উপদেশসাহস্রী

.. উপদেশসাহস্রী ..

গদ্যবন্ধঃ

প্রথমো ভাগঃ

শিষ্যপ্রতিবোধবিধিপ্রকরণম্ . ১
  কূটস্থাদ্বযাত্মবোধ প্রকরণম্ . ২
  পরিসংখ্যানপ্রকরণম্ . ৩
পদ্যবন্ধঃ

দ্বিতীযো ভাগঃ

উপোদ্ধাতপ্রকরণম্ ১
  প্রতিষেধপ্রকরণম্ ২
  ঈশ্বরাত্মপ্রকরণম্ ৩
  তত্ত্বজ্ঞানস্বভাবপ্রকরণম্ ৪
  বুদ্ধ্যপরাধপ্রকরণম্ ৫
  বিশেষপোহপ্রকরণম্ ৬
  বুদ্ধ্যারূঢপ্রকরণম্ ৭
  মতিবিলাপনপ্রকরণম্ ৮
  সূক্ষ্মতাব্যাপিতাপ্রকরণম্ ৯
  দৃশিস্বরূপপরমার্থদর্শনপ্রকরণম্ ১০
  ঈক্ষিতৃত্বপ্রকরণম্ ১১
  প্রকাশপ্রকরণম্ ১২
  অচক্ষুস্ষ্ট্বপ্রকরণম্ ১৩
  স্বপ্নস্মৃতিপ্রকরণম্ ১৪
  নান্যদন্যত্প্রকরণম্ ১৫
  পার্থিবপ্রকরণম্ ১৬
  সম্যঙ্মতিপ্রকরণম্ ১৭
  তত্ত্বমসিপ্রকরণম্ ১৮
  অথাত্মমনঃসংবাদপ্রকরণম্ ১৯

গদ্যবন্ধঃ প্রথমো ভাগঃ .

শিষ্যপ্রতিবোধবিধিপ্রকরণম্ .. ১..

অথ মোক্ষসাধনোপদেশবিধিং ব্যাখ্যাস্যামো মুমুক্ষূণাং শ্রদ্দধানানামর্থিনামর্থায .. ১..
তদিদং মোক্ষসাধনং জ্ঞানং সাধনসাধ্যাদনিত্যাত্সর্বস্মাদ্বিরক্তায ত্যক্তপুত্রবিত্তলোকৈষণায প্রতিপন্নপরমহংসপারিব্রাজাযশমদমদযাদিযুক্তায শাস্ত্রপ্রসিদ্ধশিষ্যগুণসংপন্নায শুচযে ব্রাহ্মণায বিধিবদুপসন্নায শিষ্যায জাতিকর্মবৃত্তবিদ্যাভিজনৈঃ পরীক্ষিতায ব্রূযাত্পুনঃপুনঃ যাবদ্গ্রহণং দৃঢীভবতি .. ২..
শ্রুতিশ্চ—‘ পরীক্ষ্য লোকান্ …তত্ত্বতো ব্রহ্মবিদ্যাম্ ‘ ইতি . দৃঢগৃহীতা হি বিদ্যা আত্মনঃ শ্রেযসে সন্তত্যৈ চ ভবতি .
বিদ্যাসন্ততিশ্চ প্রাণ্যনুগ্রহায ভবতি নৌরিব নদীং তিতীর্ষোঃ .
শাস্ত্রং চ—‘ যদ্যপস্মা ইমামদ্ভিঃ পরিগৃহীতাং ধনস্য পূর্ণাং দদ্যাদেতদেব ততো ভূযঃ ‘ ইতি .
অন্যথা চ জ্ঞানপ্রাপ্ত্যভাবাত্—‘ আচার্যবান্ পুরুষো বেদ ‘ , ‘ আচার্যাদ্ধৈব বিদ্যা বিদিতা ‘ , ‘ আচার্যঃ প্লবযিতা ‘ ,
‘ সম্যগ্জ্ঞানং প্লব ইহোচ্যতে ‘ ইত্যাদিশ্রুতিভ্যঃ, ‘ উপদেক্ষ্যন্তি তে জ্ঞানং, ‘ ইত্যাদিস্মৃতেশ্চ .. ৩..
শিষ্যস্য জ্ঞানাগ্রহণং চ লিঙ্গৈর্বুদ্ধ্বা অগ্রহণে হেতূনধর্মলৌকিক-প্রমাদ-নিত্যানিত্যবিবেকবিষযাসংজাতদৃঢপূর্বশ্রুতত্বলোকচিন্তাবেক্ষণ-জাত্যাদ্যভিমানাদীন্ তত্প্রতিপক্ষৈঃ শ্রুতিস্মৃতিবিহিতৈঃ অপনযেত , অক্রোধাদিভিরহিংসাদিভিশ্চ যমৈঃ, জ্ঞানবিরুদ্ধৈশ্চ নিযমৈঃ .. ৪..
