হংসগীতা

॥ হংসগীতা ॥

য়ুধিষ্ঠির উবাচ ।
সত্যং দমং ক্ষমাং প্রজ্ঞাং প্রশংসন্তি পিতামহ ।
বিদ্বাংসো মনুজা লোকে কথমেতন্মতং তব ॥ ১॥

ভীষ্ম উবাচ ।
অত্র তে বর্তয়িষ্যেঽহমিতিহাসং পুরাতনম্ ।
সাধ্যানামিহ সংবাদং হংসস্য চ য়ুধিষ্ঠির ॥ ২॥

হংসো ভূত্বাথ সৌবর্ণস্ত্বজো নিত্যঃ প্রজাপতিঃ ।
স বৈ পর্যেতি লোকাংস্ত্রীনথ সাধ্যানুপাগমত্ ॥ ৩॥

সাধ্যা ঊচুঃ ।
শকুনে বয়ং স্ম দেবা বৈ সাধ্যাস্ত্বামনুয়ুজ্মহে ।
পৃচ্ছামস্ত্বাং মোক্ষধর্মং ভবাংশ্চ কিল মোক্ষবিত্ ॥ ৪॥

শ্রুতোঽসি নঃ পণ্ডিতো ধীরবাদী
সাধুশব্দশ্চরতে তে পতত্রিন্ ।
কিং মন্যসে শ্রেষ্ঠতমং দ্বিজ ত্বং
কস্মিন্মনস্তে রমতে মহাত্মন্ ॥ ৫॥

তন্নঃ কার্যং পক্ষিবর প্রশাধি
য়ত্কর্মণাং মন্যসে শ্রেষ্ঠমেকম্ ।
য়ত্কৃত্বা বৈ পুরুষঃ সর্ববন্ধৈর্-
বিমুচ্যতে বিহগেন্দ্রেহ শীঘ্রম্ ॥ ৬॥

হংস উবাচ ।
ইদং কার্যমমৃতাশাঃ শৃণোমি
তপো দমঃ সত্যমাত্মাভিগুপ্তিঃ ।
গ্রন্থীন্ বিমুচ্য হৃদয়স্য সর্বান্
প্রিয়াপ্রিয়ে স্বং বশমানয়ীত ॥ ৭॥

নারুন্তুদঃ স্যান্ন নৃশংসবাদী
ন হীনতঃ পরমভ্যাদদীত ।
য়য়াস্য বাচা পর উদ্বিজেত
ন তাং বদেদ্রুষতীং পাপলোক্যাম্ ॥ ৮॥

বাক্সায়কা বদনান্নিষ্পতন্তি
য়ৈরাহতঃ শোচতি রাত্র্যহানি ।
পরস্য নামর্মসু তে পতন্তি
তান্ পণ্ডিতো নাবসৃজেত্পরেষু ॥ ৯॥

পরশ্চেদেনমতি বাদবানৈর্-
ভৃশং বিধ্যেচ্ছম এবেহ কার্যঃ ।
সংরোষ্যমাণঃ প্রতিহৃষ্যতে য়ঃ
স আদত্তে সুকৃতং বৈ পরস্য ॥ ১০॥

ক্ষেপাভিমানাদভিষঙ্গব্যলীকং  var  ক্ষেপায়মাণমভিষঙ্গ
নিগৃহ্ণাতি জ্বলিতং য়শ্চ মন্যুম্ ।
অদুষ্টচেতা মুদিতোঽনসূয়ুঃ
স আদত্তে সুকৃতং বৈ পরেষাম্ ॥ ১১॥

আক্রুশ্যমানো ন বদামি কিঞ্চিত্
ক্ষমাম্যহং তাড্যমানশ্চ নিত্যম্ ।
শ্রেষ্ঠং হ্যেতত্ য়ত্ ক্ষমামাহুরার্যাঃ
সত্যং তথৈবার্জবমানৃশংস্যম্ ॥ ১২॥

বেদস্যোপনিষত্সত্যং সত্যস্যোপনিষদ্দমঃ ।
দমস্যোপনিষন্মোক্ষং এতত্সর্বানুশাসনম্ ॥ ১৩॥

বাচো বেগং মনসঃ ক্রোধবেগং বিবিত্সা বেগমুদরোপস্থ বেগম্ । 
এতান্ বেগান্ য়ো বিষহদুদীর্ণাংস্তং মন্যেঽহং ব্রাহ্মণং বৈ মুনিং চ ॥ ১৪॥

অক্রোধনঃ ক্রুধ্যতাং বৈ বিশিষ্টস্তথা তিতিক্ষুরতিতিক্ষোর্বিশিষ্টঃ ।
অমানুষান্মানুষো বৈ বিশিষ্টস্ তথা জ্ঞানাজ্জ্ঞানবান্বৈ প্রধানঃ ॥ ১৫॥ 
 var  জ্ঞানবিদ্বৈ বিশিষ্টঃ
আক্রুশ্যমানো নাক্রোশেন্মন্যুরেব তিতিক্ষতঃ ।  var  নাক্রুশ্যেত্ মন্যুরেনং
আক্রোষ্টারং নির্দহতি সুকৃতং চাস্য বিন্দতি ॥ ১৬॥

