মৈত্রযনি

.. মৈত্রাযণ্যুপনিষত্ ..

সামবেদীয সামান্য উপনিষত্ ..
বৈরাগ্যোত্থভক্তিযুক্তব্রহ্মমাত্রপ্রবোধতঃ .
যত্পদং মুনযো যান্তি তত্ত্রৈপদমহং মহঃ ..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোতমথো
বলমিন্দ্রিযাণি চ .
        সর্বাণি সর্বং ব্রহ্মোপনিষদং মাহং ব্রহ্ম নিরাকুর্যাং
মা মা ব্রহ্ম
নিরাকরোদনিরাকরণমস্ত্বনিরাকরণং মেস্তু তদাত্মনি নিরতে য
উপনিষত্সু
        ধর্মাস্তে মযি সন্তু তে মযি সন্তু ..
ॐ  শান্তিঃ  শান্তিঃ  শান্তিঃ ..
মৈত্রাযণী কৌষিতকী বৃহজ্জাবালতাপনী .
কালাগ্নিরুদ্রমৈত্রেযী সুবালক্ষুরমন্ত্রিকা .
ॐ বৃহদ্রথো হ বৈ নাম রাজা রাজ্যে জ্যেষ্ঠং পুত্রং
নিধাপযিত্বেদমশাশ্বতং মন্যমানঃ শারীরং
বৈরাগ্যমুপেতোঽরণ্যং নির্জগাম স তত্র পরমং তপ
আস্থাযাদিত্যমীক্ষমাণ ঊর্ধ্ববাহুস্তিষ্ঠত্যন্তে সহস্রস্য
মুনিরন্তিকমাজগামাগ্নিরিবাধূমকস্তেজসা
নির্দহন্নিবাত্মবিদ্ভগবাঞ্ছাকাযন্য উত্তিষ্ঠোত্তিষ্ঠ বরং
বৃণীশ্বেতি রাজানমব্রবীত্স তস্মৈ নমস্কৃত্যোবাচ
ভগবন্নাহমাত্মবিত্ত্বং তত্ত্ববিচ্ছৃণুমো বযং স ত্বং নো
ব্রূহীত্যেতদ্বৃতং পুরস্তাদশক্যং মা পৃচ্ছ
প্রশ্নমৈক্ষ্বাকান্যান্কামান্বৃণীশ্বেতি শাকাযন্যস্য
চরণবভিমৃশ্যমানো রাজেমাং গাথাং জগাদ .. ১..
ভগবন্নস্থিচর্মস্নাযুমজ্জামাংসশুক্রশোণিতশ্লেষ্মাশ্রুদূ
ষিতে বিণ্মূত্রবাতপিত্তকফসঙ্ঘাতে দুর্গন্ধে
নিঃসারেঽস্মিঞ্ছরীরে কিং কামোপভোগৈঃ .. ২..
কামক্রোধলোভভযবিষাদের্ষ্যেষ্টবিযোগানিষ্টসংপ্রযোগক্ষু
ত্পিপাসাজরামৃত্যুরোগশোকাদ্যৈরভিহতেঽস্মিঞ্ছরীরে কিং
কামোপভোগৈঃ .. ৩..
সর্বং চেদং ক্ষযিষ্ণু পশ্যামো যথেমে
দংশমশকাদযস্তৃণবন্নশ্যতযোদ্ভূতপ্রধ্বংসিনঃ .. ৪..
অথ কিমেতৈর্বা পরেঽন্যে মহাধনুর্ধরাশ্চক্রবর্তিনঃ
কেচিত্সুদ্যুম্নভূরিদ্যুম্নেন্দ্রদ্যুম্নকুবলযাশ্বযৌবনাশ্ববদ্ধিযা
শ্বাশ্বপতিঃ শশবিন্দুর্হারিশ্চন্দ্রোঽম্বরীষো
ননূক্তস্বযাতির্যযাতিনরণ্যোক্ষসেনোত্থমরুত্তভরতপ্রভৃতযো
রাজানো মিষতো বন্ধুবর্গস্য মহতীং শ্রিযং
ত্যক্ত্বাস্মাল্লোকাদমুং লোকং প্রযান্তি .. ৫..
অথ কিমেতৈর্বা পরেঽন্যে
গন্ধর্বাসুরযক্ষরাক্ষসভূতগণপিশাচোরগগ্রহাদীনাং
নিরোধনং পশ্যামঃ .. ৬..
