শ্বেতস্বতর

.. শ্বেতাশ্বতরোপনিষত্ ..

ॐ সহনাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু . মা বিদ্বিষাবহৈ ..
ॐ শান্তিঃ শান্তিঃ শান্তিঃ ..

প্রথমোঽধ্যাযঃ .

হরিঃ ॐ .. ব্রহ্মবাদিনো বদন্তি .

কিং কারণং ব্রহ্ম কুতঃ স্ম জাতা
জীবাম কেন ক্ব চ সংপ্রতিষ্ঠা .
অধিষ্ঠিতাঃ কেন সুখেতরেষু
বর্তামহে ব্রহ্মবিদো ব্যবস্থাম্ .. ১..

কালঃ স্বভাবো নিযতির্যদৃচ্ছা
ভূতানি যোনিঃ পুরুষ ইতি চিন্ত্যা .
সংযোগ এষাং ন ত্বাত্মভাবা-
দাত্মাপ্যনীশঃ সুখদুঃখহেতোঃ .. ২..

তে ধ্যানযোগানুগতা অপশ্যন্
দেবাত্মশক্তিং স্বগুণৈর্নিগূঢাম্ .
যঃ কারণানি নিখিলানি তানি
কালাত্মযুক্তান্যধিতিষ্ঠত্যেকঃ .. ৩..

তমেকনেমিং ত্রিবৃতং ষোডশান্তং
শতার্ধারং বিংশতিপ্রত্যরাভিঃ .
অষ্টকৈঃ ষড্ভির্বিশ্বরূপৈকপাশং
ত্রিমার্গভেদং দ্বিনিমিত্তৈকমোহম্ .. ৪..

পঞ্চস্রোতোম্বুং পঞ্চযোন্যুগ্রবক্রাং
পঞ্চপ্রাণোর্মিং পঞ্চবুদ্ধ্যাদিমূলাম্ .
পঞ্চাবর্তাং পঞ্চদুঃখৌঘবেগাং
পঞ্চাশদ্ভেদাং পঞ্চপর্বামধীমঃ .. ৫..

সর্বাজীবে সর্বসংস্থে বৃহন্তে
অস্মিন্ হংসো ভ্রাম্যতে ব্রহ্মচক্রে .
পৃথগাত্মানং প্রেরিতারং চ মত্বা
জুষ্টস্ততস্তেনামৃতত্বমেতি .. ৬..

উদ্গীতমেতত্পরমং তু ব্রহ্ম
তস্মিংস্ত্রযং সুপ্রতিষ্ঠাঽক্ষরং চ .
অত্রান্তরং ব্রহ্মবিদো বিদিত্বা
লীনা ব্রহ্মণি তত্পরা যোনিমুক্তাঃ .. ৭..

সংযুক্তমেতত্ ক্ষরমক্ষরং চ
ব্যক্তাব্যক্তং ভরতে বিশ্বমীশঃ .
অনীশশ্চাত্মা বধ্যতে ভোক্তৃ-
ভাবাজ্ জ্ঞাত্বা দেবং মুচ্যতে সর্বপাশৈঃ .. ৮..

জ্ঞাজ্ঞৌ দ্বাবজাবীশনীশাবজা
হ্যেকা ভোক্তৃভোগ্যার্থযুক্তা .
অনন্তশ্চাত্মা বিশ্বরূপো হ্যকর্তা
ত্রযং যদা বিন্দতে ব্রহ্মমেতত্ .. ৯..

ক্ষরং প্রধানমমৃতাক্ষরং হরঃ
ক্ষরাত্মানাবীশতে দেব একঃ .
তস্যাভিধ্যানাদ্যোজনাত্তত্ত্ব-
ভাবাত্ ভূযশ্চান্তে বিশ্বমাযানিবৃত্তিঃ .. ১০..

জ্ঞাত্বা দেবং সর্বপাশাপহানিঃ
ক্ষীণৈঃ বলেশের্জন্মমৃত্যুপ্রহাণিঃ .
তস্যাভিধ্যানাত্তৃতীযং দেহভেদে
বিশ্বৈশ্বর্যং কেবল আপ্তকামঃ .. ১১..

