বরাহ

.. বরাহোপনিষত্ ..

শ্রীমদ্বারাহোপনিষদ্বেদ্যাখণ্ডসুখাকৃতি .
ত্রিপান্নারাযণাখ্যং তদ্রামচন্দ্রপদং ভজে ..
ॐ সহ নাববতু সহ নৌ ভুনক্তু সহ বীর্যং করবাবহৈ ..
তেজস্বিনাবধী তমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ .. অথ ঋভুর্বৈ মহামুনির্দেবমানেন দ্বাদশবত্সরং
তপশ্চচার . তদবসানে বরাহরূপী ভগবান্প্রাদুরভূত্ .
স হোবাচোত্তিষ্ঠোত্তিষ্ঠ বরং বৃণীশ্বেতি . সোদতিষ্ঠত্ .
তস্মৈ নমস্কৃত্যোবাচ ভগবন্কামিভির্যদ্যত্কামিতং
তত্তত্ত্বত্সকাশাত্স্বপ্নেঽপি ন যাচে . সমস্তবেদশাস্ত্রেতিহাসপুরাণানি
সমস্তবিদ্যাজালানি ব্রহ্মাদযঃ সুরাঃ সর্বে ত্বদ্রূপজ্ঞানান্মুক্তিমাহুঃ .
অতস্ত্বদ্রূপপ্রতিপাদিকাং ব্রহ্মবিদ্যাং ব্রূহীতি হোবাচ . তথেতি স হোবাচ
বরাহরূপী ভগবান্ . চতুর্বিংশতিতত্ত্বানি কেচিদিচ্ছন্তি বাদিনঃ .
কেচিত্ষট্ত্রিংশত্তত্ত্বানি কেচিত্ষণ্ণবতীনি চ .. ১..
তেষাং ক্রমং প্রবক্ষ্যামি সাবধানমনাঃ শৃণু .
জ্ঞানেন্দ্রিযাণি পঞ্চৈব শ্রোত্রত্বগ্লোচনাদযঃ .. ২..
কর্মেন্দ্রিযাণি পঞ্চৈব বাক্পাণ্যঙ্ঘ্র্যাদযঃ ক্রমাত্ .
প্রাণাদতস্তু পঞ্চৈব পঞ্চ শব্দাদযস্তথা .. ৩..
মনোবুদ্ধিরহংকারশ্চিত্তং চেতি চতুষ্টযম্ .
চতুর্বিংশতিতত্ত্বানি তানি ব্রহ্মবিদো বিদুঃ .. ৪..
এতৈস্তত্ত্বৈঃ সমং পঞ্চীকৃতভূতানি পঞ্চ চ .
পৃথিব্যাপস্তথা তেজো বাযুরাকাশমেব চ .. ৫..
দেহত্রযং স্থূলসূক্ষ্মকারণানি বিদুর্বুধাঃ .
অবস্থাত্রিতযং চৈব জাগ্রত্স্বপ্নসুষুপ্তযঃ .. ৬..
আহত্য তত্ত্বজাতানাং ষট্ত্রিংশন্মুনযো বিদুঃ .
পূর্বোক্তৈস্তত্ত্বজাতৈস্তু সমং তত্ত্বানি যোজযেত্ .. ৭..
ষড্ভাববিকৃতিশ্চাস্তি জাযতে বর্ধতেঽপি চ .
পরিণামং ক্ষযং নাশং ষড্ভাববিকৃতিং বিদুঃ .. ৮..
অশনা চ পিপাসা চ শোকমোহৌ জরা মৃতিঃ .
এতে ষডূর্মযঃ প্রোক্তাঃ ষট্কোশানথ বচ্মি তে .. ৯..
ত্বক্চ রক্তং মাংসমেদোমজ্জাস্থীনি নিবোধত .
কামক্রোধৌ লোভমোহৌ মদো মাত্সর্যমেব চ .. ১০..
এতেঽরিষড্বা বিশ্বশ্চ তৈজসঃ প্রাজ্ঞ এব চ .
জীবত্রযং সত্ত্বরজস্তমাংসি চ গুণত্রযম্ .. ১১..
প্রারব্ধাগাম্যর্জিতানি কর্মত্রযমিতীরিতম্ .
বচনাদানগমনবিসর্গানন্দপঞ্চকম্ .. ১২..
সংকল্পোঽধ্যবসাযশ্চ অভিমানোঽবধারণা .
মুদিতা করুণা মৈত্রী উপেক্ষা চ চতুষ্টযম্ .. ১৩..
দিগ্বাতার্কপ্রচেতোঽশ্বিবহ্নীন্দ্রোপেন্দ্রমৃত্যুকাঃ .
তথা চন্দ্রশ্চতুর্বক্ত্রো রুদ্রঃ ক্ষেত্রজ্ঞ ঈশ্বরঃ .. ১৪..
আহত্য তত্ত্বজাতানাং ষণ্ণবত্যস্তু কীর্তিতাঃ .
পূর্বোক্ততত্ত্বজাতানাং বৈলক্ষণ্যমনামযম্ .. ১৫..
বরাহরূপিণং মাং যে ভজন্তি মযি ভক্তিতঃ .
বিমুক্তাজ্ঞানতত্কার্যা জীবন্মুক্তা ভবন্তি তে .. ১৬..
যে ষণ্ণবতিতত্ত্বজ্ঞা যত্র কুত্রাশ্রমে রতাঃ .
জটী মুণ্ডী শিখী বাপি মুচ্যতে নাত্র সংশযঃ .. ১৭.. ইতি..
ইতি প্রথমোঽধ্যাযঃ ..
ঋভুর্নাম মহাযোগী ক্রোডরূপং রমাপতিম্ .
বরিষ্ঠাং ব্রহ্মবিদ্যাং ত্বমধীহি ভগবন্মম .
এবং স স্পৃষ্টো ভগবান্প্রাহ ভক্তার্তিভঞ্জনঃ .. ১..
স্ববর্ণাশ্রমধর্মেণ তপসা গুরুতোষণাত্ .
সাধনং প্রভবেত্পুংসাং বৈরাগ্যাদিচতুষ্টযম্ .. ২..
নিত্যানিত্যবিবেকশ্চ ইহামুত্র বিরাগতা .
শমাদিষট্কসংপত্তির্মুমুক্ষা তাং সমভ্যসেত্ .. ৩..
এবং জিতেন্দ্রিযো ভূত্বা সর্বত্র মমতামতিম্ .
বিহায সাক্ষিচৈতন্যে মযি কুর্যাদহংমতিম্ .. ৪..
দুর্লভং প্রাপ্য মানুষ্যং তত্রাপি নরবিগ্রহম্ .
ব্রাহ্মণ্যং চ মহাবিষ্ণোর্বেদান্তশ্রবণাদিনা .. ৫..
অতিবর্ণাশ্রমং রূপং সচ্চিদানন্দলক্ষণম্ .
যো ন জানাতি সোঽবিদ্বান্কদা মুক্তো ভবিষ্যতি .. ৬..
অহমেব সুখং নান্যদন্যচ্চেন্নৈব তত্সুখম্ .
অমদর্থং ন হি প্রেযো মদর্থং ন স্বতঃপ্রিযম্ .. ৭..
পরপ্রেমাস্পদতযা মা ন ভূবমহং সদা .
ভূযাসমিতি যো দ্রষ্টা সোঽহং বিষ্ণুর্মুনীশ্বর .. ৮..
ন প্রকাশোঽহমিত্যুক্তির্যত্প্রকাশৈকবন্ধনা .
স্বপ্রকাশং তমাত্মানমপ্রকাশঃ কথং স্পৃশেত্ .. ৯..
স্বযং ভাতং নিরাধারং যে জানন্তি সুনিশ্চিতম্ .
তে হি বিজ্ঞানসংপন্না ইতি মে নিশ্চিতা মতিঃ .. ১০..
স্বপূর্ণাত্মাতিরেকেণ জগজ্জীবেশ্বরাদযঃ .
ন সন্তি নাস্তি মাযা চ তেভ্যশ্চাহং বিলক্ষণঃ .. ১১..
