মঙ্কিগীতা

.. মঙ্কিগীতা ..

১৭১
যুধিস্থির
ঈহমানঃ সমারম্ভান্যদি নাসাদযেদ্ধনম্ .
ধনতৃষ্ণাভিভূতশ্চ কিং কুর্বন্সুখমাপ্নুযাত্ .. ১..
ভীস্ম
সর্বসাম্যমনাযাসঃ সত্যবাক্যং চ ভারত .
নির্বেদশ্চাবিবিত্সা চ যস্য স্যাত্স সুখী নরঃ .. ২..
এতান্যেব পদান্যাহুঃ পঞ্চ বৃদ্ধাঃ প্রশান্তযে .
এষ স্বর্গশ্চ ধর্মশ্চ সুখং চানুত্তমং সতাম্ .. ৩..
অত্রাপ্যুদাহরন্তীমমিতিহাসং পুরাতনম্ .
নির্বেদান্মঙ্কিনা গীতং তন্নিবোধ যুধিষ্ঠির .. ৪..
ঈহমানো ধনং মঙ্কির্ভগ্নেহশ্চ পুনঃ পুনঃ .
কেন চিদ্ধনশেষেণ ক্রীতবান্দম্য গোযুগম্ .. ৫..
সুসম্বদ্ধৌ তু তৌ দম্যৌ দমনাযাভিনিঃসৃতৌ .
আসীনমুষ্ট্রং মধ্যেন সহসৈবাভ্যধাবতাম্ .. ৬..
তযোঃ সম্প্রাপ্তযোরুষ্ট্রঃ স্কন্ধদেশমমর্ষণঃ .
উত্থাযোত্ক্ষিপ্য তৌ দম্যৌ প্রসসার মহাজবঃ .. ৭..
হ্রিযমাণৌ তু তৌ দম্যৌ তেনোষ্ট্রেণ প্রমাথিনা .
ম্রিযমাণৌ চ সম্প্রেক্ষ্য মঙ্কিস্তত্রাব্রবীদিদম্ .. ৮..
ন চৈবাবিহিতং শক্যং দক্ষেণাপীহিতুং ধনম্ .
যুক্তেন শ্রদ্ধযা সম্যগীহাং সমনুতিষ্ঠতা .. ৯..
কৃতস্য পূর্বং চানর্থৈর্যুক্তস্যাপ্যনুতিষ্ঠতঃ .
ইমং পশ্যত সঙ্গত্যা মম দৈবমুপপ্লবম্ .. ১০..
উদ্যম্যোদ্যম্য মে দম্যৌ বিষমেনেব গচ্ছতি .
উত্ক্ষিপ্য কাকতালীযমুন্মাথেনেব জম্বুকঃ .. ১১..
মনী বোষ্ট্রস্য লম্বেতে প্রিযৌ বত্সতরৌ মম .
শুদ্ধং হি দৈবমেবেদমতো নৈবাস্তি পৌরুষম্ .. ১২..
যদি বাপ্যুপপদ্যেত পৌরুষং নাম কর্হি চিত্ .
অন্বিষ্যমাণং তদপি দৈবমেবাবতিষ্ঠতে .. ১৩..
তস্মান্নির্বেদ এবেহ গন্তব্যঃ সুখমীপ্সতা .
সুখং স্বপিতি নির্বিণ্ণো নিরাশশ্চার্থসাধনে .. ১৪..
অহো সম্যক্ষুকেনোক্তং সর্বতঃ পরিমুচ্যতা .
প্রতিষ্ঠতা মহারণ্যং জনকস্য নিবেশনাত্ .. ১৫..
যঃ কামান্প্রাপ্নুযাত্সর্বান্যশ্চৈনান্কেবলাংস্ত্যজেত্ .
প্রাপনাত্সর্বকামানাং পরিত্যাগো বিশিষ্যতে .. ১৬..
নান্তং সর্ববিবিত্সানাং গতপূর্বোঽস্তি কশ্ চন .
শরীরে জীবিতে চৈব তৃষ্ণা মন্দস্য বর্ধতে .. ১৭..
নিবর্তস্ব বিবিত্সাভ্যঃ শাম্য নির্বিদ্য মামক .