এতজ্জ্ঞেযং নিত্যমেবাত্মসংস্থং
নাতঃ পরং বেদিতব্যং হি কিঞ্চিত্ .
ভোক্তা ভোগ্যং প্রেরিতারং চ মত্বা
সর্বং প্রোক্তং ত্রিবিধং ব্রহ্মমেতত্ .. ১২..

বহ্নের্যথা যোনিগতস্য মূর্তিনর্
দৃশ্যতে নৈব চ লিঙ্গনাশঃ .
স ভূয এবেন্ধনযোনিগৃহ্য-
স্তদ্বোভযং বৈ প্রণবেন দেহে .. ১৩..

স্বদেহমরণিং কৃত্বা প্রণবং চোত্তরারণিম্ .
ধ্যাননির্মথনাভ্যাসাদেবং পশ্যন্নিগূঢবত্ .. ১৪..

তিলেষু তৈলং দধিনীব সর্পি-
রাপঃ স্রোতঃস্বরণীষু চাগ্নিঃ .
এবমাত্মাঽত্মনি গৃহ্যতেঽসৌ
সত্যেনৈনং তপসাযোঽনুপশ্যতি .. ১৫..

সর্বব্যাপিনমাত্মানং ক্ষীরে সর্পিরিবার্পিতম্ .
আত্মবিদ্যাতপোমূলং তদ্ব্রহ্মোপনিষত্ পরম্ .. ১৬..

দ্বিতীযোঽধ্যাযঃ .

যুঞ্জানঃ প্রথমং মনস্তত্ত্বায সবিতা ধিযঃ .
অগ্নের্জ্যোতির্নিচায্য পৃথিব্যা অধ্যাভরত্ .. ১..

যুক্তেন মনসা বযং দেবস্য সবিতুঃ সবে .
সুবর্গেযায শক্ত্যা .. ২..

যুক্ত্বায মনসা দেবান্ সুবর্যতো ধিযা দিবম্ .
বৃহজ্জ্যোতিঃ করিষ্যতঃ সবিতা প্রসুবাতি তান্ .. ৩..

যুঞ্জতে মন উত যুঞ্জতে ধিযো
বিপ্রা বিপ্রস্য বৃহতো বিপশ্চিতঃ .
বি হোত্রা দধে বযুনাবিদেক
ইন্মহী দেবস্য সবিতুঃ পরিষ্টুতিঃ .. ৪..

যুজে বাং ব্রহ্ম পূর্ব্যং নমোভির্বিশ্লোক
এতু পথ্যেব সূরেঃ .
শৃণ্বন্তু বিশ্বে অমৃতস্য পুত্রা আ যে
ধামানি দিব্যানি তস্থুঃ .. ৫..

অগ্নির্যত্রাভিমথ্যতে বাযুর্যত্রাধিরুধ্যতে .
সোমো যত্রাতিরিচ্যতে তত্র সঞ্জাযতে মনঃ .. ৬..

সবিত্রা প্রসবেন জুষেত ব্রহ্ম পূর্ব্যম্ .
যত্র যোনিং কৃণবসে ন হি তে পূর্তমক্ষিপত্ .. ৭..

ত্রিরুন্নতং স্থাপ্য সমং শরীরং
হৃদীন্দ্রিযাণি মনসা সন্নিবেশ্য .
ব্রহ্মোডুপেন প্রতরেত বিদ্বান্
স্রোতাংসি সর্বাণি ভযানকানি .. ৮..

প্রাণান্ প্রপীড্যেহ সংযুক্তচেষ্টঃ
ক্ষীণে প্রাণে নাসিকযোচ্ছ্বসীত .
দুষ্টাশ্বযুক্তমিব বাহমেনং
বিদ্বান্ মনো ধারযেতাপ্রমত্তঃ .. ৯..

সমে শুচৌ শর্করাবহ্নিবালিকা-
বিবর্জিতে শব্দজলাশ্রযাদিভিঃ .
মনোনুকূলে ন তু চক্ষুপীডনে
গুহানিবাতাশ্রযণে প্রযোজযেত্ .. ১০..

নীহারধূমার্কানিলানলানাং
খদ্যোতবিদ্যুত্স্ফটিকশশীনাম্ .
এতানি রূপাণি পুরঃসরাণি
ব্রহ্মণ্যভিব্যক্তিকরাণি যোগে .. ১১..

