ব্রাহ্মণগীতা

  .. ব্রাহ্মণগীতা..

২১
 ব্র্
অত্রাপ্যুদাহরন্তীমমিতিহাসং পুরাতনম্ .
নিবোধ দশ হোতৄণাং বিধানমিহ যাদৃশম্ .. ১..
সর্বমেবাত্র বিজ্ঞেযং চিত্তং জ্ঞানমবেক্ষতে .
রেতঃ শরীরভৃত্কাযে বিজ্ঞাতা তু শরীরভৃত্ .. ২..
শরীরভৃদ্গার্হপত্যস্তস্মাদন্যঃ প্রণীযতে .
ততশ্চাহবনীযস্তু তস্মিন্সঙ্ক্ষিপ্যতে হবিঃ .. ৩..
ততো বাচস্পতির্জজ্ঞে সমানঃ পর্যবেক্ষতে .
রূপং ভবতি বৈ ব্যক্তং তদনুদ্রবতে মনঃ .. ৪..
 ব্রাহ্মনী
কস্মাদ্বাগভবত্পূর্বং কস্মাত্পশ্চান্মনোঽভবত্ .
মনসা চিন্তিতং বাক্যং যদা সমভিপদ্যতে .. ৫..
কেন বিজ্ঞানযোগেন মতিশ্চিত্তং সমাস্থিতা .
সমুন্নীতা নাধ্যগচ্ছত্কো বৈনাং প্রতিষেধতি .. ৬..
 ব্র্
তামপানঃ পতির্ভূত্বা তস্মাত্প্রেষ্যত্যপানতাম্ .
তাং মতিং মনসঃ প্রাহুর্মনস্তস্মাদবেক্ষতে .. ৭..
প্রশ্নং তু বান্মনসোর্মাং যস্মাত্ত্বমনুপৃচ্ছসি .
তস্মাত্তে বর্তযিষ্যামি তযোরেব সমাহ্বযম্ .. ৮..
উভে বান্মনসী গত্বা ভূতাত্মানমপৃচ্ছতাম্ .
আবযোঃ শ্রেষ্ঠমাচক্ষ্ব ছিন্ধি নৌ সংশযং বিভো .. ৯..
মন ইত্যেব ভগবাংস্তদা প্রাহ সরস্বতীম্ .
অহং বৈ কামধুক্তুভ্যমিতি তং প্রাহ বাগথ .. ১০..
স্থাবরং জঙ্গমং চৈব বিদ্ধ্যুভে মনসী মম .
স্থাবরং মত্সকাশে বৈ জঙ্গমং বিষযে তব .. ১১..
যস্তু তে বিষযং গচ্ছেন্মন্ত্রো বর্ণঃ স্বরোঽপি বা .
তন্মনো জঙ্গমং নাম তস্মাদসি গরীযসী .. ১২..
যস্মাদসি চ মা বোচঃ স্বযমভ্যেত্য শোভনে .
তস্মাদুচ্ছ্বাসমাসাদ্য ন বক্ষ্যসি সরস্বতি .. ১৩..
প্রাণাপানান্তরে দেবী বাগ্বৈ নিত্যং স্ম তিষ্ঠতি .
প্রের্যমাণা মহাভাগে বিনা প্রাণমপানতী .
প্রজাপতিমুপাধাবত্প্রসীদ ভগবন্নিতি .. ১৪..
ততঃ প্রাণঃ প্রাদুরভূদ্বাচমাপ্যাযযন্পুনঃ .
তমাদুচ্ছ্বাসমাসাদ্য ন বাগ্বদতি কর্হি চিত্ .. ১৫..
ঘোষিণী জাতনির্ঘোষা নিত্যমেব প্রবর্ততে .
তযোরপি চ ঘোষিণ্যোর্নির্ঘোষৈব গরীযসী .. ১৬..
গৌরিব প্রস্রবত্যেষা রসমুত্তমশালিনী .
সততং স্যন্দতে হ্যেষা শাশ্বতং ব্রহ্মবাদিনী .. ১৭..
দিব্যাদিব্য প্রভাবেন ভারতী গৌঃ শুচিস্মিতে .
এতযোরন্তরং পশ্য সূক্ষ্মযোঃ স্যন্দমানযোঃ .. ১৮..
অনুত্পন্নেষু বাক্যেষু চোদ্যমানা সিসৃক্ষযা .
কিং নু পূর্বং ততো দেবী ব্যাজহার সরস্বতী .. ১৯..
প্রাণেন যা সম্ভবতে শরীরে
প্রাণাদপানম্প্রতিপদ্যতে চ .
উদান ভূতা চ বিসৃজ্য দেহং
ব্যানেন সর্বং দিবমাবৃণোতি .. ২০..
ততঃ সমানে প্রতিতিষ্ঠতীহ
ইত্যেব পূর্বং প্রজজল্প চাপি .
তস্মান্মনঃ স্থাবরত্বাদ্বিশিষ্টং
তথা দেবী জঙ্গমত্বাদ্বিশিষ্টা .. ২১..
 ২২
 ব্র্
অত্রাপ্যুদাহরন্তীমমিতিহাসং পুরাতনম্ .
সুভগে সপ্ত হোতৄণাং বিধানমিহ যাদৃশম্ .. ১..
ঘ্রাণং চক্ষুশ্চ জিহ্বা চ ত্বক্ষ্রোত্রং চৈব পঞ্চমম্ .
মনো বুদ্ধিশ্চ সপ্তৈতে হোতারঃ পৃথগাশ্রিতাঃ .. ২..
সূক্ষ্মেঽবকাশে সন্তস্তে ন পশ্যন্তীতরেতরম্ .
এতান্বৈ সপ্ত হোতৄংস্ত্বং স্বভাবাদ্বিদ্ধি শোভনে .. ৩..
 ব্রাহ্মনী
সূক্ষ্মেঽবকাশে সন্তস্তে কথং নান্যোন্য দর্শিনঃ .
কথং স্বভাবা ভগবন্নেতদাচক্ষ্ব মে বিভো .. ৪..
 ব্র্
গুণাজ্ঞানমবিজ্ঞানং গুণি জ্ঞানমভিজ্ঞতা .
পরস্পরগুণানেতে ন বিজানন্তি কর্হি চিত্ .. ৫..
জিহ্বা চক্ষুস্তথা শ্রোত্রং ত্বন্মনো বুদ্ধিরেব চ .
ন গন্ধানধিগচ্ছন্তি ঘ্রাণস্তানধিগচ্ছতি .. ৬..
ঘ্রাণং চক্ষুস্তথা শ্রোত্রং ত্বন্মনো বুদ্ধিরেব চ .
ন রসানধিগচ্ছন্তি জিহ্বা তানদিঘচ্ছতি .. ৭..
ঘ্রাণং জিহ্বা তথা শ্রোত্রং ত্বন্মনো বুদ্ধিরেব চ .
ন রূপাণ্যধিগচ্ছন্তি চক্ষুস্তান্যধিগচ্ছতি .. ৮..
ঘ্রাণং জিহ্বা চ চক্ষুশ্চ শ্রোত্রং বুদ্ধির্মনস্তথা .
ন স্পর্শানধিগচ্ছন্তি ত্বক্চ তানধিগচ্ছতি .. ৯..
ঘ্রাণং জিহ্বা চ চক্ষুশ্ চ ত্বন্মনো বুদ্ধিরেব চ .
ন শব্দানধিগচ্ছন্তি শ্রোত্রং তানধিগচ্ছতি .. ১০..
ঘ্রাণং জিহ্বা চ চক্ষুশ্চ ত্বক্ষ্রোত্রং বুদ্ধিরেব চ .
সংশযান্নাধিগচ্ছন্তি মনস্তানধিগচ্ছতি .. ১১..
ঘ্রাণং জিহ্বা চ চক্ষুশ্চ ত্বক্ষ্রোত্রং মন এব চ .
ন নিষ্ঠামধিগচ্ছন্তি বুদ্ধিস্তাম্ অধিগচ্ছতি .. ১২..
অত্রাপ্যুদাহরন্তীমমিতিহাসং পুরাতনম্ .
ইন্দ্রিযাণাং চ সংবাদং মনসশ্চৈব ভামিনি .. ১৩..
 মনস্
ন ঘ্রাতি মামৃতে ঘ্রাণং রসং জিহ্বা ন বুধ্যতে .
রূপং চক্ষুর্ন গৃহ্ণাতি ত্বক্স্পর্শং নাববুধ্যতে .. ১৪..
ন শ্রোত্রং বুধ্যতে শব্দং মযা হীনং কথং চন .
প্রবরং সর্বভূতানামহমস্মি সনাতনম্ .. ১৫..
অগারাণীব শূন্যানি শান্তার্চিষ ইবাগ্নযঃ .
ইন্দ্রিযাণি ন ভাসন্তে মযা হীনানি নিত্যশঃ .. ১৬..
কাষ্ঠানীবার্দ্র শুষ্কাণি যতমানৈরপীন্দ্রিযৈঃ .