অমানিত্বাদিগুণং চ জ্ঞানোপাযং সম্যক্ গ্রাহযেত্ .. ৫..
আচার্যস্তূহাপোহগ্রহণধারণশমদমদযানুগ্রহাদিসংপন্নো লব্ধাগমো দৃষ্টাদৃষ্টভোগেষ্বনাসক্তঃ ত্যক্তসর্বকর্মসাধনো ব্রহ্মবিদ্ব্রহ্মণি স্থিতোঽভিন্নবৃত্তো দংভদর্পকুহকশাঠ্যমাযামাত্সর্যানৃতাহঙ্কারমমত্বাদিদোষবর্জিতঃ কেবলপরানুগ্রহপ্রযোজনো বিদ্যোপযোগার্থী পূর্বমুপদিষেত্—‘ সদেব সোম্যেদমগ্র আসীদেকমেবাদ্বিতীযম্ ‘ , ‘ যত্র নান্যত্পশ্যতি ‘ , ‘ আত্মৈবেদং সর্বম্ ‘ , ‘ আত্মা বা ইদমেক এবাগ্র আসীত্ ‘ , ‘ সর্বং খল্বিদং ব্রহ্ম ‘ ইত্যাদ্যাঃ আত্মৈক্যপ্রতিপাদনপরাঃ শ্রুতীঃ .. ৬..
উপদিশ্য চ গ্রাহযেদ্ব্রহ্মণো লক্ষণম্—‘ য আত্মাঽপহতপাপ্মা ‘ , ‘ যত্সাক্ষাদপরোক্ষাদ্ব্রহ্ম ‘ , ‘ যোঽশনাযাপিপাসে ‘ ,
‘ নেতি নেতি ‘ , ‘ অস্থূলমনণু ‘ , ‘ স এষ নেতি ‘ , অদৃষ্টং দ্রষ্টৃ ‘ , ‘ বিজ্ঞানমানন্দম্ ‘ , সত্যং জ্ঞানমনন্তম্ ‘ , অদৃশ্যেঽনাত্ম্যে ‘ , ‘ সা বা এষ মহানজ আত্মা ‘ , অপ্রাণো হ্যমনাঃ ‘ , ‘ সবাহ্যাভ্যন্তরো হ্যজঃ ‘ , বিজ্ঞানঘন এব ‘ , ‘ অনন্তরমবাহ্যম্ ‘ ,
‘ অন্যদেব তদ্বিদিতাদথো অবিদিতাত্ ‘ , ‘ আকাশো বৈ নাম ‘ ইত্যাদিশ্রুতিভিঃ .. ৭..
স্মৃতিভিশ্চ—‘ ন জাযতে ম্রিযতে বা ‘ , ‘ নাদত্তে কস্যচিত্পাপম্ ‘ , ‘ যথাকাশস্থিতোনিত্যম্ ‘ , ক্ষেত্রজ্ঞং চাপি মাং বিদ্ধি ‘ , ‘ ন সত্তন্নাসদুচ্যতে ‘ , ‘ অনাদিত্বান্নির্গুণত্বাত্ ‘ , ‘ সমং সর্বেষু ভূতেষু ‘ , ‘ উত্তমঃ পুরুষস্ত্বন্যঃ ‘ , ইত্যাদিভিঃ শ্রুত্যুক্তলক্ষণাবিরুদ্ধাভিঃ পরমাত্মাসংসারিত্বপ্রতিপাদনপরাভিঃ তস্য সর্বেণানন্যত্বপ্রতিপাদনপরাভিশ্চ .. ৮..
এবং শ্রুতিস্মৃতিভিঃ গৃহীতপরমাত্মলক্ষণং শিষ্যং সংসারসাগরাদুত্তিতীর্ষুং পৃচ্ছেত্—কস্ত্বমসি সোম্যেতি .. ৯..
স যদি ব্রূযাত্—ব্রাহ্মণপুত্রঃ অদোন্বযঃ ব্রহ্মচার্যাসম্, গৃহস্থো বা, ইদানীমস্মি পরমহংসপরিব্রাট্ সংসারসাগরাত্ জন্মমৃত্যুমহাগ্রাহাত্ উত্তিতীর্ষুরিতি .. ১০..
আচার্যো ব্রূযাত্—ইহৈব তব সোম্য মৃতস্য শরীরং বযোভিরদ্যতে মৃদ্ভাবং বাপদ্যতে, তত্র কথং সংসারাদুদ্ধর্তুমিচ্ছসীতি . নহি নদ্যাঃ অবরে কূলে ভস্মীভূতে নদ্যাঃ পারং তরিষ্যসীতি .. ১১..
