সংস্কৃত আরতী সংগ্রহ

.. অমরসংবাদঃ সংস্কৃতারতযঃ ..
|| শ্রীঃ ||
|| সংস্কৃতম্ ভদ্রমণ্ড্নম্ ||
|| অমরসংবাদঃ||
(সংস্কৃতারতযঃ)
দেবানাং ভাষযা কুর্মহে দেবানাম্ আরতিম্ |
ভক্ত্যা সহ সংস্কৃতে সংস্কৃতৌ বযমিচ্ছামো রতিম্ ||

আরতিকারঃ বসন্তঃ শংকরসুতঃ নানিবডেকরঃ |

নীরাজনা
অস্মাকং নানিবডেকর- শাহিরি- সংগম- সংস্থা
সংস্কৃত- সেবা- প্রকল্পম্ সংচালযতি সংস্কৃত- পরিমলম্ নাম .
সংস্কৃত- পরিমল- প্রকল্পান্তর্গতানি সংস্কৃতপরিমল- শিবিরাণি,
ছাত্রজগতি বিদ্যার্থিপ্রিযাণি সন্তি | সংস্কৃতম্
অস্মাকম্ সংস্কৃতেঃ ভাষা, বিশ্বস্য সনাতনী ভাষা চ .
তস্যাঃ রুচিম্ জনেষু বৃদ্ধিম্ নেতুম্ অস্মাকম্ প্রযত্নাঃ চলন্তি |

এতাদৃশেষু প্রযত্নেষু অন্যতমঃ অযম্ অপি `দেবানাম্ ভাষযা
দেবানাম্ আরতীঃ’গাতুম্ অমর- সংবাদঃ নাম কশ্চিত্ যত্নঃ |

এতাসু আরতিষু লোকেষু প্রচলিতাঃ সর্বজনবিদিতাঃ
চ পূর্বসূরীণাম্ মরাঠী- হিন্দী- ভাষা- বিরচিতাঃ
আরতযঃ সংস্কৃতবেষম্ ধারযিত্বা অত্র
যথা প্রস্তুতাঃ তথৈব নববিরচিতম্ অপি আরতিদ্বযম্ বিদ্যতে |
পুস্তকে আবশ্যকতানুসারম্ সন্ধিরাহিত্যম্ অনুসৃতম্ অস্তি |

অস্মাকং পূর্বপ্রকাশনানাম্ ইব অস্য অপি প্রকাশনস্য
স্বাগতং সর্বত্র সোত্সাহম্ ভবেত্ ইতি আশাস্মহে রাষ্ট্রদেবস্য
চরণযোঃচ প্রসূনম্ ইদম্ ভক্তিপুরঃসরম্ অর্পযামহে |

মুম্বযাম্ | শ্রীগণেশচতুর্থী ২৯- ৮- ১৯৯৫
সংস্কৃতদিন- প্রকাশনম্ ১০- ৮- ১৯৯৫ রক্ষাবন্ধনদিনম্

বসন্তঃ শংকরসুতো নানিবডেকরঃ |
কার্যবাহঃ
নানিবডেকর- শাহিরী- সংগমস্য |
১/১৮ গোরেগাংবকর চাল,
সেণ্ট্রল- সিনেমা- সমীপম্,
গিরগাংব, মুংবঈ ৪০০০০৪
নানিবডেকর শাহিরী সংগম প্রকাশনম্ ||
|| মূল্যম্ দশ রূপ্যকাণি (অথবা পঠনম্)||

——————————————————————————–

(১)|| শ্রী গণপতেঃ আরতিঃ ||
(মূলমরাঠী- সুখকর্তা দুখহর্তা)

জয দেব জয দেব জয মংগলমূর্তে |
শ্রীমংগলমূর্তে | জয মংগলমূর্তে |
দর্শনমপি তে সকলান্ কামান্ পূরযতে || ধৃ. ||
|| জয দেব জয দেব ||
সৌখ্যকরো দুঃখহরো বার্তাম্ বিঘ্নস্য
নিঃশেষযতি চ কুরুতে প্রেম কৃপা যস্য |
সৈন্দূরঃ সর্বাংগে সুন্দরলেপোঽস্য
কণ্ঠে বিলসতি মালা মুক্তানাং যস্য || ১||
|| জয দেব জয দেব ||
সরত্ন- পিপ্পলপত্রং গৌরীনন্দন তে
চন্দনলেপঃ কেশর- কুংকুম- যুক্তস্তে |
হীরক- মণ্ডিত- মুকুটং শীর্ষমলংকুরুতে
নূপূরে কিংকিণ্যঃ ক্বণন্তি পদযোস্তে || ২||
|| জয দেব জয দেব ||
লম্বোদর পীতাংবর ফণিবরবন্ধন হে
সরলশুণ্ড হে বক্রতুণ্ড (হে)ত্রীক্ষণ হে |
দাসো রামস্য ত্বাম্ প্রতীক্ষতে স্বগৃহে
সংকটেষু পাহি ত্বং, নির্বাণে রক্ষ ত্বং, সুরবরবন্দিত হে || ৩||
|| জয দেব জয দেব ||

|| ॐ গঁ গণপতযে নমঃ ||

——————————————————————————–

(২)|| শ্রীগজাননস্য আরতিঃ ||
(মূলহিন্দী- জয জয জী গণরাজ বিদ্যাসুখদাতা)

