মুণ্ডক

.. মুণ্ডকোপনিষত্ ..

             || শ্রীঃ||

               || মুণ্ডকোপনিষত্  ||

ॐ ভদ্রং কর্ণেভিঃ শ্রুণুযাম দেবা ভদ্রং পশ্যেমাক্ষভির্যজত্রাঃ |
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ |
স্বস্তি ন ইন্দ্রো বৃদ্ধশ্রবাঃ স্বস্তি নঃ পূষা বিশ্ববেদাঃ |
স্বস্তি নস্তার্ক্ষ্যো অরিষ্টনেমিঃ স্বস্তি নো বৃহস্পতির্দধাতু|

|| ॐ শান্তিঃ শান্তিঃ শান্তিঃ ||

|| ॐ ব্রহ্মণে নমঃ ||

|| প্রথমমুণ্ডকে প্রথমঃ খণ্ডঃ ||

ॐ ব্রহ্মা দেবানাং প্রথমঃ সংবভূব বিশ্বস্য কর্তা
ভুবনস্য গোপ্তা | স ব্রহ্মবিদ্যাং সর্ববিদ্যাপ্রতিষ্ঠামথর্বায
জ্যেষ্ঠপুত্রায প্রাহ || ১||

অথর্বণে যাং প্রবদেত ব্রহ্মাঽথর্বা তং
পুরোবাচাঙ্গিরে ব্রহ্মবিদ্যাম্ |
স ভারদ্বাজায সত্যবাহায প্রাহ
ভারদ্বাজোঽঙ্গিরসে পরাবরাম্ || ২||

শৌনকো হ বৈ মহাশালোঽঙ্গিরসং বিধিবদুপসন্নঃ পপ্রচ্ছ |
কস্মিন্নু ভগবো বিজ্ঞাতে সর্বমিদং বিজ্ঞাতং ভবতীতি || ৩||

তস্মৈ স হোবাচ |
দ্বে বিদ্যে বেদিতব্যে ইতি হ স্ম
যদ্ব্রহ্মবিদো বদন্তি পরা চৈবাপরা চ || ৪||

তত্রাপরা ঋগ্বেদো যজুর্বেদঃ সামবেদোঽথর্ববেদঃ
শিক্ষা কল্পো ব্যাকরণং নিরুক্তং ছন্দো জ্যোতিষমিতি |
অথ পরা যযা তদক্ষরমধিগম্যতে || ৫||

যত্তদদ্রেশ্যমগ্রাহ্যমগোত্রমবর্ণ-
      মচক্ষুঃশ্রোত্রং তদপাণিপাদম্ .
  নিত্যং বিভুং সর্বগতং সুসূক্ষ্মং
      তদব্যযং যদ্ভূতযোনিং পরিপশ্যন্তি ধীরাঃ || ৬||

যথোর্ণনাভিঃ সৃজতে গৃহ্ণতে চ
যথা পৃথিব্যামোষধযঃ সংভবন্তি |
যথা সতঃ পুরুষাত্ কেশলোমানি
তথাঽক্ষরাত্ সংভবতীহ বিশ্বম্ || ৭||

তপসা চীযতে ব্রহ্ম ততোঽন্নমভিজাযতে |
অন্নাত্ প্রাণো মনঃ সত্যং লোকাঃ কর্মসু চামৃতম্ || ৮||

যঃ সর্বজ্ঞঃ সর্ববিদ্যস্য জ্ঞানমযং তাপঃ |
তস্মাদেতদ্ব্রহ্ম নাম রূপমন্নং চ জাযাতে || ৯||

|| ইতি মুণ্ডকোপনিষদি প্রথমমুণ্ডকে প্রথমঃ খণ্ডঃ ||

|| প্রথমমুণ্ডকে দ্বিতীযঃ খণ্ডঃ ||

তদেতত্ সত্যং মন্ত্রেষু কর্মাণি কবযো
যান্যপশ্যংস্তানি ত্রেতাযাং বহুধা সংততানি |
তান্যাচরথ নিযতং সত্যকামা এষ বঃ
পন্থাঃ সুকৃতস্য লোকে || ১||

যদা লেলাযতে হ্যর্চিঃ সমিদ্ধে হব্যবাহনে |
তদাঽঽজ্যভাগাবন্তরেণাঽঽহুতীঃ প্রতিপাদযেত্ || ২||

যস্যাগ্নিহোত্রমদর্শমপৌর্ণমাস-
      মচাতুর্মাস্যমনাগ্রযণমতিথিবর্জিতং চ |
অহুতমবৈশ্বদেবমবিধিনা হুত-
      মাসপ্তমাংস্তস্য লোকান্ হিনস্তি || ৩||

