ফলদীপিকা – ০৭

সপ্তমোঽধ্যাযঃ

রাজযোগ

ত্র্যাদ্যৈহ্ খেটৈঃ স্বোচ্চগৈঃ কেন্দ্রসংস্তহিঃ স্বর্ক্ষস্থৈর্বা ভূপতিঃ স্যাত্প্রসিদ্ধিঃ |
পঞ্চাদ্যৈস্তৈরন্যবংশপ্রসূতোঽপ্যুর্বীনাথো বারণাশ্বন্ঘযুক্তঃ || ১||
ভূপঃ স্যুর্নৃপবংশজাস্তু যদি দুর্যোগে ন জাতাস্তথা
হ্যন্তার্ধির্নহি চেত্করাদ্দিনকরাজ্জানাঃ স্ফুরন্ত্যেব তে |
ত্র্যাদ্যৈঃ কেন্দ্রগতৈঃ স্বভোচ্চসহিতৈর্ভূপোদ্ভবাঃ পার্থিবাঃ
মর্ত্যস্ত্বন্যকুলোদ্ভবাঃ ক্ষিতিপতেস্তুল্যাঃ কদাচিন্নৃপাঃ || ২||
যদ্যেকোঽপি বিরাজিতংশুনিকরঃ সুস্থানগো বক্রগো
নীচস্থোঽপি করোতি ভূপসদৃশং দ্বৌ ব ত্রযো বা গ্রহাঃ |
এবং চেজ্জনযন্তি ভূপতিনমী শস্তাংশরাশিস্থিতা
স্তদ্বচ্চেদ্বহবো নৃপং সমকুটচ্ছত্রোল্লসচ্চামরম্ || ৩||
দ্বৌ বা ত্র্যাদ্যা দিগ্বলযুক্তা যদিজাতঃ
ক্ষ্মাভৃদ্বংশে ভূমিপতিঃ স্যাজ্জযশীলঃ |
হিত্বা মন্দং পঞ্চখগা দিগ্বলযুক্তা-
শ্চত্বারো বা ভূপতিরন্যান্বযজোঽপি || ৪||
গণোত্তমে লগ্ননবাংশকোদ্গমে নিশাকরশ্চাপি গণোত্তমেঽপি বা |
চতুর্গ্রহৈশ্চন্দ্রবির্বনিতৈস্তদা নিরীক্ষিতঃ স্যাদধমোদ্ভবো নৃপঃ || ৫||
বিলগ্নেশঃ কেন্দ্রে যদি তপসি বর্গোত্তমগতঃ
স্বতুঙ্গে স্বর্ক্ষে বা গুরুপতিরপি স্যাদ্যদি তথা |
গজস্খন্ধে কার্তস্বরকৃতবিমানেঽতিসুষমে |
সুখাসীনং ভূপং জনযতি লসচ্চামরযুগম্ || ৬||
নিষাদমপি পার্থিবং জনযতীন্দুরুচ্চস্বভব-
স্থিতগ্রহনিরীক্ষিতো ধবলকাম্তিজাল্লোজ্জ্বলঃ |
বিহায তনুভং কলাস্ফুরিতপূর্ণকান্তিঃ শশী
চতুষ্টযগতো নৃপং জনযতি দ্বিপাশ্বান্বিতম্ || ৭||
অশ্বিন্যামুদযগতো ভৃগুর্গ্রহেন্দ্রৈ
র্দৃষ্টশ্চেজ্জনযতি ভূপতিং জিতারিম্ |
নীচার্যোর্গৃহমহপহায বিত্তসংস্থো
লগ্নেশঃ সহ কবিনা বহী চ ভূপম্ || ৮||
ভৌমশ্চেদজহরিচাপলগ্নসংস্থঃ
পৃথ্বীশং কলযতি মিত্রখেটদৃষ্টঃ |
কর্মেশো নবমগতশ্চ ভাগ্যনাথো
মধ্যস্থো ভবতি নৃপো জনৈঃ প্রশস্তঃ || ৯||