জয জয হে গণরাজ, বিদ্যাসুখদাতঃ |
ত্বদ্দর্শনধন্যোঽহম্ ত্বত্পদ- রত- চিত্তঃ ||
|| জয দেব জয দেব || ধৃ. ||
সিন্দূর- রক্তদেহম্ সুভগম্ গজবদনম্
বিলসত্- তুন্দিলকাযম্ গৌরীহর- তনযম্ |
ধৃত- গুডলড্ডুকহস্তম্ দেবেশ্বরনাথম্
অবর্ণ্য- গুণমহিমানম্ প্রাপ্তোঽহম্ শরণম্ || ১||
অণিমাদি- সিদ্ধযোঽষ্টৌ দাস্যো বিঘ্নারেঃ
সমর্থ- বিঘ্নহরস্য শ্রীমংগলমূর্তেঃ |
কোটি- দিবাকর- সদৃশম্ তব তেজঃ প্রখরম্
গণ্ডস্থল- মদশীর্ষম্ বিহরত্ শশিভালম্ || ২||
ভাবেন কোঽপি ভক্ত্যা ত্বাং গচ্ছতু শরণম্
সন্ততি- সম্পত্- প্রমুখম্ বিন্দেত্ নিজমিষ্টম্ |
এবম্ মহারাজ ত্বম্ রোচসেঽতি মহ্যম্
গোস্বামিনঃ সুতস্ত্বাম্ গাযতি দিনরাত্রম্ || ৩||

|| জয জয গণরাজ ||
অভীপ্সিতার্থসিদ্ধ্যর্থম্ পূজিতো যঃ সুরাসুরৈঃ |
সর্ববিঘ্নহরস্তস্মৈ গণাধিপতযে নমঃ ||

——————————————————————————–

(৩)|| শ্রী শংকরস্য আরতিঃ ||
(মূল মরাঠী- লবথবতী বিক্রালা)

জয দেব জয দেব শিবশংকর জয হে |
ত্বাম্ কর্পূরসুগৌরম্ বযম্ আর্তাঃ স্তুমহে || ধৃ. ||
|| জয দেব জয দেব ||
লম্বন্তে বিকরালা ব্রহ্মাণ্ডে মালাঃ
বিষেণ কণ্ঠঃ শ্যামো বিলোচনাত্ জ্বালাঃ |
জহ্নোর্লাবণ্যযুতা শিরসি ধৃতা বালা
জলপ্রবাহো মন্দম্ বহতি যতি বিমলঃ || ১||
|| জয দেব জয দেব ||
মুগ্ধো বিশালনযনঃ কর্পূরসুগৌরঃ
অর্ধাংগিনী চ গিরিজা গলেঽস্তি সুমহারঃ |
উদ্ধূলনং বিভূতের্নীলঃ শিতিকণ্ঠঃ
এবম্ বিলসতি শংকর এষ উমাদযিতঃ || ২||
|| জয দেব জয দেব ||
কৃতং সুরাসুরবৃন্দৈরম্ভোধের্মথনম্
হালাহলম্ চ সহসা তস্মাদ্ উদ্ভূতম্ |
সহসা ত্বম্ চ সলীলম্ কৃতবান্ বিষপানম্
ততো নীলকণ্ঠ ইতি ত্বন্নাম প্রথিতম্ || ৩||
|| জয দেব জয দেব ||
ব্যাঘ্রাম্বরঃ ফণিধরঃ সুন্দর- মদনারিঃ
পংচাননো মনোহর ঋষিজন- সুখকারী |
শতকোটী- জপবীজে রামনাম্নি রমতে
রঘুকুলতিলকো রামো রামদাস- চিত্তে || ৪||
|| জয দেব জয দেব ||

|| ॐ নমঃ শিবায ||
ॐ ত্র্যম্বকং যজামহে সুগন্ধিং পুষ্টিবর্ধনম্ |
উর্বারুকমিব বন্ধনান্মৃত্যোর্মুক্ষীয মাঽমৃতাত্ ||

——————————————————————————–

(৪)|| শ্রী দুর্গাযাঃ আরতিঃ ||
(মূল মরাঠী- দুর্গে দুর্ঘট ভারী)

