মহানারাযণ

.. মহানারাযণোপনিষত্ ..

হরিঃ ॐ .. শং নো মিত্রঃ শং বরুণঃ . শং নো ভবত্যর্যমা .
শং ন ইন্দ্রো বৃহস্পতিঃ . শং নো বিষ্ণুরুরুক্রমঃ ..
নমো ব্রহ্মণে . নমস্তে বাযো . ত্বমেব প্রত্যক্ষং ব্রহ্মাসি .
ত্বামেব প্রত্যক্ষং ব্রহ্ম বদিষ্যামি . ঋতং বদিষ্যামি .
সত্যং বদিষ্যামি . তন্মামবতু . তদ্বক্তারমবতু .
অবতু মাম্ . অবতু বক্তারম্ .. ॐ শান্তিঃ শান্তিঃ শান্তিঃ ..
ॐ সহ নাববতু . সহ নৌ ভুনক্তু . সহ বীর্যং করবাবহৈ
. তেজস্বি নাবধীতমস্তু . মা বিদ্বিষাবহৈ .
ॐ শান্তিঃ   শান্তিঃ   শান্তিঃ  ..
প্রথমোঽনুবাকঃ .
অংভস্যপারে ভুবনস্য মধ্যে   নাকস্য পৃষ্ঠে মহতো
মহীযান্ .
শুক্রেণ জ্যোতীঁষি সমনুপ্রবিষ্টঃ  প্রজাপতিশ্চরতি
গর্ভে অন্তঃ .. ১..
যস্মিন্নিদঁ সং চ বি চৈতি সর্বং   যস্মিন্ দেবা অধি
বিশ্বে নিষেদুঃ .
তদেব ভূতং তদু ভব্যমা ইদং   তদক্ষরে পরমে ব্যোমন্ ..
২..
যেনাবৃতং খং চ দিবং মহী চ   যেনাদিত্যস্তপতি তেজসা
ভ্রাজসা চ .
যমন্তঃ সমুদ্রে কবযো বযন্তি   যদক্ষরে পরমে প্রজাঃ .. ৩..
যতঃ প্রসূতা জগতঃ প্রসূতী   তোযেন জীবান্ ব্যচসর্জ
ভূম্যাম্ .
যদোষধীভিঃ পুরুষান্ পশূঁশ্চ  বিবেশ ভূতানি
চরাচরাণি .. ৪..
অতঃ পরং নান্যদণীযসঁ হি  পরাত্পরং যন্মহতো
মহান্তম্ .
যদেকমব্যক্তমনন্তরূপং   বিশ্বং পুরাণং তমসঃ পরস্তাত্
.. ৫..
তদেবর্তং তদু সত্যমাহুস্তদেব ব্রহ্ম পরমং কবীনাম্ .
ইষ্টাপূর্তং বহুধা জাতং জাযমানং বিশ্বং বিভর্তি
ভুবনস্য নাভিঃ .. ৬..
তদেবাগ্নিস্তদ্বাযুস্তত্সূর্যস্তদু চন্দ্রমাঃ .
তদেব শুক্রমমৃতং তদ্ব্রহ্ম তদাপঃ স প্রজাপতিঃ .. ৭..
সর্বে নিমেষা জজ্ঞিরে বিদ্যুতঃ পুরুষাদধি .
কলা মুহূর্তাঃ কাষ্ঠাশ্চাহোরাত্রাশ্চ সর্বশঃ .. ৮..
অর্ধমাসা মাসা ঋতবঃ সংবত্সরশ্চ কল্পন্তাম্ .
স আপঃ প্রদুধে উভে ইমে অন্তরিক্ষমথো সুবঃ .. ৯..
নৈনমূর্ধ্বং ন তির্যঞ্চং ন মধ্যে পরিজগ্রভত্ .
ন তস্যেশে কশ্চন তস্য নাম মহদ্যশঃ .. ১০..
ন সংদৃশে তিষ্ঠতি রূপমস্য  ন চক্ষুষা পশ্যতি
কশ্চনৈনম্ .
হৃদা মনীশা মনসাভিক্লৃপ্তো  য এনং বিদুরমৃতাস্তে
ভবন্তি .. ১১..
পরমাত্ম-হিরণ্যগর্ভ-সূক্ত
অদ্ভ্যঃ সংভূতো হিরণ্যগর্ভ ইত্যষ্টৌ ..
অদ্ভ্য সংভূতঃ পৃথিব্যৌ রসাচ্চ  বিশ্বকর্মণঃ
সমবর্ততাধি .
তস্য ত্বষ্টা বিদধদ্রূপমেতি  তত্পুরুষস্য
বিশ্বমাজানমগ্রে . ১.
বেদাহমেতং পুরুষং মহান্তং  আদিত্যবর্ণং তমসঃ পরস্তাত্ .
তমেবং বিদ্বানভৃত ইহ ভবতি  নান্যঃপন্থাবিদ্যতেঽযনায
. ২.
প্রজাপতিশ্চরতি গর্ভে অন্তঃ  অজাযমানো বহুথা বিজাযতে .
তস্য ধীরাঃ পরিজানন্তি যোনিম্   মরীচীনাং পদমিচ্ছন্তি
বেধসঃ . ৩.
যো দেবেভ্য আতপতি  যো দেবানাং পুরোহিতঃ . পূর্বো যো দেবেভ্যো
জাতঃ  নমো রুচায ব্রাহ্মযে . ৪.
রুচং ব্রাহ্মং জনযন্তঃ  দেবা অগ্রে তদব্রুবন্ . যস্ত্বৈবং
ব্রাহ্মণো বিদ্যাত্ তস্য দেবা অসন্ বশে . ৫.
হ্রীশ্চ তে লক্ষ্মীশ্চ পত্ন্যৌ  অহোরাত্রে পার্শ্বে নক্ষত্রাণি
রূপম্ .
অশ্বিনৌ ব্যাত্তম্ ইষ্টং মনিষাণ  অমুং মনিষাণ সর্বং
মনিষাণ . ৬.   ইতি উত্তরনারাযণানুবাকঃ .

হিরণ্যগর্ভঃ সমবর্ততাগ্রে  ভূতস্য জাতঃ পতিরেক আসীত্ .
স দাধার পৃথিবীং দ্যামুতেমাং  কস্মৈ দেবায হবিষা
বিধেম .. ১..
যঃ প্রাণতো নিমিষতো মহিত্বৈক  ইদ্রাজা জগতো বভূব .
য ঈশে অস্য দ্বিপদশ্চতুষ্পদঃ   কস্মৈ দেবায হবিষা
বিধেম .. ২..
য আত্মদা বলংদা যস্য বিশ্ব  উপাসতে প্রশিষং যস্য
দেবাঃ .
যস্য ছাযামৃতং যস্য মৃত্যুঃ  কস্মৈ দেবায হবিষা
বিধেম .. ৩..
যস্যেমে হিমবন্তো মহিত্বা  যস্য সমুদ্রঁ রসযা সহাহুঃ .
যস্যেমাঃ প্রদিশো যস্য বাহূ  কস্মৈ দেবায হবিষা বিধেম ..
৪..
যং ক্রন্দসী অবসা তস্তভানে  অস্যৈক্ষেতাং মনসা রেজমানে .
যত্রাধি সূর উদিতৌ ব্যেতি  কস্মৈ দেবায হবিষা বিধেম .. ৫..
যেন দ্যৌরুগ্রা পৃথিবী চ দৃঢে  যেন সুবঃ স্তভিতং যেন
নাকঃ .
যো অন্তরিক্ষে রজসো বিমানঃ  কস্মৈ দেবায হবিষা বিধেম .. ৬..
আপো হ যন্মহতীর্বিশ্বমাযং  দক্ষং দধানা
জনযন্তীরগ্নিম্ .
ততো দেবানাং নিরবর্ততাসুরেকঃ   কস্মৈ দেবায হবিষা
বিধেম .. ৭..
যশ্চিদাপো মহিনা পর্যপশ্যদ্দক্ষং দধানা
জনযন্তীরগ্নিম্ .
যো দেবেশ্বধি দেব এক  কস্মৈ দেবায হবিষা বিধেম .. ৮..