য়ো নাত্যুক্তঃ প্রাহ রূক্ষং প্রিয়ং বা
য়ো বা হতো ন প্রতিহন্তি ধৈর্যাত্ ।
পাপং চ য়ো নেচ্ছতি তস্য হন্তুস্-
তস্মৈ দেবাঃ স্পৃহয়ন্তে সদৈব ॥ ১৭॥  var  তস্যেহ দেবাঃ স্পৃহয়ন্তি
নিত্যম্ ।
পাপীয়সঃ ক্ষমেতৈব শ্রেয়সঃ সদৃশস্য চ ।
বিমানিতো হতোঽঽক্রুষ্ট এবং সিদ্ধিং গমিষ্যতি ॥ ১৮॥

সদাহমার্যান্নিভৃতোঽপ্যুপাসে
ন মে বিবিত্সা ন চমেঽস্তি রোষঃ ।  var  বিবিত্সোত্সহতে ন রোষঃ
ন চাপ্যহং লিপ্সমানঃ পরৈমি
ন চৈব কিঞ্চিদ্বিষয়েণ য়ামি ॥ ১৯॥

নাহং শপ্তঃ প্রতিশপামি কিঞ্চিদ্
দমং দ্বারং হ্যমৃতস্যেহ বেদ্মি ।
গুহ্যং ব্রহ্ম তদিদং বা ব্রবীমি
ন মানুষাচ্ছ্রেষ্ঠতরং হি কিঞ্চিত্ ॥ ২০॥

বিমুচ্যমানঃ পাপেভ্যো ধনেভ্য ইব চন্দ্রমাঃ ।
বিরজাঃ কালমাকাঙ্ক্ষন্ ধীরো ধৈর্যেণ সিধ্যতি ॥ ২১॥

য়ঃ সর্বেষাং ভবতি হ্যর্চনীয়
উত্সেধনস্তম্ভ ইবাভিজাতঃ ।
য়স্মৈ বাচং সুপ্রশস্তাং বদন্তি  var  তস্মৈ বাচং সুপ্রসন্নাং
স বৈ দেবান্গচ্ছতি সংয়তাত্মা ॥ ২২॥

ন তথা বক্তুমিচ্ছন্তি কল্যাণান্ পুরুষে গুণান্ ।
য়থৈষাং বক্তুমিচ্ছন্তি নৈর্গুণ্যমনুয়ুঞ্জকাঃ ॥ ২৩॥

য়স্য বাঙ্মনসী গুপ্তে সম্যক্প্রণিহিতে সদা ।
বেদাস্তপশ্চ ত্যাগশ্চ স ইদং সর্বমাপ্নুয়াত্ ॥ ২৪॥

আক্রোশনাবমানাভ্যাং নাবুধান্ গর্হয়েদ্ বুধঃ ।   var  বোধয়েদ্ বুধঃ
তস্মান্ন বর্ধয়েদন্যং ন চাত্মানং বিহিংসয়েত্ ॥ ২৫॥

অমৃতস্যেব সন্তৃপ্যেদবমানস্য বৈ দ্বিজঃ ।  var  পণ্ডিতঃ ।
সুখং হ্যবমতঃ শেতে য়োঽবমন্তা স নশ্যতি ॥ ২৬॥

য়ত্ক্রোধনো য়জতে য়দ্দদাতি
য়দ্বা তপস্তপ্যতি য়জ্জুহোতি ।
বৈবস্বতস্তদ্ধরতেঽস্য সর্বং
মোঘঃ শ্রমো ভবতি হি ক্রোধনস্য ॥ ২৭॥

চত্বারি য়স্য দ্বারাণি সুগুপ্তান্যমরোত্তমাঃ ।
উপস্থমুদরং হস্তৌ বাক্চতুর্থী স ধর্মবিত্ ॥ ২৮॥

সত্যং দমং হ্যার্জবমানৃশংস্যং
ধৃতিং তিতিক্ষামভিসেবমানঃ ।  var  তিতিক্ষাং চ সংসেবমানঃ
স্বাধ্যায়নিত্যোঽস্পৃহয়ন্পরেষাম্  var  য়ুক্তোঽস্পৃহয়ন্ পরেষাম্
একান্তশীল্যূর্ধ্বগতির্ভবেত্সঃ ॥ ২৯॥

সর্বানেতাননুচরন্ বত্সবচ্চতুরঃ স্তনান্ ।  var  সর্বাংশ্চৈনাননুচরন্
ন পাবনতমং কিঞ্চিত্সত্যাদধ্যগমং ক্বচিত্ ॥ ৩০॥

আচক্ষেঽহং মনুষ্যেভ্যো দেবেভ্যঃ প্রতিসঞ্চরন্ ।
সত্যং স্বর্গস্য সোপানং পারাবারস্য নৌরিব ॥ ৩১॥