দুর্গে সুদুর্গমোঽস্তি ত্বদৃতে সংসারঃ
অনাথনাথে অম্বে অস্তু কৃপাপ্রসরঃ |
বারয বারয জননম্ মরণম্ বারয মে
অস্মি বিপত্তিষু পতিতো মাতস্তারয মে || ১||
|| জয দেবি জয দেবি ||
জয দেবি জয দেবি মহিষাসুরমথিনি |
সুরবর- ঈশ্বর- বরদে সংজীবনি তারিণি || ধৃ. ||
ত্রিভুবন- ভুবনে নাঽন্যা ভজতে ত্বত্সাম্যম্
বেদচতুষ্কম্ শ্রান্তম্ ত্বাম্ স্তোতুম্ অশক্তম্ |
বিবদত্ প্রবাহপতিতম্ ষট্শাস্ত্রাধারম্
কিন্তু ত্বম্ ভক্তেষু প্রসীদসি ক্ষিপ্রম্ || ২||
|| জয দেবি জয দেবি ||
প্রসন্ন- বদনে দাসে প্রসীদসি ত্বরিতম্
ক্লেশান্ মোচয মাতশ্ছেদয ভবপাশম্ |
অম্বে ত্বদৃতে কো মাম্ কুর্যাত্ পূর্ণাশম্
নরহরি- মন আস্তে তব পদপংকজলীনম্ || ৩||
|| জয দেবি জয দেবি ||

|| জয জয দুর্গে জগদম্বে || ভক্তান্ তারয হে অম্বে ||
নমো দেব্যৈ মহাদেব্যৈ শিবাযৈ সততং নমঃ |
নমঃ প্রকৃত্যৈ ভদ্রাযৈ নিযতাঃ প্রণতাঃ স্ম তাম্ ||

——————————————————————————–

(৫)|| শ্রী বিঠ্ঠলস্য আরতিঃ ||
(মূল মরাঠী- যুগেং অঠ্ঠাবীস)

জয দেব জয দেব, পাণ্ডুরংগ জয হে |
রুক্মিণ্যা বল্লভ হে, শ্রীরাহীবল্লভ হে, প্রসীদ মত্প্রিয হে ||
জয দেব জয দেব || ধৃ. ||

তিষ্ঠত্যষ্টাবিংশতি যুগানীষ্টিকাযাম্
রুক্মিণী চ বামাংগে, পশ্যত বহুশোভাম্ |
পরব্রহ্ম পুণ্ডলিকম্ দ্রষ্টম্ স্বযম্ এতি
বহতি পদাভ্যাম্ ভীমা জগত্ সমুদ্ধরতি || ১||
|| জয দেব জয দেব ||
তুলসীমালা- কণ্ঠম্ কটি- বিন্যস্ত- করম্
ধৃতপীতাম্বর- বসনম্ কস্তূরিললাটম্ |
মিলিতুম্ সুরবরদেবা আযান্ত্যনুদিবসম্
গরুডো হনুমান্ পুরতঃ তিষ্ঠন্তৌ নিত্যম্ || ২||
|| জয দেব জয দেব ||
ধন্যো বেণুরবোঽসৌ অনুক্ষেত্রপালঃ
সুবর্ণকমলানি কণ্ঠে বনমালা |
রাহী চ রুক্মিণী সা সকলা অপি রাজ্ঞ্যঃ
শ্যামল- বিঠ্ঠলরাজম্ নীরাজযন্তি তাঃ || ৩||
|| জয দেব জয দেব ||
আরতীশ্চ `কুর্বণ্ডীঃ’দর্শযিতুম্ প্রাপ্তাঃ
জলে চন্দ্রভাগাযাঃ মুঞ্চন্তে ননু তাঃ |
নৃত্যন্তি ধ্বজহস্তাস্তে বৈষ্ণবভক্তাঃ
পণ্ঢরি- কীর্তি- স্তবনে রসনাঽপি শ্রান্তা || ৪||
|| জয দেব জয দেব ||
আষাঢী- কার্তিক্যোর্মিলন্তি ভক্তজনাঃ
জলে চন্দ্রভাগাযাঃ স্নানম্ কুর্বাণাঃ |
দর্শন- কটাক্ষমাত্রম্ মোক্ষম্ আপ্নুবন্তি
ভাবেন নামদেবঃ কেশবম্ অর্চযতি || ৫||
|| জয দেব জয দেব ||

——————————————————————————–

(৬)|| এহি হে বিঠ্ঠলে ||
(মূল মরাঠী- যেঈ হো বিঠ্ঠলে)

এহি হে বিঠ্ঠলে সদযে শীঘ্রম্ মম মাতঃ |
প্রতিপালযতি জনোঽযম্ মাতর্নিটিল- নিহিতহস্তঃ || ধৃ. ||

গচ্ছতাঽঽগচ্ছতা সার্ধম্ দদামি সন্দেশম্ |
তিষ্ঠতি পণ্ঢরপুর্যাম্ মাতা পিতা স মে নূনম্ || ১||