চাপার্দ্ধে ভগবান্ সহস্রকিরণস্তত্রৈব তারাধিপো
লগ্নে ভানুসুতেঽতিবীর্যসহিতঃ স্বোচ্চে চ ভূনন্দনঃ |
যদ্যেবং ভবতি ক্ষিতেরধিপতিঃ সংশ্রুত্য দূরং ভযাত্
ত্রস্তা এব নমন্তি তস্য রিপবো দগ্ধাঃ প্রতাপাগ্নিনা || ১০||
সুধামৃণালোপমবিম্বশোভিতঃ শশী নবাংশে নলিনীপ্রিযস্য
যদি ক্ষিতীশো বহুহস্তিপূর্ণঃ শুভাশ্চ কেন্দ্রেষু ন পাপযুক্তাঃ || ১১||
নীচারিবর্গরহিতৈর্বিহগৈস্ত্রিভিস্তু
স্বাংশোপগৈর্বলযুতৈঃ শুভদৃষ্টিজুষ্টৈঃ |
গোক্ষীরশঙ্খধবলোমৃগলাঞ্ষ্ছনশ্চ
স্যাদ্যস্য জন্মনি স ভূমিপতির্জিতারিঃ || ১২||
কুমুদগহনবন্ধুং শ্রেষ্ঠমংশং প্রপন্নং
যদি বলসমুপেতঃ পশ্যতি ব্যোমচারী |
উদযভবনসংস্থঃ পাপসংজ্ঞো ন চৈবং
ভবতি মনুজনাথঃ সর্বভৌমঃ সুদেহঃ || ১৩||
জিবো বুধো ভৃগুসুতোঽথ নিশাকরো বা
ধর্মে বিশুদ্ধতনবঃ স্ফুটরশ্মিজালাঃ |
মিত্রৈর্নিরীক্ষিতযুতা যদি সূতিকালে
কুর্বন্তি দেবসদৃশং নৃপাতিং মহান্তম্ || ১৪||
শুক্রেড্যৌ সবিতুঃ শিশুস্তিমিযুগে স্বোচ্চে চ পূর্ণঃ শশী
দৃষ্টস্তীব্রবিলোচনেন দিনকৃন্মেষোদযেঽসৌ নৃপঃ |
সেনাযাশ্চলনেন রেণুপটলৈর্যস্য প্রবিষ্টে রবা-
বস্তভ্রান্তিসমাকুলা কমলিনী সংকোচমাগচ্ছতি || ১৫||
নীচারিস্থৈর্ভবভবনগৈঃ পষ্ঠদুশ্চিক্যগৈর্বা
সৌম্যৈঃ স্বোচ্চং পরমুপগতৈর্নির্মলৈঃ কেন্দ্রগৈর্বা |
আজ্ঞাং যতে শিশিরকিরণে কর্কটস্থে বিশাযা
মেকচ্ছত্রং ত্রিভুবনমিদং যস্য স ক্ষত্রিযেশঃ || ১৬||
বর্গোত্তমে হিমকরঃ সকলঃ স্থিতোঽংশে
কুর্যান্মহীপতিমপূর্বযশোঽভিরামম্ |
যস্যাশ্ববৃন্দখুরঘাতরজোঽভিভূতো
ভানু প্রভাতশশিনোঽনুকরোতি রূপম্ || ১৭||
কেন্দ্রগৌ যদি চ জীবশশাঙ্কৌ
যস্য জন্মনি চ ভার্গবদৃষ্টৌ |
ভূপতির্ভবতি সোঽতুলকীর্তি
নীচগো যদি ন কশ্চিদিহ স্যাত্ || ১৮||
জলচররাশিনবাংশক ইন্দুস্তনুভবনে শুভদস্বকবর্গে |
অশুভকরঃ খলু কণ্টকহীনো ভবতি নৃপো বহুবারণনাথঃ || ১৯||
শুক্রো জীবনিরীক্ষিতো বিতনুতে ভূপোদ্ভবং ভূপতিং
