সরস্বতী

.. সরস্বতীরহস্যোপনিষত্ . ..

প্রতিযোগিবিনির্মুক্তব্রহ্মবিদ্যৈকগোচরম্ .
অখণ্ডনির্বিকল্পং তদ্রামচন্দ্রপদং ভজে ..
ॐ বাঙ্মে মনসি প্রতিষ্ঠিতা মনো মে বাচি প্রতিষ্ঠিত-
মাবিরাবীর্ম এধি .. বেদস্য ম আণীস্থঃ শ্রুতং মে
প্রহাসীরনেনাধীতেনাহোরাত্রান্সন্দধামি ঋতং বদিষ্যামি
সত্যং বদিষ্যামি তন্মামবতু অবতু মামবতু বক্তার-
মবতু বক্তারম্ .. ॐ শান্তিঃ শান্তিঃ শান্তিঃ ..
হরিঃ ॐ .. ঋষযো হ বৈ ভগবন্তমাশ্বলাযনং সংপূজ্য
পপ্রচ্ছুঃ কেনোপাযেন তজ্জ্ঞানং তত্পদার্থাবভাসকম্ .
যদুপাসনযা তত্ত্বং জানাসি ভগবন্বদ .. ১..
সরস্বতী দশশ্লোক্যা সঋচা বীজমিশ্রযা . স্তুত্বা জপ্ত্বা
পরাং সিদ্ধিমলভং মুনিপুঙ্গবাঃ .. ২.. ঋষয ঊচুঃ .
কথং সারস্বতপ্রাপ্তিঃ কেন ধ্যানেন সুব্রত .
মহাসরস্বতী যেন তুষ্টা ভগবতী বদ .. ৩..
স হোবাচাশ্বলাযনঃ . অস্য শ্রীসরস্বতীদশশ্লোকীমহামন্ত্রস্য .
অহমাশ্বলাযন ঋষিঃ . অনুষ্টুপ্ ছন্দঃ . শ্রী বাগীশ্বরী
দেবতা . যদ্বাগিতি বীজম্ . দেবীং বাচমিতি শক্তিঃ . প্রণো দেবীতি কীলকম্ .
বিনিযোগস্তত্প্রীত্যর্থে . শ্রদ্ধা মেধা প্রজ্ঞা ধারণা বাগ্দেবতা
মহাসরস্বতীত্যেতৈরঙ্গন্যাসঃ .. নীহারহারঘনসারসুধাকরাভাং
কল্যাণদাং কনকচম্পকদামভূষাম্ . উত্তুঙ্গপীনকুচকুংভ-
মনোহরাঙ্গীং বাণীং নমামি মনসা বচসা বিভূত্যৈ .. ১..
ॐ প্রণোদেবীত্যস্য মন্ত্রস্য ভরদ্বাজ ঋষিঃ . গাযত্রী ছন্দঃ .
শ্রীসরস্বতী দেবতা . প্রণবেন বীজশক্তিঃ কীলকম্ . ইষ্টার্থে বিনিযোগঃ .
মন্ত্রেণ ন্যাসঃ .. যা বেদান্তার্থতত্ত্বৈকস্বরূপা পরমার্থতঃ .
নামরূপাত্মনা ব্যক্তা সা মাং পাতু সরস্বতী .. ॐ প্রণো দেবী সরস্বতী
বাজেভির্বাজিনীবতী .. ধীনামবিত্র্যবতু .. ১..
আ নো দিব ইতি মন্ত্রস্য অত্রিরৃষিঃ . ত্রিষ্টুপ্ ছন্দঃ .
সরস্বতী দেবতা . হ্রীমিতি বীজশক্তিঃ কীলকম্ . ইষ্টার্থে
বিনিযোগঃ . মন্ত্রেণ ন্যাসঃ .. যা সাঙ্গোপাঙ্গবেদেষু
চতুর্ষ্বেকৈব গীযতে . অদ্বৈতা ব্রহ্মণঃ শক্তিঃ সা মাং
পাতু সরস্বতী .. হ্রীং আ নো দিবো বৃহতঃ পর্বতাদা সরস্বতী
যজতাগং তু যজ্ঞম্ . হবং দেবী জুজুষাণা ঘৃতাচী
শগ্মাং নো বাচমুশতী শ্রুণোতু .. ২..
পাবকা ন ইতি মন্ত্রস্য . মধুচ্ছন্দ ঋষিঃ . গাযত্রী
ছন্দঃ . সরস্বতী দেবতা . শ্রীমিতি বীজশক্তিঃ কীলকম্ .
