ভক্তামর স্তোত্র

.. ভক্তামর স্তোত্র ..

ভক্তামর- প্রণত- মৌলিমণি- প্রভাণা –
মুদ্যোতকং দলিত- পাপ- তমোবিতানম্ .
সম্যক্ প্রণম্য জিন পাদযুগং যুগাদা-
বালংবনং ভবজলে পততাং জনানাম্.. ১..
যঃ সংস্তুতঃ সকল- বাঙ্ময- তত্ব- বোধা-
দ্- উদ্ভূত- বুদ্ধিপটুভিঃ সুরলোকনাথৈঃ.
স্তোত্রৈর্জগত্ত্রিতয চিত্ত- হরৈরুদরৈঃ
স্তোষ্যে কিলাহমপি তং প্রথমং জিনেন্দ্রম্.. ২..
বুদ্ধ্যা বিনাঽপি বিবুধার্চিত পাদপীঠ
স্তোতুং সমুদ্যত মতির্বিগতত্রপোঽহম্ .
বালং বিহায জলসংস্থিতমিন্দু বিম্ব –
মন্যঃ ক ইচ্ছতি জনঃ সহসা গ্রহীতুম্ .. ৩..
বক্তুং গুণান্ গুণসমুদ্র শশাঙ্ক্কান্তান্
কস্তে ক্ষমঃ সুরগুরুপ্রতিমোঽপি বুদ্ধ্যা .
কল্পান্ত – কাল্ – পবনোদ্ধত – নক্রচক্রং
কো বা তরীতুমলমম্বুনিধিং ভুজাভ্যাম্ .. ৪..
সোঽহং তথাপি তব ভক্তি বশান্মুনীশ
কর্তুং স্তবং বিগতশক্তিরপি প্রবৃত্তঃ .
প্রীত্যঽঽত্মবীর্যমবিচার্য মৃগো মৃগেন্দ্রং
নাভ্যেতি কিং নিজশিশোঃ পরিপালনার্থম্ .. ৫..
অল্পশ্রুতং শ্রুতবতাং পরিহাসধাম্
ত্বদ্ভক্তিরেব মুখরীকুরুতে বলান্মাম্ .
যত্কোকিলঃ কিল মধৌ মধুরং বিরৌতি
তচ্চারুচূত – কলিকানিকরৈকহেতু .. ৬..
ত্বত্সংস্তবেন ভবসংততি – সন্নিবদ্ধং
পাপং ক্ষণাত্ ক্ষযমুপৈতি শরীর ভাজাম্.
আক্রান্ত – লোকমলিনীলমশেষমাশু
সূর্যাংশুভিন্নমিব শার্বরমন্ধকারম্ .. ৭..
মত্বেতি নাথ্!তব্ সংস্তবনং মযেদ –
মারভ্যতে তনুধিযাপি তব প্রভাবাত্ .
চেতো হরিষ্যতি সতাং নলিনীদলেষু
মুক্তাফল – দ্যুতিমুপৈতি ননূদবিন্দুঃ .. ৮..
আস্তাং তব স্তবনমস্তসমস্ত – দোষং
ত্বত্সংকথাঽপি জগতাং দুরিতানি হন্তি .
দূরে সহস্ত্রকিরণঃ কুরুতে প্রভৈব
পদ্মাকরেষু জলজানি বিকাশভাংজি .. ৯..
নাত্যদ্- ভূতং ভুবন- ভুষণ ভূতনাথ
ভূতৈর্ গুণৈর্- ভুবি ভবন্তমভিষ্টুবন্তঃ
তুল্যা ভবন্তি ভবতো ননু তেন কিং বা
ভূত্যাশ্রিতং য ইহ নাত্মসমং করোতি .. ১০..
দৃষ্টবা ভবন্তমনিমেষ- বিলোকনীযং
নান্যত্র তোষমুপযাতি জনস্য চক্ষুঃ .
পীত্বা পযঃ শশিকরদ্যুতি দুগ্ধ সিন্ধোঃ
ক্ষারং জলং জলনিধেরসিতুং ক ইচ্ছেত্ .. ১১..
যৈঃ শান্তরাগরুচিভিঃ পরমাণুভিস্তবং
নির্মাপিতস্ত্রিভুবনৈক ললাম- ভূত.
