বাক্যবৃত্তি

.. বাক্যবৃত্তি ..

.. বাক্যবৃত্তিঃ ..

.. শ্রী গণেশায নমঃ ..
সর্গস্থিতিপ্রলযহেতুমচিন্ত্যশক্তিং বিশ্বেশ্বরং বিদিতবিশ্বমনন্তমূর্তিম্ .
নির্মুক্তবন্ধনমপারসুখাম্বুরাশিং শ্রীবল্লভং বিমলবোধঘনং নমামি .. ১..
যস্য প্রসাদাদহমেব বিষ্ণুর্ময্যেব সর্বং পরিকল্পিতং চ .
ইত্থং বিজানামি সদাত্মরূপং তস্যাংঘ্রিপদ্মং প্রণতোঽস্মি নিত্যম্ .. ২..
তাপত্রযার্কসংতপ্তঃ কশ্চিদুদ্বিগ্নমানসঃ .
শমাদিসাধনৈর্যুক্তঃ সদ্গুরুং পরিপৃচ্ছতি .. ৩..
অনাযাসেন যেনাস্মান্মুচ্চ্যেযং ভববন্ধনাত্ .
তন্মে সংক্ষিপ্য ভগবন্কেবলং কৃপযা বদ .. ৪..

গুরুরুবাচ —

সাধ্বীতে বচনব্যক্তিঃ প্রতিভাতি বদামি তে .
ইদং তদিতি বিস্পষ্টং সাবধানমনাঃ শৃণু .. ৫..
তত্ত্বমস্যাদিবাক্যোক্থং যজ্জীবপরমাত্মনোঃ .
তাদাত্ম্যবিষযং জ্ঞানং তদিদং মুক্তিসাধনম্ .. ৬..

শিষ্য উবাচ —

কো জীবঃ কঃ পরশ্চাত্মা তাদাত্ম্যং বা কথং তযোঃ .
তত্ত্বমস্যাদিবাক্যং বা কথং তত্প্রতিপাদযেত্ .. ৭..

গুরুরুবাচ —

অত্র ব্রূমঃ সমাধানং কোঽন্যো জীবস্ত্বমেব হি .
যস্ত্বং পৃচ্ছসি মাং কোঽহং ব্রহ্মৈবাসি ন সংশযঃ .. ৮..

শিষ্য উবাচ —

পদার্থমেব জানামি নাদ্যাপি ভগবন্স্ফুটম্ .
অহং ব্রহ্মেতি বাক্যার্থং প্রতিপদ্যে কথং বদ .. ৯..