গুণার্থান্নাধিগচ্ছন্তি মামৃতে সর্বজন্তবঃ .. ১৭..
 ইন্দ্রিযানি
এবমেতদ্ভবেত্সত্যং যথৈতন্মন্যতে ভবান্ .
ঋতেঽস্মানস্মদর্থাংস্তু ভোগান্ভুঙ্ক্তে ভবান্যদি .. ১৮..
যদ্যস্মাসু প্রলীনেষু তর্পণং প্রাণধারণম্ .
ভোগান্ভুঙ্ক্তে রসান্ভুঙ্ক্তে যথৈতন্মন্যতে তথা .. ১৯..
অথ বাস্মাসু লীনেষু তিষ্ঠত্সু বিষযেষু চ .
যদি সঙ্কল্পমাত্রেণ ভুঙ্ক্তে ভোগান্যথার্থবত্ .. ২০..
অথ চেন্মন্যসে সিদ্ধিমস্মদর্থেষু নিত্যদা .
ঘ্রাণেন রূপমাদত্স্ব রসমাদত্স্ব চক্ষুষা .. ২১..
শ্রোত্রেণ গন্ধমাদত্স্ব নিষ্ঠামাদত্স্ব জিহ্বযা .
ত্বচা চ শব্দমাদত্স্ব বুদ্ধ্যা স্পর্শমথাপি চ .. ২২..
বলবন্তো হ্যনিযমা নিযমা দুর্বলীযসাম্ .
ভোগানপূর্বানাদত্স্ব নোচ্ছিষ্টং ভোক্তুমর্হসি .. ২৩..
যথা হি শিষ্যঃ শাস্তারং শ্রুত্যর্থমভিধাবতি .
ততঃ শ্রুতমুপাদায শ্রুতার্থমুপতিষ্ঠতি .. ২৪..
বিষযানেবমস্মাভির্দর্শিতানভিমন্যসে .
অনাগতানতীতাংশ্চ স্বপ্নে জাগরণে তথা .. ২৫..
বৈমনস্যং গতানাং চ জন্তূনামল্পচেতসাম্ .
অস্মদর্থে কৃতে কার্যে দৃশ্যতে প্রাণধারণম্ .. ২৬..
বহূনপি হি সঙ্কল্পান্মত্বা স্বপ্নানুপাস্য চ .
বুভুক্ষযা পীড্যমানো বিষযানেব ধাবসি .. ২৭..
অগারমদ্বারমিব প্রবিশ্য
সঙ্কল্পভোগো বিষযানবিন্দন্ .
প্রাণক্ষযে শান্তিমুপৈতি নিত্যং
দারু ক্ষযেঽগ্নির্জ্বলিতো যথৈব .. ২৮..
কামং তু নঃ স্বেষু গুণেষু সঙ্গঃ
কামচ নান্যোন্য গুণোপলব্ধিঃ .
অস্মানৃতে নাস্তি তবোপলব্ধিস্
ত্বামপ্যৃতেঽস্মান্ন ভজেত হর্ষঃ .. ২৯..
 ২৩
 ব্র্
অত্রাপ্যুদাহরন্তীমমিতিহাসং পুরাতনম্ .
সুভগে পঞ্চ হোতৄণাং বিধানমিহ যাদৃশম্ .. ১..
প্রাণাপানাবুদানশ্চ সমানো ব্যান এব চ .
পঞ্চ হোতৄনথৈতান্বৈ পরং ভাবং বিদুর্বুধাঃ .. ২..
 ব্রাহ্মনী
স্বভাবাত্সপ্ত হোতার ইতি তে পূর্বিকা মতিঃ .
যথা বৈ পঞ্চ হোতারঃ পরো ভাবস্তথোচ্যতাম্ .. ৩..
 ব্র্
প্রাণেন সম্ভৃতো বাযুরপানো জাযতে ততঃ .
অপানে সম্ভৃতো বাযুস্ততো ব্যানঃ প্রবর্ততে .. ৪..
ব্যানেন সম্ভৃতো বাযুস্তদোদানঃ প্রবর্ততে .
উদানে সম্ভৃতো বাযুঃ সমানঃ সম্প্রবর্ততে .. ৫..
তেঽপৃচ্ছন্ত পুরা গত্বা পূর্বজাতং প্রজাপতিম্ .
যো নো জ্যেষ্ঠস্তমাচক্ষ্ব স নঃ শ্রেষ্ঠো ভবিষ্যতি .. ৬..
 ব্রহ্মা
যস্মিন্প্রলীনে প্রলযং ব্রজন্তি
সর্বে প্রাণাঃ প্রাণভৃতাং শরীরে .
যস্মিন্প্রচীর্ণে চ পুনশ্ চরন্তি
স বৈ শ্রেষ্ঠো গচ্ছত যত্র কামঃ .. ৭..
 প্রান
মযি প্রলীনে প্রলযং ব্রজন্তি
সর্বে প্রাণাঃ প্রাণভৃতাং শরীরে .
মযি প্রচীর্ণে চ পুনশ্ চরন্তি
শ্রেষ্ঠো হ্যহং পশ্যত মাং প্রলীনম্ .. ৮..
 ব্রাহ্মন
প্রাণঃ প্রলীযত ততঃ পুনশ্চ প্রচচার হ .
সমানশ্চাপ্যুদানশ্চ বচোঽব্রূতাং ততঃ শুভে .. ৯..
ন ত্বং সর্বমিদং ব্যাপ্য তিষ্ঠসীহ যথা বযম্ .
ন ত্বং শ্রেষ্ঠোঽসি নঃ প্রাণ অপানো হি বশে তব .
প্রচচার পুনঃ প্রাণস্তমপানোঽভ্যভাষত .. ১০..
মযি প্রলীনে প্রলযং ব্রজন্তি
সর্বে প্রাণাঃ প্রাণভৃতাং শরীরে .
মযি প্রচীর্ণে চ পুনশ্ চরন্তি
শ্রেষ্ঠো হ্যহং পশ্যত মাং প্রলীনম্ .. ১১..
ব্যানশ্চ তমুদানশ্চ ভাষমাণমথোচতুঃ .
অপান ন ত্বং শ্রেষ্ঠোঽসি প্রাণো হি বশগস্তব .. ১২..
অপানঃ প্রচচারাথ ব্যানস্তং পুনরব্রবীত্ .
শ্রেষ্ঠোঽহমস্মি সর্বেষাং শ্রূযতাং যেন হেতুনা .. ১৩..
মযি প্রলীনে প্রলযং ব্রজন্তি
সর্বে প্রাণাঃ প্রাণভৃতাং শরীরে .
মযি প্রচীর্ণে চ পুনশ্ চরন্তি
শ্রেষ্ঠো হ্যহং পশ্যত মাং প্রলীনম্ .. ১৪..
প্রালীযত ততো ব্যানঃ পুনশ্চ প্রচচার হ .
প্রাণাপানাবুদানশ্চ সমানশ্ চ তমব্রুবন্ .
ন ত্বং শ্রেষ্ঠোঽসি নো ব্যান সমানো হি বশে তব .. ১৫..
প্রচচার পুনর্ব্যানঃ সমানঃ পুনরব্রবীত্ .
শ্রেষ্ঠোঽহমস্মি সর্বেষাং শ্রূযতাং যেন হেতুনা .. ১৬..
মযি প্রলীনে প্রলযং ব্রজন্তি
সর্বে প্রাণাঃ প্রাণভৃতাং শরীরে .
মযি প্রচীর্ণে চ পুনশ্ চরন্তি
শ্রেষ্ঠো হ্যহং পশ্যত মাং প্রলীনম্ .. ১৭..
ততঃ সমানঃ প্রালিল্যে পুনশ্চ প্রচচার হ .
প্রাণাপানাবুদানশ্চ ব্যানশ্ চৈব তমব্রুবন্ .
সমানন ত্বং শ্রেষ্ঠোঽসি ব্যান এব বশে তব .. ১৮..
সমানঃ প্রচচারাথ উদানস্তমুবাচ হ .
শ্রেষ্ঠোঽহমস্মি সর্বেষাং শ্রূযতাং যেন হেতুনা .. ১৯..
মযি প্রলীনে প্রলযং ব্রজন্তি
সর্বে প্রাণাঃ প্রাণভৃতাং শরীরে .
মযি প্রচীর্ণে চ পুনশ্ চরন্তি
শ্রেষ্ঠো হ্যহং পশ্যত মাং প্রলীনম্ .. ২০..
ততঃ প্রালীযতোদানঃ পুনশ্চ প্রচচার হ .
প্রাণাপানৌ সমানশ্চ ব্যানশ্ চৈব তমব্রুবন্ .
উদান ন ত্বং শ্রেষ্ঠোঽসি ব্যান এব বশে তব .. ২১..
ততস্তানব্রবীদ্ব্রহ্মা সমবেতান্প্রজাপতিঃ .
