মাণ্ডূক্য কারিকা

.. মাণ্ডূক্যোপনিষত্ সহিত কারিকা ..

| সগৌডপাদীযকারিকাথর্ববেদীযমাণ্ডূক্যোপনিষত্ |

ॐ ভদ্রং কর্ণেভিঃ শৃণুযাম দেবা
ভদ্রং  পশ্যেমাক্ষভির্যজত্রাঃ |
স্থিরৈরঙ্গৈস্তুষ্টুবাংসস্তনূভির্ব্যশেম দেবহিতং যদাযুঃ ||
ভদ্রং নো অপি বাতয মনঃ ||
 ॐ শান্তিঃ শান্তিঃ শান্তিঃ |

হরিঃ ॐ | ॐ ইত্যেতদক্ষরং ইদঁ সর্বং তস্যোপব্যাখ্যানং
ভূতং ভবদ্ ভবিষ্যদিতি সর্বমোংকার এব |
যচ্চান্যত্ ত্রিকালাতীতং তদপ্যোংকার এব  || ১||
সর্বঁ হ্যেতদ্ ব্রহ্মাযমাত্মা ব্রহ্ম সোঽযমাত্মা
চতুষ্পাত্ || ২||
জাগরিতস্থানো বহিষ্প্রজ্ঞঃ সপ্তাঙ্গ একোনবিংশতিমুখঃ
স্থূল ভুগ্বৈশ্বানরঃ প্রথমঃ পাদঃ || ৩||
স্বপ্নস্থানোঽন্তঃপ্রজ্ঞাঃ সপ্তাঙ্গ একোনবিংশতিমুখঃ
প্রবিবিক্তভুক্তৈজসো দ্বিতীযঃ পাদঃ || ৪||
যত্র সুপ্তো ন কঞ্চন কামং কামযতে ন কঞ্চন স্বপ্নং পশ্যতি
তত্ সুষুপ্তম্ | সুষুপ্তস্থান একীভূতঃ প্রজ্ঞানঘন
এবানন্দমযো হ্যানন্দভুক্ চেতো মুখঃ প্রাজ্ঞস্তৃতীযঃ পাদঃ || ৫||
এষ সর্বেশ্বরঃ এষ সর্বজ্ঞ এষোঽন্তর্যাম্যেষ যোনিঃ
সর্বস্য প্রভবাপ্যযৌ হি ভূতানাম্ || ৬||

অত্রৈতে শ্লোকা ভবন্তি

বহিষ্প্রজ্ঞো বিভুর্বিশ্বো হ্যন্তঃপ্রজ্ঞস্তু তৈজসঃ |
ঘনপ্রজ্ঞস্তথা প্রাজ্ঞ এক এব ত্রিধা স্মৃতঃ || ১||
দক্ষিণাক্ষিমুখে বিশ্বো মনস্যন্তস্তু তৈজসঃ |
আকাশে চ হৃদি প্রাজ্ঞস্ত্রিধা দেহে ব্যবস্থিতঃ || ২||
বিশ্বো হি স্থূলভুঙ্নিত্যং তৈজসঃ প্রবিবিক্তভুক্ |
আনন্দভুক্ তথা প্রাজ্ঞস্ত্রিধা ভোগং নিবোধত || ৩||
স্থূলং তর্পযতে বিশ্বং প্রবিবিক্তং তু তৈজসম্ |
আনন্দশ্চ তথা প্রাজ্ঞং ত্রিধা তৃপ্তিং নিবোধত || ৪||
ত্রিষু ধামসু যদ্ভোজ্যং ভোক্তা যশ্চ প্রকীর্তিতঃ |
বেদৈতদুভযং যস্তু স ভুঞ্জানো ন লিপ্যতে || ৫||
প্রভবঃ সর্বভাবানাং সতামিতি বিনিশ্চযঃ |
সর্বং জনযতি প্রাণশ্চেতোংঽশূন্পুরুষঃ পৃথক্ || ৬||
বিভূতিং প্রসবং ত্বন্যে মন্যন্তে সৃষ্টিচিন্তকাঃ |
স্বপ্নমাযাসরূপেতি সৃষ্টিরন্যৈর্বিকল্পিতা || ৭||
ইচ্ছামাত্রং প্রভোঃ সৃষ্টিরিতি সৃষ্টৌ বিনিশ্চিতাঃ |
কালাত্প্রসূতিং ভূতানাং মন্যন্তে কালচিন্তকাঃ || ৮||
ভোগার্থং সৃষ্টিরিত্যন্যে ক্রীডার্থমিতি চাপরে |
দেবস্যৈষ স্বভাবোঽযমাপ্তকামস্য কা স্পৃহা || ৯||

নান্তঃপ্রজ্ঞং ন বহিষ্প্রজ্ঞং নোভযতঃপ্রজ্ঞং
ন প্রজ্ঞানঘনং ন প্রজ্ঞং নাপ্রজ্ঞং |
অদৃষ্টমব্যবহার্যমগ্রাহ্যমলক্ষণং
অচিন্ত্যমব্যপদেশ্যমেকাত্মপ্রত্যযসারং
প্রপঞ্চোপশমং শান্তং শিবমদ্বৈতং চতুর্থং মন্যন্তে
স আত্মা স বিজ্ঞেযঃ || ৭||

অত্রৈতে শ্লোকা ভবন্তি

নিবৃত্তেঃ সর্বদুঃখানামীশানঃ প্রভুরব্যযঃ |
অদ্বৈতঃ সর্বভাবানাং দেবস্তুর্যো বিভুঃ স্মৃতঃ || ১০||
কার্যকারণবদ্ধৌ তাবিষ্যেতে বিশ্বতৈজসৌ |
প্রাজ্ঞঃ কারণবদ্ধস্তু দ্বৌ তৌ তুর্যে ন সিধ্যতঃ || ১১||
নঽঽত্মানং ন পরাংশ্চৈব ন সত্যং নাপি চানৃতম্ |
প্রাজ্ঞঃ কিঞ্চন সংবেত্তি তুর্যং তত্সর্বদৃক্সদা || ১২||
দ্বৈতস্যাগ্রহণং তুল্যমুভযোঃ প্রাজ্ঞতুর্যযোঃ |
বীজনিদ্রাযুতঃ প্রাজ্ঞঃ সা চ তুর্যে ন বিদ্যতে || ১৩||
স্বপ্ননিদ্রাযুতাবাদ্যৌ প্রাজ্ঞস্ত্বস্বপ্ননিদ্রযা |
ন নিদ্রাং নৈব চ স্বপ্নং তুর্যে পশ্যন্তি নিশ্চিতাঃ || ১৪||
অন্যথা গৃহ্ণতঃ স্বপ্নো নিদ্রা তত্ত্বমজানতঃ |
বিপর্যাসে তযোঃ ক্ষীণে তুরীযং পদমশ্নুতে || ১৫||
অনাদিমাযযা সুপ্তো যদা জীবঃ প্রবুধ্যতে |
অজমনিদ্রমস্বপ্নমদ্বৈতং বুধ্যতে তদা || ১৬||
প্রপঞ্চো যদি বিদ্যেত নিবর্তেত ন সংশযঃ |
মাযামাত্রমিদং দ্বৈতমদ্বৈতং পরমার্থতঃ || ১৭||
বিকল্পো বিনিবর্তেত কল্পিতো যদি কেনচিত্ |
উপদেশাদযং বাদো জ্ঞাতে দ্বৈতং ন বিদ্যতে || ১৮||

