সাধন পঞ্চকং

.. সাধন পঞ্চকং ..

.. সাধন পঞ্চকম্ ..

বেদো নিত্যমধীযতাং তদুদিতং কর্ম স্বনুষ্ঠীযতাম্ .
  তেনেশস্য বিধীযতামপচিতিঃ কাম্যে মতিস্ত্যজ্যতাম্ .
পাপৌঘঃ পরিধূযতাং ভবসুখে দোশোঽনুসন্ধীযতাম্ .
  আত্মেচ্ছা ব্যবসীযতাং নিজগৃহাত্তূর্ণং বিনির্গম্যতাম্ .. ১..

সঙ্গঃ সত্সু বিধীযতাং ভগবতো ভক্তির্দৃঢাঽঽধীযতাম্ .
  শান্ত্যাদিঃ পরিচীযতাং দৃঢতরং কর্মাশু সন্ত্যজ্যতাম্ .
সদ্বিদ্বানুপসৃপ্যতাং প্রতিদিনং তত্পাদুকা সেব্যতাম্ .
  ব্রহ্মৈকাক্ষরমর্থ্যতাং শ্রুতিশিরোবাক্যং সমাকর্ণ্যতাম্ .. ২..

বাক্যার্থ্যশ্চ বিচার্যতাং শ্রুতিশিরপক্ষঃ সমাশ্রীযতাম্ .
  দুস্তর্কাত্ সুবিরম্যতাং শ্রুতিমতস্তর্কোঽনুসন্ধীযতাম্ .
ব্রহ্মাস্মীতি বিভাব্যতামহরহর্গবর্ঃ পরিত্যজ্যতাম্ .
  দেহেঽহংমতিরুঝ্যতাং বুধজনৈর্বাদঃ পরিত্যজ্যতাম্ .. ৩..

ক্ষুদ্ব্যাধিশ্চ চিকিত্স্যতাং প্রতিদিনং ভিক্ষৌষধং ভুজ্যতাম্ .
  স্বাদ্বন্নং ন তু যাচ্যতাং বিধিবশাত্ প্রাপ্তেন সন্তুষ্যতাম্ .
শীতোষ্ণাদি বিষহ্যতাং ন তু বৃথা বাক্যং সমুচ্চার্যতাম্ .
  ঔদাসীন্যমভীপ্স্যতাং জনকৃপানৈষ্ঠুর্যমুত্সৃজ্যতাম্ .. ৪..

একান্তে সুখমাস্যতাং পরতরে চেতঃ সমাধীযতাম্ .
  পূর্ণাত্মা সুসমীক্ষ্যতাং জগদিদং তদ্বাধিতং দৃশ্যতাম্ .
প্রাক্কর্ম প্রবিলাপ্যতাং চিতিবলান্নাপ্যুত্তরৈঃ শ্লিষ্যতাম্ .
  প্রারব্ধং ত্বিহ ভুজ্যতামথ পরব্রহ্মাত্মনা স্থীযতাম্ .. ৫..

.. ইতি পরমহংসপরিব্রাজকাচার্যশ্রীমচ্ছঙ্করাচার্যবিরচিত সাধন পঞ্চকং সংপূর্ণম্ ..