পৃথিব্যপ্তেজোঽনিলখে সমুত্থিতে
পঞ্চাত্মকে যোগগুণে প্রবৃত্তে .
ন তস্য রোগো ন জরা ন মৃত্যুঃ
প্রাপ্তস্য যোগাগ্নিমযং শরীরম্ .. ১২..

লঘুত্বমারোগ্যমলোলুপত্বং
বর্ণপ্রসাদঃ স্বরসৌষ্ঠবং চ .
গন্ধঃ শুভো মূত্রপুরীষমল্পং
যোগপ্রবৃত্তিং প্রথমাং বদন্তি .. ১৩..

যথৈব বিংবং মৃদযোপলিপ্তং
তেজোমযং ভ্রাজতে তত্ সুধান্তম্ .
তদ্বাঽঽত্মতত্ত্বং প্রসমীক্ষ্য দেহী
একঃ কৃতার্থো ভবতে বীতশোকঃ .. ১৪..

যদাত্মতত্ত্বেন তু ব্রহ্মতত্ত্বং
দীপোপমেনেহ যুক্তঃ প্রপশ্যেত্ .
অজং ধ্রুবং সর্বতত্ত্বৈর্বিশুদ্ধং
জ্ঞাত্বা দেবং মুচ্যতে সর্বপাপৈঃ .. ১৫..

এষো হ দেবঃ প্রদিশোঽনু সর্বাঃ .
পূর্বো হ জাতঃ স উ গর্ভে অন্তঃ .
স এব জাতঃ স জনিষ্যমাণঃ
প্রত্যঙ্ জনাস্তিষ্ঠতি সর্বতোমুখঃ .. ১৬..

যো দেবো অগ্নৌ যোঽপ্সু
যো বিশ্বং ভুবনমাবিবেশ .
য ওষধীষু যো বনস্পতিষু
তস্মৈ দেবায নমো নমঃ .. ১৭..

তৃতীযোঽধ্যাযঃ .

য একো জালবানীশত ঈশনীভিঃ
সর্বাংল্লোকানীশত ঈশনীভিঃ .
য এবৈক উদ্ভবে সম্ভবে চ
য এতদ্ বিদুরমৃতাস্তে ভবন্তি .. ১..

একো হি রুদ্রো ন দ্বিতীযায তস্থু-
র্য ইমাংল্লোকানীশত ঈশনীভিঃ .
প্রত্যঙ্ জনাস্তিষ্ঠতি সঞ্চুকোচান্তকালে
সংসৃজ্য বিশ্বা ভুবনানি গোপাঃ .. ২..

বিশ্বতশ্চক্ষুরুত বিশ্বতোমুখো
বিশ্বতোবাহুরুত বিশ্বতস্পাত্ .
সং বাহুভ্যাং ধমতি সংপতত্রৈ-
র্দ্যাবাভূমী জনযন্ দেব একঃ .. ৩..

যো দেবানাং প্রভবশ্চোদ্ভবশ্চ
বিশ্বাধিপো রুদ্রো মহর্ষিঃ .
হিরণ্যগর্ভং জনযামাস পূর্বং
স নো বুদ্ধ্যা শুভযা সংযুনক্তু .. ৪..

যা তে রুদ্র শিবা তনূরঘোরাঽপাপকাশিনী .
তযা নস্তনুবা শন্তমযা গিরিশন্তাভিচাকশীহি .. ৫..

যাভিষুং গিরিশন্ত হস্তে বিভর্ষ্যস্তবে .
শিবাং গিরিত্র তাং কুরু মা হিংসীঃ পুরুষং জগত্ .. ৬..

ততঃ পরং ব্রহ্ম পরং বৃহন্তং
যথানিকাযং সর্বভূতেষু গূঢম্ .
বিশ্বস্যৈকং পরিবেষ্টিতার-
মীশং তং জ্ঞাত্বাঽমৃতা ভবন্তি .. ৭..

বেদাহমেতং পুরুষং মহান্ত-
মাদিত্যবর্ণং তমসঃ পরস্তাত্ .
তমেব বিদিত্বাতিমৃত্যুমেতি
নান্যঃ পন্থা বিদ্যতেঽযনায .. ৮..

