গুরুগীতা (সংক্ষিপ্ত)

.. শ্রীগুরুগীতা ..
.. শ্রী ..
.. শ্রী গুরুপাদুকা পঞ্চকম্ ..
ॐ নমো গুরুভ্যো গুরুপাদুকাভ্যো নমঃ পরেভ্যঃ পরপাদুকাভ্যঃ .
আচার্য সিদ্ধেশ্বর পাদুকাভ্যো নমো নমঃ শ্রী গুরুপাদুকাভ্যঃ ..

ঐঙ্কার হৃঈঙ্কার রহস্য যুক্ত
শ্রীঙ্কার গূঢার্থমহাবিভূত্যা .. ১..
ওঙ্কার মর্ম প্রতিপাদিনীভ্যাং
নমো নমঃ শ্রী গুরুপাদুকাভ্যাম্ .. ২..
হোত্রাগ্নি হৌত্রাগ্নি হবিষ্যহোত্র
হোমাদি সর্বাকৃতি ভাসমানাম্ .
যদ্ ব্রহ্ম তদ্বোধ বিতারিণীভ্যাং
নমো নমঃ শ্রী গুরুপাদুকাভ্যাম্ .. ৩..
কামাদি সর্পব্রজ গারুডাভ্যাং
বিবেক বৈরাগ্য নিধি প্রদাভ্যাম্ .
বোধ প্রদাভ্যাং দৃতমোক্ষদাভ্যাং
নমো নমঃ শ্রী গুরুপাদুকাভ্যাম্ .. ৪..
অনন্ত সংসার সমুদ্র তার
নৌকাযিতাভ্যাং স্থিরভক্তিদাভ্যাম্ .
জাড্যাব্ধি সংশোষণ বাডবাভ্যাং
নমো নমঃ শ্রী গুরুপাদুকাভ্যাম্ .. ৫..

.. ॐ শান্তিঃ শান্তিঃ শান্তিঃ ..
.. অথ শ্রী গুরুগীতা প্রারংভঃ ..
শ্রীগণেশায নমঃ . শ্রীসরস্বত্যৈ নমঃ . শ্রীগুরুভ্যো নমঃ .

.. ॐ ..
অস্য শ্রীগুরুগীতাস্তোত্রমন্ত্রস্য ভগবান্ সদাশিব ঋষিঃ .
নানাবিধানি ছন্দাংসি . শ্রীগুরুপরমাত্মা দেবতা .
হং বীজং . সঃ শক্তিঃ . ক্রোং কীলকং .
শ্রীগুরুপ্রসাদসিদ্ধ্যর্থে জপে বিনিযোগঃ .

.. অথ ধ্যানম্ ..
হংসাভ্যাং পরিবৃত্তপত্রকমলৈর্দিব্যৈর্জগত্কারণৈ-
বির্শ্বোত্কীর্ণমনেকদেহনিলযৈঃ স্বচ্ছংদমাত্মেচ্ছযা ..
তদ্যোতং পদশাংভবং তু চরণং দীপাঙ্কুর গ্রাহিণম্ .
প্রত্যক্ষাক্ষরবিগ্রহং গুরুপদং ধ্যাযেদ্বিভুং শাশ্বতম্ ..

মম চতুর্বিধপুরুষার্থসিদ্ধ্যর্থে জপে বিনিযোগঃ .

.. অথ শ্রীগুরুগীতা ..
সূত উবাচ —

কৈলাসশিখরে রম্যে ভক্তি সংধান নাযকম্ .
প্রণম্য পার্বতী ভক্ত্যা শঙ্করং পর্যপৃচ্ছত .. ১..

শ্রী দেব্যুবাচ —

ॐ নমো দেব দেবেশ পরাত্পর জগদ্গুরো .
সদাশিব মহাদেব গুরুদীক্ষাং প্রদেহি মে .. ২..

কেন মার্গেণ ভো স্বামিন্ দেহি ব্রহ্মমযো ভবেত্ .
ত্বং কৃপং কুরু মে স্বামিন্ নমামি চরণৌ তব .. ৩..

ঈশ্বর উবাচ —

মম রূপাসি দেবি ত্বং ত্বত্প্রীত্যর্থং বদাম্যহম্ .
লোকোপকারকঃ প্রশ্নো ন কেনাপি কৃতঃ পুরা .. ৪..

দুর্লভং ত্রিষু লোকেষু তচ্ছৃণুষ্ব বদাম্যহম্ .
গুরুং বিনা ব্রহ্ম নান্যত্ সত্যং সত্যং বরাননে .. ৫..

বেদ শাস্ত্র পুরাণানি ইতিহাসাদিকানি চ .
মন্ত্র যন্ত্রাদি বিদ্যাশ্চ স্মৃতিরুচ্চাটনাদিকম্ .. ৬..

শৈব শাক্তাগমাদীনি অন্যানি বিবিধানি চ .
অপভ্রংশকরাণীহ জীবানাং ভ্রাংত চেতসাম্ .. ৭..

যজ্ঞো ব্রতং তপো দানং জপস্তীর্থং তথৈব চ .
গুরুতত্ত্বমবিজ্ঞায মূঢাস্তে চরতে জনাঃ .. ৮..

গুরুবুদ্ধ্যাত্মনো নান্যত্ সত্যং সত্যং ন সংশযঃ .
তল্লাভার্থং প্রযত্নস্তু কর্তব্যো হি মনীষিভিঃ .. ৯..

গূঢ বিদ্যা জগন্মাযা দেহে চাজ্ঞান সংভবা .
উদযঃ যত্প্রকাশেন গুরুশব্দেন কথ্যতে .. ১০..

সর্বপাপবিশুদ্ধাত্মা শ্রীগুরোঃ পাদসেবনাত্ .
দেহী ব্রহ্ম ভবেদ্যস্মাত্ ত্বত্কৃপার্থং বদামি তে .. ১১..

