সংন্যাস

.. সংন্যাসোপনিষত্..

সংন্যাসোপনিষদ্বেদ্যং সংন্যাসিপটলাশ্রযম্ .
সত্তাসামান্যবিভবং স্বমাত্রমিতি ভাবযে ..
ॐ আপ্যাযন্তু মামাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাং মা মা ব্রহ্ম নিরাকরোদনিরাকরণ-
মস্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু . ॐ শান্তিঃ শান্তিঃ শান্তিঃ ..
হরিঃ ॐ অথাতঃ সংন্যাসোপনিষদং ব্যাখ্যাস্যামো
যোঽনুক্রমেণ সংন্যস্যতি স সংন্যস্তো ভবতি . কোঽযং সংন্যাস
উচ্যতে কথং সংন্যস্তো ভবতি . য আত্মানং ক্রিযাভির্গুপ্তং করোতি
মাতরং পিতরং ভার্যাং পুত্রান্বন্ধূননুমোদযিত্বা যে
চাস্যর্ত্বিজস্তান্সর্বাংশ্চ পূর্ববত্প্রাণিত্বা বৈশ্বানরেষ্টিং
নির্বপেত্সর্বস্বং দদ্যাদ্যজমানস্য গা ঋত্বিজঃ সর্বৈঃ পাত্রৈঃ
সমারোপ্য যদাহবনীযে গার্হপত্যে বান্বহার্যপচনে
সভ্যাবসথ্যোশ্চ প্রাণাপানব্যানোদানসমানান্সর্বান্সর্বেষু
সমারোপযেত্ . সশিখান্কেশান্বিসৃজ্য যজ্ঞোপবীতং ছিত্ত্বা পুত্রং
দৃষ্ট্বা ত্বং যজ্ঞস্ত্বং সর্বমিত্যনুমন্ত্রযেত্ .
যদ্যপুত্রো ভবত্যাত্মানমেবেমং ধ্যাত্বাঽনবেক্ষমাণঃ
প্রাচীমুদীচিং বা দিশং প্রব্রজেচ্চ . ত্রিষু বর্ণেষু
ভিক্ষাচর্যং চরেত্ . পাণিপাত্রেণানাশনং কুর্যাত্ .
ঔষধবদহনমাচরেত্ . ঔষধবদশনং প্রাশ্নীযাত্ .
যথালাভমশ্নীযাত্প্রাণসন্ধারণার্থং যথা মেদোবৃদ্ধির্ন
জাযতে . কৃশো ভূত্বা গ্রাম একরাত্রং নগরে পঞ্চরাত্রং
চতুরোমাসান্বার্ষিকান্গ্রামে বা নগরে বাপি বসেত্ .
বিশীর্ণবস্ত্রং বল্কলং বা প্রতিগৃহ্ণীযানান্যত্প্রতিগৃহ্ণীযাদ্যদ্যশক্তো
ভবতি ক্লেশতস্তপ্যতে তপ ইতি . যো বা এবং ক্রমেণ সংন্যস্যতি যো বা
এবং পশ্যতি কিমস্য যজ্ঞোপবীতং কাস্য শিখা কথং বাস্যোপস্পর্শনমিতি .
তং হোবাচেদমেবাস্য তদ্যজ্ঞোপবীতং যদাত্মধ্যানং বিদ্যা শিখা
নীরৈঃ সর্বত্রাবস্থিতৈঃ কার্যং নির্বর্তযন্নুদরপাত্রেণ জলতীরে নিকেতনম্ .
ব্রহ্মবাদিনো বদন্ত্যস্তমিত আদিত্যে কথং বাস্যোপস্পর্শনমিতি .
তান্হোবাচ যথাহনি তথা রাত্রৌ নাস্য নক্তং ন দিবা তদপ্যেতদৃষিণোক্তম্ .
সংকৃদ্দিবা হৈবাস্মৈ ভবতি য এবংবিদ্বানেতেনাত্মানং সংধত্তে ..
ইতি প্রথমোঽধ্যাযঃ .. ১..
ॐ চত্বারিংষত্সংস্কারসংপন্নঃ সর্বতো
বিরক্তশ্চিত্তশুদ্ধিমেত্যাশাসূযের্ষ্যাহংকারং
দগ্ধ্বা সাধনচতুষ্টযসংপন্ন এব সংন্যস্তুমর্হতি .
সংন্যাসং নিশ্চযং কৃত্বা পুনর্ন চ করোতি যঃ .
স কুর্যাত্কৃচ্ছ্রমাত্রং তু পুনঃ সংন্যস্তুমর্হতি ., ১..
সংন্যাসং পাতযেদ্যস্তু পতিতং ন্যাসযেত্তু যঃ .
