যোগরহস্য

.. দত্তাত্রেয বিরচিঅত যোগরহস্য ..

যোগাধ্যাযঃ

জ্ঞানপূর্বো বিযোগো যোঃ জ্ঞানেন সহ যোগিনঃ |
সা মুক্তির্ব্রহ্মণা চ ঐক্যমনৈক্যং প্রাকৃতৈর্গুণৈঃ || ১. ১||
মুক্তির্যোগাত্তথা যোগঃ সম্যগ্জ্ঞানান্মহীপতে |
জ্ঞানং দুঃখোদ্ভবং দুঃখং মমতাসক্তচেতসাম্ || ১. ২||
তস্মাত্সঙ্গং প্রযত্নেন মুমুক্ষুঃ সন্ত্যজেন্নরঃ |
সঙ্গাভাবে মমেত্যস্যাঃ খ্যাতের্হাবিঃ প্রজাযতে || ১. ৩||
নির্মমত্বং সুখাযৈব বৈরাগ্যাদ্দোষদর্শনম্ |
জ্ঞানাদেব চ বৈরাগ্যং জ্ঞানং বৈরাগ্যপূর্বকম্ || ১. ৪||
তদ্গৃহং যত্র বসতিস্তদ্ভোজ্যং যেন জীবতি |
যন্মুক্তযে তদেবোক্তং জ্ঞানমজ্ঞানমন্যথা || ১. ৫||
উপভোগেন পুণ্যানামপুণ্যানাঞ্চ পার্থিব |
কর্ত্তব্যানাঞ্চ নিত্যানামকামকরণাত্তথা || ১. ৬||
অসঞ্চযাদপূর্বস্য ক্ষযাত্পূর্বার্জ্জিতস্য চ |
কর্মণো বন্ধমাপ্নোতি শরীরং ন পুনঃ পুনঃ || ১. ৭||
এতত্তে কথিতং রাজন্যোগং চেমং নিবোধ মে |
যং প্রাপ্য ব্রহ্মণো যোগী শাশ্বতান্নান্যতাং ব্রজেত্ || ১. ৮||
প্রাগেবাত্মাত্মনা জেযো যোগিনাং স হি দুর্জযঃ |
কুর্বীত তজ্জযে যত্নং তস্যোপাযং শৃণুস্ব মে || ১. ৯||
প্রাণাযামৈর্দহেদ্দোষান্ধারণাভিঃ চ কিল্বিষম্ |
প্রত্যাহারেণ বিষযান্ধ্যানেনানীশ্বরাঙ্গুণান্ || ১. ১০||
যথা পর্বতধাতূনাং দোষাঃ দহ্যন্তি ধাম্যতাম্ |
তথেন্দ্রিযকৃতা দোষাঃ দহ্যন্তে প্রাণনিগ্রহাত্ || ১. ১১||
প্রথমং সাধনং কুর্যাত্প্রাণাযামস্য যোগবিত্ |
প্রাণাপাননিরোধস্তু প্রাণাযাম উদাহৃতঃ || ১. ১২||
লঘুমধ্যোত্তরীযাখ্যঃ প্রাণাযামস্ত্রিধোদিতঃ |
তস্য প্রমাণং বক্ষ্যামি তদলর্ক শৃনুষ্ব মে || ১. ১৩||
লঘুঃ দ্বাদশমাত্রস্তু দ্বিগুণঃ স তু মধ্যমঃ |
ত্রিগুণাভিস্তু মাত্রাভিঃ উত্তমঃ পরিকীর্তিতঃ || ১. ১৪||
নিমেষোন্মেষণো মাত্রাকালো লঘ্বক্ষরস্তথা |
প্রাণাযামস্য সংখ্যার্থং স্মৃতো দ্বাদশমাত্রিকঃ || ১. ১৫||
প্রথমেন জযেত্স্বেদম্মধ্যমেন চ বেপথুম্ |
বিষাদং হি তৃতীযেন জযেদ্দোষাননুক্রমাত্ || ১. ১৬||
মৃদুত্বং সেব্যমানস্তু সিংহশার্দূলকুঞ্জরাঃ |