অজ্ঞানান্ধতমোরূপং কর্মধর্মাদিলক্ষণম্ .
স্বযংপ্রকাশমাত্মানং নৈব মাং স্প্রষ্টুমার্হতি .. ১২..
সর্বসাক্ষিণমাত্মানং বর্ণাশ্রমবিবর্জিতম্ .
ব্রহ্মরূপতযা পশ্যন্ব্রহ্মৈব ভবতি স্বযম্ .. ১৩..
ভাসমানমিদং সর্বং মানরূপং পরং পদম্ .
পশ্যন্বেদান্তমানেন সদ্য এব বিমুচ্যতে .. ১৪..
দেহাত্মজ্ঞানবজ্জ্ঞানং দেহাত্মজ্ঞানবাধকম্ .
আত্মন্যেব ভবেদ্যস্য স নেচ্ছন্নপি মুচ্যতে .. ১৫..
সত্যজ্ঞানানন্দপূর্ণলক্ষণং তমসঃ পরম্ .
ব্রহ্মানন্দং সদা পশ্যন্কথং বধ্যেত কর্মণা .. ১৬..
ত্রিধামসাক্ষিণং সত্যজ্ঞানানন্দাদিলক্ষণম্ .
ত্বমহংশব্দলক্ষ্যার্থমসক্তং সর্বদোষতঃ .. ১৭..
সর্বগং সচ্চিদাত্মানং জ্ঞানচক্ষুর্নিরীক্ষতে .
অজ্ঞানচক্ষুর্নেক্ষেত ভাস্বন্তং ভানুমন্ধবত্ .. ১৮..
প্রজ্ঞানমেব তদ্ব্রহ্ম সত্যপ্রজ্ঞালক্ষণম্ .
এবং ব্রহ্মপরিজ্ঞানাদেব মর্ত্যোঽমৃতো ভবেত্ .. ১৯..
তদ্ব্রহ্মানন্দমদ্বন্দ্বং নির্গুণং সত্যচিদ্ঘনম্ .
বিদিত্বা স্বাত্মনো রূপং ন বিভেতি কুতশ্চন .. ২০..
চিন্মাত্রং সর্বগং নিত্যং সংপূর্ণং সুখমদ্বযম্ .
সাক্ষাদ্ব্রহ্মৈব নান্যোঽস্তীত্যেবং ব্রহ্মবিদাং স্থিতিঃ .. ২১..
অজ্ঞস্য দুঃখৌঘমযং জ্ঞস্যানন্দমযং জগত্ .
অন্ধং ভুবনমন্ধস্য প্রকাশং তু সুচক্ষুষাম্ .. ২২..
অনন্তে সচ্চিদানন্দে মযি বারাহরূপিণী .
স্থিতেঽদ্বিতীযভাবঃ স্যাত্কো বন্ধঃ কশ্চ মুচ্যতে .. ২৩..
স্বস্বরূপং তু চিন্মাত্রং সর্বদা সর্বদেহিনাম্ .
নৈব দেহাদিসঙ্ঘাতো ঘটবদ্দৃশিগোচরঃ .. ২৪..
স্বাত্মনোঽন্যদিবাভাতং চরাচরমিদং জগত্ .
স্বাত্মমাত্রতযা বুদ্ধ্বা তদস্মীতি বিভাবয .. ২৫..
স্বস্বরূপং স্বযং ভুঙ্ক্তে নাস্তি ভোজ্যং পৃথক্ স্বতঃ .
অস্তি চেদস্তিতারূপং ব্রহ্মৈবাস্তিত্বলক্ষণম্ .. ২৬..
ব্রহ্মবিজ্ঞানসংপন্নঃ প্রতীতমখিলং জগত্ .
পশ্যন্নপি সদা নৈব পশ্যতি স্বাত্মনঃ পৃথক্ .. ২৭..
মত্স্বরূপপরিজ্ঞানাত্কর্মভির্ন স বধ্যতে .. ২৮..
যঃ শরীরেন্দ্রিযাদিভ্যো বিহীনং সর্বসাক্ষিণম্ .
পরমার্থৈকবিজ্ঞানং সুখাত্মানং স্বযংপ্রভম্ .. ২৯..
স্বস্বরূপতযা সর্বং বেদ স্বানুভবেন যঃ .
স ধীরঃ স তু বিজ্ঞেযঃ সোঽহং তত্ত্বং ঋভো ভব .. ৩০..
অতঃ প্রপঞ্চানুভবঃ সদা ন হি
স্বরূপবোধানুভবঃ সদা খলু .
ইতি প্রপশ্যন্পরিপূর্ণবেদনো
ন বন্ধমুক্তো ন চ বদ্ধ এব তু .. ৩১..
স্বস্বরূপানুসন্ধানান্নৃত্যন্তং সর্বসাক্ষিণম্ .
মুহূর্তং চিন্তযেন্মাং যঃ সর্ববন্ধৈঃ প্রমুচ্যতে .. ৩২..
সর্বভূতান্তরস্থায নিত্যমুক্তচিদাত্মনে .
প্রত্যক্চৈতন্যরূপায মহ্যমেব নমোনমঃ .. ৩৩..
ত্বং বহমস্মি ভগবো দেবতেঽহং বৈ ত্বমসি .
তুভ্যং মহ্যমনন্তায মহ্যং তুভ্যং চিদাত্মনে .. ৩৪..
নমো মহ্যং পরেশায নমস্তুভ্যং শিবায চ .
কিং করোমি ক্ব গচ্ছামি কিং গৃহ্ণামি ত্যজামি কিম্ .. ৩৫..
যন্মযা পূরিতং বিশ্বং মহাকল্পাংবুনা যথা .
অন্তঃসঙ্গং বহিঃসঙ্গমাত্মসঙ্গং চ যস্ত্যজেত্ .
সর্বসঙ্গনিবৃত্তাত্মা স মামেতি ন সংশযঃ .. ৩৬..
অহিরিব জনযোগং সর্বদা বর্জযেদ্যঃ
কুণপমিব সুনারীং ত্যক্তুকামো বিরাগী .
বিষমিব বিষযাদীন্মন্যমানো দুরন্তা-
ঞ্জগতি পরমহংসো বাসুদেবোঽহমেব .. ৩৭..
ইদং সত্যমিদং সত্যং সত্যমেতদিহোচ্যতে .
অহং সত্যং পরং ব্রহ্ম মত্তঃ কিংচিন্ন বিদ্যতে .. ৩৮..
উপ সমীপে যো বাসো জীবাত্মপরমাত্মনোঃ .
উপবাসঃ স বিজ্ঞেযো ন তু কাযস্য শোষণম্ .. ৩৯..
কাযশোষণমাত্রেণ কা তত্র হ্যবিবেকিনাম্ .
বল্মীকতাডনাদেব মৃতঃ কিং নু মহোরগঃ .. ৪০..
অস্তি ব্রহ্মেতি চেদ্বেদ পরোক্ষজ্ঞানমেব তত্ .
অহং ব্রহ্মেতি চেদ্বেদ সাক্ষাত্কারঃ স উচ্যতে .. ৪১..
যস্মিন্কালে স্বমাত্মানং যোগী জানাতি কেবলম্ .
তস্মাত্কালাত্সমারভ্য জীবন্মুক্তো ভযেদসৌ .. ৪২..
অহং ব্রহ্মেতি নিযতং মোক্ষহেতুর্মহাত্মনাম্ .
দ্বে পদে বন্ধমোক্ষায নির্মমেতি মমেতি চ .. ৪৩..
মমেতি বধ্যতে জন্তুর্নির্মমেতি বিমুচ্যতে .
বাহ্যচিন্তা ন কর্তব্যা তথৈবান্তরচিন্তিকা .
সর্বচিন্তাং সমুত্সৃজ্য স্বস্থো ভব সদা ঋভো .. ৪৪..
সংকল্পমাত্রকলনেন জগত্সমগ্রং
সংকল্পমাত্রকলনে হি জগদ্বিলাসঃ .
সংকল্পমাত্রমিদমুত্সৃজ নির্বিকল্প-
মাশ্রিত্য মামকপদং হৃদি ভাবযস্ব .. ৪৫..