অথ কিমেতৈর্বান্যানাং শোষণং মহার্ণবানাং শিখরিণাং
প্রপতনং ধ্রুবস্য প্রচলনং স্থানং বা তরূণাং
নিমজ্জনং পৃথিব্যাঃ স্থানাদপসরণং সুরাণং
সোঽহমিত্যেতদ্বিধেঽস্মিন্সংসারে কিং
কামোপভোগৈর্যৈরেবাশ্রিতস্যাসকৃদিহাবর্তনং দৃশ্যত
ইত্যুদ্ধর্তুমর্হসীত্যন্ধোদপানস্থো ভেক ইবাহমস্মিন্সংসারে
ভগবংস্ত্বং নো গতিস্ত্বং নো গতিঃ .. ৭.. ইতি প্রথমঃ
প্রপাঠকঃ ..
অথ ভগবাঞ্ছাকাযন্যঃ সুপ্রীতোঽব্রবীদ্রাজানং মহারাজ
বৃহদ্রথেক্ষ্বাকুবংশধ্বজশীর্ষাত্মজঃ কৃতকৃত্যস্ত্বং
মরুন্নাম্নো বিশ্রুতোঽসীত্যযং বা ব খল্বাত্মা তে কতমো
ভগবান্বর্ণ্য ইতি তং হোবাচ ইতি .. ১..
য এষো বাহ্যাবষ্টম্ভনেনোর্ধ্বমুত্ক্রান্তো
ব্যথমানোঽব্যথমানস্তমঃ প্রণুদত্যেষ আত্মেত্যাহ
ভগবানথ য এষ সংপ্রসাদোঽস্মাঞ্ছরীরাত্সমুত্থায
পরং জ্যোতিরুপসংপদ্য স্বেন রূপেণাভিনিষ্পদ্যত এষ আত্মেতি
হোবাচৈতদমৃতমভযমেতদ্ব্রহ্মেতি .. ২..
অথ খল্বিযং ব্রহ্মবিদ্যা সর্বোপনিষদ্বিদ্যা বা রাজন্নস্মাকং
ভগবতা মৈত্রেযেণ ব্যাখ্যাতাহং তে
কথযিষ্যামীত্যথাপহতপাপ্মানস্তিগ্মতেজস ঊর্ধ্বরেতসো
বালখিল্যা ইতি শ্রুযন্তেঽথৈতে
প্রজাপতিমব্রুবন্ভগবঞ্শকটমিবাচেতনমিদং শরীরং
কস্যৈষ খল্বীদৃশো মহিমাতীন্দ্রিযভূতস্য
যেনৈতদ্বিধমিদং চেতনবত্প্রতিষ্ঠাপিতং প্রচোদযিতাস্য কো
ভগবন্নেতদস্মাকং ব্রূহীতি তান্হোবাচ .. ৩..
যো হ খলু বাচোপরিস্থঃ শ্রূযতে স এব বা এষ শুদ্ধঃ
পূতঃ শূন্যঃ শান্তো প্রাণোঽনীশত্মাঽনন্তোঽক্ষয্যঃ স্থিরঃ
শাশ্বতোঽজঃ স্বতন্ত্রঃ স্বে মহিম্নি তিষ্ঠত্যনেনেদং শরীরং
চেতনবত্প্রতিষ্ঠাপিতং প্রচোদযিতা চৈষোঽস্যেতি তে
হোচুর্ভগবন্কথমনেনেদৃশেনানিচ্ছেনৈতদ্বিধমিদং
চেতনবত্প্রতিষ্ঠাপিতং প্রচোদযিতা চৈষোঽস্যেতি কথমিতি
তান্হোবাচ .. ৪..
স বা এষ সূক্ষ্মোঽগ্রাহ্যোঽদৃশ্যঃ পুরুষসংজ্ঞকো
বুদ্ধিপূর্বমিহৈবাবর্ততেংঽশেন সুষুপ্তস্যৈব বুদ্ধিপূর্বং
নিবোধযত্যথ যোহ খলু বাবাইতস্যাংশোঽযং
যশ্চেতনমাত্রঃ প্রতিপূরুষং ক্ষেত্রজ্ঞঃ
সঙ্কল্পাধ্যবসাযাভিমানলিঙ্গঃ প্রজাপতির্বিশ্বক্ষস্তেন
চেতনেনেদং শরীরং চেতনবত্প্রতিষ্ঠাপিতং প্রচোদযিতা
চৈষোঽস্যেতি তে হোচুর্ভগবন্নীদৃশস্য কথমংশেন
বর্তনমিতি তান্হোবাচ .. ৫..