যথা যান্তি তথা প্রাণো বশ্যো ভবতি যোগিনঃ || ১. ১৭||
বশ্যং নত্তং যথেচ্ছাতো নাগং নযতি হস্তিপঃ |
তথৈব যোগী স্বচ্ছন্দঃ প্রাণং নযতি সাধিতম্ || ১. ১৮||
যথা হি সাধিতঃ সিংহো মৃগান্ হস্তি ন মানবান্ |
তদ্বন্নিষিদ্ধপবনঃ কিল্বিষং ন নৃণাঃ তনুম্ || ১. ১৯||
তস্মাদ্যুক্তঃ সদা যোগী প্রাণাযামপরো ভবেত্ |
শ্রূযতাং মুক্তিফলদ তস্যাবস্থাচতুষ্টযম্ || ১. ২০||
ধবস্তিঃ প্রাপ্তিঃ তথা সংবিত্প্রসাদশ্চ মহীপতে |
স্বরুপং শৃণু চৈতেষাং কথ্যমানমনুক্রমাত্ || ১. ২১||
কর্মণামিষ্টদুষ্টানাং জাযতে ফলসংক্ষযঃ |
চেতসো অপকষাযত্ব যত্র সা ধবস্তিরচ্যতে || ১. ২২||
ঐহিকামুষ্মিকান্ কামান্ লোভমোহাত্মকান্ স্বযম্ |
নিরুধ্যাস্তে যদা যোগী প্রাপ্তিঃ সা সার্বকালিকী || ১. ২৩||
অতীতানাগতানর্থান্বিপ্রকৃষ্টতিরোহিতান্ |
বিজানাতীন্দুসূর্যর্ক্ষগ্রহাণাং জ্ঞানসংপদা || ১. ২৪||
তুল্যপ্রভাবস্তু সদা যোগী প্রাপ্নোতি সংপদম্ |
তদা সংবিদিতি খ্যাতা প্রাণাযামস্য সংস্থিতিঃ || ১. ২৫||
যান্তি প্রসাদং যেনাস্য মনঃ পঞ্চ চ বাযবঃ |
ইন্দ্রিযানীন্দ্রিযার্থাশ্চ স প্রসাদ্ ইতি স্মৃতঃ || ১. ২৬||
শৃণূস্ব চ মহীপাল প্রাণাযামস্য লক্ষণম্ |
যুঞ্জতশ্চ সদা যোগং যাদৃগ্বিহিতমাসনম্ || ১. ২৭||
পদ্মর্দ্ধাসনং চাপি তথা স্বস্তিকমাসনম্ |
আস্থায যোগং যুঞ্জীত কৃত্বা চ প্রণবং হৃদি || ১. ২৮||
সমঃ সমাসনো ভূত্বা সংহৃত্য চরণাবূভৌ |
সংবৃতাস্যঃ তথৈবোরু সম্যগ্বিষ্টভ্য চাগ্রতঃ || ১. ২৯||
পাষ্ণিভ্যাং লিঙ্গবৃষণাবস্পৃশন্প্রযতঃ স্থিতঃ |
কিঞ্চিদুনমিতশিরা দন্তৈঃ দন্তান্ন সংস্পৃশেত্ || ১. ৩০||
সংপশ্যন্নাসিকাগ্রং স্বং দিশশ্চানবলোকযন্ |
রজসা তমসৌ বৃত্তিং সত্ত্বেন রজসস্তথা |
স আদ্য নির্মলে তত্ত্বে স্থিতো যুঞ্জীত যোগবিত্ || ১. ৩১||
ইন্দ্রিযাণীন্দ্রিযার্থেভ্যঃ প্রাণাদীন্মন এব চ |
নিগৃহ্য সমবাযেন প্রত্যাহারমুপক্রমেত্ || ১. ৩২||
যস্তু প্রত্যাহরেত্কামান্সর্বাঙ্গানীব কচ্ছপঃ |
সদাত্মরতিরেকস্থঃ পশ্যত্যাত্মানমাত্মনি || ১. ৩৩||
স বাহ্যাভ্যন্তরং শৌচং নিপাদ্যাকণ্ঠনাভিতঃ |