কালী করালী চ মনোজবা চ
সুলোহিতা যা চ সুধূম্রবর্ণা |
স্ফুলিঙ্গিনী বিশ্বরুচী চ দেবী
লেলাযমানা ইতি সপ্ত জিহ্বাঃ || ৪||

এতেষু যশ্চরতে ভ্রাজমানেষু যথাকালং
চাহুতযো হ্যাদদাযন্ |
তং নযন্ত্যেতাঃ সূর্যস্য রশ্মযো যত্র
দেবানাং পতিরেকোঽধিবাসঃ || ৫||

এহ্যেহীতি তমাহুতযঃ সুবর্চসঃ
সূর্যস্য রশ্মিভির্যজমানং বহন্তি |
প্রিযাং বাচমভিবদন্ত্যোঽর্চযন্ত্য
এষ বঃ পুণ্যঃ সুকৃতো ব্রহ্মলোকঃ || ৬||

প্লবা হ্যেতে অদৃঢা যজ্ঞরূপা
অষ্টাদশোক্তমবরং যেষু কর্ম |
এতচ্ছ্রেযো যেঽভিনন্দন্তি মূঢা
জরামৃত্যুং তে পুনরেবাপি যন্তি || ৭||

অবিদ্যাযামন্তরে বর্তমানাঃ
স্বযং ধীরাঃ পণ্ডিতং মন্যমানাঃ |
জঙ্ঘন্যমানাঃ পরিযন্তি মূঢা
অন্ধেনৈব নীযমানা যথান্ধাঃ || ৮||

অবিদ্যাযং বহুধা বর্তমানা বযং
কৃতার্থা ইত্যভিমন্যন্তি বালাঃ |
যত্ কর্মিণো ন প্রবেদযন্তি রাগাত্
তেনাতুরাঃ ক্ষীণলোকাশ্চ্যবন্তে || ৯||

ইষ্টাপূর্তং মন্যমানা বরিষ্ঠং
নান্যচ্ছ্রেযো বেদযন্তে প্রমূঢাঃ |
নাকস্য পৃষ্ঠে তে সুকৃতেঽনুভূত্বেমং
লোকং হীনতরং বা বিশন্তি || ১০||

তপঃশ্রদ্ধে যে হ্যুপবসন্ত্যরণ্যে
শান্তা বিদ্বাংসো ভৈক্ষ্যচর্যাং চরন্তঃ |
সূর্যদ্বারেণ তে বিরজাঃ প্রযান্তি
যত্রামৃতঃ স পুরুষো হ্যব্যযাত্মা || ১১||

পরীক্ষ্য লোকান্ কর্মচিতান্ ব্রহ্মণো
নির্বেদমাযান্নাস্ত্যকৃতঃ কৃতেন |
তদ্বিজ্ঞানার্থং স গুরুমেবাভিগচ্ছেত্
সমিত্পাণিঃ শ্রোত্রিযং ব্রহ্মনিষ্ঠম্ || ১২||

তস্মৈ স বিদ্বানুপসন্নায সম্যক্
প্রশান্তচিত্তায শমান্বিতায |
যেনাক্ষরং পুরুষং বেদ সত্যং প্রোবাচ
তাং তত্ত্বতো ব্রহ্মবিদ্যাম্ || ১৩||

|| ইতি মুণ্ডকোপনিষদি প্রথমমুণ্ডকে দ্বিতীযঃ খণ্ডঃ ||

|| দ্বিতীয মুণ্ডকে প্রথমঃ খণ্ডঃ ||

তদেতত্ সত্যং
যথা সুদীপ্তাত্ পাবকাদ্বিস্ফুলিঙ্গাঃ
      সহস্রশঃ প্রভবন্তে সরূপাঃ |
তথাঽক্ষরাদ্বিবিধাঃ সোম্য ভাবাঃ
      প্রজাযন্তে তত্র চৈবাপি যন্তি || ১||

দিব্যো হ্যমূর্তঃ পুরুষঃ স বাহ্যাভ্যন্তরো হ্যজঃ |
অপ্রাণো হ্যমনাঃ শুভ্রো হ্যক্ষরাত্ পরতঃ পরঃ || ২||

এতস্মাজ্জাযতে প্রণো মনঃ সর্বেন্দ্রিযাণি চ |
খং বাযুর্জ্যোতিরাপঃ পৃথিবী বিশ্বস্য ধারিণী || ৩||

