যোগকুণ্ডলিনি

.. যোগকুণ্ডল্যুপনিষত্ ..

যোগকুণ্ডল্যুপনিষদ্যোগসিদ্ধিহৃদাসনম্ .
নির্বিশেষব্রহ্মতত্ত্বং স্বমাত্রমিতি চিন্তযে ..
ॐ সহ নাববতু সহ নৌ ভুনক্তু সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ .. হেতুদ্বযং হি চিত্তস্য বাসনা চ সমীরণঃ .
তযোর্বিনষ্ট একস্মিংস্তদ্দ্বাবপি বিনশ্যতঃ .. ১..
তযোরাদৌ সমীরস্য জযং কুর্যানরঃ সদা .
মিতাহারশ্চাসনং চ শক্তিশ্চালস্তৃতীযকঃ .. ২..
এতেষাং লক্ষণং বক্ষ্যে শৃণু গৌতম সাদরম্ .
সুস্নিগ্ধমধুরাহারশ্চতুর্থাংশবিবর্জিতঃ .. ৩..
ভুজ্যতে শিবসংপ্রীত্যৈ মিতাহারঃ স উচ্যতে .
আসনং দ্বিবিধং প্রোক্তং পদ্মং বজ্রাসনং তথা .. ৪..
ঊর্বোরুপরি চেদ্ধত্তে উভে পাদতলে যথা .
পদ্মাসনং ভবেদেতত্সর্বপাপপ্রণাশনম্ .. ৫..
বামাঙ্ঘ্রিমূলকন্দাধো হ্যন্যং তদুপরি ক্ষিপেত্ .
সমগ্রীবশিরঃকাযো বজ্রাসনমিতীরিতম্ .. ৬..
কুণ্ডল্যেব ভবেচ্ছক্তিস্তাং তু সংচালযেদ্বুধ .
স্বস্থানাদাভ্রুবোর্মধ্যং শক্তিচালনমুচ্যতে .. ৭..
তত্সাধনে দ্বযং মুখ্যং সরস্বত্যাস্তু চালনম্ .
প্রাণরোধমথাভ্যাসাদৃজ্বী কুণ্ডলিনী ভবেত্ .. ৮..
তযোরাদৌ সরস্বত্যাশ্চালনং কথযামি তে .
অরুন্ধত্যেব কথিতা পুরাবিদ্ভিঃ সরস্বতী .. ৯..
যস্যাঃ সংচালনেনৈব স্বযং চলতি কুণ্ডলী .
ইডাযাং বহতি প্রাণে বদ্ধ্বা পদ্মাসনং দৃঢম্ .. ১০..
দ্বাদশাঙ্গুলদৈর্ঘ্যং চ অম্বরং চতুরঙ্গুলম্ .
বিস্তীর্য তেন তন্নাডীং বেষ্টযিত্বা ততঃ সুধীঃ .. ১১..
অঙ্গুষ্ঠতর্জনীভ্যাং তু হস্তাভ্যাং ধারযেদ্ধৃঢম্ .
স্বশক্ত্যা চালযেদ্বামে দক্ষিণেন পুনঃপুনঃ .. ১২..
মুহূর্তদ্বযপর্যন্তং নির্ভযাচ্চালযেত্সুধীঃ .
ঊর্ধ্বমাকর্ষযেত্কিংচিত্সুষুম্নাং কুণ্ডলীগতাম্ .. ১৩..
তেন কুণ্ডলিনী তস্যাঃ সুষুম্নাযা মুখং ব্রজেত্ .
জহাতি তস্মাত্প্রাণোঽযং সুষুম্নাং ব্রজতি স্বতঃ .. ১৪..
তুন্দে তু তাণং কুর্যাচ্চ কণ্ঠসংকোচনে কৃতে .
সরস্বত্যাং চালনেন বক্ষসশ্চোর্ধ্বগো মরুত্ .. ১৫..
সূর্যেণ রেচযেদ্বাযুং সরবত্যাস্তু চালনে .
কণ্ঠসংকোচনং কৃত্বা বক্ষসশ্চোর্ধ্বগো মরুত্ .. ১৬..
তস্মাত্সংচালযেন্নিত্যং শব্দগর্ভাং সরস্বতীম্ .
যস্যাঃ সংচালনানেনৈব যোগী রোগৈঃ প্রমুচ্যতে .. ১৭..
গুল্মং জলোদরঃ প্লীহা যে চান্যে তুন্দমধ্যগাঃ .
সর্বে তে শক্তিচালেন রোগা নশ্যন্তি নিশ্চযম্ .. ১৮..
প্রাণরোধমথেদানীং প্রবক্ষ্যামি সমাসতঃ .
প্রাণশ্চ দহনো বাযুরাযামঃ কুম্ভকঃ স্মৃতঃ .. ১৯..
স এব দ্বিবিধঃ প্রোক্তঃ সহিতঃ কেবলস্তথা .
যাবত্কেবলসিদ্ধিঃ স্যাত্তাবত্সহিতমভ্যসেত্ .. ২০..
