শিবোপনিষদ

.. শিবোপনিষদ্ ..

কৈলাসশিখরাসীনমশেষামরপূজিতম্ |
কালঘ্নং শ্রীমহাকালমীশ্বরং জ্ঞানপারগম্ || ১- ১||
সংপূজ্য বিধিবদ্ভক্ত্যা ঋষ্যাত্রেযঃ সুসংযতঃ |
সর্বভূতহিতার্থায পপ্রচ্ছেদং মহামুনিঃ || ১- ২||
জ্ঞানযোগং ন বিন্দন্তি যে নরা মন্দবুদ্ধযঃ |
তে মুচ্যন্তে কথং ঘোরাদ্ভগবন্ভবসাগরাত্ || ১- ৩||
এবং পৃষ্টঃ প্রসন্নাত্মা ঋষ্যাত্রেযেণ ধীমতা |
মন্দবুদ্ধিবিমুক্ত্যর্থং মহাকালঃ প্রভাষতে || ১- ৪||
মহাদেব উবাচ
পুরা রুদ্রেণ গদিতাঃ শিবধর্মাঃ সনাতনাঃ |
দেব্যাঃ সর্বগণানাং চ সংক্ষেপাদ্গ্রন্থকোটিভিঃ || ১- ৫||
আযুঃ প্রজ্ঞাং তথা শক্তিং প্রসমীক্ষ্য নৄণামিহ |
তাপত্রযপ্রপীডাং চ ভোগতৃষ্ণাবিমোহিনীম্ || ১- ৬||
তে ধর্মাঃ স্কন্দনন্দিভ্যামন্যৈশ্চ মুনিসত্তমৈঃ |
সারমাদায নির্দিষ্টাঃ সম্যক্প্রকরণান্তরৈঃ || ১- ৭||
সারাদপি মহাসারং শিবোপনিষদং পরম্ |
অল্পগ্রন্থং মহার্থং চ প্রবক্ষ্যামি জগদ্ধিতম্ || ১- ৮||
শিবঃ শিব ইমে শান্ত- নাম চাদ্যং মুহুর্মুহুঃ |
উচ্চারযন্তি তদ্ভক্ত্যা তে শিবা নাত্র সংশযঃ || ১- ৯||
অশিবাঃ পাশসংযুক্তাঃ পশবঃ সর্বচেতনাঃ |
যস্মাদ্বিলক্ষণাস্তেভ্যস্তস্মাদীশঃ শিবঃ স্মৃতঃ || ১- ১০||
গুণো বুদ্ধিরহংকারস্তন্মাত্রাণীন্দ্রিযানি চ |
ভূতানি চ চতুর্বিংশদিতি পাশাঃ প্রকীর্তিতাঃ || ১- ১১||
পঞ্চবিংশকমজ্ঞানং সহজং সর্বদেহিনাম্ |
পাশাজালস্য তন্মূলং প্রকৃতিঃ কারণায নঃ || ১- ১২||
সত্যজ্ঞানে নিবধ্যন্তে পুরুষাঃ পাশবন্ধনৈঃ |
মদ্ভাবাচ্চ বিমুচ্যন্তে জ্ঞানিনঃ পাশপঞ্জরাত্ || ১- ১৩||
ষড্বিংশকশ্চ পুরুষঃ পশুরজ্ঞঃ শিবাগমে |
সপ্তবিংশ ইতি প্রোক্তঃ শিবঃ সর্বজগত্পতিঃ || ১- ১৪||
যস্মাচ্ছিবঃ সুসংপূর্ণঃ সর্বজ্ঞঃ সর্বগঃ প্রভুঃ |
তস্মাত্স পাশহরিতঃ স বিশুদ্ধঃ স্বভাবতঃ || ১- ১৫||
পশুপাশপরঃ শান্তঃ পরমজ্ঞানদেশিকঃ |
শিবঃ শিবায ভূতানাং তং বিজ্ঞায বিমুচ্যতে || ১- ১৬||
এতদেব পরং জ্ঞানং শিব ইত্যক্ষরদ্বযম্ |
বিচারাদ্যাতি বিস্তারং তৈলবিন্দুরিবাম্ভসি || ১- ১৭||
সকৃদুচ্চারিতং যেন শিব ইত্যক্ষরদ্বযম্ |
বদ্ধঃ পরিকরস্তেন মোক্ষোপগমনং প্রতি || ১- ১৮||
দ্ব্যক্ষরঃ শিবমন্ত্রো ঽযং শিবোপনিষদি স্মৃতঃ |
একাক্ষরঃ পুনশ্চাযমোমিত্যেবং ব্যবস্থিতঃ || ১- ১৯||
নামসংকীর্তণাদেব শিবস্যাশেষপাতকৈঃ |
যতঃ প্রমুচ্যতে ক্ষিপ্রং মন্ত্রো ঽযং দ্ব্যক্ষরঃ পরঃ || ১- ২০||
যঃ শিবং শিবমিত্যেবং দ্ব্যক্ষরং মন্ত্রমভ্যসেত্ |
একাক্ষরং বা সততং স যাতি পরমং পদম্ || ১- ২১||
মিত্রস্বজনবন্ধূনাং কুর্যান্নাম শিবাত্মকম্ |
অপি তত্কীর্তনাদ্যাতি পাপমুক্তঃ শিবং পুরম্ || ১- ২২||
বিজ্ঞেযঃ স শিবঃ শান্তো নরস্তদ্ভাবভাবিতঃ |
আস্তে সদা নিরুদ্বিগ্নঃ স দেহান্তে বিমুচ্যতে || ১- ২৩||
হৃদ্যন্তঃকরণং জ্ঞেযং শিবস্য আযতনং পরম্ |
হৃত্পদ্মং বেদিকা তত্র লিঙ্গমোংকারমিষ্যতে || ১- ২৪||
পুরুষঃ স্থাপকো জ্ঞেযঃ সত্যং সংমার্জনং স্মৃতম্ |
অহিংসা গোমযং প্রোক্তং শান্তিশ্চ সলিলং পরম্ || ১- ২৫||
কুর্যাত্সংমার্জনং প্রাজ্ঞো বৈরাগ্যং চন্দনং স্মৃতম্ |
পূজযেদ্ধ্যানযোগেন সংতোষৈঃ কুসুমৈঃ সিতৈঃ || ১- ২৬||
ধূপশ্চ গুগ্গুলুর্দেযঃ প্রাণাযামসমুদ্ভবঃ |
প্রত্যাহারশ্চ নৈবেদ্যমস্তেযং চ প্রদক্ষিণম্ || ১- ২৭||
ইতি দিব্যোপচারৈশ্চ সংপূজ্য পরমং শিবম্ |
জপেদ্ধ্যাযেচ্চ মুক্ত্যর্থং সর্বসঙ্গবিবর্জিতঃ || ১- ২৮||
জ্ঞানযোগবিনির্মুক্তঃ কর্মযোগসমাবৃত্তঃ |
মৃতঃ শিবপুরং গচ্ছেত্স তেন শিবকর্মণা || ১- ২৯||
তত্র ভুক্ত্বা মহাভোগান্প্রলযে সর্বদেহিনাম্ |
শিবধর্মাচ্ছিবজ্ঞানং প্রাপ্য মুক্তিমবাপ্নুযাত্ || ১- ৩০||
জ্ঞানযোগেন মুচ্যন্তে দেহপাতাদনন্তরম্ |
ভোগান্ভুক্ত্বা চ মুচ্যন্তে প্রলযে কর্মযোগিনঃ || ১- ৩১||
তস্মাজ্জ্ঞানবিদো যোগাত্তথাজ্ঞাঃ কর্মযোগিনঃ |
সর্ব এব বিমুচ্যন্তে যে নরাঃ শিবমাশ্রিতাঃ || ১- ৩২||
স ভোগঃ শিববিদ্যার্থং যেষাং কর্মাস্তি নির্মলম্ |
তে ভোগান্প্রাপ্য মুচ্যন্তে প্রলযে শিববিদ্যযা || ১- ৩৩||
বিদ্যা সংকীর্তনীযা হি যেষাং কর্ম ন বিদ্যতে |
তে চাবর্ত্য বিমুচ্যন্তে যাবত্কর্ম ন তদ্ভবেত্ || ১- ৩৪||
শিবজ্ঞানবিদং তস্মাত্পূজযেদ্বিভবৈর্গুরুম্ |
বিদ্যাদানং চ কুর্বীত ভোগমোক্ষজিগীষযা || ১- ৩৫||
শিবযোগী শিবজ্ঞানী শিবজাপী তপোঽধিকঃ |
ক্রমশঃ কর্মযোগী চ পঞ্চৈতে মুক্তিভাজনাঃ || ১- ৩৬||
কর্মযোগস্য যন্মূলং তদ্বক্ষ্যামি সমাসতঃ |
লিঙ্গমাযতনং চেতি তত্র কর্ম প্রবর্ততে || ১- ৩৭||
|| ইতি শিবোপনিষদি মুক্তিনির্দেশাধ্যাযঃ প্রথমঃ ||
——————————————————————————–
অথ পূর্বস্থিতো লিঙ্গে গর্ভঃ স ত্রিগুণো ভবেত্ |
গর্ভাদ্বাপি বিভাগেন স্থাপ্য লিঙ্গং শিবালযে || ২- ১||
যাবল্লিঙ্গস্য দৈর্ঘ্যং স্যাত্তাবদ্বেদ্যাশ্চ বিস্তরঃ |
লিঙ্গতৃতীযভাগেন ভবেদ্বেদ্যাঃ সমুচ্ছ্রযঃ || ২- ২||
ভাগমেকং ন্যসেদ্ভূমৌ দ্বিতীযং বেদিমধ্যতঃ |
তৃতীযভাগে পূজা স্বাদিতি লিঙ্গং ত্রিধা স্থিতম্ || ২- ৩||
ভূমিস্থং চতুরশ্রং স্বাদষ্টাশ্রং বেদিমধ্যতঃ |
পূজার্থং বর্তুলং কার্যং দৈর্ঘ্যাত্ত্রিগুণবিস্তরম্ || ২- ৪||
অধোভাগে স্থিতঃ স্কন্দঃ স্থিতা দেবী চ মধ্যতঃ |
ঊর্ধ্বং রুদ্রঃ ক্রমাদ্বাপি ব্রহ্মবিষ্ণুমহেশ্বরাঃ || ২- ৫||
এত এব ত্রযো লোকা এত এব ত্রযো গুণাঃ |
এত এব ত্রযো বেদা এতচ্চান্যত্স্থিতং ত্রিধা || ২- ৬||
নবহস্তঃ স্মৃতো জ্যেষ্ঠঃ ষড্ঢস্তশ্চাপি মধ্যমঃ |
বিদ্যাত্কনীযস্ত্রৈহস্তং লিঙ্গমানমিদং স্মৃতম্ || ২- ৭||
গর্ভস্যানতঃ প্রবিস্তারস্তদূনশ্চ ন শস্যতে |
গর্ভস্যানতঃ প্রবিস্তারাদ্তদুপর্যপি সংস্থিতম্ || ২- ৮||
প্রাসাদং কল্পযেচ্ছ্রীমান্বিভজেত ত্রিধা পুনঃ |
ভাগ একো ভবেজ্জঙ্ঘা দ্বৌ ভাগৌ মঞ্জরী স্মৃতা || ২- ৯||
মঞ্জর্যা অর্ধভাগস্থং শুকনাসং প্রকল্পযেত্ |
গর্ভাদর্ধেন বিস্তারমাযামং চ সুশোভনম্ || ২- ১০||
গর্ভাদ্বাপি ত্রিভাগেন শুকনাসং প্রকল্পযেত্ |
গর্ভাদর্ধেন বিস্তীর্ণা গর্ভাচ্চ দ্বিগুণাযতা || ২- ১১||
জঙ্ঘাভিশ্চ ভবেত্কার্যা মঞ্জর্যঙ্গুলরাশিনা |
প্রাসাদার্ধেন বিজ্ঞেযো মণ্ডপস্তস্য বামতঃ || ২- ১২||
মণ্ডপাত্পাদবিস্তীর্ণা জগতী তাবদুচ্ছ্রিতা |
প্রাসাদস্য প্রমাণেন জগত্যা সার্ধমঙ্গণম্ || ২- ১৩||
প্রাকারং তত্সমন্তাচ্চ গুপুরাদালভূষিতম্ |
প্রাকারান্তঃ স্থিতং কার্যং বৃষস্থানং সমুচ্ছ্রিতম্ || ২- ১৪||
নন্দীশ্বরমহাকালৌ দ্বারশাখাব্যবস্থিতৌ |
প্রাকারাদ্দক্ষিণে কার্যং সর্বোপকরণান্বিতম্ || ২- ১৫||
পঞ্চভৌমং ত্রিভৌমং বা যোগীন্দ্রাবসথং মহত্ |
প্রাকারগুপ্তং তত্কার্যং মৈত্রস্থানসমন্বিতম্ || ২- ১৬||
স্থানাদ্দশসমাযুক্তং ভব্যবৃক্ষজলান্বিতম্ |
তন্মহানসমাগ্নেয্যাং পূর্বতঃ সত্ত্রমণ্ডপম্ || ২- ১৭||
স্থানং চণ্ডেশমৈশান্যাং পুষ্পারামং তথোত্তরম্ |
কোষ্ঠাগারং চ বাযব্যাং বারুণ্যাং বরুণালযম্ || ২- ১৮||
শমীন্ধনকুশস্থানমাযুধানাং চ নৈরৃতম্ |
সর্বলোকোপকারায নগরস্থং প্রকল্পযেত্ || ২- ১৯||
শ্রীমদাযতনং শম্ভোর্যোগিনাং বিজনে বনে |
শিবস্যাযতনে যাবত্সমেতাঃ পরমাণবঃ || ২- ২০||
মন্বন্তরাণি তাবন্তি কর্তুর্ভোগাঃ শিবে পুরে |
মহাপ্রতিমলিঙ্গানি মহান্ত্যাযতনানি চ || ২- ২১||
কৃত্বাপ্নোতি মহাভোগানন্তে মুক্তিং চ শাশ্বতীম্ |
লিঙ্গপ্রতিষ্ঠাং কুর্বীত যদা তল্লক্ষণং কৃতী || ২- ২২||
পঞ্চগব্যেন সংশোধ্য পূজযিত্বাধিবাসযেত্ |
পালাশোদুম্বরাশ্বত্থ- পৃষদাজ্যতিলৈর্যবৈঃ || ২- ২৩||
অগ্নিকার্যং প্রকুর্বীত দদ্যাত্পূর্ণাহুতিত্রযম্ |
শিবস্যাষ্টশতং হুত্বা লিঙ্গমূলং স্পৃশেদ্বুধঃ || ২- ২৪||
এবং মধ্যে ঽবসানে তন্মূর্তিমন্ত্রৈশ্চ মূর্তিষু |
অষ্টৌ মূর্তীশ্বরাঃ কার্যাঃ নবমঃ স্থাপকঃ স্মৃতঃ || ২- ২৫||
প্রাতঃ সংস্থাপযেল্লিঙ্গং মন্ত্রৈস্তু নবভিঃ ক্রমাত্ |
মহাস্নাপনপূজাং চ স্থাপ্য লিঙ্গং প্রপূজযেত্ || ২- ২৬||
গুরোর্মূর্তিধরাণাং চ দদ্যাদুত্তমদক্ষিণাম্ |
যতীনাং চ সমস্তানাং দদ্যান্মধ্যমদক্ষিণাম্ || ২- ২৭||
দীনান্ধকৃপণেভ্যশ্চ সর্বাসামুপকল্পযেত্ |
সর্বভক্ষ্যান্নপানাদ্যৈরনিষিদ্ধং চ ভোজনম্ || ২- ২৮||
কল্পযেদাগতানাং চ ভূতেভ্যশ্চ বলিং হরেত্ |
রাত্রৌ মাতৃগণানাং চ বলিং দদ্যাদ্বিশেষতঃ || ২- ২৯||
এবং যঃ স্থাপযেল্লিঙ্গং তস্য পুণ্যফলং শৃণু |
কুলত্রিংশকমুদ্ধৃত্য ভৃত্যৈশ্চ পরিবারিতঃ || ২- ৩০||
কলত্রপুত্রমিত্রাদ্যৈঃ সহিতঃ সর্ববান্ধবৈঃ |
বিমুচ্য পাপকলিলং শিবলোকং ব্রজেন্নরঃ |
তত্র ভুক্ত্বা মহাভোগান্প্রলযে মুক্তিমাপ্নুযাত্ || ২- ৩১||
|| ইতি শিবোপনিষদি লিঙ্গাযতনাধ্যাযো দ্বিতীযঃ ||
——————————————————————————–
অথান্যৈরল্পবিত্তৈশ্চ নৃপৈশ্চ শিবভাবিতৈঃ |
শক্তিতঃ স্বাশ্রমে কার্যং শিবশান্তিগৃহদ্বযম্ || ৩- ১||
গৃহস্যেশানদিগ্ভাগে কার্যমুত্তরতো ঽপি বা |
খাত্বা ভূমিং সমুদ্ধৃত্য শল্যানাকোট্য যত্নতঃ || ৩- ২||
শিবদেবগৃহং কার্যমষ্টহস্তপ্রমাণতঃ |
দক্ষিণোত্তরদিগ্ভাগে কিংচিচ্দীর্ঘং প্রকল্পযেত্ || ৩- ৩||
হস্তমাত্রপ্রমাণং চ দৃঢপট্টচতুষ্টযম্ |
চতুষ্কোণেষু সংযোজ্যমর্ঘ্যপাত্রাদিসংশ্রযম্ || ৩- ৪||
গর্ভমধ্যে প্রকুর্বীত শিববেদিং সুশোভনাম্ |
উদগর্বাক্চ্ছ্রিতাং(?)কিংচিচ্চতুঃশীর্ষকসংযুতাম্ || ৩- ৫||
ত্রিহস্তাযামবিস্তারাম্ষোডশাঙ্গুলমুচ্ছ্রিতাম্ |
তচ্ছীর্ষাণীব হস্তার্ধমাযামাদ্বিস্তরেণ চ || ৩- ৬||
শিবস্থণ্ডিলমিত্যেতচ্চতুর্হস্তং সমং শিরঃ |
মূর্তিনৈবেদ্যদীপানাং বিন্যাসার্থং প্রকল্পযেত্ || ৩- ৭||
শৈবলিঙ্গেন কার্যং স্যাত্কার্যং মণিজপার্থিবৈঃ |
স্থণ্ডিলার্ধে চ কুর্বন্তি বেদিমন্যাং সবর্তুলাম্ || ৩- ৮||
