গীতাভাষ্য

.. গীতা শাংকরভাষ্য অধ্যায ২ ১২..

শ্রীমচ্ছঙ্করাচার্যবিরচিতং শ্রীমদ্ভগবদ্গীতাভাষ্যম্ .
ॐ নমো ভগবতে বাসুদেবায |
উপদ্ধাতঃ
নারাযণঃ পরোঽব্যক্তাত্ অণ্ডমব্যক্তসম্ভবম্ .
অণ্ডস্যান্তস্ত্বিমে লোকাঃ সপ্তদ্বীপা চ মেদিনী ..

১. স ভগবান্ সৃষ্ট্বেদং জগত্ তস্য চ স্থিতি চিকীর্ষুঃ
মরীচ্যাদীন্ অগ্রে সৃষ্ট্বা প্রজাপতীন্ প্রবৃত্তিলক্ষণং ধর্মং
গ্রাহযামাস বেদোক্তম্ . ততঃ অন্যান্ চ সনকসনন্দনাদীন্
উত্পাদ্য নিবৃত্তিলক্ষণং ধর্মং জ্ঞানবৈরাগ্যলক্ষণং গ্রাহযামাস .
দ্বিবিধো হি বেদোক্তো ধর্মঃ – প্রবৃত্তিলক্ষণঃ নিবৃত্তিলক্ষণশ্চ
জগতঃ স্থিতিকারণম্ . প্রাণিনাং সাক্ষাত্ অভ্যুদযনিঃশ্রেযসহেতুঃ
যঃ স ধর্মঃ ব্রাহ্মণাদ্যৈঃ বর্ণিভিঃ আশ্রমিভিঃ শ্রেযোর্থিভিঃ
অনুষ্ঠীযমানঃ . দীর্ঘেণ কালেন অনুষ্ঠাতৄণাং কামোদ্ভবাত্
হীযমানবিবেকবিজ্ঞানহেতুকেন অধর্মেণ অভিভূযমানে ধর্মে
প্রবধর্মানে চ অধর্মে জগতঃ স্থিতি পরিপিপালযিষুঃ সঃ আদিকর্তা
নারাযণাখ্যঃ বিষ্ণুঃ ভৌমস্য ব্রহ্মণঃ ব্রাহ্মণত্বস্য রক্ষণার্থ
দেবক্যাং বসুদেবাত্ অংশেন কৃষ্ণঃ কিল সম্বভূব .
ব্রাহ্মণত্বস্য হি রক্ষণে রক্ষিতঃ স্যাত্ বৈদিকো ধর্মঃ তদধীনত্বাত্
বর্ণাশ্রমভেদানাম্ ..

২. স চ ভগবান্ জ্ঞানৈশ্বর্যশক্তিবলবীর্যতেজোভিঃ সদা সম্পন্নঃ
ত্রিগুণাত্মিকাং বৈষ্ণবীং স্বাং মাযাং মূলপ্রকৃতিং বশীকৃত্য অজঃ
অব্যযঃ ভূতানাং ঈশ্বরঃ নিত্যশুদ্ধবুদ্ধমুক্তস্বভাবোঽপি সন্
স্বমাযযা দেহবান্ ইব জাতঃ ইব চ লোকানুগ্রহং কুর্বন্ লক্ষ্যতে .
স্বপ্রযোজনাভাবেঽপি ভূতানুজিঘৃক্ষযা বৈদিকং ধর্মদ্ব্যং অর্জুনায
শোকমোহমহোদধৌ নিমগ্নায উপদিদেশ গুণাধিকৈঃ হি গৃহীতঃ
অনুষ্ঠীযমানশ্চ ধর্মঃ প্রচযং গমিষ্যতীতি . তং ধর্মং
ভগবতা যথোপদিষ্টং বেদব্যাসঃ সর্বজ্ঞঃ ভগবান্ গীতাক্যৈঃ
সপ্তভিঃ শ্লোকশতৈঃ উপনিববন্ধ ..

৩. তত্ ইদম্ গীতাশাস্ত্রং সমস্তবেদার্থসারসঙ্গ্রহভূতং
দুর্বিজ্ঞেযার্থং তদর্থাবিষ্করণায অনেকৈঃ
বিবৃতপদপদার্থবাক্যার্থন্যাযম্ অপি অত্যন্তবিরুদ্ধানেকার্থত্বেন
লোকিকৈঃ গৃহ্যমাণং উপলভ্য অহং বিবেকতঃ অর্থনির্ধারণার্থং
সংক্ষেপতঃ বিবরণং করিষ্যামি ..

৪. তস্য অস্য গীতাশাস্ত্রস্য সংক্ষেপতঃ প্রযোজনং পরং নিঃশ্রেযসং
সহেতুকস্য সংসারস্য অত্যন্তোপরমলক্ষণম্ . তচ্চ
সর্বকর্মসংযাসপূর্বকাত্ আত্মজ্ঞাননিষ্ঠারূপাত্ ধর্মাত্ ভবতি .
তথা ইমং এব গীতার্থং ধর্মং উদ্দিশ্য ভগ্তবতা এব উক্তম্ –

স হি ধর্মঃ সুপর্যাপ্তো ব্রহ্মণঃ পদবেদনে . [ম. ভা. অশ্ব. ১৬. ১২. ]
ইতি অনুগীতাসু . তত্রৈব চ উক্তম্ –
নৈব ধর্মী ন চাধর্মী ন চৈব হি শুভাশুভী . [ম. ভা.
অশ্ব. ১৯ . ৭. ]
যঃ স্যাদেকাসেন লীনঃ তূষ্ণীং কিঞ্চিদচিন্তযন্ . [ম. ভা. অশ্ব.
১৯ . ১. ]
জ্ঞানং সন্যাসলক্ষণম্ [ম. ভা. অশ্ব. ৪৩ . ২৫. ]ইতি চ .
ইহাপি চ অন্তে উক্তং অর্জুনায –
সর্বধর্মান্ পরিয্তজ্য মামেকং শরণং ব্রজ . [১৮. ৬৬. ]ইতি .

৫. অভুদযার্থোঽপি যঃ প্রবৃত্তিলক্ষণঃ ধর্মঃ বর্ণান্
আশ্রমাংশ্চ উদ্দিশ্য বিহিতঃ স দেবাদিস্থানপ্রাপ্তিহেতুঃ অপি সন্
ঈশ্বরার্পণবুদ্ধ্যা অনুষ্ঠীযমানঃ সত্বশুদ্ধযে ভবতি
ফলাভিসন্ধিবর্জিতঃ . শুদ্ধসত্বস্য চ
জ্ঞাননিষ্ঠাযোগ্যতাপ্রাপ্তিদ্বারেণ জ্ঞানোত্পত্তিহেতুত্বেন চ
নিঃশ্রেযসহেতুত্বম্ অপি প্রতিপদ্যতে . তথা চেমম্ এব অর্থম্
অভিসংধায বক্ষ্যতি – ব্রহ্মণ্যাধায কর্মাণি [৫. ১০. ]যোগিনঃ কর্ম
কুর্বন্তি সঙ্গং ত্যক্ত্বাত্মশুদ্ধযে [৫. ১১. ]

৬. ইমং দ্বিপ্রকারং ধর্মং নিঃশ্রেযসপ্রযোজনং পরমার্থতত্বং চ
বাসুদেবাখ্যং পরব্রহ্মাভিধেযভূতং বিশেষতঃ অভিব্যঞ্জযত্
বিশিষ্টপ্রযোজনসম্বন্ধাভিধেযবত্ গীতাশাস্ত্রম্ . যতঃ
তদর্থবিজ্ঞানে স্মস্তপুরুষার্থসিদ্ধিঃ অতঃ তদ্বিবরণে যত্নঃ ক্রিযতে
মযা ..

অত্র চ ধৃতরাষ্ট্র উবাচ – ধর্মক্ষেত্রে ইত্যাদি .

অথ দ্বিতীযোঽধ্যাযঃ |

১১. ০ অ অত্র দৃষ্ট্বা তু পাণ্ডবানীকম্ [১. ২. ]ইতি আরভ্য
যাবত্ ন যোত্স্য ইতি গোবিন্দমুক্ত্বাতূষ্ণীং বভূব হ . [১. ৯. ]
ইত্যেতদন্তঃ প্রাণিনং
শোকমোহাদিসংসারবীজভূতদোষোদ্ভবকারণপ্রদর্শনার্থত্বেন
ব্যাখ্যেযঃ গ্রন্থঃ . তথা হি – অর্জুনেত
রাজ্যগুরুপুত্রমিত্রসুহৃত্স্বজনসংবন্ধিবান্ধবেষু অহং এষাং মম এতে
ইত্যেবং ভ্রান্তিপ্রত্যযনিমিতস্নেহবিচ্ছেদাদিনিমিতৌ আত্মনঃ শোকমোহৌ
প্রদর্শিতৌ কথং ভীষ্মমহং সংখ্যে [২. ৪. ]ইত্যাদিনা .
শোকমোহাভ্যাং হি অভিভূতবিবেকবিজ্ঞানঃ স্বতঃ এব ক্ষত্রধর্মে যুদ্ধে
প্রবৃতোঽপি তস্মাত্ যুদ্ধাত্ উপররাম পরধর্মং চ ভিক্ষাজীবনাদিকং
কর্তুং প্রববৃতে . তথা চ সর্বপ্রাণিনাং
শোকমোহাদিদোষাবিষ্টচেতসাং স্বভাবতঃ এব স্বধর্মপরিত্যাগঃ
প্রতিষিদ্ধসেবা চ স্যাত্ . স্বধর্মে প্রবৃতানাম্ অপি তেষাং
বাঙ্মনঃ কাযাদীনাং প্রবৃতিঃ ফলাভিসন্ধিপূর্বিকা এব সাহঙ্কারা চ
ভবতি . তত্র এবং সতি ধর্মাধর্মোপচযাত্
ইষ্টানিষ্টজন্মসুখদুঃখপ্রাপ্তিলক্ষণঃ সংসারঃ অনুপরতঃ ভবতি .
ইত্যতঃ সংসারবীজভূতৌ শোকমোহৌ . তযোশ্চ
সর্বকর্মসংযাসপূর্বকাত্ আত্মজ্ঞানাত্ ণান্যতঃ নিবৃতিঃ ইতি তত্
উপদিদিক্ষুঃ সর্বলোকানুগ্রহার্থং অর্জুনং নিমিতীকৃত্য আহ ভগবান্
বাসুদেবঃ – অশোচ্যান্ [২. ১১. ]ইত্বাদি ..

১১. ০ আ. অত্র কেচিত্ আহুঃ – সর্বকর্মসংযাসপূর্বকাত্
আত্মজ্ঞাননিষ্ঠামাত্রাত্ এব কেবলাত্ কৈবল্যং ন প্রাপ্যতে এব . কিং
তর্হি . অগ্নিহোত্রাদিশ্রৌতস্মর্তকর্মসহিতাত্ জ্ঞনাত্ কৈবল্যপ্রাপ্তিঃ
ইতি কর্বাসু গীতাসু নিশ্চিতঃ অর্থঃ ইতি . জ্ঞাপকং চ আহুঃ অয্স
অর্থস্য – অথ চেত্বমিমং ধর্ম্যং সংগ্রামং ন করিষ্যসি [২ . ৩৩.
]কর্মণ্যেবাদিকারস্তে [২ . ৪৭. ]কুরু কর্ব্মৈব তস্মাত্বম্ [৪. ১৫. ]
ইত্যাদি . হিংসাদিযুক্তত্বাত্ বৈদিক কর্ম অধর্মায ইতি ইযম্ অপি
আশঙ্কা ন কার্যা . কথম্ . ক্ষাত্রং কর্ম যুদ্ধলক্ষণং
গুরুভ্রাতৃপুত্রাদিহিংসালক্ষণং অত্যন্তক্রূরম্ অপি স্বধর্মঃ ইতি কৃত্বা
ন অধর্মায তদকরণে চ – ততঃ স্বধর্মং কীতিং চ
হিত্বাপাপমবাপ্স্যসি . [২ . ৩৩. ]ইতি ব্রুবতা
যাবজ্জীবাদিশ্রুতিচোদিতানাং পশ্বাদিহিসালক্ষণানাং চ কর্মণাং প্রাগবে ন
অধর্মত্বমিতি সুনিশ্চিতং উক্তং ভবতি – ইতি .

১১. ০ ই. তত্ অসত্ জ্ঞানকর্মনিষ্ঠযোঃ বিভাগবচনাত্
বুদ্ধিদ্বযাশ্রযযোঃ . অশোচ্যান্ [ ২. ১১. ]ইত্যাদিনা ভগবতা
যাবত্ স্বধর্মমপি চাবেক্ষ্য [২ . ৩১. ]ইত্যেতদন্তেন গ্রন্থেন
যত্পরম্র্থাত্মতত্বনিরূপণং কৃতম্ তত্ সাংখ্যম্ . তদ্বিষযা
বুদ্ধিঃ আত্মনঃ জন্মাদিষড্বিক্রিযাভাবাত্ অকর্তা আত্মা ইতি
প্রকরণার্থনিরূপণাত্ যা জাযতে সা সাংখ্যবুদ্ধিঃ . সাযেষাং জ্ঞানিনাং
উচিতা ভবতি তে সাংখ্যাঃ . এতস্যাঃ বুদ্ধেঃ জন্মনঃ প্রাক্ আত্মনঃ
দেহাদিব্যতিরিক্তত্বকর্তৃত্বভোক্তৃত্বাদ্যপেক্ষঃ ধর্মাধর্ম
বিবেকপূর্বকঃ মোক্ষসাধনানুষ্ঠানলক্ষ্ণঃ যোগঃ . তদ্বিষযা বুদ্ধিহ্
যোগবুদ্ধিঃ . সাযেষাং কর্মিণা উচিতাভব্তি তে যোগিনঃ . তথা চ
ভগবতা বিভক্তে দ্বে বুদ্ধী নির্দিষ্টে এষা এষা তেঽভিহিতা সাংখ্যে
বুদ্ধির্যোগে ত্বিমাং শৃণু . [২. ৩৯. ]ইতি . তযোশ্চ
সাঙ্খ্যবুদ্ধ্যাশ্রযাং জ্ঞানযোগেন নিষ্ঠাং সাঙ্খ্যানাং বিভক্তাং বক্ষ্যতি
পুরা বেদাত্মনা মযা প্রোক্তা [৩ . ৩. ]ইতি . তথা চ
যোগবুদ্ধ্যাশ্রযাং কর্মযোগেন নিষ্ঠাং বিভক্তাং বক্ষ্যতি – কর্মযোগেন
যোগিনাম্ [৩. ৩. ]ইতি . এবং সাঙ্খ্যবুদ্ধিং যোগবুদ্ধিং চ
আশ্রিত্য দ্বে নিষ্ঠে বিভক্তে ভগব্তা এব উক্তে জ্ঞানকর্মণোঃ
কর্তৃত্বাকর্তৃত্বিকত্বানে কত্ববুদ্ধ্যাশ্রযযোঃ যুগপত্
একপুরুষাশ্রযত্বাসংভবং পশ্যতা .

