রামতাপিনি

.. রামতাপিন্যুপনিষত্ ..

শ্রীরামতাপনীযার্থং ভক্তধ্যেযকলেবরম্ .
বিকলেবরকৈবল্যং শ্রীরামব্রহ্ম মে গতিঃ ..
ॐ ভদ্রং কর্ণেভিঃ শ্রুণুযাম দেবা ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
ॐ চিন্মযেঽস্মিন্মহাবিষ্ণৌ জাতে দশরথে হরৌ .
রঘোঃ কুলেঽখিলং রাতি রাজতে যো মহীস্থিতঃ .. ১..
স রাম ইতি লোকেষু বিদ্বদ্ভিঃ প্রকটীকৃতঃ .
রাক্ষসা যেন মরণং যান্তি স্বোদ্রেকতোঽথবা .. ২..
রামনাম ভুবি খ্যাতমভিরামেণ বা পুনঃ .
রাক্ষসান্মর্ত্যরূপেণ রাহুর্মনসিজং যথা .. ৩..
প্রভাহীনাংস্তথা কৃত্বা রাজ্যার্হাণাং মহীভৃতাম্ .
ধর্মমার্গং চরিত্রেণ জ্ঞানমার্গং চ নামতঃ .. ৪..
তথা ধ্যানেন বৈরাগ্যমৈশ্বর্যং স্বস্য পূজনাত্ .
তথা রাত্যস্য রামাখ্যা ভুবি স্যাদথ তত্ত্বতঃ .. ৫..
রমন্তে যোগিনোঽনন্তে নিত্যানন্দে চিদাত্মনি .
ইতি রামপদেনাসৌ পরং ব্রহ্মাভিধীযতে .. ৬..
চিন্মযস্যাদ্বিতীযস্য নিষ্কলস্যাশরীরিণঃ .
উপাসকানাং কার্যার্থং ব্রহ্মণো রূপকল্পনা .. ৭..
রূপস্থানাং দেবতানাং পুংস্ত্র্যঙ্গাস্ত্রাদিকল্পনা .
দ্বিত্তত্বারিষডষ্টানাং দশ দ্বাদশ ষোডশ .. ৮..
অষ্টাদশামী কথিতা হস্তাঃ শঙ্খাদিভির্যুতাঃ .
সহস্রান্তাস্তথা তাসাং বর্ণবাহনকল্পনা .. ৯..
শক্তিসেনাকল্পনা চ ব্রহ্মণ্যেবং হি পঞ্চধা .
কল্পিতস্য শরীরস্য তস্য সেনাদিকল্পনা .. ১০..
ব্রহ্মাদীনাং বাচকোঽযং মন্ত্রোঽন্বর্থাদিসংজ্ঞকঃ .
জপ্তব্যো মন্ত্রিণা নৈবং বিনা দেবঃ প্রসীদতি .. ১১..
ক্রিযাকর্মেজ্যকর্তৄণামর্থং মন্ত্রো বদত্যথ .
মননান্ত্রাণনান্মন্ত্রঃ সর্ববাচ্যস্য বাচকঃ .. ১২..
সোঽভযস্যাস্য দেবস্য বিগ্রহো যন্ত্রকল্পনা .
বিনা যন্ত্রেণ চেত্পূজা দেবতা ন প্রসীদতি .. ১৩..
ইতি রামপূর্বতাপিন্যুপনিষদি প্রথমোপনিষত্ .. ১..
স্বর্ভূর্জ্যোতির্মযোঽনন্তরূপী স্বেনৈব ভাসতে .
জীবত্বেন সমো যস্য সৃষ্টিস্থিতিলযস্য চ .. ১..
কারণত্বেন চিচ্ছক্ত্যা রজঃসত্ত্বতমোগুণৈঃ .
যথৈব বটবীজস্থঃ প্রাকৃতশ্চ মহান্দ্রুমঃ .. ২..
তথৈব রামবীজস্থং জগদেতচ্চরাচরম্ .
রেফারূঢা মূর্তযঃ স্যুঃ শক্তযস্তিস্র এব চেতি .. ৩..
ইতি রামতাপিন্যুওঅনিষদি দ্বিতীযোপনিষত্ .. ২..
সীতারামৌ তন্মযাবত্র পূজ্যৌ
     জাতান্যাভ্যাং ভুবনানি দ্বিসপ্ত .
স্থিতানি চ প্রহিতান্যেব তেষু
     ততো রামো মানবো মাযযাধাত্ .. ১..
জগত্প্রাণাযাত্মনেঽস্মৈ নমঃ স্যা-
     ন্নমস্ত্বৈক্যং প্রবদেত্প্রাগ্গুণেনেতি .. ২..
ইতি রামতাপিন্যুপনিষদি তৃতীযোপনিষত্ .. ৩..
জীববাচী নমো নাম চাত্মারামেতি গীযতে .
তদাত্মিকা যা চতুর্থী তথা মাযেতি গীযতে .. ১..
মন্ত্রোযং বাচকো রামো রামো বাচ্যঃ স্যাদ্যোগএতযোঃ .
ফলতশ্চৈব সর্বেষাং সাধকানাং ন সংশযঃ .. ২..
যথা নামী বাচকেন নাম্না যোঽভিমুখো ভবেত্ .
তথা বীজাত্মকো মন্ত্রো মন্ত্রিণোঽভিমুখো ভবেত্ .. ৩..
বীজশক্তিং ন্যসেদ্দক্ষবামযোঃ স্তনযোরপি .
কীলো মধ্যে বিনা ভাব্যঃ স্ববাঞ্ছাবিনিযোগবান্ .. ৪..
সর্বেষামেব মন্ত্রাণামেষ সাধারণঃ ক্রমঃ .
অত্র রামোঽনন্তরূপস্তেজসা বহ্নিনা সমঃ .. ৫..
সত্ত্বনুষ্ণগুবিশ্বশ্চেদগ্নীষোমাত্মকং জগত্ .
উত্পন্নঃ সীতযা ভাতি চন্দ্রশ্চন্দ্রিকযা যথা .. ৬..
প্রকৃত্যা সহিতঃ শ্যামঃ পীতবাসা জটাধরঃ .