যস্মাত্ পরং নাপরমস্তি কিংচিদ্য-
স্মান্নণীযো ন জ্যাযোঽস্তি কশ্চিত্ .
বৃক্ষ ইব স্তব্ধো দিবি তিষ্ঠত্যেক-
স্তেনেদং পূর্ণং পুরুষেণ সর্বম্ .. ৯..

ততো যদুত্তরততং তদরূপমনামযম্ .
য এতদ্বিদুরমৃতাস্তে ভবন্তি অথেতরে দুঃখমেবাপিযন্তি .. ১০..

সর্বানন শিরোগ্রীবঃ সর্বভূতগুহাশযঃ .
সর্বব্যাপী স ভগবাংস্তস্মাত্ সর্বগতঃ শিবঃ .. ১১..

মহান্ প্রভুর্বৈ পুরুষঃ সত্বস্যৈষ প্রবর্তকঃ .
সুনির্মলামিমাং প্রাপ্তিমীশানো জ্যোতিরব্যযঃ .. ১২..

অঙ্গুষ্ঠমাত্রঃ পুরুষোঽন্তরাত্মা
সদা জনানাং হৃদযে সন্নিবিষ্টঃ .
হৃদা মনীষা মনসাভিক্লৃপ্তো
য এতদ্ বিদুরমৃতাস্তে ভবন্তি .. ১৩..

সহস্রশীর্ষা পুরুষঃ সহস্রাক্ষঃ সহস্রপাত্ .
স ভূমিং বিশ্বতো বৃত্বা অত্যতিষ্ঠদ্দশাঙ্গুলম্ .. ১৪..

পুরুষ এবেদঁ সর্বং যদ্ ভূতং যচ্চ ভব্যম্ .
উতামৃতত্বস্যেশানো যদন্নেনাতিরোহতি .. ১৫..

সর্বতঃ পাণিপাদং তত্ সর্বতোঽক্ষিশিরোমুখম্ .
সর্বতঃ শ্রুতিমল্লোকে সর্বমাবৃত্য তিষ্ঠতি .. ১৬..

সর্বেন্দ্রিযগুণাভাসং সর্বেন্দ্রিযবিবর্জিতম্ .
সর্বস্য প্রভুমীশানং সর্বস্য শরণং সুহৃত্ .. ১৭..

নবদ্বারে পুরে দেহী হংসো লেলাযতে বহিঃ .
বশী সর্বস্য লোকস্য স্থাবরস্য চরস্য চ .. ১৮..

অপাণিপাদো জবনো গ্রহীতা
পশ্যত্যচক্ষুঃ স শৃণোত্যকর্ণঃ .
স বেত্তি বেদ্যং ন চ তস্যাস্তি বেত্তা
তমাহুরগ্র্যং পুরুষং মহান্তম্ .. ১৯..

অণোরণীযান্ মহতো মহীযা-
নাত্মা গুহাযাং নিহিতোঽস্য জন্তোঃ .
তমক্রতুঃ পশ্যতি বীতশোকো
ধাতুঃ প্রসাদান্মহিমানমীশম্ .. ২০..

বেদাহমেতমজরং পুরাণং
সর্বাত্মানং সর্বগতং বিভুত্বাত্ .
জন্মনিরোধং প্রবদন্তি যস্য
ব্রহ্মবাদিনো হি প্রবদন্তি নিত্যম্ .. ২১..

চতুর্থোঽধ্যাযঃ .

য একোঽবর্ণো বহুধা শক্তিযোগাদ্
বরণাননেকান্ নিহিতার্থো দধাতি .
বিচৈতি চান্তে বিশ্বমাদৌ চ দেবঃ
স নো বুদ্ধ্যা শুভযা সংযুনক্তু .. ১..

তদেবাগ্নিস্তদাদিত্য-
স্তদ্বাযুস্তদু চন্দ্রমাঃ .
তদেব শুক্রং তদ্ ব্রহ্ম
তদাপস্তত্ প্রজাপতিঃ .. ২..

ত্বং স্ত্রী পুমানসি
ত্বং কুমার উত বা কুমারী .
ত্বং জীর্ণো দণ্ডেন বঞ্চসি
ত্বং জাতো ভবসি বিশ্বতোমুখঃ .. ৩..

