ধন্যাষ্টকং

.. ধন্যাষ্টকং ..

ধন্যাষ্টকং

তজ্জ্ঞানং প্রশমকরং যদিন্দ্রিযাণং
তজ্জ্ঞেযং যদুপনিষত্সু নিশ্চিতার্থং .
তে ধন্যা ভুবি পরমার্থনিশ্চিতেহাঃ
শেষাস্তু ভ্রমনিলযে পরিভ্রমন্তঃ .. ১..

আদৌ বিজিত্য বিষযান্মদমোহরাগ-
দ্বেষাদিশত্রুগমাহৃতযোগরাজ্যাঃ .
জ্ঞাত্বা মতং সমনুভূযপরাত্মবিদ্যা-
কান্তাসুখং বনগৃহে বিচরন্তি ধন্যাঃ .. ২..

ত্যক্ত্বা গৃহে রতিমধোগতিহেতুভূতাম্
আত্মেচ্ছযোপনিষদর্থরসং পিত্বন্তঃ .
বীতস্পৃহা বিষযভোগপদে বিরক্তা
ধন্যাশ্চরন্তি বিজনেষু বিরক্তসঙ্গাঃ .. ৩..

ত্যক্ত্বা মমাহমিতি বন্ধকরে পদে দ্বে
মানাবমানসদৃশাঃ সমদর্শিনশ্চ .
কর্তারমন্যমবগম্য তদর্পিতানি
কুর্বন্তি কর্মপরিপাকফলানি ধন্যাঃ .. ৪..

ত্যক্ত্বৌষাত্রযমবেক্ষিতমোক্ষমর্গা
ভৈক্ষামৃতেন পরিকল্পিতদেহযাত্রাঃ .
জ্যোতিঃ পরাত্পরতরং পরমাত্মসংজ্ঞং
ধন্যা দ্বিজারহসি হৃদ্যবলোকযন্তি .. ৫..

নাসন্ন সন্ন সদসন্ন মহসন্ন চাণু
ন স্ত্রী পুমান্ন চ নপুংসকমেকবীজং .
যৈর্ব্রহ্ম তত্সমনুপাসিতমেকচিতৈঃ
ধন্যা বিরেজুরিতে ভবপাশবদ্ধাঃ .. ৬..

অজ্ঞানপঙ্কপরিমগ্নমপেতসারং
দুঃখালযং মরণজন্মজরাবসক্তং .
সংসারবন্ধনমনিত্যমবেক্ষ্য ধন্যা
জ্ঞানাসিনা তদবশীর্য বিনিশ্চযন্তি .. ৭..

সান্তৈরনন্যমতিভির্মধুরস্বভাবৈঃ
একত্বনিশ্চিতমনোভিরপেতমোহৈঃ .
সাকং বনেষু বিজিতাত্মপদস্বরুপং
তদ্বস্তু সম্যগনিশং বিমৃশন্তি ধন্যাঃ .. ৮..

.. ইতি শ্রীমদ্ শঙ্করাচার্যবিরচিতং ধন্যাষ্টকং সমাপ্তং ..