গুরু গীতা

.. গুরু গীতা ..

.. শ্রী গুরুগীতা ..

.. প্রথমোঽধ্যাযঃ ..

অচিন্ত্যাব্যক্তরূপায নির্গুণায গণাত্মনে |
সমস্তজগদাধারমূর্তযে ব্রহ্মণে নমঃ || ১||

ঋষয ঊচুঃ |
সূত সূত মহাপ্রাজ্ঞ নিগমাগমপারগম্ |
গুরুস্বরূপমস্মাকং ব্রূহি সর্বমলাপহম্ || ২||

যস্য শ্রবণমাত্রেণ দেহী দুঃখাদ্বিমুচ্যতে |
যেন মার্গেণ মুনযঃ সর্বজ্ঞত্বং প্রপেদিরে || ৩||

যত্প্রাপ্য ন পুনর্যাতি নরঃ সংসারবন্ধনম্ |
তথাবিধং পরং তত্ত্বং বক্তব্যমধুনা ত্বযা || ৪||

গুহ্যাদ্গুহ্যতমং সারং গুরুগীতা বিশেষতঃ |
ত্বত্প্রসাদাচ্চ শ্রোতব্যা তত্সর্বং ব্রূহি সূত নঃ || ৫||

ইতি সংপ্রার্থিতঃ সূতো মুনিসঙ্ঘৈর্মুহুর্মুহুঃ ||
কুতূহলেন মহতা প্রোবাচ মধুরং বচঃ || ৬||

সূত উবাচ |
শ্রুণুধ্বং মুনযঃ সর্বে শ্রদ্ধযা পরযা মুদা |
বদামি ভবরোগঘ্নীং গীতাং মাতৃস্বরূপিণীম্ || ৭||

পুরা কৈলাসশিখরে সিদ্ধগন্ধর্বসেবিতে |
তত্র কল্পলতাপুষ্পমন্দিরেঽত্যন্তসুন্দরে || ৮||

ব্যাঘ্রাজিনে সমাসীনং শুকাদিমুনিবন্দিতম্ |
বোধযন্তং পরং তত্ত্বং মধ্যে মুনিগণে ক্বচিত্ || ৯||

প্রণম্রবদনা শশ্বন্নমস্কুর্বন্তমাদরাত্ |
দৃষ্ট্বা বিস্মযমাপন্ন পার্বতী পরিপৃচ্ছতি || ১০||

পার্বত্যুবাচ |
ॐ নমো দেব দেবেশ পরাত্পর জগদ্গুরো |
ত্বাং নমস্কুর্বতে ভক্ত্যা সুরাসুরনরাঃ সদা || ১১||

বিধিবিষ্ণুমহেন্দ্রাদ্যৈর্বন্দ্যঃ খলু সদা ভবান্ |
নমস্করোষি কস্মৈ ত্বং নমস্কারাশ্রযঃ কিল || ১২||

দৃষ্ট্বৈতত্কর্ম বিপুলমাশ্চর্য প্রতিভাতি মে |
কিমেতন্ন বিজানেঽহং কৃপযা বদ মে প্রভো || ১৩||

ভগবন্ সর্বধর্মজ্ঞ ব্রতানাং ব্রতনাযকম্ |
ব্রূহি মে কৃপযা শম্ভো গুরুমাহাত্ম্যমুত্তমম্ || ১৪||

কেন মার্গেণ ভো স্বামিন্ দেহী ব্রহ্মমযো ভবেত্ |
তত্কৃপাং কুরু মে স্বামিন্নমামি চরণৌ তব || ১৫||

ইতি সংপ্রার্থিতঃ শশ্বন্মহাদেবো মহেশ্বরঃ |
আনন্দভরতিঃ স্বান্তে পার্বতীমিদমব্রবীত্ || ১৬||

শ্রী মহাদেব উবাচ |
ন বক্তব্যমিদং দেবি রহস্যাতিরহস্যকম্ |
ন কস্যাপি পুরা প্রোক্তং ত্বদ্ভক্ত্যর্থং বদামি তত্ || ১৭||

মম রূপাসি দেবি ত্বমতস্তত্কথযামি তে |
লোকোপকারকঃ প্রশ্নো ন কেনাপি কৃতঃ পুরা || ১৮||

যস্য দেবে পরা ভক্তির্যথা দেবে তথা গুরৌ |
তস্যৈতে কথিতা হ্যর্থাঃ প্রকাশন্তে মহাত্মনঃ || ১৯||

যো গুরুঃ স শিবঃ প্রোক্তো যঃ শিবঃ স গুরুঃ স্মৃতঃ |
বিকল্পং যস্তু কুর্বীত স নরো গুরুতল্পগঃ || ২০||

দুর্লভং ত্রিষু লোকেষু তচ্ছৃণুশ্ব বদাম্যহম্ |
গুরুব্রহ্ম বিনা নান্যঃ সত্যং সত্যং বরাননে || ২১||

বেদশাস্ত্রপুরাণানি চেতিহাসাদিকানি চ |
মন্ত্রযন্ত্রাদিবিদ্যানাং মোহনোচ্চাটনাদিকম্ || ২২||

শৈবশাক্তাগমাদীনি হ্যন্যে চ বহবো মতাঃ |
অপভ্রংশাঃ সমস্তানাং জীবানাং ভ্রান্তচেতসাম্ || ২৩||

জপস্তপো ব্রতং তীর্থং যজ্ঞো দানং তথৈব চ |
গুরুতত্ত্বমবিজ্ঞায সর্বং ব্যর্থং ভবেত্প্রিযে || ২৪||

গুরুবুদ্ধ্যাত্মনো নান্যত্ সত্যং সত্যং বরাননে |
তল্লাভার্থং প্রযত্নস্তু কর্তব্যশ্চ মনীষিভিঃ || ২৫||

গূঢাবিদ্যা জগন্মাযা দেহশ্চাজ্ঞানসম্ভবঃ |
বিজ্ঞানং যত্প্রসাদেন গুরুশব্দেন কথযতে || ২৬||

যদঙ্ঘ্রিকমলদ্বন্দ্বং দ্বন্দ্বতাপনিবারকম্ |
তারকং ভবসিন্ধোশ্চ তং গুরুং প্রণমাম্যহম্ || ২৭||

দেহী ব্রহ্ম ভবেদ্যস্মাত্ ত্বত্কৃপার্থং বদামি তত্ |
সর্বপাপবিশুদ্ধাত্মা শ্রীগুরোঃ পাদসেবনাত্ || ২৮||

সর্বতীর্থাবগাহস্য সম্প্রাপ্নোতি ফলং নরঃ |
গুরোঃ পাদোদকং পীত্বা শেষং শিরসি ধারযন্ || ২৯||

শোষণং পাপপঙ্কস্য দীপনং জ্ঞানতেজসঃ |
গুরোঃ পাদোদকং সম্যক্ সংসারার্ণবতারকম্ || ৩০||

অজ্ঞানমূলহরণং জন্মকর্মনিবারকম্ |
জ্ঞানবিজ্ঞানসিদ্ধ্যর্থং গুরুপাদোদকং পিবেত্ || ৩১||

গুরুপাদোদকং পানং গুরোরুচ্ছিষ্টভোজনম্ |
গুরুমূর্তেঃ সদা ধ্যানং গুরোর্নাম্নঃ সদা জপঃ || ৩২||

স্বদেশিকস্যৈব চ নামকীর্তনম্ ভবেদনন্তস্য শিবস্য কীর্তনম্ |
স্বদেশিকস্যৈব চ নামচিন্তনম্ ভবেদনন্তস্য শিবস্য চিন্তনম্ || ৩৩||

যত্পাদরেণুর্বৈ নিত্যং কোঽপি সংসারবারিধৌ |
সেতুবন্ধাযতে নাথং দেশিকং তমুপাস্মহে || ৩৪||

যদনুগ্রহমাত্রেণ শোকমোহৌ বিনশ্যতঃ |
তস্মৈ শ্রীদেশিকেন্দ্রায নমোঽস্তু পরমাত্মনে || ৩৫||

যস্মাদনুগ্রহং লব্ধ্বা মহদজ্ঞান্মুত্সৃজেত্ |
তস্মৈ শ্রীদেশিকেন্দ্রায নমশ্চাভীষ্টসিদ্ধযে || ৩৬||

কাশীক্ষেত্রং নিবাসশ্চ জান্হবী চরণোদকম্ |
গুরুবিশ্বেশ্বরঃ সাক্ষাত্ তারকং ব্রহ্মনিশ্চযঃ || ৩৭||

গুরুসেবা গযা প্রোক্তা দেহঃ স্যাদক্ষযো বটঃ |
তত্পাদং বিষ্ণুপাদং স্যাত্ তত্র দত্তমনন্তকম্ || ৩৮||

গুরুমূর্তি স্মরেন্নিত্যং গুরুর্নাম সদা জপেত্ |
গুরোরাজ্ঞাং প্রকুর্বীত গুরোরন্যং ন ভাবযেত্ || ৩৯||

গুরুবক্ত্রে স্থিতং ব্রহ্ম প্রাপ্যতে তত্প্রসাদতঃ |
গুরোর্ধ্যানং সদা কুর্যাত্ কুলস্ত্রী স্বপতিং যথা || ৪০||

স্বাশ্রমং চ স্বজাতিং চ স্বকীর্তিং পুষ্টিবর্ধনম্ |
এতত্সর্বং পরিত্যজ্য গুরুমেব সমাশ্রযেত্ || ৪১||

অনন্যাশ্চিন্তযন্তো যে সুলভং পরমং সুখম্ |
তস্মাত্সর্বপ্রযত্নেন গুরোরারাধনং কুরু || ৪২||

গুরুবক্ত্রে স্থিতা বিদ্যা গুরুভক্ত্যা চ লভ্যতে |
ত্রৈলোক্যে স্ফুটবক্তারো দেবর্ষিপিতৃমানবাঃ || ৪৩||

গুকারশ্চান্ধকারো হি রুকারস্তেজ উচ্যতে |
অজ্ঞানগ্রাসকং ব্রহ্ম গুরুরেব ন সংশযঃ || ৪৪||

গুকারো ভবরোগঃ স্যাত্ রুকারস্তন্নিরোধকৃত্ |
ভবরোগহরত্যাচ্চ গুরুরিত্যভিধীযতে || ৪৫||