সর্বে শ্রেষ্ঠা ন বা শ্রেষ্ঠাঃ সর্বে চান্যোন্য ধর্মিণঃ .
সর্বে স্ববিষযে শ্রেষ্ঠাঃ সর্বে চান্যোন্য রক্ষিণঃ .. ২২..
একঃ স্থিরশ্চাস্থিরশ্চ বিশেষাত্পঞ্চ বাযবঃ .
এক এব মমৈবাত্মা বহুধাপ্যুপচীযতে .. ২৩..
পরস্পরস্য সুহৃদো ভাবযন্তঃ পরস্পরম্ .
স্বস্তি ব্রজত ভদ্রং বো ধারযধ্বং পরস্পরম্ .. ২৪..
 ২৪
 ব্রাহ্মন
অত্রাপ্যুদাহরন্তীমমিতিহাসং পুরাতনম্ .
নারদস্য চ সংবাদমৃষের্দেবমতস্য চ .. ১..
 দেবমত
জন্তোঃ সঞ্জাযমানস্য কিং নু পূর্বং প্রবর্ততে .
প্রাণোঽপানঃ সমানো বা ব্যানো বোদান এব চ .. ২..
 নারদ
যেনাযং সৃজ্যতে জন্তুস্ততোঽন্যঃ পূর্বমেতি তম্ .
প্রাণদ্বন্দ্বং চ বিজ্ঞেযং তির্যগং চোর্ধ্বগং চ যত্ .. ৩..
 দ্
কেনাযং সৃজ্যতে জন্তুঃ কশ্চান্যঃ পূর্বমেতি তম্ .
প্রাণদ্বন্দ্বং চ মে ব্রূহি তির্যগূর্ধ্বং চ নিশ্চযাত্ .. ৪..
 ন্
সঙ্কল্পাজ্জাযতে হর্ষঃ শব্দাদপি চ জাযতে .
রসাত্সঞ্জাযতে চাপি রূপাদপি চ জাযতে .. ৫..
স্পর্শাত্সঞ্জাযতে চাপি গন্ধাদপি চ জাযতে .
এতদ্রূপমুদানস্য হর্ষো মিথুন সম্ভবঃ .. ৬..
কামাত্সঞ্জাযতে শুক্রং কামাত্সঞ্জাযতে রসঃ .
সমানব্যান জনিতে সামান্যে শুক্রশোণিতে .. ৭..
শুক্রাচ্ছোণিত সংসৃষ্টাত্পূর্বং প্রাণঃ প্রবর্ততে .
প্রাণেন বিকৃতে শুক্রে ততোঽপানঃ প্রবর্ততে .. ৮..
প্রাণাপানাবিদং দ্বন্দ্বমবাক্চোর্ধ্বং চ গচ্ছতঃ .
ব্যানঃ সমানশ্চৈবোভৌ তির্যগ্দ্বন্দ্বত্বমুচ্যতে .. ৯..
অগ্নির্বৈ দেবতাঃ সর্বা ইতি বেদস্য শাসনম্ .
সঞ্জাযতে ব্রাহ্মণেষু জ্ঞানং বুদ্ধিসমন্বিতম্ .. ১০..
তস্য ধূমস্তমো রূপং রজো ভস্ম সুরেতসঃ .
সত্ত্বং সঞ্জাযতে তস্য যত্র প্রক্ষিপ্যতে হবিঃ .. ১১..
আঘারৌ সমানো ব্যানশ্চেতি যজ্ঞবিদো বিদুঃ .
প্রাণাপানাবাজ্যভাগৌ তযোর্মধ্যে হুতাশনঃ .
এতদ্রূপমুদানস্য পরমং ব্রাহ্মণা বিদুঃ .. ১২..
নির্দ্বন্দ্বমিতি যত্ত্বেতত্তন্মে নিগদতঃ শৃণু .. ১৩..
অহোরাত্রমিদং দ্বন্দ্বং তযোর্মধ্যে হুতাশনঃ .
এতদ্রূপমুদানস্য পরমং ব্রাহ্মণা বিদুঃ .. ১৪..
উভে চৈবাযনে দ্বন্দ্বং তযোর্মধ্যে হুতাশনঃ .
এতদ্রূপমুদানস্য পরমং ব্রাহ্মণা বিদুঃ .. ১৫..
উভে সত্যানৃতে দ্বন্দ্বং তযোর্মধ্যে হুতাশনঃ .
এতদ্রূপমুদানস্য পরমং ব্রাহ্মণা বিদুঃ .. ১৬..
উভে শুভাশুভে দ্বন্দ্বং তযোর্মধ্যে হুতাশনঃ .
এতদ্রূপমুদানস্য পরমং ব্রাহ্মণা বিদুঃ .. ১৭..
সচ্চাসচ্চৈব তদ্দ্বন্দ্বং তযোর্মধ্যে হুতাশনঃ .
এতদ্রূপমুদানস্য পরমং ব্রাহ্মণা বিদুঃ .. ১৮..
প্রথমং সমানো ব্যানো ব্যস্যতে কর্ম তেন তত্ .
তৃতীযং তু সমানেন পুনরেব ব্যবস্যতে .. ১৯..
শান্ত্যর্থং বামদেবং চ শান্তির্ব্রহ্ম সনাতনম্ .
এতদ্রূপমুদানস্য পরমং ব্রাহ্মণা বিদুঃ .. ২০..
 ২৫
 ব্রাহ্মন
অত্রাপ্যুদাহরন্তীমমিতিহাসং পুরাতনম্ .
চাতুর্হোত্র বিধানস্য বিধানমিহ যাদৃশম্ .. ১..
তস্য সর্বস্য বিধিবদ্বিধানমুপদেক্ষ্যতে .
শৃণু মে গদতো ভদ্রে রহস্যমিদমুত্তমম্ .. ২..
করণং কর্ম কর্তা চ মোক্ষ ইত্যেব ভামিনি .
চত্বার এতে হোতারো যৈরিদং জগদাবৃতম্ .. ৩..
হোতৄণাং সাধনং চৈব শৃণু সর্বমশেষতঃ .
ঘ্রাণং জিহ্বা চ চক্ষুশ্চ ত্বক্চ শ্রোত্রং চ পঞ্চমম্ .
মনো বুদ্ধিশ্চ সপ্তৈতে বিজ্ঞেযা গুণহেতবঃ .. ৪..
গন্ধো রসশ্চ রূপং চ শব্দঃ স্পর্শশ্চ পঞ্চমঃ .
মন্তব্যমথ বোদ্ধব্যং সপ্তৈতে কর্মহেতবঃ .. ৫..
ঘ্রাতা ভক্ষযিতা দ্রষ্টা স্প্রষ্টা শ্রোতা চ পঞ্চমঃ .
মন্তা বোদ্ধা চ সপ্তৈতে বিজ্ঞেযাঃ কর্তৃহেতবঃ .. ৬..
স্বগুণং ভক্ষযন্ত্যেতে গুণবন্তঃ শুভাশুভম্ .
অহং চ নির্গুণোঽত্রেতি সপ্তৈতে মোক্ষহেতবঃ .. ৭..
বিদুষাং বুধ্যমানানাং স্বং স্বস্থানং যথাবিধি .
গুণাস্তে দেবতা ভূতাঃ সততং ভুঞ্জতে হবিঃ .. ৮..
অদন্হ্যবিদ্বানন্নানি মমত্বেনোপপদ্যতে .
আত্মার্থং পাচযন্নিত্যং মমত্বেনোপহন্যতে .. ৯..
অভক্ষ্য ভক্ষণং চৈব মদ্য পানং চ হন্তি তম্ .
স চান্নং হন্তি তচ্চান্নং স হত্বা হন্যতে বুধঃ .. ১০..
অত্তা হ্যন্নমিদং বিদ্বান্পুনর্জনযতীশ্বরঃ .
স চান্নাজ্জাযতে তস্মিন্সূক্ষ্মো নাম ব্যতিক্রমঃ .. ১১..
মনসা গম্যতে যচ্চ যচ্চ বাচা নিরুধ্যতে .
শ্রোত্রেণ শ্রূযতে যচ্চ চক্ষুষা যচ্চ দৃশ্যতে .. ১২..
স্পর্শেন স্পৃশ্যতে যচ্চ ঘ্রাণেন ঘ্রাযতে চ যত্ .
মনঃষষ্ঠানি সংযম্য হবীংষ্যেতানি সর্বশঃ .. ১৩..
গুণবত্পাবকো মহ্যং দীপ্যতে হব্যবাহনঃ .
যোগযজ্ঞঃ প্রবৃত্তো মে জ্ঞানব্রহ্ম মনোদ্ভবঃ .
প্রাণস্তোত্রোঽপান শস্ত্রঃ সর্বত্যাগসু দক্ষিণঃ .. ১৪..
কর্মানুমন্তা ব্রহ্মা মে কর্তাধ্বর্যুঃ কৃতস্তুতিঃ .
