ফলদীপিকা – ২০

বিংশোঽধ্যাযঃ

অন্তর্দশাফল

ভাবেশ্বরেণ প্রবলেন যেন যদ্যত্ফলং হীনবলেন যেন |
যদানুভোক্তব্যমনন্যসম্যক্সংসূচযিষ্যত্যথ সংগ্রহেণ || ১||
লগ্নে বলিষ্ঠে জগতি প্রভুত্বং সুখস্থিতি দেহবলং সুবর্চঃ |
উপর্যুপর্যভ্যুদযাভিবৃদ্ধিং প্রাপ্নোতি বালেন্দুবদেষ জাতঃ || ২||
পাকেঽর্থনাথস্য কুটুম্বসিদ্ধিং
সত্পুত্রিকাপ্তিং সুখভোজনং চ |
প্রাপ্নোতি বাগ্জীবিকযা ধনানি
বক্তা সদুক্তিং সদসি প্রশস্তাম্ || ৩||
শৌর্যে সবীর্যে সহজানুকূল্যং
সণ্তোষবাতশ্রিবণং চ শৌর্যং |
সেনাপতিত্বং লভতেঽভিমানং
জনাশ্রযং সদ্গুণভাজনত্বম্ || ৪||
বন্ধূপকারং কৃষকর্মসিদ্ধিং স্ত্রীসঙ্ঘমং বাহনলাভমেতি |
ক্ষেত্রং গৃহং নূতনুমর্থসিদ্ধিং স্থানংপ্রশস্তং চ সুখেশ্দাযে || ৫||
পুত্রপ্রাপ্তিং বন্ধুবিলাসং নৃপতীনাং
সাচিব্যং বা ধীশদশাযাং বহুমানম্ |
প্রাজ্যৈর্ভোজ্যৈর্মৃষ্টমিহাশ্নাতি দদাতি
শ্রেযস্কার্যং সজ্জনশস্তং স বিদধ্যাত্ || ৬||
রিপূন্নিহন্তি সাহসৈররীশ্বরস্য বত্সরে |
অরোগতানুদারতামধৃষ্যতামতিশ্রিযম্ || ৭||
সম্পাদ্য বস্ত্রাভরণানি শয্যাং
প্রীতো রমণ্যা রমতেঽতিবীর্যঃ |
করোতি কল্যাণমহোত্সবাদীন্
সন্তোষযাত্রাং চ মদেশদাযে || ৮||
ঋণবিমোচনমুচ্ছ্রতিমাত্মনঃ
কলহকৃত্যনিবৃত্তিমুপৈতি সঃ |
মহিষপশ্বজভৃত্যজনাগমং
বযসি রন্ধ্রপতের্বলশালিনঃ || ৯||
স্ত্রীপুত্রপৌত্রৈঃ সহবন্ধুবর্গৈ-
র্ভাগ্যংশ্রিযং চানুভবত্যজস্ত্রম্ |
শ্রেযাংসি কার্যাণ্যবনীশপূজাং
ভাগ্যেশদাযে বিজদেবভক্তিম্ || ১০||
যত্কার্যমারব্ধমুপৈত্যনেন
তস্যৈব সিদ্ধিং সুখজীবনং চ |
কীর্তিং প্রতিষ্ঠাং কুশলপ্রবৃত্তিং
মানোন্নতিং কর্মপতের্দশাযাম্ || ১১||
এশ্বর্যমব্যাহতমিষ্টবন্ধু-
সমাগমং ভৃত্যজনাংশ্চ দাসান্ |
সংসারসৌভাগ্যমহোদযং চ
লভেত লাভাধিপতের্দাশাযাম্ || ১২||
ব্যযেশিতুর্বযস্যতিব্যযং করোতি সজ্জনে |
অঘৌঘনাশিনীং শুভক্রিযাং মহীশমান্যতাম্ || ১৩||
বক্রগস্য নিজতুঙ্গসুহৃত্-
সুস্থানগস্য দশাফলমেবম্ |
