উজ্জযিনি কাব্য – ৬-১০ সর্গঃ

ষষ্ঠঃ সর্গঃ
পুনরপি মালবে

জ্বলন্তি মার্গোভযপার্শ্বভাজঃ
পলাশপুষ্পাগ্নিকণাঃ প্রকামম্ .
যদ্দর্শনাত্ সোঽভিললাষ পান্থঃ
প্রাপ্তুং নিজগ্রামমপূর্বরম্যম্ .. ১..
পরন্তু তত্রাস্তি নিজং কিমেত –
চ্চিন্তান্তরা তং বিমনীকরোতি .
ততঃ স গূঢাত্মকহৃত্ক্ষতানাং
রক্তার্দ্রবিন্দূন্ পরিমার্ষ্টি মন্দম্ .. ২..
তুষারবক্ত্রাংশুকশারদর্তু –
সন্ধ্যানিভা কেযমুদেতি তত্র .
ন কিঞ্চিদুক্ত্বাপি যদীযনেত্রং
সর্বং বদত্যেব সদা সমার্দ্রম্ .. ৩..
শনৈঃ শনৈরেব তদীযরূপং
তিরোভবত্যক্ষিপথাত্ কবেঃ কিম্ .
অব্যক্তহেতোঃ স চ তত্কুমার্যা
নামাকরোন্মালবিকেতি হৃদ্যম্ .. ৪..
অস্ত্যগ্নিমিত্রো বিদিশাধিপো যঃ
সোল্লাসমাস্তে নিজবল্লভাভিঃ .
যোঽভূত্ পরং চিত্রপটস্থকন্যা –
লাবণ্যমাধ্বীস্বদনেঽতিসক্তঃ .. ৫..
তত্প্রাপ্তিসিদ্ধৌ কলিতাক্ষতন্ত্রৈ –
র্বিদূষকোপাযশতৈশ্চ রাজ্ঞা .
জযার্থমাত্তৈশ্চ লঘূপজাপৈ –
রাসূত্রিতৈর্নাট্যগুরূত্থযুদ্ধৈঃ .. ৬..
অন্তঃপুরস্থপ্রমদামদৈশ্চ
যুক্তং বিভক্তাঙ্গকমন্তরঙ্গে .
প্রযুজ্যতে নাটকমত্র সঙ্ক –
ল্পাকল্পিতা মালবিকৈব ভাতি .. ৭.. যুগ্মকম্
পাদাংবুজং মালবকন্যকাযাঃ
সখী ন বা তে হৃদযাভিবাঞ্ছা .
অলক্তরক্তং মণিনূপুরাল –
ঙ্কৃতং চ রম্যং চ তনোতি পান্থ .. ৮..
অপুষ্পিতস্য প্রমদাবনস্থা –
শোকস্য তাং দোহদকে নিযুঙ্ক্তে .
দেবী দযাধাম চ ধারিণী কিং
পান্থাথবা তে হৃদযাভিবাঞ্ছা .. ৯..
সকুড্মলঃ পঞ্চদিনান্তরেঽভূ –
দশোকবৃক্ষোঽপি নিতান্তশোভঃ .
ভূর্জত্বচীত্থং লিখতস্তবাত্র
হর্ষাশ্রুধারা পতিতা মুহুঃ কিম্ .. ১০..
দেবীপদার্হাং সুকুমারলোলা –
মেতাং সুকন্যাং পরিচারবৃত্তৌ .
নিযুঞ্জতে যে স্ম পুনস্ত এব
লজ্জাবনম্রা ননু সংবভূবুঃ .. ১১..
মনোহরোঽযং কিল বিগ্রহঃ কিং
সিতেন নীপেন বিধীযতে স্ম .
সংকল্পচিত্রাদথবা সজীব –
স্বরূপমাধায সমুত্থিতোঽভূত্ .. ১২..
যথা বিলোলেষু দলেষু মন্দ –
সমীরণস্পর্শবিধৌ তথাস্যাঃ .
করাঙ্গুলীস্পন্দমৃদুপ্রকম্পো
ব্যাপ্নোতি পক্ষ্মাবৃতনীলনেত্রে .. ১৩..
নৃত্যত্পদে তে মণিনূপুরাভ্যা –
মভঙ্গুরং তালতরঙ্গিতে স্তঃ .
কদা নু পশ্যাম্যহমস্বতন্ত্রে –
ত্যুক্তং তযা কিং কবিমেব গীতম্ .. ১৪..
বিতীর্য ভূযশ্ছলিতাখ্যলাস্য –
মাধুর্যকং মালবিকে তিরোঽভূঃ .
তিষ্ঠস্যহো কিং বিদিশাধিপস্যো –
জ্জযিন্যধীশস্য পুরোঽথবা ত্বম্ .. ১৫..
হরিত্তৃণোঽযং স্মরতীহ ভূমৌ
নীলং নভো বীক্ষ্য শযান এব .
খগো যদি স্যাং শরবেধিলুব্ধঃ
কুতশ্চিদস্তীত্যববোধহীনঃ .. ১৬..
উপর্যুপর্যুড্ডযনে পতিষ্যা –
ম্যেকেন রোদেন চ মৃত্যুমেমি .
অসঙ্খ্যবাণক্ষতজাক্তদেহো –
প্যাযুর্বিবৃধ্যৈ হ্যভিলাষুকোঽস্তি .. ১৭.. যুগ্মকম্
পৃষত্কমঞ্চে শযিতোঽপি কশ্চিত্
প্রতীক্ষিতুং জীবিতমীহতে হা .
একাভিলাষস্তু কবেরিহাস্তি
তদ্দর্শনং স্নিগ্ধপবিত্রহৃদ্যম্ .. ১৮..
প্রতীক্ষযা শ্যামজডীকৃতাযাং
রাত্রৌ চ দীর্ঘপ্রহরাকুলাভাম্ .
সর্বং বৃথৈবেতি হৃদন্তরালে
মন্ত্রে শ্রুতেঽপি ধ্বনতীব কর্ণে .. ১৯..
অশব্দমপ্যত্যধিকং সুশক্ত –
মাহ্বানমাপ্তং ত্বিহ শূন্যতাযাঃ .
গৃহাতুরোঽযং পথিকঃ প্রযাতি
তং দক্ষিণাশাপথমেব পশ্যন্ .. ২০.. যুগ্মকম্
কচ্চিত্ ততঃ পৃচ্ছতি নিম্নগাযা
বীচী – স কুত্রাস্তি সুহৃদ্বরো নঃ .
কচ্চিত্ প্রতীক্ষাভরিতঃ স পান্থ –
মশ্বত্থবৃক্ষোঽঙ্গুলিভিশ্চ তত্র .. ২১..
আস্তে নিমেষাকলনেন কচ্চিত্
প্রত্যুদ্গমার্থং চ পলাশবৃক্ষাঃ .
তিষ্ঠন্তি তত্রাতিমনোহরাভান্
ধৃত্বা প্রসূনোজ্জ্বলসুপ্রদীপান্ .. ২২.. যুগ্মকম্
বৃষ্টির্ন বা পর্যবসানমাপে –
ত্যাহাত্র মৃত্সামৃদুলোষ্ণগন্ধঃ .
প্রহস্য যক্ষীব বিমুক্তকেশা
স্থিতঃ প্রসূনৈঃ কুটজদ্রুমোঽসৌ .. ২৩..
পরোক্ষতস্তিষ্ঠতি কেতকীযং
লজ্জানতা পুষ্পবতী মনোজ্ঞা .
বেশ্যাকুমারীনিভহেমপুষ্পঃ
কিরাতিকাভো বকুলদ্রুমোঽপি .. ২৪..
বিরাজমানৌ কুসুমাংবরাণি
ধৃত্বা মনোমোহনবাটিকাযাম্ .
লোধ্রদ্রুমো মাদ্যতি পুষ্পবৃদ্ধি –
হর্ষাকুলোঽসৌ তিলকস্তথৈব .. ২৫.. যুগ্মকম্
নভস্বতোঽসাবভিলাবকাল –
শ্চিনোত্যযং মালবগন্ধরাজিম্ .
প্রত্যুদ্ব্রজাভ্যাগতমত্র সম্যক্
সদাগতে বেত্সি জনং কিমেনম্ .. ২৬..
যঃ পূরিতোদাত্তসুখোগ্রতাপ –
চেতাশ্চ যোঽদগ্ধবপুর্নিদাঘে .
গ্রস্তোঽপি শীতৈর্ন জডীকৃতো যঃ
সংবত্সরান্ যো বহু সঞ্চচার .. ২৭..
সর্গস্থিতো যো নিজচিত্তভারান্
ভূর্জত্বচেষ্বন্ববতারযচ্চ .
দীর্ঘপ্রবাসাত্পরমিষ্টতীর্থং
প্রাপ্যেব যো নিঃশ্বসিতং করোতি .. ২৮..
মৃত্ত্বং চ তন্মালবদেশকোণে
ভাগ্যাযতিং যো মনুতে স্বকীযাম্ .
সোঽযং স্বভাণ্ডং বটবৃক্ষমূলে
নিক্ষিপ্য তত্রৈব সুখং চ শিশ্যে .. ২৯.. বিশেষকম্
বটদ্রুপত্রাল্যবকাশতোঽধো
দ্রবন্তি কিং পুষ্করনীলিমানি .
অনেন চোত্তানশযেন দৃষ্টং
নভো লসত্যেব কিমপ্যপূর্বম্ .. ৩০..
বাল্হীকপুষ্পাস্তৃতকোমলাভং
কাশ্মীরদেশং সুরসিদ্ধসেব্যম্ .
গঙ্গাপ্রপাতার্দ্রহিমাদ্রিতুঙ্গ –
শৃঙ্গং চ দৃষ্ট্বা বিনিবর্তমানঃ .. ৩১..
পান্থোঽযমেতস্য মুখাবলোকাদ্
গ্রামস্য কিং জাযত এব বাঢম্ .
আর্দ্রাঞ্চিতাক্ষশ্চ সমুত্সুকশ্চা –
প্যানন্দতালদ্রুতমানসশ্চ .. ৩২.. যুগ্মকম্
পঞ্চেন্দ্রিযৈরপ্যনুভূযতে স্ম
চাদ্যান্নলাবণ্যরসোঽত্র নূনম্ .
অত্রৈব দৃষ্টা হ্যৃতুপর্যযাণাং
শোভাদ্ভুতৈরাদ্যমথাদরৈশ্চ .. ৩৩..
বর্ষৈরনেকৈস্তমদৃষ্টপূর্বা
দিদৃক্ষবশ্চাত্র হি বিস্মযন্তে .
সমাবৃতৈরাগত এব কালি –
দাসোঽযমিত্যাত্মগতং তদুক্তম্ .. ৩৪..
ক্ব বা ভবান্ কালমিযন্তমাসী –
দস্মান্ ন কিং বিস্মৃতবানসীতি .
ক্ষেমোক্তযঃ স্নেহভরাদ্ভুতার্দ্রাঃ
শ্রুতাঃ পরং তেন গৃহাতুরেণ .. ৩৫..
যাত্রাসু মধ্যেঽত্র বিশশ্রমুর্যে
বিদ্বদ্বরৈস্তৈর্বিষযীকৃতোঽভূত্ .
কবীন্দ্রমুক্তামণিকালিদাস –
স্তদীযকাব্যানি চ তত্প্রশংসা .. ৩৬..
কবিঃ স কিংদেশ্য ইতি প্রকামং
শ্রুতোঽত্র বাদপ্রতিবাদঘোষঃ .
অত্রত্য এবাস্তি স কাব্যকার
ইত্যাত্মতুষ্টিপ্রভবশ্চ শব্দঃ .. ৩৭..
তত্কাব্যখণ্ডাঃ প্রথিতাঃ কিলাসন্
কর্ণানুকর্ণশ্রবণেন চোক্ত্যা .
নাসৌ তদব্যাজমুখানি পশ্যন্
স্বাপহ্নবেন প্রভুরত্র বক্তুম্ .. ৩৮..
তস্থৌ বিনম্রঃ স যথাপরাধং
কৃত্বা পুনস্তপ্তমনাশ্চ জাতঃ .
গ্রামীণবৃদ্ধোদিতবত্সলত্ব –
মাহ্লাদমালা হি বভূব তস্মিন্ .. ৩৯..
গ্রামে কিমত্রাস্তি মদীযমেত –
চ্চিন্তা তিরোঽভূন্নিজবন্ধবো হি .
পরিস্থিতাঃ স্বস্য কৃতেঽভিমান –
ভাজাস্ত্বিমে গ্রামজনা বরাকাঃ .. ৪০..
কিং নো বিহায ত্বমিতো গমিষ্য –
স্যেবং হি পৃচ্ছত্যথ মিত্রমেকম্ .
ন নেত্যুবাচাপি তু চন্দ্রকান্ত –
তুল্যং তদাত্মা দ্রবতীব ভাতি .. ৪১..
পাদে চলত্যর্ধবিবোধবত্তদ্ –
গ্রামে পুরা বৃদ্ধকুটীং নিশাম্য .
অন্তর্ন কোঽপীত্যনুযোগি নেত্রং
শ্রুতং চ বৃদ্ধঃ স মৃতো বভূব .. ৪২..
নিজৈকপুত্রীবিরহাকুলোঽসৌ
ন কঞ্চিদূচে কতিচিদ্দিনেষু .
অথৈকদা চোড্ডযতে স্ম পক্ষী
শূন্যং ত্বভূত্ পঞ্জরমেষ গেহঃ .. ৪৩..
পুরাতনপ্রেমকথাশ্চ কাশ্চি –
ন্নীডাদিতঃ শ্রোত্রপথং প্রবিষ্টাঃ .
কিং তত্ স্মরন্ত্যুজ্জযিনীসুবর্ণ –
নীডোপবদ্ধাস্তি বিহঙ্গবালা .. ৪৪..
