যোগতত্ত্ব

.. যোগতত্ত্বোপনিষত্ ..

যোগৈশ্বর্যং চ কৈবল্যং জাযতে যত্প্রসাদতঃ .
তদ্বৈষ্ণবং যোগতত্ত্বং রামচন্দ্রপদং ভজে ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
যোগতত্ত্বং প্রবক্ষ্যামি যোগিনাং হিতকাম্যযা .
যচ্ছৃত্বা চ পঠিত্বা চ সর্বপাপৈঃ প্রমুচ্যতে .. ১..
বিষ্ণুর্নাম মহাযোগী মহাভূতো মহাতপাঃ .
তত্ত্বমার্গে যথা দীপো দৃশ্যতে পুরুষোত্তমঃ .. ২..
তমারাধ্য জগন্নাথং প্রণিপত্য পিতামহঃ .
পপ্রচ্ছ যোগতত্ত্বং মে ব্রূহি চাষ্টাঙ্গসংযুতম্ .. ৩..
তমুবাচ হৃষীকেশো বক্ষ্যামি শৃণু তত্ত্বতঃ .
সর্বে জীবাঃ সুখৈর্দুখৈর্মাযাজালেন বেষ্টিতাঃ .. ৪..
তেষাং মুক্তিকরং মার্গং মাযাজালনিকৃন্তনম্ .
জন্মমৃত্যুজরাব্যাধিনাশনং মৃত্যুতারকম্ .. ৫..
নানামার্গৈস্তু দুষ্প্রাপং কৈবল্যং পরমং পদম্ .
পতিতাঃ শাস্ত্রজালেষু প্রজ্ঞযা তেন মোহিতাঃ .. ৬..
অনির্বাচ্যং পদং বক্তুং ন শক্যং তৈঃ সুরৈরপি .
স্বাত্মপ্রকাশরূপং তত্কিং শাস্ত্রেণ প্রকাশতে .. ৭..
নিষ্কলং নির্মলং শান্তং সর্বাতীতং নিরামযম্ .
তদেব জীবরূপেণ পুণ্যপাপফলৈর্বৃতম্ .. ৮..
পরমাত্মপদং নিত্যং তত্কথং জীবতাং গতম্ .
সর্বভাবপদাতীতং জ্ঞানরূপং নিরঞ্জনম্ .. ৯..
বারিবত্স্ফুরিতং তস্মিংস্তত্রাহংকৃতিরুত্থিতা .
পঞ্চাত্মকমভূত্পিণ্ডং ধাতুবদ্ধং গুণাত্মকম্ .. ১০..
সুখদুঃখৈঃ সমাযুক্তং জীবভাবনযা কুরু .
তেন জীবাভিধা প্রোক্তা বিশুদ্ধৈঃ পরমাত্মনি .. ১১..
কামক্রোধভযং চাপি মোহলোভমদো রজঃ .
জন্মমৃত্যুশ্চ কার্পণ্যং শোকস্তন্দ্রা ক্ষুধা তৃষা .. ১২..
তৃষ্ণা লজ্জা ভযং দুহ্খং বিষাদো হর্ষ এব চ .
এভির্দোষৈর্বিনির্মুক্তঃ স জীবঃ কেবলো মতঃ .. ১৩..
তস্মাদ্দোষবিনাশার্থমুপাযং কথযামি তে .
যোগহীনং কথং জ্ঞানং মোক্ষদং ভবতি ধ্রুবম্ .. ১৪..
যোগো হি জ্ঞানহীনস্তু ন ক্ষমো মোক্ষকর্মণি .
তস্মাজ্জ্ঞানং চ যোগং চ মুমুক্ষুর্দৃঢমভ্যসেত্ .. ১৫..
অজ্ঞানাদেব সংসারো জ্ঞানাদেব বিমুচ্যতে .
জ্ঞানস্বরূপমেবাদৌ জ্ঞানং জ্ঞেযৈকসাধনম্ .. ১৬..
জ্ঞাতং যেন নিজং রূপং কৈবল্যং পরমং পদম্ .
নিষ্কলং নির্মলং সাক্ষাত্সচ্চিদানন্দরূপকম্ .. ১৭..