১১. ০ ঈ. তথা এতত্ বিভাগবচনং তথৈব দর্শিতং শাতপথীযে
ব্রাহ্মণে – এতমেব প্রব্রাজিনো লোকমিচ্ছান্তো ব্রাহ্মণাঃ প্রব্রজন্তি ইতি
সর্বকর্মসংযাস্ং বিধায তচ্ছেষেণ কিং প্রজযা করিষ্যামো যেষাং
নোঽযমাত্মাঽযং লোকঃ [বৃ . উ. ৪. ৪. ২২. ]ইতি . তত্রৈব চ্
প্রাক্ দারপরিগ্রহাত্ পুরুষঃ আত্মা প্রাকৃতঃ ধর্মজিজ্ঞাসোতরকালং
লোকত্রযসাধনং – পুত্রং দ্বিপ্রকারং চ বিতং – মানুষং দৈবং চ ;
তত্র মানুষং কর্মরূপং পিতৃলোকপ্রাপ্তিসাধনং বিদ্যাং চ দৈবং বিতং
দেবলোকপ্রাপ্তিসাধনং সোঽকামযত ইতি অবিদ্যাকামবতঃ এব সর্বাণি কর্মাণি
শ্রৌতাদীনি দর্শিতানি . তেভ্যঃ (ব্যুত্থায প্রব্রজন্তি ইতি )
ব্যুত্থানং আত্মনং এব লোকং ইচ্ছতঃ অকামস্য বিহিতম্ . তদেতত্
বিভাগবচনং অনুপপন্নং স্যাত্ যদি শ্রৌতকর্মজ্ঞানযোঃ সমুচ্চযঃ
অভিপ্রেত স্যাত্ ভগবতঃ ..

১১. ০ উ. ন চ র্জুনস্য প্রশ্নঃ উপপন্নঃ ভবতি জ্যাযসী
চেত্কর্মণস্তে [৩. ১. ]ইত্যাদিঃ . একপুরুষানুষ্ঠেযত্বাসংভবং
বুদ্ধিকর্মণোঃ ভগবতা পূর্বং অনুক্তং কথং অর্জুনঃ অশ্রুতং বুদ্ধেশ্চ
কর্মণঃ জ্যাযস্ত্বং ভগবতি অধ্যারোপযেত্ মৃষৈব জ্যাযসী
চেত্কর্মণস্তে মতাবুদ্ধিঃ [৩. ১. ]ইতি ..

১১. ০ ঊ. কিঞ্চ – যদি বুদ্ধিকর্মণোঃ সর্বেষাং স্মুচ্চযঃ উক্তঃ
স্যাত্ অর্জুনস্যাপি সঃ উক্তঃ এব ইতি যচ্ছ্রেয এতযোরেকং তন্মে ব্রূহি
সুনিশ্চিতম্ [৫ . ১ . ]ইতি কথমুভযোঃ উপদেশে সতি
অন্যতরবিষযঃ এব প্রশ্নঃ স্যাত্ . ন হি পিতপ্রশমনার্থিনঃ
বৈদ্যেন মধুরং শীতং চ ভোক্তব্যমিতি উপদিষ্টে
তযোরন্যতরত্পিতপ্রশমনকারণং ব্রূহি ইতি প্রশ্নঃ সংভবতি . অথ
অর্জুনস্য ভগবদুক্তবচনার্থবিবেকানবধারণনিমিতঃ প্রশ্নঃ কল্প্যতে
তথাঽপি ভগবতা প্রশ্নানুরূপং প্রতিবচনং দেযং মযা বুদ্ধিকর্মণোঃ
সমুচ্চযঃ উক্তঃ কিমর্থম্ ইত্থং ত্বং ভ্রান্তোঽসি ইতি . ন তু পুনঃ
প্রতিবচনমননুরূপং পৃষ্টাত্ অন্যত্ এব দ্বে নিষ্ঠে মযা পুরা
প্রোক্তে [৩. ৩. ]ইতি বক্তুং যুক্তম্ .

১১. ০ ঋ. নাপি স্মার্তেনৈব কর্মণা বুদ্ধেঃ সমুচ্চযেঽভিপ্রেতে
বিভাগবচনাদি সর্বম্ উপপন্নং কিংচ ক্ষত্রিযস্য যুদ্ধং স্মার্তং
কর্ম স্বধর্ম ইতি জানতঃ তত্কিং কর্মণি ঘোরে মাং নিযোজযসি [৩. ১. ]
ইতি উপালম্ভঃ অনুপপন্নঃ .

১১. ০ ৠ. তস্মাদ্গীতাশাস্ত্রে ঈষন্মাত্রেণাপি শ্রৌতেন স্মার্তেন বা
কর্মণাঽঽত্মজ্ঞানস্য সমুচ্চযঃ ন কেনচিদ্দর্শযিতুং শক্যঃ .

১১. ঌ. যস্য তু অজ্ঞানাদ্রাগাদিদোষতো বাকর্মণি প্রবৃতস্য যজ্ঞেন
দানেন তপসা বা বিশুদ্ধসত্বস্য জ্ঞানমুত্পন্নং পরমার্থতত্ববিষযং
একমেবেদং সর্বং ব্রহ্ম অকর্তৃ চ ইতি তস্য কর্মণি কর্মপ্রযোজনে চ
নিবৃতেঽপি লোকসংগ্রহার্থং যত্নপূর্বং যথা প্রবৃতিঃ তথৈব
কর্মণি প্রবৃতস্য যত্প্রবৃতিরূপং দৃশ্যতে ন তত্কর্ম যেন বুদ্ধেঃ
সমুচ্চযঃ স্যাত্ . যথা ভগবতঃ বাসুদেবস্য ক্ষাত্রধর্মচেষ্টিতং
ন জ্ঞানেন সমুচ্চীযতে পুরুষার্থসিদ্ধযেঃ
তদ্বতত্ফলাভিসংধ্যহংকারাভাবস্য তুল্যত্বাত্ বিদুষঃ . তত্ববিতু
ন অহং করোমি ইতি মন্যতে ন চ তত্ফলম্ অভিসংধতে . যথা চ
স্বর্গাদিক্রামার্থিনঃ অগ্নিহোত্রাদিকামসাধনানুষ্ঠানায আহিতাগ্নেঃ কাম্যে এব
অগ্নিহোত্রাদৌ প্রবৃতস্য সামিকৃতে বিনষ্টেঽপি কামে তদেব অগ্নিহোত্রাদি
অনুতিষ্ঠতোঽপি ন তত্কাম্যম্ অগ্নিহোত্রাদি ভবতি . তথা চ
দর্শযতি ভগবান্ কুর্বন্নপি ন লিপ্যতে [৫. ৭. ]ন কারোতি ন
লিপ্যতে [১৩ . ৩১. ]ইতি তত্র তত্র . যচ্চ পূর্বৈঃ পূর্বতরং
কৃতম্ [৪ . ১৫. ]কর্মণৈব হি সংসিদ্ধিমাস্থিতা জনকাদযঃ [৩.
২০. ]ইতি ততু প্রবিভজ্য বিজ্ঞেযম্ . তত্কথম্ . যদি তাবত্পূর্বে
জনকাদযঃ তত্ববিদঃ অপি প্রবৃত্তকর্মাণঃ স্যুঃ তে লোকসংগ্রহার্থং
গুণা গুণেষু বর্তন্তে [৩. ২৮. ]ইতি জ্ঞানেনৈব সংসিদ্ধিম্ আস্থিতাঃ ন
কর্মসংযাসং কৃতবন্তঃ ইত্যর্থঃ . অথ ন তে তত্ববিদঃ –
ঈশ্বরসমর্পিতেন কর্মণা সাধনভূতেন সংসিদ্ধিং সত্বশুদ্ধিং
জ্ঞানোত্পতিলক্ষণাং বা সংসিদ্ধিমাস্থিতাঃ জনকাদযঃ ইতি ব্যাখ্যেযম্ .
এতমেব অর্থং বক্ষ্যতি ভগবান্ সত্বশুদ্ধযে কর্ম কুর্বন্তি [৫. ১১.
]ইতি . স্বকর্মণা তমভ্যর্চ্য সিদ্ধিং বিন্দতি মানবঃ [১৮. ৪৬. ]
ইত্যুক্ত্বা সিদ্ধিং প্রাপ্তস্য চ পুনঃ জ্ঞাননিষ্ঠাং বক্ষ্যতি সিদ্ধিং প্রাপ্তো
যথা ব্রহ্ম [১৫. ৫০. ]ইত্যাদিনা . তস্মাত্ গীতাশাস্ত্রে কেবলাত্ এব
তত্বজ্ঞানাত্ মোক্ষপ্রাপ্তিঃ ন কর্মসমুচ্চিতাত্ ইতি নিশ্চিতঃ অর্থঃ .
যথা চ অযং অর্থঃ তথা প্রকরণশঃ বিভজ্য তত্র তত্র
দর্শযিষ্যামঃ ..

১১. ০ ৡ. তত্র এবং ধর্মসম্ব্বূধচেতসঃ মিথ্যাজ্ঞানবতঃ মহতি
শোকসাগরে নিমগ্নয্স্য অর্জুনস্য অন্যত্র আত্মজ্ঞানাত্ উদ্ধরণং
অপশ্যন্ ভগবান্ বাসুদেবঃ ততঃ কৃপযা অর্জুনং উদ্দিধারযিষুঃ
আত্মজ্ঞানায অবতারযন্ আহ –

১১. ১ অশোচ্যান্ ইত্যাদি .. ন শোচ্যাহ্ অশোচ্যাঃ ভীষ্মদোর্ণাদযঃ
সদ্বৃতত্বাত্ পরমার্থস্বরূপেণ চ নিত্যত্বাত্ . তান্ অশোচ্যান্
অন্বশোচঃ অনুশোচিতবান্ অসি তে ম্রিযন্তে মন্নিমিতং অহং তৈঃ
বিনাভূতঃ কিং করিষ্যামি রাজ্যসুখাদিনা ইতি . ত্বং প্রজ্ঞাবাদান্
প্রজ্ঞাবতাং বুদ্ধিমতং বাদান্ চ বচনানি চ ভাষসে . তদেতত্
মৌঢ্যং পাণ্ডিত্যং চ বিরুদ্ধং আত্মনি দর্শযসি উন্মতঃ ইব ইতি
অভিপ্রাযঃ যস্মাত্ গতাসূন্ গতপ্রাণাত্ মৃতান্ অগতাসূন্
অগতপ্রাণান্ জীবতঃ চ ন অনুশোচন্তি পণ্ডিতাঃ আত্মজ্ঞাঃ . পণ্ডা
আত্মবিষযা বুদ্ধিঃ যেষাং তে হি পণ্ডিতাঃ পাণ্ডীত্যং নির্বেদ্য [বৃ. উ.
৩. ৫. ১. ]ইতি শ্রুতেঃ . পরমার্থতস্তু তান্ নিত্যান্ অশোচ্যান্
অনুশোচসি অতঃ মূঢঃ অসি ইতি অভিপ্রাযঃ ..

১২. ০ কুতঃ তে অশোচ্যা . যতজঃ নিত্যাঃ . কথম্ .

১২. ১ ন তু ইতি .. ন তু এব জাতু কদাচিত্ অহং ন আস.ম্ কিন্তু আসম্
এব .. অতীতেষু দেহোত্পতিবিনাশেষু ঘটাদিষু বিযদ্ ইব নিত্যঃ এব
অহং আসং ইতি অভিপ্রাযঃ . তথা – ন ত্বং ন আসীঃ কিং তু আসীঃ এব .
তথা – ন ইমে জনাধিপাঃ ন আসন্ কিং তু আসন্ এব . তথা ন চ
এব ন ভবিষ্যামঃ কিং তু ভবিষ্যামঃ এব সর্বে বযং অতঃ অস্মাত্
দেহবিনাশাত্ পরং উতরকালেঽপি . ত্রিষ্বপি কালেষু নিত্যাঃ
আত্মস্বরূপেণ ইত্যর্থঃ . দেহভেদানুবৃত্যা বহুবচনম্ ন
আত্মভেদাভিপ্রাযেণ .

১৩. ০ তত্র কথমিব নিত্যঃ আত্মা ইতি . দৃষ্টান্তং আহ –

১৩. ১ দেহিনঃ ইতি .. দেহঃ অস্য অস্তি ইতি দেহী তস্য দেহিনঃ দেহবতঃ
আত্মনঃ অস্মিন্ বর্তমানে দেহে যথা যেন প্রকারেণ কৌমারং কুমারভাবঃ
বাল্যাবস্থা যৌবনং যূনঃ ভাবঃ মধ্যমাবস্থা জরা বযোহানিঃ জীর্ণাবস্থা
ইতি এতঃ তিস্রঃ অবস্থাঃ অন্যোন্যবিলক্ষণাঃ . তাসাং প্রথমাবস্থানাশে ন
নাশঃ দ্বিতীযাবস্থোপজননে ন উপজননং আত্মনঃ . কিং তর্হি .
অবিক্রিযস্য এব একস্য দ্বিতীযতৃতীযাবস্থাপ্রাপ্তিঃ আত্মনঃ দৃষ্টা .
তথা তদ্বত্ এব দেহাত্ অন্যঃ দেহঃ দেহান্তরং তস্য প্রাপ্তিঃ
দেহান্তরপ্রাপ্তিঃ অবিকৃযস্য এব আত্মনঃ ইত্যর্থঃ . ধীরাঃ ধীমান্
তত্র এবং সতি ন মুহ্যতি ন মোহং আপদ্যতে ..

১৪. ০ যদ্যপি আত্মবিনাশনিমিতঃ মোহঃ ন সংভবতি নিত্যঃ আত্মা ইতি
বিজানতঃ তথাপি শীতোষ্ণসুখদুঃখপ্রাপ্তিনিমিতঃ মোহঃ লৌকিকঃ
দৃশ্যতে সুখবিযোগনিমিতো মোহঃ দুঃখসংযোগনিমিতশ্চ শোকঃ .
ইত্যেতত্ অর্জুনস্য বচনং আশঙ্ক্য ভগবান্ আহ –

১৪. ১ মাত্রাস্পর্শাঃ ইতি .. মাত্রাঃ আভিঃ মীযন্তে শব্দাদযঃ ইতি
শ্রোত্রাদীনি ইন্দ্রিযাণি . মাত্রাণাং স্পর্শাঃ শব্দাদিভিঃ সংযোগাঃ . তে
শীতোষ্ণসুখদুঃখদাঃ শীতং উষ্ণং সুখং দুঃখং চ প্রযচ্ছন্তীতি .
অথবা – স্পৃশ্যন্তে ইতি স্পর্ষাঃ বিষযাঃ শব্দাদযঃ মাত্রাশ্চ
স্পর্শাশ্চ শীতোষ্ণসুখদুঃখদাঃ – শীতং কদাচিত্ সুখং কদাচিত্
দুঃখম্ . তথা উষ্ণম্ অপি অনিযতস্বরূপম্ . সুখদুঃখে পুনঃ
নিযতরূপতাং ন ব্যভিচরতঃ . অতঃ তাভ্যাং পৃথক্ শীতোষ্ণযোঃ
গ্রহণম্ . যস্মাত্ তে মাত্রাস্পর্শাদযঃ আগমাপাযিনঃ আগমাপাযশীলাঃ
তস্মাত্ অনিত্যাঃ . অতঃ তান্ শীতোষ্ণাদীন্ তিতিক্ষস্ব প্রসহস্ব .
তেষু হর্ষং বিষাদং বা মা কার্ষীঃ ইত্যর্থঃ ..

১৫. ০ শীতোষ্ণাদীন্ সহতঃ কিং স্যাত্ ইতি . শৃণু –

১৫. ১ যং হি ইতি .. যং হি পুরুষং সমদুঃখসুখং সমে দুঃখসুখে
যস্য তং সমদুঃখসুখং সুখদুঃখপ্রাপ্তৌ হর্শবিষাদরহিতং ধীরং
ধীমন্তং ন ব্যথযন্তি ন চালযন্তি নিত্যাত্মদর্শনাত্ এতে যথোক্তাঃ
শীতোষ্ণাদযঃ সঃ নিত্যাত্মস্বরূপদর্শননিষ্ঠঃ দ্বন্দ্বসহিষ্ণুঃ
অমৃতত্বায অমৃতভাবায মোক্ষায কল্পতে সমর্থঃ ভবতি ..