ষোডশাঙ্গুলমুত্সেধাং বিস্তীর্ণাং দ্বিগুণেন চ |
গৃহে ন স্থাপযেচ্ছৈলং লিঙ্গং মণিজমর্চযেত্ || ৩- ৯||
ত্রিসংধ্যং পার্থিবং বাপি কুর্যাদন্যদ্দিনেদিনে |
সর্বেষামেব বর্ণানাং স্ফাটিকং সর্বকামদম্ || ৩- ১০||
সর্বদোষবিনির্মুক্তমন্যথা দোষমাবহেত্ |
আযুষ্মান্বলবাঞ্শ্রীমান্পুত্রবান্ধনবান্সুখী || ৩- ১১||
বরমিষ্টং চ লভতে লিঙ্গং পার্থিবমর্চযন্ |
তস্মাদ্ধি পার্থিবং লিঙ্গং জ্ঞেযং সর্বার্থসাধকম্ || ৩- ১২||
নির্দোষং সুলভং চৈব পূজযেত্সততং বুধঃ |
যথা যথা মহালিঙ্গং পূজা শ্রদ্ধা যথা যথা || ৩- ১৩||
তথা তথা মহত্পুণ্যং বিজ্ঞেযমনুরূপতঃ |
প্রতিমালিঙ্গবেদীষু যাবন্তঃ পরমাণবঃ |
তাবত্কল্পান্মহাভোগস্তত্কর্তাস্তে শিবে পুরে || ৩- ১৪||
|| ইতি শিবোপনিষদি শিবগৃহাধ্যাযস্তৃতীযঃ ||
——————————————————————————–
অথৈকভিন্নাবিচ্ছিন্নং পুরতঃ শান্তিমণ্ডপম্ |
পূর্বাপরাষ্টহস্তং স্যাদ্দ্বাদশোত্তরদক্ষিণে || ৪- ১||
তদ্দ্বারভিত্তিসংবদ্ধং কপিচ্ছুকসমাবৃতম্ |
পটদ্বযং ভবেত্স্থাপ্য স্রুবাদ্যাবারহেতুনা || ৪- ২||
দ্বারং ত্রিশাখং বিজ্ঞেযং নবত্যঙ্গুলমুচ্ছ্রিতম্ |
তদর্ধেন চ বিস্তীর্ণং সত্কবাটং শিবালযে || ৪- ৩||
দীর্ঘং পঞ্চনবত্যা চ পঞ্চশাখাসুশোভিতম্ |
সত্কবাটদ্বযোপেতং শ্রীমদ্বাহনমণ্টপম্ || ৪- ৪||
দ্বারং পশ্চান্মুখং জ্ঞেযমশেষার্থপ্রসাধকম্ |
অভাবে প্রাঙ্মুখং কার্যমুদগ্দক্ষিণতো ন চ || ৪- ৫||
গবাক্ষকদ্বযং কার্যমপিধানং সুশোভনম্ |
ধূমনির্গমনার্থায দক্ষিণোত্তরকুড্যযোঃ || ৪- ৬||
আগ্নেযভাগাত্পরিতঃ কার্যা জালগবাক্ষকাঃ |
ঊর্ধ্বস্তূপিকযা যুক্তা ঈষচ্ছিদ্রপিধানযা || ৪- ৭||
শিবাগ্নিহোত্রকুণ্ডং চ বৃত্তং হস্তপ্রমাণতঃ |
চতুরশ্রবেদি(kA)শ্রীমন্মেখলাত্রযভূষিতম্ || ৪- ৮||
কুড্যং দ্বিহস্তবিস্তীঋণং পঞ্চহস্তসমুচ্ছ্রিতম্ |
শিবাগ্নিহোত্রশরণং কর্তব্যমতিশোভনম্ || ৪- ৯||
জগতীস্তম্ভপট্টাদ্যং সপ্তসংখ্যং চ কল্পযেত্ |
বন্ধযোগবিনির্মুক্তং তুল্যস্থানপদান্তরম্ || ৪- ১০||
ঐষ্টকং কল্পযেদ্যত্নাচ্ছিবাগ্ন্যাযতনং মহত্ |
চতুঃপ্রেগীবকোপেতম্(?)একপ্রেগীবকেন বা(?)|| ৪- ১১||
সুধাপ্রলিপ্তং কর্তব্যং পঞ্চাণ্ডকবিভূষিতম্ |
শিবাগ্নিহোত্রশরণং চতুরণ্ডকসংযুতম্ || ৪- ১২||
বহিস্তদেব জগতী ত্রিহস্তা বা সুকুট্টিমা |
তাবদেব চ বিস্তীর্ণা মেখলাদিবিভূষিতা || ৪- ১৩||
কর্তব্যা চাত্র জগতী তস্যাশ্চাধঃ সমন্ততঃ |
দ্বিহস্তমাত্রবিস্তীর্ণা তদর্ধার্ধসমুচ্ছ্রিতা || ৪- ১৪||
অন্যা বৃত্তা প্রকর্তব্যা রুদ্রবেদী সুশোভনা |
দশহস্তপ্রমাণা চ চতুরঙ্গুলমুচ্ছ্রিতা || ৪- ১৫||
রুদ্রমাতৃগণানাং চ দিক্পতীনাং চ সর্বদা |
সর্বাগ্রপাকসংযুক্তং তাসু নিত্যবলিং হরেত্ || ৪- ১৬||
বেদ্যন্যা সর্বভূতানাং বহিঃ কার্যা দ্বিহস্তিকা |
বৃষস্থানং চ কর্তব্যং শিবালোকনসংমুখম্ || ৪- ১৭||
অগ্রার্ষসবিতুর্ব্যোম বৃষঃ কার্যশ্চ পশ্চিমে |
ব্যোম্নশ্চাধস্ত্রিগর্ভং স্যাত্পিতৃতর্পণবেদিকা || ৪- ১৮||
প্রাকারান্তর্বহিঃ কার্যং শ্রীমদ্গোপুরভূষিতম্ |
পুষ্পারামজলোপেতং প্রাকারান্তং চ কারযেত্ || ৪- ১৯||
মৃদ্দারুজং তৃণচ্ছন্নং প্রকুর্বীত শিবালযম্ |
ভূমিকাদ্বযবিন্যাসাদুত্ক্ষিপ্তং কল্পযেদ্বুধঃ || ৪- ২০||
শিবদক্ষিণতঃ কার্যং তভুক্তের্যোগ্যমালযম্ |
শয্যাসনসমাযুক্তং বাস্তুবিদ্যাবিনির্মিতম্ || ৪- ২১||
ধ্বজসিংহৌ বৃষগজৌ চত্বারঃ শোভনাঃ স্মৃতাঃ |
ধূমশ্বগর্দভধ্বাঙ্ক্ষাশ্চত্বারশ্চার্থনাশকাঃ || ৪- ২২||
গৃহস্যাযামবিস্তারং কৃত্বা ত্রিগুণমাদিতঃ |
অষ্টভিঃ শোধযেদাপৈঃ শেষশ্চ গৃহমাদিশেত্ || ৪- ২৩||
ইতি শান্তিগৃহং কৃত্বা রুদ্রাগ্নিং যঃ প্রবর্তযেত্ |
অপ্যেকং দিবসং ভক্ত্যা তস্য পুণ্যফলং শৃণু || ৪- ২৪||
কলত্রপুত্রমিত্রাদ্যৈঃ স ভৃত্যৈঃ পরিবারিতঃ |
কুলৈকবিংশদুত্তার্য দেবলোকমবাপ্নুযাত্ || ৪- ২৫||
নীলোত্পলদলশ্যামাঃ পীনবৃত্তপযোধরাঃ |
হেমবর্ণাঃ স্ত্রিযশ্চান্যাঃ সুন্দর্যঃ প্রিযদর্শনাঃ || ৪- ২৬||
তাভিঃ সার্ধং মহাভোগৈর্বিমানৈঃ সার্বকামিকৈঃ |
ইচ্ছযা ক্রীডতে তাবদ্যাবদাভূতসংপ্লবম্ || ৪- ২৭||
ততঃ কল্পাগ্নিনা সার্ধং দহ্যমানং সুবিহ্বলম্ |
দৃষ্ট্বা বিরজ্যতে ভূযো ভবভোগমহার্ণবাত্ || ৪- ২৮||
ততঃ সংপৃচ্ছতে রুদ্রাংস্তত্রস্থান্জ্ঞানপারগান্ |
তেভ্যঃ প্রাপ্য শিবজ্ঞানং শান্তং নির্বাণমাপ্নুযাত্ || ৪- ২৯||
অবিরক্তশ্চ ভোগেভ্যঃ সপ্ত জন্মানি জাযতে |
পৃথিব্যধিপতিঃ শ্রীমানিচ্ছযা বা দ্বিজোত্তমঃ || ৪- ৩০||
সপ্তমাজ্জন্মনশ্চান্তে শিবজ্ঞানমনাপ্নুযাত্ |
জ্ঞানাদ্বিরক্তঃ সংসারাচ্ছুদ্ধঃ খান্যধিতিষ্ঠতি || ৪- ৩১||
ইত্যেতদখিলং কার্যং ফলমুক্তং সমাসতঃ |
উত্সবে চ পুনর্ব্রূমঃ প্রত্যেকং দ্রব্যজং ফলম্ || ৪- ৩২||
সদ্গন্ধগুটিকামেকাং লাক্ষাং প্রাণ্যঙ্গবর্জিতাম্ |
কর্পাসাস্থিপ্রমাণং চ হুত্বাগ্নৌ শৃণুযাত্ফলম্ || ৪- ৩৩||
যাবত্সত্গন্ধগুটিকা শিবাগ্নৌ সংখ্যযা হুতা |
তাবত্কোট্যস্তু বর্ষাণি ভোগান্ভুঙ্ক্তে শিবে পুরে || ৪- ৩৪||
একাঙ্গুলপ্রমাণেন হুত্বাগ্নৌ চন্দনাহুতিম্ |
বর্ষকোটিদ্বযং ভোগৈর্দিব্যৈঃ শিবপুরে বসেত্ || ৪- ৩৫||
যাবত্কেসরসংখ্যানং কুসুমস্যানলে হুতম্ |
তাবদ্যুগসহস্রাণি শিবলোকে মহীযতে || ৪- ৩৬||
নাগকেসরপুষ্পং তু কুঙ্কুমার্ধেন কীর্তিতম্ |
যত্ফলং চন্দনস্যোক্তমুশীরস্য তদর্ধকম্ || ৪- ৩৭||
যত্পুষ্পধূপভষ্যান্ন- দধিক্ষীরঘৃতাদিভিঃ |
পুণ্যলিঙ্গার্চনে প্রোক্তং তদ্ধোমস্য দশাধিকম্ || ৪- ৩৮||
হুত্বাগ্নৌ সমিধস্তিস্রৌ শিবোমাস্কন্দনামভিঃ |
পশ্চাদ্দদ্যাত্তিলান্নানি হোমযীত যথাক্রমম্ || ৪- ৩৯||
পলাশাঅঙ্কুরজারিষ্ট- পালাল্যঃ(?)সমিধঃ শুভাঃ |
পৃষদাজ্যপ্লুতা হুত্বা শৃণু যত্ফলমাপ্নুযাত্ || ৪- ৪০||
পলাশাঙ্কুরসংখ্যানাং যাবদগ্নৌ হুতং ভবেত্ |
তাবত্কল্পান্মহাভোগৈঃ শিবলোকে মহীযতে || ৪- ৪১||
তল্লক্ষ্যমধ্যসংভূতং হুত্বাগ্নৌ সমিধঃ শুভাঃ |
কল্পার্ধসংমিতং কালং ভোগান্ভুঙ্ক্তে শিবে পুরে || ৪- ৪২||
শমীসমিত্ফলং দেযমব্দানপি চ লক্ষকম্ |
শম্যর্ধফলবচ্ছেষাঃ সমিধঃ ক্ষীরবৃক্ষজাঃ || ৪- ৪৩||
তিলসংখ্যাংস্তিলান্হুত্বা হ্যাজ্যাক্তা(?)যাবতী ভবেত্ |
তাবত্স বর্ষলক্ষাংস্তু ভোগান্ভুঙ্ক্তে শিবে পুরে || ৪- ৪৪||
যাবত্সুরৌষধীরজ্ঞস্(?)তিলতুল্যফলং স্মৃতম্ |
ইতরেভ্যস্তিলেভ্যশ্চ কৃষ্ণানাং দ্বিগুণং ফলম্ || ৪- ৪৫||
লাজাক্ষতাঃ সগোধূমাঃ বর্ষলক্ষফলপ্রদাঃ |
দশসাহস্রিকা জ্ঞেযাঃ শেষাঃ স্যুর্বীজজাতযঃ || ৪- ৪৬||
পলাশেন্ধনজে বহ্নৌ হোমস্য দ্বিগুণং ফলম্ |
ক্ষীরবৃক্ষসমৃদ্ধে ঽগ্নৌ ফলং সার্ধার্ধিকং ভবেত্ || ৪- ৪৭||
অসমিদ্ধে সধূমে চ হোমকর্ম নিরর্থকম্ |
অন্ধশ্চ জাযমানঃ স্যাদ্দারিদ্র্যোপহতস্তথা || ৪- ৪৮||
ন চ কণ্টকিভির্বৃক্ষৈরগ্নিং প্রজ্বাল্য হোমযেত্ |
শুষ্কৈর্নবৈঃ প্রশস্তৈশ্চ কাষ্ঠৈরগ্নিং সমিন্ধযেত্ || ৪- ৪৯||
এবমাজ্যাহুতিং হুত্বা শিবলোকমবাপ্নুযাত্ |
তত্র কল্পশতং ভোগান্ভুঙ্ক্তে দিব্যান্যথেপ্সিতান্ || ৪- ৫০||
স্রুচৈকাহিতমাত্রেণ ব্রতস্যাপূরিতেন চ |
যাহুতির্দীযতে বহ্নৌ সা পূর্ণাহুতিরুচ্যতে || ৪- ৫১||
একাং পূর্ণাহুতিং হুত্বা শিবেন শিবভাবিতঃ |
সর্বকামমবাপ্নোতি শিবলোকে ব্যবস্থিতঃ || ৪- ৫২||
অশেষকুলজৈর্সার্ধং স ভৃত্যৈঃ পরিবারিতঃ |
আভূতসংপ্লবং যাবদ্ভোগান্ভুঙ্ক্তে যথেপ্সিতান্ || ৪- ৫৩||
ততশ্চ প্রলযে প্রাপ্তে সংপ্রাপ্য জ্ঞানমুত্তমম্ |
প্রসাদাদীশ্বরস্যৈব মুচ্যতে ভবসাগরাত্ || ৪- ৫৪||
শিবপূর্ণাহুতিং বহ্নৌ পতন্তীং যঃ প্রপশ্যতি |
সো ঽপি পাপরি নরঃ সর্বৈর্মুক্তঃ শিবপুরং ব্রজেত্ || ৪- ৫৫||
শিবাগ্নিধূমসংস্পৃষ্টা জীবাঃ সর্বে চরাচরাঃ |
তে ঽপি পাপবিনির্মুক্তাঃ স্বর্গং যান্তি ন সংশযঃ || ৪- ৫৬||
শিবযজ্ঞমহাবেদ্যা জাযতে যে ন সন্তি বা |
তে ঽপি যান্তি শিবস্থানং জীবাঃ স্থাবরজঙ্গমাঃ || ৪- ৫৭||
পূর্ণাহুতিং ঘৃতাভাবে ক্ষীরতৈলেন কল্পযেত্ |
হোমযেদতসীতৈলং তিলতৈলং বিনা নরঃ || ৪- ৫৮||
সর্ষপেঙ্গুডিকাশাম্র- করঞ্জমধুকাক্ষজম্ |
প্রিযঙ্গুবিল্বপৈপ্পল্য- নালিকেরসমুদ্ভবম্(?)|| ৪- ৫৯||
ইত্যেবমাদিকং তৈলমাজ্যাভাবে প্রকল্পযেত্ |
দূর্বযা বিল্বপত্ত্রৈর্বা সমিধঃ সংপ্রকীর্তিতাঃ || ৪- ৬০||
অন্নার্থং হোমযেত্ক্ষীরং দধি মূলফলানি বা |
তিলার্থং তণ্ডুলৈঃ কুর্যাদ্দর্ভার্থং হরিতৈস্তৃণৈঃ || ৪- ৬১||
পরিধীনামভাবেন শরৈর্বংশৈশ্চ কল্পযেত্ |
ইন্ধনানামভাবেন দীপযেত্তৃণগোমযৈঃ || ৪- ৬২||
গোমযানামভাবেন মহত্যম্ভসি হোমযেত্ |
অপামসংভবে হোমং ভূমিভাগে মনোহরে || ৪- ৬৩||
বিপ্রস্য দক্ষিণে পাণাবশ্বত্থে তদভাবতঃ |
ছাগস্য দক্ষিণে কর্ণে কুশমূলে চ হোমযেত্ || ৪- ৬৪||
স্বাত্মাগ্নৌ হোমযেত্প্রাজ্ঞঃ সর্বাগ্নীনামসংভবে |
অভাবে ন ত্যজেত্কর্ম কর্মযোগবিধৌ স্থিতঃ || ৪- ৬৫||
আপত্কালে ঽপি যঃ কুর্যাচ্ছিবাগ্নের্মনসার্চনম্ |
স মোহকঞ্চুকং ত্যক্ত্বা পরাং শান্তিমবাপ্নুযাত্ || ৪- ৬৬||
প্রাণাগ্নিহোত্রং কুর্বন্তি পরমং শিবযোগিনঃ |
বাহ্যকর্মবিনির্মুক্তা জ্ঞানধ্যানসমাকুলাঃ || ৪- ৬৭||
|| ইতি শিবোপনিষদি শান্তিগৃহাগ্নিকার্যাধ্যাযশ্চতুর্থঃ ||
——————————————————————————–
অথাগ্নেযং মহাস্নানমলক্ষ্মীমলনাশনম্ |
সর্বপাপহরং দিব্যং তপঃ শ্রীকীর্তিবর্ধনম্ || ৫- ১||
অগ্নিরূপেণ রুদ্রেণ স্বতেজঃ পরমং বলম্ |
ভূতিরূপং সমুদ্গীর্ণং বিশুদ্ধং দুরিতাপহম্ || ৫- ২||
যক্ষরক্ষঃপিশাচানাং ধ্বংসনং মন্ত্রসত্কৃতম্ |
রক্ষার্থং বালরূপাণাং সূতিকানাং গৃহেষু চ || ৫- ৩||
যশ্চ ভুঙ্ক্তে দ্বিজঃ কৃত্বা অন্নস্য বা পরিধিত্রযম্(?)|