সংন্যাসবিঘ্নকর্তা চ ত্রীনেতান্পতিতান্বিদুঃ .. ২.. ইতি..
অথ ষণ্ডঃ পতিতোঽঙ্গবিকলঃ স্ত্রৈণো বধিরোঽর্ভকো মূকঃ
পাষণ্ডশ্চক্রী লিঙ্গী কুষ্ঠী বৈখানসহরদ্বিজৌ
ভৃতকাধ্যাপকঃ শিপিবিষ্টোঽনগ্নিকো নাস্তিকো বৈরাগ্যবন্তোঽপ্যেতে
ন সংন্যাসার্হাঃ . সংন্যস্তা যদ্যপি মহাবাক্যোপদেশে নাধিকারিণঃ ..
আরূঢপতিতাপত্যং কুনখী শ্যাবদন্তকঃ .
ক্ষীবস্তথাঙ্গবিকলো নৈব সংন্যস্তুমর্হতি .. ৩..
সংপ্রত্যবসিতানাং চ মহাপাতকিনাং তথা .
ব্রাত্যানামভিশস্তানাং সংন্যাসং ন কারযেত্ .. ৪..
ব্রতযজ্ঞতপোদানহোমস্বাধ্যাযবর্জিতম্ .
সত্যশৌচপরিভ্রষ্টং সংন্যাসং ন কারযেত্ .. ৫..
এতে নার্হন্তি সংন্যাসমাতুরেণ বিনা ক্রমম্ .
ॐ ভূঃ স্বাহেতি শিখামুত্পাট্য যজ্ঞোপবীতং
বহির্ন নিবসেত্ . যশো বলং জ্ঞানং বৈরাগ্যং
মেধাং প্রযচ্ছেতি যজ্ঞোপবীতং ছিত্ত্বা ॐ ভূঃ
স্বাহেত্যপ্সু বস্ত্রং কটিসূযং চ বিসৃজ্য সংন্যস্তং
মযেতি ত্রিবারমভিমন্ত্রযেত্ .
সংন্যাসিনং দ্বিজং দৃষ্ট্বা স্থানাচ্চলতি ভাস্করঃ .
এষ মে মণ্ডলং ভিত্ত্বা পরং ব্রহ্মাধিগচ্ছতি .. ৬..
ষষ্টিং কুলান্যতীতানি ষষ্টিমাগামিকানি চ .
কুলান্যুদ্ধরতে প্রাজ্ঞঃ সংন্যস্তমিতি যো বদেত্ .. ৭..
যে চ সন্তানজা দোষা যে দোষা দেহসংভবাঃ .
প্রৈষাগ্নির্নির্দহেত্সর্বাংস্তুষারিন্নিব কাঞ্চনম্ .. ৮..
সখা মা গোপাযেতি দণ্ডং পরিগ্রহেত্ .
দণ্ডং তু বাণবং সৌম্যং সত্বচং সমপর্বকম্ .
পুণ্যস্থলসমুত্পন্নং নানাকল্মষশোধিতম্ .. ৯..
অদগ্ধমহতং কীটৈঃ পর্বগ্রন্থিবিরাজিতম্ .
নাসাদঘ্নং শিরস্তুল্যং ভ্রুবোর্বা বিভৃযাদ্যতিঃ .. ১০..
দণ্ডাত্মনোস্তু সংযোগঃ সর্বথা তু বিধীযতে .
ন দণ্ডেন বিনা গচ্ছেদিষুক্ষেপত্রযং বুধঃ .. ১১..
জগজ্জীবনং জীবনাধারভূতং মাতে মামন্ত্রযস্ব সর্বসৌম্যেতি
কমণ্ডলুং পরিগৃহ্য যোগপট্টাভিষিক্তো ভূত্বা যথাসুখং বিহরেত্ ..
ত্যজ ধর্মমধর্মং চ উভে সত্যানৃতে ত্যজ .
উভে সত্যানৃতে ত্যক্ত্বা যেন ত্যজসি তত্ত্যজ .. ১২..