দ্বিভুজঃ কুণ্ডলী রত্নমালী ধীরো ধনুর্ধরঃ .. ৭..
প্রসন্নবদনো জেতা ঘৃষ্ট্যষ্টকবিভূষিতঃ .
প্রকৃত্যা পরমেশ্বর্যা জগদ্যোন্যাঙ্কিতাঙ্কভৃত্ .. ৮..
হেমাভযা দ্বিভুজযা সর্বালঙ্কৃতযা চিতা .
শ্লিষ্টঃ কমলধারিণ্যা পুষ্টঃ কোসলজাত্মজঃ .. ৯..
দক্ষিণে লক্ষ্মণেনাথ সধনুষ্পাণিনা পুনঃ .
হেমাভেনানুজেনৈব তথা কোণত্রযং ভবেত্ .. ১০..
তথৈব তস্য মন্ত্রস্য যস্যাণুশ্চ স্বঙেন্তযা .
এবং ত্রিকোণরূপং স্যাত্তং দেবা যে সমাযযুঃ .. ১১..
স্তুতিং চক্রুশ্চ জগতঃ পতিং কল্পতরৌ স্থিতম্ .
কামরূপায রামায নমো মাযামযায চ .. ১২..
নমো বেদাদিরূপায ওঙ্কারায নমো নমঃ .
রমাধরায রামায শ্রীরামাযাত্মমূর্তযে .. ১৩..
জানকীদেহভূষায রক্ষোঘ্নায শুভাঙ্গিনে .
ভদ্রায রঘুবীরায দশাস্যান্তকরূপিণে .. ১৪..
রামভদ্র মহেশ্বাস রঘুবীর নৃপোত্তম .
ভো দশাস্যান্তকাস্মাকং রক্ষাং দেহি শ্রিযং চ তে .. ১৫..
ত্বমৈশ্বর্যং দাপযাথ সংপ্রত্যাশ্বরিমারণম্ .
কুর্বিতি স্তুত্য দেবাদ্যাস্তেন সার্ধং সুখং স্থিতাঃ .. ১৬..
স্তুবন্ত্যেবং হি ঋষযস্তদা রাবণ আসুরঃ .
রামপত্নীং বনস্থাং যঃ স্বনিবৃত্ত্যর্থমাদদে .. ১৭..
স রাবণ ইতি খ্যাতো যদ্বা রাবাচ্চ রাবণঃ .
তদ্ব্যাজেনেক্ষিতুং সীতাং রামো লক্ষ্মণ এব চ .. ১৮..
বিচেরতুস্তদা ভূমৌ দেবীং সংদৃশ্য চাসুরম্ .
হত্বা কবন্ধং শবরীং গত্বা তস্যাজ্ঞযা তযা .. ১৯..
পূজিতো বাযুপুত্রেণ ভক্তেন চ কপীশ্বরম্ .
আহূয শংসতাং সর্বমাদ্যন্তং রামলক্ষ্মণৌ .. ২০..
স তু রামে শঙ্কিতঃ সন্প্রত্যযার্থং চ দুন্দুভেঃ .
বিগ্রহং দর্শযামাস যো রামস্তমচিক্ষিপত্ .. ২১..
সপ্ত সালান্বিভিদ্যাশু মোদতে রাঘবস্তদা .
তেন হৃষ্টঃ কপীন্দ্রোঽসৌ স রামস্তস্য পত্তনম্ .. ২২..
জগামাগর্জদনুজো বালিনো বেগতো গৃহাত্ .
তদা বালী নির্জগাম তং বালিনমথাহবে .. ২৩..
নিহত্য রাঘবো রাজ্যে সুগ্রীবং স্থাপযত্ততঃ .
হরীনাহূয সুগ্রীবস্ত্বাহ চাশাবিদোঽধুনা .. ২৪..
আদায মৈথিলীমদ্য দদতাশ্বাশু গচ্ছত .
ততস্ততার হনুমানব্ধিং লঙ্কাং সমাযযৌ .. ২৫..
সীতাং দৃষ্ট্বাঽসুরান্হত্বা পুরং দগ্ধ্বা তথা স্বযম্ .
আগত্য রামেণ সহ ন্যবেদযত তত্ত্বতঃ .. ২৬..
তদা রামঃ ক্রোধরূপী তানাহূযাথ বানরান্ .
তৈঃ সার্ধমাদাযাস্ত্রাণি পুরীং লঙ্কাং সমাযযৌ .. ২৭..
তাং দৃষ্ট্বা উদধীশেন সার্ধং যুদ্ধমকারযত্ .
ঘটশ্রোত্রসহস্রাক্ষজিদ্ভ্যাং যুক্তং তমাহবে.. ২৮..
হত্বা বিভীষণং তত্র স্থাপ্যাথ জনকাত্মজাম্ .
আদাযাঙ্কস্থিতাং কৃত্বা স্বপুরং তৈর্জগাম সঃ .. ২৯..
ততঃ সিংহাসনস্থঃ সন্ দ্বিভুজো রঘুনন্দনঃ .
ধনুর্ধরঃ প্রসন্নাত্মা সর্বাভরণভূষিতঃ .. ৩০..
মুদ্রাং জ্ঞানমযীং যাম্যে বামে তেজপ্রকাশিনীম্ .
ধৃত্বা ব্যাখ্যাননিরতশ্চিন্মযঃ পরমেশ্বরঃ .. ৩১..
উদগ্দক্ষিণযোঃ স্বস্য শত্রুঘ্নভরতৌ ততঃ .
হনূমন্তং চ শ্রোতারমগ্রতঃ স্যাত্ত্রিকোণগম্ .. ৩২..
ভরতাধস্তু সুগ্রীবং শত্রুঘ্নাধো বিভীষণম্ .
পশ্চিমে লক্ষ্মণং তস্য ধৃতচ্ছ্রত্রং সচামরম্ .. ৩৩..
তদধস্তৌ তালবৃন্তকরৌ ত্র্যস্রং পুনর্ভবেত্ .
এবং ষট্কোণমাদৌ স্বদীর্ঘাঙ্গৈরেষ সংযুতঃ .. ৩৪..