এষ হি দেবঃ প্রদিশোঽনু সর্বাঃ   পূর্বো হি জাতঃ স উ গর্ভে
অন্তঃ .
স বিজাযমানঃ স জনিষ্যমাণঃ   প্রত্যঙ্মুখাস্তিষ্ঠতি
বিশ্বতোমুখঃ .. ১২..
বিশ্বতশ্চক্ষুরুত বিশ্বতো মুখো বিশ্বতো হস্ত উত
বিশ্বতস্পাত্ .
সং বাহুভ্যাং নমতি সং পতত্রৈর্দ্যাবাপৃথিবী জনযন্
দেব একঃ .. ১৩..
বেনস্তত্ পশ্যন্ বিশ্বা ভুবনানি  বিদ্বান্ যত্র বিশ্বং
ভবত্যেকনীডম্ .
যস্মিন্নিদঁসং চ বি চৈকঁস  ওতঃ প্রোতশ্চ বিভুঃ
প্রজাসু .. ১৪..
প্র তদ্বোচে অমৃতং নু বিদ্বান্  গন্ধর্বো নাম নিহিতং গুহাসু .
ত্রীণি পদা নিহিতা গুহাসু  যস্তদ্বেদ সবিতুঃ পিতা সত্ .. ১৫..
স নো বন্ধুর্জনিতা স বিধাতা  ধামানি বেদ ভুবনানি বিশ্বা .
যত্র দেবা অমৃতমানশানাস্তৃতীযে ধামান্যভ্যৈরযন্ত ..
১৬..
পরি দ্যাবাপৃথিবী যন্তি সদ্যঃ  পরি লোকান্ পরি দিশঃ পরি
সুবঃ .
ঋতস্য তন্তুং বিততং বিচৃত্য  তদপশ্যত্ তদভবত্
প্রজাসু .. ১৭..
পরীত্য লোকান্ পরীত্য ভূতানি  পরীত্য সর্বাঃ প্রদিশো
দিশশ্চ .
প্রজাপতিঃ প্রথমজা ঋতস্যাত্মনাত্মানমভিসংবভূব .. ১৮..
সদসস্পতিমদ্ভুতং প্রিযমিন্দ্রস্য কাম্যম্ . সনিং
মেধামযাসিষম্ .. ১৯..
উদ্দীপ্যস্ব জাতবেদোঽপঘ্নন্নিঋতিং মম . পশূঁশ্চ
মহ্যমমাবহ জীবনং চ দিশো দিশ .. ২০..
মা নো হিঁসীজ্জাতবেদো গামশ্বং পুরুষং জগত্ .
অবিভ্রদগ্ন আগহি শ্রিযা মা পরিপাতয .. ২১..
পুরুষস্য বিদ্মহে সহস্রাক্ষস্য মহাদেবস্য ধীমহি . তন্নো
রুদ্রঃ প্রচোদযাত্ .. ২২..
গাযত্র্যাঃ .
তত্পুরুষায বিদ্মহে মহাদেবায ধীমহি . তন্নো রুদ্রঃ
প্রচোদযাত্ .. ২৩..
তত্পুরুষায বিদ্মহে বক্রতুণ্ডায ধীমহি . তন্নো দন্তিঃ
প্রচোদযাত্ .. ২৪..
তত্পুরুষায বিদ্মহে চক্রতুণ্ডায ধীমহি . তন্নো নন্দিঃ
প্রচোদযাত্ .. ২৫..
তত্পুরুষায বিদ্মহে মহাসেনায ধীমহি . তন্নঃ ষণ্মুখঃ
প্রচোদযাত্ .. ২৬..
তত্পুরুষায বিদ্মহে সুবর্ণপক্ষায ধীমহি . তন্নো গরুডঃ
প্রচোদযাত্ .. ২৭..
বেদাত্মনায বিদ্মহে হিরণ্যগর্ভায ধীমহি . তন্নো ব্রহ্ম
প্রচোদযাত্ .. ২৮..
নারাযণায বিদ্মহে বাসুদেবায ধীমহি . তন্নো বিষ্ণুঃ
প্রচোদযাত্ .. ২৯..
বজ্রনখায বিদ্মহে তীক্ষ্ণদঁষ্ট্রায ধীমহি . তন্নো
নারসিঁহঃ প্রচোদযাত্ .. ৩০..
ভাস্করায বিদ্মহে মহদ্দ্যুতিকরায ধীমহি . তন্নো আদিত্য্যঃ
প্রচোদযাত্ .. ৩১..
বৈশ্বানরয বিদ্মহে লালীলায ধীমহি . তন্নো অগ্নিঃ
প্রচোদযাত্ .. ৩২..
কাত্যাযনায বিদ্মহে কন্যাকুমারি ধীমহি . তন্নো দুর্গিঃ
প্রচোদযাত্ .. ৩৩..
[পাঠভেদঃ:
চতুর্মুখায বিদ্মহে কমণ্ডলুধরায ধীমহি . তন্নো ব্রহ্মা
প্রচোদযাত্ ..
আদিত্যায বিদ্মহে সহস্রকিরণায ধীমহি . তন্নো ভানুঃ
প্রচোদযাত্ ..
পাবকায বিদ্মহে সপ্তজিহ্বায ধীমহি . তন্নো বৈশ্বানরঃ
প্রচোদযাত্ ..
মহাশূলিন্যৈ বিদ্মহে মহাদুর্গাযৈ ধীমহি . তন্নো ভগবতী
প্রচোদযাত্ ..
সুভগাযৈ বিদ্মহে কমলমালিন্যৈ ধীমহি . তন্নো গৌরী
প্রচোদযাত্ ..
নবকুলায বিদ্মহে বিষদন্তায ধীমহি . তন্নঃ সর্পঃ
প্রচোদযাত্ ..]
সহস্রপরমা দেবী শতমূলা শতাঙ্কুরা . সর্বঁহরতু মে
পাপং দূর্বা দুঃস্বপ্ননাশিনী .. ৩৪..
কাণ্ডাত্ কাণ্ডাত্ প্ররোহন্তী পরুষঃ পরুষঃ পরি . এবা নো
দূর্বে প্রতনু সহস্রেণ শতেন চ .. ৩৫..
যা শতেন প্রতনোষি সহস্রেণ বিরোহসি . তস্যাস্তে দেবীষ্টকে
বিধেম হবিষা বযম্ .. ৩৬..
অশ্বক্রান্তে রথক্রান্তে বিষ্ণুক্রান্তে বসুন্ধরা . শিরসা
ধারযিষ্যামি রক্ষস্ব মাং পদে পদে .. ৩৭..
ভূমির্ধেনুর্ধরণী লোকধারিণী . উদ্ধৃতাসি বরাহেণ
কৃষ্ণেন শতবাহুনা .. ৩৮..
মৃত্তিকে হন পাপং যন্মযা দুষ্কৃতং কৃতম্ .
মৃত্তিকে ব্রহ্মদত্তাসি কাশ্যপেনাভিমন্ত্রিতা .
মৃত্তিকে দেহি মে পুষ্টিং ত্বযি সর্বং প্রতিষ্ঠিতম্ .. ৩৯..
মৃত্তিকে প্রতিষ্ঠিতে সর্বং তন্মে নির্ণুদ মৃত্তিকে . ত্বযা
হতেন পাপেন গচ্ছামি পরমাং গতিম্ .. ৪০..
যত ইন্দ্র ভযামহে ততো নো অভযং কৃধি . মঘবঞ্ছগ্ধি
তব তন্ন ঊতযে বিদ্বিষো বিমৃধো জহি .. ৪১..
স্বস্তিদা বিশস্পতির্বৃত্রহা বিমৃধো বশী . বৃষেন্দ্রঃ
পুর এতু নঃ স্বস্তিদা অভযঙ্করঃ .. ৪২..
স্বস্তি ন ইন্দ্রো বৃদ্ধশ্রবাঃ স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ স্বস্তি নো বৃহস্পতির্দধাতু ..
৪৩..
আপান্তমন্যুস্তৃপলপ্রভর্মা  ধুনিঃ
শিমীবাঞ্ছরুমাঁঋজীষী .
সোমো বিশ্বান্যতসাবনানি   নার্বাগিন্দ্রং প্রতিমানানি দেভুঃ ..
৪৪..
ব্রহ্মজজ্ঞানং প্রথমং পুরস্তাদ্বি সীমতঃ সুরুচো বেন আবঃ .
স বুধ্নিযা উপমা অস্য বিষ্ঠাঃ সতশ্চ যোনিমসতশ্চ বিবঃ
.. ৪৫..
স্যোনা পৃথিবি ভবান্ নৃক্ষরা নিবেশনী . যচ্ছা নঃ
শর্ম সপ্রথাঃ .. ৪৬..
গন্ধদ্বারাং দুরাধর্ষাং নিত্যপুষ্টাং করীষিণীম্ .
ঈশ্বরীঁ সর্বভূতানাং তামিহোপহ্বযে শ্রিযম্ .. ৪৭..
শ্রীর্মে ভজতু অলক্ষ্মীর্মে নশ্যতু .
বিষ্ণুমুখা বৈ
দেবাশ্ছন্দোভিরিমা৅ংল্লোকাননপজয্যমভ্যজযন্ .
মহাঁ ইন্দ্রো বজ্রবাহুঃ ষোডশী শর্ম যচ্ছতু .. ৪৮..
স্বস্তি নো মঘবা করোতু . হন্তু পাপ্মানং যোঽস্মান্ দ্বেষ্টি ..
৪৯..
সোমানঁ স্বরণং কৃণুহি ব্রহ্মণস্পতে কক্ষীবন্তং য
ঔশিজম্ .
শরীরং যজ্ঞশমলং কুসীদং তস্মিন্ত্সীদতু যোঽস্মান্
দ্বেষ্টি .. ৫০..
চরণং পবিত্রং বিততং পুরাণং  যেন পূতস্তরতি
দুষ্কৃতানি .
তেন পবিত্রেণ শুদ্ধেন পূতা  অতি পাপ্মানমরাতিং তরেম .. ৫১..
সজোষা ইন্দ্র সগণো মরুদ্ভিঃ  সোমং পিব বৃত্রহঞ্ছূর
বিদ্বান্ .
জহি শত্রূঁরপ মৃধো নুদস্বাথাভযং কৃণুহি বিশ্বতো
নঃ .. ৫২..
সুমিত্রা ন আপ ওষধযঃ সন্তু .
দুর্মিত্রাস্তস্মৈ ভূযাসুর্যোঽস্মান্ দ্বেষ্টি যং চ বযং
দ্বিষ্মঃ .. ৫৩..
আপো হি ষ্ঠা মযোভুবস্তা ন ঊর্জে দধাতন . মহে রণায
চক্ষসে . যো বঃ শিবতমো রসস্তস্য ভাজযতেঽহ নঃ .
উশতীরিব মাতরঃ . তস্মা অরং গমাম বো যস্য ক্ষযায
জিন্বথ . আপো জনযথা চ নঃ .. ৫৪..
হিরণ্যশৃঙ্গং বরুণং প্রপদ্যে তীর্থ মে দেহি যাচিতঃ .
যন্মযা ভুক্তমসাধূনাং পাপেভ্যশ্চ প্রতিগ্রহঃ .. ৫৫..
যন্মে মনসা বাচা কর্মণা বা দুষ্কৃতং কৃতম্ .
তন্ন ইন্দ্রো বরুণো বৃহস্পতিঃ সবিতা চ পুনন্তু পুনঃ পুনঃ ..
৫৬..
নমোঽগ্নযেঽপ্সুমতে নম ইন্দ্রায নমো বরুণায নমো বারুণ্যৈ
নমোঽদ্ভ্যঃ .. ৫৭..
যদপাং ক্রূরং যদমেধ্যং যদশান্তং তদপগচ্ছতাত্
.. ৫৮..
অত্যাশনাদতীপানাদ্ যচ্চ উগ্রাত্ প্রতিগ্রহাত্ .
তন্মে বরুণো রাজা পাণিনা হ্যবমর্শতু .. ৫৯..
সোঽহমপাপো বিরজো নির্মুক্তো মুক্তকিল্বিষঃ .
নাকস্য পৃষ্ঠমারুহ্য গচ্ছেদ্ব্রহ্মসলোকতাম্ .. ৬০..
যশ্চাপ্সু বরুণঃ স পুনাত্বঘমর্ষণঃ .. ৬১..
ইমং মে গঙ্গে যমুনে সরস্বতি শুতুদ্রি স্তোমঁ সচতা
পরুষ্ণিযা .
অসিক্নিঅ মরুদ্বৃধে বিতস্তযার্জীকীযে শৃণুহ্যা সুষোমযা ..
৬২..
ঋতং চ সত্যং চাভীদ্ধাত্তপসোঽধ্যজাযত .
ততো রাত্রিরজাযত ততঃ সমুদ্রো অর্ণবঃ .. ৬৩..
সমুদ্রাদর্ণবাদধি সংবত্সরো অজাযত .
অহোরাত্রাণি বিদধদ্বিশ্বস্য মিষতো বশী .. ৬৪..
সূর্যাচন্দ্রমসৌ ধাতা যথাপূর্বমকল্পযত্ .
দিবং চ পৃথিবীং চান্তরিক্ষমথো সুবঃ .. ৬৫..
যত্পৃথিব্যাঁ রজঃ স্বমান্তরিক্ষে বিরোদসী .
ইমাঁস্তদাপো বরুণঃ পুনাত্বঘমর্ষণঃ ..
পুনন্তু বসবঃ পুনাতু বরুণঃ পুনাত্বঘমর্ষণঃ .
এষ ভূতস্য মধ্যে ভুবনস্য গোপ্তা ..
এষ পুণ্যকৃতাং লোকানেষ মৃত্যোর্হিরণ্মযম্ .
দ্যাবাপৃথিব্যোর্হিরণ্মযঁ সঁশ্রিতঁ সুবঃ .
স নঃ সুবঃ সঁশিশাধি .. ৬৬..
আর্দ্রং জ্বলতিজ্যোতিরহমস্মি . জ্যোতির্জ্বলতি ব্রহ্মাহমস্মি .
যোঽহমস্মি ব্রহ্মাহমস্মি . অহমস্মি ব্রহ্মাহমস্মি . অহমেবাহং
মাং জুহোমি স্বাহা .. ৬৭..
অকার্যবকীর্ণী স্তেনো ভ্রূণহা গুরুতল্পগঃ .
বরুণোঽপামঘমর্ষণস্তস্মাত্ পাপাত্ প্রমুচ্যতে .. ৬৮..
রজোভূমিস্ত্ব মাঁ রোদযস্ব প্রবদন্তি ধীরাঃ .. ৬৯..
আক্রান্ত্সমুদ্রঃ প্রথমে বিধর্মঞ্জনযন্প্রজা ভুবনস্য রাজা .
বৃষা পবিত্রে অধি সানো অব্যে বৃহত্সোমো বাবৃধে সুবান
ইন্দুঃ .. ৭০..