পূরযিত্বা বুধো দেহং প্রত্যাহারমুপক্রমেত্ || ১. ৩৪||
তথা বৈ যোগযুক্তস্য যোগিনো নিযতাত্মনঃ |
সর্বে দোষাঃ প্রণশ্যন্তি স্বস্থশ্চৈবোপজাযতে || ১. ৩৫||
বীক্ষতে চ পরং ব্রহ্ম প্রাকৃতাংশ্চ গুণান্পৃথক্ |
ব্যোমাদিপরমাণুঞ্চ তথাত্মানমকল্মষম্ || ১. ৩৬||
ইত্থং যোগী যতাহারঃ প্রাণাযামপরাযণঃ |
জিতাং জিতাং শনৈর্ভূমিমারোহেত যথা গৃহম্ || ১. ৩৭||
দোষান্ব্যাধীংস্তথা মোহমাক্রান্তা ভূরনির্জিতা |
বিবর্ধযতি নারোহেত্তস্মাদ্ভূমিমনির্জিতাম্ || ১. ৩৮||
প্রাণানামুপসংরোধাত্প্রাণাযাম ইতি স্মৃতঃ |
ধারণেত্যুব্যতে চেযং ধার্য্যতে যন্মনো যযা || ১. ৩৯||
শব্দাদিভ্যঃ প্রবৃত্তানি যদক্ষাণি যতাত্মভিঃ |
প্রত্যাহ্রিযন্তে যোগেন প্রত্যাহারস্ততঃ স্মৃতঃ || ১. ৪০||
উপাযশ্চাত্র কথিতো যোগিভিঃ পরমর্ষিভিঃ |
যেন ব্যাধ্যাদযো দোষা ন জাযন্তে হি যোগিনঃ || ১. ৪১||
যথা তোযার্থিনস্তোযং যন্ত্রনালাদিভিঃ শনৈঃ |
আপিবেযূস্তথা বাযুং পিবেদ্যোগী জিতশ্রমঃ || ১. ৪২||
প্রাণ্নাভ্যাং হৃদযে চাত্র তৃতীযে চ তথোরসি |
কণ্ঠে মুখে নাসিকাগ্রে নেত্রভ্রুমধ্যমূর্দ্ধসু || ১. ৪৩||
কিঞ্চ তস্মাত্পরস্মিংশ্চ ধারণা পরমা স্মৃতা |
দশৈতা ধারণাঃ প্রাপ্য প্রাপ্নোত্যক্ষরসাম্যতাম্ || ১. ৪৪||
তস্য নো জাযতে মৃত্যুর্ন জরান চ বৈ ক্লমঃ |
ন শ্রান্তিরবসাদোত্থ তুরীযে সততং স্থিতিঃ || ১. ৪৫||
ইযং বৈ যোগভূমিঃ স্যাত্ সপ্তৈব পরিকীর্ত্তিতঃ |
যত্র স্থিতে ব্রহ্মস্থিতিং লভতে নাত্র সংশযঃ || ১. ৪৬||
নাধ্মাতঃ ক্ষূধিতঃ শ্রান্তো ন চ ব্যাকুলচেতনঃ |
যুঞ্জীত যোগং রাজেন্দ্র!যোগী সিদ্ধ্যর্থমাদৃতঃ || ১. ৪৭||
নাতিশীতে ন চোণ্ষে বৈ ন দ্বন্দ্বেনানিলাত্মকে |
কালেস্বেতেষু যুঞ্জীত ন যোগং ধ্যানতত্পরঃ || ১. ৪৮||
সশব্দাগ্নিজলাভ্যাসে জীর্ণগোষ্ঠে চতুষ্পথে |
শুষ্কপর্ণচযে নদ্যাং শ্মশানে সসরীসৃপে || ১. ৪৯||
সভযে কূপতীরে বা চৈত্যবল্মীকসংচযে |
দেষেষ্বেতেষু তত্ত্বজ্ঞো যোগাব্যাসং বিবর্জযেত্ || ১. ৫০||
সত্ত্বস্যানুপপত্তৌ চ দেশকালং বিবর্জযেত্ |
নাসতো দর্শনং যোগে তস্মাত্তত্পরিবর্জযেত্ || ১. ৫১||