দ্বিতীযং বাসুদেবাদ্যৈরাগ্নেযাদিষু সংযুতঃ .
তৃতীযং বাযুসূনুং চ সুগ্রীবং ভরতং তথা .. ৩৫..
বিভীষণং লক্ষ্মণং চ অঙ্গদং চারিমর্দনম্ .
জাম্ববন্তং চ তৈর্যুক্তস্ততো ধৃষ্টির্জযন্তকঃ .. ৩৬..
বিজযশ্চ সুরাষ্ট্রশ্চ রাষ্ট্রবর্ধন এব চ .
অশোকো ধর্মপালশ্চ সুমন্ত্রশ্চৈভিরাবৃতঃ .. ৩৭..
ততঃ সহস্রদৃগ্বহ্নির্ধর্মজ্ঞো বরুণোঽনিলঃ .
ইন্দ্বীশধাত্রনন্তাশ্চ দশভিশ্চৈভিরাবৃতঃ .. ৩৮..
বহিস্তদাযুধৈঃ পূজ্যো নীলাদিভিরলঙ্কৃতঃ .
বসিষ্ঠবামদেবাদিমুনিভিঃ সমুপাসিতঃ .. ৩৯..
এবমুদ্দেশতঃ প্রোক্তং নির্দেশস্তস্য চাধুনা .
ত্রিরেখাপুটমালিখ্য মধ্যে তারদ্বযং লিখেত্ .. ৪০..
তন্মধ্যে বীজমালিখ্য তদধঃ সাধ্যমালিখেত্ .
দ্বিতীযান্তং চ তস্যোর্ধ্বং ষষ্ঠ্যন্তং সাধকং তথা .. ৪১..
কুরু দ্বযং চ তত্পার্শ্বে লিখেদ্বীজান্তরে রমাম্ .
তত্সর্বং প্রণবাভ্যাং চ বেষ্টযেচ্ছুদ্ধবুদ্ধিমান্ .. ৪২..
দীর্ঘভাজি ষডস্রে তু লিখেদ্বীজং হৃদাদিভিঃ .
কোণপার্শ্বে রমামাযে তদগ্রেঽনঙ্গমালিখেত্ .. ৪৩..
ক্রোধং কোণাগ্রান্তরেষু লিখ্য মন্ত্র্যভিতো গিরম্ .
বৃত্তত্রযং সাষ্টপত্রং সরোজে বিলিখেত্স্বরান্ .. ৪৪..
কেসরে চাষ্টপত্রে চ বর্গাষ্টকমথালিখেত্ .
তেষু মালামনোর্বর্ণান্বিলিখেদূর্মিসংখ্যযা .. ৪৫..
অন্তে পঞ্চাক্ষরাণ্যেবং পুনরষ্টদলং লিখেত্ .
তেষু নারাযণাষ্টার্ণাং_লিখ্য তত্কেসরে রমাম্ .. ৪৬..
তদ্বহির্দ্বাদশদলং বিলিখেদ্দ্বাদশাক্ষরম্ .
অথোং নমো ভগবতে বাসুদেবায ইত্যযম্ .. ৪৭..
আদিক্ষান্তান্কেসরেষু বৃত্তাকারেণ স.ম্লিখেত্ .
তদ্বহিঃ ষোডশদলং লিখ্য তত্কেসরে হৃযম্ .. ৪৮..
বর্মাস্ত্রনতিসংযুক্তং দলেষু দ্বাদশাক্ষরম্ .
তত্সন্ধিষ্বিরজাদীনাং মন্ত্রান্মন্ত্রী সমালিখেত্ .. ৪৯..
হ্রং স্রং ভ্রং ব্রং লূ৅ং শ্রং জ্রং চ লিখেত্সম্যক্ততো বহিঃ .
দ্বাত্রিংশারং মহাপদ্মং নাদবিন্দুসমাযুতম্ .. ৫০..
বিলিখেন্মন্ত্ররাজার্ণাংস্তেষু পত্রেষু যত্নতঃ .
ধ্যাযেদষ্টবসূনেকাদশরুদ্রাংশ্চ তত্র বৈ .. ৫১..
দ্বাদশেনাংশ্চ ধাতারং বষট্কারং চ তদ্বহিঃ .
ভূগৃহং বজ্রশূলাঢ্যং রেখাত্রযসমন্বিতম্ .. ৫২..
দ্বারোপতং চ রাশ্যাদিভূষিতং ফণিসংযুতম্ .
অনন্তো বাসুকিশ্চৈব তক্ষঃ কর্কোটপদ্মকঃ .. ৫৩..
মহাপদ্মশ্চ শঙ্খশ্চ গুলিকোঽষ্টৌ প্রকীর্তিতাঃ .
এবং মণ্ডলমালিখ্য তস্য দিক্ষু বিদিক্ষু চ .. ৫৪..
নারসিংহং চ বারাহং লিখেন্মন্ত্রদ্বযং তথা .
কূটো রেফানুগ্রহেন্দুনাদশক্ত্যাদিভির্যুতঃ .. ৫৫..
যো নৃসিংহঃ সমাখ্যাতো গ্রহমারণকর্মণি .
অন্ত্যাঙ্ঘ্রীশবিযদ্বিন্দুনাদৈর্বীজং চ সৌকরম্ .. ৫৬..
হুংকারং চাত্র রামস্য মালমন্ত্রোঽধুনেরিতঃ .
তারো নতিশ্চ নিদ্রাযাঃ স্মৃতির্ভেদশ্চ কামিকা .. ৫৭..
রুদ্রেণ সংযুতা বহ্নিমেধামরবিভূষিতা .
দীর্ঘা ক্রূরযুতা হ্লাদিন্যথো দীর্ঘসমাযুতা .. ৫৮..
ক্ষুধা ক্রোধিন্যমোঘা চ বিশ্বমপ্যথ মেধযা .
যুক্তা দীর্ঘজ্বালিনী চ সুসূক্ষ্মা মৃত্যুরূপিণী .. ৫৯..
সপ্রতিষ্ঠা হ্লাদিনী ত্বক্ক্ষ্বেলপ্রীতিশ্চ সামরা .