সুভগম্ পীতাম্বরম্ গগনে পুষ্যতি নিজশোভাম্ |
খগমারোহন্ গরুডম্ বিষ্ণুস্ত্রাতুম্ প্রাপ্তো মাম্ || ২||

নিত্যম্ দীপাবলিরস্মাকম্ বিঠ্ঠলস্য রাজ্যম্ |
বিষ্ণোর্দাসো নামা কুরুতে ভাবেনাঽর্তিক্যম্ || ৩||

ভাবঃ স্যাদ্ বা ন স্যাদ্ অথবা মনসি কিলাঽস্মাকম্ |
পণ্ঢরপুরপ্রভো হে সততম্ পশ্যাঽস্মান্ সকৃপম্ || ৪||

|| বিঠ্ঠলে মাতঃ || ত্বমেব মে তাতঃ ||
|| বিঠ্ঠল বিঠ্ঠল || বত্সল বত্সল ||
|| পণ্ঢরীনাথ || বিঠ্ঠল বিঠ্ঠল ||
|| নিবৃত্তে জ্ঞানদেব সোপান অযি মুক্তাই ||
|| একনাথ নামদেব তুকারাম ||
|| বিঠ্ঠলঽ বিঠ্ঠলঽ || বদত রে || বিঠ্ঠলঽ বিঠ্ঠলঽ ||
|| জ্ঞানেশ্বর তুকারাম || বদ জিহ্বে পাবননাম ||

——————————————————————————–

(৭)|| শ্রীদত্তস্য আরতিঃ ||
(মূল মরাঠী- ত্রিগুণাত্মক ত্রৈমূর্তী)

জয দেব জয দেব দত্ত গুরো জয হে |
নষ্টা মে ভবচিন্তা কৃতে তবাঽর্তিক্যে ||
জয দেব জয দেব || ধৃ. ||
ত্রিগুণাত্মকঃ ত্রিমূর্তিঃ জ্ঞেযোঽযম্ দত্তঃ
ত্রিগুণাত্মকাবতারঃ ত্রৈলোক্যত্রাতা |
নেতি চ নেতি চ শব্দৈঃ অনুমানং ন গতঃ
সুরবর- মুনিজন- যোগসমাধিঃ নাকলিতঃ || ১||
|| জয দেব জয দেব ||
ব্যাপ্নোষ্যন্তর্বাহ্যম্ দত্ত ত্বম্ তত্ত্বম্
বেত্তু কথম্ দুর্ভাগ্যো মহদ্ ইদম্ আশ্চর্যম্ |
যতঃ পরাঽপি নিবৃত্তা তত্র চ হেতুঃ কঃ
অভবত্ জন্ম- মরণযোঃ অন্তঃ শাশ্বতিকঃ || ২||
|| জয দেব জয দেব ||
দত্তঃ প্রীতো `ভগবান্’অবতীর্ণঃ পুরতঃ
ভক্ত্যাঽহম্ তত্পুরতঃ সাষ্টাংগম্ প্রণতঃ |
আশীর্বাদঃ তেন প্রসন্নেন দত্তঃ
জন্ম- মরণযোঃ সকৃপম্ নাহিত আবার্তঃ ||
|| জয দেব জয দেব ||
`দত্ত’`শ্রীদত্ত’ইতি ধ্যানম্ মম চিত্তে
তল্লীনম্ ভূত্বা মে মন উন্মন আস্তে |
অস্মদ্- যুষ্মদ্- ভাবো নির্গমনম্ কুরুতে
`একা’জনার্দনগুরৌ শ্রীদত্তে রমতে || ৪||
|| জয দেব জয দেব ||

|| শ্রীগুরু শরণং মম || দত্তগুরুঃ শরণং মম ||

——————————————————————————–

(৮)|| শ্রীরামস্য আরতিঃ ||
(মূল মরাঠী- উত্কট সাধুনি)

