শাণ্ডিল্য ০১

.. শাণ্ডিল্যোপনিষত্ ..

শাণ্ডিল্যোপনিষত্প্রোক্তযমাদ্যষ্টাঙ্গযোগিনঃ .
যদ্বোধাদ্যান্তি কৈবল্যং স রামো মে পরা গতিঃ ..
ॐ ভদ্রং কর্ণেভিঃ শ্রুণুযাম দেবা ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
শাণ্ডিল্যো হ বা অথর্বাণং পপ্রচ্ছাত্মলাভোপাযভূত-
মষ্টাঙ্গযোগমনুব্রূহীতি . স হোবাচাথর্বা যমনিযমাসন-
প্রাণাযামপ্রত্যাহারধারণাধ্যানসমাধযোঽষ্টাঙ্গানি .
তত্র দশ যমাঃ . তথা নিযমাঃ . আসনান্যষ্টৌ . ত্রযঃপ্রাণাযামাঃ .
পঞ্চপ্রত্যাহারাঃ . তথা ধারণা . দ্বিপ্রকারং ধ্যানম্ .
সমাধিস্ত্বেকরূপঃ . তত্রাহিংসাসত্যাস্তেযব্রহ্মচর্যদযাজপ-
ক্ষমাধৃতিমিতাহারশৌচানি চেতি যমাদশ . তত্র হিংসা নাম
মনোবাক্কাযকর্মভিঃ সর্বভূতেষু সর্বদা ক্লেশজননম্ .
সত্যং নাম মনোবাক্কাযকর্মভির্ভূতহিতযথার্থাভিভাষণম্ .
অস্তেযং নাম মনোবাক্কাযকর্মভিঃ পরদ্রব্যেষু নিঃস্পৃহা .
ব্রহ্মচর্যং নাম সর্বাবস্থাসু মনোবাক্কাযকর্মভিঃ সর্বত্র মৈথুনত্যাগঃ .
দযা নাম সর্বভূতেষু সর্বত্রানুগ্রহঃ . আর্জবং নাম মনোবাক্কাযকর্মণাং
বিহিতাবিহিতেষু জনেষু প্রবৃত্তৌ নিবৃত্তৌ বা একরূপত্বম্ . ক্ষমা নাম
প্রিযাপ্রিযেষু সর্বেষু তাডনপূজনেষু সহনম্ . ধৃতির্নামার্থহানৌ
স্বেষ্টবন্ধুবিযোগে তত্প্রাপ্তৌ সর্বত্র চেতঃ স্থাপনম্ . মিতাহারো নাম
চতুর্থাংশাবশেষকসুস্নিগ্ধমধুরাহারঃ . শৌচং নাম দ্বিবিধং
বাহ্যমান্তরং চেতি . তত্র মৃজ্জলাভ্যাং বাহ্যম্ . মনঃশুদ্ধিরান্তরম্ .
তদধ্যাত্মবিদ্যযা লভ্যম্ .. ১..
তপঃসন্তোষাস্তিক্যদানেশ্বরপূজনসিদ্ধান্তশ্রবণহ্রীমতিজপো
ব্রতানি দশ নিযমাঃ . তত্র তপো নাম বিধ্যুক্তকৃচ্ছ্রচান্দ্রাযণাদিভিঃ
শরীরশোষণম্ . সন্তোষো নাম যদৃচ্ছালাভসন্তুষ্টিঃ .
আস্তিক্যং নাম বেদোক্তধর্মাধর্মেষু বিশ্বাসঃ . দানং নাম
ন্যাযার্জিতস্য ধনধান্যাদিঃ শ্রদ্ধযার্হ্তিভ্যঃ প্রদানম্ .
ঈশ্বরপূজনং নাম প্রসন্নস্বভাবেন যথাশক্তি বিষ্ণুরুদ্রাদি
পূজনম্ . সিদ্ধান্তশ্রবণং নাম বেদান্তার্থবিচারঃ .
হ্রীর্নাম বেদলৌকিকমার্গকুত্সিতকর্মণি লজ্জা . মতির্নাম
বেদবিহিতকর্মমার্গেষু শ্রদ্ধা . জপো নাম বিধিবদ্গুরূপদিষ্ট-
বেদাবিরুদ্ধমন্ত্রাভ্যাসঃ . তদ্দ্বিবিধং বাচিকং মানসং চেতি .