গুকারশ্চ গুণাতীতো রূপাতীতো রুকারকঃ |
গুণরূপবিহীনত্বাত্ গুরুরিত্যভিধীযতে || ৪৬||

গুকারঃ প্রথমো বর্ণো মাযাদিগুণভাসকঃ |
রুকারোঽস্তি পরং ব্রহ্ম মাযাভ্রান্তিবিমোচনম্ || ৪৭||

এবং গুরুপদং শ্রেষ্ঠং দেবানামপি দুর্লভম্ |
গরুডোরগগন্ধর্বসিদ্ধাদিসুরপূজিতম্ || ৪৮||

ধ্রুবং দেহি মুমুক্ষূণাং নাস্তি তত্ত্বং গুরোঃ পরম্ |
গুরোরারাধনং কুর্যাত্ স্বজীবত্বং নিবেদযেত্ || ৪৯||

আসনং শযনং বস্ত্রং বাহনং ভূষণাদিকম্ |
সাধকেন প্রদাতব্যং গুরুসন্তোষকারণম্ || ৫০||

কর্মণা মনসা বাচা সর্বদাঽঽরাধযেদ্গুরুম্ |
দীর্ঘদণ্ডং নমস্কৃত্য নির্লজ্জৌ গুরুসন্নিধৌ || ৫১||

শরীরমিন্দ্রিযং প্রাণমর্থস্বজনবান্ধবান্ |
আত্মদারাদিকং সর্বং সদ্গুরুভ্যো নিবেদযেত্ || ৫২||

গুরুরেকো জগত্সর্বং ব্রহ্মবিষ্ণুশিবাত্মকম্ |
গুরোঃ পরতরং নাস্তি তস্মাত্সংপূজযেদ্গুরুম্ || ৫৩||

সর্বশ্রুতিশিরোরত্নবিরাজিতপদাংবুজম্ |
বেদান্তার্থপ্রবক্তারং তস্মাত্ সংপূজযেদ্গুরুম্ || ৫৪||

যস্য স্মরণমাত্রেণ জ্ঞানমুত্পদ্যতে স্বযম্ |
স এব সর্বসংপত্তিঃ তস্মাত্সংপূজযেদ্গুরুম্ || ৫৫||

কৃমিকোটিভিরাবিষ্টং দুর্গন্ধকুলদূষিতম্ |
অনিত্যং দুঃখনিলযং দেহং বিদ্ধি বরাননে || ৫৬||

সংসারবৃক্ষমারূঢাঃ পতন্তি নরকার্ণবে |
যস্তানুদ্ধরতে সর্বান্ তস্মৈ শ্রীগুরবে নমঃ || ৫৭||

গুরুর্ব্রহ্মা গুরুর্বিষ্ণুর্গুরুর্দেবো মহেশ্বরঃ |
গুরুরেব পরং ব্রহ্ম তস্মৈ শ্রীগুরবে নমঃ || ৫৮||

অজ্ঞানতিমিরান্ধস্য জ্ঞানাঞ্জনশলাকযা |
চক্ষুরুন্মীলিতং যেন তস্মৈ শ্রীগুরবে নমঃ || ৫৯||

অখণ্ডমণ্ডলাকারং ব্যাপ্তং যেন চরাচরম্ |
তত্পদং দর্শিতং যেন তস্মৈ শ্রীগুরবে নমঃ || ৬০||

স্থাবরং জঙ্গমং ব্যাপ্তং যত্কিঞ্চিত্সচরাচরম্ |
ত্বংপদং দর্শিতং যেন তস্মৈ শ্রীগুরবে নমঃ || ৬১||

চিন্মযং ব্যাপিতং সর্বং ত্রৈলোক্যং সচরাচরম্ |
অসিত্বং দর্শিতং যেন তস্মৈ শ্রীগুরবে নমঃ || ৬২||

নিমিষন্নিমিষার্ধ্বাদ্বা যদ্বাক্যাদৈ বিমুচ্যতে |
স্বাত্মানং শিবমালোক্য তস্মৈ শ্রীগুরবে নমঃ || ৬৩||

চৈতন্যং শাশ্বতং শাংতং ব্যোমাতীতং নিরঞ্জনম্ |
নাদবিন্দুকলাতীতং তস্মৈ শ্রীগুরবে নমঃ || ৬৪||

নির্গুণং নির্মলং শান্তং জংগমং স্থিরমেব চ |
ব্যাপ্তং যেন জগত্সর্বং তস্মৈ শ্রীগুরবে নমঃ || ৬৫||

স পিতা স চ মে মাতা স বন্ধুঃ স চ দেবতা |
সংসারমোহনাশায তস্মৈ শ্রীগুরবে নমঃ || ৬৬||

যত্সত্ত্বেন জগত্সত্যং যত্প্রকাশেন ভাতি তত্ |
যদানন্দেন নন্দন্তি তস্মৈ শ্রীগুরবে নমঃ || ৬৭||

যস্মিন্স্থিতমিদং সর্বং ভাতি যদ্ভানরূপতঃ |
প্রিযং পুত্রাদি যত্প্রীত্যা তস্মৈ শ্রীগুরবে নমঃ || ৬৮||

যেনেদং দর্শিতং তত্ত্বং চিত্তচৈত্যাদিকং তথা |
জাগ্রত্স্বপ্নসুষুপ্ত্যাদি তস্মৈ শ্রীগুরবে নমঃ || ৬৯||

যস্য জ্ঞানমিদং বিশ্বং ন দৃশ্যং ভিন্নভেদতঃ |
সদৈকরূপরূপায তস্মৈ শ্রীগুরবে নমঃ || ৭০||

যস্য জ্ঞাতং মতং তস্য মতং যস্য ন বেদ সঃ |
অনন্যভাবভাবায তস্মৈ শ্রীগুরবে নমঃ || ৭১||

যস্মৈ কারণরূপায কার্যরূপেণ ভাতি যত্ |
কার্যকারণরূপায তস্মৈ শ্রীগুরবে নমঃ || ৭২||

নানারূপমিদং বিশ্বং ন কেনাপ্যস্তি ভিন্নতা |
কার্যকারণরূপায তস্মৈ শ্রীগুরবে নমঃ || ৭৩||

জ্ঞানশক্তিসমারূঢতত্ত্বমালাবিভূষণে |
ভুক্তিমুক্তিপ্রদাত্রে চ তস্মৈ শ্রীগুরবে নমঃ || ৭৪||

অনেকজন্মসংপ্রাপ্তকর্মবন্ধবিদাহিনে |
জ্ঞানানিলপ্রভাবেন তস্মৈ শ্রীগুরবে নমঃ || ৭৫||

শোষণং ভবসিন্ধোশ্চ দীপনং ক্ষরসংপদাম্ |
গুরোঃ পাদোদকং যস্য তস্মৈ শ্রীগুরবে নমঃ || ৭৬||

ন গুরোরধিকং তত্ত্বং ন গুরোরধিকং তপঃ |
ন গুরোরধিকং জ্ঞানং তস্মৈ শ্রীগুরবে নমঃ || ৭৭||

মন্নাথঃ শ্রীজগন্নাথো মদ্গুরুঃ শ্রীজগদ্গুরুঃ |
মমাত্মা সর্বভূতাত্মা তস্মৈ শ্রীগুরবে নমঃ || ৭৮||

গুরুরাদিরনাদিশ্চ গুরুঃ পরমদৈবতম্ |
গুরুমন্ত্রসমো নাস্তি তস্মৈ শ্রীগুরবে নমঃ || ৭৯||

এক এব পরো বন্ধুর্বিষমে সমুপস্থিতে |
গুরুঃ সকলধর্মাত্মা তস্মৈ শ্রীগুরবে নমঃ || ৮০||

গুরুমধ্যে স্থিতং বিশ্বং বিশ্বমধ্যে স্থিতো গুরুঃ |
গুরুর্বিশ্বং ন চান্যোঽস্তি তস্মৈ শ্রীগুরবে নমঃ || ৮১||

ভবারণ্যপ্রবিষ্টস্য দিঙ্মোহভ্রান্তচেতসঃ |
যেন সন্দর্শিতঃ পন্থাঃ তস্মৈ শ্রীগুরবে নমঃ || ৮২||

তাপত্রযাগ্নিতপ্তনামশান্তপ্রাণিনাং ভুবি |
যস্য পাদোদকং গঙ্গা তস্মৈ শ্রীগুরবে নমঃ || ৮৩||

অজ্ঞানসর্পদষ্টানাং প্রাণিনাং কশ্চিকিত্সকঃ |
সম্যগ্জ্ঞানমহামন্ত্রবেদিনং সদ্গুরু বিনা || ৮৪||

হেতবে জগতামেব সংসারার্ণবসেতবে |
প্রভবে সর্ববিদ্যানাং শম্ভবে গুরবে নমঃ || ৮৫||

ধ্যানমূলং গুরোর্মূতিঃর্ পূজামূলং গুরোঃ পদম্ |
মন্ত্রমূলং গুরোর্বাক্যং মুক্তিমূলং গুরোঃ কৃপা || ৮৬||

সপ্তসাগরপর্যন্তং তীর্থস্নানফলং তু যত্ |
গুরুপাদপযোবিন্দোঃ সহস্রাংশেন তত্ফলম্ || ৮৭||

শিবে রুষ্টে গুরুস্ত্রাতা গুরৌ রুষ্টে ন কশ্চন |
লব্ধ্বা কুলগুরু সম্যগ্গুরুমেব সমাশ্রযেত্ || ৮৮||

মধুলুব্ধো যথা ভৃঙ্গঃ পুষ্পাত্পুষ্পান্তরং ব্রজেত্ |
জ্ঞানলুব্ধস্তথা শিষ্যো গুরোর্গুবর্ন্তরং ব্রজেত্ || ৮৯||

বন্দে গুরুপদদ্বন্দ্বং বাঙ্মনাতীতগোচরম্ |
শ্বেতরক্তপ্রভাভিন্নং শিবশক্ত্যাত্মকং পরম্ || ৯০||

গুকারং চ গুণাতীতং রূকারং রূপবর্জিতম্ |
গুণাতীতমরূপং চ যো দদ্যাত্ স গুরুঃ স্মৃতঃ || ৯১||