নিজবোধ শ্রীরাম ত্বম্ জয জয দেব | জয জয জয দেব |
পরমার্থেনাঽর্তিক্যম্ সদ্ভাবেনাঽর্তিক্যম্ | পূরিতকাম তব |
জয দেব জয দেব | জয জয হে দেব || ধৃ. ||
সেতুম্ ববন্ধ লব্ধ্বা বৃহত্- শিলাখণ্ডান্
লিংগদেহলংকাপুরম্ উদ্ধ্বস্তম্ কৃতবান্ |
কামক্রোধাদীন্ তান্ নিষূদযন্ অসুরান্
`দেহোঽহম্’- মতিভাবম্ দশবদনম্ হতবান্ || ১||
|| জয দেব জয দেব ||
প্রথমম্ হনুমান্ সীতাম্ অন্বষ্টুম্ গতবান্
লংকাদহনম্ কৃতবান্ অক্ষম্ মারিতবান্ |
জম্বুমালিনম্ হতবান্ ভুবি আস্ফালিতবান্
আনন্দস্য সুবার্তাম্ গৃহ্ণন্ আগতবান্ || ২||
|| জয দেব জয দেব ||
স্ববলেন চ স্বশক্তিঃ বিমোচিতা সীতা
অত আগচ্ছদ্ অযোধ্যা- নগরম্ রঘুনাথঃ |
অবহত্ বিরক্তিপূরে সানন্দম্ ভরতঃ
আরতিহস্তাঽঽগচ্ছত্ কৌসল্যা মাতা || ৩||
|| জয দেব জয দেব ||
সানুহুতধ্বনযঃ প্লবগা গর্জন্তি
অষ্টাদশ- পদ্মমিতা বুভুঃ স্ম কুর্বন্তি |
দশরথতনযোঽযোধ্যাম্ এষ সমাযাতঃ
আনন্দশ্চ নগর্যাম্ অতীব সংজাতঃ || ৪||
|| জয দেব জয দেব ||
সিংহাসনে সলীলম্ রঘুবীরো রাজা
`তত্ত্বম্’- ভাবস্তস্মৈ উপচারঃ পূজা |
সহজানাম্ আর্তিক্যম্ বাদ্য- নিনাদোঽযম্
মাধবদাস- স্বামিন্ স্মর, মা বিস্মর তম্ || ৫||
|| জয দেব জয দেব ||
|| শ্রীরাম রঘুবীর || জয জয রাম রঘুবীর ||

——————————————————————————–

(৯)|| শ্রীমারুতেঃ আরতিঃ ||
(মূল মরাঠী- সত্রাণেং উড্ডাণেং)

জয দেব জয দেব জয হনুমন্ জয হে |
তব প্রসাদাত্ ক্বাঽপি ন ভযম্ কৃতান্তাত্ মে ||
জয দেব জয দেব || ধৃ. ||
উড্ডযনম্ সাবেশম্ মুখেন হুংকরণম্
ভূমণ্ডলম্ সকম্পম্ নভোগম্ উদধিজলম্ |
সনিনাদম্ ব্রহ্মাণ্ডম্ সভযম্ ত্রৈলোক্যম্
সুরবর- নর- নক্তচরৈঃ পলাযনম্ চ কৃতম্ || ১||
|| জয দেব জয দেব ||
ন্যনদন্ পাতালানি প্রতিশব্দো জাতঃ
ধরণীধরঃ সকম্পঃ খিন্নত্বম্ প্রাপ্তঃ |
গিরযঃ সর্বে ভগ্নাঃ উডুগণ উদ্ঘ্বস্তঃ
রামো রামদাসস্য খলু শক্তিস্রোতঃ || ২||
|| জয দেব জয দেব ||

|| শ্রীরামং সংস্মরামঃ || শ্রীহনুমন্তং প্রণমামঃ ||
|| বজ্রবলিন্ হনুমন্ অস্তি বিজযতে || মনোজবন্ হনুমন্ অস্তি বিজযতে ||
|| মরুদ্বেগ হনুমন্ অস্তি বিজযতে || বিজিতেন্দ্রিয হনুমন্ অস্তি বিজযতে ||
|| ধীমদ্বর হনুমন্ অস্তি বিজযতে || বাতাত্মজ হনুমন্ অস্তি বিজযতে ||
|| কপিপ্রমুখ হনুমন্ অস্তি বিজযতে || রামদূত হনুমন্ অস্তি বিজযতে ||
|| মম শরণ্য হনুমন্ অস্তি বিজযতে || জনশরণ্য হনুমন্ অস্তি বিজযতে ||

——————————————————————————–

(১০)|| ছত্রপতেঃ শ্রীশিবরাজস্য আরতিঃ ||

জয জয জয শিবরাজ পুনস্তে জযঘোষো ভবতাত্ |
জযঘোষেণ সমম্ রাষ্ট্রেঽস্মিন্ চৈতন্যম্ স্ফুরতাত্ || ধৃ. ||
|| জয জয জয শিবরাজ ||
মহংমদীযৈঃ সমদৈর্ভারত- ভূরিযম্ আক্রান্তা
আতংকাত্ ত্রাতুম্ নাঽদৃশ্যত্ হিন্দূনাম ত্রাতা |
তদা গৃহীতা ত্বযা `ভবানী’স্বকরে খড্গলতা
যবনমর্দনম্ কৃতম্ জনেভ্যো দত্তা নির্ভযতা || ১||
অস্মাকম্ পূজাস্থানানি শ্রেষ্ঠ- মন্দিরাণি
মূর্তিভংজকৈঃ ক্রূরৈর্যবনৈঃ সহসোদ্ধ্বস্তানি |
সমুচ্ছ্রিত্য খলু `মাবল’- বীরৈঃ স্বখড্গ- পত্রাণি
তবাঽজ্ঞযা নিজদেশরিপূণাম্ শিরাংসি লূনানি || ২||
খড্গম্ তে নিষ্কোষিতম্ আসীত্ আর্তত্রাণার্থম্
স্ত্রী- গো- বিপ্রাণাম্ অবনার্থম্ ঘোরম্ ব্রতম্ ধৃতম্ |
নিত্যম্ অশ্বম্ আরুহ্য যতিতবান্ স্বরাজ্যনির্মিতযে
পরিণত আসীত্ তব সংকল্পো ভব্যরাষ্ট্রবিজযে || ৩||
প্রতিপচ্চন্দ্রসমা বর্ধিষ্ণুঃ সর্ববিশ্বমান্যা
ভদ্রকারিণী মুদ্রা তব নৃপ শহাজি- সুত ধন্যা |
কর্তব্য- প্রেরণাম্ চ দদতী দিশতু চ নঃ সুপথম্
শিবগুণকথনে বাগ্ অস্মাকম্ রমতাম্ অনবরতম্ || ৪||

