যোগশিখা

.. যোগশিখোপনিষত্ ..

যোগজ্ঞানে যত্পদাপ্তিসাধনত্বেন বিশ্রুতে .
তত্রৈপদং ব্রহ্মতত্ত্বং স্বমাত্রমবশিষ্যতে ..
ॐ সহ নাববতু সহ নৌ ভুনক্তু সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ .. ॐ শান্তিঃ শান্তিঃ শান্তিঃ ..
সর্বে জীবাঃ সুখৈর্দুঃখৈর্মাযাজালেন বেষ্টিতাঃ .
তেষাং মুক্তিঃ কথং দেব কৃপযা বদ শঙ্কর .. ১..
সর্বসিদ্ধিকরং মার্গং মাযাজালনিকৃন্তনম্ .
জন্মমৃত্যুজরাব্যাধিনাশনং সুখদং বদ .. ২..
ইতি হিরণ্যগর্ভঃ পপ্রচ্ছ স হোবাচ মহেশ্বরঃ .
নানামার্গৈস্তু দুষ্প্রাপং কৈবল্যং পরমং পদম্ .. ৩..
সিদ্ধিমার্গেণ লভতে নান্যথা পদ্মসংভব .
পতিতাঃ শাস্ত্রজালেষু প্রজ্ঞযা তেন মোহিতাঃ .. ৪..
স্বাত্মপ্রকাশরূপং তত্কিং শাস্ত্রেণ প্রকাশ্যতে .
নিষ্কলং নির্মলং শান্তং সর্বাতীতং নিরামযম্ .. ৫..
তদেব জীবরূপেণ পুণ্যপাপফলৈর্বৃতম্ .
পরমাত্মপদং নিত্যং তত্কথং জীবতাং গতম্ .. ৬..
তত্ত্বাতীতং মহাদেব প্রসাদাত্কথযেশ্বর .
সর্বভাবপদাতীতং জ্ঞানরূপং নিরঞ্জনম্ .. ৭..
বাযুবত্স্ফুরিতং স্বস্মিংস্তত্রাহংকৃতিরুত্থিতা .
পঞ্চাত্মকমভূত্পিণ্ডং ধাতুবদ্ধং গুণাত্মকম্ .. ৮..
সুখদুঃখৈঃ সমাযুক্তং জীবভাবনযা কুরু .
তেন জীবামিধা প্রোক্তা বিশুদ্ধে পরমাত্মনি .. ৯..
কামক্রোধভযং চাপি মোহলোভমথো রজঃ .
জন্ম মৃত্যুশ্চ কার্পণ্যং শোকস্তন্দ্রা ক্ষুধা তৃষা .. ১০..
তৃষ্ণা লজ্জা ভযং দুঃখং বিষাদো হর্ষ এব চ .
এভির্দোষৈর্বিনির্মুক্তঃ স জীবঃ শিব উচ্যতে .. ১১..
তস্মাদ্দোষবিনাশার্থমুপাযং কথযামি তে .
জ্ঞানং কেচিদ্বদন্ত্যত্র কেবলং তন্ন সিদ্ধযে .. ১২..
যোগহীনং কথং জ্ঞানং মোক্ষদং ভবতীহ ভোঃ .
যোগোঽপি জ্ঞানহীনস্তু ন ক্ষমো মোক্ষকর্মণি .. ১৩..
তস্মাজ্জ্ঞানং চ যোগং চ মুমুক্ষুর্দৃঢমভ্যসেত্ .
জ্ঞানস্বরূপমেবাদৌ জ্ঞেযং জ্ঞানৈকসাধনম্ .. ১৪..
অজ্ঞানং কীদৃশং চেতি প্রবিচার্যং মুমুক্ষুণা .
জ্ঞাতং যেন নিজং রূপং কৈবল্যং পরমং পদম্ .. ১৫..
অসৌ দোষৈর্বিনির্মুক্তঃ কামক্রোধভযাদিভিঃ .
সর্বদোষৈর্বৃতো জীবঃ কথং জ্ঞানেন মুচ্যতে .. ১৬..
স্বাত্মরূপং যথা জ্ঞানং পূর্ণং তদ্ব্যাপকং তথা .
কামক্রোধাদিদোষাণাং স্বরূপান্নাস্তি ভিন্নতা .. ১৭..
পশ্চাত্তস্য বিধিঃ কিংনু নিষেধোঽপি কথং ভবেত্ .
বিবেকী সর্বদা মুক্তঃ সংসারভ্রমবর্জিতঃ .. ১৮..
পরিপূর্ণং স্বরূপং তত্সত্যং কমলসংভব .
সকলং নিষ্কলং চৈব পূর্ণত্বাচ্চ তদেব হি .. ১৯..
কলিনা স্ফূর্তিরূপেণ সংসারভ্রমতাং গতম্ .
নিষ্কলং নির্মলং সাক্ষাত্সকলং গগনোপমম্ .. ২০..
উত্পত্তিস্থিতিসংহারস্ফূর্তিজ্ঞানবিবর্জিতম্ .
এতদ্রূপং সমাযাতঃ স কথং মোহসাগরে .. ২১..
নিমজ্জতি মহাবাহো ত্যক্ত্বা বিদ্যাং পুনঃ পুনঃ .
সুখদুঃখাদিমোহেষু যথা সংসারিণাং স্থিতিঃ .. ২২..
তথা জ্ঞানী যদা তিষ্ঠেদ্বাসনাবাসিতস্তদা .
তযোর্নাস্তি বিশেষোঽত্র সমা সংসারভাবনা .. ২৩..
জ্ঞানং চেদীদৃশং জ্ঞাতমজ্ঞানং কীদৃশং পুনঃ .
জ্ঞাননিষ্ঠো বিরক্তোঽপি ধর্মজ্ঞো বিজিতেন্দ্রিযঃ .. ২৪..
বিনা দেহেন যোগেন ন মোক্ষং লভতে বিধে .
অপক্বাঃ পরিপক্বাশ্চ দেহিনো দ্বিবিধাঃ স্মৃতাঃ .. ২৫..
অপক্বা যোগহীনাস্তু পক্বা যোগেন দেহিনঃ .
সর্বো যোগাগ্নিনা দেহো হ্যজডঃ শোকবর্জিতঃ .. ২৬..
জডস্তু পার্থিবো জ্ঞেযো হ্যপক্বো দুঃখদো ভবেত্ .
ধ্যানস্থোঽসৌ তথাপ্যেবমিন্দ্রিযৈর্বিবশো ভবেত্ .. ২৭..
তানি গাঢং নিযম্যাপি তথাপ্যন্যৈঃ প্রবাধ্যতে .
শীতোষ্ণসুখদুঃখাদ্যৈর্ব্যাধিভির্মানসৈস্তথা .. ২৮..
অন্যৈর্নানাবিধৈর্জীবৈঃ শস্ত্রাগ্নিজলমারুতৈঃ .
শরীরং পীড্যতে তৈস্তৈশ্চিত্তং সংক্ষুভ্যতে ততঃ .. ২৯..
তথা প্রাণবিপত্তৌ তু ক্ষোভমাযাতি মারুতঃ .
ততো দুঃখশতৈর্ব্যাপত্ং চিত্তং ক্ষুব্ধং ভবেন্নৃণাম্ .. ৩০..
দেহাবসানসমযে চিত্তে যদ্যদ্বিভাবযেত্ .
তত্তদেব ভবেজ্জীব ইত্যেবং জন্মকারণম্ .. ৩১..
দেহান্তে কিং ভবেজ্জন্ম তন্ন জানন্তি মানবাঃ .
তস্মাজ্জ্ঞানং চ বৈরাগ্যং জীবস্য কেবলং শ্রমঃ .. ৩২..
পিপীলিকা যথা লগ্না দেহে ধ্যানাদ্বিমুচ্যতে .
অসৌ কিং বৃশ্চিকৈর্দ্রষ্টো দেহান্তে বা কথং সুখী .. ৩৩..
তস্মান্মূঢা ন জানন্তি মিথ্যাতর্কেণ বেষ্টিতাঃ .
অহংকৃতির্যদা যস্য নষ্টা ভবতি তস্য বৈ .. ৩৪..
দেহস্ত্বপি ভবেন্নষ্টো ব্যাধযশ্চাস্য কিং পুনঃ .
জলাগ্নিশস্ত্রখাতাদিবাধা কস্য ভবিষ্যতি .. ৩৫..
যদা যদা পরিক্ষীণা পুষ্টা চাহংকৃতির্ভবেত্ .
তমনেনাস্য নশ্যন্তি প্রবর্তন্তে রুগাদযঃ .. ৩৬..
কারণেন বিনা কার্যং ন কদাচন বিদ্যতে .
অহংকারং বিনা তদ্বদ্দেহে দুঃখং কথং ভবেত্ .. ৩৭..
শরীরেণ জিতাঃ সর্বে শরীরং যোগিভির্জিতম্ .
তত্কথং কুরুতে তেষাং সুখদুঃখাদিকং ফলম্ .. ৩৮..
ইন্দ্রিযাণি মনো বুদ্ধিঃ কামক্রোধাদিকং জিতম্ .
তেনৈব বিজিতং সর্বং নাসৌ কেনাপি বাধ্যতে .. ৩৯..
মহাভূতানি তত্ত্বানি সংহৃতানি ক্রমেণ চ .
সপ্তধাতুমযো দেহো দগ্ধা যোগাগ্নিনা শনৈঃ .. ৪০..
দেবৈরপি ন লক্ষ্যেত যোগিদেহো মহাবলঃ .
ভেদবন্ধবিনির্মুক্তো নানাশক্তিধরঃ পরঃ .. ৪১..
যথাকাশস্তথা দেহ আকাশাদপি নির্মলঃ .
সূক্ষ্মাত্সূক্ষ্মতরো দৃশ্যঃ স্থূলাত্স্থূলো জডাজ্জডঃ .. ৪২..
ইচ্ছারূপো হি যোগীন্দ্রঃ স্বতন্ত্রস্ত্বজরামরঃ .
ক্রীডতে ত্রিষু লোকেষু লীলযা যত্রকুত্রচিত্ .. ৪৩..
অচিন্ত্যশক্তিমান্যোগী নানারূপাণি ধারযেত্ .
সংহরেচ্চ পুনস্তানি স্বেচ্ছযা বিজিতেন্দ্রিযঃ .. ৪৪..
নাসৌ মরণমাপ্নোতি পুনর্যোগবলেন তু .
হঠেন মৃত এবাসৌ মৃতস্য মরণং কুতঃ .. ৪৫..
মরণং যত্র সর্বেষাং তত্রাসৌ পরিজীবতি .
যত্র জীবন্তি মূঢাস্তু তত্রাসৌ মৃত এব বৈ .. ৪৬..
কর্তব্যং নৈব তস্যাস্তি কৃতেনাসৌ ন লিপ্যতে .
জীবন্মুক্তঃ সদা স্বচ্ছঃ সর্বদোষবিবর্জিতঃ .. ৪৭..
বিরক্তা জ্ঞানিনশ্চান্যে দেহেন বিজিতাঃ সদা .
তে কথং যোগিভিস্তুল্যা মাংসপিণ্ডাঃ কুদেহিনঃ .. ৪৮..