সোঽযমাত্মাঽধ্যক্ষরমোংকরোঽধিমাত্রং পাদা
মাত্রা মাত্রাশ্চ পাদা অকার উকারো মকার ইতি || ৮||
জাগরিতস্থানো বৈশ্বানরোঽকারঃ প্রথমা
মাত্রাঽঽপ্তেরাদিমত্ত্বাদ্ বাঽঽপ্নোতি হ বৈ সর্বান্
কামানাদিশ্চ ভবতি য এবং বেদ || ৯||
স্বপ্নস্থানস্তৈজস উকারো দ্বিতীযা মাত্রোত্কর্ষাদ্
উভযত্বাদ্বোত্কর্ষতি হ বৈ জ্ঞানসন্ততিং সমানশ্চ ভবতি
নাস্যাব্রহ্মবিত্কুলে ভবতি য এবং বেদ || ১০||
সুষুপ্তস্থানঃ প্রাজ্ঞো মকারস্তৃতীযা মাত্রা মিতেরপীতের্বা
মিনোতি হ বা ইদঁ সর্বমপীতিশ্চ ভবতি য এবং বেদ || ১১||

অত্রৈতে শ্লোকা ভবন্তি

বিশ্বস্যাত্ববিবক্ষাযামাদিসামান্যমুত্কটম্ |
মাত্রাসম্প্রতিপত্তৌ স্যাদাপ্তিসামান্যমেব চ || ১৯||
তৈজসস্যোত্ববিজ্ঞান উত্কর্ষো দৃশ্যতে স্ফুটম্ |
মাত্রাসম্প্রতিপত্তৌ স্যাদুভযত্বং তথাবিধম্ || ২০||
মকারভাবে প্রাজ্ঞস্য মানসামান্যমুত্কটম্ |
মাত্রাসম্প্রতিপত্তৌ তু লযসামান্যমেব চ || ২১||
ত্রিষু ধামসু যত্তুল্যং সামান্যং বেত্তি নিশ্চিতঃ |
স পূজ্যঃ সর্বভূতানাং বন্দ্যশ্চৈব মহামুনিঃ || ২২||
অকারো নযতে বিশ্বমুকারশ্চাপি তৈজসম্ |
মকারশ্চ পুনঃ প্রাজ্ঞং নামাত্রে বিদ্যতে গতিঃ || ২৩||

অমাত্রশ্চতুর্থোঽব্যবহার্যঃ প্রপঞ্চোপশমঃ শিবোঽদ্বৈত
এবমোংকার আত্মৈব সংবিশত্যাত্মনাঽঽত্মানং য এবং বেদ || ১২||

অত্রৈতে শ্লোকা ভবন্তি

ওংকারং পাদশো বিদ্যাত্পাদা মাত্রা ন সংশযঃ |
ওংকারং পাদশো জ্ঞাত্বা ন কিঞ্চিদপি চিন্তযেত্ || ২৪||
যুঞ্জীত প্রণবে চেতঃ প্রণবো ব্রহ্ম নির্ভযম্ |
প্রণবে নিত্যযুক্তস্য ন ভযং বিদ্যতে ক্বচিত্ || ২৫||
প্রণবো হ্যপরং ব্রহ্ম প্রণবশ্চ পরঃ স্মৃতঃ |
অপূর্বোঽনন্তরোঽবাহ্যোঽনপরঃ প্রণবোঽব্যযঃ || ২৬||
সর্বস্য প্রণবো হ্যাদির্মধ্যমন্তস্তথৈব চ |
এবং হি প্রণবং জ্ঞাত্বা ব্যশ্নুতে তদনন্তরম্ || ২৭||
প্রণবং হীশ্বরং বিদ্যাত্সর্বস্য হৃদি সংস্থিতম্ |
সর্বব্যাপিনমোঙ্কারং মত্বা ধীরো ন শোচতি || ২৮||
অমাত্রোঽনন্তমাত্রশ্চ দ্বৈতস্যোপশমঃ শিবঃ |
ওংকারো বিদিতো যেন স মুনির্নেতরো জনঃ || ২৯||

ইতি মাণ্ডূক্যোপনিষদর্থাবিষ্করণপরাযাংসু
গৌডপাদিযকারীকাযাংসু প্রথমমাগমপ্রকরণম্ || ১||