সূর্যোজ্জাযী শীতলী চ ভস্ত্রী চৈব চতুর্থিকা .
ভেদৈরেব সমং কুম্ভো যঃ স্যাত্সহিতকুম্ভকঃ .. ২১..
পবিত্রে নির্জনে দেশে শর্করাদিবিবর্জিতে .
ধনুঃপ্রমাণপর্যন্তে শীতাগ্নিজলবর্জিতে .. ২২..
পবিত্রে নাত্যুচ্চনীচে হ্যাসনে সুখদে সুখে .
বদ্ধপদ্মাসনং কৃত্বা সরস্বত্যাস্তু চালনম্ .. ২৩..
দক্ষনাড্যা সমাকৃষ্য বহিষ্ঠং পবনং শনৈঃ .
যথেষ্টং পূরযেদ্বাযুং রেচযেদিডযা ততঃ .. ২৪..
কপালশোধনে বাপি রেচযেত্পবনং শনৈঃ .
চতুষ্কং বাতদোষং তু কৃমিদোষং নিহন্তি চ .. ২৫..
পুনঃ পুনরিদং কার্যং সূর্যভেদমুদাহৃতম্ .
মুখং সংযম্য নাডিভ্যামাকৃষ্য পবনং শনৈঃ .. ২৬..
যথা লগতি কণ্ঠাত্তু হৃদযাবধি সস্বনম্ .
পূর্ববত্কুম্ভযেত্প্রাণং রেচযেদিডযা ততঃ .. ২৭..
শীর্ষোদিতানলহরং গলশ্লেষ্মহরং পরম্ .
সর্বরোগহরং পুণ্যং দেহানলবিবর্ধনম্ .. ২৮..
নাডীজলোদরং ধাতুগতদোষবিনাশনম্ .
গচ্ছতস্তিষ্ঠতঃ কার্যমুজ্জাযাখ্যং তু কুম্ভকম্ .. ২৯..
জিহ্বযা বাযুমাকৃষ্য পূর্ববত্কুম্ভকাদনু .
শনৈস্তু ঘ্রাণরন্ধ্রাভ্যাং রেচযেদনিলং সুধীঃ .. ৩০..
গুল্মপ্লীহাদিকান্দোষান্ক্ষযং পিত্তং জ্বরং তৃষাম্ .
বিষাণি শীতলী নাম কুম্ভকোঽযং নিহন্তি চ .. ৩১..
ততঃ পদ্মাসনং বদ্ধ্বা সমগ্রীবোদরঃ সুধীঃ .
মুখং সংযম্য যত্নেন প্রাণং ঘ্রাণেন রেচযেত্ .. ৩২..
যথা লগতি কণ্ঠাত্তু কপালে সস্বনং ততঃ .
বেগেন পূরযেত্কিংচিদ্হৃত্পদ্মাবধি মারুতম্ .. ৩৩..
পুনর্বিরেচযেত্তদ্বত্পূরযেচ্চ পুনঃ পুনঃ .
যথৈব লোহকারাণাং ভস্ত্রা বেগেন চাল্যতে .. ৩৪..
তথৈব স্বশরীরস্থং চালযেত্পবনং শনৈঃ .
যথা শ্রমো ভবেদ্দেহে তথা সূর্যেণ পূরযেত্ .. ৩৫..
যথোদরং ভবেত্পূর্ণং পবনেন তথা লঘু .
ধারযন্নাসিকামধ্যং তর্জনীভ্যাং বিনা দৃঢম্ .. ৩৬..
কুম্ভকং পূর্ববত্কৃত্বা রেচেযেদিডযানিলম্ .
কণ্ঠোত্থিতানলহরং শরীরাগ্নিবিবর্ধ্নম্ .. ৩৭..
কুণ্ডলীবোধকং পুণ্যং পাপঘ্নং শুভদং সুখম্ .
ব্রহ্মনাডীমুখান্তস্থ কফাদ্যর্গলনাশনম্ .. ৩৮..
গুণত্রযসমুদ্ভূতগ্রন্থিত্রযবিভেদকম্ .
বিশেষেণৈব কর্তব্যং ভস্ত্রাখ্যং কুম্ভকং ত্বিদম্ .. ৩৯..
চতুর্ণামপি ভেদানাং কুম্ভকে সমুপস্থিতে .
বন্ধত্রযমিদং কার্যং যোগিভির্বীতকল্মষৈঃ .. ৪০..
প্রথমো মূলবন্ধস্তু দ্বিতীযোড্ডীযণাভিধঃ .
জালন্ধরস্তৃতীযস্তু তেষাং লক্ষণমুচ্যতে .. ৪১..
অধোগতিমপানং বৈ ঊর্ধ্বগং কুরুতে বলাত্ .
আকুঞ্চনেন তং প্রাহুর্মূলবন্ধোঽযমুচ্যতে .. ৪২..
অপানে চোর্ধ্বগে যাতে সংপ্রাপ্তে বহ্নিমণ্ডলে .
ততোঽনলশিখা দীর্ঘা বর্ধতে বাযুনাহতা .. ৪৩..
