যোগচুডামণি

.. যোগচূডামণ্যুপনিষত্ ..

মূলাধারাদিষট্চক্রং সহস্রারোপরি স্থিতম্ .
যোগজ্ঞানৈক ফলকং রামচন্দ্রপদং ভজে ..
ॐ আপ্যাযন্তু মমাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং
ব্রহ্মোপনিষদং মাহং ব্রহ্ম নিরাকুর্যাং মা মা
ব্রহ্ম নিরাকরোদনিরাকরণমস্ত্বনিরাকরণং মেস্তু
তদাত্মনি নিরতে য উপনিষত্সু ধর্মাস্তে মযি সন্তু
তে মযি সন্তু .. ॐ শান্তিঃ শান্তিঃ শান্তিঃ ..
ॐ যোগচূডামণিং বক্ষ্যে যোগিনাং হিতকাম্যযা .
কৈবল্যসিদ্ধিদং গূঢং সেবিতং যোগবিত্তমৈঃ .. ১..
আসনং প্রাণসংরোধঃ প্রত্যাহারশ্চ ধারণা .
ধ্যানং সমাধিরেতানি যোগাঙ্গানি ভবন্তি ষট্ .. ২..
একং সিদ্ধাসনং প্রোক্তং দ্বিতীযং কমলাসনম্ .
ষট্চক্রং ষোডশাধারং ত্রিলক্ষ্যং ব্যোমপঞ্চকম্ .. ৩..
স্বদেহে যো ন জানাতি তস্য সিদ্ধিঃ কথং ভবেত্ .
চতুর্দলং স্যাদাধারং স্বাধিষ্ঠানং চ ষড্দলম্ .. ৪..
নাভৌ দশদলং পদ্মং হৃদযে দ্বাদশারকম্ .
ষোডশারং বিশুদ্ধাখ্যং ভ্রূমধ্যে দ্বিদলং তথা .. ৫..
সহস্রদলসঙ্খ্যাতং ব্রহ্মরন্ধ্রে মহাপথি .
আধারং প্রথমং চক্রং স্বাধিষ্ঠানং দ্বিতীযকম্ .. ৬..
যোনিস্থানং দ্বযোর্মধ্যে কামরূপং নিগদ্যতে .
কামাখ্যং তু গুদস্থানে পঙ্কজং তু চতুর্দলম্ .. ৭..
তন্মধ্যে প্রোচ্যতে যোনিঃ কামাখ্যা সিদ্ধবন্দিতা .
তস্য মধ্যে মহালিঙ্গং পশ্চিমাভিমুখং স্থিতম্ .. ৮..
নাভৌ তু মণিবদ্বিম্বং যো জানাতি স যোগবিত্ .
তপ্তচামীকরাভাসং তডিল্লেখেব বিস্ফুরত্ .. ৯..
ত্রিকোণং তত্পুরং বহ্নেরধোমেঢ্রাত্প্রতিষ্ঠিতম্ .
সমাধৌ পরমং জ্যোতিরনন্তং বিশ্বতোমুখম্ .. ১০..
তস্মিন্দৃষ্টে মহাযোগে যাতাযাতো ন বিদ্যতে .
স্বশব্দেন ভবেত্প্রাণঃ স্বাধিষ্ঠানং তদাশ্রযঃ .. ১১..
স্বাধিষ্ঠাশ্রযাদস্মান্মেঢ্রমেবভিধীযতে .
তন্তুনা মণিবত্প্রোতো যোঽত্র কন্দঃ সুষুম্নযা .. ১২..
তন্নাভিমণ্ডলে চক্রং প্রোচ্যতে মণিপূরকম্ .
দ্বাদশারে মহাচক্রে পুণ্যপাপবিবর্জিতে .. ১৩..
তাবজ্জীবো ভ্রমত্যেবং যাবত্তত্ত্বং ন বিন্দতি .
ঊর্ধ্বং মেঢ্রাদধো নাভেঃ কন্দে যোনিঃ খগাণ্ডবত্ .. ১৪..
তত্র নাড্যঃ সমুত্পন্নাঃ সহস্রাণাং দ্বিসপ্ততিঃ .
তেষু নাডীসহস্রেষু দ্বিসপ্ততিরুদাহৃতা .. ১৫..
