প্রশ্নোত্তররত্নমালিকা

.. প্রশ্নোত্তররত্নমালিকা ..

প্রশ্নোত্তররত্নমালিকা

কঃ খলু নালঙ্ক্রিযতে দৃষ্টাদৃষ্টার্থসাধনপটীযান্ .
অমুযা কণ্ঠস্থিতযা প্রশ্নোত্তররত্নমালিকযা .. ১..

ভগবন্ কিমুপাদেযং গুরুবচনং হেযমপি কিমকার্যং .
কো গুরুঃ অধিগততত্ত্বঃ শিষ্যহিতাযোদ্যতঃ সততং .. ২..

ত্বরিতং কিং কর্তব্যং বিদুষাং সংসারসন্ততিচ্ছেদঃ .
কিং মোক্ষতরোর্বীজং সম্যক্জ্ঞানং ক্রিযাসিদ্ধং .. ৩..

কঃ পথ্যতরো ধর্মঃ কঃ শুচিরিহ যস্য মানসং শুদ্ধং .
কঃ পণ্ডিতো বিবেকী কিং বিষমবধীরণা গুরুষু .. ৪..

কিং সংসারে সারং বহুশোঽপি বিচিন্ত্যমানমিদমেব .
কিং মনুজেষ্বিষ্টতমং স্বপরহিতাযোদ্যতং জন্ম .. ৫..

মদিরেব মোহজনকঃ কঃ স্নেহঃ কে চ দস্যবো বিষযাঃ .
কা ভববল্লি তৃষ্ণা কো বৈরী যস্ত্বনুদ্যোগঃ .. ৬..

কস্মাদ্ভযমিহ মরণাদন্ধাদিহ কো বিশিষ্যতে রাগী .
কঃ শূরো যো ললনালোচনবাণৈর্ন চ ব্যধিতঃ .. ৭..

পান্তুং কর্ণাঞ্জলিভিঃ কিমমৃতমিহ যুজ্যতে সদুপদেশঃ .
কিং গুরুতাযা মূলং যদেতদপ্রার্থনং নাম .. ৮..

কিং গহনং স্ত্রীচরিতং কশ্চতুরো যো ন খণ্ডিতস্তেন .
কিং দুঃখং অসন্তোষঃ কিং লাঘবমধমতো যাচ্ঞা .. ৯..

কিং জীবিতমনবদ্যং কিং জাড্যং পাঠতোঽপ্যনভ্যাসঃ .
কো জাগর্তি বিবেকী কো নিদ্রা মূঢতা জন্তোঃ .. ১০..

নলিনীদলগতজলবত্তরলং কিং যৌবনং ধনং চাযুঃ .
কথয পুনঃ কে শশিনঃ কিরণসমাঃ সজ্জনা এব .. ১১..

কো নরকঃ পরবশতা কিং সৌখ্যং সর্বসঙ্গবিরতির্যা .
কিং সত্যং ভূতহিতং প্রিযং চ কিং প্রাণিনামসবঃ .. ১২..

কোঽনর্থফলো মানঃ কা সুখদা সাধুজনমৈত্রী .
সর্বব্যসনবিনাশে কো দক্ষঃ সর্বথা ত্যাগী .. ১৩..

কিং মরণং মূর্খত্বং কিং চানর্ঘং যদবসরে দত্তং .
আমরণাত্ কিং শল্যং প্রচ্ছন্নং যত্কৃতং পাপং .. ১৪..

কুত্র বিধেযো যত্নো বিদ্যাভ্যাসে সদৌষধে দানে .
অবধীরণা ক্ব কার্যা খলপরযোষিত্পরধনেষু .. ১৫..

কাহর্নিশমনুচিন্ত্যা সংসারাসারতা ন তু প্রমদা .
কা প্রেযসী বিধেযা করণা দীনেষু সজ্জনে মৈত্রী .. ১৬..

কণ্ঠগতৈরপ্যসুভিঃ কস্য হ্যাত্মা ন শক্যতে জেতুং .
মূর্খস্য শঙ্কিতস্য চ বিষাদিনো বা কৃতঘ্নস্য .. ১৭..

