ভগবদ্গীতা মাহাত্মযং এবং ধ্যানমংত্র

॥ ভগবদ্গীতা মাহাত্ম্যং অথবা ধ্যানমন্ত্র ॥

          ॥ শ্রী পরমাত্মনে নমঃ ॥

         ॥ অথ শ্রীগীতামাহাত্ম্যপ্রারম্ভঃ ॥

   শ্রী গণেশায় নমঃ ॥ শ্রীরাধারমণায় নমঃ ॥

             ধরোবাচ ।
ভগবন্পরেমেশান ভক্তিরব্যভিচারিণী ।
প্রারব্ধং ভুজ্যমানস্য কথং ভবতি হে প্রভো ॥ ১॥

            শ্রী বিষ্ণুরুবাচ ।
প্রারব্ধং ভুজ্যমানো হি গীতাভ্যাসরতঃ সদা ।
স মুক্তঃ স সুখী লোকে কর্মণা নোপলিপ্যতে ॥ ২॥

মহাপাপাদিপাপানি গীতাধ্যানং করোতি চেত্ ।
ক্বচিত্স্পর্শং ন কুর্বন্তি নলিনীদলমম্বুবত্ ॥ ৩॥

গীতায়াঃ পুস্তকং য়ত্র য়ত্র পাঠঃ প্রবর্ততে ।
তত্র সর্বাণি তীর্থাণি প্রয়াগাদীনি তত্র বৈ ॥ ৪॥

সর্বে দেবাশ্চ ঋষয়ো য়োগিনঃ পন্নগাশ্চ য়ে ।
গোপালা গোপিকা বাপি নারদোদ্ধবপার্ষদৈঃ ॥

সহায়ো জায়তে শীঘ্রং য়ত্র গীতা প্রবর্ততে ৫॥

য়ত্র গীতাবিচারশ্চ পঠনং পাঠনং শৃতম্ ।
তত্রাহং নিশ্চিতং পৃথ্বি নিবসামি সদৈব হি ॥ ৬॥

গীতাশ্রয়েঽহং তিষ্ঠামি গীতা মে চোত্তমং গৃহম্ ।
গীতাজ্ঞানমুপাশ্রিত্য ত্রীংলোকান্পালয়াম্যহম্ ॥ ৭॥

গীতা মে পরমা বিদ্যা ব্রহ্মরূপা ন সংশয়ঃ ।
অর্ধমাত্রাক্ষরা নিত্যা স্বানির্বাচ্যপদাত্মিকা ॥ ৮॥

চিদানন্দেন কৃষ্ণেন প্রোক্তা স্বমুখতোঽর্জুনম্ ।
বেদত্রয়ী পরানন্দা তত্ত্বার্থজ্ঞানসংয়ুতা ॥ ৯॥

য়োঽষ্টাদশজপো নিত্যং নরো নিশ্চলমানসঃ ।
জ্ঞানসিদ্ধিং স লভতে ততো য়াতি পরং পদম্ ॥ ১০॥

পাঠেঽসমর্থঃ সম্পূর্ণে ততোঽর্ধং পাঠমাচরেত্ ।
তদা গোদানজং পুণ্যং লভতে নাত্র সংশয়ঃ ॥ ১১॥

ত্রিভাগং পঠমানস্তু গঙ্গাস্নানফলং লভেত্ ।
ষডংশং জপমানস্তু সোময়াগফলং লভেত্ ॥ ১২॥

একাধ্যায়ং তু য়ো নিত্যং পঠতে ভক্তিসংয়ুতঃ ।
রুদ্রলোকমবাপ্নোতি গণো ভূত্বা বসেচ্চিরম্ ॥ ১৩॥

অধ্যায়ং শ্লোকপাদং বা নিত্যং য়ঃ পঠতে নরঃ ।
স য়াতি নরতাং য়াবন্মন্বন্তরং বসুন্ধরে ॥ ১৪॥

গীতায়াঃ শ্লোকদশকং সপ্ত পঞ্চ চতুষ্টয়ম্ ।
দ্বৌ ত্রীনেকং তদর্ধং বা শ্লোকানাং য়ঃ পঠেন্নরঃ ॥ ১৫॥

চন্দ্রলোকমবাপ্নোতি বর্ষাণাময়ুতং ধ্রুবম্ ।
গীতাপাঠসমায়ুক্তো মৃতো মানুষতাং ব্রজেত্ ॥ ১৬॥

গীতাভ্যাসং পুনঃ কৃত্বা লভতে মুক্তিমুত্তমাম্ ।
গীতেত্যুচ্চারসংয়ুক্তো ম্রিয়মাণো গতিং লভেত্ ॥ ১৭॥

গীতার্থশ্রবণাসক্তো মহাপাপয়ুতোঽপি বা ।
বৈকুণ্ঠং সমবাপ্নোতি বিষ্ণুনা সহ মোদতে ॥ ১৮॥