ন সন্তি পাপানি বিমুক্তিসিধ্যৈ
কিং তাপশান্ত্যৈ প্রভবেন্নদীযম্ .
গ্রামীণসংস্কারবদেতদাপঃ
স্বচ্ছপ্রশান্তস্ফটিকাবদাতাঃ .. ৪৫..
আকণ্ঠমস্যাং বিনিমজ্য নদ্যা –
মালাপযামাস পরস্সহস্রম্ .
গাযত্রিকাং মৃত্সঘটস্য চান্ত –
রাকাশমস্যানিশমর্কদীপ্তম্ .. ৪৬..
তেন প্রকাশেন তু নীযমান –
মাত্মানমাশংস্য বিনীতিপূর্বম্ .
স্থিতেঽপি কুত্রাপ্যভিযন্তি নৈকে
পূর্বে সতীর্থ্যাঃ সমমেব ভূযঃ .. ৪৭..
তেষাং কবেঃ সর্গতপঃফলানা –
মাস্বাদকাস্তে মিলিতা বদন্তি .
ন কেবলং সোজ্জযিনী ত্বদুক্তিং
প্রত্যুদ্ব্রজিষ্যন্ত্যপি তু ত্রিলোকী .. ৪৮..
অশ্বত্থবৃক্ষে হৃদযাকৃতিং চ
সহস্রশঃ শ্যামলপর্ণরাজিম্ .
নিস্তন্দ্রমাস্পন্দচলাং বিলোক্য
নিশ্শব্দমেবেহ কমাহ সোঽযম্ .. ৪৯..
অস্বস্থমেতদ্ধৃদযং কিলৈকং
মর্ত্যস্য হা দুস্সহমেব বৃক্ষ .
এতান্যহো তে হৃদযান্যসঙ্খ্যা –
ন্যস্বস্থিতান্যত্র সদা ভবন্তি .. ৫০..
সমীরণৈরালুলিতানি তানি
সর্বাণি সর্বর্তুষু তুল্যমেব .
দৃষ্ট্বা নিষীদাম্যখিলং তবৈত –
চ্ছাযাতটে বিস্মিতমানসোঽহম্ .. ৫১..
অস্বাস্থ্যমেতন্মহদস্তু তেঽহ –
মিচ্ছামি শান্তিং ত্বদনাতপেঽস্মিন্ .
সর্গাত্মকাবিষ্করণাকুলস্য
শান্তিস্তু লভ্যা মরণেঽথবা স্যাত্ .. ৫২..
গ্রীষ্মো গতশ্চাতকশাবকেন
কেকারবেণৈতি স বর্ষকালঃ .
পুনস্সমাযাতি বসন্তমাসো
বনপ্রিযাণাং মধুরস্বরেণ .. ৫৩..
যদা বিকংপ্রপ্রবিলোলচঞ্চূ –
পুটেন মন্দং চটকা বিরৌতি .
তদা সমাগচ্ছতি নগ্নপাদঃ
সবেপথুশ্চাপি তুষারকালঃ .. ৫৪..
ভজন্তি সাক্ষ্যং হ্যৃতুভেদভাবে
খগা ইমেঽশ্বত্থতরুঃ কবিশ্চ .
কবের্মনস্যার্তবসঙ্ক্রমাংস্তান্
জানন্তি নেমে তরুপক্ষিবর্গাঃ .. ৫৫..
স্বকীযভাণ্ডস্থিতপত্রখণ্ডা
বহন্তি তেষাং করলাঞ্ছনানি .
ইদং কিলৈতিহ্যমহো কবিং তত্ –
পশ্চাত্স্থিতং পশ্যতি কস্সচেতাঃ .. ৫৬..
মূর্তীভবত্প্রাক্তননৈজপুণ্যাং
লজ্জাবনম্রং সমুপস্থিতাং তাম্ .
স্বপ্নেষু জাগ্রত্স্বপি চার্ধবোধে –
ষ্বযং সদা পশ্যতি চত্বরস্থঃ .. ৫৭..
প্রশ্নঃ স তস্যাঃ প্রথমঃ স্মিতং ত –
দনুত্তরং হা পুলকপ্রদাযি .
নিবৃত্য সা চ স্থিতিরপ্যপাঙ্গ –
দৃষ্টির্বিলজ্জাঞ্চিততীক্ষ্ণপাতা .. ৫৮..
আমন্ত্রণং দূরবিনীতদোলা –
গবাক্ষতোঽক্ষিপ্রহিতং চ মূকম্ .
ধাবদ্রথাশ্বোত্থখুরারবস্সো –
প্যনারতং সন্ত্যনুবর্তমানাঃ .. ৫৯.. যুগ্মকম্
সংশ্রূযতে কিং স খুরারবোঽদ্যা –
প্যেতন্নু কিং সত্যমুত স্মৃতির্বা .
ভূযোঽত্র তেঽপ্যুজ্জযিনীমহীন্দ্র –
দূতাস্সমাযান্তি হযাধিরূঢাঃ .. ৬০..
তেষাং কুতো বা বিজনাঙ্কণেঽস্মিন্
পক্ষীন্দ্রচক্ষূংষি পরিভ্রমন্তি .
অত্রৈক এবাস্তি বটদ্রুমূলে
সমাগতাস্তে কিমিহৈব দেশে .. ৬১..
যথাগতং তে প্রতিযান্তু বেগা –
দিত্যানতাস্যোঽযমিহৈব তস্থৌ .
নিমীলিতাক্ষশ্চ বটদ্রুবৃদ্ধে
সমর্পিতাঙ্গোঽর্ধসুষুপ্তিমাপ .. ৬২..
আহত্য ভূমৌ স্বভুজোগ্রদণ্ডে –
নৈতে দৃঢং তস্য পুরোঽবতস্থুঃ .
অলং সুষুপ্ত্যা কিমু মূঢ কালি –
দাসঃ কবিঃ কশ্চিদিহাস্তি দৃষ্টঃ .. ৬৩..
দৃষ্ট্বাপ্যসৌ ভূপতিদূতচিহ্না –
ন্যাচারপূর্বং ন চ তান্ সিষেবে .
অযং তু নিশ্শেষনিবীতভীত্যা –
দরাক্ষ ইত্যদ্ভুতমাপ্নুবংস্তে .. ৬৪..
কোঽযং বিমূঢো বধিরোঽথ মূকঃ
প্রষ্টুং চ তেঽন্যত্র জবেন জগ্মুঃ .
প্রত্যাগমিষ্যন্তি কিমেত এব
দূতা মুদা গ্রামজনোপনীতাঃ .. ৬৫..
তং তে ক্ষমস্বেত্যভিবন্দ্য ভূপ –
সন্দেশমিত্থং কথযাংবভূবুঃ .
উত্তিষ্ঠমান প্রিযসত্কবে ত্বা –
মিহোজ্জযিন্যাং বিনিমন্ত্রযামঃ .. ৬৬..
আচার্যবাক্যং ধ্বনতি স্ম ভূযো –
প্যেতত্স্মৃতৌ মন্দ্রগভীররম্যম্ .
অবোধতঃ সাঞ্জলিরন্তরাসৌ
গুরুস্মৃতৌ পুণ্যজলে নিমগ্নঃ .. ৬৭..
ন কাঞ্চিদূচে প্রতিবাচমেষ
স্বকীযরত্নং তু জহার পূর্বম্ .
অবন্ত্যুদারা চ কিমর্থমেত –
চ্চিন্তোত্তরঙ্গং হৃদযং বভূব .. ৬৮..
নৈবাগমিষ্যাম্যহমেবমেব
বদেতি বক্ত্যান্তরধর্মরোষঃ .
নিমন্ত্রণং বিক্রমভূপদত্তং
ন ত্যাজ্যমত্রৈব শৃণোতি চেত্থম্ .. ৬৯..
জাজ্জ্বল্যমানজ্বলনদ্বিপার্শ্বো
যথা মহাঘোরবনে তথাযম্ .
তস্থৌ কবিস্তদ্ ঘনমৌনজন্য –
প্রত্যুত্তরাশঙ্কিতমানসেষু .. ৭০..
অস্বস্থিতেষু ক্ষিতিপেন্দ্রদূতে –
ষ্বেবং নিজগ্রামসুহৃত্সু চাত্র .
তিষ্ঠত্সু মা গচ্ছ বিহায চাস্মা –
নিত্যুক্তপূর্বশ্চ সুহৃদ্বরো যঃ .. ৭১..
স এব চাগত্য পুরোঽদ্য বাচ –
মূচে কবিং তং বিনিরুদ্ধকণ্ঠঃ .
গন্তাসি চেন্নস্ত্বভিমান এব
গ্রামীণশৈলীযমহো বিশুদ্ধা .. ৭২.. বিশেষকম্
পুষ্প্যত্যশোকঃ কিল দোহদেন
তথা কবেরঙ্কুরিতা প্রতীক্ষা .
দ্রষ্টুং মুখং তত্ সকৃদপ্যহং কিং
শক্নোমি যদ্যুজ্জযিনীং গতশ্চেত্ .. ৭৩..
অথাহ নৈজোজ্জযিনীপ্রযাণ –
বাঞ্ছাং কবিঃ স্বল্পবচোভিরেব .
তদা চ তদ্গ্রামমনোঽভিমান –
হর্ষৈস্তরঙ্গাযিতমেব বাঢম্ .. ৭৪..
স্নেহাতিবর্ষেণ সমার্দ্রচিত্তো –
স্ত্যেষাং চ নির্ব্যাজহৃদাং তথাপি .
শঙ্কাবশিষ্টা ভবতীহ পারং
পরাজিতোঽস্মীতি নিতান্তশল্যা .. ৭৫..
পরাজযং চাপ্যসকৃদ্ বরিষ্যে
যদীহজন্মন্যতুলপ্রিযার্দ্রম্ .
প্রিযামুখাব্জং সকৃদপ্যহো তদ্
ভবেন্মুহুর্মে নযনস্য পাত্রম্ .. ৭৬..
গত্বোচ্যতাং দোলকসেবকাদি –
বৃন্দং বিনা যাস্যতি কালিদাসঃ .
প্রশান্তিমাপ্নোত্যপরাহ্নসূর্যা –
তপোঽনিলঃ সান্ত্বযতীব মন্দম্ .. ৭৭..

---

সপ্তমঃ সর্গঃ
উজ্জযিনীং প্রতি
কিমাদ্যদৃষ্টিপ্রণযোঽত্র শিপ্রা –
পুরোঽবতস্থৌ কবিরার্দ্রচিত্তঃ .
শীতানিলস্যাথ নিমন্ত্রণেন
স্নেহোদযে তত্র চ গাহতে স্ম .. ১..
ক্লমঃ ক্রমাল্লীযত এব শৈত্যে
স্নাত্বোপবিষ্টোঽস্তি শিলাতলেঽস্মিন্ .
শীতোপচারং কুরুতে স শিপ্রা –
বাতোঽব্জগন্ধাকলিতাংবুবিন্দুঃ .. ২..
অজ্ঞাতমেতং পথিকং চ কস্মা –
জ্জন্মান্তরস্থাপিতগাঢবন্ধাত্ .
স্বপ্রত্যভিজ্ঞাবিষযীকরোষি
ত্বমুজ্জযিন্যুজ্জ্বলরম্যহর্ম্যে .. ৩..
দীর্ঘাযতে পত্তনরাজবীথী
পার্শ্বস্থসৌধেষু সমুত্পতন্তি .
সংগীতবাদ্যধ্বনিভিশ্চ সার্ধং
নৃত্তান্তরে নূপুরশিঞ্জিতানি .. ৪..
ধূপেন কালাগরুচন্দনাভ্যাং
সুসংস্কৃতেনোষ্মলচুম্বনৌঘৈঃ .
সংবৃণ্বতা কামপি কেশিনীং তৈ –
র্গবাক্ষরন্ধ্রৈর্নিভৃতং গতে তু .. ৫..
ব্যাপ্নোতি কো মাদকগন্ধপূরঃ
সঙ্ক্রীডযন্তী গৃহশারিকা কা .
উদেতি দেবেন্দ্রধনুর্বলভ্যাং
মযূরপিঞ্ছাচলনৈর্মনোজ্ঞম্ .. ৬.. যুগ্মকম্
ভূমাবযং গচ্ছতি পাদচারী
স্বর্গস্য বক্ত্রং পুরতো বিভাতি .
স্বর্গোঽত্র সক্ত্যা সমুদেতি তত্র
বৈরাগ্যচন্দ্রোদয এব ভাতি .. ৭..
দযৈব গঙ্গা মদভঙ্গরূপো
বহ্নিশ্চ নিত্যং শরণং প্রযাতঃ .
যন্মস্তকং যস্য চ বীর্যবিন্দৌ
শেতে বিশালং গগনং সুখেন .. ৮..
সুধাযতে যস্য গলে বিষং চ
তস্যালযে চণ্ডমহেশ্বরস্য .
প্রভাতপূজাসু চ ঘণ্টিকাযাঃ
শ্রোত্রং গতো মন্দ্রগভীরনাদঃ .. ৯.. যুগ্মকম্
বিন্যস্য পাদং শিশুবত্ সলীলং
সোপানমারুহ্য যথাক্রমেণ .
জগত্পিতুস্তস্য পুরঃ স্থিতোঽসৌ
কৃতাঞ্জলির্মীলিতলোচনোঽভূত্ .. ১০..
মুখে চ যা সৃষ্টিরুদেতি মন্দ্র –
স্থায্যাং শুভাশীর্বিশদাক্ষরা সা .
পুনঃ স সাক্ষাত্কুরুতে ত্রিলোকী –
সম্রাজমাকাশমহাধিপং তম্ .. ১১..
গন্তুং ততো বিক্রমরাজধানী –
মৈচ্ছত্ কবিস্তং প্রতিপালযন্তীম্ .
সূক্তিঃ পুরৈবোজ্জযিনীং গতা তা –
মন্বেতি কর্তাদ্য যথাগুরূক্তি .. ১২..