দ্বিতীযোঽবানুকঃ  .
জাতবেদসে সুনবাম সোমমরাতীযতো নিদহাতি বেদঃ .
স নঃ পর্ষদতি দুর্গাণি বিশ্বা নাবেব সিন্ধুং দুরিতাত্যগ্নিঃ
.. ১..
দুর্গা সূক্তম্ .
তামগ্নিবর্ণাং তপসা জ্বলন্তীং বৈরোচনীং কর্মফলেষু
জুষ্টাম্ .
দুর্গাং দেবীঁ শরণমহং প্রপদ্যে সুতরসি তরসে নমঃ .. ২..
অগ্নে ত্বং পারযা নব্যো অস্মান্ স্বস্তিভিরতি দুর্গাণি বিশ্বা .
পূশ্চ পৃথ্বী বহুলা ন উর্বী ভবা তোকায তনযায
শংযোঃ .. ৩..
বিশ্বানি নো দুর্গহা জাতবেদঃ সিন্ধুং ন বাবা দুরিতাতিপর্ষি .
অগ্নে অত্রিবন্মনসা গৃণানোঽস্মাকং বোধ্যবিতা তনূনাম্ .. ৪..
পৃতনাজিতঁ সহমানমুগ্নমগ্নিঁ হুবেম
পরমাত্সধস্তাত্ .
স নঃ পর্ষদতি দুর্গাণি বিশ্বা ক্ষামদ্দেবো অতি দুরিতাত্যগ্নিঃ
.. ৫..
প্রত্নোষি কমীড্যো অধ্বরেষু সনাচ্চ হোতা নব্যশ্চ সত্সি .
স্বাং চাগ্নে তনুবং পিপ্রযস্বাস্মভ্যং চ সৌভগমাযজস্ব
.. ৬..
গোভির্জুষ্টমযুজো নিষিক্তং তবেন্দ্র বিষ্ণোরনুসংচরেম .
নাকস্য পৃষ্ঠমভি সংবসানো বৈষ্ণবীং লোক ইহ
মাদযন্তাম্ .. ৭..

তৃতীযোঽনুবাকঃ .
ভূরন্নমগ্নযে পৃথিব্যৈ স্বাহা ভুবোঽন্ন.ম্
বাযবেঽন্তরিক্ষায স্বাহা সুবরন্নমাদিত্যায দিবে স্বাহা
ভূর্ভুবস্সুবরন্নং চন্দ্রমসে দিগ্ভ্যঃ স্বাহা নমো দেবেভ্যঃ
স্বধা পিতৃভ্যো ভূর্ভুবঃ সুবরন্নমোম্ .. ১..

চতুর্থোঽনুবাকঃ .
ভূরগ্নযে পৃথিব্যৈ স্বাহা  ভুবো বাযবেঽন্তরিক্ষায স্বাহা
সুবরাদিত্যায দিবে স্বাহা  ভুর্ভুবস্সুবশ্চন্দ্রমসে দিগ্ভ্যঃ
স্বাহা
নমো দেবেভ্যঃ স্বধা পিতৃভ্যো ভূর্ভুবঃসুবরগ্ন ওম্ .. ১..

পঞ্চমোঽনুবাকঃ .
ভূরগ্নযে চ পৃথিব্যৈ চ মহুতে চ স্বাহা  ভুবো বাযবে
চান্তরিক্ষায চ মহতে চ স্বাহা  সুবরাদিত্যায চ দিবে চ
মহতে চ স্বাহা  ভূর্ভুবস্সুবশ্চন্দ্রমসে চ
নক্ষত্রেভ্যশ্চ
দিগ্ভ্যশ্চ মহতে চ স্বাহা  নমো দেবেভ্যঃ স্বধা পিতৃভ্যো
ভুর্ভুবঃ সুবর্মহরোম্ .. ১..

ষষ্ঠোঽনুবাকঃ .
পাহি নো অগ্ন এনসে স্বাহা  পাহি নো বিশ্ববেদসে স্বাহা
যজ্ঞং পাহি বিভাবসো স্বাহা  সর্বং পাহি শতক্রতো স্বাহা ..
১..

সপ্তমোঽনুবাকঃ .
পাহি নো অগ্ন একযা পাহ্যুত দ্বিতীযযা  পাহ্যূর্জ তৃতীযযা
পাহি গীর্ভিশ্চতসৃভির্বসো স্বাহা .. ১..

অষ্টমোঽনুবাকঃ .
যশ্ছন্দসামৃষভো
বিশ্বরূপশ্ছন্দোভ্যশ্চন্দাঁস্যাবিবেশ . সতাঁশিক্যঃ
প্রোবাচোপনিষদিন্দ্রো জ্যেষ্ঠ ইন্দ্রিযায ঋষিভ্যো নমো
দেবেভ্যঃ স্বধা
পিতৃভ্যো ভূর্ভুবস্সুবশ্ছন্দ ওম্ .. ১..

নবমোঽনুবাকঃ .
নমো ব্রহ্মণে ধারণং মে অস্ত্বনিরাকরণং ধারযিতা ভূযাসং
কর্ণযোঃ শ্রুতং মা চ্যোঢং মমামুষ্য ওম্ .. ১..

দশমোঽনুবাকঃ .
ঋতং তপঃ সত্যং তপঃ শ্রুতং তপঃ শান্তং তপো দমস্তপঃ
শমস্তপো দানং তপো যজ্ঞং তপো ভূর্ভুবঃ
সুবর্ব্রহ্মৈতদুপাস্বৈতত্তপঃ .. ১..

একাদশোঽনুবাকঃ .
যথা বৃক্ষস্য সংপুষ্পিতস্য দূরাদ্গন্ধো বাত্যেবং পুণ্যস্য
কর্মণো দূরাদ্গন্ধো বাতি যথাসিধারাং কর্তেঽবহিতমবক্রামে
যদ্যুবে যুবে হবা বিহ্বযিষ্যামি কর্তং
পতিষ্যামীত্যেবমমৃতাদাত্মানং
জুগুপ্সেত্ .. ১..

দ্বাদশোঽনুবাকঃ .
অণোরণীযান্ মহতো মহীযানাত্মা গুহাযাং নিহিতোঽস্য জন্তোঃ .
তমক্রতুং পশ্যতি বীতশোকো ধাতুঃ প্রসাদান্মহিমানমীশম্
.. ১..
সপ্ত প্রাণা প্রভবন্তি তস্মাত্ সপ্তার্চিষঃ সমিধঃ সপ্ত
জিহ্বাঃ .
সপ্ত ইমে লোকা যেষু চরন্তি প্রাণা গুহাশযান্নিহিতাঃ সপ্ত
সপ্ত .. ২..
অতঃ সমুদ্রা গিরযশ্চ সর্বেঽস্মাত্স্যন্দন্তে সিন্ধবঃ
সর্বরূপাঃ .
অতশ্চ বিশ্বা ওষধযো রসাশ্চ যেনৈষ
ভূতস্তিষ্ঠত্যন্তরাত্মা .. ৩..
ব্রহ্মা দেবানাং পদবীঃ কবীনামৃষির্বিপ্রাণাং মহিষো
মৃগাণাম্ .
শ্যেনো গৃধ্রাণাঁস্বধিতির্বনানাঁসোমঃ পবিত্রমত্যেতি
রেভন্ .. ৪..
অজামেকাং লোহিতশুক্লকৃষ্ণাং বহ্বীং প্রজাং জনযন্তীঁ
সরূপাম্ .
অজো হ্যেকো জুষমাণোঽনুশেতে জহাত্যেনাং ভুক্তভোগামজোঽন্যঃ
.. ৫..
হংসঃ শুচিষদ্বসুরন্তরিক্ষসদ্ধোতা
বেদিষদতিথির্দুরোণসত্ .
নৃষদ্বরসদৃতসদ্ব্যোমসদব্জা গোজা ঋতজা অদ্রিজা ঋতং
বৃহত্ .. ৬..
যস্মাজ্জাতা ন পরা নৈব কিংচনাস য আবিবেশ ভুবনানি
বিশ্বা .
প্রজাপতিঃ প্রজযা সংবিদানস্ত্রীণি জ্যোতীঁষি সচতে স
ষোডশী .. ৬ ক..
বিধর্তারঁ হবামহে বসোঃ  কুবিদ্বনাতি নঃ . সবিতারং
নৃচক্ষসম্ .. ৬ খ..
ঘৃতং মিমিক্ষিরে ঘৃতমস্য যোনির্ঘৃতে শ্রিতো ঘৃতমুবস্য
ধাম .
অনুষ্বধমাবহ মাদযস্ব স্বাহাকৃতং বৃষভ বক্ষি
হব্যম্ .. ৭..
সমুদ্রাদূর্মির্মধুমাঁ উদারদুপাঁশুনা
সমমৃতত্বমানট্ .
ঘৃতস্য নাম গুহ্যং যদস্তি জিহ্বা দেবানামমৃতস্য নাভিঃ
.. ৮..
বযং নাম প্রব্রবামা ঘৃতেনাস্মিন্ যজ্ঞে ধারযামা
নমোভিঃ .
উপ ব্রহ্মা শৃণবচ্ছস্যমান চতুঃশৃঙ্গোঽবমীদ্গৌর
এতত্ .. ৯..
চত্বারি শৃঙ্গা ত্রযো অস্য পাদা দ্বেশীর্ষে সপ্ত হস্তাসো
অস্য .
ত্রিধা বদ্ধো বৃষভো রোরবীতি মহো দেবো মর্ত্যাঁ
আবিবেশ .. ১০..
ত্রিধা হিতং পণিভির্গুহ্যমানং গবি দেবাসো ঘৃতমন্ববিন্দন্ .
ইন্দ্র একঁ সূর্য একং জজান বেনাদেকঁ স্বধযা
নিষ্টতক্ষুঃ .. ১১..
যো দেবানাং প্রথমং পুরস্তাদ্বিশ্বাধিকো রুদ্রো মহর্ষিঃ .
হিরণ্যগর্ভং পশ্যত জাযমানঁ স নো দেবঃ
শুভযাস্মৃত্যা সংযুনক্তু .. ১২..
যস্মাত্পরং নাপরমস্তি কিঞ্চিত্ যস্মান্নাণীযো ন জ্যাযোঽস্তি
কশ্চিত্ .
বৃক্ষ ইব স্তব্ধো দিবি তিষ্ঠত্যেকস্তেনেদং পূর্ণং পুরুষেণ
সর্বম্ .. ১৩..
ন কর্মণা ন প্রজযা ধনেন ত্যাগেনৈকে অমৃতত্বমানশুঃ .
পরেণ নাকং নিহিতং গুহাযাং বিভ্রাজতে যদ্যতযো বিশন্তি ..
১৪..
বেদান্তবিজ্ঞানবিনিশ্চিতার্থাঃ সংন্যাসযোগাদ্যতযঃ
শুদ্ধসত্ত্বাঃ .
তে ব্রহ্মলোকে তু পরান্তকালে পরামৃতাঃ পরিমুচ্যন্তি সর্বে ..
১৫..
দহ্রং বিপাপং বরবেশ্মভূত যত্ পুণ্ডরীকং
পুরমধ্যসঁস্থম্ .
তত্রাপি দহ্রে গগনং বিশোকং তস্মিন্ যদন্তস্তদুপাসিতব্যম্
.. ১৬..
যো বেদাদৌ স্বরঃ প্রোক্তো বেদান্তে চ প্রতিষ্ঠিতঃ .
তস্য প্রকৃতিলীনস্য যঃ পরঃ স মহেশ্বরঃ .. ১৭..