জ্যোতিস্তীক্ষ্ণাগ্নিসংযুক্তা শ্বেতানুস্বারসংযুতা .. ৬০..
কামিকাপঞ্চমূলান্তস্তান্তান্তো থান্ত ইত্যথ .
স সানন্তো দীর্ঘযুতো বাযুঃ সূক্ষ্মযুতো বিষঃ .. ৬১..
কামিকা কামকা রুদ্রযুক্তাথোঽথ স্থিরাতপা .
তাপনী দীর্ঘযুক্তা ভূরনলোঽনন্তগোঽনিলঃ .. ৬২..
নারাযণাত্মকঃ কালঃ প্রাণাভো বিদ্যযা যুতঃ .
পীতারাতিস্তথা লান্তো যোন্যা যুক্তস্ততো নতিঃ .. ৬৩..
সপ্তচত্বারিংশদ্বর্ণগুণান্তঃস্পৃঙ্মনুঃ স্বযম্ .
রাজ্যাভিষিক্তস্য তস্য রামস্যোক্তক্রমাল্লিখেত্ .. ৬৪..
ইদং সর্বাত্মকং যন্ত্রং প্রাগুক্তমৃষিসেবিতম্ .
সেবকানাং মোক্ষকরমাযুরারোগ্যবর্ধনম্ .. ৬৫..
অপুত্রাণাং পুত্রদং চ বহুনা কিমনেন বৈ .
প্রাপ্নুবন্তি ক্ষণাত্সম্যগত্র ধর্মাদিকানপি .. ৬৬..
ইদং রহস্যং পরমমীশ্বরেণাপি দুর্গমম্ .
ইদং যন্ত্রং সমাখ্যাতং ন দেযং প্রাকৃতে জনে .. ৬৭.. ইতি..
ইতি তুরীযোপনিষত্ ..
ॐ ভূতাদিকং শোধযেদ্দ্বারপূজাং
     কৃত্বা পদ্মাদ্যাসনস্থঃ প্রসন্নঃ .
অর্চাবিধাবস্য পীঠাধরোর্ধ্ব-
     পার্শ্বার্চনং মধ্যপদ্মার্চনং চ .. ১..
কৃত্বা মৃদুশ্লক্ষ্ণসুতূলিকাযাং
     রত্নাসনে দেশিকমর্চযিত্বা .
শক্তিং চাধারাখ্যকাং কূর্মনাগৌ
     পৃথিব্যব্জ স্বাসনাধঃ প্রকল্প্য .. ২..
বিঘ্নেশং দুর্গাং ক্ষেত্রপালং চ বাণীং
     বীজাদিকাংশ্চাগ্নিদেশাদিকাংশ্চ .
পীঠস্যাঙ্ঘ্রিষ্বেব ধর্মাদিকাংশ্চ
     নত্বা পূর্বাদ্যাসু দীক্ষ্বর্চযেচ্চ .. ৩..
মধ্যে ক্রমাদর্কবিধ্বগ্নিতেজাং-
     স্যুপর্যুপর্যাদিমৈরর্চিতানি .
রজঃ সত্বং তম এতান্ বৃত্ত-
     ত্রযং বীজাঢ্যং ক্রমাদ্ভাবযেচ্চ .. ৪..
আশাব্যাশাস্বপ্যথাত্মানমন্ত-
     রাত্মানং বা পরমাত্মানমন্তঃ .
জ্ঞানাত্মানং চার্চযেত্তস্য দিক্ষু
     মাযাবিদ্যে যে কলাপারতত্ত্বে .. ৫..
সংপূজযেদ্বিমলাদীশ্চ শক্তী-
     রভ্যর্চযেদ্দেবমবাহযেচ্চ .
অঙ্গব্যূহানিলজাদ্যৈশ্চ পূজ্য
     ঘৃষ্ট্যাদিকৈর্লোকপালৈস্তদস্ত্রৈঃ .. ৬..
বসিষ্ঠাদ্যৈর্মুনিভির্নীলমুখ্যৈ-
     রারাধযেদ্রাঘবং চন্দনাদ্যৈঃ .
মুখ্যোপহারৈর্বিবিধৈশ্চ পূজ্যৈ-
     স্তস্মৈ জপাদীংশ্চ সম্যক্প্রকল্প্য .. ৭..
এবংভূতং জগদাধারভূতং
     রামং বন্দে সচ্চিদানন্দরূপম্ .
গদারিশঙ্খাব্জধরং ভবারিং
     স যো ধ্যাযেন্মোক্ষমাপ্নোতি সর্বঃ .. ৮..
বিশ্বব্যাপী রাঘবো যস্তদানী-
     মন্তর্দধে শ্ঙ্খচক্রে গদাব্জে .
ধৃত্বা রমাসহিতঃ সানুজশ্চ
     সপত্তনঃ সানুগঃ সর্বলোকী .. ৯..
তদ্ভক্তা যে লব্ধকামাংশ্চ ভুক্ত্বা
     তথা পদং পরমং যান্তি তে চ .
ইমা ঋচঃ সর্বকামার্থদাশ্চ
     যে তে পঠন্ত্যমলা যান্তি মোক্ষম্ .. ১০..
ইতি পঞ্চমোঽপনিষত্ ..
চিন্মযেঽস্মিংস্ত্রযোদশ . স্বভূর্জ্যোতিস্তিস্রঃ .
সীতারামাবেকা . জীববাচী ষট্ষষ্টিঃ .
ভূতাদিকমেকাদশ . পঞ্চখণ্ডেষু ত্রিনবতিঃ .
ইতি শ্রীরামপূর্বতাপিন্যুপনিষত্সমাপ্তা ..
রামোত্তরতাপিন্যুপনিষত্
ॐ বৃহস্পতিরুবাচ যাজ্ঞবল্ক্যম্ . যদনু কুরুক্ষেত্রং
দেবানাং দেবযজনং সর্বেষাং ভূতানাং
ব্রহ্মসদনমবিমুক্তং বৈ কুরুক্ষেত্রং দেবানাং দেবযজনং
সর্বেষাং ভূতানাং ব্রহ্মসদনম্ . তস্মাদ্যত্র ক্বচন
গচ্ছতি তদেব মন্যেতেতীদং বৈ কুরুক্ষেত্রং দেবানাং
দেবযজনং সর্বেষাং ভূতানাং ব্রহ্মসদনম্ .