স যদি ব্রূযাত্—অন্যোঽহং শরীরাত্ . শরীরং তু জাযতে, ম্রিযতে, বযোভিরদ্যতে, শাখাগ্ন্যাদিভিশ্চ বিনাশ্যতে, ব্যাধ্যাদিভিশ্চ প্রযুজ্যতে . তস্মিন্নহং স্বকৃতধর্মাধর্মবশাত্ পক্ষী নীডমিব প্রবিষ্টঃ পুনঃ পুনঃ শরীরবিনাশে ধর্মাধর্মবশাত্ শরীরান্তরং যাস্যামি, পূর্বনীডবিনাশে পক্ষীব নীডান্তরম্ . এবমেবাহমনাদৌ সংসারে দেবমনুষ্যতির্যঙ্নিরযস্থানেষু স্বকর্মবশাদুপাত্তমুপাত্তং শরীরং ত্যজন্, নবং নবং চ অন্যদুপাদদানো, জন্মমরণপ্রবন্ধচক্রং ঘটীযন্ত্রবত্ স্বকর্মণা ভ্রাম্যমাণঃ ক্রমেণেদং শরীরমাসাদ্য সংসারচক্রভ্রমণাত্ অস্মান্নির্বিণ্ণো ভগবন্তমুপসন্নোঽস্মি সংসারচক্রভ্রমণপ্রশমায . তস্মান্নিত্য এবাহং শরীরাদন্যঃ . শরীরাণি আগচ্ছন্ত্যপগচ্ছন্তি চ বাসাংসীব পুরুষস্যেতি .. ১২..
আচার্যো ব্রূযাত্—সাধ্ববাদীঃ, সম্যক্পশ্যসি . কথং মৃষাঽবাদীঃ ব্রাহ্মণপুত্রোঽদোন্বযো ব্রহ্মচার্যাসম্, গৃহস্থো বা, ইদানীমস্মি
পরমহংসপরিব্রাডিতি ..১৩..
তং প্রতি ব্রূযাদাচার্যঃ—স যদি ব্রূযাত্ ভগবন্, কথমহং মৃষাঽবাদিষমিতি .. ১৪..
যতস্ত্বং ভিন্নজাত্যন্বযসংস্কারং শরীরং জাত্যন্বযবর্জিতস্যাত্মনঃ প্রত্যভ্যজ্ঞাসীঃ ব্রাহ্মণপুত্রোঽদোন্বয ইত্যাদিনা বাক্যেনেতি .. ১৫..
স যদি পৃচ্ছেত্ কথং ভিন্নজাত্যন্বযসংস্কারং শরীরং, কথং বা অহং জাত্যন্বযসংস্কারবর্জিত ইতি .. ১৬..
আচার্যো ব্রূযাত্—শৃণু সোম্য যথেদং শরীরং ত্বত্তো ভিন্নং ভিন্নজাত্যন্বযসংস্কারং,
ত্বং চ জাত্যন্বযসংস্কারবর্জিতঃ, ইত্যুক্ত্বা তং স্মারযেত্—স্মর্তুমর্হসি সোম্য, পরমাত্মানং সর্বাত্মানং যথোক্তলক্ষণং শ্রাবিতোঽসি ‘ সদেব সোম্যেদম্ ‘ ইত্যাদিভিঃ শ্রুতিভিঃ স্মৃতিভিশ্চ . লক্ষণং চ তস্য শ্রুতিভিঃ স্মৃতিভিশ্চ .. ১৭..
লব্ধপরমাত্মলক্ষণস্মৃতযে ব্রূযাত্—যোঽসাবাকাশনামা নামরূপাভ্যামর্থান্তরভূতঃ অশরীরঃ অস্থূলাদিলক্ষণঃ অপহতপাপ্মাদিলক্ষণশ্চ
সর্বৈঃ সংসারধর্মৈঃ অনাগন্ধিতঃ ‘ যত্সাক্ষাদপরোক্ষাদ্ব্রহ্ম ‘ , ‘ য আত্মা সর্বান্তরঃ , ‘ অদৃষ্টো দ্রষ্টা অশ্রুতঃ শ্রোতা অমতো মন্তা অবিজ্ঞাতো বিজ্ঞাতা’ , নিত্যবিজ্ঞানস্বরূপঃ অনন্তরঃ অবাহ্যঃ বিজ্ঞানঘন এব, পরিপূর্ণঃ আকাশবত্, অনন্তশক্তিঃ, আত্মা সর্বস্য, অশনাযাদিবর্জিতঃ, আবির্ভাবতিরোভাববর্জিতশ্চ, স্বাত্মবিলক্ষণযোঃ নামরূপযোঃ জগদ্ভূতবীজযোঃ স্বাত্মস্থযোঃ তত্ত্বান্যত্বাভ্যামনির্বচনীযযোঃ স্বযংবেদ্যযোঃ
সদ্ভাবমাত্রেণাচিন্ত্যশক্তিত্বাদ্ ব্যাকর্তা অব্যকৃতযোঃ .. ১৮..