১৬. ০ ইতশ্চ শোকমোহৌ অকৃত্বাশীতোষ্ণাদিসহনং যুক্তং যস্মাত্ –

১৬. ১ নাসতঃ ইতি .. ন অসতঃ অবিদ্যমানস্য শীতোষ্ণাদেঃ সকারণস্য ন
বিদ্যতে নাস্তি ভাবো ভবনং অস্তিতা ..

ন হি শীতোষ্ণাদি সকারণং প্রমাণৈঃ নিরূপ্যমাণং বস্তু সত্ ভবতি .
বিকারো হি সঃ বিকারশ্চ ব্যভিচরতি . যথা ঘটাদিসংস্থানং
চক্ষুষানিরূপ্যমাণং মৃদ্ব্যতিরেকেণ অনুপলব্ধেঃ অসত্ তথা সর্বো
বিকারঃ কারণব্যতিরেকেণ অনুপলব্ধেঃ অসন্ . জন্মপ্রধ্বংসাভ্যাং
প্রাক্ ঊর্ধ্বং চ অনুপলব্ধেঃ কার্যস্য ঘটাদেঃ মৃদাদিকারণস্য চ
তত্কারণব্যতিরেকেণ অনুপলব্ধেঃ অসত্বম্ .. তদস্ত্বে
সর্বাভাবপ্রসঙ্গঃ ইতি চেত্ – ন সর্বত্র বুদ্ধিদ্বযোপলব্ধেঃ
সদ্বুদ্ধিঃ অসদ্বুদ্ধিঃ ইতি . যদ্বিষযা বুদ্ধিঃ ন ব্যভিচরতি তত্
সত্ যদ্বিষযা ব্যভিচরতি তত্ অসত্ ইতি সদসদ্বিভাগে বুদ্ধিতন্ত্রে
স্থিতে সর্বত্র দ্বে বুদ্ধী সর্বৈঃ উপলভ্যেতে সমানাধিকরণে ন
নীলোত্পলবত্ সন্ ঘটঃ সন্ পটঃ সন্ হস্তী ইতি . এবং সর্বত্র .
তযোঃ বুদ্ধ্যোঃ ঘটাদিবুদ্ধিঃ ব্যভিচরতি . তথা চ দর্শিতম্ .
ন তু সদ্বুদ্ধিঃ . তস্মাদ্ ঘটাদিবুদ্ধিবিষযঃ অসন্ ব্যভিচারাত্
ন তু সদ্বুদ্ধিবিষযঃ অব্যভিচারাত্ ..

১৬. ২ ঘটে বিনষ্টে ঘটবুদ্ধৌ ব্যভিচরন্ত্যাং সদ্বুদ্ধিঃ অপি
ব্যভিচরতি ইতি চেত্ – ন পটাদৌ অপি সদ্বুদ্ধিদর্শনাত্ .
বিশেষণবিষযা এব সা সদ্বুদ্ধিঃ .. সদ্বুদ্ধিবত্ ঘটবুদ্ধিঃ অপি
ঘটান্তরে দৃশ্যতে ইতি চেত্ – ন পটাদৌ অদর্শনাত্ ..
বিশেষণবিষযা এব সা সদ্বুদ্ধিঃ .. সদ্বুদ্ধিবত্ ঘ্টবুদ্ধিঃ অপি
ঘটান্তরে দৃশ্যতে ইতি চেত্ ন পটাদৌ অদর্শনাত্ .. সদ্বুদ্ধিঃ
অপি নষ্টে ঘটে ন দৃশ্যতে ইতি চেত্ ন বিশেষ্যাভাবাত্ .
সদ্বুদ্ধিঃ বিশেষণবিষযা সতী বিশেষ্যাভাবে বিশেষণানুপপতৌ
কিংবিষযা স্যাত্ . ন তু পুনঃ সদ্বুদ্ধেঃ বিষযাভাবাত্ .

১৬. ৩ একাধিকরণত্বং ঘটাদিবিশেষ্যাভাবে ন যুক্তমিতি চেত্ – ন
ইদং উদকম্ ইতি মরীচ্যাদৌ অন্যতরাভাবেঽপি সামানাধিকরণ্যদর্শনাত্ .
তস্মাত্ দেহাদেঃ দ্বন্দ্বস্য চ স্কারণস্য অসতঃ ন বিদ্যতে ভাবঃ ইতি .
তথা সতঃ চ আত্মনঃ অভাবঃ অবিদ্যমানতা ন বিদ্যতে সর্বত্র
অব্যভিচারাত্ ইতি অবোচাম . এবং আত্মানাত্মনোঃ সদসতোঃ উভযোঃ অপি
দৃষ্টঃ উপলব্ধঃ অন্তঃ নির্ণযঃ সত্ সদেব অসত্ অসদেব ইতি তু
অনযোঃ যথোক্তযোঃ তত্বদর্শিভিঃ .

১৬. ৪ তত্ ইতি সর্বনামঃ সর্বং চ ব্রহ্ম . তস্য নাম তত্ ইতি
তদ্ভাবঃ তত্বং ব্রহ্মণঃ যাথাত্ম্যম্ . তত্ দ্রষ্টিং শীলং যেষাং তে
তত্বদর্শিনঃ তৌঃ তত্বদর্শিভিঃ . ত্বমপি তত্বদর্শিনাং দৃষ্টিং
আশ্রিত্য শোকং মোহং চ হিত্বা শীতোষ্ণাদীনি নিযতানি যতরূপাণি
দ্বন্দ্বানি বিকারোঽযমসন্ এব মরীচিজলবত্ মিথ্যা অব্ভাসতে – ইতি
মনসি নিশ্চিত্য তিতিক্ষস্ব ইতি অভিপ্রাযঃ ..

১৭. ০ কিং পুনঃ তত্ যত্ সত্ এব সর্বদা ইতি . উচ্যতে –

১৭. ১ অবিনাশি ইতি .. অবিনাশি ন বিনষ্টুং শীলং অস্য ইতি . তু
শব্দঃ অসতঃ বিশেষণার্থঃ . তত্ বিদ্ধি বিজানীহি . কিম্ . যেন
সর্বং ইদং জগত্ তত্ ব্যাপ্তং সদাখ্যেন ব্রহ্মণা সাকাশং আকাশেন এব
ঘটাদযঃ . বিনাশং অদর্শনং অভাবম্ . অব্যযস্য ন ব্যেতি
উপচযাপচযৌ ন যাতি ইতি অব্যযং তস্য অব্যযস্য .

১৭. ২ ন এতত্ সদাখ্যং ব্রহ্ম স্বেন রূপেণ ব্যেতি ব্যভিচরতি
নিরবযবত্বাত্ দেহাদিবত্ . নাপি আত্মীযেন আত্মীযাভাবাত্ . যথা
দেবদত্তঃ ধনহান্যা ব্যেতি ত তু এবং ব্রহ্ম ব্যেতি . অতঃ অব্যযস্য অস্য
ব্রহ্মণঃ বিনাশং ন কশ্চিত্ অর্তুং অর্হতি ন কশ্চিত্ আত্মানং
বিনাশযিতুং শক্নোতি ঈশ্বরোঽপি . আত্মা হি ব্রহ্মঃ স্বাত্মনি চ
ক্রিযাবিরোধাত্ ..

১৮. ০ কিং পুনঃ তত্ অসত্ যত্ স্বাত্মসতাং ব্যভিচরতি ইতি .
উচ্যতে –

১৮. ১ অন্তবন্তঃ ইতি .. অন্তঃ বিনাশঃ বিদ্যতে যেষাং তে অন্তবন্তঃ .
যথা মৃগতৃষ্ণিকাদৌ সদ্বুদ্ধিঃ অনুবৃত্তা প্রমাণবিরূপণান্তে
বিচ্ছিদ্যতে স তস্য অন্তঃ তথা ইমে দেহাঃ স্বপ্নমাযাদেহাদিবচ্চ
অন্তবন্তঃ নিত্যস্য শরীরিণঃ শরীরবতঃ অনাশিনঃ অপ্রমেযস্য আত্মনঃ
অন্তবন্ত ইতি উক্তাঃ বিবেকিভিঃ ইত্যর্থঃ . নিত্যস্য অনাশিনঃ ইতি ন
পুনরুক্তম্ . নিত্যত্বস্য দ্বিবিধত্বাত্ লোকে নাশস্য চ . যথা
দেহঃ ভস্মীভূতঃ অদর্শনং গতঃ নষ্টঃ উচ্যতে . তত্র নিত্যস্য
অনাশিনঃ ইতি দ্বিবিধেনাপি নাশেন অসংবদ্ধস্য ইত্যর্থঃ . অন্যথা
পৃথিব্যাদিবত্ অপি নিত্যত্বং স্যাত্ আত্মনঃ তত্ মা ভূত্ ইতি নিত্যস্য
অনাশিনঃ ইত্যাহ .

১৮. ২ অপ্রমেযস্য ন প্রমেযস্য প্রত্যক্ষাদিপ্রমাণৈঃ অপরিচ্ছেদ্যস্য
ইত্যর্থঃ . ননু আগমেন আত্মা পরিচ্ছিদ্যতে প্রত্যক্ষাদিনা চ পূর্বম্ .
ন আত্মনঃ স্বতঃসিদ্ধত্বাত্ . সিদ্ধে হি আত্মনি প্রমাতরি প্রমিত্সোঃ
প্রমাণান্বেষণা ভবতি . ন হি পূর্বং ইত্থং অহং ইতি আত্মানং অপ্রমায
পশ্চাত্ প্রমেযপরিচ্ছেদায প্রবর্ততে . ন হি আত্মা নাম কস্যচিত্
অপ্রসিদ্ধঃ ভবতি . শাস্ত্রং তু অন্ত্যং প্রমাণং
অতদ্ধর্মাধ্যারোপণমাত্র নিবর্তকত্বেন প্রামাণ্যং আত্মনঃ প্রতিপদ্যতে ন
তু অজ্ঞাতার্থজ্ঞাপকত্বেন . তথা চ শ্রুতিঃ – যত্ সাক্ষাদপরোক্ষাদ্
ব্রহ্ম য আত্মা সর্বান্তরঃ [বৃ. উ. ৩. ৪. ১. ]ইতি ..

১৮. ৩ যস্মাত্ এবং নিত্যঃ অবিক্রিযশ্চ আত্মা তস্মাত্ যুধ্যস্ব যুদ্ধাত্
উপরমং মা কার্ষীঃ ইত্যর্থঃ ..

ন হি অত্র যুদ্ধকর্তব্যতা বিধীযতে যুদ্ধে প্রবৃতঃ এব হি অসৌ
শোকমোহপ্রতিবদ্ধঃ তূষ্ণীং আস্তে . অতঃ তস্য
কর্তব্যপ্রতিবন্ধাপনযনমাত্রং ভগবতা ক্রিযতে . তস্মাত্
যুধ্যস্ব ইতি অনুবাদমাত্রং ন বিধিঃ ..

১৯. ০ শোকমোহাদিসংসারকারণনিবৃত্যর্থং গীতাশাস্ত্রং ন প্রবর্তকং
ইতি এতস্য অর্থস্য সাক্ষিভূতে ৠচৌ [কঠ. উ. ২. ১৮. ১৯. ]আনিনায
ভগবান্ .. যতু মন্যসে যুদ্ধে ভীষ্মাদযঃ মযা হন্যন্তে অহম্ এব
তেষাং হন্তা ইতি এষা বুদ্ধিঃ মৃষৈব তে . কথম্ –

১৯. ১ য এনং ইতি .. যঃ এনং প্রকৃতং দেহিনং বেতিঃ বিজানাতি হন্তারং
হননক্রিযাযাঃ কর্তারং যঃ চ এনং অন্যঃ মন্যতে হতং দেহহননেন হতঃ
অহম্ ইতি হননক্রিযাযাঃ কর্মভূতং তৌ উভৌ ন বিজানীতঃ ন জ্ঞাতবন্তৌ
অবিবেকেন আত্মানম্ . হন্তা অহং হতঃ অস্মি অহম্ ইতি দেহহননেন
আত্মানং অহংপ্রত্যযবিষযং যৌ বিজানীতঃ তৌ আত্মস্বরূপানভিজ্ঞৌ
ইত্যর্থঃ. যস্মাত্ ন অযং আত্মা হন্তি ন হননক্রিযাযাঃ কর্তা ভবতি ন
হন্যতে ন চ কর্ম ভবতীত্যর্থঃ অবিক্রিযত্বাত্ ..

২০. ০ কথং অবিক্রিযঃ আত্মা ইতি দ্বিতীযঃ মন্ত্রঃ –

২০. ১ ন জাযতে ইতি . ন জাযতে ন উত্পদ্যতে জনিলক্ষণা বস্তুবিক্রিযা ন
আত্মনঃ বিদ্যতে ইত্যর্থঃ . তথা ন ম্রিযতে বা . বাশব্দঃ চার্থে .
ন ম্রিযতে চ ইতি অন্ত্যা বিনাশলক্ষণা বিক্রিযা প্রতিষিদ্ধ্যতে .
কদাচিত্ শব্দঃ সর্ববিক্রিযাপ্রতিষেধৌঃ সংবদ্ধ্যতে – ন কদাচিত্
জাযতে ন কদাচিত্ ম্রিযতে ইত্যেবম্ . যস্মাত্ অযং আত্মাভূত্বা
ভবনক্রিযাং অনুভূয পশ্চাত্ অভিবিতা অভাবং গন্তা ন ভূযঃ পুনঃ
তস্মাত্ ন ম্রিযতে . যো হি ভূত্বা ন ভবিতা স ম্রিযতে ইতি উচ্যতে লোকে .
বাশব্দাত্ নশব্দাচ্চ অযং আত্মা অভূত্বা বা ভবিতা দেহবত্ ন
ভূযঃ পুনঃ . তস্মাত্ ন জাযতে . যো হি অভূত্বা ভবিতা স জাযতে ইতি
উচ্যতে . নৈবং আত্মা . অতঃ ন জাযতে . যস্মাত্ এবং তস্মাত্ অজঃ .
যস্মাত্ ন ম্রিযতে তস্মাত্ নিত্যঃ চ .

২০. ২ যদ্যপি আদ্যন্তযোঃ বিক্রিযযোঃ প্রতিষেধে সর্বাঃ বিক্রিযাঃ
প্রতিষিদ্ধাঃ ভবন্তি তথাপি মধ্যভাবিনীনাং বিক্রিযাণাং স্বশব্দৈঃ এব
তদার্থৈঃ প্রতিষেধঃ কর্তব্যঃ ইতি অনুক্তানাং অপি
যৌবনাদিসমস্তবিক্রিযাণাং প্রতিষেধঃ যথা স্যাত্ ইত্যাহ – শাশ্বতঃ
ইত্যাদিনা . শাশ্বতঃ ইতি অপক্ষযলক্ষণা বিক্রিযা প্রতিষিদ্ধ্যতে .
শশ্বদ্ভবঃ শাশ্বতঃ . ন অপক্ষীযতে স্বরূপেণ নিরবযবত্বাত্ .
নির্গুণত্বাত্ চ নাপি গুণক্ষযেণ অপক্ষযঃ . অপক্ষযবিপরীতা অপি
বৃদ্ধিলক্ষণা বিক্রিযা প্রতিষিদ্ধ্যতে পুরাণঃ ইতি . যো হি অবযবাগমেন
উপচীযতে স বর্ধতে অভিনবঃ ইতি চ উচ্যতে . অযং তু আত্মা
নিরবযবত্বাত্ পুরা অপি নবঃ এব ইতি পুরাণঃ ন বর্ধতে ইত্যর্থঃ .
তথা ন হন্যতে . হন্তিঃ অত্র বিপরিণামার্থো দ্রষ্টব্যঃ অপুনরুক্ততযৈ .
ন বিপরিণম্যতে ইত্যর্থঃ . হন্যমানে বিপরিণম্যমানেঽপি শরীরে .
অস্মিন্ মন্ত্রে ষড্ ভাববিকারাঃ লৌকিকবস্তুবিক্রিযাঃ আত্মনি
প্রতিষিদ্ধ্যন্তে . সর্বপ্রকারবিক্রিযারহিতঃ আত্মা ইতি বাক্যার্থঃ .
যস্মাত্ এবং তস্মাত্ উভৌ তৌ ন বিজানীতঃ [২ . ১৯. ]ইতি পূর্বেণ
মন্ত্রেণ অস্য সংবন্ধঃ ..