শত্রুনীচগৃহমৌঢ্যষডন্ত্য-
ছিদ্রগস্য তু ফলান্যপি বক্ষ্যে || ১৪||
দুঃস্থেলগ্নপতৌ নিরোধনমুপৈত্যজ্ঞাতবাসং ভযং
ব্যাধ্যাধীনপরক্রিযাভিগমনং স্থানচ্যুতিং চাপদম্ |
জাড্যং সংসদি বাক্কুটুম্বচলনং দুষ্পত্রিকাং দৃগ্রুজং
বাগ্দোষং দ্রবিণব্যযং নৃপভযং দুঃস্থে দ্বিতীযাধিপে || ১৫||
দুশ্চিক্যাধিপতৌ সহোদরমৃতিং কার্যে দুরালোচনা-
মন্তঃশত্রু নিপীডনং পরিভবং তদ্গর্বভঙ্গ বদেত্ |
মাতৃক্লেশমরিষ্টমিষ্ঠসুহৃদাং ক্ষেত্রগৃহোপপ্লুতিং
পশ্বশ্বাদিবিনাশনং জলভযং পাতালনাথেঽবলে || ১৬||
বীর্যোনে প্রতিভাপতৌ সুতমৃতির্বুদ্ধিভ্রমং পঞ্চনা-
মধ্বানং হ্যুদরামযং নরপতেঃ কোপং স্বশক্তিক্ষযম্ |
চোরাদ্ভীতিমনর্থতাং চ দমনং রোগান্ বহূন্দুষ্কৃতিং
ভৃত্যত্বং লভতেঽবমানমযশঃ ষষ্ঠেশদাযে ব্রণম্ || ১৭||
জামাতুর্ব্যসনং কলত্রবিরহং স্ত্রীহেত্বনর্থাগমং
দ্যূনেশে বিবলিন্যসত্যভিরতিং গুহ্যামযং চাটনম্ |
রন্ধ্রেশাযুষি শোকমোহমদমাত্সর্যাদিমূর্চ্ছোচ্ছ্রিতিং
দারিদ্র্যং ভ্রমণং বদেদপযশোব্যাধীনবজ্ঞাং মৃতিম্ || ১৮||
পূর্বোপাসিতদেবকোপমশুভং জাযাতনূজাপদং
দৌষ্কৃত্যং স্বগুরোঃ পিতুশ্চ নিধনং দৈন্যং শুভে দুর্বলে |
যদ্যত্কর্ম করোতি তত্তদফলং স্যান্মানভঙ্গো নভো-
ভাবে দুর্গুণতাং প্রবাসমশুভং দুর্বৃত্তমাপন্নতাম্ || ১৯||
শ্রবণমশুভবাচাং ভ্রতৃকষ্টং সুতাতিং
ভবপবযসি দৈন্যং বঞ্চনং কর্ণরোগম্ |
বহুরুজমপমানং বন্ধনং সর্বসম্পত্-
ক্ষযমপরশশীবাঽযাতি রিঃফেশদাযে || ২০||
মংজ্ঞাযাং যদগাচ্চ কারকবিধিশ্লোকেষু যজ্জল্পিতং
কর্মাজীবনিরূপিতং ফলমিদং যদ্রোগচিরতাবিধৌ |
যদ্যস্যোক্ষণযোগসংভবফলং ভাবেশযোগোদ্ভবং
ভাবেশৈরপি ভাবগৈরপি ফলং বাচ্যং দশাযামিহ || ২১||
বর্গোত্তমাংশস্থদশা শুভপ্রদা
মিশ্রৈব সা চাস্তমিতে চ নীচগে |
মৃত্যুব্যযারীশদশাপহারযো-
স্তত্র স্থিতস্যাপ্যশুভং ফলং ভবেত্ || ২২||
ক্রূরগ্রহস্যৈব দশাপহারে
ত্রিপঞ্চসপ্তর্ক্ষপতেবিপাকে |
তথৈব জন্মাষ্টমনাথভুক্তৌ