ইষ্টার্থে বিনিযোগঃ . মন্ত্রেণ ন্যাসঃ .. যা বর্ণপদবাক্যার্থ-
স্বরূপেণৈব বর্ততে . অনাদিনিধনানন্তা সা মাং পাতু
সরস্বতী .. শ্রীং পাবকা নঃ সরস্বতী বাজেভির্বাজিনীবতী . যজ্ঞং
বষ্টু ধিযা বসুঃ .. ৩..
চোদযিত্রীতি মন্ত্রস্য মধুচ্ছন্দ ঋষিঃ . গাযত্রী ছন্দঃ .
সরস্বতী দেবতা . ব্লূমিতি বীজশক্তিঃ কীলকম্ . মন্ত্রেণ ন্যাসঃ ..
অধ্যাত্মমধিদৈবং চ দেবানাং সম্যগীশ্বরী . প্রত্যগাস্তে
বদন্তী যা সা মাং পাতু সরস্বতী .. ব্লূং চোদযিত্রী সূনৃতানাং
চেতন্তী সুমতীনাম্ . যজ্ঞং দধে সরস্বতী .. ৪..
মহো অর্ণ ইতি মন্ত্রস্য . মধুচ্ছন্দ ঋষিঃ . গাযত্রী ছন্দঃ .
সরস্বতী দেবতা . সৌরিতি বীজশক্তিঃ কীলকম্ . মন্ত্রেণ ন্যাসঃ .
অন্তর্যাম্যাত্মনা বিশ্বং ত্রৈলোক্যং যা নিযচ্ছতি .
রুদ্রাদিত্যারূপস্থা যস্যামাবেশ্য তাং পুনঃ . ধ্যাযন্তি
সর্বরূপৈকা সা মাং পাতু সরস্বতী . সৌঃ মহো অর্ণঃ
সরস্বতী প্রচেতযতি কেতুনা . ধিযো বিশ্বা বিরাজতি .. ৫..
চত্বারি বাগিতি মন্ত্রস্য উচথ্যপুত্র ঋষিঃ . ত্রিষ্টুপ্ ছন্দঃ .
সরস্বতী দেবতা . ঐমিতি বীজশক্তিঃ কীলকম্ . মন্ত্রেণ ন্যাসঃ .
যা প্রত্যগ্দৃষ্টিভির্জীবৈর্ব্যজ্যমানানুভূযতে . ব্যাপিনী
জ্’ নপ্তিরূপৈকা সা মাং পাতু সরস্বতী .. ঐং চত্বারি বাক্
পরিমিতা পদানি তানি বিদুর্ব্রাহ্মণা যে মনীষিণঃ . গুহা ত্রীণি
নিহিতা নেঙ্গযন্তি তুরীযং বাচো মনুষ্যা বদন্তি .. ৬..
যদ্রাগ্বদন্তীতি মন্ত্রস্য ভার্গব ঋষিঃ . ত্রিষ্টুপ্ ছন্দঃ .
সরস্বতী দেবতা . ক্লীমিতি বীজশক্তিঃ কীলকম্ . মন্ত্রেণ ন্যাসঃ .
নামজাত্যাদিভির্ভেদৈরষ্টধা যা বিকল্পিতা . নির্বিকল্পাত্মনা
ব্যক্তা সা মাং পাতু সরস্বতী .. ক্লীং যদ্বাগ্বদন্ত্যবিচেতনানি
রাষ্ট্রী দেবানাং নিষসাদ মন্দ্রা . চতস্র ঊর্জং দুদুহে
পযাংসি ক্ব স্বিদস্যাঃ পরমং জগাম .. ৭..
দেবীং বাচমিতি মন্ত্রস্য ভার্গব ঋষিঃ . ত্রিষ্টুপ্ ছন্দঃ .
সরস্বতী দেবতা . সৌরিতি বীজশক্তিঃ কীলকম্ . মন্ত্রেণ ন্যাসঃ .
ব্যক্তাব্যক্তগিরঃ সর্বে বেদাদ্যা ব্যাহরন্তি যাম্ . সর্বকামদুধা
ধেনুঃ সা মাং পাতু সরস্বতী .. সৌঃ দেবীং বাচমজনযন্ত
দেবাস্তা বিশ্বরূপাঃ পশবো বদন্তি . সা নো মন্দ্রেষমূর্জং
দুহানা ধেনুর্বাগস্মানুপসুষ্টুতৈতু .. ৮..
উত ত্ব ইতি মন্ত্রস্য বৃহস্পতিরৃষিঃ . ত্রিষ্টুপ্ ছন্দঃ .
সরস্বতী দেবতা . সমিতি বীজশক্তিঃ কীলকম্ . মন্ত্রেণ ন্যাসঃ .