মানসং তু মনসা ধ্যানযুক্তম্ . বাচিকং দ্বিবিধমুচ্চৈ-
রুপাংশুভেদেন . উচ্চৈরুচ্চারণং যথোক্তফলম্ . উপাংশু
সহস্রগুণম্ . মানসং কোটিগুণম্ . ব্রতং নাম বেদোক্তবিধি-
নিষেধানুষ্ঠাননৈযত্যম্ .. ২..
স্বস্তিকগোমুখপদ্মবীরসিংহভদ্রমুক্তমযূরাখ্যান্যাসনান্যষ্টৌ .
স্বস্তিকং নাম–জানূর্বোন্তরে সম্যক্কৃত্বা পাদতলে উভে .
ঋজুকাযঃ সমাসীনঃ স্বস্তিকং তত্প্রচক্ষতে .. ১..
সব্যে দক্ষিণগুল্ফং তু পৃষ্ঠপার্শ্বে নিযোজযেত্ .
দক্ষিণেঽপি তথা সব্যং গোমুখং গোমুখং যথা .. ২..
অঙ্গুষ্ঠেন নিবধ্নীযাদ্ধস্তাভ্যাং ব্যুত্ক্রমেণ চ .
ঊর্বোরুপরি শাণ্ডিল্য কৃত্বা পাদতলে উভে .
পদ্মাসনং ভবেদেতত্সর্বেষামপি পূজিতম্ .. ৩..
একং পাদমথৈকস্মিন্বিন্যস্যোরুণি সংস্থিতঃ .
ইতরস্মিংস্তথা চোরূং বীরাসনমুদীরিতম্ .. ৪..
দক্ষিণং সব্যগুল্ফেন দক্ষিণেন তথেতরম্ .
হস্তৌ চ জান্বোঃ সংস্থাপ্য স্বাঙ্গুলীশ্চ প্রসার্য চ .. ৫..
ব্যক্তবক্ত্রো নিরীক্ষেত নাসাগ্রং সুসমাহিতঃ .
সিংহাসনং ভবেদেতত্পূজিতং যোগিভিঃ সদা .. ৬..
যোনীং বামেন সংপীড্য মেঢ্রাদ্রুপরি দক্ষিণম্ .
ভ্রূমধ্যে চ মনোলক্ষ্যং সিদ্ধাসনমিদং ভবেত্ .. ৭..
গুল্ফৌ তু বৃষণস্যাধঃ সীবন্যাঃ পার্শ্বযোঃ ক্ষিপেত্ .
পাদপার্শ্বে তু পাণিভ্যাং দৃঢং বধ্বা সুনিশ্চলম্ .
ভদ্রাসনং ভবেদেতত্সর্বব্যাধিবিষাপহম্ .. ৮..
সংপীড্য সীবিনীং সূক্ষ্মাং গুল্ফেনৈব তু সব্যতঃ .
সব্যং দক্ষিণগুল্ফেন মুক্তাসনমুদীরিতম্ .. ৯..
অবষ্টভ্য ধরাং সম্যক্তলাভ্যাং তু করদ্বযোঃ .
হস্তযোঃ কূর্পরৌ চাপি স্থাপযেন্নাভিপার্শ্বযওঃ .. ১০..
সমুন্নতশিরঃপাদো দণ্ডবদ্ব্যোম্নি সংস্থিতঃ .
মযূরাসনমেতত্তু সর্বপাপপ্রণাশনম্ .. ১১..
শরীরান্তর্গতাঃ সর্বে রোগা বিনশ্যন্তি . বিষাণি জীর্যন্তে .
যেন কেনাসনেন সুখধারণং ভবত্যশক্তস্তত্সমাচরেত্ .
যেনাসনং বিজিতং জগত্ত্রযং তেন বিজিতং ভবতি .
যমনিযমাভ্যাং সংযুক্তঃ পুরুষঃ প্রাণাযামং চরেত্ .
তেন নাড্যঃ শুদ্ধা ভবন্তি .. ৩..
অথ হৈনমথর্বাণং শাণ্ডিল্যঃ পপ্রচ্ছ কেনোপাযেন
নাড্যঃ শুদ্ধাঃ স্যুঃ . নাড্যঃ কতিসংখ্যাকাঃ .
তাসামুত্পত্তিঃ কীদৃশী . তাসু কতি বযবস্তিষ্ঠন্তি .
তেষাং কানি স্থানানি . তত্কর্মাণি কানি .
দেহে যানি যানি বিজ্ঞাতব্যানি তত্সর্বং মে ব্রূহীতি .
স হোবাচ অথর্বাণ অথেদং শরীরং ষণ্ণবত্যঙ্গুলাত্মকং
ভবতি . শরীরাত্প্রাণো দ্বাদশাঙ্গুলাধিকো ভবতি .