গুরুরুবাচ —

সত্যমাহ ভবানত্র বিজ্ঞানং নৈব বিদ্যতে .
হেতুঃ পদার্থবোধো হি বাক্যার্থাবগতেরিহ .. ১০..
অন্তঃকরণতদ্বৃত্তিসাক্ষিচৈতন্যবিগ্রহঃ .
আনন্দরূপঃ সত্যঃ সন্কিং নাত্মানং প্রপদ্যসে .. ১১..
সত্যানন্দস্বরূপং ধীসাক্ষিণং বোধবিগ্রহম্ .
চিন্তযাত্মতযা নিত্যং ত্যক্ত্বা দেহাদিগাং ধিযম্ .. ১২..
রূপাদিমান্যতঃ পিণ্ডস্ততো নাত্মা ঘটাদিবত্ .
বিযদাদিমহাভূতবিকারত্বাচ্চ কুম্ভবত্ .. ১৩..
অনাত্মা যদি পিণ্ডোঽযমুক্তহেতুবলান্মতঃ .
করামলকবত্সাক্ষাদাত্মানং প্রতিপাদয .. ১৪..
ঘটদ্রষ্টা ঘটাদ্ভিন্নঃ সর্বথা ন ঘটো যথা .
দেহদ্রষ্টা তথা দেহো নাহমিত্যবধারয .. ১৫..
এবমিন্দ্রিযদৃঙ্নাহমিন্দ্রিযাণীতি নিশ্চিনু .
মনোবুদ্ধিস্তথা প্রাণো নাহমিত্যবধারয .. ১৬..
সংঘাতোঽপি তথা নাহমিতি দৃশ্যবিলক্ষণম্ .
দ্রষ্টারমনুমানেন নিপুণং সম্প্রধারয .. ১৭..
দেহেন্দ্রিযাদযো ভাবা হানাদিব্যাপৃতিক্ষমাঃ .
যস্য সন্নিধিমাত্রেণ সোঽহমিত্যবধারয .. ১৮..
অনাপন্নবিকারঃ সন্নযস্কান্তবদেব যঃ .
বুধ্দ্যাদীংশ্চালযেত্প্রত্যক্ সোঽহমিত্যবধারয .. ১৯..
অজডাত্মবদাভান্তি যত্সান্নিধ্যাজ্জডা অপি .
দেহেন্দ্রিযমনঃপ্রাণাঃ সোঽহমিত্যবধারয .. ২০..
অগমন্মে মনোঽন্যত্র সাম্প্রতং চ স্থিরীকৃতম্ .
এবং যো বেত্তি ধীবৃত্তিং সোঽহমিত্যবধারয .. ২১..
স্বপ্নজাগরিতে সুপ্তিং ভাবাভাবৌ ধিযাং তথা .
যো বেত্ত্যবিক্রিযঃ সাক্ষাত্সোঽহমিত্যবধারয .. ২২..
ঘটাবভাসকো দীপো ঘটাদন্যো যথেষ্যতে .
দেহাবভাসকো দেহী তথাহং বোধবিগ্রহঃ .. ২৩..
পুত্রবিত্তাদযো ভাবা যস্য শেষতযা প্রিযাঃ .
দ্রষ্টা সর্বপ্রিযতমঃ সোঽহমিত্যবধারয .. ২৪..
পরপ্রেমস্পদতযা মা ন ভুবমহং সদা .
ভূযাসমিতি যো দ্রষ্টা সোঽহমিত্যবধারয .. ২৫..
যঃ সাক্ষিলক্ষণো বোধস্ত্বংপদার্থঃ স উচ্যতে .
সাক্ষিত্বমপি বোধ্দৃত্বমবিকারিতযাত্মনঃ .. ২৬..
দেহেন্দ্রিযমনঃপ্রাণাহঙ্কৃতিভ্যো বিলক্ষণঃ .
প্রোজ্ঝিতাশেশষড্ভাববিকারস্ত্বংপদাভিধঃ .. ২৭..
ত্বমর্থমেবং নিশ্চিত্য তদর্থং চিন্তযেত্পুনঃ .
অতদ্ব্যাবৃত্তিরূপেণ সাক্ষাদ্বিধিমুখেন চ .. ২৮..
নিরস্তাশেষসংসারদোষোঽস্থুলাদিলক্ষণঃ .
অদৃশ্যত্বাদিগুণকঃ পরাকৃততমোমলঃ .. ২৯..
নিরস্তাদিশযানন্দঃ সত্যপ্রজ্ঞানবিগ্রহঃ .
সত্তাস্বলক্ষণঃ পূর্ণ পরমাত্মেতি গীযতে .. ৩০..
সর্বজ্ঞত্বং পরেশত্বং তথা সম্পূর্ণশক্তিতা .
বেদৈঃ সমর্থ্যতে যস্য তদ্ব্রহ্মেত্যবধারয .. ৩১..
যজ্জ্ঞানাত্সর্ববিজ্ঞানং শ্রুতিষু প্রতিপাদিতম্ .
মৃদাদ্যনেকদৃষ্টান্তৈস্তদ্ব্রহ্মেত্যবধারয .. ৩২..
