তর্কসংগ্রহ অধ্যায ১-৮ (দীপিকা সহ)

.. তর্কসংগ্রহ অধ্যায ১ – ৮ ..
অথ প্রথমোঽধ্যায |

নিধায হৃদি বিশ্বেশং বিধায গুরুবন্দনম্ .
বালানাং সুখবোধায ক্রিযতে তর্কসংগ্রহ .. ১ ..

দীপিকা
বিশ্বেশ্বরং সাম্বমূর্তিং প্রণিপত্য গিরাং গুরুম্ .
টীকাং শিশুহিতাং কুর্বে তর্কসংগ্রহদীপিকাম্ ..
চিকীর্ষিতস্য গ্রনথস্য নির্বিঘ্নপরিসমাপ্ত্যর্থং
শিষ্টাচারানুমিতশ্রুতিবোধিতকর্তব্যতাক্- ইষ্টদেবতানমস্কারাত্মকং
মঙ্গলং শিষ্যশিক্ষাযৈ গ্রন্থতো নিবধ্নংশ্চিকীর্ষিতং প্রতিজানীতে .

নিধাযেতি . ননু মঙ্গলস্য সমাপ্তিসাধনত্বং নাস্তি . মঙ্গলে কৃতেঽপি
কিরণবল্যাদৌ সমাপ্ত্যদর্শনাত্, মঙ্গলাভাবেঽপি কাদম্বর্মাদৌ
সমাপ্তিদর্শনাচ্চ অন্বযব্যতিরেকাভ্যাং ব্যভিচারাদিতি চেত্ ন .
কিরণাবল্যাদৌ বিঘ্নবাহুল্যাত্সমাপ্ত্যভাবঃ . কাদম্বর্যাদৌ গ্রন্থাদ্বহিরেব

মঙ্গলং কৃত্মতো ন ব্যভিচারঃ . ননু মঙ্গলস্য (গ্রন্থাদৌ)
কর্তব্যত্বে কিং প্রমাণমিতি চেত্ ন . শিষ্টাচারানুমিতশ্রুতেরেব্
প্রমাণত্বাত্ . তথা হি মঙ্গলং
বেদ- বোধিত্কর্তব্যতাকমলৌকিকাবিগীতশিষ্টাচারবিষযত্বাদ্দর্শাদিবত্ .
ভোজনাদৌ ব্যভিচার বারণায অলৌকিকেতি . রাত্রিশ্রাদ্ধাদৌ
ব্যভিচারবারণায অবিগীতেতি . শিষ্টপদং স্পষ্টার্থম্ . ন
কুর্যান্নিষ্ফলং কর্ম ইতি জলতাডনাদেরপি নিষিদ্ধত্বাত্ . তর্ক্যন্তে
প্রতিপাদ্যন্তে ইতি তর্কাঃ দ্রব্যাদিপদার্থাস্তেষাং সংগ্রহঃ সংক্ষেপেণ
স্বরূপকথনং ক্রিযত ইত্যর্থঃ . কস্মৈ প্রযোজনাযেত্যত আহ .
সুখবোধাযেতি . সুখেনানাযাসেন যো বোধঃ পদার্থজ্ঞানং তস্মা ইত্যর্থঃ .
ননু বহুষু তর্কগ্রথেষু সত্সু কিমর্থম্পূর্বোঽযং গ্রন্থঃ ক্রিযত
ইত্যত আহ . বালানামিতি . তেষামতিবিস্তৃতত্বাদ্বালানাং বোধো ন জাযত
ইত্যর্থঃ . গ্রহণধারণপুটুর্বালঃ ন তু স্তনন্ধযঃ . কিং কৃত্বা
ক্রিযত ইত্যত আহ . নিধাযেতি . বিশ্বেশং জগন্নিযন্তারম্ . হৃদি নিধায

নিতরাং স্থাপযিত্বা সদা তদ্ধযানপরো ভূত্বেত্যর্থঃ . গুরূণাং
বিদ্যাগুরূণাং, বন্দনং নম্স্কারং, বিধায কৃত্বেত্যর্থঃ ..
দ্রব্যগুণকর্মসামান্যবিশেষসমবাযাঽভাবাঃ সপ্তপদার্থাঃ .. ২ ..

দীপিকা
পদার্থান্ বিভ্জতে . দ্রব্যেতি . পদস্যার্থঃ পদার্থঃ ইতি
ব্যুত্পত্ত্যাভিধেযত্বং পদার্থসামান্যলক্ষণম্ (লভ্যতে). ননু
বিভাগাদেব সপ্তত্বে সিদ্ধে সপ্ত (পদ)গ্রহণং ব্যর্থমিতি চেত্,
ন অধিকসংখ্যাব্যবচ্ছেদার্থকত্বাত্ . নন্বতিরিক্তঃ পদার্থঃ
প্রমিতো বা ন বা . নাঽদ্যঃ প্রমিতস্য নিষেধাযোগাত্ . ন দ্বিতীযঃ
প্রতিযোগিপ্রমিতিং বিনা নিষেধানুপপত্তেরিতি চেত্, ন . পদার্থত্বং
দ্রব্যাদিসপ্তান্যতমত্বব্যাপ্যমিতি ব্যবচ্ছেদার্থকত্বাত্
(সপ্তগ্রহণম্). ননু সপ্তান্যতমত্বং সপ্তভিন্নভিন্নত্বমিতি
বক্তব্যম্ . সপ্তভিন্নস্যাপ্রসিদ্ধযা কথং সপ্তান্যতমত্বব্যাপ্তিনিশ্চয
ইতি চেত্, ন . দ্রব্যাদিসপ্তান্যতমত্বং নাম
দ্রব্যাদিভেদসপ্তকাভাববত্ত্বম্ . অতো দোষবিরহাত্ . এবমগ্রেঽপি
দ্রষ্টব্যম্ ..
তত্র দ্রব্যাণী পৃথিব্যপ্তেজোবায্বাকাশকালদিগাত্মমনাংসি নবৈব .. ৩ ..

দীপিকা
দব্যং (দ্রব্যাণি)বিভজতে . তত্রেতি . তত্র দ্রব্যাদিমধ্যে .
দ্রব্যাণি নবৈবেত্যন্বযঃ . কানি তানি ইত্যত আহ . পৃথিবীতি . ননু তমসো

দশমদ্রব্যস্য বিদ্যমানত্বাত্কথং নবৈব দ্রব্যাণীতি . তথা হি . নীলং
তমশ্চলতীত্যবাধিতপ্রতীতিবলান্নীলরূপাধারতযা ক্রিযাধারতযা চ
তমসো দ্রব্যত্বং তাব্ত্ সিদ্ধম্ . তত্র তমসো নাকাশাদিপঞ্চকেঽন্তর্ভাবঃ
রূপবত্ত্বাত্ . অত এব ন বাযৌ, স্পর্শাভাবাত্ সদাগতিমত্ত্বাভাবাচ্চ .

নাপি তেজসি, ভাস্বরূপাভাবাত্ উষ্ণস্পর্শাভাবাচ্চ . নাপি জলে,
শীতস্পর্শাভাবাত্ নীলরূপবত্ত্বাচ্চ . নাপি পৃথিব্যাং, গন্ধাভাবাত্
স্পর্শরহিতত্বাচ্চ . তস্মাত্তমো দশমদ্রব্যমিতি চেত্, ন .
তমসস্তেজোঽভাবরূপত্বাত্ . তথা হি . তমো ন
রূপিদ্রব্যমালোকাসহকৃতচক্ষুর্গ্রাহ্যত্বাদালোকাভাববত্ .
রূপিদ্রব্যচাক্ষুষপ্রমাযামালোকস্য কারণত্বাত্ . তস্মাত্
প্রৌঢপ্রকাশকতেজস্সামান্যাভাবস্তমঃ, তত্র নীলং তমশ্চলতি ইতি
প্রত্যযো ভ্রমঃ . অতো নব দ্রব্যাণীতি সিদ্ধম্ . দ্রব্যত্বজাতিমত্ত্বং
গুণবত্ত্বং বা দ্রব্যসামান্যলক্ষণম্ . লক্ষ্যৈকদেশাবৃত্তিত্বমব্যাপ্তিঃ .

যথা গোঃ কপিলত্বম্ . অলক্ষ্যে লক্ষণস্য বর্তনমতিব্যাপ্তিঃ . যথা গোঃ
শ্রৃঙ্গিত্বম্ . লক্ষ্যমাত্রাবৃত্তিত্বমসংভবঃ . যথা
গোরেকশফবত্ত্বম্ . এতদ্দূষণত্রযরহিতধর্মো লক্ষণম্ . স
এবাসাধারণধর্ম ইত্যুচ্যতে .
লক্ষযতাবচ্ছেদকসমনিযতত্বমসাধারণত্বম্ . ব্যাবর্তকস্যৈব
লক্ষণত্বে ব্যাবৃত্তাবভিদেযত্বাদৌ চাতিব্যাপ্তিরতস্তদ্বারণায
তদ্ভিন্নত্বং ধর্মবিশেষণং দেযম্ . ব্যবহারস্যাপি লক্ষণপ্রযোজনত্বে
তন্ন দেযম্ . ব্যাবৃত্তেরপি ব্যবহারসাধনত্বাত্ . ননু গুণবত্ত্বং ন
দ্রব্যলক্ষণম্, আদ্যক্ষণাবচ্ছিন্নঘটে উত্পন্নবিনিষ্টঘটে
চাব্যাপ্তেরিতি চেত্, ন . গুণসমানাধিকরণসত্তাভিন্নজাতিমত্ত্বস্য
বিবক্ষিতত্বাত্ . নন্বেবমপি একং রূপং রসাত্পৃথক্ ইতি
ব্যবহারাদ্রূপাদাবতিব্যাপ্তিরিতি চেত্, ন . একার্থসমবাযাদেব
তাদৃশব্যবহারোপপত্তৌ গুণে গুণানঙ্গীকারাত্ .
রূপ- রস- গন্ধ- স্পর্শ- সংখ্যা- পরিমাণ- পৃথক্ত্ব- সংযোগ- বিভাগ- পর্
অত্বা- ঽপরত্ব- গুরূত্ব- দ্রবত্ব- স্নেহ- শব্দ- বুদ্ধি- সুখ- দুঃখেচ্ছা
দ্বেষ- প্রযত্ন- ধর্মাধর্ম- সংস্কারাঃ চতুর্বিংশতির্গুণাঃ .. ৪ ..

দীপিকা
গুণান্বিভজতে . রূপেতি . দ্রব্যকর্মভিন্নত্বে সতি সামান্যবান্ গুণঃ .
গুণত্বজাতিমান্বা . ননু লঘুত্বকঠিনত্বমৃদুত্বাদীনাং বিদ্যমানত্বাত্
কথং চতুর্বিংশতির্গুণা ইতি চেত্, ন . লঘুত্বস্য
গুরূত্বাভাবরূপত্বান্মৃদুত্বকঠিনত্বযোঃ অবযবসংযোগবিশেষত্বাত্ .
উত্ক্ষেপণাপক্ষেপণাকুঞ্চনপ্রসারণগমনানি পঞ্চ কর্মাণি .. ৫ ..

দীপিকা
কর্ম বিভজতে . উত্ক্ষেপণেতি . সংযোগভিন্নত্বে সতি
সংযোগাসমবাযিকারণং কর্ম কর্মত্বজাতিমদ্বা . ভ্রমণাদীনামপি গমনে
অন্তর্ভাবান্ন পঞ্চত্ববিরোধঃ ..
পরমপরং চেতি দ্বিবিধং সামান্যম্ .. ৬ ..

দীপিকা
সামান্যং বিভজতে . পরমিতি . পরমধিকদেশবৃত্তি . অপরং
ন্যূনদেশবৃত্তি . সামান্যাদিচতুষ্টযে জাতির্নাস্তি ..
নিত্যদ্রব্যবৃত্তযো বিশেষাস্ত্বনন্তা এব .. ৭ ..

দীপিকা
বিশেষং বিভজতে . নিত্যেতি . পৃথিব্যাদিচতুষ্টযপরমাণবঃ
আকাশাদিপঞ্চকং চ নিত্যদ্রব্যাণি .
সমবাযস্ত্বেক এব .. ৮ ..

দীপিকা
সমবাযস্য ভেদো নাস্তীত্যাহ . সমবাযস্ত্বিতি .
অভাবশ্চতুর্বিধঃ – প্রাগভাবঃ, প্রধ্বংসাভাবঃ,
অত্যন্তাভাবঃ, অন্যোন্যাভাবশ্চেতি .. ৯ ..

