বৃহজ্জাতকম্ – ১১

একাদশমোঽধ্যাযঃ

রাজযোগ

প্রাহুর্যবনাঃ স্ব তুঙ্গগৈঃ ক্রূরৈঃ ক্রূর মতির্মহীপতিঃ |
ক্রূরৈস্তু ন জীব শর্মণঃ পক্ষে ক্ষিত্যধিপঃ প্রজাযতে || ১||
বক্রার্কজার্ক গুরুভিঃ সকলৈস্ত্রিভিশ্চ স্বোচ্চেষু ষোডশ নৃপাঃ কথিতৈকলগ্নে |
দ্ব্যেকাশ্রিতেষু চ তথাইকতমে বিলগ্নে স্ব ক্ষেত্রগে শশিনি ষোডশ ভূমিপাঃ স্যুঃ || ২||
বর্গোত্তম গতে লগ্নে চন্দ্রে বা চন্দ্র বর্জিতঃ |
চতুরাদ্যৈর্গ্রহৈর্দৃষ্টে নৃপা দ্বাবিংশতিঃ স্মৃতাঃ || ৩||
যমে কুম্ভে অর্কে অজে গবি শশিনি তৈরেব তনুগৈর্নৃ যুক্তিং সহালিস্থৈঃ শশিজ গুরু বক্রৈর্নৃ পতযঃ |
যমেন্দূ তুঙ্গে অঙ্গে সবিতৃ শশিজৌ ষষ্ঠ ভবনে তুলাজেন্দু ক্ষেত্রৈঃ স সিত কুজ জীবৈশ্চ নরপৌ || ৪||
কুজে তুঙ্গে অর্কেন্দ্বোর্ধনুষি যম লগ্নে চ কুপতিঃ পতির্ভূমেশ্চান্যঃ ক্ষিতি সুত বিলগ্নে স শশিনি |
স চন্দ্রে সৌরে অস্তে সুর পতি গুরৌ চাপ ধরগে স্ব তুঙ্গস্থে ভানাবুদযম্ উপযাতে ক্ষিতি পতিঃ || ৫||
বৃষে সেন্দৌ লগ্নে সবিতৃ গুরু তীক্ষ্ণাংশু তনযৈঃ সুহৃজ্ জাযা খস্থৈর্ভবতি নিযমান্ মানব পতিঃ |
মৃগে মন্দে লগ্নে সহজরিপু ধর্ম ব্যয গতৈঃ শশাঙ্কাদ্যৈঃ খ্যাতঃ পৃথু গুণযশাঃ পুঙ্গল পতিঃ || ৬||
হযে সেন্দৌ জীবে মৃগ মুখ গতে ভূমি তনযে স্ব তুঙ্গস্থৌ লগ্নে ভৃগুজ শশিজাবত্র নৃ পতী |
সুতস্থৌ বক্রার্কী গুরু শশি সিতাশ্চাপি হিবুকে বুধে কন্যা লগ্নে ভবতি হি নৃপোঽন্যোঽপি গুণবান্ || ৭||
ঝষে সেন্দৌ লগ্নে ঘট মৃগ মৃগেন্দ্রেষু সহিতৈর্যমারার্কৈর্যোঽভূত্ স খলু মনুজঃ শাস্তি বসুধাম্ |
অজে সারে মূর্তৌ শশি গৃহ গতে চামর গুরৌ |
সুরেজ্যে বা লগ্নে ধরণি পতিরন্যোঽপি গুণবান্ || ৮||
কর্কিণি লগ্নে তত্স্থে জীবে চন্দ্র সিত জ্ঞৈরায প্রাপ্তৈঃ |
মেষ গতে অর্কে জাতং বিদ্যাদ্ বিক্রমযুক্তং পৃথ্বী নাথম্ || ৯||
মৃগ মুখে অর্ক তনযস্তনু সংস্থঃ ক্রিয কুলীর হরযোঽধিপযুক্তাঃ |
মিথুন তৌলি সহিতৌ বুধ শুক্রৌ যদি তদা পৃথু যশাঃ পৃথিবীশঃ || ১০||
স্বোচ্চ সংস্থে বুধে লগ্নে ভৃগৌ মেষূরণাশ্রিতে |
স জীবে অস্তে নিশা নাথে রাজা মন্দারযোঃ সুতে || ১১||
অপি খল কুল জাতা মানবারাজ্য ভাজঃ কিম্ উত নৃপ কুলোত্থাঃ প্রোক্ত ভূ পালযোগৈঃ |
নৃ পতি কুল সমুত্থাঃ পার্থিবা বক্ষ্যমাণৈর্ভবতি নৃ পতি তুল্যস্তেষ্বভূ পাল পুত্রঃ || ১২||
উচ্চ স্ব ত্রিকোণগৈর্বলস্থৈস্ত্র্যাদ্যৈর্ভূ পতি বংশজা নরেন্দ্রাঃ |
পঞ্চাদিভিরন্য বংশ জাতা হীনৈর্বিত্তযুতা ন ভূমি পালাঃ || ১৩||
লেখাস্থে অর্কে অজেন্দৌ লগ্নে ভৌমে স্বোচ্চে কুম্ভে মন্দে |
চাপ প্রাপ্তে জীবে রাজ্ঞঃ পুত্রং বিন্দ্যাত্ পৃথ্বী নাথম্ || ১৪||
স্বঋক্ষে শুক্রে পাতালস্থে ধর্ম স্থানং প্রাপ্তে চন্দ্রে |
দুশ্চিক্যাঙ্গ প্রাপ্তি প্রাপ্তৈঃ শেষৈর্জাতঃ স্বামী ভূমেঃ || ১৫||
সৌম্যে বীর্যযুতে তনু যুক্তে বীর্যাঢ্যে চ শুভে শুভযাতে |
ধর্মার্থোপচযেষ্ববশেষৈর্ধর্মাত্মা নৃপজঃ পৃথিবীশঃ || ১৬||
বৃষোদযে মূর্তি ধনারি লাভগৈঃ শশাঙ্ক জীবার্ক সুতাপরৈর্নৃপঃ |
সুখে গুরৌ খে শশি তীক্ষ্ণ দীধিতী যমোদযে লাভ গতৈর্নৃপোঽপরৈঃ || ১৭||
মেষূরণায তনুগাঃ শশি মন্দ জীবা জ্ঞারৌ ধনে সিতরবী হিবুকে নরেন্দ্রম্ |
বক্রাসিতৌ শশি সুরেজ্য সিতার্ক সৌম্যা হোরা সুখাস্ত শুভ খাপ্তি গতাঃ প্রজেশম্ || ১৮||
কর্ম লগ্নযুত পাকদশাযাং রাজ্য লব্ধিরথ বা প্রবলস্য |
শত্রু নীচ গৃহযাতদশাযাং চ্ছিদ্র সংশ্রযদশা পরিকল্প্যা || ১৯||
গুরু সিত বুধ লগ্নে সপ্তমস্থে অর্ক পুত্রে বিযতি দিবস নাথে ভোগিনাং জন্ম বিন্দ্যাত্ |
শুভ বলযুত কেন্দ্রৈঃ ক্রূর সংস্থৈশ্চ পাপৈর্ব্রজতি শবরদস্যু স্বামিতাম্ অর্থ ভাক্ চ || ২০||