তে নামরূপে অব্যাকৃতে সতী ব্যাক্রিযমাণে তস্মাদেতস্মাদাত্মন আকাশনামাকৃতী সংবৃত্তে . তচ্চাকাশাখ্যং ভূতমনেন প্রকারেণ পরমাত্মনঃ সম্ভূতং প্রসন্নাদিব সলিলান্মলমিব ফেনম্ . ন সলিলং ন চ সলিলাদত্যন্তভিন্নং ফেনম্ . সলিলব্যতিরেকেণাদর্শনাত্ . সলিলং তু স্বচ্ছং অন্যত্ ফেনান্মলরূপাত্ . এবং পরমাত্মা নামরূপাভ্যামন্যঃ ফেনস্থানীযাভ্যাং শুদ্ধঃ প্রসন্নঃ তদ্বিলক্ষণঃ . তে নামরূপে অব্যাকৃতে সতী ব্যাক্রিযমাণে ফেনস্থানীযে আকাশনামাকৃতী সংবৃত্তে .. ১৯..
ততোঽপি স্থূলভবমাপদ্যমানে নামরূপে ব্যাক্রিযমাণে বাযুভাবমাপদ্যেতে, ততোঽপ্যগ্নিভাবং, অগ্নেরব্ভাবং, ততঃ পৃথ্বীভাবং ইত্যেবংক্রমেণ পূর্বপূর্বানুপ্রবেশেন পঞ্চমহাভূতানি পৃথিব্যন্তান্যুত্পন্নানি . ততঃ পঞ্চমহাভূতগুণবিশিষ্টা পৃথ্বী . পৃথ্ব্যাশ্চ পঞ্চাত্মিক্যো ব্রীহিযবাদ্যা ওষধযো জাযন্তে . তাভ্যো ভক্ষিতাভ্যো লোহিতং চ শুক্রং চ স্ত্রীপুংসশরীরসংবন্ধি জাযতে . তদুভযমৃতুকালে অবিদ্যাপ্রযুক্তকামখজনির্মথনোদ্ধৃতং মন্ত্রসংস্কৃতং গর্ভাশযে নিষিচ্যতে . তত্স্বযোনিরসানুপ্রবেশেন বিবর্ধমানং গর্ভীভূতং নবমে দশমে বা মাসি সঞ্জাযতে .. ২০..
তজ্জাতং লব্ধনামাকৃতিকং জাতকর্মাদিভিঃ মন্ত্রসংস্কৃতং পুনঃ উপনযনসংস্কারযোগেন ব্রহ্মচারিসংজ্ঞং ভবতি . তদেব শরীরং পত্নীযোগসংস্কারযোগেন গৃহস্থসংজ্ঞং ভবতি . তদেব বনস্থসংস্কারেণ তাপসসংজ্ঞং ভবতি . তদেব ক্রিযাবিনিবৃত্তিনিমিত্তসংস্কারেণ পরিব্রাট্সংজ্ঞং ভবতি . ইত্যেবং ত্বত্তো ভিন্নং ভিন্নজাত্যন্বযসংস্কারং শরীরম্ .. ২১..
মনশ্চেন্দ্রিযাণি চ নামরূপাত্মকান্যেব ‘ অন্নমযং হি সোম্য মনঃ ‘ ইত্যাদিশ্রুতিভ্যঃ .. ২২..
কথং চাহং ভিন্নজাত্যন্বযসংস্কারবর্জিত ইত্যেতচ্ছৃণু . যোঽসৌ নামরূপযোর্ব্যাকর্তা নামরূপধর্মবিলক্ষণঃ স এব নামরূপে ব্যাকুর্বন্ সৃষ্ট্বেদং শরীরং স্বযং সংস্কারধর্মবর্জিতো নামরূপে ইহ প্রবিষ্টঃ অন্যৈরদৃষ্টঃ স্বযং পশ্যন্, তথাঽশ্রুতঃ শ্রুণ্বন্, অমতো মন্বানো, অবিজ্ঞাতো বিজানন্—‘ সর্বাণি রূপাণি বিচিত্য ধীরো নামানি কৃত্বাঽভিবদন্ যদাস্তে ‘ ইতি . অস্মিন্নর্থে শ্রুতযঃ সহস্রশঃ ‘ তত্সৃষ্ট্বা তদেবানুপ্রাবিশত্ ‘ , ‘ অন্তঃ প্রবিষ্টঃ শাস্তা জনানাম্ ‘ , ‘ স এষ ইহ প্রবিষ্টঃ ‘ , ‘ এষ ত আত্মা ‘ , ‘ স এতমেব সীমানং বিদার্যৈতযা দ্বারা প্রাপদ্যত ‘ , ‘ এষ সর্বেষু ভূতেষু গূঢোঽঽত্মা ‘ , ‘ সেযং দেবতৈক্ষত হন্তাহমিমাস্তিস্রো দেবতাঃ ‘ ইত্যাদ্যাঃ .. ২৩..
