ষড্জগীতা..

.. .. ষড্জগীতা..

১৬১
ব্
ইত্যুক্তবতি ভীষ্মে তু তূষ্ণী ভূতে যুধিষ্ঠিরঃ .
পপ্রচ্ছাবসরং গত্বা ভ্রাতৄন্বিদুর পঞ্চমান্ .. ১..
ধর্মে চার্থে চ কামে চ লোকবৃত্তিঃ সমাহিতা .
তেষাং গরীযান্কতমো মধ্যমঃ কো লঘুশ্চ কঃ .. ২..
কস্মিংশ্চাত্মা নিযন্তব্যস্ত্রিবর্গবিজযায বৈ .
সন্তুষ্টা নৈষ্ঠিকং বাক্যং যথাবদ্বক্তুমর্হথ .. ৩..
ততোঽর্থগতিতত্ত্বজ্ঞঃ প্রথমং প্রতিভানবান্ .
জগাদ বিরুদো বাক্যং ধর্মশাস্ত্রমনুস্মরন্ .. ৪..
বাহুশ্রুত্যং তপস্ত্যাগঃ শ্রদ্ধা যজ্ঞক্রিযা ক্ষমা .
ভাবশুদ্ধির্দযা সত্যং সংযমশ্চাত্মসম্পদঃ .. ৫..
এতদেবাভিপদ্যস্ব মা তে ভূচ্চলিতং মনঃ .
এতন্মূলৌ হি ধর্মার্থাবেতদেকপদং হিতম্ .. ৬..
ধর্মেণৈবর্ষযস্তীর্ণা ধর্মে লোকাঃ প্রতিষ্ঠিতাঃ .
ধর্মেণ দেবা দিবিগা ধর্মে চার্থঃ সমাহিতঃ .. ৭..
ধর্মো রাজন্গুণশ্রেষ্ঠো মধ্যমো হ্যর্থ উচ্যতে .
কামো যবীযানিতি চ প্রবদন্তি মনীষিণঃ .
তস্মাদ্ধর্মপ্রধানেন ভবিতব্যং যতাত্মনা .. ৮..
সমাপ্তবচনে তস্মিন্নর্থশাস্ত্রবিশারদঃ .
পার্থো বাক্যার্থতত্ত্বজ্ঞো জগৌ বাক্যমতন্দ্রিতঃ .. ৯..
কর্মভূমিরিযং রাজন্নিহ বার্তা প্রশস্যতে .
কৃষিবাণিজ্য গোরক্ষ্যং শিল্পানি বিবিধানি চ .. ১০..
অর্থ ইত্যেব সর্বেষাং কর্মণামব্যতিক্রমঃ .
ন ঋতেঽর্থেন বর্তেতে ধর্মকামাবিতি শ্রুতিঃ .. ১১..
বিজযী হ্যর্থবান্ধর্মমারাধযিতুমুত্তমম্ .
কামং চ চরিতুং শক্তো দুষ্প্রাপমকৃতাত্মভিঃ .. ১২..
অর্থস্যাবযবাবেতৌ ধর্মকামাবিতি শ্রুতিঃ .
অর্থসিদ্ধ্যা হি নির্বৃত্তাবুভাবেতৌ ভবিষ্যতঃ .. ১৩..
উদ্ভূতার্থং হি পুরুষং বিশিষ্টতর যোনযঃ .
ব্রহ্মাণমিব ভূতানি সততং পর্যুপাসতে .. ১৪..
জটাজিনধরা দান্তাঃ পঙ্কদিগ্ধা জিতেন্দ্রিযাঃ .
মুণ্ডা নিস্তন্তবশ্চাপি বসন্ত্যর্থার্থিনঃ পৃথক্ .. ১৫..
কাষাযবসনাশ্চান্যে শ্মশ্রুলা হ্রীসুসংবৃতাঃ .
বিদ্বাংসশ্চৈব শান্তাশ্চ মুক্তাঃ সর্বপরিগ্রহৈঃ .. ১৬..
অর্থার্থিনঃ সন্তি কে চিদপরে স্বর্গকাঙ্ক্ষিণঃ .
কুলপ্রত্যাগমাশ্চৈকে স্বং স্বং মার্গমনুষ্ঠিতাঃ .. ১৭..