দেবেড্যো মৃগভং বিহায তনুযো মত্তেভযুক্তং নৃপম্ |
কেন্দ্রে জন্মপতির্বলাধিকযুতঃ কুর্যদ্ধরিত্রীর্পতিং
দৃষ্টে বাক্পতিনা বুধে দধতি পৃথ্বীশাশ্চ তচ্ছাসনম্ || ২০||
একোপ্যুচ্চক্ষেত্রগো মিত্রদৃষ্টঃ
কূর্যদ্ভূপং মিত্রযোগাদ্ভনাঢ্যম্ |
স্বংশে সূর্যে স্বর্ক্ষগশ্চন্দ্রমা-
শ্চেদেশাধীশং সাশ্বনাগং বিধত্তে || ২১||
মীনে পূর্ণজ্যোতিষি মিত্রগ্রহদৃষ্টে চন্দ্রে
লোকানন্দকরঃ স্যান্নৃপমুখ্যঃ |
পূর্ণজ্যোতিঃ স্বোচ্চগতশ্চেত্তুহিনাংশু-
স্ত্যাগাধিক্যং সঞ্জনশস্তং জগদীশম্ || ২২||
চন্দ্রেঽধিমিত্রাংশগতে সুদৃষ্টে শুক্রেণ লক্ষ্মীসহিতো নৃপঃ স্যাঃ |
তথা স্থিতে বাসবমন্ত্রিদৃষ্টে পূর্নাং ধরিত্রীং পরিপালযেত্সঃ || ২৩||
পাপাস্ত্রিশত্রুভবগা যদি জন্মনাথা-
ল্লগ্নাদ্ধনে কুজবুধৌ হিবুকেঽর্কশুক্রৌ |
কর্মাযলগ্নসহিতাঃ কুজমন্দজীবা-
স্তজ্জ্ঞা বদন্তি চতুরস্ত্বিহ রাজযোগান্ || ২৪||
লাভেশধর্মেশধনেশ্বরাণামেকোঽপি চন্দ্রগ্রহকেন্দ্রবর্তী |
স্বপুত্রলাভাধিপতির্গুরুশ্চেদখণ্ডসাম্রাজ্যপতিত্বমেতি || ২৫||
নীচভংগ রাজযোগ
নীচস্থিতো জন্মনি যোগ্রহঃ স্যাত্ত্দ্রাশিনাথোঽপি তদুচ্চনাথঃ |
স চন্দ্রলগ্নাদ্যদি কেন্দ্রবর্তী রাজা ভবেদ্ধার্মিকচক্রবর্তী || ২৬||
যদ্যেকো নীচগতত্তদ্রাশ্যধিপস্তদূচ্চপঃ কেন্দ্রে |
যস্য স তু চক্রবর্তী সমস্তভূপালবন্দ্যাংধ্রিঃ || ২৭||
যস্মিন্গ্রশৌ বর্ততে খেচরস্তদ্রাশীশেন প্রেক্ষিতশ্চেত্স খেটঃ |
ক্ষোণীপালং কীর্তিমন্তং বিদধ্যাত্ সুস্থানশ্চেত্কিংপুনঃ পার্থিবেন্দ্রঃ || ২৮||
নীচে তিষ্ঠতি যস্তদাশ্রিগৃহাধীশো বিলগ্নাদ্যদা
চন্দ্রাদ্বা যদি নীচগস্য বিহগস্যোচ্চর্ক্ষনাথোঽথব |
কেন্দ্রে তিষ্ঠতি চেত্প্রপূর্ণবিভবঃ স্যাচ্চক্রবর্তী নৃপো
ধর্মিষ্ঠোঽন্যমহীশবন্দিতপদস্তেজোযশোভাগ্যবান্ || ২৯||
নীচে যস্তস্য নীচোচ্চভেশৌ দ্বাবেক এব বা
কেন্দ্রস্থশ্চেচ্চক্রবর্তী ভূপঃ স্যাদ্ভুপবন্দিতঃ || ৩০||