কৃতপ্রশাস্তা তচ্ছাস্ত্রমপবর্গোঽস্য দক্ষিণা .. ১৫..
ঋচশ্চাপ্যত্র শংসন্তি নারাযণ বিদো জনাঃ .
নারাযণায দেবায যদবধ্নন্পশূন্পুরা .. ১৬..
তত্র সামানি গাযন্তি তানি চাহুর্নিদর্শনম্ .
দেবং নারাযণং ভীরু সর্বাত্মানং নিবোধ মে .. ১৭..
 ২৬
 ব্র্
একঃ শাস্তা ন দ্বিতীযোঽস্তি শাস্তা
যথা নিযুক্তোঽস্মি তথা চরামি .
হৃদ্যেষ তিষ্ঠন্পুরুষঃ শাস্তি শাস্তা
তেনৈব যুক্তঃ প্রবণাদিবোদকম্ .. ১..
একো গুরুর্নাস্তি ততো দ্বিতীযো
যো হৃচ্ছযস্তমহমনুব্রবীমি .
তেনানুশিষ্টা গুরুণা সদৈব
পরাভূতা দানবাঃ সর্ব এব .. ২..
একো বন্ধুর্নাস্তি ততো দ্বিতীযো
যো হৃচ্ছযস্তমহমনুব্রবীমি .
তেনানুশিষ্টা বান্ধবা বন্ধুমন্তঃ
সপ্তর্ষযঃ সপ্ত দিবি প্রভান্তি .. ৩..
একঃ শ্রোতা নাস্তি ততো দ্বিতীযো
যো হৃচ্ছযস্তমহমনুব্রবীমি .
তস্মিন্গুরৌ গুরু বাসং নিরুষ্য
শক্রো গতঃ সর্বলোকামরত্বম্ .. ৪..
একো দ্বেষ্টা নাস্তি ততো দ্বিতীযো
যো হৃচ্ছযস্তমহমনুব্রবীমি .
তেনানুশিষ্টা গুরুণা সদৈব
লোকদ্বিষ্টাঃ পন্নগাঃ সর্ব এব .. ৫..
অত্রাপ্যুদাহরন্তীমমিতিহাসং পুরাতনম্ .
প্রজাপতৌ পন্নগানাং দেবর্ষীণাং চ সংবিদম্ .. ৬..
দেবর্ষযশ্চ নাগাশ্চ অসুরাশ্চ প্রজাপতিম্ .
পর্যপৃচ্ছন্নুপাসীনাঃ শ্রেযো নঃ প্রোচ্যতাম্ ইতি .. ৭..
তেষাং প্রোবাচ ভগবাঞ্শ্রেযঃ সমনুপৃচ্ছতাম্ .
ওমিত্যেকাক্ষরং ব্রহ্ম তে শ্রুত্বা প্রাদ্রবন্দিশঃ .. ৮..
তেষাং প্রাদ্রবমাণানামুপদেশার্থমাত্মনঃ .
সর্পাণাং দশনে ভাবঃ প্রবৃত্তঃ পূর্বমেব তু .. ৯..
অসুরাণাং প্রবৃত্তস্তু দম্ভভাবঃ স্বভাবজঃ .
দানং দেবা ব্যবসিতা দমমেব মহর্ষযঃ .. ১০..
একং শাস্তারমাসাদ্য শব্দেনৈকেন সংস্কৃতাঃ .
নানা ব্যবসিতাঃ সর্বে সর্পদেবর্ষিদানবাঃ .. ১১..
শৃণোত্যযং প্রোচ্যমানং গৃহ্ণাতি চ যথাতথম্ .
পৃচ্ছতস্তাবতো ভূযো গুরুরন্যোঽনুমন্যতে .. ১২..
তস্য চানুমতে কর্ম ততঃ পশ্চাত্প্রবর্ততে .
গুরুর্বোদ্ধা চ শত্রুশ্চ দ্বেষ্টা চ হৃদি সংশ্রিতঃ .. ১৩..
পাপেন বিচরঁল্লোকে পাপচারী ভবত্যযম্ .
শুভেন বিচরঁল্লোকে শুভচারী ভবত্যুত .. ১৪..
কামচারী তু কামেন য ইন্দ্রিযসুখে রতঃ .
ব্রতবারী সদৈবৈষ য ইন্দ্রিযজযে রতঃ .. ১৫..
অপেতব্রতকর্মা তু কেবলং ব্রহ্মণি শ্রিতঃ .
ব্রহ্মভূতশ্চরঁল্লোকে ব্রহ্ম চারী ভবত্যযম্ .. ১৬..
ব্রহ্মৈব সমিধস্তস্য ব্রহ্মাগ্নির্ব্রহ্ম সংস্তরঃ .
আপো ব্রহ্ম গুরুর্ব্রহ্ম স ব্রহ্মণি সমাহিতঃ .. ১৭..
এতদেতাদৃশং সূক্ষ্মং ব্রহ্মচর্যং বিদুর্বুধাঃ .
বিদিত্বা চান্বপদ্যন্ত ক্ষেত্রজ্ঞেনানুদর্শিনঃ .. ১৮..
 ২৭
 ব্র্
সঙ্কল্পদংশ মশকং শোকহর্ষহিমাতপম্ .
মোহান্ধ কারতিমিরং লোভব্যাল সরীসৃপম্ .. ১..
বিষযৈকাত্যযাধ্বানং কামক্রোধবিরোধকম্ .
তদতীত্য মহাদুর্গং প্রবিষ্টোঽস্মি মহদ্বনম্ .. ২..
 ব্রাহ্মনী
ক্ব তদ্বনং মহাপ্রাজ্ঞ কে বৃক্ষাঃ সরিতশ্চ কাঃ .
গিরযঃ পর্বতাশ্ চৈব কিযত্যধ্বনি তদ্বনম্ .. ৩..
ন তদস্তি পৃথগ্ভাবে কিং চিদন্যত্ততঃ সমম্ .
ন তদস্ত্যপৃথগ্ভাবে কিং চিদ্দূরতরং ততঃ .. ৪..
তস্মাদ্ধ্রস্বতরং নাস্তি ন ততোঽস্তি বৃহত্তরম্ .
নাস্তি তস্মাদ্দুঃখতরং নাস্ত্যন্যত্তত্সমং সুখম্ .. ৫..
ন তত্প্রবিশ্য শোচন্তি ন প্রহৃষ্যন্তি চ দ্বিজাঃ .
ন চ বিভ্যতি কেষাং চিত্তেভ্যো বিভ্যতি কে চ ন .. ৬..
তস্মিন্বনে সপ্ত মহাদ্রুমাশ্ চ
ফলানি সপ্তাতিথযশ্ চ সপ্ত .
সপ্তাশ্রমাঃ সপ্ত সমাধযশ্ চ
দীক্ষাশ্চ সপ্তৈতদরণ্যরূপম্ .. ৭..
পঞ্চ বর্ণানি দিব্যানি পুষ্পাণি চ ফলানি চ .
সৃজন্তঃ পাদপাস্তত্র ব্যাপ্য তিষ্ঠন্তি তদ্বনম্ .. ৮..
সুবর্ণানি দ্বিবর্ণানি পুষ্পাণি চ ফলানি চ .
সৃজন্তঃ পাদপাস্তত্র ব্যাপ্য তিষ্ঠন্তি তদ্বনম্ .. ৯..
চতুর্বর্ণাণি দিব্যানি পুষ্পাণি চ ফলানি চ .
সৃজন্তঃ পাদপাস্তত্র ব্যাপ্য তিষ্ঠন্তি তদ্বনম্ .. ১০..
শঙ্করাণিত্রি বর্ণানি পুষ্পাণি চ ফলানি চ .
সৃজন্তঃ পাদপাস্তত্র ব্যাপ্য তিষ্ঠন্তি তদ্বনম্ .. ১১..
সুরভীণ্যেকবর্ণানি পুষ্পাণি চ ফলানিচ .
সৃজন্তঃ পাদপাস্তত্র ব্যাপ্য তিষ্ঠন্তি তদ্বনম্ .. ১২..
বহূন্যব্যক্তবর্ণানি পুষ্পাণি চ ফলানিচ .
বিসৃজন্তৌ মহাবৃক্ষৌ তদ্বনং ব্যাপ্য তিষ্ঠতঃ .. ১৩..
একো হ্যগ্নিঃ সুমনা ব্রাহ্মণোঽত্র
পঞ্চেন্দ্রিযাণি সমিধশ্চাত্র সন্তি .
তেভ্যো মোক্ষাঃ সপ্ত ভবন্তি দীক্ষা
গুণাঃ ফলান্যতিথযঃ ফলাশাঃ .. ১৪..
আতিথ্যং প্রতিগৃহ্ণন্তি তত্র সপ্তমহর্ষযঃ .
অর্চিতেষু প্রলীনেষু তেষ্বন্যদ্রোচতে বনম্ .. ১৫..
প্রতিজ্ঞা বৃক্ষমফলং শান্তিচ্ছাযা সমন্বিতম্ .