২১. ০ য এনং বেতি হন্তারম্ [২. ১৯. ]ইত্যনেন মন্ত্রেণ
হননক্রিযাযাঃ কর্তা কর্ম চ ন ভবতি ইতি প্রতিজ্ঞায ন জাযতে ইত্যনেন
অবিক্রিযত্বে হেতুং উক্ত্বা প্রতিজ্ঞাতার্থং উপসংহরতি –

২১. ১ বেদাবিনাশিনং ইতি . বেদ বিজানাতি অবিনাশিনং
অন্ত্যভাববিকাররহিতং নিত্যং বিপরিণামরহিতং যঃ বেদ ইতি সম্বন্ধঃ .
এনং পূর্বেণ মন্ত্রেণ উক্তলক্ষণং অজং জন্মরহিতং অব্যযং অপক্ষযরহিতং
কথং কেন প্রকারেণ সঃ বিদ্বান্ পুরুষঃ অধিকৃতঃ হন্তি হননক্রিযাং
করোতি . কথং বা ঘাতযতি হন্তারং প্রযোজযতি . ন কথংচিত্
কংচিত্ হন্তি ন কথংচিত্ কিংচিত্ ঘাতযতি ইতি উভযত্র আক্ষেপঃ
এব অর্থঃ প্রশ্নার্থা সংভবাত্ . হেত্বর্থস্য চ অবিক্রিযত্বস্য
তুল্যত্বাত্ বিদুষঃ সর্বকর্মপ্রতিষেধঃ এব প্রকরণার্থঃ অভিপ্রেতঃ
ভগবতঃ . হন্তেঃ তু আক্ষেপঃ উদাহরণার্থত্বেন কথিতঃ ..

২১. ২ বিদুষঃ কং কর্মাসংভবে হেতুবিশেষং পস্যন্ কর্মাণি আক্ষিপতি
ভগবান্ কথং স পুরুষঃ ইতি . ননু উক্তঃ এব আত্মনঃ অবিক্রিযত্বং
সর্বকর্মাসংভবকারণবিশেষঃ . সত্যং উক্তঃ . ন তু সঃ
কারণবিশেষঃ অন্যত্বাত্ বিদুষঃ অবিক্রিযাত্ আত্মনঃ ইতি . ন হি
অবিক্রিযং স্থাণুং বিদিতবতঃ কর্ম ন সম্ভবতি ইতি চেত্ – ন বিদুষঃ
আত্মত্বাত্ . ন দেহাদিসংঘাতস্য দিদ্বত্তা . অতঃ পারিশেষ্যাত্
অসংহতঃ আত্মাবিদ্বান্ অবিক্রিযঃ ইতি তস্য বিদুষঃ কর্মাস.ম্ভবাত্
আক্ষেপঃ যুক্তঃ কথং স পুরুষঃ ইতি .

২১. ৩ যথা বুদ্ধ্যাদ্যাহৃতস্য শব্দাদ্যর্থস্য অবিক্রিযঃ এব সন্
বুদ্ধিবৃত্যবিবেকবিজ্ঞানেন অবিদ্যযা উপলব্ধা আত্মা কল্প্যতে এবং এব
আত্মানাত্মবিবেকজ্ঞানেন বুদ্ধিবৄত্যা বিদ্যযা – অসত্যরূপযা এব
পরমার্থতঃ অবিক্রিযঃ এব আত্মা বিদ্বান্ উচ্যতে . বিদুষঃ
কর্মাসংভববচনাত্ যানি কর্মাণি শাস্ত্রেণ বিধীযন্তে তানি অবিদুষঃ
বিহিতানি ইতি ভগবতঃ নিশ্চযোঽবগম্যতে ..

২১. ৪ ননু বিদ্যাপি অবিদুষঃ এব বিধীযতে বিদিত্বিদ্যস্য
পিষ্টপেষণবত্ বিদ্যাবিধানানর্থক্যাত্ . তত্র অবিদুষঃ কর্মাণি
বিধীযন্তে ন বিদুষঃ ইতি বিশেষঃ ন উপপদ্যতে ইতি চেত্ – ন .
অনুষ্ঠেযস্য ভাবাভাববিশেষোপপতেঃ . অগ্নিহোত্রাদি
বিধ্যর্থজ্ঞানোতরকালং অগ্নিহোত্রাদিকর্ম অনেকসাধনোপসংহারপূর্বকং
অনুষ্ঠেযং কর্তা অহং মম কর্তব্যম্ ইত্যেবংপ্রকারকবিজ্ঞানবতঃ
অবিদুষঃ যথা অনুষ্ঠেযং ভবতি ন তু তথা ন জাযতে
ইত্যাদ্যাত্মস্বরূপবিধ্যর্থজ্ঞানোতরকালভাবি কিঞ্চিত্ অনুষ্ঠেযং
ভবতি কিন্তু নাহং কর্তা নাহং ভোক্তা
ইত্যাদ্যত্মৈকত্বাকর্তৃত্বাদিবিষযজ্ঞানাত্ অন্যত্ ন উত্পদ্যতে ইতি এষঃ
বিশেষঃ উপপদ্যতে . যঃ পুনঃ কর্তা অহং ইতি বেতি আত্মানং তস্য্ মম
ইদং কর্তব্যম্ ইতি অবশ্যংভাবিনী বুদ্ধিঃ স্যাত্ তদপেক্ষযা সঃ
অধিক্রিযতে ইতি তং প্রতি কর্মাণি সংভবন্তি . স চ অবিদ্বান্ উভৌ
তৌ ন বিজানীতঃ [২. ১৯. ]ইতি বচনাত্ বিশেষিতস্য চ বিদুষঃ
কর্মাক্ষেপবচনাত্ চ কথং স পুরুষঃ ইতি . তস্মাত্ বিশেষিতস্য
অবিক্রিযাত্মদর্শিনঃ বিদুষঃ মুমুক্ষোশ্চ সর্বকর্মসংযাসে এব অধিকারঃ .
অতঃ এব ভগবান্ নারাযণঃ সাংধ্যান্ বিদুষঃ অবিদুষশ্চ
কর্মিণঃ প্রবিভজ্য দ্বে নিষ্ঠে গ্রাহযতি – জ্ঞানযোগেন সাংখ্যানাং
কর্মযোগেন যোগিনাম্ [৩. ৩. ]ইতি . তথা চ পুত্রায আহ ভগবান্
ব্যাসঃ – দ্বাবিমাবথ পন্থানৌ [ম. ভা. শাংতি ২৪০. ৬. ]ইত্যাদি .
তথাচ ক্রিযাপথশ্চৈব পুরস্তাত্ পশ্চাত্ সংযাসসশ্চ [তৌ.
আ. ১০. ৬২. তাত্পর্যানুবাদঃ . তুলয – ঈ. উ. ২. ভাষ্যং তথা
কে. উ. ১. ভাশ্যম্]ইতি . এতমেব বিভাগং পুনঃ পুনঃ
দর্শযিষ্যতি ভগবান্ =৩ড্ অতত্ববিত্ অহংকারবিমূধাত্মা কর্তাহমিতি
মন্যতে তত্ববিত্ তু ন অহং করোমি [৩. ২৭ – ২৮]ইতি . তথা চ
সর্বকর্মাণি মনসা সংযস্যাস্তে [৫. ১৩. ]ইত্যাদি ..

২১. ৫ তত্র কেচিত্ পণ্ডিতমন্যাঃ বদন্তি –
জন্মাদিষড্ভাববিক্রিযারহিতঃ অবিক্রিযঃ অকর্তা একঃ অহং আত্মা ইতি ন
কস্যচিত্ জ্ঞানং উত্পদ্যতে যস্মিন্ সতি সর্বকর্মসংযাসঃ উপদিশ্যতে
ইতি . তত্ ন; ন জাযতে ইত্যাদিশাস্ত্রোপদেশানর্থক্যপ্রসঙ্গাত্ .
যথা চ শাস্ত্রোপদেশসামর্থ্যাত্ ধর্মাধর্মাস্তিত্ববিজ্ঞানং কর্তুশ্চ
দেহান্তরসংবন্ধবিজ্ঞানং উত্পদ্যতে তথা শাস্ত্রাত্ তস্য এব আত্মনঃ
অবিক্রিযত্বাকর্তৃত্বৈকত্বাদিবিজ্ঞানং কস্মাত্ ন উত্পদ্যতে ইতি প্রষ্টব্যাঃ
তে . করণাগোচরত্বাত্ ইতি চেত্ – ন মনসৈবানুক্রষ্টব্যম্ [
বৃ. উ. ৪. ৪. ১৯. ]ইতি শ্রুতেঃ . শাস্ত্রাচার্যোপদেশ্শমদমাদি
সংস্কৃতং মনঃ আত্মদর্শনে করণম্ . তথা চ তদধিগমায
অনুমানে আগমে চ সতি জ্ঞানং ন উত্পদ্যতে ইতি সাহসমাত্রং এতত্ ..

২১. ৬ জ্ঞানং চ উত্পদ্যমানং তদ্বিপরীতং অজ্ঞানং অবশ্যং বাধতে ইতি
অভ্যুপগন্তয্বম্ . তত্ চ অজ্ঞানং দর্শিতং হন্তা অহং হতঃ অস্মি
ইতি উভৌ তৌ ন বিজানীতঃ [২. ১৯. ]ইতি . অত্র চ আত্মনঃ
হননক্রিযাযাঃ কর্তৃত্বং কর্মত্বং হেতুকর্তৃত্বং চ অজ্ঞানকৃতং
দর্শিতম্ . তত্ চ সর্বক্রিযাসু অপি সমানং কর্তৃত্বাদেঃ
অবিদ্যাকৃতত্বং অবিক্রিযত্বাত্ আত্মনঃ . বিক্রিযাবান্ হি কর্তা আত্মনঃ
কর্মভূতং অন্যং প্রযোজযতি কুরু ইতি – তত্ এতত্ অবিশেষেণ বিদুষঃ
সর্বক্রিযাসু কর্তৃত্বং হেতুকর্তৃত্বং চ প্রতিষেধতি ভগবান্
বাসুদেবঃ বিদুষঃ কর্মাধিকারাভাবপ্র্দর্শনার্থ বেদাবিনাশিনং কথং স
পুরুষঃ ইত্যাদিনা .

২১. ৭ ক্ব পুনঃ বিদুষঃ অধিকারঃ ইতি . এতত্ উক্তং পূর্বমেব
জ্ঞানযোগেন সাংখ্যানাম্ [৩. ৩. ]ইতি . তথা চ সর্বকর্মসংযাসং
বক্ষ্যতি সর্বকর্মাণি মনসা [৫. ১৩. ]ইত্যাদিনা .
ননু মনসা ইতি বচনাত্ ন বাচিকানাং কাযিকানাং চ সংযাসঃ ইতি চেত্
– ন সর্বকর্মাণি ইতি বিশেষিতত্বাত্ . মানসানাং এব সর্বকর্মণাং ইতি
চেত্ – ন মনোব্যাপারপূর্বকত্বাত্ বাক্কাযব্যাপারাণাং মনোব্যাপারাভাবে
তদনুপপতেঃ . শাস্ত্রীযাণাং বাক্কাযকর্মণং কারণনি মানসানি কর্মাণি
বর্জযিত্বাঅন্যানি সর্বকর্মাণি মনসাসংযাস্য ইতি চেত্ – ন নৈব
কুর্বন্ন কারযন্ [৫. ১৩. ]ইতি বিশেষণাত্ . সর্বকর্মসংযাসঃ
অযং ভগবতা উক্তঃ মরিষ্যতঃ ন জীবতঃ ইতি চেত্ – ন নবদ্বারে
পুরে দেহী . . . আস্তে [৫. ১৩. ]ইতি বিশেষণানুপপতেঃ . ন হি
সর্বকর্মসংযাসেন মৃতস্য তদ্দেহে আসনং সংভবতি . অকুর্বতঃ
অকারযতশ্চ দেহে সংযস্য ইতি সংবন্ধঃ ন দেহে আস্তে ইতি চেত্ – ন
সর্বত্র আত্মনঃ অবিক্রিযত্বাবধারণাত্ আসনক্রিযাযাঃ চ
অধিকরণাপেক্ষত্বাত্ তদনপেক্ষত্বাত্ চ সংযাসস্য . সংপূর্বস্তু
ন্যাসশব্দঃ অত্র ত্যাগার্থঃ ন নিক্ষেপার্থঃ . তস্মাত্ গীতাশাস্ত্রে
আত্মজ্ঞানব্তঃ সংযাস এব অধিকারঃ ন কর্মণি ইতি তত্র তত্র
উপরিষ্টাত্ আত্মজ্ঞানপ্রকরণে দর্শযিষ্যামঃ ..

২২. ০ প্রকৃতং তু বক্ষ্যামঃ . তত্র আত্মনঃ অবিনাশিত্বং প্রতিজ্ঞাতম্ .
তত্ কিমিব ইতি . উচ্যতে –

২২. ১ বাসাংসি ইতি . বাসাংসি বস্ত্রাণি জীর্ণানি দুর্বলতাং গতানি যথা
লোকে বিহায পরিত্যজ্য নবানি অভিনবানি গৃহ্ণাতি উপাদতে নরঃ পুরুষঃ
অপরাণি অন্যানি তথা তদ্বত্ এব শরীরাণি বিহায জীর্ণানি অন্যানি সংযাতি
সংগচ্ছতি নবানি দেহী আত্মা পুরুষবত্ অবিক্রিযঃ এব ইত্যর্থঃ .. ২২ ..

২৩. ০ কস্মাত্ অবিক্রিয এবেতি . আহ –

২৩. ১ নৈনং ছিন্দন্তি ইতি .. এনং ক্রকৃতং দেহিনং ন ছিন্দন্তি
শস্ত্রাণি নিরবযবত্বাত্ ন অবযববিভাগং কুর্বন্তি . শস্ত্রাণি
অস্যাদীনি . তথা ন এনং দহতি পাবকঃ অগ্নিঃ অপি ন ভস্মীকরোতি .
তথা – ন চ এনং ক্লেদযন্তি আপঃ . অপাং হি সাবযবস্য বস্তুনঃ
আর্দ্রীভাবকরণেন অবযববিশ্লেষাপাদনে সামর্থ্যম্ . তত্ ন
নিরবযবে আত্মনি সংভবতি . তথা স্নেহবত্ দ্রব্যং স্নেহশোষণেন
নাশযতি যতঃ এবং তস্মাত্ –

২৪. ১ অচ্ছেদ্যোঽযং ইতি .. যস্মাত্ অন্য্ন্যনাশহেতূনি ভূতানি এনং
আত্মানং নাশযিতুং ন উত্সহন্তে তস্মাত্ নিত্যঃ . নিত্যত্বাত্ সর্বগতঃ .
সর্বগতত্বাত্ স্থাণুঃ ইব স্থিরঃ ইত্যেতত্ . স্থিরত্বাত্ অচলঃ
অযং আত্মা অতঃ সনাতনঃ চিরন্তনঃ ন কারণাত্ কুতশ্চিত্ নিষ্পন্নঃ
অভিনবঃ ইত্যর্থঃ .