বৈরাগ্যসংন্যাসী জ্ঞানসংন্যাসী জ্ঞানবৈরাগ্যসংন্যাসী
কর্মসংন্যাসীতি চাতুর্বিধ্যমুপাগতঃ . তদ্যথেতি দৃষ্টানুশ্রবিক-
বিষযবৈতৃষ্ণ্যমেত্য প্রাক্পুণ্যকর্মবিশেষাত্সংন্যস্তঃ
স বৈরাগ্যসংন্যাসী . শাস্ত্রজ্ঞানাত্পাপপুণ্যলোকানুভবশ্রবণা-
ত্প্রপঞ্চোপরতো দেহবাসনাং শাস্ত্রবাসনাং লোকবাসনাং ত্যক্ত্বা
বমনান্নমিব প্রবৃত্তিং সর্বং হেযং মত্বা সাধনচতুষ্টযসংপন্নো
যঃ সংন্যস্যতি স এব জ্ঞানসংন্যাসী . ক্রমেণ সর্বমভ্যস্য সর্বমনুভূয
জ্ঞানবৈরাগ্যাভ্যাং স্বরূপানুসন্ধানেন দেহমাত্রাবশিষ্টঃ সংন্যস্য
জাতরূপধরো ভবতি স জ্ঞানবৈরাগ্যসংন্যাসী . ব্রহ্মচর্যং সমাপ্য
গৃহী ভূত্বা বানপ্রস্থাশ্রমমেত্য বৈরাগ্যাভাবেঽপ্যাশ্রমক্রমানুসারেণ
যঃ সংন্যস্যতি স কর্মসংন্যাসী . স সংন্যাসঃ ষড্বিধো ভবতি
কুটীচকবহূদকহংসপরমহংসতুরীযাতীতাবধূতাশ্চেতি . কুটীচকঃ
শিখাযজ্ঞোপবীতি দণ্ডকমণ্ডলুধরঃ কৌপীনশাটীকন্থাধরঃ
পিতৃমাতৃগুর্বারাধনপরঃ পিঠরখনিত্রশিক্যাদিমাত্রসাধনপর
একত্রান্নাদনপরঃ শ্বেতোর্ধ্বপুণ্ড্রধারী ত্রিদণ্ডঃ . বহূদকঃ শিখাদিকন্থাধর-
স্ত্রিপুণ্ড্রধারী কুটীচকবত্সর্বসমো মধুকরবৃত্ত্যাষ্টকবলাশী .
হংসো জটাধারী ত্রিপুণ্ড্রোর্ধ্বপুণ্ড্রধারী অসংক্লৃপ্তমাধূকরান্নাশী
কৌপীনখণ্ডতুণ্ডধারী . পরমহংসঃ শিখাযজ্ঞোপবীতরহিতঃ পঞ্চগৃহেষু
করপাত্রী এককৌপীনধারী শাটীমেকামেকং বৈণবং দণ্ডমেকশাটীধরো বা
ভস্মোদ্ধৃলনপরঃ সর্বত্যাগী তুরীযাতীতো গোমুখবৃত্ত্যা ফলাহারী অন্নাহারী
চেদ্গৃহত্রযে দেহমাত্রাবশিষ্টো দিগংবরঃ কুণপবচ্ছরীন্বৃত্তিকঃ .
অবধূতস্ত্বনিযমঃ পতিতাভিশস্তবর্জনপূর্বকং সর্ববর্ণেষ্বজগরবৃত্ত্যাহারপরঃ স্বরূপানুসন্ধানপরঃ .
জগত্তাবদিদং নাহং সবৃক্ষতৃণপর্বতম্ . যদ্বাহ্যং
জডমত্যন্তং তত্স্যাং কথমহং বিভুঃ .. ১৩..
কালেনাল্পেন বিলযী দেহো নাহমচেতনঃ .
জডযা কর্ণশষ্কুল্যা কল্পমানক্ষণস্থযা .. ১৪..
শূন্যাকৃতিঃ শূন্যভবঃ শব্দো নাহমচেতনঃ .
ত্বচা ক্ষণবিনাশিন্যা প্রাপ্যোঽপ্রাপ্যোঽযমন্যথা .. ১৫..
চিত্প্রসাদোপলব্ধাত্মা স্পর্শো নাহমচেতনঃ .
লব্ধাত্মা জিহ্বযা তুচ্ছো লোলযা লোলসত্তযা .. ১৬..
স্বল্পস্যন্দো দ্রব্যনিষ্ঠো রসো নাহমচেতনঃ .
দৃশ্যদর্শনযোর্লীনং ক্ষযিক্ষণবিনাশিনোঃ .. ১৭..
কেবলে দ্রষ্টরি ক্ষীণং রূপং নাহমচেতনম্ .
নাসযা গন্ধজডযা ক্ষযিণ্যা পরিকল্পিতঃ .. ১৮..
পেলবো নিযতাকারো গন্ধো নাহমচেতনঃ .
নির্মমোঽমননঃ শান্তো গতপঞ্চেন্দ্রিযভ্রমঃ .. ১৯..
শুদ্ধচেতন এবাহং কলাকলনবর্জিতঃ .
চৈত্যবর্জিতচিন্মাত্রমহমেষোঽবভাসকঃ .. ২০..