উত্পত্তিস্থিতিসংহারস্ফূর্তিজ্ঞানবিবর্জিতম্ .
এতজ্জ্ঞানমিতি প্রোক্তমথ যোগং ব্রবীমি তে .. ১৮..
যোগো হি বহুধা ব্রহ্মন্ভিদ্যতে ব্যবহারতঃ .
মন্ত্রযোগো লযশ্চৈব হঠোঽসৌ রাজযোগতঃ .. ১৯..
আরম্ভশ্চ ঘটশ্চৈব তথা পরিচযঃ স্মৃতঃ .
নিষ্পত্তিশ্চেত্যবস্থা চ সর্বত্র পরিকীর্তিতা .. ২০..
এতেষাং লক্ষণং ব্রহ্মন্বক্ষ্যে শৃণু সমাসতঃ .
মাতৃকাদিযুতং মন্ত্রং দ্বাদশাব্দং তু যো জপেত্ .. ২১..
ক্রমেণ লভতে জ্ঞানমণিমাদিগুণান্বিতম্ .
অল্পবুদ্ধিরিমং যোগং সেবতে সাধকাধমঃ .. ২২..
লযযোগশ্চিত্তলযঃ কোটিশঃ পরিকীর্তিতঃ .
গচ্ছংস্তিষ্ঠন্স্বপন্ভুঞ্জন্ধ্যাযেন্নিষ্কলমীশ্বরম্ .. ২৩..
স এব লযযোগঃ স্যাদ্ধঠযোগমতঃ শৃণু .
যমশ্চ নিযমশ্চৈব আসনং প্রাণসংযমঃ .. ২৪..
প্রত্যাহারো ধারণা চ ধ্যানং ভ্রূমধ্যমে হরিম্ .
সমাধিঃ সমতাবস্থা সাষ্টাঙ্গো যোগ উচ্যতে .. ২৫..
মহামুদ্রা মহাবন্ধো মহাবেধশ্চ খেচরী .
জালন্ধরোড্ডিযাণশ্চ মূলবন্ধৈস্তথৈব চ .. ২৬..
দীর্ঘপ্রণবসন্ধানং সিদ্ধান্তশ্রবণং পরম্ .
বজ্রোলী চামরোলী চ সহজোলী ত্রিধা মতা .. ২৭..
এতেষাং লক্ষণং ব্রহ্মন্প্রত্যেকং শৃণু তত্ত্বতঃ .
লঘ্বাহারো যমেষ্বেকো মুখ্যা ভবতি নেতরঃ .. ২৮..
অহিংসা নিযমেষ্বেকা মুখ্যা বৈ চতুরানন .
সিদ্ধং পদ্মং তথা সিংহং ভদ্রং চেতি চতুষ্টযম্ .. ২৯..
প্রথমাভ্যাসকালে তু বিঘ্নাঃ স্যুশ্চতুরানন .
আলস্যং কত্থনং ধূর্তগোষ্টী মন্ত্রাদিসাধনম্ .. ৩০..
ধাতুস্ত্রীলৌল্যকাদীনি মৃগতৃষ্ণামযানি বৈ .
জ্ঞাত্বা সুধীস্ত্যজেত্সর্বান্বিঘ্নান্পুণ্যপ্রভাবতঃ .. ৩১..
প্রাণাযামং ততঃ কুর্যাত্পদ্মাসনগতঃ স্বযম্ .
সুশোভনং মঠং কুর্যাত্সূক্ষ্মদ্বারং তু নির্ব্রণম্ .. ৩২..
সুষ্ঠু লিপ্তং গোমযেন সুধযা বা প্রযত্নতঃ .
মত্কুণৈর্মশকৈর্লূতৈর্বর্জিতং চ প্রযত্নতঃ .. ৩৩..
দিনে দিনে চ সংমৃষ্টং সংমার্জন্যা বিশেষতঃ .
বাসিতং চ সুগন্ধেন ধূপিতং গুগ্গুলাদিভিঃ .. ৩৪..
নাত্যুচ্ছ্রিতং নাতিনীচং চৈলাজিনকুশোত্তরম্ .