২৪. ২ ন এতেষং শ্লোকানাং পৌনরুক্ত্যং চোদনীযম্ যতঃ একেন এব
শ্লোকেন আত্মনঃ নিত্যত্বং অবিক্রিযত্বং চোক্তম্ ন জাযতে ম্রিযতে বা
ইত্যাদিনা . তত্র যদেব আত্মবিষযং কিঞ্চিত্ উচ্যতে তত্ এতস্মাত্
শ্লোকার্থাত্ ন অতিরিচ্যতে কিঞ্চিত্ শব্দতঃ পুনরুক্তং কিঞ্চিত্
অর্থতঃ ইতি . দুর্বোধত্বাত্ আত্মবস্তুনঃ পুনঃ পুনঃ প্রসঙ্গং আপাদ্য
শব্দান্তরেণ তদেব বস্তু নিরূপযতি ভগবান্ বাসুদেবঃ কথং নু নাম
অব্যক্তং সংসারিণাং [অসংসারিত্ব – ]বুদ্ধিগোচরতাং আপন্নং
সংসার্নিবৃত্তেয স্যাত্ ইতি .. কিঞ্চ –

২৫. ১ অব্যক্তোঽযং ত্বাত্ ন ব্যজ্যতে ইতি অব্যক্তঃ অযং আত্মা . অতঃ এব
অচিন্ত্যঃ অযম্ . যত্ হি ইন্দ্রিযগোচরঃ তত্ চিন্তাবিষযত্বং
আপদ্যতে . অযং তু আত্মা অনিন্দ্রিযগোচরত্বাত্ অচিন্ত্যঃ অবিকার্যঃ অযম্
যথা ক্ষীরং দধ্যাতঞ্চনাদিনা বিকারি ন তথা অযং আত্মা .
নিরবযবত্বাত্ চ অবিক্রিযঃ . ন হি নিরবযং কিঞ্চিত্ বিক্রিযাত্মকং
দৃষ্টম্ . অবিক্রিযত্বাত্ অবিকার্যঃ অযং আত্মা উচ্যতে . তস্মাত্
এবং যথোক্তপ্রকারেণ এনং আত্মানং বিদিত্বা ত্বং ন অনুশোচিতুং অর্হসি
হন্তা অহং এষাং মযা এতে হন্যন্তে ইতি ..

২৬. ০ আত্মনঃ অনিত্যত্বং অভ্যুপগম্য ইদং উচ্যতে –

২৬. ১ অথ চৈনং ইতি . অথ চ ইতি অভুপগমার্থঃ . এনং
প্রকৃতং আত্মানং নিত্যজাতং লোকপ্রসিদ্ধ্যা প্রত্যনেকশরীরোত্পত্তিং জাতো
জাতঃ ইতি বা মন্যসে তথা প্রতিতত্তাদ্বিনাশং নিত্যং বা মন্যসে মৃতং
মৃতো মৃতঃ ইতি . তথাপি তথাভাবেঽপি আত্মনি ত্বং মহাবাহো ন এবং
শোচিতুং অর্হসি জন্মবতঃ নাশঃ নাশবতঃ জন্ম চ ইতি এতৌ
অবশ্যংভাবিনৌ ইতি যস্মাত্ ..
তথা চ সতি –

২৭. ১ জাতস্য ইতি . জাতস্য হি লব্ধজন্মনঃ ধ্রুবঃ অব্যভিচারী
মৃত্যুঃ মরণং ধ্রুবং মৃতস্য চ . তস্মাত্ অপরিহার্যোঽযং
জন্মমরণলক্ষণঃ অর্থঃ [যস্মাত্ – তস্মাত্ অপরিহার্যে অর্থে ন ত্বং
শোচিতুং অর্হসি . জন্মবতো নাশঃ নাশবতো জন্ম ইতি চ
স্বাভাবিকশ্চেত্ অপরিহার্যঃ সঃ অর্থঃ .]তস্মিন্ অপরিহার্যে অর্থে
ন ত্বং শোচ্তিউং অর্হসি ..

২৮. ০ কার্যকরণসঙ্ঘাতাত্মকানি অপি ভূতানি উদ্দিশ্য শোকঃ ন যুক্তঃ
কর্তুং যতঃ –

২৮. ১ অব্যক্তাদীনি ইতি . অব্যক্তাদীনি অব্যক্তং অদর্শনং অনুপলব্ধিঃ
আদিঃ যেষাং ভূতানাং পুত্রমিত্রাদিকার্যকরণসংঘাতাত্মকানাং তানি
অব্যক্তাদীনি ভূতানি প্রাক্ উত্পত্তেঃ . উত্পন্নানি চ প্রাক্ মরণাত্
ব্যক্তমধ্যানি . অব্যক্তনিধনানি এব পুনঃ অব্যক্তং অদর্শনং নিধনং
মরণং যেষাং তানি অব্যক্তনিধনানি . মরণাত্ ঊর্ধ্বং অব্যক্ততাম্ এব
প্রতিপদ্যন্তে ইত্যর্থঃ . তথা চোক্তম্ – অদর্শনাদাপতিতঃ
পুনশ্চাদর্শনং গতঃ . নাসৌ তব ন তস্য ত্বং বৃথা কা পরিদেবনা .
[স্ত্রীপর্ব. ২. ১৩. ]ইতি .. তত্র কা পরিদেবনা কো বা প্রলাপঃ
অদৃষ্টদৃষ্তপ্রনষ্টভ্রান্তিভূতেষু ভূতেষু ইত্যর্থঃ ..

২৯. ০ দুর্বেজ্ঞেযঃ অযং প্রকৃতঃ আত্মা . কিং ত্বাম্ এব একং উপালভে
সাধারণে ভ্রান্তিনিমিত্তে . কথং দুর্বিজ্ঞেযঃ অযং আত্মা ইতি . অতঃ আহ
–

২৯. ১ আশ্চর্যবত্ ইতি .. আশ্চর্যবত্ আশ্চর্যং অদৃষ্টপূর্বং
অদ্ভুতং অকস্মাত্ দৃশ্যমানং তেন তুল্যং আশ্চর্যবত্ আশ্চর্যমিব
এনং আত্মানং পশ্যতি কশ্চিত্ . আশ্চর্যবত্ এনং বদতি তথৈব
চ অন্যঃ আশ্চর্যবত্ চ এনং অন্যঃ শৃণোতি . শ্রুত্বা দৃষ্ট্বা
উক্ত্বা অপি এনং আত্মানং বেদ ন চৈব কশ্চিত্ .

২৯. ২ অথবা – যঃ অযং আত্মানং পশ্যতি স আশ্চর্যতুল্যঃ . যঃ
বদতি যঃ চ শৃণোতি সঃ অনেকসহস্রেষু কশ্চিদেব ভবতি . অতঃ
দুর্বোধঃ আত্মা ইত্যভিপ্রাযঃ ..

৩০. ০ অথ ইদানী প্রকরণার্থং উপসংহরতি –

৩০. ১ দেহী ইতি .. দেহী শরীরী নিত্যং সর্বদা সর্বাবস্থাসু অবধ্যঃ
নিরবযবত্বাত্ নিত্যত্বাত্ চ তত্র অবধ্যোঽযং দেহে শরীরে সর্বস্য
সর্বগতত্বাত্ স্থাবরাদিষু স্থিতোঽপি . সর্বস্য প্রাণিজাতস্য দেহে
বধ্যমানেঽপি অযং দেহী ন বধ্যঃ যস্মাত্ তস্মাত্ ভীষ্মাদীনি সর্বাণি
সর্বাণি ভূতানি উদ্দিশ্য ন ত্বং শোচিতুং অর্হসি ..

৩১. ১ ইহ [২. ৩০. ]পরমার্থতত্বাপেক্ষাযাং শোকো বা মোহো বা ন
সংভবতি ইত্যুক্তম্ . ন কেবলং পরমার্থতত্বাপেক্ষাযাম্ ইব কিংতু –

৩১. ১ স্বধর্মং ইতি .. স্বধর্মং অপি স্বঃ ধর্মঃ ক্ষত্রিযস্য ধর্মঃ
যুদ্ধং তমপি অবিক্ষ্যত্বং ন বিকম্পিতুং প্রচলিতুং অর্হসি ধর্ম্যাত্
ক্ষত্রিযস্য স্বাভাবিকাত্ ধর্মাত্ আত্মস্বাভাব্যাত্ ইত্যভিপ্রাযঃ .
তচ্চ যুদ্ধং পৃথিবীজযদ্বারেণ ধর্মার্থং প্রজারক্ষণার্থং চ ইতি
পরমং ধর্ম্যম্ . ধর্মাত্ অনপেতং ধর্ম্যম্ . তস্মাত্
ধর্ম্যাত্ যুদ্ধাত্ শ্রেযঃ অন্যত্ ক্ষত্রিযস্য ন বিদ্যতে হি যস্মাত্ ..

৩২. ০ কুতশ্চ তত্ যুদ্ধং কর্তব্যং ইতি . উচ্যতে –

৩২. ১ যদৃচ্ছযা ইতি . যুদৃচ্ছযা চ অপ্রার্থিতযা উপপন্নং আগতং
স্বর্গদ্বারং অপাবৃতং উদ্ঘাটিতং যে এতত্ ঈদৃশং যুদ্ধং লভন্তে
ক্ষত্রিযাঃ হে পার্থ . কিং ন সুখিনঃ তে ..

৩৩. ০ এবং কর্তব্যতাপ্রাপ্তম্ অপি –

৩৩. ১ অথ ইতি .. অথ চেত্ ত্বং ইমং ধর্ম্যং ধর্মাদনপেতং বিহিতং
সংগ্রামং যুদ্ধং ন করিষ্যসি চেত্ ততঃ তদকরণাত্ স্বধর্মং
কীর্তিং চ মহাদেবাদিসমাগমনিমিত্তাং হিত্বা কেবলং পাপং অবাপ্স্যসি ..

৩৪. ০ ন কেবলং স্বধর্মকীর্তিপরিত্যাগঃ –

৩৪. ১ অকীর্তিং ইতি .. অকীর্তিং চ অপি ভূতানি কথযিষ্যন্তি তে তব
অব্যযাং দীর্ঘকালাম্ . ধর্মাত্মা শূরঃ ইত্যেবমাদিভিঃ গুণৈঃ
সংভাবিতস্য চ অকীর্তিঃ মরণাত্ অতিরিচ্যতে সংভাবিতস্য চ অকীর্তেঃ
বরং মরণং ইত্যর্থঃ .. কিঞ্চ

৩৫. ১ ভযাত্ ইতি .. ভযাত্ কর্ণাদিভ্যঃ রণাত্ যুদ্ধাত্ উপরতং
নিবৃত্তং মংস্যন্তে চিন্তযিষ্যন্তি ন কৃপযা ইতি ত্বাং মহারথাঃ
দুর্যোধনপ্রভৃতযঃ . [কে মংস্যন্তে ?ইতি আহ – ]যেষাং চ
ত্বং দুর্যোধনাদীনাং বহুমতঃ বহুভিঃ গুণৈঃ যুক্তঃ ইত্যেবং মতঃ
বহুমতঃ ভূত্বাপুনঃ ত্বং যাস্যসি লাঘবং লঘুভাবম্ কিঞ্চ –

৩৬. ১ অবাচ্যবাদান্ ইতি .. অবাচ্যবাদান্ অবক্তব্যান্ বাদান্ চ
বহূন্ অনেকপ্রকারান্ বদিষ্যন্তি তব অহিতাঃ শত্রবঃ নিন্দন্তঃ
কুত্সযন্তঃ তব ত্বদীযং সামর্থ্যম্ নিবাতকবচাদিযুদ্ধনিমিত্তম্ .
ততঃ তস্মাত্ নিন্দাপ্রাপ্তেঃ দুঃখাত্ দুঃখতরং নু কিং ?ততঃ
কষ্টতরং দুঃখং নাস্তি ইত্যর্থঃ ..

৩৭. ০ যুদ্ধে পুনঃ ক্রিযমাণে কর্ণাদিভিঃ –

৩৭. ১. হতো বা ইতি .. হতঃ বা প্রাপ্স্যসি স্বর্গং হতঃ সন্ স্বর্গং
প্রাপ্স্যসি . জিত্বা বা কর্ণাদীন্ শূরান্ ভোক্ষ্যসে মহীম্ . উভযথাপি
তব লাভঃ এব ইত্যভিপ্রিযঃ . যতঃ এবং তস্মাত্ উত্তিষ্ঠ কৌন্তেয .
যুদ্ধায কৃতনিশ্চযঃ জেষ্যামি শত্রূন্মরিষ্যামি বা ইতি নিশ্চযং
কৃত্বা ইত্যর্থঃ ..

৩৮. ০ তত্র যুদ্ধং স্বধর্মঃ ইত্যেবং যুধ্যমানস্য উপদেশম্ ইমং
শৃণু –

৩৮. ১ সুখদুঃখে ইতি .. সুখদুঃখে সমে তুল্যে কৃত্বা রাগদ্বেষৌ [
অপি]অকৃত্বা ইত্যেতত্ . তথা লাভালাভৌ জযাজযৌ চ সমৌ কৃত্বা
ততঃ যুদ্ধায যুজ্যস্ব ঘটস্ব . ন এবং যুদ্ধং কুর্বন্ পাপং
অবাপ্স্যসি [ইতি]এষঃ উপদেশঃ প্রাসঙ্গকঃ ..

৩৯. ০ শোকমোহাপনযে [নযনায]লৌকিকঃ ন্যাযঃ স্বধর্মমপি চাবেক্ষ্য
ইত্যাদ্যৈঃ শ্লোকৈঃ উক্তঃ ন তু তাত্পর্যেণ . পরমা঱্থদর্শনং তু ইহ
প্রকৃতম্ . তচ্চ উক্তং উপ্সংহ্রিযতে – এষা তে অভিহিত্বা ইতি
শাস্ত্রবিষযবিভাগপ্রদর্শনায . ইহ হি প্রদর্শিতে পুনঃ
শস্ত্রবিষযবিভাগে উপরিষ্ঠাত্ জ্ঞানযোগেন সাংখ্যানাং কর্মযোগেন
যোগিনাম্ [৩. ৩. ]ইতি নিষ্ঠাদ্বযবিষযং শাস্ত্রং সুখং
প্রবর্তিষ্যতে শ্রোতারশ্চ বিষযবিভাগেন সুখং গ্রহীষ্যন্তি ইতি –
অতঃ আহ –

৩৯. ১ এষা তে ইতি .. এষা তে তুভ্যং অভিহিতা উক্তা সাংখ্যে
পরমার্থবস্তুবিবেক বিষযে বুদ্ধিঃ জ্ঞানং সাক্ষাত্
শোকমোহাদিসংসারহেতুদোষনিবৃত্তিকারণম্ যোগে তু তত্প্রাপ্ত্যুপাযে
নিঃসঙ্গতযা দ্বন্দ্বপ্রহাণপূর্বকং ঈশ্বরারাধনার্থে কর্মযোগে
কর্মানুষ্ঠানে সমাধিযোগে চ ইমাং অনন্তরম্ এব উচ্যমানাং বুদ্ধিং
শৃণু . তাং চ বুদ্ধিং স্তৌতি প্ররোচনার্থম্ – বুদ্ধ্যা যযা
যোগবিষযযা যুক্তঃ হে পার্থ . কর্ম্বন্ধং দর্ম এব ধর্মাধর্মাখ্যঃ
বন্ধঃ কর্মবন্ধঃ তং প্রহাস্যসি ঈশ্বরপ্রসাদনিমিত্তজ্ঞানপ্রাপ্ত্যা এব
ইত্যভিপ্রাযঃ ..
কিঞ্চ অন্যত্ –

৪০. ১ নেহ ইতি .. ন ইহ মোক্ষমার্গে কর্মযোগে অভিক্রমনাশঃ অভিক্রমণং
অভিক্রমঃ প্রারম্ভঃ তস্য নাশঃ ন অস্তি যথা কৃষ্যাদেঃ .
যোগবিষযে প্রারম্ভস্য ন অনৈকান্তিকফলত্বং ইত্যর্থঃ . কিং চ –
ন অপি চিকিত্সাবত্ প্রত্যবাযঃ বিদ্যতে . কিং তু স্বল্পম্ অপি অস্য
ধর্মস্য যোগধর্মস্য অনুষ্ঠিতং ত্রাযতে রক্ষতি মহতঃ ভযাত্
সংসারভযাত্ জন্মমরণাদিলক্ষণাত্ ..