প্রধানাঃ প্রাণবাহিন্যো ভূযস্তাসু দশস্মৃতাঃ .
ইডা চ পিঙ্গলা চৈব সুষুম্না চ তৃতীযগা .. ১৬..
গান্ধারী হস্তিজিহ্বা চ পূষা চৈব যশস্বিনী .
অলম্বুসা কুহূশ্চৈব শঙ্খিনী দশমী স্মৃতা .. ১৭..
এতন্নাডীমহাচক্রং জ্ঞাতব্যং যোগিভিঃ সদা .
ইডা বামে স্থিতা ভাগে দক্ষিণে পিঙ্গলা স্থিতা .. ১৮..
সুষুম্না মধ্যদেশে তু গান্ধারী বামচক্ষুষি .
দক্ষিণে হস্তিজিহ্বা চ পূষা কর্ণে চ দক্ষিণে .. ১৯..
যশস্বিনী বামকর্ণে চাননে চাপুঅলম্বুসা .
কুহূশ্চ লিঙ্গদেশে তু মূলস্থানে তু শঙ্খিনী .. ২০..
এবং দ্বারং সমাশ্রিত্য তিষ্ঠন্তে নাডযঃ ক্রমাত্ .
ইডাপিঙ্গলাসৌষুম্নাঃ প্রাণমার্গে চ সংস্থিতাঃ .. ২১..
সততং প্রাণবাহিন্যঃ সোমসূর্যাগ্নিদেবতাঃ .
প্রাণাপানসমানাখ্যা ব্যানোদানৌ চ বাযবঃ .. ২২..
নাগঃ কূর্মোঽথ কৃকরো দেবদত্তো ধনঞ্জযঃ .
হৃদি প্রাণঃ স্থিতো নিত্যমপানো গুদমণ্ডলে .. ২৩..
সমানো নাভিদেশে তু উদানঃ কণ্ঠমধ্যগঃ .
ব্যানঃ সর্বশরীরে তু প্রধানাঃ পঞ্চবাযবঃ .. ২৪..
উদ্গারে নাগ আখ্যাতঃ কূর্ম উন্মীলনে তথা .
কৃকরঃ ক্ষুত্করো জ্ঞেযো দেবদত্তো বিজৃম্ভণে .. ২৫..
ন জহাতি মৃতং বাপি সর্বব্যাপী ধনঞ্জযঃ .
এতে নাডীষু সর্বাসু ভ্রমন্তে জীবজন্তবঃ .. ২৬..
আক্ষিপ্তো ভুজদণ্ডেন যথা চলতি কন্দুকঃ .
প্রাণাপানসমাক্ষিপ্তস্তথা জীবো ন তিষ্ঠতি .. ২৭..
প্রাণাপানবশো জীবো হ্যধশ্চোর্ধ্বং চ ধাবতি .
বামদক্ষিণমার্গাভ্যাং চঞ্চলত্বান্ন দৃশ্যতে .. ২৮..
রজ্জুবদ্ধো যথা শ্যেনো গতোঽপ্যাকৃষ্যতে পুনঃ .
গুণবদ্ধস্তথা জীবঃ প্রাণাপানেন কর্ষতি .. ২৯..
প্রাণাপানবশো জীবো হ্যধশ্চোর্ধ্বং চ গচ্ছতি .
অপানঃ কর্ষতি প্রাণং প্রাণোঽপানং চ কর্ষতি .. ৩০..
ঊর্ধ্বাধঃসংস্থিতাবেতৌ যো জানাতি স যোগবিত্ .
হকারেণ বহির্যাতি সকারেণ বিশেত্পুনঃ .. ৩১..
হংসহংসেত্যমুং মত্রং জীবো জপতি সর্বদা .
ষট্শতানি দিবারাত্রৌ সহস্রাণ্যেকবিংশতিঃ .. ৩১..
এতত্সঙ্খ্যান্বিতং মন্ত্রং জীবো জপতি সর্বদা .
অজপানাম গাযত্রী যোগিনাং মোক্ষদা সদা .. ৩৩..
অস্যাঃ সঙ্কল্পমাত্রেণ সর্বপাপৈঃ প্রমুচ্যতে .
অনযা সদৃশী বিদ্যা অনযা সদৃশো জপঃ .. ৩৪..