তত্রোপবিশ্য মেধাবী পদ্মাসনসমন্বিতঃ .. ৩৫..
ঋজুকাযঃ প্রাঞ্জলিশ্চ প্রণমেদিষ্টদেবতাম্ .
ততো দক্ষিণহস্তস্য অঙ্গুষ্ঠেনৈব পিঙ্গলাম্ .. ৩৬..
নিরুধ্য পূরযেদ্বাযুমিডযা তু শনৈঃ শনৈঃ .
যথাশক্ত্যবিরোধেন ততঃ কুর্যাচ্চ কুম্ভকম্ .. ৩৭..
পুনস্ত্যজেত্পিঙ্গলযা শনৈরেব ন বেগতঃ .
পুনঃ পিঙ্গলযাপূর্য পূরযেদুদরং শনৈঃ .. ৩৮..
ধারযিত্বা যথাশক্তি রেচযেদিডযা শনৈঃ .
যযা ত্যজেত্তযাপূর্য ধারযেদবিরোধতঃ .. ৩৯..
জানু প্রদক্ষিণীকৃত্য ন দ্রুতং ন বিলম্বিতম্ .
অঙ্গুলিস্ফোটনং কুর্যাত্সা মাত্রা পরিগীযতে .. ৪০..
ইডযা বাযুমারোপ্য শনৈঃ ষোডশমাত্রযা .
কুম্ভযেত্পূরিতং পশ্চাচ্চতুঃষষ্ট্যা তু মাত্রযা .. ৪১..
রেচযেত্পিঙ্গলানাড্যা দ্বাত্রিংশন্মাত্রযা পুনঃ .
পুনঃ পিঙ্গলযাপূর্য পূর্ববত্সুসমাহিতঃ .. ৪২..
প্রাতর্মধ্যন্দিনে সাযমর্ধরাত্রে চ কুম্ভকান্ .
শনৈরশীতিপর্যন্তং চতুর্বারং সমভ্যসেত্ .. ৪৩..
এবং মাসত্রযাভ্যাসান্নাডীশুদ্ধিস্ততো ভবেত্ .
যদা তু নাডীশুদ্ধিঃ স্যাত্তদা চিহ্নানি বাহ্যতঃ .. ৪৪..
জাযন্তে যোগিনো দেহে তানি বক্ষ্যাম্যশেষতঃ .
শরীরলঘুতা দীপ্তির্জাঠরাগ্নিবিবর্ধনম্ .. ৪৫..
কৃশত্বং চ শরীরস্য তদা জাযেত নিশ্চিতম্ .
যোগাবিঘ্নকরাহারং বর্জযেদ্যোগবিত্তমঃ .. ৪৬..
লবণং সর্ষপং চাম্লমুষ্ণং রূক্ষং চ তীক্ষ্ণকম্ .
শাকজাতং রামঠাদি বহ্নিস্ত্রীপথসেবনম্ .. ৪৭..
প্রাতঃস্নানোপবাসাদিকাযক্লেশাংশ্চ বর্জযেত্ .
অভ্যাসকালে প্রথমং শস্তং ক্ষীরাজ্যভোজনম্ .. ৪৮..
গোধূমমুদ্গশাল্যন্নং যোগবৃদ্ধিকরং বিদুঃ .
ততঃ পরং যথেষ্টং তু শক্তঃ স্যাদ্বাযুধারণে .. ৪৯..
যথেষ্টবাযুধারণাদ্বাযোঃ সিদ্ধ্যেত্কেবলকুম্ভকঃ .
কেবলে কুম্ভক সিদ্ধে রেচপূরবিবর্জিতে .. ৫০..
ন তস্য দুর্লভং কিঞ্চিত্ত্রিষু লোকেষু বিদ্যতে .
প্রস্বেদো জাযতে পূর্বং মর্দনং তেন কারযেত্ .. ৫১..
ততোঽপি ধারণাদ্বাযোঃ ক্রমেণৈব শনৈঃ শনৈঃ .
কম্পো ভবতি দেহস্য আসনস্থস্য দেহিনঃ .. ৫২..
ততোঽধিকতরাভ্যাসাদ্দার্দুরী স্বেন জাযতে .