| ॐ তত্সত্ |

গৌডপাদীযকারিকাসু বৈতথ্যাখ্যং দিতীযং প্রকরণম্ |
——————————————————————————–

| হরিঃ ॐ |

বৈতথ্যং সর্বভাবানাং স্বপ্ন আহুর্মনীষিণঃ |
অন্তঃস্থানাত্তু ভাবানাং সংবৃতত্বেন হেতুনা || ১||
অদীর্ঘত্বাচ্চ কালস্য গত্বা দেশান্ন পশ্যতি |
প্রতিবুদ্ধশ্চ বৈ সর্বস্তস্মিন্দেশে ন বিদ্যতে || ২||
অভাবশ্চ রথাদিনাং শ্রূযতে ন্যাযপূর্বকম্ |
বৈতথ্যং তেন বৈ প্রাপ্তং স্বপ্ন আহুঃ প্রকাশিতম্ || ৩||
অন্তঃস্থানাত্তু ভেদানাং তস্মাজ্জাগরিতে স্মৃতম্ |
যথা তত্র তথা স্বপ্নে সংবৃতত্বেন ভিদ্যতে || ৪||
স্বপ্নজাগরিতস্থানে হ্যেকমাহুর্মনীষিণঃ |
ভেদানাং হি সমত্বেন প্রসিদ্ধেনৈব হেতুনা || ৫||
আদাবন্তে চ যন্নাস্তি বর্তমানেঽপি তত্তথা ||
বিতথৈঃ সদৃশাঃ সন্তোঽবিতথা ইব লক্ষিতাঃ || ৬||
সপ্রযোজনতা তেষাং স্বপ্নে বিপ্রতিপদ্যতে |
তস্মাদাদ্যন্তবত্ত্বেন মিথ্যৈব খলু তে স্মৃতাঃ || ৭||
অপূর্বং স্থানিধর্মো হি যথা স্বর্গনিবাসিনাম্ |
তান্যং প্রেক্ষতে গত্বা যথৈবেহ সুশিক্ষিতঃ || ৮||
স্বপ্নবৃত্তবপি ত্বন্তশ্চেতসা কল্পিতং ত্বসত্ |
বহিশ্চেতোগৃহীতং সদ্দৃষ্টং বৈতথ্যমেতযোঃ || ৯||
জাগ্রদ্বৃত্তাবপি ত্বন্তশ্চেতসা কল্পিতং ত্বসত্ |
বহিশ্চেতোগৃহীতং সদ্যুক্তং বৈতথ্যমেতযোঃ || ১০||
উভযোরপি বৈতথ্যং ভেদানাং স্থানযোর্যদি |
ক এতান্বুধ্যতে ভেদান্ কো বৈ তেষাং বিকল্পকঃ || ১১||
কল্পযত্যাত্মনাঽঽত্মানমাত্মা দেবঃ স্বমাযযা
স এব বুধ্যতে ভেদানিতি বেদান্তনিশ্চযঃ || ১২||
বিকরোত্যপরান্ভাবানন্তশ্চিত্তে ব্যবস্থিতান্ |
নিযতাংশ্চ বহিশ্চিত্ত এবং কল্পযতে প্রভুঃ || ১৩||
চিত্তকালা হি যেঽন্তস্তু দ্বযকালাশ্চ যে বহিঃ ||
কল্পিতা এব তে সর্বে বিশেষো নান্যহেতুকঃ || ১৪||
অব্যক্তা এব যেঽন্তস্তু স্ফুটা এব চ যে বহিঃ |
কল্পিতা এব তে সর্বে বিশেষস্ত্বিন্দ্রিযান্তরে || ১৫||
জীবং কল্পযতে পূর্বং ততো ভাবান্পৃথগ্বিধান্ |
বাহ্যানাধ্যাত্মিকাংশ্চৈব যথাবিদ্যস্তথাস্মৃতিঃ || ১৬||
অনিশ্চিতা যথা রজ্জুরন্ধকারে বিকল্পিতা |
সর্পধারাদিভির্ভাবৈস্তদ্বদাত্মা বিকল্পিতঃ || ১৭||
নিশ্চিতাযাং যথা রজ্জ্বাং বিকল্পো বিনিবর্ততে |
রজ্জুরেবেতি চাদ্বৈতং তদ্বদাত্মবিনিশ্চযঃ || ১৮||
প্রাণাদিভিরনন্তৈশ্চ ভাবৈরেতৈর্বিকল্পিতঃ |
মাযৈষা তস্য দেবস্য যযা সম্মোহিতঃ স্বযম্ || ১৯||
প্রাণ ইতি প্রাণবিদো ভূতানীতি চ তদ্বিদঃ |
গুণা ইতি গুণবিদস্তত্ত্বানীতি চ তদ্বিদঃ || ২০||
পাদা ইতি পাদবিদো বিষযা ইতি তদ্বিদঃ |
লোকা ইতি লোকবিদো দেবা ইতি চ তদ্বিদঃ || ২১||
বেদা ইতি বেদবিদো যজ্ঞা ইতি চ তদ্বিদঃ |
ভোক্তেতি চ ভোক্তৃবিদো ভোজ্যমিতি চ তদ্বিদঃ || ২২||
সূক্ষ্ম ইতি সূক্ষ্মবিদঃ স্থূল ইতি চ তদ্বিদঃ |
মূর্ত ইতি মূর্তবিদোঽমূর্ত ইতি চ তদ্বিদঃ || ২৩||
কাল ইতি কালবিদো দিশ ইতি চ তদ্বিদঃ |
বাদা ইতি বাদবিদো ভুবনানীতি তদ্বিদঃ || ২৪||
মন ইতি মনোবিদো বুদ্ধিরিতি চ তদ্বিদঃ |
চিত্তমিতি চিত্তবিদো ধর্মাধর্মৌ চ তদ্বিদঃ || ২৫||
পঞ্চবিংশক ইত্যেকে ষড্বিংশ চাপরে |
একত্রিংশক ইত্যাহুরনান্ত ইতি চাপরে || ২৬||
লোকাঁল্লোকবিদঃ প্রাহুরাশ্রমা ইতি তদ্বিদঃ |
স্ত্রীপুংনপুংসকং লৈঙ্গাঃ পরাপরমথাপরে || ২৭||
সৃষ্টিরিতি সৃষ্টিবিদো লয ইতি চ তদ্বিদঃ |
স্থিতিরিতি স্থিতিবিদঃ সর্বে চেহ তু সর্বদা || ২৮||
যং ভাবং দর্শযেদ্যস্য তং ভাবং স তু পশ্যতি |
তং চাবতি স ভূত্বাঽসৌ তদ্গ্রহঃ সমুপৈতি তম্ || ২৯||
এতৈরেষোঽপৃথরভাবৈঃ পৃথগেবেতি লক্ষিতঃ |
এবং যো বেদ তত্ত্বেন কল্পযেত্সোঽবিশঙ্কিতঃ || ৩০||
স্বপ্নমাযে যথা দৃষ্টে গন্ধর্বনগরং যথা |
