অপরোক্ষানিভূতি

.. অপরোক্ষানিভূতি ..

.. অপরোক্ষানুভূতি ..

শ্রীহরিং পরমানংদমুপদেষ্টারমীশ্বরম্ .
ব্যাপকং সর্বলোকানাং কারণং তং নমাম্যহম্ .. ১..
অপরোক্ষানুভূতির্বৈ প্রোচ্যতে মোক্ষসিদ্ধযে .
সদ্ভিরেব প্রযত্নেন বীক্ষণীযা মুহুর্মুহুঃ .. ২..
স্ববর্ণাশ্রমধর্মেণ তপসা হরিতোষণাত্ .
সাধনং প্রভবেত্পুংসাং বৈরাগ্যাদি চতুষ্টযম্ .. ৩..
ব্রহ্মাদিস্থাবরান্তেশু বৈরাগ্যং বিষযেষ্বনু .
যথৈব কাকবিষ্ঠাযাং বৈরাগ্যং তদ্ধি নির্মলম্ .. ৪..
নিত্যমাত্মস্বরূপং হি দৃশ্যং তদ্বিপরীতগম্ .
এবং যো নিশ্চযঃ সম্যগ্বিবেকো বস্তুনঃ স বৈ .. ৫..
সদৈব বাসনাত্যাগঃ শমোঽযমিতি শহ্ব্দিতঃ .
নিগ্রহো বাহ্যবৃত্তীনা.ম্ দম ইত্যভিধীযতে .. ৬..
বিষযেভ্যঃ পরাবৃত্তিঃ পরমোপরতির্হি সা .
সহনং সর্বদুঃখানাং তিতিক্ষা সা শুভা মতা .. ৭..
নিগমাচার্যবাক্যেষু ভক্তিঃ শ্রদ্ধেতি বিশ্রুতা .
চিত্তৈকাগ্র্যং তু সল্লক্ষ্যে সমাধানমিতি স্মৃতম্ .. ৮..
সংসারবন্ধনির্মুক্তিঃ কথং মে স্যাত্কথা বিধে .
ইতি যা সুদৃঢা বুদ্ধির্বক্তব্যা সা মুমুক্ষুতা .. ৯..
উক্তসাধনযুক্তেন বিচারঃ পুরুষেণ হি .
কর্তব্যো জ্ঞানসিদ্ধ্যর্থমাত্মনঃ শুভমিচ্ছতা .. ১০..
নোত্পদ্যতে বিনা জ্ঞানং বিচারেণান্যসাধনৈঃ .
যথা পদার্থভানং হি প্রকাশেন বিনা ক্বচিত্ .. ১১..
কোঽহং কথমিদং জাতং কো বৈ কর্তাঽস্য বিদ্যতে .
উপাদানং কিমস্তীহ বিচারঃ সোঽযমীদৃশঃ .. ১২..
নাহং ভূতগণো দেহো নাহং চাক্ষগণস্তথা .
এতদ্বিলক্ষণঃ কশ্চিদ্বিচারঃ সোঽযমীদৃশঃ .. ১৩..
অজ্ঞানপ্রভবং সর্বং জ্ঞানেন প্রবিলীযতে .
সংকল্পো বিবিধঃ কর্তা বিচারঃ সোঽযমীদৃশঃ .. ১৪..
এতোযর্যদুপাদানমেকং সূক্ষ্মং সদব্যযম্ .
যথৈবমৃদ্ঘটাদীনং বিচারঃ সোঽযমীদৃশঃ .. ১৫..
অহমেকোঽপি সূক্ষ্মশ্চ জ্ঞাতা সাক্ষী সদব্যযঃ .
তদহং নাত্র সংদেহো বিচারঃ সোঽযমীদৃশঃ .. ১৬..
আত্মা বিনিষ্কলো হ্যেকো দেহো বহুভিরাবৃতঃ .
তযোরৈক্যং প্রপশ্যন্তি কিমজ্ঞানমতঃ পরম্ .. ১৭..
আত্মা নিযামকশ্চাম্তর্দেহো বাহ্যো নিযম্যকঃ .
তযোরৈকযং প্রপশ্যন্তি কিমজ্ঞানমতঃ পরম্ .. ১৮..