যথা চ দর্দুরো ভাব উত্প্লুন্যোত্প্লুত্য গচ্ছতি .. ৫৩..
পদ্মাসনস্থিতো যোগী তথা গচ্ছতি ভূতলে .
ততোঽধিকতরভ্যাসাদ্ভূমিত্যাগশ্চ জাযতে .. ৫৪..
পদ্মাসনস্থ এবাসৌ ভূমিমুত্সৃজ্য বর্ততে .
অতিমানুষচেষ্টাদি তথা সামর্থ্যমুদ্ভবেত্ .. ৫৫..
ন দর্শযেচ্চ সামর্থ্যং দর্শনং বীর্যবত্তরম্ .
স্বল্পং বা বহুধা দুঃখং যোগী ন ব্যথতে তদা .. ৫৬..
অল্পমূত্রপুরীষশ্চ স্বল্পনিদ্রশ্চ জাযতে .
কীলবো দৃষিকা লালা স্বেদদুর্গন্ধতাননে .. ৫৭..
এতানি সর্বথা তস্য ন জাযন্তে ততঃ পরম্ .
ততোঽধিকতরাভ্যাসাদ্বলমুত্পদ্যতে বহু .. ৫৮..
যেন ভূচর সিদ্ধিঃ স্যাদ্ভূচরাণাং জযে ক্ষমঃ .
ব্যাঘ্রো বা শরভো ব্যাপি গজো গবয এব বা .. ৫৯..
সিংহো বা যোগিনা তেন ম্রিযন্তে হস্ততাডিতাঃ .
কন্দর্পস্য যথা রূপং তথা স্যাদপি যোগিনঃ .. ৬০..
তদ্রূপবশগা নার্যঃ কাঙ্ক্ষন্তে তস্য সঙ্গমম্ .
যদি সঙ্গং করোত্যেষ তস্য বিন্দুক্ষযো ভবেত্ .. ৬১..
বর্জযিত্বা স্ত্রিযাঃ সঙ্গং কুর্যাদভ্যাসমাদরাত্ .
যোগিনোঽঙ্গে সুগন্ধশ্চ জাযতে বিন্দুধারণাত্ .. ৬২..
ততো রহস্যুপাবিষ্টঃ প্রণবং প্লুতমাত্রযা .
জপেত্পূর্বার্জিতানাং তু পাপানাং নাশহেতবে .. ৬৩..
সর্ববিঘ্নহরো মন্ত্রঃ প্রণবঃ সর্বদোষহা .
এবমভ্যাসযোগেন সিদ্ধিরারম্ভসম্ভবা .. ৬৪..
ততো ভবেদ্ধঠাবস্থা পবনাভ্যাসতত্পরা .
প্রাণোঽপানো মনো বুদ্ধির্জীবাত্মপরমাত্মনোঃ .. ৬৫..
অন্যোন্যস্যাবিরোধেন একতা ঘটতে যদা .
ঘটাবস্থেতি সা প্রোক্তা তচ্চিহ্নানি ব্রবীম্যহম্ .. ৬৬..
পূর্বং যঃ কথিতোঽভ্যাসশ্চতুর্থাংশং পরিগ্রহেত্ .
দিবা বা যদি বা সাযং যামমাত্রং সমভ্যসেত্ .. ৬৭..
একবারং প্রতিদিনং কুর্যাত্কেবলকুম্ভকম্ .
ইন্দ্রিযাণীন্দ্রিযার্থেভ্যো যত্প্রত্যাহরণং স্ফুটম্ .. ৬৮..
যোগী কুম্ভকমাস্থায প্রত্যাহারঃ স উচ্যতে .
যদ্যত্পশ্যতি চক্ষুর্ভ্যাং তত্তদাত্মেতি ভাবযেত্ .. ৬৯..
যদ্যচ্ছৃণোতি কর্ণাভ্যাং তত্তদাত্মেতি ভাবযেত্ .
লভতে নাসযা যদ্যত্তত্তদাত্মেতি ভাবযেত্ .. ৭০..
জিহ্বযা যদ্রসং হ্যত্তি তত্তদাত্মেতি ভাবযেত্ .