নীলঃ পতঙ্গো হরিতো লোহিতাক্ষ-
স্তডিদ্গর্ভ ঋতবঃ সমুদ্রাঃ .
অনাদিমত্ ত্বং বিভুত্বেন বর্তসে
যতো জাতানি ভুবনানি বিশ্বা .. ৪..

অজামেকাং লোহিতশুক্লকৃষ্ণাং
বহ্বীঃ প্রজাঃ সৃজমানাং সরূপাঃ .
অজো হ্যেকো জুষমাণোঽনুশেতে
জহাত্যেনাং ভুক্তভোগামজোঽন্যঃ .. ৫..

দ্বা সুপর্ণা সযুজা সখাযা
সমানং বৃক্ষং পরিষস্বজাতে .
তযোরন্যঃ পিপ্পলং স্বাদ্বত্ত্যন-
শ্নন্নন্যো অভিচাকশীতি .. ৬..

সমানে বৃক্ষে পুরুষো নিমগ্নোঽ-
নীশযা শোচতি মুহ্যমানঃ .
জুষ্টং যদা পশ্যত্যন্যমীশমস্য
মহিমানমিতি বীতশোকঃ .. ৭..

ঋচো অক্ষরে পরমে ব্যোমন্
যস্মিন্দেবা অধি বিশ্বে নিষেদুঃ .
যস্তং ন বেদ কিমৃচা করিষ্যতি
য ইত্তদ্বিদুস্ত ইমে সমাসতে .. ৮..

ছন্দাংসি যজ্ঞাঃ ক্রতবো ব্রতানি
ভূতং ভব্যং যচ্চ বেদা বদন্তি .
অস্মান্ মাযী সৃজতে বিশ্বমেত-
ত্তস্মিংশ্চান্যো মাযযা সন্নিরুদ্ধঃ .. ৯..

মাযাং তু প্রকৃতিং বিদ্যান্মাযিনং চ মহেশ্বরম্ .
তস্যবযবভূতৈস্তু ব্যাপ্তং সর্বমিদং জগত্ .. ১০..

যো যোনিং যোনিমধিতিষ্ঠত্যেকো
যস্মিন্নিদ.ম্ সং চ বিচৈতি সর্বম্ .
তমীশানং বরদং দেবমীড্যং
নিচায্যেমাং শান্তিমত্যন্তমেতি .. ১১..

যো দেবানাং প্রভবশ্চোদ্ভবশ্চ
বিশ্বাধিপো রুদ্রো মহর্ষিঃ .
হিরণ্যগর্ভং পশ্যত জাযমানং
স নো বুদ্ধ্যা শুভযা সংযুনক্তু .. ১২..

যো দেবানামধিপো
যস্মিন্ল্লোকা অধিশ্রিতাঃ .
য ঈশে অস্য দ্বিপদশ্চতুষ্পদঃ
কস্মৈ দেবায হবিষা বিধেম .. ১৩..

সূক্ষ্মাতিসূক্ষ্মং কলিলস্য মধ্যে
বিশ্বস্য স্রষ্ঠারমনেকরূপম্ .
বিশ্বস্যৈকং পরিবেষ্টিতারং
জ্ঞাত্বা শিবং শান্তিমত্যন্তমেতি .. ১৪..

স এব কালে ভুবনস্য গোপ্তা
বিশ্বাধিপঃ সর্বভূতেষু গূঢঃ .
যস্মিন্ যুক্তা ব্রহ্মর্ষযো দেবতাশ্চ
তমেবং জ্ঞাত্বা মৃত্যুপাশাংশ্ছিনত্তি .. ১৫..

ঘৃতাত্ পরং মণ্ডমিবাতিসূক্ষ্মং
জ্ঞাত্বা শিবং সর্বভূতেষু গূঢম্ .
বিশ্বস্যৈকং পরিবেষ্টিতারং
জ্ঞাত্বা দেবং মুচ্যতে সর্বপাশৈঃ .. ১৬..

এষ দেবো বিশ্বকর্মা মহাত্মা
সদা জনানাং হৃদযে সন্নিবিষ্টঃ .
হৃদা মনীষা মনসাভিক্লৃপ্তো
য এতদ্ বিদুরমৃতাস্তে ভবন্তি .. ১৭..