দৃল্হতা চিত্তশুদ্ধিশ্চ জযতে নাত্র সংশযঃ |
স্থানকালপ্রভাবেণ নিশ্চযং বিদ্ধি ভূমিপ |
তন্মযস্য কুতশ্চিন্তা দেশকালমযী তথা || ১. ৫২||
দেশানিতাননাদৃত্য মূল্হত্বাদ্যো যুনক্তি বৈ |
বিঘ্নায তস্য বৈ দোষা জাযন্তে তন্নিবোধ মে || ১. ৫৩||
ভাধির্যং জলতা লোপঃ স্মৃতের্মূকত্ত্বমান্ধতা |
জ্বরশ্চ জাযতে সদ্যস্তত্তদজ্ঞানযোগিনঃ || ১. ৫৪||
প্রমাদাদ্যোগিনো দোষা যদ্যেতে স্যুশ্চিকিত্সিতম্ |
তেষাং নাশায কর্ত্তব্যং যোগিনাং তন্নিবোধ মে || ১. ৫৫||
স্নিগ্ধাং যবাগূমত্যুষ্ণাং ভুক্ত্বা তত্রৈব ধারযেত্ |
বাতগুল্মপ্রশান্ত্যর্থমুদাবর্ত্তে তথোদরে || ১. ৫৬||
যবাগূং বাপি পবনং বাযুগ্রন্থিং প্রতিক্ষিপেত্ |
তদ্বত্ কল্পে মহাশৈলং স্থিরং মনস্ ধারযেত্ || ১. ৫৭||
বিঘাতে বচনো বাচং বাধির্য্যং শ্রবণেন্দ্রিযম্ |
যথৈবাম্রফলং ধ্যাযেত্তৃষ্ণার্ত্তো রসনেন্দ্রিযে || ১. ৫৮||
যস্মিন্ যস্মিন্ রুজা দেহে তস্মিংস্তদুপকারিণীম্ |
ধারযেদ্ধারণামুষ্ণে শীতাং শীতে চ দাহিনীম্ || ১. ৫৯||
কীলং শিরসি সংস্থাপ্য কাষ্থং কাষ্ঠেন তাডযেত্ |
লুপ্তস্মৃতেঃ স্মৃতিঃ সদ্যো যোগিনস্তেন জাযতে || ১. ৬০||
দ্যাবাপৃথিব্যৌ বায্বগ্নী ব্যাপিনাবপি ধারযেত্ |
অমানুষাত্সস্ত্বজাদ্বা বাধাস্ত্বেতাশ্চিকিত্সিতাঃ || ১. ৬১||
অমানুযং সত্ত্বমন্তর্যোগিনং প্রবিশেদ্যদি |
বায্বগ্নিধারণেনৈনং দেহসংস্থং বিনির্দ্দহেত || ১. ৬২||
এবং সর্বাত্মনা রক্ষা কার্য্যা যোগবিদা নৃপ!|
ধর্মার্থকামমোক্ষাণাং শরীরং সাধনং যতঃ || ১. ৬৩||
প্রবৃত্তিলক্ষণাখ্যানাদেযাগিনো বিস্মযাত্ তথা |
বিজ্ঞানং বিলযং যাতি তস্মাদ্গোপ্যাঃ প্রবৃত্তযঃ || ১. ৬৪||
অলোল্যমারোগ্যমনিষ্ঠুরত্বং গন্ধঃ শুভো মূত্রপুরীষমল্পম্ |
কান্তিঃ প্রসাদঃ স্বাসৌম্যতা চ যোগপ্রবৃত্তেঃ প্রথমং হি চিহুম্ || ১. ৬৫||
অনুরাগী জনো যাতি পরোক্ষে গুণকীর্ত্তনম্ |
ন বিভ্যতি চ সত্ত্বানি সিদ্ধের্লক্ষণমুত্তমম্ || ১. ৬৬||
শীতোষ্ণাদিভিরত্যুগ্রৈর্যস্য বাধা ন বিদ্যতে |
ন ভীতিমেতি চান্যভ্যস্তস্য সিদ্ধিরুপস্থিতা || ১. ৬৭||
ইতি যোগাধ্যাযঃ ||