গুরুপাদাংবুজং স্মৃত্বা জলং শিরসি ধারযেত্ .
সর্ব তীর্থাবগাহস্য সংপ্রাপ্নোতি ফলং নরঃ .. ১২..

শোষনং পাপ পঙ্কস্য দীপনং জ্ঞান তেজসাম্ .
গুরুপাদোদকং সম্যক্ সংসারার্ণব তারকম্ .. ১৩..

অজ্ঞান মূল হরণং জন্ম কর্ম নিবারণম্ .
জ্ঞান বৈরাগ্য সিদ্ধ্যর্থং গুরু পাদোদকং পিবেত্ .. ১৪..

গুরোঃ পাদোদকং পীত্বা গুরোরুচ্ছিষ্টভোজনম্ .
গুরুমূর্তেঃ সদা ধ্যানং গুরুমংত্রং সদা জপেত্ .. ১৫..

কাশীক্ষেত্রং তন্নিবাসো জাহ্নবী চরণোদকম্ .
গুরুর্বিশ্বেশ্বরঃ সাক্ষাত্ তারকং ব্রহ্ম নিশ্চিতম্ .. ১৬..

গুরোঃ পাদোদকং যত্তু গযাঽসৌ সোঽক্ষযো বটঃ .
তীর্থ রাজঃ প্রযাগশ্চ গুরুমূর্ত্যৈ নমো নমঃ .. ১৭..

গুরুমূর্তিং স্মরেন্নিত্যং গুরু নাম সদা জপেত্ .
গুরোরাজ্ঞাং প্রকুর্বীত গুরোরন্যন্ন ভাবযেত্ .. ১৮..

গুরুবক্ত্র স্থিতং ব্রহ্ম প্রাপ্যতে তত্প্রসাদতঃ .
গুরোর্ধ্যানং সদা কুর্যাত্ কুলস্ত্রী স্বপতের্যথা .. ১৯..

স্বাশ্রমং চ স্বজাতিং চ স্বকীর্তিপুষ্টি বর্ধনম্ .
এতত্সর্বং পরিত্যজ্য গুরোরন্যন্ন ভাবযেত্ .. ২০..

অনন্যাশ্চিন্তযন্তো মাং সুলভং পরমং পদম্ .
তস্মাত্ সর্ব প্রযত্নেন গুরোরারাধনং কুরু .. ২১..

ত্রৈলোক্যে স্ফুট বক্তারো দেবাদ্যসুর পন্নগাঃ .
গুরুবক্ত্র স্থিতা বিদ্যা গুরুভক্ত্যে তু লভ্যতে .. ২২..

গুকারস্ত্বন্ধকারশ্চ রুকারস্তেজ উচ্যতে .
অজ্ঞান গ্রাসকং ব্রহ্ম গুরুরেব ন সংশযঃ .. ২৩..

গুকারঃ প্রথমো বর্ণো মাযাদি গুণ ভাসকঃ .
রুকারো দ্বিতীযো ব্রহ্ম মাযা ভ্রান্তি বিনাশনম্ .. ২৪..

এবং গুরুপদং শ্রেষ্ঠং দেবানামপি দুর্লভম্ .
হাহা হূহূ গণৈশ্চৈব গন্ধর্বৈশ্চ প্রপূজ্যতে .. ২৫..

ধ্রুবং তেষাং চ সর্বেষাং নাস্তি তত্ত্বং গুরোঃ পরম্ .
আসনং শযনং বস্ত্রং ভূশনং বাহনাদিকম্ .. ২৬..

সাধকেন প্রদাতব্যম্ গুরু সংতোষ কারকম্ .
গুরোরারাধনং কার্যং স্বজীবিতং নিবেদযেত্ .. ২৭..

কর্মণা মনসা বাচা নিত্যমারাধযেদ্গুরুম্ .
দীর্ঘ দণ্ডং নমস্কৃত্য নির্লজ্জো গুরুসন্নিধৌ .. ২৮..

শরীরং ইন্দ্রিযং প্রাণাং সদ্গুরুভ্যো নিবেদযেত্ .
আত্মদারাদিকং সর্বং সদ্গুরুভ্যো নিবেদযেত্ .. ২৯..

কৃমি কীট ভস্ম বিষ্ঠা দুর্গন্ধি মলমূত্রকম্ .
শ্লেষ্ম রক্তং ত্বচা মাংসং বঞ্চযেন্ন বরাননে .. ৩০..

সংসারবৃক্ষমারূঢাঃ পতন্তো নরকার্ণবে .
যেন চৈবোদ্ধৃতাঃ সর্বে তস্মৈ শ্রী গুরবে নমঃ .. ৩১..

গুরুর্ব্রহ্মা গুরুর্বিষ্ণুর্গুরুর্দেবো মহেশ্বরঃ .
গুরুরেব পরব্রহ্ম তস্মৈ শ্রী গুরবে নমঃ .. ৩২..

হেতবে জগতামেব সংসারার্ণব সেতবে .
প্রভবে সর্ব বিদ্যানাং শম্ভবে গুরবে নমঃ .. ৩৩..

অজ্ঞানতিমিরান্ধস্য জ্ঞানাঞ্জন শলাকযা .
চক্ষুরুন্মীলিতং যেন তস্মৈ শ্রী গুরবে নমঃ .. ৩৪..

ত্বং পিতা ত্বং চ মে মাতা ত্বং বন্ধুস্ত্বং চ দেবতা .
সংসার প্রতিবোধার্থং তস্মৈ শ্রীগুরবে নমঃ .. ৩৫..

যত্সত্যেন জগত্সত্যং যত্প্রকাশেন ভাতি তত্ .
যদানন্দেন নন্দন্তি তস্মৈ শ্রী গুরবে নমঃ .. ৩৬..

যস্য স্থিত্যা সত্যমিদং যদ্ভাতি ভানুরূপতঃ .
প্রিযং পুত্রদী যত্প্রীত্যা তস্মৈ শ্রী গুরবে নমঃ .. ৩৭..