যদাঽতমস্তান্ন দিবা ন রাত্রিঃ
ন সন্নচাসচ্ছিব এব কেবলঃ .
তদক্ষরং তত্ সবিতুর্বরেণ্যং
প্রজ্ঞা চ তস্মাত্ প্রসৃতা পুরাণী .. ১৮..

নৈনমূর্ধ্বং ন তির্যঞ্চং
ন মধ্যে ন পরিজগ্রভত্ .
ন তস্য প্রতিমা অস্তি
যস্য নাম মহদ্ যশঃ .. ১৯..

ন সংদৃশে তিষ্ঠতি রূপমস্য
ন চক্ষুষা পশ্যতি কশ্চনৈনম্ .
হৃদা হৃদিস্থং মনসা য এন-
মেবং বিদুরমৃতাস্তে ভবন্তি .. ২০..

অজাত ইত্যেবং কশ্চিদ্ভীরুঃ প্রপদ্যতে .
রুদ্র যত্তে দক্ষিণং মুখং তেন মাং পাহি নিত্যম্ .. ২১..

মা নস্তোকে তনযে মা ন আযুষি
মা নো গোষু মা ন অশ্বেষু রীরিষঃ .
বীরান্ মা নো রুদ্র ভামিতো
বধীর্হবিষ্মন্তঃ সদামিত্ ত্বা হবামহে .. ২২..

পঞ্চমোঽধ্যাযঃ .

দ্বে অক্ষরে ব্রহ্মপরে ত্বনন্তে
বিদ্যাবিদ্যে নিহিতে যত্র গূঢে .
ক্ষরং ত্ববিদ্যা হ্যমৃতং তু বিদ্যা
বিদ্যাবিদ্যে ঈশতে যস্তু সোঽন্যঃ .. ১..

যো যোনিং যোনিমধিতিষ্ঠত্যেকো
বিশ্বানি রূপাণি যোনীশ্চ সর্বাঃ .
ঋষিং প্রসূতং কপিলং যস্তমগ্রে
জ্ঞানৈর্বিভর্তি জাযমানং চ পশ্যেত্ .. ২..

একৈক জালং বহুধা বিকুর্ব-
ন্নস্মিন্ ক্ষেত্রে সংহরত্যেষ দেবঃ .
ভূযঃ সৃষ্ট্বা পতযস্তথেশঃ
সর্বাধিপত্যং কুরুতে মহাত্মা .. ৩..

সর্বা দিশ ঊর্ধ্বমধশ্চ তির্যক্
প্রকাশযন্ ভ্রাজতে যদ্বনড্বান্ .
এবং স দেবো ভগবান্ বরেণ্যো
যোনিস্বভাবানধিতিষ্ঠত্যেকঃ .. ৪..

যচ্চ স্বভাবং পচতি বিশ্বযোনিঃ
পাচ্যাংশ্চ সর্বান্ পরিণামযেদ্ যঃ .
সর্বমেতদ্ বিশ্বমধিতিষ্ঠত্যেকো
গুণাংশ্চ সর্বান্ বিনিযোজযেদ্ যঃ .. ৫..

তদ্ বেদগুহ্যোপনিষত্সু গূঢং
তদ্ ব্রহ্মা বেদতে ব্রহ্মযোনিম্ .
যে পূর্বং দেবা ঋষযশ্চ তদ্ বিদু-
স্তে তন্মযা অমৃতা বৈ বভূবুঃ ..৬..

গুণান্বযো যঃ ফলকর্মকর্তা
কৃতস্য তস্যৈব স চোপভোক্তা .
স বিশ্বরূপস্ত্রিগুণস্ত্রিবর্ত্মা
প্রাণাধিপঃ সঞ্চরতি স্বকর্মভিঃ .. ৭..

অঙ্গুষ্ঠমাত্রো রবিতুল্যরূপঃ
সঙ্কল্পাহঙ্কারসমন্বিতো যঃ .
বুদ্ধের্গুণেনাত্মগুণেন চৈব
আরাগ্রমাত্রোঽপ্যপরোঽপি দৃষ্টঃ .. ৮..

বালাগ্রশতভাগস্য শতধা কল্পিতস্য চ .
ভাগো জীবঃ স বিজ্ঞেযঃ স চানন্ত্যায কল্পতে .. ৯..