অত্রিনেত্রঃ শিবঃ সাক্ষাত্ দ্বিবাহুশ্চ হরিঃ স্মৃতঃ |
যোঽচতুর্বদনো ব্রহ্মা শ্রীগুরুঃ কথিতঃ প্রিযে || ৯২||

অযং মযাঞ্জলির্বদ্ধো দযাসাগরসিদ্ধযে |
যদনুগ্রহতো জন্তুশ্চিত্রসংসারমুক্তিভাক্ || ৯৩||

শ্রীগুরোঃ পরমং রূপং বিবেকচক্ষুরগ্রতঃ |
মন্দভাগ্যা ন পশ্যন্তি অন্ধাঃ সূর্যোদযং যথা || ৯৪||

কুলানাং কুলকোটীনাং তারকস্তত্র তত্ক্ষণাত্ |
অতস্তং সদ্গুরু জ্ঞাত্বা ত্রিকালমভিবাদযেত্ || ৯৫||

শ্রীনাথচরণদ্বন্দ্বং যস্যাং দিশি বিরাজতে |
তস্যাং দিশি নমস্কুর্যাদ্ ভক্ত্যা প্রতিদিনং প্রিযে || ৯৬||

সাষ্টাঙ্গপ্রণিপাতেন স্তুবন্নিত্যং গুরুং ভজেত্ |
ভজনাত্স্থৈর্যমাপ্নোতি স্বস্বরূপমযো ভবেত্ || ৯৭||

দোর্ভ্যাং পদ্ভ্যাং চ জানুভ্যামুরসা শিরসা দৃশা |
মনসা বচসা চেতি প্রণামোষ্টাঙ্গ উচ্যতে || ৯৮||

তস্যৈ দিশে সততমজ্জলিরেষ নিত্যম্
প্রক্ষিপ্যতাং মুখরিতৈর্মধুরৈঃ প্রসূনৈঃ |
জাগর্তি যত্র ভগবান্ গুরুচক্রবর্তী
বিশ্বস্থিতিপ্রলযনাটকনিত্যসাক্ষী || ৯৯||

অভৈস্তৈঃ কিমু দীর্ঘকালবিমলৈর্ব্যাদিপ্রদৈর্দুষ্করৈঃ
প্রাণাযামশতৈরনেককরণৈর্দুঃখাত্মকৈর্দুজর্যৈঃ |
যস্মিন্নভ্যুদিতে বিনশ্যতি বলী বাযুঃ স্বযং তত্ক্ষণাত্
প্রাপ্তুং তত্সহজস্বভাবমনিশং সেবেত চৈকং গুরুম্ || ১০০||

জ্ঞানং বিনা মুক্তিপদং লভ্যতে গুরুভক্তিতঃ |
গুরোঃ প্রসাদতো নান্যত্ সাধনং গুরুমার্গিণাম্ || ১০১||

যস্মাত্পরতরং নাস্তি নেতি নেতীতি বৈ শ্রুতিঃ |
মনসা বচসা চৈব সত্যমারাধযেদ্গুরুম্ || ১০২||

গুরোঃ কৃপাপ্রসাদেন ব্রহ্মবিষ্ণুশিবাদযঃ |
সামর্থ্যমভজন্ সর্বে সৃষ্টিস্থিত্যন্তকর্মণি || ১০৩||

দেবকিন্নরগন্ধর্বাঃ পিতৃযক্ষাস্তু তুম্বুরুঃ |
মুনযোঽপি ন জানন্তি গুরুশুশ্রূষণে বিধিম্ || ১০৪||

তার্কিকাশ্ছান্দসাশ্চৈব দৈবজ্ঞাঃ কর্মঠাঃ প্রিযে |
লৌকিকাস্তে ন জানন্তি গুরুতত্ত্বং নিরাকুলম্ || ১০৫||

মহাহঙ্কারগর্বেণ ততোবিদ্যাবলেন চ |
ভ্রমন্ত্যেতস্মিন্ সংসারে ঘটীযন্ত্রং যথা পুনঃ || ১০৬||

যজ্ঞিনোঽপি ন মুক্তাঃ স্যুঃ ন মুক্তা যোগিনস্তথা |
তাপসা অপি নো মুক্তা গুরুতত্ত্বাত্পরাঙ্মুখাঃ || ১০৭||

ন মুক্তাস্তু গন্ধর্বাঃ পিতৃযক্ষাস্তু চারণাঃ |
ঋষযঃ সিদ্ধদেবাদ্যা গুরুসেবাপরাঙ্মুখাঃ || ১০৮||

.. ইতি শ্রীস্কংদপুরাণে উত্তরখংডে উমামহেশ্বর সংবাদে
শ্রী গুরুগীতাযাং প্রথমোঽধ্যাযঃ ..

——————————————————————————–

.. অথ দ্বিতীযোঽধ্যাযঃ ..

ধ্যানং শ্রুণু মহাদেবি সর্বানন্দপ্রদাযকম্ |
সর্বসৌখ্যকরং চৈব ভুক্তিমুক্তিপ্রদাযকম্ || ১০৯||

শ্রীমত্পরং ব্রহ্ম গুরুং স্মরামি শ্রীমত্পরং ব্রহ্ম গুরুং ভজামি |
শ্রীমত্পরং ব্রহ্ম গুরুং বদামি শ্রীমত্পরং ব্রহ্ম গুরুং নমামি || ১১০||

ব্রহ্মানন্দং পরমসুখদং কেবলং জ্ঞানমূর্তিম্
দ্বন্দ্বাতীতং গগনসদৃশং তত্ত্বমস্যাদিলক্ষ্যম্ |
একং নিত্যং বিমলমচলং সর্বধীসাক্ষিভূতম্
ভাবাতীতং ত্রিগুণরহিতং সদ্গুরুং তং নমামি || ১১১||

হৃদম্বুজে কর্ণিকমধ্যসংস্থে সিংহাসনে সংস্থিতদিব্যমূর্তিম্ |
ধ্যাযেদ্গুরুং চন্দ্রকলাপ্রকাশম্ সচ্চিত্সুখাভীষ্টবরং দধানম্ || ১১২||

শ্বেতাম্বরং শ্বেতবিলেপপুষ্পম্ মুক্তাবিভূষং মুদিতং দ্বিনেত্রম্ |
বামাঙ্কপীঠস্থিতদিব্যশক্তিম্ মন্দস্মিতং পূর্ণকৃপানিধানম্ || ১১৩||

জ্ঞানস্বরূপং নিজভাবযুক্তম্ আনন্দমানন্দকরং প্রসন্নম্ |
যোগীন্দ্রমীড্যং ভবরোগবৈদ্যম্ শ্রীমদ্গুরুং নিত্যমহং নমামি || ১১৪||

বন্দে গুরূণাং চরণারবিন্দম্ সন্দর্শিতস্বাত্মসুখাম্বুধীনাম্ |
জনস্য যেষাং গুলিকাযমানং সংসারহালাহলমোহশান্ত্যৈ || ১১৫||

যস্মিন্ সৃষ্টিস্থিস্তিধ্বংসনিগ্রহানুগ্রহাত্মকম্ |
কৃত্যং পঞ্চবিধং শশ্বত্ ভাসতে তং গুরুং ভজেত্ || ১১৬||

পাদাব্জে সর্বসংসারদাবকালানলং স্বকে |
ব্রহ্মরন্ধ্রে স্থিতাম্ভোজমধ্যস্থং চন্দ্রমণ্ডলম্ || ১১৭||

অকথাদিত্রিরেখাব্জে সহস্রদলমণ্ডলে |
হংসপার্শ্বত্রিকোণে চ স্মরেত্তন্মধ্যগং গুরুম্ || ১১৮||

নিত্যং শুদ্ধং নিরাভাসং নিরাকারং নিরঞ্জনম্ |
নিত্যবোধং চিদানন্দং গুরুং ব্রহ্ম নমাম্যহম্ || ১১৯||

সকলভুবনসৃষ্টিঃ কল্পিতাশেষসৃষ্টিঃ
নিখিলনিগমদৃষ্টিঃ সত্পদার্থৈকসৃষ্টিঃ |
অতদ্গণপরমেষ্টিঃ সত্পদার্থৈকদৃষ্টিঃ
ভবগুণপরমেষ্টির্মোক্ষমার্গৈকদৃষ্টিঃ || ১২০||

সকলভুবনরঙ্গস্থাপনাস্তম্ভযষ্টিঃ
সকরুণরসবৃষ্টিস্তত্ত্বমালাসমষ্টিঃ |
সকলসমযসৃষ্টিস্সচ্চিদানন্দদৃষ্টিঃ
নিবসতু মযি নিত্যং শ্রীগুরোর্দিব্যদৃষ্টিঃ || ১২১||

ন গুরোরধিকং ন গুরোরধিকং ন গুরোরধিকং ন গুরোরধিকম্ |
শিবশাসনতঃ শিবশাসনতঃ শিবশাসনতঃ শিবশাসনতঃ || ১২২||

ইদমেব শিবমিদমেব শিবম্ ইদমেব শিবমিদমেব শিবম্ |
হরিশাসনতো হরিশাসনতো হরিশাসনতো হরিশাসনতঃ || ১২৩||

বিদিতং বিদিতং বিদিতং বিদিতম্ বিজনং বিজনং বিজনং বিজনম্ |
বিধিশাসনতো বিধিশাসনতো বিধিশাসনতো বিধিশাসনতঃ || ১২৪||

এবংবিধং গুরুং ধ্যাত্বা জ্ঞানমুত্পদ্যতে স্বযম্ |
তদা গুরূপদেশেন মুক্তোঽহমিতি ভাবযেত্ || ১২৫||

গুরূপদিষ্টমার্গেণ মনঃশুদ্ধিং তু কারযেত্ |
অনিত্যং খণ্ডযেত্সর্বং যত্কিঞ্চিদাত্মগোচরম্ || ১২৬||

জ্ঞেযং সর্বং প্রতীতং চ জ্ঞানং চ মন উচ্যতে |
জ্ঞানং জ্ঞেযং সমং কুর্যান্নান্যঃ পন্থা দ্বিতীযকঃ || ১২৭||