কঃ সাধুঃ সদবৃত্তঃ কমধমমাচক্ষতে ত্বসদ্বৃত্তং .
কেন জিতং জগদেতত্সত্যতিতিক্ষাবতা পুংসা .. ১৮..

কস্মৈ নমাংসি দেবাঃ কুর্বন্তি দযাপ্রধানায .
কস্মাদুদ্বেগঃ স্যাত্সংসারারণ্যতঃ সুধিযঃ .. ১৯..

কস্য বশে প্রাণিগণঃ সত্যপ্রিযভাষিণো বিনীতস্য .
ক্ব স্থাতব্যং ন্যায্যে পথি দৃষ্টাদৃষ্টলাভাঢ্যে .. ২০..

কোঽন্ধো যোঽকর্যরতঃ কো বধিরো যো হিতানি ন শৃণোতি .
কো মূকো যঃ কালে প্রিযাণি বক্তুং ন জানাতি .. ২১..

কিং দানমনাকাঙ্ক্ষং কিং মিত্রং যো নিবারযতি পাপাত্ .
কোঽলঙ্কারঃ শীলং কিং বাচাং মণ্ডনং সত্যং .. ২২..

বিদ্যুদ্বিলসিতচপলং কিং দুর্জনসঙ্গতির্যুবতযশ্চ .
কুলশীলনিষ্প্রকম্পাঃ কে কলিকালেঽপি সজ্জনা এব .. ২৩..

চিন্তামণিরিব দুর্লভমিহ কিং কথযামি তচ্চতুর্ভদ্রং .
কিং তদ্বদন্তি ভূযো বিধুততমসা বিশেষেণ .. ২৪..

দানং প্রিযবাক্সহিতং জ্ঞানমগর্বং ক্ষমান্বিতং শৌর্যং .
বিত্তং ত্যাগসমেতং দুর্লভমেতচ্চতুর্ভদ্রং .. ২৫..

কিং শোচ্যং কার্পণ্যং সতি বিভবে কিং প্রশস্তমৌদার্যং .
কঃ পূজ্যো বিদ্বদ্ভিঃ স্বভাবতঃ সর্বদা বিনীতো যঃ .. ২৬..

কঃ কুলকমলদিনেশঃ সতি গুণাবিভবেঽপি যো নম্রঃ .
কস্য বশে জগদেতত্প্রিযহিতবচনস্যধর্মনিরতস্য .. ২৭..

বিদ্বন্মনোহরা কা সত্কবিতা বোধবনিতা চ .
কং ন স্পৃশতি বিপত্তিঃ প্রবৃদ্ধবচনানুবর্তিনং দান্তং .. ২৮..

কস্মৈ স্পৃহযতি কমলা ত্বনলসচিত্তায নীতিবৃত্তায .
ত্যজতি চ কং সহসা দ্বিজগুরুসুরনিন্দাকরং চ সালস্যং .. ২৯..

কুত্র বিধেযো বাসঃ সজ্জননিকটেঽথবা কাশ্যাং .
কঃ পরিহার্যো দেশঃ পিশুনযুতো লুব্ধভূপশ্চ .. ৩০..

কেনাশোচ্যঃ পুরুষঃ প্রণতকলত্রেণ ধীরবিভবেন .
ইহ ভুবনে কঃ শোচ্যঃ সত্যপি বিভবে ন যো দাতা .. ৩১..

কিং লঘুতাযা মূলং প্রাকৃতপুরুষেষু যা যাচ্ঞা .
রামাদপি কঃ শূরঃ স্মরশরনিহতো ন যশ্চলতি .. ৩২..

কিমহর্নিশমনুচিন্ত্যং ভগবচ্চরণং ন সংসারঃ .
চক্ষুষ্মন্তোঽপ্যন্ধাঃ কে স্যুঃ যে নাস্তিকা মনুজাঃ .. ৩৩..

কঃ পঙ্গুরিহ প্রথিতো ব্রজতি চ যো বার্দ্ধকে তীর্থং .
কিং তীর্থমপি চ মুখ্যং চিত্তমলং যন্নিবর্তযতি .. ৩৪..

কিং স্মর্ত্তব্যং পুরুষৈঃ হরিনাম সদা ন যাবনী ভাষা .
কো হি ন বাচ্যঃ সুধিযা পরদোষশ্চানৃতং তদ্বত্ .. ৩৫..