অসকৃচ্চাসি নিকৃতো ন চ নির্বিদ্যসে তনো .. ১৮..
যদি নাহং বিনাশ্যস্তে যদ্যেবং রমসে মযা .
মা মাং যোজয লোভেন বৃথা ত্বং বিত্তকামুক .. ১৯..
সঞ্চিতং সঞ্চিতং দ্রব্যং নষ্টং তব পুনঃ পুনঃ .
কদা বিমোক্ষ্যসে মূঢ ধনেহাং ধনকামুক .. ২০..
অহো নু মম বালিশ্যং যোঽহং ক্রীদনকস্তব .
কিং নৈব জাতু পুরুষঃ পরেষাং প্রেষ্যতামিযাত্ .. ২১..
ন পূর্বে নাপরে জাতু কামানামন্তমাপ্নুবন্ .
ত্যক্ত্বা সর্বসমারম্ভান্প্রতিবুদ্ধোঽস্মি জাগৃমি .. ২২..
নূনং তে হৃদযং কামবজ্র সারমযং দৃধম্ .
যদনর্থশতাবিষ্টং শতধা ন বিদীর্যতে .. ২৩..
ত্যজামি কামত্বাং চৈব যচ্চ কিং চিত্প্রিযং তব .
তবাহং সুখমন্বিচ্ছন্নাত্মন্যুপলভে সুখম্ .. ২৪..
কামজানামি তে মূলং সঙ্কল্পাত্কিল জাযসে .
ন ত্বাং সঙ্কল্পযিষ্যামি সমূলো ন ভবিষ্যতি .. ২৫..
ঈহা ধনস্য ন সুখা লব্ধ্বা চিন্তা চ ভূযসী .
লব্ধানাশো যথা মৃত্যুর্লব্ধং ভবতি বা ন বা .. ২৬..
পরেত্য যো ন লভতে ততো দুঃখতরং নু কিম্ .
ন চ তুষ্যতি লব্ধেন ভূয এব চ মার্গতি .. ২৭..
অনুতর্ষুল এবার্থঃ স্বাদু গাঙ্গমিবোদকম্ .
মদ্বিলাপনমেতত্তু প্রতিবুদ্ধোঽস্মি সন্ত্যজ .. ২৮..
য ইমং মামকং দেহং ভূতগ্রামঃ সমাশ্রিতঃ .
স যাত্বিতো যথাকামং বসতাং বা যথাসুখম্ .. ২৯..
ন যুষ্মাস্বিহ মে প্রীতিঃ কামলোভানুসারিষু .
তস্মাদুত্সৃজ্য সর্বান্বঃ সত্যমেবাশ্রযাম্যহম্ .. ৩০..
সর্বভূতান্যহং দেহে পশ্যন্মনসি চাত্মনঃ .
যোগে বুদ্ধিং শ্রুতে সত্ত্বং মনো ব্রহ্মণি ধারযন্ .. ৩১..
বিহরিষ্যাম্যনাসক্তঃ সুখী লোকান্নিরামযঃ .
যথা মা ত্বং পুনর্নৈবং দুঃখেষু প্রনিধাস্যসি .. ৩২..
ত্বযা হি মে প্রনুন্নস্য গতিরন্যা ন বিদ্যতে .
তৃষ্ণা শোকশ্রমাণাং হি ত্বং কামপ্রভবঃ সদা .. ৩৩..
ধননাশোঽধিকং দুঃখং মন্যে সর্বমহত্তরম্ .
জ্ঞাতযো হ্যবমন্যন্তে মিত্রাণি চ ধনচ্যুতম্ .. ৩৪..
অবজ্ঞান সহস্রৈস্তু দোষাঃ কস্ততরাধনে .
ধনে সুখকলা যা চ সাপি দুঃখৈর্বিধীযতে .. ৩৫..
ধনমস্যেতি পুরুষং পুরা নিঘ্নন্তি দস্যবঃ .
ক্লিশ্যন্তি বিবিধৈর্দন্দৈর্নিত্যমুদ্বেজযন্তি চ .. ৩৬..
মন্দলোলুপতা দুঃখমিতি বুদ্ধিং চিরান্মযা .