চোরারিপীডাং লভতেঽতিদুঃখম্ || ২৩||
শনেশ্চতুর্থী চ গুরোস্তু ষষ্ঠী
দশা কুজাহ্যোর্যদি প~চমী সা |
কষ্ট ভবেদ্রাশ্যবসানভাগ-
স্থিতস্য দুঃস্থানপতেস্তথৈব || ২৪||
উর্ধ্বাস্যতুঙ্গভবনস্থিতভূমিজস্য
কর্মাযগস্য হি দশা বিদধাতি রাজ্যম্ |
জিত্বা রিপূন্বিপুলবাহনসৈন্যযুক্তাং
রাজ্যশ্রিযং বিতনুতেঽধিকমন্নদানম্ || ২৫||
স্বোচ্চস্থিতো ভৃগুসুতো ব্যযকর্মগো বা
লাভেঽপি বাঽস্তরহিতো ন চ পাপযুক্তঃ |
তস্যাব্দপাকসমযে বহুরত্নপূর্ণো
ধীমান্বিশালবিভবো জযতি প্রশস্তঃ || ২৬||
নীচারিষষ্ঠব্যযসংশ্রিতা হি
শুভাঃ প্রযচ্ছন্ত্যশুভানি সর্বে |
শুভেতরাস্ত্বেষু গতাঃ প্রযচ্ছ-
ন্ত্যমোঘদুঃখানি দশাসু তেষম্ || ২৭||
দশেশত্রোররিগেহভাজো
লগ্নেশশত্রোরপি বাঽথ ভুক্তৌ |
শত্রোর্ভযং স্থানলযঃ তদাস্য
স্নিগ্ধোপি শত্রুত্বমুপৈতি নূনম্ || ২৮||
যদ্ভাবগঃ পাকপতির্দশেশাত্-
তদ্ভাবজাতানি ফলানি কুর্যাত্ |
বিপক্ষরিঃফাষ্টমভাবগশ্চেদ্-
দুঃখং বিদধ্যাদিতরত্র সৌখ্যম্ || ২৯||
স্বোচ্চত্রিকোণস্বহিতারিনীচে
পূর্ণং ত্রিপাদার্দ্ধপদাল্পশূন্যম্ |
ক্রমাচ্ছুভং চেদশুভং বিলোমাট্
মূঢে গ্রহে নীচসমং ফলং স্যাত্ || ৩০||
মন্দমান্দ্যগুখরেশরন্ধ্রপাঃ-
তন্নবাংশপতযোঽপি যে গ্রহাঃ |
তেষু দুর্বলদশা মৃতিপ্রদা
কষ্টভে চরতি সূর্যনন্দনে || ৩১||
মৃতীশনাথস্থিতভাংশকেশযোঃ
খরত্রিভাগেশ্বরযোর্বলীযসঃ |
দশাগমে মৃত্যুযুক্তভাংশক-
ত্রিকোণগে দেবগুরৌ তনুক্ষযঃ || ৩২||
চতুষ্টযস্থা গুরুজন্মলগ্নপা
ভবন্তি মধ্যে বযসঃ সুখপ্রদাঃ |
ক্রমেণ পৃষ্ঠোভযমস্তকোদয-
স্থিতোঽন্ত্যমধ্যপ্রথমেষু পাকদঃ || ৩৩||
যদ্ভাবগো গোচরতো বিলগ্নাত্-
দশেশ্বরঃ স্বোচ্চসুহৃদ্গৃহস্থঃ |
তদ্ভাবপুষ্টিং কুরুতে তদানীং
বলান্বিতশ্চেজ্জননেঽপি তস্য || ৩৪||
বলোনিতো জন্মনি পাকনাথো
মৌঢ্যং স্বনীচং রিপুমন্দিরং বা |
প্রাপ্তশ্চ যদ্ভাবমুপৈতি চারাত্-
তদ্ভাবনাশং কুরুতে তদানীম্ || ৩৫||
দশেশস্য তুঙ্গে সুহৃদ্ভে দশেশাত্