নৈব স্ত্রী ন পুমানেষ ন চৈবাযং নপুংসকঃ .
যদ্যচ্ছরীরমাদত্তে তেনে তেনে স যুজ্যতে .. ১০..

সঙ্কল্পনস্পর্শনদৃষ্টিমোহৈ-
র্গ্রাসাংবুবৃষ্ট্যাত্মবিবৃদ্ধিজন্ম .
কর্মানুগান্যনুক্রমেণ দেহী
স্থানেষু রূপাণ্যভিসম্প্রপদ্যতে .. ১১..

স্থূলানি সূক্ষ্মাণি বহূনি চৈব
রূপাণি দেহী স্বগুণৈর্বৃণোতি .
ক্রিযাগুণৈরাত্মগুণৈশ্চ তেষাং
সংযোগহেতুরপরোঽপি দৃষ্টঃ .. ১২..

অনাদ্যনন্তং কলিলস্য মধ্যে
বিশ্বস্য স্রষ্ঠারমনেকরূপম্ .
বিশ্বস্যৈকং পরিবেষ্টিতারং
জ্ঞাত্বা দেবং মুচ্যতে সর্বপাশৈঃ .. ১৩..

ভাবগ্রাহ্যমনীডাখ্যং ভাবাভাবকরং শিবম্ .
কলাসর্গকরং দেবং যে বিদুস্তে জহুস্তনুম্ .. ১৪..

ষষ্ঠোঽধ্যাযঃ .

স্বভাবমেকে কবযো বদন্তি
কালং তথান্যে পরিমুহ্যমানাঃ .
দেবস্যৈষ মহিমা তু লোকে
যেনেদং ভ্রাম্যতে ব্রহ্মচক্রম্ .. ১..

যেনাবৃতং নিত্যমিদং হি সর্বং জ্ঞঃ
কালকারো গুণী সর্ববিদ্ যঃ .
তেনেশিতং কর্ম বিবর্ততে হ
পৃথিব্যপ্তেজোনিলখানি চিন্ত্যম্ .. ২..

তত্কর্ম কৃত্বা বিনিবর্ত্য ভূয-
স্তত্ত্বস্য তাবেন সমেত্য যোগম্ .
একেন দ্বাভ্যাং ত্রিভিরষ্টভির্বা
কালেন চৈবাত্মগুণৈশ্চ সূক্ষ্মৈঃ .. ৩..

আরভ্য কর্মাণি গুণান্বিতানি
ভাবাংশ্চ সর্বান্ বিনিযোজযেদ্যঃ .
তেষামভাবে কৃতকর্মনাশঃ
কর্মক্ষযে যাতি স তত্ত্বতোঽন্যঃ .. ৪..

আদিঃ স সংযোগনিমিত্তহেতুঃ
পরস্ত্রিকালাদকলোঽপি দৃষ্টঃ .
তং বিশ্বরূপং ভবভূতমীড্যং
দেবং স্বচিত্তস্থমুপাস্য পূর্বম্ .. ৫..

স বৃক্ষকালাকৃতিভিঃ পরোঽন্যো
যস্মাত্ প্রপঞ্চঃ পরিবর্ততেঽযম্ .
ধর্মাবহং পাপনুদং ভগেশং
জ্ঞাত্বাত্মস্থমমৃতং বিশ্বধাম .. ৬..

তমীশ্বরাণাং পরমং মহেশ্বরং
তং দেবতানাং পরমং চ দৈবতম্ .
পতিং পতীনাং পরমং পরস্তাদ্-
বিদাম দেবং ভুবনেশমীড্যম্ .. ৭..

ন তস্য কার্যং করণং চ বিদ্যতে
ন তত্সমশ্চাভ্যধিকশ্চ দৃশ্যতে .
পরাস্য শক্তির্বিবিধৈব শ্রূযতে
স্বাভাবিকী জ্ঞানবলক্রিযা চ .. ৮..

ন তস্য কশ্চিত্ পতিরস্তি লোকে
ন চেশিতা নৈব চ তস্য লিঙ্গম্ .
স কারণং করণাধিপাধিপো
ন চাস্য কশ্চিজ্জনিতা ন চাধিপঃ .. ৯..