যেন চেতযতে হীদং চিত্তং চেতযতে ন যম্ .
জাগ্রত্ স্বপ্ন সুষুপ্ত্যাদি তস্মৈ শ্রী গুরবে নমঃ .. ৩৮..

যস্য জ্ঞানাদিদং বিশ্বং ন দৃশ্যং ভিন্নভেদতঃ .
সদেকরূপরূপায তস্মৈ শ্রী গুরবে নমঃ .. ৩৯..

যস্যামতং তস্য মতং মতং যস্য ন বেদ সঃ .
অনন্য ভাব ভাবায তস্মৈ শ্রী গুরবে নমঃ .. ৪০..

যস্য কারণরূপস্য কার্য রূপেণ ভাতি যত্ .
কার্য কারণ রূপায তস্মৈ শ্রী গুরবে নমঃ .. ৪১..

নানারূপং ইদং সর্বং ন কেনাপ্যস্তি ভিন্নতা .
কার্য কারণতা চৈব তস্মৈ শ্রী গুরবে নমঃ .. ৪২..

যদঙ্ঘ্রি কমল দ্বন্দ্বং দ্বন্দ্বতাপনিবারকম্ .
তারকং সর্বদাঽপদ্ভ্যঃ শ্রীগুরুং প্রণমাম্যহম্ .. ৪৩..

শিবে ক্রুদ্ধে গুরুস্ত্রাতা গুরৌ ক্রুদ্ধে শিবো নহি .
তস্মাত্ সর্ব প্রযত্নেন শ্রীগুরুং শরণং ব্রজেত্ .. ৪৪..

বন্দে গুরুপদদ্বন্দ্বং বাঙ্মনশ্চিত্তগোচরম্ .
শ্বেতরক্তপ্রভাভিন্নং শিবশক্ত্যাত্মকং পরম্ .. ৪৫..

গুকারং চ গুণাতীতং রুকারং রূপবর্জিতম্ .
গুণাতীতস্বরূপং চ যো দদ্যাত্স গুরুঃ স্মৃতঃ .. ৪৬..

অ-ত্রিনেত্রঃ সর্বসাক্ষী অ-চতুর্বাহুরচ্যুতঃ .
অ-চতুর্বদনো ব্রহ্মা শ্রী গুরু কথিতঃ প্রিযে .. ৪৭..

অযং মযাঞ্জলির্বদ্ধো দযা সাগর বৃদ্ধযে .
যদনুগ্রহতো জন্তুশ্চিত্রসংসারমুক্তিভাক্ .. ৪৮..

শ্রীগুরোঃ পরমং রূপং বিবেকচক্ষুষোঽমৃতম্ .
মন্দ ভাগ্যা ন পশ্যন্তি অন্ধাঃ সূর্যোদযং যথা .. ৪৯..

শ্রীনাথ চরণ দ্বন্দ্বং যস্যাং দিশি বিরাজতে .
তস্যৈ দিশে নমস্কুর্যাদ্ ভক্ত্যা প্রতিদিনং প্রিযে .. ৫০..

তস্যৈ দিশে সততমঞ্জলিরেশ আর্যে
প্রক্ষিপ্যতে মুখরিতো মধুপৈর্বুধৈশ্চ .
জাগর্তি যত্র ভগবান্ গুরুচক্রবর্তী
বিশ্বোদযপ্রলযনাটকনিত্যসাক্ষী .. ৫১..

শ্রীনাথাদি গুরুত্রযং গণপতিং পীঠত্রযং ভৈরবং
সিদ্ধৌঘং বটুকত্রযং পদযুগং দূতীত্রযং শাংভবম্ .
বীরেশাষ্টচতুষ্কষষ্টিনবকং বীরাবলীপঞ্চকং
শ্রীমন্মালিনিমংত্ররাজসহিতং বন্দে গুরোর্মণ্ডলম্ .. ৫২..

অভ্যস্তৈঃ সকলৈঃ সুদীর্ঘমনিলৈর্ব্যাধিপ্রদৈর্দুষ্করৈঃ
প্রাণাযাম শতৈরনেককরণৈর্দুঃখাত্মকৈর্ দুর্জযৈঃ .
যস্মিন্নভ্যুদিতে বিনশ্যতি বলী বাযুঃ স্বযং তত্ক্ষণাত্
প্রাপ্তুং তত্সহজং স্বভাবমনিশং সেবধ্বমেকং গুরুম্ .. ৫৩..

স্বদেশিকস্যৈব শরীরচিন্তনম্
ভবেদনন্তস্য শিবস্য চিন্তনম্ .
স্বদেশিকস্যৈব চ নামকীর্তনম্
ভবেদনন্তস্য শিবস্য কীর্তনম্ .. ৫৪..

যত্পাদ রেণু কণিকা কাপি সংসারবারিধেঃ .
সেতুবন্ধাযতে নাথং দেশিকং তমুপাস্মহে .. ৫৫..

যস্মাদনুগ্রহং লব্ধ্বা মহদজ্ঞানমুত্সৃজেত্ .
তস্মৈ শ্রী দেশিকেন্দ্রায নমশ্চাভীষ্টসিদ্ধযে .. ৫৬..

পাদাব্জং সর্বসংসার-দাবানলবিনাশকম্ .
ব্রহ্মরন্ধ্রে সিতাংভোজ-মধ্যস্থং চন্দ্রমণ্ডলে .. ৫৭..

অকথাদি ত্রিরেখাব্জে সহস্রদল মণ্ডলে .
হংস পার্শ্ব ত্রিকোণে চ স্মরেত্তন্মধ্যগং গুরুম্ .. ৫৮..