আস্তিকা নাস্তিকাশ্চৈব নিযতাঃ সংযমে পরে .
অপ্রজ্ঞানং তমো ভূতং প্রজ্ঞানং তু প্রকাশতা .. ১৮..
ভৃত্যান্ভোগৈর্দ্বিষো দণ্ডৈর্যো যোজযতি সোঽর্থবান্ .
এতন্মতিমতাং শ্রেষ্ঠ মতং মম যথাতথম্ .
অনযোস্তু নিবোধ ত্বং বচনং বাক্যকণ্ঠযোঃ .. ১৯..
ততো ধর্মার্থকুশলৌ মাদ্রীপুত্রাবনন্তরম্ .
নকুলঃ সহদেবশ্চ বাক্যং জগদতুঃ পরম্ .. ২০..
আসীনশ্চ শযানশ্চ বিচরন্নপি চ স্থিতঃ .
অর্থযোগং দৃঢং কুর্যাদ্যোগৈরুচ্চাবচৈরপি .. ২১..
অস্মিংস্তু বৈ সুসংবৃত্তে দুর্লভে পরমপ্রিয .
ইহ কামানবাপ্নোতি প্রত্যক্ষং নাত্র সংশযঃ .. ২২..
যোঽর্থো ধর্মেণ সংযুক্তো ধর্মো যশ্চার্থসংযুতঃ .
মধ্বিবামৃত সংযুক্তং তস্মাদেতৌ মতাবিহ .. ২৩..
অনর্থস্য ন কামোঽস্তি তথার্থোঽধর্মিণঃ কুতঃ .
তস্মাদুদ্বিজতে লোকো ধর্মার্থাদ্যো বহিষ্কৃতঃ .. ২৪..
তস্মাদ্ধর্মপ্রধানেন সাধ্যোঽর্থঃ সংযতাত্মনা .
বিশ্বস্তেষু চ ভূতেষু কল্পতে সর্ব এব হি .. ২৫..
ধর্মং সমাচরেত্পূর্বং তথার্থং ধর্মসংযুতম্ .
ততঃ কামং চরেত্পশ্চাত্সিদ্ধার্থস্য হি তত্ফলম্ .. ২৬..
বিরেমতুস্তু তদ্বাক্যমুক্ত্বা তাবশ্বিনোঃ সুতৌ .
ভীমসেনস্তদা বাক্যমিদং বক্তুং প্রচক্রমে .. ২৭..
নাকামঃ কামযত্যর্থং নাকামো ধর্মমিচ্ছতি .
নাকামঃ কামযানোঽস্তি তস্মাত্কামো বিশিষ্যতে .. ২৮..
কামেন যুক্তা ঋষযস্তপস্যেব সমাহিতাঃ .
পলাশফলমূলাশা বাযুভক্ষাঃ সুসংযতাঃ .. ২৯..
বেদোপবাদেষ্বপরে যুক্তাঃ স্বাধ্যাযপারগাঃ .
শ্রাদ্ধযজ্ঞক্রিযাযাং চ তথা দানপ্রতিগ্রহে .. ৩০..
বণিজঃ কর্ষকা গোপাঃ কারবঃ শিল্পিনস্তথা .
দৈবকর্ম কৃতশ্চৈব যুক্তাঃ কামেন কর্মসু .. ৩১..
সমুদ্রং চাবিশন্ত্যন্যে নরাঃ কামেন সংযুতাঃ .
কামো হি বিবিধাকারঃ সর্বং কামেন সন্ততম্ .. ৩২..
নাস্তি নাসীন্নাভবিষ্যদ্ভূতং কামাত্মকাত্পরম্ .
এতত্সারং মহারাজ ধর্মার্থাবত্র সংশ্রিতৌ .. ৩৩..
নব নীতং যথা দধ্নস্তথা কামোঽর্থধর্মতঃ .
শ্রেযস্তৈলং চ পিণ্যাকাদ্ধৃতং শ্রেয উদশ্বিতঃ .. ৩৪..
শ্রেযঃ পুষ্পফলং কাষ্ঠাত্কামো ধর্মার্থযোর্বরঃ .
পুষ্পিতো মধ্বিব রসঃ কামাত্সঞ্জাযতে সুখম্ .. ৩৫..
সুচারু বেষাভিরলঙ্কৃতাভির্
মদোত্কটাভিঃ প্রিযবাদিনীভিঃ .