দেহান্তে জ্ঞানিভিঃ পুণ্যাত্পাপাচ্চ ফলমাপ্যতে .
ঈদৃশং তু ভবেত্তত্তদ্ভুক্ত্বা জ্ঞানী পুনর্ভবেত্ .. ৪৯..
পশ্চাত্পুণ্যেন লভতে সিদ্ধেন সহ সঙ্গতিম্ .
ততঃ সিদ্ধস্য কৃপযা যোগী ভবতি নান্যথা .. ৫০..
ততো নশ্যতি সংসারো নান্যথা শিবভাষিতম্ .
যোগেন রহিতং জ্ঞানং ন মোক্ষায ভবেদ্বিধে .. ৫১..
জ্ঞানেনৈব বিনা যোগো ন সিদ্ধ্যতি কদাচন .
জন্মান্তরৈশ্চ বহুভির্যোগো জ্ঞানেন লভ্যতে .. ৫২..
জ্ঞানং তু জন্মনৈকেন যোগাদেব প্রজাযতে .
তস্মাযোগাত্পরতরো নাস্তি মার্গস্তু মোক্ষদঃ .. ৫৩..
প্রবিচার্য চিরং জ্ঞানং মুক্তোঽহমিতি মন্যতে .
কিমসৌ মননাদেব মুক্তো ভবতি তত্ক্ষণাত্ .. ৫৪..
পশ্চাজ্জন্মশন্তান্তরৈর্যোগাদেব বিমুচ্যতে .
ন তথা ভবতো যোগাজ্জন্মমৃত্যূ পুনঃ পুনঃ .. ৫৫..
প্রাণাপানসমাযোগাচ্চন্দ্রসূর্যৈকতা ভবেত্ .
সপ্তধাতুমযং দেহমগ্নিনা রঞ্জযেদ্ধ্রুবম্ .. ৫৬..
ব্যাধযস্তস্য নশ্যন্তি চ্ছেদখাতাদিকাস্তথা ,
তদাসৌ পরমাকাশরূপো দেহ্যবতিষ্ঠতি .. ৫৭..
কিং পুনর্বহুনোক্তেন মরণং নাস্তি তস্য বৈ .
দেহীব দৃশ্যতে লোকে দগ্ধকর্পূরবত্স্বযম্ .. ৫৮..
চিত্তং প্রাণেন সংবদ্ধং সর্বজীবেষু সংস্থিতম্ .
রজ্জ্বা যদ্বত্সুসংবদ্ধঃ পক্ষী তদ্বদিদং মনঃ .. ৫৯..
নানাবিধৈর্বিচারৈস্তু ন বাধ্যং জাযতে মনঃ .
তস্মাত্তস্য জযোপাযঃ প্রাণ এব হি নান্যথা .. ৬০..
তর্কৈর্জল্পৈঃ শাস্ত্রজালৈর্যুক্তিভির্মন্ত্রভেষজৈঃ .
ন বশো জাযতে প্রাণঃ সিদ্ধোপাযং বিনা বিধে .. ৬১..
উপাযং তমবিজ্ঞায যোগমার্গে প্রবর্ততে .
খণ্ডজ্ঞানেন সহসা জাযতে ক্লেশবত্তরঃ .. ৬২..
যো জিত্বা পবনং মোহাদ্যোগমিচ্ছতি যোগিনাম্ .
সোঽপক্বং কুম্ভমারুহ্য সাগরং তর্তুমিচ্ছতি .. ৬৩..
যস্য প্রাণো বিলীনোঽন্তঃ সাধকে জীবিতে সতি .
পিণ্ডো ন পতিতস্তস্য চিত্তং দোষৈঃ প্রবাধতে .. ৬৪..
শুদ্ধে চেতসি তস্যৈব স্বাত্মজ্ঞানং প্রকাশতে .
তস্মাজ্জ্ঞানং ভবেদ্যোগাজ্জন্মনৈকেন পদ্মজ .. ৬৫..
তস্মাদ্যোগং তমেবাদৌ সাধকো নিত্যমভ্যসেত্ .
মুমুক্ষুভিঃ প্রাণজযঃ কর্তব্যো মোক্ষহেতবে .. ৬৬..
যোগাত্পরতরং পুণ্যং যোগাত্পরতরং শিবম্ .
যোগাত্পরতরং সূক্ষ্মং যোগাত্পরতরং নহি .. ৬৭..
যোঽপানপ্রাণযোরৈক্যং স্বরজোরেতসোস্তথা .
সূর্যাচন্দ্রমসোর্যোগো জীবাত্মপরমাত্মনোঃ .. ৬৮..
এবং তু দ্বন্দ্বজালস্য  সংযোগো যোগ উচ্যতে .
অথ যোগশিখাং বক্ষ্যে সর্বজ্ঞানেষু চোত্তমাম্ .. ৬৯..
যদানুধ্যাযতে মন্ত্রং গাত্রকম্পোঽথ জাযতে .
আসনং পদ্মকং বদ্ধ্বা যচ্চান্যদপি রোচতে .. ৭০..
নাসাগ্রে দৃষ্টিমারোপ্য হস্তপাদৌ চ সংযতৌ .
মনঃ সর্বত্র সংগৃহ্য ॐকারং তত্র চিন্তযেত্ .. ৭১..
ধ্যাযতে সততং প্রাজ্ঞো হৃত্কৃত্বা পরমেশ্বরম্ .
একস্তম্ভে নবদ্বারে ত্রিস্থূণে পঞ্চদৈবতে .. ৭২..
ঈদৃশে তু শরীরে বা মতিমান্নোপলক্ষযেত্ .
আদিত্যমণ্ডলাকারং রশ্মিজ্বালাসমাকুলম্ .. ৭৩..
তস্য মধ্যগতং বহ্নিং প্রজ্বলেদ্দীপবর্তিবত্ .
দীপশিখা তু যা মাত্রা সা মাত্রা পরমেশ্বরে .. ৭৪..
ভিন্দন্তি যোগিনঃ সূর্যং যোগাভ্যাসেন বৈ পুনঃ .
দ্বিতীযং সুষুম্নাদ্বারং পরিশুভ্রং সমর্পিতম্ .. ৭৫..
কপালসংপুটং পীত্বা ততঃ পশ্যতি তত্পদম্ .
অথ ন ধ্যাযতে জন্তুরালস্যাচ্চ  প্রমাদতঃ .. ৭৬..
যদি ত্রিকালমাগচ্ছেত্স গচ্ছেত্পুণ্যসংপদম্ .
পুণ্যমেতত্সমাসাদ্য সংক্ষিপ্য কথিতং মযা .. ৭৭..
লব্ধযোগোঽথ বুদ্ধ্যেত প্রসন্নং পরমেশ্বরম্ .
জন্মান্তরসহস্রেষু যদা ক্ষীণং তু কিল্বিষম্ .. ৭৮..
তদা পশ্যতি যোগেন সংসারোচ্ছেদনং মহত্ .
অধুনা সংপ্রবক্ষ্যামি যোগাভ্যাসস্য লক্ষণম্ .. ৭৯..
মরুজ্জযো যস্য সিদ্ধঃ সেবযেত্তং গুরুং সদা .
গুরুবস্ত্রপ্রসাদেন কুর্যাত্প্রাণজযং বুধঃ .. ৮০..
বিতস্তিপ্রমিতং দৈর্ঘ্যং চতুরঙ্গুলবিস্তৃতম্ .
মৃদুলং ধবলং প্রোক্তং বেষ্টনাম্বরলক্ষণম্ .. ৮১..
নিরুধ্য মারুতং গাঢং শক্তিচালনযুক্তিতঃ .
অষ্টধা কুণ্ডলীভূতামৃজ্বীং কুর্যাত্তু কুণ্ডলীম্ .. ৮২..
পাযোরাকুঞ্চনং কুর্যাত্কুণ্ডলীং চালযেত্তদা .
মৃত্যুচক্রগতস্যাপি তস্য মৃত্যুভযং কুতঃ .. ৮৩..
এতদেব পরং গুহ্যং কথিতং তু মযা তব .
বজ্রাসনগতো নিত্যমূর্ধ্বাকুঞ্চনমভ্যসেত্ .. ৮৪..
বাযুনা জ্বলিতো বহ্নিঃ কুণ্ডলীমনিশং দহেত্ .
সন্তপ্তা সাগ্নিনা জীবশক্তিস্ত্রৈলোক্যমোহিনী .. ৮৫..
প্রবিশেচ্চন্দ্রতুণ্ডে তু সুষুম্নাবদনান্তরে .
বাযুনা বহ্নিনা সার্ধং ব্রহ্মগ্রন্থিং ভিনত্তি সা .. ৮৬..
বিষ্ণুগ্রন্থিং ততো ভিত্ত্বা রুদ্রগ্রন্থৌ চ তিষ্ঠতি .
ততস্তু কুম্ভকৈর্গাঢং পূরযিত্বা পুনঃপুনঃ .. ৮৭..
অথাভ্যসেত্সূর্যভেদমুজ্জাযীং চাপি শীতলীম্ .
ভস্ত্রাং চ সহিতো নাম স্যাচ্চতুষ্টযকুম্ভকঃ .. ৮৮..
বন্ধত্রযেণ সংযুক্তঃ কেবলপ্রাপ্তিকারকঃ .
অথাস্য লক্ষণং সম্যক্কথযামি সমাসতঃ .. ৮৯..
একাকিনা সমুপগম্য বিবিক্তদেশং
     প্রাণাদিরূপমমৃতং পরমার্থতত্ত্বম্ .
লঘ্বাশিনা ধৃতিমতা পরিভাবিতব্যং
     সংসাররোগহরমৌষধমদ্বিতীযম্ .. ৯০..
সূর্যনাড্যা সমাকৃষ্য বাযুমভ্যাসযোগিনা .
বিধিবত্কুম্ভকং কৃত্বা রেচযেচ্ছ্রীতরশ্মিনা .. ৯১..
উদরে বহুরোগঘ্নং ক্রিমিদোষং নিহন্তি চ .
মুহুর্মুহুরিদং কার্যং সূর্যভেদমুদাহৃতম্ .. ৯২..
নাডীভ্যাং বাযুমাকৃষ্য কুণ্ডল্যাঃ পার্শ্বযোঃ ক্ষিপেত্ .
ধারযেদুদরে পশ্চাদ্রেচযেদিডযা সুধীঃ .. ৯৩..
কণ্ঠে কফাদি দোষঘ্নং শরীরাগ্নিবিবর্ধনম্ .
নাডীজলাপহং ধাতুগতদোষবিনাশনম্ .. ৯৪..
গচ্ছতস্তিষ্ঠতঃ কার্যমুজ্জাযাখ্যং তু কুম্ভকম্ .
মুখেন বাযুং সংগৃহ্য ঘ্রাণরন্ধ্রেণ রেচযেত্ .. ৯৫..
শীতলীকরণং চেদং হন্তি পিত্তং ক্ষুধাং তৃষম্ .
স্তনযোরথ ভস্ত্রেব লোহকারস্য বেগতঃ .. ৯৬..
রেচ্যেত্পূরযেদ্বাযুমাশ্রমং দেহগং ধিযা .
যথা শ্রমো ভবেদ্দেহে তথা সূর্যেণ পূরযেত্ .. ৯৭..