কিমত্র বহুনোক্তেন শাস্ত্রকোটিশতৈরপি |
দুর্লভা চিত্তবিশ্রান্তিঃ বিনা গুরুকৃপাং পরাম্ || ১২৮||

করুণাখড্গপাতেন ছিত্বা পাশাষ্টকং শিশোঃ |
সম্যগানন্দজনকঃ সদ্গুরুঃ সোঽভিধীযতে ||১২৯||

এবং শ্রুত্বা মহাদেবি গুরুনিন্দাং করোতি যঃ |
স যাতি নরকান্ ঘোরান্ যাবচ্চন্দ্রদিবাকরৌ || ১৩০||

যাবত্কল্পান্তকো দেহস্তাবদ্দেবি গুরুং স্মরেত্ |
গুরুলোপা ন কর্তব্যঃ স্বচ্ছন্দো যদি বা ভবেত্ || ১৩১||

হুঙ্কারেণ ন বক্তব্যং প্রাজ্ঞশিষ্যৈঃ কদাচন |
গুরোরগ্র ন বক্তব্যমসত্যং তু কদাচন || ১৩২||

গুরুং ত্বংকৃত্য হুংকৃত্য গুরুসান্নিধ্যভাষণঃ |
অরণ্যে নির্জলে দেশে সম্ভবেদ্ ব্রহ্মরাক্ষসঃ || ১৩৩||

অদ্বৈতং ভাবযেন্নিত্যং সর্বাবস্থাসু সর্বদা |
কদাচিদপি নো কুর্যাদ্দ্বৈতং গুরুসন্নিধৌ || ১৩৪||

দৃশ্যবিস্মৃতিপর্যন্তং কুর্যাদ্ গুরুপদার্চনম্ |
তাদৃশস্যৈব কৈবল্যং ন চ তদ্ব্যতিরেকিণঃ || ১৩৫||

অপি সম্পূর্ণতত্ত্বজ্ঞো গুরুত্যাগি ভবেদ্যদা |
ভবত্যেব হি তস্যান্তকালে বিক্ষেপমুত্কটম্ || ১৩৬||

গুরুকার্যং ন লঙ্ঘেত নাপৃষ্ট্বা কার্যমাচরেত্ |
ন হ্যুত্তিষ্ঠেদ্দিশেঽনত্বা গুরুসদ্ভ্বশোভিতঃ || ১৩৭||

গুরৌ সতি স্বযং দেবি পরেষাং তু কদাচন |
উপদেশং ন বৈ কুর্যাত্ তথা চেদ্রাক্ষসো ভবেত্ || ১৩৮||

ন গুরোরাশ্রমে কুর্যাত্ দুষ্পানং পরিসর্পণম্ |
দীক্ষা ব্যাখ্যা প্রভুত্বাদি গুরোরাজ্ঞাং ন কারযেত্ || ১৩৯||

নোপাশ্রমং চ পর্যকং ন চ পাদপ্রসারণম্ |
নাঙ্গভোগাদিকং কুর্যান্ন লীলামপরামপি || ১৪০||

গুরূণাং সদসদ্বাপি যদুক্তং তন্ন লংঘযেত্ |
কুর্বন্নাজ্ঞাং দিবা রাত্রৌ দাসবন্নিবসেদ্গুরো || ১৪১||

অদত্তং ন গুরোর্দ্রব্যমুপভুঞ্জীত কর্হিচিত্ |
দত্তে চ রংকবদ্গ্রাহ্যং প্রাণোঽপ্যেতেন লভ্যতে || ১৪২||

পাদুকাসনশয্যাদি গুরুণা যদভীষ্টিতম্ |
নমস্কুর্বীত তত্সর্বং পাদাভ্যাং ন স্পৃশেত্ ক্বচিত্ || ১৪৩||

গচ্ছতঃ পৃষ্ঠতো গচ্ছেত্ গুরুচ্ছাযাং ন লংঘযেত্ |
নোল্বণং ধারযেদ্বেষং নালংকারাংস্ততোল্বণান্ || ১৪৪||

গুরুনিন্দাকরং দৃষ্ট্বা ধাবযেদথ বাসযেত্ |
স্থানং বা তত্পরিত্যাজ্যং জিহ্বাছেদাক্ষমো যদি || ১৪৫||

নোচ্ছিষ্টং কস্যচিদ্দেযং গুরোরাজ্ঞাং ন চ ত্যজেত্ |
কৃত্স্নমুচ্ছিষ্টমাদায হবির্বদ্ভক্ষযেত্স্বযম্ || ১৪৬||

নানৃতং নাপ্রিযং চৈব ন গর্ব নাপি বা বহু |
ন নিযোগধরং ব্রূযাত্ গুরোরাজ্ঞাং বিভাবযেত্ || ১৪৭||

প্রভো দেবকুলেশানাং স্বামিন্ রাজন্ কুলেশ্বর |
ইতি সম্বোধনৈর্ভীতো সচ্চরেদ্গুরুসন্নিধৌ || ১৪৮||

মুনিভিঃ পন্নগৈর্বাপি সুরৈর্বা শাপিতো যদি |
কালমৃত্যুভযাদ্বাপি গুরুঃ সংত্রাতি পার্বতি || ১৪৯||

অশক্তা হি সুরাদ্যাশ্চ হ্যশক্তাঃ মুনযস্তথা |
গুরুশাপোপপন্নস্য রক্ষণায চ কুত্রচিত্ || ১৫০||

মন্ত্ররাজমিদং দেবি গুরুরিত্যক্ষরদ্বযম্ |
স্মৃতিবেদপুরাণানাং সারমেব ন সংশযঃ || ১৫১||

সত্কারমানপূজার্থং দণ্ডকাষযধারণঃ |
স সংন্যাসী ন বক্তব্যঃ সংন্যাসী জ্ঞানতত্পরঃ || ১৫২||

বিজানন্তি মহাবাক্যং গুরোশ্চরণ সেবযা |
তে বৈ সংন্যাসিনঃ প্রোক্তা ইতরে বেষধারিণাঃ || ১৫৩||

নিত্যং ব্রহ্ম নিরাকারং নির্গুণং সত্যচিদ্ধনম্ |
যঃ সাক্ষাত্কুরুতে লোকে গুরুত্বং তস্য শোভতে || ১৫৪||

গুরুপ্রসাদতঃ স্বাত্মন্যাত্মারামনিরীক্ষণাত্ |
সমতা মুক্তিমার্গেণ স্বাত্মজ্ঞানং প্রবর্ততে || ১৫৫||

আব্রহ্মস্তম্ভপর্যন্তং পরমাত্মস্বরূপকম্ |
স্থাবরং জংগমং চৈব প্রণমামি জগন্মযম্ || ১৫৬||

বন্দেহং সচ্চিদানন্দং ভাবাতীতং জগদ্গুরুম্ |
নিত্যং পূর্ণং নিরাকারং নির্গুণং স্বাত্মসংস্থিতম্ || ১৫৭||

পরাত্পরতরং ধ্যাযেন্নিত্যমানন্দকারকম্ |
হৃদযাকাশমধ্যস্থং শুদ্ধস্ফটিকসন্নিভম্ || ১৫৮||

স্ফাটিকে স্ফাটিকং রূপং দর্পণে দর্পণো যথা |
তথাত্মনি চিদাকারমানন্দং সোঽহমিত্যুত || ১৫৯||

অংগুষ্ঠমাত্রং পুরুষং ধ্যাযেচ্চ চিন্মযং হৃদি |
তত্র স্ফুরতি যো ভাবঃ শ্রুণু তত্কথযামি তে || ১৬০||

অজোঽহমমরোঽহং চ হ্যনাদিনিধনো হ্যহম্ |
অবিকারশ্চিদানন্দো হ্যণীযান্মহতো মহান্ || ১৬১||

অপূর্বমপরং নিত্যং স্বযংজ্যোতির্নিরামযম্ |
বিরজং পরমাকাশং ধ্রুবমানন্দমব্যযম্ || ১৬২||

অগোচরং তথাঽগম্যং নামরূপবিবর্জিতম্ |
নিঃশব্দং তু বিজানীযাত্স্বভাবাদ্ব্রহ্ম পার্বতি || ১৬৩||

যথা গন্ধস্বভাবাবত্বং কর্পূরকুসুমাদিষু |
শীতোষ্ণত্বস্বভাবত্বং তথা ব্রহ্মণি শাশ্বতম্ || ১৬৪||

যথা নিজস্বভাবেন কুণ্ডলকটকাদযঃ |
সুবর্ণত্বেন তিষ্ঠন্তি তথাঽহং ব্রহ্ম শাশ্বতম্ || ১৬৫||

স্বযং তথাবিধো ভূত্বা স্থাতব্যং যত্রকুত্রচিত্ |
কীটো ভৃঙ্গ ইব ধ্যানাদ্যথা ভবতি তাদৃশঃ || ১৬৬||

গুরুধ্যানং তথা কৃত্বা স্বযং ব্রহ্মমযো ভবেত্ |
পিণ্ডে পদে তথা রূপে মুক্তাস্তে নাত্র সংশযঃ || ১৬৭||

শ্রীপার্বতী উবাচ |
পিণ্ডং কিং তু মহাদেব পদং কিং সমুদাহৃতম্ |
রূপাতীতং চ রূপং কিং এতদাখ্যাহি শংকর || ১৬৮||

শ্রীমহাদেব উবাচ |
পিণ্ডং কুণ্ডলিনী শক্তিঃ পদং হংসমুদাহৃতম্ |
রূপং বিন্দুরিতি জ্ঞেযং রূপাতীতং নিরঞ্জনম্ || ১৬৯||

পিণ্ডে মুক্তাঃ পদে মুক্তা রূপে মুক্তা বরাননে |
রূপাতীতে তু যে মুক্তাস্তে মুক্তা নাত্র সংশযঃ || ১৭০||

গুরুর্ধ্যানেনৈব নিত্যং দেহী ব্রহ্মমযো ভবেত্ |
স্থিতশ্চ যত্র কুত্রাপি মুক্তোঽসৌ নাত্র সংশযঃ || ১৭১||

জ্ঞানং স্বানুভবঃ শান্তির্বৈরাগ্যং বক্তৃতা ধৃতিঃ |
ষড্গুণৈশ্বর্যযুক্তো হি ভগবান্ শ্রীগুরুঃ প্রিযে || ১৭২||

