মৈত্রেযী

.. মৈত্রেয্যুপনিষত্ ..

শ্রুত্যাচার্যোপদেশেন মুনযো যত্পদং যযুঃ .
তত্স্বানুভূতিসংসিদ্ধং স্বমাত্রং ব্রহ্ম ভাবযে ..

ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রম্ .
অথো বলমিন্দ্রিযাণি চ সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাম্ . মা মা ব্রহ্ম নিরাকরো-
দনিরাকরণমস্তু . অনিরাকরণং মেঽস্তু . তদাত্মনি নিরতে
য উপনিষত্সু ধর্মাস্তে মযি সন্তু  তে মযি সন্তু ..

ॐ শান্তিঃ শান্তিঃ শান্তিঃ ..

ॐ বৃহদ্রথো বৈ নাম রাজা রাজ্যে জ্যেষ্ঠং
পুত্রং নিধাপযিত্বেদমশাশ্বতং মন্যমানঃ
শরীরং বৈরাগ্যমুপেতোঽরণ্যং নির্জগাম . স তত্র
পরমং তপ আস্থাযাদিত্যমীক্ষমাণ ঊর্ধ্ববাহু-
স্তিষ্ঠত্যন্তে সহস্রস্য মুনিরন্তিকমাজগামাগ্নি
রিবাধূমকস্তেজসা নির্দহন্নিবাত্মবিদ্ভগবাঞ্ছা-
কাযন্য উত্তিষ্ঠোত্তিষ্ঠ বরং বৃণীশ্বেতি
রাজানমব্রবীত্স তস্মৈ নমস্কৃত্যোবাচ
ভগবন্নাহমাত্মবিত্ত্বং তত্ত্ববিচ্ছৃণুমো বযং
স ত্বং নো ব্রূহীত্যেতদ্বৃত্তং পুরস্তাদশক্যং মা
পৃচ্ছ প্রশ্নমৈক্ষ্বাকান্যান্কামান্বৃণীশ্বেতি
শাকাযন্যস্য চরণাবভিমৃশ্যমানো
রাজেমাং গাথাং জগাদ .. ১..

অথ কিমএতৈর্মান্যনাং শোষণং মহার্ণবানাং
শিখরিণাং প্রপতনং ধ্রুবস্য প্রচলনং স্থানং
বা তরূণাং নিমজ্জনং পৃথিব্যাঃ স্থানাদপসরণং
সুরাণাং সোঽহমিত্যেতদ্বিধেঽস্মিন্সংসারে কিং
কামোপভোগৈর্যৈরেবাশ্রিতস্যাসকৃদুপাবর্তনং
দৃশ্যত ইত্যুদ্ধর্তুমর্হসীত্যন্ধোদপানস্থো ভেক
ইবাহমস্মিন্সংসারে ভগবংস্ত্বং নো গতিরিতি .. ২..

ভগবঞ্শরীরমিদং মৈথুনাদেবোদ্ভূতং সংবিদপেতং
নিরয এব মূত্রদ্বারেণ নিষ্ক্রান্তমস্থিভিশ্চিতং
মাংসেনানুলিপ্তং চর্মণাববদ্ধং বিণ্মূত্রবাতপিত্ত-
কফমজ্জামেদোবসাভিরন্যৈশ্চ মলৈর্বহুভিঃ
পরিপূর্ণমেতাদৃশে শরীরে বর্তমানস্য ভগবংস্ত্বং
নো গতিরিতি .. ৩..

অথ ভগবাঞ্ছকাযন্যঃ সুপ্রীতোঽব্রবীদ্রাজানং
মহারাজ বৃহদ্রথেক্ষ্বাকুর্বংশধ্বজশীর্ষাত্মজ্ঞঃ
কৃতকৃত্যস্ত্বং মরুন্নাম্নো বিশ্রুতোঽসীত্যযং
খল্বাত্মা তে কতমো ভগবান্বর্ণ্য ইতি তং হোবাচ ..

শব্দস্পর্শমযা যেঽর্থা অনর্থা ইব তে স্থিতাঃ .
যেষাং সক্তস্তু ভূতাত্মা ন স্মরেচ্চ পরং পদম্ .. ১..

তপসা প্রাপ্যতে সত্ত্বং সত্ত্বাত্সংপ্রাপ্যতে মনঃ .
মনসা প্রাপ্যতে হ্যাত্মা হ্যাত্মাপত্ত্যা নিবর্ততে .. ২..

