শাট্যাযনীয

.. শাট্যাযনীযোপনিষত্ ..

শাট্যাযনীব্রহ্মবিদ্যাখণ্ডাকারসুখাকৃতি .
যতিবৃন্দহৃদাগারং রামচন্দ্রপদং ভজে ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
হরিঃ ॐ ..
মন এব মনুষ্যাণাং কারণং বন্ধমোক্ষযোঃ .
বন্ধায বিষযাসক্তং মুক্ত্যৈ নির্বিষযং স্মৃতম্ .. ১..
সমাসক্তং সদা চিত্তং জন্তোর্বিষযগোচরে .
যদ্যেবং ব্রহ্মণি স্যাত্তত্কো ন মুচ্যেত বন্ধনাত্ .. ২..
বিত্তমেব হি সংসারস্তত্প্রযত্নেন শোধযেত্ .
যচ্চিত্তস্তন্মযো ভবতি গুহ্যমেতত্সনাতনম্ .. ৩..
নাবেদবিন্মনুতে তং বৃহন্তং
নাব্রহ্মবিত্পরমং প্রৈতি ধাম .
বিষ্ণুক্রান্তং বাসুদেবং বিজান-
ন্বিপ্রো বিপ্রত্বং গচ্ছতে তত্ত্বদর্শী .. ৪..
অথাহ যত্পরমং ব্রহ্ম সনাতনং
যে শ্রোত্রিযা অকামহতা অধীযুঃ .
শান্তো দান্ত উপরতিস্তিতিক্ষুহু-
র্যোঽনূচানো হ্যভিজজ্ঞৌ সমানঃ .. ৫..
ত্যক্তেষণো হ্যনৃণস্তং বিদিত্বা
মৌনী বসেদাশ্রমে যত্র কুত্র .
অথাশ্রমং চরমং সংপ্রবিশ্য
যথোপপত্তিং পঞ্চমাত্রাং দধানঃ .. ৬..
ত্রিদণ্ডমুপবীতং চ বাসঃ কৌপীনবেষ্টনম্ .
শিক্যং পবিত্রমিত্যেতদ্বিভৃযাদ্যাবদাযুষম্ .. ৭..
পঞ্চৈতাস্তু যতের্মাত্রাস্তা মাত্রা ব্রহ্মণে শ্রুতাঃ .
ন ত্যজেদ্যাবদুত্ক্রান্তিরন্তেঽপি নিখনেত্সহ .. ৮..
বিষ্ণুলিঙ্গং দ্বিধা প্রোক্তং ব্যক্তমব্যক্তমেব চ .
তযোরেকমপি ত্যক্ত্বা পতত্যেব ন সংশযঃ .. ৯..
ত্রিদণ্ডং বৈষ্ণবং লিঙ্গং বিপ্রাণাং মুক্তিসাধনম্ .
নির্বাণং সর্বধর্মাণামিতি বেদানুশাসনম্ .. ১০..
অথ খলু সৌম্য কুটীচকো বহূদকো হংসঃ পরমহংস
ইত্যেতে পরিব্রাজকাশ্চতুর্বিধা ভবন্তি . সর্ব এতে বিষ্ণুলিঙ্গিনঃ
শিখিনোপবীতিনঃ শুদ্ধচিত্তা আত্মানমাত্মনা ব্রহ্ম
ভাবযন্তঃ শুদ্ধচিদ্রূপোপাসনরতা জপযমবন্তো
নিযমবন্তঃ সুশীলিনঃ পুণ্যশ্লোকা ভবন্তি . তদেতদৃচাভ্যুক্তম্ .
কুটীচকো বহূদকশ্চাপি হংসঃ
পরমহংস ইব বৃত্ত্যা চ ভিন্নাঃ .
সর্ব এতে বিষ্ণুলিঙ্গং দধানা
বৃত্ত্যা ব্যক্তং বহিরন্তশ্চ নিত্যম্ .
পঞ্চযজ্ঞা বেদশিরঃপ্রবিষ্টাঃ
ক্রিযাবন্তোঽমী সঙ্গতা ব্রহ্মবিদ্যাম্ .
ত্যক্ত্বা বৃক্ষং বৃক্ষমূলং শ্রিতাসঃ
সংন্যস্তপুষ্পা রসমেবাশ্নুবানাঃ .
বিষ্ণুক্রীডা বিষ্ণুরতযো বিমুক্তা
বিষ্ণ্বাত্মকা বিষ্ণুমেবাপিযন্তি .. ১১..
ত্রিসন্ধ্যং শক্তিতঃ স্নানং তর্পণং মার্জনং তথা .
উপস্থানং পঞ্চযজ্ঞান্কুর্যাদামরণান্তিকম্ .. ১২..
দশভিঃ প্রণবৈঃ সপ্তব্যাহৃতিভিশ্চতুষ্পদা .
গাযত্রীজপযজ্ঞশ্চ ত্রিসন্ধ্যং শিরসা সহ .. ১৩..