প্রজাপতির্বা এষোঽগ্রেঽতিষ্ঠত্স নারমতৈকঃ স
আত্মনমভিধ্যাযদ্বব্হীঃ প্রজা অসৃজত্ত অস্যৈবাত্মপ্রবুদ্ধা
অপ্রাণা স্থাণুরিব তিষ্ঠমানা অপশ্যত্স নারমত
সোঽমন্যতৈতাসং প্রতিবোধনাযাভ্যন্তরং প্রাবিশানীত্যথ স
বাযুমিবাত্মানং কৃত্বাভ্যন্তরং প্রাবিশত্স একো নাবিশত্স
পঞ্চধাত্মানং প্রবিভজ্যোচ্যতে যঃ প্রাণোঽপানঃ সমান
উদানো ব্যান ইতি .. ৬..
অথ যোঽযমূর্ধ্বমুত্ক্রামতীত্যেষ বাব স প্রাণোঽথ
যোযমাবঞ্চং সংক্রামত্বেষ বাব সোঽপানোঽথ যোযং
স্থবিষ্ঠমন্নধাতুমপানে স্থাপযত্যণিষ্ঠং চাঙ্গেঽঙ্গে
সমং নযত্যেষ বাব স সমানোঽথ যোঽযং পীতাশিতমুদ্গিরতি
নিগিরতীতি চৈষ বাব স উদানোঽথ যেনৈতাঃ শিরা
অনুব্যাপ্তা এষ বাব স ব্যানঃ .. ৭..
অথোপাংশুরন্তর্যাম্যমিভবত্যন্তর্যামমুপাংশুমেতযোরন্তরালে
চৌষ্ণ্যং মাসবদৌষ্ণ্যং স পুরুষোঽথ যঃ পুরুষঃ
সোঽগ্নির্বৈশ্বানরোঽপ্যন্যত্রাপ্যুক্তমযমগ্নির্বৈশ্বানরো
যোঽযমনন্তঃ পুরুষো যেনেদমন্নং পচ্যতে যদিদমদ্যতে
তস্যৈষ ঘোষো ভবতি যদেতত্কর্ণাবপিধায শৃণোতি স
যদোত্ক্রমিষ্যন্ভবতি নৈনং ঘোষং শৃণোতি .. ৮..
স বা এষ পঞ্চধাত্মানং প্রবিভজ্য নিহিতো গুহাযাং
মনোমযঃ প্রাণশরীরো বহুরূপঃ সত্যসং কল্প আত্মেতি স বা
এষোঽস্য হৃদন্তরে তিষ্ঠন্নকৃতার্থোঽমন্যতার্থানসানি
তত্স্বানীমানি ভিত্ত্বোদিতঃ পঞ্চভী রশ্মিভির্বিষযানত্তীতি
বুদ্ধীন্দ্রিযাণি যানীমান্যেতান্যস্য রশ্মযঃ কর্মেন্দ্রিযাণ্যস্য
হযা রথঃ শরীরং মনো নিযন্তা প্রকৃতিমযোস্য প্রতোদনেন
খল্বীরিতং পরিভ্রমতীদং শরীরং চক্রমিব মৃতে চ
নেদং শরীরং চেতনবত্প্রতিষ্ঠাপিতং প্রচোদযিতা
চৈষোঽস্যেতি .. ৯..
স বা এষ আত্মেত্যদো বশং নীত ইব সিতাসিতৈঃ
কর্মফলৈরভিভূযমান ইব প্রতিশরীরেষু
চরত্যব্যক্তত্বাত্সূক্ষ্মত্বাদদৃশ্যত্বাদগ্রাহ্যত্বান্নির্মমত্বা
চ্চানবস্থোঽকর্তা কর্তেবাবস্থিতঃ .. ১০..
স বা এষ শুদ্ধঃ স্থিরোঽচলশ্চালেপোঽব্যগ্রো নিঃস্পৃহঃ
প্রেক্ষকবদবস্থিতঃ স্বস্য চরিতভুগ্গুণমযেন
পটেনাত্মানমন্তর্ধীযাবস্থিত ইত্যবস্থিত ইতি .. ১১.. ইতি
দ্বিতীযঃ প্রপাঠকঃ ..
তে হোচুর্ভগবন্যদ্যেবমস্যাত্মনো মহিমানং সূচযসীত্যন্যো
বা পরঃ কোঽযমাত্মা সিতাসিতৈঃ কর্মফলৈরভিভূযমানঃ
সদসদ্যোনিমাপদ্যত ইত্যবাচীং বোর্ধ্বাং বা গতং
দ্বন্দ্বৈরভিভূযমানঃ পরিভ্রমতীতি কতম এষ ইতি
তান্হোবাচ .. ১..