যথা নিরিন্ধনো বহ্নিঃ স্বযোনাবুপশাম্যতি .
তথা বৃত্তিক্ষযচ্চিত্তং স্বযোনাবুপশাম্যতি .. ৩..

স্বযোনাবুপশান্তস্য মনসঃ সত্যগামিনঃ .
ইন্দ্রিযার্থবিমূঢস্যানৃতাঃ কর্মবশানুগাঃ .. ৪..

চিত্তমেব হি সংসারস্তত্প্রযত্নেন শোধযেত্ .
যচ্চিত্তস্তন্মযো ভবতি গুহ্যমেতত্সনাতনম্ .. ৫..

চিত্তস্য হি প্রসাদেন হন্তি কর্ম শুভাশুভম্ .
প্রসন্নাত্মাত্মনি স্থিত্বা সুখমক্ষযমশ্নুতে .. ৬..

সমাসক্তং যদা চিত্তং জন্তোর্বিষযগোচরম্ .
যদ্যেবং ব্রহ্মণি স্যাত্তত্কো ন মুচ্যেত বন্ধনাত্ .. ৭..

হৃত্পুণ্ডরীকমধ্যে তু ভাবযেত্পরমেশ্বরম্ .
সাক্ষিণং বুদ্ধিবৃত্তস্য পরমপ্রেমগোচরম্ .. ৮..

অগোচরং মনোবাচামবধূতাদিসংপ্লবম্ .
সত্তামাত্রপ্রকাশৈকপ্রকাশং ভাবনাতিগম্ .. ৯..

অহেযমনুপাদেযমসামান্যবিশেষণম্ .
ধ্রুবং স্তিমিতগংভীরং ন তেজো ন তমস্ততম্ .
নির্বিকল্পং নিরাভাসং নির্বাণমযসংবিদম্ .. ১০..

নিত্যঃ শুদ্ধো বুদ্ধমুক্তস্বভাবঃ
       সত্যঃ সূক্ষ্মঃ সংবিভুশ্চাদ্বিতীযঃ .
আনন্দাব্ধির্যঃ পরঃ সোঽহ-
       মস্মি প্রত্যগ্ধাতুর্নাত্র সংশীতিরস্তি .. ১১..

আনন্দমন্তর্নিজমাশ্রযং ত-
       মাশাপিশাচীমবমনযন্তম্ .
আলোকযন্তং জগদিন্দ্রজাল-
       মাপত্কথং মাং প্রবিশেদসঙ্গম্ .. ১২..

বর্ণাশ্রমাচারযুতা বিমূঢাঃ
       কর্মানুসারেণ ফলং লভন্তে .
বর্ণাদিধর্মং হি পরিত্যজন্তঃ
       স্বানন্দতৃপ্তাঃ পুরুষা ভবন্তি .. ১৩..

বর্ণাশ্রমং সাবযবং স্বরূপ-
       মাদ্যন্তযুক্তং হ্যতিকৃচ্ছ্রমাত্রম্ .
পুত্রাদিদেহেষ্বভিমানশূন্যং
       ভূত্বা বসেত্সৌখ্যতমে হ্যনন্ত ইতি .. ১৪..  ৪..

ইতি প্রথমোঽধ্যাযঃ .. ১..

অথ ভগবান্মৈত্রেযঃ কৈলাসং জগাম তং গত্বোবাচ
ভো ভগবন্পরমতত্ত্বরহস্যমনুব্রূহীতি ..

স হোবাচ মহাদেবঃ ..

দেহো দেবালযঃ প্রোক্তঃ স জীবঃ কেবলঃ শিবঃ .
ত্যজেদজ্ঞাননির্মাল্যং সোঽহংভাবেন পূজযেত্ .. ১..

অভেদদর্শনং জ্ঞানং ধ্যানং নির্বিষযং মনঃ.
স্নানং মনোমলত্যাগঃ শৌচমিন্দ্রিযনিগ্রহঃ .. ২..

ব্রহ্মামৃতং পিবেদ্ভৈক্ষমাচরেদ্দেহরক্ষণে .
বসেদেকান্তিকো ভূত্বা চৈকান্তে দ্বৈতবর্জিতে .
ইত্যেবমাচরেদ্ধীমান্স এবং মুক্তিমাপ্নুযাত্ .. ৩..

জাতং মৃতমিদং দেহং মাতাপিতৃমলাত্মকম্ .
সুখদুঃখালযামেধ্যং স্পৃষ্ট্বা স্নানং বিধীযতে .. ৪..