অনযা সদৃশং জ্ঞানং ন ভূতং ন ভবিষ্যতি .
কুণ্ডলিন্যা সমুদ্ভূতা গাযত্রী প্রাণধারিণী ..৩৫..
প্রাণবিদ্যা মহাবিদ্যা যস্তাং বেত্তি স বেদবিত্ .
কন্দোর্ধ্বে কুণ্ডলীশক্তিরষ্টধা কুণ্ডলাকৃতিঃ .. ৩৬..
ব্রহ্মদ্বারমুখং নিত্যং মুখেনাচ্ছায তিষ্ঠতি .
যেন দ্বারেণ গন্তব্যং ব্রহ্মদ্বারমনামযম্ .. ৩৭..
মুখেনাচ্ছাদ্য তদ্দ্বারং প্রসুপ্তা পরমেশ্বরী .
প্রবুদ্ধা বহ্নিযোগেন মনসা মরুতা সহ .. ৩৮..
সূচিবদ্গাত্রমাদায ব্রজত্যূর্ধ্বং সুষুম্নযা .
উদ্ঘাটযেত্কবাটং তু যথাকুঞ্চিকযা গৃহম্ .
কুণ্ডলিন্যাং তথা যোগী মোক্ষদ্বারং প্রভেদযেত্ .. ৩৯..
কৃত্বা সংপুটিতৌ করৌ দৃঢতরং বধ্বা তু পদ্মাসনং
     গাঢং বক্ষসি সংনিধায চুবুকং ধ্যানং চ তচ্চেষ্টিতম্ .
বারংবারমপানমূর্ধ্বমনিলং প্রোচ্ছারযেত্পূরিতং
     মুঞ্চন্প্রাণমুপৈতি বোধমতুলং শক্তিপ্রভাবান্নরঃ .. ৪০..
অঙ্গানাং মর্দনং কৃত্বা শ্রমসংজাতবারিণা .
কট্বম্ললবণত্যাগী ক্ষীরভোজনমাচরেত্ ..৪১..
ব্রহ্মচারী মিতাহারী যোগী যোগপরাযণঃ .
অব্দাদূর্ধ্বং ভবেত্সিদ্ধো নাত্র কার্যা বিচারণা .. ৪২..
সুস্নিগ্ধমধুরাহারশ্চতুর্থাংশবিবর্জিতঃ .
ভুঞ্জতে শিবসংপ্রীত্যা মিতাহারী স উচ্যতে .. ৪৩..
কন্দোর্ধ্বে কুণ্ডলীশক্তিরষ্টধা কুণ্ডলীকৃতিঃ .
বন্ধনায চ মূঢানাং যোগিনাং মোক্ষদা সদা .. ৪৪..
মহামুদ্রা নভোমুদ্রা ওড্যাণং চ জলন্ধরম্ .
মূলবন্ধং চ যো বেত্তি স যোগী মুক্তিভাজনম্ .. ৪৫..
পার্ষ্ণিঘাতেন সংপীড্য যোনিমাকুঞ্চযেদ্দৃঢম্ .
অপানমূর্ধ্বমাকৃষ্য মূলবন্ধো বিধীযতে .. ৪৬..
অপানপ্রাণযোরৈক্যং ক্ষযান্মূত্রপুরীষযোঃ .
যুবা ভবতি বৃদ্ধোঽপি সততং মূলবন্ধনাত্ .. ৪৭..
ওড্যাণং কুরুতে যস্মাদবিশ্রান্তং মহাখগঃ .
ওড্ডিযাণং তদেব স্যান্মৃত্যুমাতঙ্গকেসরী .. ৪৮..
উদরাত্পশ্চিমং তাণমধো নাভের্নিগদ্যতে .
ওড্যাণমুদরে বন্ধস্তত্র বন্ধো বিধীযতে .. ৪৯..
বধ্নাতি হি শিরোজাতমধোগামি নভোজলম্ .
ততো জালন্ধরো বন্ধঃ কষ্টদুঃখৌঘনাশনঃ .. ৫০..
জালন্ধরে কৃতে বন্ধে কণ্ঠসঙ্কোচলক্ষণে .
ন পীযূষং পতত্যগ্নৌ ন চ বাযুঃ প্রধাবতি .. ৫১..