|| ভারতমাতা বিজযতাম্ || শ্রীশিবরাজো বিজযতাম্ ||
|| অস্মাকম্ পৌরুষম্ বিজযতাম্ || শিবসংকল্পো বিজযতাম্ ||

——————————————————————————–

(১১)|| শ্রী- অক্কলকোট- স্বামিনঃ আরতিঃ || ১

জয দেব জয দেব, স্বামিন্ জয জয হে || জগদ্গুরো জয হে ||
আর্তিক্যম্ তব পদযোঃ দাসোঽহম্ কুর্বে || জয দেব জয দেব || ধৃ. ||
জন্ম গৃহীত্বা মানবযোনৌ গুরুবর্য
প্রীত্যা ভক্তত্রাণম্ ত্বং কৃতবান্ আর্য |
উত্তুংগভব্যমূর্তে দিব্যপ্রভসূর্য
আজানুবাহুমূর্তে, হে সদ্গুরুবর্য || জয দেব জয দেব || ১||
ক্ব জন্ম জাতম্ ক্ব চ বা দীক্ষা তে জাতা
কস্তে জনিতা, রত্নপ্রসবা বা মাতা |
ত্বম্ ভক্তকামধেনুঃ নিত্যকৃপাচ্ছাযা
জানীযত্ ত্বাম্ জননীম্ কথম্ অজ্ঞস্তনযঃ || জয দেব জয দেব || ২||
অক্কলকোট- গ্রামে নিবসসি ভক্তার্থম্ (সাধ্বর্থম্)
বালাপ্পাঃ প্রিযভক্তম্ ত্বাম্ গতবান্ শরণম্ |
বহুশিষ্যেভ্যঃ কথযন্ ভক্তিরহঃসারম্ (ভক্তেঃ সর্বস্বম্)
উধ্দৃতবান্ পূর্ণাশান্ কৃত্বা লোকাঁস্ত্বম্ || জয দেব জয দেব || ৩||
আত্মানম্ মনুতে যঃ তব শিষ্যম্ ভক্তম্
পরীক্ষসে দত্ত!গুরো!তস্যাঽন্তঃকরণম্ |
দর্শযসি স্বাম্ লীলাম্ যোগ্যতানুসারম্
নিশ্চলভক্তিম্ দৃষ্ট্বা স্বামিন্ তুষ্টস্ত্বম্ || জয দেব জয দেব || ৪||
মন্বানঃ কলিকলুষাত্ ইহযাত্রাপূর্তিম্
সমাধিম্ অংগীকুর্বত্, ত্যজন্ ইমাম্ জগতীম্ |
অমৃতম্ ভবান্ প্রযচ্ছতি ভক্তেভ্যোঽদ্যাঽপি
স্বামিপদাভ্যাম্ রমতে ন গণেশঃ ক্বাঽপি || জয দেব জয দেব || ৫||