৪১. ১ যা ইযং সাংখ্যে বুদ্ধিঃ উক্তা যোগে চ বক্ষ্যমণলক্ষণা সা –

৪১. ১ ব্যবসায ইতি .. ব্যবসাযাত্মিকা নিশ্চযস্বভাবা একা এব বুদ্ধিঃ
তরবিপরীতবুদ্ধিশাখাভেদস্য বাধিকা সম্যক্ প্রমাণজনিতত্বাত্ ইহ
শ্রেযোমার্গে হে কুরুনন্দন . যাঃ পুনঃ ইতরাঃ বিপরীতবুদ্ধযঃ যাসাং
শাখাভেদপ্রচারবশাত্ অনন্তঃ অপারঃ অনুপরতঃ সংসারঃ
নিত্যপ্রততঃ নিত্যপ্রততঃ বিস্তী঱্ণঃ ভবতি
প্রমাণজনিতবিবেকবুদ্ধিনিমিত্তবশাচ্চ উপরতাসু অনন্তভেদবুদ্ধিষু
সংসারোঽপি উপরমতে তাঃ বুদ্ধযঃ বহুশাখাঃ বহ্ব্যঃ শাখাঃ যাসাং তাঃ
বহুশাখাঃ বহুভেদাঃ ইত্যেতত্ . প্রতিশাখাভেদেন হি অনন্তাশ্চ
বুদ্ধযঃ . কেষাম্ . অব্যবসাযিনাং প্রমাণজনিতবিবেকবুদ্ধিরহিতানাং
ইত্যর্থঃ ..

৪২. ০ যেষাং ব্যবসাযাত্মিকা বুদ্ধিঃ নাস্তি তে –

৪২. ১ যামিমাং ইতি .. যাং ইমাং বক্ষ্য্মাণাং পুষ্পিতাং পুষ্পিতবৃক্ষঃ ইব
শোভমানাং শ্রূযমাণীযাং বাচং বাক্যলক্ষণাং প্রবদন্তি . কে .
অবিপশ্চিতঃ অল্পমেধসঃ অবিবেকিনঃ ইত্যর্থঃ . বেদবাদরতাঃ
বহ্বর্থবাদফলসধনপ্রকাশকেষু বেদবাক্যেষু রতাঃ হে পার্থঃ . ন
অন্যত্ স্বর্গপশ্বাদিফলসাধনেভ্যঃ কর্মভ্যঃ অস্তি ইতি এবং বাদিনঃ
বদনশীলাঃ .. তে চ –

৪৩. ১ কামাত্মানঃ ইতি .. কামাত্মানঃ কামস্বভাবাঃ কামপরাঃ ইত্যর্থঃ .
স্বর্গপরাঃ স্বর্গঃ পরঃ পুরুষর্থঃ যেষাং তে স্বর্গপরাঃ
স্বর্গপ্রধানাঃ . জন্মকর্মফলপ্রদাং কর্মণঃ ফলং কর্মফলং জন্ম
এব কর্মণঃ ফলং জন্মকর্মফলং তত্ প্রদদাতি ইতি
জন্মকর্মফলপ্রদা তাং বাচম্ – প্রবদন্তি ইতি অনুষজ্যতে .
ক্রিযাবিশেহবহুলাং ক্রিযাণাং বিশেষাঃ ক্রিযাবিশেষাঃ তে বহুলা যস্যাং
বাচি তাং স্বর্গপশুপুত্রাদ্যর্থাঃ যযা বাচা বাহুল্যেন প্রকাশ্যন্তে .
ভোগৈশ্বর্যগতিং প্রতি ভোগশ্চ ঐস্ব্হর্যং চ ভোগৈশ্বর্যে তযোঃ
গতিঃ প্রাপ্তিঃ ভোগৈশ্বর্যগতিঃ তাং প্রতি সাধনভূতাঃ যে ক্রিযাবিশেষাঃ
তদ্বহুলাং তাং বাচং প্রবদন্তঃ মূঢাঃ সংসারে পরিবর্তন্তে
ইত্যভিপ্রাযঃ .. তেষাং চ –

৪৪. ১ ভোগ ইতি .. ভোগৈশ্বর্যপ্রসক্তানাং ভোগঃ কর্তব্যং ঐশ্বর্যং
চ ইতি ভোগৈশ্বর্যযোঃ এব প্রণবচতাং তদাত্মভূতানাং . তযা
ক্রিযাবিশেষবহুলযা বাচা অপহৃতচেতসাং আচ্ছাদিতবিবেকপ্রজ্ঞানাং
ব্যবসাযাত্মিকা সাংখ্যে যোগে বা যা বুদ্ধিঃ সা সমাধৌ সমাধীযতে অস্মিন্
পুরুষোপভোগায সর্বং সমাধিঃ অন্তঃকরণং – বুদ্ধিঃ তস্মিন্ সমাধৌ
ন বিধীযতে ন ভবতি ইত্যর্থঃ ..

৪৫. ০ যে এবং বিবেকবুদ্ধিরহিতাঃ তেষাং কমাত্মনাং যত্ ফলং তত্ আহ –

৪৫. ১ ত্রৈগুণ্য ইতি .. ত্রৈগুণ্যবিষযাঃ – ত্রৈগুণ্যং সংসারঃ
বিষযঃ প্রকাশযিতব্যঃ যেষাং তে বেদাঃ ত্রগুণ্যবিষযাঃ . ত্বং তু
নিস্ত্রৈগুণ্যঃ ভব অর্জুন নিষ্কামঃ ভব ইত্যর্থঃ নির্দ্বন্দ্বঃ
সুখদুঃখহেতূ সত্প্রতিপক্ষৌ পদার্থৌ দ্বন্দ্বশব্দবাচ্যৌ ততঃ নির্গতঃ
নির্দ্বন্দ্বঃ ভব . নিত্যসত্বস্থঃ সদা সত্বগুণাশ্রিতঃ ভব . তথা
নির্যোগক্ষেমঃ অনুপাতস্য উপাদানং যোগঃ উপাতস্য রক্ষণং ক্ষেমঃ .
যোগক্ষেমপ্রধানস্য শ্রেযসি প্রবৃত্তিহ্ দুষ্করা ইতি অতঃ নির্যোগক্ষেমঃ
ভব . আত্মবান্ অপ্রমত্তঃ চ ভব . এষ তব উপদেশঃ
স্বধর্মং অনুতিষ্ঠতঃ ..

৪৬. ০ সর্বেষু বেদোক্তেষু কর্মসু যানি উক্তানি অনন্তানি ফলানি তানি ন
অপেক্ষ্যন্তে চেত্ কিমর্থং তানি ঈস্ব্হরায ইতি অনুষ্ঠীযন্তে ইতি . উচ্যতে
শৃণু –

৪৬. ১ যাবান্ ইতি .. যথা লোকে কূপতডাগাদ্যনেকস্মিন্ উদপানে
পরিচ্ছিন্নোদকে যাবান্ যাবত্পরিমাণঃ স্নানপানাদিঃ অর্থঃ ফলং
প্রযোজনং সঃ সর্বঃ অর্থঃ সর্বথঃ সংপ্লুতোদকে তাবান্ এব
সংপদ্যতে তত্র অন্তর্ভবতি ইত্যর্থঃ . এবং তাবান্ তাবত্পরিমাণঃ
এব সংপদ্যতে সর্বেষু বেদেষু বেকোক্তেষু কর্মসু যঃ অর্থঃ যত্
কর্মফলং সঃ অর্থঃ ব্রাহ্মণস্য সংযাসিনঃ অরমার্থতত্বং বিজানতঃ
যঃ অর্থঃ যত্ বিজ্ঞানফলং সর্বতঃ সংপ্লুতোদকস্থানীযং তস্মিন্
তাবান্ এব সংপদ্যতে – তত্রৈব অন্তর্ভবতীত্যর্থঃ . সর্বং তত্
অভিসমেতি যত্ কিঞ্চ প্রজাঃ সাধু কুর্বন্তি যস্তদ্বেদ যত্ স বেদ [
ছা. উ. ৪. ১. ৪. ]ইতি শ্রুতেঃ . সর্বং কর্মাখিলম্ [৪. ৩৩. ]
ইতি চ বক্ষ্যতি . তস্মাত্ প্রাক্ জ্ঞাননিষ্ঠাধিকারপ্রাপ্তেঃ কর্মণি
অধিকৃতেন কূপতডাগাদ্যর্থস্থানীযং অপি কর্ম কর্তব্যম্ .. তব চ
–

৪৭. ১ কর্মণি ইতি .. কর্মণি এব অধিকারঃ ন জ্ঞাননিষ্ঠাযাং তে তব .
তত্র চ কর্ম কুর্বতঃ মা ফলেষু অধিকারঃ অস্তু কর্মফলতৃষ্ণা মা
ভূত্ কদাচন কস্যাংচিত্ অপি অবস্থাযাং ইত্যর্থঃ . যদা কর্মফলে
তৃষ্ণা তে স্যাত্ তদা কর্মফলপ্রাপ্তেঃ হেতুঃ স্যাঃ এবং মা
কর্মফলহেতুঃ ভূঃ . যদা হি কর্মফলতৃহ্ণাপ্রযুক্তঃ কর্মফলং ন
ইষ্যতে কিং কর্মণা দুঃখরূপেণ . ইতি মা তে তব সঙ্গঃ অস্তু অকর্মণি
অকরণে প্রীতিঃ মা ভূত্ ..

৪৮. ০ যদি কর্মফলপ্রযুক্তেন ন কর্তব্যং কর্ম কথং তর্হি কর্তব্যং
ইতি . উচ্যতে –

৪৮. ১ যোগস্থঃ ইতি .. যোগস্থঃ সন্ কুরু কর্মাণি কেবলং ঈশ্বরার্থং
তত্রাপি ঈশ্বরো মে তুষ্যতু ইতি সঙ্গং ত্যক্ত্বা ধনঞ্জয .
ফলতৃষ্ণাশূন্যেন ক্রিযমাণে কর্মণি সত্বশুদ্ধিজা জ্ঞানপ্রাপ্তিলক্ষণা
সিদ্ধিঃ তদ্বিপর্যযজা অসিদ্ধিঃ তযোঃ সিদ্ধ্যসিদ্ধ্যোঃ অপি সমঃ তুল্যঃ
ভূত্বা কুরু কর্মাণি . তোঽসৌ যোগঃ যত্রস্থঃ কুরু ইতি উক্তম্ . ইদং
এব তত্ – সিদ্ধ্যসিদ্ধ্যোঃ সমত্বং যোগঃ উচ্যতে ..

৪৯. ০ যত্ পুনঃ অমত্ববুদ্ধিযুক্তং ঈশ্বরারাধনার্থং কর্ম [উক্তং]
এতস্মাত্ কর্মণঃ –

৪৯. ১ দূরেণ ইতি .. দূরেণ অতিবিপ্রকর্ষেণ হি অবরং অধমং
নিকৃষ্টং কর্ম ফলার্থিনা ক্রিযমাণং বুদ্ধিযোগাত্
সমত্ববুদ্ধিযুক্তাত্ কর্মণঃ জন্মমরণাদিহেতুত্বাত্ . হে ধনঞ্জয
যতঃ এবং ততঃ যোগবিষযাযাং বুদ্ধৌ তত্পরিপাকজাযাং বা সাংখ্যবুদ্ধৌ
শরণং আশ্রযং অভযপ্রাপ্তিকারণং অন্বিচ্ছ প্রার্থযস্ব
পরমার্থজ্ঞানশরণঃ ভব ইত্যর্থঃ . যতঃ অবরং কর্ম কুর্বাণাঃ
কৃপণাঃ দীনাঃ ফলহেতবঃ ফলতৃষ্ণাপ্রযুক্তাঃ সন্তঃ যো বা এতদক্ষরং
গার্গ্যবিদিত্বাঽস্মাল্লোকাত্প্রৈতি স কৃপণঃ [বৃ. উ. ৩. ৮. ১০. ]ইতি
শ্রুতেঃ ..

৫০. ০ সমত্ববুদ্ধিযুক্তঃ সন্ স্বধর্মং অনুতিষ্ঠন্ যত্ ফলং
প্রাপ্নোতি তত্ শৃণু –

৫০. ১ বুদ্ধি ইতি .. বুদ্ধিযুক্তঃ সমত্ববিষযযা বুদ্ধ্যা যুক্তঃ
বুদ্ধিযুক্তঃ সঃ জহাতি পরিত্যজতি ইহ অস্মিন্ লোকে উভে
সুকৃতদুষ্কৃতে পুণ্যপাপে সত্বশুদ্ধিজ্ঞান প্রাপ্তিবারেণ যতঃ তস্মাত্
সমত্ববুদ্ধিযোগায যুজ্যস্ব ঘটস্ব . যোগঃ হি কর্মসু কৌশলং
স্বধর্মাখ্যেষু কর্মসু বর্তমানস্য যা সিদ্ধ্যসিদ্ধ্যোঃ সমত্ববুদ্ধিঃ
ঈশ্বরার্পি তচেতস্তযা তত্ কৌশলং কুশলভাবঃ . তদ্ধি কৌশলং
যত্ বন্ধস্বভাবানি অপি কর্মাণি সমত্ববুদ্ধ্যা স্বভাবাত্ নিবর্তন্তে .
তস্মাত্ সমত্ববুদ্ধিযুক্তঃ ভব ত্বম্ .. যস্মাত্ –

৫১. ১ কর্মজং ইতি .. কর্মজং ফলং ত্যক্ত্বা ইতি ব্যবহিতেন সংবন্ধঃ
ইষ্টনিষ্টদেহপ্রাপ্তিঃ কর্মজং ফলং কর্মভ্যঃ জাতং বুদ্ধিযুক্তাঃ
সমত্ববুদ্ধিযুক্তাঃ সন্তঃ হি যস্মাত্ ফলং ত্যক্ত্বা পরিত্যজ্য মনীষিণঃ
জ্ঞানিনঃ ভূত্বা জন্মবন্ধবিনির্মুক্তাঃ জন্ম এব বন্ধঃ জন্মবন্ধঃ তেন
বিনির্মুক্তাঃ জীবন্তঃ এব জন্মবন্ধাত্ বিনির্মুক্তাঃ সন্তঃ পদং পরমং
বিষ্ণোঃ মোক্ষাখ্যং গচ্ছন্তি অনামযম্ সর্বোপদ্রবরহিতং ইত্যর্থঃ .