সকল ভুবন সৃষ্টিঃ কল্পিতাশেষপুষ্টি-
নির্খিল নিগম দৃষ্টিঃ সংপদং ব্যর্থদৃষ্টিঃ .
অবগুণ পরিমার্ষ্টিস্তত্পদার্থৈক দৃষ্টি-
ভর্ব গুণ পরমেষ্টির্মোক্ষমার্গৈক দৃষ্টিঃ .. ৫৯..

সকলভুবনরঙ্গ স্থাপনাস্তংভযষ্টিঃ
সকরুণরসবৃষ্টিস্তত্ত্বমালাসমষ্টিঃ .
সকলসমযসৃষ্টিঃ সচ্চিদানন্দ দৃষ্টি
নির্বসতু মযি নিত্যং শ্রীগুরোর্দিব্যদৃষ্টিঃ .. ৬০..

অগ্নি শুদ্ধ সমন্তাত জ্বালা পরিচকাধিযা .
মন্ত্ররাজমিমং মন্যেঽহর্নিশং পাতু মৃত্যুতঃ .. ৬১..

তদেজতি তন্নৈজতি তদ্দূরে তত্সমীপকে .
তদংতরস্য সর্বস্য তদু সর্বস্যাস্য বাহ্যতঃ .. ৬২..

অজোঽহমজরোঽহং চ অনাদিনিধনঃ স্বযম্ .
অবিকারশ্চিদানন্দ অণীযান্ মহতো মহান্ .. ৬৩..

অপূর্বাণাং পরং নিত্যং স্বযংজ্যোতির্নিরামযম্ .
বিরজং পরমাকাশং ধ্রুবমানন্দমব্যযম্ .. ৬৪..

শ্রুতিঃ প্রত্যক্ষমৈতিহ্যমনুমানশ্চতুষ্টযম্ .
যস্য চাত্মতপো বেদ দেশিকং চ সদা স্মরেত্ .. ৬৫..

মননং যদ্ভবং কার্যং তদ্বদামি মহামতে .
সাধুত্বং চ মযা দৃষ্ট্বা ত্বযি তিষ্ঠতি সাংপ্রতম্ .. ৬৬..

অখণ্ডমণ্ডলাকারং ব্যাপ্তং যেন চরাচরম্ .
তত্পদং দর্শিতং যেন তস্মৈ শ্রীগুরবে নমঃ .. ৬৭..

সর্ব শ্রুতি শিরোরত্ন বিরাজিত পদাংবুজঃ .
বেদান্তাংবুজ সূর্যো যস্তস্মৈ শ্রীগুরবে নমঃ .. ৬৮..

যস্য স্মরণমাত্রেণ জ্ঞানমুত্পদ্যতে স্বযম্ .
য এব সর্ব সংপ্রাপ্তিস্তস্মৈ শ্রীগুরবে নমঃ .. ৬৯..

চৈতন্যং শাশ্বতং শান্তং ব্যোমাতীতং নিরঞ্জনম্ .
নাদ বিন্দু কলাতীতং তস্মৈ শ্রীগুরবে নমঃ .. ৭০..

স্থাবরং জঙ্গমং চৈব তথা চৈব চরাচরম্ .
ব্যাপ্তং যেন জগত্সর্বং তস্মৈ শ্রীগুরবে নমঃ .. ৭১..

জ্ঞান শক্তি সমারূঢস্তত্ত্বমালা বিভূষিতঃ .
ভুক্তিমুক্তিপ্রদাতা যস্তস্মৈ শ্রীগুরবে নমঃ .. ৭২..

অনেকজন্মসংপ্রাপ্ত সর্বকর্মবিদাহিনে .
স্বাত্মজ্ঞানপ্রভাবেণ তস্মৈ শ্রীগুরবে নমঃ .. ৭৩..

ন গুরোরধিকং তত্ত্বং ন গুরোরধিকং তপঃ .
তত্ত্বং জ্ঞানাত্পরং নাস্তি তস্মৈ শ্রীগুরবে নমঃ .. ৭৪..

মন্নাথঃ শ্রীজগন্নাথো মদ্গুরুস্ত্রিজগদ্গুরুঃ .
মমাত্মা সর্ব ভূতাত্মা তস্মৈ শ্রীগুরবে নমঃ .. ৭৫..

ধ্যানমূলং গুরোর্মূর্তিঃ পূজামূলং গুরোঃ পদম্ .
মন্ত্রমূলং গুরোর্বাক্যং তস্মৈ শ্রীগুরবে নমঃ .. ৭৬..

গুরুরাদিরনাদিশ্চ গুরুঃ পরম দৈবতম্ .
গুরোঃ পরতরং নাস্তি তস্মৈ শ্রীগুরবে নমঃ .. ৭৭..

সপ্ত সাগর পর্যন্ত তীর্থ স্নানাদিকং ফলম্ .
গুরোরঙ্ঘ্রিপযোবিন্দুসহস্রাংশে ন দুর্লভম্ .. ৭৮..

হরৌ রুষ্টে গুরুস্ত্রাতা গুরৌ রুষ্টে ন কশ্চন .
তস্মাত্সর্বপ্রযত্নেন শ্রীগুরুং শরণং ব্রজেত্ .. ৭৯..

গুরুরেব জগত্সর্বং ব্রহ্ম বিষ্ণু শিবাত্মকম্ .
গুরোঃ পরতরং নাস্তি তস্মাত্সংপূজযেদ্গুরুম্ .. ৮০..

জ্ঞানং বিজ্ঞানসহিতং লভ্যতে গুরুভক্তিতঃ .
গুরোঃ পরতরং নাস্তি ধ্যেযোঽসৌ গুরুমার্গিভিঃ .. ৮১..

যস্মাত্পরতরং নাস্তি নেতি নেতীতি বৈ শ্রুতিঃ .
মনসা বচসা চৈব নিত্যমারাধযেদ্গুরুম্ .. ৮২..

গুরোঃ কৃপা প্রসাদেন ব্রহ্ম বিষ্ণু সদাশিবাঃ .
সমর্থাঃ প্রভবাদৌ চ কেবলং গুরুসেবযা .. ৮৩..