স্মৃতযোঽপি ‘ আত্মৈব দেবতাঃ সর্বাঃ ‘ , ‘ নবদ্বারে পুরে দেহী ‘ , ‘ ক্ষেত্রজ্ঞং চাপি মাং বিদ্ধি ‘ , ‘ সমঃ সর্বেষু ভূতেষু ‘ , ‘ উপদ্রষ্টানুমন্তা চ ‘ , ‘ উত্তমঃ পুরুষস্ত্বন্যঃ ‘ , অশরীরং শরীরেষু ‘ ইত্যাদ্যঃ . তস্মাত্ জাত্যন্ব্যযসংস্কারবর্জিততস্ত্বমিতি সিদ্ধম্ .. ২৪..
স যদি ব্রূযাত্—অন্য এবাহমজ্ঞঃ সুখী দুঃখী বদ্ধঃ সংসারী, অন্যোঽসৌ মদ্বিলক্ষণঃ অসংসারী দেবঃ, তমহং বল্যুপহারনমস্কারাদিভিঃ বর্ণাশ্রমকর্মভিশ্চারাধ্য সংসারসাগরাদুত্তিতীর্ষুরস্মি, কথমহং স এবেতি .. ২৫..
আচার্যো ব্রূযাত্—নৈবং সোম্য প্রতিপত্তুমর্হসি, প্রতিষিদ্ধত্বাদ্ভেদপ্রতিপত্তেঃ . কথং প্রতিষিদ্ধা ভেদপ্রতিপত্তিরিত্যত আহ—‘ অন্যোঽসাবন্যোঽহমস্মীতি ন স বেদ ‘ , ‘ ব্রহ্ম তং পরাদাদ্যোঽন্যত্রাত্মনো ব্রহ্ম বেদ ‘ , মৃত্যোঃ স মৃত্যুমাপ্নোতি য ইহ নানেব পশ্যতি ‘
 ইত্যেবমাদ্যাঃ .. ২৬..
এতা এব শ্রুতযো ভেদপ্রতিপত্তেঃ সংসারগমনং দর্শযন্তি .. ২৭..
অভেদপ্রতিপত্তেশ্চ মোক্ষং দর্শযন্তি সহস্রশঃ—‘ স আত্মা তত্ত্বমসি ‘ ইতি পরমাত্মভাবং বিধায ‘ আচার্যবান্ পুরুষো বেদ ‘ ইত্যুক্ত্বা ‘ তস্য তাবদেব চিরম্ ‘ ইতি মোক্ষং দর্শযন্ত্যভেদবিজ্ঞানাদেব . সত্যাভিসন্ধস্য অতস্করস্যেব দাহাদ্যভাববত্ সংসারাভাবং দর্শযন্তি দৃষ্টান্তেন, ভেদদর্শনাদসত্যাভিসন্ধস্য সংসারগমনং দর্শযন্তি তস্করস্যেব দাহাদিদৃষ্টান্তেন .. ২৮..
‘ ত ইহ ব্যাঘ্রো বা ‘ ইত্যাদিনা চ অভেদদর্শনাত্ ‘ স স্বরাট্ ভবতি ‘ ইত্যুক্ত্বা তদ্বিপরীতেন ভেদদর্শনেন সংসারগমনং দর্শযন্তি—‘ অথ যেঽন্যথাঽতো বিদুরন্যরাজানস্তে ক্ষয্যলোক ভবন্তি ‘ ইতি প্রতিশাখম্ . তস্মাত্ মৃষৈবৈবমবাদীঃ—ব্রাহ্মণপুত্রোঽদোন্বযঃ সংসারী পরমাত্মবিলক্ষণ ইতি .. ২৯..
তস্মাত্ প্রতিষিদ্ধত্বাদ্ভেদদর্শনস্য, ভেদবিষযত্বাচ্চ কর্মোপাদানস্য, কর্মসাধনত্বাচ্চ যজ্ঞোপবীতাদেঃ কর্মসাধনোপাদানস্য পরমাত্মাভেদপ্রতিপত্ত্য প্রতিষেধঃ কৃতো বেদিতব্যঃ . কর্মণাং তত্সাধনানাং চ যজ্ঞোপবীতাদীনাং পরমাত্মাভেদপ্রতিপত্তিবিরুদ্ধত্বাত্ . সংসারিণো হি কর্মাণি বিধীযন্তে তত্সাধনানি চ যজ্ঞোপবীতাদীনি, ন পরমাত্মনোঽভেদদর্শিনঃ . ভেদদর্শনমাত্রেণ চ ততোঽন্যত্বম্ .. ৩০..