তথা বিশ্বমিদং দৃষ্টং বেদান্তেষু বিচক্ষণৈঃ || ৩১||
ন নিরোধো ন চোত্পত্তির্ন বদ্ধো ন চ সাধকঃ |
ন মুমুক্ষুর্ন বৈ মুক্ত ইত্যেষা পরমার্থতা || ৩২||
ভাবৈরসদ্ভিরেবাযমদ্বযেন চ কল্পিতঃ |
ভাবা অপ্যদ্বযেনৈব তস্মাদদ্বযতা শিবা || ৩৩||
নাঽঽত্মভাবেন নানেদং ন স্বেনাপি কথঞ্চন |
ন পৃথঙ্নাপৃথক্কিঞ্চিদিতি তত্ত্ববিদো বিদুঃ || ৩৪||
বীতরাগভযক্রোধৈর্মুনিভির্বেদপারগৈঃ |
 নির্বিকল্পো হ্যযং দৃষ্টঃ প্রপঞ্চোপশমোঽদ্বযঃ || ৩৫||
তস্মাদেবং বিদিত্বৈনমদ্বৈতে যোজযেত্স্মৃতিম্ |
অদ্বৈতং সমনুপ্রাপ্য জডবল্লোকমাচরেত্ || ৩৬||
নিস্তুতির্নির্নমস্কারো নিঃস্বধাকার এব চ |
চলাচলনিকেতশ্চ যতির্যাদৃচ্ছিকো ভবেত্ || ৩৭||
তত্ত্বমাধ্যাত্মিকং দৃষ্ট্বা তত্ত্বং দৃষ্ট্বা তু বাহ্যতঃ |
তত্ত্বীভূতস্তদারামস্তত্ত্বাদপ্রচ্যুতো ভবেত্ || ৩৮||
ইতি গৌডপাদীযকারিকাসু বৈতথ্যাক্যং
দ্বিতীযম্প্রকরণম্ || ২||
——————————————————————————–
ॐ  || উপাসানাশ্রিতো ধর্মো জাতে ব্রহ্মণি বর্ততে |
প্রাগুত্পত্তেরজং সর্বং তেনাসৌ কৃপণঃ স্মৃতঃ || ১||
অতো বক্ষ্যাম্যকার্পণ্যমজাতি সমতাং গতম্ |
যথা ন জাযতে কিঞ্চিজ্জাযমানং সমন্ততঃ || ২||
আত্মা হ্যাকাশবজ্জীবৈর্ঘটাকাশৈরিবোদিতঃ |
ঘটাদিবচ্চ সঙ্ঘাতৈর্জাতাবেতন্নিদর্শনম্ || ৩||
ঘটাদিষু  প্রলীনেষু ঘটাকাশাদযো যথা |
আকাশে সম্প্রলীযন্তে তদ্বজ্জীবা ইহাঽঽত্মনি || ৪||
যথৈকস্মিন্ঘটাকাশে রজোধূমাদিভির্যুতে |
ন সর্বে সম্প্রযুজ্যন্তে তদ্বজ্জীবাঃ সুখাদিভিঃ || ৫||
রূপকার্যসমাখ্যাশ্চ ভিদ্যন্তে তত্র তত্র বৈ |
আকাশস্য ন ভেদোঽস্তি তদ্বজ্জীবেষু নির্ণযঃ || ৬||
নাঽঽকাশস্য ঘটাকাশো বিকারাবযবৌ যথা |
নৈবাঽঽত্মনঃ সদা জীবো বিকারাবযবৌ তথা || ৭||
যথা ভবতি বালানাং গগনং মলিনং মলৈঃ |
তথা ভবত্যবুদ্ধানামাত্মাঽপি মলিনো মলৈঃ || ৮||
মরণে সম্ভবে চৈব গত্যাগমনযোরপি |
স্থিতৌ সর্বশরীরেষু আকাশেনাবিলক্ষণঃ || ৯||
সঙ্ঘাতাঃ স্বপ্নবত্সর্বে আত্মমাযাবিসর্জিতাঃ |
আধিক্যে সর্বসাম্যে বা নোপপত্তির্হি বিদ্যতে || ১০||
রসাদযো হি যে কোশা ব্যাখ্যাতাস্তৈত্তিরীযকে |
তেষামাত্মা পরো জীবঃ খং যথা সম্প্রকাশিতঃ || ১১||
দ্বযোর্দ্বযোর্মধুজ্ঞানে পরং ব্রহ্ম প্রকাশিতম্ |
পৃথিব্যামুদরে চৈব যথাঽঽকাশঃ প্রকাশিতঃ || ১২||
জীবাত্মনোরনন্যত্বমভেদেন প্রশস্যতে |
নানাত্বং নিন্দ্যতে যচ্চ তদেবং হি সমঞ্জসম্ || ১৩||
জীবাত্মনোঃ পৃথক্ত্বং যত্প্রাগুত্পত্তেঃ প্রকীর্তিতম্ |
ভবিষ্যদ্বৃত্ত্যা গৌণং তন্মুখ্যত্বং হি ন যুজ্যতে || ১৪||
মৃল্লোহবিস্ফুলিঙ্গাদ্যৈ সৃষ্টির্যা চোদিতাঽন্যথা |
উপাযঃ সোঽবতারায নাস্তি ভেদঃ কথঞ্চন || ১৫||
আশ্রমাস্ত্রিবিধা হীনমধ্যমোত্কৃষ্টদৃষ্টযঃ |
উপাসনোপদিষ্টেযং তদর্থমনুকম্পযা || ১৬||
স্বসিদ্ধান্তব্যবস্থাসু দ্বৈতিনো নিশ্চিতা দৃঠম্ |
পরস্পরং বিরুধ্যন্তে তৈরযং ন বিরুধ্যতে || ১৭||
অদ্বৈতং পরমার্থো হি দ্বৈতং তদ্ভেদ উচ্যতে |
তেষামুভযথা দ্বৈতং তেনাযং ন বিরুধ্যতে || ১৮||
মাযযা ভিদ্যতে হ্যেতন্নান্যথাঽজং কথঞ্চন |
তত্ত্বতো ভিদ্যমানে হি মর্ত্যতামমৃতং ব্রজেত্ || ১৯||
অজাতস্যৈব ভাবস্য জাতিমিচ্ছন্তি বাদিনঃ |
অজাতো হ্যমৃতো ভাবো মর্ত্যতাং কথমেষ্যতি || ২০||
ন ভবত্যমৃতং মর্ত্যং ন মর্ত্যমমৃতং তথা |
প্রকৃতেরন্যথাভাবো ন কথঞ্চিদ্ভবিষ্যতি || ২১||
স্বভাবোনমৃতো যস্য ভাবো গচ্ছতি মর্ত্যতাম্ |
কৃতকেনামৃতস্তস্য কথং স্থাস্যতি নিশ্চলঃ || ২২||
ভূততোঽভূততো বাঽপি সৃজ্যমানে সমা শ্রুতিঃ |
নিশ্চিতং যুক্তিযুক্তিং চ যত্তদ্ভবতি নেতরত্ || ২৩||
নেহ নানেতি চাঽঽম্নাযাদিন্দ্রো মাযাভিরিত্যপি ||