অত্র হি জন্তোঃ প্রাণেষূত্ক্রমমাণেষু রুদ্রস্তারকং
ব্রহ্ম ব্যাচষ্টে যেনাসাবমৃতীভূত্বা মোক্ষীভবতি .
তস্মাদবিমুক্তমেব নিষেবেত . অবিমুক্তং ন বিমুঞ্চেত্ .
এবমেবৈতদ্যাজ্ঞবল্ক্য .. ১..
অথ হৈনং ভারদ্বাজঃ পপ্রচ্ছ যাজ্ঞবল্ক্যং কিং
তারকং কিং তারযতীতি . স হোবাচ যাজ্ঞবল্ক্যস্তারকং
দীর্ঘানলং বিন্দুপূর্বকং দীর্ঘানলং পুনর্মাযাং
নমশ্চন্দ্রায নমো ভদ্রায নম ইত্যেতদ্ব্রহ্মাত্মিকাঃ
সচ্চিদানন্দাখ্যা ইত্যুপাসিতব্যম্ . অকারঃ প্রথমাক্ষরো
ভবতি . উকারোদ্বিতীযাক্ষরো ভবতি . মকারস্তৃতীযাক্ষরো
ভবতি . অর্ধমাত্রশ্চতুর্থাক্ষরো ভবতি . বিন্দুঃ পঞ্চমাক্ষরো
ভবতি . নাদঃ ষষ্ঠাক্ষরো ভবতি . তারকত্বাত্তারকো ভবতি .
তদেব তারকং ব্রহ্ম ত্বং বিদ্ধি . তদেবোপাসিতব্যমিতি জ্ঞেযম্ . গর্ভজন্মজরামরণসংসারমহদ্ভযাত্সংতারযতীতি .
তস্মাদুচ্যতে ষডক্ষরং তারকমিতি . . য এতত্তারকং ব্রহ্ম
ব্রাহ্মণো নিত্যমধীতে . স পাপ্মানং তরতি . স মৃত্যুং তরতি .
স ব্রহ্মহত্যাং তরতি . স ভ্রূণহত্যাং তরতি. স সংসারং তরতি .
স সর্বং তরতি . সোঽবিমুক্তমাশ্রিতো ভবতি . স মহান্ভবতি .
সোঽমৃতত্বং চ গচ্ছতি .. ২..
অত্রৈতে শ্লোকা ভবন্তি .
অকারক্ষরসংভূতঃ সৌমিত্রির্বিশ্বভাবনঃ .
উকারাক্ষরসংভূতঃ শত্রুঘ্নস্তৈজসাত্মকঃ .. ১..
প্রাজ্ঞাত্মকস্তু ভরতো মকারাক্ষরসংভবঃ .
অর্ধমাত্রাত্মকো রামো ব্রহ্মানন্দৈকবিগ্রহঃ .. ২..
শ্রীরামসাংনিধ্যবশাজ্জগদাধারকারিণী .
উত্পত্তিস্থিতিসংহারকারিণী সর্বদেহিনাম্ .. ৩..
সা সীতা ভবতি জ্ঞেযা মূলপ্রকৃতিসংজ্ঞিতা .
প্রণবত্বাত্প্রকৃতিরিতি বদন্তি ব্রহ্মবাদিনঃ .. ৪.. ইতি..
ওমিত্যেতদক্ষরমিদং সর্বং তস্যোপব্যাখ্যানং
ভূতং ভব্যং ভবিষ্যদিতি সর্বমোঙ্কার এব .
যচ্চান্যত্ত্রিকালাতীতং তদপ্যোঙ্কার এব . সর্বং
হ্যেতদ্ব্রহ্ম . অযমাত্মা ব্রহ্ম সোঽযমাত্মা
চতুষ্পাজ্জাগরিতস্থানো বহিঃপ্রজ্ঞঃ সপ্তাঙ্গ
একোনবিংশতিমুখঃ স্থূলভুগ্বৈশ্বানরঃ
প্রথমঃ পাদঃ .. স্বপ্নস্থানোঽন্তঃপ্রজ্ঞঃ
সপ্তাঙ্গ একোনবিংশতিমুখঃ প্রবিবিক্তভুক্ তৈজসো
দ্বিতীযঃ পাদঃ . যত্র সুপ্তো ন কংচন কামং
কামযতে ন কংচন স্বপ্নং পশ্যতি তত্সুষুপ্তম্ .
সুষুপ্তস্থান একীভূতঃ প্রজ্ঞানঘনএবানন্দমযো
হ্যানন্দভুক্ চেতোমুখঃ প্রাজ্ঞস্তৃতীযঃ পাদঃ .
এষ সর্বেশ্বর এষ সর্বজ্ঞ এষোঽন্তর্যাম্যেষ
যোনিঃ সর্বস্য প্রভবাপ্যযৌ হি ভূতানাম্ .
নান্তঃপ্রজ্ঞং ন বহিঃপ্রজ্ঞং নোভযতঃপ্রজ্ঞং
ন প্রজ্ঞং নাপ্রজ্ঞং ন প্রজ্ঞানঘনমদৃশ্য-
মব্যবহার্যমগ্রাহ্যমলক্ষণমচিন্ত্যমব্যপদেশ্য-
মেকাত্মপ্রত্যযসারং প্রপঞ্চোপশমং শান্তং
শিবমদ্বৈতং চতুর্থং মন্যন্তে . স আত্মা স বিজ্ঞেযঃ
সদোজ্জ্বলোঽবিদ্যাতত্কার্যহীনঃ স্বাত্মবন্ধহরঃ সর্বদা
দ্বৈতরহিত আনন্দরূপঃ সর্বাধিষ্ঠানসন্মাত্রো
নিরস্তাবিদ্যাতমোমোহোঽহমেবেতি সংভাব্যাহমোংত-
ত্সদ্যত্পরংব্রহ্ম রামচন্দ্রশ্চিদাত্মকঃ .