অপি শূদ্রস্য পঙ্ক্তিস্থঃ পঙ্ক্তিদোষৈর্ন লিপ্যতে || ৫- ৪||
আহারমর্ধভুক্তং চ কীটকেশাদিদূষিতম্ |
তাবন্মাত্রং সমুদ্ধৃত্য ভূতিস্পৃষ্টং বিশুদ্ধ্যতি || ৫- ৫||
আরণ্যং গোমযকৃতং করীষং বা প্রশস্যতে |
শর্করাপাংসুনির্মুক্তমভাবে কাষ্ঠভস্মনা || ৫- ৬||
স্বগৃহাশ্রমবল্লিভ্যঃ কুলালালযভস্মনা |
গোমযেষু চ দগ্ধেষু হীষ্টকানি চ যেষু চ || ৫- ৭||
সর্বত্র বিদ্যতে ভস্ম দুঃখাপার্জনরক্ষণম্(duHkhopAr)|
শঙ্খকুন্দেন্দুবর্ণাভমাদদ্যাজ্জন্তুবর্জিতম্ || ৫- ৮||
ভস্মানীয প্রযত্নেন তদ্রক্ষেদ্যত্নবাংস্তথা |
মার্জারমূষিকাদ্যৈশ্চ নোপহন্যেত তদ্যথা || ৫- ৯||
পঞ্চদোষবিনির্মুক্তং গুণপঞ্চকসংযুতম্ |
শিবৈকাদশিকাজপ্তং শিবভস্ম প্রকীর্তিতম্ || ৫- ১০||
জাতিকারুকবাক্কায- স্থানদুষ্টং চ পঞ্চমম্ |
পাপঘ্নং শাংকরং রক্ষা- পবিত্রং যোগদং গুণাঃ(?)|| ৫- ১১||
শিবব্রতস্য শান্তস্য ভাসকত্বাচ্ছুভস্য চ |
ভক্ষণাত্সর্বপাপানাং ভস্মেতি পরিকীর্তিতম্ || ৫- ১২||
ভস্মস্নানং শিবস্নানং বারুণাদধিকং স্মৃতম্ |
জন্তুশৈবালনির্মুক্তমাগ্নেযং পঙ্কবর্জিতম্ || ৫- ১৩||
অপবিত্রং ভবেত্তোযং নিশি পূর্বমনাহৃতম্ |
নদীতডাগবাপিষু গিরিপ্রস্রবণেষু চ || ৫- ১৪||
স্নানং সাধারণং প্রোক্তং বারুণং সর্বদেহিনাম্ |
অসাধারণমেবোক্তং ভস্মস্নানং দ্বিজন্মনাম্ || ৫- ১৫||
ত্রিকালং বারুণস্নানাদনারোগ্যং প্রজাযতে |
আগ্নেযং রোগশমনমেতস্মাদ্সার্বকামিকম্ || ৫- ১৬||
সংধ্যাত্রযে ঽর্ধরাত্রে চ ভুক্ত্বা চান্নবিরেচনে |
শিবযোগ্যাচরেত্স্নানমুচ্চারাদিক্রিযাসু চ || ৫- ১৭||
ভস্মাস্তৃতে মহীভাগে সমে জন্তুবিবর্জিতে |
ধ্যাযমানঃ শিবং যোগী রজন্যন্তং শযীত চ || ৫- ১৮||
একরাত্রোষিতস্যাপি যা গতির্ভস্মশাযিনঃ |
ন সা শক্যা গৃহস্থেন প্রাপ্তুং যজ্ঞশতৈরপি || ৫- ১৯||
গৃহস্থস্ত্র্যাযুষোংকারৈঃ স্নানং কুর্যাত্ত্রিপুণ্ড্রকৈঃ |
যতিঃ সার্বাঙ্গিকং স্নানমাপাদতলমস্তকাত্ || ৫- ২০||
শিবভক্তস্ত্রিধা বেদ্যাং ভস্মস্নানফলং লভেত্ |
হৃদি মূর্ধ্নি ললাটে চ শূদ্রঃ শিবগৃহাশ্রমী || ৫- ২১||
গণাঃ প্রব্রজিতাঃ শান্তাঃ ভূতিমালভ্য পঞ্চধা |
শিরোললাটে হৃদ্বাহ্বোর্ভস্মস্নানফলং লভেত্ || ৫- ২২||
সংবত্সরং তদর্ধং বা চতুর্দশ্যষ্টমীষু চ |
যঃ কুর্যাদ্ভস্মনা স্নানং তস্য পুণ্যফলং শৃনু || ৫- ২৩||
শিবভস্মনি যাবন্তঃ সমেতাঃ পরমাণবঃ |
তাবদ্বর্ষসহস্রাণি শিবলোকে মহীযতে || ৫- ২৪||
একবিংশকুলোপেতঃ পত্নীপুত্রাদিসংযুতঃ |
মিত্রস্বজনভৃত্যৈশ্চ সমস্তৈঃ পরিবারিতঃ || ৫- ২৫||
তত্র ভুক্ত্বা মহাভোগানিচ্ছযা সার্বকামিকান্ |
জ্ঞানযোগং সমাসাদ্য প্রলযে মুক্তিমাপ্নুযাত্ || ৫- ২৬||
ভস্ম ভস্মান্তিকং যেন গৃহীতং নৈষ্ঠিকব্রতম্(?)|
অনেন বৈ স দেহেন রুদ্রশ্চঙ্ক্রমতে ক্ষিতৌ || ৫- ২৭||
ভস্মস্নানরতং শান্তং যে নমন্তি দিনে দিনে |
তে সর্বপাপনির্মুক্তা নরা যান্তি শিবং পুরম্ || ৫- ২৮||
ইত্যেতত্পরমং স্নানমাগ্নেযং শিবনির্মিতম্ |
ত্রিসংধ্যমাচরেন্নিত্যং জাপী যোগমবাপ্নুযাত্ || ৫- ২৯||
ভস্মানীয প্রদদ্যাদ্যঃ স্নানার্থং শিবযোগিনে |
কল্পং শিবপুরে ভোগান্ভুক্ত্বান্তে স্যাদ্দ্বিজোত্তমঃ || ৫- ৩০||
আগ্নেযং বারুণং মান্ত্রং বাযব্যং ত্বৈন্দ্রপঞ্চমম্ |
মানসং শান্তিতোযং চ জ্ঞানস্নানং তথাষ্টমম্ || ৫- ৩১ ||
আগ্নেযং রুদ্রমন্ত্রেণ ভস্মস্নানমনুত্তমম্ |
অম্ভসা বারুণং স্নানম্কার্যং বারুণমূর্তিনা || ৫- ৩২||
মূর্ধানং পাণিনালভ্য শিবৈকাদশিকাং জপেত্ |
ধ্যাযমানঃ শিবং শান্তম্মন্ত্রস্নানং পরং স্মৃতম্ || ৫- ৩৩||
গবাং খুরপুটোত্খাত- পবনোদ্ধূতরেণুনা |
কার্যং বাযব্যকং স্নানম্মন্ত্রেণ মরুদাত্মনা || ৫- ৩৪||
ব্যভ্রে ঽর্কে বর্ষতি স্নানং কুর্যাদৈন্দ্রীং দিশং স্থিতঃ |
আকাশমূর্তিমন্ত্রেণ তদৈন্দ্রমিতি কীর্তিতম্ || ৫- ৩৫||
উদকং পাণিনা গৃহ্য সর্বতীর্থানি সংস্মরেত্ |
অভ্যুক্ষযেচ্ছিরস্তেন স্নানং মানসমুচ্যতে || ৫- ৩৬||
পৃথিব্যাং যানি তীর্থানি সরাংস্যাযতনানি চ |
তেষু স্নাতস্য যত্পুণ্যং তত্পুণ্যং ক্ষান্তিবারিণা || ৫- ৩৭||
ন তথা শুধ্যতে তীর্থৈস্তপোভির্বা মহাধ্বরৈঃ |
পুরুষঃ সর্বদানৈশ্চ যথা ক্ষান্ত্যা বিশুদ্ধ্যতি || ৫- ৩৮||
আক্রুষ্টস্তাডিতস্তস্মাদধিক্ষিপ্তস্তিরস্কৃত |
ক্ষমেদক্ষমমানানাং স্বর্গমোক্ষজিগীষযা || ৫- ৩৯||
যৈব ব্রহ্মবিদাং প্রাপ্তির্যৈব প্রাপ্তিস্তপস্বিনাম্ |
যৈব যোগাভিযুক্তানাং গতিঃ সৈব ক্ষমাবতাম্ || ৫- ৪০||
জ্ঞানামলাম্ভসা স্নাতঃ সর্বদৈব মুনিঃ শুচিঃ |
নির্মলঃ সুবিশুদ্ধশ্চ বিজ্ঞেযঃ সূর্যরশ্মিবত্ || ৫- ৪১||
মেধ্যামেধ্যরসং যদ্বদপি বত্স বিনা করৈঃ |
নৈব লিপ্যতি তদ্দোষৈস্তদ্বজ্জ্ঞানী সুনির্মলঃ || ৫- ৪২||
এষামেকতমে স্নাতঃ শুদ্ধভাবঃ শিবং ব্রজেত্ |
অশুদ্ধভাবঃ স্নাতো ঽপি পূজযন্নাপ্নুযাত্ফলম্ || ৫- ৪৩||
জলং মন্ত্রং দযা দানং সত্যমিন্দ্রিযসংযমঃ |
জ্ঞানং ভাবাত্মশুদ্ধিশ্চ শৌচমষ্টবিধং শ্রুতম্ || ৫- ৪৪||
অঙ্গুষ্ঠতলমূলে চ ব্রাহ্মং তীর্থমবস্থিতম্ |
তেনাচম্য ভবেচ্ছুদ্ধঃ শিবমন্ত্রেণ ভাবিতঃ || ৫- ৪৫||
যদধঃ কন্যকাযাশ্চ তত্তীর্থং দৈবমুচ্যতে |
তীর্থং প্রদেশিনীমূলে পিত্র্যং পিতৃবিধোদযম্(?)|| ৫- ৪৬||
মধ্যমাঙ্গুলিমধ্যেন তীর্থমারিষমুচ্যতে |
করপুষ্করমধ্যে তু শিবতীর্থং প্রতিষ্ঠিতম্ || ৫- ৪৭||
বামপাণিতলে তীর্থমৌমম্নাম প্রকীর্তিতম্ |
শিবোমাতীর্থসংযোগাত্কুর্যাত্স্নানাভিষেচনম্ || ৫- ৪৮||
দেবান্দৈবেন তীর্থেন তর্পযেদকৃতাম্ভসা |
উদ্ধৃত্য দক্ষিণং পাণিমুপবীতী সদা বুধঃ || ৫- ৪৯||
প্রাচীনাবীতিনা কার্যং পিতৄণাং তিলবারিণা |
তর্পণং সর্বভূতানামারিষেণ নিবীতিনা || ৫- ৫০||
সব্যস্কন্ধে যদা সূত্রমুপবীত্যুচ্যতে তদা |
প্রাচীনাবীত্যসব্যেন নিবীতী কণ্ঠসংস্থিতে || ৫- ৫১||
পিতৄণাং তর্পণং কৃত্বা সূর্যাযার্ঘ্যং প্রকল্পযেত্ |
উপস্থায ততঃ সূর্যং যজেচ্ছিবমনন্তরম্ || ৫- ৫২||
|| ইতি শিবোপনিষদি শিবভস্মস্নানাধ্যাযঃ পঞ্চমঃ ||
——————————————————————————–
অথ ভক্ত্যা শিবং পূজ্য নৈবেদ্যমুপকল্পযেত্ |
যদন্নমাত্মনাশ্নীযাত্তস্যাগ্রে বিনিবেদযেত্ || ৬- ১||
যঃ কৃত্বা ভক্ষ্যভোজ্যানি যত্নেন বিনিবেদযেত্ |
শিবায স শিবে লোকে কল্পকোটিং প্রমোদতে || ৬- ২||
যঃ পক্বং শ্রীফলং দদ্যাচ্ছিবায বিনিবেদযেত্ |
গুরোর্বা হোমযেদ্বাপি তস্য পুণ্যফলং শৃণু || ৬- ৩||
শ্রীমদ্ভিঃ স মহাযানৈর্ভোগান্ভুঙ্ক্তে শিবে পুরে |
বর্ষাণামযুতং সাগ্রং তদন্তে শ্রীপতির্ভবেত্ || ৬- ৪||
কপিত্থমেকং যঃ পক্বমীশ্বরায নিবেদযেত্ |
বর্ষলক্ষং মহাভোগৈঃ শিবলোকে মহীযতে || ৬- ৫||
একমাম্রফলং পক্বং যঃ শম্ভোর্বিনিবেদযেত্ |
বর্ষাণাম্যুতং ভোগৈঃ ক্রীডতে স শিবে পুরে || ৬- ৬||
একং বটফলং পক্বং যঃ শিবায নিবেদযেত্ |
বর্ষলক্ষং মহাভোগৈঃ শিবলোকে মহীযতে || ৬- ৭||
যঃ পক্বং দাডিমং চৈকং দদ্যাদ্বিকসিতং নবম্ |
শিবায গুরবে বাপি তস্য পুণ্যফলং শৃণু || ৬- ৮||
যাবত্তদ্বীজসংখ্যানং শোভনং পরিকীর্তিতম্ |
তাবদষ্টাযুতান্যুচ্চৈঃ শিবলোকে মহীযতে || ৬- ৯||
দ্রাক্ষাফলানি পক্বানি যঃ শিবায নিবেদযেত্ |
ভক্ত্যা বা শিবযোগিভ্যস্তস্য পুণ্যফলং শৃণু || ৬- ১০||
যাবত্তত্ফলসংখ্যানমুভযোর্বিনিবেদিতম্ |
তাবদ্যুগসহস্রাণি রুদ্রলোকে মহীযতে || ৬- ১১||
দ্রাক্ষাফলেষু যত্পুণ্যং তত্খর্জূরফলেষু চ |
তদেব রাজবৃক্ষেষু পারাবতফলেষু চ || ৬- ১২||
যো নারঙ্গফলং পক্বং বিনিবেদ্য মহেশ্বরে |
অষ্টলক্ষং মহাভোগৈঃ কৃডতে স শিবে পুরে || ৬- ১৩||
বীজপূরেষু তস্যার্ধং তদর্ধং লিকুচেষু চ |
জম্বূফলেষু যত্পুণ্যং তত্পুণ্যং তিন্দুকেষু চ || ৬- ১৪||
পনসং নারিকেলং বা শিবায বিনিবেদযেত্ |
বর্ষলক্ষং মহাভোগৈঃ শিবলোকে মহীযতে || ৬- ১৫||
পুরুষং চ প্রিযালং চ মধূককুসুমানি চ |
জম্বূফলানি পক্বানি বৈকঙ্কতফলানি চ || ৬- ১৬||
নিবেদ্য ভক্ত্যা শর্বায প্রত্যেকং তু ফলে ফলে |
দশবর্ষসহস্রাণি রুদ্রলোকে মহীযতে || ৬- ১৭||
ক্ষীরিকাযাঃ ফলং পক্বং যঃ শিবায নিবেদযেত্ |
বর্ষলক্ষং মহাভোগৈর্মোদতে স শিবে পুরে || ৬- ১৮||
বালুকাত্রপুসাদীনি যঃ ফলানি নিবেদযেত্ |
শিবায গুরবে বাপি পক্বং চ করমর্দকম্ || ৬- ১৯||
দশবর্ষসহস্রাণি রুদ্রলোকে মহীযতে |
বদরাণি সুপক্বানি তিন্তিডীকফলানি চ || ৬- ২০||
দর্শনীযানি পক্বানি হ্যামলক্যাঃ ফলানি চ |
এবমাদীনি চান্যানি শাকমূলফলানি চ || ৬- ২১||
নিবেদযতি শর্বায শৃণু যত্ফলমাপ্নুযাত্ |
একৈকস্মিন্ফলে ভোগান্প্রাপ্নুযাদনুপূর্বশঃ || ৬- ২২||
পঞ্চবর্ষসহস্রাণি রুদ্রলোকে মহীযতে |
গোধূমচন্দকাদ্যানি সুকৃতং সক্তুভর্জিতম্ || ৬- ২৩||
নিবেদযীত শর্বায তস্য পুণ্যফলং শৃণু |
যাবত্তদ্বীজসংখ্যানং শুভং ভ্রষ্টং নিবেদযেত্ || ৬- ২৪||
তাবদ্বর্ষসহস্রাণি রুদ্রলোকে মহীযতে |
যঃ পক্বানীক্ষুদণ্ডানি শিবায বিনিবেদযেত্ || ৬- ২৫||
গুরবে বাপি তদ্ভক্ত্যা তস্য পুণ্যফলং শৃণু |
ইক্ষুপর্ণানি চৈকৈকং বর্ষলোকং প্রমোদতে || ৬- ২৬||
সাকং শিবপুরে ভোগৈঃ পৌণ্ড্রং পঞ্চগুণং ফলম্ |
নিবেদ্য পরমেশায শুক্তিমাত্ররসস্য তু || ৬- ২৭||
বর্ষকোটিং মহাভোগৈঃ শিবলোকে মহীযতে |
নিবেদ্য ফাণিতং শুদ্ধং শিবায গুরবে ঽপি বা || ৬- ২৮||
রসাত্সহস্রগুণিতং ফলং প্রাপ্নোতি মানবঃ |
গুডস্য ফলমেকং যঃ শিবায বিনিবেদযেত্ || ৬- ২৯||
অম্বকোটিং শিবে লোকে মহাভোগৈঃ প্রমোদতে |
খণ্ডস্য পলনৈবেদ্যং গুডাচ্ছতগুণং ফলম্ || ৬- ৩০||
খণ্ডাত্সহস্রগুণিতং শর্করাযা নিবেদনে |
মত্সণ্ডিকাং মহাশুদ্ধাং শংকরায নিবেদযেত্ || ৬- ৩১||
কল্পকোটিং নরঃ সাগ্রং শিবলোকে মহীযতে |