ধাতুবদ্ধং মহারোগং পাপমন্দিরমধ্রুবম্ .
বিকারাকারবিস্তীর্ণং স্পৃষ্ট্বা স্নানং বিধীযতে .. ৫..

নবদ্বারমলস্রাবং সদা কালে স্বভাবজম্ .
দুর্গন্ধং দুর্মলোপেতং স্পৃষ্ট্বা স্নানং বিধীযতে .. ৬..

মাতৃসূতকসম্বন্ধং সূতকে সহ জাযতে .
মৃতসূতকজং দেহং স্পৃষ্ট্বা স্নানং বিধীযতে .. ৭..

অহংমমেতি বিণ্মূত্রলেপগন্ধাদিমোচনম্ .
শুদ্ধশৌচমিতি প্রোক্তং মৃজ্জলাভ্যাং তু লৌকিকম্ .. ৮..

চিত্তশুদ্ধিকরং শৌচং বাসনাত্রযনাশনম্ .
জ্ঞানবৈরাগ্যমৃত্তোযৈঃ ক্ষালনাচ্ছৌচমুচ্যতে .. ৯..

অদ্বৈতভাবনাভৈক্ষমভক্ষ্যং দ্বৈতভাবনম্ .
গুরুশাস্ত্রোক্তভাবেন ভিক্ষোর্ভৈক্ষং বিধীযতে .. ১০..

বিদ্বান্স্বদেশমুত্সৃজ্য সংন্যাসানন্তরং স্বতঃ .
কারাগারবিনির্মুক্তচোরবদ্দূরতো বসেত্ .. ১১..

অহঙ্কারসুতং বিত্তভ্রাতরং মোহমন্দিরম্ .
আশাপত্নী ত্যজেদ্যাবত্তাবন্মুক্তো ন সংশযঃ .. ১২..

মৃতা মোহমযী মাতা জাতো বোধমযঃ সুতঃ .
সূতকদ্বযসংপ্রাপ্তৌ কথং সন্ধ্যামুপাস্মহে .. ১৩..

হৃদাকাশে চিদাদিত্যঃ সদা ভাসতি ভাসতি .
নাস্তমেতি ন চোদেতি কথং সন্ধ্যামুপাস্মহে .. ১৪..

একমেবাদ্বিতীযং যদ্গুরোর্বাক্যেন নিশ্চিতম্ .
এতদেকান্তমিত্যুক্তং ন মঠো ন বনান্তরম্ .. ১৫..

অসংশযবতাং মুক্তিঃ সংশযাবিষ্টচেতসাম্ .
ন মুক্তির্জন্মজন্মান্তে তস্মাদ্বিশ্বাসমাপ্নুযাত্ .. ১৬..

কর্মত্যাগান্ন সংন্যাসো ন প্রেষোচ্চারণেন তু .
সন্ধৌ জীবাত্মনোরৈক্যং সংন্যাসঃ পরিকীর্তিতঃ .. ১৭..

বমনাহারবদ্যস্য ভাতি সর্বেষণাদিষু .
তস্যাধিকারঃ সংন্যাসে ত্যক্তদেহাভিমানিনঃ .. ১৮..

যদা মনসি বৈরাগ্যং জাতং সর্বেষু বস্তুষু .
তদৈব সংন্যসেদ্বিদ্বানন্যথা পতিতো ভবেত্ .. ১৯..

দ্রব্যার্থমন্নবস্ত্রার্থং যঃ প্রতিষ্ঠার্থমেব বা .
সংন্যসেদ্দুভযভ্রষ্টঃ স মুক্তিং নাপ্তুমর্হতি .. ২০..

উত্তমা তত্ত্বচিন্তৈব মধ্যমং শাস্ত্রচিন্তনম্ .
অধমা মন্ত্রচিন্তা চ তীর্থভ্রান্ত্যধমাধমা .. ২১..

অনুভুতিং বিনা মূঢো বৃথা ব্রহ্মণি মোদতে .
প্রতিবিম্বিতশাখাগ্রফলাস্বাদনমোদবত্ .. ২২..

ন ত্যজেচ্চেদ্যতির্মুক্তো যো মাধুকরমাতরম্ .
বৈরাগ্যজনকং শ্রদ্ধাকলত্রং জ্ঞাননন্দনম্ .. ২৩..