কিং সংপাদ্যং মনুজৈঃ বিদ্যা বিত্তং বলং যশঃ পুণ্যং .
কঃ সর্বগুণবিনাশী লোভঃ শত্রুশ্চ কঃ কামঃ .. ৩৬..

কা চ সভা পরিহার্যা হীনা যা বৃদ্ধসচিবেন .
ইহ কুত্রাবহিতঃ স্যান্মনুজঃ কিল রাজসেবাযাং .. ৩৭..

প্রাণাদপি কো রম্যঃ কুলধর্মঃ সাধুসঙ্গশ্চ .
কা সংরক্ষ্যা কীর্তিঃ পতিব্রতা নৈজবুদ্ধিশ্চ .. ৩৮..

কা কল্পলতা লোকে সচ্ছিষ্যাযার্পিতা বিদ্যা .
কোঽক্ষযবটবৃক্ষঃ স্যাত্বিধিবত্সত্পাত্রদত্তদানং যত্ .. ৩৯..

কিং শস্ত্রং সর্বেষাং যুক্তিঃ মাতা চ কা ধেনুঃ .
কিং নু বলং যদ্ধৈর্যং কো মৃত্যুঃ যদবধানরহিতত্বং .. ৪০..

কুত্র বিষং দুষ্টজনে কিমিহাশৌচং ভবেতৃণং নৃণাং .
কিমভযমিহ বৈরাম্যং ভযমপি কিং বিত্তমেব সর্বেষাং .. ৪১..

কা দুর্লভা নরাণাং হরিভক্তিঃ পাতকং চ কিং হিংসা .
কো হি ভগবত্প্রিযঃ স্যাত্যোঽন্যং নোদ্বেজযেদনুদ্বিগ্নঃ .. ৪২..

কস্মাত্ সিদ্ধিঃ তপসঃ বুদ্ধিঃ ক্ব নু ভূসুরে কুতো বুদ্ধিঃ .
বৃদ্ধোপসেবযা কে বৃদ্ধা যে ধর্মতত্ত্বজ্ঞাঃ .. ৪৩..

সংভাবিতস্য মরণাদধিকং কিং দুর্যশো ভবতি .
লোকে সুখী ভবেত্কো ধনবান্ধনমপি চ কিং যতশ্চেষ্টং .. ৪৪..

সর্বসুখানাং বীজং কিং পুণ্যং দুঃখমপি কুতঃ পাপাত্ .
কস্যৈশ্বর্যং যঃ কিল শঙ্করমারাধযেদ্ভক্ত্যা .. ৪৫..

কো বর্দ্ধতে বিনীতঃ কো বা হীযেত যো দৃপ্তঃ .
কো ন প্রত্যেতব্যো ব্রূতে যশ্চানৃতং শশ্বত্ .. ৪৬..

কুত্রানৃতেঽপ্যপাপাং যচ্চোক্তং ধর্মরক্ষার্থং .
কো ধর্মোঽভিমতো যঃ শিষ্টানাং নিজকুলীনানাং .. ৪৭..

সাধুবলং কিং দৈবং কঃ সাধুঃ সর্বদা তুষ্টঃ .
দৈবং কিং যত্সুকৃতং কঃ সুকৃতী শ্লাঘ্যতে চ যঃ সদ্ভিঃ .. ৪৮..

গৃহমেধিনশ্চ মিত্রং কিং ভার্যা কো গৃহী চ যো যজতে .
কো যজ্ঞো যঃ শ্রুত্যা বিহিতঃ শ্রেযস্করো নৃণাং .. ৪৯..

কস্য ক্রিযা হি সফলা যঃ পুনরাচারবাং শিষ্টঃ .
কঃ শিষ্টো যো বেদপ্রমাণবাং কো হতঃ ক্রিযাভ্রষ্টঃ .. ৫০..

কো ধন্যঃ সংন্যাসী কো মান্যঃ পণ্ডিতঃ সাধুঃ .
কঃ সেব্যো যো দাতা কো দাতা যোঽর্থিতৃপ্তিমাতনুতে .. ৫১..