অস্তি খল্বন্যোঽপরো ভূতাত্মা যোঽযং সিতাসিতৈঃ
কর্মফলৈরভিভূযমানঃ সদসদযোনিমাপদ্যত ইত্যবাচীং
বোর্ধ্বাং গতিং দ্বন্দ্বৈরভিভূযমানঃ
পরিভ্রমতীত্যস্যোপব্যাখ্যানং পঞ্চ তন্মাত্রাণি
ভূতশব্দেনোচ্যন্তে পঞ্চ মহাভূতানি
ভূতশব্দেনোচ্যন্তেঽথ তেষাং যঃ সমুদাযঃ
শরীরমিত্যুক্তমথ যো হ খলু বাব শরীরমিত্যুক্তং স
ভূতাত্মেত্যুক্তমথাস্তি তস্যাত্মা বিন্দুরিব পুষ্কর ইতি স বা
এষোঽভিভূতঃ
প্রাকৃত্যৈর্গুণৈরিত্যতোঽভিভূতত্বাত্সংমূঢত্বং
প্রযাত্যসংমূঢস্ত্বাদাত্মস্থং প্রভুং ভগবন্তং
কারযিতারং নাপশ্যদ্গুণৌঘৈস্তৃপ্যমানঃ
কলুষীকৃতাস্থিরশ্চঞ্চলো লোলুপ্যমানঃ সস্পৃহো
ব্যগ্রশ্চাভিমানত্বং প্রযাত ইত্যহং সো মমেদমিত্যেবং
মন্যমানো নিবধ্নাত্যাত্মনাত্মানং জালেনৈব খচরঃ
কৃতস্যানুফলৈরভিভূযমানঃ পরিভ্রমতীতি .. ২..
অথান্যত্রাপ্যুক্তং যঃ কর্তা সোঽযং বৈ ভূতাত্মা করণৈঃ
কারযিতান্তঃপুরুষোঽথ যথাগ্নিনাযঃপিণ্ডো বাভিভূতঃ
কর্তৃভির্হন্যমানো নানাত্বমুপৈত্যেবং বাব খল্বসৌ
ভূতাত্মান্তঃপুরুষেণাভিভূতো গুণৈর্হন্যমানো
নানাত্বমুপৈত্যথ যত্ত্রিগুণং চতুরশীতিলক্ষযোনিপরিণতং
ভূতত্রিগুণমেতদ্বৈ নানাত্বস্য রূপং তানি হ বা ইমানি
গুণানি পুরুষেণেরিতানি চক্রমিব চক্রিণেত্যথ যথাযঃপিণ্ডে
হন্যমানে নাগ্নিরভিভূযত্যেবং নাভিভূযত্যসৌ
পুরুষোঽভিভূযত্যযং ভূতাত্মোপসংশ্লিষ্টত্বাদিতি .. ৩..
অথান্যত্রাপ্যুক্তং শরীরমিদং মৈথুনাদেবোদ্ভূতং
সংবিদপেতং নিরয এব মূত্রদ্বারেণ
নিষ্ক্রামন্তমস্থিভিশ্চিতং মাংসেনানুলিপ্তং
চর্মণাববদ্ধং বিণ্মূত্রপিত্তকফমজ্জামেদোবসাভিরন্যৈশ্চ
মলৈর্বহুভিঃ পরিপূর্ণং কোশ ইবাবসন্নেতি .. ৪..
অথান্যত্রাপ্যুক্তং সংমোহো ভযং বিষাদো নিদ্রা তন্দ্রী ব্রণো
জরা শোকঃ ক্ষুত্পিপাসা কার্পণ্যং ক্রোধো নাস্তিক্যমজ্ঞানং
মাত্সর্যং বৈকারুণ্যং মূঢত্বং নির্ব্রীডত্বং
নিকৃতত্বমুদ্ধাতত্বমসমত্বমিতি তামসান্বিতস্তৃষ্ণা স্নেহো
রাগো লোভো হিংসা রতির্দৃষ্টিব্যাপৃতত্বমীর্ষ্যা
কামমবস্থিতত্বং চঞ্চলত্বং জিহীর্ষার্থোপার্জনং
মিত্রানুগ্রহণং পরিগ্রহাবলম্বোঽনিষ্টেষ্বিন্দ্রিযার্থেষু
দ্বিষ্টিরিষ্টেশ্বভিষঙ্গ ইতি রাজসান্বিতৈঃ পরিপূর্ণ
এতৈরভিভূত ইত্যযং ভূতাত্মা
তস্মান্নানারূপাণ্যাপ্নোতীত্যাপ্নোতীতি .. ৫.. তৃতীযঃ
প্রপাঠকঃ ..
তে হ খল্বথোর্ধ্বরেতসোঽতিবিস্মিতা অতিসমেত্যোচুর্ভগবন্নমস্তে
ত্বং নঃ শাধি ত্বমস্মাকং গতিরন্যা ন বিদ্যত ইত্যস্য
কোঽতিথির্ভূতাত্মনো যেনেদং হিত্বামন্যেব সাযুজ্যমুপৈতি
তান্হোবাচ .. ১..