ত্রযোদশোঽনুবাকঃ .
সহস্রশীর্ষং দেবং বিশ্বাক্ষং বিশ্বশম্ভুবম্ .
বিশ্বং নারাযণং দেবমক্ষরং পরমং প্রভুম্ .. ১..
বিশ্বতঃ পরমং নিত্যং বিশ্বং নারাযণঁ হরিম্ .
বিশ্বমেবেদং পুরুষস্তদ্বিশ্বমুপজীবতি .. ২..
পতিং বিশ্বস্যাত্মেশ্বরঁ শাশ্বতঁ শিবমচ্যুতম্ .
নারাযণং মহাজ্ঞেযং বিশ্বাত্মানং পরাযণম্ .. ৩..
নারাযণঃ পরং ব্রহ্ম তত্ত্বং নারাযণঃ পরঃ .
নারাযণঃ পরো জ্যোতিরাত্মা নারযণঃ পরঃ .. ৪..
নারাযণঃ পরো ধ্যাতা ধ্যানং নারাযণঃ পরঃ .
যচ্চ কিঞ্চিজ্জগত্যস্মিন্ দৃশ্যতে শ্রূযতেঽপি বা .
অন্তর্বহিশ্চ তত্সর্বং ব্যাপ্য নারাযণঃ স্থিতঃ .. ৫..
অনন্তমব্যযং কবিঁ সমুদ্রেঽন্তং বিশ্বশম্ভুবম্ .
পদ্মকোশপ্রতীকাশঁ হৃদযং চাপ্যধোমুখম্ .. ৬..
অধো নিষ্ট্যা বিতস্ত্যান্তে নাভ্যামুপরি তিষ্ঠতি .
হৃদযং তদ্বিজানীযাদ্বিশ্বস্যাযতনং মহত্ .. ৭..
সন্ততঁ সিরাভিস্তু লম্বত্যাকোশসন্নিভম্ .
তস্যান্তে সুষিরঁ সূক্ষ্মং তস্মিন্ত্সর্বং প্রতিষ্ঠিতম্ ..
৮..
তস্য মধ্যে মহানগ্নির্বিশ্বার্চির্বিশ্বতোমুখঃ .
সোঽগ্রভুগ্বিভজন্তিষ্ঠন্নাহারমজরঃ কবিঃ .. ৯..
তির্যগূর্ধ্বমধঃশাযী রশ্মযস্তস্য সন্ততাঃ .
সন্তাপযতি স্বং দেহমাপাদতলমস্তকম্ .
তস্য মধ্যে বহ্নিশিখা অণীযোর্ধ্বা ব্যবস্থিতা .. ১০..
নীলতোযদমধ্যস্থা বিদ্যুল্লেখেব ভাস্বরা .
নীবারশূক্বত্তন্বী পীতা ভাস্বত্যণূপম .. ১১..
তস্যাঃ শিখাযা মধ্যে পরমাত্মা ব্যবস্থিতঃ .
স ব্রহ্মা স শিবঃ স হরিঃ সেন্দ্রঃ সোঽক্ষরঃ পরমঃ স্বরাট্
.. ১২..

চতুর্দশোঽনুবাকঃ .
চতুর্দশোঽনুবাকঃ .
আদিত্যো বা এষ এতন্মণ্ডলং তপতি তত্র তা ঋচস্তদৃচা
মণ্ডলঁ
স ঋচাং লোকোঽথ য এষ এতস্মিন্মণ্ডলেঽর্চির্দীপ্যতে তানি
সামানি স
সাম্নাং লোকোঽথ য এষ এতস্মিন্মণ্ডলেঽর্চিষি পুরুষস্তানি
যজূঁষি স যজুষা মণ্ডলঁ স যজুষাং লোকঃ
সৈষা ত্রয্যেব
বিদ্যা তপতি য এষোঽন্তরাদিত্যে হিরণ্মযঃ পুরুষঃ .. ১..

পঞ্চদশোঽনুবাকঃ .
আদিত্যো বৈ তেজ ওজো বলং যশশ্চক্ষুঃ শ্রোত্রমাত্মা মনো
মন্যুর্মনুর্মৃত্যুঃ
সত্যো মিত্রো বাযুরাকাশঃ প্রাণো লোকপালঃ কঃ কিং কং
তত্সত্যমন্নমমৃতো
জীবো বিশ্বঃ কতমঃ স্বযম্ভু ব্রহ্মৈতদমৃত এষ পুরুষ এষ
ভূতানামধিপতির্ব্রহ্মণঃ সাযুজ্যঁ
সলোকতামাপ্নোত্যেতাসামেব
দেবতানাঁ সাযুজ্যঁ সার্ষ্টিতাঁ
সমানলোকতামাপ্নোতি য এবং
বেদেত্যুপনিষত্ .. ১..
ঘৃণিঃ সূর্য আদিত্যোমর্চযন্তি তপঃ সত্যং মধু ক্ষরন্তি
তদ্ব্রহ্ম তদাপ
আপো জ্যোতী রসোঽমৃতং ব্রহ্ম ভূর্ভুবঃ সুবরোম্ .. ২..

ষোডশোঽনুবাকঃ .
নিধনপতযে নমঃ . নিধনপতান্তিকায নমঃ .
ঊর্ধ্বায নমঃ . ঊর্ধ্বলিঙ্গায নমঃ .
হিরণ্যায নমঃ . হিরণ্যলিঙ্গায নমঃ .
সুবর্ণায নমঃ . সুবর্ণলিঙ্গায নমঃ .
দিব্যায নমঃ . দিব্যলিঙ্গায নমঃ .
ভবায নমঃ. ভবলিঙ্গায নমঃ .
শর্বায নমঃ . শর্বলিঙ্গায নমঃ .
শিবায নমঃ . শিবলিঙ্গায নমঃ .
জ্বলায নমঃ . জ্বললিঙ্গায নমঃ .
আত্মায নমঃ . আত্মলিঙ্গায নমঃ .
পরমায নমঃ . পরমলিঙ্গায নমঃ .
এতত্সোমস্য সূর্যস্য সর্বলিঙ্গঁ স্থাপযতি পাণিমন্ত্রং
পবিত্রম্ .. ১..

সপ্তদশোঽনুবাকঃ .
সদ্যোজাতং প্রপদ্যামি সদ্যোজাতায বৈ নমো নমঃ .
ভবে ভবে নাতিভবে ভবস্ব মাম্ . ভবোদ্ভবায নমঃ .. ১..

অষ্টদশোঽনুবাকঃ .
বামদেবায নমো জ্যেষ্ঠায নমঃ  শ্রেষ্ঠায নমো রুদ্রায
নমঃ কালায নমঃ কলবিকরণায নমো বলবিকরণায নমো
বলায নমো বলপ্রমথায নমঃ সর্বভূতদমনায নমো
মনোন্মনায নমঃ .. ১..

একোনবিংশোঽনুবাকঃ .
অঘোরেভ্যোঽথ ঘোরেভ্যো ঘোরঘোরতরেভ্যঃ . সর্বতঃ শর্ব
সর্বেভ্যো নমস্তে অস্তু রুদ্ররূপেভ্যঃ .. ১..

বিংশোঽনুবাকঃ .
তত্পুরুষায বিদ্মহে মহাদেবায ধীমহি . তন্নো রুদ্রঃ
প্রচোদযাত্ .. ১..

একবিংশোঽনুবাকঃ .
ঈশানঃ সর্ববিদ্যানামীশ্বরঃ সর্বভূতানাং
ব্রহ্মাধিপতির্ব্রহ্মণোঽধিপতির্ব্রহ্মা শিবো মে অস্তু সদাশিবোম্
.. ১..

দ্বাবিংশোঽনুবাকঃ .
নমো হিরণ্যবাহবে হিরণ্যবর্ণায হিরণ্যরূপায হিরণ্যপতযে.
অম্বিকাপতয উমাপতযে পশুপতযে নমো নমঃ .. ১..

ত্রযোবিংশোঽনুবাকঃ .
ঋতঁ সত্যং পরং ব্রহ্ম পুরুষং কৃষ্ণপিঙ্গলম্ .
ঊর্ধ্বরেতং বিরূপাক্ষং বিশ্বরূপায বৈ নমো নমঃ .. ১..

চতুর্বিংশোঽনুবাকঃ .
সর্বো বৈ রুদ্রস্তস্মৈ রুদ্রায নমো অস্তু . পুরুষো বৈ রুদ্রঃ
সন্মহো নমো নমঃ .
বিশ্বং ভূতং ভুবনং চিত্রং বহুধা জাতং জাযমানং চ
যত্ .
সর্বো হ্যেষ রুদ্রস্তস্মৈ রুদ্রায নমো অস্তু .. ১..

পঞ্চবিংশোঽনুবাকঃ .
কদ্রুদ্রায প্রচেতসে মীঢুষ্টমায তব্যসে . বোচেম
শংতমঁ হৃদে .
সর্বোহ্যেষ রুদ্রস্তস্মৈ রুদ্রায নমো অস্তু .. ১..

ষড্বিংশোঽনুবাকঃ .
যস্য বৈকঙ্কত্যগ্নিহোত্রহবণী ভবতি
প্রত্যেবাস্যাহুতযস্তিষ্ঠত্যথো
প্রতিষ্ঠিত্যৈ .. ১..