পুষ্পাঙ্কণং প্রাপ্য স গোপুরেণ
মুখ্যস্য সৌধস্য পুরো জগাম .
দ্বাঃস্থস্তদা তত্পদচারিপান্থ –
ক্ষীণার্তভাবং তু নিরীক্ষতে স্ম .. ১৩..
স্নানেন শুদ্ধোঽপি কুচেলকোঽযং
কো বা ভবেদংসবিলম্বিভাণ্ডঃ .
অথাগতশ্চাহ নৃপায কালি –
দাসং পুরদ্বারি বদ স্থিতং মাম্ .. ১৪..
কিং কালিদাসঃ শ্রুতপূর্বমেব
তন্নাম নামৈব ততোঽধিকং ন .
অথান্তরানীতকবিঃ স রাজ –
দূতানুযাতশ্চরতীহ মন্দম্ .. ১৫..
গচ্ছত্যসৌ পক্ষিমৃগাদিশিল্প –
হৃদ্যোন্নতস্তূপশতানি তানি .
পুস্তানি চিত্রাঞ্চিতপার্শ্বভিত্তীঃ
পশ্যন্ সুবৃত্তান্তররম্যবীথ্যা .. ১৬..
সংপূর্যতে বেণুমৃদঙ্গবীণা –
নাদৈঃ শ্রুতিঃ সিক্তমথাক্ষি বর্ণৈঃ .
দৃষ্টং চ সর্বং রমণীযমেব
শ্রুতাশ্চ সর্বে মধুরার্দ্রশব্দাঃ .. ১৭..
গ্রামপ্রিযোঽযং তু তথাপি রাজ –
হর্ম্যং জনাকীর্ণমিদং গভীরম্ .
ঘোরানলেনাবৃতবাসগেহ –
সমানমেবেতি বিমন্যতে স্ম .. ১৮..
জালং কিলেদং পরপুষ্টনাম্নো –
প্যতন্ত্রসঞ্চারিবিহঙ্গমস্য .
তথাপি নাকানুকৃতিঃ পৃথিব্যাং
মনুষ্যসৃষ্টেযমনন্যরম্যা .. ১৯..
সুদীর্ঘমার্গক্লমতপ্তপাদঃ
স বেত্রবত্যাঽঽদরতোঽনুযাতঃ .
উপৈতি সোপানমশেষবিদ্ব –
দভ্যর্চিতং মণ্ডপসন্নিধিস্থম্ .. ২০..
তিষ্ঠত্যসৌ বিস্মিতনেত্রযুগ্মঃ
কবিঃ পরং বিক্রমচক্রবর্তী .
সিংহাসনস্যোপরি সন্নিবিষ্টো
বিরাজতে সূর্যসমানতেজাঃ .. ২১..
স্বর্ণচ্ছদৈঃ কেসরিভিশ্চতুর্ভি –
র্ধৃতং হি সিংহাসনমস্য পশ্চাত্ .
শুক্লাভ্রশুভ্রাভসুবর্ণদণ্ড –
চ্ছত্রং চ শৈত্যপ্রদচামরে চ .. ২২..
সুচিত্রিতং যেন রসার্দ্রবাচা
রঘূত্তমানাং চরিতং সুধীরং .
কবিঃ স পশ্যত্যধুনৈব কঞ্চি –
ন্মহীপতিং হ্যেষ তু বিক্রমার্কঃ .. ২৩..
শকারিমেতত্সদৃশং ব্যচিন্তি
পূর্বং তথা নেত্যবধার্যতেঽদ্য .
অযং ন তীক্ষ্ণব্রতবান্ দিলীপো
রঘুর্ন যো দিগ্বিজযী যশস্বী .. ২৪..
অজোঽপি নার্দ্রাকুলমানসস্তত্ –
পুত্রোঽপি নো যঃ প্রিযবল্লভাযৈ .
গৃহীতমৃত্যুর্ভবতি স্ম নৈব
ত্যাগৈকশীলঃ স চ রামচন্দ্রঃ .. ২৫..
অনন্বযো বিক্রমভূমিপাল –
স্তথাপি কামপ্যকলঙ্ককন্যাম্ .
স্বীযাং ব্যধাদ্ যো বিনিগূঢতন্ত্রৈ –
স্স চাগ্নিমিত্রঃ স্মরণে প্রবিষ্টঃ .. ২৬.. কলাপকম্
এষা কথা যদ্যপি বিক্রমার্ক –
কীর্তীন্দুমধ্যেঽস্তি কলঙ্করেখা .
তথাপি হস্তাহিতচামরাভি –
স্তন্বীভিরুত্পক্ষ্মলতূলিকাভিঃ .. ২৭..
অদৃশ্যপত্রেষু শকোগ্রযুদ্ধে
বিজেতুরেতন্নৃপবিক্রমস্য .
প্রতাপশৌর্যাদিকথাবিশেষো
বিলিখ্যতেঽদ্যাপি নিরন্তরালম্ .. ২৮..
নক্ষত্রমালাধবলান্তরীক্ষ –
মধ্যে যথা পূর্ণশশাঙ্কবিম্বম্ .
বিভাতি তদ্বত্ খলু বিক্রমার্ক –
রাজাধিরাজঃ স হি ভীমকান্তঃ .. ২৯..
জানাতি নাচারমসৌ তথাপি
রাজ্ঞে জযাশীর্বচনানি দত্বা .
আনম্রশীর্ষঃ কবিরত্র তস্থৌ
শুভায বা প্রার্থিতবান্ মহেশম্ .. ৩০..
জযালুরাদ্যোজ্জযিনীপুরীযং
যস্যাঃ শিরো বা মন এব রাজা .
স্মশ্রুপ্রবৃদ্ধে ক্ষিতিপালবক্ত্রে
স্মিতং তু কিঞ্চিত্ সমুদেতি মন্দম্ .. ৩১..
যথাম্বরে শ্রাবণমেঘপুর্ণে
মনোহরা চন্দ্রকলাবতীর্ণা .
দৃষ্ট্বৈতদস্মিন্ কবিমানসেঽপি
বিশ্বাসলেশঃ স্ফুটিতঃ ক্রমেণ .. ৩২..
রজঃপ্রভাবোডুবিলোচনে তে
নবাগতং তং স্পৃশতঃ সুখেন .
আরোঢুমত্রোন্নতপীঠমেনং
নিমন্ত্রযত্যাঙ্গ্যবশাত্ সভাযাম্ .. ৩৩..
ক্ষীণঃ কবির্নম্রশিরাঃ স নন্দ্যা
সমগ্রহীদাসনমাদরেণ .
শরীরমেতদ্দযনীযমস্য
বেষশ্চ ভূষাপ্যপরিষ্কৃতা চ .. ৩৪..
সুসংস্কৃতঃ কিং পরমাত্মদীপঃ
প্রকাশতে বা লঘুমৃদ্ঘটেঽস্মিন্ .
দত্তো বরোঽযং কবিকীর্তিরূপঃ
কেনোন্মিষদ্যৌবনধারিণেঽস্মৈ .. ৩৫..
জানীমহেঽত্রাদ্য চরন্ সুদূরং
সমাগতো মালবদেশতস্ত্বম্ .
তদ্ গচ্ছ বিশ্রাময চাবিলম্বং
স্বচ্ছন্দমিত্যাহ নৃপঃ পুনশ্চ .. ৩৬..
নৈবাতিথিস্ত্বং মম রাজধান্যাং
মদাত্মমিত্রং ভবসীতি বিদ্ধি .
মৈত্রী কথং নিস্সমচিত্তযোরি –
ত্যন্তঃ কবেশ্চিন্তিতমস্তি কস্মাত্ .. ৩৭.. যুগ্মকম্
ক্ব চাতপত্রস্য চ চামরস্য
ছাযাং গতোঽধীশপদাধিকারাত্ .
উন্মত্তচিত্তো নৃপতিঃ ক্ব চাযং
কবিঃ কলালোলমনাশ্চ নিস্স্বঃ .. ৩৮..
শান্তিং ন কাঞ্চিল্লভতে চ চিত্ত –
মস্মিন্ নিকেতেঽধিকশান্তিলক্ষ্যে .
ক্ষৌমাস্তৃতেযং মৃদুরম্যশয্যা
বিচিত্রপর্ণান্যুপবর্হণানি .. ৩৯..
বিতানকালংকৃতমঞ্জুমঞ্চঃ
পীঠানি রূপ্যাবপনেষু তত্র .
মাধুর্যধুর্যাণি ফলানি নৈক –
মদ্যানি চ স্ফাটিকভাজনেষু .. ৪০..
কবিং শুভাশংসনযা চ সাকং
প্রলোভকানি প্রতিপালযন্তি .
কিন্ত্বত্র চেতো বিজনেঽত্যগাধ –
দুঃখহ্রদে হা পততীব ভাতি .. ৪১.. বিশেষকম্
সত্রে নিশাযাং চ বটদ্রুমূলে –
প্যবাধনিদ্রাসুখমার্জিতং কিম্ .
ভদ্রেঽত্র কোষ্ঠে মৃদুমঞ্চকেঽস্মিন্
নিশ্শব্দরাত্রেঽপ্যমলপ্রশান্তে .. ৪২..
নিদ্রাং বিদূরীকুরুতে চ কো বা
নিস্তন্দ্রমস্বাস্থ্যমিহান্তরা কিম্ .
অশান্তচিত্তস্য কুতঃ সুখং কিং
মথ্নাতি চাস্বস্থমনোঽবশং বা .. ৪৩.. যুগ্মকম্
কবের্মনো যোঽত্র সমাচকর্ষ
নিশ্শব্দমোহো বিফলঃ স কিং স্যাত্ .
করোষি কিং গ্রামসুতে মনোজ্ঞে
হ্যন্তঃপুরেঽস্মিন্ কুহচিদ্ বসন্তী .. ৪৪..
ক্ব বাধুনা ত্বং সুমবাটিকাযাং
লীলাগৃহে বা প্রমদাবনে বা .
কিং তে স্মৃতৌ তাঃ কনকাভসন্ধ্যাঃ
গ্রামাপগাসৈকতশীতবাতাঃ .. ৪৫..
অপি স্মরস্যেকবটদ্রুমং ত –
চ্ছাযাগতং তং কতিচিল্লিখন্তম্ .
দিদৃক্ষসি ত্বং সকৃদপ্যহো ত –
ন্মুখং তবেক্ষাবিহিতানুযাত্রম্ .. ৪৬..
চিত্তং কবেরাত্মগতেষ্বশান্তে –
ষ্বামগ্নমদ্ধা পুনরুত্থিতং তত্ .
স্পৃষ্টাররঃ কশ্চিদিহার্ধবোধে –
নান্তঃপ্রবেশায কৃতানুবাদঃ .. ৪৭..
দ্বারং বিবৃত্য প্রবিবেশ সৌম্যো –
দারস্মিতঃ সাঞ্জলিরন্তরাসৌ .
শুশ্রূষণার্থং চ কবের্নিযুক্তো
নৃপেণ যোঽগ্র্যো বযসা দযাবান্ .. ৪৮..
স্নেহার্দ্রবাগ্দর্শনসেবনাদ্যৌ –
ত্সুক্যং কবিং তোষযতি স্ম যস্য .
সপ্রশ্রযং পল্লবনামকোঽহ –
মিত্যব্রবীদ্ যোঽথ তমন্বিযেষ .. ৪৯..
অভীষ্টভোজ্যানি চ নিত্যনৈমি –
ত্তিকানি কর্মাচরণানি তস্য .
স্মিতেন মৌনং স সমাচরংস্ত –
দনন্তরং গৌরবযুক্তমাহ .. ৫০..
ন তানি বক্তুং প্রভবাম্যহং তু
গ্রামীণ এবাত্র চ পার্থিবানি .
ধান্যানি মূলানি ফলানি সর্বা –
ণীষ্টানি মেঽন্যত্ কিমিতি ব্রবীমি .. ৫১.. বিশেষকম্
ক্ষণং বিচিন্ত্যাহ কবিঃ সদাপি
দ্রষ্টুং চ মামর্হসি পল্লব ত্বম্ .
তস্যেষ্টকার্যাণি সদানুতিষ্ঠন্
স পল্লবোঽভূত্ কবিমিত্রমাপ্তম্ .. ৫২..
অন্যত্ববুধ্যা প্রতিভান্তমেতং
রাজালযং মামিহ পল্লবোঽযম্ .
বধ্নাতি যস্তং নিজসন্নিধানং
নেতুং নৃপাজ্ঞাং বিনিবেদ্য তস্থৌ .. ৫৩..
প্রণম্য ভূপং কবিরাস্ত নানা –
রত্নাঞ্চিতেঽন্যত্ সদসীব রত্নম্ .
নান্দীং মহাকালপরাং জিগায
কোঽন্যঃ কবেরস্তি চ বন্দনীযঃ .. ৫৪..
অত্যুন্নতৈশ্বর্যধরোঽপি সর্বং
দত্ত্বাশ্রিতেভ্যো ধৃতকৃত্তিবাসাঃ .
কান্তার্ধদেহোঽপি বিরক্তচিত্তো
যতীশ্বরোঽষ্টাঙ্গকলেবরেণ .. ৫৫..
বিভ্রত্প্রপঞ্চোঽপ্যভিমানহীনো
মহেশ্বরো মঙ্গলসত্পথেষু .
নিরুধ্য বৃত্তিং চ তমোমযীং বো
নযত্বিতি প্রোচ্য সমাপযত্ সঃ .. ৫৬.. যুগ্মকম্
ঈশস্তবেঽপ্যত্র কিমান্তরার্থঃ
কটাক্ষ্যতেঽচিন্তি ন কৈশ্চিদেবম্ .
নৃপোঽপি ধন্যোঽদ্য তু কালিদাস –
সূক্ত্যা সভা মে সমলঙ্কৃতেতি .. ৫৭..