দীপিকা
অভাবং বিভজতে . প্রাগভাবেতি .
——————————————————————————–
অথ দ্বিতীযোঽধ্যায |

তত্র গন্ধবতী পৃথিবী . সা দ্বিবিধা- নিত্যাঽনিত্যা চ . নিত্যা
পরমাণুরূপা . অনিত্যা কার্যরূপা . পুনস্ত্রিবিধা শরীরেন্দ্রিয বিষযভেদাত্ .
শরীরমস্মদাদীনাম্ . ইন্দ্রিযং গন্ধগ্রাহকং ঘ্রাণম্ . তচ্চ নাসাগ্রবর্তি .
বিষযো মৃত্পাষাণাদিঃ .. ১..

দীপিকা
তত্রোদ্দেশক্রমানুসারাত্ প্রথমং পৃথিব্যা লক্ষণমাহ . তত্রেতি . নানা
পদার্থসংকীর্তনমুদ্দেশঃ . উদ্দেশক্রমে চ সরবত্রেচ্ছৈবং নিযামিকা .
ননু সুরভ্যসুরভ্যবযবাখ্ধে দ্রব্যে পরস্পরবিরোধেন
গন্ধানুত্পাদাদব্যাপ্তিঃ . ন চ তত্র গন্ধপ্রতীত্যনুপপত্তিরিতি বাচ্যম্ .
অবযবগন্ধস্যৈব তত্র প্রতীতিসংভবেন চিত্রগন্ধানঙ্গীকারাত্ কিং
চোত্পন্নবিনষ্টঘটাদাবব্যাপ্তিরিতি চেত্ ন .
গন্ধসমানাধিকরণদ্রব্যত্বাপরজাতিমত্ত্বস্য বিবক্ষিতত্বাত্ . ননু
জলাদাবপি গন্ধপ্রতীতিরিতি চেত্ ন . অন্বযব্যতিরেকাভ্যাং
পৃথিবীগন্ধস্যৈব তত্র ভানাঙ্গীকারাত্ . ননু কালস্য সর্বাধারতযা
সর্বেষাং লক্ষণানাং কালেঽতিব্যাপ্তিরিতি চেত্ ন .
সর্বাধারতাপ্রযোজকভিন্নসংবন্ধেন লক্ষণত্বস্য বিবক্ষিতত্বাত্ .
পৃথিবীং বিভজতে . সা দ্বিবিধেতি . নিত্যত্বং ধ্বংসাপ্রতিযোগিত্বম্ .
অনিত্যত্বং ধ্বংসপ্রতিযোগিত্বম্ . প্রকারান্তরেণ বিভজতে . পুনরিতি . আত্মনো

ভোগাযতনং শরীরম্ . যদবচ্ছিন্নাত্মনি ভোগো জাযতে তদ্ভোগাযতনম্ .
সুখদুঃখসাক্ষাত্কারো ভোগঃ . শব্দেতরোদ্ভূতবিশেষগুণানাশ্রযত্বে সতি
জ্ঞানকারণমনঃ সংযোগাশ্রযত্বমিন্দ্রিযত্বম্ . শরীরেন্দ্রিযভিন্নো
বিষযঃ . এবং চ গন্ধবচ্ছরীরং পার্থিবশরীরম্,
গন্ধবদিন্দ্রিযং পার্থিবেন্দ্রিযম্, গন্ধবান্ বিষযঃ পার্থিববিষয
ইতি তত্তল্লক্ষণং বোধ্যম্ . পার্থিবশরীরং দর্শযতি . শরীরমিতি .
ইন্দ্রিযং দর্শযতি . ইন্দ্রিযমিতি . গন্ধগ্রাহকমিতি প্রযোজনম্ . ঘ্রাণমিতি
সংজ্ঞা . নাসাগ্রেত্যাশ্রযোক্তিঃ . এবমুত্তরত্র জ্ঞেযম্ . পার্থিববিষযং
দর্শযতি . মৃতপাষাণাদীতি .

শীতস্পর্শবত্যঃ আপঃ . তা দ্বিবিধাঃ নিত্যা অনিত্যাশ্চ . নিত্যাঃ
পরমাণুরূপাঃ . অনিত্যাঃ কার্যরূপাঃ . পুনঃ ত্রিবিধাঃ
শরীরেন্দ্রিযবিষযভেদাত্ . শরীরং বরূণলোকে . ইন্দ্রিযং রসগ্রাহকং
রসনং জিহ্বাগ্রবর্তি . বিষযঃ সরিত্ সমুদ্রাদিঃ .. ২..

দীপিকা
অপাং লক্ষণমাহ . শীতেতি . উতপন্নবিনিষ্টজলেঽব্যাপ্তিবারণায
শীতস্পর্শসমানাধিকরণদ্রব্যত্বাপরজাতিমত্ত্বম্ . “শীতং
শিলাতলম্”ইত্যাদৌ জলসংবন্ধাদেব শীতস্পর্শভানমিতি
নাতিব্যাপ্তিঃ . অন্যত্সর্বং পূর্বরীত্যা ব্যাখ্যেযম্ ..

উষ্ণস্পর্শবত্ তেজঃ . তচ্চ দ্বিবিধং, নিত্যমনিত্যং চ . নিত্যং
পরমাণুরূপম্ . অনিত্যং কার্যরূপম্ . পুনঃ ত্রিবিধং
শরীরেন্দ্রিযবিষযভেদাত্ . শরীরং আদিত্যলোকে প্রসিদ্ধম্ . ইন্দ্রিযং
রূপগ্রাহকং চক্ষুঃ কৃষ্ণতারাগ্রবর্তি . বিষযঃ চতুর্বিধঃ,
ভৌম- দিব্য- ঔদর্য- আকরজ ভেদাত্ . ভৌমং বহ্নযাদিকম্ . অবিন্ধনং
দিব্যং বিদ্যুদাদি . ভুক্তস্য পরিণামহেতুরৌদর্যম্ . আকরজং সুবর্ণাদি .. ৩..

দীপিকা
তেজসো লক্ষণমাহ . উষ্ণস্পর্শবদিতি . `উষ্ণং জলম্’ইতি
প্রতীতেস্তেজঃ সংযোগানুবিধাযিত্বান্নাতিব্যাপ্তিঃ . বিষযং বিভজতে .
ভৌমেতি . ননু `সুবণং পার্থিবং’পীতত্বাদ্গুরূত্বাত্ হরিদ্রাবত্ ইতি
চেত্ ন . অত্যন্তানলসংযোগে সতি ঘৃতাদৌ দ্রব্ত্বনাশদর্শনেন,
জলমধ্যস্থঘৃতাদৌ তন্নাশাদর্শনেন চ অসতি প্রতিবন্ধকে
পার্থিবদ্রবত্বনাশাগ্নিসংযোগযোঃ কার্যকারণভাবাবধারণাত্সুবর্ণস্য
অত্যন্তানলসংযোগে সত্যনুচ্ছিদ্যমানদ্রবত্বাধিকরণত্বেন
পার্থিবত্বাঽনুপপত্তেঃ পীতদ্রব্যদ্রবত্বনাশপ্রতিবন্ধকতযা
দ্রবদ্রব্যান্তরসিদ্ধৌ নৈমিত্তিকদ্রবত্বাধিকরণতযা জলত্বানুপপত্তেঃ
রূপবত্তযা বায্বাদিষ্বনন্তর্ভাবাত্তেজসত্বসিদ্ধিঃ .
তস্যোষ্ণস্পর্শভাস্বররূপযোরূপষ্টম্ভক পার্থিবরূপস্পর্শাভ্যাং
প্রতিবন্ধাদনুপলব্ধিঃ . তস্মাত্ সুবর্ণং তৈজসমিতি সিদ্ধম্ .

রূপরহিতঃ স্পর্শবান্ বাযুঃ . স দ্বিবিধঃ নিত্যঃ অনিত্যশ্চ . নিত্যঃ
পরমাণুরূপঃ . অনিত্যঃ কার্যরূপঃ . পুনঃ ত্রিবিধঃ শরীরেন্দ্রিযবিষয
ভেদাত্ . শরীরং বাযুলোকে . ইন্দ্রিযং স্পর্শগ্রাহকং ত্বক্ সর্বশরীরবর্তি .
বিষযো বৃক্ষাদিকম্পনহেতুঃ . শরীরান্তঃসংচারী বাযুঃ প্রাণঃ . স চ
একোঽপি উপাধিভেদাত্ প্রাণাপানাদিসংজ্ঞাং লভতে .. ৪ ..

দীপিকা
বাযুং লক্ষযতি . রূপরহিতেতি . আকাশাদাবতিব্যাপ্তিবারণায স্পর্শবানিতি .
পৃথিব্যাদাবতিব্যাপ্তিবারণায রূপরহিতেতি . প্রাণস্য কুত্রান্তর্ভাব ইত্যত
আহ . শরীরেতি . স চেতি . এক এবঃ প্রাণঃ স্থানভেদাত্প্রাণাপানাদিশব্দৈঃ
ব্যবহ্রিযত ইত্যর্থঃ . স্পর্শানুমেযো বাযুঃ . তথা হি -যোঽযং বাযৌ
বাতি সতি অনুষ্ণাশীতস্পর্শ উপলভ্যতে স ক্কচিদাশ্রিতঃ
গুণত্বাদ্রূপবত্ . ন চাস্য আশ্রযঃ পৃথিবী
উদ্ভূতস্পর্শবত্পার্থিবস্যোদ্ভূতরূপত্ত্বনিযমাত্ . ন জল তেজসি
অনুষ্ণাশীতস্পর্শবত্ত্বাত্ . ন বিভুচতুষ্টযম্ সর্বত্রোপলব্ধিপ্রসঙ্গাত্ .

ন মনঃ পরমাণুস্পর্শস্যাতীন্দ্রিযত্বাত্ . তস্মাদ্যঃ প্রতীযমানস্পর্শাশ্রযঃ

স বাযুঃ (এব). ননু বাযুঃ প্রত্যক্ষঃ প্রত্যক্ষাশ্রযত্বাত্ ঘটবত্

ইতি চেত্ ন . উদ্ভূতরূপস্যোপাধিত্বাত্ . `যত্র দ্রব্যত্বে সতি
বহিরিন্দ্রিযজন্যপ্রত্যক্ষত্বং, তত্র উদ্ভূতরূপবত্ত্বম্ ‘ইতি
সাধ্যব্যাপকত্বম্ . পক্ষে সাধনাব্যাপকত্বম্ . ন চৈবং
তপ্তবারিস্থতেজসোঽপি অপ্রত্যক্ষত্বাপত্তিঃ ইষ্টত্বাত্ .
তস্মাদ্রূপরহিতত্বাদ্বাযুরপ্রত্যক্ষঃ . ইদানীং
কার্যরূপপৃথিব্যাদিচতুষ্টযস্যোত্পত্তিবিনাশক্রমঃ কথ্যতে . ঈশ্বরস্য
চিকীর্ষাবশাত্পরমাণুষু ক্রিযা জাযতে . ততঃ পরমাণুদ্বযসংযোগে
দ্বযণুকমুত্পদ্যতে . ত্রিভিরেব দ্বযণুকৈস্ত্রযণুকমুত্পদ্যতে . এবং
চতুরণুকাদিক্রমেণ মহতী পৃথিবীঃ, মহত্য আপঃ, মহত্তেজঃ,

মহান্বাযুরূত্পদ্যতে . এবমুত্পন্নস্য কার্যদ্রব্যস্য সংজিহীর্ষাবশাত্
ক্রিযযা পরমাণুদ্বযবিভাগে দ্বযণুকনাশঃ . ইত্যেবং পৃথিব্যাদিনাশঃ .
অসমবাযিকারণাশাত্ দ্বযণুকনাশঃ . সমবাযিকারণাশাত্ ত্র্যণুকনাশ ইতি
সংপ্রদাযঃ সর্বত্রাসমবাযিকারণনাশাত্ দ্রব্যনাশ ইতি নবীনাঃ . কিং পুনঃ

পরমাণুসদ্ভাবে প্রমাণম্ . উচ্যতে –জালসূর্যমরীচিস্থং সর্বতঃ
সূক্ষমতমং যত্ দ্রব্যং উপলভ্যতে তত্সাবযবং
চাক্ষুষদ্রব্যত্বাদ্ধটবত্ . ত্র্যণুকাবযবোঽপি সাবযবঃ
মহদারম্ভকত্বাত্কপালবত্ . যো দ্বযণুকাবযবঃ স পরমাণুঃ . স চ
নিত্যং, তস্যাপি কার্যত্বে অনবস্থাপ্রসঙ্গাত্ . সৃষ্টিপ্রলযসদ্ভাবে
`ধাতা যথাপূর্বমকল্পযত্ . ‘ইতি শ্রুতিরেব প্রমাণম্ .
`সর্বকার্যদ্রব্যধ্বংসোঽবান্তরপ্রলযঃ . সর্বভাবকার্যধ্বংসো
মহাপ্রলযঃ’ইতি বিবেকঃ .

শব্দগুণকমাকাশম্ . তচ্চৈকং নিত্যঞ্চ .. ৫..