মচ্চিন্তনং মত্কথনমন্যোন্যং মত্প্রভাষণম্ .
মদেকপরমো ভূত্বা কালং নয মহামতে .. ৪৬..
চিদিহাস্তীতি চিন্মাত্রমিদং চিন্মযমেব চ .
চিত্ত্বং চিদহমেতে চ লোকাশ্চিদিতি ভাবয .. ৪৭..
রাগং নীরাগতাং নীত্বা নির্লেপো ভব সর্বদা .
অজ্ঞানজন্যকর্ত্রাদিকারকোত্পন্নকর্মণা .. ৪৮..
শ্রুত্যুত্পন্নাত্মবিজ্ঞানপ্রদীপো বাধ্যতে কথম্ .
অনাত্মনাং পরিত্যজ্য নির্বিকারো জগত্স্থিতৌ .. ৪৯..
একনিষ্ঠতযান্তস্থসংবিন্মাত্রপরো ভব .
ঘটাকাশমঠাকাশৌ মহাকাশে প্রতিষ্ঠিতৌ .. ৫০..
এবং মযি চিদাকাশে জীবেশৌ পরিকল্পিতৌ .
যা চ প্রাগাত্মনো মাযা তথান্তে চ তিরস্কৃতা .. ৫১..
ব্রহ্মবাদিভিরুদ্গীতা সা মাযেতি বিবেকতঃ .
মাযাতত্কার্যবিলযে নেশ্বরত্বং ন জীবতা .. ৫২..
ততঃ শুদ্ধশ্চিদেবাহং ব্যোমবন্নিরুপাধিকঃ .
জীবেশ্বরাদিরূপেণ চেতনাচেতনাত্মকম্ .. ৫৩..
ঈক্ষণাদিপ্রবেশান্তা সৃষ্টিরীশেন কল্পিতা .
জাগ্রদাদিবিমোক্ষান্তঃ সংসারো জীবকল্পিতঃ .. ৫৪..
ত্রিণাচিকাদিযোগান্তা ঈশ্বরভ্রান্তিমাশ্রিতাঃ .
লোকাযতাদিসাংখ্যান্তা জীববিশ্রান্তিমাশ্রিতাঃ .. ৫৫..
তস্মান্মুমুক্ষিভির্নৈব মতির্জীবেশবাদযোঃ .
কার্যা কিংতু ব্রহ্মতত্ত্বং নিশ্চলেন বিচার্যতাম্ .. ৫৬.
অদ্বিতীযব্রহ্মতত্ত্বং ন জানন্তি যথা তথা .
ভ্রান্তা এবাখিলাস্তেষাং ক্ব মুক্তিঃ ক্বেহ বা সুখম্ .. ৫৭..
উত্তমাধমভাবশ্চেত্তেষাং স্যাদস্তি তেন কিম্ .
স্বপ্নস্থরাজ্যভিক্ষাভ্যাং প্রবুদ্ধঃ স্পৃশতে খলু .. ৫৮..
অজ্ঞানে বুদ্ধিবিলযে নিদ্রা সা ভণ্যতে বুধৈঃ .
বিলীনাজ্ঞানতত্কার্যে মযি নিদ্রা কথং ভবেত্ .. ৫৯..
বুদ্ধেঃ পূর্ণবিকাসোঽযং জাগরঃ পরিকীর্ত্যতে .
বিকারাদিবিহীনত্বাজ্জাগরো মে ন বিদ্যতে .. ৬০..
সূক্ষ্মনাডিষু সংচারো বুদ্ধেঃ স্বপ্নঃ প্রজাযতে .
সংচারধর্মরহিতে মযি স্বপ্নো ন বিদ্যতে .. ৬১..
সুষুপ্তিকালে সকলে বিলীনে তমসাবৃতে .
স্বরূপং মহদানন্দং ভুঙ্ক্তে বিশ্ববিবর্জিতঃ .. ৬২..
অবিশেষেণ সর্বং তু যঃ পশ্যতি চিদন্বযাত্ .
স এব সাক্ষাদ্বিজ্ঞানী স শিবঃ স হরির্বিধিঃ .. ৬৩..
দীর্ঘস্বপ্নমিদং যত্তদ্দীর্ঘং বা চিত্তবিভ্রমম্ .
দীর্ঘং বাপি মনোরাজ্যং সংসারং দুঃখসাগরম্ .
সুপ্তেরুত্থায সুপ্ত্যন্তং ব্রহ্মৈকং প্রবিচিন্ত্যতাম্ .. ৬৪..
আরোপিতস্য জগতঃ প্রবিলাপনেন
চিত্তং মদাত্মকতযা পরিকল্পিতং নঃ .
শত্রূন্নিহত্য গুরুষট্কগণান্নিপাতা-
দ্গন্ধদ্বিপো ভবতি কেবলমদ্বিতীযঃ .. ৬৫..
অদ্যাস্তমেতু বপুরাশশিতারমাস্তাং
কস্তাবতাপি মম চিদ্বপুষো বিশেষঃ .
কুম্ভে বিনশ্যতি চিরং সমবস্থিতে বা
কুম্ভাম্বরস্য নহি কোঽপি বিশেষলেশঃ .. ৬৬..
অহিনির্ল্বযনী সর্পনির্মোকো জীববর্জিতঃ .
বল্মীকে পতিতস্তিষ্ঠেত্তং সর্পো নাভিমন্যতে .. ৬৭..
এবং স্থূলং চ সূক্ষ্মং চ শরীরং নাভিমন্যতে .
প্রত্যগ্জ্ঞানশিখিধ্বস্তে মিথ্যাজ্ঞানে সহেতুকে .
নেতি নেতীতি রূপত্বাদশরীরো ভবত্যযম্ .. ৬৮..
শাস্ত্রেণ ন স্যাত্পরমার্থদৃষ্টিঃ
কার্যক্ষমং পশ্যতি চাপরোক্ষম্ .
প্রারব্ধনাশাত্প্রতিভাননাশ
এবং ত্রিধা নশ্যতি চাত্মমাযা .. ৬৯..
ব্রহ্মত্বে যোজিতে স্বামিঞ্জীবভাবো ন গচ্ছতি .
অদ্বৈতে বোধিতে তত্ত্বে বাসনা বিনিবর্ততে .. ৭০..
প্রারব্ধান্তে দেহহানির্মাযেতি ক্ষীযতেঽখিলা .
অস্তীত্যুক্তে জগত্সর্বং সদ্রসং ব্রহ্ম তদ্ভবেত্ .. ৭১..
ভাতীত্যুক্তে জগত্সর্বং ভানং ব্রহ্মৈব কেবলম্ .
মরুভূমৌ জলং সর্বং মরুভূমাত্রমেব তত্ .
জগত্ত্রযমিদং সর্বং চিন্মাত্রং স্ববিচারতঃ .. ৭২..
অজ্ঞানমেব ন কুতো জগতঃ প্রসঙ্গো
জীবেশদেশিকবিকল্পকথাতিদূরে .
একান্তকেবলচিদেকরসস্বভাবে
ব্রহ্মৈব কেবলমহং পরিপূর্ণমস্মি .. ৭৩..
বোধচন্দ্রমসি পূর্ণবিগ্রহে
মোহরাহুমুষিতাত্মতেজসি .
স্নানদানযজনাদিকাঃ
ক্রিযা মোচনাবধি বৃথৈব তিষ্ঠতে .. ৭৪..
সলিলে সৈন্ধবং যদ্বত্সাম্যং ভবতি যোগতঃ .
তথাত্মমনসোরৈক্যং সমাধিরিতি কথ্যতে .. ৭৫..
দুর্লভো বিষযত্যাগো দুর্লভং তত্ত্বদর্শনম্ .
দুর্লভা সহজাবস্থা সদ্গুরোঃ করুণাং বিনা .. ৭৬..
উত্পন্নশক্তিবোধস্য ত্যক্তনিঃশেষকর্মণঃ .
যোগিনঃ সহজাবস্থা স্বযমেব প্রকাশতে .. ৭৭..
