পাণ্ডবগীতা

.. .. পাণ্ডব গীতা .. ..

পাণ্ডব –
প্রহ্লাদনারদপরাশরপুণ্ডরীক-
ব্যাসাম্বরীশশুকশৌনকভীষ্মদাল্ভ্যান্ .
রুক্মাঙ্গদার্জুনবসিষ্ঠবিভীষণাদীন্
পুণ্যানিমান্পরমভাগবতান্স্মরামি .. ১..
লোমহর্ষণ –
ধর্মো বিবির্ধতি যুধিষ্ঠিরকীর্তনেন
পাপং প্রণশ্যতি বৃকোদরকীর্তনেন .
শত্রুর্বিনশ্যতি ধনঞ্জযকীর্তনেন
মাদ্রীসুতৌ কথযতাং ন ভবন্তি রোগাঃ .. ২..
ব্রহ্মা –
যে মানবা বিগতরাগপরাবরজ্ঞা
নারাযণং সুরগুরুং সততং স্মরন্তি .
ধ্যানেন তেন হতকিল্বিষ চেতনাস্তে
মাতুঃ পযোধররসং ন পুনঃ পিবন্তি .. ৩..
যুধিষ্ঠির –
মেঘশ্যামং পীতকৌশেযবাসং
শ্রীবত্সাঙ্কং কৌস্তুভোদ্ভাসিতাঙ্গম্ .
পুণ্যোপেতং পুণ্ডরীকাযতাক্ষং
বিষ্ণুং বন্দে সর্বলোকৈকনাথম্ .. ৪..
কুন্তী –
স্বকর্মফলনির্দিষ্টাং যাং যাং যোনিং ব্রজাম্যহম্ .
তস্যাং তস্যাং হৃষীকেশ ত্বযি ভক্তিদৃর্ঢাঽস্তু মে .. ৫..
দ্রুপদ –
কীটেষু পক্ষিষু মৃগেষু সরীসৃপেষু
রক্ষঃপিশাচমনুজেষ্বপি যত্র যত্র .
জাতস্য মে ভবতু কেশব ত্বত্প্রসাদাত্
ত্বয্যেব ভক্তিরচলাঽব্যভিচারিণী মে .. ৬..
অভিমন্যু –
গোবিন্দ গোবিন্দ হরে মুরারে
গোবিন্দ গোবিন্দ রথাঙ্গপাণে .
গোবিন্দ গোবিন্দ মুকুন্দ কৃষ্ণ
গোবিন্দ গোবিন্দ নমো নমস্তে .. ৭..
উদ্ধব –
বাসুদেবং পরিত্যজ্য যোঽন্যং দেবমুপাসতে .
তৃষিতো জাহ্নবীতীরে কূপং বাঞ্ছতি দুর্ভগঃ .. ৮..
বিদুর –
বাসুদেবস্য যে ভক্তাঃ শান্তাস্তদ্গতমানসাঃ .
তেষাং দাসস্য দাসোঽহং ভবে জন্মনি জন্মনি .. ৯..
ভীষ্ম –
বিপরীতেষু কালেষু পরিক্ষীণেষু বন্ধুষু .
ত্রাহি মাং কৃপযা কৃষ্ণ শরণাগতবত্সল .. ১০..
দ্রোণ –
যে যে হতাশ্চক্রধরেণ রাজং-
স্ত্রৈলোক্যনাথন জনার্দনেন .
তে তে গতা বিষ্ণুপুরিং প্রযাতাঃ
ক্রোধোঽপি দেবস্য বরেণ তুল্যঃ .. ১১..
গান্ধারী –
ত্বমেব মাতা চ পিতা ত্বমেব
ত্বমেব বন্ধুশ্চ সখা ত্বমেব .
ত্বমেব বিদ্যা দ্রবিণং ত্বমেব
ত্বমেব সর্বং মম দেব দেব .. ১২..
প্রহ্লাদ –
নাথ যোনিসহস্রেষু যেষু যেষু ব্রজাম্যহম্ .
তেষু তেষ্বচলা ভক্তিরচ্যুতঽসু সদা ত্বযি .. ১৩..
যা প্রীতিরবিবেকনাং বিষযেষ্বনপাযিনি .
