শরভ

.. শরভোপনিষত্ ..

সর্বং সন্ত্যজ্য মুনযো যদ্ভজন্ত্যাত্মরূপতঃ .
তচ্ছারভং ত্রিপাদ্ব্রহ্ম স্বমাত্রমবশিষ্যতে ..
ॐ ভদ্রং কর্ণেভিঃ শৃণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্বদেবাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
অথ হৈনং পৈপ্পলাদো ব্রহ্মাণমুবাচ ভো ভগবন্
ব্রহ্মবিষ্ণুরুদ্রাণাং মধ্যে কো বা অধিকতরো ধ্যেযঃ
স্যাত্তত্ত্বমেব নো ব্রূহীতি .
তস্মৈ স হোবাচ পিতামহশ্চ
হে পৈপ্পলাদ শৃণু বাক্যমেতত্ .
বহূনি পুণ্যানি কৃতানি যেন
তেনৈব লভ্যঃ পরমেশ্বরোঽসৌ .
যস্যাঙ্গজোঽহং হরিরিন্দ্রমুখ্যা
মোহান্ন জানন্তি সুরেন্দ্রমুখ্যাঃ .. ১..
প্রভুং বরেণ্যং পিতরং মহেশং
যো ব্রহ্মাণং বিদধাতি তস্মৈ .
বেদাংশ্চ সর্বান্প্রহিণোতি চাগ্র্যং
তং বৈ প্রভুং পিতরং দেবতানাম্ .. ২..
মমাপি বিষ্ণোর্জনকং দেবমীড্যং
যোঽন্তকালে সর্বলোকান্সংজহার .. ৩..
স একঃ শ্রেষ্ঠশ্চ সর্বশাস্তা স এব বরিষ্ঠশ্চ .
যো ঘোরং বেষমাস্থায শরভাখ্যং মহেশ্বরঃ .
নৃসিংহং লোকহন্তারং সংজঘান মহাবলঃ .. ৪..
হরিং হরন্তং পাদাভ্যামনুযান্তি সুরেশ্বরাঃ .
মাবধীঃ পুরুষং বিষ্ণুং বিক্রমস্ব মহানসি .. ৫..
কৃপযা ভগবান্বিষ্ণুং বিদদার নখৈঃ খরৈঃ .
চর্মাম্বরো মহাবীরো বীরভদ্রো বভূব হ .. ৬..
স একো রুদ্রো ধ্যেযঃ সর্বেষাং সর্বসিদ্ধযে . যো ব্রহ্মণঃ পঞ্চবক্রহন্তা
তস্মৈ রুদ্রায নমো অস্তু .. ৭..
যো বিস্ফুলিঙ্গেন ললাটজেন সর্বং জগদ্ভস্মসাত্সংকরোতি .
পুনশ্চ সৃষ্ট্বা পুনরপ্যরক্ষদেবং স্বতন্ত্রং প্রকটীকরোতি .
তস্মৈ রুদ্রায নমো অস্তু .. ৮..
যো বামপাদেন জঘান কালং ঘোরং পপেঽথো হালহলং দহন্তম্ .
তস্মৈ রুদ্রায নমো অস্তু .. ৯..
যো বামপাদার্চিতবিষ্ণুনেত্রস্তস্মৈ দদৌ চক্রমতীব হৃষ্টঃ .
তস্মৈ রুদ্রায নমো অস্তু .. ১০..
যো দক্ষযজ্ঞে সুরসঙ্ঘান্বিজিত্য
বিষ্ণুং ববন্ধোরগপাশেন বীরঃ .
তস্মৈ রুদ্রায নমো অস্তু .. ১১..
যো লীলযৈব ত্রিপুরং দদাহ
বিষ্ণুং কবিং সোমসূর্যাগ্নিনেত্রঃ .
সর্বে দেবাঃ পশুতামবাপুঃ
স্বযং তস্মাত্পশুপতির্বভূব .
তস্মৈ রুদ্রায নমো অস্তু .. ১২..
যো মত্স্যকূর্মাদিবরাহসিংহা-
ন্বিষ্ণুং ক্রমন্তং বামনমাদিবিষ্ণুম্ .
বিবিক্লবং পীড্যমানং সুরেশং
ভস্মীচকার মন্মথং যমং চ .
তস্মৈ রুদ্রায নমো অস্তু .. ১৩..
এবং প্রকারেণ বহুধা প্রতুষ্ট্বা
ক্ষমাপযামাসুর্নীলকণ্ঠং মহেশ্বরম্ .
তাপত্রযসমুদ্ভূতজন্মমৃত্যুজরাদিভিঃ .
নাবিধানি দুঃখানি জহার পরমেশ্বরঃ ..১৪..
এবং মন্ত্রৈঃ প্রার্থ্যমান আত্মা বৈ সর্বদেহিনাম্ .
শঙ্করো ভগবানাদ্যো ররক্ষ সকলাঃ প্রজাঃ .. ১৫..
যত্পাদাম্ভোরুহদ্বন্দ্বং মৃগ্যতে বিষ্ণুনা সহ .
স্তুত্বা স্তুত্যং মহেশানমবাঙ্মনসগোচরম্ .. ১৬..
ভক্ত্যা নম্রতনোর্বিষ্ণোঃ প্রসাদমকরোদ্বিভুঃ .
যতো বাচো নিবর্তন্তে অপ্রাপ্য মনসা সহ .
আনন্দং ব্রহ্মণো বিদ্বান্ন বিভেতি কদাচনেতি .. ১৭..
অণোরণীযান্মহতো মহীযা-
নাত্মাস্যজন্তোর্নিহিতো গুহাযাম্ .