যোগসিদ্ধিঃ
উপসর্গাঃ প্রবর্ত্তন্তে দৃষ্টে হ্যাত্মনি যোগিনঃ |
যে তাংস্তে সংপ্রবক্ষ্যামি সমাসেন নিবোধ মে || ২. ১||
কাম্যাঃ ক্রিযাস্তথা কামান্ মানুষানভিবাজ্ঞতি |
স্ত্রিযো দানফলং বিদ্যাং মাযাং কুপ্যং ধনং দিবম্ || ২. ২||
দেবত্বমমরেশত্বং রসাযনচযঃ ক্রিযাঃ |
মরুত্প্রপতনং যঞ্জং জলাগ্ন্যাবেশনং তথা |
শ্রাদ্ধানাং সর্বদানানাং ফলানি নিযমাংস্তথা || ২. ৩||
তথোপবাসাত্পূর্ত্তাচ্চ দেবতাভ্যর্চ্চনাদপি |
তেভ্যশ্চেভ্যশ্চ কর্মভ্য উপসৃষ্টোঽভিবাঞ্চতি || ২. ৪||
চিত্তমিথং বর্ত্তমানং যত্নাদেযাগী নিবর্ত্তযেত্ |
ব্রহ্মসঙ্গি মনঃ কুর্ব্বন্নুপসর্গাত্প্রমুচ্যতে || ২. ৫||
উপসর্গৈর্জিতৈরেভিরূপসর্গাস্তুতঃ পুনঃ |
যোগিনঃ সম্প্রবর্ত্তন্তে সাত্ত্বরাজসতামসাঃ || ২. ৬||
প্রাতিভঃ শ্রাবণো দৈবো ভ্রমাবর্ত্তৌ তথাপরৌ |
পঞ্চৈতে যোগিনাং যোগবিঘ্নায কটুকোদযা || ২. ৭||
বেদার্থাঃ কাব্যশাস্ত্রার্থা বিদ্যাশিল্পান্যশেষতঃ |
প্রতিভান্তি যদস্ত্যেতি প্রাতিভঃ স তু যোগিনঃ || ২. ৮||
শব্দার্থানখিলান্ বেত্তি শব্দং গৃহ্নতি চৈব যত্ |
যোজনানাং সহস্ত্রেভ্যঃ শ্রাবণঃ সোঽভিধীযতে || ২. ৯||
সমন্তাদ্বীক্ষতে চাষ্টৌ স যদা দেবতোপমঃ |
উপসর্গং তমপ্যান্থর্দৈবমুন্মত্তবদ্বুধাঃ || ২. ১০||
ভ্রাম্যতে যন্নিরালম্বং সনো দোষেণ যোগিনঃ |
সমস্তাচারবিভ্রংশাদ্ভ্রমঃ স পরিকীর্ত্তিতঃ || ২. ১১||
আবর্ত্ত ইব তোযস্য জ্ঞানাবত্তো যদাকুলঃ |
নাশযেচ্চিত্তমাবর্ত্ত উপসর্গঃ স উচ্যতে || ২. ১২||
এতৈর্নাশিতযোগাস্তু সকলা দেবযোনযঃ |
উপসর্গৈর্মহাঘোরৈরাবর্ত্তন্তে পুনঃ পুনঃ || ২. ১৩||
প্রাবৃত্য কন্বলং শুল্কং যোগী তস্মান্মনোমযং |
চিন্তযেত্পরমং ব্রহ্ম কৃত্বা তত্প্রবণং মনঃ || ২. ১৪||
যোগযুক্তঃ সদা যোগী লঘ্বাহারো জিতেন্দ্রিযঃ |
সূক্ষ্মাস্তু ধারণাঃ সপ্ত ভূরাদ্যা মূর্দ্ধ্ন ধারযেত্ || ২. ১৫||
ধরিত্রীং ধারযেদ্যোগী তত্সৌখ্যং প্রতিপদ্যতে |
আত্মানং মন্যতে চোর্ব্বিং তদ্বন্ধঞ্চ জহাতি সঃ || ২. ১৬||
তথৈবাপ্সুরসং সূক্ষ্মং তদ্বদ্রূপঞ্চ তেজসি |