পরিশুদ্ধং ভৃষ্টমাজ্যং সিদ্ধং চৈব সুসংস্কৃতম্ || ৬- ৩২||
মাসং নিবেদ্য শর্বায শৃণু যত্ফলমাপ্নুযাত্ |
অশেষফলদানেন যত্পুণ্যং পরিকীর্তিতম্ || ৬- ৩৩||
তত্পুণ্যং প্রাপ্নুযাত্সর্বং মহাদাননিবেদনে |
পনসানি চ দিব্যানি স্বাদূনি সুরভীণি চ || ৬- ৩৪||
নিবেদযেত্তু শর্বায তস্য পুণ্যফলং শৃণু |
কল্পকোটিং নরঃ সাগ্রং শিবলোকে ব্যবস্থিতঃ || ৬- ৩৫||
পিবন্শিবামৃতং দিব্যং মহাভোগৈঃ প্রমোদতে |
দিনে দিনে চ যস্ত্বাপং বস্ত্রপূতং সমাচরেত্ || ৬- ৩৬||
সুখায শিবভক্তেভ্যস্তস্য পুণ্যফলং শৃণু |
মহাসরাংসি যঃ কুর্যাদ্ভবেত্পুণ্যং শিবাগ্রতঃ || ৬- ৩৭||
তত্পুণ্যং সকলং প্রাপ্য শিবলোকে মহীযতে |
যদিষ্টমাত্মনঃ কিংচিদন্নপানফলাদিকম্ || ৬- ৩৮||
তত্তচ্ছিবায দেযং স্যাদুত্তমং ভোগমিচ্ছতা |
ন শিবঃ পরিপূর্ণত্বাত্কিংচিদশ্নাতি কস্যচিত্ || ৬- ৩৯||
কিন্ত্বীশ্বরনিভং কৃত্বা সর্বমাত্মনি দীযতে |
ন রোহতি যথা বীজং স্বস্থমাশ্রযবর্জিতম্ || ৬- ৪০||
পুণ্যবীজং তথা সূক্ষ্মং নিষ্ফলং স্যান্নিরাশ্রযম্ |
সুক্ষেত্রেষু যথা বীজমুপ্তং ভবতি সত্ফলম্ || ৬- ৪১||
অল্পমপ্যক্ষযং তদ্বত্পুণ্যং শিবসমাশ্রযাত্ |
তস্মাদীশ্বরমুদ্দিশ্য যদ্যদাত্মনি রোচতে || ৬- ৪২||
তত্তদীশ্বরভক্তেভ্যঃ প্রদাতব্যং ফলার্থিনা |
যঃ শিবায গুরোর্বাপি রচযেন্মণিভূমিকম্ || ৬- ৪৩||
নৈবেদ্য ভোজনার্থং যঃ পত্ত্রৈঃ পুষ্পৈশ্চ শোভনম্ |
যাবত্তত্পত্ত্রপুষ্পাণাং পরিসংখ্যা বিধীযতে || ৬- ৪৪||
তাবদ্বর্ষসহস্রাণি সুরলোকে মহীযতে |
পলাশকদলীপদ্ম- পত্ত্রাণি চ বিশেষতঃ || ৬- ৪৫||
দত্ত্বা শিবায গুরবে শৃণু যত্ফলমাপ্নুযাত্ |
যাবত্তত্পত্ত্রসংখ্যানমীশ্বরায নিবেদিতম্ || ৬- ৪৬||
তাবদব্দাযুতানাং স লোকে ভোগানবাপ্নুযাত্ |
যাবত্তাম্বুলপত্ত্রাণি পূগাংশ্চ বিনিবেদযেত্ || ৬- ৪৭||
তাবন্তি বর্ষলক্ষাণি শিবলোকে মহীযতে |
যচ্ছুদ্ধং শঙ্খচূর্ণং বা গুরবে বিনিবেদযেত্ || ৬- ৪৮||
তাম্বূলযোগসিদ্ধ্যর্থং তস্য পুণ্যফলং শৃণু |
যাবত্তাম্বূলপত্ত্রাণি চূর্ণমানেন ভক্ষযেত্ || ৬- ৪৯||
তাবদ্বর্ষসহস্রাণি রুদ্রলোকে মহীযতে |
জাতীফলং সকঙ্কোলং লতাকস্তূরিকোত্পলম্ || ৬- ৫০||
ইত্যেতানি সুগন্ধীনি ফলানি বিনিবেদযেত্ |
ফলে ফলে মহাভোগৈর্বর্ষলক্ষং তু যত্নতঃ || ৬- ৫১||
কামিকেন বিমানেন ক্রীডতে স শিবে পুরে |
ত্রুটিমাত্রপ্রমাণেন কর্পূরস্য শিবে গুরৌ || ৬- ৫২||
বর্ষকোটিং মহাভোগৈঃ শিবলোকে মহীযতে |
পূগতাম্বূলপত্ত্রাণামাধারং যো নিবেদযেত্ || ৬- ৫৩||
বর্ষকোট্যষ্টকং ভোগৈঃ শিবলোকে মহীযতে |
যশ্চূএণাধারসত্পাত্রং কস্যাপি বিনিবেদযেত্ || ৬- ৫৪||
মোদতে স শিবে লোকে বর্ষকোটীশ্চতুর্দশ |
মৃত্কাষ্ঠবংশখণ্ডানি যঃ প্রদদ্যাচ্ছিবাশ্রমে || ৬- ৫৫||
প্রাপ্নুযাদ্বিপুলান্ভোগান্দিব্যাঞ্ছিবপুরে নরঃ |
মাণিক্যং কলশং পাত্রীং স্থাল্যাদীন্ভাণ্ডসংপুটান্ || ৬- ৫৬||
দত্ত্বা শিবাগ্রজস্তেভ্যঃ শিবলোকে মহীযতে |
তোযাধারপিধানানি মৃদ্বস্ত্রতরুজানি বা || ৬- ৫৭||
বংশালাবুসমুত্থানি দত্ত্বাপ্নোতি শিবং পুরম্ |
পঞ্চসংমার্জনীতোযং গোমযাঞ্জনকর্পটান্ || ৬- ৫৮||
মৃত্কুম্ভপীটিকাং দদ্যাদ্ভোগাঞ্ছিবপুরে লভেত্ |
যঃ পুষ্পধূপগন্ধানাং দধিক্ষীরঘৃতাম্ভসাম্ || ৬- ৫৯||
দদ্যাদাধারপাত্রাণি শিবলোকে স গচ্ছতি |
বংশতালাদিসংভূতং পুষ্পাধারকরণ্ডকম্ || ৬- ৬০||
ইত্যেবমাদ্যান্যো দদ্যাচ্ছিবলোকমবাপ্নুযাত্ |
যঃ স্রুক্স্রুবাদিপাত্রাণি হোমার্থং বিনিবেদযেত্ || ৬- ৬১||
বর্ষকোটিং মহাভাগৈঃ শিবলোকে মহীযতে |
যঃ সর্বধাতুসংযুক্তং দদ্যাল্লবণপর্বতম্ || ৬- ৬২||
শিবায গুরবে বাপি তস্য পুণ্যফলং শৃণু |
কল্পকোটিসহস্রাণি কল্পকোটিশতানি চ || ৬- ৬৩||
স গোত্রভৃত্যসংযুক্তো বসেচ্ছিবপুরে নরঃ |
বিমানযানৈঃ শ্রীমদ্ভিঃ সর্বকামসমন্বিতৈঃ || ৬- ৬৪||
ভোগান্ভুক্ত্বা তু বিপুলাংস্তদন্তে স মহীপতিঃ |
মনঃশিলাং হরীতালং রাজপট্টং চ হিঙ্গুলম্ || ৬- ৬৫||
গৈরিকং মণিদন্তং চ হেমতোযং তথাষ্টমম্ |
যশ্চ তং পর্বতবরং শালিতণ্ডুলকল্পিতম্ || ৬- ৬৬||
শিবাযগুরবে বাপি তস্য পুণ্যফলং শৃণু |
কল্পকোটিশতং সাগ্রং ভোগান্ভুঙ্ক্তে শিবে পুরে || ৬- ৬৭||
যঃ সর্বধান্যশিখরৈরুপেতং যবপর্বতম্ |
ঘৃততৈলনদীযুক্তং তস্য পুণ্যফলং শৃণু || ৬- ৬৮||
কল্পকোটিশতং সাগ্রং ভোগান্ভুঙ্ক্তে শিবে পুরে |
সমস্তকুলজৈঃ সার্ধং তস্যান্তে স মহীপতিঃ || ৬- ৬৯||
তিলধেনুং প্রদদ্যাদ্যঃ কৃত্বা কৃষ্ণাজিনে নরঃ |
কপিলাযাঃ প্রদানস্য যত্ফলং তদবাপ্নুযাত্ || ৬- ৭০||
ঘৃতধেনুং নরঃ কৃত্বা কাংস্যপাত্রে সকাঞ্চনান্ |
নিবেদ্য গোপ্রদানস্য সমগ্রং ফলমাপ্নুযাত্ || ৬- ৭১||
দ্বীপিচর্মণি যঃ স্থাপ্য প্রদদ্যাল্লবণাঢকম্ |
অশেষরসদানস্য যত্পুণ্যং তদবাপ্নুযাত্ || ৬- ৭২||
মরিচাঢেন কুর্বীত(?)মারীচং নাম পর্বতম্ |
দদ্যাদ্যজ্জীরকং পূর্বমাগ্নেযং হিঙ্গুমুত্তমম্ || ৬- ৭৩||
দক্ষিণে গুডশুণ্ঠীং চ নৈরৃতে নাগকেসরম্ |
পিপ্পলীং পশ্চিমে দদ্যাদ্বাযব্যে কৃষ্ণজীরকম্ || ৬- ৭৪||
কৌবের্যামজমোদং চ ত্বগেলাশ্চেশদৈবতে |
কুস্তুম্বর্যাঃ প্রদেযাঃ স্যুর্বহিঃ প্রাকারতঃ স্থিতাঃ || ৬- ৭৫||
ককুভামন্তরালেষু সমন্তাত্সৈন্ধবং ন্যসেত্ |
সপুষ্পাক্ষততোযেন শিবায বিনিবেদযেত্ || ৬- ৭৬||
যাবত্তদ্দীপসংখ্যানং সর্বমেকত্র পর্বতে |
তাবদ্বর্ষশতাদূর্ধ্বং ভোগান্ভুঙ্ক্তে শিবে পুরে || ৬- ৭৭||
কূশ্মাণ্ডং মধ্যতঃ স্থাপ্য কালিঙ্গং পূর্বতো ন্যসেত্ |
দক্ষিণে ক্ষীরতুম্বীং তু বৃন্তাকং পশ্চিমে ন্যসেত্ || ৬- ৭৮||
পটীসান্যুত্তরে স্থাপ্য কর্কটীমীশদৈবতে |
ন্যসেদ্গজপটোলাংশ্চ মধুরান্বহ্নিদৈবতে || ৬- ৭৯||
কারবেল্লাংশ্চ নৈরৃত্যাং বাযব্যাং নিম্বকং ফলম্ |
উচ্চাবচানি চান্যানি ফলানি স্থাপযেদ্বহিঃ || ৬- ৮০||
অভ্যর্চ্য পুষ্পধূপৈশ্চ সমন্তাত্ফলপর্বতম্ |
শিবায গুরবে বাপি প্রণিপত্য নিবেদযেত্ || ৬- ৮১||
যাবত্তত্ফলসংখ্যানং তদ্দীপানাং চ মধ্যতঃ |
তাবদ্বর্ষসহস্রাণি রুদ্রলোকে মহীযতে || ৬- ৮২||
মূলকং মধ্যতঃ স্থাপ্য তত্পূর্বে বালমূলকম্ |
আগ্নেয্যাং বাস্তুকং স্থাপ্য যাম্যাযাং ক্ষারবাস্তুকম্ || ৬- ৮৩||
পালক্যং নৈরৃতে স্থাপ্য সুমুখং পশ্চিমে ন্যসেত্ |
কুহদ্রকং চ বাযব্যামুত্তরে বাপি তালিকীম্ || ৬- ৮৪||
কুসুম্ভশাকমৈশান্যাং সর্বশাকানি তদ্বহিঃ |
পূর্বক্রমেণ বিন্যস্য শিবায বিনিবেদযেত্ || ৬- ৮৫||
যাবত্তন্মূলনালানাং পত্ত্রসংখ্যা চ কীর্তিতা |
তাবদ্বর্ষসহস্রাণি রুদ্রলোকে মহীযতে || ৬- ৮৬||
দত্ত্বা লভেন্মহাভোগান্গুগ্গুল্বদ্রেঃ পলদ্বযম্ |
বর্ষকোটিদ্বযং স্বর্গে দ্বিগুণং গুডমিশ্রিতৈঃ || ৬- ৮৭||
গুডার্দ্রকং সলবণমাম্রমঞ্জরিসংযুতম্ |
নিবেদ্য গুরবে ভক্ত্যা সৌভাগ্যং পরমং লভেত্ || ৬- ৮৮||
হস্তারোপ্যেণ বা কৃত্বা মহারত্নান্বিতাং মহীম্ |
নিবেদযিত্বা শর্বায শিবতুল্যঃ প্রজাযতে || ৬- ৮৯||
বজ্রেন্দ্রনীলবৈডূর্য- পদ্মরাগং সমৌক্তিকম্ |
কীটপক্ষং সুবর্ণং চ মহারত্নানি সপ্ত বৈ || ৬- ৯০||
যশ্চ সিংহাসনং দদ্যান্মহারত্নান্বিতং নৃপঃ |
ক্ষুদ্ররত্নৈশ্চ বিবিধৈস্তস্য পুণ্যফলং শৃণু || ৬- ৯১||
কুলত্রিংশকসংযুক্তঃ সান্তঃপুরপরিচ্ছদঃ |
সমস্তভৃত্যসংযুক্তঃ শিবলোকে মহীযতে || ৬- ৯২||
তত্র ভুক্ত্বা মহাভোগান্শিবতুল্যপরাক্রমঃ |
আমহাপ্রলযং যাবত্তদন্তে মুক্তিমাপ্নুযাত্ || ৬- ৯৩||
যদি চেদ্রাজ্যমাকঙ্ক্ষেত্ততঃ সর্বসমাহিতঃ |
সপ্তদ্বীপসমুদ্রাযাঃ ক্ষিতেরধিপতির্ভবেত্ || ৬- ৯৪||
জন্মকোটিসহস্রাণি জন্মকোটিশতানি চ |
রাজ্যং কৃত্বা ততশ্চান্তে পুনঃ শিবপুরং ব্রজেত্ || ৬- ৯৫||
এতদেব ফলং জ্ঞেযং মকুটাভরণাদিষু |
রত্নাসনপ্রদানেন পাদুকে বিনিবেদযেত্ || ৬- ৯৬||
দদ্যাদ্যঃ কেবলং বজ্রং শুদ্ধং গোধূমমাত্রকম্ |
শিবায স শিবে লোকে তিষ্ঠেদাপ্রলযং সুখী || ৬- ৯৭||
ইন্দ্রনীলপ্রদানেন স বৈডূর্যপ্রদানতঃ |
মোদতে বিবিধৈর্ভোগৈঃ কল্পকোটিং শিবে পুরে || ৬- ৯৮||
মসূরমাত্রমপি যঃ পদ্মরাগং সুশোভনম্ |
নিবেদযিত্বা শর্বায মোদতে কালমক্ষযম্ || ৬- ৯৯||
নিবেদ্য মৌক্তিকং স্বচ্ছমেকভাগৈকমাত্রকম্ |
ভোগৈঃ শিবপুরে দিব্যৈঃ কল্পকোটিং প্রমোদতে || ৬- ১০০||
কীটপক্ষং মহাশুদ্ধং নিবেদ্য যবমাত্রকম্ |
শিবাযাদ্যঃ শিবে লোকে মোদতে কালমক্ষযম্ || ৬- ১০১||
হেম্না কৃত্বা চ যঃ পুষ্পমপি মাষকমাত্রকম্ |
নিবেদযিত্বা শর্বায বর্ষকোটিং বসেদ্দিবি || ৬- ১০২||
ক্ষুদ্ররত্নানি যো দদ্যাদ্ধেম্নি বদ্ধানি শম্ভবে |
মোদতে স শিবে লোকে কল্পকোট্যযুতং নরঃ || ৬- ১০৩||
যথা যথা মহারত্নং শোভনং চ যথা যথা |
তথা তথা মহত্পুণ্যং জ্ঞেযং তচ্ছিবদানতঃ || ৬- ১০৪||
ভূমিভাগে স(?)বিস্তীঋণে জম্বূদ্বীপং প্রকল্পযেত্ |
অষ্টাবরণসংযুক্তং নগেন্দ্রাষ্টকভূষিতম্ || ৬- ১০৫||
তন্মধ্যে কারযেদ্দিব্যং মেরুপ্রাসাদমুত্তমম্ |
অনেকশিখরাকীর্ণমশেষামরসংযুতম্ || ৬- ১০৬||
বহিঃ সুবর্ণনিচিতং সর্বরত্নোপশোভিতম্ |
চতুঃপ্রগ্রীবকোপেতং চক্ষুর্লিঙ্গসমাযুতম্ || ৬- ১০৭||
চতুর্দিক্ষু বনোপেতং চতুর্ভিঃ সংযুতৈঃ শরৈঃ |
চতুর্ণাং পুরযুক্তেন প্রাকারেণ চ সংযুতম্ || ৬- ১০৮||
মেরুপ্রাসাদমিত্যেবং হেমরত্নবিভূষিতম্ |
যঃ কারযেদ্বনোপেতং সো ঽনন্তফলমাপ্নুযাত্ || ৬- ১০৯||
ভূম্যম্ভঃপরমাণূনাং যথা সংখ্যা ন বিদ্যতে |
শিবাযতনপুণ্যস্য তথা সংখ্যা ন বিদ্যতে || ৬- ১১০||
কুলত্রিংশকসংযুক্তঃ সর্বভৃত্যসমন্বিতঃ |
কলত্রপুত্রমিত্রৈশ্চ সর্বস্বজনসংযুতঃ || ৬- ১১১||
আশ্র্তিতোপাশ্রিতৈঃ সর্বৈরশেষগণসংযুতঃ |
যথা শিবস্তথৈবাযং শর্বলোকে স পূজ্যতে || ৬- ১১২||