তমক্রতুং পশ্যতি বীতশোকো
ধাতুঃপ্রসাদান্মহিমানমীশম্ .. ১৮..
বসিষ্ঠবৈযাসকিবামদেব-
বিরিঞ্চিমুখ্যৈর্হৃদি ভাব্যমানঃ .
সনত্সুজাতাদিসনাতনাদ্যৈ-
রীড্যো মহেশো ভগবানাদিদেবঃ .. ১৯..
সত্যো নিত্যঃ সর্বসাক্ষী মহেশো
নিত্যানন্দো নির্বিকল্পো নিরাখ্যঃ .
অচিন্ত্যশক্তির্ভগবান্গিরীশঃ
স্বাবিদ্যযা কল্পিতমানভূমিঃ .. ২০..
অতিমোহকরী মাযা মম বিষ্ণোশ্চ সুব্রত .
তস্য পাদাম্বুজধ্যানাদ্দুস্তরা সুতরা ভবেত্ .. ২১..
বিষ্ণুর্বিশ্বজগদ্যোনিঃ স্বাংশভূতৈঃ স্বকৈঃ সহ .
মমাংশসংভবো ভূত্বা পালযত্যখিলং জগত্ .. ২২..
বিনাশং কালতো যাতি ততোঽন্যত্সকলং মৃষা .
ॐ তস্মৈ মহাগ্রাসায মহাদেবায শূলিনে .
মহেশ্বরায মৃডায তস্মৈ রুদ্রায নমো অস্তু .. ২৩..
একো বিষ্ণুর্মহদ্ভূতং পৃথগ্ভূতাযনেকশঃ .
ত্রীংল্লোকান্ব্যাপ্য ভূতাত্মা ভুঙ্ক্তে বিশ্বভুগব্যযঃ .. ২৪..
চতুর্ভিশ্চ চতুর্ভিশ্চ দ্বাভ্যাং পঞ্চমিরেব চ .
হূযতে চ পুনর্দ্বাভ্যাং স মে বিষ্ণুঃ প্রসীদতু .. ২৫..
ব্রহ্মার্পণং ব্রহ্ম হবির্ব্রহ্মাগ্নৌ ব্রহ্মণা হুতম্ .
ব্রহ্মৈব তেন গন্তব্যং ব্রহ্মকর্মসমাধিনা .. ২৬..
শরা জীবাস্তদঙ্গেষু ভাতি নিত্যং হরিঃ স্বযম্ .
ব্রহ্মৈব শরভঃ সাক্ষান্মোক্ষদোঽযং মহামুনে .. ২৭..
মাযাবশাদেব দেবা মোহিতা মমতাদিভিঃ .
তস্য মাহাত্ম্যলেশাংশং বক্তুং কেনাপ্য শক্যতে .. ২৮..
পরাত্পরতরং ব্রহ্ম যত্পরাত্পরতো হরিঃ .
পরাত্পরতরো হীশস্তস্মাত্তুল্যোঽধিকো ন হি .. ২৯..
এক এব শিবো নিত্যস্ততোঽন্যত্সকলং মৃষা .
তস্মাত্সর্বান্পরিত্যজ্য ধ্যেযান্বিষ্ণ্বাদিকান্সুরান্ .. ৩০..
শিব এব সদা ধ্যেযঃ সর্বসংসারমোচকঃ .
তস্মৈ মহাগ্রাসায মহেশ্বরায নমঃ .. ৩১..
পৈপ্পলাদং মহাশাস্ত্রং ন দেযং যস্য কস্যচিত্ .
নাস্তিকায কৃতঘ্নায দুর্বৃত্তায দুরাত্মনে .. ৩২..
দাংভিকায নৃশংসায শঠাযানৃতভাষিণে .
সুব্রতায সুভক্তায সুবৃত্তায সুশীলিনে .. ৩৩..
গুরুভক্তায দান্তায শান্তায ঋজুচেতসে .
শিবভক্তায দাতব্যং ব্রহ্মকর্মোক্তধীমতে .. ৩৪..
স্বভক্তাযৈব দাতব্যমকৃতঘ্নায সুব্রতম্ .
ন দাতব্যং সদা গোপ্যং যত্নেনৈব দ্বিজোত্তম .. ৩৫..
এতত্পৈপ্পলাদং মহাশাস্ত্রং যোঽধীতে শ্রাবযেদ্দ্বিজঃ
স জন্মমরণেভ্যো মুক্তো ভবতি . যো জানীতে সোঽমৃতত্বং
চ গচ্ছতি . গর্ভবাসাদ্বিমুক্তো ভবতি . সুরাপানাত্পূতো
ভবতি . স্বর্ণস্তেযাত্পূতো ভবতি . ব্রহ্মহত্যাত্পূতো
ভবতি . গুরুতল্পগমনাত্পূতো ভবতি . স সর্বান্বেদানধীতো
ভবতি . স সর্বান্দেবান্ধ্যাতো ভবতি . স সমস্তমহাপাতকো-
পপাতকাত্পূতো ভবতি . তস্মাদবিমুক্তমাশ্রিতো ভবতি .
স সততং শিবপ্রিযো ভবতি . স শিবসাযুজ্যমেতি . ন স
পুনরাবর্ততে ন স পুনরাবর্ততে . ব্রহ্মৈব ভবতি . ইত্যাহ
ভগবান্ব্রহ্মেত্যুপনিষত্ ..
ॐ ভদ্রং কর্ণেভিঃ শৃণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু .
ॐ শান্তিঃ শান্তিঃ শান্তিঃ ..
ইতি শরভোপনিষত্সমাপ্তা ..