অথান্যত্রাপ্যুক্তং মহানদীষূর্ময ইব নিবর্তকমস্য
যত্পুরাকৃতং সমুদ্রবেলেব দুর্নিবার্যমস্য মৃত্যোরাগমনং
সদসত্ফলমযৈর্হি পাশৈঃ পশুরিব বদ্ধং
বন্ধনস্থস্যেবাস্বাতন্ত্র্যং যমবিষযস্থস্যৈব
বহুভযাবস্থং মদিরোন্মত্ত ইবামোদমমদিরোন্মত্তং পাপ্মনা
গৃহীত ইব ভ্রাম্যমাণং মহোরগদষ্ট ইব বিপদৃষ্টং
মহান্ধকার ইব রাগান্ধমিন্দ্রজালমিব মাযামযং স্বপ্নমিব
মিথ্যাদর্শনং কদলীগর্ভ ইবাসারং নট ইব ক্ষণবেষং
চিত্রভিত্তিরিব মিথ্যামনোরমমিত্যথোক্তম্ .. শব্দস্পর্শাদযো
যেঽর্থা অনর্থা ইব তে স্থিতাঃ . যেষ্বাসক্তস্তু ভূতাত্মা ন
স্মরেচ্চ পরং পদম্ .. ২..
অযং বা ব খল্বস্য প্রতিবিধির্ভূতাত্মনো যদ্যেব
বিদ্যাধিগমস্য ধর্মস্যানুচরণং স্বাশ্রমেষ্বানুক্রমণং
স্বধর্ম এব সর্বং ধত্তে
স্তম্ভশাখেবেতরাণ্যনেনোর্ধ্বভাগ্ভবত্যন্যথধঃ পতত্যেষ
স্বধর্মাভিভূতো যো বেদেষু ন স্বধর্মাতিক্রমেণাশ্রমী
ভবত্যাশ্রমেষ্বেবাবস্থিতস্তপস্বী চেত্যুচ্যত এতদপ্যুক্তং
নাতপস্কস্যাত্মধ্যানেঽধিগমঃ কর্মশুদ্ধির্বেত্যেবং হ্যাহ ..
তপসা প্রাপ্যতে সত্ত্বং সত্ত্বাত্সম্প্রাপ্যতে মনঃ .
মনসা প্রাপ্যতে ত্বাত্মা হ্যাত্মাপত্ত্যা নিবর্তত ইতি .. ৩..
অত্রৈতে শ্লোকা ভবন্তি ..
যথা নিরিন্ধনো বহ্নিঃ স্বযোনাবুপশাম্যতি .
তথা বৃত্তিক্ষযাচ্চিত্তং স্বযোনাবুপশাম্যতি .. ১..
স্বযোনাবুপশান্তস্য মনসঃ সত্যগামিনঃ .
ইন্দ্রিযার্থাবিমূঢস্যানৃতাঃ কর্মবশানুগাঃ .. ২..
চিত্তমেব হি সংসারস্তত্প্রযত্নেন শোধযেত্ .
যচ্চিত্তস্তন্মযো ভবতি গুহ্যমেতত্সনাতনম্ .. ৩..
চিত্তস্য হি প্রসাদেন হন্তি কর্ম শুভাশুভম্ .
প্রসন্নাত্মাত্মনি স্থিত্বা সুখমব্যযমশ্নুতে.. ৪..
সমাসক্তং যদা চিত্তং জন্তোর্বিষযগোচরে .
যদ্যেবং ব্রহ্মণি স্যাত্তত্কো ন মুচ্যেত বন্ধনাত্ .. ৫..
মনো হি দ্বিবিধং প্রোক্তং শুদ্ধং চাশুদ্ধমেব চ .
অশুদ্ধং কামসঙ্কল্পং শুদ্ধং কামবিবর্জিতম্ .. ৬..
লযবিক্ষেপরহিতং মনঃ কৃত্বা সুনিশ্চলম্ .
যদা যাত্যমনীভাবং তদা তত্পরমং পদম্ .. ৭..
তাবদেব নিরোদ্ধব্যং হৃদি যাবত্ক্ষযং গতম্ .
এতজ্জ্ঞানং চ মোক্ষং চ শেষাস্তু গ্রন্থবিস্তরাঃ .. ৮..
সমাধিনির্ধূতমলস্য চেতসো
       নিবেশিতস্যাত্মনি যত্সুখং লভেত্ .