সপ্তবিংশোঽনুবাকঃ .
কৃণুষ্ব পাজ ইতি পঞ্চ .
কৃণুষ্ব পাজঃ প্রসিতিং ন পৃথ্বীং যাহি রাজেবামবা৅ং
ইভেন .
তৃষ্বীমনু প্রসিতিং দ্রূণানোঽস্তাসি বিধ্য
রক্ষসস্তপিষ্ঠৈঃ .. ১..
তব ভ্রমাস আশুযা পতন্ত্যনু স্পৃশ ধৃশতা
শোশুচানঃ .
তপূংষ্যগ্নে জুহ্বা পতঙ্গানসন্দিতো বি সৃজ বিশ্বগুল্কাঃ ..
২..
প্রতি স্পশো বিসৃজ তূর্ণিতমো ভবা পাযুর্বিশী অস্যা অদব্ধঃ .
যো নো দূরে অঘশং সো যো অন্ত্যগ্নে মাকিষ্টে
ব্যথিরাদধর্ষীত .. ৩..
উদগ্নে তিষ্ঠ প্রত্যা তনুষ্ব ন্যমিত্রাং৅ ওষতাত্তিগ্মহেতে .
যো নো অরাতিং সমিধান চক্রে নীচাতং ধক্ষ্যতসং ন
শুষ্কম্ .. ৪..
ঊর্ধ্বো ভব প্রতিং বিধ্যাধ্যস্মদাবিষ্কৃণুষ্ব
দৈব্যান্যগ্নে .
অবস্থিরা তনুহি যাতুজূনাং জামিমজামিং প্রমৃণীহি
শত্রূন্ .. ৫..

অষ্টাবিংশোঽনুবাকঃ .
অদিতির্দেবা গন্ধর্বা মনুষ্যাঃ পিতরোঽসুরাস্তেষাঁ
সর্বভূতানাং মাতা মেদিনী মহতী মহী সাবিত্রী গাযত্রী
জগত্যুর্বী পৃথ্বী বহুলা বিশ্বা ভূতা কতমা কাযা সা
সত্যেত্যমৃতেতি বাসিষ্ঠঃ .. ১..

একোনত্রিংশোঽনুবাকঃ .
আপো বা ইদঁ সর্বং বিশ্বা ভূতান্যাপঃ প্রাণা বা আপঃ
পশব আপোঽন্নমাপোঽমৃতমাপঃ সম্রাডাপো বিরাডাপঃ
স্বরাডাপশ্ছন্দাঁস্যাপো জ্যোতীঁষ্যাপো
যজূঁষ্যাপঃ
সত্যমাপঃ সর্বা দেবতা আপো ভূর্ভুবঃ সুবরাপ ওম্ .. ১..

ত্রিংশোঽনুবাকঃ .
আপঃ পুনন্তু পৃথিবীং পৃথিবী পূতা পুনাতু মাম্ .
পুনন্তু ব্রহ্মণস্পতির্ব্রহ্মপূতা পুনাতু মাম্ .. ১..
যদুচ্ছিষ্টমভোজ্যং যদ্বা দুশ্চরিতং মম .
সর্বং পুনন্তু মামাপোঽসতাং চ প্রতিগ্রহঁ স্বাহা .. ২..

একত্রিংশোঽনুবাকঃ .
অগ্নিশ্চ মা মন্যুশ্চ মন্যুপতযশ্চ মন্যুকৃতেভ্যঃ .
পাপেভ্যো রক্ষন্তাম্ . যদহ্না পাপমকার্ষম্ .
মনসা বাচা হস্তাভ্যাম্ . পদ্ভ্যামুদরেণ শিশ্না .
অহস্তদবলিম্পতু . যত্কিঞ্চ দুরিতং মযি . ইদমহং
মামমৃতযোনী .
সত্যে জ্যোতিষি জুহোমি স্বাহা .. ১..

দ্বাত্রিংশোঽনুবাকঃ .
সূর্যশ্চ মা মন্যুশ্চ মন্যুপতযশ্চ মন্যুকৃতেভ্যঃ .
পাপেভ্যো রক্ষন্তাম্ . যদ্রাত্রিযা পাপমকার্ষম্ .
মনসা বাচা হস্তাভ্যাম্ . পদ্ভ্যামুদরেণ শিশ্না .
রাত্রিস্তদবলুম্পতু .
যত্কিঞ্চ দুরিতং মযি . ইঅদমহং মামমৃতযোনী . সূর্যে
জ্যোতিষি স্বাহা .. ১..

ত্রযস্ত্রিংশোঽনুবাকঃ .
ওমিত্যেকাক্ষরং ব্রহ্ম . অগ্নির্দেবতা ব্রহ্ম ইত্যার্ষম্ .
গাযত্রং
ছন্দং পরমাত্মং সরূপম্ . সাযুজ্যং বিনিযোগম্ .. ১..

চতুস্ত্রিংশোঽনুবাকঃ .
আযাতু বরদা দেবী অক্ষরং ব্রহ্ম সংমিতম্ .
গাযত্রী ছন্দসাং মাতেদং ব্রহ্ম জুষস্ব নঃ .. ১..
যদহ্নাত্কুরুতে পাপং তদহ্নাত্প্রতিমুচ্যতে .
যদ্রাত্রিযাত্কুরুতে পাপং তদ্রাত্রিযাত্প্রতিমুচ্যতে .
সর্ববর্ণে মহাদেবি সন্ধ্যাবিদ্যে সরস্বতি .. ২..

পঞ্চত্রিংশোঽনুবাকঃ .
ওজোঽসি সহোঽসি বলমসি ভ্রাজোঽসি দেবানাং ধামনামাসি
বিশ্বমসি
বিশ্বাযুঅঃ সর্বমসি সর্বাযুরভিভূরোং গাযত্রীমাবাহযামি
সাবিত্রীমাবাহযামি সরস্বতীমাবাহযামি
ছন্দর্হীনাবাহযামি
শ্রিযমাবাহযামি গাযত্রিযা গাযত্রী ছন্দো বিশ্বামিত্র
ঋষিঃ
সবিতা দেবতাগ্নির্মুখং ব্রহ্মা শিরো বিষ্ণুহৃদযঁ রুদ্রঃ
শিখা
পৃথিবী যোনিঃ প্রাণাপানব্যানোদানস্মানা সপ্রাণা শ্বেতবর্ণা
সাংখ্যাযনসগোত্রা গাযত্রী চতুর্বিংশত্যক্ষরা ত্রিপদা
ষ্ট্কুক্ষিঃ
পঞ্চশীর্ষোপনযনে বিনিযোগঃ .. ১..
ॐ ভূঃ . ॐ ভুবঃ . ওঁসুবঃ . ॐ মহঃ . ॐ জনঃ . ॐ
তপঃ .
ওঁ সত্যম্ . ॐ তত্সবিতুর্বরেণ্যং ভর্গো দেবস্য ধীমহি .
ধিযো যো নঃ প্রচোদযাত্ . ওমাপো জ্যোতী রসোঽমৃতং ব্রহ্ম
ভূর্ভুবঃ সুবরোম্ .. ২..

ষট্ত্রিংশোঽনুবাকঃ .
উত্তমে শিখরে দেবি জাতে ভূম্যাং পর্বতমূর্ধনি .
ব্রাহ্মণেভ্যোঽভ্যনুজ্ঞাতা গচ্ছ দেবি যথাসুখম্ .. ১..
স্তুতো মযা বরদা বেদমাতা প্রচোদযন্তী পবনে দ্বিজাতা .
আযুঃ পৃথিব্যাং দ্রবিণং ব্রহ্মবর্চসং মহ্যং দত্বা
প্রজাতুং ব্রহ্মলোকম্ .. ২..

সপ্তত্রিংশোঽনুবাকঃ .
ঘৃণিঃ সূর্য আদিত্যো ন প্রভা বাত্যক্ষরম্ . মধু ক্ষরন্তি
তদ্রসম্ .
সত্যং বৈ তদ্রসমাপো জ্যোতী রসোঽমৃতং ব্রহ্ম ভূর্ভুবঃ
সুবরোম্ .. ১..

ত্রিসুপর্ণমন্ত্রঃ ১
অষ্টত্রিংশোঽনুবাকঃ .
ব্রহ্মমেতু মাম্ . মধুমেতু মাম্ . ব্রহ্মমেব মধুমেতু মাম্ .
যাস্তে সোম
প্রজা বত্সোঽভি সো অহম্ . দুঃষ্বপ্নহন্ দুরুষ্ষহ . যাস্তে
সোম
প্রাণাঁস্তাঞ্জুহোমি .. ১..
ত্রিসুপর্ণমযাচিতং ব্রাহ্মণায দদ্যাত্ . ব্রহ্মহত্যাং বা
এতে ঘ্নন্তি .
যে ব্রাহ্মণাস্ত্রিসুপর্ণং পঠন্তি . তে সোমং প্রাপ্নুবন্তি . আ
সহস্রাত্ পঙ্ক্তিং
পুনন্তি . ॐ .. ২..

ত্রিসুপর্ণমন্ত্রঃ ২
একোনচত্বারিংশোঽনুবাকঃ .
ব্রহ্ম মেধযা . মধু মেধযা . ব্রহ্মমেব মধুমেধযা .. ১..
অদ্যানো দেব সবিতঃ প্রজাবত্সাবীঃ সৌভগম্ . পরা
দুঃষ্বপ্নিযঁ সুব .. ২..
বিশ্বানি দেব সবিতর্দুরিতানি পরাসুব . যদ্ভদ্রং তন্মম
আসুব .. ৩..
মধুবাতা ঋতাযতে মধুক্ষরন্তি সিন্ধবঃ . মাধ্বীর্নঃ
সন্ত্বোষধীঃ .. ৪..
মধু নক্তমুতোষসি মধুমত্পার্থিবঁ রজঃ . মধুদ্যৌরস্তু
নঃ পিতা .. ৫..
মধুমান্নো বনস্পতির্মধুমাঁ অস্তু সূর্যঃ . মাধ্বীর্গাবো
ভবন্তু নঃ .. ৬..
য ইমং ত্রিসুপর্ণমযাচিতং ব্রাহ্মণায দদ্যাত্ .
ভ্রূণহত্যাং বা এতে ঘ্নন্তি  .
যে ব্রাহ্মণাস্ত্রিসুপর্ণং পঠন্তি . তে সোমং প্রাপ্নুবন্তি . আ
সহস্রাত্পঙ্ক্তিং পুনন্তি . ॐ .. ৭..