তাবন্ত এব খলু তেঽপ্যণবঃ পৃথিব্যাং
যত্তে সমানমপরং ন হি রূপমস্তি .. ১২..
বক্ত্রং ক্ব তে সুরনরোরগনেত্রহারি
নিঃশেষ – নির্জিত- জগত্ ত্রিতযোপমানম্ .
বিম্বং কলঙ্ক- মলিনং ক্ব নিশাকরস্য
যদ্বাসরে ভবতি পাংডুপলাশকল্পম্ .. ১৩..
সম্পূর্ণমণ্ঙল – শশাঙ্ককলাকলাপ্
শুভ্রা গুণাস্ত্রিভুবনং তব লংঘযন্তি .
যে সংশ্রিতাস্- ত্রিজগদীশ্বর নাথমেকং
কস্তান্- নিবারযতি সংচরতো যথেষ্টম্ .. ১৪..
চিত্রং কিমত্র যদি তে ত্রিদশাংগনাভির্-
নীতং মনাগপি মনো ন বিকার – মার্গম্ .
কল্পান্তকালমরুতা চলিতাচলেন
কিং মন্দরাদ্রিশিখিরং চলিতং কদাচিত্ .. ১৫..
নির্ধূমবর্তিপবর্জিত – তৈলপূরঃ
কৃত্স্নং জগত্ত্রযমিদং প্রকটী- করোষি .
গম্যো ন জাতু মরুতাং চলিতাচলানাং
দীপোঽপরস্ত্বমসি নাথ্ জগত্প্রকাশঃ .. ১৬..
নাস্তং কাদাচিদুপযাসি ন রাহুগম্যঃ
স্পষ্টীকরোষি সহসা যুগপজ্জগন্তি .
নাম্ভোধরোদর – নিরুদ্ধমহাপ্রভাবঃ
সূর্যাতিশাযিমহিমাসি মুনীন্দ্র!লোকে .. ১৭..
নিত্যোদযং দলিতমোহমহান্ধকারং
গম্যং ন রাহুবদনস্য ন বারিদানাম্ .
বিভ্রাজতে তব মুখাব্জমনল্প কান্তি
বিদ্যোতযজ্জগদপূর্ব – শশাঙ্কবিম্বম্ .. ১৮..
কিং শর্বরীষু শশিনাঽহ্নি বিবস্বতা বা
যুষ্মন্মুখেন্দু – দলিতেষু তমস্সু নাথ
নিষ্মন্ন শালিবনশালিনি জীব লোকে
কার্যং কিযজ্জলধরৈর্ – জলভার নম্রৈঃ .. ১৯..
জ্ঞানং যথা ত্বযি বিভাতি কৃতাবকাশং
নৈবং তথা হরিহরাদিষু নাযকেষু
তেজঃ স্ফুরন্মণিষু যাতি যথা মহত্বং
নৈবং তু কাচ – শকলে কিরণাকুলেঽপি .. ২০..
মন্যে বরং হরি- হরাদয এব দৃষ্টা
দৃষ্টেষু যেষু হৃদযং ত্বযি তোষমেতি .
কিং বীক্ষিতেন ভবতা ভুবি যেন নান্যঃ
কশ্চিন্মনো হরতি নাথ!ভবান্তরেঽপি .. ২১..
স্ত্রীণাং শতানি শতশো জনযন্তি পুত্রান্
নান্যা সুতং ত্বদুপমং জননী প্রসূতা.
সর্বা দিশো দধতি ভানি সহস্ত্ররশ্মিং
প্রাচ্যেব দিগ্ জনযতি স্ফুরদংশুজালং .. ২২..
ত্বামামনন্তি মুনযঃ পরমং পুমাংস-
মাদিত্যবর্ণমমলং তমসঃ পরস্তাত্ .
ত্বামেব সম্যগুপলভ্য জযংতি মৃত্যুং
নান্যঃ শিবঃ শিবপদস্য মুনীন্দ্র!পন্থাঃ .. ২৩..
ত্বামব্যযং বিভুমচিন্ত্যমসংখ্যমাদ্যং
ব্রহ্মাণমীশ্বরমনন্তমনংগকেতুম্
যোগীশ্বরং বিদিতযোগমনেকমেকং
জ্ঞানস্বরূপমমলং প্রবদন্তি সন্তঃ .. ২৪..