দ্বেধা সভাং মে নবরত্নভূতা –
মলঙ্কুরু ত্বং বিদুষাং মনোজ্ঞাম্ .
এবং নৃপে বক্তরি সাধুবাদৈঃ
সভাতলং হর্ষসমৃদ্ধমাসীত্ .. ৫৮..
অসৌ তু ভাগ্যপ্রণযৈকপাত্রং
বাণীপ্রসাদং কথমেষ লেভে .
বাগস্য মাযাশিখিবর্হ এবে –
ত্যাসীত্ সভা মিশ্রবিকাররম্যা .. ৫৯..
পপ্রচ্ছ রাজা কবিনোক্তপদ্যং
কস্মিংশ্চ কাব্যে ভবতীত্যথেদম্ .
স্বনির্মিতে নূতননাটকে চ
নান্দীত্যবোচত্ কবিরাদরেণ .. ৬০..
তদ্দর্শনাযাত্তকুতূহলোঽসা –
বাহ প্রযোগঃ ক্রিযতাং চ তস্য .
আগামিচৈত্রোত্সব এব তত্রা –
স্ত্যাজ্ঞা ন বাশীর্বচনং চ রাজ্ঞঃ .. ৬১..
ভাসাদিপৌরাণিককাব্যকর্তৄন্
বিহায কিং স্নিহ্যতি কালিদাসে .
সভেযমিত্যস্তি কবের্বিশঙ্কা
সভাসদাং চাপি নৃপস্য নৈব .. ৬২..
স্মরান্তরাচার্যবরং বিনীতো
বন্দস্ব চেত্যাত্মনি মন্ত্রিতে তু .
কবির্নিজস্থানগতোঽস্তি কাব্যং
ধ্বনিপ্রদীপ্তং ললিতং যথা স্যাত্ .. ৬৩..
উদ্যত্সমাহ্লাদসুপূর্ণিমাযা –
মপ্যস্তশক্তা হসিতুং যথাব্ধিঃ .
সর্বাত্মহৃষ্টঃ কথমাতপত্র –
চ্ছাযাগতশ্চামরবাতশীতঃ .. ৬৪..
কক্ষ্যাপ্রদীপং নিভৃতং প্রকাশ্য
শুশ্রূষিকাযাং তু বহির্গতাযাম্ .
আযাতি দেবাহুতিধূমগন্ধে
সন্দৃশ্যতে হা স্মৃতিসানুসীম্নি .. ৬৫..
অপুষ্পিতাশোকতরোরধস্তা –
ন্মঞ্জীরশিঞ্জামনু পুষ্পমেলা .
অস্ত্যত্র সর্গাত্মকভদ্রমূর্তি –
শ্চিত্তং তু ভগ্নং ব্যথিতং চ যস্য .. ৬৬.. যুগ্মকম্

---

অষ্টমঃ সর্গঃ
রঙ্গোত্সবস্য ধ্বজারোহঃ
লতানিকুঞ্জে রসিকোঽঙ্গনানাং
পুংস্কোকিলো গাযতি লীনদেহঃ .
অন্তঃপুরান্তাত্ প্রবহন্তি তন্ত্রী –
লযান্বিতপ্রেমসুগীতকানি .. ১..
নবীনবাসন্তমহোত্সবস্য
ধ্বজাধিরোহং দধতেঽতিমোদাঃ .
সপল্লবাশোকপলাশচূতা –
স্তদোজ্জযিন্যস্তি বসন্তরথ্যা .. ২..
সুগন্ধতৈলজ্বলদগ্নিদীপা
বসন্তপুষ্পাণ্যভবন্ নিশাযাম্ .
আতোদ্যগীতানি চ নাট্যগেহে
নান্দীং ব্রুবন্ত্যত্র মহোত্সবস্য .. ৩..
সর্বেন্দ্রিযামোদবিশেষহেতুঃ
সামাজিকানাং চ সতাং মনোজ্ঞম্ .
প্রযুজ্যতেঽদ্য প্রথমং হি কালি –
দাসপ্রণীতং নবনাটকং তত্ .. ৪..
রাজাধিরাজঃ পুরতো নিষণ্ণঃ
পশ্চাত্ কলাতত্ত্ববিদো রসজ্ঞাঃ .
আর্দ্রাশযাশ্চান্যসুখাসুখজ্ঞাঃ
শঙ্কাবিলোলাঃ সুসমানচিত্তাঃ .. ৫..
নব্যেষু সর্বেষু পরাঙ্মুখাশ্চ
ভবন্তি দোষৈকদৃশশ্চ কেচিত্ .
প্রতিক্ষণং বর্ধত এব কৌতূ –
হলং তদেকাগ্রলযং বিচিত্রম্ .. ৬.. যুগ্মকম্
যদাগ্নিমিত্রস্য পুরো নিজাত্মা –
র্পণং পদং মালবিকা বিগীয .
নৃত্তং বিধত্তে চ তদা প্রহর্ষ –
বর্ষঃ কিযান্ বিক্রমভূপচিত্তে .. ৭..
ইযং পুরো মালবিকাপরাস্তি
নিবেদযন্তী পদমেব তন্মে .
চিন্তাকুলোঽভূন্নৃপতিস্তদাযং
কবীশ্বরঃ কিন্নু পরেঙ্গিতজ্ঞঃ .. ৮..
যতো হ্যহং মালবিকানুরক্ত
ইত্যেতদত্যন্তনিগূঢমেব .
রাজালযস্থং চ রহস্যমেবং
কবির্বিজানাতি কথং ন জানে .. ৯..
কবেস্তৃতীযং নযনং চকাস্তি
যেনৈকহস্তামলকপ্রকাশম্ .
জগত্ত্রযং পশ্যতি যস্য সর্ব –
মন্তর্নিবিষ্টং সুতরাং সুতার্যম্ .. ১০..
মদীযসত্যান্যত এব মন্যে
মম প্রিযস্বপ্নশতানি চাসৌ .
কবিঃ সমাবিষ্কুরুতে যথা মে
হৃদি প্রবিষ্টোঽতিনিগূঢদেহঃ .. ১১..
পুরোঽত্র চেটী বকুলাবলীযং
রাজ্ঞীপ্রদত্তেন চ নূপুরেণ .
করোত্যলং মালবিকাপদাব্জ –
মালক্তকার্দ্রারুণকোমলাভম্ .. ১২..
অনুক্ষণং সর্বমিদং বিলোক্য
তিষ্ঠত্যসৌ বৃক্ষলতানিলীনঃ .
নৃপোঽগ্নিমিত্রস্তরলাকুলাঙ্গঃ
সভাস্থিতোঽযং চ নৃপস্তথৈব .. ১৩..
সূক্ষ্মাণি রঙ্গে চলনানি নানা –
সভাসদাং চ প্রতিভাবভেদান্ .
সমং নিরীক্ষ্য ক্বচিদত্র কোণে
কবির্নিষণ্ণো বিনিগূঢহর্ষঃ .. ১৪..
তথাপি গূঢং নিহিতং যদন্ত –
র্দুঃখং বহিস্তত্প্রবহত্যবাধম্ .
ইযং চ মে মালবিকাঽবরোধে
বিভাতি যা মালবরম্যশোভা .. ১৫..
বিরাজতেঽসৌ হিমশুভ্রপুষ্পং
রাজ্ঞী চ ধারিণ্যতিমাত্রশুদ্ধা .
ইরাবতীযং মধুমত্তলোলা
চাম্পেযসূনং প্রবিলোভনীযম্ .. ১৬..
এতত্প্রসূনদ্বযমগ্নচিত্তো
নৃপালভৃঙ্গঃ কলিকাং নবীনাম্ .
কন্যামিমাং মালবিকাং বিলোক্য
গুঞ্জন্নিহাস্তে মধুলোলুপোঽযম্ .. ১৭..
যদা মযৈতদ্বিটভৃঙ্গমোহঃ
প্রশংসিতোঽভূদ্ বিমলানুরাগঃ .
তদাহমাত্মানমনিন্দ্যমেবে –
ত্যবৈমি নিষ্পক্ষবিমর্শনেন .. ১৮..
অতীব নিন্দ্যা বিটবৃত্তিরেষা
সাধারণানাং যদি মানবানাম্ .
গ্রাহ্যো হি ধর্মো বিহিতো হিতশ্চা –
সাধারণানাং ধরণীপতীনাম্ .. ১৯..
অহো বসন্তোত্সব এব তেষাং
রাজ্ঞামিদং জীবিতমস্তি যস্মিন্ .
ন কেবলং চৈকসুমেন দেযা
মাধ্বী সহস্রৈঃ কুসুমৈঃ পরন্তু .. ২০..
প্রত্যক্ষদৃশ্যং ত্বিদমেব চাতঃ –
পরং বিশেষান্তরিকার্থজাতম্ .
জানন্তু তেঽজ্ঞাতবচাংসি চৈবং
সত্যস্য তাস্তাঃ পরভাগশোভাঃ .. ২১..
উদ্যানরঙ্গে পরিতোঽগ্নিমিত্রো
ভ্রমত্যলং কামবিকারমূঢঃ .
কর্তুং মনশ্শান্তিবিভঙ্গমস্মিন্
স্মরোঽদ্য কিং পাতযতি প্রকামম্ .. ২২..
মন্দারজাতীসহকারপুষ্প –
বাণানথাস্যা নিশিতান্ কটাক্ষান্ .
কামাতুরো মালবিকাপদাব্জ –
স্পর্শামৃতং প্রার্থযতে নরেন্দ্রঃ .. ২৩.. যুগ্মকম্
বিন্ধ্যং চ বিদ্যুল্লতযা নিহন্তু –
মভ্যুদ্যতেবাম্বুদমালিকা সা .
ইরাবতী রোষকষাযিতা স্ব –
কাঞ্চ্যা নৃপং তাডযিতুং প্রবৃত্তা .. ২৪..
তস্যাস্তু পাদগ্রহণেন রাজা
মাং দণ্ডযেত্যাহ শমাভিলাষী .
গৃহ্ণীষ্ব তৌ মালবিকাপদাবি –
ত্যুক্ত্বা গতা সা জ্বলদগ্নিকল্পা .. ২৫..
পশ্যামি নাট্যে মুকুরে মদীযং
সত্যং কিলেত্যেবমমংস্ত ভূপঃ .
নির্বর্ণ্য রঙ্গং ত্বিদমাত্তহর্ষা
সভাপি হৃষ্টং চ কবিং করোতি .. ২৬..
যথানৃপেচ্ছং তরুণীং বিবোঢুং
করোত্যুপাযান্ বহুধা রসেন .
যো গৌতমো নর্মসুহৃত্ স এবে –
ত্যলং বিজানাতি নৃপালবর্যঃ .. ২৭..
বিনা তু গত্যন্তরমত্র রাজ্ঞো
নবেষ্টবধ্বৈ প্রিযধারিণী সা .
সুস্বাগতং বক্তি সশঙ্খনাদং
সমাপ্যতে চান্তিমপঞ্চমোঽঙ্কঃ .. ২৮..
তত্সূচকো মঙ্গলমঞ্জুগানা –
লাপশ্চ হৃদ্যো বিদুষাং সমাজে .
সমুত্থিতং তত্ করঘোষণং চ
সন্তোষযামাসতুরদ্য ভূপম্ .. ২৯..
অন্বিষ্যতে সর্বজনৈঃ কবীন্দ্রো
রাজ্ঞাপি সার্দ্রস্বরভাবভাজা .
আনীযতেঽযং পুরতশ্চ তস্য
সংতৃপ্তিসংপূরিতনেত্রযুগ্মঃ .. ৩০..
করেঽস্য রাজা নবরত্নরম্যাং
সুশৃঙ্খলামর্পযতি দ্রুতং সা .
পতত্যথাত্মন্যতিগূঢমস্মিন্
ভুজেঽথবেতি ক্ষণমালুলোচ .. ৩১..
আস্তাং ন জানাতু কদাচিদস্য
ভারং নিষণ্ণোঽস্তি কবির্বিনম্রঃ .
আভূষ্যতে কিং মকুটেন তস্য
শীর্ষঃ প্রকামং বিনযাভিধেন .. ৩২..
আরাধনাপ্রোজ্জ্বলনীলনেত্রৈ –
র্নিরাজ্যতেঽযং তরুণঃ কবিঃ কিম্ .
দগ্ধাঃ কিমীর্ষ্যাঘনসারখণ্ডাঃ
সবিস্মযালোকনভাজনেষু .. ৩৩..
হর্ষাতিরেকেষু সভাখিলা সা
নিমজ্জনোন্মজ্জনমাতনোতি .
ততঃ সমুদ্ভূয চিরাদ্ ধ্বনন্ত্য –
বিচ্ছিন্নধারোজ্জ্বলহস্তঘোষা .. ৩৪..
নবাগতো নাটককৃত্ তথাপি
তন্নাটকং প্রীতিদমাবভূব .
বিদ্বজ্জনানামিতি নাট্যকারাঃ
পরস্পরং সংপ্রতি মন্ত্রযন্তি .. ৩৫..
প্রীতা বযং সাংপ্রতমিত্যবাদী –
ন্নৃপালকো যন্মহতী প্রশংসা .
প্রসাদরূপেণ বিরাজতে স্ম
প্রত্যক্ষমেবাস্য বিলোচনান্তে .. ৩৬..
রঙ্গে স্থিতাং নাটকনাযিকাং স
দৃষ্ট্বা তু রাজা ললিতাশযাং তাম্ .
প্রোবাচ নৃত্তং ছলিতং তবেদং
দ্রষ্টুং চ ভূযোঽপি মমাভিলাষঃ .. ৩৭..
কৃতাঞ্জলির্মন্দমথো জগামৈ –
বাধোমুখী সা ন বিলোক্য কঞ্চিত্ .
অন্তঃপুরং প্রাপ নৃপালকো নি –
শ্শূন্যস্ত্বভূন্নাট্যগৃহাঙ্কণোঽপি .. ৩৮..