ন শক্যতে বর্ণযিতুং গিরা তদা
       স্বযং তদন্তঃকরণেন গৃহ্যতে .. ৯..
অপামপোঽগ্নিরগ্নৌ বা ব্যোম্নি ব্যোম ন লক্ষযেত্ .
এবমন্তর্গতং চিত্তং পুরুষঃ প্রতিমুচ্যতে .. ১০..
মন এব মনুষ্যাণাং কারণং বন্ধমোক্ষযোঃ .
বন্ধায বিষযাসক্তং মুক্ত্যৈ নির্বিষযং স্মৃতমিতি .. ১১..
অথ যথেযং কৌত্সাযনিস্তুতিঃ ..
ত্বং ব্রহ্মা ত্বং চ বৈ বিষ্ণুস্ত্বং রুদ্রস্ত্বং প্রজাপতিঃ .
ত্বমগ্নির্বরুণো বাযুস্ত্বমিন্দ্রস্ত্বং নিশাকরঃ .. ১২..
ত্বং মনুস্ত্বং যমশ্চ ত্বং পৃথিবী ত্বমথাচ্যুতঃ .
স্বার্থে স্বাভাবিকেঽর্থে চ বহুধা তিষ্ঠসে দিবি .. ১৩..
বিশ্বেশ্বর নমস্তুভ্যং বিশ্বাত্মা বিশ্বকর্মকৃত্ .
বিশ্বভুগ্বিশ্বমাযস্ত্বং বিশ্বক্রীডারতিঃ প্রভুঃ .. ১৪..
নমঃ শান্তাত্মনে তুভ্যং নমো গুহ্যতমায চ .
অচিন্ত্যাযাপ্রমেযায অনাদিনিধনায চেতি .. ১৫.. .. ৪..
তমো বা ইদমেকমাস তত্পশ্চাত্পরেণেরিতং বিষযত্বং
প্রযাত্যেতদ্বৈ রজসো রূপং তদ্রজঃ খল্বীরিতং বিষমত্বং
প্রযাত্যেতদ্বৈ তমসো রূপং তত্তমঃ খল্বীরিতং তমসঃ
সম্প্রাস্রবত্যেতদ্বৈ সত্ত্বস্য রূপং তত্সত্ত্বমেবেরিতং
তত্সত্ত্বাত্সংপ্রাস্রবত্সোংঽশোঽযং যশ্চেতনমাত্রঃ
প্রতিপুরুষং ক্ষেত্রজ্ঞঃ সঙ্কল্পাধ্যবসাযাভিমানলিঙ্গঃ
প্রজাপতিস্তস্য প্রোক্তা অগ্র্যাস্তনবো ব্রহ্মা রুদ্রো বিষ্ণুরিত্যথ
যো হ খলু বাবাস্য রাজসোংঽশোঽসৌ স যোঽযং ব্রহ্মাথ যো হ
খলু বাবাস্য তামসোংঽশোঽসৌ স যোঽযং রুদ্রোঽথ যো হ
খলু বাবাস্য সাত্বিকোংঽশোঽসৌ স এবং বিষ্ণুঃ স বা এষ
একস্ত্রিধাভূতোঽষ্টধৈকাদশধা দ্বাদশধাপরিমিতধা
চোদ্ভূত উদ্ভূতত্বাদ্ভূতেষু চরতি প্রতিষ্ঠা
সর্বভূতানামধিপতির্বভূবেত্যসাবাত্মান্তর্বহিশ্চান্তর্বহিস্
হ্চ .. ৫.. চতুর্থঃ প্রপাঠকঃ ..
দ্বিধা বা এষ আত্মানং বিভর্ত্যযং যঃ প্রাণো
যশ্চাসাবাদিত্যোঽথ দ্বৌ বা এতাবাস্তাং পঞ্চধা
নামান্তর্বহিশ্চাহোরাত্রে তৌ ব্যাবর্তেতে অসৌ বা আদিত্যো
বহিরাত্মান্তরাত্মা প্রাণো বহিরাত্মা গত্যান্তরাত্মনানুমীযতে
. গতিরিত্যেবং হ্যাহ যঃ
কশ্চিদ্বিদ্বানপহতপাপ্মাধ্যক্ষোঽবদাতমনাস্তন্নিষ্ঠ
আবৃত্তচক্ষুঃ সোঽন্তরাত্মাগত্যা বহিরাত্মনোঽনুমীযতে
গতিরিত্যেবং হ্যাহাথ য এষোঽন্তরাদিত্যে হিরণ্মযঃ পুরুষো
যঃ পশ্যতি মাং হিরণ্যবত্স এষোঽন্তরে হৃত্পুষ্কর
এবাশ্রিতোঽন্নমত্তি .. ১..