রসস্য মনসশ্চৈব চঞ্চলত্বং স্বভাবতঃ .
রসো বদ্ধো মনো বদ্ধং কিং ন সিদ্ধ্যতি ভূতলে .. ৭৮..
মূর্চ্ছিতো হরতি ব্যাধিং মৃতো জীবযতি স্বযম্ .
বদ্ধঃ খেচরতাং ধত্তে ব্রহ্মত্বং রসচেতসি .. ৭৯..
ইন্দ্রিযাণাং মনো নাথো মনোনাথস্তু মারুতঃ .
মারুতস্য লযো নাথস্তন্নাথং লযমাশ্রয .. ৮০..
নিশ্চেষ্টো নির্বিকারশ্চ লযো জীবতি যোগিনাম্ .
উচ্ছিন্নসর্বসংকল্পো নিঃশেষাশেষচেষ্টিতঃ .
স্বাবগম্যো লযঃ কোঽপি মনসাং বাগগোচরঃ .. ৮১..
পুঙ্খানুপুঙ্খবিষযেক্ষণতত্পরোঽপি
ব্রহ্মাবলোকনধিযং ন জহাতি যোগী .
সঙ্গীততাললযবাদ্যবশং গতাপি
মৌলিস্থকুম্ভপরিরক্ষণধীর্নটীব .. ৮২..
সর্বচিন্তাং পরিত্যজ্য সাবধানেন চেতসা .
নাদ এবানুসন্ধেযো যোগসাম্রাজ্যমিচ্ছতা .. ৮৩..
ইতি দ্বিতীযোঽধ্যাযঃ .. ২..
নহি নানাস্বরূপং স্যাদেকং বস্তু কদাচন .
তস্মাদখণ্ড এবাস্মি যন্মদন্যন্ন কিংচন .. ১..
দৃশ্যতে শ্রূযতে যদ্যদ্ব্রহ্মণোঽন্যন্ন তদ্ভবেত্ .
নিত্যশুদ্ধ বিমুক্তৈকমখণ্ডানন্দমদ্বযম্ .
সত্যং জ্ঞানমনন্তং যত্পরং ব্রহ্মাহমেব তত্ .. ২..
আনন্দরূপোঽহমখণ্ডবোধঃ
পরাত্পরোঽহং ঘনচিত্প্রকাশঃ .
মেঘা যথা ব্যোম ন চ স্পৃশন্তি
সংসারদুঃখানি ন মাং স্পৃশন্তি .. ৩..
সর্বং সুখং বিদ্ধি সুদুঃখনাশা-
ত্সর্বং চ সদ্রূপমসত্যনাশাত্ .
চিদ্রূপমেব প্রতিভানযুক্তং
তস্মাদখণ্ডং মম রূপমেতত্ .. ৪..
ন হি জনির্মরণং গমনাগমৌ
ন চ মলং বিমলং ন চ বেদনম্ .
চিন্মযং হি সকলং বিরাজতে
স্ফুটতরং পরমস্য তু যোগিনঃ .. ৫..
সত্যচিদ্ঘনমখণ্ডমদ্বযং
সর্বদৃশ্যরহিতং নিরামযম্ .
যত্পদং বিমলমদ্বযং শিবং
তত্সদাহমিতি মৌনমাশ্রয .. ৬..
জন্মমৃত্যুসুখদুঃখবর্জিতং
জাতিনীতিকুলগোত্রদূরগম্ .
চিদ্বিবর্তজগতোঽস্য কারণং
তত্সদাহমিতি মৌনমাশ্রয .. ৭..
পূর্ণমদ্বযমখণ্ডচেতনং
বিশ্বভেদকলনাদিবর্জিতম্ .
অদ্বিতীযপরসংবিদংশকং
তত্সদাহমিতি মৌনমাশ্রয .. ৮..
কেনাপ্যবাধিতত্বেন ত্রিকালেঽপ্যেকরূপতঃ .
বিদ্যমানত্বমস্ত্যেতত্সদ্রূপত্বং সদা মম .. ৯..
নিরুপাধিকনিত্যং যত্সুপ্তৌ সর্বসুখাত্পরম্ .
সুখরূপত্বমস্ত্যেতদানন্দত্বং সদা মম .. ১০..
দিনকরকিরণৈর্হি শার্বরং তমো
নিবিডতরং ঝটিতি প্রণাশমেতি .
ঘনতরভবকারণং তমো যদ্দ্-
হরিদিনকৃত্প্রভযা ন চান্তরেণ .. ১১..
মম চরণস্মরণেন পূজযা চ
স্বকতমসঃ পরিমুচ্যতে হি জন্তুঃ .
ন হি মরণপ্রভবপ্রণাশহেতু-
র্মম চরণস্মরণাদৃতেঽস্তি কিংচিত্ .. ১২..
আদরেণ যথা স্তৌতি ধনবন্তং ধনেচ্ছযা .
তথা চেদ্বিশ্বকর্তারং কো ন মুচ্যেত বন্ধনাত্ .. ১৩..
আদিত্যসংনিধৌ লোকশ্চেষ্টতে স্বযমেব তু .
তথা মত্সংনিধাবেব সমস্তং চেষ্টতে জগত্ .. ১৪..
শুক্তিকাযা যথা তারং কল্পিতং মাযযা তথা .
মহদাদি জগন্মাযামযং ময্যেব কেবলম্ .. ১৫..
চণ্ডালদেহে পশ্বাদিস্থাবরে ব্রহ্মবিগ্রহে .
অন্যেষু তারতম্যেন স্থিতেষু ন তথা হ্যহম্ .. ১৬..
বিনষ্টদিগ্ভ্রমস্যাপি যথাপূর্বং বিভাতি দিক্ .
তথা বিজ্ঞানবিধ্বস্তং জগন্মে ভাতি তন্ন হি .. ১৭..
ন দেহো নেন্দ্রিযপ্রাণো ন মনোবুদ্ধ্যহংকৃতি .
ন চিত্তং নৈব মাযা চ ন চ ব্যোমাদিকং জগত্ .. ১৮..
ন কর্তা নৈব ভোক্তা চ ন চ ভোজযিতা তথা .
কেবলং চিত্সদানন্দব্রহ্মৈবাহং জনার্দনঃ .. ১৯..
জলস্য চলনাদেব চঞ্চলত্বং যথা রবেঃ .
তথাহংকারসম্বধাদেব সংসার আত্মনঃ .. ২০..
চিত্তমূলং হি সংসারস্তত্প্রযত্নেন শোধযেত্ .
হন্ত চিত্তমহত্তাযাং কৈষা বিশ্বাসতা তব .. ২১..
ক্ব ধনানি মহীপানাং ব্রহ্মণঃ ক্ব জগন্তি বা .
প্রাক্তনানি প্রযাতানি গতাঃ সর্গপরম্পরঃ .
কোটযো ব্রহ্মণাং যাতা ভূপা নষ্টাঃ পরাগবত্ .. ২২..
স চাধ্যাত্মাভিমানোঽপি বিদুষোঽযাসুরত্বতঃ .
বিদুষোঽপ্যাসুরশ্চেত্স্যান্নিষ্ফলং তত্ত্বদর্শনম্ .. ২৩..
উত্পাদ্যমানা রাগাদ্যা বিবেকজ্ঞানবহ্নিনা .
যদা তদৈব দহ্যন্তে কুতস্তেষাং প্ররোহণম্ .. ২৪..
যথা সুনিপুণঃ সম্যক্ পরদোষেক্ষণে রতঃ .
তথা চেন্নিপুণঃ স্বেষু কো ন মুচ্যেত বন্ধনাত্ .. ২৫..
অনাত্মবিদমুক্তোঽপি সিদ্ধিজালানি বাঞ্ছতি .
দ্রব্যমন্ত্রক্রিযাকালযুক্ত্যাপ্নোতি মুনীশ্বর .. ২৬..
নাত্মজ্ঞস্যৈষ বিষয আত্মজ্ঞো হ্যাত্মমাত্রদৃক্ .
আত্মনাত্মনি সংতৃপ্তো নাবিদ্যামনুধাবতি .. ২৭..