কণ্ঠসংকোচনং কৃত্বা পুনশ্চন্দ্রেণ রেচযেত্ .
বাতপিত্তশ্লেষ্মহরং শরীরাগ্নিবিবর্ধনম্ .. ৯৮..
কুণ্ডলীবোধকং বক্ত্রদোষঘ্নং শুভদং সুখম্ .
ব্রহ্মনাডীমুখান্তস্থকফাদ্যর্গলনাশনম্ .. ৯৯..
সম্যগ্বন্ধুসমুদ্ভূতং গ্রন্থিত্রযবিভেদকম্ .
বিশেষেণৈব কর্তব্যং ভস্ত্রাখ্যং কুম্ভকং ত্বিদম্ .. ১০০..
বন্ধত্রযমথেদানীং প্রবক্ষ্যামি যথাক্রমম্ .
নিত্যং কৃতেন তেনাসৌ বাযোর্জযমবাপ্নুযাত্ .. ১০১..
চতুর্ণামপি ভেদানাং কুম্ভকে সমুপস্থিতে .
বন্ধত্রযমিদং কার্যং বক্ষ্যমাণং মযহি তত্ .. ১০২..
প্রথমো মূলবন্ধস্তু দ্বিতীযোড্ডীযনাভিধঃ .
জালন্ধারস্তৃতীযস্তু লক্ষণং কথযাম্যহম্ .. ১০৩..
গুদং পার্ষ্ণ্যা তু সংপীড্য পাযুমাকুঞ্চলেদ্বলাত্ .
বারংবারং যথা চোর্ধ্বং সমাযাতি সমীরণঃ .. ১০৪..
প্রাণাপানৌ নাদবিন্দূ মূলবন্ধেন চৈকতাম্ .
গত্বা যোগস্য সংসিদ্ধিং যচ্ছতো নাত্র সংশযঃ .. ১০৫..
কুম্ভকান্তে রেচকাদৌ কর্তব্যস্তূড্ডিযানকঃ .
বন্ধো যেন সুষুম্নাযাং প্রাণস্তূড্ডীযতে যতঃ .. ১০৬
তস্মাদুড্ডীযনাখ্যোঽযং যোগিভিঃ সমুদাহৃতঃ .
উড্ডিযানং তু সহজং গুরুণা কথিতং সদা .. ১০৭..
অভ্যসেত্তদতন্দ্রস্তু বৃদ্ধোঽপি তরুণো ভবেত্ .
নাভেরূর্ধ্বমধশ্চাপি ত্রাণং কুর্যাত্প্রযত্নতঃ .. ১০৮..
ষাণ্মাসমভ্যসেন্মৃত্যুং জযত্যেব ন সংশযঃ .
পূরকান্তে তু কর্তব্যো বন্ধো জালন্ধরাভিধঃ .. ১০৯..
কণ্ঠসংকোচরূপোঽসৌ বাযুর্মার্গনিরোধকঃ .
কণ্ঠমাকুঞ্চ্য হৃদযে স্থাপযেদ্দৃঢমিচ্ছযা .. ১১০..
বন্ধো জালন্ধরাখ্যোঽযমমৃতাপ্যাযকারকঃ .
অধস্তাত্কুঞ্চনেনাশু কণ্ঠসংকোচনে কৃতে .. ১১১..
মধ্যে পশ্চিমতানেন স্যাত্প্রাণো ব্রহ্মনাডিগঃ .
বজ্রাসনস্থিতো যোগী চালযিত্বা তু কুণ্ডলীম্ .. ১১২..
কুর্যাদনন্তরং ভস্ত্রীং কুণ্ডলীমাশু বোধযেত্ .
ভিদ্যন্তে গ্রন্থযো বংশে তপ্তলোহশলাকযা .. ১১৩..
তথৈব পৃষ্ঠবংশঃ স্যাদ্গ্রন্থিভেদস্তু বাযুনা .
পিপীলিকাযাং লগ্নাযাং কণ্ডূস্তত্র প্রবর্ততে .. ১১৪..
সুষুম্নাযাং তথাভ্যাসাত্সততং বাযুনা ভবেত্ .
রুদ্রগ্রন্থিং ততো ভিত্ত্বা ততো যাতি শিবাত্মকম্ .. ১১৫..
চন্দ্রসূর্যৌ সমৌ কৃত্বা তযোর্যোগঃ প্রবর্ততে .
গুণত্রযমতীতং স্যাদ্গ্রন্থিত্রযবিভেদনাত্ .. ১১৬..
শিবশক্তিসমাযোগে জাযতে পরমা স্থিতিঃ .
যথা করী করেণৈব পানীযং প্রপিবেত্সদা .. ১১৭..
সুষুম্নাবজ্রনালেন পবমানং গ্রসেত্তথা .
বজ্রদণ্ডসমুদ্ভূতা মণযশ্চৈকবিংশতিঃ .. ১১৮..
সুষুম্নাযাং স্থিতঃ সর্বে সূত্রে মণিগণা ইব .
মোক্ষমার্গে প্রতিষ্ঠানাত্সুষুম্না বিশ্বরূপিণী .. ১১৯..
যথৈব নিশ্চিতঃ কালশ্চন্দ্রসূর্যনিবন্ধনাত্ .
আপূর্য কুম্ভিতো বাযুর্বহির্নো যাতি সাধকে .. ১২০..
পুনঃপুনস্তদ্বদেব পশ্চিমদ্বারলক্ষণম্ .
পূরিতস্তু স তদ্দ্বারৈরীষত্কুম্ভকতাং গতঃ .. ১২১..
প্রবিশেত্সর্বগাত্রেষু বাযুঃ পশ্চিমমার্গতঃ .
রেচিতঃ ক্ষীণতাং যাতি পূরিতঃ পোষযেত্ততঃ .. ১২২..
যত্রৈব জাতং সকলেবরং মন-
     স্তত্রৈব লীনং কুরুতে স যোগাত্ .
স এব মুক্তো নিরহংকৃতিঃ সুখী
     মূঢা ন জানন্তি হি পিণ্ডপাতিনঃ .. ১২৩..
চিত্তং বিনিষ্টং যদি ভাসিতং স্যা-
     ত্তত্র প্রতীতো মরুতোঽপি নাশঃ .
ন চেদ্যদি স্যান্ন তু তস্য শাস্ত্রং
     নাত্মপ্রতীতির্ন গুরুর্ন মোক্ষঃ .. ১২৪..
জলূকা রুধিরং যদ্বদ্বলাদাকর্ষতি স্বযম্ .
ব্রহ্মনাডী তথা ধাতূন্সন্ততাভ্যাসযোগতঃ .. ১২৫..
অনেনাভ্যাসযোগেন নিত্যমাসনবন্ধতঃ .
চিত্তং বিলীনতামেতি বিন্দুর্নো যাত্যধস্তথা .. ১২৬..
রেচকং পূরকং মুক্ত্বা বাযুনা স্থীযতে স্থিরম্ .
নানা নাদাঃ প্রবর্তন্তে সংস্রবেচ্চন্দ্রমণ্ডলম্ .. ১২৭..
নশ্যন্তি ক্ষুত্পিপাসাদ্যাঃ সর্বদোষাস্ততস্তদা .
স্বরূপে সচ্চিদানন্দে স্থিতিমাপ্নোতি কেবলম্ .. ১২৮..
কথিতং তু তব প্রীত্যা হ্যেতদভ্যাসলক্ষণম্ .
মন্ত্রো লযো হঠো রাজযোগোঽন্তর্ভূমিকাঃ ক্রমাত্ .. ১২৯..
এক এব চতুর্ধাঽযং মহাযোগোঽভিধীযতে .
হকারেণ বহির্যাতি সকারেণ বিশেত্পুনঃ .. ১৩০..
হংসহংসেতি মন্ত্রোঽযং সর্বৈর্জীবশ্চ জপ্যতে .
গুরুবাক্যাত্সুষুম্নাযাং বিপরীতো ভবেজ্জপঃ .. ১৩১..
সোঽহংসোঽহমিতি প্রোক্তো মন্ত্রযোগঃ স উচ্যতে .
প্রতীতির্মন্ত্রযোগাচ্চ জাযতে পশ্চিমে পথি .. ১৩২..
হকারেণ তু সূর্যঃ স্যাত্সকারেণেন্দুরুচ্যতে .
সূর্যাচন্দ্রমসোরৈক্যং হঠ ইত্যভিধীযতে .. ১৩৩..
হঠেন গ্রস্যতে জাড্যং সর্বদোষসমুদ্ভবম্ .
ক্ষেত্রজ্ঞঃ পরমাত্মা চ তযোরৈক্যং যদা ভবেত্ .. ১৩৪..
তদৈক্যে সাধিতে ব্রহ্মংশ্চিত্তং যাতি বিলীনতাম্ .
পবনঃ স্থৈর্যমাযাতি লযযোগোদযে সতি .. ১৩৫..
লযাত্সংপ্রাপ্যতে সৌখ্যং স্বাত্মানদং পরং পদম্ .
যোনিমধ্যে মহাক্ষেত্রে জপাবন্ধূকসংনিভম্ .. ১৩৬..
রজো বসতি জন্তূনাং দেবীতত্ত্বং সমাবৃতম্ .
রজসো রেতসো যোগাদ্রাজযোগ ইতি স্মৃতঃ .. ১৩৭..
অণিমাদিপদং প্রাপ্য রাজতে রাজযোগতঃ .
প্রাণাপানসমাযোগো জ্ঞেযং যোগচতুষ্টযম্ .. ১৩৮..
সংক্ষেপাত্কথিতং ব্রহ্মন্নান্যথা শিবভাষিতম্ .
ক্রমেণ প্রাপ্যতে প্রাপ্যমভ্যাসাদেব নান্যথা .. ১৩৯..
একেনৈব শরীরেণ যোগাভ্যাসাচ্ছনৈঃশনৈঃ .
চিরাত্সংপ্রাপ্যতে মুক্তির্মর্কটক্রম এব সঃ .. ১৪০..
যোগসিদ্ধিং বিনা দেহঃ প্রমাদাদ্যদি নশ্যতি .
পূর্ববাসনযা যুক্তঃ শরীরং চান্যদাপ্নুযাত্ .. ১৪১..
ততঃ পুণ্যবশাত্সিদ্ধো গুরুণা সহ সংগতঃ .
পশ্চিমদ্বারমার্গেণ জাযতে ত্বরিতং ফলম্ .. ১৪২..
পূর্বজন্মকৃতাভ্যাসাত্সত্ত্বরং ফলমশ্নুতে .
এতদেব হি বিজ্ঞেযং তত্কাকমতমুচ্যতে .. ১৪৩..
নাস্তি কাকমতাদন্যদভ্যাসাখ্যমতঃ পরম্ .
তেনৈব প্রাপ্যতে মুক্তির্নান্যথা শিবভাষিতম্ .. ১৪৪..
হঠযোগক্রমাত্কাষ্ঠাসহজীবলযাদিকম্ .
নাকৃতং মোক্ষমার্গং স্যাত্প্রসিদ্ধাং পশ্চিমং বিনা .. ১৪৫..
আদৌ রোগাঃ প্রণশ্যন্তি পশ্চাজ্জাড্যং শরীরজম্ .
ততঃ সমরসো ভূত্বা চন্দ্রো বর্ষত্যনারতম্ .. ১৪৬..