ত্রিষত্কর্মলাভত্রিকোণাস্তভেষু |
যদা চারগত্যা সমাযাতি চন্দ্রঃ
হুভং সংবিধত্তেঽন্যথা চেদরিষ্টম্ || ৩৬||
পাকপ্রভুর্গোচরতঃ স্বনীচং
মৌঢ্যং যদাযাতি বিপক্ষভং বা |
কষ্টং বিদধ্যাত্স্বগৃহং স্বতুঙ্গং
বক্রং গতঃ সৌখ্যফলং তদানীম্ || ৩৭||
পাকেশস্য শুভপ্রদস্য ভবনং তুঙ্গং প্রপন্নে যদা
সূর্যে তত্ফলসিদ্ধিমেতি গুরুণাপ্যেবং ফলং চিন্তযেত্ |
নীচং কষ্টফলপ্রদস্য চ দশানাথস্য বৈরিস্থলং
প্রাপ্তে ভাস্বতি গোচরেণ লভতে তস্যৈব কষ্টং ফলম্ || ৩৮||
যেন গ্রহেণ সহিতো ভুজগাধিনাথ-
স্তত্খেটজাতগুণদোষফলানি কুর্যাত্ |
সর্পান্বিতঃ স তু খগঃ শুভদোঽপি কষ্টং
দুঃখং দশান্ত্যসমযে কুরুতে বিশেষাত্ || ৩৯||
দ্বাবর্থকামাবিহ মারকাখ্যৌ
তদীশ্বরস্তত্র গতো বলাঢ্যঃ |
হন্তি স্বপাকে নিধনেশ্বরো বা
ব্যযেশ্বরো বঽপ্যতিদুর্বলশ্চেত্ || ৪০||
কেন্দ্রেশস্য সতোঽসতো.শুভশুভৌ কুর্যাদ্দশা কোণপাঃ
সর্বে শোভনদাস্ত্রিবৈরিভবপা যদ্যপ্যনর্থপ্রদাঃ |
রন্ধ্রেশোঽপি বিলগ্নপো যদি শুভং কুর্যাদ্রবির্বা শশী
যদ্যেবং শুভদঃ পরাশরমতং তত্তদ্দশাযাং ফলম্ || ৪১||
কোণাধীশঃ কেন্দ্রগঃ কেন্দ্রপো বা
কোণস্থশ্চেদ্ দ্বৌ চ যোগপ্রদৌ স্তঃ |
দ্বাবপ্যেতৌ ভুক্তিকালে দশাযা-
মন্যোন্যং তৌ যোগদৌ সোপকারৌ || ৪২||
ন দিশেযুর্গ্রহাঃ সর্বে স্বদশাসু স্বভুক্তিষু |
ভবাশুভফলং নৄণামাত্মভাবানুরূপতঃ || ৪৩||
আত্মসম্বন্ধিনো যে চ যে যে নিজসর্ধামিণঃ |
তেষামন্তর্দাস্বেব দিশন্তি স্বদশাফলম্ || ৪৪||
কেন্দ্রত্রিকোণনেতারৌ দোষযুক্তাবপি স্বযম্ |
সম্বন্ধুমাত্রাদ্বলিনৌ ভবেতাং যোগকারকো || ৪৫||
ত্রিকোণাধিপযোর্মধ্যে সম্বন্ধো যেন কেনচিত্ |
কেন্দ্রনাথস্য বলিনো ভবেদ্যদি স যোগকৃত্ || ৪৬||
কেন্দ্রত্রিকোণাধিপযোরৈক্যে তৌ যোগকারকৌ |
অন্যত্রিকোণপতিনা সংবন্ধো যদি কিং পুনঃ || ৪৭||
যোগকারকসম্বন্ধাত্পাপিনোঽপি গ্রহাঃ স্বতঃ |
তত্তদ্ভুক্ত্যানুসারেণ দিশেযুর্যৌগিকং ফলম্ || ৪৮||
স্বদশাযাং ত্রিকোণেশো শুক্তৌ কেন্দ্রপতেঃ শুভম্ |
