হারীতগীতা

॥ হারীতগীতা ॥

 অধ্যায়ঃ ২৬৯
 য়ুধিষ্ঠির উবাচ
কিং শীলঃ কিং সমাচারঃ কিং বিদ্যঃ কিং পরায়নঃ ।
প্রাপ্নোতি ব্রহ্মণঃ স্থানং য়ত্পরং প্রকৃতের্ধ্রুবম্ ॥ ১॥

 ভীষ্ম উবাচ
মোক্ষধর্মেষু নিরতো লঘ্বাহারো জিতেন্দ্রিয়ঃ ।
প্রাপ্নোতি পরমং স্থানং য়ত্পরং প্রকৃতের্ধ্রুবম্ ॥ ২॥

স্বগৃহাদভিনিঃসৃত্য লাভালাভে সমো মুনিঃ ।
সমুপোধেষু কামেষু নিরপেক্ষঃ পরিব্রজেত্ ॥ ৩॥

ন চক্ষুষা ন মনসা ন বাচা দূসয়েদপি ।
ন প্রত্যক্ষং পরোক্ষং বা দূসনং ব্যাহরেত্ক্ব চিত্ ॥ ৪॥

ন হিংস্যাত্সর্বভূতানি মৈত্রায়ণ গতিশ্ চরেত্ ।
নেদং জীবিতমাসাদ্য বৈরং কুর্বীত কেন চিত্ ॥ ৫॥

অতিবাদাংস্তিতিক্ষেত নাভিমন্যেত্কথং চন ।
ক্রোধ্যমানঃ প্রিয়ং ব্রূয়াদাক্রুষ্টঃ কুশলং বদেত্ ॥ ৬॥

প্রদক্ষিণং প্রসব্যং চ গ্রামমধ্যে ন চাচরেত্ ।
ভৈক্ষ চর্যামনাপন্নো ন গচ্ছেত্পূর্বকেতিতঃ ॥ ৭॥

অবিকীর্ণঃ সুগুপ্তশ্চ ন বাচা হ্যপ্রিয়ং বদেত্ ।
মৃদুঃ স্যাদপ্রতিক্রূরো বিস্রব্ধঃ স্যাদরোষণঃ ॥ ৮॥

বিধূমে ন্যস্তমুসলে ব্যঙ্গারে ভুক্তবজ্জনে ।
অতীতে পাত্রসঞ্চারে ভিক্ষাং লিপ্সেত বৈ মুনিঃ ॥ ৯॥

অনুয়াত্রিকমর্থস্য মাত্রা লাভেষ্বনাদৃতঃ ।
অলাভে ন বিহন্যেত লাভশ্চৈনং ন হর্ষয়েত্ ॥ ১০॥

লাভং সাধারণং নেচ্ছেন্ন ভুঞ্জীতাভিপূজিতঃ ।
অভিপূজিত লাভং হি জুগুপ্সেতৈব তাদৃশঃ ॥ ১১॥

ন চান্ন দোষান্নিন্দেত ন গুণানভিপূজয়েত্ ।
শয়াসনে বিবিক্তে চ নিত্যমেবাভিপূজয়েত্ ॥ ১২॥

শূন্যাগরং বৃক্ষমূলমরণ্যমথ বা গুহাম্ ।
অজ্ঞাতচর্যাং গত্বান্যাং ততোঽন্যত্রৈব সংবিশেত্ ॥ ১৩॥

অনুরোধবিরোধাভ্যাং সমঃ স্যাদচলো ধ্রুবঃ ।
সুকৃতং দুষ্কৃতং চোভে নানুরুধ্যেত কর্মণি ॥ ১৪॥

নিত্যতৃপ্তঃ সুসন্তুষ্টঃ প্রসন্নবদনেন্দ্রিয়ঃ ।
বিভীর্জপ্যপরো মৌনী বৈরাগ্যং সমুপাশ্রিতঃ ॥ ১৫॥

অভ্যস্তং ভৌতিকং পশ্যন্ ভূতানামাগতীং গতিম্ ।
নিস্পৃহঃ সমদর্শী চ পক্বাপক্বেন বর্তয়ন্ ।
আত্মনা য়ঃ প্রশান্তাত্মা লঘ্বাহারো জিতেন্দ্রিয়ঃ ॥ ১৬॥

বাচো বেগং মনসঃ ক্রোধবেগং
বিবিত্সা বেগমুদরোপস্থ বেগম্ ।
এতান্বেগান্বিনয়েদ্বৈ তপস্বী
নিন্দা চাস্য হৃদয়ং নোপহন্যাত্ ॥ ১৭॥

মধ্যস্থ এব তিষ্ঠেত প্রশংসা নিন্দয়োঃ সমঃ ।
এতত্পবিত্রং পরমং পরিব্রাজক আশ্রমে ॥ ১৮॥

মহাত্মা সুব্রতো দান্তঃ সর্বত্রৈবানপাশ্রিতঃ ।
অপূর্ব চারকঃ সৌম্যো অনিকেতঃ সমাহিতঃ ॥ ১৯॥

বান প্রস্থগৃহস্থাভ্যাং ন সংসৃজ্যেত কর্হি চিত্ ।
অজ্ঞাতলিপ্সাং লিপ্সেত ন চৈনং হর্ষ আবিশেত্ ॥ ২০॥

বিজানতাং মোক্ষ এষ শ্রমঃ স্যাদবিজানতাম্ ।
মোক্ষয়ানমিদং কৃত্স্নং বিদুষাং হারিতোঽব্রবীত্ ॥ ২১॥

অভয়ং সর্বভূতেভ্যো দত্ত্বা য়ঃ প্রব্রজেদ্গৃহাত্ ।
লোকাস্তেজোময়াস্তস্য তথানন্ত্যায় কল্পতে ॥ ২২॥

॥ ইতি শ্রী মহাভারতে শান্তিপর্বণি মোক্ষধর্মপর্বণি হারীতগীতায়াং
অষ্টসপ্তত্যধিকদ্বিশততমোঽস্ধ্যায় ॥