য়াদৃশৈঃ সংনিবসতি য়াদৃশাংশ্চোপসেবতে ।
য়াদৃগিচ্ছেচ্চ ভবিতুং তাদৃগ্ভবতি পূরুষঃ ॥ ৩২॥

য়দি সন্তং সেবতি য়দ্যসন্তং
তপস্বিনং য়দি বা স্তেনমেব ।
বাসো য়থা রঙ্গবশং প্রয়াতি
তথা স তেষাং বশমভ্যুপৈতি ॥ ৩৩॥

সদা দেবাঃ সাধুভিঃ সংবদন্তে
ন মানুষং বিষয়ং য়ান্তি দ্রষ্টুম্ ।
নেন্দুঃ সমঃ স্যাদসমো হি বায়ুর্-
উচ্চাবচং বিষয়ং য়ঃ স বেদ ॥ ৩৪॥

অদুষ্টং বর্তমানে তু হৃদয়ান্তরপূরুষে ।
তেনৈব দেবাঃ প্রীয়ন্তে সতাং মার্গস্থিতেন বৈ ॥ ৩৫॥

শিশ্নোদরে য়েঽভিরতাঃ সদৈব  var  য়ে নিরতাঃ
স্তেনা নরা বাক্পরুষাশ্চ নিত্যম্ ।
অপেতদোষানিতি তান্ বিদিত্বা
দূরাদ্দেবাঃ সম্পরিবর্জয়ন্তি ॥ ৩৬॥

ন বৈ দেবা হীনসত্ত্বেন তোষ্যাঃ
সর্বাশিনা দুষ্কৃতকর্মণা বা ।
সত্যব্রতা য়ে তু নরাঃ কৃতজ্ঞা
ধর্মে রতাস্তৈঃ সহ সম্ভজন্তে ॥ ৩৭॥

অব্যাহৃতং ব্যাকৃতাচ্ছ্রেয় আহুঃ
সত্যং বদেদ্ব্যাহৃতং তদ্‍দ্বিতীয়ম্ ।
ধর্মং বদেদ্ব্যাহৃতং তত্তৃতীয়ং
প্রিয়ংবদেদ্ব্যাহৃতং তচ্চতুর্থম্ ॥ ৩৮॥

সাধ্যা ঊচুঃ ।
কেনায়মাবৃতো লোকঃ কেন বা ন প্রকাশতে ।
কেন ত্যজতি মিত্রাণি কেন স্বর্গং ন গচ্ছতি ॥ ৩৯॥

হংস উবাচ ।
অজ্ঞানেনাবৃতো লোকো মাত্সর্যান্ন প্রকাশতে ।
লোভাত্ত্যজতি মিত্রাণি সঙ্গাত্স্বর্গং ন গচ্ছতি ॥ ৪০॥

সাধ্যা ঊচুঃ ।
কঃ স্বিদেকো রমতে ব্রাহ্মণানাং
কঃ স্বিদেকো বহুভির্জোষমাস্তে ।
কঃ স্বিদেকো বলবান্ দুর্বলোঽপি
কঃ স্বিদেষাং কলহং নান্ববৈতি ॥ ৪১॥

হংস উবাচ ।
প্রাজ্ঞ একো রমতে ব্রাহ্মণানাং
প্রাজ্ঞশ্চৈকো বহুভির্জোষমাস্তে ।
প্রাজ্ঞ একো বলবান্ দুর্বলোঽপি
প্রাজ্ঞ এষাং কলহং নান্ববৈতি ॥ ৪২॥

সাধ্যা ঊচুঃ ।
কিং ব্রাহ্মণানাং দেবত্বং কিং চ সাধুত্বমুচ্যতে ।
অসাধুত্বং চ কিং তেষাং কিমেষাং মানুষং মতম্ ॥ ৪৩॥

হংস উবাচ ।
স্বাধ্যায় এষাং দেবত্বং ব্রতং সাধুত্বমুচ্যতে ।
অসাধুত্বং পরীবাদো মৃত্যুর্মানুষ্যমুচ্যতে ॥ ৪৪॥

ভীষ্ম উবাচ ।
সংবাদ ইত্যয়ং শ্রেষ্ঠঃ সাধ্যানাং পরিকীর্তিতঃ ।
ক্ষেত্রং বৈ কর্মণাং য়োনিঃ সদ্ভাবঃ সত্যমুচ্যতে ॥ ৪৫॥

 var 
ইত্যুক্ত্বা পরমো দেব ভগবান্ নিত্য অব্যয়ঃ ।
সাধ্যৈর্দেবগণৈঃ সার্ধং দিবমেবারুরোহ সঃ ॥ ৪৫॥

এতদ্ য়শস্যমায়ুষ্যং পুণ্যং স্বর্গায় চ ধ্রুবম্ ।
দর্শিতং দেবদেবেন পরমেণাব্যয়েন চ ॥ ৪৬॥

॥ ইতি শ্রীমহাভারতে শান্তিপর্বণি মোক্ষধর্মপর্বণি
          হংসগীতা সমাপ্তা ॥