একান্তসঙ্কেতমবাপ নৈজং
চিন্তান্তরং বা স কবিঃ কিমর্থম্ .
সন্দিগ্ধচিত্তোঽভবদেষ তস্যাং
সংবৃত্য দৃষ্ট্বেমমিহ স্থিতাযাম্ .. ৩৯..
অচিন্তি যন্মালবিকা মমেযং
কিমু ক্ষণাত্ প্রাক্ তদভূদ্ যথার্থম্ .
যদ্যেকমত্রানুবিচারযেত্ ত-
মেবাথ পশ্যেদিতি কিন্নু মাযা .. ৪০..
ইযং চ তে মালবিকেতি গূঢং
দৌত্যং বহন্তী চ কপোতিকৈকা .
সমেত্য সন্মানসনীডকং তত্
প্রবিশ্য সঞ্জল্পতি কিং মনোজ্ঞম্ .. ৪১..
হর্ষস্তদাকস্মিকদর্শনেন
খেদোঽথবা তত্ক্ষণিকত্বদৃষ্টেঃ .
ন কিঞ্চিদূচে মিথ ইত্যতুষ্টি –
র্দৃষ্টোঽপ্যভিজ্ঞাত ইবেতি শঙ্কা .. ৪২..
অপশ্যদিত্যেব যথার্থমিত্থং
বিভিন্নচিন্তামথনেন জাতে .
দন্দহ্যমানো জ্বলনেঽতিঘোরে
লাক্ষাগৃহোঽভূত্ কবিচিত্তমদ্য .. ৪৩.. যুগ্মকম্
অস্মাদশক্যং তু পলাযনং হা
তপৈবমেকান্তদুরন্ততাযাম্ .
ভাগ্যাতিরেকং মম চিন্তযিত্বা
নিদ্রাং ত্যজেযুর্বহবোঽত্র রাত্রৌ .. ৪৪..
একান্তনির্ভাগ্যহতোঽস্মি নিদ্রা –
বিহীন এবেতি ন কোঽপি বেত্তি .
দ্বারেঽস্তি কঃ পল্লব এহি কিং বা
স্বরে তু কাতর্যমবোধপূর্বম্ .. ৪৫..
অস্ত্যদ্য যুষ্মদ্দিনমুজ্জযিন্যাং
সার্বত্রিকং তে শুভনাম চৈব .
গতেষু সভ্যেষু সমেষু কর্ণে
ধ্বনত্যসৌ হর্ষরবো গভীরঃ .. ৪৬..
কিমেতদাস্যে ন স হর্ষরাশিঃ
কিমত্র চিন্তাকুলিতস্ত্বমাস্সে .
তদাপি দৃষ্টো ন চ মন্দহাসো
ভবন্মুখে কশ্চন যন্মুহূর্তে .. ৪৭..
অস্মিন্ করে বিক্রমভূমিপেন
সমার্দ্রচিত্তেন দযাধিকেন .
বিভূষিতে বীরসুশৃঙ্খলেন
ভবানভূন্মুখ্যবিশিষ্টরত্নম্ .. ৪৮..
বিদ্বত্সভাযাং মহিতোজ্জযিন্যাং
তথাপ্যযং গৌরবভাব এব .
ইত্যাহ বেলাতটমেত্য ফেনান্
ভিন্দন্নিবোর্মিঃ স চ পল্লবোঽপি .. ৪৯.. বিশেষকম্
গতে মুহূর্তে তু নিতান্তমূকে
সস্মার দীনং কবিরাকুলাত্মা .
অস্মিন্ রহস্যে কিল ভাগভাক্ত্বং
কোঽন্যো ভজেত্ পল্লবতোঽপ্যমুষ্মাত্ .. ৫০..
রাজ্ঞা নিযুক্তো মম সৌখ্যচর্যাং
নির্বোঢুমেবাযমতঃপরং যঃ .
মদিঙ্গিতজ্ঞোঽভবদেষ মে য-
জ্জানাতু তদ্দুঃখজমান্তরার্থম্ .. ৫১..
অথাহ মন্দং স তু পল্লবস্যা-
কাঙ্ক্ষাং প্রগাঢাং শমযন্ কবীন্দ্রঃ .
নিজপ্রিযগ্রামটিকাসুতাযাঃ
কথাং স্বকীযাং চ বিকাররম্যাম্ .. ৫২..
কথানুবন্ধঃ কবিনোচ্যতেঽয-
মিহৈব জন্মন্যনুরাগমুগ্ধম্ .
দ্রষ্টুং সকৃত্ তন্মুখপদ্মমেত-
ন্নিমন্ত্রণং স্বীকৃতমুজ্জযিন্যাঃ .. ৫৩..
সর্বাভ্যসূযাপদমদ্য সর্বৈঃ
সমাদৃতোঽসৌ কবিরেব কিং বা .
অগাধতাযাং বডবাগ্নিদগ্ধ-
সমুদ্রবচ্ছান্তমনা ইবাস্তে .. ৫৪..
বিশ্বাস্যভূমেরতিবর্ততে হা
সত্যস্য নানাবিধসূক্ষ্মতত্ত্বম্ .
স্মৃত্বা পরং পল্লব আহ ভূযঃ
কথাবিশেষং তমনুক্রমেণ .. ৫৫..
স্মরামি পদ্মেব মনোজ্ঞকন্যা
কাচিত্ ততো মালবতঃ কদাচিত্ .
অন্তঃপুরস্যাঙ্কণসীম্নি চাস্মি-
ন্নান্দোলিকাতোঽবততার মন্দম্ .. ৫৬..
স্মরামি চাদ্যাপি মুখং তু তস্যা
লুব্ধেন পশ্চাদনুধাবিতাযাঃ .
মৃগ্যা ইবোপেতভযং ন চান্যা
নৃত্তং চকার চ্ছলিতাভিধানম্ .. ৫৭..
অভ্যস্য নৃত্তং ললিতং চ গীতং
বনে লতোদ্যানলতা চ জাতা .
এবং চ সা নেত্রকনীনিকাভূ-
ন্নাট্যোত্তমাচার্যপরম্পরাণাম্ .. ৫৮..
অন্তঃপুরে নৃত্তখলূরিকাযা-
মেকাকিনী সা নিষসাদ নিত্যম্ .
তস্থৌ পরাসাং বহুনর্তকীনাং
মধ্যে চ নিশ্শব্দতরঙ্গতুল্যা .. ৫৯..
কমপ্যসৌ পশ্যতি নো তথাপি
সম্পশ্যমানা ভবতীহ সর্বৈঃ .
অনন্তরং পল্লব আহ মন্দ-
মেতত্সুকন্যামুখদর্শনেন .. ৬০..
স্বপ্নদ্রুমঃ পল্লবিতো বভূব
শ্রীবিক্রমস্যেতি তু কিংবদন্তী .
পাষাণভিত্তেরপি চাস্তি কর্ণো
রহস্যবেদীহ সমীরণোঽপি .. ৬১.. যুগ্মকম্
কবিঃ স মৌনং ন বভঞ্জ সাল-
ভঞ্জেব নিশ্চেষ্টশরীরমাস্তে .
স পল্লবঃ স্নেহবিলোলমংসে
স্পৃশন্ করেণৈবমুবাচ হার্দম্ .. ৬২..
করোমি কিং বা বদ মাং যথেষ্টং
মমাভিলাষস্ত্বযমেক এব .
তযা সহৈকান্তভুবি স্থিতস্তাং
সম্ভাষিতুং কেবলমীক্ষিতুং বা .. ৬৩..
জানাতি যোঽন্তঃপুরগং চ সর্বং
স পল্লবস্তং কবিমেবমূচে .
সম্ভাবযে স্নেহমিমং পবিত্রং
ত্বদীযদৌত্যং চ বহামি ভদ্রম্ .. ৬৪..
নবং চ রত্নং নবসূজ্জ্বলং চ
রত্নেষু তেঽস্ম্যুজ্জযিনি প্রকামম্ .
কীর্ত্যৈতযা বক্ষ্যসি লব্ধবানে-
বাস্মিন্নসূযানিশিতান্ পৃষত্কান্ .. ৬৫..
ভবদ্যশোরত্নমনোজ্ঞপেটা-
মেবং সদা পূর্ণতরাং বিধাতুম্ .
তমস্যনেকে প্রবিনষ্টসর্বা-
শ্চরন্তি নিশ্শব্দবিলাপপূর্ণাঃ .. ৬৬..
সর্বেঽপ্যদৃশ্যাযতশৃঙ্খলাভি-
র্বদ্ধা বলান্নিষ্ঠুরবন্ধনেঽস্মিন্ .
এতেষু মধ্যেঽন্যতমোঽপ্যহং চে-
ত্যযং কবীন্দ্রঃ শযনে পপাত .. ৬৭..
স্বচ্ছন্দসঞ্চারসুখেচ্ছুরাত্মা
যোঽস্যৈব সাক্ষাদসহাযতাসৌ .
কঞ্চিন্নিধিং হা পরিপালযন্তঃ
স্নেহেন বীথ্যাং তু লসন্তি দীপাঃ .. ৬৮.. যুগ্মকম্

---

নবমঃ সর্গঃ
শ্যামযামাঃ
শ্যামপক্ষে কিমেতস্মিন্ জ্যোত্স্নাগমবিলম্বনম্ .
যামিনীহৃদযং ব্যগ্রং তিতিক্ষারহিতং যথা .. ১..
পর্ণরাজির্নিশ্চলাস্তি কুত্রাগচ্ছত্ সমীরণঃ .
প্রদীপাশ্চান্তরালেষু নিমিষন্তি মুহুর্মুহুঃ .. ২..
অন্তঃপুরং চ নিদ্রালু প্রশান্তং সুখসান্দ্রিতম্ .
তথাপি কবিরেকাকী নিদ্রাহীনো নিষীদতি .. ৩..
অজ্ঞাত্বা ভূতলেনাপি পাদং বিন্যস্য কশ্চন .
আগত্য কবিমেবং তত্কর্ণে মন্ত্রযতে কিমু .. ৪..
উত্থিষ্ঠাগচ্ছ গচ্ছাবো মামেবানুব্রজ ক্ষণম্ .
সুজ্ঞাতঃ পল্লবস্যেহ মার্গঃ সর্বোঽপি দুর্গমঃ .. ৫..
অন্তঃপুরেঽল্পবিবৃতং গবাক্ষং চ তদন্তিকে .
কবিং দ্রষ্টুং তরলিতং নেত্রং বিন্যস্য সাঽঽধুনা .. ৬..
প্রতিপালযতীত্যুক্তেঃ পূর্বমেব সমুত্থিতঃ .
অবিশ্বাসপ্রতীত্যেব কবিস্তত্রৈব তিষ্ঠতি .. ৭..
বর্ধিতৈর্হৃদযস্পন্দৈর্দীর্ঘৈর্নিঃশ্বসিতৈরপি .
মন্দং মন্দং স চলতি পল্লবেন সমং কবিঃ .. ৮..
তিষ্ঠত্স্বপদ্গজবরবৃন্দবন্নিশ্চলাভযা .
বৃক্ষপঙ্ক্ত্যা বিচিত্রাভির্বিশালাঙ্কণবীথিভিঃ .. ৯..
আলেখিতানেকবর্ণচ্ছাযাচিত্রমনোহরৈঃ .
লতাকুটীরৈর্যুক্তাভিরন্তরঙ্কণবীথিভিঃ .. ১০..
সঞ্চরন্তৌ নোদিতাযাং চন্দ্রিকাযাং পুরোভুবি .
অন্তরিক্ষপ্রভাদৃষ্টমার্গেণেহ কথঞ্চন .. ১১..
শিলাশৃঙ্খলিকাদীর্ঘরাজগেহসমুচ্চযে .
গেহস্যৈকস্য পৃষ্ঠান্তে তস্থতুস্তাবুভাবপি .. ১২.. কলাপকম্
তত্র ভিত্তিষু সর্বত্র ব্যাপ্তপুষ্পিতবল্লিকা .
তযোর্নিগূঢস্থিত্যর্থং ছাযাগৃহমভূত্ কিমু .. ১৩..
কুটজানাং পুষ্পিতানাং সুগন্ধেনাখিলং নভঃ .
সুবাসিতং চ চিত্তে তু সপ্তসিন্ধূচ্চলদ্ধ্বনিঃ .. ১৪..
সোত্কণ্ঠিতং কবিস্তস্থৌ সান্দ্রচ্ছাযে স পল্লবঃ .
নিরীক্ষতে ক্ব বা দৃশ্যমীষদ্বিবৃতজালকম্ .. ১৫..
তনুক্ষৌমেনাবৃতং তত্ পুরতো দৃশ্যতে কিমু .
প্রতিপালযিতা পশ্চাত্ কবিদৃষ্টিপ্রলোভিনী .. ১৬..
গবাক্ষসুষিরেণাথ কঞ্চিদ্ গুপ্তং দিদৃক্ষুণী .
দৃশ্যেতে তারকাদীপ্তমনোহরবিলোচনে .. ১৭..
ছাযারূপং পল্লবস্য প্রত্যভিজ্ঞায সা দ্রুতম্ .
পপ্রচ্ছোদ্বেগসহিতা – সোঽযং – মৌনমথাচরত্ .. ১৮..
আহ্বযেঽত্রৈবাস্তি পশ্চাদিত্যস্মিন্নুক্তবত্যহো .
ধূমাযিতনিশালোকে চান্বিযেষাক্ষিযুগ্মকম্ .. ১৯..
পুনঃসমাগমারম্যসন্মুহূর্তপরম্পরা .
বর্ণিতা যেন সোঽধীরো জাযতেঽস্মিন্ মুহূর্তকে .. ২০..
পুরা বটদ্রুচ্ছাযাযাং কিঞ্চিত্ স্বস্মিন্ লিখত্যহো .
আরাদুপেত্য তস্থৌ যা প্রিযকৌতুকসন্নিভা .. ২১..