গীতার্থং ধ্যায়তে নিত্যং কৃত্বা কর্মাণি ভূরিশঃ ।
জীবন্মুক্তঃ স বিজ্ঞেয়ো দেহান্তে পরমং পদম্ ॥ ১৯॥

গীতামাশ্রিত্য বহবো ভূভুজো জনকাদয়ঃ ।
নির্ধূতকল্মষা লোকে গীতায়াতাঃ পরং পদম্ ॥ ২০॥

গীতায়াঃ পঠনং কৃত্বা মাহাত্ম্যং নৈব য়ঃ পঠেত্ ।
বৃথা পাঠো ভবেত্তস্য শ্রম এব হ্যুদাহৃতঃ ॥ ২১॥

এতন্মাহাত্ম্যসংয়ুক্তং গীতাভ্যাসং করোতি য়ঃ ।
স তত্ফলমবাপ্নোতি দুর্লভাং গতিমাপ্নুয়াত্ ॥ ২২॥

               সূত উবাচ ।
মাহাত্ম্যমেতদ্গীতায়া ময়া প্রোক্ত সতাতনম্ ।
গীতান্তে চ পঠেদ্যস্তু য়দুক্তং তত্ফলং লভেত্ ॥ ২৩॥

    ॥ ইতি শ্রীবারাহপুরাণে শ্রীগীতামাহাত্ম্যং সম্পূর্ণম্ ॥

       ॥ অথ শ্রীমদ্ভগবদ্গীতাধ্যানাদি ॥

   শ্রী গণেশায় নমঃ ॥ শ্রীগোপালকৃষ্ণায় নমঃ ॥

            অথ ধ্যানম্ ।
            অথ করন্যাসঃ।
ওঁ অস্য শ্রীমদ্ভগবদ্গীতামালামন্ত্রস্য
ভগবান্বেদব্যাস ঋষিঃ ॥  অনুষ্টুপ্ ছন্দঃ ॥

শ্রীকৃষ্ণ পরমাত্মা দেবতা ॥

অশোচ্যানন্বশোচস্ত্বং প্রজ্ঞাবাদাংশ্চ ভাষসে ইতি বীজম্ ॥

সর্বধর্মান্ পরিত্যজ্য মামেকং শরণং ব্রজ ইতি শক্তিঃ ॥

অহং ত্বা সর্বপাপেভ্যো মোক্ষয়িষ্যামি মা শুচ ইতি কীলকম্ ॥

নৈনং ছিন্দন্তি শস্ত্রাণি নৈনং দহতি
পাবক ইত্যঙ্গুষ্ঠাভ্যাং নমঃ ॥

ন চৈনং ক্লেদয়ন্ত্যাপো ন শোষয়তি মারুত ইতি তর্জনীভ্যাং নমঃ ॥

অচ্ছেদ্যোঽয়মদাহ্যোঽয়মক্লেদ্যোঽশোষ্য
এব চ ইতি মধ্যমাভ্যাং নমঃ ॥

নিত্যঃ সর্বগতঃ স্থাণুরচলোঽয়ং সনাতন ইত্যনামিকাভ্যাং নমঃ ॥

পশ্য মে পার্থ্ রূপাণি শতশোঽথ
সহস্রশ ইতি কনিষ্ঠিকাভ্যাং নমঃ ॥

নানাবিধানি দিব্যানি নানাবর্ণাকৃতীনি
চ ইতি করতলকরপৃষ্ঠাভ্যাং নমঃ ॥

         ইতি করন্যাসঃ ॥

         অথ হৃদয়াদিন্যাসঃ ॥

নৈনং ছিন্দন্তি শস্ত্রাণি নৈনং দহতি
পাবক ইতি হৃদয়ায় নমঃ ॥

ন চৈনং ক্লেদয়ন্ত্যাপো ন শোষয়তি মারুত ইতি শিরসে স্বাহা ॥

অচ্ছেদ্যোঽয়মদাহ্যোঽয়মক্লেদ্যোঽশোষ্য
এব চেতি শিখায়ৈ বষট্  ॥

নিত্যঃ সর্বগতঃ স্থাণুরচলোঽয়ং সনাতন ইতি কবচায় হুম্ ॥

পশ্য মে পার্থ্ রূপাণি শতশোঽথ
সহস্রশ ইতি নেত্রত্রয়ায় বৌষট্ ॥

নানাবিধানি দিব্যানি নানাবর্ণাকৃতীনি
চেতি অস্ত্রায় ফট্ ॥

শ্রীকৃষ্ণপ্রীত্যর্থে পাঠে বিনিয়োগঃ ॥

ওঁ পার্থায় প্রতিবোধিতাং ভগবতা নারায়ণেন স্বয়ং
ব্যাসেন গ্রথিতাং পুরাণমুনিনা মধ্যে মহাভারতম্ ।
অদ্বৈতামৃতবর্ষিণীং ভগবতীমষ্টাদশাধ্যায়িনীং
অম্ব ত্বামনুসন্দধামি ভগবদ্গীতে ভবেদ্বেষিণীম্ ॥ ১॥