জ্ঞানাশ্রযং তৃপ্তিতোযমন্তঃ ক্ষেত্রজ্ঞভাস্করম্ .. ১৬..
যোঽধিগচ্ছন্তি তত্সন্তস্তেষাং নাস্তি ভযং পুনঃ .
ঊর্ধ্বং চাবাক্চ তির্যক্চ তস্য নান্তোঽধিগম্যতে .. ১৭..
সপ্ত স্ত্রিযস্তত্র বসন্তি সদ্যো
অবাঙ্মুখা ভানুমত্যো জনিত্র্যঃ .
ঊর্ধ্বং রসানাং দদতে প্রজাভ্যঃ
সর্বান্যথা সর্বমনিত্যতাং চ .. ১৮..
তত্রৈব প্রতিতিষ্ঠন্তি পুনস্তত্রোদযন্তি চ .
সপ্ত সপ্তর্ষযঃ সিদ্ধা বসিষ্ঠপ্রমুখাঃ সহ .. ১৯..
যশো বর্চো ভগশ্চৈব বিজযঃ সিদ্ধিতেজসী .
এবমেবানুবর্তন্তে সপ্ত জ্যোতীংষি ভাস্করম্ .. ২০..
গিরযঃ পর্বতাশ্চৈব সন্তি তত্র সমাসতঃ .
নদ্যশ্চ সরিতো বারিবহন্ত্যো ব্রহ্ম সম্ভবম্ .. ২১..
নদীনাং সঙ্গমস্তত্র বৈতানঃ সমুপহ্বরে .
স্বাত্ম তৃপ্তা যতো যান্তি সাক্ষাদ্দান্তাঃ পিতামহম্ .. ২২..
কৃশাশাঃ সুব্রতাশাশ্চ তপসা দগ্ধকিল্বিষাঃ .
আত্মন্যাত্মানমাবেশ্য ব্রহ্মাণং সমুপাসতে .. ২৩..
ঋচমপ্যত্র শংসন্তি বিদ্যারণ্যবিদো জনাঃ .
তদরণ্যমভিপ্রেত্য যথা ধীরমজাযত .. ২৪..
এতদেতাদৃশং দিব্যমরণ্যং ব্রাহ্মণা বিদুঃ .
বিদিত্বা চান্বতিষ্ঠন্ত ক্ষেত্রজ্ঞেনানুদর্শিতম্ .. ২৫..
 ২৮
 ব্র্
গন্ধান্ন জিঘ্রামি রসান্ন বেদ্মি
রূপং ন পশ্যামি ন চ স্পৃশামি .
ন চাপি শব্দান্বিবিধাঞ্শৃণোমি
ন চাপি সঙ্কল্পমুপৈমি কিং চিত্ .. ১..
অর্থানিষ্টান্কামযতে স্বভাবঃ
সর্বান্দ্বেষ্যান্প্রদ্বিষতে স্বভাবঃ .
কামদ্বেষাবুদ্ভবতঃ স্বভাবাত্
প্রাণাপানৌ জন্তু দেহান্নিবেশ্য .. ২..
তেভ্যশ্চান্যাংস্তেষ্বনিত্যাংশ্চ ভাবান্
ভূতাত্মানং লক্ষযেযং শরীরে .
তস্মিংস্তিষ্ঠন্নাস্মি শক্যঃ কথং চিত্
কামক্রোধাভ্যাং জরযা মৃত্যুনা চ .. ৩..
অকামযানস্য চ সর্বকামান্
অবিদ্বিষাণস্য চ সর্বদোষান্ .
ন মে স্বভাবেষু ভবন্তি লেপাস্
তোযস্য বিন্দোরিব পুষ্করেষু .. ৪..
নিত্যস্য চৈতস্য ভবন্তি নিত্যা
নিরীক্ষমাণস্য বহূন্স্বভাবান্ .
ন সজ্জতে কর্মসু ভোগজালং
দিবীব সূর্যস্য মযূখজালম্ .. ৫..
অত্রাপ্যুদাহরন্তীমমিতিহাসং পুরাতনম্ .
অধ্বর্যু যতি সংবাদং তং নিবোধ যশস্বিনি .. ৬..
প্রোক্ষ্যমাণং পশুং দৃষ্ট্বা যজ্ঞকর্মণ্যথাব্রবীত্ .
যতিরধ্বর্যুমাসীনো হিংসেযমিতি কুত্সযন্ .. ৭..
তমধ্বর্যুঃ প্রত্যুবাচ নাযং ছাগো বিনশ্যতি .
শ্রেযসা যোক্ষ্যতে জন্তুর্যদি শ্রুতিরিযং তথা .. ৮..
যো হ্যস্য পার্থিবো ভাগঃ পৃথিবীং স গমিষ্যতি .
যদস্য বারিজং কিং চিদপস্তত্প্রতিপদ্যতে .. ৯..
সূর্যং চক্ষুর্দিশঃ শ্রোত্রে প্রাণোঽস্য দিবমেব চ .
আগমে বর্তমানস্য ন মে দোষোঽস্তি কশ্ চন .. ১০..
 যতি
প্রাণৈর্বিযোগে ছাগস্য যদি শ্রেযঃ প্রপশ্যসি .
ছাগার্থে বর্ততে যজ্ঞো ভবতঃ কিং প্রযোজনম্ .. ১১..
অনু ত্বা মন্যতাং মাতা পিতা ভ্রাতা সখাপি চ .
মন্ত্রযস্বৈনমুন্নীয পরবন্তং বিশেষতঃ .. ১২..
য এবমনুমন্যেরংস্তান্ভবান্প্রষ্টুমর্হতি .
তেষামনুমতং শ্রুত্বা শক্যা কর্তুং বিচারণা .. ১৩..
প্রাণা অপ্যস্য ছাগস্য প্রাপিতাস্তে স্বযোনিষু .
শরীরং কেবলং শিষ্টং নিশ্চেষ্টমিতি মে মতিঃ .. ১৪..
ইন্ধনস্য তু তুল্যেন শরীরেণ বিচেতসা .
হিংসা নির্বেষ্টু কামানামিন্ধনং পশুসঞ্জ্ঞিতম্ .. ১৫..
অহিংসা সর্বধর্মাণামিতি বৃদ্ধানুশাসনম্ .
যদহিংস্রং ভবেত্কর্ম তত্কার্যমিতি বিদ্মহে .. ১৬..
অহিংসেতি প্রতিজ্ঞেযং যদি বক্ষ্যাম্যতঃ পরম্ .
শক্যং বহুবিধং বক্তুং ভবতঃ কার্যদূষণম্ .. ১৭..
অহিংসা সর্বভূতানাং নিত্যমস্মাসু রোচতে .
প্রত্যক্ষতঃ সাধযামো ন পরোক্ষমুপাস্মহে .. ১৮..
 অ
ভূমের্গন্ধগুণান্ভুঙ্ক্ষ্ব পিবস্যাপোমযান্রসান্ .
জ্যোতিষাং পশ্যসে রূপং স্পৃশস্যনিলজান্গুণান্ .. ১৯..
শৃণোষ্যাকাশজং শব্দং মনসা মন্যসে মতিম্ .
সর্বাণ্যেতানি ভূতানি প্রাণা ইতি চ মন্যসে .. ২০..
প্রাণাদানে চ নিত্যোঽসি হিংসাযাং বর্ততে ভবান্ .
নাস্তি চেষ্টা বিনা হিংসাং কিং বা ত্বং মন্যসে দ্বিজ .. ২১..
 য্
অক্ষরং চ ক্ষরং চৈব দ্বৈধী ভাবোঽযমাত্মনঃ .
অক্ষরং তত্র সদ্ভাবঃ স্বভাবঃ ক্ষর উচ্যতে .. ২২..
প্রাণো জিহ্বা মনঃ সত্ত্বং স্বভাবো রজসা সহ .
ভাবৈরেতৈর্বিমুক্তস্য নির্দ্বন্দ্বস্য নিরাশিষঃ .. ২৩..
সমস্য সর্বভূতেষু নির্মমস্য জিতাত্মনঃ .
সমন্তাত্পরিমুক্তস্য ন ভযং বিদ্যতে ক্ব চিত্ .. ২৪..
 অ
সদ্ভিরেবেহ সংবাসঃ কার্যো মতিমতাং বর .
ভবতো হি মতং শ্রুত্বা প্রতিভাতি মতির্মম .. ২৫..
ভগবন্ভগবদ্বুদ্ধ্যা প্রতিবুদ্ধো ব্রবীম্যহম্ .
মতং মন্তুং ক্রতুং কর্তুং নাপরাধোঽস্তি মে দ্বিজ .. ২৬..
 ব্র্
উপপত্ত্যা যতিস্তূষ্ণীং বর্তমানস্ততঃ পরম্ .
অধ্বর্যুরপি নির্মোহঃ প্রচচার মহামখে .. ২৭..