দিশেত্সোঽপি তথা নো চেদসংবন্ধেঽপি পাপকৃত্ || ৪৯||
কেন্দ্রাধিপত্যদোষস্তু বলবান্ গুরুশুক্রযোঃ |
মারকত্বেঽপি চ তযোর্মারকস্থানসংস্থিতিঃ || ৫০||
বুধস্তদনু চংদ্রোঽপি ভবেত্ত্দনু তদ্বিধঃ |
পাপাশ্চেত্কেন্দ্রপতযঃ শুভদাশ্চোত্তরোত্তরম্ || ৫১||
যদি কেন্দ্রে ত্রিকোণে বা নিবসেতাং তমোগ্রহৌ |
নাথেনান্যতরস্যৈব সংবন্ধাদ্যোগকারকৌ || ৫২||
তমোগ্রহৌ শুভারূঢৌঽসংবদ্ধৌ যেন কেনচিত্ |
অন্তর্দশানুরূপেণ ভবেতাং যোগকারকৌ || ৫৩||
আরম্ভো রাজযোগস্য ভবেন্মারকভুক্তিষু |
প্রথযন্তি তমারভ্য ক্রমশঃ পাপভুক্তযঃ || ৫৪||
রন্ধ্রস্থরন্ধ্রেক্ষকরন্ধ্রনাথ-
রন্ধ্রত্রিভাগাধিপমান্দিভেশাঃ |
দুঃখপ্রদাস্তেষ্বপি দুর্বলো যঃ
স নাশকারী স্বদশাপহারে || ৫৫||
ভ্রষ্ঠস্য তুঙ্গাদবরোহিসংজ্ঞা
মধ্যা ভবেত্সা সুহৃদুচ্চভাগে |
আরোহিণী নিম্নপরিচ্যুতস্য
নীচারিভাংশেষ্বধমা ভবেত্সা || ৫৬||
শস্তগৃহে শস্তাংশে নীচে রিপুভেঽস্তসংস্থিতে বাঽপি |
তস্য দশা মিশ্রফলা দশাপরার্ধে ফলপ্রদা জ্ঞেযা || ৫৭||
তত্তদ্ভাবাত্ব্যযথস্য তদ্ভাবব্যযপস্য চ |
বীর্যহীনস্য খেটস্য পাকে মৃত্যুমবাপ্নুযাত্ || ৫৮||
দশাপতির্লগ্নগতো যদি স্যাত্
ত্রিষট্দশৈকাদশগশ্চ লগ্নাত্ |
তত্সপ্তবর্গেঽপ্যথ তত্সুহৃদ্বা
লগ্নে শুভো বা শুভদা দশা স্যাত্ || ৫৯||
যাবন্তি বর্ষণি দশা চ সা স্যাত্-
চারক্রমাত্তত্র দশাপতিঃ সঃ |
যত্র স্থিতস্তদ্ভবনাদ্বিধোস্তু
স্থিতেঃ প্রকল্প্যং সদসত্ফলং হি || ৬০||
দশাধিনাথস্য সুহৃদ্গৃহস্থ-
স্তদুচ্চগো বাঽথ দশাধিনাথাত্ |
স্মরত্রিকোণোপচযোপগশ্চ
দদাতি চন্দ্রঃ খলু সত্ফলানি || ৬১||
উক্তেষু রাশিষু গতস্য বিধোঃ স রাশিঃ
স্যাজ্জন্মকালভবমূর্তিধনাদিভাবঃ |
তত্তদ্বিবৃধিকৃদসৌ কথিতো নরাণাং
তদ্ভাবহানিকৃদথেতররাশিসংস্থঃ || ৬২||
সারাবলীমুডুদশাং চ বরাহহোরা-
মালোক্য জাতকফলং প্রবদেন্নরাণাম্ |
প্রশ্নোদযগ্রহবশাদথ বা স্বজন্ম-
রাশ্যাদিনা বদতু নাস্ত্যনযোর্বিশেষঃ || ৬৩||