আত্মা জ্ঞানমযঃ পুণ্যো দেহো মাংসমযোঽশুচিঃ .
তযোরৈক্যং প্রপশ্যন্তি কিমজ্ঞানমতঃ পরম্ .. ১৯..
আত্মা প্রকাশকঃ স্বচ্ছো দেহস্তামস উচ্যতে .
তযোরৈক্যং প্রপশ্যন্তি কিমজ্ঞানমতঃ পরম্ .. ২০..
আত্মা নিত্যো হি সদ্রূপো দেহোঽনিত্যো হ্যসন্মযঃ .
তযোরৈক্যং প্রপশ্যন্তি কিমজ্ঞানমতঃ পরম্ .. ২১..
আত্মনস্তত্প্রকাশত্বং যত্পদার্থাবভাসনম্ .
নাগ্ন্যাদিদীপ্তিবদ্দিপ্তির্ভবত্যান্ধ্য যতো নিশি .. ২২..
দেহোঽহমিত্যযং মূঢো ধৃত্বা তিষ্ঠত্যহো জনঃ .
মমাযমিত্যপি জ্ঞাত্বা ঘটদ্রষ্টেব সর্বদা .. ২৩..
ব্রহ্মৈবাহং সমঃ শান্তঃ সচ্চিদানংদলক্ষণঃ .. ২৪
নির্বিকারো নিরাকারো নিরবদ্যোঽহমব্যযঃ .
নাহং দেহো হ্যসদ্রূপো জ্ঞানমুচ্যতে বুধৈঃ .. ২৫..
নিরামযো নিরাভাসো নির্বিকল্পোঽহমাততঃ .
নাহং দেহো হ্যসদ্রূপো জ্ঞানমুচ্যতে বুধৈঃ .. ২৬..
নির্গুণো নিষ্ক্রিযো নিত্যো নিত্যমুক্তোঽহমচ্যুতঃ .
নাহং দেহো হ্যসদ্রূপো জ্ঞানমুচ্যতে বুধৈঃ .. ২৭..
নির্মলো নিশ্চলোঽনন্তঃ শুদ্ধোঽহমজরোমরঃ .
নাহং দেহো হ্যসদ্রূপো জ্ঞানমুচ্যতে বুধৈঃ .. ২৮..
স্বদেহে শোভনং সন্তং পুরুষাখ্যং চ সংমতম্ .
কিং মূর্খ শূন্যমাত্মানং দেহাতীতং করোষি ভোঃ .. ২৯..
স্বাত্মানং শ্রুণু মূর্খ ত্বং শ্রুত্যা যুক্ত্যা চ পূরুষম্ .
দেহাতীতং সদাকারং সুদুর্দর্শং ভবাদৃশৈঃ .. ৩০..
অহংশব্দেন বিখ্যাত এক এব স্থিতঃ পরঃ .
স্থূলস্ত্বনেকতাং প্রাপ্তঃ কথং স্যাদ্দেহকঃ পুমান্ .. ৩১..
অহং দ্রষ্টৃতযা সিদ্ধো দেহো দৃশ্যতযা স্থিতঃ .
মমাযমিতি নির্দেশাত্কথং স্যাদ্দেহকঃ পুমান্ .. ৩২..
অহং বিকারহীনস্তু দেহো নিত্যং বিকারবান্ .
ইতি প্রতীযতে সাক্ষাত্কথং স্যাদ্দেহকঃ পুমান্ .. ৩৩..
যস্মাত্পরমিতি শ্রুত্যা তযা পুরুষলক্ষণম্ .
বিনির্ণীতং বিমূঢেন কথং স্যাদ্দেহকঃ পুমান্ .. ৩৪..
সর্বং পুরুষ এবেতি সূক্তে পুরুষসংজ্ঞিতে .
অপ্যুচ্যতে যতঃ শ্রুত্যা কথং স্যাদ্দেহকঃ পুমান্ .. ৩৫..
অসংগঃ পুরুষঃ প্রোক্তো বৃহদারণ্যকেঽপি চ .
অনন্তমলসংশ্লিষ্টঃ কথং স্যাদ্দেহক.ঃ পুমান্ .. ৩৬..
তত্রৈব চ সমাখ্যাতঃ স্বযংজ্যোতির্হি পূরুষঃ .