সোঽহমোন্তদ্রামভদ্রপরংজ্যোতীরসোঽহমোমিত্যা-
ত্মানমাদায মনসা ব্রহ্মণৈকীকুর্যাত্ ..
সদা রামোঽহমস্মীতি তত্ত্বতঃ প্রবদন্তি যে .
ন তে সংসারিণো নূনং রাম এব ন সংশযঃ .. ইত্যুপনিষত্ ..
য এবং বেদ স মুক্তো ভবতীতি যাজ্ঞবল্ক্যঃ ..
অথ হৈনমত্রিঃ পপ্রচ্ছ যাজ্ঞবল্ক্যং য
এষোঽনন্তোঽব্যক্তপরিপূর্ণানন্দৈকচিদাত্মা
তং কথমহং বিজানীযামিতি . স হোবাচ যাজ্ঞবল্ক্যঃ .
সোঽবিমুক্ত উপাস্যোঽযম্ . এষোঽনন্তোঽব্যক্ত আত্মা
সোঽবিমুক্তে প্রতিষ্ঠিত ইতি . সোঽবিমুক্তঃ কস্মিন্প্রতিষ্ঠিত ইতি .
বরণাযাং নাস্যাং চ মধ্যে প্রতিষ্ঠিত ইতি ..
কা বৈ বরণা কা চ নাসীতি . জন্মান্তরকৃতান্সর্বা-
ন্দোষন্বারযতীতি তেন বরণা ভবতীতি .
সর্বানিন্দ্রিযকৃতান্পাপান্নাশযতীতি তেন নাসী ভবতীতি .
কতমচ্চাস্য স্থানং ভবতীতি . ভ্রুবোর্ঘ্রাণস্য চ
যঃ সন্ধিঃ স এষ দ্যৌর্লোকস্য পরস্য চ সন্ধির্ভবতীতি .
এতদ্বৈ সন্ধিং সন্ধ্যাং ব্রহ্মবিদ উপাসত ইতি ..
সোঽবিমুক্ত উপাস্য ইতি . সোঽবিমুক্তং জ্ঞানমাচষ্টে যো
বা এতদেবং বেদ .. অথ তং প্রত্যুবাচ .
শ্রীরামস্য মনুং কাশ্যাং জজাপ বৃষভধ্বজঃ .
মন্বন্তরসহস্রৈস্তু জপহোমার্চনাদিভিঃ ..১..
ততঃ প্রসন্নো ভগবাঞ্ছ্রীরামঃ প্রাহ শংকরম্ .
বৃণীশ্ব যদভীষ্টং তদ্দাস্যামি পরমেশ্বর .. ২.. ইতি ..
অথ সচ্চিদানন্দাত্মানং শ্রীরামমীশ্বরঃ পপ্রচ্ছ .
মণিকর্ণ্যাং মম ক্ষেত্রে গঙ্গাযাং বা তটে পুনঃ .
ম্রিযেত দেহী তজ্জন্তোর্মুক্তির্নাঽতো বরান্তরম্ .. ৩.. ইতি ..
অথ স হোবাচ শ্রীরামঃ ..
ক্ষেত্রেঽস্মিংস্তব দেবেশ যত্র কুত্রাপি বা মৃতাঃ .
কৃমিকীটাদযোঽপ্যাশু মুক্তাঃ সন্তু ন চান্যথা .. ৪..
অবিমুক্তে তব ক্ষেত্রে সর্বেষাং মুক্তিসিদ্ধযে .
অহং সংনিহিতস্তত্র পাষাণপ্রতিমাদিষু .. ৫..
ক্ষেত্রেঽস্মিন্যোঽর্চযেদ্ভক্ত্যা মন্ত্রেণানেন মাং শিব .
ব্রহ্মহত্যাদিপাপেভ্যো মোক্ষযিষ্যামি মা শুচঃ .. ৬..
ত্বত্তো বা ব্রহ্মণো বাপি যে লভন্তে ষডক্ষরম্ .
জীবন্তো মন্ত্রসিদ্ধাঃ স্যুর্মুক্তা মাং প্রাপ্নুবন্তি তে .. ৭..
মুমূর্ষোর্দক্ষিণে কর্ণে যস্য কস্যাপি বা স্বযম্ .
উপদেক্ষ্যসি মন্মন্ত্রং স মুক্তো ভবিতা শিব .. ৮..
ইতি শ্রীরামচন্দ্রেণোক্তম্ .. অথ হৈনং ভারদ্বাজো
যাজ্ঞবল্ক্যমুবাচাথ কৈর্মন্ত্রৈঃ স্তুতঃ শ্রীরামচন্দ্রঃ
প্রীতো ভবতি . স্বাত্মানং দর্শযতি তান্নো ব্রূহি ভগবন্নিতি .
স হোবাচ যাজ্ঞবল্ক্যঃ .. পূর্বং সত্যলোকে শ্রীরামচন্দ্রেণৈবং
শিক্ষিতো ব্রহ্মা পুনরেতযা গাথযা নমস্করোতি ..
বিশ্বরূপধরং বিষ্ণুং নারাযণমনামযম্ .
পূর্ণানন্দৈকবিজ্ঞানং পরং ব্রহ্মস্বরূপিণম্ ..
মনসা সংস্মরন্ব্রহ্ম তুষ্টাব পরমেশ্বরম্ .
ॐ যো হ বৈ শ্রীরামচন্দ্রঃ স ভগবানদ্বৈতপরমানন্দ
আত্মা যত্পরং ব্রহ্ম ভূর্ভুবঃ সুবস্তস্মৈ বৈ নমো নমঃ .. ১..
যথা প্রথমমন্ত্রোক্তাবাদ্যন্তৌ তথা সর্বমন্ত্রেষু জ্ঞাতব্যৌ ..
যশ্চাখণ্ডৈকরসাত্মা .. ২.. যচ্চ ব্রহ্মানন্দামৃতম্ .. ৩..
যত্তারকং ব্রহ্ম .. ৪.. যো ব্রহ্মা বিষ্ণুর্মহেশ্বরো যঃ সর্বদেবাত্মা .. ৫..
যে সর্বে বেদাঃ সাঙ্গাঃ সশাখাঃ সেতিহাসপুরাণাঃ .. ৬..