অথ য এষোঽন্তরে হৃত্পুষ্কর এবাশ্রিতোঽন্নমত্তি স
এষোঽগ্নির্দিবি শ্রিতঃ সৌরঃ কালাখ্যোঽদৃশ্যঃ
সর্বভূতান্নমত্তি কঃ পুষ্করঃ কিমযং বেদ বা ব
তত্পুষ্করং যোঽযমাকাশোঽস্যেমাশ্চতস্রো দিশশ্চতস্র
উপদিশঃ সংস্থা অযমর্বাগগ্নিঃ পরত এতৌ
প্রাণাদিত্যাবেতাবুপাসীতোমিত্যক্ষরেণ ব্যাহৃতিভিঃ সাবিত্র্যা
চেতি .. ২..
দ্বে বাব ব্রহ্মণো রূপে মূর্তং চামূর্তং চাথ যন্মূর্তং
তদসত্যং যদমূর্তং তত্সত্যং তদ্ব্রহ্ম যদ্ব্রহ্ম
তজ্জ্যোতির্যজ্জ্যোতিঃ স আদিত্যঃ স বা এষ ওমিত্যেতদাত্মা স
ত্রেধাত্মানং ব্যকুরুত ওমিতি তিস্রো মাত্রা এতাভিঃ সর্বমিদমোতং
প্রোতং চৈবাস্মিন্নিত্যেবং হ্যাহৈতদ্বা আদিত্য ওমিত্যেবং
ধ্যাযংস্তথাত্মানং যুঞ্জীতেতি .. ৩..
অথান্যত্রাপ্যুক্তমথ খলু য উদ্গীথঃ স প্রণবো যঃ প্রণবঃ
স উদ্গীথ ইত্যসাবাদিত্য উদ্গীথ এব প্রণব ইত্যেবং
হ্যাহোদ্গীথঃ প্রণবাখ্যং প্রণেতারং নামরূপং বিগতনিদ্রং
বিজরমবিমৃত্যুং পুনঃ পঞ্চধা জ্ঞেযং নিহিতং
গুহাযামিত্যেবং হ্যাহোর্ধ্বমূলং বা আব্রহ্মশাখা
আকাশবায্বগ্ন্যুদকভূম্যাদয একেনাত্তমেতদ্ব্রহ্ম
তত্তস্যৈতত্তে যদসাবাদিত্য ওমিত্যেতদক্ষরস্য
চৈতত্তস্মাদোমিত্যনেনৈতদুপাসীতাজস্রমিত্যেকোঽস্য রসং
বোধযীত ইত্যেবং হ্যাহৈতদেবাক্ষরং পুণ্যমেতদেবাক্ষরং
জ্জ্ঞাত্বা যো যদিচ্ছতি তস্য তত্ .. ৪..
অথান্যত্রাপ্যুক্তং স্তনযত্যেপাস্য তনূর্যা ওমিতি
স্ত্রীপুংনপুংসকমিতি লিঙ্গবত্যেষাথাগ্নির্বাযুরাদিত্য ইতি
ভাস্বত্যেষাথ রুদ্রো বিষ্ণুরিত্যধিপতিরিত্যেষাথ গার্হপত্যো
দক্ষণাগ্নিরাহবনীয ইতি মুখবত্যেষাথ ঋগ্যজুঃসামেতি
বিজানাত্যেষথ ভূর্ভুবস্বরিতি লোকবত্যেষাথ ভূতং
ভব্যং ভবিষ্যদিতি কালবত্যেষাথ প্রাণোঽগ্নিঃ সূর্যঃ ইতি
প্রতাপবত্যেষাথান্নমাপশ্চন্দ্রমা ইত্যাপ্যাযনবত্যেষাথ
বুদ্ধির্মনোঽহঙ্কার ইতি চেতনবত্যেষাথ প্রাণোঽপানো ব্যান
ইতি প্রাণবত্যেকে ত্যজামীত্যুক্তৈতাহ প্রস্তোতার্পিতা
ভবতীত্যেবং হ্যাহৈতদ্বৈ সত্যকাম পরং চাপরং চ
যদোমিত্যেতদক্ষরমিতি .. ৫..