ততো যাতৌ বহ্ন্যমানৌ প্রাণমুষ্ণস্বরূপকম্ .
তেনাত্যন্তপ্রদীপ্তেন জ্বলনো দেহজস্তথা .. ৪৪..
তেন কুণ্ডলিনী সুপ্তা সংতপ্তা সংপ্রবুধ্যতে .
দণ্ডাহতভুজঙ্গীব নিঃশ্বস্য ঋজুতাং ব্রজেত্ .. ৪৫..
বিলপ্রবেশতো যত্র ব্রহ্মনাড্যন্তরং ব্রজেত্ .
তস্মান্নিত্যং মূলবন্ধঃ কর্তব্যো যোগিভিঃ সদা .. ৪৬..
কুম্ভকান্তে রেচকাদৌ কর্তব্যস্তূড্ডিযাণকঃ .
বন্ধো যেন সুষুম্নাযাং প্রাণস্তূড্ডীযতে যতঃ .. ৪৭..
তস্মাদুড্ডীযণাখ্যোঽযং যোগিভিঃ সমুদাহৃতঃ .
সতি বজ্রাসনে পাদৌ করাভ্যাং ধারযেধৃঢম্ .. ৪৮..
গুল্ফদেশসমীপে চ কন্দং তত্র প্রপীডযেত্ .
পশ্চিমং তাণমুদরে ধারযেদ্হৃদযে গলে .. ৪৯..
শনৈঃ শনৈর্যদা প্রাণস্তুন্দসন্ধিং নিগচ্ছতি .
তুন্দদোষং বিনির্ধূয কর্তব্যং সততং শনৈঃ .. ৫০..
পূরকান্তে তু কর্তব্যো বন্ধো জালন্ধরাভিধঃ .
কণ্ঠসংকোচরূপোঽসৌ বাযুমার্গনিরোধকঃ .. ৫১..
অধস্তাত্কুঞ্চনেনাশু কণ্ঠসংকোচনে কৃতে .
মধ্যে পশ্চিমতাণেন স্যাত্প্রাণো ব্রহ্মনাডিগঃ .. ৫২..
পূর্বোক্তেন ক্রমেণৈব সম্যগাসনমাস্থিতঃ .
চালনং তু সরস্বত্যাঃ কৃত্বা প্রাণং নিরোধযেত্ .. ৫৩..
প্রথমে দিবসে কার্যং কুম্ভকানাং চতুষ্টযম্ .
প্রত্যেকং দশসংখ্যাংকং দ্বিতীযে পঞ্চভিস্তথা .. ৫৪..
বিশত্যলং তৃতীযেহ্নি পঞ্চবৃদ্ধ্যা দিনেদিনে .
কর্তব্যঃ কুম্ভকো নিত্যং বন্ধত্রযসমন্বিতঃ .. ৫৫..
দিবা সুপ্তির্নিশাযাং তু জাগরাদতিমৈথুনাত্ .
বহুসংক্রমণং নিত্যং রোধান্মূত্রপুরীষযোঃ .. ৫৬..
বিষমাশনদোষাচ্চ প্রযাসপ্রাণচিন্তনাত্ .
শীঘ্রমুত্পদ্যতে রোগঃ স্তম্ভযেদ্যদি সংযমী .. ৫৭..
যোগাভ্যাসেন মে রোগ উত্পন্ন ইতি কথ্যতে .
ততোঽভ্যাসং ত্যজেদেবং প্রথমং বিঘ্নাচ্যতে .. ৫৮..
দ্বিতীযং সংশযাখ্যং চ তৃতীযং চ প্রমত্ততা .
আলস্যাখ্যং চতুর্থং চ নিদ্রারূপং তু পঞ্চমম্ .. ৫৯..
ষষ্ঠং তু বিরতির্ভ্রান্তিঃ সপ্তমং পরিকীর্তিতম্ .
বিষমং চাষ্টমং চৈব অনাখ্যং নবমং স্মৃতম্ .. ৬০..
অলব্ধির্যোগতত্ত্বস্য দশমং প্রোচ্যতে বুধৈঃ .
ইত্যেতদ্বিঘ্নদশকং বিচারেণ ত্যজেদ্বুধঃ .. ৬১..
প্রাণাভ্যাসস্ততঃ কার্যো নিত্যং সত্ত্বস্থযা ধিযা .
সুষুম্না লীযতে চিত্তং তথা বাযুঃ প্রধাবতি .. ৬২..
শুষ্কে মলে তু যোগী চ স্যাদ্গতিশ্চলিতা ততঃ .
অধোগতিমপানং বৈ ঊর্ধ্বগং কুরুতে বলাত্ .. ৬৩..
আকুঞ্চনেন তং প্রাহুর্মূলবন্ধোঽযমুচ্যতে .
অপানশ্চোর্ধ্বগোভূত্বা বহ্নিনা সহ গচ্ছতি .. ৬৪..
প্রাণস্থানং ততো বহ্নিঃ প্রাণাপানৌ চ সত্বরম্ .
