পিঙ্গলাগীতা

.. .. পিঙ্গলাগীতা.. ..

১৬৮
য্
ধর্মাঃ পিতামহেনোক্তা রাজধর্মাশ্রিতাঃ শুভাঃ .
ধর্মমাশ্রমিণাং শ্রেষ্ঠং বক্তুমর্হসি পার্থিব .. ১..
ভীস্ম
সর্বত্র বিহিতো ধর্মঃ স্বর্গ্যঃ সত্যফলং তপঃ .
বহু দ্বারস্য ধর্মস্য নেহাস্তি বিফলা ক্রিযা .. ২..
যস্মিন্যস্মিংস্তু বিনযে যো যো যাতি বিনিশ্চযম্ .
স তমেবাভিজানাতি নান্যং ভরতসত্তম .. ৩..
যথা যথা চ পর্যেতি লোকতন্ত্রমসারবত্ .
তথা তথা বিরাগোঽত্র জাযতে নাত্র সংশযঃ .. ৪..
এবং ব্যবসিতে লোকে বহুদোষে যুধিষ্ঠির .
আত্মমোক্ষনিমিত্তং বৈ যতেত মতিমান্নরঃ .. ৫..
য্
নষ্টে ধনে বা দারে বা পুত্রে পিতরি বা মৃতে .
যযা বুদ্ধ্যা নুদেচ্ছোকং তন্মে ব্রূহি পিতামহ .. ৬..
ভী
নষ্টে ধনে বা দারে বা পুত্রে পিতরি বা মৃতে .
অহো দুঃখমিতি ধ্যাযঞ্শোকস্যাপচিতিং চরেত্ .. ৭..
অত্রাপ্যুদাহরন্তীমমিতিহাসং পুরাতনম্ .
যথা সেনজিতং বিপ্রঃ কশ্চিদিত্যব্রবীদ্বচঃ .. ৮..
পুত্রশোকাভিসন্তপ্তং রাজানং শোকবিহ্বলম্ .
বিষন্নবদনং দৃষ্ট্বা বিপ্রো বচনমব্রবীত্ .. ৯..
কিং নু খল্বসি মূঢস্ত্বং শোচ্যঃ কিমনুশোচসি .
যদা ত্বামপি শোচন্তঃ শোচ্যা যাস্যন্তি তাং গতিম্ .. ১০..
ত্বং চৈবাহং চ যে চান্যে ত্বাং রাজন্পর্যুপাসতে .
সর্বে তত্র গমিষ্যামো যত এবাগতা বযম্ .. ১১..
সেনজিত্
কা বুদ্ধিঃ কিং তপো বিপ্র কঃ সমাধিস্তপোধন .
কিং জ্ঞানং কিং শ্রুতং বা তে যত্প্রাপ্য ন বিষীদসি .. ১২..
ব্রাহ্মন
পশ্য ভূতানি দুঃখেন ব্যতিষক্তানি সর্বশঃ .
আত্মাপি চাযং ন মম সর্বা বা পৃথিবী মম .. ১৩..
যথা মম তথান্যেষামিতি বুদ্ধ্যা ন মে ব্যথা .
এতাং বুদ্ধিমহং প্রাপ্য ন প্রহৃষ্যে ন চ ব্যথে .. ১৪..
যথা কাষ্ঠং চ কাষ্ঠং চ সমেযাতাং মহোদধৌ .
সমেত্য চ ব্যপেযাতাং তদ্বদ্ভূতসমাগমঃ .. ১৫..
এবং পুত্রাশ্চ পৌত্রাশ্চ জ্ঞাতযো বান্ধবাস্তথা .
তেষু স্নেহো ন কর্তব্যো বিপ্রযোগো হি তৈর্ধ্রুবম্ .. ১৬..
অদর্শনাদাপতিতঃ পুনশ্চাদর্শনং গতঃ .
ন ত্বাসৌ বেদ ন ত্বং তং কঃ সন্কমনুশোচসি .. ১৭..
তৃষ্ণার্তি প্রভবং দুঃখং দুঃখার্তি প্রভবং সুখম্ .