সবাহ্যাভ্যন্তরব্যাপী নিষ্কলোঽহং নিরঞ্জনঃ .
নির্বিকল্পচিদাভাস এক আত্মাস্মি সর্বগঃ .. ২১..
মযৈব চেতনেনেমে সর্বে ঘটপটাদযঃ .
সূর্যান্তা অবভাস্যন্তে দীপেনেবাত্মতেজসা .. ২২..
মযৈবৈতাঃ স্ফুরন্তীহ বিচিত্রেন্দ্রিযবৃত্তযঃ .
তেজসান্তঃপ্রকাশেন যথাগ্নিকণপঙ্ক্তযঃ .. ২৩..
অনন্তানন্দসংভোগা পরোপশমশালিনী .
শুদ্ধেযং চিন্মযী দৃষ্টির্জযত্যখিলদৃষ্টিষু .. ২৪..
সর্বভাবান্তরস্থায চৈত্যমুক্তচিদাত্মনে .
প্রত্যক্চৈতন্যরূপায মহ্যমেব নমো নমঃ .. ২৫..
বিচিত্রাঃ শক্তযঃ স্বচ্ছাঃ সমা যা নির্বিকারযা .
চিতা ক্রিযন্তে সমযা কলাকলনমুক্তযা .. ২৬..
কালত্রযমুপেক্ষিত্র্যা হীনাযাশ্চৈত্যবন্ধনৈঃ .
চিতশ্চৈত্যমুপেক্ষিত্র্যাঃ সমতৈবাবশিষ্যতে .. ২৭..
সা হি বাচামগম্যত্বাদসত্তামিব শাশ্বতীম্ .
নৈরাত্মসিদ্ধাত্মদশামুপযাতৈব শিষ্যতে .. ২৮..
ঈহানীহামযৈরন্তর্যা চিদাবলিতা মলৈঃ .
সা চিন্নোত্পাদিতুং শক্তা পাশবদ্ধেব পক্ষিণী .. ২৯..
ইচ্ছাদ্বেষসমুত্থেন দ্বন্দ্বমোহেন জন্তবঃ .
ধরাবিবরমগ্নানাং কীটানাং সমতাং গতাঃ .. ৩০..
আত্মনেঽস্তু নমো মহ্যমবিচ্ছিন্নচিদাত্মনে .
পরামৃষ্টোঽস্মি লব্ধোঽস্মি প্রোদিতোঽস্ম্যচিরাদহম্ .
উদ্ধৃতোঽস্মি বিকল্পেভ্যো যোঽস্মি সোঽস্মি নমোঽস্তু তে .. ৩১..
তুভ্যং মহ্যমনন্তায মহ্যং তুভ্যং চিদাত্মনে .
নমস্তুভ্যং পরেশায নমো মহ্যং শিবায চ .. ৩২..
তিষ্ঠন্নপি হি নাসীনো গচ্ছন্নপি ন গচ্ছতি .
শান্তোঽপি ব্যবহারস্থঃ কুর্বন্নপি ন লিপ্যতে .. ৩৩..
সুলভশ্চাযমত্যন্তং সুজ্ঞেযশ্চাপ্তবন্ধুবত্ .
শরীরপদ্মকুহরে সর্বেষামেব ষট্পদঃ .. ৩৪..
ন মে ভোগস্থিতৌ বাঞ্ছা ন মে ভোগবিসর্জনে .
যদাযাতি তদাযাতু যত্প্রযাতি প্রযাতু তত্ .. ৩৫..
মনসা মনসি চ্ছিন্নে নিরহংকারং গতে .
ভাবেন গলিতে ভাবে স্বস্থস্তিষ্ঠামি কেবলঃ .. ৩৬..
নির্ভাবং নিরহংকারং নির্মনস্কমনীহিতম্ .
কেবলাস্পন্দশুদ্ধাত্মন্যেব তিষ্ঠতি মে রিপুঃ .. ৩৭..
তৃষ্ণারজ্জুগণং ছিত্বা মচ্ছরীরকপঞ্জরাত্ .
ন জানে ক্ব গতোড্ডীয নিরহংকারপক্ষিণী .. ৩৮..
যস্য নাহংকৃতো ভাবো বুদ্ধির্যস্য ন লিপ্যতে .
যঃ সমঃ সর্বভূতেষু জীবিতং তস্য শোভতে .. ৩৯..
যোঽন্তঃশীতলযা বুদ্ধ্যা রাগদ্বেষবিমুক্তযা .
সাক্ষিবত্পশ্যতীদং হি জীবিতং তস্য শোভতে .. ৪০..
যেন সম্যক্পরিজ্ঞায হেযোপাদেযমুজ্ঝতা .