যো জীবান্তরাত্মা .. ৭.. যঃ সর্বভূতান্তরাত্মা .. ৮..
যে দেবাসুরমনুষ্যাদিভাবাঃ .. ৯.. যে মত্স্যকূর্মাদ্যবতারাঃ .. ১০..
যোঽন্তঃকরণচতুষ্টযাত্মা .. ১১.. যশ্চ প্রাণঃ .. ১২..
যশ্চ যমঃ .. ১৩.. যশ্চান্তকঃ .. ১৪.. যশ্চ মৃত্যুঃ .. ১৫..
যচ্চামৃতম্ .. ১৬.. যানি চ পঞ্চমহাভূতানি .. ১৭..
যঃ স্থাবরজঙ্গমাত্মা .. ১৮.. যে পঞ্চাগ্নযঃ .. ১৯..
যাঃ সপ্ত মহাব্যাহৃতযঃ .. ২০.. যা বিদ্যা .. ২১..
যা সরস্বতী .. ২২.. যা লক্ষ্মীঃ .. ২৩.. যা গৌরী .. ২৪..
যা জানকী .. ২৫.. যচ্চ ত্রৈলোক্যম্ .. ২৬.. যঃ সূর্যঃ .. ২৭..
যঃ সোমঃ .. ২৮.. যানি চ নক্ষত্রাণি .. ২৯.. যে চ নব গ্রহাঃ .. ৩০..
যে চাষ্টৌ লোকপালাঃ .. ৩১.. যে চাষ্টৌ বসবঃ .. ৩২..
যে চৈকাদশ রুদ্রাঃ .. ৩৩.. যে চ দ্বদিশাদিত্যাঃ .. ৩৪..
যচ্চ ভূতং ভব্যং ভবিষ্যত্ .. ৩৫..
যদ্ব্রহ্মাণ্ডস্য বহির্ব্যাপ্তম্ .. ৩৬.. যো হিরণ্যগর্ভঃ .. ৩৭..
যা প্রকৃতিঃ .. ৩৮.. যশ্চোঙ্কারঃ .. ৩৯..
যাশ্চতস্রোঽর্ধমাত্রাঃ .. ৪০.. যঃ পরমপুরুষঃ .. ৪১..
যশ্চ মহেশ্বরঃ .. ৪২.. যশ্চ মহাদেবঃ .. ৪৩..
য ॐ নমো ভগবতে বাসুদেবায .. ৪৪.. যো মহাবিষ্ণুঃ .. ৪৫..
যঃ পরমাত্মা .. ৪৬.. যো বিজ্ঞানাত্মা .. ৪৭..
ॐ যো হ বৈ শ্রীরামচন্দ্রঃ স ভগবানদ্বৈতপরমানন্দ আত্মা .
যঃ সচ্চিদানন্দাদ্বৈতৈকচিদাত্মা ভূর্ভুবঃ সুবস্তস্মৈ
বৈ নমো নমঃ .. ইতি তান্ব্রহ্মাব্রবীত্ . সপ্তচত্বারিংশন্মন্ত্রৈর্নিত্যং
দেবং স্তুবধ্বম্ . ততো দেবঃ প্রীতো ভবতি . স্বাত্মানং দর্শযতি .
তস্মাদ্য এতৈর্মন্ত্রৈর্নিত্যং দেবং স্তৌতি স দেবং পশ্যতি .
সোঽমৃতত্বং গচ্ছতীতি মহোপনিষত্ .. ৫..
অথ হৈনং ভারদ্বাজো যাজ্ঞবল্ক্যমুপসমেত্যোবাচ
শ্রীরামমন্ত্ররাজস্য মাহাত্ম্যমনুব্রূহীতি . স হোবাচ যাজ্ঞবল্ক্যঃ .
স্বপ্রকাশঃ পরংজ্যোতিঃ স্বানুভূত্যৈকচিন্মযঃ .
তদেব রামচন্দ্রস্য মনোরাদ্যক্ষরঃ স্মৃতঃ .. ১..
অখণ্ডৈকরসানন্দস্তারকব্রহ্মবাচকঃ .
রামাযেতি সুবিজ্ঞেযঃ সত্যানন্দচিদাত্মকঃ .. ২..
নমঃপদং সুবিজ্ঞেযং পূর্ণানন্দৈককারণম্ .
সদা নমন্তি হৃদযে সর্বে দেবা মুমুক্ষবঃ .. ৩.. ইতি ..
য এবং মন্ত্ররাজং শ্রীরামচন্দ্রষডক্ষরং নিত্যমধীতে .
সোঽগ্নিপূতো ভবতি . স বাযুপূতো ভবতি . স আদিত্যপূতো ভবতি .
স সোমপূতো ভবতি . স ব্রহ্মপূতো ভবতি . স বিষ্ণুপূতো ভবতি .
স রুদ্রপূতো ভবতি . সর্বৈর্দেবৈর্জ্ঞাতো ভবতি . সর্বক্রতুভিরিষ্টবান্ভবতি .
তেনেতিহাসপুরাণানাং রুদ্রাণাং শতসহস্রাণি জপ্তানি ফলানি ভবন্তি .
শ্রীরামচন্দ্রমনুস্মরণেন গাযত্র্যঃ শতসহস্রাণি জপ্তানি ফলানি
ভবন্তি . প্রণবানামযুতকোটিজপা ভবন্তি . দশ পূর্বান্দশোত্তরান্পুনাতি .
স পঙ্ক্তিপাবনো ভবতি . স মহান্ভবতি . সোঽমৃতত্বং চ গচ্ছতি ..
অত্রৈতে শ্লোকা ভবন্তি .
গাণপত্যেষু শৈবেষু শাক্তসৌরেষ্বভীষ্টদঃ .
বৈষ্ণবেষ্বপি সর্বেষু রামমন্ত্রঃ ফলাধিকঃ .. ৪..
গাণপত্যাদি মন্ত্রেষু কোটিকোটিগুণাধিকঃ .
মন্ত্রস্তেষ্বপ্যনাযাসফলদোঽযং ষডক্ষরঃ .. ৫..