ন চ মানুষ্যকং লোকমাগচ্ছেত্কৃপণং পুনঃ |
সর্বজ্ঞঃ পরিপূর্ণশ্চ মুক্তঃ স্বাত্মনি তিষ্ঠতি || ৬- ১১৩||
যঃ শিবায বনং কৃত্বা মুদাব্দসলিলোত্থিতম্(?)|
তদ্দণ্ডকোপশোভং চ হস্তে কুর্বীত সর্বদা || ৬- ১১৪||
শোভযেদ্ভূতনাথং বা চন্দ্রশালাং ক্বচিত্ক্বচিত্ |
বেদীং বাথাভ্যপদ্যন্ত প্রোন্নতাঃ স্তম্ভপঙ্ক্তযঃ || ৬- ১১৫||
শাতকুম্ভমযীং বাপি সর্বলক্ষণসংযুতাম্ |
ঈশ্বরপ্রতিমাং সৌম্যাং কারযেত্পুরুষোচ্ছ্রিতাম্ || ৬- ১১৬||
ত্রিশূলসব্যহস্তাং চ বরদাভযদাযিকাং |
সব্যহস্তাক্ষমালাং চ জটাকুসুমভূষিতাম্ || ৬- ১১৭||
পদ্মসিংহাসনাসীনাং বৃষস্থাং বা সমুচ্ছ্রিতাম্ |
বিমানস্থাং রথস্থাং বা বেদিস্থাং বা প্রভান্বিতাম্ || ৬- ১১৮||
সৌম্যবক্ত্রাং করালাং বা মহাভৈরবরূপিণীম্ |
অত্যুচ্ছ্রিতাং সুবিস্তীর্ণাং নৃত্যস্থাং যোগসংস্থিতাম্ || ৬- ১১৯||
কুর্যাদসংভবে হেম্নস্তারেণ বিমলেন চ |
আরকূটমযীং বাপি তাম্রমৃচ্ছৈলদারুজাম্ || ৬- ১২০||
অশেষকৈঃ সরূপৈশ্চ বর্ণকৈর্বা পটে লিখেত্ |
কুড্যে বা ফলকে বাপি ভক্ত্যা বিত্তানুসারতঃ || ৬- ১২১||
একাং সপরিবারাং বা পার্বতীং গণসংযুতাম্ |
প্রতীহারসমোপেতাং(?)কুর্যাদেবাবিকল্পতঃ || ৬- ১২২||
পীঠং বা কারযেদ্রৌপ্যং তাম্রং পিত্তলসংভবম্ |
চতুর্মুখৈকবক্ত্রং বা বহিঃ কাঞ্চনসংস্কৃতম্ || ৬- ১২৩||
পৃথক্পৃথগনেকানি কারযিত্বা মুখানি তু |
সৌম্যভৈরবরূপাণি শিবস্য বহুরূপিণঃ || ৬- ১২৪||
নানাভরণযুক্তানি হেমরৌপ্যকৃতানি চ |
শিবস্য রথযাত্রাযাং তানি লোকস্য দর্শযেত্ || ৬- ১২৫||
উক্তানি যানি পুণ্যানি সংক্ষেপেণ পৃথক্পৃথক্ |
কৃত্বৈকেন মমৈতেষামক্ষযং ফলমাপ্নুযাত্ || ৬- ১২৬||
মাতুঃ পিতুঃ সহোপাযৈর্(?)দশভির্দশভিঃ কুলৈঃ |
কলত্রপুত্রমিত্রাদ্যৈর্ভৃত্যৈর্যুক্তঃ স বান্ধবৈঃ || ৬- ১২৭||
অযুতেন বিমানানাং সর্বকামযুতেন চ |
ভুঙ্ক্তে স্বযং মহাভোগানন্তে মুক্তিমবাপ্নুযাত্ || ৬- ১২৮||
মণ্ডপস্তম্ভপর্যন্তে কীলযেদ্দর্পণান্বিতম্ |
অভিষিচ্য জনা যস্মিন্পুজাং কুবন্তি বিল্বকৈঃ || ৬- ১২৯||
কালকালকৃতিং কৃত্বা কীলযেদ্যঃ শিবাশ্রমে |
সর্বলোকোপকারায পূজযেচ্চ দিনে দিনে || ৬- ১৩০||
ধূপবেলাপ্রমাণার্থং কল্পযেদ্যঃ শিবাশ্রমে |
ক্ষরন্তীং পূর্যমাণাং বা সদাযামে ঘটীং নৃপঃ || ৬- ১৩১||
এষামেকতমং পুণ্যং কৃত্বা পাপবিবর্জিতঃ |
শিবলোকে নরঃ প্রাপ্য সর্বজ্ঞঃ স সুখী ভবেত্ || ৬- ১৩২||
রথযাত্রাং প্রবক্ষ্যামি শিবস্য পরমাত্মনঃ |
সর্বলোকহিতার্থায মহাশিল্পিবিনির্মিতাম্ || ৬- ১৩৩||
রথমধ্যে সমাবেশ্য যথা যষ্টিং তু কীলযেত্ |
যষ্টের্মধ্যে স্থিতং কার্যং বিমানমতিশোভিতম্ || ৬- ১৩৪||
পঞ্চভৌমং ত্রিভৌমং বা দৃঢবংশপ্রকল্পিতম্ |
কর্মণা সুনিবদ্ধং চ রজ্জুভিশ্চ সুসংযুতম্ || ৬- ১৩৫||
পঞ্চশালাণ্ডিকৈর্যুক্তং নানাভক্তিসমন্বিতম্ |
চিত্রবর্ণপরিচ্ছন্নং পটৈর্বা বর্ণকান্বিতৈঃ || ৬- ১৩৬||
লম্বকৈঃ সূত্রদাম্না চ ঘণ্টাচামরভূষিতম্ |
বুদ্বুদৈরর্ধচন্দ্রৈশ্চ দর্পণৈশ্চ সমুজ্জ্বলম্ || ৬- ১৩৭||
কদল্যর্ধধ্বজৈর্যুক্তং মহাচ্ছত্ত্রং মহাধ্বজম্ |
পুষ্পমালাপরিক্ষিপ্তং সর্বশোভাসমন্বিতম্ || ৬- ১৩৮||
মহারথবিমানে ঽস্মিন্স্থাপযেদ্গণসংযুতম্ |
ঈশ্বরপ্রতিমাং হেম্নি প্রথমে পুরমণ্ডপে || ৬- ১৩৯||
মুখত্রযং চ বধ্নীযাদ্বহিঃ কুর্যাত্তথাশ্রিতম্ |
পুরে পুরে বহির্দিক্ষু গৃহকেষু সমাশ্রিতম্ || ৬- ১৪০||
চতুষ্কং শিববক্ত্রাণাং সংস্থাপ্য প্রতিপূজযেত্ |
দিনত্রযং প্রকুর্বীত স্নানমর্চনভোজনম্ || ৬- ১৪১||
নৃত্যক্রীডাপ্রযোগেণ গেযমঙ্গলপাঠকৈঃ |
মহাবাদিত্রনির্ঘোষৈঃ পৌষপূর্ণিমপর্বণি || ৬- ১৪২||
ভ্রামযেদ্রাজমার্গেণ চতুর্থে ঽহনি তদ্রথম্ |
ততঃ স্বস্থানমানীয তচ্ছেষমপি বর্ধযেত্ || ৬- ১৪৩||
অবধার্য জগদ্ধাত্রী প্রতিমামবতারযেত্ |
মহাবিমানযাত্রৈষা কর্তব্যা পট্টকে ঽপি বা || ৬- ১৪৪||
বংশৈর্নবৈঃ সুপক্বৈশ্চ কটং কুর্যাদ্ভরক্ষমম্(?)|
বৃত্তং দ্বিগুণদীর্ঘং চ চতুরশ্রমধঃ সমম্ || ৬- ১৪৫||
সর্বত্র চর্মণা বদ্ধং মহাযষ্টিসমাশ্রিতম্ |
মুখং বদ্ধং চ কুর্বীত বংশমণ্ডলিনা দৃঢম্ || ৬- ১৪৬||
কটে ঽস্মিংস্তানি বস্ত্রাণি স্থাপ্য বধ্নীত যত্নতঃ |
উপর্যুপরি সর্বাণি তন্মধ্যে প্রতিমাং ন্যসেত্ || ৬- ১৪৭||
বর্ণকৈঃ কুঙ্কুমাদ্যৈশ্চ চিত্রপুষ্পৈশ্চ পূজযেত্ |
নানাভরণপূজাভির্মুক্তাহারপ্রলম্বিভিঃ || ৬- ১৪৮||
রথস্য মহতো মধ্যে স্থাপ্য পট্টদ্বযং দৃঢম্ |
অধরোত্তরভাগেন মধ্যে ছিদ্রসমন্বিতম্ || ৬- ১৪৯||
কটিযষ্টেরধোভাগং স্থাপ্য ছিদ্রমযং শুভৈঃ |
আবদ্ধ্য কীলযেদ্যত্নাদ্যষ্ট্যর্ধং চ ধ্বজাষ্টকম্ || ৬- ১৫০||
কটস্য পৃষ্টং সর্বত্র কারযেত্পটসংবৃতম্ |
তত্পটে চ লিখেত্সোমং সগণং সবৃষং শিবম্ || ৬- ১৫১||
বিচিত্রপুষ্পস্রগ্দাম্না সমন্তাদ্ভূষযেত্কটম্ |
রবকৈঃ কিঙ্কিণীজালৈর্ঘণ্টাচামরভূষিতৈঃ || ৬- ১৫২||
মহাপূজাবিশেষৈশ্চ কৌতূহলসমন্বিতম্ |
বাদ্যারম্ভোপচারেণ মার্গশোভাং প্রকল্পযেত্ || ৬- ১৫৩||
তদ্রথং ভ্রামযেদ্যত্নাদ্রাজমার্গেণ সর্বতঃ |
ততঃ স্বাশ্রমমানীয স্থাপযেত্তত্সমীপতঃ || ৬- ১৫৪||
মহাশব্দং ততঃ কুর্যাত্তালত্রযসমন্বিতম্ |
ততস্তুষ্ণীং স্থিতে লোকে তচ্ছান্তিমিহ ধারযেত্ || ৬- ১৫৫||
শিবং তু সর্বজগতঃ শিবং গোব্রাহ্মণস্য চ |
শিবমস্তু নৃপাণাং চ তদ্ভক্তানাং জনস্য চ || ৬- ১৫৬||
রাজা বিজযমাপ্নোতি পুত্রপৌত্রৈশ্চ বর্ধতাম্ |
ধর্মনিষ্ঠশ্চ ভবতু প্রজানাং চ হিতে রতঃ || ৬- ১৫৭||
কালবর্ষী তু পর্জন্যঃ সস্যসংপত্তিরুত্তমা |
সুভিক্ষাত্ক্ষেমমাপ্নোতি কার্যসিদ্ধিশ্চ জাযতাম্ || ৬- ১৫৮||
দোষাঃ প্রযান্তু নাশং চ গুণাঃ স্থৈর্যং ভজন্তু বঃ |
বহুক্ষীরযুতা গাবো হৃষ্টপুষ্টা ভবন্তু বঃ || ৬- ১৫৯||
এবং শিবমহাশান্তিমুচ্চার্য জগতঃ ক্রমাত্ |
অভিবর্ধ্য ততঃ শেষমৈশ্বরীং সার্বকামিকীম্ || ৬- ১৬০||
শিবমালাং সমাদায সদাসীপরিচারিকঃ |
ফলৈর্ভক্ষৈশ্চ সংযুক্তাং গৃহ্য পাত্রীং নিবেশযেত্ || ৬- ১৬১||
পাত্রীং চ ধারযেন্মূর্ধ্না সোষ্ণীষাং দেবপুত্রকঃ |
অলংকৃতঃ শুক্লবাসা ধার্মিকঃ সততং শুচিঃ || ৬- ১৬২||
ততশ্চ তাং সমুত্ক্ষিপ্য পাণিনা ধারযেদ্বুধঃ |
প্রব্রূযাদপরশ্চাত্র শিবধর্মস্য ভাজকঃ || ৬- ১৬৩||
তোযং যথা ঘটীসংস্থমজস্রং ক্ষরতে তথা |
ক্ষরতে সর্বলোকানাং তদ্বদাযুরহর্নিশম্ || ৬- ১৬৪||
যদা সর্বং পরিত্যজ্য গন্তব্যমবশৈর্ধ্রুবম্ |
তদা ন দীযতে কস্মাত্পাথেযার্থমিদং ধনম্ || ৬- ১৬৫||
কলত্রপুত্রমিত্রাণি পিতা মাতা চ বান্ধবাঃ |
তিষ্ঠন্তি ন মৃতস্যার্থে পরলোকে ধনানি চ || ৬- ১৬৬||
নাস্তি ধর্মসমং মিত্রং নাস্তি ধর্মসমঃ সখা |
যতঃ সর্বৈঃ পরিত্যক্তং নরং ধর্মো ঽনুগচ্ছতি || ৬- ১৬৭||
তস্মাদ্ধর্মং সমুদ্দিশ্য যঃ শেষামভিবর্ধযেত্ |
সমস্তপাপনির্মুক্তঃ শিবলোকং স গচ্ছতি || ৬- ১৬৮||
উপর্যুপরি বিত্তেন যঃ শেষামভিবর্ধযেত্ |
তস্যেযমুত্তমা দেযা যতশ্চান্যা ন বর্ধতে || ৬- ১৬৯||
ইত্যেবং মধ্যমাং শেষাং বর্ধযেদ্বা কনীযসীম্ |
ততস্তেষাং প্রদাতব্যা সর্বশোকস্য শান্তযে || ৬- ১৭০||
যেনোত্তমা গৃহীতা স্যাচ্শিবশেষা মহীযসী |
প্রাপণীযা গৃহং তস্য তথৈব শিরসা বৃতা || ৬- ১৭১||
ধ্বজচ্ছত্ত্রবিমানাদ্যৈর্মহাবাদিত্রনিঃস্বনৈঃ |
গৃহদ্বারং ততঃ প্রাপ্তমর্চযিত্বা নিবেশযেত্ || ৬- ১৭২||
দদ্যাদ্গোত্রকলত্রাণাং ভৃত্যানাং স্বজনস্য চ |
তর্পযেচ্চানতান্(?)ভক্ত্যা বাদিত্রধ্বজবাহকান্ || ৬- ১৭৩||
এবমাদীযতে ভক্ত্যা যঃ শিবস্যোত্তমা গৃহে |
শোভযা রাজমার্গেণ তস্য ধর্মফলং শৃণু || ৬- ১৭৪||
সমস্তপাপনির্মুক্তঃ সমস্তকুলসংযুতঃ |
শিবলোকমবাপ্নোতি সভৃত্যপরিচারকঃ || ৬- ১৭৫||
তত্র দিব্যৈর্মহাভোগৈর্বিমানৈঃ সার্বকামিকৈঃ |
কল্পানাং ক্রীডতে কোটিমন্তে নির্বাণমাপ্নুযাত্ || ৬- ১৭৬||
রথস্য যাত্রাং যঃ কুর্যাদিত্যেবমুপশোভযা |
ভক্ষভোজ্যপ্রদানৈশ্চ তত্ফলং শৃনু যত্নতঃ || ৬- ১৭৭||
অশেষপাপনির্মুক্তঃ সর্বভৃত্যসমন্বিতঃ |
কুলত্রিংশকমুদ্ধৃত্য সুহৃদ্ভিঃ স্বজনৈঃ সহ || ৬- ১৭৮||
সর্বকামযুতৈর্দিব্যৈঃ স্বচ্ছন্দগমনালযৈঃ |
মহাবিমানৈঃ শ্রীমদ্ভির্দিব্যস্ত্রীপরিবারিতঃ || ৬- ১৭৯||
ইচ্ছযা ক্রীডতে ভোগৈঃ কল্পকোটিং শিবে পুরে |
জ্ঞানযোগং ততঃ প্রাপ্য সংসারাদবমুচ্যতে || ৬- ১৮০||
শিবস্য রথযাত্রাযামুপবাসপরঃ ক্ষমী |
পুরতঃ পৃষ্ঠতো বাপি গচ্ছংস্তস্য ফলং শৃণু || ৬- ১৮১||
অশেষপাপনির্মুক্তঃ শুদ্ধঃ শিবপুরং গতঃ |
মহারথোপমৈর্যানৈঃ কল্পাশীতিং প্রমোদতে” || ৬- ১৮২||
ধ্বজচ্ছত্ত্রপতাকাভির্দীপদর্পণচামরৈঃ |
ধূপৈর্বিতানকলশৈরুপশোভা সহস্রশঃ || ৬- ১৮৩||
গৃহীত্বা যাতি পুরতঃ স্বেচ্ছযা বা পরেচ্ছযা |
সংপর্কাত্কৌতুকাল্লাভাচ্ছিবলোকে ব্রজন্তে তে || ৬- ১৮৪||
শিবস্য রথযাত্রাং তু যঃ প্রপশ্যতি ভক্তিতঃ |
প্রসঙ্গাত্কৌতুকাদ্বাপি তে ঽপি যান্তি শিবং পুরম্ || ৬- ১৮৫||
নানাযত্নাদিশেষান্তে নানাপ্রেক্ষণকানি চ |
কুর্বীত রথযাত্রাযাং রমতে চ বিভূষিতা || ৬- ১৮৬||
তে ভোগৈর্বিবিধৈর্দিব্যৈঃ শিবাসন্না গণেশ্বরাঃ |
ক্রীডন্তি রুদ্রভবনে কল্পানাং বিংশতীর্নরাঃ || ৬- ১৮৭||
মহতা জ্ঞানসঙ্ঘেন তস্মাচ্ছিবরথেন চ |
পৃথক্জীবা মৃতা যান্তি শিবলোকং ন সংশযঃ || ৬- ১৮৮||
শ্রীপর্বতে মহাকালে বারাণস্যাং মহালযে |
জল্পেশ্বরে কুরুক্ষেত্রে কেদারে মণ্ডলেশ্বরে || ৬- ১৮৯||
গোকর্ণে ভদ্রকর্ণে চ শঙ্কুকর্ণে স্থলেশ্বরে |
ভীমেশ্বরে সুবর্ণাক্ষে কালঞ্জরবনে তথা || ৬- ১৯০||
এবমাদিষু চান্যেষু শিবক্ষেত্রেষু যে মৃতাঃ |
জীবাশ্চরাচরাঃ সর্বে শিবলোকং ব্রজন্তি তে || ৬- ১৯১||
প্রযাগং কামিকং তীর্থমবিমুক্তং তু নৈষ্ঠিকম্ |
