দোষপরিহারাষ্টকম্

.. দোষপরিহারাষ্টকম্ ..
অন্যস্য দোষগণনাকুতুকং মমৈত-
দাবিষ্করোতি নিযতং মযি দোষবত্ত্বম্ .
দোষঃ পুনর্মযি নচেদখিলে সতীশে
দোষগ্রহঃ কথমুদেতু মমেশ তস্মিন্ .. ১..
এষাপ্যথেতরকৃতেতি মমেশ কস্মিন্
কোপো যদি স্বপরকামমুখপ্রসূতা .
সেযং ব্যথেতি মযি মে ন কথন্নু কোপঃ
স্বস্য ব্যথা স্বদুরিতপ্রভবা হি সর্বা .. ২..
কামপ্রভৃত্যখিলদোষনিধের্মমৈষ
মব্যাহ দোষমিতি কোনু দুরাগ্রহোঽস্মিন্ .
হেযত্বমালপতি যোঽযমলং ন কেন
বার্যোঽথ সত্ববতি সোঽযমসত্ কিমাহ .. ৩..
যস্সংশ্রিতঃ স্বহিতধীর্ব্যসনাতুরস্ত-
দ্দোষস্য তং প্রতি বচোঽস্তু তদন্যদোষম্ .
যদ্বচ্মি তন্মম ন কিং ক্ষতযে স্বদোষ-
চিন্তৈব মে তদপনোদফলোচিতাতঃ .. ৪..
দোষং পরস্য ননু গৃণ্হতি ময্যনেন
স্বাত্মৈষ এব পরগাত্রসমাহৃতেন .
দুর্বস্তুনেব মলিনীকৃযতে তদন্য-
দোষগ্রহাদহহ কিং ন নিবর্তিতব্যম্ .. ৫..
নির্দোষভাবমিতরস্য সদোষভাবং
স্বস্যাপি সংবিদধতী পরদোষধীর্মে .
আস্তামিযং তদিতরাতু পরার্তিমাত্র-
হেতুর্ব্যনক্তু ন কথং মম তুচ্ছভাবম্ .. ৬..
পদ্মাদিসৌরভ ইব ভ্রমরস্য হর্ষং
হিত্বাঽন্যদীযসুগুণে পুনরন্যদোষে .
হর্ষো দুরর্থ ইব গেহকিটেঃ কিমাস্তে
হা মে কদেশ কৃপযা বিগলেত্স এষঃ .. ৭..
দোষে স্বভাজিমতিকৌশলমন্যভাজি
মৌঢ্যং গুণেঽন্যজুষি হর্ষভরঃ স্বভাজি .
অস্তপ্রসক্তিরখিলেষু দযাত্যুদার-
বৃত্যোর্জিতো মম কদাস্তু হরানুরাগঃ .. ৮..
ইতি শ্রী শ্রীধরবেংকটেশার্যেণ বিরচিতম্
দোষপরিহারাষ্টকং সংপূর্ণম্ .