যাং বিদিত্বাখিলং বন্ধং নির্মথ্যাখিলবর্ত্মনা . যোগী যাতি
পরং স্থানং সা মাং পাতু সরস্বতী .. সং উত ত্বঃ পশ্যন্ন
দদর্শ বাচমুত ত্বঃ শ্রুণ্বন্ন শ্রুণোত্যেনাম্ . উতো ত্বস্মৈ
তন্বং ১ বিসস্রে জাযেব পত্য উশতী সুবাসাঃ .. ৯..
অম্বিতম ইতি মন্ত্রস্য গৃত্সমদ ঋষিঃ . অনুষ্টুপ্ ছন্দঃ .
সরস্বতী দেবতা . ঐমিতি বীজশক্তিঃ কীলকম্ . মন্ত্রেণ ন্যাসঃ .
নামরূপাত্মকং সর্বং যস্যামাবেশ্য তাং পুনঃ .
ধ্যাযন্তি ব্রহ্মরূপৈকা সা মাং পাতু সরস্বতী .. ঐং অম্বিতমে
নদীতমে দেবিতমে সরস্বতী . অপ্রশস্তা ইব স্মসি প্রশস্তিমম্ব
নস্কৃধি .. ১০..
চতুর্মুখমুখাম্ভোজবনহংসবধূর্মম .
মানসে রমতাং নিত্যং সর্বশুক্লা সরস্বতী .. ১..
নমস্তে শারদে দেবি কাশ্মীরপুরবাসিনি .
ত্বামহং প্রার্থযে নিত্যং বিদ্যাদানং চ দেহি মে .. ২..
অক্ষসূত্রাঙ্কুশধরা পাশপুস্তকধারিণী .
মুক্তাহারসমাযুক্তা বাচি তিষ্ঠতু মে সদা .. ৩..
কম্বুকণ্ঠী সুতাম্রোষ্ঠী সর্বাভরণভূষিতা .
মহাসরস্বতী দেবী জিহ্বাগ্রে সংনিবিশ্যতাম্ .. ৪..
যা শ্রদ্ধা ধারণা মেধা বাগ্দেবী বিধিবল্লভা .
ভক্তজিহ্বাগ্রসদনা শমাদিগুণদাযিনী .. ৫..
নমামি যামিনীনাথলেখালঙ্কৃতকুন্তলাম্ .
ভবানীং ভবসন্তাপনির্বাপণসুধানদীম্ .. ৬..
যঃ কবিত্বং নিরাতঙ্কং ভুক্তিমুক্তী চ বাঞ্ছতি .
সোঽভৈর্চ্যৈনাং দশশ্লোক্যা নিত্যং স্তৌতি সরস্বতীম্ .. ৭..
তস্যৈবং স্তুবতো নিত্যং সমভ্যর্চ্য সরস্বতীম্ .
ভক্তিশ্রদ্ধাভিযুক্তস্য ষণ্মাসাত্প্রত্যযো ভবেত্ .. ৮..
ততঃ প্রবর্ততে বাণী স্বেচ্ছযা ললিতাক্ষরা .
গদ্যপদ্যাত্মকৈঃ শব্দৈরপ্রমেযৈর্বিবক্ষিতৈঃ .. ৯..
অশ্রুতো বুধ্যতে গ্রন্থঃ প্রাযঃ সারস্বতঃ কবিঃ .
ইত্যেবং নিশ্চযং বিপ্রাঃ সা হোবাচ সরস্বতী .. ১০..
আত্মবিদ্যা মযা লব্ধ্বা ব্রহ্মণৈব সনাতনী .
ব্রহ্মত্বং মে সদা নিত্যং সচ্চিদানন্দরূপতঃ .. ১১..
প্রকৃতিত্বং ততঃ সৃষ্টং সত্ত্বাদিগুণসাম্যতঃ .
সত্যমাভাতি চিচ্ছাযা দর্পণে প্রতিবিম্ববত্ .. ১২..
তেন চিত্প্রতিবিম্বেন ত্রিবিধা ভাতি সা পুনঃ .
প্রকৃত্যবচ্ছিন্নতযা পুরুষত্বং পুনশ্চ তে .. ১৩..
শুদ্ধসত্ত্বপ্রধানাযাং মাযাযাং বিম্বিতো হ্যজঃ .
সত্ত্বপ্রধানা প্রকৃতির্মাযেতি প্রতিপাদ্যতে .. ১৪..
সা মাযা স্ববশোপাধিঃ সর্বজ্ঞস্যেশ্বরস্য হি .
বশ্যমাযত্বমেকত্বং সর্বজ্ঞত্বং চ তস্য তু .. ১৫..
সাত্বিকত্বাত্সমষ্টিত্বাত্সাক্ষিত্বাজ্জগতামপি .
জগত্কর্তুমকর্তুং বা চান্যথা কর্তুমীশতে .. ১৬..