শ্রীপর্বতং চ বিজ্ঞেযমিহামুত্র চ সিদ্ধিদম্ || ৬- ১৯২||
প্রসঙ্গেনাপি যঃ পশ্যেদন্যত্র প্রস্থিতঃ ক্বচিত্ |
শ্রীপর্বতং মহাপুণ্যং সো ঽপি যাতি শিবং পুরম্ || ৬- ১৯৩||
ব্রজেদ্যঃ শিবতীর্থানি সর্বপাপৈঃ প্রমুচ্যতে |
পাপযুক্তঃ শিবজ্ঞানং প্রাপ্য নির্বাণমাপ্নুযাত্ || ৬- ১৯৪||
তীর্থস্থানেষু যঃ শ্রাদ্ধং শিবরাত্রে প্রযত্নতঃ |
কল্পযিত্বানুসারেণ কালস্য বিষুবস্য চ || ৬- ১৯৫||
তীর্থযাত্রাগতং শান্তং হাহাভূতমচেতনম্ |
ক্ষুত্পিপাসাতুরং লোকে পাংসুপাদং ত্বরান্বিতম্ || ৬- ১৯৬||
সংতর্পযিত্বা যত্নেন ম্লানলক্ষ্মীমিবাম্বুভিঃ |
পাদ্যাসনপ্রদানেন কস্তেন পুরুষঃ সমঃ || ৬- ১৯৭||
অশ্নন্তি যাবত্তত্পিণ্ডং তীর্থনির্ধূতকল্মষাঃ |
তাবদ্বর্ষসহস্রাণি তদ্দাতাস্তে শিবে পুরে || ৬- ১৯৮||
দদ্যাদ্যঃ শিবসত্ত্রার্থং মহিষীং সুপযস্বিনীম্ |
মোদতে স শিবে লোকে যুগকোটিশতং নরঃ || ৬- ১৯৯||
আর্তায শিবভক্তায দদ্যাদ্যঃ সুপযস্বিনীম্ |
অজামেকাং সুপুষ্টাঙ্গীং তস্য পুণ্যফলং শৃণু || ৬- ২০০||
যাবত্তদ্রোমসংখ্যানং তত্প্রসূতিকুলেষু চ |
তাবদ্বর্ষসহস্রাণি রুদ্রলোকে মহীযতে || ৬- ২০১||
মৃদুরোমাঞ্চিতাং কৃষ্ণাং নিবেদ্য গুরবে নরঃ |
রোম্ণি রোম্ণি সুবর্ণস্য দত্তস্য ফলমাপ্নুযাত্ || ৬- ২০২||
গজাশ্বরথসংযুক্তৈর্বিমানৈঃ সার্বকামিকৈঃ |
সানুগঃ ক্রীডতে ভোগৈঃ কল্পকোটিং শিবে পুরে || ৬- ২০৩||
নিবেদ্যাশ্বতরং পুষ্টমদুষ্টং গুরবে নরঃ |
সংগতিং সোপকরণং ভোগান্ভুঙ্ক্তে শিবে পুরে || ৬- ২০৪||
দিব্যাশ্বযুক্তৈঃ শ্রীমদ্ভির্বিমানৈঃ সার্বকামিকৈঃ |
কোটিং কোটিং চ কল্পানাং তদন্তে স্যান্মহীপতিঃ || ৬- ২০৫||
অপি যোজনমাত্রায শিবিকাং পরিকল্পযেত্ |
গুরোঃ শান্তস্য দান্তস্য তস্য পুণ্যফলং শৃণু || ৬- ২০৬||
বিমানানাং সহস্রেণ সর্বকামযুতেন চ |
কল্পকোট্যযুতং সাগ্রং ভোগান্ভুঙ্ক্তে শিবে পুরে || ৬- ২০৭||
ছাগং মেষং মযূরং চ কুক্কুটং শারিকাং শুকম্ |
বালক্রীডনকানেতানিত্যাদ্যানপরানপি || ৬- ২০৮||
নিবেদযিত্বা স্কন্দায তত্সাযুজ্যমবাপ্নুযাত্ |
ভুক্ত্বা তু বিপুলান্ভোগাংস্তদন্তে স্যাদ্দ্বিজোত্তমঃ || ৬- ২০৯||
মুসলোলূখলাদ্যানি গৃহোপকরণানি চ |
দদ্যাচ্ছিবগৃহস্থেভ্যস্তস্য পূণ্যফলং শৃণু || ৬- ২১০||
প্রত্যেকং কল্পমেকৈকং গৃহোপকরণৈর্নরঃ |
অন্তে দিবি বসেদ্ভোগৈস্তদন্তে চ গৃহী ভবেত্ || ৬- ২১১||
খর্জূরতালপত্ত্রৈর্বা চর্মণা বা সুকল্পিতম্ |
দত্ত্বা কোট্যাসনং বৃত্তং শিবলোকমবাপ্নুযাত্ || ৬- ২১২||
প্রাতর্নীহারবেলাযাং হেমন্তে শিবযোগিনাম্ |
কৃত্বা প্রতাপনাযাগ্নিং শিবলোকে মহীযতে || ৬- ২১৩||
সূর্যাযুতপ্রভাদীপ্তৈর্বিমানৈঃ সার্বকামিকৈঃ |
কল্পকোটিশতং ভোগান্ভুক্ত্বা স তু মহীপতিঃ || ৬- ২১৪||
যঃ প্রান্তরং বিদেশং বা গচ্ছন্তং শিবযোগিনম্ |
ভোজযীত যথাশক্ত্যা শিবলোকে মহীযতে || ৬- ২১৫||
যশ্ছত্ত্রং ধারযেদ্গ্রীষ্মে গচ্ছতে শিবযোগিনে |
স মৃতঃ পৃথিবীং কৃত্স্নামেকচ্ছত্ত্রামবাপ্নুযাত্ || ৬- ২১৬||
যঃ সমুদ্ধরতে মার্গে মাত্রোপকরণাসনম্ |
শিবযোগপ্রবৃত্তস্য তস্য পুণ্যফলং শৃণু || ৬- ২১৭||
কল্পাযুতং নরঃ সাগ্রং ভুক্ত্বা ভোগাঞ্ছিবে পুরে |
তদন্তে প্রাপ্নুযাদ্রাজ্যং সর্বৈশ্বর্যসমন্বিতম্ || ৬- ২১৮||
অভ্যঙ্গোদ্বর্তনং স্নানমার্তস্য শিবযোগিনঃ |
কৃত্বাপ্নোতি মহাভোগান্কল্পাঞ্ছিবপুরে নরঃ || ৬- ২১৯||
অপনীয সমুচ্ছিষ্টং ভক্তিতঃ শিবযোগিনাম্ |
দশধেনুপ্রদানস্য ফলমাপ্নোতি মানবঃ || ৬- ২২০||
পঞ্চগব্যসমং জ্ঞেযমুচ্ছিষ্টং শিবযোগিনাম্ |
তদ্ভুক্ত্বা লভতে শুদ্ধিং মহতঃ পাতকাদপি || ৬- ২২১||
নারী চ ভুক্ত্বা সত্পুত্রং কুলাধারং গুণান্বিতম্ |
রাজ্যযোগ্যং ধনাঢ্যং চ প্রাপ্নুযাদ্ধর্মতত্পরম্ || ৬- ২২২||
যশ্চ যাং শিবযজ্ঞায গৃহস্থঃ পরিকল্পযেত্ |
শিবভক্তো ঽস্য মহতঃ পরমং ফলমাপ্নুযাত্ || ৬- ২২৩||
শিবোমাং চ প্রযত্নেন ভক্ত্যাব্দং যো ঽনুপালযেত্ |
গবাং লক্ষপ্রদানস্য সংপূর্ণং ফলমাপ্নুযাত্ || ৬- ২২৪||
প্রাতঃ প্রদদ্যাত্সঘৃতং সুকৃতং বালপিণ্ডকম্ |
দূর্বাং চ বালবত্সানাং(?)তস্য পুণ্যফলং শৃণু || ৬- ২২৫||
যাবত্তদ্বালবত্সানাং পানাহারং প্রকল্পযেত্ |
তাবদষ্টাযুতান্পূর্বৈর্ভোগান্ভুঙ্ক্তে শিবে পুরে || ৬- ২২৬||
বিধবানাথবৃদ্ধানাং প্রদদ্যাদ্যঃ প্রজীবনম্ |
আভূতস্সংপ্লবং যাবচ্ছিবলোকে মহীযতে || ৬- ২২৭||
দদ্যাদ্যঃ সর্বজন্তূনামাহারমনুযত্নতঃ |
ত্রিঃ পৃথ্বীং রত্নসংপূর্ণাং যদ্দত্ত্বা তত্ফলং লভেত্ || ৬- ২২৮||
বিনযব্রতদানানি যানি সিদ্ধানি লোকতঃ |
তানি তেনৈব বিধিনা শিবমন্ত্রেণ কল্পযেত্ || ৬- ২২৯||
নিবেদযীত রুদ্রায রুদ্রাণ্যাঃ ষণ্মুখস্য চ |
প্রাপ্নুযাদ্বিপুলান্ভোগান্দিব্যাঞ্ছিবপুরে নরঃ || ৬- ২৩০||
পুনর্যঃ কর্তরীং দদ্যাত্কেশক্লেশাপনুত্তযে |
সর্বক্লেশবিনির্মুক্তঃ শিবলোকে সুখী ভবেত্ || ৬- ২৩১||
নাসিকাশোধনং দদ্যাত্সংদংশং শিবযোগিনে |
বর্ষকোটিং মহাভোগৈঃ শিবলোকে মহীযতে || ৬- ২৩২||
নখচ্ছেদনকং দত্ত্বা শিবলোকে মহীযতে |
বর্ষলক্ষং মহাভোগৈঃ শিবলোকে মহীযতে || ৬- ২৩৩||
দত্ত্বাঞ্জনশলাকাং বা লোহাদ্যাং শিবযোগিনে |
ভোগাঞ্ছিবপুরে প্রাপ্য জ্ঞানচক্ষুরবাপ্নুযাত্ || ৬- ২৩৪||
কর্ণশোধনকং দত্ত্বা লোহাদ্যং শিবযোগিনে |
বর্ষকোটিং মহাভোগৈঃ শিবলোকে মহীযতে || ৬- ২৩৫||
দদ্যাদ্যঃ শিবভক্তায সূচীং কৌপীনশোধনীম্ |
বর্ষলক্ষং স লক্ষার্ধং শিবলোকে মহীযতে || ৬- ২৩৬||
নিবেদ্য শিবযোগিভ্যঃ সূচিকং সূত্রসংযুতম্ |
বর্ষলক্ষং মহাভোগৈঃ ক্রীডতে স শিবে পুরে || ৬- ২৩৭||
দদ্যাদ্যঃ শিবযোগিভ্যঃ সুকৃতাং পত্রবেধনীম্ |
বর্ষলক্ষং মহাভোগৈঃ শিবলোকে মহীযতে || ৬- ২৩৮||
দদ্যাদ্যঃ পুস্তকাদীনাং সর্বকার্যার্থকর্তৃকাম্ |
পঞ্চলক্ষং মহাভোগৈর্মোদতে স শিবে পুরে || ৬- ২৩৯||
শমীন্ধনতৃণাদীনাং দদ্যাত্তচ্ছেদনং চ যঃ |
ক্রীডতে স শিবে লোকে বর্ষলক্ষচতুষ্টযম্ || ৬- ২৪০||
শিবাশ্রমোপভোগায লোহোপকরণং মহত্ |
যঃ প্রদদ্যাগ্কুঠারাদ্যং তস্য পুণ্যফলং শৃণু || ৬- ২৪১||
যাবত্তত্ফলসংখ্যানং লোহোপকরণে ভবেত্ |
তাবন্তি বর্ষলক্ষাণি শিবলোকে মহীযতে || ৬- ২৪২||
শিবাযতনবিত্তানাং রক্ষার্থং যঃ প্রযচ্ছতি |
ধনুঃখড্গাযুধাদীনি তস্য পুণ্যফলং শৃণু || ৬- ২৪৩||
একৈকস্মিন্পরিজ্ঞেযমাযুধে চাপি বৈ ফলম্ |
বর্ষকোট্যষ্টকং ভোগৈঃ শিবলোকে মহীযতে || ৬- ২৪৪||
যঃ স্বাত্মভোগভৃত্যর্থং কুসুমানি নিবেদযেত্ |
শিবায গুরবে বাপি তস্য পুণ্যফলং শৃণু || ৬- ২৪৫||
যাবদন্যোঽন্যসংবন্ধাস্তস্যাংশাঃ পরিকীর্তিতাঃ |
বর্ষলক্ষং স তাবচ্চ শিবলোকে প্রমোদতে || ৬- ২৪৬||
নষ্টাপহৃতমন্বিষ্য পুনর্বিত্তং নিবেদযেত্ |
শিবাত্মকং শিবাযৈব তস্য পুণ্যফলং শৃণু || ৬- ২৪৭ ||
যাবচ্ছিবায তদ্বিত্তং প্রাঙ্নিবেদ্য ফলং স্মৃতম্ |
নষ্টমানীয তদ্ভূযঃ পুণ্যং শতগুণং লভেত্ || ৬- ২৪৮||
দেবদ্রব্যং হৃতং নষ্টমন্বেষ্যমপি যত্নতঃ |
ন প্রাপ্নোতি তদা তস্য প্রাপ্নুযাদ্দ্বিগুণং ফলম্ || ৬- ২৪৯||
তাম্রকুম্ভকটাহাদ্যং যঃ শিবায নিবেদযেত্ |
শিবাত্মকং শিবাযৈব তস্য পুণ্যফলং শৃণু || ৬- ২৫০||
যাবচ্ছিবায তদ্বিত্তং প্রাঙ্নিবেদ্য ফলং স্মৃতম্ |
নষ্টমানীয তদ্ভূযঃ পুণ্যং শতগুণং লভেত্ || ৬- ২৫১||
স্নানসত্ত্রোপভোগায তস্য পুণ্যফলং শৃণু |
যাবত্তত্ফলসংখ্যানং তাম্রোপকরণে স্থিতম্ || ৬- ২৫২||
পলে পলে বর্ষকোটিং মোদতে স শিবে পুরে |
যঃ পত্ত্রপুষ্পবস্তূনাং দদ্যাদাধারভাজনম্ || ৬- ২৫৩||
তদ্বস্তুদাতুর্যত্পুণ্যং তত্পুণ্যং সকলং ভবেত্ |
দত্ত্বোপকরণং কিংচিদপি যো বিত্তমর্থিনাম্ || ৬- ২৫৪||
যদ্বস্তু কুরুতে তেন তত্প্রদানফলং লভেত্ |
যঃ শৌচপীতবস্ত্রাণি ক্ষারাদ্যৈঃ শিবযোগিনাম্ || ৬- ২৫৫||
স পাপমলনির্মুক্তঃ শিবলোকমবাপ্নুযাত্ |
যঃ পুষ্পপট্টসংযুক্তং পটগর্ভং চ কম্বলম্ || ৬- ২৫৬||
প্রদদ্যাচ্ছিবযোগিভ্যস্তস্য পুণ্যফলং শৃণু |
তেষাং চ বস্ত্রতন্তূনাং যাবত্সংখ্যা বিধীযতে || ৬- ২৫৭||
তাবদ্বর্ষসহস্রাণি ভোগান্ভুঙ্ক্তে শিবে পুরে |
শ্লক্ষ্ণবস্ত্রাণি শুক্লানি দদ্যাদ্যঃ শিবযোগিনে || ৬- ২৫৮||
চিত্রবস্ত্রাণি তদ্ভক্ত্যা তস্য পুণ্যফলং শৃণু |
যাবত্তত্সূক্ষ্মবস্ত্রাণাং তন্তুসংখ্যা বিধীযতে || ৬- ২৫৯||
তাবদ্যুগানি সংভোগৈঃ শিবলোকে মহীযতে |
শঙ্খপাত্রং তু বিস্তীর্ণং ভাণ্ডং বাপি সুশোভনম্ || ৬- ২৬০||
প্রদদ্যাচ্ছিবযোগিভ্যস্তস্য পুণ্যফলং শৃণু |
দিব্যং বিমানমারূঢঃ সর্বকামসমন্বিতম্ || ৬- ২৬১||
কল্পকোট্যযুতং সাগ্রং শিবলোকে মহীযতে |
শুক্ত্যাদীনি চ পাত্রাণি শোভনান্যমলানি চ || ৬- ২৬২||
নিবেদ্য শিবযোগিভ্যঃ শঙ্খার্ধেন ফলং লভেত্ |
স্ফাটিকানাং চ পাত্রাণাং শঙ্খতুল্যফলং স্মৃতম্ || ৬- ২৬৩||
শৈলজানাং তদর্ধেন পাত্রাণাং চ তদর্ধকম্ |
তালখর্জূরপাত্রাণাং বংশজানাং নিবেদনে || ৬- ২৬৪||
অন্যেষামেবমাদীনাং পুণ্যং বার্ক্ষ্যার্ধসংমিতম্ |
বংশজার্ধসমং পুণ্যং ফলপাত্রনিবেদনে || ৬- ২৬৫||
নানাপর্ণপুটাণাং চ সারাণাং বা ফলার্ধকম্ |
যস্তাম্রকাংস্যপাত্রাণি শোব্হনান্যমলানি চ || ৬- ২৬৬||
স্নানভোজনপানার্থং দদ্যাদ্যঃ শিবযোগিনে |
তাম্রাং কাংসীং ত্রিলোহীং বা যঃ প্রদদ্যাত্ত্রিপাদিকাম্ || ৬- ২৬৭||
ভোজনে ভোজনাধারং গুরবে তত্ফলং শৃণু |
যাবত্তত্পলসংখ্যানং ত্রিপাদ্যা ভোজনেষু চ || ৬- ২৬৮||
তাবদ্যুগসহস্রাণি ভোগান্ভুঙ্ক্তে শিবে পুরে |
লোহং ত্রিপাদিকং দত্ত্বা সত্কৃত্বা শিবযোগিনে || ৬- ২৬৯||
দশকল্পান্মহাভোগৈর্নরঃ শিবপুরে বসেত্ |
যঃ প্রদদ্যাত্ত্রিবিষ্টম্ভং ভিক্ষাপাত্রসমাশ্রযম্ || ৬- ২৭০||
বংশজং দারুজং বাপি তস্য পুণ্যফলং শৃণু |