অগ্নীর্মূর্ধা চক্ষুষী চন্দ্রসূর্যৌ
দিশঃ শ্রোত্রে বাগ্ বিবৃতাশ্চ বেদাঃ |
বাযুঃ প্রণো হৃদযং বিশ্বমস্য পদ্ভ্যাং
পৃথিবী হ্যেষ সর্বভূতান্তরাত্মা || ৪||

তস্মাদগ্নিঃ সমিধো যস্য সূর্যঃ
সোমাত্ পর্জন্য ওষধযঃ পৃথিব্যাম্ |
পুমান্ রেতঃ সিঞ্চতি যোষিতাযাং
বহ্বীঃ প্রজাঃ পুরুষাত্ সংপ্রসূতাঃ || ৫||

তস্মাদৃচঃ সাম যজূংষি দীক্ষা
যজ্ঞাশ্চ সর্বে ক্রতবো দক্ষিণাশ্চ |
সংবত্সরশ্চ যজমানশ্চ লোকাঃ
সোমো যত্র পবতে যত্র সূর্যঃ || ৬||

তস্মাচ্চ দেবা বহুধা সংপ্রসূতাঃ
সাধ্যা মনুষ্যাঃ পশবো বযাংসি |
প্রাণাপানৌ ব্রীহিযবৌ তপশ্চ
শ্রদ্ধ সত্যং ব্রহ্মচর্যং বিধিশ্চ || ৭||

সপ্ত প্রাণাঃ প্রভবন্তি তস্মাত্
সপ্তার্চিষঃ সমিধঃ সপ্ত হোমাঃ |
সপ্ত ইমে লোকা যেষু চরন্তি প্রাণা
গুহাশযা নিহিতাঃ সপ্ত সপ্ত || ৮||

অতঃ সমুদ্রা গিরযশ্চ সর্বেঽস্মাত্
স্যন্দন্তে সিন্ধবঃ সর্বরূপাঃ |
অতশ্চ সর্বা ওষধযো রসশ্চ
যেনৈষ ভূতৈস্তিষ্ঠতে হ্যন্তরাত্মা || ৯||

পুরুষ এবেদং বিশ্বং কর্ম তপো ব্রহ্ম পরামৃতম্ |
এতদ্যো বেদ নিহিতং গুহাযাং
সোঽবিদ্যাগ্রন্থিং বিকিরতীহ সোম্য || ১০||

|| ইতি মুণ্ডকোপনিষদি দ্বিতীযমুণ্ডকে প্রথমঃ খণ্ডঃ ||

|| দ্বিতীয মুণ্ডকে দ্বিতীযঃ খণ্ডঃ ||

আবিঃ সংনিহিতং গুহাচরং নাম
মহত্পদমত্রৈতত্ সমর্পিতম্ |
এজত্প্রাণন্নিমিষচ্চ যদেতজ্জানথ
সদসদ্বরেণ্যং পরং বিজ্ঞানাদ্যদ্বরিষ্ঠং প্রজানাম্ || ১||

যদর্চিমদ্যদণুভ্যোঽণু চ
        যস্মিঁল্লোকা নিহিতা লোকিনশ্চ |
তদেতদক্ষরং ব্রহ্ম স প্রাণস্তদু বাঙ্মনঃ 
        তদেতত্সত্যং তদমৃতং তদ্বেদ্ধব্যং সোম্য বিদ্ধি || ২||

ধনুর্ গৃহীত্বৌপনিষদং মহাস্ত্রং
শরং হ্যুপাসা নিশিতং সন্ধযীত |
আযম্য তদ্ভাবগতেন চেতসা
লক্ষ্যং তদেবাক্ষরং সোম্য বিদ্ধি || ৩||

প্রণবো ধনুঃ শারো হ্যাত্মা ব্রহ্ম তল্লক্ষ্যমুচ্যতে |
অপ্রমত্তেন বেদ্ধব্যং শরবত্ তন্মযো ভবেত্ || ৪||

যস্মিন্ দ্যৌঃ পৃথিবী চান্তরিক্ষমোতং
মনঃ সহ প্রাণৈশ্চ সর্বৈঃ |
তমেবৈকং জানথ আত্মানমন্যা বাচো
বিমুঞ্চথামৃতস্যৈষ সেতুঃ || ৫||

অরা ইব রথনাভৌ সংহতা যত্র নাড্যঃ  |
স এষোঽন্তশ্চরতে বহুধা জাযমানঃ |
ওমিত্যেবং ধ্যাযথ আত্মানং স্বস্তি বঃ
পারায তমসঃ পরস্তাত্ || ৬||

যঃ সর্বজ্ঞঃ সর্ববিদ্ যস্যৈষ মহিমা ভুবি |
দিব্যে ব্রহ্মপুরে হ্যেষ ব্যোম্ন্যাত্মা প্রতিষ্ঠিতঃ ||