কপালকুহরে জিহ্বা প্রবিষ্টা বিপরীতগা .
ভ্রুবোরন্তর্গতা দৃষ্টির্মুদ্রা ভবতি খেচরী .. ৫২..
ন রোগো মরণং তস্য ন নিদ্রা ন ক্ষুধা তৃষা .
ন চ মূর্চ্ছা ভবেত্তস্য যো মুদ্রাং বেত্তি খেচরীম্ .. ৫৩..
পীড্যতে ন চ রোগেণ লিখ্যতে ন স কর্মভিঃ .
বাধ্যতে ন চ কেনাপি যো মুদ্রাং বেত্তি খেচরীম্ .. ৫৪..
চিত্তং চরতি খে যস্মাজ্জিহ্বা চরতি খে যতঃ .
তেনেযং খেচরী মুদ্রা সর্বসিদ্ধনমস্কৃতা ..৫৫..
বিন্দুমূলশরীরণি শিরাস্তত্র প্রতিষ্ঠিতাঃ .
ভাবযন্তী শরীরাণি আপাদতলমস্তকম্ .. ৫৬..
খেচর্যা মুদ্রিতং যেন বিবরং লম্বিকোর্ধ্বতঃ .
ন তস্য ক্ষীযতে বিন্দুঃ কামিন্যালিঙ্গিতস্য চ .. ৫৭..
যাবদ্বিন্দুঃ স্থিতো দেহে তাবন্মৃত্যুভযং কুতঃ .
যাবদ্বদ্ধা নভোমুদ্রা তাবদ্বিন্দুর্ন গচ্ছতি .. ৫৮..
জ্বলিতোঽপি যথা বিন্দুঃ সংপ্রাপ্তশ্চ হুতাশনম্ .
ব্রজত্যূর্ধ্বং গতঃ শক্ত্যা নিরুদ্ধো যোনিমুদ্রযা .. ৫৯..
স পুনর্দ্বিবিধো বিন্দুঃ পাণ্ডরো লোহিতস্তথা .
পাণ্ডরং শুক্লমিত্যাহুর্লোহিতাখ্যং মহারজঃ .. ৬০..
সিন্দূরব্রাতসঙ্কাশং রবিস্থানস্থিতং রজঃ .
শশিস্থানস্থিতং শুক্লং তযোরৈক্যং সুদুর্লভম্ .. ৬১..
বিন্দুর্ব্রহ্মা রজঃ শক্তির্বিন্দুরিন্দূ রজো রবিঃ .
উভযোঃ সঙ্গমাদেব প্রাপ্যতে পরমং পদম্ .. ৬২..
বাযুনা শক্তিচালেন প্রেরিতং চ যথা রজঃ .
যাতি বিন্দুঃ সদৈকত্বং ভবেদ্দিব্যবপুস্তদা .. ৬৩..
শুক্লং চন্দ্রেণ সংযুক্তং রজঃ সূর্যেণ সঙ্গতম্ .
তযোঃ সমরসৈকত্বং যো জানাতি স যোগবিত্ .. ৬৪..
শোধনং নাডিজালস্য চালনং চন্দ্রসূর্যযোঃ .
রসানাং শোষণং চৈব মহামুদ্রাভিধীযতে .. ৬৫..
বক্ষোন্যস্তহনুঃ প্রপীড্য সুচিরং যোনিং চ বামাঙ্গিণা
   হস্তাভ্যামনুধারযন্প্রসরিতং পাদং তথা দক্ষিণম্ .
আপূর্য শ্বসনেন কুক্ষিযুগলং বধ্বা শনৈ রেচযে-
   ত্সেযং ব্যাধিবিনাশিনী সুমহতী মুদ্রা নৃণাং কথ্যতে .. ৬৬..
চন্দ্রাংশেন সমভ্যস্য সূর্যাংশেনাভ্যসেত্পুনঃ .
যা তুল্যা তু ভবেত্সঙ্খ্যা ততো মুদ্রাং বিসর্জযেত্ .. ৬৭..
নহি পথ্যমপথ্যং বা রসাঃ সর্বেঽপি নীরসাঃ .
অতিভুক্তং বিষং ঘোরং পীযূষমিব জীর্যতে .. ৬৮..