নীবারস্তম্বকাকীর্ণকেদারক্ষেত্রসীমসু .
নদীতীরেঽপি শারীব ভ্রমতি স্ম তদা চ যা .. ২২..
নষ্টীভূতপিতৃস্নেহবাত্সল্যমধুকঙ্গুকা .
সন্ত্যজ্য যা প্রিযং সর্বং গ্রামাদিহ সমাগতা .. ২৩..
সাস্মিন্নন্তঃপুরোদাররম্যকাঞ্চনপঞ্জরে .
অন্যৈব তিষ্ঠতীদানীং – মিথোদর্শনমীদৃশম্ .. ২৪.. কলাপকম্
কবৌ তস্য গবাক্ষস্য ছাযামাশ্রিত্য তিষ্ঠতি .
স্ফুটিতং কিং চন্দ্রিকাযাঃ প্রথমং মালতীসুমম্ .. ২৫..
স্তব্ধনিঃশ্বাসবেগা সা বদ্ধাঞ্জলিরবস্থিতা .
অশ্রুপূর্ণং তন্নযনমুন্মিষত্যেব সস্পৃহম্ .. ২৬..
ততো মন্দং পতন্নীহারার্দ্রপত্রনিভং বচঃ .
গলিতং- বিস্মৃতৈবাহং ভবতেতি ব্যচিন্তযম্ .. ২৭..
বিস্মর্তুং নৈব শক্নোমি ত্বামিত্যস্মত্সুদুর্গতিঃ .
ইত্যুবাচ কবিশ্চিত্তনির্গতং শ্বসিতং যথা .. ২৮..
দীপ্তযোর্নেত্রযোস্তস্যাঃ পশ্যন্ তিষ্ঠত্যসৌ কবিঃ .
তত্র তস্থাবিযং কিঞ্চিদবিশ্বাস্যাদ্ভুতং যথা .. ২৯..
নিজমানসসন্তানভূতা মালবকন্যকা .
রঙ্গস্থা দীপিকা সাক্ষান্নৈব চ্ছাযা ন সংশযঃ .. ৩০..
পুরা বরাকী যা গ্রামকন্যকা নৈব সাঽঽধুনা .
যথাশাস্ত্রং সমভ্যস্তনৃত্তগীতেযমঙ্গনা .. ৩১..
ইতিবক্তব্যতামূঢো নৈব কিঞ্চিদুবাচ সঃ .
ততঃ সা কন্যকাতীব বিষণ্ণা পরিপৃচ্ছতি .. ৩২..
অথ কিং জনকো দৃষ্টঃ – ন চোত্তরমযং দদৌ .
পিতুরন্ত্যং চিন্তযিত্বা নম্রৈবাশ্রু মুমোচ সা .. ৩৩..
একতারাং সমাশ্লিষ্য বক্ষসি শ্রুতিনির্মলম্ .
দুরন্তপ্রেমচরিতং গাযন্তং তং বযোঽধিকম্ .. ৩৪..
একপুত্রীবিযোগোত্থসন্তাপেনাস্থিমাত্রকম্ .
অপশ্যদন্তে যত্ স্মৃত্বা তেন নিঃশ্বসিতং তদা .. ৩৫.. যুগ্মকম্
অশক্তঃ সান্ত্বনাযাসৌ কবিস্তত্রৈব তিষ্ঠতি .
ভাষাযা নিস্সহাযত্বমাদ্যং জানন্নিব ক্ষণম্ .. ৩৬..
অত্রৈব স্যাত্ কিমু ভবান্ যদ্যেবং তু কদাচন .
দ্রষ্টুং লভ্যেত সন্দর্ভশ্চেতি মৌনং বভঞ্জ সা .. ৩৭..
ত্বদ্দর্শনাভিলাষেণৈবোজ্জযিন্যা নিমন্ত্রণম্ .
মযা স্বীকৃতমদ্যৈতত্ সুকৃতং মে – বচঃ কবেঃ .. ৩৮..
সুকৃতং তন্মমেত্যুক্ত্বা সহসা পুনরাহ সা .
যত্ত্বযা লিখিতং তস্য শ্রবণেঽর্থাববোধনম্ .. ৩৯..
নাসীন্মে কিন্তু কুতুকাত্ তত্র তস্থৌ পুনর্মযা .
তদর্থবোধে হৃদযমর্পিতং ত্বযি সাদরম্ .. ৪০..
দর্শং দর্শং ত্বন্মুখং তত্ কাব্যং শ্রোতুমতঃপরম্ .
ন স্যাত্ সৌভাগ্যমিত্যেব মত্বা চাহমরীরুদম্ .. ৪১..
একদা যত্ ত্বমাগচ্ছস্তন্মে সুকৃতমেব কিম্ .
শব্দং তব শৃণোমি স্ম গুপ্তাহং পুনরপ্যমুম্ .. ৪২..
ভাবত্কভাবনাসৃষ্টকন্যকাত্বেন সাংপ্রতম্ .
রঙ্গেঽতিষ্ঠং তদা যত্তদপি মে সুকৃতং ন কিম্ .. ৪৩..
একশ্বাসেনৈবমুক্ত্বা স্বস্তিকেন নিজোরসি .
স্থিতা সা পঞ্জরগতা শারিকেব মনোহরী .. ৪৪..
তদীযং বচনং স্নেহসান্দ্রং কর্তুমজাযত .
যোঽসৌ তপতি নৈজস্নিগ্ধাত্মনঃ পুরতঃ স্বযম্ .. ৪৫..
দর্শনে পুনরপ্যাশা দর্শনাযেতি কন্যকা .
কিযন্তং কালমেতন্মে দর্শনং – প্রত্যুবাচ সঃ .. ৪৬..
নষ্টস্নেহপ্রদীপৈকবর্তিকাদীপ্তিবত্ তদা .
আগতা চন্দ্রিকা ত্যক্তনিদ্রা রত্রিরিবোজ্জ্বলা .. ৪৭..
আচ্ছাদ্যতাং গবাক্ষোঽত্র জ্যোত্স্না সর্বত্র সংসৃতা .
কেবলং পল্লবোঽযং নৌ সহাযঃ – সাধযাম্যহম্ .. ৪৮..
অসহ্যো বিরহঃ কিন্তু বিরহস্য মুহূর্তকে .
পুনর্দর্শনসৌভাগ্যং মনসা প্রার্থযত্ কবিঃ .. ৪৯..
ছাযানুগামিনং যত্তং কবিমেবানুবর্ততে .
তদার্দ্রনেত্রং গণ্ডেঽস্যা মুক্তাবিন্দূনধারযত্ .. ৫০..
চারচক্ষুরগম্যেন মার্গেণ বিচরন্ কবিঃ .
উবাচ পল্লবং তেঽহং কৃতজ্ঞোঽস্ম্যেব সর্বদা .. ৫১..
কতি সাহসকর্মাণি কৃতানি সুহৃদা ত্বযা .
নিস্সারং তদিতি- স্নেহপারস্পর্যং মনোহরম্ .. ৫২..
পল্লবে গচ্ছতি কবিরেকঃ শয্যাগৃহং গতঃ .
কথমাযাতি বা নিদ্রা চিন্তামগ্নে তু মানসে .. ৫৩..
II
পুনশ্চ কৃষ্ণপক্ষাস্তে বহুবারং সমাগতাঃ .
শ্যামযামেষু ভূযোঽপি বভূবুস্তত্সমাগমাঃ .. ৫৪..
সান্ত্বনাতীতদুঃখস্য মূর্তিমদ্ভাবসম্মিতা .
তিষ্ঠতীযং সমাগত্য মন্দং বাতাযনান্তিকম্ .. ৫৫..
রক্ষ মামিতি তন্নেত্রে প্রার্থনা কিমু বিদ্যতে .
কা রক্ষেতি ন জানানঃ কবিস্তিষ্ঠতি দুঃখিতঃ .. ৫৬..
যদাস্যা নৃত্তগীতেষু যথাবিধ্যনুশীলনম্ .
পূর্তীকরোতি ভূপস্তদ্দিনমেব প্রতীক্ষতে .. ৫৭..
তদনন্তরমস্যান্তঃপুররম্যবধূগণে .
লপ্স্যতে সাপি পদবীমিত্যেষা তু জনশ্রুতিঃ .. ৫৮..
নৃপস্য প্রীতিপাত্রং ত্বমিত্যাচার্যোঽন্তরান্তরা .
তং ব্রবীত্যভিনন্দোক্তিস্বরেণ প্রীতিপূর্বকম্ .. ৫৯..
সাক্ষাদ্ দদর্শৈব তস্যা নৃত্তং বিক্রমভূমিপঃ .
হৃদ্যং ছলিতনৃত্তং তদভিনন্দিতবাংশ্চ সঃ .. ৬০..
কথাঃ সর্বাশ্চ শুশ্রাব কবিস্তস্যা মুখাত্ পরম্ .
হৃদযং দর্শযন্তীব সর্বমেবাব্রবীদসৌ .. ৬১..
বিদ্বত্সভাসু সর্বত্র জযশীলা গিরস্তদা .
অন্তর্লীনা ইবাভান্তি কবের্মূকং তু তিষ্ঠতঃ .. ৬২..
দর্শনেঽস্যা বিষাদোঽস্তি দিদৃক্ষৈব ততঃ পরম্ .
তদন্তরে সম্ভবেযুঃ স্বল্পমাত্রসুখানি চ .. ৬৩..
কদাচিত্ কবিরাহ হ্যঃ স্বপ্নে ত্বাং দৃষ্টবানহম্ .
কণ্বপুত্রীবেষভূষাধারিণীং সুমনোহরীম্ .. ৬৪..
স্বপ্নো যথার্থতামাপ হ্যনন্তরমহামহে .
শাকুন্তলপ্রযোগোঽভূদ্ রাজাজ্ঞানুসৃতং তদা .. ৬৫..
মৃগৈশ্চ সাকং সংবর্ধমানাং তাপসনন্দিনীম্ .
তস্যামাত্তপুনর্জন্মাং দৃষ্ট্বাশ্রূণি মমার্জ সঃ .. ৬৬..
বিটে মধুকরে তস্যাঃ সমাগম্য মুখাম্বুজম্ .
স্পৃষ্ট্বাঽস্পৃষ্ট্বা চ সংভ্রম্য ধিক্কৃতিং পরিকুর্বতি .. ৬৭..
দুষ্যন্তমেবাক্রন্দ ত্বদ্রক্ষণে কেবলে ত্বিমে .
এবং সখ্যোর্হসত্যোঃ স কবির্নম্রমুখো বভৌ .. ৬৮..
বিটাদ্ রক্ষিতুমাক্রন্দেন্নৃপমেব সুরক্ষকম্ .
নৃপোঽপি বিট এবাত্র – জহাস কবিরন্তরা .. ৬৯..
তুষারবিন্দুবচ্ছুভ্রলাবণ্যদ্যুতিবত্ তথা .
সমাযান্তীং মুনিসুতাং স্বান্তিকং সুকুমারিকাম্ .. ৭০..
দৃষ্ট্বাশ্রুপূর্ণনযনঃ পীতচিন্তামধুদ্রবঃ .
নিষীদতি স্ম ভূপালঃ সদস্যগ্রাসনে রসাত্ .. ৭১.. যুগ্মকম্
স্বকীযমবলাজন্মৈবাস্য দুঃখস্য কারণম্ .
নিন্দাবমানযোশ্চেতি ক্রন্দত্যেষা কুমারিকা .. ৭২..
গৃহ্ণীষ্ব মাতর্মামেবং ভূমিদেবীং প্রতি দ্রুতম্ .
হস্তং প্রসার্যাশ্রুপূর্ণনেত্রা চোচ্চৈঃ প্ররোদিতি .. ৭৩..
তদামংস্ত কবিঃ কণ্বপুত্রী চাত্রৈব তিষ্ঠতি .
ইমাং ন কাপি স্বীকর্তুমপ্সরা হ্যাগমিষ্যতি .. ৭৪..
নাটকেঽবসিতে রাজা সাক্ষীকৃত্য সভাসদঃ .
কালিদাসমলঞ্চক্রে স্বর্ণশৃঙ্খলযা করে .. ৭৫..
হস্তনির্ঘোষমুখরং নাট্যগেহমভূত্ তদা .
অথ ক্রমাত্ সদস্যেষু গতেষ্বস্তমিতো রবঃ .. ৭৬..
রাজসন্নিধিমানীতা নাট্যাচার্যৈর্যথাক্রমম্ .
অভিনেতৃবরা যেঽবতস্থুঃ সাঞ্জলযস্ত্বিহ .. ৭৭..
ধৃতকণ্বসুতাবেষামভিনেত্রীং নৃপালকে .
অভিনন্দতি সস্নেহং তস্থৌ নিস্সঙ্গমেব সা .. ৭৮..
ভযং কিং বা পরিভ্রান্তিরিতি জ্ঞাতুমশক্নুষী .
সাদরং সাঞ্জলিকরা সালভঞ্জীব সা স্থিতা .. ৭৯..
কটাক্ষবীক্ষণেনাপি তন্মুখং ন দদর্শ সা .
পতগঃ পতিতঃ কিং বা নৃপান্তর্নযনে তদা .. ৮০..
নিরীক্ষ্য সর্বমুত্তস্থৌ ন নিরীক্ষ্যেব শীঘ্রতঃ .
নিদ্রাগারমবাপ্তুং স নিশ্চক্রাম চ ভূমিপঃ .. ৮১..
III
জ্যোত্স্নাকণবিহীনাযাং নিশাযামপি গচ্ছতি .
অশান্তোঽপি কবিস্তেন পথা শীলবশাত্ স্বযম্ .. ৮২..
অদৃশ্যরাত্রিকুসুমতপ্তনিঃশ্বাসসৌরভম্ .
অন্ধকারেঽপি সান্নিধ্যং প্রসারযতি সর্বতঃ .. ৮৩..
প্রকাশনেচ্ছুরপ্যন্ধতামিস্রে স্থিতযে বিধিঃ .