মনোমযঃ প্রাণশরীরনেতা
প্রতিষ্ঠিতোঽন্নে হৃদযং সন্নিধায |
তদ্ বিজ্ঞানেন পরিপশ্যন্তি ধীরা
আনন্দরূপমমৃতং যদ্ বিভাতি || ৭||

ভিদ্যতে হৃদযগ্রন্থিশ্ছিদ্যন্তে সর্বসংশযাঃ |
ক্ষীযন্তে চাস্য কর্মাণি তস্মিন্ দৃষ্টে পরাবরে || ৮||

হিরণ্মযে পরে কোশে বিরজং ব্রহ্ম নিষ্কলম্ |
তচ্ছুভ্রং জ্যোতিষং জ্যোতিস্তদ্ যদাত্মবিদো বিদুঃ || ৯||

ন তত্র সূর্যো ভাতি ন চন্দ্রতারকং
নেমা বিদ্যুতো ভান্তি কুতোঽযমগ্নিঃ |
তমেব ভান্তমনুভাতি সর্বং
তস্য ভাসা সর্বমিদং বিভাতি || ১০||

ব্রহ্মৈবেদমমৃতং পুরস্তাদ্ ব্রহ্ম পশ্চাদ্ ব্রহ্ম দক্ষিণতশ্চোত্তরেণ |
অধশ্চোর্ধ্বং চ প্রসৃতং ব্রহ্মৈবেদং বিশ্বমিদং বরিষ্ঠম্ || ১১||

|| ইতি মুণ্ডকোপনিষদি দ্বিতীযমুণ্ডকে দ্বিতীযঃ খণ্ডঃ ||

|| তৃতীয মুণ্ডকে প্রথমঃ খণ্ডঃ ||

দ্বা সুপর্ণা সযুজা সখাযা সমানং বৃক্ষং পরিষস্বজাতে |
তযোরন্যঃ  পিপ্পলং স্বাদ্বত্ত্যনশ্নন্নন্যো অভিচাকশীতি || ১||

সমানে বৃক্ষে পুরুষো নিমগ্নোঽনিশযা শোচতি মুহ্যমানঃ |
জুষ্টং যদা পশ্যত্যন্যমীশমস্য
মহিমানমিতি বীতশোকঃ || ২||

যদা পশ্যঃ পশ্যতে রুক্মবর্ণং
কর্তারমীশং পুরুষং ব্রহ্মযোনিম্ |
তদা বিদ্বান্ পুণ্যপাপে বিধূয
নিরঞ্জনঃ পরমং সাম্যমুপৈতি || ৩||

প্রণো হ্যেষ যঃ সর্বভূতৈর্বিভাতি
বিজানন্ বিদ্বান্ ভবতে নাতিবাদী |
আত্মক্রীড আত্মরতিঃ ক্রিযাবা-
নেষ ব্রহ্মবিদাং বরিষ্ঠঃ || ৪||

সত্যেন লভ্যস্তপসা হ্যেষ আত্মা
সম্যগ্জ্ঞানেন ব্রহ্মচর্যেণ নিত্যম্ |
অন্তঃশরীরে জ্যোতির্মযো হি শুভ্রো
যং পশ্যন্তি যতযঃ ক্ষীণদোষাঃ || ৫||

সত্যমেব জযতে নানৃতং
     সত্যেন পন্থা বিততো দেবযানঃ |
যেনাঽঽক্রমন্ত্যৃষযো হ্যাপ্তকামা
     যত্র তত্ সত্যস্য পরমং নিধানম্ || ৬||

বৃহচ্চ তদ্ দিব্যমচিন্ত্যরূপং
সূক্ষ্মাচ্চ তত্ সূক্ষ্মতরং বিভাতি |
দূরাত্ সুদূরে তদিহান্তিকে চ
পশ্যন্ত্বিহৈব নিহিতং গুহাযাম্ || ৭||

ন চক্ষুষা গৃহ্যতে নাপি বাচা
নান্যৈর্দেবৈস্তপসা কর্মণ বা |
জ্ঞানপ্রসাদেন বিশুদ্ধসত্ত্ব-
স্ততস্তু তং পশ্যতে নিষ্কলং
ধ্যাযমানঃ || ৮||

এষোঽণুরাত্মা চেতসা বেদিতব্যো
যস্মিন্ প্রাণঃ পঞ্চধা সংবিবেশ |
প্রাণৈশ্চিত্তং সর্বমোতং প্রজানাং
যস্মিন্ বিশুদ্ধে বিভবত্যেষ আত্মা || ৯||