ক্ষযকুষ্ঠগুদাবর্তগুল্মাজীর্ণপুরোগমাঃ .
তস্য রোগাঃ ক্ষযং যান্তি মহামুদ্রাং তু যোঽভ্যসেত্ .. ৬৯..
কথিতেযং মহামুদ্রা মহাসিদ্ধিকরী নৃণাম্ .
গোপনীযা প্রযত্নেন ন দেযা যস্য কস্যচিত্ .. ৭০..
পদ্মাসনং সমারুহ্য সমকাযশিরোধরঃ .
নাসাগ্রদৃষ্টিরেকান্তে জপেদোঙ্কারমব্যযম্ .. ৭১..
ॐ নিত্যং শুদ্ধং বুদ্ধং নির্বিকল্পং নিরঞ্জনং
নিরাখ্যাতমনাদিনিধনমেকং তুরীযং যদ্ভূতং
ভবদ্ভবিষ্যত্পরিবর্তমানং সর্বদাঽনবচ্ছিন্নং
পরংব্রহ্ম তস্মাজ্জাতা পরা শক্তিঃ স্বযং জ্যোতিরাত্মিকা .
আত্মন আকাশঃ সংভূতঃ . আকাশাদ্বাযুঃ . বাযোরগ্নিঃ .
অগ্নেরাপঃ . অদ্ভ্যঃ পৃথিবী . এতেষাং পঞ্চভূতানাং
পতযঃ পঞ্চ সদাশিবেশ্বররুদ্রবিষ্ণুব্রহ্মাণশ্চেতি .
তেষাং ব্রহ্মবিষ্ণুরুদ্রাশ্চোত্পত্তিস্থিতিলযকর্তারঃ .
রাজসো ব্রহ্মা সাত্বিকো বিষ্ণুস্তামসো রুদ্র ইতি এতে ত্রযো গুণযুক্তাঃ .
ব্রহ্মা দেবানাং প্রথমঃ সংবভূব . ধাতা চ সৃষ্টৌ
বিষ্ণুশ্চ স্থিতৌ রুদ্রশ্চ নাশে ভোগায চন্দ্র ইতি
প্রথমজা বভূবুঃ . এতেষাং ব্রহ্মণো লোকা দেবতির্যঙ্গ-
রস্থাবরাশ্চ জাযন্তে . তেষাং মনুষ্যাদীনাং
পঞ্চভূতসমবাযঃ শরীরম্ . জ্ঞানকর্মেন্দ্রিযৈ-
র্জ্ঞানবিষযৈঃ প্রাণাদিপঞ্চবাযুমনোবুদ্ধিচিত্তাহঙ্কারৈঃ
স্থূলকল্পিতৈঃ সোঽপি স্থূলপ্রকৃতিরিত্যুচ্যতে . জ্ঞানকর্মেন্দ্রিযৈ-
র্জ্ঞানবিষযৈঃ প্রাণাদিপঞ্চবাযুমনোবুদ্ধিভিশ্চ
সূক্ষ্মস্থোঽপি লিঙ্গমেবেত্যুচ্যতে . গুণত্রযযুক্তং কারণম্ .
সর্বেষামেবং ত্রীণি শরীরাণি বর্তন্তে . জাগ্রত্স্বপ্নসুষুপ্তি-
তুরীযাশ্চেত্যবস্থাশ্চতস্রঃ তাসামবস্থানামধিপতয-
শ্চত্বারঃ পুরুষা বিশ্বতৈজসপ্রাজ্ঞাত্মানশ্চেতি .
বিশ্বো হি স্থূলভুঙ্নিত্যং তৈজসঃ প্রবিবিক্তভুক্ .
আনন্দভুক্তযা প্রাজ্ঞঃ সর্বসাক্ষীত্যতঃ পরঃ .. ৭২..
প্রণতঃ সর্বদা তিষ্ঠেত্সর্বজীবেষু ভোগতঃ .
অভিরামস্তু সর্বাসু হ্যবস্থাসু হ্যধোমুখঃ .. ৭৩..
অকার উকারো মকারশ্চেতি বেদাস্ত্রযো লোকাস্ত্রযো
গুণাস্ত্রীণ্যক্ষরাণি ত্রযঃ স্বরা এবং প্রণবঃ প্রকাশতে .