ধাতূংশ্চ সংগ্রহেদ্বহ্নিঃ পবনেন সমন্ততঃ .
নানা নাদাঃ প্রবর্তন্তে মার্দবং স্যাত্কলেবরে .. ১৪৭..
জিত্বা বৃষ্ট্যাদিকং জাড্যং খেচরঃ স ভবেন্নরঃ .
সর্বজ্ঞোসৌ ভবেত্কামরূপঃ পবনবেগবান্ .. ১৪৮..
ক্রীডতে ত্রিষু লিকেষু জাযন্তে সিদ্ধযোঽখিলাঃ .
কর্পূরে লীযমানে কিং কাঠিন্যং তত্র বিদ্যতে .. ১৪৯..
অহংকারক্ষযে তদ্বদ্দেহে কঠিনা কুতঃ .
সর্বকর্তা চ যোগীন্দ্রঃ স্বতন্ত্রোঽনন্তরূপবান্ .. ১৫০..
জীবন্মুক্তো মহাযোগী জাযতে নাত্র সংশযঃ .
দ্বিবিধাঃ সিদ্ধযো লোকে কল্পিতাঽকল্পিতাস্তথা .. ১৫১..
রসৌষধিক্রিযাজালমন্ত্রাভ্যাসাধিসাধনাত্ .
সিদ্ধ্যন্তি সিদ্ধযো যাস্তু কল্পিতাস্তাঃ প্রকীর্তিতাঃ .. ১৫২..
অনিত্যা অল্পবীর্যাস্তাঃ সিদ্ধযঃ সাধনোদ্ভবাঃ .
সাধনেন বিনাপ্যেবং জাযন্তে স্বত এব হি .. ১৫৩..
স্বাত্মযোগৈকনিষ্ঠেষু স্বাতন্ত্র্যাদ্দীশ্বরপ্রিযাঃ .
প্রভূতাঃ সিদ্ধযো যাস্তাঃ কল্পনারহিতাঃ স্মৃতাঃ .. ১৫৪.
সিদ্ধানিত্যা মহাবীর্যা ইচ্ছারূপাঃ স্বযোগজাঃ .
চিরকালাত্প্রজাযন্তে বাসনারহিতেষু চ .. ১৫৫..
তাস্তু গোপ্যা মহাযোগাত্পরমাত্মপদেঽব্যযে .
বিনা কার্যং সদা গুপ্তং যোগসিদ্ধস্য লক্ষণম্ .. ১৫৬..
যথাকাশং সমুদ্দিশ্য গচ্ছদ্ভিঃ পথিকৈঃ পথি .
নানা তীর্থানি দৃশ্যন্তে নানামার্গাস্তু সিদ্ধযঃ .. ১৫৭..
স্বযমেব প্রজাযন্তে লাভালাভবিবর্জিতে .
যোগমার্গে তথৈবেদং সিদ্ধিজালং প্রবর্ততে .. ১৫৮..
পরীক্ষকৈঃ স্বর্ণকারৈর্হেম সংপ্রোচ্যতে যথা .
সিধিভির্লক্ষযেত্সিদ্ধং জীবন্মুক্তং তথৈব চ .. ১৫৯..
অলৌকিকগুণস্তস্য কদাচিদ্দৃশ্যতে ধ্রুবম্ .
সিদ্ধিভিঃ পরিহীনং তু নরং বদ্ধং তু লক্ষযেত্ .. ১৬০..
অজরামরপিণ্ডো যো জীবন্মুক্তঃ স এব হি .
পশুকুক্কুটকীটাদ্যা মৃতিং সংপ্রাপ্নুবন্তি বৈ .. ১৬১..
তেষাং কিং পিণ্ডপাতেন মুক্তির্ভবতি পদ্মজ .
ন বহিঃ প্রাণ আযাতি পিণ্ডস্য পতনং কুতঃ .. ১৬২..
পিণ্ডপাতেন যা মুক্তিঃ সা মুক্তির্ন তু হন্যতে .
দেহে ব্রহ্মত্বমাযাতে জলানাং সৈন্ধবং যথা .. ১৬৩..
অনন্যতাং যদা যাতি তদা মুক্তঃ স উচ্যতে .
বিমতানি শরীরাণি ইন্দ্রিযাণি তথৈব চ .. ১৬৪..
ব্রহ্ম দেহত্বমাপন্নং বারি বুদ্বুদতামিব .
দশদ্বার পুরং দেহং দশনাডীমহাপথম্ .. ১৬৫..
দশভির্বাযুভির্ব্যাপ্তং দশেন্দ্রিযপরিচ্ছদম্ .
ষডাধারাপবরকং ষডন্বযমহাবনম্ .. ১৬৬..
চতুঃপীঠসমাকীর্ণং চতুরাম্নাযদীপকম্ .
বিন্দুনাদমহালিঙ্গং শিবশক্তিনিকেতনম্ .. ১৬৭..
দেহং শিবালযং প্রোক্তং সিদ্ধিদং সর্বদেহিনাম্ .
গুদমেঢ্রান্তরালস্থং মূলাধারং ত্রিকোণকম্ .. ১৬৮..
শিবস্য জীবরূপস্য স্থানং তদ্ধি প্রচক্ষতে .
যত্র কুণ্ডলিনীনাম পরা শক্তিঃ প্রতিষ্ঠিতা .. ১৬৯..
যস্মাদুত্পদ্যতে বাযুর্যস্মাদ্বহ্নিঃ প্রবর্ততে .
যস্মাদুত্পদ্যতে বিন্দুর্যস্মান্নাদঃ প্রবর্ততে .. ১৭০..
যস্মাদুত্পদ্যতে হংসো যস্মাদুত্পদ্যতে মনঃ .
তদেতত্কামরূপাখ্যং পীঠং কামফলপ্রদম্ .. ১৭১..
স্বাধিষ্ঠানাহ্বযং চক্রং লিঙ্গমূলে ষডস্রকে .
নাভিদেশে স্থিতং চক্রং দশারং মণিপূরকম্ .. ১৭২..
দ্বাদশারং মহাচক্রং হৃদযে চাপ্যনাহতম্ .
তদেতত্পূর্ণগির্যাখ্যং পীঠং কমলসংভব .. ১৭৩..
কণ্ঠকূপে বিশুদ্ধ্যাখ্যং যচ্চক্রং ষোডশাস্রকম্ .
পীঠং জালন্ধর নাম তিষ্ঠত্যত্র সুরেশ্বর .. ১৭৪..
আজ্ঞা নাম ভ্রুবোর্মধ্যে দ্বিদলং চক্রমুত্তমম্ .
উড্যানাখ্যং মহাপীঠমুপরিষ্টাত্প্রতিষ্ঠিতম্ .. ১৭৫..
চতুরস্রং ধরণ্যাদৌ ব্রহ্মা তত্রাধিদেবতা .
অর্ধচন্দ্রাকৃতি চলং বিষ্ণুস্তস্যাধিদেবতা .. ১৭৬..
ত্রিকোণমণ্ডলং বহ্নী রুদ্রস্তস্যাধিদেবতা .
বাযোর্বিম্বং তু ষট্কোণমীশ্বরোঽস্যাধিদেবতা .. ১৭৭..
আকাশমণ্ডলং বৃত্তং দেবতাস্য সদাশিবঃ .
নাদরূপং ভ্রুবোর্মধ্যে মনসো মণ্ডলং বিদুঃ .. ১৭৮..
ইতি প্রথমোঽধ্যাযঃ .. ১..
পুনর্যোগস্য মাহাত্ম্যং শ্রোতুমিচ্ছামি শঙ্কর .
যস্য বিজ্ঞানমাত্রেণ খেচরীসমতাং ব্রজেত্ .. ১..
শৃণু ব্রহ্মন্প্রবক্ষ্যামি গোপনীযং প্রযত্নতঃ .
দ্বাদশাব্দং তু শুশ্রূষাং যঃ কুর্যাদপ্রমাদতঃ .. ২..
তস্মৈ বাচ্যং যথাতথ্যং দান্তায ব্রহ্মচারিণে .
পাণ্ডিত্যাদর্থলোভাদ্বা প্রমাদাদ্বা প্রযচ্ছতি .. ৩..
তেনাধীতং শ্রুতং তেন তেন সর্বমনুষ্ঠিতম্ .
মূলমন্ত্রং বিজানাতি যো বিদ্বান্গুরুদর্শিতম্ .. ৪..
শিবশক্তিমযং মন্ত্রং মূলাধারাত্সমুত্থিতম্ .
তস্য মন্ত্রস্য বৈ ব্রহ্মঞ্ছ্রোতা বক্তা চ দুর্লভঃ .. ৫..
এতত্পীঠমিতি প্রোক্তং নাদলিঙ্গং চিদাত্মকম্ .
তস্য বিজ্ঞানমাত্রেণ জীবন্মুক্তো ভবেজ্জনঃ .. ৬..
অণিমাদিকমৈশ্বর্যমচিরাদেব জাযতে .
মননাত্প্রাণনাচ্চৈব মদ্রূপস্যাববোধনাত্ .. ৭..
মন্ত্রমিত্যুচ্যতে ব্রহ্মন্মদধিষ্ঠানতোঽপি বা .
মূলত্বাত্সর্বমন্ত্রাণাং মূলাধারাত্সমুদ্ভবাত্ .. ৮..
মূলস্বরূপলিঙ্গত্বান্মূলমন্ত্র ইতি স্মৃতঃ .
সূক্ষ্মত্বাত্কারণাত্বাচ্চ লযনাদ্গমনাদপি .. ৯..
লক্ষণাত্পরমেশস্য লিঙ্গমিত্যভিধীযতে .
সংনিধানাত্সমস্তেষু জন্তুষ্বপি চ সন্ততম্ .. ১০..
সূচকত্বাচ্চ রূপস্য সূত্রমিত্যভিধীযতে .
মহামাযা মহালক্ষ্মীর্মহাদেবী সরস্বতী .. ১১..
আধারশক্তিরব্যক্তা যযা বিশ্বং প্রবর্ততে .
সূক্ষ্মাভা বিন্দুরূপেণ পীঠরূপেণ বর্ততে .. ১২..
বিন্দুপীঠং বিনির্ভিদ্য নাদলিঙ্গমুপস্থিতম্ .
প্রাণেনোচ্চার্যতে ব্রহ্মন্ষণ্মুখীকরণেন চ .. ১৩..
গুরূপদেশমার্গেণ সহসৈব প্রকাশতে .
স্থূলং সূক্ষ্মং পরং চেতি ত্রিবিধং ব্রহ্মণো বপুঃ .. ১৪..
পঞ্চব্রহ্মমযং রূপং স্থূলং বৈরাজমুচ্যতে .
হিরণ্যগর্ভং সূক্ষ্মং তু নাদং বীজত্রযাত্মকম্ .. ১৫..
পরং ব্রহ্ম পরং সত্যং সচ্চিদানন্দলক্ষণম্ .
অপ্রমেযমনির্দেশ্যমবাঙ্মনসগোচরম্ .. ১৬..
শুদ্ধং সূক্ষ্মং নিরাকারং নির্বিকারং নিরঞ্জনম্ .
অনন্তমপরিচ্ছেদ্যমনূপমমনামযম্ .. ১৭..