গুরুঃ শিবো গুরুর্দেবো গুরুর্বন্ধুঃ শরীরিণাম্ |
গুরুরাত্মা গুরুর্জীবো গুরোরন্যন্ন বিদ্যতে || ১৭৩||

একাকী নিস্পৃহঃ শান্তশ্চিন্তাসূযাদিবর্জিতঃ |
বাল্যভাবেন যো ভাতি ব্রহ্মজ্ঞানী স উচ্যতে || ১৭৪||

ন সুখং বেদশাস্ত্রেষু ন সুখং মন্ত্রযন্ত্রকে |
গুরোঃ প্রসাদাদন্যত্র সুখং নাস্তি মহীতলে || ১৭৫||

চার্বাকবৈষ্ণবমতে সুখং প্রাভাকরে ন হি |
গুরোঃ পাদান্তিকে যদ্বত্সুখং বেদান্তসম্মতম্ || ১৭৬||

ন তত্সুখং সুরেন্দ্রস্য ন সুখং চক্রবর্তিনাম্ |
যত্সুখং বীতরাগস্য মুনেরেকান্তবাসিনঃ || ১৭৭||

নিত্যং ব্রহ্মরসং পীত্বা তৃপ্তো যঃ পরমাত্মনি |
ইন্দ্রং চ মন্যতে তুচ্ছং নৃপাণাং তত্র কা কথা || ১৭৮||

যতঃ পরমকৈবল্যং গুরুমার্গেণ বৈ ভবেত্ |
গুরুভক্তিরতঃ কার্যা সর্বদা মোক্ষকাংক্ষিভিঃ || ১৭৯||

এক এবাদ্বিতীযোঽহং গুরুবাক্যেন নিশ্চিতঃ |
এবমভ্যস্যতা নিত্যং ন সেব্যং বৈ বনান্তরম্ || ১৮০||

অভ্যাসান্নিমিষেণৈবং সমাধিমধিগচ্ছতি |
আজন্মজনিতং পাপং তত্ক্ষণাদেব নশ্যতি || ১৮১||

কিমাবাহনমব্যক্তৈ ব্যাপকং কিং বিসর্জনম্ |
অমূর্তো চ কথং পূজা কথং ধ্যানং নিরামযে || ১৮২||

গুরুর্বিষ্ণুঃ সত্ত্বমযো রাজসশ্চতুরাননঃ |
তামসো রুদ্ররূপেণ সৃজত্যবতি হন্তি চ || ১৮৩||

স্বযং ব্রহ্মমযো ভূত্বা তত্পরং নাবলোকযেত্ |
পরাত্পরতরং নান্যত্ সর্বগং চ নিরামযম্ || ১৮৪||

তস্যাবলোকনং প্রাপ্য সর্বসংগবিবর্জিতঃ |
একাকী নিস্পৃহঃ শান্তঃ স্থাতব্যং তত্প্রসাদতঃ || ১৮৫||

লব্ধং বাঽথ ন লব্ধং বা স্বল্পং বা বহুলং তথা |
নিষ্কামেনৈব ভোক্তব্যং সদা সংতুষ্টমানসঃ || ১৮৬||

সর্বজ্ঞপদমিত্যাহুর্দেহী সর্বমযো ভুবি |
সদাঽনন্দঃ সদা শান্তো রমতে যত্রকুত্রচিত্ || ১৮৭||

যত্রৈব তিষ্ঠতে সোঽপি স দেশঃ পুণ্যভাজনঃ |
মুক্তস্য লক্ষণং দেবি তবাগ্রে কথিতং মযা || ১৮৮||

উপদেশস্ত্বযং দেবি গুরুমার্গেণ মুক্তিদঃ |
গুরুভক্তিস্তথাত্যান্তা কর্তব্যা বৈ মনীষিভিঃ || ১৮৯||

নিত্যযুক্তাশ্রযঃ সর্বো বেদকৃত্সর্ববেদকৃত্ |
স্বপরজ্ঞানদাতা চ তং বন্দে গুরুমীশ্বরম্ || ১৯০||

যদ্যপ্যধীতা নিগমাঃ ষডংগা আগমাঃ প্রিযে |
অধ্যাত্মাদীনি শাস্ত্রাণি জ্ঞানং নাস্তি গুরুং বিনা || ১৯১||

শিবপূজারতো বাপি বিষ্ণুপূজারতোঽথবা |
গুরুতত্ত্ববিহীনশ্চেত্তত্সর্বং ব্যর্থমেব হি || ১৯২||

শিবস্বরূপমজ্ঞাত্বা শিবপূজা কৃতা যদি |
সা পূজা নামমাত্রং স্যাচ্চিত্রদীপ ইব প্রিযে || ১৯৩||

সর্বং স্যাত্সফলং কর্ম গুরুদীক্ষাপ্রভাবতঃ |
গুরুলাভাত্সর্বলাভো গুরুহীনস্তু বালিশঃ || ১৯৪||

গুরুহীনঃ পশুঃ কীটঃ পতংগো বক্তুমর্হতি |
শিবরূপং স্বরূপং চ ন জানাতি যতস্স্বযম্ || ১৯৫||

তস্মাত্সর্বপ্রযত্নেন সর্বসংগবিবর্জিতঃ |
বিহায শাস্ত্রজালানি গুরুমেব সমাশ্রযেত্ || ১৯৬||

নিরস্তসর্বসন্দেহো একীকৃত্য সুদর্শনম্ |
রহস্যং যো দর্শযতি ভজামি গুরুমীশ্বরম্ || ১৯৭||

জ্ঞানহীনো গুরুস্ত্যাজ্যো মিথ্যাবাদি বিডম্বকঃ |
স্ববিশ্রান্তিং ন জানাতি পরশান্তিং করোতি কিম্ || ১৯৮||

শিলাযাঃ কিং পরং জ্ঞানং শিলাসংঘপ্রতারণে |
স্বযং তর্তুং ন জানাতি পরং নিস্তারযেত্ কথম্ || ১৯৯||

ন বন্দনীযাস্তে কষ্টং দর্শনাদ্ভ্রান্তিকারকাঃ |
বর্জযেতান্ গুরুন্ দূরে ধীরানেব সমাশ্রযেত্ || ২০০||

পাষণ্ডিনঃ পাপরতাঃ নাস্তিকা ভেদবুদ্ধযঃ |
স্ত্রীলম্পটা দুরাচারাঃ কৃতঘ্না বকবৃত্তযঃ || ২০১||

কর্মভ্রষ্টাঃ ক্ষমানষ্টা নিন্দ্যতর্কেশ্চ বাদিনঃ |
কামিনঃ ক্রোধিনশ্চৈব হিংস্রাশ্চণ্ডাঃ শঠাস্তথা || ২০২||

জ্ঞানলুপ্তা ন কর্তব্যা মহাপাপাস্তথা প্রিযে |
এভ্যো ভিন্নো গুরুঃ সেব্যঃ একভক্ত্যা বিচার্য চ || ২০৩||

শিষ্যাদন্যত্র দেবেশি ন বদেদ্যস্য কস্যচিত্ |
নরাণাং চ ফলপ্রাপ্তৌ ভক্তিরেব হি কারণম্ || ২০৪||

গূঢো দৃঢশ্চ প্রীতশ্চ মৌনেন সুসমাহিতঃ |
সকৃত্কামগতৌ বাপি পঞ্চধা গুরুরীরিতঃ || ২০৫||

সর্বং গুরুমুখাল্লব্ধং সফলং পাপনাশনম্ |
যদ্যদাত্মহিতং বস্তু তত্তদ্দ্রব্যং ন বঞ্চযেত্ || ২০৬||

গুরুদেবার্পণং বস্তু তেন তুষ্টোঽস্মি সুব্রতে |
শ্রীগুরোঃ পাদুকাং মুদ্রাং মূলমন্ত্রং চ গোপযেত্ || ২০৭||

নতাস্মি তে নাথ পদারবিন্দং বুদ্ধীন্দ্রিযাপ্রাণমনোবচোভিঃ |
যচ্চিন্ত্যতে ভাবিত আত্মযুক্তৌ মুমুক্ষিভিঃ কর্মমযোপশান্তযে || ২০৮||

অনেন যদ্ভবেত্কার্যং তদ্বদামি তব প্রিযে |
লোকোপকারকং দেবি লৌকিকং তু বিবর্জযেত্ || ২০৯||

লৌকিকাদ্ধর্মতো যাতি জ্ঞানহীনো ভবার্ণবে |
জ্ঞানভাবে চ যত্সর্বং কর্ম নিষ্কর্ম শাম্যতি || ২১০||

ইমাং তু ভক্তিভাবেন পঠেদ্বৈ শ্রুণুযাদপি |
লিখিত্বা যত্প্রদানেন তত্সর্বং ফলমশ্নুতে || ২১১||

গুরুগীতামিমাং দেবি হৃদি নিত্যং বিভাবয |
মহাব্যাধিগতৈর্দুঃখৈঃ সর্বদা প্রজপেন্মুদা || ২১২||

গুরুগীতাক্ষরৈকৈকং মন্ত্ররাজমিদং প্রিযে |
অন্যে চ বিবিধা মন্ত্রাঃ কলাং নাহর্ন্তি ষোডশীম্ || ২১৩||

অনন্ত ফলমাপ্নোতি গুরুগীতা জপেন তু |
সর্বপাপহরা দেবি সর্বদারিদ্র্যনাশিনী || ২১৪||

অকালমৃত্যুহর্ত্রী চ সর্বসংকটনাশিনী |
যক্ষরাক্ষসভূতাদিচোরব্যাঘ্রবিঘাতিনী || ২১৫||

সর্বোপদ্রবকুষ্ঠাদিদুষ্টদোষনিবারিণী |
যত্ফলং গুরুসান্নিধ্যাত্তত্ফলং পঠনাদ্ভবেত্ || ২১৬||

মহাব্যাধিহরা সর্ববিভূতেঃ সিদ্ধিদা ভবেত্ |
অথবা মোহনে বশ্যে স্বযমেব জপেত্সদা || ২১৭||

কুশদূর্বাসনে দেবি হ্যাসনে শুভ্রকম্বলে |
উপবিশ্য ততো দেবি জপেদেকাগ্রমানসঃ || ২১৮||