স্পর্শং বাযৌ তথা তদ্বদ্বিভ্রতস্তস্য ধারণাম্ |
ব্যোম্নঃ সূক্ষ্মাং প্রবৃত্তিঞ্চ শব্দং তদ্বজ্জহাতি সঃ || ২. ১৭||
মনসা সর্ব্বভূতানাং মনস্যাবিশতে যদা |
মানসীং ধারণাং বিভ্রন্মনঃ সূক্ষ্মঞ্চ জাযতে || ২. ১৮||
তদ্বদ্বুদ্ধিমশেষাণাং সত্ত্বানামেত্য যোগবিত্ |
পরিত্যজতি সম্প্রাপ্য বুদ্ধিসৌক্ষ্ম্যমনুতমম্ || ২. ১৯||
পরিত্যজতি সূক্ষ্মাণি সপ্ত ত্বেতানি যোগবিত্ |
সম্যগ্বিজ্ঞায যোঽলর্ক!তস্যাবৃত্তির্ন বিদ্যতে || ২. ২০||
এতাসাং ধারণানন্তু সপ্তানাং সৌক্ষ্ম্যমাত্মবান্ |
দৃষ্ট্বা ততঃ সিদ্ধিং ত্যক্ত্বা ত্যক্ত্বা পরং ব্রজেত্ || ২. ২১||
যস্মিন্ যস্মিংশ্চ কুরুতে ভুতে রাগং মহীপতে!|
তস্মিংস্তস্মিন্ সমাসক্তিং সম্প্রাপ্য স বিনশ্যতি || ২. ২২||
তস্মাদ্বিদিত্বা সূক্ষ্মাণি সংসক্তানি পরস্পরম্ |
পরিত্যজতি যো দেহী স পরং প্রাপ্নুযাত্পদম্ || ২. ২৩||
এতান্যেব তু সন্ধায সপ্ত সূক্ষ্মাণি পার্থিব |
ভূতাদীনাং বিরাগোঽত্র সদ্ভাবজ্ঞস্য মুক্তযে || ২. ২৪||
গদ্ধাদিষু সমাসক্তিং সম্প্রাপ্য স বিনশ্যতি |
পুনরাবর্ত্ততে ভূপ!স ব্রহ্মাপরমানুষম্ || ২. ২৫||
সপ্তৈতা ধারণা যোগী সমতীত্য যদিচ্ছতি |
তস্মিংস্তস্মিংল্লযং সূক্ষ্মে ভূতে যাতি নরেশ্বর!|| ২. ২৬||
দেবানামসুরাণাং বা গন্ধর্ব্বোরগরক্ষসাম্ |
দেহেষু লযমাযাতি সঙ্গং নাপ্নোতি চ ক্বচিত্ || ২. ২৭||
অণিমা লঘিমা চৈব মহিমা প্রাপ্তিরেব চ |
প্রাকাম্যঞ্চ তথেশিত্বং বশিত্বঞ্চ তথাপরম্ || ২. ২৮||
যত্র কামাবসাযিত্বং গুণানেতাংস্তথৈশ্বরান্ |
প্রাপ্নোত্যষ্টৌ নরব্যাঘ্র!পরং নির্ব্বাণসূচকান্ || ২. ২৯||
সূক্ষ্মাত্ সূক্ষ্মতমোঽণীযান্ শীঘ্রত্বং লঘিমা গুণঃ |
মহিমাঽশেষপূজ্যত্বাত্ প্রাপ্তির্নাপ্রাপ্যমস্য যতঃ || ২. ৩০||
প্রাকাম্যস্য চ ব্যাপিত্বাদীশিত্বঞ্চেশ্বরো যতঃ |
বশিত্বাদ্বশিমা নাম যোগিনঃ সপ্তমো গুণঃ || ২. ৩১||
যত্রেচ্চাস্থানমপ্যুক্তং যত্র কামাবসাযিতা |
ত্রৈশ্বর্য্যকারণৈরেভির্যোগিনঃ প্রোক্তমষ্টধা || ২. ৩২||
মুক্তিসংসূচকং ভূপ!পরং নির্বাণমাত্মনঃ |
ততো ন জাযতে নৈব বর্দ্ধতে ন বিনশ্যতি || ২. ৩৩||