যে কেচন জগদ্ভাবাস্তানবিদ্যামযান্বিদুঃ .
কথং তেষু কিলাত্মজ্ঞস্ত্যক্তাবিদ্যো নিমজ্জতি .. ২৮..
দ্রব্যমন্ত্রক্রিযাকালযুক্তযঃ সাধুসিদ্ধিদাঃ .
পরমাত্মপদপ্রাপ্তৌ নোপকুর্বন্তি কাশ্চন .. ২৯..
সর্বেচ্ছাকলনাশান্তাবাত্মলাভোদযাভিধঃ .
স পুনঃ সিদ্ধিবাঞ্ছাযাং কথমর্হত্যচিত্ততঃ .. ৩০.. ইতি..
ইতি তৃতীযোধ্যাযঃ .. ৩..
অথ হ ঋভুং ভগবন্তং নিদাঘঃ পপ্রচ্ছ জীবন্মুক্তিলক্ষণমনুব্রূহীতি .
তথেতি স হোবাচ . সপ্তভূমিষু জীবন্মুক্তাশ্চত্বারঃ .
শুভেচ্ছা প্রথমা ভূমিকা ভবতি . বিচারণা দ্বিতীযা . তনুমানসী তৃতীযা .
সত্ত্বাপত্তিস্তুরীযা . অসংসক্তিঃ পঞ্চমী . পদার্থভাবনা ষষ্ঠী . তুরীযগা সপ্তমী .
প্রণবাত্মিকা ভূমিকা অকারোকারমকারার্ধমাত্রাত্মিকা . স্থূলসূক্ষ্মবীজসাক্ষিভেদেনাকারাদযশ্চতুর্বিধাঃ .
তদবস্থা জাগ্রত্স্বপ্নসুষুপ্তিতুরীযাঃ .
অকারস্থূলাংশে জাগ্রদ্বিশ্বঃ .
সূক্ষ্মাংশে তত্তৈজসঃ . বীজাংশে তত্প্রাজ্ঞঃ . সাক্ষ্যংশে তত্তুরীযঃ .
মকারস্থূলাংশে সুষুপ্তবিশ্বঃ .
সূক্ষ্মাংশে তত্তৈজসঃ . বীজাংশে তত্প্রাজ্ঞঃ . সাক্ষ্যংশে তত্তুরীযঃ .
অর্ধমাত্রাস্থূলাংশে তুরীযবিশ্বঃ .
সূক্ষ্মাংশে তত্তৈজসঃ . বীজাংশে তত্প্রাজ্ঞঃ . সাক্ষ্যংশে তুরীযতুরীযঃ .
অকারতুরীযাংশাঃ প্রথমদ্বিতীযতৃতীযভূমিকাঃ .
উকারতুরীযাংশা চতুর্থী ভূমিকা .
মকারতুরীযাংশা পঞ্চমী .
অর্ধমাত্রাতুরীযাংশা ষষ্ঠী .
তদতীতা সপ্তমী .
ভূমিত্রযেষু বিহরন্মুমুক্ষুর্ভবতি .
তুরীযভূম্যাং বিহরন্ব্রহ্মবিদ্ভবতি .
পঞ্চমভূম্যাং বিহরন্ব্রহ্মবিদ্বরো ভবতি .
ষষ্ঠভূম্যাং বিহরন্ব্রহ্মবিদ্বরীযান্ভবতি .
সপ্তমভূম্যাং বিহরন্ব্রহ্মবিদ্বরিষ্ঠো ভবতি .
তত্রৈতে শ্লোকা ভবন্তি .
জ্ঞানভূমিঃ শুভেচ্ছা স্যাত্প্রথমা সমুদীরিতা .
বিচারণা দ্বিতীযা তু তৃতীযা তনুমানসা .. ১..
সত্ত্বাপত্তিশ্চতুর্থী স্যাত্ততোঽসংসক্তিনামিকা .
পদার্থভাবনা ষষ্ঠী সপ্তমী তুর্যগা স্মৃতা .. ২..
স্থিতঃ কিং মূঢ এবাস্মি প্রেক্ষ্যোঽহং শাস্ত্রসজ্জনৈঃ .
বৈরাগ্যপূর্ণমিচ্ছেতি শুভেচ্ছেত্যুচ্যতে বুধৈঃ .. ৩..
শাস্ত্রসজ্জনসংপর্কবৈরাগ্যাভ্যাসপূর্বকম্ .
সদাচারপ্রবৃত্তির্যা প্রোচ্যতে সা বিচারণা .. ৪..
বিচারণাশুভেচ্ছাভ্যামিন্দ্রিযার্থেষু রক্ততা .
যত্র সা তনুতামেতি প্রোচ্যতে তনুমানসী .. ৫..
ভূমিকাত্রিতযাভ্যাসাচিত্তেঽর্থবিরতের্বশাত্ .
সত্বাত্মনি স্থিতে শুদ্ধে সত্ত্বাপত্তিরুদাহৃতা .. ৬..
দশাচতুষ্টযাভ্যাসাদসংসর্গফলা তু যা .
রূঢসত্ত্বচমত্কারা প্রোক্তা সংসক্তিনামিকা .. ৭..
ভূমিকাপঞ্চকাভ্যাসাত্স্বাত্মারামতযা ভৃশম্ .
আভ্যন্তরাণাং বাহ্যানাং পদার্থানামভাবনাত্ .. ৮..
পরপ্রযুক্তেন চিরং প্রত্যযেনাববোধনম্ .
পদার্থভাবনানাম ষষ্ঠী ভবতি ভূমিকা .. ৯..
ষড্ভূমিকাচিরাভ্যাসদ্ভেদস্যানুপলম্ভনাত্ .
যত্স্বভাবৈকনিষ্ঠত্বং সা জ্ঞেযা তুর্যগা গতিঃ .. ১০..
শুভেচ্ছাদিত্রযং ভূমিভেদাভেদযুতং স্মৃতম্ .
যথাবদ্বেদ বুদ্ধ্যেদং জগজ্জাগ্রতি দৃশ্যতে .. ১১..
অদ্বৈতে স্থৈর্যমাযাতে দ্বৈতে চ প্রশমং গতে .
পশ্যন্তি স্বপ্নবল্লোকং তুর্যভূমি সুযোগতঃ .. ১২..
বিচ্ছিন্নশরদভ্রাংশবিলযং প্রবিলীযতে .
সত্বাবশেষ এবাস্তে হি নিদাঘ দৃঢীকুরু .. ১৩..
পঞ্চভূমিং সমারুহ্য সুষুপ্তিপদনামিকাম্ .
শান্তাশেষবিশেষাংশস্তিষ্ঠত্যদ্বৈতমাত্রকে .. ১৪..
অন্তর্মুখতযা নিত্যং বহির্বৃত্তিপরোঽপি সন্ .
পরিশ্রান্ততযা নিত্যং নিদ্রালুরিব লক্ষ্যতে .. ১৫..
কুর্বন্নভ্যাসমেতস্যাং ভূম্যাং সম্যগ্বিবাসনঃ .
সপ্তমী গাঢসুপ্তাখ্যা ক্রমপ্রাপ্তা পুরাতনী .. ১৬..
যত্র নাসন্ন সদ্রূপো নাহং নাপ্যনহংকৃতিঃ .
কেবলং ক্ষীণমনন আস্তেঽদ্বৈতেঽতিনির্ভযঃ .. ১৭..
অন্তঃশূন্যো বহিঃশূন্যঃ শূন্যকুম্ভ ইবাম্বরে .
অন্তঃপূর্ণো বহিঃপূর্ণঃ পূর্ণকুম্ভ ইবার্ণবে .. ১৮..
মা ভব গ্রাহ্যভাবাত্মা গ্রাহকাত্মা চ মা ভব .
ভাবনামখিলাং ত্যক্ত্বা যচ্ছিষ্টং তন্মযো ভব .. ১৯..
দ্র্ষ্টৃদর্শনদৃশ্যানি ত্যক্ত্বা বাসনযা সহ .