|| শ্রীস্বামিন্ সমর্থ || জয স্বামিন্ সমর্থ ||

——————————————————————————–

(১২)|| শ্রী- অক্কলকোট- স্বামিনঃ আরতিঃ || ২

জয দেব, জয দেব জয নাথ, স্বামিন্ |
ত্রিভুবননাথ অগম্যা লীলা তে স্বামিন্ || ধৃ. || জয দেব জয দেব ||
তব দর্শনাত্ সুদূরম্ প্রযান্তি পাপানি
স্পর্শাত্ তথৈব বিলযম্ বত ভবদুরিতানি |
শিরশ্চরণযোঃ নত্বা স্পষ্টম্ জ্ঞাতব্যম্
ইতঃপরম্ ন ভবেত্ কিল বৈকুণ্ঠে সৌখ্যম্ || জয দেব জয দেব || ১||
সুগন্ধকেশরতিলকঃ তথা শিরস্ত্রধরঃ
কুণ্ডলশোভিতকর্ণো বক্ষঃস্থিতহারঃ |
ত্বত্পদশরেণভ্যঃ খলু কালো ভযভীতঃ
সেবামহোত্সবম্ তব কুর্বন্তি চ ভক্তাঃ || জয দেব জয দেব || ২||
মানবশরীরধারী দৃষ্টোঽস্মাভিঃ ত্বম্
কৃতবান্ অক্কলকোটে যতিবেষো বাসম্ |
অবতারমগৃহ্ণীথাঃ পূর্ণব্রহ্ম ত্বম্
অবগচ্ছতি পরম্ অজ্ঞো ভাবম্ বিপরীতম্ || জয দেব জয দেব || ৩||
ত্বম্ নির্গুণোঽবিকারো ব্যাপ্নোষি হি বিশ্বম্
ব্যাপ্য স্থিরচরম্ একঃ স্বামিন্ স্থিতবাঁস্ত্বম্ |
বহুমাযারূপাণি ত্বম্ ধরসে নিত্যম্
ত্বদ্গুণবর্ণনকথনে বিধিশব্দৈঃ শ্রান্তম্ || জয দেব জয দেব || ৪||
অনন্ত- জন্মসু রাশিঃ সংচিতসুকৃতানাম্
তেন হি লাভো জাতো মে গুরুচরণানাম্ |
স্বর্ণস্তবকে নিহিতম্ পূর্ণামৃতপাত্রম্
পশ্য কৃপাদৃষ্ট্যা মাম্ শরণাগতদীনম্ || জয দেব জয দেব || ৫||

|| শ্রীঅক্কলকোট- স্বামিন্ || জয অক্কলকোট- স্বামিন্ ||

——————————————————————————–

(১৩)|| মাতৃভূমেঃ আরতিঃ ||

জযতু মাতৃভূমিঃ মম পুণ্যম্ রাষ্ট্রম্ |
তত্- সেবাযাম্ রমতাম্ সদৈব মম চিত্তম্ || ধৃ. ||
|| জযতু রাষ্ট্রম্ || পুণ্য রাষ্ট্রম্ ||
উদিতো যত্র প্রথমম্ জ্ঞানরবিঃ সাক্ষাত্
সর্বজ্ঞঃ পরমাত্মা শ্রুতিরূপম্ অগৃহ্ণাত্ |
অন্বভবন্তো ধন্যা ঋষযো জ্ঞানার্কম্
পূতা সিন্ধুঃ দৃষ্ট্বা জ্ঞানরবেরুদযম্ || ১||
অধর্ম- পরিহারার্থম্, ধর্ম- রক্ষণার্থম্
সাধূনাম্ অবনার্থম্, খলনির্দলনার্থম্ |
প্রেষযতি স্বান্ দূতান্ প্রভুরন্যত্ স্থানম্
অত্র স্বযম্, আগচ্ছতি ভগবান্ সানন্দম্ || ২||
দেব- নিবাসাত্ নূনম্ পুণ্যা ভূমিরিযম্
ধন্যো যোঽস্যা কুরুতে স্বশিরসি শুভরজসম্ |
প্রভোঽস্তু ভূম্যাম্ অস্যাম্ সুখম্ পুনর্জননম্
বদনে বিলসতু সততম্ ভারত- গুণগানম্ || ৩||

|| জযতু জযতু ভারতদেশঃ || স এব মে শ্রীপরমেশঃ ||
|| ভারতমাতা বিজযতাম্ || বিজযতাম্ ভারতমাতা ||

——————————————————————————–

(১৪)|| ভূমৌ লুঠেযম্ ||
(মূল মরাঠী- ঘালীন লোটাংগণ)

ভূমৌ লুঠেযম্, পদৌ নমেযম্, নিরূপযেযম্ স্বরূপকম্ |
ত্বত্ স্বরূপকম্ |
প্রীত্যাঽঽশ্লিষেযম্, মুদাঽর্চযেযম্ নীরাজযেযম্ নুতে নামা ||

ত্বমেব মাতা চ পিতা ত্বমেব, ত্বমেব বংধুশ্চ সখা ত্বমেব |
ত্বমেব বিদ্যা দ্রবিণং ত্বমেব, ত্বমেব সর্বম্ মম দেব দেব || ১||
কাযেন বাচা মনসেন্দ্রিযৈর্বা, বুদ্ধ্যাঽঽত্মনা বা প্রকৃতিস্বভাবাত্ |
করোমি যদ্ যত্ সকলম্ পরস্মৈ নারাযণাযেতি সমর্পযামি || ২||
অচ্যুতং কেশবং, রাম- নারাযণং, কৃষ্ণ- দামোদরং বাসুদেবং হরিম্ |
শ্রীধরং মাধবং, গোপিকাবল্লভং জানকীনাযকং রামচন্দ্রং ভজে || ৩||
হরে রাম, হরে রাম, রাম রাম, হরে হরে |
হরে কৃষ্ণ, হরে কৃষ্ণ, কৃষ্ণ কৃষ্ণ, হরে হরে || ৪||