ষডক্ষরোঽযং মন্ত্রঃ স্যাত্সর্বাঘৌঘনিবারণঃ .
মন্ত্ররাজ ইতি প্রোক্তঃ সর্বেষামুত্তমোত্তমঃ .. ৬..
কৃতং দিনে যদ্দুরিতং পক্ষমাসর্তুবর্ষজম্ .
সর্বং দহতি নিঃশেষং তূলরাশিমিবানলঃ .. ৭..
ব্রহ্মহত্যাসহস্রাণি জ্ঞানাজ্ঞানকৃতানি চ .
স্বর্ণস্তেযসুরাপানগুরুতল্পাযুতানি চ .. ৮..
কোটিকোটিসহস্রাণি উপপাতকজান্যপি .
সর্বাণ্যপি প্রণশ্যন্তি রামমন্ত্রানুকীর্তনাত্ .. ৯..
ভূতপ্রেতপিশাচাদ্যাঃ কূষ্মাণ্ডব্রহ্মরাক্ষসাঃ .
দূরাদেব প্রধাবন্তি রামমন্ত্রপ্রভাবতঃ .. ১০..
ঐহলৌকিকমৈশ্বর্যং স্বর্গাদ্যং পারলৌকিকম্ .
কৈবল্যং ভগবত্ত্বং চ মন্ত্রোঽযং সাধযিষ্যতি .. ১১..
গ্রাম্যারণ্যপশুঘ্নত্বং সংচিতং দুরুতং চ যত্ .
মদ্যপানেন যত্পাপং তদপ্যাশু বিনাশযেত্ .. ১২..
অভক্ষ্যভখক্ষণোত্পন্নং মিথ্যাজ্ঞানসমুদ্ভবম্ .
সর্বং বিলীযতে রামমন্ত্রস্যাস্যৈব কীর্তনাত্ .. ১৩..
শ্রোত্রিযস্বর্ণহরণাদ্যচ্চ পাপমুপস্থিতম্ .
রত্নাদেশ্চাপহারেণ তদপ্যাশু বিনাশযেত্ .. ১৪..
ব্রাহ্মণং ক্ষত্রিযং বৈশ্যং শূদ্রং হত্বা চ কিল্বিষম্ .
সংচিনোতি নরো মোহাদ্যদ্যত্তদপি নাশযেত্ .. ১৫..
গত্বাপি মাতরং মোহাদগম্যাশ্চৈব যোষিতঃ .
উপাস্যানেন মন্ত্রেণ রামস্তদপি নাশযেত্ .. ১৬..
মহাপাতকপাপিষ্ঠসঙ্গত্যা সংচিতং চ যত্ .
নাশযেত্তত্কথালাপশযনাসনভোজনৈঃ .. ১৭..
পিতৃমাতৃবধোত্পন্নং বুদ্ধিপূর্বমঘং চ যত্ .
তদনুষ্ঠানমাত্রেণসর্বমেতদ্বিলীযতে .. ১৮..
যত্প্রযাগাদিতীর্থোক্তপ্রাযশ্চিত্তশতৈরপি .
নৈবাপনোদ্যতে পাপং তদপ্যাশু বিনাশযেত্ .. ১৯..
পুণ্যক্ষেত্রেষু সর্বেষু কুরুক্ষেত্রাদিষু স্বযম্ .
বুদ্ধিপূর্বমঘং কৃত্বা তদপ্যাশুবিনাশযেত্ .. ২০..
কৃচ্ছ্রৈস্তপ্তপরাকাদ্যৈর্নানাচান্দ্রাযণৈরপি .
পাপং চ নাপনোদ্যং যত্তদপ্যাশু বিনাশযেত্ .. ২১..
আত্মতুল্যসুবর্ণাদিদানৈর্বহুবিধৈরপি .
কিংচিদপ্যপরিক্ষীণং তদপ্যাশু বিনাশযেত্ .. ২২..
অবস্থাত্রিতযেষ্বেববুদ্ধিপূর্বমঘং চ যত্ .
তন্মন্ত্রস্মরণেনৈব নিঃশেষং প্রবিলীযতে .. ২৩..
অবস্থাত্রিতযেষ্বেবং মূলবন্ধমন্ত্রং চ যত্ .
তত্তন্মন্ত্রোপদেশেন সর্বমেতত্প্রণশ্যতি .. ২৪..
আব্রহ্মবীজদোষাশ্চ নিযমাতিক্রমোদ্ভ্বাঃ .
স্ত্রীণাং চ পুরুষাণাং চ মন্ত্রেণানেন নাশিতাঃ .. ২৫..
যেষু যেষ্বপি দেশেষু রামভদ্র উপাস্যতে .
দুর্ভিক্ষাদিভযং তেষু ন ভবেত্তু কদাচন .. ২৬..
শান্তঃ প্রসন্নবদনো হ্যক্রোধো ভক্তবত্সলঃ .
অনেন সদৃশো মন্ত্রো জগত্স্বপি ন বিদ্যতে .. ২৭..
সম্যগারাধিতো রামঃ প্রসীদত্যেব সত্বরম্ .
দদাত্যাযুষ্যমৈশ্বর্যমন্তে বিষ্ণুপদং চ যত্ .. ২৮..
তদেতদৃচাভ্যুক্তম্ .
ঋচো অক্ষরে পরমে ব্যোমন্যস্মিন্দেবা অধি বিশ্বে নিষেদুঃ .
যস্তন্ন বেদ কিমৃচা করিষ্যতি য ইত্তদ্বিদুস্ত ইমে সমাসতে .
তদ্বিষ্ণোঃ পরমং পদং সদা পশ্যন্তি সূরযঃ .
দিবীব চক্ষুরাততম্ . তদ্বিপ্রাসো বিপন্যবো জাগৃবাংসঃ সমিন্ধতে .
বিষ্ণোর্যত্পরমং পদম্ . ॐ সত্যমিত্যুপনিষত্ .. ৬..
ॐ ভদ্রং কর্ণেভিঃ শ্রুণুযাম দেবা ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
ইতি রামোত্তরতাপিন্যুপনিষত্সমাপ্তা ..
ইতি রামতাপিন্যুপনিষত্সমাপ্তা..