দীপিকা
আকাশং লক্ষযতি . শব্দগুণকমিতি . নন্বাকাশমপি
পৃথিব্যাদিবন্নানা, কিং নেত্যাহ . তচ্চৈকমিতি . ভেদে
প্রমাণাভাবাদিত্যর্থঃ . একত্বাদেব সর্বত্র
শব্দোপলব্ধের্বিভুত্বমঙ্গীকর্তব্যমিত্যাহ বিভ্বিতি .
সর্বমূর্তদ্রব্যসংযোগিত্বং বিভুত্বং, মূর্তত্বং
পরিচ্ছিন্নপরিমাণবত্ত্বং ক্রিযাবত্ত্বং বা.বিভুত্বাদেব
আত্মবন্নিত্যমিত্যাহ . নিত্যং চেতি .

অতীতাদিব্যবহারহেতুঃ কালঃ . স চৈকো বিভুর্নিত্যশ্চ .. ৬..

দীপিকা
কালং লক্ষযতি . অতীতেতি . সর্বাধারঃ কালঃ সর্বকার্যনিমিত্তকারণম্ .

প্রাচ্যাদিব্যবহারহেতুর্দিক্ . সা চৈকা বিভ্বী নিত্যা চ .. ৭..

দীপিকা
দিশো লক্ষণমাহ . প্রাচীতি . দিগপি কার্যমাত্রনিমিত্তকারণম্ .

জ্ঞানাধিকরণমাত্মা . স দ্বিবিধঃ পরমাত্মা জীবাত্মা চ . তত্রেশ্বরঃ
সর্বজ্ঞঃ পরমাত্মৈক এব . জীবাত্মা প্রতিশরীরং ভিন্নো বিভুর্নিত্যশ্চ .. ৮..

দীপিকা
আত্মনো লক্ষণমাহ . জ্ঞানেতি . আত্মানং বিভজতে . স দ্বিবিধ ইতি .
পরমাত্মনো লক্ষণমাহ . তত্রেতি . নিত্যজ্ঞানাধিকরণত্বমীশ্বরত্বম্ .
নন্বীশ্বরসদ্ভাবে কিং প্রমাণম্ . ন তাবত্প্রত্যক্ষম্ . তদ্ধি বাহ্যামান্তরং
বা . নাদ্যঃ অরূপিদ্রব্যত্বাত্ . ন দ্বিতীযঃ আত্মসুখদুঃখাদিব্যতিরিক্তত্বাত্ .
নাপ্যনুমানং লিঙ্গাভাবাদিতি চেত্ ন . অঙ্কুরাদিকং সকর্তৃকং
কার্যত্বাদ্ধটবত্ ইত্যনুমানস্যৈব প্রমাণত্বাত্ .
উপাদানগোচরাপরোক্ষজ্ঞানচিকীর্ষাকৃতিমত্ত্বং কর্তৃত্বম্ . উপাদানং
সমবাযিকারণম্ . সকলপরমাণ্বাদিসূক্ষ্মদর্শিত্বাত্সর্বজ্ঞত্বম্ . যঃ
সর্বজ্ঞঃ স সর্ববিত্ ইত্যাগমোঽপি তত্র প্রমাণম্ . জীবস্য লক্ষণমাহ .
জীব ইতি . সুখাদ্যাশ্রযত্বং জীবলক্ষণম্ . ননু মনুষ্যোঽহং ব্রাহ্মণোঽহম্

ইত্যাদৌ সর্বত্রাহংপ্রত্যযে শরীরস্যৈব বিষযত্বাচ্ছরীরমেবাত্মেতি
চেত্ ন . শরীরস্যাত্মবে করপাদিনাশে শরীরনাশাদাত্মনোঽপি
নাশপ্রসংগাত্ . নাপীন্দ্রিযাণামাত্মত্বম্ , `যোঽহং ঘটমদ্রাক্ষং
সোঽহমিদানীং স্পৃশামি’ইত্যনুসন্ধানাভাবপ্রসঙ্গাত্ .
অন্যানুভূতেঽর্থে অন্যস্যানুসংধানাযোগাত্ . তস্মাদ্দেহেইন্দ্রিযব্যতিরিক্তো জীবঃ

সুখদুঃখাদিবৈচিত্র্যাত্প্রতিশরীরং ভিন্নঃ . স চ ন পরমাণুঃ .
সর্বশরীরব্যাপিসুখাদ্যনুপলব্ধিপ্রসঙ্গাত্ . ন মধ্যমপরিমাণবান্ তথা
সতি অনিত্যত্বপ্রসঙ্গেন কৃথানাকৃতাভ্যাগমপ্রসঙ্গাত্ . তস্মান্নিত্যো
বিভুর্জীবঃ ..

সুখাদ্যুপলব্ধিসাধনমিন্দ্রিযং মনঃ . তচ্চ প্রত্যাত্মনিযতত্বাদনন্তং
পরমাণুরূপং নিত্যং চ .. ৯..

দীপিকা
মনসো লক্ষণমাহ . সুখেতি . স্পর্শরহিত্বে সতি ক্রিযাবত্বং মনসো
লক্ষণম্ . তদ্বিভজতে . তচ্চেতি . একৈকস্যাত্মন একৈকং মন
ইত্যাত্মনামনেকত্বান্ মসোঽপ্যনেকত্বমিত্যর্থঃ . পরমাণুরূপমিতি .
মধ্যমপরিমাণবত্ত্বে অনিত্যত্বপ্রসঙ্গাদিত্যর্থঃ . ননু মনো বিভু
স্পর্শরহিত্বে সতি দ্রব্যত্বাদাকাশাদিবদিতি চেত্ ন . মনসো বিভুত্বে
আত্মমনঃ সংযোগস্যাঽসমবাযিকারণস্যাভাবাজ্জ্ঞানানুত্পত্তিপ্রসঙ্গঃ . ন
চ বিভুদ্বযসংযোগোঽস্ত্বিতি বাচ্যম্ . তত্সংযোগস্য নিত্যত্বেন
সুষুপ্ত্যভাবপ্রসঙ্গাত, পুরীতদ্রব্যতিরিক্তস্থলে আত্মমনঃ
সংযোগস্য সর্বদা বিদ্যমানত্বাত্ . অণুত্বে তু যদা মনঃ পুরীতত্ প্রবিংশতি

তদা সুষুপ্তিঃ যদা নিস্সরতি তদা জ্ঞানোত্পত্তিরিত্যণুত্বসিদ্ধিঃ .
——————————————————————————–
অথ তৃতীযোঽধ্যায |

চক্ষুর্মাত্রগ্রাহ্যো গুণো রূপম্.তচ্চ
শুক্লনীলপীতরক্তহরিতকপিশচিত্র ভেদাত্সপ্তবিধম্ .
পৃথিবীজলতেজোবৃত্তি . তত্র পৃথিব্যাং সপ্তবিধম্ . অভাবস্বরশুক্লং
জলে . ভাবস্বরশুক্লং তেজসি .. ১..

দীপিকা
রূপং লক্ষযতি . চক্ষুরিতি . সংখ্যাদাবতিব্যাপ্তিবারণায মাত্রপদম্ .
রূপত্বেঽতিব্যাপ্তিবারণায গুণপদম্ . নন্বব্যাপ্যবৃত্তিনীলাদিসমুদায এব
চিত্ররূপমিতি চেত্ ন . রূপস্য ব্যাপ্যবৃত্তিত্বনিযমাত্ . ননু চিত্রপটে
অবযবরূপস্যৈব প্রতীতিরিতি চেত্ ন . রূপরহিতত্বেন
পটস্যাপ্রত্যক্ষত্বপ্রসংগাত্ . ন চ রূপবত্সমবেতত্বং
প্রত্যক্ষত্বপ্রযোজকং গৌরবাত্ . তস্মাত্পটস্য
প্রত্যক্ষত্বান্যথানুপপত্ত্যা চিত্ররূপসিদ্ধিঃ . রূপস্যাশ্রযমাহ .
পৃথিবীতি . আশ্রযং বিভজ্য দর্শযতি . তত্রেতি .

রসনগ্রাহ্যো গুণো রসঃ . স চ মধুরাম্ললবণকতুকষাযতিক্তভেদাত্
ষড্বিধঃ . পৃথিবীজলবৃত্তিঃ . তত্র পৃথিব্যাং ষড্বিধঃ . জলে
মধুর এব .. ২..

দীপিকা
রসং লক্ষযতি . রসনেতি . রসত্বেঽতিব্যাপ্তিবারণায গুণপদম্ .
রসস্যাশ্রযমাহ . পৃথিবীতি . আশ্রযং বিভজ্য দর্শযতি . তত্রেতি .

ঘ্রাণাগ্রাহ্যো গুণো গন্ধঃ . স দ্বিবিধঃ সুরভিরসুরভিশ্চ .
পৃথিবীমাত্রব্রিত্তিঃ .. ৩..

দীপিকা
গন্ধং লক্ষযতি . ঘ্রাণেতি . গন্ধত্বেঽতিব্যাপ্তিবারণায গুণপদম্ .

ত্বগিন্দ্রিযমাত্রগ্রাহ্যো গুণঃ স্পর্শঃ . স চ ত্রিবিধঃ
শীতোষ্ণানুষ্ণাশীতভেদাত্ . পৃথিব্যপ্তেজোবাযুবৃত্তিঃ . তত্র শীতো জলে .
উষ্ণস্তেজসি . অনুষ্ণাশীতঃ পৃথিবীবাযব্যোঃ .. ৪..

দীপিকা
স্পর্শং লক্ষযতি . ত্বগিতি . স্পর্শত্বেঽতিব্যাপ্তিবারণায গুণপদম্ .
সংযোগাদাবতিব্যাপ্তিবারণায মাত্রপদম্ .

রূপাদিচতুষ্টযং পৃথিব্যাং পাকজমনিত্যং চ . অন্যত্র অপাকজং
নিত্যমনিত্যম্ চ . নিত্যগতং নিত্যম্ অনিত্যগতমনিত্যম্ .. ৫..

দীপিকা
পাকজমিতি . পাকস্তেজঃ সংযোগঃ . তেন পূর্বরূপং নশ্যতি
রূপান্তরমুত্পদ্যত ইত্যর্থঃ . তত্র পরমাণুষ্বেব পাকো ন দ্বযণুকাদৌ .
আমনিক্ষিপ্তে ঘটে পরমাণুষু রূপান্তরোত্পত্তৌ শ্যামঘটনাশে
পুনদ্বর্যণুকাদিক্রমেণ রক্তঘটোত্পত্তিঃ . তত্র পরমাণবঃ
সমবাযিকারণম্ . তেজঃ সংযোগোঽসমবাযিকারণম্ . অদৃষ্টাদিকং
নিমিত্তকারণম্ . দ্বযণুকাদিরূপে কারণরূপসমবাযিকারণমিতি পীলুপাকবাদিনো
বৈশেষিকাঃ . পূর্বঘটস্য নাশং বিনৈব্ অবযবিনি অবযবেষু চ
পরমাণুপর্যন্তেষু যুগপদ্রূপান্তরোত্পত্তিরিতি পিঠরপাকবাদিনো নৈযাযিকাঃ .
অত এব পার্থিবপরমাণুরূপাদিকমনিত্যমনিত্যর্থঃ . অন্যত্র
জলাদাবিত্যর্থঃ . নিত্যগতমিতি . পরমাণুগতমিত্যর্থঃ . অনিত্যগতমিতি .
দ্বযণুকাদিগতভিত্যর্থঃ . রূপাদিচতুষ্টযম্ উদ্ভূতং প্রত্যক্ষম্ .
অনুদ্ভূতমপ্রত্যক্ষম্ . উদ্ভূতত্বং প্রত্যক্ষত্বপ্রযোজকো ধর্মঃ .
তদভাবোঽনুদ্ভূতত্বম্ .

একত্বাদিব্যবহারহেতুঃ সংখ্যা . সা নবদ্রব্যবৃত্তিঃ
একত্বাদিপরার্ধপর্যন্তা . একত্বং নিত্যমনিত্যং চ . নিত্যগতং নিত্যম্ .
অনিত্যগতমনিত্যম্ . দ্বিত্বাদিকং তু সর্বত্রাঽনিত্যমেব .. ৬..

দীপিকা
সংখ্যা লক্ষযতি . একেতি .

মানব্যবহারাসাধারণকারণং পরিমাণম্ . নবদ্রব্যবৃত্তিঃ . তচ্চুর্বিধম্ .
অণু মহত্ দীর্ঘং হৃঅস্বং চেতি .. ৭..

দীপিকা
পরিমাণং লক্ষযতি . মানেতি . পরিমাণং বিভজতে . তচ্চেতি . ভাবপ্রধানো
নির্দেশঃ . অণুত্বং, মহত্ত্বং, দীর্ঘত্বং, হ্রস্বত্বং চেত্যর্থঃ .