আত্মমন্ত্রসদাভ্যাসাত্পরতত্ত্বং প্রকাশতে .
তদভিব্যক্তচিহ্নানি সিদ্ধিদ্বারাণি মে শৃণু .. ১৮..
দীপজ্বালেন্দুখদ্যোতবিদ্যুন্নক্ষত্রভাস্বরাঃ .
দৃশ্যন্তে সূক্ষ্মরূপেণ সদা যুক্তস্য যোগিনঃ .. ১৯..
অণিমাদিকমৈশ্বর্যমচিরাত্তস্য জাযতে .
নাস্তি নাদাত্পরো মন্ত্রো ন দেবঃ স্বাত্মনঃ পরঃ .. ২০..
নানুসন্ধেঃ পরা পূজা ন হি তৃপ্তেঃ পরং মুখম্ .
গোপনীযং প্রযত্নেন সর্বদা সিদ্ধিমিচ্ছতা .
মদ্ভক্ত এতদ্বিজ্ঞায কৃত কৃত্যঃ সুখী ভবেত্ .. ২১..
যস্য দেবে পরা ভক্তির্যথা দেবে তথা গুরৌ .
তস্যৈতে কথিতা হ্যর্থাঃ প্রকাশন্তে মহাত্মনঃ .. ২২.. ইতি ..
ইতি দ্বিতীযোঽধ্যাযঃ .. ২..
যন্নমস্যং চিদাখ্যাতং যত্সিদ্ধীনাং চ কারণম্ .
যেন বিজ্ঞাতমাত্রেণ জন্মবন্ধাত্প্রমুচ্যতে .. ১..
অক্ষরং পরমো নাদঃ শব্দব্রহ্মেতি কথ্যতে .
মূলাধারগতা শক্তিঃ স্বাধারা বিন্দুরূপিণী .. ২..
তস্যামুত্পদ্যতে নাদঃ সূক্ষ্মবীজাদিবাঙ্কুরঃ .
তাং পশ্যন্তীং বিদুর্বিশ্বং যযা পশ্যন্তি যোগিনঃ .. ৩..
হৃদযে ব্যজ্যতে ঘোষো গর্জত্পর্জন্যসংনিভঃ .
তত্র স্থিতা সুরেশান মধ্যমেত্যভিধীযতে .. ৪..
প্রাণেন চ স্বরাখ্যেন প্রথিতা বৈখরী পুনঃ .
শাখাপল্লবরূপেণ তাল্বাদিস্থানঘট্টনাত্ .. ৫..
অকারাদিক্ষকারান্তান্যক্ষরাণি সমীরযেত্ .
অক্ষরেভ্যঃ পদানি স্যুঃ পদেভ্যো বাক্যসংভবঃ .. ৬..
সর্বে বাক্যাত্মকা মন্ত্রা বেদশাস্ত্রাণি কৃত্স্নশঃ .
পুরাণানি চ কাব্যানি ভাষাশ্চ বিবিধা অপি .. ৭..
সপ্তস্বরাশ্চ গাথাশ্চ সর্বে নাদসমুদ্ভবাঃ .
এষা সরস্বতী দেবী সর্বভূতগুহাশ্রযা .. ৮..
বাযুনা বহ্নিযুক্তেন প্রের্যমাণা শনৈঃ শনৈঃ .
তদ্বিবর্তপদৈর্বাক্যৈরিত্যেবং বর্ততে সদা .. ৯..
য ইমাং বৈখরী শক্তিং যোগী স্বাত্মনি পশ্যতি .
স বাক্সিদ্ধিমবাপ্নোতি সরস্বত্যাঃ প্রসাদতঃ .. ১০..
বেদশাস্ত্রপুরাণানাং স্বযং কর্তা ভবিষ্যতি .
যত্র বিন্দুশ্চ নাদশ্চ সোমসূর্যাগ্নিবাযবঃ .. ১১..
ইন্দ্রিযাণি চ সর্বাণি লযং গচ্ছন্তি সুব্রত .
বাযবো যত্র লীযন্তে মনো যত্র বিলীযতে .. ১২..
যং লব্ধ্বা চাপরং লাভং মন্যতে নাধিকং ততঃ .
যস্মিংস্থিতো ন দুঃখেন গুরুণাপি বিচাল্যতে .. ১৩..
যত্রোপরমতে চিত্তং নিরুদ্ধং যোগসেবযা .
যত্র চৈবাত্মনাত্মানং পশ্যন্নাত্মনি তুষ্যতি .. ১৪..
সুখমাত্যন্তিকং যত্তদ্বুদ্ধিগ্রাহ্যমতীন্দ্রিযম্ .
এতত্ক্ষরাক্ষরাতীতমনক্ষরমিতীর্যতে .. ১৫..
ক্ষরঃ সর্বাণি ভূতানি সূত্রাত্মাঽক্ষর উচ্যতে .
অক্ষরং পরমং ব্রহ্ম নির্বিশেষং নিরঞ্জনম্ .. ১৬..
অলক্ষণমলক্ষং তদপ্রতর্ক্যমনূপমম্ .
অপারপারমচ্ছেদ্যমচিন্ত্যমতিনির্মলম্ .. ১৭..
আধারং সর্বভূতানামনাধারমনামযম্ .
অপ্রমাণমনির্দেশ্যমপ্রমেযমতীন্দ্রিযম্ .. ১৮..
অস্থূলমনণুহ্রস্বমদীর্ঘমজমব্যযম্ .
অশব্দমস্পর্শরূপমচক্ষুঃশ্রোত্রনামকম্ .. ১৯..
সর্বজ্ঞং সর্বগং শান্তং সর্বেষাং হৃদযে স্থিতম্ .
সুসংবেদ্যং গুরুমতাত্সুদুর্বোধমচেতসাম্ .. ২০..
নিষ্কলং নির্গুণং শান্তং নির্বিকারং নিরাশ্রযম্ .
নির্লেপকং নিরাপাযং কূটস্থমচলং ধ্রুবম্ .. ২১..
জ্যোতিষামপি তজ্জ্যোতিস্তমঃপারে প্রতিষ্ঠিতম্ .
ভাবাভাববিনির্মুক্তং ভাবনামাত্রগোচরম্ .. ২২..
ভক্তিগম্যং পরং তত্ত্বমন্তর্লীনেন চেতসা .
ভাবনামাত্রমেবাত্র কারণং পদ্মসংভব .. ২৩..
যথা দেহান্তরপ্রাপ্তেঃ কারণং ভাবনা নৃণাম্ .
বিষযং ধ্যাযতঃ পুংসো বিষযে রমতে মনঃ .. ২৪..
মামনুস্মরতশ্চিত্তং ময্যেবাত্র বিলীযতে .
সর্বজ্ঞত্বং পরেশত্বং সর্বসংপূর্ণশক্তিতা .
অনন্তশক্তিমত্ত্বং চ মদনুস্মরণাদ্ভবেত্ .. ২৫.. ইতি..
ইতি তৃতীযোঽধ্যাযঃ .. ৩..
চৈতনস্যৈকরূপত্বদ্ভেদো যুক্তো ন কর্হিচিত্ .
জীবত্বং চ তথা জ্ঞেযং রজ্জ্বাং সর্পগ্রহো যথা .. ১..
রজ্জ্বজ্ঞানাত্ক্ষণেনৈব যদ্বদ্রজ্জুর্হি সর্পিণী .
ভাতি তদ্বচ্চিতিঃ সাক্ষাদ্বিশ্বাকারেণ কেবলা .. ২..
উপাদানং প্রপঞ্চস্য ব্রহ্মণোঽন্যন্ন বিদ্যতে .
তস্মাত্সর্বপ্রপঞ্চোঽযং ব্রহ্মৈবাস্তি ন চেতরত্ .. ৩..
ব্যাপ্যব্যাপ্যকতা মিথ্যা সর্বমাত্মেতি শাসনাত্ .
ইতি জ্ঞাতে পরে তত্ত্বে ভেদস্যাবসরঃ কুতঃ .. ৪..
ব্রহ্মণঃ সর্বভূতানি জাযন্তে পরমাত্মনঃ .
তস্মাদেতানি ব্রহ্মৈব ভবন্তীতি বিচিন্তয .. ৫..
ব্রহ্মৈব সর্বনামানি রূপাণি বিবিধানি চ .
কর্মাণ্যপি সমগ্রাণি বিভর্তীতি বিভাবয .. ৬..
সুবর্ণাজ্জাযমানস্য সুবর্ণত্বং চ শাশ্বতম্ .
ব্রহ্মণো জাযমানস্য ব্রহ্মত্বং চ তথা ভবেত্ .. ৭..
স্বল্পমপ্যন্তরং কৃত্বা জীবাত্মপরমাত্মনোঃ .
যস্তিষ্ঠতি বিমূঢাত্মা ভযং তস্যাপি ভাষিতম্ .. ৮..
যদজ্ঞানদ্ভবেদ্দ্বৈতমিতরত্তত্প্রপশ্যতি .
আত্মত্বেন তদা সর্বং নেতরত্তত্র চাণ্বপি .. ৯..
অনুভূতোঽপ্যযং লোকো ব্যবহারক্ষমোঽপি সন্ .
অসদ্রূপো যথা স্বপ্ন উত্তরক্ষণবাধিতঃ .. ১০..
স্বপ্নে জাগরিতং নাস্তি জাগরে স্বপ্নতা নহি .
দ্বযমেব লযে নাস্তি লযোঽপি হ্যনযোর্ন চ .. ১১..
ত্রযমেব ভবেন্মিথ্যা গুণত্রযবিনির্মিতম্ .
অস্য দ্রষ্টা গুণাতীতো নিত্যো হ্যেষ চিদাত্মকঃ .. ১২..
যদ্বন্মৃদি ঘটভ্রান্তিঃ শুক্তৌ হি রজতস্থিতিঃ .
তদ্বদ্ব্রহ্মণি জীবত্বং বীক্ষমাণে বিনশ্যতি .. ১৩..
যথা মৃদি ঘটো নাম কনকে কুণ্ডলাভিধা .
শুক্তৌ হি রজতখ্যাতির্জীবশব্দস্তথা পরে .. ১৪..
যথৈব ব্যোম্নি নীলত্বং যথা নীরং মরুস্থলে .
পুরুষত্বং যথা স্থাণৌ তদ্বদ্বিশ্বং চিদাত্মনি .. ১৫..
যথৈব শূন্যো বেতালো গন্ধর্বাণং পুরং যথা .
যথাকাশে দ্বিচন্দ্রত্বং তদ্বত্সত্যে জগত্স্থিতিঃ .. ১৬..
যথা তরঙ্গকল্লোলৈর্জলমেব স্ফুরত্যলম্ .
ঘটনাম্না যথা পৃথ্বী পটনাম্না হি তন্তবঃ .. ১৭..
জগন্নাম্না চিদাভাতি সর্বং ব্রহ্মৈব কেবলম্ .
যথা বন্ধ্যাসুতো নাস্তি যথা নস্তি মরৌ জলম্ .. ১৮..
যথা নাস্তি নভোবৃক্ষস্তথা নাস্তি জগত্স্থিতিঃ .
গৃহ্যমানে ঘটে যদ্বন্মৃত্তিকা ভাতি বৈ বলাত্ .. ১৯..