এবমেতাদৃশং মোক্ষং সুসূক্ষ্মং ব্রাহ্মণা বিদুঃ .
বিদিত্বা চানুতিষ্ঠন্তি ক্ষেত্রজ্ঞেনানুদর্শিনা .. ২৮..
 ২৯
 ব্র্
অত্রাপ্যুদাহরন্তীমমিতিহাসং পুরাতনম্ .
কার্তবীর্যস্য সংবাদং সমুদ্রস্য চ ভামিনি .. ১..
কার্তবীর্যার্জুনো নাম রাজা বাহুসহস্রবান্ .
যেন সাগরপর্যন্তা ধনুষা নির্জিতা মহী .. ২..
স কদা চিত্সমুদ্রান্তে বিচরন্বলদর্পিতঃ .
অবাকিরচ্ছরশতৈঃ সমুদ্রমিতি নঃ শ্রুতম্ .. ৩..
তং সমুদ্রো নমস্কৃত্য কৃতাঞ্জলিরুবাচ হ .
মা মুঞ্চ বীর নারাচান্ব্রূহি কিং করবাণি তে .. ৪..
মদাশ্রযাণি ভূতানি ত্বদ্বিসৃষ্টৈর্মহেষুভিঃ .
বধ্যন্তে রাজশার্দূল তেভ্যো দেহ্যভযং বিভো .. ৫..
 অ
মত্সমো যদি সঙ্গ্রামে শরাসনধরঃ ক্ব চিত্ .
বিদ্যতে তং মমাচক্ষ্ব যঃ সমাসীত মাং মৃধে .. ৬..
 স্
মহর্ষির্জমদগ্নিস্তে যদি রাজন্পরিশ্রুতঃ .
তস্য পুত্রস্তবাতিথ্যং যথাবত্কর্তুমর্হতি .. ৭..
ততঃ স রাজা প্রযযৌ ক্রোধেন মহতা বৃতঃ .
স তমাশ্রমমাগম্য রমমেবান্বপদ্যত .. ৮..
স রাম প্রতিকূলানি চকার সহ বন্ধুভিঃ .
আযাসং জনযামাস রামস্য চ মহাত্মনঃ .. ৯..
ততস্তেজঃ প্রজজ্বাল রাজস্যামিত তেজসঃ .
প্রদহদ্রিপুসৈন্যানি তদা কমললোচনে .. ১০..
ততঃ পরশুমাদায স তং বাহুসহস্রিণম্ .
চিচ্ছেদ সহসা রামো বাহুশাখমিব দ্রুমম্ .. ১১..
তং হতং পতিতং দৃষ্ট্বা সমেতাঃ সর্ববান্ধবাঃ .
অসীনাদায শক্তীশ্চ ভার্গবং পর্যবারযন্ .. ১২..
রামোঽপি ধনুরাদায রথমারুহ্য স ত্বরঃ .
বিসৃজঞ্শরবর্ষাণি ব্যধমত্পার্থিবং বলম্ .. ১৩..
ততস্তু ক্ষত্রিযাঃ কে চিজ্জমদগ্নিং নিহত্য চ .
বিবিশুর্গিরিদুর্গাণি মৃগাঃ সিংহার্দিতা ইব .. ১৪..
তেষাং স্ববিহিতং কর্ম তদ্ভযান্নানুতিষ্ঠতাম্ .
প্রজা বৃষলতাং প্রাপ্তা ব্রাহ্মণানামদর্শনাত্ .. ১৫..
ত এতে দ্রমিডাঃ কাশাঃ পুণ্ড্রাশ্চ শবরৈঃ সহ .
বৃষলত্বং পরিগতা ব্যুত্থানাত্ক্ষত্রধর্মতঃ .. ১৬..
ততস্তু হতবীরাসু ক্ষত্রিযাসু পুনঃ পুনঃ .
দ্বিজৈরুত্পাদিতং ক্ষত্রং জামদগ্ন্যো ন্যকৃন্তত .. ১৭..
এব বিংশতিমেধান্তে রামং বাগশরীরিণী .
দিব্যা প্রোবাচ মধুরা সর্বলোকপরিশ্রুতা .. ১৮..
রাম রাম নিবর্তস্ব কং গুণং তাত পশ্যসি .
ক্ষত্রবন্ধূনিমান্প্রাণৈর্বিপ্রযোজ্য পুনঃ পুনঃ .. ১৯..
তথৈব তং মহাত্মানমৃচীকপ্রমুখাস্তদা .
পিতামহা মহাভাগ নিবর্তস্বেত্যথাব্রুবন্ .. ২০..
পিতুর্বধমমৃষ্যংস্তু রামঃ প্রোবাচ তানৃষীন্ .
নার্হন্তীহ ভবন্তো মাং নিবারযিতুমিত্যুত .. ২১..
 পিতরহ্
নার্হসে ক্ষত্রবন্ধূংস্ত্বং নিহন্তুং জযতাং বর .
ন হি যুক্তং ত্বযা হন্তুং ব্রাহ্মণেন সতা নৃপান্ .. ২২..
 ৩০
 পিতরহ্
অত্রাপ্যুদাহরন্তীমমিতিহাসং পুরাতনম্ .
শ্রুত্বা চ তত্তথা কার্যং ভবতা দ্বিজসত্তম .. ১..
অলর্কো নাম রাজর্ষিরভবত্সুমহাতপাঃ .
ধর্মজ্ঞঃ সত্যসন্ধশ্চ মহাত্মা সুমহাব্রতঃ .. ২..
স সাগরান্তাং ধনুষা বিনির্জিত্য মহীমিমাম্ .
কৃত্বা সুদুষ্করং কর্ম মনঃ সূক্ষ্মে সমাদধে .. ৩..
স্থিতস্য বৃক্ষমূলেঽথ তস্য চিন্তা বভূব হ .
উত্সৃজ্য সুমহদ্রাজ্যং সূক্ষ্মং প্রতি মহামতে .. ৪..
 অ
মনসো মে বলং জাতং মনো জিত্বা ধ্রুবো জযঃ .
অন্যত্র বাণানস্যামি শত্রুভিঃ পরিবারিতঃ .. ৫..
যদিদং চাপলান্মূর্তেঃ সর্বমেতচ্চিকীর্ষতি .
মনঃ প্রতি সুতীক্ষ্ণাগ্রানহং মোক্ষ্যামি সাযকান্ .. ৬..
 মনস্
নেমে বাণাস্তরিষ্যন্তি মামলর্ক কথং চন .
তবৈব মর্ম ভেত্স্যন্তি ভিন্নমর্মা মরিষ্যসি .. ৭..
অন্যান্বাণান্সমীক্ষস্ব যৈস্ত্বং মাং সূদযিষ্যসি .
তচ্ছ্রুত্বা স বিচিন্ত্যাথ ততো বচনমব্রবীত্ .. ৮..
 অ
আঘ্রায সুবহূন্গন্ধাংস্তানেব প্রতিগৃধ্যতি .
তস্মাদ্ঘ্রাণং প্রতি শরান্প্রতিমোক্ষ্যাম্যহং শিতান্ .. ৯..
 ঘ্রান
নেমে বাণাস্তরিষ্যন্তি মামলর্ক কথং চন .
তবৈব মর্ম ভেত্স্যন্তি ভিন্নমর্মা মরিষ্যসি .. ১০..
অন্যান্বাণান্সমীক্ষস্ব যৈস্ত্বং মাং সূদযিষ্যসি .
তচ্ছ্রুত্বা স বিচিন্ত্যাথ ততো বচনমব্রবীত্ .. ১১..
 অ
ইযং স্বাদূন্রসান্ভুক্ত্বা তানেব প্রতিগৃধ্যতি .
তস্মাজ্জিহ্বাং প্রতি শরান্প্রতিমোক্ষ্যাম্যহং শিতান্ .. ১২..
 জ্
নেমে বাণাস্তরিষ্যন্তি মামলর্ক কথং চন .
তবৈব মর্ম ভেত্স্যন্তি ভিন্নমর্মা মরিষ্যসি .. ১৩..
অন্যান্বাণান্সমীক্ষস্ব যৈস্ত্বং মাং সূদযিষ্যসি .
তচ্ছ্রুত্বা স বিচিন্ত্যাথ ততো বচনমব্রবীত্ .. ১৪..
 অ
সৃষ্ট্বা ত্বগ্বিবিধান্স্পর্শাংস্তানেব প্রতিগৃধ্যতি .
তস্মাত্ত্বচং পাটযিষ্যে বিবিধৈঃ কঙ্কপত্রভিঃ .. ১৫..
 ত্বচ্
নেমে বাণাস্তরিষ্যন্তি মামলর্ক কথং চন .
তবৈব মর্ম ভেত্স্যন্তি ভিন্নমর্মা মরিষ্যসি .. ১৬..
অন্যান্বাণান্সমীক্ষস্ব যৈস্ত্বং মাং সূদযিষ্যসি .
তচ্ছ্রুত্বা স বিচিন্ত্যাথ ততো বচনমব্রবীত্ .. ১৭..