পৃথগ্ব্যবহারাসাধারণকারণং পৃথক্বত্বম্ . সর্বদ্রব্যবৃত্তিঃ ..৮..

দীপিকা
সংযুক্তব্যবহারহেতুঃ সংযোগঃ . সর্বদ্রব্যবৃত্তিঃ .. ৯..

দীপিকা
সংযোগং লক্ষযতি . সংযুক্তেতি . ইমৌ সংযুক্তৌ ইতি
ব্যবহারহেতুরিত্যর্থঃ . সংখ্যাদিলক্ষণে সর্বত্র
দিক্কালাদাবতিব্যপ্তিবারণায অসাধারাণেতি বিশেষণীযম্ . সংযোগো দ্বিবিধঃ
কর্মজঃ সংযোগজশ্চেতি . আদ্যো হস্তক্রিযযা হস্তপুস্তকসংযোগঃ . দ্বিতীযো
হস্তপুস্তকসংযোগাত্কাযপুস্তকসংযোগঃ . অব্যাপ্যবৃত্তিঃ সংযোগঃ .
স্বাত্যন্তাভাবসমানাধিকরণত্বমব্যাপ্যবৃত্তিত্বম্ .

সংযোগনাশকো গুণো বিভাগঃ . সর্বদ্রব্যবৃত্তিঃ .. ১০..

দীপিকা
বিভাগং লক্ষযতি . সংযোগেতি . কালাদাবতিব্যাপ্তিবারণায গুণ ইতি .
রূপাদাবতিব্যাপ্তিবারণায সংযোগনাশক ইতি . বিভাগোঽপি দ্বিবিধঃ কর্মজো
বিভাগজশ্চেতি . আদ্যো হস্তপুস্তকবিভাগঃ . দ্বিতীযো
হস্তপুস্তকবিভাগাত্কাযপুস্তকবিভাগঃ .

পরাপরব্যবহারাসাধারণকারণে পরত্বাপরত্বে . পৃথিব্যাদিচতুষ্টয
মনোবৃত্তিনী . তে দ্বিবিধে দিক্কৃতে কালকৃতে চ . দূরস্থে দিক্কৃতং
পরত্বম্ . সমীপস্থে দিক্কৃতমপরত্বম্ . জ্যেষ্ঠে কালকৃতং পরত্বম্ .
কনিষ্ঠে কালকৃতমপরত্বম্ .. ১১..

দীপিকা
পরত্বাপরত্বযোর্লক্ষণমাহ . পরাপরেতি . পরব্যবহারাসাধারণকারণং
পরত্বম্ . অপরব্যবহারাসাধারণকারণমপরত্বম্ ইত্যর্থঃ . তে বিভজতে .
তে দ্বিবিধে ইতি . দিক্কৃতযোরূদাহরণমাহ . দূরস্থ ইতি . কালকৃতে
উদাহরতি . জ্যেষ্ঠ ইতি .

আদ্যপতনাসমবাযিকারণং গুরূত্বম্ . পৃথিবীজলবৃত্তি .. ১২..

দীপিকা
গুরূত্বং লক্ষযতি . আদ্যেতি . দ্বিতীযাদিপতনস্য
বেগাসমবাযিকারণত্বদ্বেগেঽতিব্যাপ্তিবারণায আদ্যেতি .

আদ্যস্যন্দনাসমবাযিকারণং দ্রবত্বম্ . পৃথিব্যপ্তেজোবৃত্তি . তদ্দ্বিবিধং
সাংসিদ্ধিকং নৈমিত্তিকং চ.সাংসিদ্ধিকং জলে . নৈমিত্তিকং
পৃথিবীতেজসোঃ . পৃথিব্যাং ঘৃতাদাবগ্নি সংযোগজং দ্রবত্বম্ . তেজসি
সুবর্ণাদৌ .. ১৩ ..

দীপিকা
দ্রবত্বং লক্ষযতি . আদ্যেতি . স্যন্দনং প্রস্রবণম্ . তেজঃসংযোগজং
নৈমিত্তিকম্ . তদ্ভিন্নং সাংসিদ্ধিকম্ . পৃথিব্যাং নৈমিত্তিকমুদাহরতি .
ঘৃতাদাবিতি . তেজসি তদাহ . সুবর্ণাদাবিতি .

চূর্ণাদিপিণ্ডীভাবহেতুর্গুণঃ স্নেহঃ . জলমাত্রবৃত্তিঃ .. ১৪..

দীপিকা
স্নেহং লক্ষযতি . চূর্ণেতি . কালাদাবতিব্যাপ্তিবারণায গুণপদম্ .
রূপাদাবতিব্যাপ্তিবারণায পিণ্ডীভাবেতি .

শ্রোত্রগ্রাহ্যো গুণঃ শব্দঃ, আকাশমাত্রবৃত্তিঃ . স দ্বিবিধঃ,
ধ্বন্যাত্মকঃ বর্ণাত্মকশ্চ . তত্র ধ্বন্যাত্মকঃ ভের্যাদৌ . বর্ণাত্মকঃ
সংস্কৃতভাষাদিরূপঃ .. ১৫..

শব্দং লক্ষযতি . শ্রোত্রেতি . শব্দত্বেঽতিব্যাপ্তিবারণায গুণপদম্ .
রূপাদাবতিব্যাপ্তিবারণায শ্রোত্রেতি . শব্দাস্ত্রিবিধঃ সংযোগজঃ,
বিভাগজঃ, শব্দজশ্চেতি . তত্র আদ্যো ভেরীদণ্ডসংযোগজন্যঃ .
দ্বিতীযো বংশে পাটযমানে দলদ্বযবিভাগজন্যশ্চটাশব্দঃ .
ভের্যাদিদেশমারভ্য শ্রোত্রদেশপর্যন্তং দ্বিতীযাদিশব্দাঃ শব্দজাঃ .

সর্বেব্যবহারহেতুর্গুণো বুদ্ধির্জ্ঞানম্ . সা দ্বিবিধা স্মৃতিরনুভবশ্চ .. ১৬..

দীপিকা
বুদ্ধের্লক্ষণমাহ . সর্বব্যবহারেতি . কালাদাবতিব্যাপ্তিবারণায গুণ ইতি .
রূপাদাবতিব্যাপ্তিবারণায সর্বব্যবহার ইতি . জানামীত্যনুব্যবসাযগম্যং
জ্ঞানমেব লক্ষণমিতি ভাবঃ . বুদ্ধিং বিভজতে . সেতি .

সংস্কারমাত্রজন্যং জ্ঞানং স্মৃতিঃ .. ১৭..

দীপিকা
স্মৃতের্লক্ষণমাঃ . সংস্কারেতি . ভাবনাখ্যঃ সংস্কারঃ .
সংস্কারধ্বংসেঽতিব্যাপ্তিবারণায জ্ঞানমিতি .
ঘটাদিপ্রত্যক্ষেঽতিব্যাপ্তিবারণায সংস্কারজন্যমিতি . প্রত্যভিজ্ঞাযাম্
অতিব্যাপ্তিবারণায মাত্রপদম্ .

তদ্ভিন্নং জ্ঞানমনুভবঃ . স দ্বিবিধঃ, যথার্থোঽযথার্থশ্চ .. ১৮..

দীপিকা
অনুভবং লক্ষযতি . তদ্ভিন্নমিতি . স্মৃতিভিন্নং জ্ঞানমনুভব
ইত্যর্থঃ . অনুভবং বিভজতে . স দ্বিবিধ ইতি .

তদ্বতি তত্প্রকারকোঽনুভবো যথার্থঃ . যথা রজতে ইদং রজতমিতি
জ্ঞানম্ . সৈব প্রমেত্যুচ্যতে .. ১৯..

দীপিকা
যথার্থানুভবস্য লক্ষণমাহ . তদ্বতীতি . ননু ঘটে ঘটত্বম্ ইতি
প্রমাযামব্যাপ্তিঃ, ঘটত্বে ঘটাভাবাদিতি চেত্ ন, যত্র
যত্সংবন্ধোঽস্তি তত্র তত্সংবন্ধানুভবঃ ইত্যর্থাদ্ধটত্বে
ঘটসংবন্ধোঽস্তীতি নাব্যাপ্তিঃ . সৈবেতি . যথার্থানুভব এব শাস্ত্রে
প্রমেত্যুচ্যত ইত্যর্থঃ .

তদভাববতি তত্প্রকারকোঽনুভবোঽযথার্থঃ . যথা
শুক্তাবিদংরজতমিতি জ্ঞানম্ . সৈব অপ্রমা ইত্যুচ্যতে .. ২০..

দীপিকা
অযথার্থানুভবং লক্ষযতি . তদভাববতীতি . নন্বিদং সংযোগীতি
প্রমাযামতিব্যাপ্তিরিতি চেত্ ন . যদবচ্ছেদেন
যত্সংবন্ধাভাবস্তদবচ্ছেদেন তত্সংবন্ধজ্ঞানস্য বিবিক্ষিতত্বাত্ .
সংযোগাভাবাবচ্ছেদেন সংযোগজ্ঞানস্য ভ্রমত্বাত্সংযোগাবচ্ছেদেন
সংযোগসংবন্ধস্য সত্ত্বান্নাতিব্যাপ্তিঃ .

যথার্থানুভবঃ চতুর্বিধঃ প্রত্যক্ষানুমিত্যুপমিতিশাব্দভেদাত্ .. ২১..

দীপিকা
যথার্থানুভবং বিভজতে . যথার্থেতি .

তত্ করণমপি চতুর্বিধং প্রত্যক্ষানুমানোপশব্দ ভেদাত্ .. ২২..

দীপিকা
প্রসঙ্গাত্প্রমাকরণং বিভজতে . তত্করণমপীতি . প্রমাকরণমিত্যর্থঃ .
প্রমাকরণং প্রমাণমিতি প্রমাণসামান্যলক্ষণম্ .

অসাধরণং কারণং করণম্ .. ২৩..

দীপিকা
করণলক্ষণমাহ . অসাধারণেতি . দিক্কালাদাবতিব্যাপ্তিবারণায অসাধারণেতি .

কার্যনিযতপূর্ববৃত্তি কারণম্ .. ২৪..

দীপিকা
কারণলক্ষণমাহ . কার্যেতি . পূর্ববৃত্তি কারণমিত্যুক্তে
রাসভাদাবতিব্যাপ্তিঃ স্যাদতো নিযতেতি . তাবন্মাত্রে কৃতে
কার্যেঽতিব্যাপ্তিরতঃ পূর্ববৃত্তীতি . ননু তন্তুরূপমপি পটং প্রতি কারণং
স্যাদতি চেত্ ন, অনন্যথাসিদ্ধত্বে সতীতি বিশেষণাত্ .
অনন্যথাসিদ্ধত্বমন্যথাসিদ্ধিরহিতত্বম্ . অন্যথাসিদ্ধিঃ ত্রিবিধা –
যেন সহৈব যস্য যং প্রতি পূর্ববৃত্তিত্বমবগম্যতে তং প্রতি তেন
তদন্যথাসিদ্ধম্ . যথা তন্তুনাং তন্তুরূপং তন্তুত্বং চ পটং প্রতি . তং
প্রতি তদন্যথাসিদ্ধম্ . যথা শব্দং প্রতি পূর্ববৃতিত্ত্বে জ্ঞাত এব
পটং প্রত্যাকাশস্য . অন্যত্র কৢপ্তনিযতপূর্ববতির্ন এব কার্যসংভবে
তত্সহভূতমন্যথাসিদ্ধম্ . যথা পাকজস্থলে গন্ধং প্রতি
রূপপ্রাগভাবস্য . এবঞ্চ অনন্যথাসিদ্ধনিযতপূর্ববৃত্তিত্বং
কারণত্বম্ .

কার্যং প্রাগভাবপ্রতিযোগি .. ২৫..

দীপিকা
কার্যলক্ষণমাহ . কার্যমিতি .

কারণং ত্রিবিধম্ -সমবায্যসমবাযিনিমিত্তভেদাত্ .. ২৬..

যত্ সমবেতং কার্যং উত্পদ্যতে তত্ সমবাযিকারণম্ .
যথা তংতবঃ পটস্য, পটশ্চ স্বগতরূপাদেঃ .. ২৭..

দীপিকা
কারণং বিভজতে . কারণমিতি . সমবাযিকারণস্য লক্ষণমাহ ——
যত্সমবেতমিতি . যস্মিন্ সমবেতমিত্যর্থঃ . অসমবাযিকারণং লক্ষযতি
—-কার্যণেতি . কার্যেণেত্যেতদুদাহরতি —–তন্তুসংযোগ ইতি .

কার্যেণ কারণেন বা সহ একস্মিন্নর্থে সমবেতত্বে সতি যত্কারণং
তদসমবাযিকারণম্ .
যথা তংতুসংযোগঃ পটস্য, তন্তুরূপং পটরূপস্য .. ২৮..