মিলিত্বা কুণ্ডলীং যাতি প্রসুপ্তা কুণ্ডলাকৃতিঃ .. ৬৫..
তেনাগ্নিনা চ সংতপ্তা পবনেনৈব চালিতা .
প্রসার্য স্বশরীরং তু সুষুম্না বদনান্তরে .. ৬৬..
ব্রহ্মগ্রন্থিং ততো ভিত্ত্বা রজোগুণসমুদ্ভবম্ .
সুষুম্না বদনে শীঘ্রং বিদ্যুল্লেখেব সংস্ফুরেত্ .. ৬৭..
বিষ্ণুগ্রন্থিং প্রযাত্যুচ্চৈঃ সত্বরং হৃদি সংস্থিতা .
ঊর্ধ্বং গচ্ছতি যচ্চাস্তে রুদ্রগ্রন্থিং তদুদ্ভবম্ .. ৬৮..
ভ্রুবোর্মধ্যে তু সংভিদ্য যাতি শীতাংশুমণ্ডলম্ .
অনাহতাখ্যং যচ্চক্রং দলৈঃ ষোডশভির্যুতম্ .. ৬৯..
তত্র শীতাংশুসংজাতং দ্রবং শোষযতি স্বযম্ .
চলিতে প্রাণ বেগেন রক্তং পীতং রবের্গ্রহাত্ .. ৭০..
যাতেন্দুচক্রং যত্রাস্তে শুদ্ধশ্লেষ্মদ্রবাত্মকম্ .
তত্র সিক্তং গ্রসত্যুষ্ণং কথং শীতস্বভাবকম্ .. ৭১..
তথৈব রভসা শুক্লং চন্দ্ররূপং হি তপ্যতে .
ঊর্ধ্বং প্রবহতি ক্ষুব্ধা তদৈবং ভ্রমতেতরাম্ .. ৭২..
তস্যাস্বাদবশাচ্চিত্তং বহিষ্ঠং বিষযেষু যত্ .
তদেব পরমং ভুক্ত্বা স্বস্থঃ স্বাত্মরতো যুবা .. ৭৩..
প্রকৃত্যষ্টকরূপং চ স্থানং গচ্ছতি কুণ্ডলী .
ক্রোডীকৃত্য শিবং যাতি ক্রোডীকৃত্য বিলীযতে .. ৭৪..
ইত্যধোর্ধ্বরজঃ শুক্লং শিবে তদনু মারুতঃ .
প্রাণাপানৌ সমৌ যাতি সদা জাতৌ তথৈব চ .. ৭৫..
ভূতেঽল্পে চাপ্যনল্পে বা বাচকে ত্বতিবর্ধতে .
ধবযত্যখিলা বাতা অগ্নিমূষাহিরণ্যবত্ .. ৭৬..
আধিভৌতিকদেহং তু আধিদৈবিকবিগ্রহে .
দেহোঽতিবিমলং যাতি চাতিবাহিকতামিযাত্ .. ৭৭..
জাড্যভাববিনির্মুক্তমমলং চিন্মযাত্মকম্ .
তস্যাতিবাহিকং মুখ্যং সর্বেষাং তু মদাত্মকম্ .. ৭৮..
জাযাভববিনির্মুক্তিঃ কালরূপস্য বিভ্রমঃ .
ইতি তং স্বস্বরূপা হি মতী রজ্জুভুজঙ্গবত্ .. ৭৯..
মৃষৈবোদেতি সকলং মৃষৈব প্রবিলীযতে .
রৌপ্যবুদ্ধিঃ শুক্তিকাযাং স্ত্রীপুংসোর্ভ্রমতো যথা .. ৮০..
পিণ্ডব্রহ্মাণ্ডযোরৈক্যং লিঙ্গসূত্রাত্মনোরপি .
স্বাপাব্যাকৃতযোরৈক্যং স্বপ্রকাশচিদাত্মনোঃ .. ৮১..
শক্তিঃ কুণ্ডলিনী নাম বিসতন্তুনিভা শুভা .
মূলকন্দং ফণাগ্রেণ দৃষ্ট্বা কমলকন্দবত্ .. ৮২..
মুখেন পুচ্ছং সংগৃহ্য ব্রহ্মরন্ধ্রসমন্বিতা .
পদ্মাসনগতঃ স্বস্থো গুদমাকুঞ্চ্য সাধকঃ .. ৮৩..
বাযুমূর্ধ্বগতং কুর্বন্কুম্ভকাবিষ্টমানসঃ .
বায্বাঘাতবশাদগ্নিঃ স্বাধিষ্ঠানগতো জ্বলন্ .. ৮৪..
জ্বলনাঘাতপবনাঘাতোরূন্নিদ্রিতোঽহিরাট্ .
ব্রহ্মগ্রন্থিং ততো ভিত্ত্বা বিষ্ণুগ্রন্থিং ভিনত্ত্যতঃ .. ৮৫..
রুদ্রগ্রন্থিং চ ভিত্ত্বৈব কমলানি ভিনত্তি ষট্ .