সুখাত্সঞ্জাযতে দুঃখমেবমেতত্পুনঃ পুনঃ .
সুখস্যানন্তরং দুঃখং দুঃখস্যানন্তরং সুখম্ .. ১৮..
সুখাত্ত্বং দুঃখমাপন্নঃ পুনরাপত্স্যসে সুখম্ .
ন নিত্যং লভতে দুঃখং ন নিত্যং লভতে সুখম্ .. ১৯..
নালং সুখায সুহৃদো নালং দুঃখায শত্রবঃ .
ন চ প্রজ্ঞালমর্থানাং ন সুখানামলং ধনম্ .. ২০..
ন বুদ্ধির্ধনলাভায ন জাদ্যমসমৃদ্ধযে .
লোকপর্যায বৃত্তান্তং প্রাজ্ঞো জানাতি নেতরঃ .. ২১..
বুদ্ধিমন্তং চ মূঢং চ শূরং ভীরুং জদং কবিম্ .
দুর্বলং বলবন্তং চ ভাগিনং ভজতে সুখম্ .. ২২..
ধেনুর্বত্সস্য গোপস্য স্বামিনস্তস্করস্য চ .
পযঃ পিবতি যস্তস্যা ধেনুস্তস্যেতি নিশ্চযঃ .. ২৩..
যে চ মূঢতমা লোকে যে চ বুদ্ধেঃ পরং গতাঃ .
তে নরাঃ সুখমেধন্তে ক্লিশ্যত্যন্তরিতো জনঃ .. ২৪..
অন্ত্যেষু রেমিরে ধীরা ন তে মধ্যেষু রেমিরে .
অন্ত্য প্রাপ্তিং সুখামাহুর্দুঃখমন্তরমন্তযোঃ .. ২৫..
যে তু বুদ্ধিসুখং প্রাপ্তা দ্বন্দ্বাতীতা বিমত্সরাঃ .
তান্নৈবার্থা ন চানর্থা ব্যথযন্তি কদা চন .. ২৬..
অথ যে বুদ্ধিমপ্রাপ্তা ব্যতিক্রান্তাশ্চ মূঢতাম্ .
তেঽতিবেলং প্রহৃষ্যন্তি সন্তাপমুপযান্তি চ .. ২৭..
নিত্যপ্রমুদিতা মূঢা দিবি দেবগণা ইব .
অবলেপেন মহতা পরিদৃব্ধা বিচেতসঃ .. ২৮..
সুখং দুঃখান্তমালস্যং দুঃখং দাক্ষ্যং সুখোদযম্ .
ভূতিশ্চৈব শ্রিযা সার্ধং দক্ষে বসতি নালসে .. ২৯..
সুখং বা যদি বা দুঃখং দ্বেষ্যং বা যদি বা প্রিযম্ .
প্রাপ্তং প্রাপ্তমুপাসীত হৃদযেনাপরাজিতঃ .. ৩০..
শোকস্থান সহস্রাণি হর্ষস্থান শতানি চ .
দিবসে দিবসে মূঢমাবিশন্তি ন পণ্ডিতম্ .. ৩১..
বুদ্ধিমন্তং কৃতপ্রজ্ঞং শুশ্রূসুমনসূযকম্ .
দান্তং জিতেন্দ্রিযং চাপি শোকো ন স্পৃশতে নরম্ .. ৩২..
এতাং বুদ্ধিং সমাস্থায গুপ্তচিত্তশ্চরেদ্বুধঃ .
উদযাস্তমযজ্ঞং হি ন শোকঃ স্প্রস্তুমর্হতি .. ৩৩..
যন্নিমিত্তং ভবেচ্ছোকস্ত্রাসো বা দুঃখমেব বা .
আযাসো বা যতোমূলস্তদেকাঙ্গমপি ত্যজেত্ .. ৩৪..
যদ্যত্ত্যজতি কামানাং তত্সুখস্যাভিপূর্যতে .
কামানুসারী পুরুষঃ কামাননু বিনশ্যতি .. ৩৫..
যচ্চ কামসুখং লোকে যচ্চ দিব্যং মহত্সুখম্ .