বুদ্ধস্ত্বমেব বিবুধার্চিত বুদ্ধি বোধাত্,
ত্বং শংকরোঽসি ভুবনত্রয শংকরত্বাত্ .
ধাতাঽসি ধীর !শিবমার্গ- বিধের্বিধানাত্,
ব্যক্তং ত্বমেব ভগবন্!পুরুষোত্তমোঽসি .. ২৫..
তুভ্যং নমস্ত্রিভুবনার্তিহরায নাথ .
তুভ্যং নমঃ ক্ষিতিতলামলভূষণায .
তুভ্যং নমস্ত্রিজগতঃ পরমেশ্বরায,
তুভ্যং নমো জিন !ভবোদধি শোষণায .. ২৬..
কো বিস্মযোঽত্র যদি নাম গুণৈরশেষৈস্ –
ত্বং সংশ্রিতো নিরবকাশতযা মুনীশ!
দোষৈরূপাত্ত বিবিধাশ্রয জাতগর্বৈঃ,
স্বপ্নান্তরেঽপি ন কদাচিদপীক্ষিতোঽসি .. ২৭..
উচ্চৈরশোক- তরুসংশ্রিতমুন্মযূখ-
মাভাতি রূপমমলং ভবতো নিতান্তম্ .
স্পষ্টোল্লসত্কিরণমস্ত- তমোবিতানং
বিম্বং রবেরিব পযোধর পার্শ্ববর্তি .. ২৮..
সিংহাসনে মণিমযূখশিখাবিচিত্রে,
বিভ্রাজতে তব বপুঃ কনকাবদাতম্ .
বিম্বং বিযদ্বিলসদংশুলতা – বিতানং,
তুংগোদযাদ্রি – শিরসীব সহস্ত্ররশ্মেঃ .. ২৯..
কুন্দাবদাত – চলচামর – চারুশোভং,
বিভ্রাজতে তব বপুঃ কলধৌতকান্তম্ .
উদ্যচ্ছশাংক – শুচিনির্ঝর – বারিধার- ,
মুচ্চৈস্তটং সুর গিরেরিব শাতকৌম্ভম্ .. ৩০..
ছত্রত্রযং তব বিভাতি শশাংককান্ত-
মুচ্চৈঃ স্থিতং স্থগিত ভানুকর – প্রতাপম্ .
মুক্তাফল – প্রকরজাল – বিবৃদ্ধশোভং,
প্রখ্যাপযত্ত্রিজগতঃ পরমেশ্বরত্বম্ .. ৩১..
গম্ভীরতারবপূরিত – দিগ্বিভাগস্-
ত্রৈলোক্যলোক – শুভসংগম ভূতিদক্ষঃ .
সদ্ধর্মরাজজযঘোষণ – ঘোষকঃ সন্,
খে দুন্দুভির্ধ্বনতি তে যশসঃ প্রবাদী .. ৩২..
মন্দার – সুন্দরনমেরূ – সুপারিজাত
সন্তানকাদিকুসুমোত্কর- বৃষ্টিরুদ্ধা .
গন্ধোদবিন্দু – শুভমন্দ – মরুত্প্রপাতা,
দিব্যা দিবঃ পতিত তে বচসাং ততির্বা .. ৩৩..
শুম্ভত্প্রভাবলয – ভূরিবিভা বিভোস্তে,
লোকত্রযে দ্যুতিমতাং দ্যুতিমাক্ষিপন্তী .
প্রোদ্যদ্- দিবাকর – নিরন্তর ভূরিসংখ্যা
দীপ্ত্যা জযত্যপি নিশামপি সোম- সৌম্যাম্ .. ৩৪..
স্বর্গাপবর্গগমমার্গ – বিমার্গণেষ্টঃ,
সদ্ধর্মতত্বকথনৈক – পটুস্ত্রিলোক্যাঃ .
দিব্যধ্বনির্ভবতি তে বিশদার্থসত্ব
ভাষাস্বভাব – পরিণামগুণৈঃ প্রযোজ্যঃ .. ৩৫..
উন্নিদ্রহেম – নবপংকজ – পুংজকান্তী,
পর্যুল্লসন্নখমযূখ- শিখাভিরামৌ .
পাদৌ পদানি তব যত্র জিনেন্দ্র !ধত্তঃ
পদ্মানি তত্র বিবুধাঃ পরিকল্পযন্তি .. ৩৬..