ধনবৃদ্ধা বযোবৃদ্ধা বিদ্যাবৃদ্ধাস্তথৈব চ .
তে সর্বে জ্ঞানবৃদ্ধস্য কিংকরাঃ শিষ্যকিংকরাঃ .. ২৪..

যন্মাযযা মোহিতচেতসো মা-
        মাত্মানমাপূর্ণমলব্ধবন্তঃ .
পরং বিদগ্দোধরপূরণায
        ভ্রমন্তি কাকা ইব সূরযোঽপি .. ২৫..

পাষাণলোহমণিমৃণ্মযবিগ্রহেষু
         পূজা পুনর্জননভোগকরী মুমুক্ষোঃ .
তস্মাদ্যতিঃ স্বহৃদযার্চনমেব কুর্যা-
         দ্বাহ্যার্চনং পরিহরেদপুনর্ভবায .. ২৬..

অন্তঃপূর্ণো বহিঃপূর্ণঃ পূর্ণকুম্ভ ইবার্ণবে .
অন্তঃশূন্যো বহিঃশূন্যঃ শূন্যকুম্ভ ইবাম্বরে ..২৭..

মা ভব গ্রাহ্যভাবাত্মা গ্রাহকাত্মা চ মা ভব .
ভাবনামখিলং ত্যক্ত্বা যচ্ছিষ্টং তন্মযো ভব .. ২৮..

দ্রষ্টৃদর্শনদৃশ্যানি ত্যক্ত্বা বাসনযা সহ .
দর্শনপ্রথমাভাসমাত্মানং কেবলং ভজ .. ২৯..

সংশান্তসর্বসংকল্পা যা শিলাবদবস্থিতিঃ .
জাগ্রন্নিদ্রাবিনির্মুক্তা সা স্বরূপস্থিতিঃ পরা .. ৩০..

ইতি দ্বিতীযোঽধ্যাযঃ .. ২..

অহমস্মি পরশ্চাস্মি ব্রহ্মাস্মি প্রভবোঽস্ম্যহম্ .
সর্বলোকগুরুশ্চামি সর্বলোকেঽস্মি সোঽস্ম্যহম্ .. ১..

অহমেবাস্মি সিদ্ধোঽস্মি শুদ্ধোঽস্মি পরমোঽস্ম্যহম্ .
অহমস্মি সোমোঽস্মি নিত্যোঽস্মি বিমলোঽস্ম্যহম্ .. ২..

বিজ্ঞানোঽস্মি বিশেষোঽস্মি সোমোঽস্মি সকলোঽস্ম্যহম্ .
শুভোঽস্মি শোকহীনোঽস্মি চৈতন্যোঽস্মি সমোঽস্ম্যহম্ .. ৩..

মানাবমানহীনোঽস্মি নির্গুণোঽস্মি শিবোঽস্ম্যহম্ .
দ্বৈতাদ্বৈতবিহীনোঽস্মি দ্বন্দ্বহীনোঽস্মি সোঽস্ম্যহম্ .. ৪..

ভাবাভাববিহীনোঽস্মি ভাসাহীনোঽস্মি ভাস্ম্যহম্ .
শূন্যাশূন্যপ্রভাবোঽস্মি শোভনাশোভনোঽস্ম্যহম্ .. ৫..

তুল্যাতুল্যবিহীনোঽস্মি নিত্যঃ শুদ্ধঃ সদাশিবঃ .
সর্বাসর্ববিহীনোঽস্মি সাত্ত্বিকোঽস্মি সদাস্ম্যহম্ .. ৬..

একসঙ্খ্যাবিহীনোঽস্মি দ্বিসঙ্খ্যাবাহনং ন চ .
সদসদ্ভেদহীনোঽস্মি সঙ্কল্প্স্রহিতোস্ম্যহম্ .. ৭..

নানাত্মভেদহীনোঽস্মি হ্যখণ্ডানন্দবিগ্রহঃ .
নাহমস্মি ন চান্যোঽস্মি দেহাদিরহিতোঽস্ম্যহম্ .. ৮..

আশ্রযাশ্রযহীনোঽস্মি আধাররহিতোঽস্ম্যহম্ .
বন্ধমোক্ষাদিহীনোঽস্মি শুদ্ধব্রহ্মাস্মি সোঽস্ম্যহম্ .. ৯..

চিত্তাদিসর্বহীনোঽস্মি পরমোঽস্মি পরাত্পরঃ .
সদা বিচাররূপোঽস্মি নির্বিচারোঽস্মি সোঽস্ম্যহম্ .. ১০..

