মান্ত্রিক

.. মন্ত্রিকোপনিষত্ ..

স্বাবিদ্যাদ্বযতত্কার্যাপহ্নবজ্ঞানভাসুরম্ .
মন্ত্রিকোপনিষদ্বেদ্যং রামচন্দ্রমহং ভজে ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ॐ অষ্টপাদং শুচিং হংসং ত্রিসূত্রমণুমব্যযম্ .
ত্রিবর্ত্মানং তেজসোহং সর্বতঃপশ্যন্ন পশ্যতি .. ১..
ভূতসংমোহনে কালে ভিন্নে তমসি বৈখরে .
অন্তঃ পশ্যন্তি সত্ত্বস্থা নির্গুণং গুণগহ্বরে .. ২..
অশক্যঃ সোঽন্যথা দ্রষ্টুং ধ্যাযমানঃ কুমারকৈঃ .
বিকারজননীমজ্ঞামষ্টরূপামজাং ধ্রুবাম্ .. ৩..
ধ্যাযতেঽধ্যাসিতা তেন তন্যতে প্রের্যতে পুনঃ .
সূযতে পুরুষার্থং চ তেনৈবাধিষ্ঠিতং জগত্ .. ৪..
গৌরনাদ্যন্তবতী সা জনিত্রী ভূতভাবিনী .
সিতাসিতা চ রক্তা চ সর্বকামদুধা বিভোঃ .. ৫..
পিবন্ত্যেনামবিষযামবিজ্ঞাতাং কুমারকাঃ .
একস্তু পিবতে দেবঃ স্বচ্ছন্দোঽত্র বশানুগঃ .. ৬..
ধ্যানক্রিযাভ্যাং ভগবান্ভুঙ্ক্তেঽসৌ প্রসহদ্বিভুঃ .
সর্বসাধারণীং দোগ্ধ্রীং পীযমানাং তু যজ্বমিঃ .. ৭..
পশ্যন্ত্যস্যাং মহাত্মানঃ সুবর্ণং পিপ্পলাশনম্ .
উদাসীনং ধ্রুবং হংসং স্নাতকাধ্বর্যবো জগুঃ .. ৮..
শংসন্তমনুশংসন্তি বহ্বৃচাঃ শাস্ত্রকোবিদাঃ .
রথন্তরং বৃহত্সাম সপ্তবৈধৈস্তু গীযতে .. ৯..
মন্ত্রোপনিষদং ব্রহ্ম পদক্রমসমন্বিতম্ .
পঠন্তি ভার্গবা হ্যেতে হ্যথর্বাণো ভৃগূত্তমাঃ .. ১০..
সব্রহ্মচারিবৃত্তিশ্চ স্তম্ভোঽথ ফলিতস্তথা .
অনড্বান্রোহিতোচ্ছিষ্টঃ পশ্যন্তো বহুবিস্তরম্ .. ১১..
কালঃ প্রাণশ্চ ভগবান্মৃত্যুঃ শর্বো মহেশ্বরঃ .
উগ্রো ভবশ্চ রুদ্রশ্চ সসুরঃ সাসুরস্তথা .. ১২..
প্রজাপতির্বিরাট্ চৈব পুরুষঃ সলিলমেব চ .
স্তূযতে মন্ত্রসংস্তুত্যৈরথর্ববিদিতৈর্বিভুঃ .. ১৩..
তং ষড্বিংশক ইত্যেতে সপ্তবিংশং তথাপরে .
পুরুষং নির্গুণং সাঙ্খ্যমথর্বশিরসো বিদুঃ .. ১৪..
চতুর্বিংশতিসংখ্যাতং ব্যক্তমব্যক্তমেব চ .
অদ্বৈতং দ্বৈতমিত্যাহুস্ত্রিধা তং পঞ্চধা তথা .. ১৫..
ব্রহ্মাদ্যং স্থাবরান্তং চ পশ্যন্তি জ্ঞানচক্ষুষঃ .
তমেকমেব পশ্যন্তি পরিশুভ্রং বিভুং দ্বিজাঃ .. ১৬..
যস্মিন্সর্বমিদং প্রোতং ব্রহ্ম স্থাবরজঙ্গমম্ .
তস্মিন্নেব লযং যান্তি স্রবন্ত্যঃ সাগরে যথা .. ১৭..
যস্মিন্ভাবাঃ প্রলীযন্তে লীনাশ্চাব্যক্ততাং যযুঃ .
পশ্যন্তি ব্যক্ততাং ভূযো জাযন্তে বুদ্বুদা ইব .. ১৮..
ক্ষেত্রজ্ঞাধিষ্ঠিতং চৈব কারণৈর্বিদ্যতে পুনঃ .
এবং স ভগবান্দেবং পশ্যন্ত্যন্যে পুনঃ পুনঃ .. ১৯..
ব্রহ্ম ব্রহ্মেত্যথাযান্তি যে বিদুর্ব্রাহ্মণাস্তথা .
অত্রৈব তে লযং যান্তি লীনাশ্চাব্যক্তশালিনঃ ..
লীনাশ্চাব্যক্তশালিন ইত্যুপনিষত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ  ..
ইতি মন্ত্রিকোপনিষত্সমাপ্তা ..