দর্শনপ্রথমাভাসমাত্মানং কেবলং ভজ .. ২০..
যথাস্থিতমিদং যস্য ব্যবহারযতোঽপি চ .
অস্তংগতং স্থিতং ব্যোম স জীবন্মুক্ত উচ্যতে .. ২১..
নোদেতি নাস্তমাযাতি সুখে দুঃখে মনঃপ্রভা .
যথাপ্রাপ্তস্থিতির্যস্য স জীবন্মুক্ত উচ্যতে .. ২২..
যো জাগর্তি সুষুপ্তিস্থো যস্য জাগ্রন্ন বিদ্যতে .
যস্য নির্বাসনো বোধঃ স জীবন্মুক্ত উচ্যতে .. ২৩..
রাগদ্বেষভযাদীনামনুরূপং চরন্নপি .
যোঽন্তর্ব্যোমবদচ্ছন্নঃ স জীবন্মুক্ত উচ্যতে .. ২৪..
যস্য নাহংকৃতো ভাবো বুদ্ধির্যস্য ন লিপ্যতে .
কুর্বতোঽকুর্বতো বাপি স জীবন্মুক্ত উচ্যতে .. ২৫..
যস্মান্নোদ্বিজতে লোকো লোকান্নোদ্বিজতে চ যঃ .
হর্ষামর্ষভযোন্মুক্তঃ স জীবন্মুক্ত উচ্যতে .. ২৬..
যঃ সমস্তার্থজালেষু ব্যবহার্যপি শীতলঃ .
পরার্থেষ্বিব পূর্ণাত্মা স জীবন্মুক্ত উচ্যতে .. ২৭..
প্রজহাতি যদা কামান্সর্বাংশ্চিত্তগতান্মুনে .
মযি সর্বাত্মকে তুষ্টঃ স জীবন্মুক্ত উচ্যতে .. ২৮..
চৈত্যবর্জিতচিন্মাত্রে পদে পরমপাবনে .
অক্ষুব্ধচিত্তো বিশ্রান্তঃ স জীবন্মুক্ত উচ্যতে .. ২৯..
ইদং জগদহং সোঽযং দৃশ্যজাতমবাস্তবম্ .
যস্য চিত্তে ন স্ফুরতি স জীবন্মুক্ত উচ্যতে .. ৩০..
সদ্ব্রহ্মণি স্থিরে স্ফারে পূর্ণে বিষযবর্জিতে .
আচার্যশাস্ত্রমার্গেণ প্রবিশ্যাশু স্থিরো ভব .. ৩১..
শিবো গুরুঃ শিবো বেদঃ শিব দেবঃ শিবঃ প্রভুঃ .
শিবোঽস্ম্যহং শিবঃ সর্বং শিবদন্যন্ন কিংচন .. ৩২..
তমেব ধীরো বিজ্ঞায প্রজ্ঞাং কুর্বীত ব্রাহ্মণঃ .
নানুধ্যাযাদ্বহূঞ্ছব্দান্বাচো বিগ্লাপনং হি তত্ .. ৩৩..
শুকো মুক্তো বামদেবোঽপি মুক্ত-
স্তাভ্যাং বিনা মুক্তিভাজো ন সন্তি .
শুকমার্গং যেঽনুসরন্তি ধীরাঃ
সদ্যো মুক্তাস্তে ভবন্তীহ লোকে .. ৩৪..
বামদেবং যেঽনুসরন্তি নিত্যং
মৃত্বা জনিত্বা চ পুনঃপুনস্তত্ .
তে বৈ লোকে ক্রমমুক্তা ভবন্তি
যোগৈঃ সাংখ্যৈঃ কর্মভিঃ সত্ত্বযুক্তৈঃ .. ৩৫..
শুকশ্চ বামদেবশ্চ দ্বে সৃতী দেবনির্মিতে .
শুকঃ বিহঙ্গমঃ প্রোক্তো বামদেবঃ পিপীলিকা .. ৩৬..
অতদ্ব্যাবৃত্তিরূপেণ সাক্ষাদ্বিধিমুখেন বা .
মহাবাক্যবিচারেণ সাংখ্যযোগসমাধিনা .. ৩৭..
বিদিত্বা স্বাত্মনো রূপং সংপ্রজ্ঞাতসমাধিতঃ .
শুকমার্গেণ বিরজাঃ প্রযান্তি পরমং পদম্ .. ৩৮..
যমাদ্যাসনজাযাসহঠাভ্যাসাত্পুনঃপুনঃ .
বিঘ্নবাহুল্যসংজাত অণিমাদিবশাদিহ .. ৩৯..
অলব্ধ্বাপি ফলং সম্যক্পুনর্ভূত্বা মহাকুলে .
পুনর্বাসনযৈবাযং যোগাভ্যাসং পুনশ্চরন্ .. ৪০..
অনেকজন্মাভ্যাসেন বামদেবেন বৈ পথা .
সোঽপি মুক্তিং সমাপ্নোতি তদ্বিষ্ণোঃ পরমং পদম্ .. ৪১..
দ্বাবিমাবপি পন্থানৌ ব্রহ্মপ্রাপ্তিকরৌ শিবৌ .
সদ্যোমুক্তিপ্রদশ্চৈকঃ ক্রমমুক্তিপ্রদঃ পরঃ .
অত্র কো মোহঃ কঃ শোক একত্বমনুপশ্যতঃ .. ৪২..
যস্যানুভবপর্যন্তা বুদ্ধিস্তত্ত্বে প্রবর্ততে .
তদ্দৃষ্টিগোচরাঃ সর্বে মুচ্যন্তে সর্বপাতকৈঃ .. ৪৩..
খেচরা ভূচরাঃ সর্বে ব্রহ্মবিদ্দৃষ্টিগোচরাঃ .
সদ্য এব বিমুচ্যন্তে কোটিজন্মার্জিতৈরঘৈঃ .. ৪৪.. ইতি..
ইতি চতুর্থোঽদ্যাযঃ .. ৪..
অথ হৈনং ঋভুং ভগবন্তং নিদাঘঃ পপ্রচ্ছ
যোগাভ্যাসবিধিমনুব্রূহীতি . তথেতি স হোবাচ .
পঞ্চভূতাত্মকো দেহঃ পঞ্চমণ্ডলপূরিতঃ .
কাঠিন্যং পৃথিবীমেকা পানীযং তদ্দ্রবাকৃতি .. ১..
দীপনং চ ভবেত্তেজঃ প্রচারো বাযুলক্ষণম্ .
আকাশঃ সত্ত্বতঃ সর্বং জ্ঞাতব্যং যোগমিচ্ছতা .. ২..
ষট্শতান্যধিকান্যত্র সহস্রাণ্যেকবিংশতিঃ .
অহোরাত্রবহিঃ শ্বাসৈর্বাযুমণ্ডলঘাততঃ .. ৩..
তত্পৃথ্বীমণ্ডলে ক্ষীণে বলিরাযাতি দেহিনাম্ .
তদ্বদাপো গণাপাযে কেশাঃ স্যুঃ পাণ্ডুরাঃ ক্রমাত্ .. ৪..
তেজঃক্ষযে ক্ষুধা কান্তির্নশ্যতে মারুতক্ষযে .
বেপথুঃ সংভবেন্নিত্যং নাম্ভসেনৈব জীবতি .. ৫..
ইত্থংভূতং ক্ষযান্নিত্যং জীবিতং ভূতধারণম্ .
উড্ড্যাণং কুরুতে যস্মাদবিশ্রান্তং মহাখগঃ .. ৬..
উড্ডিযাণং তদেব স্যাত্তত্র বন্ধোঽভিধীযতে .
উড্ডিযাণো হ্যসৌ বন্ধো মৃত্যুমাতঙ্গকেশরী .. ৭..
তস্য মুক্তিস্তনোঃ কাযাত্তস্য বন্ধো হি দুষ্করঃ .
অগ্নৌ তু চালিতে কুক্ষৌ বেদনা জাযতে ভৃশম্ .. ৮..
ন কার্যা ক্ষুধি তেনাপি নাপি বিণ্মূত্রবেগিনা .