শরীরস্থং প্রাণমগ্নিনা সহ যোগাভ্যাসেন সমং ন্যূনং বা
যঃ করোতি স যোগিপুঙ্গবো ভবতি . দেহমধ্যে শিখিস্থানং
ত্রিকোণং তপ্তজাম্বূনদপ্রভং মনুষ্যাণাম্ .
চতুষ্পদাং চতুরস্রম্ . বিহঙ্গানাং বৃত্তাকারম্ .
তন্মধ্যে শুভা তন্বী পাবকী শিখা তিষ্ঠতি .
গুদাদ্ব্যঙ্গুলাদূর্ধ্বং মেঢ্রাদ্ব্যঙ্গুলাদধো দেহমধ্যং
মনুষ্যাণাং ভবতি . চতুষ্পদাং হৃন্মধ্যম্ .
বিহঙ্গানাং তুঙ্গমধ্যম্ . দেহমধ্যং নবাঙ্গুলং
চতুরঙ্গুলমুত্সেধাযতমণ্ডাকৃতি . তন্মধ্যে নাভিঃ .
তত্র দ্বাদশারযুতং চক্রম্ . তচ্চক্রমধ্যে
পুণ্যপাপপ্রচোদিতো জীবো ভ্রমতি . তন্তুপঞ্জরমধ্যস্থলূতিকা
যথা ভ্রমতি তথা চাসৌ তত্র প্রাণশ্চরতি . দেহেঽস্মিঞ্জীবঃ
প্রাণারূঢো ভবেত্ . নাভেস্তির্যগধঊর্ধ্বং কুণ্ডলিনীস্থানম্ .
অষ্টপ্রকৃতিরূপাষ্টধা কুণ্ডলীকৃতা কুণ্ডলিনী শক্তির্ভবতি .
যথাবদ্বাযুসংচারং জলান্নাদীনি পরিতঃ স্কন্ধঃ পার্শ্বেষু
নিরুধ্যৈনং মুখেনৈব সমাবেষ্ট্য ব্রহ্মরন্ধ্রং যোগকালে
চাপানেনাগ্নিনা চ স্ফুরতি . হৃদযাকাশে মহোজ্জ্বলা
জ্ঞানরূপা ভবতি . মধ্যস্থকুণ্ডলিনীমাশ্রিত্য
মুখ্যা নাড্যশ্চতুর্দশ ভবন্তি . তত্র সুষুম্না
বিশ্বধারিণী মোক্ষমার্গেতি চাচক্ষতে .
গুদস্য পৃষ্ঠভাগে বীণাদণ্ডাশ্রিতা মূর্ধপর্যন্তং
ব্রহ্মরন্ধ্রে বিজ্ঞেযা ব্যক্তা সূক্ষ্মা বৈষ্ণবী ভবতি .
সুষুম্নাযাঃ সব্যভাগে ইডা তিষ্ঠতি . দক্ষিণভাগে
পিঙ্গলা ইডাযাং চন্দ্রশ্চরতি . পিঙ্গলাযাং রবিঃ .
তমোরূপশ্চন্দ্রঃ . রজোরূপো রবিঃ . বিষভাগো রবিঃ .
অমৃতভাগশ্চন্দ্রমাঃ . তাবেব সর্বকালং ধত্তে .
সুষুম্না কালভোক্ত্রী ভবতি . সুষুম্না পৃষ্ঠপার্শ্বযোঃ
সরস্বতীকুহূ ভবতঃ . যশস্বিনীকুহূমধ্যে বারুণী প্রতিষ্ঠিতা
ভবতি . পূষাসরস্বতীমধ্যে পযস্বিনী ভবতি . গান্ধারী-
সরস্বতিমধ্যে যশস্বিনী ভবতি . কন্দমযেঽলম্বুসা ভবতি.
সুষুম্নাপূর্বভাগে মেঢ্রান্তং কুহূর্ভবতি . কুণ্ডলিন্যা
অধশ্চোর্ধ্বং বারুণী সর্বগামিনী ভবতি . যশস্বিনী সৌম্যা চ
পাদাঙ্গুষ্ঠান্তমিষ্যতে . পিঙ্গলা চোর্ধ্বগা যাম্যনাসান্তং
ভবতি . পিঙ্গলাযাঃ পৃষ্ঠতো যাম্যনেত্রানতং পূষা ভবতি .
যাম্যকর্ণান্তং যশস্বিনী ভবতি . জিহ্বাযা ঊর্ধ্বানতং সরস্বতী ভবতি .
