অশ্বত্থ স্তোত্রম্

.. অশ্বত্থ স্তোত্রম্ ..

শ্রী নারদ উবাচ
অনাযাসেন লোকোঽযম্ সর্বান্ কামানবাপ্নুযাত্ |
সর্বদেবাত্মকং চৈকং তন্মে ব্রূহি পিতামহ ||
ব্রহ্মোবাচ
শ্রুণু দেব মুনেঽশ্বত্থং শুদ্ধং সর্বাত্মকং তরুম্ |
যত্প্রদক্ষিণতো লোকঃ সর্বান্ কামান্ সমশ্নুতে ||
অশ্বত্থাদ্দক্ষিণে রুদ্রঃ পশ্চিমে বিষ্ণুরাস্থিতঃ |
ব্রহ্মা চোত্তরদেশস্থঃ পূর্বেত্বিন্দ্রাদিদেবতাঃ ||
স্কন্ধোপস্কন্ধপত্রেষু গোবিপ্রমুনযস্তথা |
মূলং বেদাঃ পযো যজ্ঞাঃ সংস্থিতা মুনিপুঙ্গব ||
পূর্বাদিদিক্ষু সংযাতা নদীনদসরোঽব্ধযঃ |
তস্মাত্ সর্বপ্রযত্নেন হ্যশ্বত্থং সংশ্রযেদ্বুধঃ ||
ত্বং ক্ষীর্যফলকশ্চৈব শীতলস্য বনস্পতে |
ত্বামারাধ্য নরো বিন্দ্যাদৈহিকামুষ্মিকং ফলম্ ||
চলদ্দলায বৃক্ষায সর্বদাশ্রিতবিষ্ণবে |
বোধিসত্বায দেবায হ্যশ্বত্থায নমো নমঃ ||
অশ্বত্থ যস্মাত্ ত্বযি বৃক্ষরাজ নারাযণস্তিষ্ঠতি সর্বকালে |
অথঃ শ্রুতস্ত্বং সততং তরূণাং ধন্যোঽসি চারিষ্টবিনাশকোঽসি ||
ক্ষীরদস্ত্বং চ যেনেহ যেন শ্রীস্ত্বাং নিষেবতে |
সত্যেন তেন বৃক্ষেন্দ্র মামপি শ্রীর্নিষেবতাম্ ||
একাদশাত্মরুদ্রোঽসি বসুনাথশিরোমণিঃ |
নারাযণোঽসি দেবানাং বৃক্ষরাজোঽসি পিপ্পল ||
অগ্নিগর্ভঃ শমীগর্ভো দেবগর্ভঃ প্রজাপতিঃ |
হিরণ্যগর্ভো ভূগর্ভো যজ্ঞগর্ভো নমোঽস্তু তে ||
আযুর্বলং যশো বর্চঃ প্রজাঃ পশুবসূনি চ |
ব্রহ্ম প্রজ্ঞাং চ মেধাং চ ত্বং নো দেহি বনস্পতে ||
সততং বরুণো রক্ষেত্ ত্বামারাদ্দৃষ্টিরাশ্রযেত্ |
পরিতস্ত্বাং নিষেবন্তাং তৃণানি সুখমস্তু তে ||
অক্ষিস্পন্দং ভুজস্পন্দং দুঃস্বপ্নং দুর্বিচিন্তনম্ |
শত্রূণাং চ সমুত্থানং হ্যশ্বত্থ শময প্রভো ||
অশ্বত্থায বরেণ্যায সর্বৈশ্বর্য প্রদাযিনে |
নমো দুঃস্বপ্ননাশায সুস্বপ্নফলদাযিনে ||
মূলতো ব্রহ্মরূপায মধ্যতো বিষ্ণু রূপিণে |
অগ্রতঃ শিবরূপায বৃক্ষরাজায তে নমঃ ||
যং দৃষ্ট্বা মুচ্যতে রোগৈঃ স্পৃষ্ট্বা পাপৈঃ প্রমুচ্যতে |
যদাশ্রযাচ্চিরঞ্জীবী তমশ্বত্থং নমাম্যহম্ ||
অশ্বত্থ সুমহাভাগ সুভগ প্রিযদর্শন |
ইষ্টকামাংশ্চ মে দেহি শত্রুভ্যস্তু পরাভবম্ ||
আযুঃ প্রজাং ধনং ধান্যং সৌভাগ্যং সর্বসম্পদম্ |
দেহি দেব মহাবৃক্ষ ত্বামহং শরণং গতঃ ||
ঋগ্যজুঃসামমন্ত্রাত্মা সর্বরূপী পরাত্পরঃ |
অশ্বত্থো বেদমূলোঽসাবৃষিভিঃ প্রোচ্যতে সদা ||
ব্রহ্মহা গুরুহা চৈব দরিদ্রো ব্যাধিপীডিতঃ |
আবৃত্য লক্ষসংখ্যং তত্ স্তোত্রমেতত্ সুখী ভবেত্ ||
ব্রহ্মচারী হবিষ্যাশী ত্বদঃশাযী জিতেন্দ্রিযঃ |
পপোপহতচিত্তোঽপি ব্রতমেতত্ সমাচরেত্ ||
একাহস্তং দ্বিহস্তং বা কুর্যাদ্গোমযলেপনম্ |
অর্চেত্ পুরুষসূক্তেন প্রণবেন বিশেষতঃ ||
মৌনী প্রদক্ষিণং কুর্যাত্ প্রাগুক্তফলভাগ্ভবেত্ |
বিষ্ণোর্নামসহস্রেণ হ্যচ্যুতস্যাপি কীর্তনাত্ ||
পদে পদান্তরং গত্বা করচেষ্টাবিবর্জিতঃ |
বাচা স্তোত্রং মনো ধ্যানে চতুরঙ্গং প্রদক্ষিণম্ ||
অশ্বত্থঃ স্থাপিতো যেন তত্কুলং স্থাপিতং ততঃ |
ধনাযুষাং সমৃদ্ধিস্তু নরকাত্ তারযেত্ পিতৃন্ ||
অশ্বত্থমূলমাশ্রিত্য শাকান্নোদকদানতঃ |
একস্মিন্ ভোজিতে বিপ্রে কোটিব্রাহ্মণভোজনম্ ||
অশ্বত্থমূলমাশ্রিত্য জপহোমসুরার্চনাত্ |
অক্ষযং ফলমাপ্নোতি ব্রহ্মণো বচনং যথা ||
এবমাশ্বাসিতোঽশ্বত্থঃ সদাশ্বাসায কল্পতে |
যজ্ঞার্থং ছেদিতেঽশ্বত্থে হ্যক্ষযং স্বর্গমাপ্নুযাত্ ||
ছিন্নো যেন বৃথাঽশ্বত্থশ্ছেদিতা পিতৃদেবতাঃ |
অশ্বত্থঃ পূজিতো যত্র পূজিতাঃ সর্বদেবতাঃ ||
|| ইতি অশ্বত্থ স্তোত্রং সম্পূর্ণম্ ||