ত্বচা যদ্যত্স্পৃশেদ্যোগী তত্তদাত্মেতি ভাবযেত্ .. ৭১..
এবং জ্ঞানেন্দ্রিযাণাং তু তত্তত্সৌখ্যং সুসাধযেত্ .
যামমাত্রং প্রতিদিনং যোগী যত্নাদতন্দ্রিতঃ .. ৭২..
যথা বা চিত্তসামর্থ্যং জাযতে যোগিনো ধ্রুবম্ .
দূরশ্রুতির্দূরদৃষ্টিঃ ক্ষণাদ্দূরগমস্তথা .. ৭৩..
বাক্সিদ্ধিঃ কামরূপত্বমদৃশ্যকরণী তথা .
মলমূত্রপ্রলেপেন লোহাদেঃ স্বর্ণতা ভবেত্ .. ৭৪..
খে গতিস্তস্য জাযেত সন্ততাভ্যাসযোগতঃ .
সদা বুদ্ধিমতা ভাব্যং যোগিনা যোগসিদ্ধযে .. ৭৫..
এতে বিঘ্না মহাসিদ্ধের্ন রমেত্তেষু বুদ্ধিমান্ .
ন দর্শযেত্স্বসামর্থ্যং যস্যকস্যাপি যোগিরাট্ .. ৭৬..
যথা মূঢো যথা মূর্খো যথা বধির এব বা .
তথা বর্তেত লোকস্য স্বসামর্থ্যস্য গুপ্তযে .. ৭৭..
শিষ্যাশ্চ স্বস্বকার্যেষু প্রার্থযন্তি ন সংশযঃ .
তত্তত্কর্মকরব্যগ্রঃ স্বাভ্যাসেঽবিস্মৃতো ভবেত্ .. ৭৮..
অবিস্মৃত্য গুরোর্বাক্যমভ্যসেত্তদহর্নিশম্ .
এবং ভবেদ্ধঠাবস্থা সন্ততাভ্যাসযোগতঃ .. ৭৯..
অনভ্যাসবতশ্চৈব বৃথাগোষ্ঠ্যা ন সিদ্ধ্যতি .
তস্মাত্সর্বপ্রযত্নেন যোগমেব সদাভ্যসেত্ .. ৮০..
ততঃ পরিচযাবস্থা জাযতেঽভ্যাসযোগতঃ .
বাযুঃ পরিচিতো যত্নাদগ্নিনা সহ কুণ্ডলীম্ .. ৮১..
ভাবযিত্বা সুষুম্নাযাং প্রবিশেদনিরোধতঃ .
বাযুনা সহ চিত্তং চ প্রবিশেচ্চ মহাপথম্ .. ৮২..
যস্য চিত্তং স্বপবনং সুষুম্নাং প্রবিশেদিহ .
ভূমিরাপোঽনলো বাযুরাকাশশ্চেতি পঞ্চকঃ .. ৮৩..
যেষু পঞ্চসু দেবানাং ধারণা পঞ্চধোদ্যতে .
পাদাদিজানুপর্যন্তং পৃথিবীস্থানমুচ্যতে .. ৮৪..
পৃথিবী চতুরস্রং চ পীতবর্ণং লবর্ণকম্ .
পার্থিবে বাযুমারোপ্য লকারেণ সমন্বিতম্ .. ৮৫..
ধ্যাযংশ্চতুর্ভুজাকারং চতুর্বক্ত্রং হিরণ্মযম্ .
ধারযেত্পঞ্চঘটিকাঃ পৃথিবীজযমাপ্নুযাত্ .. ৮৬..
পৃথিবীযোগতো মৃত্যুর্ন ভবেদস্য যোগিনঃ .
আজানোঃ পাযুপর্যন্তমপাং স্থানং প্রকীর্তিতম্ .. ৮৭..
আপোঽর্ধচন্দ্রং শুক্লং চ বংবীজং পরিকীর্তিতম্ .
বারুণে বাযুমারোপ্য বকারেণ সমন্বিতম্ .. ৮৮..
স্মরন্নারাযণং দেবং চতুর্বাহুং কিরীটিনম্ .
শুদ্ধস্ফটিকসঙ্কাশং পীতবাসসমচ্যুতম্ .. ৮৯..