জডঃ পরপ্রকাশ্যোঽযং কথং স্যাদ্দেহকঃ .. ৩৭..
প্রোক্তোঽপি কর্মকাণ্ডেন হ্যাত্মা দেহাদ্বিলক্ষণঃ .
নিত্যশ্চ তত্ফলং ভুঙ্ক্তে দেহপাতাদনন্তরম্ .. ৩৮..
লিঙ্গং চানেকসংযুক্তং চলং দৃশ্যং বিকারি চ .
অব্যাপকমসদ্রূপং তত্কথং স্যাত্পুমানযম্ .. ৩৯..
এবং দেহদ্বযাদন্য আত্মা পুরুষ ঈশ্বরঃ .
সর্বাত্মা সর্বরূপশ্চ সর্বাতীতোমহব্যযঃ .. ৪০..
ইত্যাত্মদেহভাগেন প্রপঞ্চস্যৈব সত্যতা .
যথোক্তা তর্কশাস্ত্রেণ ততঃ কিং পুরুষার্থতা .. ৪১..
ইত্যাত্মদেহভেদেন দেহাত্মত্বং নিবারিতম্ .
ইদানীং দেহভেদস্য হ্যসত্ত্বং স্ফুটমুচ্যতে .. ৪২..
চৈতন্যস্যৈকরূপত্বাদ্ভেদো যুক্তো ন কর্হিচিত্ .
জীবতং চ মৃষা জ্ঞেযং রজ্জৌ সর্পগ্রহৌ যথা .. ৪৩..
রজ্জ্বজ্ঞানাত্ক্ষণেনৈব যদ্বদ্রজ্জুর্হি সর্পিণী .
ভাতি তদ্বচ্চিতিঃ সাক্ষাদ্বিশ্বাকারেণ কেবলা .. ৪৪..
উপাদানং প্রপঞ্চস্য ব্রহ্মণোন্যন্ন বিদ্যতে .
তস্মাত্সর্বপ্রপঞ্চোঽযং ব্রহ্মৈবাস্তি ন চেতরত্ .. ৪৫..
ব্যাপ্যাব্যাপকতা মিথ্যা সর্বমাত্মেতি শাসনাত্ .
ইতি জ্ঞাতে পরে তত্ত্বে ভেদস্যাবসরঃ কুতঃ .. ৪৬..
শ্রুত্যা নিবারিতং নূনং নানাত্বং স্বমুখেন হি .
কথং ভাসো ভবেদন্যঃ স্থিতে চাদ্বযকারণে .. ৪৭..
দোষোঽপি বিহিতঃ শ্রুত্যা মৃত্য্র্মৃর্ত্যুং স গচ্ছতি .
ইহ পশ্যতি নানাত্বং মাযযা বঞ্চিতো নরঃ .. ৪৮..
ব্রহ্মণঃ সর্বভূতানি জাযন্তে পরমাত্মনঃ .
তস্মাদেতানি ব্রহ্মৈব ভবন্তীত্যবধারযেত্ .. ৪৯..
ব্রহ্মৈব সর্বনামানি রূপাণি বিবিধানি চ .
কর্মাণ্যপি সমগ্রাণি বিভর্তীতি শ্রুতির্জগৌ .. ৫০..
সুবর্ণাজ্জযমানস্য সুবর্ণত্বং চ শাশ্বতম্ .
ব্রহ্মণো জাযমানস্য ব্রহ্মত্বং চ তথা ভবেত্ .. ৫১..
স্বল্পমত্যন্তরং কৃত্বা জীবাত্মপরমাত্মনোঃ .
যঃ সন্তিষ্ঠতি মূঢাত্ম ভযং তস্যাভিভাষিতম্ .. ৫২..
যত্রাজ্ঞানাদ্ভবেদ্বৈতমিতরস্তত্র পশ্যতি .
আত্মত্বেন যদা সর্বং নেতরস্তত্র চাণ্বপি .. ৫৩..
যস্মিন্সর্বাণি ভূতানি হ্যাত্মত্বেন বিজানতঃ .
ন বৈ তস্য ভবেন্মোহো ন চ শোকোঽদ্বিতীযতঃ .. ৫৪..
অযমাত্মা হি ব্রহ্মৈব সর্বাত্মকতযা স্থিতঃ .