অজাযমানো বহুধা মাযযা জাযতে তু সঃ || ২৪||
সম্ভূতেরপবাদাচ্চ সম্ভবঃ প্রতিষিধ্যতে |
কো ন্বেনং জনযেদিতি কারণং প্রতিষিধ্যতে || ২৫||
স এষ নেতি নেতীতি ব্যাখ্যাতং নিহ্নুতে যতঃ |
সর্বমগ্রাহ্যভাবেন হেতুনাঽজং প্রকাশতে || ২৬||
সতো হি মাযযা জন্ম যুজ্যতে ন তু তত্ত্বতঃ |
তত্ত্বতো জাযতে যস্য জাতং তস্য হি জাযতে || ২৭||
অসতো মাযযা জন্ম তত্ত্বতো নৈব যুজ্যতে |
বন্ধ্যাপুত্রো ন তত্ত্বেন মাযযা বাঽপি জাযতে || ২৮||
যথা  স্বপ্নে দ্বযাভাসং স্পন্দতে মাযযা মনঃ |
তথা জাগ্রদ্দ্বযাভাসং স্পন্দতে মাযযা মনঃ || ২৯||
অদ্বযং চ দ্বযাভাসং মনঃ স্বপ্নে ন সংশযঃ |
অদ্বযং চ দ্বযাভাসং তথা জাগ্রন্ন সংশযঃ || ৩০||
মনোদৃশ্যমিদং দ্বৈতং যত্কিঞ্চিত্সচরাচরম্ |
মনসো হ্যমনীভাবে দ্বৈতং নৈবোপলভ্যতে || ৩১||
আত্মসত্যানুবোধেন ন সঙ্কল্পযতে যদা |
অমনস্তাং তদা যাতি গ্রাহ্যাভাবে তদগ্রহম্ || ৩২||
অকল্পকমজং জ্ঞানং জ্ঞেযাভিন্নং প্রচক্ষতে |
ব্রহ্মজ্ঞেযমজং নিত্যমজেনাজং বিবুধ্যতে || ৩৩||
নিগৃহীতস্য মনসো নির্বিকল্পস্য ধীমতঃ |
প্রচারঃ স তু বিজ্ঞেযঃ সুষুপ্তেঽন্যো ন তত্সমঃ || ৩৪||
লীযতে হি সুষুপ্তে তন্নিগৃহীতং ন লীযতে |
তদেব নির্ভযং ব্রহ্ম জ্ঞানালোকং সমন্ততঃ || ৩৫||
অজমনিদ্রমস্বপ্নমনামকমরূপকম্ |
সকৃদ্বিভাতং সর্বজ্ঞং নোপচারঃ কথঞ্চন || ৩৬||
সর্বাভিলাপবিগতঃ সর্বচিন্তাসমুত্থিতঃ |
সুপ্রশান্তঃ সকৃজ্জ্যোতিঃ সমাধিরচলোঽভযঃ || ৩৭||
গ্রহো ন তত্র নোত্সর্গ্রশ্চিন্তা যত্র ন বিদ্যতে |
আত্মসংস্থং তদা জ্ঞানমজাতি সমতাং গতম্ || ৩৮||
অস্পর্শযোগো বৈ নাম দুর্দর্শঃ সর্বযোগিভিঃ |
যোগিনো বিভ্যতি হ্যস্মাদভযে ভযদর্শিনঃ || ৩৯||
মনসো নিগ্রহাযত্তমভযং সর্বযোগিনাম্ |
দুঃখক্ষযঃ প্রবোধশ্চাপ্যক্ষযা শান্তিরেব চ || ৪০||
উত্সেক উদধের্যদ্বত্কুশাগ্রেণৈকবিন্দুনা |
মনসো নিগ্রহস্তদ্বদ্ভবেদপরিখেদতঃ || ৪১||
উপাযেন নিগৃহ্ণীযাদ্বিক্ষিপ্তং কামভোগযোঃ |
সুপ্রসন্নং লযে চৈব যথা কামো লযস্তথা || ৪২||
দুঃখং সর্বমনুস্মৃত্য কামভোগান্নিবর্তযেত্ |
অজং সর্বমনুস্মৃত্য জাতং নৈব তু পশ্যতি || ৪৩||
লযে সম্বোধযেচ্চিত্তং বিক্ষিপ্তং শমযেত্পুনঃ |
সকষাযং বিজানীযাত্সমপ্রাপ্তং ন চালযেত্ || ৪৪||
নাঽঽস্বাদযেত্সুখং তত্র নিঃসঙ্গঃ প্রজ্ঞযা ভবেত্ |
নিশ্চলং নিশ্চরচ্চিত্তমেকী কুর্যাত্প্রযত্নতঃ || ৪৫||
যদা ন লীযতে চিত্তং ন চ বিক্ষিপ্যতে পুনঃ |
অনিঙ্গনমনাভাসং নিষ্পন্নং ব্রহ্ম তত্তদা || ৪৬||
স্বস্থং শান্তং সনির্বণমকথ্যং সুখমুত্তমম্ |
অজমজেন জ্ঞেযেন সর্বজ্ঞং পরিচক্ষতে || ৪৭||
ন কশ্চিজ্জাযতে জীবঃ সম্ভবোঽস্য ন বিদ্যতে |
এতত্তদুত্তমং সত্যং যত্র কিঞ্চিন্ন জাযতে || ৪৮||
ইতি গৌডপাদিযকারিকাযামদ্বৈতাখ্যং তৃতীযং
প্রকরণম্ || ৩|| ॐ তত্সত্ ||
——————————————————————————–
জ্ঞানেনাঽঽকাশকল্পেন ধর্মান্যো গগনোপমান্ |
জ্ঞেযাশিন্নেন সম্বুদ্ধস্তং বন্দে দ্বিপদাং বরম্ || ১||
অস্পর্শযোগো বৈ নাম সর্বসত্ত্বসুখো হিতঃ |
অবিবাদোঽবিরুদ্ধশ্চ দেশিতস্তং নমাম্যম্ || ২||
ভূতস্য জাতিমিচ্ছন্তি বাদিনঃ কেচিদেব হি |
অভূতস্যাপরে ধীরা বিবদন্তঃ পরস্পরম্ || ৩||
ভূতং ন জাযতে কিঞ্চিদভূতং নৈব জাযতে |
বিবদন্তো দ্বযা হ্যেবমজাতিং খ্যাপযন্তি তে || ৪||
খ্যাপ্যমানামজাতিং তৈরনুমোদামহে বযম্ |
বিবদামো ন তৈঃ সার্ধমবিবাদং নিবোধত || ৫||
অজাতস্যৈব ধর্মস্য জাতিমিচ্ছন্তি বাদিনঃ |
অজাতো হ্যমৃতো ধর্মো মর্ত্যতাং কথমেষ্যতি || ৬||
ন ভবত্যমৃতং মর্ত্যং ন মর্ত্যমমৃতং তথা |
প্রকৃতেরন্যথাভাবো ন কথঞ্চিদ্ভবিষ্যতি || ৭||