যঃ স ঈশ্বর ইত্যুক্তঃ সর্বজ্ঞত্বাদিভির্গুণৈঃ .
শক্তিদ্বযং হি মাযাযা বিক্ষেপাবৃতিরূপকম্ .. ১৭..
বিক্ষেপশক্তির্লিঙ্গাদিব্রহ্মাণ্ডান্তং জগত্সৃজেত্ .
অন্তর্দৃগ্দৃশ্যযোর্ভেদং বহিশ্চ ব্রহ্মসর্গযোঃ .. ১৮..
আবৃণোত্যপরা শক্তিঃ সা সংসারস্য কারণম্ .
সাক্ষিণঃ পুরতো ভাতং লিঙ্গদেহেন সংযুতম্ .. ১৯..
চিতিচ্ছাযাসমাবেশাজ্জীবঃ স্যাদ্ব্যাবহারিকঃ .
অস্য জীবত্বমারোপাত্সাক্ষিণ্যপ্যবভাসতে .. ২০..
আবৃতৌ তু বিনষ্টাযাং ভেদে ভাতেঽপযাতি তত্ .
তথা সর্গব্রহ্মণোশ্চ ভেদমাবৃত্য তিষ্ঠতি .. ২১..
যা শক্তিস্ত্বদ্বশাদ্ব্রহ্ম বিকৃতত্বেন ভাসতে .
অত্রাপ্যাবৃতিনাশেন বিভাতি ব্রহ্মসর্গযোঃ .. ২২..
ভেদস্তযোর্বিকারঃ স্যাত্সর্গে ন ব্রহ্মণি ক্বচিত্ .
অস্তি ভাতি প্রিযং রূপং নাম চেত্যংশপঞ্চকম্ .. ২৩..
আদ্যত্রযং ব্রহ্মরূপং জগদ্রূপং ততো দ্বযম্ .
অপেক্ষ্য নামরূপদ্বে সচ্চিদানন্দতত্পরঃ .. ২৪..
সমাধিং সর্বদা কুর্যাধৃদযে বাথ বা বহিঃ .
সবিকল্পো নির্বিকল্পঃ সমাধির্দ্বিবিধো হৃদি .. ২৫..
দৃশ্যশব্দানুভেদেন স বিকল্পঃ পুনর্দ্বিধা .
কামাদ্যাশ্চিত্তগা দৃশ্যাস্তত্সাক্ষিত্বেন চেতনম্ .. ২৬..
ধ্যাযদ্দৃশ্যানুবিদ্ধোঽযং সমাধিঃ সবিকল্পকঃ .
স্বানুভূতিরসাবেশাদ্দৃশ্যশব্দাদ্যপেক্ষিতুঃ .. ২৮..
নির্বিকল্পঃ সমাধিঃ স্যান্নিবান্তস্থিতদীপবত্ .
হৃদীব বাহ্যদেশেঽপি যস্মিন্কস্মিংশ্চ বস্তুনি .. ২৯..
সমাধিরাদ্যসন্মাত্রান্নামরূপপৃথক্কৃতিঃ .
স্তব্ধীভাবো রসাস্বাদাত্তৃতীযঃ পূর্ববন্মতঃ .. ৩০..
এতৈঃ সমাধিভিঃ ষড্ভির্নযেত্কালং নিরন্তরম্ .
দেহাভিমানে গলিতে বিজ্ঞাতে পরমাত্মনি .
যত্র যত্র মনো যাতি তত্র তত্র পরামৃতম্ .. ৩১..
ভিদ্যতে হৃদযগ্রন্থিশ্ছিদ্যন্তে সর্বসংশযাঃ .
ক্ষীযন্তে চাস্য কর্মাণি তস্মিন্দৃষ্টে পরাবরে .. ৩২..
মযি জীবত্বমীশত্বং কল্পিতং বস্তুতো নহি .
ইতি যস্তু বিজানাতি স মুক্তো নাত্র সংশযঃ .. ৩৩..
ইত্যুপনিষত্ ..
ॐ বাঙ্মে মনসি প্রতিষ্ঠিতা মনো মে বাচি প্রতিষ্ঠিত-
মাবিরাবীর্ম এধি .. বেদস্য ম আণীস্থঃ শ্রুতং মে মা
প্রহাসীরনেনাধীতেনাহোরাত্রান্সন্দধামি ঋতং বদিষ্যামি
সত্যং বদিষ্যামি তন্মামবতু তদ্বক্তারমবত্ববতু মামবতু
বক্তারমবতু বক্তারম্ .. ॐ শান্তিঃ শান্তিঃ শান্তিঃ ..
ইতি সরস্বতীরহস্যোপনিষত্সমাপ্তা ..