যং যং লোকং মনসা সংবিভাতি
বিশুদ্ধসত্ত্বঃ কামযতে যাংশ্চ কামান্ |
তং তং লোকং জযতে তাংশ্চ কামাং-
স্তস্মাদাত্মজ্ঞং হ্যর্চযেত্ ভূতিকামঃ || ১০||

|| ইতি মুণ্ডকোপনিষদি তৃতীযমুণ্ডকে প্রথমঃ খণ্ডঃ ||

||  তৃতীযমুণ্ডকে দ্বিতীযঃ খণ্ডঃ ||

স বেদৈতত্ পরমং ব্রহ্ম ধাম
যত্র বিশ্বং নিহিতং ভাতি শুভ্রম্ |
উপাসতে পুরুষং যে হ্যকামাস্তে
শুক্রমেতদতিবর্তন্তি ধীরাঃ ||  ১||

কামান্ যঃ কামযতে মন্যমানঃ
স কামভির্জাযতে তত্র তত্র |
পর্যাপ্তকামস্য কৃতাত্মনস্তু
ইহৈব সর্বে প্রবিলীযন্তি কামাঃ || ২||

নাযমাত্মা প্রবচনেন লভ্যো
ন মেধযা ন বহুনা শ্রুতেন |
যমেবৈষ বৃণুতে তেন লভ্য-
স্তস্যৈষ আত্মা বিবৃণুতে তনূং স্বাম্ || ৩||

নাযমাত্মা বলহীনেন লভ্যো
ন চ প্রমাদাত্ তপসো বাপ্যলিঙ্গাত্ |
এতৈরুপাযৈর্যততে যস্তু বিদ্বাং-
স্তস্যৈষ আত্মা বিশতে ব্রহ্মধাম || ৪||

সংপ্রাপ্যৈনমৃষযো জ্ঞানতৃপ্তাঃ
কৃতাত্মানো বীতরাগাঃ প্রশান্তাঃ
তে সর্বগং সর্বতঃ প্রাপ্য ধীরা
যুক্তাত্মানঃ সর্বমেবাবিশন্তি || ৫||

বেদান্তবিজ্ঞানসুনিশ্চিতার্থাঃ
সংন্যাসযোগাদ্ যতযঃ শুদ্ধসত্ত্বাঃ |
তে ব্রহ্মলোকেষু পরান্তকালে
পরামৃতাঃ পরিমুচ্যন্তি সর্বে || ৬||

গতাঃ কলাঃ পঞ্চদশ প্রতিষ্ঠা
দেবাশ্চ সর্বে প্রতিদেবতাসু |
কর্মাণি বিজ্ঞানমযশ্চ আত্মা
পরেঽব্যযে সর্বে একীভবন্তি || ৭||

যথা নদ্যঃ স্যন্দমানাঃ সমুদ্রেঽ
স্তং গচ্ছন্তি নামরূপে বিহায |
তথা বিদ্বান্ নামরূপাদ্বিমুক্তঃ
পরাত্পরং পুরুষমুপৈতি দিব্যম্ || ৮||

স যো হ বৈ তত্ পরমং ব্রহ্ম বেদ
ব্রহ্মৈব ভবতি নাস্যাব্রহ্মবিত্কুলে ভবতি |
তরতি শোকং তরতি পাপ্মানং গুহাগ্রন্থিভ্যো
বিমুক্তোঽমৃতো ভবতি || ৯||

তদেতদৃচাঽভ্যুক্তম্ |
ক্রিযাবন্তঃ শ্রোত্রিযা ব্রহ্মনিষ্ঠাঃ
স্বযং জুহ্বত একর্ষিং শ্রদ্ধযন্তঃ |
তেষামেবৈতাং ব্রহ্মবিদ্যাং বদেত
শিরোব্রতং বিধিবদ্ যৈস্তু চীর্ণম্ || ১০||

তদেতত্ সত্যমৃষিরঙ্গিরাঃ
পুরোবাচ নৈতদচীর্ণব্রতোঽধীতে |
নমঃ পরমঋষিভ্যো নমঃ পরমঋষিভ্যঃ || ১১||

|| ইতি মুণ্ডকোপনিষদি তৃতীযমুণ্ডকে দ্বিতীযঃ খণ্ডঃ ||

|| ইত্যথর্ববেদীয মুণ্ডকোপনিষত্সমাপ্তা ||

ॐ ভদ্রং কর্ণেভিঃ….শান্তিঃ ..

|| ॐ শান্তিঃ শান্তিঃ শান্তিঃ ||