সহস্রকমলে শক্তিঃ শিবেন সহ মোদতে .. ৮৬..
সৈবাবস্থা পরা জ্ঞেযা সৈব নির্বৃতিকারিণী ইতি ..
ইতি প্রথমোঽধ্যাযঃ .. ১..
অথাহং সংপ্রবক্ষ্যামি বিদ্যাং খেচরিসংজ্ঞিকাম্ .
যথা বিজ্ঞানবানস্যা লোকেঽস্মিন্নজরোঽমরঃ .. ১..
মৃত্যুব্যাধিজরাগ্রস্তো দৃষ্ট্বা বিদ্যামিমাং মুনে .
বুদ্ধিং দৃঢতরাং কৃত্বা খেচরীং তু সমভ্যসেত্ .. ২..
জরামৃত্যুগদঘ্নো যঃ খেচরীং বেত্তি ভূতলে .
গ্রন্থতশ্চার্থতশ্চৈব তদভ্যাসপ্রযোগতঃ .. ৩..
তং মুনে সর্বভাবেন গুরুং মত্বা সমাশ্রযেত্ .
দুর্লভা খেচরী বিদ্যা তদভ্যাসোঽপি দুর্লভঃ .. ৪..
অভ্যাসং মেলনং চৈব যুগপন্নৈব সিধ্যতি .
অভ্যাসমাত্রনিরতা ন বিন্দন্তে হ মেলনম্ .. ৫..
অভ্যাসং লভতে ব্রহ্মঞ্জন্মজন্মান্তরে ক্বচিত্ .
মেলনং তু জন্মনাং শতান্তেঽপি ন লভ্যতে .. ৬..
অভ্যাসং বহুজন্মান্তে কৃত্বা তদ্ভাবসাধিতম্ .
মেলনং লভতে কশ্চিদ্যোগী জন্মান্তরে ক্বচিত্ .. ৭..
যদা তু মেলনং যোগী লভতে গুরুবক্ত্রতঃ .
তদা তত্সিদ্ধিমাপ্নোতি যদুক্তা শাস্ত্রসন্ততৌ .. ৮..
গ্রন্থতশ্চার্থতশ্চৈব মেলনং লভতে যদা .
তদা শিবত্বমাপ্নোতি নির্মুক্তঃ সর্বসংসৃতেঃ .. ৯..
শাস্ত্রং বিনাপি সংবোদ্ধুং গুরবোঽপি ন শক্নযুঃ .
তস্মাত্সুদুর্লভতরং লভ্যং শাস্ত্রমিদং মুনে .. ১০..
যাবন্ন লভ্যতে শাস্ত্রং তাবদ্গাং পর্যটেদ্যতিঃ .
যদা সংলভ্যতে শাস্ত্রং তদা সিদ্ধিঃ করে স্থিতা .. ১১..
ন শাস্ত্রেণ বিনা সিদ্ধির্দৃষ্টা চৈব জগত্ত্রযে .
তস্মান্মেলনদাতারং শাস্ত্রদাতারমচ্যুতম্ .. ১২..
তদভ্যাসপ্রদাতারং শিবং মত্বা সমাশ্রযেত্ .
লব্ধ্বা শাস্ত্রমিদং মহ্যমন্যেষাং ন প্রকাশযেত্ .. ১৩..
তস্মাত্সর্বপ্রযত্নেন গোপনীযং বিজানতা .
যত্রাস্তে চ গুরুর্ব্রহ্মন্দিব্যযোগপ্রদাযকঃ .. ১৪..
তত্র গত্বা চ তেনোক্তবিদ্যাং সংগৃহ্য খেচরীম্ .
তেনোক্তঃ সম্যগভ্যাসং কুর্যাদাদাবতন্দ্রিতঃ .. ১৫..
অনযা বিদ্যযা যোগী খেচরীসিদ্ধিভাগ্ভবেত্ .
খেচর্যা খেচরীং যুঞ্জন্খেচরীবীজপূরযা .. ১৬..
খেচরাধিপতির্ভূত্বা খেচরেষু সদা বসেত্ .
খেচরাবসথং বহ্নিমম্বুমণ্ডলভূষিতম্ .. ১৭..
আখ্যাতং খেচরীবীজং তেন যোগঃ প্রসিধ্যতি .
সোমাংশনবকং বর্ণং প্রতিলোমেন চোদ্ধরেত্ .. ১৮..
তস্মাত্ত্র্যংশকমাখ্যাতমক্ষরং চন্দ্ররূপকম্ .
তস্মাদপ্যষ্টমং বর্ণং বিলোমেন পরং মুনে .. ১৯..
তথা তত্পরমং বিদ্ধি তদাদিরপি পঞ্চমী .
ইন্দোশ্চ বহুভিন্নে চ কূটোঽযং পরিকীর্তিতঃ .. ২০..
গুরূপদেশলভ্যং চ সর্বযোগপ্রসিদ্ধিদম্ .
যত্তস্য দেহজা মাযা নিরুদ্ধকরণাশ্রযা .. ২১..
স্বপ্নেঽপি ন লভেত্তস্য নিত্যং দ্বাদশজপ্যতঃ .