ধারযেত্পঞ্চঘটিকাঃ সর্বপাপৈঃ প্রমুচ্যতে .
ততো জলাদ্ভযং নাস্তি জলে মৃত্যুর্ন বিদ্যতে .. ৯০..
আপাযোর্হৃদযান্তং চ বহ্নিস্থানং প্রকীর্তিতম্ .
বহ্নিস্ত্রিকোণং রক্তং চ রেফাক্ষরসমুদ্ভবম্ .. ৯১..
বহ্নৌ চানিলমারোপ্য রেফাক্ষরসমুজ্জ্বলম্ .
ত্রিযক্ষং বরদং রুদ্রং তরুণাদিত্যসংনিভম্ .. ৯২..
ভস্মোদ্ধূলিতসর্বাঙ্গং সুপ্রসন্নমনুস্মরন্ .
ধারযেত্পঞ্চঘটিকা বহ্নিনাসৌ ন দাহ্যতে .. ৯৩..
ন দহ্যতে শরীরং চ প্রবিষ্টস্যাগ্নিমণ্ডলে .
আহৃদযাদ্ভ্রুবোর্মধ্যং বাযুস্থানং প্রকীর্তিতম্ .. ৯৪..
বাযুঃ ষট্কোণকং কৃষ্ণং যকারাক্ষরভাসুরম্ .
মারুতং মরুতাং স্থানে যকারাক্ষরভাসুরম্ .. ৯৫..
ধারযেত্তত্র সর্বজ্ঞমীশ্বরং বিশ্বতোমুখম্ .
ধারযেত্পঞ্চঘটিকা বাযুবদ্ব্যোমগো ভবেত্ .. ৯৬..
মরণং ন তু বাযোশ্চ ভযং ভবতি যোগিনঃ .
আভ্রূমধ্যাত্তু মূর্ধান্তমাকাশস্থানমুচ্যতে .. ৯৭..
ব্যোম বৃত্তং চ ধূম্রং চ হকারাক্ষরভাসুরম্ .
আকাশে বাযুমারোপ্য হকারোপরি শঙ্করম্ .. ৯৮..
বিন্দুরূপং মহাদেবং ব্যোমাকারং সদাশিবম্ .
শুদ্ধস্ফটিকসঙ্কাশং ধৃতবালেন্দুমৌলিনম্ .. ৯৯..
পঞ্চবক্ত্রযুতং সৌম্যং দশবাহুং ত্রিলোচনম্ .
সর্বাযুধৈর্ধৃতাকারং সর্বভূষণভূষিতম্ .. ১০০..
উমার্ধদেহং বরদং সর্বকারণকারণম্ .
আকাশধারণাত্তস্য খেচরত্বং ভবেদ্ধ্রুবম্ .. ১০১..
যত্রকুত্র স্থিতো বাপি সুখমত্যন্তমশ্নুতে .
এবং চ ধারণাঃ পঞ্চ কুর্যাদ্যোগী বিচক্ষণঃ .. ১০২..
ততো দৃঢশরীরঃ স্যান্মৃত্যুস্তস্য ন বিদ্যতে .
ব্রহ্মণঃ প্রলযেনাপি ন সীদতি মহামতিঃ .. ১০৩..
সমভ্যসেত্তথা ধ্যানং ঘটিকাষষ্টিমেব চ .
বাযুং নিরুধ্য চাকাশে দেবতামিষ্টদামিতি .. ১০৪..
সগুণং ধ্যানমেতত্স্যাদণিমাদিগুণপ্রদম্ .
নির্গুণধ্যানযুক্তস্য সমাধিশ্চ ততো ভবেত্ .. ১০৫..
দিনদ্বাদশকেনৈব সমাধিং সমবাপ্নুযাত্ .
বাযুং নিরুধ্য মেধাবী জীবন্মুক্তো ভবত্যযম্ .. ১০৬..
সমাধিঃ সমতাবস্থা জীবাত্মপরমাত্মনোঃ .
যদি স্বদেহমুত্স্রষ্টুমিচ্ছা চেদুত্সৃজেত্স্বযম্ .. ১০৭..