ইতি নির্ধারিতং শ্রুত্যা বৃহদারণ্যসংস্থযা .. ৫৫..
অনুভূতোঽপ্যযং লোকো ব্যবহারক্ষমোঽপি সন্ .
অসদ্রূপো যথা স্বপ্ন উত্তরক্ষণবাধতঃ .. ৫৬..
স্বপ্নো জাগরণেঽলীকঃ স্বপ্নেঽপি জাগরো ন হি .
দ্বযমেব লযে নাস্তি লযোঽপি হ্যুভযোর্ন চ .. ৫৭..
ত্রযমেবং ভবেন্মিথ্যা গুণত্রযবিনির্মিতম্ .
অস্যে দ্রষ্টা গুণাতীতো নিত্যো হ্যেকশ্চিদাত্মকঃ .. ৫৮..
অযদ্বন্মৃদি ঘটভ্রান্তিং শুক্তৌ বা রজতস্থিতিম্ .
তদ্বদ্ব্রহ্মণি জীবত্বং বীক্ষমাণে ন পশ্যতি .. ৫৯..
যথা মৃদি ঘটো নাম কনকে কুণ্ডলাভিধা .
শুক্তৌ হি রজতখ্যাতির্জীবশব্দস্তথা পরে .. ৬০..
যথৈব ব্যোম্নি নীলত্বং যথা নীরং মরুস্থলে .
পুরুষস্ত্বং যথা স্থাণৌ তদ্বদ্বিশ্বং চিদাত্মনি .. ৬১..
যথৈব শূন্যে বেতালো গন্ধর্বাণাং পুরং যথা .
যথাকাশে দ্বিচন্দ্রত্বং তদ্বত্সত্যে জগত্স্থিতিঃ .. ৬২..
যথা তরঙ্গকল্লোলৈর্জলমেব স্ফুরত্যলম্ .
পাত্ররূপেণ তাম্রং হি ব্রহ্মাণ্ডৌঘৈস্তথাত্মতা .. ৬৩..
ঘটনাম্ন যথা পৃথ্বী পটনাম্না হি তংতবঃ .
জগন্নম্না চিদাভাতি জ্ঞেযং তত্তদভাবতঃ .. ৬৪..
সর্বোঽপি ব্যবহারস্তু ব্রহ্মণা ক্রিযতে জনৈঃ .
অজ্ঞানান্ন বিজানন্তি মৃদেব হি ঘটাদিকম্ .. ৬৫..
কার্যকারণতা নিত্যমাস্তে ঘটমৃদোর্যথা .
তথৈব শ্রুতিযুক্তিভ্যং প্রপঞ্চ ব্রহ্মণোরিহ .. ৬৬..
গৃহ্যমাণে ঘটে যদ্বন্মৃত্তিকাঽযাতি বৈ বলাত্ .
বীক্ষমাণে প্রপঞ্চেঽপি ব্রহ্মৈবাভাতি ভাসুরম্ .. ৬৭..
সদৈবাত্মা বিশুদ্ধোঽস্তি হ্যশুদ্ধো ভাতি বৈ সদা .
যথৈব দ্বিবিধা রজ্জুর্জ্ঞানিনোঽজ্ঞানিনোঽনিশম্ .. ৬৮..
যথৈব মৃন্মযঃ কুংভস্তদ্বদ্দেহোঽপি চিন্মযঃ .
আত্মানাত্মবিভাগোঽযং মুধৈব ক্রিযতেঽবুধৈঃ .. ৬৯..
সর্পত্বেন যথা রজ্জূ রজতত্বেন শুক্তিকা .
বিনির্ণীতা বিমূঢেন দেহত্বেন তথাত্মতা .. ৭০..
ঘটত্বেন যথা পৃথ্বী পটত্বেনৈব তংতবঃ .
বিনির্ণীতা বিমূঢেন দেহত্বেন তথাত্মতা .. ৭১..
কনকং কুণ্ডলত্বেন তরঙ্গত্বেন বৈ জলম্ .
বিনির্ণীতা বিমূঢেন দেহত্বেন তথাত্মতা .. ৭২..
পুরুষত্বেন বৈ স্থাণুর্জলত্বেন মরীচিকা .
বিনির্ণীতা বিমূঢেন দেহত্বেন তথাত্মতা .. ৭৩..