অকারো জাগ্রতি নেত্রে বর্ততে সর্বজন্তুষু .
উকারঃ কণ্ঠতঃ স্বপ্নে মকারো হৃদি সুপ্তিতঃ .. ৭৪..
বিরাড্বিশ্বঃ স্থূলশ্চাকারঃ .
হিরণ্যগর্ভস্তৈজসঃ সূক্ষ্মশ্চ উকারঃ .
কারণাব্যাকৃতপ্রাজ্ঞশ্চ মকারঃ .
অকারো রাজসো রক্তো ব্রহ্ম চেতন উচ্যতে .
উকারঃ সাত্ত্বিকঃ শুক্লো বিষ্ণুরিত্যভিধীযতে .. ৭৫..
মকারস্তামসঃ কৃষ্ণো রুদ্রশ্চেতি তথোচ্যতে .
প্রণবাত্প্রভবো ব্রহ্মা প্রণবাত্প্রভবো হরিঃ .. ৭৬..
প্রণবাত্প্রভবো রুদ্রঃ প্রণবো হি পরো ভবেত্ .
অকারে লীযতে ব্রহ্মা হ্যুকারে লীযতে হরিঃ .. ৭৭..
মকারে লীযতে রুদ্রঃ প্রণবো হি প্রকাশতে .
জ্ঞানিনামূর্ধ্বগো ভূযাদজ্ঞানে স্যাদধোমুখঃ .. ৭৮..
এবং বৈ প্রণবস্তিষ্ঠেদ্যস্তং বেদ স বেদবিত্ .
অনাহতস্বরূপেণ জ্ঞানিনামূর্ধ্বগো ভবেত্ .. ৭৯..
তৈলধারামিবাচ্ছিন্নং দীর্ঘঘণ্টানিনাদবত্ .
প্রণবস্য ধ্বনিস্তদ্বত্তদগ্রং ব্রহ্ম চোচ্যতে .. ৮০..জ্যোতির্মযং তদগ্রং স্যাদবাচ্যং বুদ্ধিসূক্ষ্মতঃ .
দদৃশুর্যে মহাত্মানো যস্তং বেদ স বেদবিত্ .. ৮১..
জাগ্রন্নেত্রদ্বযোর্মধ্যে হংস এব প্রকাশতে .
সকারঃ খেচরী প্রোক্তস্ত্বংপদং চেতি নিশ্চিতম্ .. ৮২..
হকারঃ পরমেশঃ স্যাত্তত্পদং চেতি নিশ্চিতম্ .
সকারো ধ্যাযতে জন্তুর্হকারো হি ভবেদ্ধৃবম্ .. ৮৩..
ইন্দ্রিযৈর্বধ্যতে জীব আত্মা চৈব ন বধ্যতে .
মমত্বেন ভবেজ্জীবো নির্মমত্বেন কেবলঃ .. ৮৪..
ভূর্ভুবঃ স্বরিমে লোকাঃ সোমসূর্যাগ্নিদেবতাঃ .
যস্য মাত্রাসু তিষ্ঠন্তি তত্পরং জ্যোতিরোমিতি .. ৮৫..
ক্রিযা ইচ্ছা তথা জ্ঞানং ব্রাহ্মী রৌদ্রী চ বৈষ্ণবী .
ত্রিধা মাত্রাস্থিতির্যত্র তত্পরং জ্যোতিরোমিতি .. ৮৬..
বচসা তজ্জপেন্নিত্যং বপুষা তত্সমভ্যসেত্ .
মনসা তজ্জপেন্নিত্যং তত্পরং জ্যোতিরোমিতি .. ৮৭..
শুচির্বাপ্যশুচির্বাপি যো জপেত্প্রণবং সদা .
ন স লিপ্যতি পাপেন পদ্মপত্রমিবাম্ভসা .. ৮৮..
চলে বাতে চলো বিন্দুর্নিশ্চলে নিশ্চলো ভবেত্ .
যোগী স্থাণুত্বমাপ্নোতি ততো বাযুং নিরুন্ধযেত্ .. ৮৯..
যাবদ্বাযুঃ স্থিতো দেহে তাবজ্জীবো ন মুঞ্চতি .