চিত্তস্যান্তেঽর্পিতং চিত্তং জীবিতং তস্য শোভতে .. ৪১..
গ্রাহ্যগ্রাহকসংবন্ধে ক্ষীণে শান্তিরুদেত্যলম্ .
স্থিতিমভ্যাগতা শান্তির্মোক্ষনামাভিধীযতে .. ৪২..
ভ্রষ্টবীজোপমা ভূযো জন্মাঙ্কুঅরবিবর্জিতা .
হৃদি জীবদ্বিমুক্তানাং শুদ্ধা ভবতি বাসনা .. ৪৩..
পাবনী পরমোদারা শুদ্ধসত্ত্বানুপাতিনী .
আত্মধ্যানমযী নিত্যা সুষুপ্তিস্থেব তিষ্ঠতি .. ৪৪..
চেতনং চিত্তরিক্তং হি প্রত্যক্চেতনমুচ্যতে .
নির্মনস্কস্বভাবত্বান্ন তত্র কলনামলম্ .. ৪৫..
সা সত্যতা সা শিবতা সাবস্থা পারমাত্মিকী .
সর্বজ্ঞতা সা সংতৃপ্তির্নতু যত্র মনঃ ক্ষতম্ .. ৪৬..
প্রলপন্বিসৃজন্গৃহ্ণন্নুন্মিষন্নিমিষন্নপি .
নিরস্তমননানন্দঃ সংবিন্মাত্রপরোঽস্ম্যহম্ .. ৪৭..
মলং সংবেদ্যমুত্সৃজ্য মনো নির্মূলযন্পরম্ .
আশাপাশানলং ছিত্ত্বা সংবিন্মাত্রপরোঽস্ম্যহম্ .. ৪৮..
অশুভাশুভসংকল্পঃ সংশান্তোঽস্মি নিরামযঃ .
নষ্টেষ্টানিষ্টকলনঃ সংমাত্রপরোস্ম্যহম্ .. ৪৯..
আত্মতাপরতে ত্যক্ত্বা নির্বিভাগো জগত্স্থিতৌ .
বজ্রস্তংভবদাত্মানমবলংব্য স্থিরোঽস্ম্যহম্ .. ৫০..
নির্মলাযাং নিরাশাযাং স্বসংবিত্তৌ স্থিতোঽস্ম্যহম্ .
ঈহিতানীহিতৈর্মুক্তো হেযোপাদেযবর্জিতঃ .. ৫১..
কদান্তস্তোষমেষ্যামি স্বপ্রকাশপদে স্থিতঃ .
কদোপশান্তমননো ধরণীধরকন্দরে .. ৫২..
সমেষ্যামি শিলাসাম্যং নির্বিকল্পসমাধিনা .
নিরংশধ্যানবিশ্রান্তিমূকস্য মম মস্তকে .. ৫৩..
কদা তার্ণং করিষ্যন্তি কুলাযং বনপুত্রিকাঃ .
সংকল্পপাদপং তৃষ্ণালতং ছিত্ত্বা মনোবনম্ .. ৫৪..
বিততাং ভুবমাসাদ্য বিহরাভি যথাসুখম্ .
পদং তদনু যাতোঽস্মি কেবলোঽস্মি জযাম্যহম্ .. ৫৫..
নির্বাণোঽস্মি নিরীহোঽস্মি নিরংশোঽস্মি নিরীপ্সিতঃ .
স্বচ্ছতোর্জিততা সত্তা হৃদ্যতা সত্যতা জ্ঞতা .. ৫৬..
আনন্দিতোপশমতা সদা প্রমুদিতোদিতা .
পূর্ণতোদারতা সত্যা কান্তিসত্তা সদৈকতা .. ৫৭..
ইত্যেবং চিন্তযন্ভিক্ষুঃ স্বরূপস্থিতিমঞ্জসা .
নির্বিকল্পস্বরূপজ্ঞো নির্বিকল্পো বভূব হ .. ৫৮..
আতুরো জীবতি চেত্ক্রমসংন্যাসঃ কর্তব্যঃ .
ন শূদ্রস্ত্রীপতিতোদক্যা সংভাষণম্ .
ন যতের্দেবপূজনোত্সবদর্শনম্ .
তস্মান্ন সংন্যাসিন এষ লোকঃ .
আতুরকুটীচকযোর্ভূলোকভুবর্লোকৌ .
বহূদকস্য স্বর্গলোকঃ .
হংসস্য তপোলোকঃ . পরমহংসস্য সত্যলোকঃ .
তুরীযাতীতাবধূতযোঃ স্বাত্মন্যেব কৈবল্যং
স্বরূপানুসন্ধানেন ভ্রমরকীটন্যাযবত্ .