যদি কর্মাণি কর্তব্যানি, ন নিবর্তযিষিতানি, কর্মসাধনাসম্বন্ধিনঃ কর্মনিমিত্তজাত্যাশ্রমাদ্যসম্বন্ধিনশ্চ পরমাত্মনশ্চ আত্মনৈবাভেদপ্রতিপত্তিং নাবক্ষ্যত্ ‘ স আত্মা তত্ত্বমসি ‘ ইত্যেবমাদিভির্নিশ্চিতরূপৈর্বাক্যৈঃ, ভেদপ্রতিপত্তিনিন্দাং চ নাভ্যধাস্যত্ ‘ এষ নিত্যো মহিমা ব্রাহ্মণস্য’ , ‘ অনন্বাগতং পুণ্যেনানন্বাগতং পাপেন অত্র স্তেনোঽস্তেনঃ ‘ ইত্যাদিনা .. ৩১..
কর্মাসম্বন্ধিস্বরূপত্বং কর্মনিমিত্তবর্ণাদ্যসম্বন্ধরূপতাং চ নাভ্যধাস্যত্, কর্মাণি চ কর্মসাধনানি চ যজ্ঞোপবীতাদীনি যদ্যপরিতিত্যাজযিষিতানি . তস্মাত্ সসাধনং কর্ম পরিত্যক্তব্যং মুমুক্ষুণা, পরমাত্মাঽভেদদর্শনবিরোধাত্, আত্মা চ পর এবেতি প্রতিপত্তব্যো যথাশ্রুত্যুক্তলক্ষণঃ .. ৩২..
স যদি ব্রূযাত্—ভগবন্, দহ্যমানে ছিদ্যমানে বা দেহে প্রত্যক্ষা বেদনা, অশনাযাদিনিমিত্তং চ প্রত্যক্ষং দুঃখং মম . পরশ্চাযমাত্মা, ‘ অযমাত্মাঽপহতপাপ্মা বিজরো বিমৃত্যুর্বিশোকো বিজিঘিত্সোঽপিপাসঃ সর্বগন্ধরসবর্জিতঃ ‘ ইতি শ্রূযতে সর্বশ্রুতিষু স্মৃতিষু চ . কথং তদ্বিলক্ষণঃ অনেকসংসারধর্মসংযুক্তঃ পরমাত্মানমাত্মত্বেন চ মাং সংসারিণং পরমাত্মত্বেন অগ্নিমিব শীতত্বেন প্রতিপদ্যেযম্? সংসারী চ সন্ সর্বাভ্যুদযনিঃশ্রেযসসাধনে অধিকৃতঃ অভ্যুদযনিঃশ্রেযসসাধনানি কর্মাণি তত্সাধনানি চ যজ্ঞোপবীতাদীনি কথং
পরিত্যজেযমিতি .. ৩৩..
তং প্রতি ব্রূযাত্—যদবোচো দহ্যমানে ছিদ্যমানে বা দেহে প্রত্যক্ষা বেদনোপলভ্যতে মমেতি তদসত্ . কস্মাত্? দহ্যমানে ছিদ্যমান ইব বৃক্ষে উপলব্ধুরুপলভ্যমানে কর্মণি শরীরে দাহচ্ছেদবেদনাযা উপলভ্যমানত্বাত্ দাহাদিসমানাশ্রযৈব বেদনা . যত্র হি দাহঃ ছেদো বা ক্রিযতে তত্রৈব ব্যপদিশতি দাহাদিবেদনাং লোকঃ, ন বেদনাং দাহাদ্যুপলব্ধরীতি . কথং? ক্ব তে বেদনেতি পৃষ্টঃ শিরসি মে বেদনা উরসি উদরে ইতি বা যত্র দাহাদিস্তত্রৈব ব্যপদিশতি, ন তূপলব্ধরীতি . যদুপলব্ধরি বেদনা স্যাত্, বেদনানিমিত্তং বা দাহচ্ছেদাদি, বেদনাশ্রযত্বেনোপদিশেদ্দাহাদ্যাশ্রযবত্ .. ৩৪..
স্বযং চ নোপলভ্যেত চক্ষুর্গতরূপবত্ . তস্মাত্ দাহচ্ছেদাদিসমানাশ্রযত্বেন উপলভ্যমানত্বাদ্দাহাদিবত্ কর্মভূতৈব বেদনা . ভাবরূপত্বাচ্চ সাশ্রযা তণ্ডুলপাকবত্ . বেদনাসমানাশ্রয এব তত্সংস্কারঃ . স্মৃতিসমানকাল এবোপলভ্যমানত্বাত্ বেদনাবিষযঃ . তন্নিমিত্তবিষযশ্চ দ্বেষোঽপি সংস্কারসমানাশ্রয এব . তথ চোক্তম্—‘ রূপসংস্কারতুল্যাঽঽধী রাগদ্বেষৌ ভযং চ যত্ . গৃহ্যতে ধীশ্রযং তস্মাজ্জ্ঞাতা শুদ্ধোঽভযঃ সদা ‘ .. ৩৫..