নাপি ক্ষযমবাপ্নোতি পরিণামং ন গচ্ছতি |
ছেদং ক্লেদং তথা দাহং শোষং ভুযাদিতো ন চ || ২. ৩৪||
ভুতবর্গাদবাপ্নোতি শব্দাদ্যৈর্হ্রিযতে ন চ |
ন চাস্য সন্তি শব্দাদ্যাস্তদ্ভোক্তা তৈর্ন যুজ্যতে || ২. ৩৫||
যথা হি কনকং খন্তমপদ্রব্যবদগ্নিনা |
দগ্ধদোষং দ্বিতীযেন খন্তেনৈক্যং ব্রজেন্নৃপ!|| ২. ৩৬||
ন বিশেষমবাপ্নোতি তদ্বদ্যোগাগ্নিনা যতিঃ |
নির্দ্দগ্ধদোষস্তেনৈক্যং প্রযাতি ব্রহ্মণা সহ || ২. ৩৭||
যথাগ্নিরগ্নৌ সংক্ষিপ্তঃ সমানত্বমনুব্রজেত্ |
তদাখ্যস্তন্মযো ভুতো ন গৃহ্যেত বিশেষতঃ || ২. ৩৮||
পরেণ ব্রহ্মণা তদ্বত্ প্রাপ্যৈক্যং দগ্ধকিল্বিষঃ |
যোগী যাতি পৃথগ্ভাবং ন কদাচিন্মহীপতে!|| ২. ৩৯||
যথা জলং জলেনৈক্যং নিক্ষিপ্তমুপগচ্ছতি |
তথাত্মা সাম্যমভ্যেতি যোগিনঃ পরমাত্মনি || ২. ৪০||
ইতি যোগসিদ্ধিঃ ||
যোগিচর্য্যা
অলর্ক উবাচ |
ভগবন্!যোগিনশ্চর্য্যং শ্রোতুমিচ্ছামি তত্ত্বতঃ |
ব্রহ্মবর্ত্মন্যনুসরন্ যথা যোগী ন সীদতি || ৩. ১||
দত্তাত্রেয উবাচ |
মানাপমানৌ যাবেতৌ প্রাপ্ত্যুদ্বেগকরৌ নৃণাম্ |
তাবেব বিপরীতার্থৌ যোগিনঃ সিদ্ধিকারকৌ || ৩. ২||
মানাপমানৌ যাবেতৌ তাবেবান্থর্বিষামৃতে |
অপমানোঽমৃতং তত্র মানস্তু বিষমং বিষম্ || ৩. ৩||
চক্ষুঃপূতং ন্যসেত্ পাদং বস্ত্রপূতং জলং পিবেত্ |
সত্যপূতাং বদেদ্বাণীং বুদ্ধিপূতঞ্চ চিন্তযেত্ || ৩. ৪||
আতিত্যশ্রাদ্ধযজ্ঞেষু দেবযাত্রোত্সবেষু চ |
ম্হাজনঞ্চ সিদ্ধ্যর্থং ন গচ্ছেদ্যোগবিত্ ক্বচিত্ || ৩. ৫||
ব্যস্তে বিধূমে ব্যঙ্গারে সর্বস্মিন্ ভুক্রবর্জ্জনে |
অদেত যোগবিদ্ভৈক্ষ্যং ন তু ত্রিষ্বেব নিত্যশঃ || ৩. ৬||
যথৈবমবমন্যন্তে জনাঃ পরিভবস্তি চ |
তথা যুক্তশ্চরেদ্যোগী সতাং বর্ত্ম ন দূষযন্ || ৩. ৭||
ভৈক্ষ্যং চরেদ্গৃহস্থেষু যাযাবরগৃহেষু চ |
শ্রেষ্ঠা তু প্রথমা চেতি বৃত্তিরস্যোপদৃশ্যতে || ৩. ৮||
অথ নিত্যং গৃহস্থেষু শালীনেষু চরেদ্যতিঃ |
শ্রদ্দধানেষু দান্তেষু শ্রোত্রিযেষু মহাত্মসু || ৩. ৯||
অত ঊর্দ্ধং পুনশ্চাপি অদুষ্ঠাপতিতেষু চ |
ভৈক্ষ্যচর্য্যা বিবর্ণেষু জঘন্যা বৃত্তিরিষ্যতে || ৩. ১০||
