ব্রহ্মানুচিন্তনম্

.. ব্রহ্মানুচিন্তনম্ ..

অহমেব পরং ব্রহ্ম বাসুদেবাখ্যমব্যযম্ .
ইতি স্যান্নিশ্চিতো মুক্তো বদ্ধ এবান্যথা ভবেত্ .. ১..

অহমেব পরং ব্রহ্ম নিশ্চিতং চিত্ত চিন্ত্যতাম্ .
চিদ্রূপত্বাদসঞ্গত্বাদবাধ্যত্বাত্ প্রযত্নতঃ .. ২..

অহমেব পরং ব্রহ্ম ন চাহং ব্রহ্মণঃ পৃথক্ .
ইত্যেবং সমুপাসীত ব্রাহ্মণো ব্রহ্মণি স্থিতঃ .. ৩..

সর্বোপাধিবিনির্মুক্তং চৈতন্যং চ নিরন্তরম্ .
তদ্ব্রহ্মাহমিতি জ্ঞাত্বা কথং বর্ণাশ্রমী ভবেত্ .. ৪..

অহং ব্রহ্মাস্মি যো বেদ স সর্বং ভবতি ত্বিদম্ .
নাভূত্যা ঈশতে দেবাস্তেওআমাত্মা ভবেদ্ধি সঃ .. ৫..

অন্যো অসাবহমন্যো অস্মীত্যুপাস্তে যো অন্যদেবতাম্ .
ন স বেদ নরো ব্রহ্ম স দেবানাং যথা পশুঃ .. ৬..

অহমাত্মা ন চান্যোঽস্মি ব্রহ্মৈবাহং ন শোকভাক্ .
সচ্চিদানন্দরূপোঽহং নিত্যমুক্তস্বভাববান্ .. ৭..

আত্মানং সততং ব্রহ্ম সংভাব্য বিহরন্তি যে .
ন তেষাং দুষ্কৃতং কিঞ্চিদ্দুষ্কৃতোত্থা ন চাপদঃ ..
আত্মানং সততং ব্রহ্ম সংভাব্য বিহরেত্সুখম্ .. ৮,৯..

ক্ষণং ব্রহ্মাহমস্মীতি যঃ কুর্যাদাত্মচিন্তনম্ .
তন্মহাপাতকং হন্তি তমঃ সূর্যোদযো যথা .. ১০..

অজ্ঞানাদ্ব্রহ্মণো জ্ঞাতমাকাশং বুদ্বুদোপমম্ .
আকাশাদ্বাযুরুত্পন্নো বাযোস্তেজস্ততঃ পযঃ .. ১১..

অদ্ভ্যশ্চ পৃথিবী জ্ঞাতা ততো ব্রীহিযবাদিকম্ .
পৃথিব্যপ্সু পযো বহ্নৌ বহ্নির্বাযৌ নভস্যসৌ .
নভোঽপ্যব্যাকৃতে তচ্চ শুদ্ধে শুদ্ধোঽস্ম্যহং হরিঃ .. ১২..

অহং বিষ্ণুরহং বিষ্ণুরহং বিষ্ণুরহং হরিঃ .
কর্তৃভোক্ত্রাদিকং সর্বং তদবিদ্যোত্থমেব চ .. ১৩..

অচ্যুতোঽহমনন্তোঽহং গোবিন্দোঽহমহংহরিঃ .
আনন্দোঽহমশেষোঽহমজোঽহমমৃতোঽস্ম্যহম্ .. ১৪..

নিত্যোঽহং নির্বিকল্পোঽহং নিরাকারোঽহমব্যযঃ .
সচ্চিদানন্দরূপোঽহং পঙ্চকোশাতিগোঽস্ম্যহম্ .. ১৫..

অকর্তাঽহমভোক্তাঽহমসঙ্গঃ পরমেশ্বরঃ .
সদা মত্সন্নিধানেন চেষ্টতে সর্বমিন্দ্রিযং .. ১৬..

আদিমধ্যান্তমুক্তোঽহং ন বদ্ধোঽহং কদাচন .
স্বভাবনির্মলঃ শুদ্ধঃ স এবাহং ন সংশযঃ .. ১৭..

ব্রহ্মৈবাহং ন সংসারী মুক্তোঽহমিতি ভাবযেত্ .
অশক্নুবন্ভাবযিতুং বাক্যমেতত্সদাঽভ্যসেত্ .. ১৮..

যদভ্যাসেন তদ্ভাবো ভবেদ্ভ্রমরকীটবত্ .
অত্রাপহায সন্দেহমভ্যসেত্কৃতনিশ্চযঃ .. ১৯..

ধ্যানযোগেন মাসৈকাদ্ব্রহ্মহত্যাং ব্যপোহতি .
সংবত্সরং সদাঽভ্যাসাত্সিদ্ধ্যষ্টকমবাপ্নুযাত্ .
যাবজ্জীবং সদাঽভ্যাসাজ্জীবন্মুক্তো ভবেদ্যতিঃ .. ২০..

নাহং দেহো ন চ প্রাণো নেন্দ্রিযাণি তথৈব চ .
ন মনোঽহং ন বুদ্ধিশ্চ নৈব চিত্তমহঙ্কৃতিঃ .. ২১..

নাহং পৃথ্বী ন সলিলং ন চ বহ্নিস্তথাঽনিলঃ .
ন চাকাশো ন শব্দশ্চ ন চ স্পর্শস্তথা রসঃ .. ২২..

নাহং গন্ধো ন রূপং চ ন মাযাঽহং ন সংসৃতিঃ .
সদা সাক্ষিস্বরূপত্বাচ্ছিব এবাস্মি কেবলঃ .. ২৩..

ময্যেব সকলং জাতং মযি সর্বং প্রতিষ্ঠিতম্ .
মযি সর্বং লযং যাতি তদ্ব্রহ্মাস্ম্যহমদ্বযম্ .. ২৪..

সর্বজ্ঞোঽহমনন্তোঽহং সর্বেশঃ সর্বশক্তিমান্ .
আনন্দঃ সত্যবোধোঽহমিতি ব্রহ্মানুচিন্তনম্ .. ২৫..

অযং প্রপঞ্চো মিথ্যৈব সত্যং ব্রহ্মাহমব্যযম্ .
অত্র প্রমাণং বেদান্তা গুরবোঽনুভবস্তথা .. ২৬..

ব্রহ্মৈবাহং ন সংসারী ন চাহং ব্রহ্মণঃ পৃথক্ .
নাহং দেহো ন মে দেহঃ কেবলোঽহং সনাতনঃ .. ২৭..

.. ইতি শ্রীমদ্ শঙ্করাচার্যবিরচিতং ব্রহ্মানুচিন্তনং সমাপ্তং ..