গৃহত্বেনৈব কাষ্ঠানি খদ্গত্বেনৈব লোহতা .
বিনির্ণীতা বিমূঢেন দেহত্বেন তথাত্মতা .. ৭৪..
তথা বৃক্ষ বিপর্যাসো জলাদ্ভবতি কস্যচিত্ .
তদ্বদাত্মনি দেহত্বং পশ্যত্যজ্ঞানযোগতঃ .. ৭৫..
পোতেন গচ্ছতঃ পুংসঃ সর্বং ভাতীব চঞ্চলম্ .
তদ্বদাত্মনি দেহত্বং পশ্যত্যজ্ঞানযোগতঃ .. ৭৬..
পীতত্বং হি যথা শুভ্রে দোষাদ্ভবতি কস্যচিত্ .
তদ্বদাত্মনি দেহত্বং পশ্যত্যজ্ঞানযোগতঃ .. ৭৭..
চক্ষুভ্যাং ভ্রমশীলাভ্যাং সর্বং ভাতি ভ্রমাত্মকম্ .
তদ্বদাত্মনি দেহত্বং পশ্যত্যজ্ঞানযোগতঃ .. ৭৮..
অলাতং ভ্রমণৈব বর্তুলং ভাতি সূর্যবত্ .
তদ্বদাত্মনি দেহত্বং পশ্যত্যজ্ঞানযোগতঃ .. ৭৯..
মহত্ত্বে সর্ববস্তূনমণুত্বং হ্যতিদূরতঃ .
তদ্বদাত্মনি দেহত্বং পশ্যত্যজ্ঞানযোগতঃ .. ৮০..
সূক্ষ্নত্বে সর্বভাবানাং স্থূলত্বং চোপনেত্রতঃ .
তদ্বদাত্মনি দেহত্বং পশ্যত্যজ্ঞানযোগতঃ .. ৮১..
কাচভূমৌ জলত্বং বা জলভূমৌ হি কাচতা .
তদ্বদাত্মনি দেহত্বং পশ্যত্যজ্ঞানযোগতঃ .. ৮২..
যদ্বদগ্নৌ মণিত্বং হি মণৌ বা বহ্নিতা পুমান্ .
তদ্বদাত্মনি দেহত্বং পশ্যত্যজ্ঞানযোগতঃ .. ৮৩..
অভ্রেষু সত্সু ধাবত্সু সোমো ধাবতি ভাতি বৈ .
তদ্বদাত্মনি দেহত্বং পশ্যত্যজ্ঞানযোগতঃ .. ৮৪..
যথৈব দিগ্বিপর্যাসো মোহাদ্ভবতি কস্যচিত্ .
তদ্বদাত্মনি দেহত্বং পশ্যত্যজ্ঞানযোগতঃ .. ৮৫..
যথা শশী জলে ভাতি চঞ্চলত্বেন কস্যচিত্ .
তদ্বদাত্মনি দেহত্বং পশ্যত্যজ্ঞানযোগতঃ .. ৮৬..
এবমাত্মন্যবিদ্যাতো দেহাধ্যাসো হি জাযতে .
স এবাত্মপরিজ্ঞানাল্লীযতে চ পরম্ .. ৮৭..
সর্বমাত্মতযা জ্ঞাতং জগত্স্থাবরজঙ্গমম্ .
অভাবাত্সর্বভাবানাং দেহস্য চাত্মনা কুতঃ .. ৮৮..
আত্মানাং সততং জানন্কালং নয মহাদ্যুতে .
প্রারব্ধমখিলং ভুঞ্জন্নোদ্বেগং কর্তুমহর্সি .. ৮৯..
উত্পন্নেঽপ্যত্মবিজ্ঞানে প্রারব্ধং নৈব মুঞ্চতি .
ইতি যচ্ছৄযতে শাস্ত্রে তন্নিরাক্রিযতেঽধুনা .. ৯০..
তত্ত্বজ্ঞানোদযাদূর্ধ্বং প্রারব্ধং নৈব বিদ্যতে .
দেহাদীনামসত্ত্বত্তু যথা স্বপ্নো বিবোধতঃ .. ৯১..
কর্ম জন্মান্তরীযং যত্প্রারব্ধমিতি কীর্তিতম্ .