বীক্ষ্যমাণে প্রপঞ্চে তু ব্রহ্মৈবাভাতি ভাসুরম্ .
সদৈবাত্মা বিশুদ্ধোঽস্মি হ্যশুদ্ধো ভাতি বৈ সদা .. ২০..
যথৈব দ্বিবিধা রজ্জুর্জ্ঞানিনোঽজ্ঞানিনোঽনিশম্ .
যথৈব মৃন্মযঃ কুংভস্তদ্বদ্দেহোঽপি চিন্মযঃ .. ২১..
আত্মানাত্মবিবেকোঽযং মুধৈব ক্রিযতে বুধৈঃ ..
সর্পত্বেন যথা রজ্জূ রজতত্বেন শুক্তিকা .. ২২..
বিনির্ণীতা বিমূঢেন দেহত্বেন তথাত্মতা .
ঘটত্বেন যথা পৃথ্বী জলত্বেন মরীচিকা .. ২৩..
গৃহত্বেন হি কাষ্ঠানি খড্গত্বেন হি লোহতা .
তদ্বদাত্মনি দেহত্বং পশ্যত্যজ্ঞানযোগতঃ .. ২৪.. ইতি..
ইতি চতুর্থোঽধ্যাযঃ .. ৪..
পুনর্যোগং প্রবক্ষ্যামি গুহ্যং ব্রহ্মস্বরূপকম্ .
সমাহিতমনাঅ ভূত্বা শৃণু ব্রহ্মন্যথাক্রমম্ .. ১..
দশদ্বারপুরং দেহং দশনাডীমহাপথম্ .
দশভির্বাযুভির্ব্যাপ্তং দশেন্দ্রিযপরিচ্ছদম্ .. ২..
ষডাধারাপবরকং ষডন্বযমহাবনম্ .
চতুঃপীঠসমাকীর্ণং চতুরাম্নাযদীপকম্ .. ৩..
বিন্দুনাদমহালিঙ্গবিষ্ণুলক্ষ্মীনিকেতনম্ .
দেহং বিষ্ণ্বালযং প্রোক্তং সিদ্ধিদং সর্বদেহিনাম্ .. ৪..
গুদমেঢ্রান্তরালস্থং মূলাধারং ত্রিকোণকম্ .
শিবস্য জীবরূপস্য স্থানং তদ্ধি প্রচক্ষতে .. ৫..
যত্র কুণ্ডলিনী নাম পরা শক্তিঃ প্রতিষ্ঠিতা .
যস্মাদুত্পদ্যতে বাযুর্যস্মাদ্বহ্নিঃ প্রবর্ততে .. ৬..
যস্মাদুত্পদ্যতে বিন্দুর্যস্মান্নাদঃ প্রবর্ততে .
যস্মাদুত্পদ্যতে হংসো যস্মাদুত্পদ্যতে মনঃ .. ৭..
তদেতত্কামরূপাখ্যং পীঠং কামফলপ্রদম্ .
স্বাধিষ্ঠানহ্বযং চক্রং লিঙ্গমূলে ষডস্রকম্ .. ৮..
নাভিদেশে স্থিতং চক্রং দশাস্রং মণিপূরকম্ .
দ্বাদশারং মহাচক্রং হৃদযে চাপ্যনাহতম্ .. ৯..
তদেতত্পূর্ণগির্যাখ্যং পীঠং কমলসংভব .
কণ্ঠকূপে বিশুদ্ধাখ্যং যচ্চক্রং ষোডশাস্রকম্ .. ১০..
পীঠং জালন্ধরং নাম তিষ্ঠত্যত্র চতুর্মুখ .
আজ্ঞা নাম ভ্রুবোর্মধ্যে দ্বিদলং চক্রমুত্তমম্ .. ১১..
উড্যানাখ্যং মহাপীঠমুপরিষ্টাত্প্রতিষ্ঠিতম্ .
স্থানান্যেতানি দেহেঽস্মিঞ্ছক্তিরূপং প্রকাশতে .. ১২..
চতুরস্রধরণ্যাদৌ ব্রহ্মা তত্রাধিদেবতা .
অর্ধচন্দ্রাকৃতি জলং বিষ্ণুস্তস্যাধিদেবতা .. ১৩..
ত্রিকোণমণ্ডলং বহ্নী রুদ্রস্তস্যাধিদেবতা .
বাযোর্বিংবং তু ষট্কোণং সংকর্ষোঽত্রাধিদেবতা .. ১৪..
আকাশমণ্ডলং বৃত্তং শ্রীমন্নারাযণোঽত্রাধিদেবতা .
নাদরূপং ভ্রুবোর্মধ্যে মনসো মণ্ডলং বিদুঃ .. ১৫..
শাংভবস্থানমেতত্তে বর্ণিতং পদ্মসংভব .
অতঃ পরং প্রবক্ষ্যামি নাডীচক্রস্য নির্ণযম্ .. ১৬..
মূলাধারত্রিকোণস্থা সুষুম্না দ্বাদশাঙ্গুলা .
মূলার্ধচ্ছিন্নবংশাভা ব্রহ্মনাডীতি সা স্মৃতা .. ১৭..
ইডা চ পিঙ্গলা চৈব তস্যাঃ পার্শ্বদ্বযে গতে .
বিলংবিন্যামনুস্যূতে নাসিকান্তমুপাগতে .. ১৮..
ইডাযাং হেমরূপেণ বাযুর্বামেন গচ্ছতি .
পিঙ্গলাযাং তু সূর্যাত্মা যাতি দক্ষিণপার্শ্বতঃ .. ১৯..
বিলংবিনীতি যা নাডী ব্যক্তা নাভৌ প্রতিষ্ঠিতা .
তত্র নাড্যঃ সমুত্পন্নস্তির্যগূর্ধ্বমধোমুখাঃ .. ২০..
তন্নাভিচক্রমিত্যুক্তং কুক্কুটাণ্ডমিব স্থিতম্ .
গান্ধারী হস্তিজিহ্বা চ তস্মান্নেত্রদ্বযং গতে .. ২১..
পূষা চালম্বুসা চৈব শ্রোত্রদ্বযমুপাগতে .
শূরা নাম মহানাডী তস্মাদ্ভ্রূমধ্যমাশ্রিতা .. ২২..
বিশ্বোদরী তু যা নাডী সা ভুঙ্ক্তেঽন্নং চতুর্বিধম্ .
সরস্বতী তু যা নাডী সা জিহ্বান্তং প্রসর্পতি .. ২৩..
রাকাহ্বযা তু যা নাডী পীত্বা চ সলিলং ক্ষণাত্ .
ক্ষুতমুত্পাদযেদ্ ঘ্রাণে শ্লেষ্মাণং সংচিনোতি চ .. ২৪..
কণ্ঠকূপোদ্ভবা নাডী শঙ্খিনাখ্যা ত্বধোমুখী .
অন্নসারং সমাদায মূর্ধ্নি সংচিনুতে সদা .. ২৫..
নাভেরধোগতাস্তিস্রো জাডযঃ স্যুরধোমুখঃ .
মলং ত্যজেত্কুহূর্নাডী মূত্রং মুঞ্চতি বারুণী .. ২৬..
চিত্রাখ্যা সীবিনি নাডী শুক্লমোচনকারণী .
নাডীচক্রমিতি প্রোক্তং বিন্দুরূপমতঃ শৃণু .. ২৭..
স্থূলং সূক্ষ্মং পরং চেতি ত্রিবিধং ব্রহ্মণো বপুঃ .
স্থূলং শুক্লাত্মকং বিন্দুঃ সূক্ষ্মং পঞ্চাগ্নিরূপকম্ .. ২৮..
সোমাত্মকঃ পরঃ প্রোক্তঃ সদা সাক্ষী সদাচ্যুতঃ .
পাতালানামধোভাগে কালাগ্নির্যঃ প্রতিষ্ঠিতঃ .. ২৯..
সমূলাগ্নিঃ শরীরেঽগ্নির্যস্মান্নাদঃ প্রজাযতে .
বডবাগ্নিঃ শরীরস্থো হ্যস্থিমধ্যে প্রবর্ততে .. ৩০..
কাষ্ঠপাষাণযোর্বহ্নির্হ্যস্থিমধ্যে প্রবর্ততে .
কাষ্ঠপাষণজো বহ্নিঃ পার্থিবো গ্রহণীগতঃ.. ৩১..
অন্তরিক্ষগতো বহ্নির্বৈদ্যুতঃ স্বান্তরাত্মকঃ .
নভস্থঃ সূর্যরূপোঽগ্নির্নাভিমণ্ডলমাশ্রিতঃ .. ৩২..
বিষং বর্ষতি সূর্যোঽসৌ স্রবত্যমৃতমুন্মুখঃ .
তালুমূলে স্থিতশ্চন্দ্রঃ সুধাং বর্ষত্যধোমুখঃ .. ৩৩..
ভ্রূমধ্যনিলযো বিন্দুঃ শুদ্ধস্ফটিকসংনিভঃ .
মহাবিষ্ণোশ্চ দেবস্য তত্সূক্ষ্মং রূপমুচ্যতে .. ৩৪..
এতত্পঞ্চাগ্নিরূপং যো ভাবযেদ্বুদ্ধিমান্ধিযা .
তেন ভুক্তং চ পীতং চ হুতমেব ন সংশযঃ .. ৩৫..
সুখসংসেবিতং স্বপ্নং সুজীর্ণমিতভোজনম্.জ্ .
শরীরশুদ্ধিং কৃত্বাদৌ সুখমাসনমাস্থিতঃ .. ৩৬..
প্রাণস্য শোধযেন্মার্গং রেচপূরককুম্ভকৈঃ .
গুদমাকুঞ্চ্য যত্নেন মূলশক্তিং প্রপূজযেত্ .. ৩৭..
নাভৌ লিঙ্গস্য মধ্যে তু উড্যানাখ্যং চ বন্ধযেত্ .
উড্ডীয যাতি তেনৈব শক্তিতোড্যানপীঠকম্ .. ৩৮..
কণ্ঠং সঙ্কোচযেত্কিংচিদ্বন্ধো জালন্ধরি হ্যযম্ .
বন্ধযেত্খেচরি মুদ্রাং দৃঢচিত্তঃ সমাহিতঃ .. ৩৯..
কপালবিবরে জিহ্বা প্রবিষ্টা বিপরীতগা .
ভ্রুবোরন্তর্গতা দৃষ্টির্মুদ্রা ভবতি খেচরী .. ৪০..
খেচর্যা মুদ্রিতং যেন বিবরং লম্বিকোর্ধ্বতঃ .
ন পীযূষং পতত্যগ্নৌ ন চ বাযুঃ প্রধাবতি .. ৪১..
ন ক্ষুধা ন তৃষা নিদ্রা নৈবালস্যং প্রজাযতে .
ন চ মৃত্যুর্ভবেত্তস্য যো মুদ্রাং বেত্তি খেচরীম্ .. ৪২..
ততঃ পূর্বাপরে ব্যোম্নি দ্বাদশান্তেঽচ্যুতাত্মকে .
উড্ড্যানপীঠে নির্দ্বন্দ্বে নিরালম্বে নিরঞ্জনে .. ৪৩..
ততঃ পঙ্কজমধ্যস্থং চন্দ্রমণ্ডলমধ্যগম্ .