স্বরূপানুসন্ধানব্যতিরিক্তান্যশাস্ত্রাভ্যাস
উষ্ট্রকুংকুমভারবদ্ব্যর্থঃ . ন যোগশাস্ত্রপ্রবৃত্তিঃ .
ন সাংখ্যশাস্ত্রাভ্যাসঃ . ন মন্ত্রতন্ত্রব্যাপারঃ .
নেতরশাস্ত্রপ্রবৃত্তির্যতেরস্তি . অস্তি চেচ্ছবালংকারব-
ত্কর্মাচর বিদ্যাদূরঃ .
ন পরিব্রাণ্নামসংকীর্তনপরো যদ্যত্কর্ম করোতি তত্তত্ফলমনুভবতি .
এরণ্ডতৈলফেনবত্সর্বং পরিত্যজেত্ . ন দেবতাপ্রসাদগ্রহণম্ .
ন বাহ্যদেবাভ্যর্চনং কুর্যাত্ . স্বব্যতিরিক্তং সর্বং ত্যক্ত্বা
মধুকরবৃত্ত্যাহারমাহরন্কৃশীভূত্বা মেদোবৃদ্ধিমকুর্বন্বিহরেত্ .
মাধূকরেণ করপাত্রেণাস্যপাত্রেণ বা কালং নযেত্ .
আত্মসংমিতমাহারমাহরেদাত্মবান্যতিঃ .
আহারস্য চ ভাগৌ দ্বৌ তৃতীযমুদকস্য চ .
বাযোঃ সংচরণার্থায চতুর্থমবশেষযেত্ ..৫৯..
ভৈক্ষেণ বর্তযেন্নিত্যং নৈকান্নাশী ভবেত্ক্বচিত্ .
নিরীক্ষন্তে ত্বনুদ্বিগ্নাস্তদ্গৃহং যত্নতো ব্রজেত্ .. ৬০..
পঞ্চসপ্তগৃহাণাং তু ভিক্ষামিচ্ছেত্ক্রিযাবতাম্ .
গোদোহমাত্রমাকাঙ্ক্ষেন্নিষ্ক্রান্তো ন পুনর্ব্রজেত্ .. ৬১..
নক্তাদ্বরশ্চোপবাস উপবাসাদযাচিতঃ .
অযাচিতাদ্বরং ভৈক্ষ্যং তস্মাত্ভৈক্ষেণ বর্ধযেত্ .. ৬২..
নৈব সব্যাপসব্যেন ভিক্ষাকালে বিশেদ্গৃহান্ .
নাতিক্রামেদ্গৃহং মোহাদ্যত্র দোষো ন বিদ্যতে .. ৬৩..
শ্রোত্রিযান্নং ন ভিক্ষেত শ্রদ্ধাভক্তিবহিষ্কৃতম্ .
ব্রাত্যস্যাপি গৃহে ভিক্ষেচ্ছ্রদ্ধাভক্তিপুরস্কৃতে .. ৬৪..
মাধূকরমসংক্লৃপ্তং প্রাক্প্রণীতমযাচিতম্ .
তাত্কালিকং চোপপন্নং ভৈক্ষং পঞ্চবিধং স্মৃতম্ .. ৬৫..
মনঃসংকল্পরহিতাংস্ত্রীন্গৃহান্পঞ্চ সপ্ত বা .
মধুমক্ষিকবত্কৃত্বা মাধূকরমিতি স্মৃতম্ .. ৬৬..
প্রাতঃকালে চ পূর্বেদ্যুর্যদ্ভক্তৈঃ প্রাথিতং মুহুঃ .
তদ্ভৈক্ষং প্রাক্প্রণীতং স্যাত্স্থিতিং কুর্যাত্তথাপি বা .. ৬৭..
ভিক্ষাটনসমুদ্যোগাদ্যেন কেন নিমন্ত্রিতম্ .
অযাচিতং তু তদ্ভৈক্ষং ভোক্তব্যং চ মুমুক্ষুভিঃ .. ৬৮..
উপস্থানেন যত্প্রোক্তং ভিক্ষার্থং ব্রাহ্মণেন তত্ .
তাত্কালিকমিতি খ্যাতং ভোক্তব্যং যতিভিস্তদা .. ৬৯..
সিদ্ধমন্নং যদানীতং ব্রাহ্মণেন মঠং প্রতি .
উপপন্নমিতি প্রাহুর্মুনযো মোক্ষকাঙ্ক্ষিণঃ .. ৭০..
চরেন্মাধূকরং ভৈক্ষং যতির্ম্লেচ্ছকুলাদপি .
একান্নং নতু ভুঞ্জীত বৃহস্পতিসমাদপি .