ত্বামনুস্মরতঃ সা মে হৃদযান্মাঽপসর্পতু .. ১৪..
ভরদ্বাজ –
লাভস্তেষাং জযস্তেষাং কুতস্তেষাং পরাজযঃ .
যেষামিন্দীশ্বরশ্যামো হৃদযস্থো জনার্দনঃ .. ১৫..
অত্রি –
গোবিন্দেতি সদা স্নানং গোবিন্দেতি সদা জপঃ .
গোবিন্দেতি সদা ধ্যানং সদা গোবিন্দকীর্তনম্ .. ১৬..
আবির্হোত্র –
কৃষ্ণ ত্বদীযপদপঙ্কজপঞ্জরান্তে
অদ্যৈব মে বিশতু মানসরাজহংসঃ .
প্রাণপ্রযাণসমযে কফবাতপিতাইঃ
কণ্ঠাবরোধনবিধৌ স্মরণং কুতস্তে .. ১৭..
বিদুর –
হরর্নামৈব নামৈব নামামৈব মম জীবনম্ .
কলৌ নাস্যেব নাস্তেব নাস্ত্যেব গতিরন্যথা .. ১৮..
বশিষ্ঠ –
কৃষ্ণেতি মঙ্গলং নাম যস্য বাচি প্রবর্ততে .
ভস্মীভবন্তু তস্যাশু মহাপাতককোটযঃ .. ১৯..
দুর্যোধন –
জানামি ধর্মং ন চ মে প্রবৃত্তি-
র্জানাম্যধর্মং ন চ মে নিবৃত্তিঃ .
কেনাপি দেবেন হৃদিস্থিতেন
যথা নিযুক্তোঽস্মি তথা করোমি .. ২০..
সুভদ্র –
একোঽপি কৃষ্ণস্য কৃতঃ প্রণামো
দশাশ্বমেধাবভৃথেন তুল্যঃ .
দশাশ্বমেধী পুনরেতি জন্ম
কৃষ্ণপ্রণামী ন পুনর্ভবায .. ২১..
গর্গ –
নারাযণেতি মন্ত্রোঽস্তি বাগস্তি বশবর্তিনি .
তথাপি নরকে ঘোরে পতন্তীত্যেতদদ্ভুতম্ .. ২২..
পরাশর –
সকৃদুচ্চরিতং যেন হরিরিত্যক্ষরদ্বযম্ .
বদ্ধঃ পরিকরস্তেন মোক্ষায গমনং প্রতি .. ২৩..
ব্যাস –
সত্যং সত্যং পুনঃ সত্যং ভুজমুত্থাপ্য চোচ্যতে .
ন বেদাচ্চ পরং শাস্ত্রং ন দেবঃ কেশবাত্পরঃ ..২৪..
ধন্বন্তরি –
অচ্যুতানন্ত গোবিন্দ নামোচ্চারণভেষজাত্ .
নশ্যন্তি সকলা রোগাঃ সত্যং সত্যং বদাম্যহম্ .. ২৫..
মার্কণ্ডেয –
সা হানিস্তন্মহচ্ছিদ্রং সা চান্ধজডমূঢতা .
যন্মুহূর্তং ক্ষণং বাপি বাসুদেবং ন চিন্তযেত্ .. ২৬..
শ্রীশুক –
আলোড্য সর্বশাস্ত্রাণি বিচার্যৈবং পুনঃ পুনঃ .
ইদমেকং সুনিষ্পন্নং ধ্যেযো নারাযণঃ সদা .. ২৭..
শ্রীমহাদেব –
শরীর চ নবচ্ছিদ্রং ব্যাধিগ্রস্তং কলেবরম্
ঔষধং জাহ্নবীতোযং বৈদ্যো নারাযণো হরিঃ .. ২৮..
শৌনক –
ভোজনাচ্ছাদনে চিন্তাং বৃথা কুর্বন্তি বৈষ্ণবাঃ .
যোঽসৌ বিশ্বম্ভরো দেবঃ স ভক্তান্কিমুপেক্ষতে .. ২৯ ..
আকাশাত্পতিতং তোযং যথা গচ্ছতি সাগরম্ .
সর্বদেবনমস্কারঃ কেশবং প্রতি গচ্ছতি .. ৩০..