নারাযণমনুধ্যাযেত্স্রবতমমৃতং সদা .. ৪৪..
ভিদ্যতে হৃদযগ্রন্থিশ্ছিদ্যন্তে সর্বসংশযাঃ .
ক্ষীযন্তে চাস্য কর্মাণি তস্মিদ্নৃষ্টে পরাবরে .. ৪৫..
অথ সিদ্ধিং প্রবক্ষ্যামি সুখোপাযং সুরেশ্বর .
জিতেন্দ্রিযাণাং শান্তানাং জিতশ্বাসবিচেতসাম্ .. ৪৬..
নাদে মনোলযং ব্রহ্মন্দূরশ্রবণকারণম্ .
বিন্দৌ মনোলযং কৃত্বা দূরদর্শনমাপ্নুযাত্ .. ৪৭..
কালাত্মনি মনো লীনং ত্রিকালজ্ঞানকারণম্ .
পরকাযমনোযোগঃ পরকাযপ্রবেশকৃত্ .. ৪৮..
অমৃতং চিন্তযেন্মূর্ধ্নি ক্ষুত্তৃষাবিষশান্তযে .
পৃথিব্যাং ধারযেচ্চিত্তং পাতালগমনং ভবেত্ .. ৪৯..
সলিলে ধারযেচ্চিত্তং নাম্ভসা পরিভূযতে .
অগ্নৌ সন্ধারযেচ্চিত্তমগ্নিনা দহ্যতে ন সঃ .. ৫০..
বাযৌ মনোলযং কুর্যাদাকাশগমনং ভবেত্ .
আকাশে ধারযেচ্চিত্তমণিমাদিকমাপ্নুযাত্ .. ৫১..
বিরাড্রূপে মনো যুঞ্জন্মহিমানমবাপ্নুযাত্ .
চতুর্মুখে মনো যুঞ্জঞ্জগত্সৃষ্টিকরো ভবেত্ .. ৫২..
ইন্দ্ররূপিণমাত্মানং ভাবযন্মর্ত্যভোগবান্ .
বিষ্ণুরূপে মহাযোগী পালযেদখিলং জগত্ .. ৫৩..
রুদ্ররূপে মহাযোগী সংহরত্যেব তেজসা .
নারাযণে মনো যুঞ্জন্সর্বসিদ্ধিমবাপ্নুযাত্ .. ৫৪..
যথা সংকল্পযেদ্যোগী যোগযুক্তো জিতেন্দ্রিযঃ .
তথা তত্তদবাপ্নোতি ভাব এবাত্র কারণম্ .. ৫৫..
গুরুর্ব্রহ্মা গুরুর্বিষ্ণুর্গুরুর্দেবঃ সদাচ্যুতঃ .
ন গুরোরধিকঃ কশ্চিত্ত্রিষু লোকেষু বিদ্যতে .. ৫৬..
দিব্যজ্ঞানোপদেষ্টারং দেশিকং পরমেশ্বরম্ .
পূজযেত্পরযা ভক্ত্যা তস্য জ্ঞানফলং ভবেত্ .. ৫৭..
যথা গুরুস্তথৈবেশো যথৈবেশোস্তথা গুরুঃ .
পূজনীযো মহাভক্ত্যা ন ভেদো বিদ্যতেঽনযোঃ .. ৫৮..
নাদ্বৈতবাদং কুর্বীত গুরুণা সহ কুত্রচিত্ .
অদ্বৈতং ভাবযেদ্ভক্ত্যা গুরোর্দেবস্য চাত্মনঃ .. ৫৯..
যোগশিখাং মহাগুহ্যং যো জানাতি মহামতিঃ .
ন তস্য কিংচিদজ্ঞাতং ত্রিষু লোকেষু বিদ্যতে .. ৬০..
ন পুণ্যপাপে নাস্বস্থো ন দুঃখং ন পরাজযঃ .
ন চাস্তি পুনরাবৃত্তিরস্মিন্সংসারমণ্ডলে .. ৬১..
সিদ্ধৌ চিত্তং ন কুর্বীত চঞ্চলত্বেন চেতসঃ .
তথা বিজ্ঞাততত্ত্বোঽসৌ মুক্ত এব ন সংশযঃ .. ৬২..
ইত্যুপনিষত্ .. ইতি পঞ্চমোঽধ্যাযঃ .. ৫..
উপাসনাপ্রকারং মে ব্রূহি ত্বং পরমেশ্বর .
যেন বিজ্ঞাতমাত্রেণ মুক্তো ভবতি সংসৃতেঃ .. ১..
উপাসনাপ্রকারং তে রহস্যং শ্রুতিসারকম্ .
হিরণ্যগর্ভ বক্ষ্যামি শ্রুত্বা সম্যগুপাসয .. ২..
সুষুম্নাযৈ কুণ্ডলীন্যৈ সুধাযৈ চন্দ্রমণ্ডলাত্ .
মনোন্মন্যৈ নমস্তুভ্যং মহাশক্ত্যৈ চিদাত্মনে .. ৩..
শতং চৈকা চ হৃদযস্য নাড্য-
     স্তাসাং মূর্ধানমভিনিঃসৃতৈকা .
তযোর্ধ্বমাযন্নমৃতত্বমেতি
     বিশ্বঙ্ঙ্ন্যা উত্ক্রমণে ভবন্তি .. ৪..
একোত্তরং নাডিশতং তাসাং মধ্যে পরা স্মৃতা .
সুষুম্না তু পরে লীনা বিরজা ব্রহ্মরূপিণী .. ৫..
ইডা তিষ্ঠতি বামেন পিঙ্গলা দক্ষিণেন তু .
তযোর্মধ্যে পরং স্থানং যস্তদ্বেদ স বেদবিত্ .. ৬..
প্রাণান্সন্ধারযেত্তস্মিন্নাসাভ্যান্তরচারিণঃ .
ভূত্বা তত্রাযতপ্রাণঃ শনৈরেব সমভ্যসেত্ .. ৭..
গুদস্য পৃষ্ঠভাগেঽস্মিন্বীণাদন্ডঃ স দেহভৃত্ .
দীর্ঘাস্তিদেহপর্যন্তং ব্রহ্মনাডীতি কথ্যতে .. ৮..
তস্যান্তে সুষিরং সূক্ষ্মং ব্রহ্মনাডীতি সূরভিঃ .
ইডাপিঙ্গলযোর্মধ্যে সুষুম্না সূর্যরূপিণী .. ৯..
সর্বং প্রতিষ্ঠিতং তস্মিন্সর্বগং বিশ্বতোমুখম্ .
তস্য মধ্যগতাঃ সূর্যসোমাগ্নিপরমেশ্বরাঃ .. ১০..
ভূতলোকা দিশঃ ক্ষেত্রাঃ সমুদ্রাঃ পর্বতাঃ শিলাঃ .
দ্বীপাশ্চ নিম্নগা বেদাঃ শাস্ত্রবিদ্যাকলাক্ষরাঃ .. ১১..
স্বরমন্ত্রপুরাণানি গুণাশ্চৈতে চ সর্বশঃ .
বীজং বীজাত্মকস্তেষাং ক্ষেত্রজ্ঞঃ প্রাণবাযবঃ .. ১২..
সুষুম্নান্তর্গতং বিশ্বং তস্মিন্সর্বং প্রতিষ্ঠিতম্ .
নানানাডীপ্রসবগং সর্বভূতান্তরাত্মনি .. ১৩..
ঊর্ধ্বমূলমধঃশাখং বাযুমার্গেণ সর্বগম্ .
দ্বিসপ্ততিসহস্রাণি নাড্যঃ স্যুর্বাযুগোচরাঃ .. ১৪..
সর্বমার্গেণ সুষিরাস্তির্যঞ্চঃ সুষিরাত্মতাঃ .
অধশ্চোর্ধ্বং চ কুণ্ডল্যাঃ সর্বদ্বারনিরোধনাত্ .. ১৫..
বাযুনা সহ জীবোর্ধ্বজ্ঞানান্মোক্ষমবাপ্নুযাত্ .
জ্ঞাত্বা সুষুম্নাং তদ্ভেদং কৃত্বা পাযুং চ মধ্যগম্ .. ১৬..
কৃত্বা তু চৈন্দবস্থানে ঘ্রাণরন্ধ্রে নিরোধযেত্ .
দ্বিসপ্ততিসহস্রাণি নাডীদ্বারাণি পঞ্জরে .. ১৭..
সুষুম্না শাম্ভবী শক্তিঃ শেষাস্ত্বন্যে নিরর্থকাঃ .
হৃল্লেখে পরমানন্দে তালুমূলে ব্যবস্থিতে .. ১৮..
অত ঊর্ধ্বং নিরোধে তু মধ্যমং মধ্যমধ্যমম্ .
উচ্চারযেত্পরাং শক্তিং ব্রহ্মরন্ধ্রনিবাসিনীম্ .
যদি ভ্রমরসৃষ্টিঃ স্যাত্সংসারভ্রমণং ত্যজেত্ .. ১৯..
গমাগমস্থং গমনাদিশূন্যং
     চিদ্রূপদীপং তিমিরান্ধনাশম্ .
পশ্যামি তং সর্বজনান্তরস্থং
     নমামি হংসং পরমাত্মরূপম্ .. ২০..
অনাহতস্য শব্দস্য তস্য শব্দস্য যো ধ্বনিঃ .
ধ্বনেরন্তর্গতং জ্যোতির্জ্যোতিষোঽন্তর্গতং মনঃ .
তন্মনো বিলযং যাতি তদ্বিষ্ণোঃ পরমং পদম্ .. ২১..
কেচিদ্বদন্তি চাধারং সুষুম্না চ সরস্বতী .
আধারাজ্জাযতে বিশ্বং বিশ্বং তত্রৈব লীযতে .. ২২..
তস্মাত্সর্বপ্রযত্নেন গুরুপাদং সমাশ্রযেত্ .
আধারশক্তিনিদ্রাযাং বিশ্বং ভবতি নিদ্রযা .. ২৩..
তস্যাং শক্তিপ্রবোধেন ত্রৈলোক্যং প্রতিবুধ্যতে .
আধারং যো বিজানাতি তমসঃ পরমশ্নুতে .. ২৪..
তস্য বিজ্ঞানমাত্রেণ নরঃ পাপৈঃ প্রমুচ্যতে .. ২৫..
আধারচক্রমহসা বিদ্যুত্পুঞ্জসমপ্রভা .
তদা মুক্তির্ন সন্দেহো যদি তুষ্টঃ স্বযং গুরুঃ .. ২৬..
আধারচক্রমহসা পুণ্যপাপে নিকৃন্তযেত্ .
আধারবাতরোধেন লীযতে গগনান্তরে .. ২৭..
আধারবাতরোধেন শরীরং কংপতে যদা .
আধারবাতরোধেন যোগী নৃত্যতি সর্বদা .. ২৮..
আধারবাতরোধেন বিশ্বং তত্রৈব দৃশ্যতে .
সৃষ্টিমাধারমাধারমাধারে সর্বদেবতাঃ .
আধারে সর্ববেদাশ্চ তস্মাদাধারমাশ্রযেত্ .. ২৯..
আধারে পশ্চিমে ভাগে ত্রিবেণীসঙ্গমো ভবেত্ .