দেব কিন্নর গন্ধর্বাঃ পিতরো যক্ষচারণাঃ .
মুনযোঽপি ন জানন্তি গুরুশুশ্রূষণে বিধিম্ .. ৮৪..

মহাহঙ্কারগর্বেণ তপোবিদ্যাবলান্বিতাঃ .
সংসারকুহরাবর্তে ঘট যন্ত্রে যথা ঘটাঃ .. ৮৫..

ন মুক্তা দেবগন্ধর্বাঃ পিতরো যক্ষকিন্নরাঃ .
ঋষযঃ সর্বসিদ্ধাশ্চ গুরুসেবা পরাঙ্মুখঃ .. ৮৬..

ধ্যানং শৃণু মহাদেবি সর্বানন্দ প্রদাযকম্ .
সর্বসৌখ্যকরং নিত্যং ভুক্তিমুক্তিবিধাযকম্ .. ৮৭..

শ্রীমত্পরব্রহ্ম গুরুং স্মরামি শ্রীমত্পরব্রহ্ম গুরুং বদামি .
শ্রীমত্পরব্রহ্ম গুরুং নমামি শ্রীমত্পরব্রহ্ম গুরুং ভজামি .. ৮৮..

ব্রহ্মানন্দং পরমসুখদং কেবলং জ্ঞানমূর্তিম্ .
দ্বন্দ্বাতীতং গগনসদৃশং তত্ত্বমস্যাদিলক্ষ্যম্ .
একং নিত্যং বিমলমচলং সর্বধীসাক্ষিভূতম্
ভাবাতীতং ত্রিগুণরহিতং সদ্গুরুং তং নমামি .. ৮৯

নিত্যং শুদ্ধং নিরাভাসং নিরাকারং নিরঞ্জনম্ .
নিত্যবোধং চিদানন্দং গুরুং ব্রহ্ম নমাম্যহম্ .. ৯০..

হৃদংবুজে কর্ণিকমধ্যসংস্থে সিংহাসনে সংস্থিতদিব্যমূর্তিম্ .
ধ্যাযেদ্গুরুং চন্দ্রকলাপ্রকাশম্ চিত্পুস্তকাভীষ্টবরং দধানম্ .. ৯১..

শ্বেতাংবরং শ্বেতবিলেপপুষ্পং মুক্তাবিভূষং মুদিতং দ্বিনেত্রম্ .
বামাংকপীঠস্থিতদিব্যশক্তিং মংদস্মিতং সাংদ্রকৃপানিধানম্ .. ৯২..

আনংদমানংদকরং প্রসন্নং জ্ঞানস্বরূপং নিজবোধযুক্তম্ .
যোগীংদ্রমীড্যং ভবরোগবৈদ্যং শ্রীমদ্গুরুং নিত্যমহং নমামি .. ৯৩..

যস্মিন্সৃষ্টিস্থিতিধ্বংস-নিগ্রহানুগ্রহাত্মকম্ .
কৃত্যং পংচবিধং শশ্বদ্ভাসতে তং নমাম্যহম্ .. ৯৪..

প্রাতঃ শিরসি শুক্লাব্জে দ্বিনেত্রং দ্বিভুজং গুরুম্ .
বরাভযযুতং শাংতং স্মরেত্তং নামপূর্বকম্ .. ৯৫..

ন গুরোরধিকং ন গুরোরধিকং ন গুরোরধিকং ন গুরোরধিকম্ .
শিবশাসনতঃ শিবশাসনতঃ শিবশাসনতঃ শিবশাসনতঃ .. ৯৬..

ইদমেব শিবং ত্বিদমেব শিবং ত্বিদমেব শিবং ত্বিদমেব শিবম্ .
মম শাসনতো মম শাসনতো মম শাসনতো মম শাসনতঃ .. ৯৭..

এবংবিধং গুরুং ধ্যাত্বা জ্ঞানমুত্পদ্যতে স্বযম্ .
তত্সদ্গুরুপ্রসাদেন মুক্তোঽহমিতি ভাবযেত্ .. ৯৮..

গুরুদর্শিতমার্গেণ মনঃশুদ্ধিং তু কারযেত্ .
অনিত্যং খংডযেত্সর্বং যত্কিংচিদাত্মগোচরম্ .. ৯৯..

জ্ঞেযং সর্বস্বরূপং চ জ্ঞনং চ মন উচ্যতে .
জ্ঞানং জ্ঞেযসমং কুর্যান্ নান্যঃ পংথা দ্বিতীযকঃ .. ১০০..

এবং শ্রুত্বা মহাদেবি গুরুনিংদাং করোতি যঃ .
স যাতি নরকং ঘোরং যাবচ্চংদ্রদিবাকরৌ .. ১০১..

যাবত্কল্পাংতকো তেহস্তাবদেব গুরুং স্মরেত্ .
গুরুলোপো ন কর্তব্যঃ স্বচ্ছংদো যদি বা ভবেত্ .. ১০২..

হুংকারেণ ন বক্তব্যং প্রাজ্ঞৈঃ শিষ্যৈঃ কথংচন .
গুরোরগ্রে ন বক্তব্যমসত্যং চ কদাচন .. ১০৩..

গুরুং ত্বং কৃত্য হুং কৃত্য গুরুং নির্জিত্য বাদতঃ .
অরণ্যে নির্জলে দেশে স ভবেদ্ ব্রহ্মরাক্ষসঃ .. ১০৪..

মুনিভিঃ পন্নগৈর্বাঽপি সুরৈর্বা শাপিতো যদি .
কালমৃত্যুভযাদ্বাপি গুরূ রক্ষতি পার্বতি .. ১০৫..

অশক্তা হি সুরাদ্যাশ্চ অশক্তা মুনযস্তথা .
গুরুশাপেন তে শীঘ্রং ক্ষযং যাংতি ন সংশযঃ .. ১০৬..