কিমাশ্রযাঃ পুনা রূপাদিসংস্কারাদয ইতি . উচ্যতে . যত্র কামাদযঃ . ক্ব পুনস্তে কামাদযঃ? ‘ কামঃ সঙ্কল্পো বিচিকিত্সা ‘ ইত্যাদিশ্রুতেঃ বুদ্ধাবেব . তত্রৈব রূপাদিসংস্কারাদযোঽপি, ‘ কস্মিন্নু রূপাণি প্রতিষ্ঠিতানীতি হৃদযে ‘ ইতি শ্রুতেঃ . ‘ কামা যেঽস্য হৃদি শ্রিতাঃ’ , ‘ তীর্ণো হি যদা সর্বান্ শোকান্ হৃদযস্য’ , ‘ অসঙ্গো হ্যযম্’ , ‘ তদ্বা অস্যৈতদতিচ্ছন্দাঃ’ ইত্যাদিশ্রুতিভ্যঃ, ‘ অবিকার্যোঽযমুচ্যতে’ , ‘ অনাদিত্বান্নির্গুণত্বাত্’ ইত্যাদি ইচ্ছাদ্বেষাদি চ ক্ষেত্রস্যৈব বিষযস্য ধর্মো নাত্মন ইতি স্মৃতিভ্যশ্চ কর্মস্থৈবাশুদ্ধিঃ নাত্মস্থা ইতি .. ৩৬..
অতো রূপাদিসংস্কারাদ্যশুদ্ধিসম্বন্ধাভাবাত্ ন পরস্মাদাত্মনো বিলক্ষণস্ত্বমিতি প্রত্যক্ষাদিবিরোধাভাবাত্ যুক্তং পর এবাত্মাঽহমিতি প্রতিপত্তুম্—‘ তদাত্মানমেবাবেদহং ব্রহ্মাস্মি ‘ , ‘ একধৈবানুদ্রষ্টব্যম্ ‘ , ‘ অহমেবাঽধস্তাত্ ‘ , ‘ আত্মৈবাঽধস্তাত্ ‘ , ‘ সর্বমাত্মানং পশ্যেত্ ‘ , ‘ স এষোঽকলঃ ‘ , ‘ অনন্তরমবাহ্যম্ ‘ , ‘ সবাহ্যাভ্যন্তরো
হ্যজঃ ‘ , ‘ ব্রহ্মৈবেদম্ ‘ , ‘ এতযা দ্বারা প্রাপদ্যত ‘ , ‘ প্রজ্ঞানস্য নামধেযানি ‘ , ‘ সত্যং জ্ঞানমনন্তং ব্রহ্ম ‘ , ‘ তস্মাদ্বা ‘ , ‘ তত্সৃষ্ট্বা তদেবানুপ্রাবিশত্ ‘ , ‘ একো দেবঃ সর্বভূতেষু গূঢঃ সর্বব্যাপী ‘ , ‘ অশরীরং শরীরেষু ‘ , ‘ ন জাযতে ম্রিযতে ‘ , ‘ স্বপ্নান্তং জাগরিতান্তম্ ‘ , ‘ স ম আত্মেতি বিদ্যাত্ ‘ , ‘ যস্তু সর্বাণি ভূতানি ‘ , তদেজতি তন্নৈজতি ‘ , ‘ বেনস্তত্পশ্যন্ ‘ , ‘ তদেবাগ্নিঃ ‘ , ‘ অহং মধুরভবং সূর্যশ্চ ‘ , ‘ অন্তঃ প্রবিষ্টঃ শাস্তা জনানাম্ ‘ , ‘ সদেব সোম্য ‘ , ‘ তত্সত্যং স আত্মা তত্ত্বমসি ‘ ইত্যাদিশ্রুতিভ্যঃ .. ৩৭..
স্মৃতিভ্যশ্চ—‘ পূঃ প্রাণিনঃ সর্বগুহাশযস্য ‘ , ‘ আত্মৈব দেবতাঃ ‘ , ‘ নবদ্বারে পুরে ‘ , ‘ সমং সর্বেষু ভূতেষু ‘ , ‘ বিদ্যাবিনযসংপন্নে ‘ , ‘ অবিভক্তং বিভক্তেষু ‘ , ‘ বাসুদেবঃ সর্বম্ ‘ ইত্যাদিভ্যঃ এক এবাত্মা পরং ব্রহ্ম সর্বসংসারধর্মবিনির্মুক্তস্ত্বমিতি
 সিদ্ধম্ ..৩৮..
স যদি ব্রূযাত্—যদি ভগবন্ ‘ অনন্তরোঽবাহ্যঃ ‘ , ‘ সবাহ্যাভ্যন্তরো হ্যজঃ ‘ , ‘ কৃত্স্নঃ ‘ ,
‘ প্রজ্ঞানঘন এব ‘ সৈন্ধবঘনবদাত্মা সর্বমূর্তিভেদবর্জিতঃ আকাশবদেকরসঃ, তর্হি কিমিদং দৃশ্যতে শ্রূযতে বা সাধ্যং সাধনং বা সাধকশ্চেতি শ্রুতিস্মৃতিলোকপ্রসিদ্ধং বাদিশতবিপ্রতিপত্তিবিষয ইতি .. ৩৯..