দীপিকা
কার্যেণ পটেন সহ একস্মিংস্তন্তৌ সমবেতত্বাত্তন্তুসংযোগঃ
পটস্যাসমবাযিকারণমিযর্থঃ . কারণেনেত্যেতদুদাহরতি —-
তন্তুরূপমিতি . কারণেন পটেন সহ একস্মিংস্তন্তৌ সমবেতত্বাত্ .

তদুভযভিন্নং কারণং নিমিত্তকারণম্ .
যথা তুরীবেমাদিকং পটস্য .. ২৯..

দীপিকা
তন্তুরূপং পটরূপস্যাসমবাযিকারণমিত্যর্থঃ . নিমিত্তকারণং লক্ষযতি
—তদুভযেতি . সমবায্যসমবাযিভিন্নকারণং নিমিত্তকারণমিত্যর্থঃ .

তদেতত্ত্রিবিধকারণমধ্যে যদসাধারণং কারণং তদেব করণম্ .. ৩০..

দীপিকা
করণলক্ষণমুপসংহরতি —-তদেতদিতি .
——————————————————————————–
অথ চতুর্থোঽধ্যায |

তত্র প্রত্যক্ষজ্ঞানকরণং প্রত্যক্ষম্ .. ৩১..

দীপিকা
প্রত্যক্ষলক্ষণমাহ ——তত্রেতি . প্রমাণচতুষ্টযমধ্যে
ইত্যর্থঃ .

ইন্দ্রিযার্থসন্নিকর্ষজন্যং জ্ঞানং প্রত্যক্ষম্ . তদ্দ্বিবিধং নির্বিকল্পকং
সবিকল্পকং চেতি . তত্র নিষ্প্রকারকং জ্ঞানং নির্বিকল্পকং যথেদং
কিঞ্চিত্ . সপ্রকারকং জ্ঞানং সবিকল্পকং যথা ডিত্থোঽযং,
ব্রাহ্মণোঽযং, শ্যামোঽযং, পাচকোঽযমিতি .. ৩২..

দীপিকা
প্রত্যক্ষজ্ঞানস্য লক্ষণমাহ ——–ইন্দ্রিযেতি . ইন্দ্র্যিযং
চক্ষুরাদিকম্, অর্থো ঘটাদিঃ, তযোঃ সংনিকর্ষঃ সংযোগাদিঃ,
তজ্জন্যং জ্ঞানমিত্যর্থঃ . তদ্বিভজতে তদ্দ্বিবিধমিতি . নির্বিকল্পস্য
লক্ষণমাহ ——-নিষ্প্রকারকমিতি .
বিশেষণবিশেষ্যসংবন্ধানবগাহি জ্ঞানমিত্যর্থঃ . ননু নির্বিকল্পকে
কিং প্রমাণমিতি চেত্ ন, গৌরিতি বিশিষ্টজ্ঞানং
বিশেষণজ্ঞানজন্যং, বিশিষ্টজ্ঞানত্বাত্, দণ্ডীতি জ্ঞানবত্
ইত্যনুমানস্য প্রমাণত্বাত্ . বিশেষণজ্ঞানস্যাপি
সবিকল্পকত্বেঽনবস্থাপ্রসঙ্গান্নির্বিকল্পকসিদ্ধিঃ . সবিকল্পকং
লক্ষযতি . সপ্রকারকমিতি . নামজাত্যাদিবিশেষ্যবিশেষণসংবন্ধাবগাহি
জ্ঞানমিত্যর্থঃ . সবিকল্পকমুদাহরতি . যথেতি .

প্রত্যক্ষজ্ঞানহেতুরিন্দ্রিযার্থসংনিকর্ষঃ ষড্বিধঃ . সন্যোগঃ,
সংযুক্তসমবাযঃ, সংযুক্তসমবেতসমবাযঃ, সমবাযঃ,
সমবেতসমবাযঃ, বিশেষণবিশেষ্যভাবশ্চেতি .. ৩৩..

দীপিকা
ইন্দ্রিযার্থসংনিকর্ষং বিভজতে . প্রত্যক্ষেতি .

চক্ষুষা ঘটপ্রত্যক্ষজননে সংযোগঃ সন্নিকর্ষঃ .. ৩৪..

দীপিকা
সংযোগসংনিকর্ষমুদাহরতি . চক্ষুষেতি . দ্রব্যপ্রত্যক্ষে সর্বত্র
সংযোগঃ সংনিকর্ষঃ . আত্মা মনসা সংযুজ্যতে, মন ইন্দ্রিযেণ,
ইন্দ্রিযমর্থেন, ততঃ প্রত্যক্ষজ্ঞানমুত্পদ্যতে ইত্যর্থঃ .

ঘটরূপপ্রত্যক্ষজননে সংযুক্ত সমবাযঃ সংনিকর্ষঃ .
চক্ষুঃ সংযুক্তে ঘটে রূপস্য সমবাযাত্ .. ৩৫..

দীপিকা
সংযুক্তসমবাযমুদাহরতি . ঘটরূপেতি . তত্র যুক্তিমাহ . চক্ষুঃসংযুক্ত
ইতি .

রূপত্বসামান্যপ্রত্যক্ষে সংযুক্তসমবেতসমবাযঃ সন্নিকর্ষঃ .
চক্ষুঃ সংযুক্তে ঘটে রূপং সমবেতং, তত্র রূপত্বস্য সমবাযাত্ .. ৩৬..

দীপিকা
সংযুক্তসমবেতসমবাযমুদাহরতি . রূপত্বেতি .

শ্রোত্রেণ শব্দসাক্ষাত্কারে সমবাযঃ সন্নিকর্ষঃ কর্ণবিবরবর্ত্যাকাশস্য
শ্রোত্রত্বাত্ শব্দস্যাকাশগুণত্বাত্ গুণগুণিনোশ্চ সমবাযাত্ .. ৩৭..

দীপিকা
সমবাযমুদাহরতি . শ্রোত্রেণেতি . তদুপপাদযতি . কর্ণেতি . ননু
দূরস্থশব্দস্য কথং শ্রোত্রসম্বন্ধ ইতি চেত্ ন,
বীচীতরঙ্গন্যাযেন বা শব্দান্তরোত্পত্তিক্রমেণ শ্রোত্রদেশে জাতস্য
শ্রোত্রেণ সংবন্ধাত্প্রত্যক্ষসংভবঃ .

শব্দত্বসাক্ষাত্কারে সমবেতসমবাযঃ সন্নিকর্ষঃ শ্রোত্রসমবেতে শব্দে
শবত্বস্য সমবাযাত্ .. ৩৮..

দীপিকা
সমবেতসমবাযমুদাহরতি . শব্দত্বেতি .

অভাবপ্রত্যক্ষে বিশেষণবিশেষ্যভাবঃ সন্নিকর্ষঃ,
ঘটাভাববদ্ভূতলমিত্যত্র চক্ষুঃ সংযুক্তে ভূতলে ঘটাভাবস্য
বিশেষণত্বাত্ .. ৩৯..

দীপিকা
বিশেষণবিশেষ্যাভাবমুদাহরতি . অভাবেতি . তদুপপাদযতি .
ঘটাভাববদিতি . ভূতলে ঘটো নাস্তীত্যত্র অভাবস্য বিশেষ্যত্বং
দ্রষ্টব্যম্ . এতেন অনুপলব্ধেঃ প্রমাণান্তরত্বং নিরস্তম্ . যদ্যত্র
ঘটোঽভবিষ্যত্তর্হি ভূতলমিবাদ্রক্ষ্যত, দর্শনাভাবান্নাস্তীতি
তর্কিতপ্রতিযোগিসত্ববিরোধ্যনুপলব্ধিসহকৃতেন্দ্রিযেণৈব
অভাবজ্ঞানোত্পত্তৌ অনুপলব্ধেঃ প্রমাণান্তরত্বাসংভবাত্ .
অধিকরণজ্ঞানার্থমপেক্ষণীযেন্দ্রিযস্যৈব করণত্বোপপত্তাবনুপলব্ধেঃ
করণত্বযোগাত্ . বিশেষণবিশেষ্যভাবো বিশেষণবিশেষ্যস্বরূপমেব,
নাতিরিক্তঃ সংবন্ধঃ . প্রত্যক্ষজ্ঞানমুপসংহরস্তস্য করণমাহ .
এবমিতি .

এবং সন্নিকর্ষষট্কজন্যং জ্ঞানং প্রত্যক্ষং, তত্করণমিন্দ্রিযম্,
তস্মাদিন্দ্রিযং প্রত্যক্ষপ্রমাণমিতি সিদ্ধম্ .. ৪০..

দীপিকা
অসাধারণকারণত্বাদিন্দ্রিযং প্রত্যক্ষজ্ঞানকরণমিত্যর্থঃ .
প্রত্যক্ষপ্রমাণমুপসংহরতি .
——————————————————————————–
অথ পংচমোঽধ্যায |

অনুমিতিকরণমনুমানম্ .. ১..

দীপিকা
অনুমানং লক্ষযতি ——অনুমিতিকরণমিতি .

পরামর্শজন্যং জ্ঞানমনুমিতিঃ .. ২..

দীপিকা
অনুমিতিং লক্ষযতি —পরামর্শেতি . ননু
সংশযোত্তরপ্রত্যক্ষেঽতিব্যাপ্তিঃ স্থাণুপুরূষসংশযানন্তরং
পুরূষত্বব্যাপ্যকরাদিমানযম্ ইতি পরামর্শে সতি পুরূষ এব ইতি
প্রত্যক্ষজননাত্ . ন চ তত্রানুমিতিরেবেতি বাচ্যম্ . পুরূষং সাক্ষাত্করোমি
ইত্যনুব্যবসাযবিরোধাদিতি চেত্ ন,
পক্ষতাসহকৃতপরামর্শজন্যত্বস্য বিবিক্ষিত্বাত্ .
সিষাধযিষাবিরহবিশিষ্টসিদ্ধযভাবঃ পক্ষতা .
সাধ্যসিদ্ধিরনুমিতিপ্রতিবন্ধিকা . সিদ্ধিসত্ত্বেঽপি অনুমিযুযাম্
ইতীচ্ছাযামনুমিতিদর্শনাত্ . সিষাধযিষোত্তেজিকা .
তত্শ্চোত্তেজকাভাববিশিষ্টমণ্যভাবস্য
দাহকারণত্ববত্সিষাধযিষাবিরহবিশিষ্টসিদ্ধযভাবস্যাপ্যনুমিতিকারণত্বম্ .

ব্যাপ্তিবিশিষ্টপক্ষধর্মতাজ্ঞানং পরামর্শঃ . যথা
বহ্নিব্যাপ্যধূমবানযং পর্বত ইতি জ্ঞানং পরামর্শঃ . তজ্জন্যং পর্বতো
বহ্নিমানিতি জ্ঞানমনুমিতিঃ .. ৩..

দীপিকা
পরামর্শং লক্ষযতি —–ব্যাপ্তীতি . ব্যাপ্তিবিষযকং
যত্পক্ষধর্মতাজ্ঞানং স পরামর্শ ইত্যর্থঃ . পরামর্শমভিনীয
দর্শযতি ——যথেতি . অনুমিতিমভিনীয দর্শযতি ——-
তজ্জন্যমিতি . পরামর্শজন্যমিত্যর্থঃ . ব্যাপ্তিলক্ষণমাহ —-
যত্রেতি .

যত্র যত্র ধূমস্তত্র তত্রাগ্নিরিতি সাহচর্যনিযমো ব্যাপ্তিঃ .. ৪..

দীপিকা
যত্র ধূমস্তত্রাগ্নিঃ ইতি ব্যাপ্তেরভিনযঃ . সাহচর্যনিযমঃ ইতি লক্ষণম্ .
সাহচর্যং সামানাধিকরণ্যং, তস্য নিযমঃ .
হেতুসমানাধিকরণাত্যন্তাভাবাপ্রতিযোগিসাধ্যসামানাধিকরণ্যং
ব্যাপাপ্তিরিত্যর্থঃ .

ব্যাপ্যস্য পর্বতাদিবৃত্তিত্বং পক্ষধর্মতা .. ৫..

দীপিকা
পক্ষধর্মতারূপমাহ ——–ব্যাপ্যস্যেতি .

অনুমানং দ্বিবিধং –স্বার্থং পরার্থং চ .. ৬..