——————————————————————————–

(১৫)|| মন্ত্রপুষ্পাংজলিঃ ||

ॐ যজ্ঞেন যজ্ঞমযজন্ত দেবাস্তানি ধর্মাণি প্রথমান্যাসন্ .
তে হ নাকং মহিমানঃ সচংত | যত্র পূর্বে সাধ্যাঃ সংতি দেবাঃ ..
ॐ রাজাধিরাজায প্রসহ্যসাহিনে . নমো বযং বৈশ্রবণায
কুর্মহে . স মে কামান্ কামকামায মহ্যং কামেশ্বরো বৈশ্রবণো
দদাতু | কুবেরায বৈশ্রবণায মহারাজায নমঃ .
ॐ স্বস্তি সাম্রাজ্যং ভৌজ্যং স্বারাজ্যং বৈরাজ্যং পারমেষ্ঠ্যং
রাজ্যং মাহারাজ্যমাধিপত্যমযং সমংতপর্যা ঈস্যাত্
সার্বভৌমঃ সার্বাযুষ আংতাদাপরার্ধাত্ | পৃথিব্যৈ
সমুদ্রপর্যংতাযা একরালিতি . তদপ্যেষশ্লোকোঽভিগীতো
মরুতঃ পরিবেষ্টারো মরুত্তস্যাবসন্ গৃহে .
আবিক্ষিতস্য কামপ্রের্বিশ্বেদেবাঃ সভাসদ ইতি ..

শ্লোকাঃ
একদন্তাযবিদ্মহে | বক্রতুণ্ডায ধীমহি .
তন্নো দন্তী প্রচোদযাত্ .

বাগর্থাবিব সংপৃক্তৌ বাগর্থপ্রতিপত্তযে |
জগতঃ পিতরৌ বন্দে পার্বতী পরমেশ্বরৌ ||

রামায রামভদ্রায রামচন্দ্রায বেধসে |
রঘুনাথায নাথায সীতাযাঃ পতযে নমঃ ||

বসুদেবসুতং দেবং কংসচাণূরমর্দনম্ |
দেবকীপরমানন্দং কৃষ্ণং বন্দে জগদ্গুরুম্ ||

অপি স্বর্ণম্যী লংকা ন মে লক্ষ্মণ রোচতে |
জননী জন্মভূমিশ্চ স্বর্গাদপি গরীযসী ||

প্রেরকমন্ত্রো এক এব `ॐ রাষ্ট্রায স্বাহা’|
`রাষ্ট্রায স্বাহা’- `রাষ্ট্রায ইদং ন মম’||

——————————————————————————–

ॐ
|| সংস্কৃতাষ্টকম্ ||
অগ্রতঃ সংস্কৃতং মেঽস্তু পৃষ্ঠতো মেঽস্তু সংস্কৃতম্ |
সংস্কৃতং হৃদযে মেঽস্তু বিশ্বমধ্যেঽস্তু সংস্কৃতম্ || ১||
সংস্কৃতং দেবভাষাঽস্তি বেদভাষাঽস্তি সংস্কৃতম্ |
প্রাচীন- জ্ঞান- ভাষা চ সংস্কৃতং ভদ্রমণ্ডনম্ || ২||
বেদান্তানাং পুরাণানাং শাস্ত্রাণাং চ তথৈব চ |
মংত্রাণাং তংত্রসূত্রাণাম্ আদ্যভাষাঽস্তি সংস্কৃতম্ || ৩||
রামাযণং মহাকাব্যং মহাভারতমেব চ |
উভে চ বিশ্ববিখ্যাতে সংস্কৃতস্য মহানিধী || ৪||
ভাসস্য কালিদাসস্য ভবভূতেশ্চ বিশ্রুতা |
বাণ- শূদ্রক- হর্ষাণাম্ কাব্যভাষাঽস্তি সংস্কৃতম্ || ৫||
প্রাণভূতং চ যত্তত্ত্বং সারভূতং তথৈব চ |
সংস্কৃতৌ ভারতস্যাঽস্য তন্মে যচ্ছতু সংস্কৃতম্ || ৬||
যত্র রামকথাগানম্ তত্রাঽস্তে হনুমান্ যথা |
সংস্কৃতাধ্যযনং যত্র তত্র সংস্কৃতিদর্শনম্ || ৭||
শৃণুমঃ সংস্কৃতং নিত্যং বদামঃ সংস্কৃতং তথা |
স্মরামঃ সংস্কৃতং নিত্যং পঠামঃ সংস্কৃতং তথা || ৮||

|| জযতু সংস্কৃতম্ || জযতু সংস্কৃতিঃ ||
|| জযতু অমরসংস্কৃতারতিঃ ||