অত্রাস্ম্যহমিতি প্রাহেবার্দ্রগন্ধপ্রসারণাত্ .. ৮৪..
কঞ্চিত্ প্রতীক্ষ্যান্ধকারে তিষ্ঠদক্ষীব বর্ততে .
গবাক্ষো বিবৃতো যস্য মূকশান্তে পুরোভুবি .. ৮৫..
কবিস্তিষ্ঠতি তদ্দীর্ঘনিঃশ্বাসোষ্মলমারুতে .
কিঞ্চিচ্চঞ্চলিতং কিং বা বিলোলং জালকাংশুকম্ .. ৮৬.. যুগ্মকম্
অপ্রখ্যাপিতমপ্যস্যাগমনং প্রতিপাল্য সা .
নির্বাপিতপ্রদীপা তদাহ্বানোত্কা স্থিতা নু কিম্ .. ৮৭..
ন বিশেষঃ কশ্চিদত্রাগন্তুমৈচ্ছম্- উবাচ সঃ .
নূনমাযাস্যসীত্যেব ভাতি মে স্মেতি সা দ্রুতম্ .. ৮৮..
পূর্ণমৌনেষু নিঃশ্বাসৈর্ব্রণিতেষু কথঞ্চন .
সহসাস্যাঃ কণ্ঠনালাদ্ বচোধারা প্রসারিতা .. ৮৯..
অসূযালুভটৌঘেন পরীতো বর্ততে ভবান্ .
গূঢতন্ত্রৈর্বিজেতুং ত্বাং যো মুহূর্তং প্রতীক্ষতে .. ৯০..
সন্তি কাপট্যগর্তানি ভবন্মার্গেষু সর্বতঃ .
যদি কাচিদ্ বিপত্ স্যাত্ তামশক্তা স্মর্তুমপ্যহম্ .. ৯১..
ন হি শক্নোষি মাং ত্রাতুং মম জন্মেদৃশং কিল .
হবিরস্মি মদর্থং মা জুহোত্বিহ ভবান্ স্বযম্ .. ৯২..
গচ্ছ ত্বং যত্রকুত্রাপি ন চিরান্মা বিশঙ্কযা .
ত্বত্পাদরেণুস্পর্শার্থী দেশঃ কো বা ন বিদ্যতে .. ৯৩..
ভবতো হৃদযস্যাস্য মহাসাম্রাজ্যসীম্নি মে .
স্নেহসিংহাসনং দত্তমেকমিত্যস্তি ধন্যতা .. ৯৪..
ইতঃপরং কাম্যমস্য বনপুষ্পস্য কিং প্রভো .
অগ্নিদগ্ধমিমং গেহং ত্যক্ত্বা যাতু ভবান্ দ্রুতম্ .. ৯৫..
ঘনবর্ষবদুচ্চৈঃ সা প্ররুরোদ ততঃ করম্ .
প্রসার্য জালরন্ধ্রেণ তস্থৌ সা ভাবনির্ভরা .. ৯৬..
স্পৃষ্ট্বাসৌ মৃদুলং হস্তমস্যা মন্দং পরামৃশত্ .
কবেস্তদঙ্গুলীস্পর্শঃ সুধাবর্ষোঽভবত্ তদা .. ৯৭..
ন ভবিষ্যতি কিঞ্চিন্মে কস্মাত্ তেঽশুভচিন্তিতম্ .
কিঞ্চিন্নিঃশ্বস্যাব্রবীত্ সঃ- ত্বাং হিত্বা কুত্র যাম্যহম্ .. ৯৮..
বিন্যস্যোপরি তত্পাণিপল্লবং নিটিলে তথা .
মুখেঽপি নিখিলে তস্থৌ চিত্সুখামৃতপো যথা .. ৯৯..
সমীপে ন বিদূরে ন – পাদন্যাসরবঃ কিমু .
অন্ধকারো বৈরিণোঽপি বন্ধুঃ স্যাদিত্যমন্যত .. ১০০..
স্তব্ধং মনস্তথাপ্যন্তর্ন্যযচ্ছন্নিজসংভ্রমম্ .
বাতাযনং পিধেহীত্থমুক্ত্বামন্ত্র্য জগাম সঃ .. ১০১..
পুনর্দর্শনসৌভাগ্যং নাশশংসোপচারতঃ .
পাদচারেণ সঙ্কেতং প্রাপ শীঘ্রমসৌ কবিঃ .. ১০২..
উত্কণ্ঠযা তদা যত্র দ্বারি তিষ্ঠতি পল্লবঃ .
ভযং ভবতি তদ্দৃষ্টৌ কোঽপূর্বোঽযং পরিভ্রমঃ .. ১০৩..

---

দশমঃ সর্গঃ
রত্নপরীক্ষা
শ্যামযামৈরত্র সূক্ষ্মচারনেত্রাণি তান্যপি .
তযোঃ সমাগমানাং সমভবন্ গূঢসাক্ষিণঃ .. ১..
মরুত্তরঙ্গিতে পত্রব্রাতে মর্মরসন্নিভম্ .
কর্ণাকর্ণিকযা সা চ বার্তা প্রচলিতা দ্রুতম্ .. ২..
সচিবেষ্বন্ততো গত্বা সত্যং তন্মন্ত্রযত্যহো .
অশক্নুবন্ বিশ্বসিতুং তস্থৌ তত্রৈব ভূমিপঃ .. ৩..
যস্য সত্কীর্তিচন্দ্রস্য শীতরশ্মিশতৈরভূত্ .
ধবলোজ্জ্বলবর্ণাভা স্বকীযোজ্জযিনীপুরী .. ৪..
তস্য কাব্যকৃতস্তন্বী সা কিং প্রণযভাজনম্ .
তথাপি বিক্রমার্কস্য সা কথং বিস্মৃতা ভবেত্ .. ৫.. যুগ্মকম্
স্বমনোহারিণী কন্যা পক্ষে তিষ্ঠতি সাংপ্রতম্ .
প্রতিপক্ষে তু ধন্যোঽসৌ কবিমিত্রং চ তিষ্ঠতি .. ৬..
অনযোস্তু পরিত্যক্তুমেকং শক্নোমি হা কথম্ .
ইতি ধর্মব্যথামগ্নো মধ্যে তিষ্ঠতি ভূপতিঃ .. ৭..
কেবলং গ্রামকন্যা সা তথাপি সুরমার্গতঃ .
অপ্সরা ইব চান্দোলাদস্মিন্ রাজাঙ্কণে যদা .. ৮..
অবতীর্ণা তদারভ্য তস্যাং সক্তং মনো মম .
নিরক্ষরা সাদ্য পুনর্নাট্যসঙ্গীতকোবিদা .. ৯.. যুগ্মকম্
তাদৃশীং তাং বধূকর্তুং প্রত্যুদ্গন্তুং যথাবিধি .
শুভাবহাং তিথিং রাজা মুহূর্তং চ প্রতীক্ষতে .. ১০..
কথামিমাং রাজধান্যাং কো ন জানাতি পূর্ণতঃ .
অজ্ঞাত্বা হি কবেশ্চিত্তং তত্সক্তং নৃপমানসম্ .. ১১..
অত্যুদারমনা ভূত্বা যমসৌ সমভাবযত্ .
স এব কবিরত্রৈবমবজানাতি ভূমিপম্ .. ১২..
ইদং তু সর্বং জানন্নেবৈকান্তে চ তযা সহ .
সমাগমায ধিক্কারং কুর্বন্ যোঽসৌ সুহৃত্ কথম্ .. ১৩..
রত্নং সা স কবীন্দ্রোঽপি রত্নং বর্ধিতমূল্যকম্ .
অতস্তং মা ত্যজেত্যেতদুপদেশোক্তিসান্ত্বনম্ .. ১৪..
বিক্রমার্কস্য কর্ণে তু কুর্বন্তি সচিবাঃ সদা .
সামদানাদ্যতিক্রম্য দণ্ডঃ কিং নু বিচার্যতে .. ১৫.. যুগ্মকম্
সচিবৈস্তন্ত্রনিপুণৈর্মনঃসন্তুলনান্বিতৈঃ .
মন্ত্রযন্মোচনোপাযং পশ্যত্যবনিপালকঃ .. ১৬..
ন কিঞ্চিদপি জানামীত্যেবংভাবনযা নৃপঃ .
আসনস্থোঽভবদ্ যস্য পুরতো নীযতে কবিঃ .. ১৭..
বিশ্বাসশীতলজ্যোত্স্নাং হৃদযে সংপ্রসারযন্ .
কুশলং পৃচ্ছতি কবিং রাজা স্মেরমুখাম্বুজঃ .. ১৮..
শ্রোতুং বার্তামতিক্রূরাং স্বীকর্তুং দণ্ডনং তথা .
পীডনং চানুভোক্তুং নিস্সঙ্গভাবেন চেতসা .. ১৯..
সন্নদ্ধঃ কাব্যকারোঽত্র নিষণ্ণো রাজসন্নিধৌ .
সন্নে যস্য মুখে নাসীত্ কিন্তু মন্দস্মিতোদযঃ .. ২০..
অকালসম্ভবত্কালমেঘবর্ষো যথা তথা .
অভিনন্দনবাগ্ধারাং বর্ষত্যস্মিন্ কবৌ নৃপঃ .. ২১..
ছত্রস্যাধশ্চামরস্য বাতো মে বাতি পার্শ্বতঃ .
তথাপি মিত্র তে স্নেহশৈত্যমেবাভিকামযে .. ২২..
কবেঃ স্বচ্ছন্দবাসোঽত্রৈবেতি মে পুলকপ্রদম্ .
তুষ্ট্যা তৃপ্ত্যা কিন্তু সর্গাস্বাস্থ্যেনেহ সমাবস .. ২৩..
পুনরাহ নৃপঃ শ্রীমন্নগাযত পুরা ভবান্ .
অহৈতুকীং প্রাণবতামব্যক্তমধুরাং ব্যথাম্ .. ২৪..
আত্মানুভূতং সত্যং তত্ কিং তে তস্মাদ্ বিমুক্তযে .
প্রযতেঽহং কিং করোমি তদর্থং সদযং বদ .. ২৫..
বিমূকং পুনরপ্যত্রোপবিষ্টং কবিকুঞ্জরম্ .
নিমিমীতে নির্নিমেষং রাজাথোবাচ সুস্মিতম্ .. ২৬..
ভবতোঽযং পুরীবাসো ভবতূল্লাসবান্ সদা .
রম্যবস্তূনি নান্বিষ্যস্যেতৈস্ত্বন্বিষ্যসে পরম্ .. ২৭..
উপহারান্তরং বীরশৃঙ্খলাধিকমোহনম্ .
সমর্পযে করে চাস্মিন্নচিরেণ মহাকবে .. ২৮..
এতেষাং শ্রূযমাণানামজ্ঞাত্বার্থমসৌ কবিঃ .
কিমু বক্তব্যমিত্যেতদপি নো বেত্তি কিঞ্চন .. ২৯..
সামগানসমং রাজভাষণং তন্নিশম্য সঃ .
আদরেণ সমামন্ত্র্য জগাম বসতিং কবিঃ .. ৩০..
উপহারান্তরং বীরশৃঙ্খলাধিকমূল্যকম্ .
কিং স্যাত্ পরীণামগুপ্তকথেব প্রতিভাতি তত্ .. ৩১..
তদুত্তরং প্রতীক্ষ্যাস্মিন্ কবৌ তত্র নিষীদতি .
বিলীযতেঽন্ধকারে তত্কক্ষ্যাগতদিনপ্রভা .. ৩২..
কবাটস্যার্ধপিহিতস্যোদ্ঘাটনরবস্তদা .
শ্রূযতে পাদনিঃস্বানং কঙ্কণক্বণিতং তথা .. ৩৩..
নাপৃচ্ছত্ কেযমিত্যেষ মণিনূপুরশিঞ্জিতম্ .
স্ফুটং বদতি নৈবেযং স্বকীযপরিচারিকা .. ৩৪..
অথেযমস্তি বা কন্যা রম্যা সা প্রিযমানসা .
নৈবেযং সেত্যাহ সর্বব্যাপীদং মদসৌরভম্ .. ৩৫..
কস্যা বস্ত্রাঞ্চলস্যাযং শব্দো বিলুলিতস্য বা .
কস্যা বা তরলোল্লোলবলযোদিতশিঞ্জিতম্ .. ৩৬..
কস্যা বা বিকিরন্ত্যত্র নিঃশ্বাসার্দ্রদলান্যহো .
পস্পর্শ কা কবেরস্য মনঃসূনরজঃস্বপি .. ৩৭..
কবিঃ ক্রমেণ তাং নীচামুদ্দীপযতি বর্তিকাম্ .
পুরতো দৃশ্যমানেযং কা পুনর্মেনকা কিমু .. ৩৮..
অগ্নিপঞ্চকমধ্যস্থামদ্রিকন্যাং তপস্বিনীম্ .
অচঞ্চলাগ্ন্যন্তরবদস্মান্ যোঽদর্শযত্ পুরা .. ৩৯..
কল্পদ্রুপতিতোত্ফুল্লপুষ্পাযাপ্সরসে পুরা .
বাঙ্মযেন পুনর্জন্ম দদৌ যোঽতীব সুন্দরম্ .. ৪০..
অন্যস্যামপ্সরঃপুত্র্যাং পৃথিব্যাঃ পরিশুদ্ধতাম্
লাবণ্যং চ সমন্বীয প্রাদর্শযদিহৈব যঃ .. ৪১..
স কবিশ্চিন্তযামাস সাক্ষাদেবাপ্সরাস্ত্বিযম্ .
কস্যাজ্ঞযেযমাগচ্ছদত্র কিং বাস্য কারণম্ .. ৪২.. কলাপকম্
নৈবাত্র বিক্রমো নৈব বিশ্বামিত্রোঽপি তাপসঃ .