রমস্ব যোষাভিরুপেত্য কামং
কামো হি রাজংস্তরসাভিপাতী .. ৩৬..
বুদ্ধির্মমৈষা পরিষত্স্থিতস্য
মা ভূদ্বিচারস্তব ধর্মপুত্র .
স্যাত্সংহিতং সদ্ভিরফল্গুসারং
সমেত্য বাক্যং পরমানৃশংস্যম্ .. ৩৭..
ধর্মার্থকামাঃ সমমেব সেব্যা
যস্ত্বেকসেবী স নরো জঘন্যঃ .
দ্বযোস্তু দক্ষং প্রবদন্তি মধ্যং
স উত্তমো যো নিরতিস্ত্রিবর্গে .. ৩৮..
প্রাজ্ঞঃ সুহৃচ্চন্দনসারলিপ্তো
বিচিত্রমাল্যাভরণৈরুপেতঃ .
ততো বচঃ সঙ্গ্রহবিগ্রহেণ
প্রোক্ত্বা যবীযান্বিররাম ভীমঃ .. ৩৯..
ততো মুহূর্তাদথ ধর্মরাজো
বাক্যানি তেষাম্ অনুচিন্ত্য সম্যক্ .
উবাচ বাচাবিতথং স্মযন্বৈ
বহুশ্রুতো ধর্মভৃতাং বরিষ্ঠঃ .. ৪০..
নিঃসংশযং নিশ্চিত ধর্মশাস্ত্রাঃ
সর্বে ভবন্তো বিদিতপ্রমাণাঃ .
বিজ্ঞাতু কামস্য মমেহ বাক্যম্
উক্তং যদ্বৈ নৈষ্ঠিকং তচ্ছ্রুতং মে .
ইহ ত্ববশ্যং গদতো মমাপি
বাক্যং নিবোধধ্বমনন্যভাবাঃ .. ৪১..
যো বৈ ন পাপে নিরতো ন পুণ্যে
নার্থে ন ধর্মে মনুজো ন কামে .
বিমুক্তদোষঃ সমলোষ্ট কাঞ্চনঃ
স মুচ্যতে দুঃখসুখার্থ সিদ্ধেঃ .. ৪২..
ভূতানি জাতী মরণান্বিতানি
জরা বিকারৈশ্চ সমন্বিতানি .
ভূযশ্চ তৈস্তৈঃ প্রতিবোধিতানি
মোক্ষং প্রশংসন্তি ন তং চ বিদ্মঃ .. ৪৩..
স্নেহে ন বুদ্ধস্য ন সন্তি তানীত্য্
এবং স্বযম্ভূর্ভগবানুবাচ .
বুধাশ্চ নির্বাণপরা বদন্তি
তস্মান্ন কুর্যাত্প্রিযমপ্রিযং চ .. ৪৪..
এতত্প্রধানং ন তু কামকারো
যথা নিযুক্তোঽস্মি তথা চরামি .
ভূতানি সর্বাণি বিধির্নিযুঙ্ক্তে
বিধির্বলীযানিতি বিত্তসর্বে .. ৪৫..
ন কর্মণাপ্নোত্যনবাপ্যমর্থং
যদ্ভাবি সর্বং ভবতীতি বিত্ত .
ত্রিবর্গহীনোঽপি হি বিন্দতেঽর্থং
তস্মাদিদং লোকহিতায গুহ্যম্ .. ৪৬..
ততস্তদগ্র্যং বচনং মনোঽনুগং
সমস্তমাজ্ঞায ততোঽতিহেতুমত্ .
তদা প্রণেদুশ্চ জহর্ষিরে চ তে
কুরুপ্রবীরায চ চক্রুরঞ্জলীন্ .. ৪৭..
সুচারু বর্ণাক্ষর শব্দভূষিতাং
মনোঽনুগাং নির্ধুত বাক্যকণ্টকাম্ .
নিশম্য তাং পার্থিব পার্থ ভাষিতাং
গিরং নরেন্দ্রাঃ প্রশশংসুরেব তে .
পুনশ্চ পপ্রচ্ছ সরিদ্বরাসুতং
ততঃ পরং ধর্মমহীন সত্ত্বঃ .. ৪৮..

.. ইতি ষড্জগীতা সমাপ্তা ..