 অ
শ্রুত্বা বৈ বিবিধাঞ্শব্দাংস্তানেব প্রতিগৃধ্যতি .
তস্মাচ্ছ্রোত্রং প্রতি শরান্প্রতিমোক্ষ্যাম্যহং শিতান্ .. ১৮..
 জ্রোত্র
নেমে বাণাস্তরিষ্যন্তি মামলর্ক কথং চন .
তবৈব মর্ম ভেত্স্যন্তি ততো হাস্যসি জীবিতম্ .. ১৯..
অন্যান্বাণান্সমীক্ষস্ব যৈস্ত্বং মাং সূদযিষ্যসি .
তচ্ছ্রুত্বা স বিচিন্ত্যাথ ততো বচনমব্রবীত্ .. ২০..
 অ
দৃষ্ট্বা বৈ বিবিধান্ভাবাংস্তানেব প্রতিগৃধ্যতি .
তস্মাচ্চক্ষুঃ প্রতি শরান্প্রতিমোক্ষ্যাম্যহং শিতান্ .. ২১..
 চ্
নেমে বাণাস্তরিষ্যন্তি মামালর্ক কথং চন .
তবৈব মর্ম ভেত্স্যন্তি ভিন্নমর্মা মরিষ্যসি .. ২২..
অন্যান্বাণান্সমীক্ষস্ব যৈস্ত্বং মাং সূদযিষ্যতি .
তচ্ছ্রুত্বা স বিচিন্ত্যাথ ততো বচনমব্রবীত্ .. ২৩..
 অ
ইযং নিষ্ঠা বহুবিধা প্রজ্ঞযা ত্বধ্যবস্যতি .
তস্মাদ্বুদ্ধিং প্রতি শরান্প্রতিমোক্ষ্যাম্যহং শিতান্ .. ২৪..
 চক্সুস্
নেমে বাণাস্তরিষ্যন্তি মামলর্ক কথং চন .
তবৈব মর্ম ভেত্স্যন্তি ভিন্নমর্মা মরিষ্যসি .. ২৫..
 পিতরহ্
ততোঽলর্কস্তপো ঘোরমাস্থাযাথ সুদুষ্করম্ .
নাধ্যগচ্ছত্পরং শক্ত্যা বাণমেতেষু সপ্তসু .
সুসমাহিত চিত্তাস্তু ততোঽচিন্তযত প্রভুঃ .. ২৬..
স বিচিন্ত্য চিরং কালমলর্কো দ্বিজসত্তম .
নাধ্যগচ্ছত্পরং শ্রেযো যোগান্মতিমতাং বরঃ .. ২৭..
স একাগ্রং মনঃ কৃত্বা নিশ্চলো যোগমাস্থিতঃ .
ইন্দ্রিযাণি জঘানাশু বাণেনৈকেন বীর্যবান্ .. ২৮..
যোগেনাত্মানমাবিশ্য সংসিদ্ধিং পরমাং যযৌ .
বিস্মিতশ্চাপি রাজর্ষিরিমাং গাথাং জগাদ হ .
অহো কষ্টং যদস্মাভিঃ পূর্বং রাজ্যমনুষ্ঠিতম্ .
ইতি পশ্চান্মযা জ্ঞাতং যোগান্নাস্তি পরং সুখম্ .. ২৯..
ইতি ত্বমপি জানীহি রাম মা ক্ষত্রিযাঞ্ জহি .
তপো ঘোরমুপাতিষ্ঠ ততঃ শ্রেযোঽভিপত্স্যসে .. ৩০..
 ব্র্
ইত্যুক্তঃ স তপো ঘোরং জামদগ্ন্যঃ পিতামহৈঃ .
আস্থিতঃ সুমহাভাগো যযৌ সিদ্ধিং চ দুর্গমাম্ .. ৩১..
 ৩১
 ব্র্
ত্রযো বৈ রিপবো লোকে নব বৈ গুণতঃ স্মৃতাঃ .
হর্ষঃ স্তম্ভোঽভিমানশ্চ ত্রযস্তে সাত্ত্বিকা গুণাঃ .. ১..
শোকঃ ক্রোধোঽতিসংরম্ভো রাজসাস্তে গুণাঃ স্মৃতাঃ .
স্বপ্নস্তন্দ্রী চ মোহশ্চ ত্রযস্তে তামসা গুণাঃ .. ২..
এতান্নিকৃত্য ধৃতিমান্বাণসন্ধৈরতন্দ্রিতঃ .
জেতুং পরানুত্সহতে প্রশান্তাত্মা জিতেন্দ্রিযঃ .. ৩..
অত্র গাথাঃ কীর্তযন্তি পুরাকল্পবিদো জনাঃ .
অম্বরীষেণ যা গীতা রাজ্ঞা রাজ্যং প্রশাসতা .. ৪..
সমুদীর্ণেষু দোষেষু বধ্যমানেষু সাধুষু .
জগ্রাহ তরসা রাজ্যমম্বরীষ ইতি শ্রুতিঃ .. ৫..
স নিগৃহ্য মহাদোষান্সাধূন্সমভিপূজ্য চ .
জগাম মহতীং সিদ্ধিং গাথাং চেমাং জগাদ হ .. ৬..
ভূযিষ্ঠং মে জিতা দোষা নিহতাঃ সর্বশত্রবঃ .
একো দোষোঽবশিষ্টস্তু বধ্যঃ স ন হতো মযা .. ৭..
যেন যুক্তো জন্তুরযং বৈতৃষ্ণ্যং নাধিগচ্ছতি .
তৃষ্ণার্ত ইব নিম্নানি ধাবমানো ন বুধ্যতে .. ৮..
অকার্যমপি যেনেহ প্রযুক্তঃ সেবতে নরঃ .
তং লোভমসিভিস্তীক্ষ্ণৈর্নিকৃন্তন্তং নিকৃন্তত .. ৯..
লোভাদ্ধি জাযতে তৃষ্ণা ততশ্চিন্তা প্রসজ্যতে .
স লিপ্সমানো লভতে ভূযিষ্ঠং রাজসান্গুণান্ .. ১০..
স তৈর্গুণৈঃ সংহতদেহবন্ধনঃ
পুনঃ পুনর্জাযতি কর্ম চেহতে .
জন্ম ক্ষযে ভিন্নবিকীর্ণ দেহঃ
পুনর্মৃত্যুং গচ্ছতি জন্মনি স্বে .. ১১..
তস্মাদেনং সম্যগবেক্ষ্য লোভং
নিগৃহ্য ধৃত্যাত্মনি রাজ্যমিচ্ছেত্ .
এতদ্রাজ্যং নান্যদস্তীতি বিদ্যাদ্
যস্ত্বত্র রাজা বিজিতো মমৈকঃ .. ১২..
ইতি রাজ্ঞাম্বরীষেণ গাথা গীতা যশস্বিনা .
আধিরাজ্যং পুরস্কৃত্য লোভমেকং নিকৃন্ততা .. ১৩..
 ৩২
 ব্র্
অত্রাপ্যুদাহরন্তীমমিতিহাসং পুরাতনম্ .
ব্রাহ্মণস্য চ সংবাদং জনকস্য চ ভামিনি .. ১..
ব্রাহ্মণং জনকো রাজা সন্নং কস্মিংশ্চিদাগমে .
বিষযে মে ন বস্তব্যমিতি শিষ্ট্যর্থমব্রবীত্ .. ২..
ইত্যুক্তঃ প্রত্যুবাচাথ ব্রাহ্মণো রাজসত্তমম্ .
আচক্ষ্ব বিষযং রাজন্যাবাংস্তব বশে স্থিতঃ .. ৩..
সোঽন্যস্য বিষযে রাজ্ঞো বস্তুমিচ্ছাম্যহং বিভো .
বচস্তে কর্তুমিচ্ছামি যথাশাস্ত্রং মহীপতে .. ৪..
ইত্যুক্তঃ স তদা রাজা ব্রাহ্মণেন যশস্বিনা .
মুহুরুষ্ণং চ নিঃশ্বস্য ন স তং প্রত্যভাষত .. ৫..
তমাসীনং ধ্যাযমানং রাজানমমিতৌজসম্ .
কশ্মলং সহসাগচ্ছদ্ভানুমন্তমিব গ্রহঃ .. ৬..
সমাশ্বাস্য ততো রাজা ব্যপেতে কশ্মলে তদা .
ততো মুহূর্তাদিব তং ব্রাহ্মণং বাক্যমব্রবীত্ .. ৭..
পিতৃপৈতামহে রাজ্যে বশ্যে জনপদে সতি .
বিষযং নাধিগচ্ছামি বিচিন্বন্পৃথিবীমিমাম্ .. ৮..
নাধ্যগচ্ছং যদা পৃথ্ব্যাং মিথিলা মার্গিতা মযা .
নাধ্যগচ্ছং যদা তস্যাং স্বপ্রজা মার্গিতা মযা .. ৯..