শুক্লং সর্বত্র বৈ প্রোক্তং বশ্যে রক্তাসনং প্রিযে |
পদ্মাসনে জপেন্নিত্যং শান্তিবশ্যকরং পরম্ || ২১৯||

বস্ত্রাসনে চ দারিদ্র্যং পাষাণে রোগসম্ভবঃ |
মেদিন্যাং দুঃখমাপ্নোতি কাষ্ঠে ভবতি নিষ্ফলম্ || ২২০||

কৃষ্ণাজিনে জ্ঞানসিদ্ধির্মোক্ষশ্রীব্যার্ঘ্রচর্মণি |
কুশাসনে জ্ঞানসিদ্ধিঃ সর্বসিদ্ধিস্তু কম্বলে || ২২১||

আগ্নেয্যাং কর্ষণং চৈব বাযব্যাং শত্রুনাশনম্ |
নৈঋর্ত্যাং দর্শনং চৈব ঈশান্যাং জ্ঞানমেব চ || ২২২||

উদঙ্মুখঃ শান্তিজপ্যে বশ্যে পূর্বমুখস্তথা |
যাম্যে তু মারণং প্রোক্তং পশ্চিমে চ ধনাগমঃ || ২২৩||

মোহনং সর্বভূতানাং বন্ধমোক্ষকরং পরম্ |
দেবরাজ্ঞাং প্রিযকরং রাজানং বশমানযেত্ || ২২৪||

মুখস্তম্ভকরং চৈব গুণানাং চ বিবর্ধনম্ |
দুষ্কর্মনাশনং চৈব তথা সত্কর্মসিদ্ধিদম্ || ২২৫||

প্রসিদ্ধং সাধযেত্কার্যং নবগ্রহভযাপহম্ |
দুঃস্বপ্ননাশনং চৈব সুস্বপ্নফলদাযকম্ || ২২৬||

মোহশান্তিকরং চৈব বন্ধমোক্ষকরং পরম্ |
স্বরূপজ্ঞাননিলযং গীতাশাস্ত্রমিদং শিবে || ২২৭||

যং যং চিন্তযতে কামং তং তং প্রাপ্নোতি নিশ্চযম্ |
নিত্যং সৌভাগ্যদং পুণ্যং তাপত্রযকুলাপহম্ || ২২৮||

সর্বশান্তিকরং নিত্যং তথা বন্ধ্যা সুপুত্রদম্ |
অবৈধব্যকরং স্ত্রীণাং সৌভাগ্যস্য বিবর্ধনম্ || ২২৯||

আযুরারোগ্যমৈশ্বর্যং পুত্রপৌত্রপ্রবর্ধনম্ |
নিষ্কামজাপী বিধবা পঠেন্মোক্ষমবাপ্নুযাত্ || ২৩০||

অবৈধব্যং সকামা তু লভতে চান্যজন্মনি |
সর্বদুঃখমযং বিঘ্নং নাশযেত্তাপহারকম্ || ২৩১||

সর্বপাপপ্রশমনং ধর্মকামার্থমোক্ষদম্ |
যং যং চিন্তযতে কামং তং তং প্রাপ্নোতি নিশ্চিতম্ || ২৩২||

কাম্যানাং কামধেনুর্বৈ কল্পিতে কল্পপাদপঃ |
চিন্তামণিশ্চিন্তিতস্য সর্বমংগলকারকম্ || ২৩৩||

লিখিত্বা পূজযেদ্যস্তু মোক্ষশ্রিযমবাপ্নুযাত্ |
গুরূভক্তির্বিশেষেণ জাযতে হৃদি সর্বদা || ২৩৪||

জপন্তি শাক্তাঃ সৌরাশ্চ গাণপত্যাশ্চ বৈষ্ণবাঃ |
শৈবাঃ পাশুপতাঃ সর্বে সত্যং সত্যং ন সংশযঃ || ২৩৫||

.. ইতি শ্রীস্কংদপুরাণে উত্তরখংডে উমামহেশ্বর সংবাদে
শ্রী গুরুগীতাযাং দ্বিতীযোঽধ্যাযঃ ..

——————————————————————————–

.. অথ তৃতীযঃ অধ্যাযঃ ..

অথ কাম্যজপস্থানং কথযামি বরাননে |
সাগরান্তে সরিতীরে তীর্থে হরিহরালযে || ২৩৬||

শক্তিদেবালযে গোষ্ঠে সর্বদেবালযে শুভে |
বটস্য ধাত্র্যা মূলে বা মঠে বৃন্দাবনে তথা || ২৩৭||

পবিত্রে নির্মলে দেশে নিত্যানুষ্ঠানতোঽপি বা |
নির্বেদনেন মৌনেন জপমেতত্ সমারভেত্ || ২৩৮||

জাপ্যেন জযমাপ্নোতি জপসিদ্ধিং ফলং তথা |
হীনং কর্ম ত্যজেত্সর্বং গহির্তস্থানমেব চ || ২৩৯||

শ্মশানে বিল্বমূলে বা বটমূলান্তিকে তথা |
সিদ্ধ্যন্তি কানকে মূলে চূতবৃক্ষস্য সন্নিধৌ || ২৪০||

পীতাসনং মোহনে তু হ্যসিতং চাভিচারিকে |
জ্ঞেযং শুক্লং চ শান্ত্যর্থং বশ্যে রক্তং প্রকীর্তিতম্ || ২৪১||

জপং হীনাসনং কুর্বত্ হীনকর্মফলপ্রদম্ |
গুরুগীতাং প্রযাণে বা সংগ্রামে রিপুসংকটে || ২৪২||

জপন্ জযমবাপ্নোতি মরণে মুক্তিদাযিকা |
সর্বকর্মাণি সিদ্ধ্যন্তি গুরুপুত্রে ন সংশযঃ || ২৪৩||

গুরুমন্ত্রো মুখে যস্য তস্য সিদ্ধ্যন্তি নান্যথা |
দীক্ষযা সর্বকর্মাণি সিদ্ধ্যন্তি গুরুপুত্রকে || ২৪৪||

ভবমূলবিনাশায চাষ্টপাশনিবৃত্তযে |
গুরুগীতাম্ভসি স্নানং তত্ত্বজ্ঞঃ কুরুতে সদা || ২৪৫||

স এবং সদ্গুরুঃ সাক্ষাত্ সদসদ্ব্রহ্মবিত্তমঃ |
তস্য স্থানানি সর্বাণি পবিত্রাণি ন সংশযঃ || ২৪৬||

সর্বশুদ্ধঃ পবিত্রোঽসৌ স্বভাবাদ্যত্র তিষ্ঠতি |
তত্র দেবগণাঃ সর্বে ক্ষেত্রপীঠে চরন্তি চ || ২৪৭||

আসনস্থাঃ শযানা বা গচ্ছন্তস্তিষ্ঠন্তোঽপি বা |
অশ্বারূঢা গজারূঢাঃ সুষুপ্তা জাগ্রতোঽপি বা || ২৪৮||

শুচিভূতা জ্ঞানবন্তো গুরুগীতা জপন্তি যে |
তেষাং দর্শনসংস্পর্ষাত্ দিব্যজ্ঞানং প্রজাযতে || ২৪৯||

সমুদ্রে বৈ যথা তোযং ক্ষীরে ক্ষীরং জলে জলম্ |
ভিন্নে কুম্ভে যথাকাশং তথাঽঽত্মা পরমাত্মনি || ২৫০||

তথৈব জ্ঞানবান্ জীবঃ পরমাত্মনি সর্বদা |
ঐক্যেন রমতে জ্ঞানী যত্র কুত্র দিবানিশম্ || ২৫১||

এবংবিধো মহাযুক্তঃ সর্বত্র বর্ততে সদা |
তস্মাত্সর্বপ্রকারেণ গুরুভক্তিং সমাচরেত্ || ২৫২||

গুরুসন্তোষণাদেব মুক্তো ভবতি পার্বতি |
অণিমাদিষু ভোক্তৃত্বং কৃপযা দেবি জাযতে || ২৫৩||

সাম্যেন রমতে জ্ঞানী দিবা বা যদি বা নিশি |
এবংবিধো মহামৌনী ত্রৈলোক্যসমতাং ব্রজেত্ || ২৫৪||

অথ সংসারিণঃ সর্বে গুরুগীতাজপেন তু |
সর্বান্ কামাংস্তু ভুঞ্জন্তি ত্রিসত্যং মম ভাষিতম্ || ২৫৫||

সত্যং সত্যং পুনঃ সত্যং ধর্মসারং মযোদিতম্ |
গুরুগীতাসমং স্তোত্রং নাস্তি তত্ত্বং গুরোঃ পরম্ || ২৫৬||

গুরুর্দেবো গুরুর্ধমোর্ গুরৌ নিষ্ঠা পরং তপঃ |
গুরোঃ পরতরং নাস্তি ত্রিবারং কথযামি তে || ২৫৭||

ধন্যা মাতা পিতা ধন্যো গোত্রং ধন্যং কুলোদ্ভবঃ |
ধন্যা চ বসুধা দেবি যত্র স্যাদ্গুরুভক্ততা || ২৫৮||

আকল্পজন্ম কোটীনাং যজ্ঞব্রততপঃক্রিযাঃ |
তাঃ সর্বাঃ সফলা দেবি গুরূসন্তোষমাত্রতঃ || ২৫৯||

শরীরমিন্দ্রিযং প্রাণশ্চার্থঃ স্বজনবন্ধুতা |
মাতৃকুলং পিতৃকুলং গুরুরেব ন সংশযঃ || ২৬০||

মন্দভাগ্যা হ্যশক্তাশ্চ যে জনা নানুমন্বতে |
গুরুসেবাসু বিমুখাঃ পচ্যন্তে নরকেশুচৌ || ২৬১||

বিদ্যা ধনং বলং চৈব তেষাং ভাগ্যং নিরর্থকম্ |
যেষাং গুরূকৃপা নাস্তি অধো গচ্ছন্তি পার্বতী || ২৬২||

ব্রহ্মা বিষ্ণুশ্চ রুদ্রশ্চ দেবতাঃ পিতৃকিন্নরাঃ |
সিদ্ধচারণযক্ষাশ্চ অন্যে চ মুনযো জনাঃ || ২৬৩||