বর্ততেঽত্র বরাকোঽযং কবিরেব হি কেবলম্ .. ৪৩..
বশ্যেন সুস্মিতেনেহ তিষ্ঠতীযং মনোহরী .
নিস্ত্রপং স্বযমেবাস্মৈ সমর্পযিতুমুদ্যতা .. ৪৪..
রাজোপহারোঽমূল্যোঽযমিদানীমেব চাভবত্ .
স্পষ্টা কথাপরীণামগুপ্তিরাসূত্রিতা তদা .. ৪৫..
রাজধান্যাং বিশিষ্টানামতিথীনাং মহীভৃতাম্ .
সত্কারায সুনৈবেদ্যং বিক্রমার্কনৃপাহৃতম্ .. ৪৬..
প্রাংশুলভ্যং ফলমিযং তিষ্ঠতীহ করাঞ্চলে .
কবিং প্রণম্য সা প্রাহ- দাসীযং তব গৃহ্যতাম্ .. ৪৭.. যুগ্মকম্
সুহৃদ্রাজবরৈস্তুল্যং কবিমেনং চ নির্ধনম্ .
সাক্ষাত্ স বিক্রমাদিত্যঃ সত্করোতীহ সাদরম্ .. ৪৮..
অতঃপরং চারিতার্থ্যপ্রদমন্যত্ কিমস্তি হা .
অভিনন্দনসম্মানমপ্যন্যত্ কিমু বিদ্যতে .. ৪৯..
ইত্থং সন্তোষধবলজ্যোত্স্না নোদেতি তন্মুখে .
তত্র প্রত্যুত রোষোঽভিমানজঃ সমুদেতি কিম্ .. ৫০..
অন্তঃক্ষোভং তু সংযম্য কবিরাস্তে বিমূকবত্ .
চিন্তাব্ধিবীচীঃ শমযন্নাত্মশক্তিং চ বর্ধযন্ .. ৫১..
সুতার্যক্ষৌমবাসোঽস্যাঃ স্রস্তং ভবতি চ স্বযম্ .
স্পন্দতে তদুরঃকঞ্চুকাবৃতং কোরকদ্বযম্ .. ৫২..
দ্রবিতুং স্বযমেবাত্র সবিতুঃ কিরণোষ্মণি .
হিমশীকরনির্মুক্তবিকসত্সুমসন্নিভম্ .. ৫৩..
স্ববিগ্রহং সুনির্মাল্যং বিধাতুং স্বযমেব সা .
নিজসৌবর্ণভূষাস্তা বিনির্মোক্তুং সমুদ্যতা .. ৫৪.. যুগ্মকম্
অথ মেতি প্রশান্তং তন্নিষেধতি কবিস্তদা .
সমেত্যালসমস্যোপস্থিতিমাপ বিলাসিনী .. ৫৫..
তটভিত্তটিনীবীচীসমাজ্ঞাতবিলোভিনী .
সাহ রাজনিযুক্তাহং ভবত্প্রিযহিতৈষিণী .. ৫৬..
পানপাত্রং পূরযেঽহং কেন দ্রাক্ষারসেন বা .
দেবপ্রিযেণ কিং ব্রূহি সাক্ষাত্ সোমরসেন বা .. ৫৭..
কেন রাগেণালপামি মদশক্তিপ্রদেন বা .
কেন নৃত্তেন মাযূরপিঞ্ছিকাং বিতনোম্যহম্ .. ৫৮..
অলৌকিকং মাদকং কিমৈন্দ্রিযস্বর্গগোপুরম্ .
প্রোদ্ঘাটযাম্যহং হর্ষাদ্ ভবদর্থং প্রভো বদ .. ৫৯..
সারঙ্গীমধুরে তস্মিন্ স্বররাগসুধাঝরে .
ক্ষীরে সিতেব মৃদুলং মনো লীযেত কস্য বা .. ৬০..
ধ্যানলীনং মহাকালমুপাস্তে যত্ সদৈব তত্ .
আনন্দলযমগ্নং ন ত্বলীযত মনঃ কবেঃ .. ৬১..
দৃঢদীপ্তেন নেত্রেণ নির্বর্ণ্যাহ কবিঃ স তাম্ .
সর্বসম্মোহনং রূপমেতত্ প্রত্যঙ্গসুন্দরম্ .. ৬২..
উন্মাদকং বিশালেঽস্মিন্ প্রপঞ্চহৃদযান্তরে .
বশ্যবাঙ্মযরূপেণালিখিতং চাসকৃন্মযা .. ৬৩..
প্রমাদোঽভূত্ তবাযং – ন তেষাং যেঽস্মিন্ নিশামুখে .
প্রৈষযন্ পুরতো মে ত্বাং সত্যং মে জানতে ন তে .. ৬৪..
রুদন্তি যদি মে দীনং প্রত্যেকং পরমাণবঃ .
পরিত্যজেযুর্মাং তেঽপি স্নেহার্দ্রাযাত্মনঃ কৃতে .. ৬৫..
সুবর্ণনির্মিতো রত্নখচিতশ্চ কৃপাণকঃ .
মারকঃ কিং পাতিতশ্চেত্ সুদৃঢেঽপি হৃদন্তরে .. ৬৬..
অধিকারোগ্রহস্তেন ক্ষিপ্রং মাং প্রতি সম্প্রতি .
বিদ্যুল্লতোজ্জ্বলং শস্ত্রং ত্বমিতি প্রতিভাতি মে .. ৬৭..
এতস্মাদুদ্ভবিষ্যন্তী ক্ষতির্মে খলু দুর্গতিঃ .
জীবতো মৃতিরেবাত্মহতিরেবেতি মন্মতম্ .. ৬৮..
ক্ষত্রবীর্যাণ্যনেকানি নির্জিতানি যযা পুরা .
নগ্নসৌন্দর্যশক্তিঃ সা নিঃসহাযা নিরাকৃতা .. ৬৯..
ততো দুঃসহদুঃখেন প্রতিগন্তুং সমুদ্যতা .
তিষ্ঠেতি কবিনোক্তা সা তস্থৌ শ্রুত্বেব তদ্বচঃ .. ৭০..
কবিরাহার্দ্রমেনাং- ন ত্বয্যনাদৃতিরস্তি মে .
ত্বামিহ প্রৈষযন্ যে তে বাচ্যা বিনযপূর্বকম্ .. ৭১..
ত্বযি সংপ্রীতিমাংশ্চাহং সুতৃপ্তো লীন এব চ .
দৌত্যং তে সফলং সম্যক্ ত্বযা নির্ব্যূঢমিত্যপি .. ৭২..
নিবৃত্য সা নিমেষার্ধং নির্বর্ণ্য চ কবের্মুখম্ .
শান্তেন সুদৃঢেনাপি স্বরেণৈবমভাষত .. ৭৩..
অসত্যকথনাযেমাং মা নির্দিশ মহাপ্রভো .
কুলকর্মণ্যসত্যত্বং নাদ্যাবধি কৃতং মযা .. ৭৪..
রাজ্ঞো দাসীযমাজ্ঞানুসারিণী নাভিসারিণী .
ইতি সত্যোদিতা বাচো হৃদযান্নির্গতা ইব .. ৭৫..
অথারুদত্ সংবৃতাস্যা কবিশ্চাভূত্ সবিস্মযঃ .
নববোধোদযেনেব তীক্ষ্ণসত্যোপদর্শনাত্ .. ৭৬..
ক্ষমস্ব ভদ্রে সদযং যদ্যহং ত্বামখেদযম্ .
অথাশক্ত্যা ন কিঞ্চিত্তামবদত্ কবিকোবিদঃ .. ৭৭..
তস্যাং গতাযাং তদ্দাস্যদৈন্যনিন্দনকর্মণি .
পশ্চাত্তাপেন দগ্ধোঽভূত্ কবিঃ কারুণ্যবানসৌ .. ৭৮..
নাসত্যবাদিনী সৈষা তেন যত্ সুতিরস্কৃতা .
তদপ্যবনিপেন্দ্রঃ শ্বো জ্ঞাস্যত্যেব ন সংশযঃ .. ৭৯..
তস্মাদাবিষ্করিষ্যন্তি তে রাজপুরুষাদযঃ .
কথাবিশেষান্ বিবিধান্ সামদানবৃথাত্বতঃ .. ৮০..
রোষোদযো ভবেচ্চক্রবর্তিনশ্চ ভবত্বযম্ .
সর্বং কিলাত্র হা ছত্রচামরাজ্ঞানিযন্ত্রিতম্ .. ৮১..
নিদ্রাং গচ্ছেত্ পল্লবোঽত্র নিশাপি বহুশো গতা .
প্রাপ্যস্থানং নাস্তি নৈব শ্রোতব্যঃ কশ্চনাপি বা .. ৮২..
কক্ষ্যাদ্বারং বিধাযান্তরালবীথ্যা সুদূরতঃ .
বিনা লক্ষ্যস্থলং মন্দমন্দং গচ্ছত্যসৌ কবিঃ .. ৮৩..
নৃত্যদ্বাতোঽপি নিদ্রাপি বৃক্ষশাখাসু কিং শনৈঃ .
গাযকঃ কৃকরাটঃ কিং ক্ষীণো মৌনং ভজত্যসৌ .. ৮৪..
জগামান্বিষ্য পিহিতং গবাক্ষং কামুকঃ কবিঃ .
কুত্র বা কামিনী সা স্যাত্ প্রতীক্ষানির্ভরাশযা .. ৮৫..
অর্ধবোধ ইবাত্রত্যরাজবীথ্যা স গচ্ছতি .
অজ্ঞাতলক্ষ্যং ভূযোঽপি গচ্ছত্যেব কবিঃ স্বযম্ .. ৮৬..
ভবন্তি নিদ্রাহীনানি জ্বলদ্দীপযুতানি চ .
গণিকানাং গৃহাণ্যত্র পার্শ্বযোরুভযোরপি .. ৮৭..
বীণা চ তন্বীকণ্ঠশ্চ সম্ভূযৈকং সুগীতকম্ .
গাতুং স্পর্ধাং করোতীব কুত্রচিদ্ ভবনাতরে .. ৮৮..
অন্যত্র কামুকোন্মাদো হসত্যুচ্চৈশ্চ গর্জতি .
কস্যাশ্চিন্নৃত্তসুন্দর্যা নূপুরাশিঞ্জিতৈঃ সহ .. ৮৯..
পুরো মকররথ্যা সা বোধহীনেব বর্ততে .
কামাগ্নিদগ্ধবলিপুষ্পাণাং গন্ধেন সন্ততম্ .. ৯০..
নেতি নেতীতি মনসা মন্ত্র্যতে বীথিকা তু যা .
মৃগ্যতে কবিনা সান্যা- দূরে কিমনলপ্রভা .. ৯১..
চিতা প্রশান্তজ্বালাসৌ খ্যাতা পিতৃবনাখ্যযা .
যত্রান্তে প্রাপ্যতে সর্বৈরর্ধরাত্রে মযাপ্যহো .. ৯২..
সক্তোঽসক্তো নৃপো দাসশ্চৈকতল্পং ভজন্নিহ .
শান্তিং গচ্ছেত্ সাম্যদৃষ্টিসারসৌন্দর্যসদ্মনি .. ৯৩..
অত্রৈব সর্বদুঃখানি বিস্মৃত্যানন্যচিন্তযা .
তিষ্ঠত্যুন্মীলিতেনান্তর্লোচনেন মহাকবিঃ .. ৯৪..
কালমেঘজটাজূটাদর্ধচন্দ্রস্ত্বধস্তলম্ .
নিরীক্ষতে তদা ভূতিং জ্যোত্স্নাভস্ম বিলিম্পতি .. ৯৫..
পাবকনেত্রং মীলয সদযং
হে হর বর্ষয চন্দ্রমরীচীঃ .
চিতাসমীপে তস্থৌ কবিরু-
ন্নম্য করৌ চ প্রর্থযতীব
মহেশপাবকনেত্রনিমীলন-
তুল্যং চিত্যামনলা বিগতাঃ .
তরবঃ পিতৃবনসীমনি জাতা-
শ্ছাযা জ্যোত্স্না তদন্তরালে .
শকলীভূযাকাশস্যান্তে
বোধাবোধতলানি মিলিত্বা .
ভঙ্গ্যান্যোন্যং লিখিতমপূর্বল-
যস্যালেখ্যমিবাস্তি মনোজ্ঞম্ .. ৯৬..
কস্মিন্ পটহে চোচ্চৈঃ শ্রুত্যা
কালং কো বা পরিমাত্যত্র
আদিবিলম্বিততালমনুক্ষণ-
মাহা চটুলদ্রুতগতিরাস্তে .
পবনালুলিতজটা ইব বটতরু-
শাখাস্তত্র বিলুলিতাঃ সন্তি .
কৃষ্ণভুজঙ্গফণোন্নযনেন স-
মং তদনাতপনটনং লসতি .
শিবতেজোমযরূপং বিকসিত-
মথ হা গগনাপূর্ণং দৃষ্ট্বা .
কবিরিহ গাযতি- মম হৃদযেন তু
রসিতোগ্রং কুরু নটনং ভগবন্ .. ৯৭..
নৃত্তং কুরু নটনাযক ভবদা-
নন্দশ্রীনটনদ্রুততালঃ
কাননবৃক্ষলতাস্বথ নীচ-
স্থিততৃণকোটিষু সর্বাস্বপি চ .
আর্দ্রমনস্স্বনুশাসননির্দে-
শাজ্ঞানামবিধেযা যে বা
তেষাং হৃদযেষ্বপি চ সিরাসু চ
নিত্যস্পন্দং কুরু তব চরণ-
ধ্বনিরিহ মৃত্যুঞ্জযমন্ত্রধ্বনিঃ .. ৯৮..
অর্ধোক্তৌ বিররামেদং গানমেষ কবিস্ত্বিহ .
ভূমাবুত্তানতঃ ক্ষীণশরীরো নিপপাত হা .. ৯৯