যদ্যদালম্বসে কামতত্তদেবানুরুধ্যসে .. ৩৭..
অতত্ত্বজ্ঞোঽসি বালশ্চ দুস্তোষোঽপূরণোঽনলঃ .
নৈব ত্বং বেত্থ সুলভং নৈব ত্বং বেত্থ দুর্লভম্ .. ৩৮..
পাতালমিব দুষ্পূরো মাং দুঃখৈর্যোক্তুমিচ্ছসি .
নাহমদ্য সমাবেষ্টুং শক্যঃ কামপুনস্ত্বযা .. ৩৯..
নির্বেদমহমাসাদ্য দ্রব্যনাশাদ্যদৃচ্ছযা .
নির্বৃতিং পরমাং প্রাপ্য নাদ্য কামান্বিচিন্তযে .. ৪০..
অতিক্লেশান্সহামীহ নাহং বুধ্যাম্যবুদ্ধিমান্ .
নিকৃতো ধননাশেন শযে সর্বাঙ্গবিজ্বরঃ .. ৪১..
পরিত্যজামি কামত্বাং হিত্বা সর্বমনোগতীঃ .
ন ত্বং মযা পুনঃ কামনস্যোতেনেব রংস্যসে .. ৪২..
ক্ষমিষ্যেঽক্ষমমাণানাং ন হিংসিষ্যে চ হিংসিতঃ .
দ্বেষ্য মুক্তঃ প্রিযং বক্ষ্যাম্যনাদৃত্য তদপ্রিযম্ .. ৪৩..
তৃপ্তঃ স্বস্থেন্দ্রিযো নিত্যং যথা লব্ধেন বর্তযন্ .
ন সকামং করিষ্যামি ত্বামহং শত্রুমাত্মনঃ .. ৪৪..
নির্বেদং নির্বৃতিং তৃপ্তিং শান্তিং সত্যং দমং ক্ষমাম্ .
সর্বভূতদযাং চৈব বিদ্ধি মাং শরণাগতম্ .. ৪৫..
তস্মাত্কামশ্চ লোভশ্চ তৃষ্ণা কার্পণ্যমেব চ .
ত্যজন্তু মাং প্রতিষ্ঠন্তং সত্ত্বস্থো হ্যস্মি সাম্প্রতম্ .. ৪৬..
প্রহায কামং লোভং চ ক্রোধং পারুষ্যমেব চ .
নাদ্য লোভবশং প্রাপ্তো দুঃখং প্রাপ্স্যাম্যনাত্মবান্ .. ৪৭..
যদ্যত্ত্যজতি কামানাং তত্সুখস্যাভিপূর্যতে .
কামস্য বশগো নিত্যং দুঃখমেব প্রপদ্যতে .. ৪৮..
কামান্ব্যুদস্য ধুনুতে যত্কিং চিত্পুরুষো রজঃ .
কামক্রোধোদ্ভবং দুঃখমহ্রীররতিরেব চ .. ৪৯..
এষ ব্রহ্ম প্রবিষ্টোঽহং গ্রীস্মে শীতমিব হ্রদম্ .
শাম্যামি পরিনির্বামি সুখমাসে চ কেবলম্ .. ৫০..
যচ্চ কামসুখং লোকে যচ্চ দিব্যং মহত্সুখম্ .
তৃষ্ণা ক্ষযসুখস্যৈতে নার্হতঃ সোদশীং কলাম্ .. ৫১..
আত্মনা সপ্তমং কামং হত্বা শত্রুমিবোত্তমম্ .
প্রাপ্যাবধ্যং ব্রহ্ম পুরং রাজেব স্যামহং সুখী .. ৫২..
এতাং বুদ্ধিং সমাস্থায মঙ্কির্নির্বেদমাগতঃ .
সর্বান্কামান্পরিত্যজ্য প্রাপ্য ব্রহ্ম মহত্সুখম্ .. ৫৩..
দম্য নাশ কৃতে মঙ্কিরমরত্বং কিলাগমত্ .
অছিনত্কামমূলং স তেন প্রাপ মহত্সুখম্ .. ৫৪..

.. ইতি মঙ্কিগীতা সমাপ্তা ..