দিব্যস্ত্রীভোগসংপন্নো বিমানে মহতি স্থিতঃ || ৬- ২৭১||
চতুর্যুগসহস্রং তু ভোগান্ভুঙ্ক্তে শিবে পুরে |
ভিক্ষাপাত্রমুখাচ্ছাদম্বস্ত্রপর্ণাদিকল্পিতম্ || ৬- ২৭২||
দত্ত্বা শিবপুরে ভোগান্কল্পমেকং বসেন্নরঃ |
সংশ্রযং যঃ প্রদদ্যাচ্চ ভিক্ষাপাত্রে কমণ্ডলৌ || ৬- ২৭৩||
কল্পিতং বস্ত্রসূত্রাদ্যৈস্তস্য পুণ্যফলং শৃণু |
তদ্বস্ত্রপূততন্তূনাং সংখ্যা যাবদ্বিধীযতে || ৬- ২৭৪||
তাবদ্বর্ষসহস্রাণি রুদ্রলোকে মহীযতে |
সূত্রবল্কলবালৈর্বা শিক্যভাণ্ডসমাশ্রযম্ || ৬- ২৭৫||
যঃ কৃত্বা দামনীযোক্ত্রং প্রগ্রহং রজ্জুমেব বা |
এবমাদীনি চান্যানি বস্তূনি বিনিবেদযেত্ || ৬- ২৭৬||
শিবগোষ্ঠোপযোগার্থং তস্য পুণ্যফলং শৃণু |
যাবত্তদ্রজ্জুসংখ্যানং প্রদদ্যাচ্ছিবগোকুলে || ৬- ২৭৭||
তাবচ্চতুর্যুগং দেহী শিবলোকে মহীযতে |
যথা যথা প্রিযং বস্ত্রং শোভনং চ যথা যথা || ৬- ২৭৮ ||
তথা তথা মহাপুণ্যং তদ্দানাদুত্তরোত্তরম্ |
যঃ পন্থানং দিশেত্পৃষ্টং প্রণষ্টং চ গবাদিকং || ৬- ২৭৯||
স গোদানসমং পুণ্যং প্রজ্ঞাসৌখ্যং চ বিন্দতি |
কৃত্বোপকারমার্তানাং স্বর্গং যাতি ন সংশযঃ || ৬- ২৮০||
অপি কণ্টকমুদ্ধৃত্য কিমুতান্যং মহাগুণম্(?)|
অন্নপানৌষধীনাং চ যঃ প্রদাতারমুদ্দিশেত্ || ৬- ২৮১||
আর্তানাং তস্য বিজ্ঞেযং দাতুস্তত্সদৃশং ফলম্ |
শিবায তস্য সংরুদ্ধং কর্ম তিষ্ঠতি যদ্বিনা || ৬- ২৮২||
তদল্পমপি যজ্ঞাঙ্গং দত্ত্বা যজ্ঞফলং লভেত্ |
অপি কাশকুশং সূত্রং গোমযং সমিদিন্ধনম্ || ৬- ২৮৩||
শিবযজ্ঞোপযোগার্থং প্রবক্ষ্যামি সমাসতঃ |
সর্বেষাং শিবভক্তানাং দদ্যাদ্যত্কিংচিদাদরাত্ |
দত্ত্বা যজ্ঞফলং বিদ্যাত্কিমু তদ্বস্তুদানতঃ || ৬- ২৮৪||
|| ইতি শিবোপনিষদি ফলোপকরণপ্রদানাধ্যাযঃ ষষ্ঠঃ ||
——————————————————————————–
অথ স্বর্গাপবর্গার্থে প্রবক্ষ্যামি সমাসতঃ |
সর্বেষাং শিবভক্তানাং শিবাচারমনুত্তমম্ || ৭- ১||
শিবঃ শিবায ভূতানাং যস্মাদ্দানং প্রযচ্ছতি |
গুরুমূর্তিঃ স্থিতস্তস্মাত্পূজযেত্সততং গুরুম্ || ৭- ২||
নালক্ষণে যথা লিঙ্গে সাংনিধ্যং কল্পযেচ্ছিবঃ |
অল্পাগমে গুরৌ তদ্বত্সাংনিধ্যং ন প্রকল্পযেত্ || ৭- ৩||
শিবজ্ঞানার্থতত্ত্বজ্ঞঃ প্রসন্নমনসং গুরুম্ |
শিবঃ শিবং সমাস্থায জ্ঞানং বক্তি ন হীতরঃ || ৭- ৪||
গুরুং চ শিববদ্ভক্ত্যা নমস্কারেণ পূজযেত্ |
কৃতাঞ্জলিস্ত্রিসংধ্যং চ ভূমিবিন্যস্তমস্তকঃ || ৭- ৫||
ন বিবিক্তমনাচান্তম্(?)চঙ্ক্রমন্তং তথাকুলম্ |
সমাধিস্থং ব্রজন্তং চ নমস্কুর্যাদ্গুরুং বুধঃ || ৭- ৬||
ব্যাখ্যানে তত্সমাপ্তৌ চ সংপ্রশ্নে স্নানভোজনে |
ভুক্ত্বা চ শযনে স্বপ্নে নমস্কুর্যাত্সদা গুরুম্ || ৭- ৭||
গ্রামান্তরমভিপ্রেপ্সুর্গুরোঃ কুর্যাত্প্রদক্ষিণম্ |
সার্বাঙ্গিকপ্রণামং চ পুনঃ কুর্যাত্তদাগতঃ || ৭- ৮||
পর্বোত্সবেষু সর্বেষু দদ্যাদ্গন্ধপবিত্রকম্ |
শিবজ্ঞানস্য চারম্ভে প্রবাসগমনাগতৌ || ৭- ৯||
শিবধর্মব্রতারম্ভে তত্সমাপ্তৌ চ কল্পযেত্ |
প্রসাদনায কুপিতো বিজিত্য চ রিপুং তথা || ৭- ১০||
পুণ্যাহে গ্রহশান্তৌ চ দীক্ষাযাং চ সদক্ষিণম্ |
আবার্য পদসংপ্রাপ্তৌ পবিত্রে চোপবিগ্রহে || ৭- ১১||
উপানচ্ছত্ত্রশযনং বস্ত্রমাসনভূষণম্ |
পাত্রদণ্ডাক্ষসূত্রং বা গুরুসক্তং ন ধারযেত্ || ৭- ১২||
হাস্যনিষ্ঠীবনাস্ফোটমুচ্চভাষ্যবিজৃম্ভণম্ |
পাদপ্রসারণং গতিং ন কুর্যাদ্গুরুসংনিধৌ || ৭- ১৩||
হীনান্নপানবস্ত্রঃ স্যান্নীচশয্যাসনো গুরোঃ |
ন যথেষ্টশ্চ সংতিষ্ঠেত্কলহং চ বিবর্জযেত্ || ৭- ১৪||
প্রতিবাতে ঽনুবাতে বা ন তিষ্ঠেদ্গুরুণা সহ |
অসংশ্রযে চ সততং ন কিংচিত্কীর্তযেদ্গুরোঃ || ৭- ১৫||
অন্যাসক্তো ন ভুঞ্জানো ন তিষ্ঠন্নপরাঙ্মুখঃ |
ন শযনো ন চাসীনঃ সংভাস্যেদ্গুরুণা সহ || ৭- ১৬||
দৃষ্ট্বৈব গুরুমাযান্তমুত্তিষ্ঠেদ্দূরতস্ত্বরম্ |
অনুজ্ঞাতশ্চ গুরুণা সংবিশেচ্চানুপৃষ্ঠতঃ || ৭- ১৭||
ন কণ্ঠং প্রাবৃতং কুর্যান্ন চ তত্রাবসক্তিকাম্ |
ন পাদধাবনস্নানং যত্র পশ্যেদ্গুরুঃ স্থিতঃ || ৭- ১৮||
ন দন্তধাবনাভ্যঙ্গমাযামোদ্বর্তনক্রিযাঃ |
উত্সর্গপরিধানং চ গুরোঃ কুর্বীত পশ্যতঃ || ৭- ১৯||
গুরুর্যদর্পযেত্কিংচিদ্গৃহাসন্নং তদঞ্জলৌ |
পাত্রে বা পুরতঃ শিষ্যস্তদ্বক্ত্রমভিবীক্ষযন্ || ৭- ২০||
যদর্পযেদ্গুরুঃ কিংচি তন্নম্রঃ পুরতঃ স্থিতঃ |
পাণিদ্বযেন গৃহ্ণীযত্স্থাপযেত্তচ্চ সুস্থিতম্ || ৭- ২১||
ন গুরোঃ কীর্তযেন্নাম পরোঽক্ষমপি কেবলম্ |
সমানসংজ্ঞমন্যং বা নাহ্বযীত তদাখ্যযা || ৭- ২২||
স্বগুরুস্তদ্গুরুশ্চৈব যদি স্যাতাং সমং ক্বচিত্ |
গুরোর্গুরুস্তযোঃ পূজ্যঃ স্বগুরুশ্চ তদাজ্ঞযা || ৭- ২৩||
অনিবেদ্য ন ভুঞ্জীত ভুক্ত্বা চাস্য নিবেদযেত্ |
নাবিজ্ঞাপ্য গুরুং গচ্ছেদ্বহিঃ কার্যেণ কেনচিত্ || ৭- ২৪||
গুর্বাজ্ঞযা কর্ম কৃত্বা তত্সমাপ্তৌ নিবেদযেত্ |
কৃত্বা চ নৈত্যকং সর্বমধীযীতাজ্ঞযা গুরোঃ || ৭- ২৫||
মৃদ্ভস্মগোমযজলং পত্ত্রপুষ্পেন্ধনং সমিত্ |
পর্যাপ্তমষ্টকং হ্যেতদ্গুর্বর্থং তু সমাহরেত্ || ৭- ২৬||
ভৈষজ্যাহারপাত্রাণি বস্ত্রশয্যাসনং গুরোঃ |
আনযেত্সর্বযত্নেন প্রার্থযিত্বা ধনেশ্বরান্ || ৭- ২৭||
গুরোর্ন খণ্ডযেদাজ্ঞামপি প্রাণান্পরিত্যজেত্ |
কৃত্বাজ্ঞাং প্রাপ্নুযান্মুক্তিং লঙ্ঘযন্নরকং ব্রজেত্ || ৭- ২৮||
পর্যটেত্পৃথিবীং কৃত্স্নাং সশৈলবনকাননাম্ |
গুরুভৈষজ্যসিদ্ধ্যর্থমপি গচ্ছেদ্রসাতলম্ || ৭- ২৯||
যদাদিশেদ্গুরুঃ কিংচিত্তত্কুর্যাদবিচারতঃ |
অমীমাংস্যা হি গুরবঃ সর্বকার্যেষু সর্বথা || ৭- ৩০||
নোত্থাপযেত্সুখাসীনং শযানং ন প্রবোধযেত্ |
আসীনো গুরুমাসীনমভিগচ্ছেত্প্রতিষ্ঠিতম্ || ৭- ৩১||
পথি প্রযান্তং যান্তং চ যত্নাদ্বিশ্রমযেদ্গুরুম্ |
ক্ষিত্পিপাসাতুরং স্নাতং জ্ঞাত্বা শক্তং চ ভোজযেত্ || ৭- ৩২||
অভ্যঙ্গোদ্বর্তনং স্নানং ভোজনষ্ঠীবমার্জনম্ |
গাত্রসংবাহনং রাত্রৌ পাদাভ্যঙ্গং চ যত্নতঃ || ৭- ৩৩||
প্রাতঃ প্রসাধনং দত্ত্বা কার্যং সংমার্জনাঞ্জনম্ |
নানাপুষ্পপ্রকরণং শ্রীমদ্ব্যাখ্যানমণ্ডপে || ৭- ৩৪||
স্থাপ্যাসনং গুরোঃ পূজ্যং শিবজ্ঞানস্য পুস্তকম্ |
তত্র তিষ্ঠেত্প্রতীক্ষংস্তদ্গুরোরাগমনং ক্রমাত্ || ৭- ৩৫||
গুরোর্নিন্দাপবাদং চ শ্রুত্বা কর্ণৌ পিধাপযেত্ |
অন্যত্র চৈব সর্পেত্তু নিগৃহ্ণীযাদুপাযতঃ || ৭- ৩৬||
ন গুরোরপ্রিযং কুর্যাত্পীডিতস্তারিতো ঽপি বা |
নোচ্চারযেচ্চ তদ্বাক্যমুচ্চার্য নরকং ব্রজেত্ || ৭- ৩৭||
গুরুরেব পিতা মাতা গুরুরেব পরঃ শিবঃ |
যস্যৈব নিশ্চিতো ভাবস্তস্য মুক্তির্ন দূরতঃ || ৭- ৩৮||
আহারাচারধর্মাণাং যত্কুর্যাদ্গুরুরীশ্বরঃ |
তথৈব চানুকুর্বীত নানুযুঞ্জীত কারণম্ || ৭- ৩৯||
যজ্ঞস্তপাংসি নিযমাত্তানি বৈ বিবিধানি চ |
গুরুবাক্যে তু সর্বাণি সংপদ্যন্তে ন সংশযঃ || ৭- ৪০||
অজ্ঞানপঙ্কনির্মগ্নং যঃ সমুদ্ধরতে জনম্ |
শিবজ্ঞানাত্মহস্তেন কস্তং ন প্রতিপূজযেত্ || ৭- ৪১||
ইতি যঃ পূজযেন্নিত্যং গুরুমূর্তিস্থমীশ্বরম্ |
সর্বপাপবিনির্মুক্তঃ প্রাপ্নোতি পরমং পদম্ || ৭- ৪২||
স্নাত্বাম্ভসা ভস্মনা বা শুক্লবস্ত্রোপবীতবান্ |
দূর্বাগর্ভস্থিতং পুষ্পং গুরুঃ শিরসি ধারযেত্ || ৭- ৪৩||
রোচনালভনং কুর্যাদ্ধূযযেদাত্মনস্তনুম্ |
অঙ্গুলীযাক্ষসূত্রং চ কর্ণমাত্রে চ ধারযেত্ || ৭- ৪৪||
গুরুরেবংবিধঃ শ্রীমান্নিত্যং তিষ্ঠেত্সমাহিতঃ |
যস্মাজ্জ্ঞানোপদেশার্থং গুরুরাস্তে সদাশিবঃ || ৭- ৪৫||
ধারযেত্পাদুকে নিত্যং মৃদুবর্মপ্রকল্পিতে |
প্রগৃহ্য দণ্ডং ছত্ত্রং বা পর্যটেদাশ্রমাদ্বহিঃ || ৭- ৪৬||
ন ভূমৌ বিন্যসেত্পাদমন্তর্ধানং বিনা গুরুঃ |
কুশপাদকমাক্রম্য তর্পণার্থং প্রকল্পযেত্ || ৭- ৪৭||
পাদস্থানানি পত্ত্রাদ্যৈঃ কৃত্বা দেবগৃহং বিশেত্ |
পাত্রাস্তরিতপাদশ্চ(?)নিত্যং ভুঞ্জীত বাগ্যতঃ || ৭- ৪৮||
ন পাদৌ ধাবযেত্কাংস্যে লোহে বা পরিকল্পিতে |
শৌচযেত্তৃণগর্ভাযাং দ্বিতীযাযাং তথাচমেত্ || ৭- ৪৯||
ন রক্তমুল্বণং বস্ত্রং ধারযেত্কুসুমানি চ |
ন বহির্গন্ধমাল্যানি বাসাংসি মলিনানি চ || ৭- ৫০||
কেশাস্থীনি কপালানি কার্পাসাস্থিতুষাণি চ |
অমেধ্যাঙ্গারভস্মানি নাধিতিষ্ঠেদ্রজাংসি চ || ৭- ৫১||
ন চ লোষ্টং বিমৃদ্নীযান্ন চ ছিন্দ্যান্নখৈস্তৃণম্ |
ন পত্ত্রপুষ্পমূল্যানি বংশমঙ্গলকাষ্ঠিতাম্ || ৭- ৫২||
এবমাদীনি চান্যানি পাণিভ্যাং ন চ মর্দযেত্ |
ন দন্তখাদনং কুর্যাদ্রোমাণ্যুত্পাটযেন্ন চ || ৭- ৫৩||
ন পদ্ভ্যামুল্লিখেদ্ভূমিং লোষ্টকাষ্ঠৈঃ করেণ বা |
ন নখাংশ্চ নখৈর্বিধ্যান্ন কণ্ডূযেন্নখৈস্তনুম্ || ৭- ৫৪||
মুহুর্মুহুঃ শিরঃ শ্মশ্রু ন স্পৃশেত্করজৈর্বুধঃ |
ন লিক্ষাকর্ষণং কুর্যাদাত্মনো বা পরস্য বা || ৭- ৫৫||
সৌবর্ণ্যরৌপ্যতাম্রৈশ্চ শৃঙ্গদন্তশলাকযা |
দেহকণ্ডূযনং কার্যং বংশকাষ্ঠীকবীরণৈঃ(?)|| ৭- ৫৬||
ন বিচিত্তং প্রকুর্বীত দিশশ্চৈবাবলোকযন্ |
ন শোকার্তশ্চ সংতিষ্ঠেদ্ধূত্বা পাণৌ কপোলকম্ || ৭- ৫৭||
ন পাণিপাদবাক্চক্ষুঃ- শ্রোত্রশিশ্নগুদোদরৈঃ |
চাপলানি ন কুর্বীত স সর্বার্থমবাপ্নুযাত্ || ৭- ৫৮||
ন কুর্যাত্কেনচিদ্বৈরমধ্রুবে জীবিতে সতি |
লোককৌতূহলং পাপং সংধ্যাং চ পরিবর্জযেত্ || ৭- ৫৯||
ন কুদ্বারেণ বেশ্মানি নগরং গ্রামমাবিশেত্ |
ন দিবা প্রাবৃতশিরা রাত্রৌ প্রাবৃত্য পর্যটেত্ || ৭- ৬০||
নাতিভ্রমণশীলঃ স্যান্ন বিশেচ্চ গৃহাদ্গৃহম্ |
ন চাজ্ঞানমধীযীত শিবজ্ঞানং সমভ্যসেত্ || ৭- ৬১||
শিবজ্ঞানং পরং ব্রহ্ম তদারভ্য ন সংত্যজেত্ |
ব্রহ্মাসাধ্য চ যো গচ্ছেদ্ব্রহ্মহা স প্রকীর্তিতঃ || ৭- ৬২||
কৃতাঞ্জলিঃ স্থিতঃ শিষ্যো লঘুবস্ত্রমুদঙ্মুখঃ |
শিবমন্ত্রং সমুচ্চার্য প্রাঙ্মুখো ঽধ্যাপযেদ্গুরুঃ || ৭- ৬৩||