হিতং মিতং চ ভোক্তব্যং স্তোকং স্তোকমনেকধা .. ৯..
মৃদুমধ্যমমন্ত্রেষু ক্রমান্মন্ত্রং লযং হঠম্ .
লযমন্ত্রহঠা যোগা যোগো হ্যষ্টাঙ্গসংযুতঃ .. ১০..
যমশ্চ নিযমশ্চৈব তথা চাসনমেব চ .
প্রাণাযমস্তথা পশ্চাত্প্রত্যাহারস্তথা পরম্ .. ১১..
ধারণা চ তথা ধ্যানং সমধিশ্চাষ্টমো ভবেত্ .
অহিংসা সত্যমস্তেযং ব্রহ্মচর্যং দযার্জবম্ .. ১২..
ক্ষমা ধৃতির্মিতাহারঃ শৌচং চেতি যমা দশ .
তপঃ সন্তোষমাস্তিক্যং দানমীশ্বরপূজনম্ .. ১৩..
সিদ্ধান্তশ্রবণং চৈব হ্রীর্মতিশ্চ জপো ব্রতম্ .
এতে হি নিযমাঃ প্রোক্তা দশধৈব মহামতে .. ১৪..
একাদশাসনানি স্যুশ্চক্রাদি মুনিসত্তম .
চক্রং পদ্মাসনং কূর্মং মযূরং কুক্কুটং তথা .. ১৫..
বীরাসনং স্বস্তিকং চ ভদ্রং সিংহাসনং তথা .
মুক্তাসনং গোমুখং চ কীর্তিতং যোগবিত্তমৈঃ .. ১৬..
সব্যোরু দক্ষিণে গুল্ফে দক্ষিণং দক্ষিণেতরে .
নিদধ্যাদৃজুকাযস্তু চক্রাসনমিদং মতম্ .. ১৭..
পূরকঃ কুম্ভকস্তদ্বদ্রেচকঃ পূরকঃ পুনঃ .
প্রাণাযামঃ স্বনাডীভিস্তস্মান্নাডীঃ প্রচক্ষতে .. ১৮..
শরীরং সর্বজন্তূনাং ষণ্ণবত্যঙ্গুলাত্মকম্ .
তন্মধ্যে পাযুদেশাত্তু দ্ব্যঙ্গুলাত্পরতঃ পরম্ .. ১৯..
মেঢ্রদেশাদধস্তাত্তু দ্ব্যঙ্গুলান্মধ্যমুচ্যতে .
মেঢ্রান্নতাঙ্গুলাদূর্ধ্বং নাডীনাং কন্দমুচ্যতে .. ২০..
চতুরঙ্গুলমুত্সেধং চতুরঙ্গুলমাযতম্ .
অণ্ডাকারং পরিবৃতং মেদোমজ্জাস্থিশোণিতৈঃ .. ২১..
তত্রৈব নাডীচক্রং তু দ্বাদশারং প্রতিষ্ঠিতম্ .
শরীরং ধ্রিযতে যেন বর্ততে তত্র কুণ্ডলী .. ২২..
ব্রহ্মরন্ধ্রং সুষুম্ণা যা বদনেন পিধায সা .
অলম্বুসা সুষুম্ণাযাঃ কুহূর্নাডী বসত্যসৌ .. ২৩..
অনন্তরারযুগ্মে তু বারুণা চ যশস্বিনী .
দক্ষিণারে সুষুম্ণাযাঃ পিঙ্গলা বর্ততে ক্রমাত্ .. ২৪..
তদন্তরারযোঃ পূষা বর্ততে চ পযস্বিনী .
সুষুম্না পশ্চিমে চারে স্থিতা নাডী সরস্বতী .. ২৫..
শঙ্খিনী চৈব গান্ধারী তদনন্তরযোঃ স্থিতে .
উত্তরে তু সুষুম্নাযা ইডাখ্যা নিবসত্যসৌ .. ২৬..
অনন্তরং হস্তিজিহ্বা ততো বিশ্বোদরী স্থিতা .
প্রদক্ষিণক্রমেণৈব চক্রস্যারেষু নাডযঃ .. ২৭..
বর্তন্তে দ্বাদশ হ্যেতা দ্বাদশানিলবাহকাঃ .
পটবত্সংস্থিতা নাড্যো নানাবর্ণাঃ সমীরিতাঃ .. ২৮..
পটমধ্যং তু যত্স্থানং নাভিচক্রং তদুচ্যতে .
নাদাধারা সমাখ্যাতা জ্বলন্তী নাদরূপিণী .. ২৯..
পররন্ধ্রা সুষুম্না চ চত্বারো রত্নপূরিতাঃ .
কুণ্ডল্যা পিহিতং শশ্বদ্ব্রহ্মরন্ধ্রস্য মধ্যমম্ .. ৩০..
এবমেতাসু নাডীষু ধরন্তি দশবাযবঃ .
এবং নাডীগতিং বাযুগতিং জ্ঞাত্বা বিচক্ষণঃ .. ৩১..
সমগ্রীবশিরঃ কাযঃ সংবৃতাস্যঃ সুনিশ্চলঃ .
নাসাগ্রে চৈব হৃন্মধ্যে বিন্দুমধ্যে তুরীযকম্ .. ৩২..
স্রবন্তমমৃতং পশ্যেন্নেত্রাভ্যাং সুসমাহিতঃ .
অপানং মুকুলীকৃত্য পাযুমাকৃষ্য চোন্মুখম্ .. ৩৩..
প্রণবেন সমুত্থাপ্য শ্রীবীজেন নিবর্তযেত্ .
স্বাত্মানং চ শ্রিযং ধ্যাযেদমৃতপ্লাবনং তথা .. ৩৪..
কালবঞ্চনমেতদ্ধি সর্বমুখ্যং প্রচক্ষতে .
মনসা চিন্তিতা কার্যং মনসা যেন সিধ্যতি .. ৩৫..
জলেঽগ্নিজ্বলনাচ্ছাখাপল্লবানি ভবন্তি হি .
নাধন্যং জাগতং বাক্যং বিপরীতা ভবেত্ক্রিযা .. ৩৬..
মার্গে বিন্দুং সমাবধ্য বহ্নিং প্রজ্বাল্য জীবনে .
শোষযিত্বা তু সলিলং তেন কাযং দৃঢং ভবেত্ .. ৩৭..
গুদযোনিসমাযুক্ত আকুঞ্চত্যেককালতঃ .
অপানমূর্ধ্বগং কৃত্বা সমানোন্নে নিযোজযেত্ .. ৩৮..
স্বাত্মানং চ শ্রিযং ধ্যাযেদমৃতপ্লাবনং ততঃ .
বলং সমারভেদ্যোগং মধ্যমদ্বারভাগতঃ .. ৩৯..
ভাবযেদূর্ধ্বগত্যর্থং প্রাণাপানসুযোগতঃ .
এষ যোগো বরো দেহে সিদ্ধিমার্গপ্রকাশকঃ .. ৪০..
যথৈবাপাঙ্গতঃ সেতুঃ প্রবাহস্য নিরোধকঃ .
তথা শরীরগা চ্ছাযা জ্ঞাতব্যা যোগিভিঃ সদা .. ৪১..
সর্বাসামেব নাডীনামেষ বন্ধঃ প্রকীর্তিতঃ .
বন্ধস্যাস্য প্রসাদেন স্ফুটীভবতি দেবতা .. ৪২..
এবং চতুষ্পথো বন্ধো মার্গত্রযনিরোধকঃ .
একং বিকাসযন্মার্গং যেন সিদ্ধাঃ সুসঙ্গতাঃ .. ৪৩..
উদানমূর্ধ্বগং কৃত্বা প্রাণেন সহ বেগতঃ .
বন্ধোঽযং সর্বনাডীনামূর্ধ্বং যাতি নিরোধকঃ .. ৪৪..
অযং চ সংপুটো যোগো মূলবন্ধোঽপ্যযং মতঃ .
বন্ধত্রযমনেনৈব সিদ্ধ্যত্যভ্যাসযোগতঃ .. ৪৫..