গুরুভাবঃ পরং তীর্থমন্যর্থং নিরর্থকম্ |
সর্বতীর্থমযং দেবি শ্রীগুরোশ্চরণাম্বুজম্ || ২৬৪||

কন্যাভোগরতা মন্দাঃ স্বকান্তাযাঃ পরাঙ্মুখাঃ |
অতঃ পরং মযা দেবি কথিতন্ন মম প্রিযে || ২৬৫||

ইদং রহস্যমস্পষ্টং বক্তব্যং চ বরাননে |
সুগোপ্যং চ তবাগ্রে তু মমাত্মপ্রীতযে সতি || ২৬৬||

স্বামিমুখ্যগণেশাদ্যান্ বৈষ্ণবাদীংশ্চ পার্বতি |
ন বক্তব্যং মহামাযে পাদস্পর্শং কুরুষ্ব মে || ২৬৭||

অভক্তে বঞ্চকে ধূর্তে পাষণ্ডে নাস্তিকাদিষু |
মনসাঽপি ন বক্তব্যা গুরুগীতা কদাচন || ২৬৮||

গুরবো বহবঃ সন্তি শিষ্যবিত্তাপহারকাঃ |
তমেকং দুর্লভং মন্যে শিষ্যহৃত্তাপহারকম্ || ২৬৯||

চাতুর্যবান্ বিবেকী চ অধ্যাত্মজ্ঞানবান্ শুচিঃ |
মানসং নির্মলং যস্য গুরুত্বং তস্য শোভতে || ২৭০||

গুরবো নির্মলাঃ শান্তাঃ সাধবো মিতভাষিণঃ |
কামক্রোধবিনির্মুক্তাঃ সদাচারাঃ জিতেন্দ্রিযাঃ || ২৭১||

সূচকাদিপ্রভেদেন গুরবো বহুধা স্মৃতাঃ |
স্বযং সম্যক্ পরীক্ষ্যাথ তত্ত্বনিষ্ঠং ভজেত্সুধীঃ || ২৭২||

বর্ণজালমিদং তদ্বদ্বাহ্যশাস্ত্রং তু লৌকিকম্ |
যস্মিন্ দেবি সমভ্যস্তং স গুরুঃ সুচকঃ স্মৃতঃ || ২৭৩||

বর্ণাশ্রমোচিতাং বিদ্যাং ধর্মাধর্মবিধাযিনীম্ |
প্রবক্তারং গুরুং বিদ্ধি বাচকং ত্বিতি পার্বতি || ২৭৪||

পঞ্চাক্ষর্যাদিমন্ত্রাণামুপদেষ্টা তু পার্বতি |
স গুরুর্বোধকো ভূযাদুভযোরযমুত্তমঃ || ২৭৫||

মোহমারণবশ্যাদিতুচ্ছমন্ত্রোপদর্শিনম্ |
নিষিদ্ধগুরুরিত্যাহুঃ পণ্ডিতাস্তত্ত্বদর্শিনঃ || ২৭৬||

অনিত্যমিতি নির্দিশ্য সংসারং সংকটালযম্ |
বৈরাগ্যপথদর্শী যঃ স গুরুর্বিহিতঃ প্রিযে || ২৭৭||

তত্ত্বমস্যাদিবাক্যানামুপদেষ্টা তু পার্বতি |
কারণাখ্যো গুরুঃ প্রোক্তো ভবরোগনিবারকঃ || ২৭৮||

সর্বসন্দেহসন্দোহনির্মূলনবিচক্ষণঃ |
জন্মমৃত্যুভযঘ্নো যঃ স গুরুঃ পরমো মতঃ || ২৭৯||

বহুজন্মকৃতাত্ পুণ্যাল্লভ্যতেঽসৌ মহাগুরুঃ |
লব্ধ্বাঽমুং ন পুনর্যাতি শিষ্যঃ সংসারবন্ধনম্ || ২৮০||

এবং বহুবিধা লোকে গুরবঃ সন্তি পার্বতি |
তেষু সর্বপ্রযত্নেন সেব্যো হি পরমো গুরুঃ || ২৮১||

নিষিদ্ধগুরুশিষ্যস্তু দুষ্টসংকল্পদূষিতঃ |
ব্রহ্মপ্রলযপর্যন্তং ন পুনর্যাতি মর্ত্যতাম্ || ২৮২||

এবং শ্রুত্বা মহাদেবী মহাদেববচস্তথা |
অত্যন্তবিহ্বলমনা শংকরং পরিপৃচ্ছতি || ২৮৩||

পার্বত্যুবাচ |
নমস্তে দেবদেবাত্র শ্রোতব্যং কিংচিদস্তি মে |
শ্রুত্বা ত্বদ্বাক্যমধুনা ভৃশং স্যাদ্বিহ্বলং মনঃ || ২৮৪||

স্বযং মূঢা মৃত্যুভীতাঃ সুকৃতাদ্বিরতিং গতাঃ |
দৈবান্নিষিদ্ধগুরুগা যদি তেষাং তু কা গতিঃ || ২৮৫||

শ্রী মহাদেব উবাচ |
শ্রুণু তত্ত্বমিদং দেবি যদা স্যাদ্বিরতো নরঃ |
তদাঽসাবধিকারীতি প্রোচ্যতে শ্রুতিমস্তকৈঃ || ২৮৬||

অখণ্ডৈকরসং ব্রহ্ম নিত্যমুক্তং নিরামযম্ |
স্বস্মিন্ সন্দর্শিতং যেন স ভবেদস্যং দেশিকঃ || ২৮৭||

জলানাং সাগরো রাজা যথা ভবতি পার্বতি |
গুরূণাং তত্র সর্বেষাং রাজাযং পরমো গুরুঃ || ২৮৮||

মোহাদিরহিতঃ শান্তো নিত্যতৃপ্তো নিরাশ্রযঃ |
তৃণীকৃতব্রহ্মবিষ্ণুবৈভবঃ পরমো গুরুঃ || ২৮৯||

সর্বকালবিদেশেষু স্বতন্ত্রো নিশ্চলস্সুখী |
অখণ্ডৈকরসাস্বাদতৃপ্তো হি পরমো গুরুঃ || ২৯০||

দ্বৈতাদ্বৈতবিনির্মুক্তঃ স্বানুভূতিপ্রকাশবান্ |
অজ্ঞানান্ধতমশ্ছেত্তা সর্বজ্ঞঃ পরমো গুরুঃ || ২৯১||

যস্য দর্শনমাত্রেণ মনসঃ স্যাত্ প্রসন্নতা |
স্বযং ভূযাত্ ধৃতিশ্শান্তিঃ স ভবেত্ পরমো গুরুঃ || ২৯২||

সিদ্ধিজালং সমালোক্য যোগিনাং মন্ত্রবাদিনাম্ |
তুচ্ছাকারমনোবৃত্তির্যস্যাসৌ পরমো গুরুঃ || ২৯৩||

স্বশরীরং শবং পশ্যন্ তথা স্বাত্মানমদ্বযম্ |
যঃ স্ত্রীকনকমোহঘ্নঃ স ভবেত্ পরমো গুরুঃ || ২৯৪||

মৌনী বাগ্মীতি তত্ত্বজ্ঞো দ্বিধাভূচ্ছৃণু পার্বতি |
ন কশ্চিন্মৌনিনা লাভো লোকেঽস্মিন্ভবতি প্রিযে || ২৯৫||

বাগ্মী তূত্কটসংসারসাগরোত্তারণক্ষমঃ |
যতোসৌ সংশযচ্ছেত্তা শাস্ত্রযুক্ত্যনুভূতিভিঃ || ২৯৬||

গুরুনামজপাদ্দেবি বহুজন্মর্জিতান্যপি |
পাপানি বিলযং যান্তি নাস্তি সন্দেহমণ্বপি || ২৯৭||

শ্রীগুরোস্সদৃশং দৈবং শ্রীগুরোসদৃশঃ পিতা |
গুরুধ্যানসমং কর্ম নাস্তি নাস্তি মহীতলে || ২৯৮||

কুলং ধনং বলং শাস্ত্রং বান্ধবাস্সোদরা ইমে |
মরণে নোপযুজ্যন্তে গুরুরেকো হি তারকঃ || ২৯৯||

কুলমেব পবিত্রং স্যাত্ সত্যং স্বগুরুসেবযা |
তৃপ্তাঃ স্যুস্সকলা দেবা ব্রহ্মাদ্যা গুরুতর্পণাত্ || ৩০০||

গুরুরেকো হি জানাতি স্বরূপং দেবমব্যযম্ |
তজ্জ্ঞানং যত্প্রসাদেন নান্যথা শাস্ত্রকোটিভিঃ || ৩০১||

স্বরূপজ্ঞানশূন্যেন কৃতমপ্যকৃতং ভবেত্ |
তপোজপাদিঅক্ং দেবি সকলং বালজল্পবত্ || ৩০২||

শিবং কেচিদ্ধরিং কেচিদ্বিধিং কেচিত্তু কেচন |
শক্তিং দেবমিতি জ্ঞাত্বা বিবদন্তি বৃথা নরাঃ || ৩০৩||

ন জানন্তি পরং তত্ত্বং গুরূদীক্ষাপরাঙ্মুখাঃ |
ভ্রান্তাঃ পশুসমা হ্যেতে স্বপরিজ্ঞানবর্জিতাঃ || ৩০৪||

তস্মাত্কৈবল্যসিদ্ধ্যর্থং গুরূমেব ভজেত্প্রিযে |
গুরূং বিনা ন জানন্তি মূঢাস্তত্পরমং পদম্ || ৩০৫||

ভিদ্যতে হৃদযগ্রন্থিশ্ছিদ্যন্তে সর্বসংশযাঃ |
ক্ষীযন্তে সর্বকর্মাণি গুরোঃ করূণযা শিবে || ৩০৬||

কৃতাযা গুরুভক্তেস্তু বেদশাস্ত্রানুসারতঃ |
মুচ্যতে পাতকাদ্ঘোরাদ্গুরূভক্তো বিশেষতঃ || ৩০৭||