তত্র স্বার্থং স্বানুমিতিহেতুঃ, তথাহি, স্বযমেব ভূযোদর্শনেন
যত্র যত্র ধূমস্তত্র তত্রাগ্নিরিতি মহানসাদৌ ব্যাপ্তিং গৃহীত্বা
পর্বতসমীপং গতঃ, তদ্গতে চাগ্নৌ সন্দিহানঃ পর্বতে ধূমং পশ্যন্
ব্যাপ্তিং স্মরতি যত্র যত্র ধূমস্তত্র তত্রাগ্নিঃ ইতি . তদন্তরং
বহ্নিব্যাপ্যধূমবানযং পর্বত ইতি জ্ঞানমুত্পদ্যতে, অযমেব
লিঙ্গপরামর্শ ইত্যুচ্যতে . তস্মাত্ পর্বতো বহ্নিমানিতি জ্ঞানমনুমিতিঃ
উত্পদ্যতে . তদেতত্ স্বার্থানুমানম্ .. ৭..

দীপিকা
অনুমানং বিভজতে ——–অনুমানমিতি . স্বার্থানুমানং দর্শযতি
স্বযমেবেতি . ননু পার্থিবত্বলোহলেখ্যত্বাদৌ শতশঃ
সহচারদর্শনেঽপি বজ্রমণৌ ব্যভিচারোপলব্ধের্ভূযোদর্শনেন কথং
ব্যাপ্তিগ্রহ ইতি চেত্ ন . ব্যভিচারজ্ঞানবিরহসহকৃতসহচারজ্ঞানস্য
ব্যাপ্তিগ্রাহকত্বাত্ . ব্যভিচারজ্ঞানং নিশ্চযঃ শঙ্কা চ . তদ্বিরহঃ
ক্বচিত্তর্কাত্, ক্বচিত্স্বতঃ সিদ্ধ এব . ধূমাগ্ন্যোর্ব্যাপ্তিগ্রহে
কার্যকারণভাবভঙ্গপ্রসঙ্গলক্ষণস্তর্কো ব্যভিচারশঙ্কানিবর্তকঃ .
ননু সকলবহ্নিধূমযোরসন্নিকর্ষাত্কথং ব্যাপ্তিগ্রহ ইতি চেত্ ন .
বহ্নিত্বধূমত্বরূপসামান্যপ্রত্যাসত্ত্যাসকলবহ্নিধূমজ্ঞানসংভবাত্ .
তস্মাদিতি . লিঙ্গপরামর্শাদিত্যর্থঃ .

যত্তু স্বযং ধূমাদগ্নিমনুমায পরংপ্রতিবোধযিতুং পঞ্চাবযব বাক্যং
প্রযুজ্যতে তত্ পরার্থানুমানম্ . যথা পর্বতো বহ্নিমান্, ধূমত্বাত্ ,
যো যো ধূমবান্ স বহ্নিমান্ যথা মহানসঃ, তথা চাযং,
তস্মাত্তথেতি . অনেন প্রতিপাদিতাত্ লিঙ্গাত্ পরোঽপ্যগ্নিং প্রতিপদ্যতে .

দীপিকা
পরার্থানুমানমাহ ———-যত্ত্বিতি . যচ্ছব্দস্য `
তত্পরার্থানুমানম্ ‘ইতি তচ্ছব্দেনান্বযঃ .
পঞ্চাবযববাক্যমুদাহরতি —–যথেতি .

প্রতিজ্ঞা -হেতু -উদাহরণ -উপনয -নিগমনানি
পঞ্চাবযবাঃ . পর্বতো বহ্নিমানিতি প্রতিজ্ঞা . ধূমবত্বাত্ ইতি হেতুঃ . যো যো
ধূমবান্ স বহ্নিমান্ যথা মহানস ইত্যুদাহরণম্ . তথা চ অযমিতি
উপনযঃ . তস্মাত্তথেতি নিগমনম্ .. ৯..

দীপিকা
অবযবস্বরূপমাহ ———প্রতিজ্ঞেতি .. উদাহৃত্বাক্যে
প্রতিজ্ঞাদিবিভাগমাহ ——-পর্বতো বহ্নিমানিতি .. সাধ্যবত্তযা
পক্ষবচনং প্রতিজ্ঞা . পঞ্চম্যন্তং লিঙ্গপ্রতিপাদকং হেতুঃ .
ব্যাপ্তিপ্রতিপাদকং উদাহরণম্ . ব্যাপ্তিবিশিষ্টলিঙ্গপ্রতিপাদকং
বচনমুপনযঃ . হেতুসাধ্যবত্তযা পক্ষপ্রতিপাদকং বচনং নিগমনম্ .
অবাধিতত্বাদিকং নিগমনপ্রযোজনম্ .

স্বার্থানুমিতিপরার্থানুমিত্যোঃ লিঙ্গপরামর্শ এব করণম্ . তস্মাত্
লিঙ্গপরামর্শোঽনুমানম্ .. ১০..

দীপিকা
অনুমিতিকরণমাহ —স্বার্থেতি . ননু
ব্যাপ্তিস্মৃতিপক্ষধর্মতাজ্ঞানাভ্যামেব অনুমিতিসংভবে
বিশিষ্টপরামর্শঃ কিমর্থমঙ্গীকর্তব্য ইতি চেত্ ন, `
বহ্নিব্যাপ্যবানযম্ ‘ইতি শাব্দপরামর্শস্থলে
পরামর্শস্যাবশ্যকতযা লাঘবেন সর্বত্র পরামর্শস্যৈব কারণত্বাত্ .
লিঙ্গং ন করণম্, অতীতাদৌ ব্যভিচারাত্ . `ব্যাপারবত্বকারণং
করণম্ ‘ইতি মতে পরামর্শদ্বারা ব্যাপ্তিজ্ঞানং করণম্ . তজ্জন্যত্বে
সতি তজ্জন্যজনকো ব্যাপারঃ . অনুমানমুপসংহরতি -তস্মাদিতি .

লিঙ্গং ত্রিবিধম্ . অন্বযব্যতিরেকি, কেবলান্বযি, কেবলব্যতিরেকি
চেতি . অন্বযেন ব্যতিরেকেণ চ ব্যাপ্তিমদন্বযব্যতিরেকি . যথা বহ্নৌ
সাধ্যে ধূমবত্ত্বম্ . যত্র ধূমস্তত্রাগ্নিযর্থা মহানস ইত্যন্বযব্যাপ্তিঃ .
যত্র বহ্নির্নাস্তি তত্র ধূমোঽপি নাস্তি যথা মহাহৃদ ইতি
ব্যাপ্তিরেকব্যাপ্তিঃ .. ১১..

দীপিকা
লিঙ্গং বিভজতে —লিঙ্গমিতি .. অন্বযব্যতিরেকিণং লক্ষযতি —
অন্বযেনেতি .. হেতুসাধ্যযোর্ব্যাপ্তিরন্বযব্যাপ্তিঃ,
তদভাবযোর্ব্যাপ্তির্ব্যতিরেকব্যাপ্তিঃ .

অন্বযমাত্রব্যাপ্তিকং কেবলান্বযি . যথা ঘটঃ অভিধেযঃ প্রমেযত্বাত্
পটবত্ . অত্র প্রমেযত্বাভিধেযত্বযোঃ ব্যতিরেকব্যাপ্তির্নাস্তি, সর্বস্যাপি
প্রমেযত্বাত্ অভিধেযত্বাচ্চ .. ১২..

দীপিকা
কেবলান্বযিনো লক্ষণমাহ ——–অন্বযেতি .. কেবলান্বযিসাধ্যকং
লিঙ্গং কেবলান্বযি . (বৃত্তিমত্)অত্যন্তাভাবাপ্রতিযোগিত্বং
কেবলান্বযিত্বম্ . ঈশ্বরপ্রমাবিষযত্বং সর্বপদাভিধেযত্বং চ
সর্বত্রাস্তীতি ব্যতিরেকাভাবঃ .

ব্যতিরেকমাত্রব্যাপ্তিকং কেবলব্যতিরেকি, যথা পৃথিবীতরেভ্যো
ভিদ্যতে গন্ধবত্ত্বাত্ . যদিতরেভ্যো ন ভিদ্যতে ন তদ্গন্ধবত্ যথা
জলম্ . ন চেযং তথা . তস্মান্ন তথেতি . অত্র যদ্গন্ধবত্ তদিতরভিন্নম্
ইত্যন্বযদৃষ্টান্তো নাস্তি, পৃথিবীমাত্রস্য পক্ষত্বাত্ .. ১৩..

দীপিকা
কেবলব্যতিরেকিণো লক্ষণমাহ —ব্যতিরেকেতি .
তদুদাহরতি-যথেতি . নন্বিতরভেদঃ প্রসিদ্ধো বা ন বা . আদ্যে যত্র
প্রসিদ্ধস্তত্র হেতুসত্ত্বে অন্বযিত্বম্, অসত্ত্বে অসাধারণ্যম্ . দ্বিতীযে
সাধ্যজ্ঞানাভাবাত্কথং তদ্বিশিষ্টানুমিতিঃ . বিশেষণজ্ঞানাভাবে
বিশিষ্টজ্ঞানানুদযাত্প্রতিযোগিজ্ঞানাভাবাদ্বযতিরেকব্যাপ্তিজ্ঞানমপি ন
স্যাদিতি চেত্ ন . জলাদিত্রযোদশান্যোন্যাভাবানাং ত্রযোদশসু প্রত্যেকং
প্রসিদ্ধানাং মেলনং পৃথিব্যাং সাধ্যতে . তত্র
ত্রযোধত্বাবচ্ছিন্নভেদাত্মক –
সাধ্যস্যৈকাধিকরণবৃত্তিত্বাভাবান্নান্বযিত্বাসাধারণ্যে .
প্রত্যেকাধিকরণপ্রসিদ্ধযা সাধ্যবিশিষ্টানুমিতিঃ ব্যতিরেকব্যাপ্তিনিরূপণং
চেতি .

সন্দিগ্ধসাধ্যবান্ পক্ষঃ . যতা ধূমবত্ত্বে হেতৌ পর্বতঃ .. ১৪..

দীপিকা
পক্ষলক্ষণমাহ ——-সন্দিগ্ধেতি .. ননু
শ্রবণান্তরভাবিমননস্থলে অব্যাপ্তিঃ . তত্র বেদবাক্যৈরাত্মনো
নিশ্চিত্বেন সন্দেহাভাবাত্ . কিঞ্চ প্রত্যক্ষেঽপি বহ্নৌ
যত্রেচ্ছযানুমিতিস্তত্রাব্যাপ্তিরিতি চেত্ ন, উক্তপক্ষতাশ্রযত্বস্য
পক্ষলক্ষণত্বাত্ .

নিশ্চিতসাধ্যবান্ সপক্ষঃ, যথা তত্রৈব মহানসম্ .. ১৫..

দীপিকা
সপক্ষলক্ষণমাহ ——–নিশ্চিতেতি ..

নিশ্চিতসাধ্যাঽভাববান্ বিপক্ষঃ . যথা তত্রৈব মহাহ্রদঃ .. ১৬..

দীপিকা
বিপক্ষলক্ষণমাহ —–নিশ্চিতেতি ..

সব্যভিচারবিরুদ্ধসত্প্রতিপক্ষাসিদ্ধবাধিতাঃ পঞ্চ হেত্বাভাসাঃ .. ১৭..

দীপিকা
এবং সদ্ধেতূন্নিরূপ্য অসদ্ধেতূন্নিরূপযিতুং বিভজতে ——
সব্যভিচারেতি .. অনুমিতিপ্রতিবন্ধকযথার্থজ্ঞানবিষযত্বং
হেত্বাভাসত্বম্ .

সব্যভিচারঃ অনৈকান্তিকঃ . স ত্রিবিধঃ
সাধারণাসাধারণানুপসংহারিভেদাত্ .. ১৮..

দীপিকা
সব্যভিচারং বিভজতে —-স ত্রিবিধ ইতি ..

তত্র সাধ্যাভাববদ্বৃত্তিঃ সাধারণঃ অনৈকান্তিকঃ, যথা পর্বতো
বহ্নিমান্ প্রমেযত্বাত্ ইতি . প্রমেযত্বস্য বহ্নযভাববতি হ্রদে বিদ্যমানত্বাত্ .. ১৯..

দীপিকা
সাধারণং লক্ষযতি —–তত্রেতি .. উদাহরতি —-যথেতি ..

সর্বসপক্ষবিপক্ষব্যাবৃত্তঃ পক্ষমাত্রবৃত্তিঃ অসাধারণঃ . যথা
শব্দো নিত্যঃ শব্দত্বাত্ ইতি . শব্দত্বং হি সর্বেভ্যো
নিত্যেভ্যোঽনিত্যেভ্যশ্চ ব্যাবৃত্তং শব্দমাত্রবৃত্তিঃ .. ২০..

দীপিকা
অসাধারণং লক্ষযতি —–সর্বেতি ..

অন্বযব্যতিরেকদৃষ্টান্তরহিতোঽনুপসংহারী . যথা সর্বমনিত্যং
প্রমেযত্বাদিতি . অত্র সর্বস্যাপি পক্ষত্বাত্ দৃষ্টান্তো নাস্তি .. ২১..