আচার্যো ব্রূযাত্—অবিদ্যাকৃতমেতদ্যদিদং দৃশ্যতে শ্রূযতে বা, পরমার্থতস্ত্বেক এবাত্মা অবিদ্যাদৃষ্টেঃ অনেকবত্ আভসতে, তিমিরদৃষ্ট্যা অনেকচন্দ্রবত্ . ‘ যত্র বা অন্যদিব স্যাত্ ‘ , ‘ যত্র হি দ্বৈতমিব ভবতি তদিতর ইতরং পশ্যতি ‘ , ‘ মৃত্যোঃ স মৃত্যুমাপ্নোতি ‘ , ‘ অথ যত্রান্যত্পশ্যতি অন্যচ্ছৃণোতি অন্যদ্বিজানাতি তদল্পং, অথ যদল্পং তন্মর্ত্যমিতি ‘ , ‘ বাচারম্ভণং বিকারো নামধেযং মৃত্তিকেত্যেব সত্যম্ ‘ , ‘ অন্যোঽসাবন্যোঽহম্ ‘ ইতি ভেদদর্শননিন্দোপপত্তেরবিদ্যাকৃতং দ্বৈতং ‘ একমেবাদ্বিতীযম্ ‘ , ‘ যত্র ত্বস্য ‘ , ‘ তত্র কো মোহঃ কঃ শোকঃ ‘ ইত্যাদ্যেকত্ববিধিশ্রুতিভ্যশ্চেতি .. ৪০..
যদ্যেবং ভগবন্, কিমর্থং শ্রুত্যা সাধ্যসাধনাদিভেদ উচ্যতে উত্পত্তিঃ প্রলযশ্চেতি .. ৪১..
অত্রোচ্যতে—অবিদ্যাবত উপাত্তশরীরাদিভেদস্য ইষ্টানিষ্টযোগিনমাত্মানং মন্যমানস্য সাধনৈরেবেষ্টানিষ্টপ্রাপ্তিপরিহারোপাযবিবেকমজানতঃ ইষ্টপ্রাপ্তিং চানিষ্টপরিহারং চেচ্ছতঃ শনৈস্তদ্বিষযমজ্ঞানং নিবর্তযিতুং শাস্ত্রং ন সাধ্যসাধনাদিভেদং বিধত্তে . অনিষ্টরূপঃ সংসারো হি স ইতি তদ্ভেদদৃষ্টিমেবাবিদ্যাং সংসারমুন্মূলযতি উত্পত্তিঃ প্রলযাদ্যেকত্বোপপত্তিপ্রদর্শনেন .. ৪২..
অবিদ্যাযামুন্মূলিতাযাং শ্রুতিস্মৃতিন্যাযেভ্যঃ ‘ অনন্তরমবাহ্যম্ ‘ , ‘ সবাহ্যাভ্যন্তরো হ্যজঃ ‘ , ‘ সৈন্ধবঘনবত্ ‘ , ‘ প্রজ্ঞানঘন এবৈক আত্মা ‘ , ‘ আকাশবত্পরিপূর্ণঃ ‘ ইত্যত্রৈব একা প্রজ্ঞাপ্রতিষ্ঠা পরমার্থদর্শিনো ভবতি, ন সাধ্যসাধনোত্পত্তিপ্রলযাদিভেদেন অশুদ্ধিগন্ধোঽপ্যুপপদ্যতে .. ৪৩..
তচ্চৈতত্ পরমার্থদর্শনং প্রতিপত্তুমিচ্ছতা বর্ণাশ্রমাদ্যভিমানকৃতপাঙ্ক্তরূপপুত্রবিত্তলোকৈষণাদিভ্যো ব্যুত্থানং কর্তব্যম্ . সম্যক্প্রত্যযবিরোধাত্তদভিমানস্য ভেদদর্শনপ্রতিষেধার্থোপপত্তিশ্চোপপদ্যতে . নহ্যেকস্মিন্নাত্মন্যসংসারিত্ববুদ্ধৌ শাস্ত্রন্যাযোত্পাদিতাযাং তদ্বিপরীতা বুদ্ধির্ভবতি . নহ্যগ্নৌ শীতত্ববুদ্ধিঃ শরীরে বা অজরামরণবুদ্ধিঃ . তস্মাদবিদ্যাকার্যত্বাত্ সর্বকর্মণাং তত্সাধনানাং চ যজ্ঞোপবীতাদীনাং পরমার্থদর্শননিষ্ঠেন ত্যাগঃ কর্তব্যঃ .. ৪৪..

.. ॐ তত্ সত্ ..