যাচিতাযাচিতাভ্যাং চ ভিক্ষাভ্যাং কল্পযেত্স্থিতম্ .. ৭১..
ন বাযুঃ স্পর্শদোষেণ নাগ্নির্দহনকর্মণা .
নাপো মূত্রপুরীষাভ্যাং নান্নদোষেণ মস্করী .. ৭২..
বিধূমে সন্নমুসলে ব্যঙ্গারে ভুক্তবজ্জনে .
কালেঽপরাহ্ণে ভূযিষ্ঠে ভিক্ষাচরণমাচরেত্ .. ৭৩..
অভিশতং চ পতিতং পাপণ্ডং দেবপূজকম্ .
বর্জযিত্বা চরেদ্ভৈক্ষং সর্ববর্ণেষু চাপদি .. ৭৪..
ঘৃতং স্বমূত্রসদৃশং মধু স্যাত্সুরযা সমম্ .
তৈলং সূকরমূত্রং স্যাত্সূপং লশুনসংমিতম্ .. ৭৫..
মাষাপূষাদি গোমাংসং ক্ষীরং মূত্রসমং ভবেত্ .
তস্মাত্সর্বপ্রযত্নেন ঘৃতাদীন্বর্জযেদ্যতিঃ .
ঘৃতসূপাদিসংযুক্তমন্নং নাদ্যাত্কদাচন .. ৭৬..
পাত্রমস্য ভবেত্পাণিস্তেন নিত্যং স্থিতিং নযেত্ .
পাণিপাত্রশ্চরন্যোগী নাসকৃদ্ভৈক্ষমাচরেত্ .. ৭৭..
আস্যেন তু যদাহারং গোবন্মৃগযতে মুনিঃ .
তদা সমঃ স্যাত্সর্বেষু সোঽমৃতত্বায কল্পতে .. ৭৮..
আজ্যং রুধিরমিব ত্যজেদেকত্রান্নং পললমিব
গন্ধলেপনমশুদ্ধলেপনমিব ক্ষারমন্ত্যজমিব
বস্ত্রমুচ্ছিষ্টপাত্রমিবাভ্যঙ্গং স্ত্রীসঙ্গমিব
মিত্রাহ্লাদকং মূত্রমিব স্পৃহাং গোমাংসমিব
জ্ঞাতচরদেশং চণ্ডালবাটিকাদিব স্ত্রিযমহিমিব
সুবর্ণং কালকূটমিব সভাস্থলং শ্মশানস্থলমিব
রাজধানীং কুংভীপাকমিব শবপিণ্ডবদেকত্রান্নং ন
দেবতার্চনম্ . প্রপঞ্চবৃত্তিং পরিত্যয জীবন্মুক্তো ভবেত্ ..
আসনং পাত্রলোপশ্চ সংচযঃ শিষ্যসংচযঃ .
দিবাস্বাপো বৃথালাপো যতের্বন্ধকরাণি ষট্ .. ৭৯..
বর্ষাভ্যোঽন্যত্র যত্স্থানমাসনং তদুদাহৃতম্ .
উত্কালাব্বাদিপাত্রাণামেকস্যাপীহ সংগ্রহঃ .. ৮০..
যতেঃ সংব্যবহরায পাত্রলোপঃ স উচ্যতে .
গৃহীতস্য তু দণ্ডাদের্দ্বিতীযস্য পরিগ্রহঃ .. ৮১..
কালান্তরোপভোগার্থং সংচযঃ পরিকীর্তিতঃ .
শুশ্রূষালাভপূজার্থং যশোর্থং বা পরিগ্রহঃ .. ৮২..
শিষ্যাণাং নতু কারুণ্যাচ্ছিষ্যসংগ্রহ ঈরিতঃ .
বিদ্যা দিবা প্রকাশত্বাদবিদ্যা রাত্রিরুচ্যতে .. ৮৩..
বিদ্যাভ্যাসে প্রমাদো যঃ স দিবাস্বাপ উচ্যতে .
আধ্যাত্মিকীং কথাং মুক্ত্বা ভিক্ষাবার্তাং বিনা তথা .. ৮৪..
অনুগ্রহং পরিপ্রশ্নং বৃথাজল্পোঽন্য উচ্যতে .
একান্নং মদমাত্সর্যং গন্ধপুষ্পবিভূষণম্ .. ৮৫..
তাম্বূলাভ্যঞ্জনে ক্রীডা ভোগাকাঙ্ক্ষা রসাযনম্ .
কত্থনং কুত্সনং স্বস্তি জ্যোতিশ্চ ক্রযবিক্রযম্ .. ৮৬..
ক্রিযাকর্মবিবাদশ্চ গুরুবাক্যবিলঙ্ঘনম্ .