যোগযজ্ঞঃ সদৈকাগ্রভক্ত্যা সেবা হরের্গুরোঃ .
অহিংসা তু তপোযজ্ঞো বাঙ্মনঃকাযকর্মভিঃ .. ১৪..
নানোপনিষদভ্যাসঃ স্বাধ্যাযো যজ্ঞ ঈরিতঃ .
ॐইত্যাত্মানমব্যগ্রো ব্রহ্মণ্যগ্না জুহোতি যত্ .. ১৫..
জ্ঞানযজ্ঞঃ স বিজ্ঞেযঃ সর্বযজ্ঞোত্তমোত্তমঃ .
জ্ঞানদণ্ডা জ্ঞানশিখা জ্ঞানযজ্ঞোপবীতিনঃ .. ১৬..
শিখা জ্ঞানমযী যস্য উপবীতং চ তন্মযম্ .
ব্রাহ্মণ্যং সকলং তস্য ইতি বেদানুশাসনম্ .. ১৭..
অথ খলু সৌম্যেত পরিব্রাজকা যথা প্রাদুর্ভবন্তি
তথা ভবন্তি . কামক্রোধলোভমোহদম্ভদর্পাসূযা-
মমত্বাহঙ্কারাদীংস্তিতীর্য মানাবমানৌ নিন্দাস্তুতী
চ বর্জযিত্বা বৃক্ষ ইব তিষ্ঠাসেত্ . ছিদ্যমানো ন
ব্রূযাত্ . তদৈবং বিদ্বাংস ইহৈবামৃতা ভবন্তি .
তদেতদৃচাভ্যুক্তম্ .
বন্ধুপুত্রমনুমোদযিত্বা-
নবেক্ষ্যমাণো দ্বন্দ্বসহঃ প্রশান্তঃ .
প্রাচীমুদীচিং বা নির্বর্তযংশ্চরেত
পাত্রী দণ্ডী যুগমাত্রাবলোকী .
শিখী মুণ্ডী চোপবীতী কুটুম্বী
যাত্রামাত্রং প্রতিগৃহ্ণন্মনুষ্যাত্ .. ১৮..
অযাচিতং যাচিতং বোত ভৈক্ষং
মৃদ্দার্বলাবূফলপর্ণপাত্রম্ .
ক্ষীণং ক্ষৌমং তৃণং কন্থাজিনে চ পর্ণ-
মাচ্ছাদনং স্যাদহতং বা বিমুক্তঃ .. ১৯..
ঋতুসন্ধৌ মুণ্ডযেন্মুণ্ডমাত্রং
নাধো নাক্ষং জাতু শিখাং ন বাপযেত্ .
চতুরো মাসান্ধ্রুবশীলতঃ স্যা-
ত্স যাবত্সুপ্তোঽন্তরাত্মা পুরুষো বিশ্বরূপঃ .
অন্যানথাষ্টৌ পুনরুত্থিতেঽস্মি-
ন্স্বকর্মলিপ্সুর্বিহরেদ্বা বসেদ্বা .. ২০..
দেবাগ্ন্যগারে তরুমূলে গুহাযাং
বসেদসঙ্গোঽলক্ষিতশীলবৃত্তঃ .
অনিন্ধনো জ্যোতিরিবোপশান্তো
ন চোদ্বিজেদুদ্বিজেদ্যত্র কুত্র .. ২১..
আত্মানং চেদ্বিজানীযাদযমস্মীতি পূরুষঃ .
কিমিচ্ছন্কস্য কামায শরীরমনুসংজ্বরেত্ .. ২২..
তমেব ধীরো বিজ্ঞায প্রজ্ঞাং কুর্বীত ব্রাহ্মণঃ .
নানুধ্যাযাদ্বহূঞ্ছব্দান্বাচো বিগ্লাপনং হি তত্ .. ২৩..
বাল্যেনৈব হি তিষ্ঠাসেন্নির্বিদ্য ব্রহ্মবেদনম্ .
ব্রহ্মবিদ্যা চ বাল্যং চ নির্বিদ্য মুনিরাত্মবান্ .. ২৪..
যদা সর্বে প্রমুচ্যন্তে কামা যেঽস্য হৃদি শ্রিতাঃ .
অথ মর্ত্যোঽমৃতো ভবত্যত্র ব্রহ্ম সমশ্নুতে .. ২৫..
অথ খলু সৌম্যেদং পরিব্রাজ্যং নৈষ্ঠিকমাত্মধর্মং
যো বিজহাতি স বীরহা ভবতি . স ব্রহ্মহা ভবতি . স ভ্রূণহা
ভবতি . স মহাপাতকী ভবতি . য ইমাং বৈষ্ণবীং নিষ্ঠাং
পরিত্যজ্যতি . স স্তেনো ভবতি . স গুরুতল্পগো ভবতি . স মিত্রধ্রুগ্ভবতি .
