বিচখ্নুগীতা

.. বিচখ্নুগীতা ..

২৫৭
ভী
অত্রাপ্যুদাহরন্তীমমিতিহাসং পুরাতনম্ .
প্রজানামনুকম্পার্থং গীতং রাজ্ঞা বিচখ্নুনা .. ১..
ছিন্নস্থূনং বৃষং দৃষ্ট্বা বিরাবং চ গবাং ভৃশম্ .
গোগ্রহে যজ্ঞবাতস্য প্রেক্ষমাণঃ স পার্থিবঃ .. ২..
স্বস্তি গোভ্যোঽস্তু লোকেষু ততো নির্বচনং কৃতম্ .
হিংসাযাং হি প্রবৃত্তাযামাশীরেষানুকল্পিতা .. ৩..
অব্যবস্থিত মর্যাদৈর্বিমূঢৈর্নাস্তিকৈর্নরৈঃ .
সংশযাত্মভিরব্যক্তৈর্হিংসা সমনুকীর্তিতা .. ৪..
সর্বকর্ম স্বহিংসা হি ধর্মাত্মা মনুরব্রবীত্ .
কামরাগাদ্বিহিংসন্তি বহির্বেদ্যাং পশূন্নরাঃ .. ৫..
তস্মাত্প্রমানতঃ কার্যো ধর্মঃ সূক্ষ্মো বিজানতা .
অহিংসৈব হি সর্বেভ্যো ধর্মেভ্যো জ্যাযসী মতা .. ৬..
উপোষ্য সংশিতো ভূত্বা হিত্বা বেদ কৃতাঃ শ্রুতীঃ .
আচার ইত্যনাচারাঃ কৃপণাঃ ফলহেতবঃ .. ৭..
যদি যজ্ঞাংশ্চ বৃক্ষাংশ্চ যূপাংশ্চোদ্ধিশ্য মানবাঃ .
বৃথা মাংসানি খাদন্তি নৈষ ধর্মঃ প্রশস্যতে .. ৮..
মাংসং মধু সুরা মত্স্যা আসবং কৃসরৌদনম্ .
ধূর্তৈঃ প্রবর্তিতং হ্যেতন্নৈতদ্বেদেষু কল্পিতম্ .. ৯..
কামান্মোহাচ্চ লোভাচ্চ লৌল্যমেতত্প্রবর্তিতম্ .
বিষ্ণুমেবাভিজানন্তি সর্বযজ্ঞেষু ব্রাহ্মণাঃ .
পাযসৈঃ সুমনোভিশ্চ তস্যাপি যজনং স্মৃতম্ .. ১০..
যজ্ঞিযাশ্চৈব যে বৃক্ষা বেদেষু পরিকল্পিতাঃ .
যচ্চাপি কিং চিত্কর্তব্যমন্যচ্চোক্ষৈঃ সুসংস্কৃতম্ .
মহাসত্ত্বৈঃ শুদ্ধভাবৈঃ সর্বং দেবার্হমেব তত্ .. ১১..
য্
শরীরমাপদশ্চাপি বিবদন্ত্যবিহিংসতঃ .
কথং যাত্রা শরীরস্য নিরারম্ভস্য সেত্স্যতি .. ১২..
ভী
যথা শরীরং ন গ্লাযেন্নেযান্মৃত্যুবশং যথা .
তথা কর্মসু বর্তেত সমর্থো ধর্মমাচরেত্ .. ১৩..

.. ইতি বিচখ্নুগীতা সমাপ্তা ..