ভৈক্ষ্যং যবাগূং তক্রং বা পযো যাবকমেব বা |
ফলং মূলং প্রিযঙ্গুং বা কণপিণ্যাকশক্তবঃ || ৩. ১১||
ইত্যেতে চ শুভাহারা যোগিনঃ সিদ্ধিকারকাঃ |
তত্প্রযুঞ্জ্যান্মুনির্ভক্ত্যা পরমেণ সমাধিনা || ৩. ১২||
অপঃ পূর্বং সকৃত্ প্রাশ্য তুষ্ণীন্ভূত্বা সমাহিতঃ |
প্রাণারেতি ততস্তস্য প্রথমা হ্যান্থতিঃ স্মৃতা || ৩. ১৩||
অপানায দ্বিতীযা তু সমানাযেতি চাপরা |
উদানায চতুর্থী স্যাত্ ব্যানাযেতি চ পঞ্চমী || ৩. ১৪||
প্রাণাযামৈঃ পৃথক্ কৃত্বা শেষং ভুঞ্জীত কামতঃ |
অপঃ পুনঃ সকৃত্ প্রাশ্য আচম্য হৃদযং স্পৃশেত্ || ৩. ১৫||
অস্তেযং ব্রহ্মচর্যঞ্চ ত্যাগোঽলোভস্তথৈব চ |
ব্রতানি পঞ্চ ভিক্ষুণামহিংসাপরমাণি বৈ || ৩. ১৬||
অক্রোধো গুরুশুশ্রুষা শৌচমাহারলাঘবম্ |
নিত্যস্বাধ্যায ইত্যেতে নিযমাঃ পঞ্চ কীর্ত্তিতাঃ || ৩. ১৭||
সারভূতমুপাসীত জ্ঞানং যত্ কার্য্যসাধকম্ |
জ্ঞানানাং ব ধা ষেযং যোগবিঘ্নকরা হিন্সা || ৩. ১৮||
ইদং জ্ঞেযমিদং জ্ঞেযমিতি যস্তৃষিতশ্চরেত্ |
অপি কল্পসহস্রেষু নৈব জ্ঞেযমবাপ্নুযাত্ || ৩. ১৯||
ত্যক্তসঙ্গো জিতক্রোধো লঘ্বাহারো জিতেন্দ্রিযঃ |
বিধায বুদ্ধ্হ্যা দ্বারাণি মনো ধ্যানে নিবেশযেত্ || ৩. ২০||
শূন্যেষ্বেবাবকাশেষু গুহাসু চ বনেষু চ |
নিত্যযুক্তঃ সদা যোগী ধ্যানং সম্যগুপক্রমেত্ || ৩. ২১||
বাগ্দন্তঃ কর্মদন্তশ্চ মনোদন্তশ্চ তে ত্রযঃ |
যস্মৈতে নিযতা দন্তাঃ স ত্রিদন্তী মহাযতিঃ || ৩. ২২||
সর্বমাত্মমযং যস্য সদসজ্জগদীদৃশম্ |
গুণাগুণমযং তস্য কঃ প্রিযঃ কো নৃপাপ্রিযঃ || ৩. ২৩||
বিশুদ্ধবুদ্ধিঃ সমলোষ্ঠ্রকাঞ্চনঃ সমস্তভূতেষু চ তত্সমাহিতঃ |
স্থানং পরং শাশ্বতমব্যঞ্চ পরং হি গত্বা ন পুনঃ প্রজাযতে || ৩. ২৪||
বেদাঃ শ্রেষ্ঠাঃ সর্বযজ্ঞক্রিযাশ্চ যজ্ঞাজ্জপ্যং জ্ঞানমার্গশ্চ জপ্যাত্ |
জ্ঞানাদ্ধ্যানং সঙ্গরাগব্যপেতং তস্মিন্প্রাপ্তে শাশ্বতস্যোপলব্ধিঃ || ৩. ২৫||
সমাহিতো ব্রহ্মপরোঽপ্রমাদী শুচিস্তথৈকান্তরতির্যতেন্দ্রিযঃ |
সমাপ্নুযাদ্যোগমিমং মহাত্মা বিমুক্তিমাপ্নোতি ততঃ স্বযোগতঃ || ৩. ২৬||
ইতি যোগিচর্য্যা