অথ ব্যাত্তং বা ইদমাসীত্সত্যং প্রজাপতিস্তপস্তপ্ত্বা
অনুব্যাহরদ্ভূর্ভুবঃস্বরিত্যেষা হাথ প্রজাপতেঃ স্থবিষ্ঠা
তনূর্বা লোকবতীতি স্বরিত্যস্যাঃ শিরো নাভির্ভুবো ভূঃ পাদা
আদিত্যশ্চক্ষুরাযত্তঃ পুরুষস্য মহতো মাত্রাশ্চক্ষুষা
হ্যযং মাত্রাশ্চরিতি সত্যং বৈ চক্ষুরক্ষিণ্যুপস্থিতো হি
পুরুষঃ সর্বার্থেষু
বদত্যেতস্মাদ্ভূর্ভুবঃস্বরিত্যুপাসীতান্নং হি
প্রজাপতির্বিশ্বাত্মা বিশ্বচক্ষুরিবোপাসিতো ভবতীত্যেবং
হ্যাহৈষা বৈ প্রজাপতির্বিশ্বভৃত্তনূরেতস্যামিদং
সর্বমন্তর্হিতমস্মি৅ংশ্চ সর্বস্মিন্নেষান্তর্হিতেতি
তস্মাদেষোপাসীতেতি .. ৬..
তত্সবিতুর্বরেণ্যমিত্যসৌ বা আদিত্যঃ সবিতা স বা এবং
প্রবরণায আত্মকামেনেত্যাহুর্ব্রহ্মবাদিনোঽথ ভর্গো দেবস্য
ধীমহীতি সবিতা বৈ তেঽবস্থিতা যোঽস্য ভর্গঃ কং
সঞ্চিতযামীত্যাহুর্ব্রহ্মবাদিনোঽথ ধিযো যো নঃ প্রচোদযাদিতি
বুদ্ধযো বৈ ধিযস্তা যোঽস্মাকং
প্রচোদযাদিত্যাহুর্ব্রহ্মবাদিনোঽথ ভর্গ ইতি যো হ বা
অস্মিন্নাদিত্যে নিহিতস্তারকেঽক্ষিণি চৈষ ভর্গাখ্যো
ভাভির্গতিরস্য হীতি ভর্গো ভর্জতি বৈষ ভর্গ ইতি
ব্রহ্মবাদিনোঽথ ভর্গ ইতি ভাসযতীমা৅ংল্লোকানিতি
রঞ্জযতীমানি ভূতানি গচ্ছত ইতি
গচ্ছত্যস্মিন্নাগচ্ছত্যস্মা ইমাঃ
প্রজাস্তস্মাদ্ভারকত্বাদ্ভর্গঃ শত্রূন্সূযমানত্বাত্সূর্যঃ
সব্নাত্সবিতা দানাদাদিত্যঃ
পবনাত্পাবমানোঽথাযোঽথাযনাদাদিত্য ইত্যেবং হ্যাহ
খল্বাত্মনাত্মামৃতাখ্যশ্চেতা মন্তা গন্তা স্রষ্টা
নন্দযিতা কর্তা বক্তা রসযিতা ঘ্রাতা স্পর্শযিতা চ
বিভুবিগ্রহে সন্নিষ্ঠা ইত্যেবং হ্যাহাথ যত্র দ্বৈতীভূতং
বিজ্ঞানং তত্র হি শৃণোতি পশ্যতি জিঘ্রতীতি রসযতে চৈব
স্পর্শযতি সর্বমাত্মা জানীতেতি যত্রাদ্বৈতীভূতং বিজ্ঞানং
কার্যকারণনির্মুক্তং নির্বচনমনৌপম্যং নিরুপাখ্যং কিং
তদঙ্গ বাচ্যম্ .. ৭..
এষ হি খল্বাত্মেশানঃ শংভুর্ভবো রুদ্রঃ
প্রজাপতির্বিশ্বসৃড্ঢিরণ্যগর্ভঃ সত্যং প্রাণো হংসঃ শান্তো
বিষ্ণুর্নারাযণোঽর্কঃ সবিতা ধাতা সম্রাডিন্দ্র ইন্দুরিতি য
এষ তপত্যগ্নিনা পিহিতঃ সহস্রাক্ষেণ হিরণ্মযেনানন্দেনৈষ
বাব বিজিজ্ঞাসিতব্যোঽন্বেষ্টব্যঃ সর্বভূতেভ্যোঽভযং
দত্ত্বারণ্যং গত্বাথ
বহিঃকৃতেন্দ্রিযার্থান্স্বশরীরাদুপলভতেঽথৈনমিতি
বিশ্বরূপং হরিণং জাতবেদসং পরাযণং জ্যোতিরেকং
তপন্তম্ . সহস্ররশ্মিঃ শতধা বর্তমানঃ প্রাণঃ
প্রজানামুদযত্যেষ সূর্যঃ .. ৮.. ইতি পঞ্চমঃ প্রপাঠকঃ ..
ॐ আপ্যাযন্ত্বিতি শান্তিঃ ..
ইতি মৈত্রাযণ্যুপনিষত্সমাপ্তা ..