স্বভাবেনামৃতো যস্য ধর্মো গচ্ছতি মর্ত্যতাম্ |
কৃতকেনামৃতস্তস্য কথং স্থাস্যতি নিশ্চলঃ || ৮||
সাংসিদ্ধিকী স্বাভাবিকী সহজা অকৃতা চ যা |
প্রকৃতিঃ সেতি বিজ্ঞেযা স্বভাবং ন জহাতি যা || ৯||
জরামরণনির্মুক্তাঃ সর্বে ধর্মাঃ স্বভাবতঃ |
জরামরণমিচ্ছন্তশ্চ্যবন্তে তন্মনীষযা || ১০||
কারণং যস্য বৈ কার্যং কারণং তস্য জাযতে |
জাযমানং কথমজং ভিন্নং নিত্যং কথং চ তত্ || ১১||
কারণাদ্যদ্যনন্যত্বমতঃ কার্যমজং যদি |
জাযমানাদ্ধি বৈ কার্যাত্কারণং তে কথং ধ্রুবম্ || ১২||
অজাদ্বৈ জাযতে যস্য দৃষ্টান্তস্তস্য নাস্তি বৈ |
জাতাচ্চ জাযমানস্য ন ব্যবস্থা প্রসজ্যতে || ১৩||
হেতোরাদিঃ ফলং যেষামাদির্হেতুঃ ফলস্য চ |
হেতোঃ ফলস্য চানাদিঃ কথং তৈরূপবর্ণ্যতে || ১৪||
হেতোরাদিঃ ফলং যেষামাদির্হেতুঃ ফলস্য চ |
তথা জন্ম ভবেত্তেশাং পুত্রাজ্জন্ম পিতুর্যথা || ১৫||
সম্ভবে হেতুফলযোরেষিতব্যঃ ক্রমস্ত্বযা |
যুগপত্সম্ভবে যস্মাদসম্বন্ধো বিষাণবত্ || ১৬||
ফলাদুত্পদ্যমানঃ সন্ন তে হেতুঃ প্রসিধ্যতি |
অপ্রসিদ্ধঃ কথং হেতুঃ ফলমুত্পাদযিষ্যতি || ১৭||
যদি হেতোঃ ফলাত্সিদ্ধিঃ ফলসিদ্ধিশ্চ হেতুতঃ |
কতরত্পূর্বনিষ্পন্নং যস্য সিদ্ধিরপেক্ষযা || ১৮||
অশক্তিরপরিজ্ঞানং ক্রমকোপোঽথ বা পুনঃ |
এবং হি সর্বথা বুদ্ধৈরজাতিঃ পরিদীপিতা || ১৯||
বীজাঙ্কুরাখ্যো দৃষ্টান্তঃ সদা সাধ্যসমো হি সঃ |
ন হি সাধ্যসমো হেতুঃ সিদ্ধৌ সাধ্যস্য যুজ্যতে || ২০||
পূর্বাপরাপরিজ্ঞানমজাতেঃ পরিদীপকম্ |
জাযমানাদ্ধি বৈ ধর্মাত্কথং পূর্বং ন গৃহ্যতে || ২১||
স্বতো বা পরতো বাঽপি ন কিঞ্চিদ্বস্তু জাযতে |
সদসত্সদসদ্বাঽপি ন কিঞ্চিদ্বস্তু জাযতে || ২২||
হেতুর্ন জাযতেঽনাদেঃ ফলং চাপি স্বভাবতঃ |
আদির্ন বিদ্যতে যস্য তস্য হ্যাদির্ন বিদ্যতে || ২৩||
প্রজ্ঞপ্তেঃ সনিমিত্তত্বমন্যথা দ্বযনাশতঃ |
সঙ্ক্লেশস্যোপলব্ধেশ্চ পরতন্ত্রাস্তিতা মতা || ২৪||
প্রজ্ঞপ্তেঃ সনিমিত্তত্বমিষ্যতে যুক্তিদর্শনাত্ |
নিমিত্তস্যানিমিত্তত্বমিষ্যতে ভূতদর্শনাত্ || ২৫||
চিত্তং ন সংস্পৃশত্যর্থং নার্থাভাসং তথৈব চ |
অভূতো হি যতশ্চার্থো নার্থাভাসস্ততঃ পৃথক্ || ২৬||
নিমিত্তং ন সদা চিত্তং সংস্পৃশত্যধ্বসু ত্রিষু |
অনিমিত্তো বিপর্যাসঃ কথং তস্য ভবিষ্যতি || ২৭||
তস্মান্ন জাযতে চিত্তং চিত্তদৃশ্যং ন জাযতে |
তস্য পশ্যন্তি যে জাতিং খে বৈ পশ্যন্তি তে পদম্ || ২৮||
অজাতং জাযতে যস্মাদজাতিঃ প্রকৃতিস্ততঃ |
প্রকৃতেরন্যথাভাবো ন কথঞ্চিদ্ভবিষ্যতি || ২৯||
অনাদেরন্তবত্ত্বং চ সংসারস্য ন সেত্স্যতি |
অনন্ততা চাঽঽদিমতো মোক্ষস্য ন ভবিষ্যতি || ৩০||
আদাবন্তে চ যন্নাস্তি বর্তমানেঽপি তত্তথা |
বিতথৈঃ সদৃশাঃ সন্তোঽবিতথা ইব লক্ষিতাঃ || ৩১||
সপ্রযোজনতা তেষাং স্বপ্নে বিপ্রতিপদ্যতে |
তস্মাদাদ্যন্তবত্ত্বেন মিথ্যৈব খলু তে স্মৃতাঃ || ৩২||
সর্বে ধর্মা স্মৃষা স্বপ্নে কাযস্যান্তর্নিদর্শনাত্ |
সংবৃতেঽস্মিন্প্রদেশে বৈ ভূতানাং দর্শনং কুতঃ || ৩৩||
ন যুক্তং দর্শনং গত্বা কালস্যানিযমাদ্তৌ |
প্রতিবুদ্ধশ্চ বৈ সর্বস্তস্মিন্দেশে ন বিদ্যতে || ৩৪||
মিত্রাদ্যৈঃ সহ সংমন্ত্র্য সম্বুদ্ধো ন প্রপদ্যতে |
গৃহীতং চাপি যত্কিঞ্চিত্প্রতিবুদ্ধো ন পশ্যতি || ৩৫||
স্বপ্নে চাবস্তুকঃ কাযঃ পৃথগন্যস্য দর্শনাত্ |
যথা কাযস্তথা সর্বং চিত্তদৃশ্যমবস্তুকম্ || ৩৬||
গ্রহণাজ্জাগরিতবত্তদ্ধেতুঃ স্বপ্নে ইষ্যতে |
তদ্ধেতুত্বাত্তু তস্যৈব সজ্জাগরিতমিষ্যতে || ৩৭||
উত্পাদস্যাপ্রসিদ্ধত্বাদজং সর্বমুদাহৃতম্ |
ন চ ভূতাদভূতস্য সম্ভবোঽস্তি কথঞ্চন || ৩৮||
অসজ্জাগরিতে দৃষ্ট্বা স্বপ্নে পশ্যতি তন্মযঃ |