তত্তু জন্মান্তরাভাবাত্পুংসো নৈবাস্তি কহির্চিত্ .. ৯২..
স্বপ্নদেহো যথাধ্যস্থস্তথৈবাযং হি দেহকঃ .
অধ্যস্তস্য কুতো জন্ম জন্মাভাবে হি তত্কুতঃ .. ৯৩..
উপাদানং প্রপঞ্চস্য মৃদ্ভণ্ডস্যেব কথ্যতে .
অজ্ঞানং চৈব বেদান্তৈস্তস্মিন্নষ্টে ক্ব বিশ্বতা .. ৯৪..
যথা রজ্জুং পরিত্যজ্য সর্পং গৃহ্ণাতি বৈ ভ্রমাত্ .
তদ্বত্সত্যমবিজ্ঞায জগত্পশ্যতি মূঢধীঃ .. ৯৫..
রজ্জুরূপে পরিজ্ঞাতে সর্পখণ্ডং ন তিষ্ঠতি .
অধিষ্ঠানে তথা জ্ঞাতে প্রপঞ্চঃ শূন্যতাং গতঃ .. ৯৬..
দেহস্যাপি প্রপঞ্চত্বাত্প্রারব্ধাবস্থিতিঃ কুতঃ .
অজ্ঞানিজনবোধার্থং প্রারব্ধং বক্তি বৈ শ্রুতিঃ .. ৯৭..
ক্ষীযন্তে চাস্য কর্মাণি তস্মিন্দৃষ্টে পরাবরে .
বহুত্বং তন্নিষেধার্থং শ্রুত্যা গীতং চ যত্স্ফুতম্ .. ৯৮..
উচ্যতেঽজ্ঞৈর্বলাচ্চৈতত্তদানর্থদ্বযাগমঃ .
বেদান্তমতহানং চ যতো জ্ঞানমিতি শ্রুতিঃ .. ৯৯..
ত্রিপঞ্চাঙ্গান্যতো বক্ষ্যে পূর্বোক্তস্য হি লব্ধযে .
তৈশ্চ সর্বৈঃ সদা কার্যং নিদিধ্যাসনমেব তু .. ১০০..
নিত্যাভ্যাসাদৃতে প্রাপ্তির্ন ভবেত্সচ্চিদাত্মনঃ .
তস্মাদ্ব্রহ্ম নিদিধ্যাসেজ্জিজ্ঞাসুঃ শ্রেযসে চিরম্ .. ১০১..
যমো হি নিযমস্ত্যাগো মৌনং দেশশ্চ কালতা .
আসনং মূলবংধশ্চ দেহসাম্যং চ দৃক্স্থিতিঃ .. ১০২..
প্রাণসংযমনং চৈব প্রত্যাহারশ্চ ধারণা .
আত্মধ্যানং সমাধিশ্চ প্রোক্তান্যঙ্গানি বৈ ক্রমাত্ .. ১০৩..
সর্বং ব্রহ্মেতি বিজ্ঞানাদিন্দ্রিযগ্রামসংযমঃ .
যমোঽযমিতি সংপ্রোক্তোঽভ্যসনীযো মুহুর্মুহুঃ .. ১০৪..
সজাতীযপ্রবাহশ্চ বিজাতীযতিরস্কৃতিঃ .
নিযমো হি পরানন্দো নিযমাত্ক্রিযতে বুধৈঃ .. ১০৫..
ত্যাগঃ প্রপঞ্চরূপস্য চিদাত্মত্বাবলোকনাত্ .
ত্যাগো হি মহতাং পূজ্যঃ সদ্যো মোক্ষমযো যতঃ .. ১০৬..
যস্মাদ্বাচো নিবর্তন্তে অপ্রাপ্য মনসা সহ .
যন্মৌনং যোগিভির্গম্যং তদ্ভবেত্সর্বদা বুধঃ .. ১০৭..
বাচো যস্যান্নিবর্তন্তে তদ্বক্তুং কেন শক্যতে .
প্রপঞ্চো যদি বক্তব্যঃ সোঽপি শব্দবিবর্জিতঃ .. ১০৮..
ইতি বা তদ্ভবেন্মৌনং সতাং সহজ সংজ্ঞিতম্ .
গিরা মৌনং তু বালানাং প্রযুক্তং ব্রহ্মবাদিভিঃ .. ১০৯..