নাধ্যগচ্ছং যদা তাসু তদা মে কশ্মলোঽভবত্ .
ততো মে কশ্মলস্যান্তে মতিঃ পুনরুপস্থিতা .. ১০..
তযা ন বিষযং মন্যে সর্বো বা বিষযো মম .. ১১..
 S
আত্মাপি চাযং ন মম সর্বা বা পৃথিবী মম .
উষ্যতাং যাবদুত্সাহো ভুজ্যতাং যাবদিষ্যতে .. ১১..
পিতৃপৈতামহে রাজ্যে বশ্যে জনপদে সতি .
ব্রূহি কাং বুদ্ধিমাস্থায মমত্বং বর্জিতং ত্বযা .. ১২..
কাং বা বুদ্ধিং বিনিশ্চিত্য সর্বো বৈ বিষযস্তব .
নাবৈষি বিষযং যেন সর্বো বা বিষযস্তব .. ১৩..
 জ্
অন্তবন্ত ইহারম্ভা বিদিতা সর্বকর্মসু .
নাধ্যগচ্ছমহং যস্মান্মমেদমিতি যদ্ভবেত্ .. ১৪..
কস্যেদমিতি কস্য স্বমিতি বেদ বচস্তথা .
নাধ্যগচ্ছমহং বুদ্ধ্যা মমেদমিতি যদ্ভবেত্ .. ১৫..
এতাং বুদ্ধিং বিনিশ্চিত্য মমত্বং বর্জিতং মযা .
শৃণু বুদ্ধিং তু যাং জ্ঞাত্বা সর্বত্র বিষযো মম .. ১৬..
নাহমাত্মার্থমিচ্ছামি গন্ধান্ঘ্রাণগতানপি .
তস্মান্মে নির্জিতা ভূমির্বশে তিষ্ঠতি নিত্যদা .. ১৭..
নাহমাত্মার্থমিচ্ছামি রসানাস্যেঽপি বর্ততঃ .
আপো মে নির্জিতাস্তস্মাদ্বশে তিষ্ঠন্তি নিত্যদা .. ১৮..
নাহমাত্মার্থমিচ্ছামি রূপং জ্যোতিশ্চ চক্ষুষা .
তস্মান্মে নির্জিতং জ্যোতির্বশে তিষ্ঠতি নিত্যদা .. ১৯..
নাহমাত্মার্থমিচ্ছামি স্পর্শাংস্ত্বচি গতাশ্ চ যে .
তস্মান্মে নির্জিতো বাযুর্বশে তিষ্ঠতি নিত্যদা .. ২০..
নাহমাত্মার্থমিচ্ছামি শব্দাঞ্শ্রোত্রগতানপি .
তস্মান্মে নির্জিতাঃ শব্দা বশে তিষ্ঠন্তি নিত্যদা .. ২১..
নাহমাত্মার্থমিচ্ছামি মনো নিত্যং মনোঽন্তরে .
মনো মে নির্জিতং তস্মাদ্বশে তিষ্ঠতি নিত্যদা .. ২২..
দেবেভ্যশ্চ পিতৃভ্যশ্চ ভূতেভ্যোঽতিথিভিঃ সহ .
ইত্যর্থং সর্ব এবেমে সমারম্ভা ভবন্তি বৈ .. ২৩..
ততঃ প্রহস্য জনকং ব্রাহ্মণঃ পুনরব্রবীত্ .
ত্বজ্জিজ্ঞাসার্থমদ্যেহ বিদ্ধি মাং ধর্মমাগতম্ .. ২৪..
ত্বমস্য ব্রহ্ম নাভস্য বুদ্ধ্যারস্যানিবর্তিনঃ .
সত্ত্বনেমি নিরুদ্ধস্য চক্রস্যৈকঃ প্রবর্তকঃ .. ২৫..
 ৩৩
 ব্র্
নাহং তথা ভীরু চরামি লোকে
তথা ত্বং মাং তর্কযসে স্ববুদ্ধ্যা .
বিপ্রোঽস্মি মুক্তোঽস্মি বনেচরোঽস্মি
গৃহস্থ ধর্মা ব্রহ্ম চারী তথাস্মি .. ১..
নাহমস্মি যথা মাং ত্বং পশ্যসে চক্ষুষা শুভে .
মযা ব্যাপ্তমিদং সর্বং যত্কিং চিজ্জগতী গতম্ .. ২..
যে কে চিজ্জন্তবো লোকে জঙ্গমাঃ স্থাবরাশ্ চ হ .
তেষাং মামন্তকং বিদ্ধি দারূণামিব পাবকম্ .. ৩..
রাজ্যং পৃথিব্যাং সর্বস্যামথ বাপি ত্রিবিষ্টপে .
তথা বুদ্ধিরিযং বেত্তি বুদ্ধিরেব ধনং মম .. ৪..
একঃ পন্থা ব্রাহ্মণানাং যেন গচ্ছন্তি তদ্বিদঃ .
গৃহেষু বনবাসেষু গুরু বাসেষু ভিক্ষুষু .
লিঙ্গৈর্বহুভিরব্যগ্রৈরেকা বুদ্ধিরুপাস্যতে .. ৫..
নানা লিঙ্গাশ্রমস্থানাং যেষাং বুদ্ধিঃ শমাত্মিকা .
তে ভাবমেকমাযান্তি সরিতঃ সাগরং যথা .. ৬..
বুদ্ধ্যাযং গম্যতে মার্গঃ শরীরেণ ন গম্যতে .
আদ্যন্তবন্তি কর্মাণি শরীরং কর্মবন্ধনম্ .. ৭..
তস্মাত্তে সুভগে নাস্তি পরলোককৃতং ভযম্ .
মদ্ভাবভাবনিরতা মমৈবাত্মানমেষ্যসি .. ৮..
 ৩৪
 ব্র্
নেদমল্পাত্মনা শক্যং বেদিতুং নাকৃতাত্মনা .
বহু চাল্পং চ সঙ্ক্ষিপ্তং বিপ্লুতং চ মতং মম .. ১..
উপাযং তু মম ব্রূহি যেনৈষা লভ্যতে মতিঃ .
তন্মন্যে কারণতমং যত এষা প্রবর্ততে .. ২..
 ব্র্
অরণীং ব্রাহ্মণীং বিদ্ধি গুরুরস্যোত্তরারণিঃ .
তপঃ শ্রুতেঽভিমথ্নীতো জ্ঞানাগ্নির্জাযতে ততঃ .. ৩..
 ব্রাহ্মনী
যদিদং ব্রহ্মণো লিঙ্গং ক্ষেত্রজ্ঞমিতি সঞ্জ্ঞিতম্ .
গ্রহীতুং যেন তচ্ছক্যং লক্ষণং তস্য তত্ক্ব নু .. ৪..
 ব্র্
অলিঙ্গো নির্গুণশ্চৈব কারণং নাস্য বিদ্যতে .
উপাযমেব বক্ষ্যামি যেন গৃহ্যেত বা ন বা .. ৫..
সম্যগপ্যুপদিষ্টশ্চ ভ্রমরৈরিব লক্ষ্যতে .
কর্ম বুদ্ধিরবুদ্ধিত্বাজ্জ্ঞানলিঙ্গৈরিবাশ্রিতম্ .. ৬..
ইদং কার্যমিদং নেতি ন মোক্ষেষূপদিশ্যতে .
পশ্যতঃ শৃণ্বতো বুদ্ধিরাত্মনো যেষু জাযতে .. ৭..
যাবন্ত ইহ শক্যেরংস্তাবতোঽংশান্প্রকল্পযেত্ .
ব্যক্তানব্যক্তরূপাংশ্চ শতশোঽথ সহস্রশঃ .. ৮..
সর্বান্নানাত্ব যুক্তাংশ্চ সর্বান্প্রত্যক্ষহেতুকান্ .
যতঃ পরং ন বিদ্যেত ততোঽভ্যাসে ভবিষ্যতি .. ৯..
 বা
ততস্তু তস্যা ব্রাহ্মণ্যা মতিঃ ক্ষেত্রজ্ঞসঙ্ক্ষযে .
ক্ষেত্রজ্ঞাদেব পরতঃ ক্ষেত্রজ্ঞোঽন্যঃ প্রবর্ততে .. ১০..
 অর্জুন
ক্ব নু সা ব্রাহ্মণী কৃষ্ণ ক্ব চাসৌ ব্রাহ্মণর্ষভঃ .
যাভ্যাং সিদ্ধিরিযং প্রাপ্তা তাবুভৌ বদ মেঽচ্যুত .. ১১..
 বা
মনো মে ব্রাহ্মণং বিদ্ধি বুদ্ধিং মে বিদ্ধি ব্রাহ্মণীম্ .
ক্ষেত্রজ্ঞ ইতি যশ্চোক্তঃ সোঽহমেব ধনঞ্জয .. ১২..

.. ইতি ব্রাহ্মণগীতা সমাপ্তা ..