মরণং তস্য নিষ্ক্রান্তিস্ততো বাযুং নিরুন্ধযেত্ .. ৯০..
যাবদ্বাযুঃ স্থিতো দেহে তাবজ্জীবো ন মুঞ্চতি .
যাবদ্দৃষ্টির্ভ্রুবোর্মধ্যে তাবত্কালং ভযং কুতঃ .. ৯১..
অল্পকালভযাদ্ব্রহ্মন্প্রাণাযমপরো ভবেত্ .
যোগিনো মুনশ্চৈব ততঃ প্রাণান্নিরোধযেত্ .. ৯২..
ষড্বিংশদঙ্গুলির্হংসঃ প্রযাণং কুরুতে বহিঃ .
বামদক্ষিণমার্গেণ প্রাণাযামো বিধীযতে .. ৯৩..
শুদ্ধিমেতি যদা সর্বং নাডীচক্রং মলাকুলম্ .
তদৈব জাযতে যোগী প্রাণসংগ্রহণক্ষমঃ .. ৯৪..
বদ্ধপদ্মাসনো যোগী প্রাণং চন্দ্রেণ পূরযেত্ .
ধারযেদ্বা যথাশক্ত্যা ভূযঃ সূর্যেণ রেচযেত্ .. ৯৫..
অমৃতোদধিসংকাশং গোক্ষীরধবলোপমম্ .
ধ্যাত্বা চন্দ্রমসং বিম্বং প্রাণাযামে সুখী ভবেত্ .. ৯৬..
স্ফুরত্প্রজ্বলসংজ্বালাপূজ্যমাদিত্যমণ্ডলম্ .
ধ্যাত্বা হৃদি স্থিতং যোগী প্রাণাযামে সুখী ভবেত্ .. ৯৭..
প্রাণং চেদিডযা পিবেন্নিযমিতং ভূযোঽন্যথা রেচযে-
      ত্পীত্বা পিঙ্গলযা সমীরণমথো বদ্ধ্বা ত্যজেদ্বামযা .
সূর্যাচন্দ্রমসোরনেন বিধিনা বিন্দুদ্বযং ধ্যাযতঃ
      শুদ্ধা নাডিগণা ভবন্তি যমিনো মাসদ্বযাদূর্ধ্বতঃ .. ৯৮..
যথেষ্টধারণং বাযোরনলস্য প্রদীপনম্ .
নাদাভিব্যক্তিরারোগ্যং জাযতে নাডিশোধনাত্ .. ৯৯..
প্রাণো দেহস্থিতো যাবদপানং তু নিরুন্ধযেত্ .
একশ্বাসমযী মাত্রা ঊর্ধ্বাধো গগনে গতিঃ .. ১০০..
রেচকঃ পূরকশ্চৈব কুম্ভকঃ প্রণবাত্মকঃ .
প্রাণাযামো ভবেদেবং মাত্রাদ্বাদশসংযুতঃ .. ১০১..
মাত্রাদ্বাদশসংযুক্তৌ দিবাকরনিশাকরৌ .
দোষজালমবধ্নন্তৌ জ্ঞাতব্যৌ যোগিভিঃ সদা .. ১০২..
পূরকং দ্বাদশং কুর্যাত্কুম্ভকং ষোডশং ভবেত্ .
রেচকং দশ চোঙ্কারঃ প্রাণাযামঃ স উচ্যতে .. ১০৩..
অধমে দ্বাদশমাত্রা মধ্যমে দ্বিগুণা মতা .
উত্তমে ত্রিগুণা প্রোক্তা প্রাণাযামস্য নির্ণযঃ .. ১০৪..
অধমে স্বেদজননং কম্পো ভবতি মধ্যমে .
উত্তমে স্থানমাপ্নোতি ততো বাযুং নিরুন্ধযেত্ .. ১০৫..
বদ্ধপদ্মাসনো যোগী নমস্কৃত্য গুরুং শিবম্ .
নাসাগ্রদৃষ্টিরেকাকী প্রাণাযামং সমভ্যসেত্ .. ১০৬..
দ্বারাণাং নব সংনিরুধ্য মরুতং বধ্বা দৃঢাং ধারণাং
     নীত্বা কালমপানবহ্নিসহিতং শক্ত্যা সমং চালিতম্ .