য ইমাং পঞ্চ লক্ষাণি জপেদপি সুযন্ত্রিতঃ .. ২২..
তস্য শ্রীখেচরীসিদ্ধিঃ স্বযমেব প্রবর্ততে .
নশ্যন্তি সর্ববিঘ্নানি প্রসীদন্তি চ দেবতাঃ .. ২৩..
বলীপলিতনাশশ্চ ভবিষ্যতি ন সংশযঃ .
এবং লব্ধ্বা মহাবিদ্যামভ্যাসং কারযেত্ততঃ .. ২৪..
অন্যথা ক্লিশ্যতে ব্রহ্মন্ন সিদ্ধিঃ খেচরীপথে .
যদভ্যাসবিধৌ বিদ্যাং ন লভেদ্যঃ সুধামযীম্ .. ২৫..
ততঃ সংমেলকাদৌ চ লব্ধ্বা বিদ্যাং সদা জপেত্ .
নান্যথা রহিতো ব্রহ্মন্ন কিংচিত্সিদ্ধিভাগ্ভবেত্ .. ২৬..
যদিদং লভ্যতে শাস্ত্রং তদা বিদ্যাং সমাশ্রযেত্ .
ততস্তদোদিতাং সিদ্ধিমাশু তাং লভতে মুনিঃ .. ২৭..
তালুমূলং সমুত্কৃষ্য সপ্তবাসরমাত্মবিত্ .
স্বগুরূক্তপ্রকারেণ মলং সর্বং বিশোধযেত্ .. ২৮..
স্নুহিপত্রনিভং শস্ত্রং সুতীক্ষ্ণং স্নিগ্ধনির্মলম্ .
সমাদায ততস্তেন রোমমাত্রং সমুচ্ছিনেত্ .. ২৯..
হিত্বা সৈন্ধবপথ্যাভ্যাং চূর্ণিতাভ্যাং প্রকর্ষযেত্ .
পুনঃ সপ্তদিনে প্রাপ্তে রোমমাত্রং সমুচ্ছিনেত্ .. ৩০..
এবং ক্রমেণ ষণ্মাসং নিত্যোদ্যুক্তঃ সমাচরেত্ .
ষণ্মাসাদ্রসনামূলং সিরাবদ্ধং প্রণশ্যতি .. ৩১..
অথ বাগীশ্বরীধাম শিরো বস্ত্রেণ বেষ্টযেত্ .
শনৈরুত্কর্ষযেদ্যোগী কালবেলাবিধানবিত্ .. ৩২..
পুনঃ ষণ্মাসমাত্রেণ নিত্যং সংঘর্ষণান্মুনে .
ভ্রূমধ্যাবধি চাপ্যেতি তির্যক্কণবিলাবধিঃ .. ৩৩..
অধশ্চ চুবুকং মূলং প্রযাতি ক্রমচারিতা .
পুনঃ সংবত্সরাণাং তু তৃতীযাদেব লীলযা .. ৩৪..
কেশান্তমূর্ধ্বং ক্রমতি তির্যক্ শাখাবধির্মুনে .
অধস্তাত্কণ্ঠকূপান্তং পুনর্বর্ষত্রযেণ তু .. ৩৫..
ব্রহ্মরন্ধ্রং সমাবৃত্য তিষ্ঠেদেব ন সংশযঃ .
তির্যক্ চূলিতলং যাতি অধঃ কণ্ঠবিলাবধি .. ৩৬..
শনৈঃ শনৈর্মস্তকাচ্চ মহাবজ্রকপাটভিত্ .
পূর্বং বীজযুতা বিদ্যা হ্যাখ্যাতা যতিদুর্লভা .. ৩৭..
তস্যাঃ ষডঙ্গং কুর্বীত তযা ষট্স্বরভিন্নযা .
কুর্যাদেবং করন্যাসং সর্বসিদ্ধ্যাদিহেতবে .. ৩৮..
শনৈরেবং প্রকর্তব্যমভ্যাসং যুগপন্নহি .
যুগপদ্বর্ততে যস্য শরীরং বিলযং ব্রজেত্ .. ৩৯..
তস্মাচ্ছনৈঃ শনৈঃ কার্যমভ্যাসং মুনিপুঙ্গব .
যদা চ বাহ্যমার্গেণ জিহ্বা ব্রহ্মবিলং ব্রজেত্ .. ৪০..
তদা ব্রহ্মার্গলং ব্রহ্মন্দুর্ভেদ্যং ত্রিদশৈরপি .
অঙ্গুল্যগ্রেণ সংঘৃষ্য জিহ্বামাত্রং নিবেশযেত্ .. ৪১..
এবং বর্ষত্রযং কৃত্বা ব্রহ্মদ্বারং প্রবিশ্যতি .
ব্রহ্মদ্বারে প্রবিষ্টে তু সম্যঙ্মথনমাচরেত্ .. ৪২..
মথনেন বিনা কেচিত্সাধযন্তি বিপশ্চিতঃ .