নাগদন্তাদিসংভূতং চতুরশ্রং সুশোভনম্ |
হেমরত্নচিতং বাপি গুরোরাসনমুত্তমম্ || ৭- ৬৪||
ন শুশ্রূষার্থকামাশ্চ ন চ ধর্মঃ প্রদৃশ্যতে |
ন ভক্তির্ন যশঃ ক্রৌর্যং ন তমধ্যাপযেদ্গুরুঃ || ৭- ৬৫||
দেবাগ্নিগুরুগোষ্ঠীষু ব্যাখ্যাধ্যযনসংসদি |
প্রশ্নে বাদে ঽনৃতে ঽশৌচে দক্ষিণং বাহুমুদ্ধরেত্ || ৭- ৬৬||
বশে সততনম্রঃ স্যাত্সংহৃত্যাঙ্গানি কূর্মবত্ |
তত্সংমুখং চ নির্গচ্ছেন্নমস্কারপুরস্সরঃ || ৭- ৬৭||
দেবাগ্নিগুরুবিপ্রাণাং ন ব্রজেদন্তরেণ তু |
নার্পযেন্ন চ গৃহ্ণীযাত্কিংচিদ্বস্তু তদন্তরা || ৭- ৬৮||
ন মুখেন ধমেদগ্নিং নাধঃকুর্যান্ন লঙ্ঘযেত্ |
ন ক্ষিপেদশুচিং বহ্নৌ ন চ পাদৌ প্রতাপযেত্ || ৭- ৬৯||
তৃণকাষ্ঠাদিগহনে জন্তুভিশ্চ সমাকুলে |
স্থানে ন দীপযেদগ্নিং দীপ্তং চাপি ততঃ ক্ষিপেত্ || ৭- ৭০||
অগ্নিং যুগপদানীয ধারযেত প্রযত্নতঃ |
জ্বলন্তং ন প্রদীপং চ স্বযং নির্বাপযেদ্বুধঃ || ৭- ৭১||
শিবব্রতধরং দৃষ্ট্বা সমুত্থায সদা দ্রুতম্ |
শিবো ঽযমিতি সংকল্প্য হর্ষিতঃ প্রণমেত্ততঃ || ৭- ৭২||
ভোগান্দদাতি বিপুলান্লিঙ্গে সংপূজিতঃ শিবঃ |
অগ্নৌ চ বিবিধাং সিদ্ধিং গুরৌ মুক্তিং প্রযচ্ছতি || ৭- ৭৩||
মোক্ষার্থং পূজযেত্তস্মাদ্গুরুমূর্তিস্থমীশ্বরম্ |
গুরুভক্ত্যা লভেজ্জ্ঞানং জ্ঞানান্মুক্তিমবাপ্নুযাত্ || ৭- ৭৪||
সর্বপর্বসু যত্নেন হ্যেষু সংপূজযেচ্ছিবম্ |
কুর্যাদাযতনে শোভাং গুরুস্থানেষু সর্বতঃ || ৭- ৭৫||
নরদ্বযোচ্ছ্রিতে পীঠে সর্বশোভাসমন্বিতে |
সংস্থাপ্য মণিজং লিঙ্গং স্থানে কুর্যাজ্জগদ্ধিতম্ || ৭- ৭৬||
অন্নপানবিশেষৈশ্চ নৈবেদ্যমুপকল্পযেত্ |
ভোজযেদ্ব্রতিনশ্চাত্র স্বগুরুং চ বিশেষতঃ || ৭- ৭৭||
পূজযেচ্চ শিবজ্ঞানং বাচযীত চ পর্বসু |
দর্শযেচ্ছিবভক্তেভ্যঃ সত্পূজাং পরিকল্পিতাম্ || ৭- ৭৮||
প্রিযং ব্রূযাত্সদা তেভ্যঃ প্রদেযং চাপি শক্তিতঃ |
এবং কৃতে বিশেষেণ প্রসীদতি মহেশ্বরঃ || ৭- ৭৯||
ছিন্নং ভিন্নং মৃতং নষ্টং বর্ধতে নাস্তি কেবলম্ |
ইত্যাদ্যান্ন বদেচ্ছব্দান্সাক্ষাদ্ব্রূযাত্তু মঙ্গলম্ || ৭- ৮০||
অধেনুং ধেনুমিত্যেব ব্রূযাদ্ভদ্রমভদ্রকম্ |
কপালং চ ভগালং স্যাত্পরমং মঙ্গলং বদেত্ || ৭- ৮১||
ঐন্দ্রং ধনুর্মণিধনুর্দাহকাষ্ঠাদি চন্দনম্ |
স্বর্যাতং চ মৃতং ব্রূযাচ্ছিবীভূতং চ যোগিনম্ || ৭- ৮২||
দ্বিধাভূতং বদেচ্ছিন্নং ভিন্নং চ বহুধা স্থিতম্ |
নষ্টমন্বেষণীযং চ রিক্তং পূর্ণাভিবর্ধিতম্ || ৭- ৮৩||
নাস্তীতি শোভনং সর্বমাদ্যমঙ্গাভিবর্ধনম্ |
সিদ্ধিমদ্ব্রূহি গচ্ছন্তং সুপ্তং ব্রূযাত্প্রবর্ধিতম্ || ৭- ৮৪||
ন ম্লেচ্ছমূর্খপতিতৈঃ ক্রূরৈঃ সংতাপবেদিভিঃ |
দুর্জনৈরবলিপ্তৈশ্চ ক্ষুদ্রৈঃ সহ ন সংবদেত্ || ৭- ৮৫||
নাধার্মিকনৃপাক্রান্তে ন দংশমশকাবৃতে |
নাতিশীতজলাকীর্ণে দেশে রোগপ্রদে বসেত্ || ৭- ৮৬||
নাসনং শযনং পানং নমস্কারাভিবাদনম্ |
সোপানত্কঃ প্রকুর্বীত শিবপুস্তকবাচনম্ || ৭- ৮৭||
আচার্যং দৈবতং তীর্থমুদ্ধূতোদং মৃদং দধি |
বটমশ্বত্থকপিলাং দীক্ষিতোদধিসংগমম্ || ৭- ৮৮||
যানি চৈষাং প্রকারাণি মঙ্গলানীহ কানিচিত্ |
শিবাযেতি নমস্কৃত্বা প্রোক্তমেতত্প্রদক্ষিণম্ || ৭- ৮৯||
উপানচ্ছত্ত্রবস্ত্রাণি পবিত্রং করকং স্রজম্ |
আসনং শযনং পানং ধৃতমন্যৈর্ন ধারযেত্ || ৭- ৯০||
পালাশমাসনং শয্যাং পাদুকে দন্তধাবনম্ |
বর্জযেচ্চাপি নির্যাসং রক্তং ন তু সমুদ্ভবম্ || ৭- ৯১||
সংধ্যামুপাস্য কুর্বীত নিত্যং দেহপ্রসাধনম্ |
স্পৃশেদ্বন্দেচ্চ কপিলাং প্রদদ্যাচ্চ গবাং হিতম্ || ৭- ৯২||
যঃ প্রদদ্যাদ্গবাং সম্যক্ফলানি চ বিশেষতঃ |
ক্ষেত্রমুদ্দামযেচ্চাপি তস্য পুণ্যফলং শৃণু || ৭- ৯৩||
যাবত্তত্পত্ত্রকুসুম- কন্দমূলফলানি চ |
তাবদ্বর্ষসহস্রাণি শিবলোকে মহীযতে || ৭- ৯৪||
কৃশরোগার্তবৃদ্ধানাং ত্যক্তানাং নির্জনে বনে |
ক্ষুত্পিপাসাতুরাণাং চ গবাং বিহ্বলচেতসাম্ || ৭- ৯৫||
নীত্বা যস্তৃণতোযানি বনে যত্নাত্প্রযচ্ছতি |
করোতি চ পরিত্রাণং তস্য পুণ্যফলং শৃণু || ৭- ৯৬||
কুলৈকবিংশকোপেতঃ পত্নীপুত্রাদিসংযুতঃ |
মিত্রভৃত্যৈরুপেতশ্চ শ্রীমচ্ছিবপুরং ব্রজেত্ || ৭- ৯৭||
তত্র ভুক্ত্বা মহাভোগান্বিমানৈঃ সার্বকামিকৈঃ |
স মহাপ্রলযং যাবত্তদন্তে মুক্তিমাপ্নুযাত্ || ৭- ৯৮||
গোব্রাহ্মণপরিত্রাণং সকৃত্কৃত্বা প্রযত্নতঃ |
মুচ্যতে পঞ্চভির্ঘোরৈর্মহদ্ভিঃ পাতকৈর্দ্রুতম্ || ৭- ৯৯||
অহিংসা সত্যমস্তেযং ব্রহ্মচর্যমকল্কতা |
অক্রোধো গুরুশুশ্রূষা শৌচং সংতোষমার্জবম্ || ৭- ১০০||
অহিংসাদ্যা যমাঃ পঞ্চ যতীনাং পরিকীর্তিতাঃ |
অক্রোধাদ্যাশ্চ নিযমাঃ সিদ্ধিবৃদ্ধিকরাঃ স্মৃতাঃ || ৭- ১০১||
দশলাক্ষণিকো ধর্মঃ শিবাচারঃ প্রকীর্তিতঃ |
যোগীন্দ্রাণাং বিশেষেণ শিবযোগপ্রসিদ্ধযে || ৭- ১০২||
ন বিন্দতি নরো যোগং পুত্রদারাদিসংগতঃ |
নিবদ্ধঃ স্নেহপাশেন মোহস্তম্ভবলীযসা || ৭- ১০৩||
মোহাত্কুটুম্বসংসক্তস্তৃষ্ণযা শৃঙ্খলীকৃতঃ |
বালৈর্বদ্ধস্তু লোকো ঽযং মুসলেনাভিহন্যতে || ৭- ১০৪||
ইমে বালাঃ কথং ত্যাজ্যা জীবিষ্যন্তি মযা বিনা |
মোহাদ্ধি চিন্তযত্যেবং পরমার্থৌ ন পশ্যতি || ৭- ১০৫||
সংপর্কাদুদরে ন্যস্তঃ শুক্রবিন্দুরচেতনঃ |
স পিত্রা কেন যত্নেন গর্ভস্থঃ পরিপালিতঃ || ৭- ১০৬||
কর্কশাঃ কঠিনা ভক্ষা জীর্যন্তে যত্র ভক্ষিতাঃ |
তস্মিন্নেবোদরে শুক্রং কিং ন জীর্যতি ভক্ষ্যবত্ || ৭- ১০৭||
যেনৈতদ্যোজিতং গর্ভে যেন চৈব বিবর্ধিতম্ |
তেনৈব নির্গত্ং ভূযঃ কর্মণা স্বেন পাল্যতে || ৭- ১০৮||
ন কশ্চিত্কস্যচিত্পুত্রঃ পিতা মাতা ন কস্যচিত্ |
যত্স্বযং প্রাক্তনং কর্ম পিতা মাতেতি তত্স্মৃতম্ || ৭- ১০৯||
যেন যত্র কৃতং কর্ম স তত্রৈব প্রজাযতে |
পিতরৌ চাস্য দাসত্বং কুরুতস্তত্প্রচোদিতৌ || ৭- ১১০||
ন কশ্চিত্কস্যচিচ্ছক্তঃ কর্তুং দুঃখং সুখানি চ |
করোতি প্রাক্তনং কর্ম মোহাল্লোকস্য কেবলম্ || ৭- ১১১||
কর্মদাযাদসংবন্ধাদুপকারঃ পরস্পরম্ |
দৃশ্যতে নাপকারশ্চ মোহেনাত্মনি মন্যতে || ৭- ১১২||
ঈশ্বরাধিষ্ঠিতং কর্ম ফলতীহ শুভাশুভম্ |
গ্রামস্বামিপ্রসাদেন সুকৃতং কর্ষণং যথা || ৭- ১১৩||
দ্বযং দেবত্বমোক্ষায মমেতি ন মমেতি চ |
মমেতি বধ্যতে জন্তুর্ন মমেতি বিমুচ্যতে || ৭- ১১৪||
দ্ব্যক্ষরং চ ভবেন্মৃত্যুস্ত্র্যক্ষরং ব্রহ্ম শাশ্বতম্ |
মমেতি দ্ব্যক্ষরং মৃত্যুস্ত্র্যক্ষরং ন মমেতি চ || ৭- ১১৫||
তস্মাদাত্মন্যহংকারমুত্সৃজ্য প্রবিচারতঃ |
বিধূযাশেষসঙ্গাংশ্চ মোক্ষোপাযং বিচিন্তযেত্ || ৭- ১১৬||
জ্ঞানাদ্যোগপরিক্লেশং কুপ্রাবরণভোজনম্ |
কুচর্যাং কুনিবাসং চ মোক্ষার্থী ন বিচিন্তযেত্ || ৭- ১১৭||
ন দুঃখেন বিনা সৌখ্যং দৃশ্যতে সর্বদেহিনাম্ |
দুঃখং তন্মাত্রকং জ্ঞেযং সুখমানন্ত্যমুত্তমম্ || ৭- ১১৮||
সেবাযাং পাশুপাল্যে চ বানিজ্যে কৃষিকর্মণি |
তুল্যে সতি পরিক্লেশে বরং ক্লেশো বিমুক্তযে || ৭- ১১৯||
স্বর্গাপবর্গযোরেকং যঃ শীঘ্রং ন প্রসাধযেত্ |
যাতি তেনৈব দেহেন স মৃতস্তপ্যতে চিরম্ || ৭- ১২০||
যদবশ্যং পরাধীনৈস্ত্যজনীযং শরীরকম্ |
কস্মাত্তেন বিমূঢাত্মা ন সাধযতি শাশ্বতম্ || ৭- ১২১||
যৌবনস্থা গৃহস্থাশ্চ প্রাসাদস্থাশ্চ যে নৃপাঃ |
সর্ব এব বিশীর্যন্তে শুষ্কস্নিগ্ধান্নভোজনাঃ || ৭- ১২২||
অনেকদোষদুষ্টস্য দেহস্যৈকো মহান্গুণহ্ |
যাং যামবস্থামাপ্নোতি তাং তামেবানুবর্ততে || ৭- ১২৩||
মন্দং পরিহরন্কর্ম স্বদেহমনুপালযেত্ |
বর্ষাসু জীর্ণকটবত্তিষ্ঠন্নপ্যবসীদতি || ৭- ১২৪||
ন তে ঽত্র দেহিনঃ সন্তি যে তিষ্ঠন্তি সুনিশ্চলাঃ |
সর্বে কুর্বন্তি কর্মাণি বিকৃশাঃ পূর্বকর্মভিঃ || ৭- ১২৫||
তুল্যে সত্যপি কর্তব্যে বরং কর্ম কৃতং পরম্ |
যঃ কৃত্বা ন পুনঃ কুর্যান্নানাকর্ম শুভাশুভম্ || ৭- ১২৬||
তস্মাদন্তর্বহিশ্চিন্তামনেকাকারসংস্থিতাম্ |
সংত্যজ্যাত্মহিতার্থায স্বাধ্যাযধ্যানমভ্যসেত্ || ৭- ১২৭||
বিবিক্তে বিজনে রম্যে পুষ্পাশ্রমবিভূষিতে |
স্থানং কৃত্বা শিবস্থানে ধ্যাযেচ্ছান্তং পরং শিবম্ || ৭- ১২৮||
যে ঽতিরম্যাণ্যরণ্যানি সুজলানি শিবানি তু |
বিহাযাভিরতা গ্রামে প্রাযস্তে দৈবমোহিতাঃ || ৭- ১২৯||
বিবেকিনঃ প্রশান্তস্য যত্সুখং ধ্যাযতঃ শিবম্ |
ন তত্সুখং মহেন্দ্রস্য ব্রহ্মণঃ কেশবস্য বা || ৭- ১৩০||
ইতি নামামৃতং দিব্যং মহাকালাদবাপ্তবান্ |
বিস্তরেণানুপূর্বাচ্চ ঋষ্যাত্রেযঃ(?)সুনিশ্চিতম্ || ৭- ১৩১||
প্রজ্ঞামথা বিনির্মথ্য(?)শিবজ্ঞানমহোদধিম্ |
ঋষ্যাত্রেযঃ সমুদ্ধৃত্য প্রাহেদমণুমাত্রকম্ || ৭- ১৩২||
শিবধর্মে মহাশাস্ত্রে শিবধর্মস্য চোত্তরে |
যদনুক্তং ভবেত্কিংচিত্তদত্র পরিকীর্তিতম্ || ৭- ১৩৩||
ত্রিদৈবত্যমিদং শাস্ত্রং মুনীন্দ্রাত্রেযভাষিতম্ |
তির্যঙ্মনুজদেবানাং সর্বেষাং চ বিমুক্তিদম্ || ৭- ১৩৪||
নন্দিস্কন্দমহাকালাস্ত্রযো দেবাঃ প্রকীর্তিতাঃ |
চন্দ্রাত্রেযস্তথাত্রিশ্চ ঋষ্যাত্রেযো মুনিত্রযম্ || ৭- ১৩৫||
এতৈর্মহাত্মবিঃ প্রোক্তাঃ শিবধর্মাঃ সমাসতঃ |
সর্বলোকোপকারার্থং নমস্তেভ্যঃ সদা নমঃ || ৭- ১৩৬||
তেষাং শিষ্যপ্রশিষ্যৈশ্চ শিবধর্মপ্রবক্তৃভিঃ |
ব্যাপ্তং জ্ঞানসরঃ শার্বং বিকচৈরিব পঙ্কজৈঃ || ৭- ১৩৭||
যে শ্রাবযন্তি সততং শিবধর্মং শিবার্থিনাম্ |
তে রুদ্রাস্তে মুনীন্দ্রাশ্চ তে নমস্যাঃ স্বভক্তিতঃ || ৭- ১৩৮||
যে সমুত্থায শৃণ্বন্তি শিবধর্মং দিনে দিনে |
তে রুদ্রা রুদ্রলোকেশা ন তে প্রকৃতিমানুষাঃ || ৭- ১৩৯||
শিবোপনিষদং হ্যেতদধ্যাযৈঃ সপ্তভিঃ স্মৃতম্ |
ঋষ্যাত্রেযসগোত্রেণ মুনিনা হিতকাম্যযা || ৭- ১৪০||
|| ইতি শিবোপনিষদি শিবাচারাধ্যাযঃ সপ্তমঃ ||
|| ইতি শিবোপনিষত্সমাপ্তা ||