অথ দ্বাদশোঽধ্যাযঃ

দ্বিতীযাধ্যাযপ্রভৃতিষু বিভূত্যন্তেষু অধ্যাযেষু (১০)
পরমাত্মনঃ ব্রহ্মণঃ অক্ষরস্য বিধ্বস্তসর্বোপাধিবিশেষস্য উপাসনং
উক্তং; সর্বযোগৈশ্বর্যসর্বজ্ঞানশক্তিমত্সত্বোপাধেঃ ঈশ্বরস্য তব
চ উপাসনং তত্র তত্র উক্তম্ . বিশ্বরূপাধ্যাযে (১১)তু
ঐশ্বরং আদ্যং সমস্তজগদাত্মরূপং বিশ্বরূপং ত্বদীযং দর্শিতং
উপাসনার্থমেব ত্বযা . তচ্চ দর্শযিত্বা উক্তবানসি
”মত্কর্মকৃত্”(১১. ৫৫)ইত্যাদি . অতঃ অহং অনযোঃ উভযোঃ পক্ষযোঃ
বিশিষ্টতরবুভুত্সযা ত্বাং পৃচ্ছামি ইতি অর্জুন উবাচ –

অর্জুন উবাচঃ

এবং সততযুক্তা যে ভক্তাস্ত্বাং পর্যুপাসতে .
যে চাপ্যক্ষরমব্যক্তং তেষাং কে যোগবিত্তমাঃ .. ১২. ১..

এবং ইতি .. ”এবং”ইতি অতীতানন্তরশ্লোকেন উক্তং অর্থং পরামৃশতি
”মত্কর্মকৃত্”(১১. ৫৫)ইত্যাদিনা . এবং সততযুক্তাঃ নৈরন্তর্যেণ
ভগবত্কর্মাদৌ যথোক্তে অর্থে সমাহিতাঃ সন্তঃ প্রবৃত্তাঃ
ইত্যর্থঃ . যে ভক্তাঃ অনন্যশরণাঃ সন্তঃ ত্বাং যথাদর্শিতং
বিশ্বরূপং পর্যুপাসতে ধ্যাযন্তি . যে চ অন্যে অপি ত্য্ক্তসর্বৈষণাঃ
সংযাস্তসর্বকর্মাণঃ যথাবিশেষিতং ব্রহ্ম অক্ষরং .
নিরস্তসর্বোপাধিত্বাত্ অব্যক্তং অকরণগোচরং – যত্ হি লোকে
করণগোচরং তত্ ব্যক্তং উচ্যতে . অঞ্জেঃ ধাতোঃ তত্কর্মকত্বাত্;
ইদং তু অক্ষং তদ্বিপরীতং – শিষ্টৈশ্চ উচ্যমানৈঃ বিশেষণৈঃ
নিশিষ্টং . তত্ যে চাপি পর্যুপাসতে – তেষাং উভযেষাং মধ্যে কে
যোগবিত্তমাঃ . কে অতিশযেন যোগবিদঃ ?ইত্যর্থঃ ..

২. ০ যে তু অক্ষরোপাসকাঃ সম্যগ্দর্শিনঃ নিবৃত্তৈষণাঃ . তে তাবত্
তিষ্ঠন্তু; তান্ প্রতি যত্ বক্তব্যং তত্ উপরিষ্টাত্ বক্ষ্যামঃ
(শ্লোকে ১৩ – ২০)যে তু ইতরে –

শ্রীভগবানুবাচঃ

ময্যাবেশ্য মনো যে মাং নিত্যযুক্তা উপাসতে .
শ্রদ্ধযা পরযোপেতাস্তে মে যুক্ততমা মতাঃ .. ১২. ২..

২. ১ মযি ইতি .. মযি বিশ্বরূপে পরিমেশ্বরে আবেশ্য সমাধায মনঃ যে
ভক্তাঃ সন্তঃ মাং সর্বযোগেশ্বরাণাং অধীশ্বরং সর্বজ্ঞং
বিমুক্তরাগাদিক্লেশতিমিরদৃষ্টিং, নিত্যযুক্তাঃ
অতীতানন্তরাধ্যাযান্তে উক্তশ্লোকার্থন্যাযেন সততযুক্তাঃ সন্তঃ
উপাসতে শ্রদ্ধযা পরযা প্রকৃষ্টযা উপেতাঃ যে, তে মে মম
যুক্ততমাঃ মতাঃ অভিপ্রেতাঃ যুক্ততমাঃ ইতি . নৈরন্তর্যেণ হি তে
মচ্চিত্ততযা অহোরাত্রং অতিবাহযন্তি (অহোরাত্রং অতিমাত্র্ং মাং
ধ্যাযন্তি), অতঃ যুক্তং তান্ প্রতি যুক্ততমাঃ ইতি বক্তুম্ ..

৩. ০ কিং ইতরে যুক্ততমাঃ ন ভবন্তি ?ন; কিংতু তান্ প্রতি যত্
বক্তব্যং তত্ শৃণু –

যে ত্বক্ষরমনির্দেশ্যমব্যক্তং পর্যুপাসতে .
সর্বত্রগমচিন্ত্যং চ কূটস্থমচলং ধ্রুবম্ .. ১২. ৩..

৩. ১ যে তু ইতি .. যে তু অক্ষরং অনির্দেশ্যং অব্যক্তত্বাত্ অশব্দগোচরং ইতি
ন নির্দেষ্টু শক্যতে, অতঃ অনির্দেশ্যং, অব্যক্তং ন কেনাপি প্রমাণেন
ব্যজ্যতে ইতি অব্যক্তং পর্যুপাসতে পরি সমন্তাত্ উপাসতে . উপাসনং
নাম যথাশাস্ত্রং উপাস্যস্য অর্থস্য বিষযীকরণেন সামীপ্যং
উপগম্য তৈলধারবত্ সমানপ্রত্যযপ্রবাহেণ দীর্ঘকালং যত্
আসনং, তত্ উপাসনং আচক্ষতে . অক্ষরস্য বিশেষণং আহ উপাস্যস্য
– সর্বত্রগং ব্যোমবত্ ব্যাপি অচিন্ত্যং চ – যত্ হি করণগোচরং
তত্ মনসাঽপি চিন্ত্যং, তদ্বিপরীতত্বাত্ অচিন্ত্যং অক্ষরং কূটস্থং
দৃশ্যমানগুণকং অন্তদোষং বস্তু কূটম্ . ”কূটরূপকং, ”
”কূটসাক্ষ্যং”ইত্যাদৌ কূটশব্দঃ প্রসিদ্ধঃ লোকে . তথা চ
অবিদ্যাদ্যনেকসংসারবীজং অন্তদোষবত্
মাযাঽব্যাকৃতাদ্যনেকশব্দবাচ্যতযা ”মাযাং তু প্রকৃতিং
বিদ্যাত্ মাযিনং তু মহেশ্বরম্”(শ্বে. উ. ৪. ১০. ), ”মম মাযা
দুরত্যযা”(৭. ১৪)ইত্যাদৌ প্রসিদ্ধং যত্ তত্ কূটং, তস্মিন্
কূটে স্থিতং কূটস্থং তদধ্যক্ষতযা . অথবা – রাশিরিব স্থিতং
কূটস্থম্ . অত এব অচলম্ . যস্মাত্ অচলং, তস্মাত্
ধ্রুবং, নিত্যং ইত্যর্থঃ ..

সংনিযমেন্দ্রিযগ্রামং সর্বত্র সমবুদ্ধযঃ .
তে প্রাপ্নুবন্তি মামেব সর্বভূতহিতে রতাঃ .. ১২. ৪..

৪. ১ সংনিযম্য ইতি . সংনিযম্য সম্যক্ নিযম্য উপসংহৃত্য
ইন্দ্রিযগ্রামং ইন্দ্রিযসমুদাযং, সর্বত্র সর্বস্মিন্ কালে সমবুদ্ধযঃ
সমা তুল্যা বুদ্ধিঃ যেষাং ইষ্টানিষ্টপ্রাপ্তৌ তে সমবুদ্ধযঃ . তে
যে এবংবিধাঃ তে প্রাপ্নুবন্তি মাং এব সর্বভূতহিতে রতাঃ . ন তু
তেষাং বক্তব্যং কিঞ্চিত্ ”মাং তে প্রাপ্নুবন্তি”ইতি, ”জ্ঞানি ত্বাত্মৈব
মে মতং”(৭. ১৮)ইতি হি উক্তম্ . ন হি ভগবত্স্বরূপাণাং সতাং
যুক্ততমত্বং, অযুক্ততমত্বং বা বাচ্যম্ .. কিন্তু –

ক্লেশোঽধিকতরস্তেষামব্যক্তাসক্তচেতসাম্ .
অব্যক্তা হি গতির্দুঃখং দেহবদ্ভিরবাপ্যতে .. ১২. ৫..

৫. ১ ক্লেশঃ ইতি .. ক্লেশঃ অধিকতরঃ – যদ্যপি মত্কর্মাদিপরাণাং
অধিকঃ এব ক্লেশঃ, অধিকতরস্তু অক্ষরাত্মনাং পরমাত্মদর্শিনাং
দেহাভিমানপরিত্যাগনিমিত্তঃ – অব্যক্তাসক্তচেতসাং অব্যক্তে
আসক্তং চেতঃ যেষাং তে অব্যক্তাসক্তচেতসঃ তেষাং
অব্যক্তাসক্তচেতসাম্ .. অব্যক্তা হি যস্মাত্ (যা)গতিঃ
অক্ষরাত্মিকা দুঃখং (সা)দেহবদ্ভিঃ দেহাভিমানবদ্ভিঃ অবাপ্যতে,
অতঃ ক্লেশঃ অধিকতরঃ .

৬. ০ অক্ষরোপাসকানাং যত্ বর্তনং তত্ উপরিষ্টাত্ (শ্লোকেষু ১২. ১৩ – ২০)
বক্ষ্যামঃ ..

যে তু সর্বাণি কর্মাণি মযি সংন্যস্য মত্পরাঃ .
অনন্যেনৈব যোগেন মাং ধ্যাযন্ত উপাসতে .. ১২. ৬..

৬. ১ যে তু ইতি .. যে তু সর্বাণি কর্মাণি মযি ঈশ্বরে সংন্যস্য মত্পরাঃ
অহং পরঃ যেষাং তে মত্পরাঃ সন্তঃ অনন্যেন এব অবিদ্যমানং অন্যত্
আলম্বনং বিশ্বরূপং দেবং ধ্যাযন্তঃ চিন্তযন্তঃ উপাসতে ..
তেষাং কিম্ ?-

তেষামহং সমুদ্ধর্তা মৃত্যুসংসারসাগরাত্ .
ভবামি ন চিরাত্পার্থ ময্যাবেশিতচেতসাম্ .. ১২. ৭..

৭. ১ তেষাং ইতি . তেষাং মদুপাসনৈকপরাণাং অহং ঈশ্বরঃ সমুদ্ধর্তা
– কুতঃ ইতি ?আহ – মৃত্যুসংসারসাগরাত্ মৃত্যুযুক্তঃ
সংসারঃ মৃত্যুসংসারঃ, স এব সাগর ইব সাগরঃ, দুস্তরত্বাত্,
তস্মাত্ মৃত্যুসংসারসাগরাত্ অহং তেষাং সমুদ্ধর্তা ভবামি ন
চিরাত্ . কিং তর্হি?- ক্ষিপ্রমেব হে পার্থ ! মযি আবেশিতচেতসাং
মযি বিশ্বরূপে আবেশিতং সমাহিতং চেতঃ যেষাং তে
ময্যবেশিতচেতসঃ তেষাম্ ..

যতঃ এবং, তস্মাত্ –

ময্যেন মন আধস্ত্ব মযি বুদ্ধিং নিবেশয .
নিবসিষ্যসি ময্যেব অত ঊর্ধ্বং ন সংশযঃ .. ১২. ৮..

৮. ১ ময্যেব ইতি .. মযি এব বিশ্বরূপে ঈশ্বরে মনঃ সঙ্কল্পবিকল্পাত্মকং
সমাধত্স্ব সথাপয . মযি এব অধ্যবসাযং কুর্বতীং বুদ্ধিং চ
আধত্স্ব নিবেশয . ততঃ তে কিং ভ্যাত্ ইতি ?শৃণু –
নিবসিষ্যসি নিবত্স্যসি নিশ্চযেন মদাত্মনা মযি বাসং করিষ্যসি এব
অতঃ শরীরপাতাত্ ঊর্ধ্বম্ . ন সংশযঃ, সংশযঃ অত্র ন
কর্তব্যঃ ..

অথ চিত্তং সমাধাতুং ন শক্নোষি মযি স্থিরম্ .
অভ্যাসযোগেন ততো মামিচ্ছাপ্তুং ধনঞ্জয .. ১২. ৯..

৯. ১ অথ ইতি .. অথ এবং যথা অবোচং তথা মযি চিত্তং সমাধাতুং
স্থাপযিতুং স্থিরং অচলং ন শক্নোষি চেত্, ততঃ পশ্চাত্
অভ্যাসযোগেন, চিত্তস্য একস্মিন্ আলম্বেন সর্বতঃ সমাহৃত্য
পুনঃপুনঃ স্থাপনং অভ্যাসঃ, তত্পূর্বক যোগঃ সমাধানলক্ষণঃ তেন
অভ্যাসযোগেন মাং বিশ্বরূপং ইচ্ছ প্রার্থযস্ব আপ্তুং হে ধনঞ্জয
! ..

অভ্যাসেঽপ্যসমর্থোঽসি মত্কর্মপরমো ভব .
মদর্থমপি কর্মাণি কুর্বন্ সিদ্ধিমবাপ্স্যসি .. ১২. ১০..

১০. ১ অভ্যাসে ইতি .. অভ্যাসে অপি অসমর্থঃ অসি অশক্তঃ অসি, তর্হি
মত্কর্মপরমঃ ভব, মদর্থং কর্ম মত্কর্ম, তত্পরমঃ
মত্কর্মপরমঃ, মত্কর্মপ্রধানঃ ইত্যর্থঃ . অভ্যাসেন বিনা
মদর্থং অপি কর্মাণি কেবলং কুর্বন্ সিদ্ধি
সত্বশুদ্ধিযোগজ্ঞানপ্রাপ্তিদ্বারেণ অবাপ্স্যসি ..

অথৈতদপ্যশক্তোঽসি কর্তুং মদোগমাশ্রিতঃ .
সর্বকর্মফলত্যাগং ততঃ কুরু যতাত্মবান্ .. ১২. ১১..

১১. ১ অথৈতদ্ ইতি .. অথ পুনঃ এতত্ অপি যত্ উক্তং মত্কর্মপরমত্বং
তত্ কর্তুং অশক্তঃ অসি, মদ্যোগং আশ্রিতঃ, মযি ক্রিযমাণানি কর্মাণি
সংযস্য যত্ করণং তেষাং অনুষ্ঠানং সঃ মদ্যোগঃ, তং আশ্রিতঃ
সন্ – সর্বকর্মফলত্যাগং সর্বেষাং কর্মণাং ফলসংযাসং
সর্বকর্মফলত্যাগং ততঃ অনন্তরং কুরু যতাত্মবান্ সংযতচিত্তঃ
সন্ ইত্যর্থঃ ..

১২. ০ ইদানীং সর্বকর্মফলত্যাগং স্তৌতি –

শ্রেযো হি জ্ঞানমভ্যাসাজ্জ্ঞানাদ্ধ্যানং বিশিষ্যতে .
ধ্যানাত্কর্মফলত্যাগস্ত্যাগাচ্ছান্তিরনন্তরম্ .. ১২. ১২..

১২. ১ শ্রেযঃ ইতি .. শ্রেযঃ হি প্রশস্যতরং জ্ঞানং –
কস্মাত্ ?- (অ)বিবেকপূর্বকাথ্ অভ্যাসাত্
তস্মাত্ অপি জ্ঞানাত্ জ্ঞানপূর্বকং ধ্যানং
বিশিষ্যতে . জ্ঞানবতঃ ধ্যানাত্ অপি কর্মফলত্যাগঃ,
”বিশিষ্যতে”ইতি অনুষজ্যতে . এবং কর্মফলত্যাগাত্
পূর্বোক্তবিশেষণবতঃ (১১)শান্তিঃ উপশমঃ সহেতুকস্য সংসারস্য
অনন্তরং এব স্যাত্, ন তু কালান্তরং অপেক্ষতে ..