অসত্স্বপ্নেঽপি দৃষ্ট্বা চ প্রতিবুদ্ধো ন পশ্যতি || ৩৯||
নাস্ত্যসদ্ধেতুকমসত্সদসদ্ধেতুকং তথা |
সচ্চ সদ্ধেতুকং নাস্তি সদ্ধেতুকমসত্কুতঃ || ৪০||
বিপর্যাসাদ্যথা জাগ্রদচিন্ত্যান্ভূতবত্স্পৃশেত্ |
তথা স্বপ্নে বিপর্যাসাত্ ধর্মাস্তত্রৈব পশ্যতি || ৪১||
উপলম্ভাত্সমাচারাদস্তিবস্তুত্ববাদিনাম্ |
জাতিস্তু দেশিতা বুদ্ধৈঃ অজাতেস্ত্রসতাং সদা || ৪২||
অজাতেস্ত্রসতাং তেষামুপলম্ভাদ্বিযন্তি যে |
জাতিদোষা ন সেত্স্যন্তি দোষোঽপ্যল্পো ভবিষ্যতি || ৪৩||
উপলম্ভাত্সমাচারান্মাযাহস্তী যথোচ্যতে |
উপলম্ভাত্সমাচারাদস্তি বস্তু তথোচ্যতে || ৪৪||
জাত্যাভাসং চলাভাসং বস্ত্বাভাসং তথৈব চ |
অজাচলমবস্তুত্বং বিজ্ঞানং শান্তমদ্বযম্ || ৪৫||
এবং ন জাযতে চিত্তমেবংধর্মা অজাঃ স্মৃতাঃ |
এবমেব বিজানন্তো ন পতন্তি বিপর্যতে || ৪৬||
ঋজুবক্রাদিকাভাসমলাতস্পন্দিতং যথা |
গ্রহণগ্রাহকাভাসং বিজ্ঞানস্পন্দিতং তথা || ৪৭||
অস্পন্দমানমলাতমনাভাসমজং যথা |
অস্পন্দমানং বিজ্ঞানমনাভাসমজং তথা || ৪৮||
অলাতে স্পন্দমানে বৈ নাঽঽভাসা অন্যতোভুবঃ |
ন ততোঽন্যত্র নিস্পন্দান্নালাতং প্রবশন্তি তে || ৪৯||
ন নির্গতা অলাতাত্তে দ্রব্যত্বাভাবযোগতঃ |
বিজ্ঞানেঽপি তথৈব স্যুরাভাসস্যাবিশেশতঃ || ৫০||
বিজ্ঞানে স্পন্দমানে বৈ নাঽঽভাসা অন্যতোভুবঃ |
ন ততোঽন্যত্র নিস্পন্দান্ন বিজ্ঞানং বিশন্তি তে || ৫১||
ন নির্গতাস্তে বিজ্ঞানাদ্দ্রব্যত্বাভাবযাগতঃ |
কার্যকারণতাভাবাদ্যতোঽচিন্ত্যাঃ সদৈব তে || ৫২||
দ্রব্যং দ্রব্যস্য হেতুঃ স্যাদন্যদন্যস্য চৈব হি |
দ্রব্যত্বমন্যভাবো বা ধর্মাণাং নোপপদ্যতে || ৫৩||
এবং ন চিত্তজা ধর্মাশ্চিত্তং বাঽপি ন ধর্মজম্ |
এবং হেতুফলাজাতিং প্রবিশন্তি মনীষিণঃ || ৫৪||
যাবদ্ধেতুফলাবেশস্তাবদ্ধেতুফলোদ্ভবঃ |
ক্ষীণে হেতুফলাবেশে নাস্তি হেতুফলোদ্ভবঃ || ৫৫||
যাবদ্ধেতুফলাবেশঃ সংসারস্তাবদাযতঃ |
ক্ষীণে হেতুফলাবেশে সংসারং ন প্রপদ্যতে || ৫৬||
সংবৃত্যা জাযতে সর্বং শাশ্বতং নাস্তি তেন বৈ |
সদ্ভাবেন হ্যজং সর্বমুচ্ছেদস্তেন নাস্তি বৈ || ৫৭||
ধর্মা য ইতি জাযন্তে জাযন্তে তে ন তত্ত্বতঃ |
জন্ম মাযোপমং তেষাং সা চ মাযা ন বিদ্যতে || ৫৮||
যথা মাযামযাদ্বীজাজ্জাযতে তন্মযোঽঙ্কুরঃ |
নাসৌ নিত্যো ন চোচ্ছ্যেদী তদ্বদ্ধর্মেষু যোজনা || ৫৯||
নাজেষু সর্বধর্মেষু শাশ্বতাশাশ্বতাভিধা |
যত্র বর্ণা ন বর্তন্তে বিবেকস্তত্র নোচ্যতে || ৬০||
যথা স্বপ্নে দ্বযাভাসং চিত্তং চলতি মাযযা |
তথা জাগ্রদ্দ্বযাভাসং চিত্তং চলতি মাযযা || ৬১||
অদ্বযং চ দ্বযাভাসং চিত্তং স্বপ্নে ন সংশযঃ |
অদ্বযং চ দ্বযাভাসং তথা জাগ্রন্ন সংশযং || ৬২||
স্বপ্নদৃক্প্রচরন্স্বপ্নে দিক্ষু বৈ দশসু স্থিতান্ |
অণ্ডজান্স্বেদজান্বাঽপি জীবান্পশ্যতি যান্সদা || ৬৩||
স্বপ্নদৃক্চিত্তদৃশ্যাস্তে ন বিদ্যন্তে ততঃ পৃথক্ |
তথা তদ্দৃশ্যমেবেদং স্বপ্নদৃক্চিত্তমিষ্যতে || ৬৪||
চরঞ্জাগরিতে জাগ্রদ্দিক্ষু বৈ দশসু স্থিতান্ |
অণ্ডজান্স্বেদজান্বাঽপি জীবান্পশ্যতি যান্সদা || ৬৫||
জাগ্রচ্চিতেক্ষণীযাস্তে ন বিদ্যন্তে ততঃ পৃথক্ |
তথা তহৃশ্যমেবেদং জাগ্রতশ্চিত্তমিষ্যতে || ৬৬||
উভে হ্যন্যোন্যদৃশ্যে তে কিং তদস্তীতি নোচ্যতে |
লক্ষণাশূন্যমুভযং তন্মতেনৈব গৃহ্যতে || ৬৭||
যথা স্বপ্নমযো জীবো জাযতে ম্রিযতেঽপি চ |
তথা জীবা অমী সর্বে ভবন্তি ন ভবন্তি চ || ৬৮||
যথা মাযামযো জীবো জাযতে ম্রিযতেঽপি চ |
তথা জীবা অমী সর্বে ভবন্তি ন ভবন্তি চ || ৬৯||
যথা নির্মিতকো জীবো জাযতে ম্রিযতেঽপি বা |
তথা জীবা অমী সর্বে ভবন্তি ন ভবন্তি চ || ৭০||