আদাবন্তে চ মধ্যে চ জনো যস্মিন্ন বিদ্যতে .
যেনেদং সততং ব্যাপ্তং স দেশো বিজনঃ স্মৃতঃ .. ১১০..
কলনাত্ সর্বভূতানাং ব্রহ্মাদীনাং নিমেষতঃ .
কালশব্দেন নির্দিষ্টো হ্যখণ্ডানন্দকোঽদ্বযঃ .. ১১১..
সুখেনৈব ভেদ্যস্মিন্নজস্রং ব্রহ্মচিন্তনম্ .
আসনং তদ্বিজানীযান্নেতরত্সুখনাশনম্ .. ১১২..
সিদ্ধং যত্সর্বভূতাদি বিশ্বাধিষ্ঠানমব্যযম্ .
যস্মিন্সিদ্ধাঃ সমাবিষ্টাস্তদ্বৈ সিদ্ধাসনং বিদুঃ .. ১১৩..
যন্মূলং সর্বভূতানাং যন্মূলং চিত্তবন্ধনম্ .
মূলবন্ধঃ সদা সেব্যো যোগ্যোঽসৌ রাজযোগিনাম্ .. ১১৪..
অঙ্গানাং সমতাং বিদ্যাত্সমে ব্রহ্মণি লীনতাম্ .
নো চেন্নৈব সমানত্বমৃজুত্বং শুষ্কবৃক্ষবত্ .. ১১৫..
দৃষ্টিং জ্ঞানমযীং কৃত্বা পশ্যেদ্ব্রহ্মমযং জগত্ .
সা দৃষ্টিঃ পরমোদারা ন নাসাগ্রাবলোকিনী .. ১১৬..
দ্রষ্তৃদর্শনদৃশ্যানাং বিরামো যত্র বা ভবেত্ .
দৃষ্টিস্তত্রৈব কর্তব্যা ন নাসাগ্রাবলোকিনী .. ১১৭..
চিত্তাদিসর্বভাবেষু ব্রহ্মত্বেনৈব ভাবনাত্ .
নিরোধঃ সর্ব বৃত্তীনাং প্রাণাযামঃ স উচ্যতে .. ১১৮..
নিষেধনং প্রপঞ্চস্য রেচকাখ্যঃ সমীরণঃ .
ব্রহ্মৈবাস্মীতি যা বৃত্তিঃ পূরকো বাযুরীরিতঃ .. ১১৯..
ততস্তদ্বৃত্তিনৈশ্চল্যং কুংভকঃ প্রাণসংযমঃ .
অযং চাপি প্রবুদ্ধানামজ্ঞানাং ঘ্রাণপীডনম্ .. ১২০..
বিষযেষ্বাত্মতাং দৃষ্ট্বা মনসশ্চিতি মজ্জনম্ .
প্রত্যাহারঃ স বিজ্ঞেযোঽভ্যসনীযো মুমুক্ষুভিঃ .. ১২১..
যত্র যত্র মনো যাতি ব্রহ্মণস্তত্র দর্শনাত্ .
মনসো ধারণং চৈব ধারণা সা পরা মতা .. ১২২..
ব্রহ্মৈবাস্মীতি সদ্বৃত্ত্যা নিরালম্বতযা স্থিতিঃ .
ধ্যানশব্দেন বিখ্যাতা পরমানন্দদাযিনী .. ১২৩..
নির্বিকারতযা বৃত্ত্যা ব্রহ্মাকারতযা পুনঃ .
বৃত্তিবিস্মরণং সম্যক্সমাধির্জ্ঞানসংজ্ঞকঃ .. ১২৪..
ইমঞ্চাকৃত্রিমানন্দং তাবত্সাধু সমভ্যসেত্ .
বশ্যো যাবত্ক্ষণাত্পুংসঃ প্রযুক্তঃ সন্ ভবেত্স্বযম্ .. ১২৫..
ততঃ সাধননির্মুক্তঃ সিদ্ধো ভবতি যোগিরাট্ .
তত্স্বরূপং ন চৈতস্য বিণযো মনসো গিরাম্ .. ১২৬..
সমাধৌ ক্রিযমাণে তু বিঘ্নান্যাযান্তি বৈ বলাত্ .