যস্তন্তুনাভ ইব তন্তুভিঃ প্রধানজৈঃ স্বভাবতঃ .
দেব একঃ স্বমাবৃণোতি স নো দধাতু ব্রহ্মাপ্যযম্ .. ১০..

একো দেবঃ সর্বভূতেষু গূঢঃ
সর্বব্যাপী সর্বভূতান্তরাত্মা.
কর্মাধ্যক্ষঃ সর্বভূতাধিবাসঃ
সাক্ষী চেতা কেবলো নির্গুণশ্চ .. ১১..

একো বশী নিষ্ক্রিযাণাং বহূনা-
মেকং বীজং বহুধা যঃ করোতি .
তমাত্মস্থং যেঽনুপশ্যন্তি ধীরা-
স্তেষাং সুখং শাশ্বতং নেতরেষাম্ .. ১২..

নিত্যো নিত্যানাং চেতনশ্চেতনানা-
মেকো বহূনাং যো বিদধাতি কামান্ .
তত্কারণং সাংখ্যযোগাধিগম্যং
জ্ঞাত্বা দেবং মুচ্যতে সর্বপাশৈঃ .. ১৩..

ন তত্র সূর্যো ভাতি ন চন্দ্রতারকং
নেমা বিদ্যুতো ভান্তি কুতোঽযমগ্নিঃ .
তমেব ভান্তমনুভাতি সর্বং
তস্য ভাসা সর্বমিদং বিভাতি .. ১৪..

একো হংসঃ ভুবনস্যাস্য মধ্যে
স এবাগ্নিঃ সলিলে সংনিবিষ্টঃ .
তমেব বিদিত্বা অতিমৃত্যুমেতি
নান্যঃ পন্থা বিদ্যতেঽযনায .. ১৫..

স বিশ্বকৃদ্ বিশ্ববিদাত্মযোনি-
র্জ্ঞঃ কালকালো গুণী সর্ববিদ্ যঃ .
প্রধানক্ষেত্রজ্ঞপতির্গুণেশঃ
সংসারমোক্ষস্থিতিবন্ধহেতুঃ .. ১৬..

স তন্মযো হ্যমৃত ঈশসংস্থো
জ্ঞঃ সর্বগো ভুবনস্যাস্য গোপ্তা .
য ঈশেঽস্য জগতো নিত্যমেব
নান্যো হেতুর্বিদ্যত ঈশনায .. ১৭..

যো ব্রহ্মাণং বিদধাতি পূর্বং
যো বৈ বেদাংশ্চ প্রহিণোতি তস্মৈ .
তং হ দেবং আত্মবুদ্ধিপ্রকাশং
মুমুক্ষুর্বৈ শরণমহং প্রপদ্যে .. ১৮..

নিষ্কলং নিষ্ক্রিযং শান্তং নিরবদ্যং নিরঞ্জনম্ .
অমৃতস্য পরং সেতুং দগ্ধেন্দনমিবানলম্ .. ১৯..

যদা চর্মবদাকাশং বেষ্টযিষ্যন্তি মানবাঃ .
তদা দেবমবিজ্ঞায দুঃখস্যান্তো ভবিষ্যতি .. ২০..

তপঃপ্রভাবাদ্ দেবপ্রসাদাচ্চ
ব্রহ্ম হ শ্বেতাশ্বতরোঽথ বিদ্বান্ .
অত্যাশ্রমিভ্যঃ পরমং পবিত্রং
প্রোবাচ সম্যগৃষিসঙ্ঘজুষ্টম্ .. ২১..

বেদান্তে পরমং গুহ্যং পুরাকল্পে প্রচোদিতম্ .
নাপ্রশান্তায দাতব্যং নাপুত্রাযাশিষ্যায বা পুনঃ .. ২২..

যস্য দেবে পরা ভক্তিঃ যথা দেবে তথা গুরৌ .
তস্যৈতে কথিতা হ্যর্থাঃ প্রকাশন্তে মহাত্মনঃ .. ২৩..
প্রকাশন্তে মহাত্মন ইতি .

ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু . মা বিদ্বিষাবহৈ ..

ॐ শান্তিঃ শান্তিঃ শান্তিঃ ..