ন কশ্চিজ্জাযতে জীবঃ সম্ভবোঽস্য ন বিদ্যতে |
এতত্তদুত্তমং সত্যং যত্র কিঞ্চিন্ন জাযতে || ৭১||
চিত্তস্পন্দিতমেবেদং গ্রাহ্যগ্রাহকবদ্দ্বযম্ |
চিত্তং নির্বিষযং নিত্যমসঙ্গং তেন কীর্তিতম্ || ৭২||
যোঽস্তি কল্পিতসংবৃত্যা পরমার্থেন নাস্ত্যসৌ |
পরতন্ত্রাভিসংবৃত্যা স্যান্নাস্তি পরমার্থতঃ || ৭৩||
অজঃ কল্পিতসংবৃত্যা পরমার্থেন নাপ্যজঃ |
পরতন্ত্রাভিনিষ্পত্ত্যা সংবৃত্যা জাযতে তু সঃ || ৭৪||
অভূতাভিনিবেশোঽস্তি দ্বযং তত্র ন বিদ্যতে |
দ্বযাভাবং স বুদ্ধ্বৈব নির্নিমিত্তো ন জাযতে || ৭৫||
যদা ন লভতে হেতূনুত্তমাধমমধ্যমান্ |
তদা ন জাযতে চিত্তং হেত্বভাবে ফলং কুতঃ || ৭৬||
অনিমিত্তস্য চিত্তস্য যাঽনুত্পত্তিঃ সমাঽদ্বযা |
অজাতস্যৈব সর্বস্য চিত্তদৃশ্যং হি তদ্যতেঃ || ৭৭||
বুধ্দ্বাঽনিমিত্ততাং সত্যাং হেতুং পৃথগনাপ্নুবন্ |
বীতশোকং তথা কামমভযং পদমশ্নুতে || ৭৮||
অভূতাভিনিবেশাদ্ধি সদৃশে তত্প্রবর্ততে |
বস্ত্বভাবং স বুদ্ধ্বৈব নিঃসঙ্গং বিনিবর্ততে || ৭৯||
নিবৃত্তস্যাপ্রবৃত্তস্য নিশ্চলা হি তদা স্থিতিঃ |
বিষযঃ স হি বুদ্ধানাং তত্সাম্যমজমদ্বযম্ || ৮০||
অজমনিদ্রমস্বপ্নং প্রভাতং ভবতি স্বযম্ |
সকৃদ্বিভাতো হ্যেবৈষ ধর্মো ধাতুস্বভাবতঃ || ৮১||
সুখমাব্রিযতে নিত্যং দুঃখং বিব্রিযতে সদা |
যস্য কস্য চ ধর্মস্য গ্রহেণ ভগবানসৌ || ৮২||
অস্তি নাস্ত্যস্তি নাস্তীতি নাস্তি নাস্তীতি বা পুনঃ |
চলস্থিরোভযাভাবৈরাবৃণোত্যেব বালিশঃ || ৮৩||
কোট্যশ্চতস্র এতাস্তু গ্রহৈর্যাসাং সদাঽঽবৃতঃ |
ভগবানাভিরস্পৃষ্টো যেন দৃষ্টঃ স সর্বদৃক্ || ৮৪||
প্রাপ্য সর্বজ্ঞতাং কৃত্স্নাং ব্রাহ্মণ্যং পদমদ্বযম্ |
অনাপন্নাদিমধ্যান্তং কিমতঃ পরমীহতে || ৮৫||
বিপ্রাণাং বিনযো হ্যেষ শমঃ প্রাকৃত উচ্যতে |
দমঃ প্রকৃতিদান্তত্বাদেবং বিদ্বাঞ্শমং ব্রজেত্ || ৮৬||
সবস্তু সোপলম্ভং চ দ্বযং লৌকিকমিষ্যতে |
অবস্তু সোপলম্ভং চ শুদ্ধং লৌকিকমিষ্যতে || ৮৭||
অবস্ত্বনুপলম্ভং চ লোকোত্তরমিতি স্মৃতম্ |
জ্ঞানং জ্ঞেযং চ বিজ্ঞেযং সদা বুদ্ধৈঃ প্রকীর্তিতম্ || ৮৮||
জ্ঞানে চ ত্রিবিধে জ্ঞেযে ক্রিমেণ বিদিতে স্বযম্ |
সর্বজ্ঞতা হি সর্বত্র ভবতীহ মহাবিযঃ || ৮৯||
হেযজ্ঞেযাপ্যপাক্যানি বিজ্ঞেযান্যগ্রযাণতঃ |
তেষামন্যত্র বিজ্ঞেযাদুপলম্ভস্ত্রিষু স্মৃতঃ || ৯০||
প্রকৃত্যাঽঽকাশবজ্জ্ঞেযাঃ সর্বে ধর্মা অনাদযঃ |
বিদ্যতে ন হি নানাত্বং তেষাং ক্বচন কিঞ্চন || ৯১||
আদিবুদ্ধাঃ প্রকৃত্যৈব সর্বে ধর্মাঃ সুনিশ্চিতাঃ |
যস্যৈবং ভবতি ক্ষান্তিঃ সোঽমৃতত্বায কল্পতে || ৯২||
আদিশান্তা হ্যনুত্পন্নাঃ প্রকৃত্যৈব সুনির্বৃতাঃ |
সর্বে ধর্মাঃ সমাভিন্না অজং সাম্যং বিশারদম্ || ৯৩||
বৈশারদ্যং তু বৈ নাস্তি ভেদে বিচরতাং সদা |
ভেদনিম্নাঃ পৃথগ্বাদাস্তস্মাত্তে কৃপণাঃ স্মৃতাঃ || ৯৪||
অজে সাম্যে তু যে কেচিদ্ভবিষ্যন্তি সুনিশ্চিতাঃ |
তে হি লোকে মহাজ্ঞানাস্তচ্চ লোকো ন গাহতে || ৯৫||
অজেষ্বজমসঙ্ক্রান্তং ধর্মেষু জ্ঞনমিষ্যতে |
যতো ন ক্রমতে জ্ঞানমসঙ্গং তেন কীর্তিতম্ || ৯৬||
অণুমাত্রেঽপি বৈধর্মে জাযমানেঽবিপশ্চিতঃ |
অসঙ্গতা সদা নাস্তি কিমুতাঽঽবরণচ্যুতিঃ || ৯৭||
অলব্ধাবরণাঃ সর্বে ধর্মাঃ প্রকৃতিনির্মলাঃ |
আদৌ বুদ্ধাস্তথা মুক্তা বুধ্যন্ত ইতি নাযকাঃ || ৯৮||
ক্রমতে ন হি বুদ্ধস্য জ্ঞানং ধর্মেষু তাযিনঃ |
সর্বে ধর্মাস্তথা জ্ঞানং নৈতদ্বুদ্ধেন ভাষিতম্ || ৯৯||
দুর্দর্শমতিগম্ভীরমজং সাম্যং বিশারদম্ |
বুদ্ধ্বা পদমনানাত্বং নমস্কুর্মো যথাবলম্ || ১০০||
|| ইতি গৌডপাদাচর্যকৃতা মাণ্ডূক্যোপনিষত্কারিকাঃ
সম্পূর্ণাঃ||
|| ॐ তত্সত্||