১২. ২ অজ্ঞস্য কর্মণি প্রবৃত্তস্য পূর্বোপদিষ্টোপাযানুষ্ঠানশক্তৌ
সর্বকর্মণাং ফলত্যাগঃ শ্রেযস্সাধনং ইতি উপদিষ্টং, ন
প্রথমমেব . অতশ্চ ”শ্রেযো হি জ্ঞানং”
ইত্যাদ্যুত্তরোত্তরবিশিষ্টত্বোপদেশেন সর্বকর্মফলত্যাগঃ স্তূযতে,
সম্পন্নসাধনানুষ্ঠানশক্তৌ অনুষ্ঠেযত্বেন শ্রুতত্বাত্ . কেন
ধর্মেণ স্তুতিত্বং ?”যদা সর্বে প্রমুচ্যন্তে”(কঠ. উ. ৬. ১৪).
কামাশ্চ সর্বে শ্রৌতস্মার্তকর্মণাং ফলানি . তত্যাগে চ
বিদুষঃ ধ্যাননিষ্ঠস্য অনন্তরা এব শান্তিঃ . ইতি
সর্বকামত্যাগসামান্যং অজ্ঞকর্মফলত্যাগস্য অপি অস্তি ইতি
তত্সামান্যাত্ সর্বকর্মফলত্যাগস্তুতিঃ ইযং প্ররোচনার্থী .
যথা অগস্ত্যেন ব্রাহ্মণেন সমুদ্রঃ পীতঃ ইতি ইদানীন্তনাঃ অপি
ব্রাহ্মণাঃ ব্রাহ্মণত্বসামান্যাত্ স্তূযন্তে . এবং
কর্মফলত্যাগাত্ কর্মযোগস্য শেযস্সাধনত্বং অভিহিতম্ ..

১৩. ০ অত্র চ আত্মেশ্বরভেদং আশ্রিত্য বিশ্বরূপে ঈশ্বরে চেতঃ
সমাধানলক্ষণঃ যোগঃ উক্তঃ, ঈশ্বরার্থং কর্মানুষ্ঠানাদি চ .
”অথৈতদপ্যশক্তোঽসি”(১২. ১১)ইতি অজ্ঞানকার্যসূচনাত্ ন
অভেদদর্শিনঃ অক্ষরোপাসকস্য কর্মযোগঃ উপপদ্যতে ইতি দর্শযতি .
তথা কর্মযোগিনঃ অক্ষরোপাসনানুপপত্তিং দর্শযতি ভগবান্ ”তে
প্রাপ্নুবন্তি মামেব”(১২. ৪)ইতি অক্ষরোপাসকানাং কৈবল্যপ্রাপ্তৌ
স্বাতন্ত্র্যং উক্ত্বা, ইতরেষাং পারতন্ত্র্যাত্ ঈশ্বরাধীনতাং
দর্শিতবান্ ”তেষামহং সমুদ্ধর্থা”(১২. ৭)ইতি . যদি হি
ঈশ্বরস্য আত্মভূতাঃ তে মতাঃ অভেদদর্শিত্বাত্ অক্ষরস্বরূপাঃ এব
তে ইতি সমুদ্ধরণ কর্মবিষযবচনং তান্ প্রতি অপেশলং স্যাত্ .
যস্মাচ্চ অর্জুনস্য অত্যন্তম্ এব হিতৌষী ভগবান্ তস্য
সম্যগ্দর্শনানন্বিতং কর্মযোগং ভেদদৃষ্টিমন্তম্ এব উপদিশতি .
ন চ আত্মানং ঈশ্বরং প্রমাণতঃ বুদ্ধ্বা কস্যচিত্ গুণবাবং
জিগমিষতি কশ্চিত্, বিরোধাত্ . তস্মাত্ অক্ষরোপাসকানাং
সম্যগ্দর্শননিষ্ঠানাং সংযাসিনাং ত্যক্তসর্বৈষণানাং ”অদ্বেষ্টা
সর্বভূতানাং”ইত্যাদিধর্মপূগং সাক্ষাত্ অমৃতত্বকারণং বক্ষ্যামি
ইতি প্রবর্ততে –

অদ্বেষ্টা সর্বভূতানাং মৈত্রঃ করুণ এব চ .
নির্মমো নিরহঙ্কারঃ সমদুঃখসুখঃ ক্ষমী .. ১২. ১৩..

১৩. ১ অদ্বেষ্টা ইতি .. অদ্বেষ্টা সর্ব ভূতানাং সর্বেষাং ভূতানাং ন
দ্বেষ্টা, আত্মনঃ দুঃখহেতুমপি ন কিঞ্চিত্ দ্বেষ্টি, সর্বাণি ভূতানি
আত্মত্বেন পশ্যতি . মৈত্রঃ – মিত্রভাবঃ মৈত্রী, মিত্রতযা বর্ততে
ইতি – মৈত্রঃ . করুণঃ এব চ, করুণা কৃপা দুঃখিতেষু দযা,
তদ্বান্ করুণঃ, সর্বভূতাভযপ্রদঃ, সংযাসী ইত্যর্থঃ .
নির্মমঃ মমপ্রত্যযবর্জিতঃ . নিরহঙ্কারঃ নির্গতাহপ্রত্যযঃ .
সমদুঃখসুখঃ, সমে দুঃখসুখে দ্বেষরাগযোঃ অপ্রবর্তকে যস্য সঃ
সমদুঃখসুখঃ . ক্ষমী ক্ষমাবান্ আক্রুষ্টঃ অভিহতো বা অবিক্রিযঃ এব
আস্তে ..

সন্তুষ্টঃ সততং যোগী যতাত্মা দৃঢনিশ্চযঃ .
ময্যর্পিতমনোবুদ্ধির্যো মদ্ভক্তঃ স মে প্রিযঃ .. ১২. ১৪..

১৪. ১ সন্তুষ্টঃ ইতি .. সন্তুষ্টঃ সততং নিত্যং, দেহস্থিতিকারণস্য লাভে
অলাভে চ উত্পন্নলংপ্রত্যযঃ . তথা গুণবল্লাভে বিপর্যযে চ
সন্তুষ্টঃ . সততং যোগী সমাহিতচিত্তঃ . যতাত্মা
সংযতস্বভাবঃ . দৃঢনিশ্চযঃ, দৃঢঃ স্থিরঃ নিশ্চযঃ
অধ্যবসাযঃ যস্য আত্মতত্ববিষযে সঃ দৃঢনিশ্চযঃ .
ময্যর্পিতমনোবুদ্ধিঃ সঙ্কল্পবিকল্পাত্মকং মনঃ, অধ্যবসাযলক্ষণা
বুদ্ধিঃ, তে মযি এব অর্পিতে স্থাপিতে যস্য সংযাসিনঃ স
ময্যর্পিতমনোবুদ্ধিঃ . যঃ ঈদৃশঃ মদ্ভক্তঃ সঃ মে প্রিযঃ .
”প্রিযো হি জ্ঞানিনোঽত্যর্থমহং স চ মম প্রিযঃ”(৭. ১৭)ইতি সপ্তমে
অধ্যাযে সূচিতং তত্ ইহ প্রপঞ্চ্যতে ..

যস্মান্নোদ্বিজতে লোকো লোকন্নোদ্বিজতে চ যঃ .
হর্ষামর্ষভযোদ্বেগৈর্মুক্তো যঃ স চ মে প্রিযঃ .. ১২. ১৫..

১৫. ১ যস্মাত্ ইতি .. যস্মাত্ সংযাসিনঃ ন উদ্বিজতে ন উদ্বেগং গচ্ছতি
ন সংতপ্যতে, ন সংক্ষুভ্যতি লোকঃ, তথা লোকাত্ ন উদ্বিজতে চ যঃ,
হর্ষামর্ষভযোদ্বেগৈঃ, হর্ষশ্চ অমর্ষশ্চ ভযং চ উদ্বেগশ্চ
তৈঃ হর্ষামর্ষভযোদ্বেগৈঃ মুক্তঃ – হর্ষঃ প্রিযলাভে অন্তঃকরণস্য
উত্কর্ষঃ রোমাঞ্চনাশ্রুপাতাদিলিঙ্গঃ, অমর্ষঃ অসহিষ্ণুতা, ভযং
ত্রাসঃ, উদ্বেগঃ স্দ্বিগ্নতা, তৈঃ মুক্তঃ যঃ সঃ চ মে প্রিযঃ ..

অনপেক্ষঃ শুধির্দক্ষ উদাসীনো গতব্যথঃ .
সর্বারম্ভপরিত্যাগী যো মদ্ভক্তঃ স মে প্রিযঃ .. ১২. ১৬..

১৬. ১ অনপেক্ষঃ ইতি .. অনপেক্ষঃ দেহেন্দ্রিযবিষযসম্বন্ধাদিষু অপেক্ষা যস্য
নাস্তি সঃ অনপেক্ষঃ নিঃস্পৃহঃ . শুচিঃ, বাহ্যেন আভ্যতরেণ চ
শৌচেন সম্পন্নঃ . দক্ষঃ, প্রত্যুত্পন্নেষু কার্যেষু সদ্যঃ যথাবত্
প্রতিপত্তুং সমর্থঃ . উদাসীনঃ ন কস্যচিত্ মিত্রাদেঃ পক্ষং ভজতে
যঃ সঃ উদাসীনঃ – যতিঃ . গতব্যথঃ গতভযঃ .
সর্বারম্ভপরির্ত্যাঙ্গী, আরভ্যন্তে ইতি আরম্ভাঃ
ইহামুত্রফলভোগার্থানি কামহেতূনি কর্মাণি সর্বারম্ভাঃ, তান্
পরিত্যক্তুং শীলং অস্য ইতি সর্বারম্ভপরিত্যাগী যঃ মদ্ভক্তঃ সঃ মে
প্রিযঃ ..

কিঞ্চ্ –

যো ন হৃষ্যতি ন দ্বেষ্টি ন শোচতি ন কাঙ্ক্ষতি .
শুভাশুভপরিত্যাগী ভক্তিমান্ যঃ স মে প্রিযঃ .. ১২. ১৭..

১৭. ১ যো ন ইতি .. যঃ ন হৃষ্যতি ইষ্টপ্রাপ্তৌ, ন দ্বেষ্টি অনিষ্টপ্রাপ্তৌ,
ন শোচতি প্রিযবিযোগে, ন চ অপ্রাপ্তং কাঙ্ক্ষতি, শুভাশুভে কর্মণী
পরিত্যক্তং শীলং অস্য ইতি শুভাশুভপরিত্যাগী ভক্তিমান্ যঃ সঃ
মে প্রিযঃ ..

সমঃ শত্রৌ চ মিত্রে চ তথা মানাপমানযোঃ .
শীতোষ্ণসুখদুঃখেষু সমঃ সঙ্গবিবর্জিতঃ .. ১২. ৮..

১৮. ১ সমঃ ইতি .. সমঃ শত্রৌ চ মিত্রে চ, তথা মানাপমানযোঃ
পুজাপরিভবযোঃ, শীতোষ্ণুসুখদুঃখেষু সমঃ সর্বত্র সঙ্গবিবর্জিতঃ ..

কিঞ্চ –

তুল্যনিন্দাস্তুনির্মৌনী সন্তুষ্টো যেন কেনচিত্ .
অনিকেতঃ স্থিরমতির্ভক্তিমান্মে প্রিযো নরঃ .. ১২. ১৯..

১৯. ১ তুল্য ইতি .. তুল্যনিন্দাস্তুতিঃ নিন্দা চ স্তুতিশ্চ নিন্দাস্তুতী তে তুল্যে
যস্য সঃ তুল্যনিন্দাস্তুইতিঃ . মৌনী মৌনবান্ সংযতবাক্ .
সন্তুষ্টঃ যেন কেনচিত্ শরীরস্থিতিহেতুমাত্রেণ; তথা চ উক্তম্ –

যেন কেনচিদাচ্ছন্নো যেন কেনচিদাশিতঃ .
যত্র ক্বচন শাযী স্যাত্তং দেবা ব্রাহ্মণং বিদুঃ ..

– (শান্তিপর্ব. ২৪৫. ১২. )ইতি . কিঞ্চ – অনিকেতঃ নিকেতঃ
আশ্রযঃ নিবাসঃ নিযতঃ ন বিদ্যতে যস্য সঃ অনিকেতঃ, ”নাগারে”
ইত্যাদিস্মৃত্যন্তরাত্ . স্থিরমতিঃ স্থিরা পারমার্থবস্তুবিষযা
যস্য মতিঃ সঃ স্থিরমতিঃ . ভক্তিমান্ মে প্রিযঃ নরঃ ..

২০. ০ ”অদ্বেষ্টা সর্বভূতানাং”(১২. ১৩. )ইত্যাদিনা অক্ষরোপাসকানাং
নিবৃত্তসর্বৈষণানাং সংযাসিনাং পরমার্থজ্ঞাননিষ্ঠানাং
ধর্মজাতং প্রক্রান্তং উপসংহরতি –

যে তু ধর্ম্যামৃতমিদং যথোক্তং পর্যুপাসতে .
শ্রদ্দধানা মত্পরমা ভক্তাস্তেঽতীব মে প্রিযাঃ .. ১২. ২০ ..

ইতি শ্রীমহাভারতে শতসাহস্র্যাং সংহিতাযাং বৈযাসিক্যাং
ভীষ্মপর্বণি শ্রীমদ্ভগবদ্গীতাসূপনিষত্সু ব্রহ্মবিদ্যাযাং
যোগশাস্ত্রে শ্রীকৃষ্ণার্জুনসংবাদে ভক্তিযোগে নাম
দ্বাদশোঽধ্যাযঃ ..

২০. ১ যে তু ইতি .. যে তু সংযাসিনঃ ধর্ম্যামৃতং ধর্মাদনপেতং ধর্ম্যং
চ তত্ অমৃতং চ তত্, অমৃতত্বেহেতুত্বাত্, ইদং যথোক্তং
”অদ্বেষ্টা সর্বভূতানাং”ইত্যাদিনা পর্যুপাসতে অনুতিষ্ঠন্তি
শ্রদ্দধানাঃ সংতঃ মত্পরমাঃ যথোক্তাঃ অহং অক্ষরাত্মা পরমঃ
নিরতিশযাগতিঃ যেষাং তে মত্পরমাঃ, মদ্ভক্তাঃ চ উত্তমাং
পরমার্থজ্ঞানলক্ষণাং ভক্তিং আস্থি (শ্রি)তাঃ তে অতীব মে প্রিযাঃ .
”প্রিযো হি জ্ঞানিনোঽত্যর্থম্”(৭. ১৭. )ইতি যত্ সূচিতং তত্
ব্যাখ্যায ইহ উপসংহৃতং ”ভক্তাস্তেঽতীব মে প্রিযাঃ”ইতি .
যস্মাত্ ধর্ম্যামৃতং ইদং যথোক্তং অনুতিষ্ঠন্ ভগবতঃ বিষ্ণোঃ
পরমেশ্বরস্য অতীব প্রিযঃ ভবতি, তস্মাত্ ইদং ধর্ম্যামৃতং
মুমুক্ষুণা যত্নতঃ অনুষ্ঠেযং, বিষ্ণোঃ, প্রিযং পরং ধাম জিগমিষুণা
– ইতি বাক্যার্থঃ ..

ॐ শাংতাকারং ভুজগশযনং পদ্মনাভং সুরেশম্ .
বিশ্বাধারং গগনসদৃশং মেঘবর্ণং শুভাংগম্ .
লক্ষ্মীকাংতং কমলনযনং যোগীভির্ধ্যানগম্যম্ .
বংদে বিষ্ণুং ভবভযহরং সর্বলোকৈকনাথম্ ..