অকারোকাররূপোঽস্মি মকরোঽস্মি সনাতনঃ .
ধাতৃধ্যানবিহীনোঽস্মি ধ্যেযহীনোঽস্মি সোঽস্ম্যহম্ .. ১১..

সর্বপূর্ণস্বরূপোঽস্মি সচ্চিদানন্দলক্ষণঃ .
সর্বতীর্থস্বরূপোঽস্মি পরমাত্মাস্ম্যহং শিবঃ .. ১২..

লক্ষ্যালক্ষ্যবিহীনোঽস্মি লযহীনরসোঽস্ম্যহম্ .
মাতৃমানবিহীনোঽস্মি মেযহীনঃ শিবোঽস্ম্যহম্ .. ১৩..

ন জগত্সর্বদ্রষ্টাস্মি নেত্রাদিরহিতোস্ম্যহম্ .
প্রবৃদ্ধোঽস্মি প্রবুদ্ধোঽস্মি প্রসন্নোঽস্মি পরোঽস্ম্যহম্ .. ১৪..

সর্বেন্দ্রিযবিহীনোঽস্মি সর্বকর্মকৃদপ্যহম্ .
সর্ববেদান্ততৃপ্তোঽস্মি সর্বদা সুলভোঽস্ম্যহম্ .. ১৫..

মুদিতামুদিতাখ্যোঽস্মি সর্বমৌনফলোঽস্ম্যহম্ .
নিত্যচিন্মাত্ররূপোঽস্মি সদা সচ্চিন্মযোঽস্ম্যহম্ .. ১৬..

যত্কিঞ্চিদপি হীনোঽস্মি স্বল্পমপ্যতি নাস্ম্যহম্ .
হৃদযগ্রন্থিহীনোঽস্মি হৃদযাম্ভোজমধ্যগঃ .. ১৭..

ষড্বিকারবিহীনোঽস্মি ষট্কোষরহিতোঽস্ম্যহম্ .
অরিষড্বর্গমুক্তোঽস্মি অন্তরাদন্তরোঽস্ম্যহম্ .. ১৮..

দেশকালবিমুক্তোঽস্মি দিগম্বরসুখোঽস্ম্যহম্ .
নাস্তি নাস্তি বিমুক্তোঽস্মি নকারহিতোঽস্ম্যহম্ .. ১৯..

অখণ্ডাকাশরূপোঽস্মি হ্যখণ্ডাকারমস্ম্যহম্ .
প্রপঞ্চমুক্তচিত্তোঽস্মি প্রপঞ্চরহিতোঽস্ম্যহম্ .. ২০..

সর্বপ্রকাশরূপোঽস্মি চিন্মাত্রজ্যোতিরস্ম্যহম্ .
কালত্রযবিমুক্তোঽস্মি কামাদিরহিতোঽস্ম্যহম্ .. ২১..

কাযিকাদিবিমুক্তোঽস্মি নির্গুণঃ কেবলোঽস্ম্যহম্ .
মুক্তিহীনোঽস্মি মুক্তোঽস্মি মোক্ষহীনোঽস্ম্যহম্ সদা .. ২২..

সত্যাসত্যাদিহীনোঽস্মি সন্মাত্রান্নাস্ম্যহং সদা .
গন্তব্যদেশহীনোঽস্মি গমনাদিবিবর্জিতঃ .. ২৩..

সর্বদা সমরূপোঽস্মি শান্তোঽস্মি পুরুষোত্তমঃ .
এবং স্বানুভবো যস্য সোঽহমস্মি ন সংশযঃ .. ২৪..

যঃ শৃণোতি সকৃদ্বাপি ব্রহ্মৈব ভবতি স্বযমিত্যুপনিষত্ ..

ইতি তৃতীযোঽধ্যাযঃ .. ৩..

ॐ আপ্যান্তু মামাঙ্গানি বাক্প্রাণশ্চক্ষুঃ শ্রোত্র-
মথো বলমিন্দ্রিযাণি চ . সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাং মা মা ব্রহ্ম নিরাকরো-
দনিরাকরণমস্ত্বনিরাকরণং মেস্তু তদাত্মনি নিরতে য
উপনিষত্সু ধর্মাস্তে মযি সন্তু তে মযি সন্তু ..

ॐ শান্তিঃ শান্তিঃ শান্তিঃ ..

ইতি মৈত্রেয্যুপনিষত্সমাপ্তা ..