স কৃতঘ্নো ভবতি . স সর্বস্মাল্লোকাত্প্রচ্যুতো ভবতি .
তদেতদৃচাভ্যুক্তম্ .
স্তেনঃ সুরাপো গুরুতল্পগামী
মিত্রধ্রুগেতে নিষ্কৃতের্যান্তি শুদ্ধিম্ .
ব্যক্তমব্যক্তং বা বিধৃতং বিষ্ণুলিঙ্গং
ত্যজন্ন শুদ্ধ্যেদখিলৈরাত্মভাসা .. ২৬..
ত্যক্ত্বা বিষ্ণোর্লিঙ্গমন্তর্বহির্বা
যঃ স্বাশ্রমং সেবতেঽনাশ্রমং বা .
প্রত্যপত্তিং ভজতে বাতিমূঢো
নৈষাং গতিঃ কল্পকোট্যাপি দৃষ্টা .. ২৭..
ত্যক্ত্বা সর্বাশ্রমান্ধীরো বসেন্মোক্ষাশ্রমে চিরম্ .
মোক্ষাশ্রমাত্পরিভ্রষ্টো ন গতিস্তস্য বিদ্যতে .. ২৮..
পারিব্রাজ্যং গৃহীত্বা তু যঃ স্বধর্মে ন তিষ্ঠতি .
তমারূঢচ্যুতং বিদ্যাদিতি বেদানুশাসনম্ .. ২৯..
অথ খলু সৌম্যেমং সনাতনমাত্মধর্মং বৈষ্ণবীং
নিষ্ঠাং লব্ধ্বা যস্তামদূষযন্বর্ততে স বশী ভবতি .
স পুণ্যশ্লোকো ভবতি . স লোকজ্ঞো ভবতি . স বেদান্তজ্ঞো ভবতি .
স ব্রহ্মজ্ঞো ভবতি . স সর্বজ্ঞো ভবতি . স স্বরাড্ ভবতি .
স পরং ব্রহ্ম ভগবন্তমাপ্নোতি . স পিতৄন্সম্বন্ধিনো
বান্ধবান্সুহৃদো মিত্রাণি চ ভবাদুত্তরযতি . তদেতদৃচাভ্যুক্তম্ .
শতং কুলানাং প্রথমং বভূব
তথা পরাণাং ত্রিশতং সমগ্রম্ .
এতে ভবন্তি সুকৃতস্য লোকে
যেষং কুলে সংন্যসতীহ বিদ্বান্ .. ৩০..
ত্রিংশত্পরাস্ত্রিংশদপরাংস্ত্রিংশচ্চ পরতঃ পরান্ .
উত্তরযতি ধর্মিষ্ঠঃ পরিব্রাডিতি বৈ শ্রুতিঃ .. ৩১..
সংযস্তমিতি যো ব্রূযাত্কণ্ঠস্থপ্রাণবানপি .
তারিতাঃ পিতরস্তেন ইতি বেদানুশাসনম্ .. ৩২..
অথ খলু সৌম্যেমং সনাতনমাত্মধর্মং বৈষ্ণবীং
নিষ্ঠাং নাসমাপ্য প্রব্রূযাত্ . নানূচানায
নানাত্মবিদে নাবীতরাগায নাবিশুদ্ধায নানুপসন্নায
নাপ্রযতমানসাযেতি হ স্মাহুঃ . তদেতদৃচাভ্যুক্তম্ .
বিদ্যা হ বৈ ব্রাহ্মণমাজগাম
গোপায মাং শেবধিষ্টেঽহমস্মি .
অসূযকাযানৃজবে শঠায
মা মা ব্রূযা বীর্যবতী তথা স্যাম্ .. ৩৩..
যমেব বিদ্যাশ্রুতমপ্রমত্তং
মেধাবিনং ব্রহ্মচর্যোপপন্নম্ .
অস্মা ইমামুপসন্নায সম্যক্
পরীক্ষ্য দদ্যাদ্বৈষ্ণবীমাত্মনিষ্ঠাম্ .. ৩৪..
অধ্যাপিতা যে গুরুং নাদ্রিযন্তে
বিপ্রা বাচা মনসা কর্মণা বা .
যথৈব তেন ন গুরুর্ভোজনীয-
স্তথৈব চানং ন ভুনক্তি শ্রুতং তত্ .. ৩৫..
গুরুরেব পরো ধর্মো গুরুরেব পরা গতিঃ .
একাক্ষরপ্রদাতারং যো গুরুং নাভিনন্দতি .
তস্য শ্রুতং তথা জ্ঞানং স্রবত্যামঘটাম্বুবত্ .. ৩৬..
যস্য দেবে পরা ভক্তির্যথা দেবে তথা গুরৌ .
স ব্রহ্মবিত্পরং প্রেযাদিতি বেদানুশাসনম্ .. ৩৭..
ইত্যুপনিষত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি শাট্যাযনীযোপনিষত্সমাপ্তা ..