দুঃসংগং চ পরিত্যজ্য পাপকর্ম পরিত্যজেত্ |
চিত্তচিহ্নমিদং যস্য দীক্ষা বিধীযতে || ৩০৮||

চিত্তত্যাগনিযুক্তশ্চ ক্রোধগর্ববিবর্জিতঃ |
দ্বৈতভাবপরিত্যাগী তস্য দীক্ষা বিধীযতে || ৩০৯||

এতল্লক্ষণ সংযুক্তং সর্বভূতহিতে রতম্ |
নির্মলং জীবিতং যস্য তস্য দীক্ষা বিধীযতে || ৩১০||

ক্রিযযা চান্বিতং পূর্বং দীক্ষাজালং নিরূপিতম্ |
মন্ত্রদীক্ষাভির্র্ধ সাংগোপাংগ শিবোদিতম্ || ৩১১||

ক্রিযযা স্যাদ্বিরহিতাং গুরূসাযুজ্যদাযিনীম্ |
গুরুদীক্ষাং বিনা কো বা গুরুত্বাচারপালকঃ || ৩১২||

শক্তো ন চাপি শক্তো বা দৈশিকাংঘ্রিসমাশ্রযাত্ |
তস্য জন্মাস্তি সফলং ভোগমোক্ষফলপ্রদম্ || ৩১৩||

অত্যন্তচিত্তপক্বস্য শ্রদ্ধাভক্তিযুতস্য চ |
প্রবক্তব্যমিদং দেবি মমাত্মপ্রীতযে সদা || ৩১৪||

রহস্যং সর্বশাস্ত্রেষু গীতাশাস্ত্রদং শিবে |
সম্যক্পরীক্ষ্য বক্তব্যং সাধকস্য মদ্যাত্মনঃ || ৩১৫||

সত্কর্মপরিপাকাচ্চ চিত্তশুদ্ধস্য ধীমতঃ |
সাধকস্যৈব বক্তব্যা গুরুগীতা প্রযত্নতঃ || ৩১৬||

নাস্তিকায কৃতঘ্নায দাম্ভিকায শঠায চ |
অভক্তায বিভক্তায ন বাচ্যেযং কদাচন || ৩১৭||

স্ত্রীলোলুপায মূর্খায কামোপহতচেতসে |
নিন্দকায ন বক্তব্যা গুরুগীতা স্বভাবতঃ || ৩১৮||

সর্ব পাপপ্রশমনং সর্বোপদ্রববারকম্ |
জন্মমৃত্যুহরং দেবি গীতাশাস্ত্রমিদং শিবে || ৩১৯||

শ্রুতিসারমিদং দেবি সর্বমুক্তং সমাসতঃ |
নান্যথা সদ্গতিঃ পুংসাং বিনা গুরুপদং শিবে || ৩২০||

বহুজন্মকৃতাত্পাদযমর্থো ন রোচতে |
জন্মবন্ধনিবৃত্যর্থং গুরুমেব ভজেত্সদা || ৩২১||

অহমেব জগত্সর্বমহমেব পরং পদম্ |
এতজ্জ্ঞানং যতো ভূযাত্তং গুরুং প্রণমাম্যহম্ || ৩২২||

অলং বিকল্পৈরহমেব কেবলো মযি স্থিতং বিশ্বমিদং চরাচরম্ |
ইদং রহস্যং মম যেন দর্শিতম্ স বন্দনীযো গুরুরেব কেবলম্ || ৩২৩||

যস্যান্তং নাদিমধ্যং ন হি করচরণং নামগোত্রং ন সূত্রম্ |
নো জাতির্নৈব বর্ণো ন ভবতি পুরুষো নো নপুংসং ন চ স্ত্রী || ৩২৪||

নাকারং নো বিকারং ন হি জনিমরণং নাস্তি পুণ্যং ন পাপম্ |
নোঽতত্ত্বং তত্ত্বমেকং সহজসমরসং সদ্গুরুং তং নমামি || ৩২৫||

নিত্যায সত্যায চিদাত্মকায নব্যায ভব্যায পরাত্পরায |
শুদ্ধায বুদ্ধায নিরঞ্জনায নমোঽস্য নিত্যং গুরুশেখরায || ৩২৬||

সচ্চিদানন্দরূপায ব্যাপিনে পরমাত্মনে |
নমঃ শ্রীগুরুনাথায প্রকাশানন্দমূর্তযে || ৩২৭||

সত্যানন্দস্বরূপায বোধৈকসুখকারিণে |
নমো বেদান্তবেদ্যায গুরবে বুদ্ধিসাক্ষিণে || ৩২৮||

নমস্তে নাথ ভগবন্ শিবায গুরুরূপিণে |
বিদ্যাবতারসংসিদ্ধ্যৈ স্বীকৃতানেকবিগ্রহ || ৩২৯||

নবায নবরূপায পরমার্থৈকরূপিণে |
সর্বাজ্ঞানতমোভেদভানবে চিদ্ঘনায তে || ৩৩০||

স্বতন্ত্রায দযাক্লৃপ্তবিগ্রহায শিবাত্মনে |
পরতন্ত্রায ভক্তানাং ভব্যানাং ভব্যরূপিণে || ৩৩১||

বিবেকিনাং বিবেকায বিমর্শায বিমর্শিনাম্ |
প্রকাশিনাং প্রকাশায জ্ঞানিনাং জ্ঞানরূপিণে || ৩৩২||

পুরস্তত্পার্শ্বযোঃ পৃষ্ঠে নমস্কুর্যাদুপর্যধঃ |
সদা মচ্চিত্তরূপেণ বিধেহি ভবদাসনম্ || ৩৩৩||

শ্রীগুরুং পরমানন্দং বন্দে হ্যানন্দবিগ্রহম্ |
যস্য সন্নিধিমাত্রেণ চিদানন্দায তে মনঃ || ৩৩৪||

নমোঽস্তু গুরবে তুভ্যং সহজানন্দরূপিণে |
যস্য বাগমৃতং হন্তি বিষং সংসারসংজ্ঞকম্ || ৩৩৫||

নানাযুক্তোপদেশেন তারিতা শিষ্যমন্ততিঃ |
তত্কৃতাসারবেদেন গুরুচিত্পদমচ্যুতম্ || ৩৩৬||

অচ্যুতায মনস্তুভ্যং গুরবে পরমাত্মনে |
সর্বতন্ত্রস্বতন্ত্রায চিদ্ঘনানন্দমূর্তযে || ৩৩৭||

নমোচ্যুতায গুরবে বিদ্যাবিদ্যাস্বরূপিণে |
শিষ্যসন্মার্গপটবে কৃপাপীযূষসিন্ধবে || ৩৩৮||

ওমচ্যুতায গুরবে শিষ্যসংসারসেতবে |
ভক্তকার্যৈকসিংহায নমস্তে চিত্সুখাত্মনে || ৩৩৯||

গুরুনামসমং দৈবং ন পিতা ন চ বান্ধবাঃ |
গুরুনামসমঃ স্বামী নেদৃশং পরমং পদম্ || ৩৪০||

একাক্ষরপ্রদাতারং যো গুরুং নৈব মন্যতে |
শ্বানযোনিশতং গত্বা চাণ্ডালেষ্বপি জাযতে || ৩৪১||

গুরুত্যাগাদ্ভবেন্মৃত্যুর্মন্ত্রত্যাগাদ্দরিদ্রতা |
গুরুমন্ত্রপরিত্যাগী রৌরবং নরকং ব্রজেত্ || ৩৪২||

শিবক্রোধাদ্গুরুস্ত্রাতা গুরুক্রোধাচ্ছিবো ন হি |
তস্মাত্সর্বপ্রযত্নেন গুরোরাজ্ঞা ন লংঘযেত্ || ৩৪৩||

সংসারসাগরসমুদ্ধরণৈকমন্ত্রম্ ব্রহ্মাদিদেবমুনিপূজিতসিদ্ধমন্ত্রম্ |
দারিদ্র্যদুঃখভবরোগবিনাশমন্ত্রম্ বন্দে মহাভযহরং গুরুরাজমন্ত্রম্ || ৩৪৪||

সপ্তকোটীমহামন্ত্রাশ্চিত্তবিভ্রংশকারকাঃ |
এক এব মহামন্ত্রো গুরুরিত্যক্ষরদ্বযম্ || ৩৪৫||

এবমুক্ত্বা মহাদেবঃ পার্বতীং পুনরব্রবীত্ |
ইদমেব পরং তত্ত্বং শ্রুণু দেবি সুখাবহম্ || ৩৪৬||

গুরুতত্ত্বমিদং দেবি সর্বমুক্তং সমাসতঃ |
রহস্যমিদমব্যক্তন্ন বদেদ্যস্য কস্যচিত্ || ৩৪৭||

ন মৃষা স্যাদিযং দেবি মদুক্তিঃ সত্যরূপিণী |
গুরুগীতাসমং স্তোত্রং নাস্তি নাস্তি মহীতলে || ৩৪৮||

গুরুগীতামিমাং দেবি ভবদুঃখবিনাশিনীম্ |
গুরুদীক্ষাবিহীনস্য পুরতো ন পঠেত্ ক্বচিত্ || ৩৪৯||

রহস্যমত্যন্তরহস্যমেতন্ন পাপিনা লভ্যমিদং মহেশ্বরি |
অনেকজন্মার্জিতপুণ্যপাকাদ্গুরোস্তু তত্ত্বং লভতে মনুষ্যঃ || ৩৫০||

যস্য প্রসাদাদহমেব সর্বম্ ময্যেব সর্বং পরিকল্পিতং চ |
ইত্থং বিজানামি সদাত্মরূপম্ গ্তস্যাংঘ্রিপদ্মং প্রণতোঽস্মি নিত্যম্ || ৩৫১||

অজ্ঞানতিমিরান্ধস্য বিষযাক্রান্তচেতসঃ |
জ্ঞানপ্রভাপ্রদানেন প্রসাদং কুরু মে প্রভো || ৩৫২||

.. ইতি শ্রীগুরুগীতাযাং তৃতীযোঽধ্যাযঃ ..
.. ইতি শ্রীস্কংদপুরাণে উত্তরখংডে ঈশ্বরপার্বতী সংবাদে গুরুগীতা সমাপ্ত ..
.. শ্রীগুরুদত্তাত্রেযার্পণমস্তু ..