ত্রিসুপর্ণমন্ত্রঃ ৩
চত্বারিংশোঽনুবাকঃ .
ব্রহ্ম মেধবা . মধু মেধবা . ব্রহ্মমেব মধু মেধবা .. ১..
ব্রহ্মা দেবানাং পদবীঃ কবীনামৃষির্বিপ্রাণাং মহিষো
মৃগাণাম্ .
শ্যেনো গৃদ্ধাণাঁ স্বধিতির্বনানাঁ সোমঃ পবিত্রমত্যেতি
রেভত্ .. ২..
হঁসঃ শুচিষদ্বসুরন্তরিক্ষসদ্ধোতা
বেদিষদতিথির্দুরোণসত্ .
নৃষদ্বরসদৃতসদ্ব্যোমসদব্জা গোজা ঋতজা অদ্রিজা ঋতং
বৃহত্ .. ৩..
ঋচে ত্বা ঋচে ত্বা সমিত্স্রবন্তি সরিতো ন ধেনাঃ .
অন্তর্হৃদা মনসা পূযমানাঃ . ঘৃতস্য ধারা
অভিচাকশীমি .. ৪..
হিরণ্যযো বেতসো মধ্য আসাম্ . তস্মিন্ত্সুপর্ণো মধুকৃত্
কুলাযী ভজন্নাস্তে
মধু দেবতাভ্যঃ . তস্যাসতে হরযঃ সপ্ত তীরে স্বধাং
দুহানা অমৃতস্য
ধারাম্ .. ৫..
য ইদং ত্রিসুপর্ণমযাচিতং ব্রাহ্মণায দদ্যাত্ .
বীরহত্যাং বা এতে ঘ্নন্তি .
যে ব্রাহ্মণাস্ত্রিসুপর্ণং পঠন্তি . তে সোমং প্রাপ্নুবন্তি .
আসহস্রাত্
পঙ্ক্তিং পুনন্তি . ॐ .. ৬..

একচত্বারিংশোঽনুবাকঃ .
মেধাদেবী জুষমাণা ন আগাদ্বিশ্বাচী ভদ্রা
সুমনস্যমানা .
ত্বযা জুষ্টা জুষমাণা দুরুক্তান্বৃহদ্বদেম বিদথে
সুবীরাঃ .. ১..
ত্বযা জুষ্ট ঋষির্ভবতি দেবি ত্বযা ব্রহ্মাগতশ্রীরুত
ত্বযা .
ত্বযা জুষ্টশ্চিত্রং বিন্দতে বসু সা নো জুষস্ব দ্রবিণেন
মেধে .. ২..

দ্বিচত্বারিংশোঽনুবাকঃ .
মেধাং ম ইন্দ্রো দদাতু মেঅধাং দেবী সরস্বতী .
মেধাং মে অশ্বিনাবুভাবাধত্তাং পুষ্করস্রজৌ .. ১..
অপ্সরাসু চ যা মেধা গন্ধর্বেষু চ যন্মনঃ .
দৈবী মেধা সরস্বতী স মাং মেধা সুরভির্জুষতাঁ
স্বাহা .. ২..

ত্রিচত্বারিংশোঽনুবাকঃ .
আ মাং মেধা সুরভির্বিশ্বরূপা হিরণ্যবর্ণা জগতী জগম্যা .
ঊর্জস্বতী পযসা পিন্বমানা সা মাং মেধা সুপ্রতীকা
জুষতাম্ .. ১..

চতুশ্চত্বারিংশোঽনুবাকঃ .
মযি মেধাং মযি প্রজাং ময্যগ্নিস্তেজো দধাতু .
মযি মেধাং মযি প্রজাং মযীন্দ্র ইন্দ্রিযং দধাতু .
মযি মেধাং মযি প্রজাং মযি সূর্যো ভ্রাজো দধাতু .. ১..

পঞ্চচত্বারিংশোঽনুবাকঃ .
অপৈতু মৃত্যুরমৃতং ন আগন্বৈবস্বতো নো অভযং কৃণোতু .
পর্ণং বনস্পতেরিবাভি নঃ শীযতাঁরযিঃ সচতাং নঃ
শচীপতিঃ .. ১..

ষট্চত্বারিংশোঽনুবাকঃ .
পরং মৃত্যো অনুপরেহি পন্থাং যস্তে স্ব ইতরো দেবযানাত্ .
চক্ষুষ্মতে শৃণ্বতে তে ব্রবীমি মা নঃ প্রজাঁ রীরিষো
মোত বীরান্ .. ১..

সপ্তচত্বারিংশোঽনুবাকঃ .
বাতং প্রাণং মনসান্বারভামহে প্রজাপতিং যো ভুবনস্য
গোপাঃ .
স নো মৃত্যোস্ত্রাযতাং পাত্বঁহসো জ্যোগ্জীবা জরাম শীমহি
.. ১..

অষ্টচত্বারিংশোঽনুবাকঃ .
অমুত্রভূযাদধ যদ্যমস্য বৃহস্পতে অভিশস্তেরমুঞ্চঃ .
প্রত্যৌহতামশ্বিনা মৃত্যুমস্মদ্দেবানামগ্নে ভিষজা
শচীভিঃ .. ১..

একোনপঞ্চাশোঽনুবাকঃ .
হরিঁ হরন্তমনুযন্তি দেবা বিশ্বস্যেশানং বৃষভং
মতীনাম্ .
ব্রহ্মসরূপমনু মেদমাগাদযনং মা বিবধীর্বিক্রমস্ব .. ১..

পঞ্চাশোঽনুবাকঃ .
শল্কৈরগ্নিমিন্ধান উভৌ লোকৌ সনেমহম্ .
উভযোর্লোকযোরৃধ্বাতি মৃত্যুং তরাম্যহম্ .. ১..

একপঞ্চাশোঽনুবাকঃ .
মা ছিদো মৃত্যো মা বধীর্মা মে বলং বিবৃহো মা প্রমোষীঃ .
প্রজাং মা মে রীরিষ আযুরুগ্র নৃচক্ষসং ত্বা হবিষা
বিধেম .. ১..

দ্বিপঞ্চাশোঽনুবাকঃ .
মা নো মহান্তমুত মা নো অর্ভকং  মা ন উক্ষন্তমুত মা ন
উক্ষিতম্ .
মা নো বধীঃ পিতরং মোত মাতরং  প্রিযা মা নস্তনুবো রুদ্র
রীরিষঃ .. ১..

ত্রিপঞ্চাশোঽনুবাকঃ .
মা নস্তোকে তনযে মা ন আযুষি  মা নো গোষু মা নো অশ্বেষু
রীরিষঃ .
বীরান্মা নো রুদ্র ভামিতো বধীর্হবিষ্মন্তো নমসা বিধেম তে
.. ১..

চতুষ্পঞ্চাশোঽনুবাকঃ .
প্রজাপতে ন ত্বদেতান্যন্যো বিশ্বা জাতানি পরি তা বভূব .
যত্কামস্তে জুহুমস্তন্নো অস্তু বযঁ স্যাম পতযো রযীণাম্ ..
১..

পঞ্চপঞ্চাশোঽনুবাকঃ .
স্বস্তিদা বিশস্পতির্বৃত্রহা বিমৃধো বশী .
বৃষেন্দ্রঃ পুর এতু নঃ স্বস্তিদা অভযঙ্করঃ .. ১..

ষট্পঞ্চাশোঽনুবাকঃ .
ত্র্যম্বকং যজামহে সুগন্ধিং পুষ্টিবর্ধনম্ .
উর্বারুকমিব বন্ধনান্মৃত্যোর্মুক্ষীয মামৃতাত্ .. ১..

সপ্তপঞ্চাশোঽনুবাকঃ .
যে তে সহস্রমযু পাশা মৃত্যো মর্ত্যায হন্তবে .
তান্ যজ্ঞস্য মাযযা সর্বানবযজামহে .. ১..

অষ্টপঞ্চাশোঽনুবাকঃ .
মৃত্যবে স্বাহা মৃত্যবে স্বাহা .. ১..

একোনষষ্টিতমোঽনুবাকঃ .
দেবকৃতস্যৈনসোঽবযজনমসি স্বাহা .
মনুষ্যকৃতস্যৈনসোঽবযজনমসি স্বাহা .
পিতৃকৃতস্যৈসোঽবযজনমসি স্বাহা .
আত্মকৃতস্যৈনসো.বযাজনমসি স্বাহা .
অন্যকৃতস্যৈনসোঽবযজনমসি স্বাহা .
অস্মত্কৃতস্যৈনসোঽবযজনমসি স্বাহা .
যদ্দিবা চ নক্তং চৈনশ্চকৃম তস্যাবযজনমসি স্বাহা .
যত্স্বপন্তশ্চ জাগ্রতশ্চৈনশ্চকৃম তস্যাবযজনমসি
স্বাহা .
যত্সুষুপ্তশ্চ জাগ্রতশ্চৈনশ্চকৃম তস্যাবযজনমসি
স্বাহা .
যদ্বিদ্বাঁসশ্চাবিদ্বাঁসশ্চৈনশ্চকৃম
তস্যাবযজনমসি স্বাহা .
এনস এনসোঽবযজনমসি স্বাহা .. ১..

ষষ্টিতমোঽনুবাকঃ .
যদ্বো দেবাশ্চকৃম জিহ্বযাং গুরু মনসো বা প্রযুতী
দেবহেডনম্ .
অরাবা যো নো অভি দুচ্ছুনাযতে  তস্মিন্ তদেনো বসবো নিধেতন
স্বাহা .. ১..

একষষ্টিতমোঽনুবাকঃ .
কামোঽকার্ষীন্নমো নমঃ . কামোঽকার্শীত্কামঃ করোতি নাহং
করোমি কামঃ কর্তা
নাহং কর্তা কামঃ কারযিতা নাহং কারযিতা এষ তে কাম
কামায স্বাহা .. ১..

দ্বিষষ্টিতমোঽনুবাকঃ .
মন্যুরকার্ষীন্নমো নমঃ . মন্যুরকার্ষীন্মন্যুঃ করোতি নাহং
করোমি মন্যুঃ কর্তা নাহং কর্তা
মন্যুঃ কারযিতা নাহং কারযিতা এষ তে মন্যো মন্যবে স্বাহা
.. ১..

ত্রিষষ্টিতমোঽনুবাকঃ .
তিলাঞ্জুহোমি সরসান্ সপিষ্টান্ গন্ধার মম চিত্তে রমন্তু
স্বাহা .. ১..
গাবো হিরণ্যং ধনমন্নপানঁ সর্বেষাঁ শ্রিযৈ স্বাহা
.. ২..
শ্রিযং চ লক্ষ্মীং চ পুষ্টিং চ কীর্তিং চানৃণ্যতাম্
. ব্রাহ্মণ্যং বহুপুত্রতাম্ . শ্রদ্ধামেধে প্রজাঃ সংদদাতু
স্বাহা .. ৩..

চতুঃষষ্টিতমোঽনুবাকঃ .
তিলাঃ কৃষ্ণাস্তিলাঃ শ্বেতাস্তিলাঃ সৌম্যা বশানুগাঃ .
তিলাঃ পুনন্তু মে পাপং যত্কিঞ্চিদ্ দুরিতং মযি স্বাহা .. ১..
চোরস্যান্নং নবশ্রাদ্ধং ব্রহ্মহা গুরুতল্পগঃ .
গোস্তেযঁ সুরাপানং ভ্রূণহত্যা তিলা শান্তিঁ শমযন্তু
স্বাহা .. ২..
শ্রীশ্চ লক্ষ্মীশ্চ পুষ্টীশ্চ কীর্তিং চানৃণ্যতাম্ .
ব্রহ্মণ্যং বহুপুত্রতাম্ . শ্রদ্ধামেধে প্রজ্ঞা তু জাতবেদঃ
সংদদাতু স্বাহা .. ৩..