আত্মধ্যানযুতস্ত্বনেন বিধিনা ঘ্রিন্যস্য মূর্ধ্নি স্থিরং
     যাবত্তিষ্ঠতি তাবদেব মহতাং সঙ্গো ন সংস্তূযতে .. ১০৭..
প্রাণাযামো ভবেদেবং পাতকেন্ধনপাবকঃ .
ভবোদধিমহাসেতুঃ প্রোচ্যতে যোগিভিঃ সদা .. ১০৮..
আসনেন রুজং হন্তি প্রাণাযামেন পাতকম্ .
বিকারং মানসং যোগী প্রত্যাহারেণ মুঞ্চতি .. ১০৯..
ধারণাভির্মনোধৈর্যং যাতি চৈতন্যমদ্ভুতম্ .
সমাধৌ মোক্ষমাপ্নোতি ত্যক্ত্বা কর্ম শুভাশুভম্ .. ১১০..
প্রাণাযামদ্বিষট্কেন প্রত্যাহারঃ প্রকীর্তিতঃ .
প্রত্যাহারদ্বিষট্কেন জাযতে ধারণা শুভা .. ১১১..
ধারণাদ্বাদশ প্রোক্তং ধ্যানং যোগবিশারদৈঃ .
ধ্যানদ্বাদশকেনৈব সমাধিরভিধীযতে .. ১১২..
যত্সমাধৌ পরংজ্যোতিরনন্তং বিশ্বতোমুখম্ .
তস্মিন্দৃষ্টে ক্রিযাকর্ম যাতাযাতো ন বিদ্যতে .. ১১৩..
সংবদ্ধাসনমেঢ্রমঙ্ঘ্রিযুগলং কর্ণাক্ষিনাসাপুট-
     দ্বারাদ্যঙ্গুলিভির্নিযম্য পবনং বক্ত্রেণ বা পূরিতম্ .
বধ্বা বক্ষসি বহ্বযানসহিতং মূর্ধ্নি স্থিরং ধারযে-
     দেবং যান্তি বিশেষতত্ত্বসমতাং যোগীশ্বরাস্তন্মনঃ .. ১১৪..
গগনং পবনে প্রাপ্তে ধ্বনিরুত্পদ্যতে মহান্ .
ঘণ্টাদীনাং প্রবাদ্যানাং নাদসিদ্ধিরুদীরিতা .. ১১৫..
প্রাণাযামেন যুক্তেন সর্বরোগক্ষযো ভবেত্ .
প্রাণাযামবিযুক্তেভ্যঃ সর্বরোগসমুদ্ভবঃ .. ১১৬..
হিক্কা কাসস্তথা শ্বাসঃ শিরঃকর্ণাক্ষিবেদনাঃ .
ভবন্তি বিবিধা রোগাঃ পবনব্যত্যযক্রমাত্ .. ১১৭..
যথা সিংহো গজো ব্যাঘ্রো ভবেদ্বশ্যঃ শনৈঃ শনৈঃ .
তথৈব সেবিতো বাযুরন্যথা হন্তি সাধকম্ .. ১১৮..
যুক্তংযুক্তং ত্যজেদ্বাযুং যুক্তংযুক্তং প্রপূরযেত্ .
যুক্তংযুক্তং প্রবধ্নীযাদেবং সিদ্ধিমবাপ্নুযাত্ .. ১১৯..
চরতাং চক্ষুরাদীনাং বিষযেষু যথাক্রমম্ .
যত্প্রত্যাহরণং তেষাং প্রত্যাহরঃ স উচ্যতে .. ১২০..
যথা তৃতীযকালে তু রবিঃ প্রত্যাহরেত্প্রভাম্ .
তৃতীযঙ্গস্থিতো যোগী বিকারং মনসং হরেদীত্যুপনিষত্ .
ॐ আপ্যাযন্তু মমাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাং মা মা ব্রহ্ম নিরাকরোদনিরাকরণ-
মস্ত্বনিরাকরণং মেস্তু তদাত্মনি নিরতে য উপনিষত্সু
ধর্মাস্তে মযি সন্তু তে মযি তে মযি সন্তু ..
ॐ শান্তিঃ শান্তিঃ শান্তিঃ ..
ইতি যোগচূডামণ্যুপনিষত্সমাপ্তা ..