তত্র স্নাত্বা চ পীত্বা চ নরঃ পাপাত্প্রমুচ্যতে .. ৩০..
আহারে পশ্চিমং লিঙ্গং কবাটং তত্র বিদ্যতে .
তস্যোদ্ঘাটনমাত্রেণ মুচ্যতে ভববন্ধনাত্ .. ৩১..
আধারপশ্চিমে ভাগে চন্দ্রসূর্যৌ স্থিরৌ যদি .
তত্র তিষ্ঠতি বিশ্বেশো ধ্যাত্বা ব্রহ্মমযো ভবেত্ .. ৩২..
আধারপশ্চিমে ভাগে মূর্তিস্তিষ্ঠতি সংজ্ঞযা .
ষট্ চক্রাণি চ নির্ভিদ্য ব্রহ্মরন্ধ্রাদ্বহির্গতম্ .. ৩৩..
বামদক্ষে নিরুন্ধন্তি প্রবিশন্তি সুষুম্নযা .
ব্রহ্মরন্ধ্রং প্রবিশ্যান্তস্তে যান্তি পরমাং গতিম্ .. ৩৪..
সুষুম্নাযাং যদা হংসস্ত্বধ ঊর্ধ্বং প্রধাবতি .
সুষুম্নাযাং যদা প্রাণং ভ্রামযেদ্যো নিরন্তরম্ .. ৩৫..
সুষুম্নাযাং যদা প্রাণঃ স্থিরো ভবতি ধীমতাম্ .
সুষুম্নাযাং প্রবেশেন চন্দ্রসূর্যৌ লযং গতৌ .. ৩৬..
তদা সমরসং ভাবং যো জানাতি স যোগবিত্ .
সুষুম্নাযাং যদা যস্য ম্রিযতে মনসো রযঃ .. ৩৭..
সুষুম্নাযাং যদা যোগী ক্ষণৈকমপি তিষ্টতি .
সুষুম্নাযাং যদা যোগী ক্ষণার্ধমপি তিষ্ঠতি .. ৩৮..
সুষুম্নাযাং যদা যোগী সুলগ্নো লবণাম্বুবত্ .
সুষুম্নাযাং যদা যোগী লীযতে ক্ষীরনীরবত্ .. ৩৯..
ভিদ্যতে চ তদা গ্রন্থিশ্চিদ্যন্তে সর্বসংশযাঃ .
ক্ষীযন্তে পরমাকাশে তে যান্তি পরমাং গতিম্ .. ৪০..
গঙ্গাযাং সাগরে স্নাত্বা নত্বা চ মণিকর্ণিকাম্ .
মধ্যনাডীবিচারস্য কলাং নার্হন্তি ষোডশীম্ .. ৪১..
শ্রীশৈলদর্শনান্মুক্তির্বারাণস্যাং মৃতস্য চ .
কেদারোদকপানেন মধ্যনাডীপ্রদর্শনাত্ .. ৪২..
অশ্বমেধসহস্রাণি বাজপেযশতানি চ .
সুষুম্নাধ্যানযোগস্য কলাং নার্হন্তি ষোডশীম্ .. ৪৩..
সুষুম্নাযাং সদা গোষ্ঠীং যঃ কশ্চিত্কুরুতে নরঃ .
স মুক্তঃ সর্বপাপেভ্যো নিশ্রেযসমবাপ্নুযাত্ .. ৪৪..
সুষুম্নৈব পরং তীর্থং সুষুম্নৈব পরং জপঃ .
সুষুম্নৈব পরং ধ্যানং সুষুম্নৈব পরা গতিঃ .. ৪৫..
অনেকযজ্ঞদানানি ব্রতানি নিযমাস্তথা .
সুষুম্নাধ্যানলেশস্য কলাং নার্হন্তি ষোডশীম্ .. ৪৬..
ব্রহ্মরন্ধ্রে মহাস্থানে বর্ততে সততং শিবা .
চিচ্ছক্তিঃ পরমাদেবী মধ্যমে সুপ্রতিষ্ঠিতা .. ৪৭..
মাযাশক্তির্ললাটাগ্রভাগে ব্যোমাম্বুজে তথা .
নাদরূপা পরাশক্তির্ললাটস্য তু মধ্যমে .. ৪৮..
ভাগে বিন্দুমযী শক্তির্ললাটস্যাপরাংশকে .
বিন্দুমধ্যে চ জীবাত্মা সূক্ষ্মরূপেণ বর্ততে .. ৪৯..
হৃদযে স্থূলরূপেণ মধ্যমেন তু মধ্যগে .. ৫০..
প্রাণাপানবশো জীবো হ্যধশ্চোর্ধ্বং চ ধাবতি .
বামদক্ষিণমার্গেণ চঞ্চলত্বান্ন দৃশ্যতে .. ৫১..
আক্ষিপ্তো ভুজদণ্ডেন যথোচ্চলতি কন্দুকঃ .
প্রাণাপানসমাক্ষিপ্তস্তথা জীবো ন বিশ্রমেত্ .. ৫২..
অপানঃ কর্ষতি প্রাণং প্রাণোঽপানং চ কর্ষতি .
হকারেণ বহির্যাতি সকারেণ বিশেত্পুনঃ .. ৫৩..
হংসহংসেত্যমুং মন্ত্রং জীবো জপতি সর্বদা .
তদ্বিদ্বানক্ষরং নিত্যং যো জানাতি স যোগবিত্ .. ৫৪..
কন্দোর্ধ্বে কুণ্ডলীশক্তির্মুক্তিরূপা হি যোগিনাম্ .
বন্ধনায চ মূঢানাং যস্তাং বেত্তি স যোগবিত্ .. ৫৫..
ভূর্ভুবঃস্বরিমে লোকাশ্চন্দ্রসূর্যাঽগ্নিদেবতাঃ .
যাসু মাত্রাসু তিষ্ঠন্তি তত্পরং জ্যোতিরোমিতি .. ৫৬..
ত্রযঃ কালাস্ত্রযো দেবাস্ত্রযো লোকাস্ত্রযঃ স্বরাঃ .
ত্রযো বেদাঃ স্থিতা যত্র তত্পরং জ্যোতিরোমিতি .. ৫৭..
চিত্তে চলতি সংসারো নিশ্চলং মোক্ষ উচ্যতে .
তস্মাচ্চিত্তং স্থিরীকুর্যাত্প্রজ্ঞযা পরযা বিধে .. ৫৮..
চিত্তং কারণমর্থানাং তস্মিন্সতি জগত্ত্রযম্ .
তস্মিন্ক্ষীণে জগত্ক্ষীণং তচ্চিকিত্স্যং প্রযত্নতঃ .. ৫৯..
মনোহং গগনাকারং মনোহং সর্বতোমুখম্ .
মনোহং সর্বমাত্মা চ ন মনঃ কেবলঃ পরঃ .. ৬০..
মনঃ কর্মাণি জাযন্তে মনো লিপ্যতি পাতকৈঃ .
মনশ্চেদুন্মনীভূযান্ন পুণ্যং ন চ পাতকম্ .. ৬১..
মনসা মন আলোক্য বৃত্তিশূন্যং যদা ভবেত্ .
ততঃ পরং পরব্রহ্ম দৃশ্যতে চ সুদুর্লভম্ .. ৬২..
মনসা মন আলোক্য মুক্তো ভবতি যোগবিত্ .
মনসা মন আলোক্য উন্মন্যন্তং সদা স্মরেত্ .. ৬৩..
মনসা মন আলোক্য যোগনিষ্ঠঃ সদা ভবেত্ .
মনসা মন আলোক্য দৃশ্যন্তে প্রত্যযা দশ .. ৬৪..
যদা প্রত্যযা দৃশ্যন্তে তদা যোগীশ্বরো ভবেত্ .. ৬৫..
বিন্দুনাদকলাজ্যোতীরবীন্দুধ্রুবতারকম্ .
শান্তং চ তদতীতং চ পরংব্রহ্ম তদুচ্যতে .. ৬৬..
হসত্যুল্লসতি প্রীত্যা ক্রীডতে মোদতে তদা .
তনোতি জীবনং বুদ্ধ্যা বিভেতি সর্বতোভযাত্ .. ৬৭..
রোধ্যতে বুধ্যতে শোকে মুহ্যতে ন চ সংপদা .
কংপতে শত্রুকার্যেষু কামেন রমতে হসন্ .. ৬৮..
স্মৃত্বা কামরতং চিত্তং বিজানীযাত্কলেবরে .
যত্র দেশে বসেদ্বাযুশ্চিত্তং তদ্বসতি ধ্রুবম্ .. ৬৯..
মনশ্চন্দ্রো রবির্বাযুর্দৃষ্টিরগ্নিরুদাহৃতঃ .
বিন্দুনাদকলা ব্রহ্মন্ বিষ্ণুব্রহ্মেশদেবতাঃ .. ৭০..
সদা নাদানুসন্ধানাত্সংক্ষীণা বাসনা ভবেত্ .
নিরঞ্জনে বিলীযেত মরুন্মনসি পদ্মজ .. ৭১..
যো বৈ নাদঃ স বৈ বিন্দুস্তদ্বৈ চিত্তং প্রকীর্তিতম্ .
নাদো বিন্দুশ্চ চিত্তং চ ত্রিভিরৈক্যং প্রসাদযেত্ .. ৭২..
মন এব হি বিন্দুশ্চ উত্পত্তিস্থিতিকারণম্ .
মনসোত্পদ্যতে বিন্দুর্যথা ক্ষীরং ঘৃতাত্মকম্ .. ৭৩..
ষট্ চক্রাণি পরিজ্ঞাত্বা প্রবিশেত্সুখমণ্ডলম্ .
প্রবিশেদ্বাযুমাকৃষ্য তথৈবোর্ধ্বং নিযোজযেত্ .. ৭৪..
বাযুং বিন্দুং তথা চক্রং চিত্তং চৈব সমভ্যসেত্ .
সমাধিমেকেন সমমমৃতং যান্তি যোগিনঃ .. ৭৫..
যথাগ্নির্দারুমধ্যস্থো নোত্তিষ্ঠেন্মথনং বিনা .
বিনা চাভ্যাসযোগেন জ্ঞানদীপস্তথা নহি .. ৭৬..
ঘটমধ্যে যথা দীপো বাহ্যে নৈব প্রকাশতে .
ভিন্নে তস্মিন্ ঘটে চৈব দীপজ্বালা চ ভাসতে .. ৭৭..
স্বকাযং ঘটমিত্যুক্তং যথা জীবো হি তত্পদম্ .
গুরুবাক্যসমাভিন্নে ব্রহ্মজ্ঞানং প্রকাশতে .. ৭৮..
কর্ণধারং গুরুং প্রাপ্য তদ্বাক্যং প্লববদৃঢম্ .
অভ্যাসবাসনাশক্ত্যা তরন্তি ভবসাগরম্ .. ৭৯..
ইত্যুপনিষত্ . ইতি যোগশিখোপনিষদি ষষ্ঠোঽধ্যাযঃ .. ৬..
ॐ সহ নাববতু সহ নৌ ভুনক্তু সহ বীর্যং করবাবহৈ .
তেজস্বিনবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ .. ॐ তত্সত্ ..
ইতি যোগশিখোপনিষত্সমাপ্তা ..