পঞ্চষষ্টিতমোঽনুবাকঃ .
প্রাণাপানব্যানোদানসমানা মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ১..
বাঙ্মনশ্চক্ষুঃশ্রোত্রজিহ্বাঘ্রাণরেতোবুদ্ধ্যাকূতিঃসঙ্কল্পা
মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ২..
ত্বক্চর্মমাংসরুধিরমেদোমজ্জাস্নাযবোঽস্থীনি মে শুধ্যন্তাং
জ্যোতিরহং বিরজা বিপাপ্মা ভুযাসঁ স্বাহা .. ৩..
শিরঃপাণিপাদপার্শ্বপৃষ্ঠোরূধরজঙ্ঘাশিশ্নোপস্থপাযব্
ও মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ৪..
উত্তিষ্ঠ পুরুষ হরিত পিঙ্গল লোহিতাক্ষি দেহি দেহি
দদাপযিতা মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ৫..

ষট্ষষ্টিতমোঽনুবাকঃ .
পৃথিব্যপ্তেজোবাযুরাকাশা মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ১..
শব্দস্পর্শরূপরসগন্ধা মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ২..
মনোবাক্কাযকর্মাণি মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ৩..
অব্যক্তভাবৈরহঙ্কারৈর্-
জ্যোতিরহং বিরজা বিপাপ্মা ভূযাসঁ স্বাহা .. ৪..
আত্মা মে শুধ্যন্তাং
জ্যোতিরহং বিরজা বিপাপ্মা ভুযাসঁ স্বাহা .. ৫..
অন্তরাত্মা মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ৬..
পরমাত্মা মে শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ৭..
ক্ষুধে স্বাহা . ক্ষুত্পিপাসায স্বাহা . বিবিট্যৈ স্বাহা .
ঋগ্বিধানায স্বাহা . কষোত্কায স্বাহা . ॐ স্বাহা .. ৮..
ক্ষুত্পিপাসামলং জ্যেষ্ঠামললক্ষ্মীর্নাশযাম্যহম্ .
অভূতিমসমৃদ্ধিং চ সর্বান্নির্ণুদ মে পাপ্মানঁ স্বাহা
.. ৯..
অন্নমযপ্রাণমযমনোমযবিজ্ঞানমযমানন্দমযমাত্মা মে
শুধ্যন্তাং
জ্যোতিরহং বিরজা বিপাপ্মা ভূযাসঁ স্বাহা .. ১০..

সপ্তষষ্টিতমোঽনুবাকঃ .
অগ্নযে স্বাহা . বিশ্বেভ্যো দেবেভ্যঃ স্বাহা . ধ্রুবায ভূমায
স্বাহা . ধ্রুবক্ষিতযে স্বাহা .
অচ্যুতক্ষিতযে স্বাহা . অগ্নযে স্বিষ্টকৃতে স্বাহা ..
ধর্মায স্বাহা . অধর্মায স্বাহা . অদ্ভ্যঃ স্বাহা .
ওষধিবনস্পতিভ্যঃ স্বাহা . রক্ষোদেবজনেভ্যঃ স্বাহা .
গৃহ্যাভ্যঃ স্বাহা . অবসানেভ্যঃ স্বাহা . অবসানপতিভ্যঃ
স্বাহা . সর্বভূতেভ্যঃ স্বাহা . কামায স্বাহা . অন্তরিক্ষায
স্বাহা . যদেজতি জগতি যচ্চ চেষ্টতি নাম্নো ভাগোঽযং
নাম্নে স্বাহা . পৃথিব্যৈ স্বাহা . অন্তরিক্ষায স্বাহা . দিবে
স্বাহা . সূর্যায স্বাহা . চন্দ্রমসে স্বাহা . নক্ষত্রেভ্যঃ
স্বাহা . ইন্দ্রায স্বাহা . বৃহস্পতযে স্বাহা . প্রজাপতযে
স্বাহা . ব্রহ্মণে স্বাহা . স্বধা পিতৃভ্যঃ স্বাহা . নমো
রুদ্রায পশুপতযে স্বাহা . দেবেভ্যঃ স্বাহা . পিতৃভ্যঃ
স্বধাস্তু . ভূতেভ্যো নমঃ . মনুষ্যেভ্যো হন্তা . প্রজাপতযে
স্বাহা . পরমেষ্ঠিনে স্বাহা .. ১..
যথা কূপঃ শতধারঃ সহস্রধারো অক্ষিতঃ .
এবা মে অস্তু ধান্যঁ সহস্রধারমক্ষিতম্ .. ধনধান্যৈ
স্বাহা .. ২..
যে ভূতাঃ প্রচরন্তি দিবানক্তং বলিমিচ্ছন্তো বিতুদস্য
প্রেষ্যাঃ .
তেভ্যো বলিং পুষ্টিকামো হরামি মযি পুষ্টিং পুষ্টিপতির্দধাতু
স্বাহা .. ৩..

অষ্টষষ্টিতমোঽনুবাকঃ .
ॐ তদ্ব্রহ্ম . ॐ তদ্বাযুঅঃ . ॐ তদাত্মা . ॐ তত্সত্যম্ .
ॐ তত্সর্বম্ . ॐ তত্পুরোর্নমঃ .. ১..
ॐ অন্তশ্বরতি ভূতেষু গুহাযাং বিশ্বমূর্তিষু . ত্বং
যজ্ঞস্ত্বং বষট্কারস্ত্বমিন্দ্রস্ত্বঁ রুদ্রস্ত্বং বিষ্ণুস্ত্বং
ব্রহ্ম ত্বং প্রজাপতিঃ . ত্বং তদাপ আপো জ্যোতী রসোঽমৃতং
ব্রহ্ম ভূর্ভুবঃ সুবরোম্ .. ২..

একোনসপ্ততিতমোঽনুবাকঃ .
শ্রদ্ধাযাং প্রাণে নিবিষ্টোঽমৃতং জুহোমি .
শ্রদ্ধাযামপানে নিবিষ্টোঽমৃতং জুহোমি .
শ্রদ্ধাযাং ব্যানে নিবিষ্টোঽমৃতং জুহোমি .
শ্রদ্ধাযামুদানে নিবিষ্টোঽমৃতং জুহোমি .
শ্রদ্ধাযাঁ সমানে নিবিষ্টোঽমৃতং জুহোমি .
ব্রহ্মণি ম আত্মামৃতত্বায .. ১..
অমৃতোপস্তরণমসি .. ২..
শ্রদ্ধাযাং প্রাণে নিবিষ্টোঽমৃতং জুহোমি . শিবো মা
বিশাপ্রদাহায . প্রাণায স্বাহা ..
শ্রদ্ধাযামপানে নিবিষ্টোঽমৃতং জুহোমি . শিবো মা
বিশাপ্রদাহায . অপানায স্বাহা ..
শ্রদ্ধাযাং ব্যানে নিবিষ্টোঽমৃতং জুহোমি . শিবো মা
বিশাপ্রদাহায . ব্যানায স্বাহা ..
শ্রদ্ধাযামুদানে নিবিষ্টোঽমৃতং জুহোমি . শিবো মা
বিশাপ্রদাহায . উদানায স্বাহা ..
শ্রদ্ধাযাঁ সমানে নিবিষ্টোঽমৃতং জুহোমি . শিবো মা
বিশাপ্রদাহায . সমানায স্বাহা ..
ব্রহ্মণি ম আত্মামৃতত্বায .. ৩..
অমৃতাপিধানমসি .. ৪..

একসপ্ততিতমোঽনুবাকঃ .
অঙ্গুষ্ঠমাত্রঃ পুরুষোঽঙ্গুষ্ঠং চ সমাশ্রিতঃ .
ঈশঃ সর্বস্য জগতঃ প্রভুঃ প্রীণাতু বিশ্বভুক্ .. ১..

দ্বিসপ্ততিতমোঽনুবাকঃ .
বাঙ্ ম আসন্ . নসোঃ প্রাণঃ . অক্ষ্যোশ্চক্ষুঃ . কর্ণযোঃ
শ্রোত্রম্ . বাহুবোর্বলম্ . উরুবোরোজঃ . অরিষ্টা
বিশ্বান্যঙ্গানি তনূঃ . তনুবা মে সহ নমস্তে অস্তু মা মা
হিঁসীঃ .. ১..

ত্রিসপ্ততিতমোঽনুবাকঃ .
বযঃ সুপর্ণা উপসেদুরিন্দ্রং প্রিযমেধা ঋষযো নাধমানাঃ .
অপ ধ্বান্তমূর্ণুহি পূর্ধি চক্ষুর্মুমুগ্ধ্যস্মান্নিধযেব
বদ্ধান্ .. ১..

চতুঃসপ্ততিতমোঽনুবাকঃ .
প্রাণানাং গ্রন্থিরসি রুদ্রো মা বিশান্তকঃ .
তেনান্নেনাপ্যাযস্ব .. ১..

পঞ্চসপ্ততিতমোঽনুবাকঃ .
নমো রুদ্রায বিষ্ণবে মৃত্যুর্মে পাহি .. ১..

ষট্সপ্ততিতমোঽনুবাকঃ .
ত্বমগ্নে দ্যুভিস্ত্বমাশুশুক্ষণিস্ত্বমদ্ভ্যস্ত্বমশ্মনস্পরি .
ত্বং বনেভ্যস্ত্বমোষধীভ্যস্ত্বং নৃণাং নৃপতে জাযসে
শুচিঃ .. ১..

সপ্তসপ্ততিতমোঽনুবাকঃ .
শিবেন মে সংতিষ্ঠস্ব স্যোনেন মে সংতিষ্ঠস্ব
ব্রহ্মবর্চসেন মে
সংতিষ্ঠস্ব যজ্ঞস্যর্দ্ধিমনুসংতিষ্ঠস্বোপ তে যজ্ঞ নম
উপ তে
নম উপ তে নমঃ .. ১..

অষ্টসপ্ততিতমোঽনুবাকঃ .
সত্যং পরং পরঁ সত্যঁ সত্যেন ন
সুবর্গাল্লোহাচ্চ্যবন্তে কদাচন
সতাঁ হি সত্যং তস্মাত্সত্যে রমন্তে .. ১..
তপ ইতি তপো নানশনাত্পরং যদ্ধি পরং তপস্তদ্
দুর্ধর্ষং তদ্
দুরাধষ তস্মাত্তপসি রমন্তে .. ২..
দম ইতি নিযতং ব্রহ্মচারিণস্তস্মাদ্দমে রমন্তে .. ৩..
শম ইত্যরণ্যে মুনস্তমাচ্ছমে রমন্তে .. ৪..
দানমিতি সর্বাণি ভূতানি প্রশঁসন্তি দানান্নাতিদুষ্করং
তস্মাদ্দানে রমন্তে .. ৫..
ধর্ম ইতি ধর্মেণ সর্বমিদং পরিগৃহীতং
ধর্মান্নাতিদুশ্চরং
তস্মাদ্ধর্মে রমন্তে .. ৬..
প্রজন ইতি ভূযাঁসস্তস্মাত্ ভূযিষ্ঠাঃ প্রজাযন্তে তস্মাত্
ভূযিষ্ঠাঃ প্রজননে রমন্তে .. ৭..
অগ্নয ইত্যাহ তস্মাদগ্নয আধাতব্যাঃ .. ৮..
অগ্নিহোত্রমিত্যাহ তস্মাদগ্নিহোত্রে রমন্তে .. ৯..
যজ্ঞ ইতি যজ্ঞেন হি দেবা দিবং গতাস্তস্মাদ্যজ্ঞে রমন্তে ..
১০..
মানসমিতি বিদ্বাঁসস্তস্মাদ্বিদ্বাঁস এব মানসে রমন্তে
.. ১১..
ন্যাস ইতি ব্রহ্মা ব্রহ্মা হি পরঃ পরো হি ব্রহ্মা তানি বা
এতান্যবরাণি
তপাঁসি ন্যাস এবাত্যরেচযত্ য এবং বেদেত্যুপনিষত্ ..
১২..