কিং ভাগ্যং দেহবতামারোগ্যং কঃ ফলী কৃষিকৃত্ .
কস্য ন পাপং জপতঃ কঃ পূর্ণো যঃ প্রজাবাং স্যাত্ .. ৫২..

কিং দুষ্করং নরাণাং যন্মনসো নিগ্রহঃ সততং .
কো ব্রহ্মচর্যবাং স্যাত্যশ্চাস্খলিতোর্ধ্বরেতস্কঃ .. ৫৩..

কা চ পরদেবতোক্তা চিচ্ছক্তিঃ কো জগত্ভর্তা .
সূর্যঃ সর্বেষাং কো জীবনহেতুঃ স পর্জন্যঃ .. ৫৪..

কঃ শুরো যো ভীতত্রাতা ত্রাতা চ কঃ সদ্গুরুঃ .
কো হি জগদ্গুরুরুক্তঃ শংভুঃ জ্ঞানং কুতঃ শিবাদেব .. ৫৫..

মুক্তিং লভেত কস্মান্মুকুন্দভক্তেঃ মুকুন্দঃ কঃ .
যস্তারযেদবিদ্যাং কা চাবিদ্যা যদাত্মনোঽস্ফূর্তিঃ .. ৫৬..

কস্য ন শোকো যঃ স্যাদ্ক্রোধঃ কিং সুখং তুষ্টিঃ .
কো রাজা রঞ্চনকৃত্কশ্চ শ্বা নীচসেবকো যঃ স্যাত্ .. ৫৭..

কো মাযী পরমেশঃ ক ইন্দ্রজালাযতে প্রপঞ্চোঽযং .
কঃ স্বপ্ননিভো জাগ্রদ্ব্যবহারঃ সত্যমপি চ কিং ব্রহ্ম .. ৫৮..

কিং মিথ্যা যদ্বিদ্যানাশ্যং তুচ্ছং তু শশবিষাণাদি .
কা চানির্বাচ্যা মাযা কিং কল্পিতং দ্বৈতং .. ৫৯..

কিং পারমার্থিকং স্যাদদ্বৈতং চাজ্ঞতা কুতোঽনাদিঃ .
বপুষশ্চ পোষকং কিং প্রারব্ধং চান্নদাযি কিং চাযুঃ .. ৬০..

কো ব্রহ্মণৈরুপাস্যো গাযত্র্যর্কাগ্নিগোচরঃ শংভুঃ .
গাযত্র্যামাদিত্যে চাগ্নৌ শংভ চ কিং নু তত্তত্ত্বং .. ৬১..

প্রাত্যক্ষদেবতা কা মাতা পূজ্যো গুরুশ্চ কঃ তাতঃ .
কঃ সর্বদেবতাত্মা বিদ্যাকর্মান্বিতো বিপ্রঃ .. ৬২..

কশ্চ কুলক্ষযহেতুঃ সন্তাপঃ সজ্জনেষু যোঽকারি .
কেষামমোঘ বচনং যে চ পুনঃ সত্যমৌনশমশীলাঃ .. ৬৩..

কিং জন্ম বিষযসঙ্গঃ কিমুত্তরং জন্ম পুত্রঃ স্যাত্ .
কোঽপরিহার্যো মৃত্যুঃ কুত্র পদং বিন্যসেচ্চ দৃক্পূতে .. ৬৪..

পাত্রং কিমন্নদানে ক্ষুধিতং কোঽর্চ্যো হি ভগবদবতারঃ .
কশ্চ ভগবান্মহেশঃ শঞ্করনারাযণাত্মৈকঃ .. ৬৫..

ফলমপি ভগবদ্ভক্তেঃ কিং তল্লোকস্বরুপসাক্ষাত্ত্বং .
মোক্ষশ্চ কো হ্যবিদ্যাস্তমযঃ কঃ সর্ববেদভূঃ অথ চ ৐ .. ৬৬..

ইত্যেষা কণ্ঠস্থা প্রশ্নোত্তররত্নমালিকা যেষাং .
তে মুক্তাভরণা ইব বিমলাশ্চাভান্তি সত্সমাজেষু .. ৬৭..

.. ইতি শ্রীমদ্ শঙ্করাচার্যবিরচিতা প্রশ্নোত্তররত্নমালিকা সমাপ্তা ..