দীপিকা
অনুপসংহারিণো লক্ষণমাহ ——–অন্বযেতি ..

সাধ্যাভাবব্যাপ্তো হেতুর্বিরূদ্ধঃ . যথা শব্দো নিত্যঃ কৃতকত্বাদিতি .
কৃতকত্বং হি নিত্যত্বাভাবেনাঽনিত্যত্বেন ব্যাপ্তম্ .. ২২..

দীপিকা
বিরূদ্ধং লক্ষযতি —–সাধ্যেতি ..

যস্য সাধ্যাভাবসাধকং হেত্বন্তরং বিদ্যতে স সত্প্রতিপক্ষঃ . যথা
শব্দো নিত্যঃ শ্রাবণত্বাত্ শব্দত্ববত্ . শব্দোঽনিত্যঃ কার্যত্বাত্ ঘটবত্ .. ২৩..

দীপিকা
সত্প্রতিপক্ষং লক্ষযতি —-যস্যেতি ..

অসিদ্ধস্ত্রিবিধঃ —-আশ্রযাসিদ্ধঃ, স্বরূপাসিদ্ধো
ব্যাপ্যত্বাসিদ্ধশ্চেতি .. ২৪..

দীপিকা
অসিদ্ধং বিভজতে —অসিদ্ধ ইতি ..

আশ্রযাসিদ্ধো যথা গগনারবিন্দং সুরভি অরবিন্দত্বাত্ সরোজারবিন্দত্ . অত্র
গগনারবিন্দমাশ্রযঃ স চ নাস্ত্যেব .. ২৫..

দীপিকা
আশ্রযাসিদ্ধমুদাহরতি —গগনেতি ..

স্বরূপাসিদ্ধো যথা শব্দো গুণশ্চাক্ষুষত্বাত্ . অত্র চাক্ষুষত্বং শব্দং
নাস্তি শব্দস্য শ্রাবণত্বাত্ .. ২৬..

দীপিকা
স্বরূপাসিদ্ধমুদাহরতি —যথেতি ..

সোপাধিকো হেতুঃ ব্যাপ্যত্বাসিদ্ধঃ . সাধ্যব্যাপকত্বে সতি সাধনাব্যাপকত্বং
উপাধিঃ . সাধ্যসমানাধিকরণাত্যন্তাভাবাপ্রতিযোগিত্বং সাধ্যব্যাপকত্বম্ .
সাধনবন্নিষ্ঠাত্যন্তাভাবপ্রতিযোগিত্বং সাধনাব্যাপকত্বম্ . পর্বতো
ধূমবান্বহ্নিমত্বাদিত্যত্র আর্দ্রেন্ধনসংযোগ উপাধিঃ . তথাহি . যত্র
ধূমস্তত্রার্দ্রেন্ধনসংযোগ ইতি সাধ্যব্যাপকতা . যত্র
বহ্নিস্তত্রার্দ্রেন্ধনসংযোগো নাস্তি অযোগোলকে আর্দ্রেন্ধনসংযোগাভাবাদিতি
সাধনাব্যাপকতা . এবং সাধ্যব্যাপকত্বে সতি
সাধনাব্যাপকত্বাদার্দ্রেন্ধনসংযোগ উপাধিঃ . সোপাধিকত্বাত্ বহ্নিমত্ত্বং
ব্যাপ্যত্বাসিদ্ধম্ .. ২৭..

দীপিকা
ব্যাপ্যত্বাসিদ্ধস্য লক্ষণমাহ —সোপাধিক ইতি .. উপাধের্লক্ষণমাহ
—সাধ্যেতি .. উপাদিশ্চতুর্বিধঃ কেবলসাধ্যব্যাপকঃ,
পক্ষধর্মাবচ্ছিন্নসাধ্যব্যাপকঃ,
সাধনাবচ্ছিন্নসাধ্যব্যাপকঃ,
উদাসীনধর্মাবচ্ছিন্নসাধ্যব্যাপকশ্চেতি . আদ্যঃ আর্দ্রেন্ধনসংযোগঃ .
দ্বিতীযো যথা বাযুঃ প্রত্যক্ষঃ প্রত্যক্ষস্পর্শাশ্রযত্বাত্ ইত্যত্র
বহির্দ্রব্যত্বাবচ্ছিন্নপ্রত্যক্ষত্বব্যাপকমুদ্ভূতরূপবত্ত্বম্ . তৃতীযো
যথা —প্রাগভাবো বিনাশী জন্যত্বাদিত্যত্র
জন্যত্বাবচ্ছিন্নানিত্যত্বব্যাপকং ভাবত্বম্ . চতুর্থো যথা —
প্রাগভাবো বিনাশী প্রমেযত্বাত্ ইত্যত্র জন্যত্বাবচ্ছিন্নানিত্যত্বব্যাপকং
ভাবত্বম্ .

যস্য সাধ্যাভাবঃ প্রমাণান্তরেণ নিশ্চিতঃ স বাধিতঃ . যথা
বহ্নিরনুষ্ণো দ্রব্যত্বাত্ জলবত্ . অত্রানুষ্ণত্বং সাধ্যং তদভাব উষ্ণত্বং
স্পর্শনপ্রত্যক্ষেণ গুহ্যাত ইতি বাধিতত্বম্ .. ২৮..

দীপিকা
বাধিতস্য লক্ষণমাহ —-যস্যেতি .. অত্র বাধস্য
গ্রাহ্যাভাবনিশ্চযত্বেন, সত্প্রতিপক্ষস্য বিরোধিজ্ঞানসামগ্রীত্বেন
সাক্ষাদনুমিতিপ্রতিবন্ধকত্বম্ . ইতরেষাং তু পরামর্শপ্রতিবন্ধকত্বম্ .
তত্রাপি সাধারণস্যাব্যভিচারাভাবরূপতযা, বিরূদ্ধস্য
সমানাধিকরণ্যাভাবতযা ব্যাপ্যত্বাসিদ্ধস্য বিশিষ্টব্যাপ্ত্যভাবতযা,
অসাধারণনুপসংহারিণোঃ ব্যাপ্তিসংশযাধাযকত্বেন
ব্যাপ্তিজ্ঞানপ্রতিবন্ধকত্বম্, আশ্রযাসিদ্ধিস্বরূপাসিদ্ধযোঃ
পক্ষধর্মতাজ্ঞানপ্রতিবন্ধকত্বম্ . উপাধিস্তু ব্যভিচারজ্ঞানদ্বারা
ব্যাপ্তিজ্ঞানপ্রতিবন্ধকঃ . সিদ্ধসাধনং তু পক্ষতাবিঘটকতযা
আশ্রযাসিদ্ধাবন্তর্ভবতীতি প্রাঞ্চঃ . নিগ্রহস্থানান্তরমিতি নবীনাঃ ..
——————————————————————————–
অথ ষষ্ঠোঽধ্যায |

উপমিতিকরণমুপমানম্ . সংজ্ঞাসংজ্ঞিসম্বন্ধজ্ঞানমুপমিতিঃ . তত্করণং
সাদৃশ্যজ্ঞানম্ . অতিদেশবাক্যার্থস্মরণমবান্তর ব্যাপারঃ . তথা হি
কশ্চিদ্গবযশব্দার্থমজানন্ কুতিশ্চিত্ আরণ্যকপুরুষাদ্গোসদৃশো
গবয ইতি শ্রুত্বা বনং গতো বাক্যার্থং স্মরন্ গোসদৃশং পিণ্দং
পশ্যতি . তদন্তরমসৌ গবযশব্দবাচ্য ইত্যুপমিতিরূত্পদ্যতে .. ১..

দীপিকা
উপমানং লক্ষযতি —-উপমিতিকরণমিতি ..
——————————————————————————–
অথ সপ্তমোঽধ্যায |

আপ্তবাক্যং শব্দঃ . আপ্তস্তু, যথার্থবক্তা . বাক্যং পদসমূহঃ . যথা
গামানযেতি . শক্তং পদম্ . অস্মাত্পদাত্ অযমর্থো বোদ্ধব্য ইতীশ্বরসংকেতঃ
শক্তিঃ .. ১..

দীপিকা
শব্দং লক্ষযতি —আপ্তেতি .. আপ্তং লক্ষযতি —আপ্তস্ত্বিতি ..
বাক্যলক্ষণমাহ —-বাক্যমিতি .. পদলক্ষণমাহ —শক্তমিতি ..
অর্থস্মৃত্যনুকূলপদপদার্থসংবন্ধঃ শক্তিঃ . সা চ পদার্থান্তরমিতি
মীমাংসকাঃ . তন্নিরাসার্থমাহ —অস্মাদিতি .. ডিত্থাদীনামিব
ঘটাদীনামপি সংকেত এব শক্তিঃ ন তু পদার্থান্তরমিত্যর্থঃ . ননু
গবাদিপদানাং জাতাবেব শক্তিঃ, বিশেষণতযা জাতেঃ
প্রথমমুপস্থিত্বাত্ . ব্যক্তিলাভাস্তু আক্ষেপাদিতি কেচিত্ . তত্ ন,
গামান্যেত্যাদৌ বৃদ্ধব্যবহারেণ সর্বত্রানযনাদের্ব্যক্তাবেব
সংভবেন, জাতিবিশিষ্টব্যক্তাবেব শক্তিকল্পনাত্ . শক্তিগ্রহশ্চ
বৃদ্ধব্যবহারেণ . ব্যুত্পিত্সুর্বালো `গামানয’
ইত্যুত্তমবৃদ্ধবাক্যশ্রবণান্তরং মধ্যমবৃদ্ধস্য
প্রবৃত্তিমুপলভ্য গবানযনং চ দৃষ্ট্বা
মধ্যমবৃদ্ধপ্রবৃত্তিজনকজ্ঞানস্যান্বযব্যতিরেকাভ্যাং বাক্তজন্যত্বং
নিশ্চিত্য `অশ্বমানয গাং বধান’ইতি বাক্যান্তরে আবাপোদ্বাপাভ্যাং
গোপদস্য গোত্ববিশিষ্টে শক্তিঃ, অশ্বপদস্য অশ্বত্ববিশিষ্টে
শক্তিরিতি ব্যুত্পদ্যতে . ননু সর্বত্র কার্যপরত্বাদ্বযবহারস্য
কার্যপরবাক্য এব ব্যুত্পর্ত্তিন সিদ্ধপর ইতি চেত্ ন . `কাশ্যাং
ত্রিভুবন্তিলকো ভূপতিরাস্তে ‘ইত্যাদৌ সিদ্ধেঽপি ব্যবহারাত্, `
বিকসিতপদ্মে মধুকরস্তিষ্ঠতি ‘ইত্যাদৌ
প্রসিদ্ধপদসমভিব্যবহারাত্সিদ্ধেঽপি মধুকরাদিব্যুত্পত্তিদর্শনাচ্চ .
লক্ষণাপি শব্দবৃত্তিঃ . শক্যসংবন্দো লক্ষণা . গঙ্গাযাং ঘোষ
ইত্যত্র গঙ্গাপদবাচ্যপ্রবাহসংবন্ধাদেব তীরোপস্থিতৌ তীরেঽপি
শক্তির্ন কল্প্যতে . সৈধবাদৌ লবণাশ্বযোঃ
পরস্পরসংবন্ধাভাবান্নানাশক্তিকল্পনম্ . লক্ষণা ত্রিবিধা —-
জহল্লক্ষণা, অজহল্লক্ষণা, জহদজল্লক্ষণা চেতি . যত্র
বাচ্যার্থস্যান্বযাভাবঃ তত্র জহল্লক্ষণা . যথা মঞ্চাঃ ক্রোশন্তীতি .
যত্র বাচ্যার্থস্যাপ্যন্বযঃ, তত্র অজহদিতি . যথা ছত্রিণো
গচ্চন্তীতি . যত্র বাচ্যৈকদেশত্যাগেন একদেশান্বযঃ, তত্র
জহদজহদিতি . যথা তত্ত্বমসীতি . গৌণ্যপি লক্ষণৈব
লক্ষ্যমাণগুণসংবন্ধস্বরূপা যথা অগ্নির্মাণবক ইতি . ব্যঞ্চনাপি
শক্তিলক্ষণান্তর্ভূতা, শব্দশক্তিমূলা অর্থশক্তিমূলা চ .
অনুমানাদিনা অন্যথাসিদ্ধা . তাত্পর্যানুপপত্তির্লক্ষণাবীজম্ .
তত্প্রীতীতীচ্ছযোচ্চরিতত্বং তাত্পর্যম্ . তাত্পর্যজ্ঞানঞ্চ
বাক্যার্থজ্ঞানে হেতুঃ নানার্থানুরোধাত্ . প্রকরণাদিকং তাত্পর্যগ্রাহকম্ .
দ্বারমিত্যাদৌ পিধেহীতি শব্দাধ্যাহারঃ . ননু
অর্থজ্ঞানার্থত্বাচ্ছব্দস্যার্থমবিজ্ঞায
শব্দাধ্যাহারাসংভবাদর্থাধ্যাহার এব যুক্ত ইতি চেত্ ন .
পদবিশেষজন্যপদার্থোপস্তিথেঃ শাব্দজ্ঞানে হেতুত্বাত্ . অন্যথা `
ঘটঃ কর্মত্বমানযং কৃতিঃ ‘ইত্যত্রাপি শাব্দজ্ঞানপ্রসঙ্গাত্ .
পঙ্কজাদিপদেষু যোগরূঢিঃ . অবযবশক্তির্যোগঃ . সমুদাযশক্তী রূঢিঃ .
নিযতপদ্মত্বাদিজ্ঞানার্থং সমুদাযশক্তিঃ . অন্যথা কুমুদেঽপি
প্রযোগপ্রসঙ্গাত্ . `ইতরান্বিতে শক্তিঃ ‘ইতি প্রাভাকরাঃ . অন্বযস্য
বাক্যার্থতযা ভানসম্ভবাদন্বযাংশেঽপি শক্তির্ন কল্পনীযা ইতি
গৌতমীযাঃ .