খেচরীমন্ত্রসিদ্ধস্য সিধ্যতে মথনং বিনা .. ৪৩..
জপং চ মথনং চৈব কৃত্বা শীঘ্রং ফলং লভেত্ .
স্বর্ণজাং রৌপ্যজাং বাপি লোহজাং বা শলাকিকাম্ .. ৪৪..
নিযোজ্য নাসিকারন্ধ্রং দুগ্ধসিক্তেন তন্তুনা .
প্রাণান্নিরুধ্য হৃদযে সুখমাসনমাত্মনঃ .. ৪৫..
শনৈঃ সুমথনং কুর্যাদ্ভ্রূমধ্যে ন্যস্য চক্ষুষী .
ষণ্মাসং মথনাবস্থা ভাবেনৈব প্রজাযতে .. ৪৬..
যথা সুষুপ্তির্বালানাং যথা ভাবস্তথা ভবেত্ .
ন সদা মথনং শস্তং মাসে মাসে সমাচরেত্ .. ৪৭..
সদা রসনযা যোগী মার্গং ন পরিসংক্রমেত্ .
এবং দ্বাদশবর্ষান্তে সংসিদ্ধির্ভবতি ধ্রুবা .. ৪৮..
শরীরে সকলং বিশ্বং পশ্যত্যাত্মাবিভেদতঃ .
ব্রহ্মাণ্ডোঽযং মহামার্গো রাজদন্তোর্ধ্বকুণ্ডলী .. ৪৯.. ইতি..
ইতি দ্বিতীযোঽধ্যাযঃ .. ২..
মেলনমনুঃ . হ্রীং ভং সং পং ফং সং ক্ষম্ . পদ্মজ উবাচ .
অমাবাস্যা চ প্রতিপত্পৌর্ণমাসী চ শংকর .
অস্যাঃ কা বর্ণ্যতে সংজ্ঞা এতদাখ্যাহি তত্ত্বতঃ .. ১..
প্রতিপদ্দিনতোঽকালে অমাবাস্যা তথৈব চ .
পৌর্ণমাস্যাং স্থিরীকুর্যাত্স চ পন্থা হি নান্যথা .. ২..
কামেন বিষযাকাঙ্ক্ষী বিষযাত্কামমোহিতঃ .
দ্বাবেব সংত্যজেন্নিত্যং নিরঞ্জনমুপাশ্রযেত্ .. ৩..
অপরং সংত্যজেত্সর্বং যদিচ্ছেদাত্মনো হিতম্ .
শক্তিমধ্যে মনঃ কৃত্বা মনঃ শক্তেশ্চ মধ্যগম্ .. ৪..
মনসা মন আলোক্য তত্ত্যজেত্পরমং পদম্ .
মন এব হি বিন্দুশ্চ উত্পত্তিস্থিতিকারণম্ .. ৫..
মনসোত্পদ্যতে বিন্দুর্যথা ক্ষীরং ঘৃতাত্মকম্ .
ন চ বন্ধনমধ্যস্থং তদ্বৈ কারণমানসম্ .. ৬..
চন্দ্রার্কমধ্যমা শক্তির্যত্রস্থা তত্র বন্ধনম্ .
জ্ঞাত্বা সুষুম্নাং তদ্ভেদং কৃত্বা বাযুং চ মধ্যগম্ .. ৭..
স্থিত্বাসৌ বৈন্দবস্থানে ঘ্রাণরন্ধ্রে নিরোধযেত্ .
বাযুং বিন্দুং সমাখ্যাতং সত্ত্বং প্রকৃতিমেব চ .. ৮..
ষট্ চক্রাণি পরিজ্ঞাত্বা প্রবিশেত্সুখমণ্ডলম্ .
মূলাধারং স্বাধিষ্ঠানং মণিপূরং তৃতীযকম্ .. ৯..
অনাহতং বিশুদ্ধং চ আজ্ঞাচক্রং চ ষষ্ঠকম্ .
আধারং গুদমিত্যুক্তং স্বাধিষ্ঠানং তু লৈঙ্গিকম্ .. ১০..
মণিপূরং নভিদেশং হৃদযস্থমনাহতম্ .
বিশুদ্ধিঃ কণ্ঠমূলে চ আজ্ঞাচক্রং চ মস্তকম্ .. ১১..
ষট্ চক্রাণি পরিজ্ঞাত্বা প্রবিশেত্সুখমণ্ডলে .
প্রবিশেদ্বাযুমাকৃষ্য তযৈবোর্ধ্বং নিযোজযেত্ .. ১২..
এবং সমভ্যসেদ্বাযুং স ব্রহ্মাণ্ডমযো ভবেত্ .
বাযুং বিন্দুং তথা চক্রং চিত্তং চৈব সমভ্যসেত্ .. ১৩..
সমাধিমেকেন সমমমৃতং যান্তি যোগিনঃ .
যথাগ্নির্দারুমধ্যস্থো নোত্তিষ্ঠেন্মথনং বিনা .. ১৪..
বিনা চাভ্যাসযোগেন জ্ঞানদীপস্তথা ন হি .