পরব্রহ্মণি লীযেত ন তস্যোত্ক্রান্তিরিষ্যতে .
অথ নো চেত্সমুত্স্রষ্টুং স্বশরীরং প্রিযং যদি .. ১০৮..
সর্বলোকেষু বিহরন্নণিমাদিগুণান্বিতঃ .
কদাচিত্স্বেচ্ছযা দেবো ভূত্বা স্বর্গে মহীযতে .. ১০৯..
মনুষ্যো বাপি যক্ষো বা স্বেচ্ছযাপীক্ষণদ্ভবেত্ .
সিংহো ব্যাঘ্রো গজো বাশ্বঃ স্বেচ্ছযা বহুতামিযাত্ .. ১১০..
যথেষ্টমেব বর্তেত যদ্বা যোগী মহেশ্বরঃ .
অভ্যাসভেদতো ভেদঃ ফলং তু সমমেব হি .. ১১১..
পার্ষ্ণিং বামস্য পাদস্য যোনিস্থানে নিযোজযেত্ .
প্রসার্য দক্ষিণং পাদং হস্তাভ্যাং ধারযেদ্দৃঢম্ .. ১১২..
চুবুকং হৃদি বিন্যস্য পূরযেদ্বাযুনা পুনঃ .
কুম্ভকেন যথাশক্তি ধারযিত্বা তু রেচযেত্ .. ১১৩..
বামাঙ্গেন সমভ্যস্য দক্ষাঙ্গেন ততোঽভ্যসেত্ .
প্রসারিতস্তু যঃ পাদস্তমূরূপরি নামযেত্ .. ১১৪..
অযমেব মহাবন্ধ উভযত্রৈবমভ্যসেত্ .
মহাবন্ধস্থিতো যোগী কৃত্বা পূরকমেকধীঃ .. ১১৫..
বাযুনা গতিমাবৃত্য নিভৃতং কর্ণমুদ্রযা .
পুটদ্বযং সমাক্রম্য বাযুঃ স্ফুরতি সত্বরম্ .. ১১৬..
অযমেব মহাবেধঃ সিদ্ধৈরভ্যস্যতেঽনিশম্ .
অন্তঃ কপালকুহরে জিহ্বাং ব্যাবৃত্য ধারযেত্ .. ১১৭..
ভ্রূমধ্যদৃষ্টিরপ্যেষা মুদ্রা ভবতি খেচরী .
কণ্ঠমাকুঞ্চ্য হৃদযে স্থাপযেদ্দৃঢযা ধিযা .. ১১৮..
বন্ধো জালন্ধরাখ্যোঽযং মৃত্যুমাতঙ্গকেসরী .
বন্ধো যেন সুষুম্নাযাং প্রাণস্তূড্ডীযতে যতঃ .. ১১৯..
উড্যানাখ্যো হি বন্ধোঽযং যোগিভিঃ সমুদাহৃতঃ .
পার্ষ্ণিভাগেন সংপীড্য যোনিমাকুঞ্চযেদ্দৃঢম্ .. ১২০..
অপানমূর্ধ্বমুত্থাপ্য যোনিবন্ধোঽযমুচ্যতে .
প্রাণাপানৌ নাদবিন্দূ মূলবন্ধেন চৈকতাম্ .. ১২১..
গত্বা যোগস্য সংসিদ্ধিং যচ্ছতো নাত্র সংশযঃ .
করণী বিপরীতাখ্যা সর্বব্যাধিবিনাশিনী .. ১২২..
নিত্যমভ্যাসযুক্তস্য জাঠরাগ্নিবিবর্ধনী .
আহারো বহুলস্তস্য সংপাদ্যঃ সাধকস্য চ .. ১২৩..
অল্পাহারো যদি ভবেদগ্নির্দেহং হরেত্ক্ষণাত্ .
অধঃশিরশ্চোর্ধ্বপাদঃ ক্ষণং স্যাত্প্রথমে দিনে .. ১২৪..
ক্ষণাচ্চ কিঞ্চিদধিকমভ্যসেত্তু দিনেদিনে .
বলী চ পলিতং চৈব ষণ্মাসার্ধান্ন দৃশ্যতে .. ১২৫..