দিবারাত্রমবিচ্ছিন্নং যামেযামে যদা যদা .
অনেনাভ্যাসযোগেন বাযুরভ্যসিতো ভবেত্ .. ৪৬..
বাযাবভ্যসিতে বহ্নিঃ প্রত্যহং বর্ধতে তনৌ .
বহ্নৌ বিবর্ধমানে তু সুখমন্নাদি জীর্যতে .. ৪৭..
অন্নস্য পরিপাকেন রসবৃদ্ধিঃ প্রজাযতে .
রসে বৃদ্ধিং গতে নিত্যং বর্ধন্তে ধাতবস্তথা .. ৪৮..
ধাতূনাং বর্ধনেনৈব প্রবোধো বর্ততে তনৌ .
দহ্যন্তে সর্বপাপানি জন্মকোট্যর্জিতানি চ .. ৪৯..
গুদমেঢ্রান্তরালস্থং মূলাধারং ত্রিকোণকম্ .
শিবস্য বিন্দুরূপস্য স্থানং তদ্ধি প্রকাশকম্ .. ৫০..
যত্র কুণ্ডলিনী নাম পরা শক্তিঃ প্রতিষ্ঠিতা .
যস্মাদুত্পদ্যতে বাযুর্যস্মাদ্বহ্নিঃ প্রবর্ধতে .. ৫১..
যস্মাদুত্পদ্যতে বিন্দুর্যস্মান্নাদঃ প্রবর্ধতে .
যস্মাদুত্পদ্যতে হংসো যস্মাদুত্পদ্যতে মনঃ .. ৫২..
মূলাধারাদিষট্চক্রং শক্তিস্থানমুদীরিতম্ .
কণ্ঠাদুপরি মূর্ধান্তং শাংভবং স্থানমুচ্যতে .. ৫৩..
নাডীনামাশ্রযঃ পিণ্ডো নাড্যঃ প্রাণস্য চাশ্রযঃ .
জীবস্য নিলযঃ প্রাণো জীবো হংসস্য চাশ্রযঃ .. ৫৪..
হংসঃ শক্তেরধিষ্ঠানং চরাচরমিদং জগত্ .
নির্বিকল্পঃ প্রসন্নাত্মা প্রাণাযাং সমভ্যসেত্ .. ৫৫..
সম্যগ্বন্ধত্রযস্থোঽপি লক্ষ্যলক্ষণকারণম্ .
বেদ্যং সমুদ্ধরেন্নিত্যং সত্যসংধানমানসঃ .. ৫৬..
রেচকং পূরকং চৈব কুম্ভমধ্যে নিরোধযেত্ .
দৃশ্যমানে পরে লক্ষ্যে ব্রহ্মণি স্বযমাশ্রিতঃ .. ৫৭..
বাহ্যস্থবিষযং সর্বং রেচকঃ সমুদাহৃতঃ .
পূরকং শাস্ত্রবিজ্ঞানং কুম্ভকং স্বগতং স্মৃতম্ .. ৫৮..
এবমভ্যাসচিত্তশ্চেত্সমুক্তো নাত্র সংশযঃ .
কুম্ভকেন সমারোপ্য কুম্ভকেন পূরযেত্ .. ৫৯..
কুম্ভেন কুম্ভযেত্কুম্ভং তদন্তস্থঃ পরং শিবম্ .
পুনরাস্ফালযেদদ্য সুস্থিরং কণ্ঠমুদ্রযা .. ৬০..
বাযূনাং গতিমাবৃত্য ধৃত্বা পূরককুম্ভকৌ .
সমহস্তযুগং ভূমৌ সমং পাদযুগং তথা .. ৬১..
বেধকক্রমযোগেন চতুষ্পীঠং তু বাযুনা .
আস্ফালযেন্মহামেরুং বাযুবক্ত্রে প্রকোটিভিঃ .. ৬২..
পুটদ্বযং সমাকৃষ্য বাযুঃ স্ফুরতি সত্বরম্ .
সোমসূর্যাগ্নিসংবধাজ্জানীযাদমৃতায বৈ .. ৬৩..
মেরুমধ্যগতা দেবাশ্চলন্তে মেরুচালনাত্ .
আদৌ সংজাযতে ক্ষিপ্রং বেধোঽস্য ব্রহ্মগ্রন্থিতঃ .. ৬৪..
ব্রহ্মগ্রন্থিং ততো ভিত্ত্বা বিষ্ণুগ্রন্থিং ভিনত্ত্যসৌ .
বিষ্ণুগ্রন্থিং ততো ভিত্ত্বা রুদ্রগ্রন্থিং ভিনত্ত্যসৌ .. ৬৫..
রুদ্রগ্রন্থিং ততো ভিত্ত্বা ছিত্বা মোহমলং তথা .
অনেকজন্মসংস্কারগুরুদেবপ্রসাদতঃ .. ৬৬..
যোগাভ্যাসাত্ততো বেধো জাযতে তস্য যোগিনঃ .
ইডাপিঙ্গলযোর্মধ্যে সুষুম্নানাডিমণ্ডলে .. ৬৭..
মুদ্রাবন্ধবিশেষেণ বাযুমূর্ধ্বং চ কারযেত্ .
঱্হস্বো দহতি পাপানি দীর্ঘো মোক্ষপ্রদাযকঃ .. ৬৮..
আপ্যাযনঃ প্লুতো বাপি ত্রিবিধোচ্চারণেন তু .
তৈলধারামিবচ্ছিন্নং দীর্ঘঘণ্টানিনাদবত্ .. ৬৯..
অবাচ্যং প্রণবস্যাগ্রং যস্তং বেদ স বেদবিত্ .
঱্হস্বং বিন্দুগতং দৈর্ঘ্যং ব্রহ্মরন্ধ্রগতং প্লুতম্ .
দ্বাদশান্তগতং মন্ত্রং প্রসাদং মন্ত্রসিদ্ধযে .. ৭০
সর্ববিঘ্নহরশ্চাযং প্রণবঃ সর্বদোষহা .
আরংভশ্চ ঘটশ্চৈব পুনঃ পরিচযস্তথা .. ৭১..
নিষ্পত্তিশ্চেতি কথিতাশ্চতস্রস্তস্য ভূমিকাঃ .
কারণত্রযসংভূতং বাহ্যং কর্ম পরিত্যজন্ .. ৭২..
আন্তরং কর্ম কুরুতে যত্রারংভঃ স উচ্যতে .
বাযুঃ পশ্চিমতো বেধং কুর্বন্নাপূর্য সুস্থিরম্ .. ৭৩..
যত্র তিষ্ঠতি সা প্রোক্তা ঘটাখ্যা ভূমিকা বুধৈঃ .
ন সজীবো ন নির্জীবঃ কাযে তিষ্ঠতি নিশ্চলম্ .
যত্র বাযুঃ স্থিরঃ খে স্যাত্সেযং প্রথমভূমিকা .. ৭৪..
যত্রাত্মনা সৃষ্টিলযৌ জীবন্মুক্তিদশাগতঃ .
সহজঃ কুরুতে যোগং সেযং নিষ্পত্তিভূমিকা .. ৭৫.. ইতি..
এতদুপনিষদং যোঽধীতে সোঽগ্নিপূতো ভবতি .
স বাযুপূতো ভবতি . সুরাপানাত্পূতো ভবতি .
স্বর্ণস্তেযাত্পূতো ভবতি . স জীবন্মুক্তো ভবতি .
তদেতদৃচাভ্যুক্তম্ . তদ্বিষ্ণোঃ পরমং পদং সদা পশ্যন্তি সূরযঃ .
দিবীব চক্ষুরাততম্ . তদ্বিপ্রাসো বিপন্যবো জাগৃবাংসঃ সমিন্ধতে .
বিষ্ণোর্যত্পরমং পদমিত্যুপনিষত্ ..
ইতি পঞ্চমোঽধ্যাযঃ .. .. ৫..
ॐ সহ নাববতু সহ নৌ ভুনক্তু সহ বীর্যং করবাবহৈ ..
তেজস্বিনাবধী তমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি বরাহোপনিষত্সমাপ্তা ..