ইত্থং যথা তব বিভূতিরভূজ্জিনেন্দ্র,
ধর্মোপদেশনবিধৌ ন তথা পরস্য .
যাদৃক্ প্রভা দিনকৃতঃ প্রহতান্ধকারা,
তাদৃক্- কুতো গ্রহগণস্য বিকাশিনোঽপি . ৩৭..
শ্চ্যোতন্মদাবিলবিলোল- কপোলমূল
মত্তভ্রমদ্- ভ্রমরনাদ – বিবৃদ্ধকোপম্ .
ঐরাবতাভমিভমুদ্ধতমাপতন্তং
দৃষ্ট্বা ভযং ভবতি নো ভবদাশ্রিতানাম্ .. ৩৮..
ভিন্নেভ – কুম্ভ – গলদুজ্জবল – শোণিতাক্ত,
মুক্তাফল প্রকর – ভূষিত ভুমিভাগঃ .
বদ্ধক্রমঃ ক্রমগতং হরিণাধিপোঽপি,
নাক্রামতি ক্রমযুগাচলসংশ্রিতং তে .. ৩৯..
কল্পাংতকাল – পবনোদ্ধত – বহ্নিকল্পং,
দাবানলং জ্বলিতমুজ্জবলমুত্স্ফুলিংগম্ .
বিশ্বং জিঘত্সুমিব সম্মুখমাপতন্তং,
ত্বন্নামকীর্তনজলং শমযত্যশেষম্ .. ৪০..
রক্তেক্ষণং সমদকোকিল – কণ্ঠনীলং,
ক্রোধোদ্ধতং ফণিনমুত্ফণমাপতন্তম্ .
আক্রামতি ক্রমযুগেন নিরস্তশংকস্-
ত্বন্নাম নাগদমনী হৃদি যস্য পুংসঃ .. ৪১..
বল্গত্তুরংগ গজগর্জিত – ভীমনাদ-
মাজৌ বলং বলবতামপি ভূপতিনাম্ !
উদ্যদ্দিবাকর মযূখ – শিখাপবিদ্ধং,
ত্বত্- কীর্তনাত্ তম ইবাশু ভিদামুপৈতি .. ৪২..
কুন্তাগ্রভিন্নগজ – শোণিতবারিবাহ
বেগাবতার – তরণাতুরযোধ – ভীমে .
যুদ্ধে জযং বিজিতদুর্জযজেযপক্ষাস্-
ত্বত্পাদ পংকজবনাশ্রযিণো লভন্তে .. ৪৩..
অম্ভৌনিধৌ ক্ষুভিতভীষণনক্রচক্র-
পাঠীন পীঠভযদোল্বণবাডবাগ্নৌ
রংগত্তরংগ – শিখরস্থিত – যানপাত্রাস্-
ত্রাসং বিহায ভবতঃস্মরণাদ্ ব্রজন্তি .. ৪৪..
উদ্ভূতভীষণজলোদর – ভারভুগ্নাঃ
শোচ্যাং দশামুপগতাশ্চ্যুতজীবিতাশাঃ .
ত্বত্পাদপংকজ- রজোঽমৃতদিগ্ধদেহা,
মর্ত্যা ভবন্তি মকরধ্বজতুল্যরূপাঃ .. ৪৫..
আপাদ – কণ্ঠমুরূশ্রৃংখল – বেষ্টিতাংগা,
গাঢং বৃহন্নিগডকোটিনিঘৃষ্টজংঘাঃ .
ত্বন্নামমংত্রমনিশং মনুজাঃ স্মরন্তঃ,
সদ্যঃ স্বযং বিগত- বন্ধভযা ভবন্তি .. ৪৬..
মত্তদ্বিপেন্দ্র – মৃগরাজ – দবানলাহি
সংগ্রাম – বারিধি – মহোদর- বন্ধনোত্থম্ .
তস্যাশু নাশমুপযাতি ভযং ভিযেব,
যস্তাবকং স্তবমিমং মতিমানধীতে .. ৪৭..
স্তোত্রস্ত্রজং তব জিনেন্দ্র !গুণৈর্নিবদ্ধাং,
ভক্ত্যা মযা বিবিধবর্ণবিচিত্রপুষ্পাম্ .
ধত্তে জনো য ইহ কংঠগতামজস্রং,
তং মানতুংগমবশা সমুপৈতি লক্ষ্মীঃ .. ৪৮..