মংত্ররাজমিদং দেবি গুরুরিত্যক্ষরদ্বযম্ .
স্মৃতিবেদার্থবাক্যেন গুরুঃ সাক্ষাত্পরং পদম্ .. ১০৭..

শ্রুতি-স্মৃতী অবিজ্ঞায কেবলং গুরু সেবকাঃ .
তে বৈ সংন্যাসিনঃ প্রোক্তা ইতরে বেষধারিণঃ .. ১০৮..

নিত্যং ব্রহ্ম নিরাকারং নির্গুঅণং বোধযেত্পরম্ .
সর্বং ব্রহ্ম নিরাভাসং দীপো দীপান্তরং যথা .. ১০৯..

গুরোঃ কৃপাপ্রসাদেন আত্মারামং নিরীক্ষযেত্ .
অনেন গুরুমার্গেণ স্বাত্মজ্ঞানং প্রবর্ততে .. ১১০..

আব্রহ্মস্তংবপর্যংতং পরমাত্মস্বরূপকম্ .
স্থাবরং জংগমং চৈব প্রণমামি জগন্মযম্ .. ১১১..

বংদেঽহং সচ্চিদানংদং ভেদাতীতং সদা গুরুম্ .
নিত্যং পূর্ণং নিরাকারং নির্গুণং স্বাত্মসংস্থিকম্ .. ১১২..

পরাত্পরতরং ধ্যেযং নিত্যমানংদকারকম্ .
হৃদযাকাশমধ্যস্থং শুদ্ধস্ফটিকসন্নিভম্ .. ১১৩..

স্ফটিকপ্রতিমারূপং দৃশ্যতে দর্পণে যথা .
তথাত্মনি চিদাকারমানংদং সোঽহমিত্যুত .. ১১৪..

অংগুষ্ঠমাত্রপুরুষং ধ্যাযতশ্চিন্মযং হৃদি .
তত্র স্ফুরতি ভাবো যঃ শ্রুণু তং কথযাম্যহম্ .. ১১৫..

অজোঽহমমরোহঽহং চ হ্যনাদিনিধনোঽহ্যহম্ .
অবিকারশ্চিঅদানন্দো হ্যণীযান্মহতো মহান্ ..

অপূর্বমপরং নিত্যং স্বযংজ্যোতির্নিরামযম্ .
বিরজং পরমাকাশং ধ্রুবমানন্দমব্যযম্ ..

অগোচরং তথা গম্যং নামরূপবিবর্জিতম্ .
নিঃশব্দং তদ্বিজানীযাত্ স্বভাবং ব্রহ্ম পার্বতি .. ১১৬..

যথা গংধঃ স্বভাবেন কর্পূরকুসুমাদিষু .
শীতোষ্ণাদিস্বভাবেন তথা ব্রহ্ম চ শাশ্বতম্ .. ১১৭..

স্বযং তথাবিদো ভূত্বা স্থাতব্যং যত্রকুত্রচিত্ .
কীটভ্রমরবত্তত্র ধ্যানং ভবতি তাদৃশম্ .. ১১৮..

গুরুধ্যানং তথা কৃত্বা স্বযং ব্রহ্মমযো ভবেত্ .
পিংডে পদে তথা রূপে মুক্তোঽসৌ নাত্র সংশযঃ .. ১১৯..

স্বযং সর্বমযো ভূত্বা পরং তত্ত্বং বিলোকযেত্ .
পরাত্পরতরং নান্যত্ সর্বমেতন্নিরালযম্ .. ১২০..

তস্যাবলোকনং প্রাপ্য সর্বসংগবিবর্জিতম্ .
একাকী নিঃস্পৃহঃ শংতস্তিষ্ঠাসেত্তত্প্রসাদতঃ .. ১২১..

লব্ধং বাঽথ ন লব্ধ্বং বা স্বল্পং বা বহুলং তথা .
নিষ্কামেনৈব ভোক্তব্যং সদা সংতুষ্টচেতসা .. ১২২..

সর্বজ্ঞপদমিত্যাহুর্দেহী সর্বমযো বুধাঃ .
সদানংদঃ সদা শাংতো রমতে যত্রকুত্রচিত্ .. ১২৩..

যত্রৈবে তিষ্ঠতে সোঽপি স দেশঃ পুণ্যভাজনম্ .
মুক্তস্য লক্ষণং দেবি তবাগ্রে কথিতং মযা .. ১২৪..

উপদেশস্তথা দেবি গুরুমার্গেণ মুক্তিদঃ .
গুরুভক্তিস্তথা ধ্যানং সকলং তব কীর্তিতম্ .. ১২৫..

অনেন যদ্ভবেত্কার্যং তদ্বদামি মহামতে .
লোকোপকারকং দেবি লৌকিকং তু ন ভাবযেত্ .. ১২৬..

লৌকিকাত্কর্মণো যাংতি জ্ঞানহীনা ভবার্ণবম্ .
জ্ঞানী তু ভাবযেত্সর্বং কর্ম নিষ্কর্ম যত্কৃতম্ .. ১২৭..

ইদং তু ভক্তিভাবেন পঠতে শ্রুণুতে যদি .
লিখিত্বা তত্প্রদাতব্যং দানং দক্ষিণযা সহ .. ১২৮..

গুরুগীতাত্মকং দেবি শুদ্ধতত্ত্বং মযোদিতম্ .
ভবব্যাধিবিনাশার্থং স্বযমেব জপেত্সদা .. ১২৯..

গুরুগীতাক্ষরৈকং তু মংত্ররাজমিমং জপেত্ .
অন্যে চ বিবিধা মংত্রাঃ কলাং নার্হংতি ষোডশীম্ .. ১৩০..

অনংতফলমাপ্নোতি গুরুগীতাজপেন তু .
সর্বপাপপ্রশমনং সর্বদারিদ্র্যনাশনম্ .. ১৩১..