আকাংক্ষা যোগ্যতা সংনিধিশ্চ বাক্যার্থজ্ঞানহেতুঃ পদস্য
পদান্তরব্যতিরেকপ্রযুক্তান্বযাননুভাবকত্বম্ আকাংক্ষা . অর্থাবাধো
যোগ্যতা . পদানামবিলম্বেনোচ্চারণং সংনিধিঃ .. ২..

দীপিকা
আকাংক্ষেতি .. আকাঙ্ক্ষাদিজ্ঞানমিত্যর্থঃ . অন্যথা
আকাংক্ষাদিভ্রমাচ্ছাব্দভ্রমো ন স্যাত্ . আকাঙ্ক্ষাং লক্ষযতি —
পদস্যেতি .. যোগ্যতালক্ষণমাহ —-অর্থেতি .. সংনিধিলক্ষণমাহ
—-পদানামিতি . অবিলম্বেন পদার্থোপস্থিতিঃ সংনিধিঃ . উচ্চারণং তু
তদুপযোগিতযোক্তম্ .

আকাংক্ষাদিরহিতং বাক্যপ্রমাণম্ . যথা গৌরশ্বঃ পুরূষো হস্তীতি ন
প্রমাণমাকাংক্ষাবিরহাত্ . অগ্নিনা সিঞ্চেদিতি ন প্রমাণং যোগ্যতাবিরহাত্ .
প্রহরে প্রহরেঽসহোচ্চারিতানি গামানযেত্যাদিপদানি ন প্রমাণং
সাংনিধ্যাভাবাত্ .. ৩..

দীপিকা
গৌরশ্ব ইতি .. ঘটকর্মত্বমিত্যপ্যনাকাংক্ষোদাহরণং দ্রষ্টব্যম্ .

বাক্যং দ্বিবিধম্ . বৈদিকং লৌকিকং চ . বৈদিকমীশ্বরোক্তত্বাত্সর্বমেব
প্রমাণম্ . লৌকিকং ত্বাপ্তোক্তং প্রমাণম্ . অন্যদপ্রমাণম্ .. ৪..

দীপিকা
বাক্যং বিভজতে —বাক্যমিতি .. বৈদিকস্য বিশেষমাহ —
বৈদিকমীশ্বরোক্তত্বাদিতি .. ননু বেদস্যানাদিত্বাত্কথমীশ্বরোক্তত্বমিতি চেত্
ন . `বেদঃ পৌরূষেযঃ বাক্যসমূহত্বাত্ ভারতাদিবত্ ‘ইত্যনুমানেন
পৌরূষেযত্বসিদ্ধেঃ . ন চ স্মর্যমাণকর্তৃকত্বমুপাধিঃ,
গৌতমাদিভিঃ শিষ্যপরম্পরযা বেদেঽপি সকর্তৃকত্বস্মরণেন
সাধনব্যাপকত্বাত্ . `তস্মাত্তেপানাত্ত্রযো বেদা অজাযন্ত ‘ইতি
শ্রুতেশ্চ . ননু বর্ণা নিত্যাঃ, স এবাযং গকার ইতি প্রত্যভিজ্ঞাবলাত্ .
তথা চ কথং বেদস্যানিত্যত্বমিতি চেত্ ন, `উত্পন্নো গকারো
বিনিষ্টো গকার’ইত্যাদিপ্রতীত্যা বর্ণানামনিত্যত্বাত্, `সোঽযং
গকার’ইতি প্রত্যভিজ্ঞাযাঃ `সেএযং দীপজ্বালা ‘
ইতিবত্সাজাত্যাবলম্বনত্বাত্, বর্ণানাং
নিত্যত্বেঽপ্যানুপূর্বাবিশিষ্টবাক্যস্যানিত্যত্বাচ্চ . তস্মাদীশ্বরোক্তা বেদাঃ .
মন্বাদিস্মৃতীনামাচারাণাং চ বেদমূলকতযা প্রমাণ্যম্ .
স্মৃতিমূলবাক্যানামিদানীমনধ্যযনাত্তন্মূলভূতা কাচিচ্ছারবোত্সন্নেতি
কল্প্যতে . ননু পঠ্যমানবেদবাক্যোত্সাদনস্য কল্পযিতুমশক্যতযা
বিপ্রকীর্ণবাদস্যাযুক্তত্বান্নিত্যানুমেযো বেদো মূলমিতি চেত্ ন, তথা সতি
কদাপি বর্ণানামানুপূর্বীজ্ঞানাসংভবেন বোধকত্বাস/ন্ভবাত্ .

বাক্যার্থজ্ঞানং শাব্দজ্ঞানম্ . তত্করণং শব্দঃ .. ৫..

দীপিকা
ননু এতানি পদানি স্মারিতার্থসংসর্গবন্তি আকাংক্ষাদিমত্পদকদম্বকত্বাত্
মদ্বাক্যবত্ ইত্যনুমানাদেব সংসর্গজ্ঞাসংভবাচ্ছব্দো ন
প্রমাণান্তরমিতি চেন্ন . অনুমিত্যপেক্ষযা বিলক্ষণস্য শাব্দজ্ঞানস্য
`শাব্দাত্প্রত্যেমি ‘ইত্বনুব্যবসাযংসাক্ষিকস্য সর্বসংমতত্বাত্ .
নন্বর্থাপত্তিরপি প্রমাণান্তরমস্তি `পীনো দেবদত্তো দিবা ন ভুঙ্ক্তে
‘ইতি দৃষ্টে শ্রুতে বা পীনত্বান্যথানুপপত্ত্যা
রাত্রিভোজনমর্থাপত্ত্যা কল্প্যত ইতি চেন্ন . `দেবদত্তো রাত্রৌ
ভুঙ্ক্তে দিবাঽভুঞ্জানত্বে সতি পীনত্বাত্ ‘ইত্যনুমানেনৈব
রাত্রিভোজনস্য সিদ্ধত্বাত্ . শতে পঞ্চাশদিতি সম্ভবোঽপ্যনুমানমেব .
`ইহ বটে যক্ষস্তিষ্ঠতি ‘ইত্যৈতিহ্যমপি
অজ্ঞাতম্লবক্তৃকশব্দ এব . চেষ্টাপি শব্দানুমানদ্বারা ব্যবহারহেতুরিতি
ন প্রমাণান্তরম্ . তস্মাত্প্রত্যক্ষানুমানোপমানশব্দাশ্চত্বার্যেব প্রমাণানি ..

——————————————————————————–
অথ অষ্টমোঽধ্যায | NaiyAyikA theory on epistemolog

জ্ঞানানাং তদ্বতি তত্প্রকারকত্বং স্বতোগ্রাহ্যং পরতো বেতি বিচার্যতে .
তত্র বিপ্রতিপত্তিঃ ——জ্ঞানপ্রামাণ্যং
তদপ্রামাণ্যাগ্রাহকযাবজ্জ্ঞানগ্রাহকসামগ্রীগ্রাহ্যং ন বা ইতি . অত্র
বিধিকোটিঃ স্বতস্ত্বম্ . নিষেধকোটিঃ পরতস্ত্বম্ . অনুমানাদিগ্রাহ্যত্বেন
সিদ্ধসাধনবারণায যাবদিতি . ‘ইদং জ্ঞানমপ্রমা `ইতি জ্ঞানেন
প্রামাণ্যাগ্রহাদ্বাধবারণায —–অপ্রামাণ্যাগ্রাহকেতি..
ইদং জ্ঞানমপ্রমা ইত্যনুব্যবসাযনিষ্ঠপ্রামাণ্যগ্রাহকস্যাপি
অপ্রামাণ্যাগ্রাহকত্বাভাবাত্স্বতস্ত্বং ন স্যাদতস্তদিতি .
তস্মিন্গ্রাহ্যপ্রামাণ্যাশ্রযেঽপ্রামাণ্যাগ্রাহিকেত্যর্থঃ . উদাহৃতস্থলে
ব্যবসাযাপ্রামাণ্যগ্রাহকস্যাপ্যনুব্যবসাযে তদ্গ্রাহকত্বাত্স্বতস্ত্বসিদ্ধিঃ .
ননু স্বত এব প্রামাণ্যং গৃহ্যতে, `ঘটমহং জানামি ‘
ইত্যনুব্যবসাযেন ঘটঘটত্বযোরিব তত্সংবন্ধস্যাপি বিষযীকরণাত্
ব্যবসাযরূপ প্রত্যাসত্তেস্তুল্যত্বাত্ . পুরোবর্তিনি প্রকারসংবন্ধস্যৈব
প্রমাত্বপদার্থত্বাদিতি চেত্ ন . স্বতঃপ্রামাণ্যগ্রহে `জলজ্ঞানং প্রমা
ন বা ‘ইত্যনভ্যাসদশাযাং প্রমাত্বসংশযো ন স্যাত্ . অনুব্যবসাযেন
প্রামাণস্য নিশ্চিতত্বাত্ . তস্মাত্স্বতোগ্রাহ্যত্বাভাবাত্পরতো গ্রাহ্যত্বমেব .
তথাহি . প্রথমং জলজ্ঞানান্তরং প্রবৃত্তৌ সত্যাং জললাভে সতি
পূর্বোত্পন্নং জলজ্ঞানং প্রমা সফলপ্রবৃত্তিজনকত্বাত্ যন্নৈবং
তন্নৈবং যথা অপ্রমা ইতি ব্যতিরেকিণা প্রমাত্বং নিশ্চীযতে .
দ্বিতীযাদিজ্ঞানেষু পূর্বজ্ঞানদৃষ্টান্তেন
তত্সজাতীযত্বলিঙ্গেনান্বযব্যতিরেকিণাপি গৃহ্যতে . প্রমাযা
গুণজন্যত্বমুত্পত্তৌ পরতস্ত্বম্ . প্রমাসাধারণকারণং গুণঃ,
অপ্রমাসাধারণকারণং দোষঃ . তত্র প্রত্যক্ষে
বিশেষণবদ্বিশেষ্যসংনিকর্ষো গুণঃ . অনুমিতৌ ব্যাপকবতি
ব্যাপ্যজ্ঞানম্ . উপমিতৌ যথার্থসাদৃশ্যজ্ঞানম্ . শাব্দজ্ঞানে
যথার্থযোগ্যতাজ্ঞানম্ . ইত্যাদ্যূহনীযম্ . পুরোবর্তিনি
প্রকারাভাবস্যানুব্যবসাযেনানুপস্থিতত্বাদপ্রমাত্বং পরত এব গৃহ্যতে .
পিত্তাদিদোষজন্যত্বমুত্পত্তৌ পরতস্ত্বম্ . ননু সর্বেষাং জ্ঞানানাং
যথার্থত্বাদযথার্থজ্ঞানমেব নাস্তীতি . ন চ `শুক্তাবিদং রজতম্
‘ইতি জ্ঞানাত্প্রবৃত্তিদর্শনাদন্যথাখ্যাতিসিদ্ধিরিতি বাচ্যম্ .
রজতস্মৃতিপুরোবর্তিজ্ঞানাভ্যামেব প্রবৃত্তিসংভবাত্ .
স্বতন্ত্রোপস্থিতেষ্টভেদাগ্রহস্যৈব সর্বত্র প্রবর্তকত্বেন `নেদং
রজতম্ ‘ইত্যাদৌ অতিপ্রসঙ্গাভাবাদিতি চেত্ ন . সত্যরজস্থলে
পুরোবর্তিবিশেষ্যকরজতত্বপ্রকারকজ্ঞানস্য লাঘবেন
প্রবৃত্তিজনকতযা শুক্তাবপি রজতার্থি প্রবৃত্তিজনকত্বেন
বিশিষ্টজ্ঞানস্যৈব কল্পনাত্ .