মহাবাক্য

.. মহাবাক্যোপনিষত্ ..

যন্মহাবাক্যসিদ্ধান্তমহাবিদ্যাকলেবরম্ .
বিকলেবরকৈবল্যং রামচন্দ্রপদং ভজে ..
ॐ ভদ্রং কর্ণেভিঃ শ্রুণুযাম দেবাঃ
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ
ব্যশেম দেবহিতং যদাযুঃ ..
ॐ শান্তিঃ শান্তিঃ শান্তিঃ ..
হরিঃ ॐ ..
অথ হোবাচ ভগবান্ব্রহ্মাপরোক্ষানুভবপরোপনিষদং
ব্যাখ্যাস্যামঃ . গুহ্যাদ্গুহ্যপরমেষা ন প্রাকৃতাযোপদেষ্টব্যা .
সাত্বিকাযান্তর্মুখায পরিশুশ্রূষবে . অথ
সংসৃতিবন্ধমোক্ষযোর্বিদ্যাবিদ্যে চক্ষুষী উপসংহৃত্য
বিজ্ঞাযাবিদ্যালোকাণ্ডস্তমোদৃক্ . তমো হি
শারীরপ্রপঞ্চমাব্রহ্মস্থাবরান্তমনন্তাখিলাজাণ্ডভূতম্ .
নিখিলনিগমোদিতসকামকর্মব্যবহারো লোকঃ .
নৈষোঽন্ধকারোঽযমাত্মা .বিদ্যা হি কাণ্ডান্তরাদিত্যো
জ্যোতির্মণ্ডলং গ্রাহ্যং নাপরম্ . অসাবাদিত্যো ব্রহ্মেত্যজপযোপহিতং
হংসঃ সোঽহম্ . প্রাণাপানাভ্যাং প্রতিলোমানুলোমাভ্যাং
সমুপলভ্যৈবং সা চিরং লব্ধ্বা ত্রিবৃদাত্মনি
ব্রহ্মণ্যভিধ্যাযমানে সচ্চিদানন্দঃ পরমাত্মাবির্ভবতি .
সহস্রভানুমচ্ছুরিতাপূরিতত্বাদলিপ্যা পারাবারপূর ইব .
নৈষা সমাধিঃ . নৈষা যোগসিদ্ধিঃ . নৈষা মনোলযঃ .
ব্রহ্মৈক্যং তত্ . আদিত্যবর্ণং তমসস্তু পারে .
সর্বাণি রূপাণি বিচিত্য ধীরঃ . নামানি কৃত্বাঽভিবদন্যদাস্তে .
ধাতা পুরস্তাদ্যমুদাজহার . শক্রঃ প্রবিদ্বান্প্রদিশশ্চতস্রঃ .
তমেব বিদ্বানমৃত ইহ ভবতি . নান্যঃ পন্থা অযনায বিদ্যতে .
যজ্ঞেন যজ্ঞমযজন্ত দেবাঃ . তানি ধর্মাণি প্রথমান্যাসন্ .
তে হ নাকং মহিমানঃ সচন্তে . যত্র পূর্বে সাধ্যাঃ সন্তি দেবাঃ .
সোঽহমর্কঃ পরং জ্যোতিরর্কজ্যোতিরহং শিবঃ .
আত্মজ্যোতিরহং শুক্রঃ সর্বজ্যোতিরসাবদোম্ .
য এতদথর্বশিরোঽধীতে . প্রাতরধীযানো রাত্রিকৃতং
পাপং নাশযতি . সাযমধীযানো দিবসকৃতং পাপং নাশযতি .
তত্সাযং প্রাতঃ প্রযুঞ্জানঃ পাপোঽপাপো ভবতি .
মধ্যন্দিনমাদিত্যাভিমুখোঽধীযানঃ
পঞ্চমহাপাতকোপপাতকাত্প্রমুচ্যতে .
সর্ববেদপারাযণপুণ্যং লভতে .
শ্রীমহাবিষ্ণুসাযুজ্যমবাপ্নোতীত্যুপনিষত্ ..
ॐ ভদ্রং কর্ণেভিঃ শ্রুণুযাম দেবাঃ
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ
ব্যশেম দেবহিতং যদাযুঃ ..
ॐ শান্তিঃ শান্তিঃ শান্তিঃ . হরিঃ ॐ তত্সত্
ইতি মহাবাক্যোপনিষত্সমাপ্তা ..