কালমৃত্যুভযহরং সর্বসংকটনাশনম্ .
যক্ষরাক্ষসভূতানাং চোরব্যাঘ্রভযাপহম্ .. ১৩২..

মহাব্যাধিহরং সর্বং বিভূতিসিদ্ধিদং ভবেত্ .
অথবা মোহনং বশ্যং স্বযমেব জপেত্সদা .. ১৩৩..

কুশৈর্বা দূর্বযা দেবি আসনে শুভ্রকংবলে .
উপবিশ্য ততো দেবি জপেদেকাগ্রমানসঃ .. ১৩৪..

ধ্যেযং শুক্লং চ শাংত্যর্থং বশ্যে রক্তাসনং প্রিযে .
অভিচারে কৃষ্ণবর্ণং পীতবর্ণং ধনাগমে .. ১৩৫..

উত্তরে শাংতিকামস্তু বশ্যে পূর্বমুখো জপেত্ .
দক্ষিণে মারণং প্রোক্তং পশ্চিমে চ ধনাগমঃ .. ১৩৬..

আগ্নেয্যং কর্ষণং চৈব বাযব্যাং শত্রুনাশনম্ .
নৈরর্ঋত্যাং দর্শনং চৈব ঈশান্যং জ্ঞানমেব চ ..

বস্ত্রাসনে চ দারিদ্র্যং পাষাণে রোগসংভবঃ .
মেদিন্যাং দুঃখমাপ্নোতি কাষ্ঠে ভবতি নিষ্ফলম্ ..

কৃষ্ণাজিনে জ্ঞানসিদ্ধির্মোক্ষশ্রীর্ব্যাঘ্রচর্মণি .
কুশাসনে জ্ঞানসিদ্ধিঃ সর্বসিদ্ধিস্তু কম্বলে ..

মোহনং সর্বভূতানাং বংধমোক্ষকরং ভবেত্ .
দেবরাজপ্রিযকরং সর্বলোকবশং ভবেত্ .. ১৩৭..

সর্বেষাং স্তংভনকরং গুণানাং চ বিবর্ধনম্ .
দুষ্কর্মনাশনং চৈব সুকর্ম সিদ্ধিদং ভবেত্ .. ১৩৮..

অসিদ্ধং সাধযেত্কার্যং নবগ্রহভযাপহম্ .
দুঃস্বপ্ননাশনং চৈব সুস্বপ্নফলদাযকম্ .. ১৩৯..

সর্বশাংতিকরং নিত্যং তথা বংধ্যা সুপুত্রদম্ .
অবৈধব্যকরং স্ত্রীণাং সৌভাগ্যদাযকং সদা .. ১৪০..

আযুরারোগ্যমৈশ্বর্যং পুত্রপৌত্রপ্রবর্ধনম্ .
অকামতঃস্ত্রী বিধবা জপান্মোক্ষমবাপ্নুযাত্ .. ১৪১..

অবৈধব্যং সকামা তু লভতে চান্যজন্মনি .
সর্বদুঃখভযং বিঘ্নং নাশযেচ্ছাপহারকম্ .. ১৪২..

সর্ববাধাপ্রশমনং ধর্মার্থকামমোক্ষদম্ .
যং যং চিংতযতে কামং তং তং প্রাপ্নোতি নিশ্চিতম্ .. ১৪৩..

কামিতস্য কামধেনুঃ কল্পনাকল্পপাদপঃ .
চিন্তামণিশ্চিন্তিতস্য সর্ব মংগলকারকম্ .. ১৪৪..

মোক্ষহেতুর্জপেন্নিত্যং মোক্ষশ্রিযমবাপ্নুযাত্ .
ভোগকামো জপেদ্যো বৈ তস্য কামফলপ্র্দম্ .. ১৪৫..

জপেচ্ছাক্তস্য সৌরশ্চ গাণপত্যশ্চ বৈষ্ণব .
শৈবশ্চ সিদ্ধিদং দেবি সত্যং সত্যং ন সংশযঃ .. ১৪৬..

অথ কাম্যজপে স্থানং কথযামি বরাননে .
সাগরে বা সরিত্তীরেঽথবা হরিহরালযে .. ১৪৭..

শক্তিদেবালযে গোষ্ঠে সর্বদেবালযে শুভে .
বটে চ ধাত্রীমূলে বা মঠে বৃন্দাবনে তথা .. ১৪৮..

পবিত্রে নির্মলে স্থানে নিত্যানুষ্ঠানতোঽপি বা .
নির্বেদনেন মৌনেন জপমেতং সমাচরেত্ .. ১৪৯..

স্মশানে ভযভূমৌ তু বটমূলান্তিকে তথা .
সিদ্ধ্যন্তি ধৌতরে মূলে চূতবৃক্ষস্য সন্নিধৌ .. ১৫০..

গুরুপুত্রো বরং মূর্খস্তস্য সিদ্ধ্যন্তি নান্যথা .
শুভকর্মাণি সর্বাণি দীক্ষাব্রততপাংসি চ .. ১৫১..

সংসারমলনাশার্থং ভবপাশনিবৃত্তযে .
গুরুগীতাম্ভসিস্নানং তত্ত্বজ্ঞঃ কুরুতে সদা .. ১৫২..

স এব চ গুরুঃ সাক্ষাত্ সদা সদ্ ব্রহ্মবিত্তমঃ .
তস্য স্থানানি সর্বাণি পবিত্রাণি ন সংশযঃ .. ১৫৩..

সর্বশুদ্ধঃ পবিত্রোঽসৌ স্বভাবদ্যত্র তিষ্ঠতি .
তত্র দেবগণাঃ সর্বে ক্ষেত্রে পীঠে বসন্তি হি .. ১৫৪..

আসনস্থঃ শযানো বা গচ্ছংস্তিষ্ঠন্ বদন্নপি .
অশ্বারূঢো গজারূঢঃ সুপ্তো বা জাগৃতোঽপি বা .. ১৫৫..