একোনাশীতিতমোঽনুবাকঃ .
প্রাজাপত্যো হারুণিঃ সুপর্ণেযঃ প্রজাপতিং পিতরমুপসসার কিং
ভগবন্তঃ পরমং বদন্তীতি তস্মৈ প্রোবাচ .. ১..
সত্যেন বাযুরাবাতি সত্যেনাদিত্যো রোচতে দিবি সত্যং বাচঃ
প্রতিষ্ঠা সত্যে সর্বং প্রতিষ্ঠিতং তস্মাত্সত্যং পরমং
বদন্তি .. ২..
তপসা দেবা দেবতামগ্র আযন্ তপসার্ষযঃ সুবরন্ববিন্দন্
তপসা সপত্নান্প্রণুদামারাতীস্তপসি সর্বং প্রতিষ্ঠিতং
তস্মাত্তপঃ পরমং বদন্তি .. ৩..
দমেন দান্তাঃ কিল্বিষমবধূন্বন্তি দমেন ব্রহ্মচারিণঃ
সুবরগচ্ছন্ দমো ভূতানাং দুরাধর্ষং দমে সর্বং
প্রতিষ্ঠিতং তস্মাদ্দমঃ পরমং বদন্তি .. ৪..
শমেন শান্তাঃ শিবমাচরন্তি শমেন নাকং মুনযোঽন্ববিন্দন্
শমো ভূতানাং দুরাধর্ষং শমে সর্বং প্রতিষ্ঠিতং
তস্মাচ্ছমঃ পরমং বদন্তি .. ৫..
দানং যজ্ঞানাং বরূথং দক্ষিণা লোকে দাতারঁ
সর্বভূতান্যুপজীবন্তি দানেনারাতীরপানুদন্ত দানেন
দ্বিষন্তো মিত্রা ভবন্তি দানে সর্বং প্রতিষ্ঠিতং তস্মাদ্দানং
পরমং বদন্তি .. ৬..
ধর্মো বিশ্বস্য জগতঃ প্রতিষ্ঠা লোকে ধর্মিষ্ঠ প্রজা
উপসর্পন্তি ধর্মেণ পাপমপনুদতি ধর্মে সর্বং প্রতিষ্ঠিতং
তস্মাদ্ধর্মং পরমং বদন্তি .. ৭..
প্রজননং বৈ প্রতিষ্ঠা লোকে সাধু প্রজাযাস্তন্তুং তন্বানঃ
পিতৃণামনুণো ভবতি  তদেব তস্যানৃণং তস্মাত্ প্রজননং
পরমং বদন্তি .. ৮..
অগ্নযো বৈ ত্রযী বিদ্যা দেবযানঃ পন্থা গার্হপত্য ঋক্
পৃথিবী রথন্তরমন্বাহার্যপচনঃ যজুরন্তরিক্ষং
বামদেব্যমাহবনীযঃ সাম সুবর্গো লোকো বৃহত্তস্মাদগ্নীন্
পরমং বদন্তি .. ৯..
অগ্নিহোত্রঁ সাযং প্রাতর্গৃহাণাং নিষ্কৃতিঃ স্বিষ্টঁ
সুহুতং যজ্ঞক্রতূনাং প্রাযণঁ সুবর্গস্য লোকস্য
জ্যোতিস্তস্মাদগ্নিহোত্রং পরমং বদন্তি .. ১০..
যজ্ঞ ইতি যজ্ঞো হি দেবানাং যজ্ঞেন হি দেবা দিবং গতা
যজ্ঞেনাসুরানপানুদন্ত যজ্ঞেন দ্বিষন্তো মিত্রা ভবন্তি যজ্ঞে
সর্বং প্রতিষ্ঠিতং তস্মাদ্যজ্ঞং পরমং বদন্তি .. ১১..
মানসং বৈ প্রাজাপত্যং পবিত্রং মানসেন মনসা সাধু
পশ্যতি ঋষযঃ প্রজা অসৃজন্ত মানসে সর্বং প্রতিষ্ঠিতং
তস্মান্মানসং পরমং বদন্তি .. ১২..
ন্যাস ইত্যাহুর্মনীষিণো ব্রহ্মাণং ব্রহ্মা বিশ্বঃ কতমঃ
স্বযম্ভূঃ প্রজাপতিঃ সংবত্সর ইতি .. ১৩..
সংবত্সরোঽসাবাদিত্যো য এষ আদিত্যে পুরুষঃ স পরমেষ্ঠী
ব্রহ্মাত্মা .. ১৪..
যাভিরাদিত্যস্তপতি রশ্মিভিস্তাভিঃ পর্জন্যো বর্ষতি
পর্জন্যেনৌষধিবনস্পতযঃ প্রজাযন্ত ওষধিবনস্পতিভিরন্নং
ভবত্যন্নেন প্রাণাঃ প্রাণৈর্বলং বলেন তপস্তপসা শ্রদ্ধা
শ্রদ্ধযা মেধা মেধযা মনীষা মনীষযা মনো মনসা
শান্তিঃ শান্ত্যা চিত্তং চিত্তেন স্মৃতিঃ স্মৃত্যা স্মারঁ
স্মারেণ বিজ্ঞানং বিজ্ঞানেনাত্মানং বেদযতি তস্মাদন্নং
দদন্সর্বাণ্যেতানি দদাত্যন্নাত্প্রাণা ভবন্তি ভূতানাং
প্রাণৈর্মনো মনসশ্চ বিজ্ঞানং বিজ্ঞানাদানন্দো ব্রহ্ম যোনিঃ
.. ১৫..
স বা এষ পুরুষঃ পঞ্চধা পঞ্চাত্মা যেন সর্বমিদং
প্রোতং পৃথিবী চান্তরিক্ষং চ দ্যৌশ্চ
দিশশ্চাবান্তরদিশাশ্চ স বৈ সর্বমিদং জগত্স
সভূতঁ স ভব্যং জিজ্ঞাসক্লৃপ্ত ঋতজা রযিষ্ঠাঃ
শ্রদ্ধা সত্যো পহস্বান্তমসোপরিষ্টাত্ . জ্ঞাত্বা তমেবং
মনসা হৃদা চ ভূযো ন মৃত্যুমুপযাহি
বিদ্বান্ . তস্মান্ন্যাসমেষাং তপসামতিরিক্তমাহুঃ .. ১৬..
বসুরণ্বো বিভূরসি প্রাণে ত্বমসি সন্ধাতা ব্রহ্মন্ ত্বমসি
বিশ্বসৃত্তেজোদাস্ত্বমস্যগ্নেরসি বর্চোদাস্ত্বমসি সূর্যস্য
দ্যুম্নোদাস্ত্বমসি চন্দ্রমস উপযামগৃহীতোঽসি ব্রহ্মণে ত্বা
মহসে .. ১৭..
ওমিত্যাত্মানং যুঞ্জীত . এতদ্বৈ মহোপনিষদং দেবানাং
গুহ্যম্ . য এবং বেদ ব্রহ্মণো মহিমানমাপ্নোতি তস্মাদ্ব্রহ্মণো
মহিমানমিত্যুপনিষত্ .. ১৮..

অশীতিতমোঽনুবাকঃ .
তস্যৈবং বিদুষো যজ্ঞস্যাত্মা যজমানঃ শ্রদ্ধা পত্নী
শরীরমিধ্মমুরো বেদির্লোমানি বর্হির্বেদঃ শিখা হৃদযং যূপঃ
কাম আজ্যং মন্যুঃ পশুস্তপোঽঅগ্নির্দমঃ শমযিতা দানং
দক্ষিণা বাগ্ঘোতা প্রাণ উদ্গাতা চক্ষুরধ্বর্যুর্মনো ব্রহ্মা
শ্রোত্রমগ্নীত্ যাবদ্ধ্রিযতে সা দীক্ষা যদশ্নাতি
তদ্ধবির্যত্পিবতি তদস্য সোমপানং যদ্রমতে তদুপসদো
যত্সঞ্চরত্যুপবিশত্যুত্তিষ্ঠতে চ স প্রবর্গ্যো যন্মুখং
তদাহবনীযো যা ব্যাহৃতিরহুতির্যদস্য বিজ্ঞান তজ্জুহোতি
যত্সাযং প্রাতরত্তি তত্সমিধং যত্প্রাতর্মধ্যন্দিনঁ সাযং
চ তানি সবনানি যে অহোরাত্রে তে দর্শপূর্ণমাসৌ
যেঽর্ধমাসাশ্চ মাসাশ্চ তে চাতুর্মাস্যানি য ঋতবস্তে
পশুবন্ধা যে সংবত্সরাশ্চ পরিবত্সরাশ্চ তেঽহর্গণাঃ
সর্ববেদসং বা এতত্সত্রং যন্মরণং তদবভৃথ এতদ্বৈ
জরামর্যমগ্নিহোত্রঁসত্রং য এবং বিদ্বানুদগযনে প্রমীযতে
দেবানামেব মহিমানং গত্বাদিত্যস্য সাযুজ্যং গচ্ছত্যথ যো
দক্ষিণে প্রমীযতে পিতৃণামেব মহিমানং গত্বা চন্দ্রমসঃ
সাযুজ্যং গচ্ছত্যেতৌ বৈ সূর্যাচন্দ্রমসোর্মহিমানৌ ব্রাহ্মণো
বিদ্বানভিজযতি তস্মাদ্ ব্রহ্মণো মহিমানমিত্যুপনিষত্ .. ১..

ॐ শং নো মিত্রঃ শং বরুণঃ . শং নো ভবত্যর্যমা . শং
ন ইন্দ্রো বৃহস্পতিঃ . শং নো বিষ্ণুরুরুক্রমঃ .
নমো ব্রহ্মণে . নমস্তে বাযো . ত্বমেব প্রত্যক্ষং ব্রহ্মাসি .
ত্বামেব প্রত্যক্ষং ব্রহ্মাবাদিষম্ . ঋতমবাদিষম্
.সত্যমবাদিষম্ . তন্মামাবীত্ . তদ্বক্তারমাবীত্ .
আবীন্মাম্ . আবিদ্বক্তারম্ ..

ॐ সহনাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু . মা বিদ্বিষাবহৈ ..

ॐ   শান্তিঃ   শান্তিঃ   শান্তিঃ  ..

ইতি মহানারাযণোপনিষত্সমাপ্তা ..