ঘটমধ্যগতো দীপো বাহ্যে নৈব প্রকাশতে .. ১৫..
ভিন্নে তস্মিন্ঘটে চৈব দীপজ্বালা চ ভাসতে .
স্বকাযং ঘটমিত্যুক্তং যথা দীপো হি তত্পদম্ .. ১৬..
গুরুবাক্যসমাভিন্নে ব্রহ্মজ্ঞানং স্ফুটীভবেত্ .
কর্ণধারং গুরুং প্রাপ্য কৃত্বা সূক্ষ্মং তরন্তি চ .. ১৭..
অভ্যাসবাসনাশক্ত্যা তরন্তি ভবসাগরম্ .
পরাযামঙ্কুরীভূয পশ্যন্তাং দ্বিদলীকৃতা .. ১৮..
মধ্যমাযাং মুকুলিতা বৈখর্যাং বিকসীকৃতা .
পূর্বং যথোদিতা যা বাগ্বিলোমেনাস্তগা ভবেত্ .. ১৯..
তস্যা বাচঃ পরো দেবঃ কূটস্থো বাক্প্রবোধকঃ .
সোহমস্মীতি নিশ্চিত্য যঃ সদা বর্ততে পুমান্ .. ২০..
শব্দৈরুচ্চাবচৈর্নীচৈর্ভাষিতোঽপি ন লিপ্যতে .
বিশ্বশ্চ তৈজসশ্চৈব প্রাজ্ঞশ্চেতি চ তে ত্রযঃ .. ২১..
বিরাড্ঢিরণ্যগর্ভশ্চ ঈশ্বরশ্চেতি তে ত্রযঃ .
ব্রহ্মাণ্ডং চৈব পিণ্ডাণ্ডং লোকা ভূরাদযঃ ক্রমাত্ .. ২২..
স্বস্বোপাধিলযাদেব লীযন্তে প্রত্যগাত্মনি .
অণ্ডং জ্ঞানাগ্নিনা তপ্তং লীযতে কারণৈঃ সহ .. ২৩..
পরমাত্মনি লীনং তত্পরং ব্রহ্মৈব জাযতে .
ততঃ স্তিমিতগম্ভীরং ন তেজো ন তমস্ততম্ .. ২৪..
অনাখ্যমনভিব্যক্তং সত্কিংচিদবশিষ্যতে .
ধ্যাত্বা মধ্যস্থমাত্মানং কলশান্তরদীপবত্ .. ২৫..
অঙ্গুষ্ঠমাত্রমাত্মানমধূমজ্যোতিরূপকম্ .
প্রকাশযন্তমন্তস্থং ধ্যাযেত্কূটস্থমব্যযম্ .. ২৬..
বিজ্ঞানাত্মা তথা দেহে জাগ্রত্স্বপ্নসুষুপ্তিতঃ .
মাযযা মোহিতঃ পশ্চাদ্বহুজন্মান্তরে পুনঃ .. ২৭..
সত্কর্মপরিপাকাত্তু স্ববিকারং চিকীর্ষতি .
কোঽহং কথমযং দোষঃ সংসারাখ্য উপাগতঃ .. ২৮..
জাগ্রত্স্বপ্নে ব্যবহরন্ত্সুষুপ্তৌ ক্ব গতির্মম .
ইতি চিন্তাপরো ভূত্বা স্বভাসা চ বিশেষতঃ .. ২৯..
অজ্ঞানাত্তু চিদাভাসো বহিস্তাপেন তাপিতঃ .
দগ্ধং ভবত্যেব তদা তূলপিণ্ডমিবাগ্নিনা .. ৩০..
দহরস্থঃ প্রত্যগাত্মা নষ্টে জ্ঞানে ততঃ পরম্ .
বিততো ব্যাপ্য বিজ্ঞানং দহত্যেব ক্ষণেন তু .. ৩১..
মনোমযজ্ঞানমযান্ত্সম্যগ্দগ্ধ্বা ক্রমেণ তু .
ঘটস্থদীপবচ্ছশ্বদন্তরেব প্রকাশতে .. ৩২..
ধ্যাযন্নাস্তে মুনিশ্চৈবমাসুপ্তেরামৃতেস্তু যঃ .
জীবন্মুক্তঃ স বিজ্ঞেযঃ স ধন্যঃ কৃতকৃত্যবান্ .. ৩৩..
জীবন্মুক্তপদং ত্যক্ত্বা স্বদেহে কালসাত্কৃতে .
বিশত্যদেহমুক্তত্বং পবনোঽস্পন্দতামিব .. ৩৪..
অশব্দমস্পর্শমরূপমব্যযং
     তথারসং নিত্যমগন্ধবচ্চ যত্ .
অনাদ্যনন্তং মহতঃ পরং ধ্রুবং
     তদেব শিষ্যত্যমলং নিরামযম্ .. ৩৫.. ইত্যুপনিষত্ ..
ॐ সহ নাববতু সহ নৌ ভুনক্তু সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি যোগকুণ্ডল্যুপনিষত্সমাপ্তা ..