যামমাত্রং তু যো নিত্যমভ্যসেত্স তু কালজিত্ .
বজ্রোলীমভ্যসেদ্যস্তু স যোগী সিদ্ধিভাজনম্ .. ১২৬..
লভ্যতে যদি তস্যৈব যোগসিদ্ধিঃ করে স্থিতা .
অতীতানাগতং বেত্তি খেচরী চ ভবেদ্ধ্রুবম্ .. ১২৭..
অমরীং যঃ পিবেন্নিত্যং নস্যং কুর্বন্দিনে দিনে .
বজ্রোলীমভ্যসেন্নিত্যমমরোলীতি কথ্যতে .. ১২৮..
ততো ভবেদ্রাজযোগো নান্তরা ভবতি ধ্রুবম্ .
যদা তু রাজযোগেন নিষ্পন্না যোগিভিঃ ক্রিযা .. ১২৯..
তদা বিবেকবৈরাগ্যং জাযতে যোগিনো ধ্রুবম্ .
বিষ্ণুর্নাম মহাযোগী মহাভূতো মহাতপাঃ .. ১৩০..
তত্ত্বমার্গে যথা দীপো দৃশ্যতে পুরুষোত্তমঃ .
যঃ স্তনঃ পূর্বপীতস্তং নিষ্পীড্য মুদমশ্নুতে .. ১৩১..
যস্মাজ্জাতো ভগাত্পূর্বং তস্মিন্নেব ভগে রমন্ .
যা মাতা সা পুনর্ভার্যা যা ভার্যা মাতরেব হি .. ১৩২..
যঃ পিতা স পুনঃ পুত্রো যঃ পুত্রঃ স পুনঃ পিতা .
এবং সংসারচক্রং কূপচক্রেণ ঘটা ইব .. ১৩৩..
ভ্রমন্তো যোনিজন্মানি শ্রুত্বা লোকান্সমশ্নুতে .
ত্রযো লোকাস্ত্রযো বেদাস্তিস্রঃ সন্ধ্যাস্ত্রযঃ স্বরাঃ .. ১৩৪..
ত্রযোঽগ্নযশ্চ ত্রিগুণাঃ স্থিতাঃ সর্বে ত্রযাক্ষরে .
ত্রযাণামক্ষরাণাং চ যোঽধীতেঽপ্যর্ধমক্ষরম্ .. ১৩৫..
তেন সর্বমিদং প্রোতং তত্সত্যং তত্পরং পদম্ .
পুষ্পমধ্যে যথা গন্ধঃ পযোমধ্যে যথা ঘৃতম্ .. ১৩৬..
তিলমধ্যে যথা তৈলং পাষাণেষ্বিব কাঞ্চনম্ .
হৃদি স্থানে স্থিতং পদ্মং তস্য বক্ত্রমধোমুখম্ .. ১৩৭..
ঊর্ধ্বনালমধোবিন্দুস্তস্য মধ্যে স্থিতং মনঃ .
অকারে রেচিতং পদ্মমুকারেণৈব ভিদ্যতে .. ১৩৮..
মকারে লভতে নাদমর্ধমাত্রা তু নিশ্চলা .
শুদ্ধস্ফটিকসঙ্কাশং নিষ্কলং পাপনাশনম্ .. ১৩৯..
লভতে যোগযুক্তাত্মা পুরুষস্তত্পরং পদম্ .
কূর্মঃ স্বপাণিপাদাদিশিরশ্চাত্মনি ধারযেত্ .. ১৪০..
এবং দ্বারেষু সর্বেষু বাযুপূরিতরেচিতঃ .
নিষিদ্ধং তু নবদ্বারে ঊর্ধ্বং প্রাঙ্নিশ্বসংস্তথা .. ১৪১..
ঘটমধ্যে যথা দীপো নিবাতং কুম্ভকং বিদুঃ .
নিষিদ্ধৈর্নবভির্দ্বারৈর্নির্জনে নিরুপদ্রবে .. ১৪২..
নিশ্চিতং ত্বাত্মমাত্রেণাবশিষ্টং যোগসেবযেত্যুপনিষত্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ইতি যোগতত্ত্বোপনিষত্ সমাপ্তা ..