শুচিষ্মাংশ্চ সদা জ্ঞানী গুরুগীতাজপেন তু .
তস্য দর্শনমাত্রেণ পুনর্জন্ম ন বিদ্যতে .. ১৫৬..

সমুদ্রে চ যথা তোযং ক্ষীরে ক্ষীরং ঘৃতে ঘৃতম্ .
ভিন্নে কুংভে যথাকাশস্তথাত্মা পরমাত্মনি .. ১৫৭..

তথৈব জ্ঞন্নী জীবাত্মা পরমাত্মনি লীযতে .
ঐক্যেন রমতে জ্ঞানী যত্র তত্র দিবানিশম্ .. ১৫৮..

গুরো সংতোষিনে সর্বে মুক্তাস্তে নাত্র সংশযঃ .
ভুক্তিমুক্তিদযাস্তেষাং জিব্হাগ্রে চ সরস্বতী ..

এবংবিধো মহামুক্তঃ সর্বদা বর্ততে বুধঃ .
তস্য সর্ব প্রযত্নেন ভাবভক্তিং করোতি যঃ .. ১৫৯..

সর্বসন্দেহরহিতো মুক্তো ভবতি পার্বতি .
ভুক্তিমুক্তিদ্বযং তস্য জিব্হাগ্রে চ সরস্বতী .. ১৬০..

অনেন প্রাণিনঃ সর্বে গুরুগীতা জপেন তু .
সর্বসিদ্ধিং প্রাপ্নুবন্তি ভুক্তিং মুক্তিং ন সংশযঃ .. ১৬১..

সত্যং সত্যং পুনঃ সত্যং ধর্মং সাংখ্যং মযোদিতম্ .
গুরুগীতাসমং নাস্তি সত্যং সত্যং বরাননে .. ১৬২..

একো দেব এক ধর্ম একনিষ্ঠা পরংতপঃ .
গুরোঃ পরতরং নান্যন্নাস্তি তত্ত্বং গুরোঃ পরম্ .. ১৬৩..

মাতা ধন্যা পিতা ধন্যো ধন্যো বংশঃ কুলং তথা .
ধন্যা চ বসুধা দেবি গুরুভক্তিঃ সুদুর্লভা .. ১৬৪..

শরীরমিন্দ্রিযং প্রাণশ্চার্থঃ স্বজনবাংধবাঃ .
মাতা পিতা কুলং দেবি গুরুরেব ন সংশযঃ .. ১৬৫..

আকল্পং জন্মনা কোট্যা জপব্রততপঃক্রিযাঃ .
তত্সর্বং সফলং দেবি গুরুসংতোশমাত্রতঃ .. ১৬৬..

বিদ্যাতপোবলেনৈব মংদভাগ্যাশ্চ যে নরাঃ .
গুরুসেবা ন কুর্বন্তি সত্যং সত্যং বরাননে .. ১৬৭..

ব্রহ্মবিষ্ণুমহেশাশ্চ দেবর্ষিপিতৃকিন্নরাঃ .
সিদ্ধচারণযক্ষাশ্চ অন্যেঽপি মুনযো জনাঃ .. ১৬৮..

সংতুষ্টঃ সুপ্রসন্নাশ্চ গুরুভক্ত্যা ভবংতি হি .
ফলপুষ্পাণি সংধত্তে মূলে সিক্তং জলং যথা ..

গুরুভাবঃ পরং তীর্থমন্যতীর্থং নিরর্থকম্ .
সর্বতীর্থাশ্রযং দেবি পাদাঙ্গুষ্ঠং চ বর্ততে .. ১৬৯..

জপেন জযমাপ্নোতি চানন্তফলমাপ্নুযাত্ .
হীনকর্ম ত্যজন্সর্বং স্থানানি চাধমানি চ .. ১৭০..

উগ্রধ্যানং কুক্কুটস্থং হীনকর্মফলপ্রদম্ .
গুরুগীতাং প্রযাণে বা সংগ্রামে রিপুসংকটে .. ১৭১..

জপতে জযমাপ্নোতি মরণে মুক্তিদাযকম্ .
সর্বকর্ম চ সর্বত্র গুরুপুত্রস্য সিদ্ধ্যতি .. ১৭২..

ইদং রহস্যং নো বাচ্যং তবাগ্রে কথিতং মযা .
সুগোপ্যং চ প্রযত্নেন মম ত্বং চ প্রিযাত্বিতি .. ১৭৩..

স্বামিমুখ্যগণেষাদিবিষ্ণ্বাদীনাং চ পার্বতি .
মনসাপি ন বক্তব্যং সত্যং সত্যং বদাম্যহম্ .. ১৭৪..

অতীবপক্বচিত্তায শ্রদ্ধাভক্তিযুতায চ .
প্রবক্তব্যমিদং দেবি মমাত্মাঽসি সদা প্রিযে .. ১৭৫..

অভক্তে বংচকে ধূর্তে পাখংডে নাস্তিকে নরে .
মনসাপি ন বক্তব্যা গুরুগীতা কদাচন .. ১৭৬..

গুরবো বহবঃ সংতি শিষ্যবিত্তাপহারকাঃ .
দুর্লভোঽযং গুরুর্দেবি শিষ্যসংতাপহারকঃ ..

সংসারসাগরসমুদ্ধরণৈকমংত্রম্
ব্রহ্মাদিদেবমুনিপূজিতসিদ্ধমংত্রম্ ..
দারিদ্র্যদুঃখভযশোকবিনাশমংত্রম্
বন্দে মহাভযহরং গুরুরাজমন্ত্রম্ ..

.. ইতি শ্রীস্কংদপুরাণে উত্তরখংডে ঈশ্বরপার্বতী সংবাদে গুরুগীতা সমাপ্ত ..
.. শ্রীগুরুদত্তাত্রেযার্পণমস্তু ..