হস্তামলক স্তোত্র

||হস্তামলক স্তোত্রম ||

কস্ত্বং শিশো কস্য কুতোঽসি গন্তা
কিং নাম তে ত্বং কুত আগতোঽসি |
এতন্মযোক্তং বদ চার্ভক ত্বং
মত্প্রীতযে প্রীতি বিবর্ধনোঽসি ||১||
হস্তামলক উবাচ |
নাহং মনুষ্যো ন চ দেব- যক্ষৌ
ন ব্রাহ্মণ- ক্ষত্রিয- বৈশ্য- শূদ্রাঃ |
ন ব্রহ্মচারী ন গৃহী বনস্থো
ভিক্ষুর্ন চাহং নিজবোধ রূপঃ ||২||
নিমিত্তং মনশ্চক্ষুরাদি প্রবৃত্তৌ
নিরস্তাখিলোপাধিরাকাশকল্পঃ |
রবির্লোকচেষ্টানিমিত্তং যথা যঃ
স নিত্যোপলব্ধিস্বরূপোঽহমাত্মা ||৩||
যমগ্ন্যুষ্ণবন্নিত্যবোধ স্বরূপং
মনশ্চক্ষুরাদীন্যবোধাত্মকানি |
প্রবর্তন্ত আশ্রিত্য নিষ্কম্পমেকং
স নিত্যোপলব্ধিস্বরূপোঽহমাত্মা ||৪||
মুখাভাসকো দর্পণে দৃশ্যমানো
মুখত্বাত্ পৃথক্ত্বেন নৈবাস্তি বস্তু |
চিদাভাসকো ধীষু জীবোঽপি তদ্বত্
স নিত্যোপলব্ধিস্বরূপোঽহমাত্মা ||৫||
যথা দর্পণাভাব আভাসহানৌ
মুখং বিদ্যতে কল্পনাহীনমেকম্ |
তথা ধী বিযোগে নিরাভাসকো যঃ
স নিত্যোপলব্ধিস্বরূপোঽহমাত্মা ||৬||
মনশ্চক্ষুরাদের্বিযুক্তঃ স্বযং যো
মনশ্চক্ষুরাদের্মনশ্চক্ষুরাদিঃ |
মনশ্চক্ষুরাদেরগম্যস্বরূপঃ
স নিত্যোপলব্ধিস্বরূপোঽহমাত্মা ||৭||
য একো বিভাতি স্বতঃ শুদ্ধচেতাঃ
প্রকাশস্বরূপোঽপি নানেব ধীষু
শরাবোদকস্থো যথা ভানুরেকঃ
স নিত্যোপলব্ধিস্বরূপোঽহমাত্মা ||৮||
যথাঽনেকচক্ষুঃ- প্রকাশো রবির্ন
ক্রমেণ প্রকাশীকরোতি প্রকাশ্যম্ |
অনেকা ধিযো যস্তথৈকঃ প্রবোধঃ
স নিত্যোপলব্ধিস্বরূপোঽহমাত্মা ||৯||
বিবস্বত প্রভাতং যথা রূপমক্ষং
প্রগৃহ্ণাতি নাভাতমেবং বিবস্বান্ |
যদাভাত আভাসযত্যক্ষমেকঃ
স নিত্যোপলব্ধিস্বরূপোঽহমাত্মা||১০||
যথা সূর্য একোঽপ্স্বনেকশ্চলাসু
স্থিরাস্বপ্যনন্যদ্বিভাব্যস্বরূপঃ
চলাসু প্রভিন্নঃ সুধীষ্বেক এব
স নিত্যোপলব্ধিস্বরূপোঽহমাত্মা ||১১||
ঘনচ্ছন্নদৃষ্টির্ঘনচ্ছন্নমর্কম্
যথা নিষ্প্রভং মন্যতে চাতিমূঢঃ |
তথা বদ্ধবদ্ভাতি যো মূঢ- দৃষ্টেঃ
স নিত্যোপলব্ধিস্বরূপোঽহমাত্মা ||১২||
সমস্তেষু বস্তুষ্বনুস্যূতমেকং
সমস্তানি বস্তূনি যন্ন স্পৃশন্তি |
বিযদ্বত্সদা শুদ্ধমচ্ছস্বরূপং
স নিত্যোপলব্ধিস্বরূপোঽহমাত্মা ||১৩||
উপাধৌ যথা ভেদতা সন্মণীনাং
তথা ভেদতা বুদ্ধিভেদেষু তেঽপি |
যথা চন্দ্রিকাণাং জলে চঞ্চলত্বং
তথা চঞ্চলত্বং তবাপীহ বিষ্ণো ||১৪||
||ইতি শ্রীমদ্ শঙ্করাচার্যকৃত
হস্তামলকসংবাদস্তোত্রং সংপূর্ণম্ ||