নমোঽস্তু তে ব্যাস বিশালবুদ্ধে ফুল্লারবিন্দায়তপত্রনেত্র ।
য়েন ত্বয়া ভারততৈলপূর্ণঃ প্রজ্বালিতো জ্ঞানময়ঃ প্রদীপঃ ॥ ২॥

প্রপন্নপারিজাতায়তোত্রবেত্রৈকপাণয়ে ।
জ্ঞানমুদ্রায় কৃষ্ণায় গীতামৃতদুহে নমঃ ॥ ৩॥

বসুদেবসুতং দেবং কংসচাণূরমর্দনম্ ।
দেবকীপরমানন্দং কৃষ্ণং বন্দে জগদ্গুরুম্ ॥ ৪॥

ভীষ্মদ্রোণতটা জয়দ্রথজলা গান্ধারনীলোত্পলা
শল্যগ্রাহবতী কৃপেণ বহনী কর্ণেন বেলাকুলা ।
অশ্বত্থামবিকর্ণঘোরমকরা দুর্যোধনাবর্তিনী
সোত্তীর্ণা খলু পাণ্ডবৈ রণনদী কৈবর্তকঃ কেশবঃ ॥ ৫॥

পারাশর্যবচঃ সরোজমমলং গীতার্থগন্ধোত্কটং
নানাখ্যানককেসরং হরিকথাসম্বোধনাবোধিতম্ ।
লোকে সজ্জনষট্পদৈরহরহঃ পেপীয়মানং মুদা
ভূয়াদ্ভারতপঙ্কজং কলিমলপ্রধ্বংসি নঃ শ্রেয়সে ॥ ৬॥

মূকং করোতি বাচালং পঙ্গুং লঙ্ঘয়তে গিরিম্ ।
য়ত্কৃপা তমহং বন্দে পরমানন্দমাধবম্ ॥ ৭॥

        অথ গীতামাহাত্ম্যম্ ।
গীতাশাস্ত্রমিদং পুণ্যং য়ঃ পঠেত্প্রয়তঃ পুমান্ ।
বিষ্ণোঃ পদমবাপ্নোতি ভয়শোকাদিবর্জিতঃ ॥ ১॥

গীতাধ্যয়নশীলস্য প্রাণায়ামপরস্য চ ।
নৈব সন্তি হি পাপানি পূর্বজন্মকৃতানি চ ॥ ২॥

মলনির্মোচনং পুংসাং জলস্নানং দিনে দিনে ।
সকৃদ্গীতাম্ভসি স্নানং সংসারমলনাশনম্ ॥ ৩॥

গীতা সুগীতা কর্তব্যা কিমন্যৈঃ শাস্ত্রবিস্তরৈঃ ।
য়া স্বয়ং পদ্মনাভস্য মুখপদ্মাদ্বিনিঃসৃতা ॥ ৪॥

ভারতামৃতসর্বস্বং বিষ্ণোর্বক্ত্রাদ্বিনিঃসৃতম্ ।
গীতাগঙ্গোদকং পীত্বা পুনর্জন্ম ন বিদ্যতে ॥ ৫॥

সর্বোপনিষদো গাবো দোগ্ধা গোপাল নন্দনঃ ।
পার্থো বত্সঃ সুধীর্ভোক্তা দুগ্ধং গীতামৃতং মহত্ ॥ ৬॥

একং শাস্ত্রং দেবকীপুত্রগীতমেকো
      দেবো দেবকীপুত্র এব ।
একো মন্ত্রস্তস্য নামানি য়ানি
      কর্মাপ্যেকং তস্য দেবস্য সেবা ॥ ৭॥

শান্তাকারং ভুজগশয়নং পদ্মনাভং সুরেশং
বিশ্বাধারং গগনসদৃশং মেঘবর্ণং শুভাঙ্গম্ ।
লক্ষ্মীকান্তং কমলনয়নং য়োগিভির্ধ্যানগম্যং
বন্দে বিষ্ণুং ভবভয়হরং সর্বলোকৈকনাথম্ ॥

য়ং ব্রহ্মা বরুণেন্দ্ররুদ্রমরুতঃ স্তুন্বন্তি দিব্যৈঃ স্তবৈঃ
বেদৈঃ সাঙ্গপদক্রমোপনিষদৈর্গায়ন্তি য়ং সামগাঃ ।
ধ্যানাবস্থিততদ্গতেন মনসা পশ্যন্তি য়ং য়োগিনো
য়স্যান্তং ন বিদুঃ সুরাসুরগণা দেবায় তস্মৈ নমঃ ॥ ৮॥

               ॥ ইতি ধ্যানম্ ॥