অনুসংধানরাহিত্যমালস্যং ভোগলালসম্ .. ১২৭..
লযস্তমশ্চ বিক্ষেপো রসাস্বাদশ্চ শূন্যতা .
এবং যদ্বিঘ্নবাহুল্যং ত্যাজ্যং ব্রহ্মবিদা শনৈঃ .. ১২৮..
ভাববৃত্ত্যা হি ভাবত্বং শূন্যবৃত্ত্যা হি শূন্যতা .
ব্রহ্মবৃত্ত্যা হি পূর্ণত্বং তথা পূর্ণত্বমভ্যসেত্ .. ১২৯..
যে হি বৃত্তিং জহত্যেনাং ব্রহ্মাখ্যাং পাবনীং পরাম্ .
বৃথৈব তে তু জীবন্তি পশুভিশ্চ সমা নরাঃ .. ১৩০..
যে হি বৃত্তিং বিজানন্তি জ্ঞাত্বাপি বর্ধযন্তি যে .
তে বৈ সত্পুরুষা ধন্যা বন্দ্যাস্তে ভুবনত্রযে .. ১৩১..
যেষাং বৃত্তিঃ সমা বৃদ্ধা পরিপক্বা চ সা পুনঃ .
তে বৈ সদ্ব্রহ্মতাং প্রাপ্তা নেতরে শব্দবাদিনঃ .. ১৩২..
কুশলা ব্রহ্মবার্তাযাং বৃত্তিহীনাঃ সুরাগিণঃ .
তেঽপ্যজ্ঞানতযা নূনং পুনরাযান্তি যান্তি চ .. ১৩৩..
নিমেষার্ধং ন তিষ্ঠন্তি বৃত্তিং ব্রহ্মমযীং বিনা .
যথা তিষ্ঠন্তি ব্রহ্মাদ্যাঃ সনকাদ্যঃ শুকাদযঃ .. ১৩৪..
কার্যে কারণতাযাতা কারণে ন হি কার্যতা .
কারণত্বং ততো গচ্ছেত্কার্যাভাবে বিচারতঃ .. ১৩৫..
অথ শুদ্ধং ভবেদ্বস্তু যদ্বৈ বাচামগোচরম্ .
দ্রষ্টব্যং মৃদ্ঘটেনৈব দৃষ্টান্তেন পুনঃ পুনঃ .. ১৩৬..
অনেনৈব প্রকারেণ বৃত্তিব্রহ্মাত্মিকা ভবেত্ .
উদেতি শুদ্ধচিত্তানাং বৃত্তিজ্ঞানং ততঃ পরম্ .. ১৩৭..
কারণং ব্যতিরেকেণ পুমানাদৌ বিলোকযেত্ .
অন্বযেন পুনস্তদ্ধি কার্যে নিত্যং প্রপশ্যতি .. ১৩৮..
কার্যে হি কারণং পশ্যেত্পশ্চাত্কার্যং বিসর্জযেত্ .
অন্বযেন পুনস্তদ্ধি কার্যে নিত্যং প্রপশ্যতি .. ১৩৯..
ভাবিতং তীব্রবেগেন যদ্বস্তু নিশ্চযাত্মনা .
পুমাংস্তদ্ধি ভবেচ্ছীঘ্রং জ্ঞেযং ভ্রমরকীটবত্ .. ১৪০..
অদৃশ্যং ভাবরূপঞ্চ সর্বমেব চিদাত্মকম্ .
সাবধানতযা নিত্যং স্বাত্মানং ভাবযেদ্বুধঃ .. ১৪১..
দৃশ্যং হ্যদৃশ্যতাং নীত্বা ব্রহ্মাকারেণ চিন্তযেত্ .
বিদ্বান্নিত্যসুখে তিষ্ঠেদ্ধিয চিদ্রসপূর্ণযা .. ১৪২..
এভিরঙ্গৈঃ সমাযুক্তো রাজযোগ উদাহৃতঃ .
কিঞ্চিত্পক্বকষাযাণাং হঠযোগেন সংযুতঃ .. ১৪৩..
পরিপক্বং মনো যেষং কেবলোঽযং চ সিদ্ধিদঃ .
গুরুদৈবতভক্তানাং সর্বেষাং সুলভো জবাত্ .. ১৪৪..

.. ইতি ..