সংধিশ্চ বিগ্রহো যানং মঞ্চকং শুক্লবস্ত্রকম্ .. ৮৭..
শুক্লোত্সর্গো দিবাস্বাপো ভিক্ষাধারস্তু তৈজসম্ .
বিষং চৈবাযুধং বীজং হিংসাং তৈক্ষ্ণ্যং চ মৈথুনম্ .. ৮৮..
ত্যক্তং সংন্যাসযোগেন গৃহধর্মাদিকং ব্রতম্ .
গোত্রাদিচরণং সর্বং পিতৃমাতৃকুলং ধনম্ .
প্রতিষিদ্ধানি চৈতানি সেবমানো ব্রজেদধঃ .. ৮৯..
সুজীর্ণোঽপি সুজীর্ণাসু বিদ্বাংস্ত্রীষু ন বিশ্বসেত্ .
সুজীর্ণাস্বপি কন্থাসু সজ্জতে জীর্ণমম্বরম্ .. ৯০..
স্থাবরং জঙ্গমং বীজং তৈজসং বিষমাযুধম্ .
ষডেতানি ন গৃহ্ণীযাদ্যতির্মূত্রপুরীষবত্ .. ৯১..
নৈবাদদীত পাথেযং যতিঃ কিংচিদনাপদি .
পক্বমাপত্সু গৃণ্হীযাদ্যাবদন্নং ন লভ্যতে .. ৯২..
নীরুজশ্চ যুবা চৈব ভিক্ষুর্নাবসথে বসেত্ .
পরার্থং ন প্রতিগ্রাহ্যং ন দদ্যাচ্চ কথংচন .. ৯৩..
দৈন্যভাবাত্তু ভূতানাং সৌভগায যতিশ্চরেত্ .
পক্বং বা যদি বাঽপক্বং যাচমানো ব্রজেদধঃ .. ৯৪..
অন্নপানপরো ভিক্ষুর্বস্ত্রাদীনাং প্রতিগ্রহী .
আবিকং বানাবিকং বা তথা পট্টপটানপি .. ৯৫..
প্রতিগৃহ্য যতিশ্চৈতান্পতত্যেব ন সংশযঃ .
অদ্বৈতং নাবমাশ্রিত্য জীবন্মুক্তত্বমাপ্নুযাত্ .. ৯৬..
বাগ্দণ্ডে মৌনমাতিষ্টেত্কাযদণ্ডে ত্বভোজনম্ .
মানসে তু কৃতে দণ্ডে প্রাণাযামো বিধীযতে .. ৯৭..
কর্মণা বধ্যতে জন্তুর্বিদ্যযা চ বিমুচ্যতে .
তস্মাত্কর্ম ন কুর্বন্তি যতযঃ পারদর্শিনঃ .. ৯৮..
রথ্যাযাং বহুবস্ত্রাণি ভিক্ষা সর্বত্র লভ্যতে .
ভূমিঃ শয্যাস্তি বিস্তীর্ণা যতযঃ কেন দুঃখিতঃ .. ৯৯..
প্রপঞ্চমখিলং যস্তু জ্ঞানাগ্নৌ জুহুযাদ্যতিঃ .
আত্মন্যগ্নীন্সমারোপ্য সোঽগ্নিহোত্রী মহাযতিঃ .. ১০০..
প্রবৃত্তির্দ্বিবিধা প্রোক্তা মার্জারী চৈব বানরী .
জ্ঞানাভ্যাসবতামোতুর্বানরীভাক্ত্বমেব চ .. ১০১..
নাপৃষ্টঃ কস্যচিদ্ব্রূযান্ন চান্যাযেন পৃচ্ছতঃ .
জানন্নপি হি মেধাবী জডবল্লোকমাচরেত্ .. ১০২..
সর্বেষামেব পাপানাং সঙ্ঘাতে সমুপস্থিতে .
তারং দ্বাদশসাহস্রমভ্যসেচ্ছেদনং হি তত্ .. ১০৩..
যস্তু দ্বাদশসাহস্রং প্রণবং জপতেঽন্বহম্ .
তস্য দ্বাদশভির্মাসৈঃ পরং ব্রহ্ম প্রকাশতে.. ১০৪..
ইত্যুপনিষত্ হরিঃ ॐ তত্সত্ .. ইতি দ্বিতীযোঽধ্যাযঃ .. ২..
ॐ আপ্যাযন্তু মামাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাং মা মা ব্রহ্ম নিরাকরোদনিরাকরণ-
মস্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু . ॐ শান্তিঃ শান্তিঃ শান্তিঃ ..
ইতি সংন্যাসোপনিষত্সমাপ্তা ..