আসব্যকর্ণান্তমূর্ধ্বগা শঙ্খিনী ভবতি . ইডাপৃষ্ঠভাগা-
ত্সব্যনেত্রান্তগা গান্ধারী ভবতি . পাযুমূলাদধোর্ধ্বগালম্বুসা
ভবতি . এতাশ্চ চতুর্দশসু নাডীষ্বন্যা নাড্যঃ সংভবন্তি .
তাস্বন্যাস্তাস্বন্যা ভবন্তীতি বিজ্ঞেযাঃ ..
যথাশ্বত্থাদিপত্রং শিরাভির্ব্যাপ্তমেবং শরীরং নাডীভির্ব্যাপ্তম্ .
প্রাণাপানসমানোদানব্যানা নাগকূর্মকৃকরদেবদত্তধনঞ্জযা
এতে দশ বাযবঃ সর্বাসু নাডীষু চরন্তি . আস্যনাসিকাকণ্ঠনাভি-
পাদাঙ্গুষ্ঠদ্বযকুণ্ডল্যধশ্চোর্ধ্বভাগেষু প্রাণঃ সংচরতি .
শ্রোত্রাক্ষিকটিগুল্ফঘ্রাণগলস্ফিগ্দেশেষু ব্যানঃ সংচরতি .
গুদমেঢ্রোরুজানূদরবৃষণকটিজঙ্ঘানাভিগুদাগ্ন্যগারেষ্বপানঃ
সংচরতি . সর্বসন্ধিস্থ উদানঃ . পাদহস্তযোরপি সর্বগাত্রেষু সর্বব্যাপী
সমানঃ . ভুক্তান্নরসাদিকং গাত্রেগ্নিনা সহ ব্যাপযন্দ্বিসপ্ততিসহস্রেষু
নাডীমার্গেষু চরন্সমানবাযুরগ্নিনা সহ সাঙ্গোপাঙ্গকলেবরং
ব্যাপ্নোতি . নাগাদিবাযবঃ পঞ্চত্বগস্থ্যাদিসংভবাঃ . তুন্দস্থং
জলমন্নং চ রসাদিষু সমীরিতং তুন্দমধ্যগতঃ প্রাগস্তানি পৃথক্কুর্যাত্ .
অগ্নেরুপরি জলং স্থাপ্য জলোপর্যন্নাদীনি সংস্থাপ্য স্বযমপানং সংপ্রাপ্য
তেনৈব সহ মারুতঃ প্রযাতি দেহমধ্যগতং জ্বলনম্ . বাযুনা পালিতো
বহ্নিরপানেন শনৈর্দেহমধ্যে জ্বলতি . জ্বলনো জ্বালাভিঃ প্রাণেন কোষ্ঠমধ্যগতং
জলমত্যুষ্ণমকরোত্ . জলোপরি সমর্পিতব্যঞ্জনসংযুক্তমন্নং বহ্নিসংযুক্তবারিণা
পক্বমকরোত্ . তেন স্বেদমূত্রজলরক্তবীর্যরূপরসপুরীষাদিকং প্রাণঃ
পৃথক্কুর্যাত্ . সমানবাযুনা সহ সর্বাসু নাডীষু রসং ব্যাপযঞ্ছ্বাসরূপেণ
দেহে বাযুশ্চরতি . নবভির্ব্যোমরন্ধ্রৈঃ শরীরস্য বাযবঃ কুর্বন্তি বিণ্মূত্রাদিবিসর্জনম্ .
নিশ্বাসোচ্ছ্বাসকাসশ্চ প্রাণকর্মোচ্যতে . বিণ্মূত্রাদিবিসর্জনমপানবাযুকর্ম .
হানোপাদানচেষ্টাদি ব্যানকর্ম . দেহস্যোন্নযনাদিকমুদানকর্ম .
শরীরপোষণাদিকং সমানকর্ম . উদ্গারাদি নাগকর্ম . নিমীলনাদি কূর্মকর্ম .
ক্ষুত্করণং কৃকরকর্ম . তন্দ্রা দেবদত্তকর্ম . শ্লেষ্মাদি ধনঞ্জযকর্ম .
এবং নাডীস্থানং বাযুস্থানং তত্কর্ম চ সম্যগ্জ্ঞাত্বা নাডীসংশোধনং কুর্যাত্ .. ৪..