তৃষ্ণা ক্ষযসুখস্যৈতে নার্হতঃ সোদশীং কলাম্ .. ৩৬..
পূর্বদেহকৃতং কর্ম শুভং বা যদি বাশুভম্ .
প্রাজ্ঞং মূঢং তথা শূরং ভজতে যাদৃশং কৃতম্ .. ৩৭..
এবমেব কিলৈতানি প্রিযাণ্যেবাপ্রিযাণি চ .
জীবেষু পরিবর্তন্তে দুঃখানি চ সুখানি চ .. ৩৮..
তদেবং বুদ্ধিমাস্থায সুখং জীবেদ্গুণান্বিতঃ .
সর্বান্কামাঞ্জুগুপ্সেত সঙ্গান্কুর্বীত পৃষ্ঠতঃ .
বৃত্ত এষ হৃদি প্রৌধো মৃত্যুরেষ মনোমযঃ .. ৩৯..
যদা সংহরতে কামান্কূর্মোঽঙ্গানীব সর্বশঃ .
তদাত্মজ্যোতিরাত্মা চ আত্মন্যেব প্রসীদতি .. ৪০..
কিং চিদেব মমত্বেন যদা ভবতি কল্পিতম্ .
তদেব পরিতাপার্থং সর্বং সম্পদ্যতে তদা .. ৪১..
ন বিভেতি যদা চাযং যদা চাস্মান্ন বিভ্যতি .
যদা নেচ্ছতি ন দ্বেষ্টি ব্রহ্ম সম্পদ্যতে তদা .. ৪২..
উভে সত্যানৃতে ত্যক্ত্বা শোকানন্দৌ ভযাভযে .
প্রিযাপ্রিযে পরিত্যজ্য প্রশান্তাত্মা ভবিষ্যসি .. ৪৩..
যদা ন কুরুতে ধীরঃ সর্বভূতেষু পাপকম্ .
কর্মণা মনসা বাচা ব্রহ্ম সম্পদ্যতে তদা .. ৪৪..
যা দুস্ত্যজা দুর্মতিভির্যা ন জীর্যতি জীর্যতঃ .
যোঽসৌ প্রাণান্তিকো রোগস্তাং তৃষ্ণাং ত্যজতঃ সুখম্ .. ৪৫..
অত্র পিঙ্গলযা গীতা গাথাঃ শ্রূযন্তি পার্থিব .
যথা সা কৃচ্ছ্রকালেঽপি লেভে ধর্মং সনাতনম্ .. ৪৬..
সঙ্কেতে পিঙ্গলা বেশ্যা কান্তেনাসীদ্বিনাকৃতা .
অথ কৃচ্ছ্রগতা শান্তাং বুদ্ধিমাস্থাপযত্তদা .. ৪৭..
পিন্গলা
উন্মত্তাহমনুন্মত্তং কান্তমন্ববসং চিরম্ .
অন্তিকে রমণং সন্তং নৈনমধ্যগমং পুরা .. ৪৮..
একস্থূনং নবদ্বারমপিধাস্যাম্যগারকম্ .
কা হি কান্তমিহাযান্তমযং কান্তেতি মন্স্যতে .. ৪৯..
অকামাঃ কামরূপেণ ধূর্তা নরকরূপিণঃ .
ন পুনর্বঞ্চযিষ্যন্তি প্রতিবুদ্ধাস্মি জাগৃমি .. ৫০..
অনর্থোঽপি ভবত্যর্থো দৈবাত্পূর্বকৃতেন বা .
সম্বুদ্ধাহং নিরাকারা নাহমদ্যাজিতেন্দ্রিযা .. ৫১..
সুখং নিরাশঃ স্বপিতি নৈরাশ্যং পরমং সুখম্ .
আশামনাশাং কৃত্বা হি সুখং স্বপিতি পিঙ্গলা .. ৫২..
ভী
এতৈশ্চান্যৈশ্চ বিপ্রস্য হেতুমদ্ভিঃ প্রভাষিতৈঃ .
পর্যবস্থাপিতো রাজা সেনজিন্মুমুদে সুখম্ .. ৫৩..

.. ইতি পিঙ্গলাগীতা সমাপ্তা ..