যদানন্ত্যং প্রতিজ্ঞায শ্রুতিস্তত্সিধ্দযে জগৌ .
তত্কার্যত্বং প্রপঞ্চস্য তদ্ব্রহ্মেত্যবধারয .. ৩৩..
বিজিজ্ঞাস্যতযা যঞ্চ বেদান্তেষু মুমুক্ষিভিঃ .
সমর্থ্যতেঽতিযত্নেন তদ্ব্রহ্মেত্যবধারয .. ৩৪..
জীবাত্মনা প্রবেশশ্চ নিযন্তৃত্বং চ তান্ প্রতি .
শ্রূযতে যস্য বেদেষু তদ্ব্রহ্মেত্যবধারয .. ৩৫..
কর্মণাং ফলদাতৃত্বং যস্যৈব শ্রূযতে শ্রুতৌ .
জীবানাং হেতুকর্তৃত্বং তদ্ব্রহ্মেত্যবধারয .. ৩৬..
তত্ত্বংপদার্থৌ নির্ণীতৌ বাক্যার্থশ্চিন্ততেঽধুনা .
তাদাত্ম্যমত্র বাক্যার্থস্তযোরেব পদার্থযোঃ .. ৩৭..
সংসর্গো বা বিশিষ্টো বা বাক্যার্থো নাত্র সম্মতঃ .
অখণ্ডৈকরসত্বেন বাক্যার্থো বিদুষাং মতঃ .. ৩৮..
প্রত্যগ্বোধো য আভাতি সোঽদ্বযানন্দলক্ষণঃ .
অদ্বযানন্দরূপশ্চ প্রত্যগ্বোধৈকলক্ষণঃ .. ৩৯..
ইত্থমন্যোন্যতাদাত্ম্যপ্রতিপত্তির্যদা ভবেত্ .
অব্রহ্মত্বং ত্বমর্থস্য ব্যাবর্তেত তদৈব হি .. ৪০..
তদর্থস্য পারোক্ষ্যং যদ্যেব কিং ততঃ শ্রুণু .
পূর্ণানন্দৈকরূপেণ প্রত্যগ্বোধোবতিষ্ঠতে .. ৪১..
তত্ত্বমস্যাদিবাক্যং চ তাদাত্ম্যপ্রতিপাদনে .
লক্ষ্যৌ তত্ত্বংপদার্থৌ দ্বাবুপাদায প্রবর্ততে .. ৪২..
হিত্বা দ্বৌ শবলৌ বাচ্যৌ বাক্যং বাক্যার্থবোধনে .
যথা প্রবর্ততেঽস্মাভিস্তথা ব্যাখ্যাতমাদরাত্ .. ৪৩..
আলম্বনতযাভাতি যোঽস্মত্প্রত্যযশব্দযোঃ .
অন্তঃকরণসংভিন্নবোধঃ স ত্বংপদাভিধঃ .. ৪৪..
মাযোপাধির্জগদ্যোনিঃ সর্বজ্ঞত্বাদিলক্ষণঃ .
পরোক্ষ্যশবলঃ সত্যাদ্যাত্মকস্তত্পদাভিধঃ .. ৪৫..
প্রত্যক্পরোক্ষতৈকস্য সদ্বিতীযত্বপূর্ণতা .
বিরুধ্যতে যতস্তস্মাল্লক্ষণা সংপ্রবর্ততে .. ৪৬..
মানান্তরবিরোধে তু মুখ্যার্থস্য পরিগ্রহে .
মুখ্যার্থেনাবিনাভূতে প্রতীতির্লক্ষণোচ্যতে .. ৪৭..
তত্ত্বমস্যাদিবাক্যেষু লক্ষণা ভাগলক্ষণা .
সোঽযমিত্যাদিবাক্যস্থপদযোরিব নাপরা .. ৪৮..
অহং ব্রহ্মেতিবাক্যার্থবোধো যাবদ্দৃঢীভবেত্ .
শমাদিসহিতস্তাবদভ্যসেচ্ছ্রবণাদিকম্ .. ৪৯..
শ্রুত্যাচার্যপ্রসাদেন দৃঢো বোধো যথা ভবেত্ .
নিরস্তাশেষসংসারনিদানঃ পুরুষস্তদা .. ৫০..
বিশীর্ণকার্যকরণো ভূতসূক্ষ্মৈরনাবৃতঃ .
বিমুক্তকর্মনিগডঃ সদ্য এব বিমুচ্যতে .. ৫১..
প্রারব্ধকর্মবেগেন জীবন্মুক্তো যথা ভবেত্ .
কিঞ্চিত্কালমনারব্ধকর্মবন্ধস্য সংক্ষযে .. ৫২..
নিরস্তাতিশযানন্দং বৈষ্ণবং পরমং পদম্ .
পুনরাবৃত্তিরহিতং কৈবল্যং প্রতিপদ্যতে .. ৫৩..

.. ইতি পরমহংসপরিব্রাজকাচার্যশ্রীমচ্ছঙ্করাচার্যবিরচিতা বাক্যবৃত্তিঃ সমাপ্ত ..