যমনিযমযুতঃ পুরুষঃ সর্বসঙ্গবিবর্জিতঃ কৃতবিদ্যঃ
সত্যধর্মরতো জিতক্রোধো গুরুশুশ্রূষানিরতঃ পিতৃমাতৃবিধেযঃ
স্বাশ্রমোক্তসদাচারবিদ্বচ্ছিক্ষিতঃ ফলমূলোদকান্বিতং
তপোবনং প্রাপ্য রম্যদেশে ব্রহ্মঘোষসমন্বিতে
স্বধর্মনিরতব্রহ্মবিত্সমাবৃতে ফলমূলপুষ্পবারিভিঃ
সুসংপূর্ণে দেবাযতনে নদীতীরে গ্রামে নগরে বাপি সুশোভনমঠং
নাত্যুচ্চনীচাযতমল্পদ্বারং গোমযাদিলিপ্তং সর্বরক্ষাসমন্বিতং
কৃত্বা তত্র বেদান্তশ্রবণং কুর্বন্যোগং সমারভেত্ . আদৌ
বিনাযকং সংপূজ্য স্বেষ্টদেবতাং নত্বা পূর্বোক্তাসনে স্থিত্বা
প্রাঙ্মুখ উদঙ্মুখো বাপি মৃদ্বাসনেষু জিতাসনগতো
বিদ্বান্সমগ্রীবশিরোনাসাগ্রদৃগ্ভ্রূমধ্যে শশভৃদ্বিংবং
পশ্যন্নেত্রাভ্যামমৃতং পিবেত্ . দ্বাদশমাত্রযা ইডযা
বাযুমাপূর্যোদরে স্থিতং জ্বালাবলীযুতং রেফবিন্দুযুক্তমগ্নিমণ্ডলযুতং
ধ্যাযেদ্রেচযেত্পিঙ্গলযা . পুনঃ পিঙ্গলযাপূর্য কুম্ভিত্বা
রেচযেদিডযা . ত্রিচতুস্ত্রিচতুঃসপ্তত্রিচাতুর্মাসপর্যন্তং ত্রিসন্ধিষু
তদন্তরালেষু চ ষট্কৃত্ব আচরেন্নাডীশুদ্ধির্ভবতি . ততঃ
শরীরে লঘুদীপ্তিবহ্নিবৃদ্ধিনাদাভিব্যক্তির্ভবতি .. ৫..
প্রাণাপানসমাযোগঃ প্রাণাযামো ভবতি .
রেচকপূরককুম্ভকভেদেন স ত্রিবিধঃ .
তে বর্ণাত্মকাঃ . তস্মাত্প্রণব এব প্রাণাযামঃ
পদ্মাদ্যাসনস্থঃ পুমান্নাসাগ্রে
শশভৃদ্বিম্বজ্যোত্স্নাজালবিতানিতাকারমূর্তী রক্তাঙ্গী
হংসবাহিনী দণ্ডহস্তা বালা গাযত্রী ভবতি . উকারমূর্তিঃ
শ্বেতাঙ্গী তার্ক্ষ্যবাহিনী যুবতী চক্রহস্তা সাবিত্রী ভবতি .
মকারমূর্তিঃ কৃষ্ণাঙ্গী বৃষভবাহিনী বৃদ্ধা
ত্রিশূলধারিণী সরস্বতী ভবতি . অকারাদিত্রযাণাং
সর্বকারণমেকাক্ষরং পরংজ্যোতিঃ প্রণবং ভবতীতি ধ্যাযেত্ .
ইডযা বাহ্যাদ্বাযুমাপূর্য ষোডশমাত্রাভিরকারং
চিন্তযন্পূরিতং বাযুং চতুঃষষ্টিমাত্রাভিঃ কুম্ভযিত্বোকারং
ধ্যাযন্পূরিতং পিঙ্গলযা দ্বাত্রিংশন্মাত্রযা মকারমূর্তি-
ধ্যানেনৈবং ক্রমেণ পুনঃ পুনঃ কুর্যাত্ .. ৬..
অথাসনদৃঢো যোগী বশী মিতহিতাশনঃ
সুষুম্নানাডীস্থমলশোষার্থং যোগী
বদ্ধপদ্মাসনো বাযুং চন্দ্রেণাপূর্য
যথাশক্তি কুম্ভযিত্বা সূর্যেণ রেচযিত্বা
পুনঃ সূর্যেণাপূর্য কুম্ভযিত্বা চন্দ্রেণ
বিরেচ্য যযা ত্যজেত্তযা সংপূর্য ধারযেত্ .
তদেতে শ্লোকা ভবন্তি .
প্রাণং প্রাগিডযা পিবেন্নিযমিতং ভূযোঽন্যযা রেচযে-
  ত্পীত্বা পিঙ্গলযা সমীরণমথো বদ্ধ্বা ত্যজেদ্বামযা .